مشروع منهاج زادك

جمعیۃ الدعوہ والارشاد و توعیۃ الجالیات، روضہ

دین سے آگاہی

پہلا مرحلہ

پیش لفظ

سب تعریف اللہ تعالی کے لیے ہے، جس نے انسان کو پیدا کیا، اسے علم و بیان کے ذریعہ عزت بخشى اور قرآن و سنت کے ذریعے اس پر حجت قائم کر دی۔

درود و سلام ہو ہمارے نبی محمد صلی اللہ علیہ و سلم پر، آپ کے اہل و عیال، صحابۂ کرام اور ہر اس شخص پر جو قیامت تک بحسن وخوبی ان کی اتباع کرے گا۔

امابعد! اس بات میں کسی شک و شبہ کی گنجائش نہيں ہے کہ بندے پر عمل سے پہلے علم حاصل کرنا عظیم واجبات میں سے ہے۔ اللہ تعالی نے فرمایا ہے : "تو آپ اس کا یقین رکھیے کہ بجز اللہ کے کوئی معبود برحق نہیں اور اپنی خطا کی معافی مانگتے رہیے اور سارے ایمان والوں اور ایمان والیوں کے لیے بھی، اور اللہ خوب خبر رکھتا ہے تم (سب) کے چلنے پھرنے اور رہنے سہنے کی۔"

[سورۂ محمد : 19]

دراصل شرعی علم اس امت کی اہم ترین امتیازات میں سے ایک امتیاز اور اسلامی شخصیت کے اہم ترین عناصر میں سے ایک عنصر ہے۔

علم کی اہمیت کے پیش نظر، جس کے چشمے سے جمعیۃ الدعوہ و توعیۃ الجالیات روضہ کا فیض جاری ہے اور وہ لوگوں کو حکمت کے ساتھ اور تبلیغ کے بہترین طریقوں کو بروئے کار لاتے ہوئے لوگوں کو اسلام کی دعوت دینے اورغيرملكي کمیونٹیز کی تعلیم اور ان کو شرعی اعتبار سے اہل بنانے کے مقصد سے کیے گئے پروگراموں، جیسے "دین سے آگاہی" کا پروگروام، جو غير ملكي کمیونٹیز کے لیے سات زبانوں میں شرعی کورسیز فراہم کرتا ہے، کے توسط سے مسلمانوں کے اندر دینی بیداری لانے کے کام میں مشغول ہے۔ اس پروجیکٹ (منصوبے) کو تیار کرنے کے لیے جمعیہ مذکورہ نے "بصائر للاستشارات التربوية" نامی کمپنی سے رابطہ کیا، جو شرعی تعلیم کے نصاب کو بہتر سے بہتر بنانے کا کام کرتی ہے۔ چنانچہ جمعیہ کی جانب سے فراہم کردہ مواد کی بنیاد پر اس نصابی دستاویز کو تیار کرنے پر اتفاق عمل میں آیا اور پھر درج ذیل مراحل کے مطابق طلبہ کے لیے کتابیں تالیف کی گئیں :

- پہلا مرحلہ، جو چالیس (40) اسباق پر مشتمل ہے۔

-دوسرا مرحلہ، جو تیس (30) اسباق پر مشتمل ہے۔

- تیسرا مرحلہ، جو تیس (30) اسباق پر مشتمل ہے۔

متعلم کے لیے تیار کی گئی ہر کتاب کے مقابلے میں معلم کے لیے بھی ایک رہنما کتاب تیار کی گئی ہے، جو مؤثر تعلیمی اور تربیتی طریقے پر درس پیش کرنے میں معین و مددگار ثابت ہو گی۔ نصابی دستاویز مرتب کرنے، متعلمین کے لیے کتابیں تالیف کرنے اور معلمین کے لیے گائیڈ تیار کرنے کا عمل بڑے ہی علمی انداز میں انجام پایا ہے اور بڑی باریک بینی کے ساتھ مراجعہ کیا گیا ہے۔ یہ کام شرعی تعلیمی نصاب کے ماہرین کی ایک جماعت نے کیا ہے۔

اخیر میں دعا ہے کہ اللہ اس عمل کو اسلام اور مسلمانوں کے لیے نفع بخش بنائے اور اس میں شریک ہونے والے ہر شخص کو بہتر بدلہ عطا کرے اور جنت سے نوازے۔ اس نصاب تعلیم کے بارے میں سوشل میڈیا اکاؤنٹس اور جمعیہ کے فون نمبروں کے ذریعہ موصول ہونے والی آپ کی کارآمد تجاویز اور آرا کا پرجوش خیر مقدم ہے۔

درود وسلام نازل ہو ہمارے نبی محمد ﷺ اور آپ ﷺ کے آل واصحاب پر۔

جمعیۃ الدعوہ، روضہ

مقدمہ

سب تعریف اللہ کے لیے ہے، جو سارے جہانوں کا رب ہے۔ درود و سلام ہو ہمارے نبی محمد صلی اللہ علیہ و سلم، آپ کے اہل بیت اور تمام ساتھیوں پر۔

اما بعد!

عزیز طالبِ علم! نصاب کی پہلی کتاب آپ کے سامنے ہے۔ اس تعلیمی نصاب کی پہلی کتاب، جس کا مقصد مسلمان کو دین سے متعلق ضروری باتیں سکھانا، ایک مضبوط اسلامی ثقافت کی بنیاد رکھنا اور اسلامی تربیت کے مطابق طالب علم کی شخصیت کی تعمیر کرنا ہے۔

اس کتاب کو شرعی علوم کے مختلف شعبوں کے مد نظر مختلف تعلیمی اکائیوں میں تقسیم کر دیا گیا ہے، جو اس طرح ہيں :

- اکائی : قرآن اور تفسیر : اس اکائی کے اندر قرآن کریم کا مقام و مرتبہ، سورہ فاتحہ اور کچھ چھوٹی چھوٹی سورتوں کی مختصر تفسیر اور ان سورتوں کی آیتوں سے حاصل ہونے والے کچھ اہم ترین علمی اور تربیتی فوائد بیان کيے گئے ہيں۔

- اکائي : ایمان اور تزکیہ : اس میں ایمان کی اہمیت، اس کے ارکان اور اس کے ہر رکن کے ایک مسلمان کے عقیدے، برتاؤ اور زندگی کے بارے میں اس کے نظریے پر پڑنے والے اثرات کا خلاصہ پیش کیا گیا ہے۔

- اکائی : سنت اور شمائل نبویہ : اس میں اللہ کے نبی صلی اللہ علیہ و سلم کا مختصر تعارف اور آپ کے اہم اوصاف و خصائص کا ذکر کیا گيا ہے، تاکہ سیکھنے والے کے دل و دماغ میں آپ کے مقام و مرتبے کو بٹھایا جا سکے اور اسے آپ کے اتباع پر آمادہ کیا جا سکے۔ بعد ازاں آپ صلی اللہ علیہ و سلم کی چار حدیثوں کا مطالعہ پیش کیا گیا ہے، جو قرآن پڑھنے کی فضیلت، گناہوں کے مٹانے والے اہم اعمال، اللہ سے حسن ظن رکھنے کے آثار اور کچھ ایسے لوگوں کے بیان پر مشتمل ہے، جن پر اللہ قیامت کے دن کے ہولناک حالات میں ان پر رحم فرمائے گا۔

- اکائی : فقہ الاحکام : اس میں طہارت اور نماز سے متعلق وہ اہم ترین باتیں بیان کی گئی ہیں، جن کا سیکھنا ایک مسلمان پر فرض ہے۔ جیسے :

وضو، غسل اور نماز کا طریقہ۔

- اکائی : اسلامی آداب : اس میں شب و روز کے اہم آداب، جیسے کھانے پینے، اجازت طلبی، گفتگو، مجلس اور قضائے حاجت وغیرہ کے آداب بیان کیے گئے ہیں۔

ہم نے ان کتابوں کو علمی اصولوں اور جدید تربیتی معیاروں کے مطابق تیار کرنے کی کوشش کی ہے۔

ان کی تیاری میں ہم نے درج ذیل باتوں کا خاص خیال رکھا ہے :

طالبِ علم (متعلم) کی دل چسپی بڑھانے کے لیے -ضرورت محسوس ہونے پر- سبق کا آغاز ایک مختصر تمہید سے کیا گیا ہے۔

ایسی تصاویر اور مفہوم کو واضح کرنے والے نقشے دیے گئے ہيں، جو علمی مشمولات کے استیعاب میں مددگار ہوں۔

ہر سبق فعال انداز میں سیکھنے کی حکمت عملیوں کے مطابق تربیتی مقاصد کے حصول کے لیے تعلیمی سر گرمى پر مشتمل ہے۔

ان عملی کاموں کے سلسلے میں ہم نے درج ذیل باتوں کا خاص خیال رکھا ہے :

سبجیکٹ سے مربوط ہونے کے ساتھ ساتھ, یہ عملی کام سبق کے مقاصد کے حصول کے سلسلے میں مشمولات سے مکمل طور سے ہم آہنگ ہیں۔

شخصیت کے مختلف پہلؤوں کو پروان چڑھانا اور نوع بہ نوع صلاحیتوں کو فروغ دینا۔

انھیں کرنے کے طریقے میں بھی تنوع سے کام لیا گیا ہے۔ کچھ عملی کام انفرادی طور پر کرنے کے ہیں اور کچھ اجتماعی طور پر۔ انھیں کرنے کی جگہ میں بھی تنوع رکھا گیا ہے۔ کچھ کلاس روم میں کرنے کے ہیں، تو کچھ کلاس روم سے باہر۔

ان کی شکلوں اور صورتوں میں بھی تنوع رکھا گیا ہے۔ کچھ تحریر ہیں، کچھ زبانی ہيں، کچھ اشاراتی ہیں اور کچھ دماغی۔

ہر سبق کے آخر میں سوالات دیے گئے ہيں، تاکہ اس بات کا اندازہ لگایا جا سکے کہ سبق کا استیعاب کہاں تک ہوا اور اس کے مقاصد کہاں تک حاصل ہوئے؟

اس کتاب کو پیش کرتے ہوئے ہمیں امید ہے کہ یہ کتاب علمی مواد کو آسان اور واضح انداز میں سامنے رکھنے،

کارگر عملی کام ترتیب دینے اور جانچنے کا جامع انداز اپنانے کی اپنی کوشش میں کامیاب ہوئے ہيں۔

دعا ہے کہ اللہ تعالی ہماری اس کوشش کو طلبہ کے لیے مفید بنائے اور شرف قبول عطا کرے۔ بے شک وہ سب کچھ سننے اور جاننے والا ہے۔

درود و سلام نازل ہو ہمارے نبی محمد ﷺ اور آپ ﷺ کے تمام اہل بیت اور ساتھیوں پر۔

بصائر للاستشارات التربوية والتعليمية

- اکائی : قرآن اور تفسیر :

پہلا سبق : قرآن کریم کا مقام و مرتبہ

سبق کے مقاصد:

عزیز طالب علم! اس سبق کے بعد آپ سے یہ توقع ہوگی کہ آپ:

1- قرآن کریم کے مقام و مرتبہ کی نشان دہی کر سکیں گے۔

2- اہل قرآن کی تکریم کے مظاہر کو گنوا سکیں گے۔

3- قرآن کریم کی تعظیم کريں گے۔

4- قرآن اور اہل قرآن سے محبت رکھيں گے۔

قرآن مقام و مرتبے کے لحاظ سے سب سے عظیم آسمانی کتاب ہے۔ یہ اللہ تعالی کا کلام ہے، در اصل اللہ تعالی نے قرآن مجید کو مخلوق کی ہدایت کے لیے ہمارے نبی محمد صلی اللہ علیہ و سلم پر اتارا ہے۔ قرآن خود ایک معجزہ ہے۔ کوئی بھی اس جیسی کتاب تالیف نہيں کر سکتا۔

قرآن کریم کا مقام و مرتبہ :

قرآن کریم اللہ تعالی کا کلام ہے

قرآنِ کریم کا اعجاز

قرآن کریم نور و ہدایت ہے

اللہ تعالی کی جانب سے قرآن کریم کی حفاظت کا انتظام

دنیا اور آخرت میں اہل قرآن کی عزت افزائی

1- قرآن کریم اللہ کا کلام ہے :

یہی وجہ ہے کہ قرآن سب سے اشرف اور سب سے عظیم کلام ہے۔ اس کی عظمت کی ایک دلیل یہ ہے کہ قرآن سننے اور سمجھنے والے کے دل پر گہرا اثر ڈالتا ہے۔

2- قرآن کریم کا اعجاز :

قرآن کریم، اللہ کے نبی صلی اللہ علیہ و سلم کا سب سے بڑا معجزہ ہے۔ اللہ تعالی نے جنوں اور انسانوں کو اس جیسی کتاب پیش کرنے کا چیلنج کیا تھا، لیکن وہ ایسا کرنے سے قاصر رہے۔ اللہ تعالی نے فرمایا ہے : "کہہ دیجیے کہ اگر تمام انسان اور کل جنات مل کر اس قرآن کے مثل ﻻنا چاہیں تو ان سب سے اس کے مثل ﻻنا نا ممکن ہے، گو وه (آپس میں) ایک دوسرے کے مددگار بھی بن جائیں"۔ (سورہ اسرا : 88)

بعد ازاں ان کو دس سورتیں پیش کرنے کا چیلنج کیا، لیکن کسی سے کچھ نہ ہو سکا۔ اخیر میں ایک ہی سورہ پیش کرنے کا چیلنج کیا، لیکن وہ اس کو بھى پورا نہ کرسکے۔

3- قرآنِ کریم سارے جہاں کے لوگوں کے لیے کتابِ ہدایت ہے :

اللہ نے قرآن کو اپنی شریعت بیان کرنے والی اور لوگوں کے لیے ہدایت اور رحمت پر مبنی کتاب بنا کر اتارا ہے۔ اللہ تعالی نے کہا ہے : "اور ہم نے تجھ پر یہ کتاب نازل فرمائی ہے، جس میں ہر چیز کا شافی بیان ہے اور ہدایت اور رحمت اور خوش خبری ہے مسلمانوں کے لیے"۔ (سورہ نحل : 89)

4- اللہ کی جانب سے قرآن کریم کی حفاظت :

اللہ تعالی نے قرآن کریم کو یہ خصوصیت عطا کی ہے کہ تورات اور انجیل کی طرح اس میں تحریف نہيں ہو سکتی۔ اس کی ذمے داری اللہ نے خود لے رکھی ہے۔ اللہ کا فرمان ہے : "ہم نے ہی اس ذکر (قرآن) کو نازل فرمایا ہے اور ہم ہی اس کے محافظ ہیں۔" (سورہ حجر : 9)

5- دنیا اور آخرت میں اہلِ قرآن کی عزت افزائی :

اہل قرآن سے مراد قرآن پڑھنے اور حفظ کرنے والے، اس کی تفسیر اور اس کے علوم کے رمز شناس اور اس کے احکامات پر عمل کرنے والے لوگ ہيں۔ اللہ نے اہل قرآن کو دنیا میں اونچا مقام اور آخرت میں کامیابی عطا کی ہے۔

چنانچہ اہل قرآن اس امت کے سب سے بہتر لوگ ہيں۔ اللہ کے نبی صلی اللہ علیہ و سلم نے فرمایا ہے : ”تم میں سب سے بہتر شخص وہ ہے، جو قرآن سیکھے اور اسے سکھائے“۔ (صحیح بخاری : 5027)

قرآن قیامت کے دن اہل قرآن کے حق میں شفارش کرے گا۔ اللہ کے نبی صلی اللہ علیہ و سلم نے فرمایا ہے : "قرآن پڑھا کرو، کیوں کہ قرآن قیامت کے دن اہل قرآن کا سفارشی بن کر آئے گا۔" (صحیح مسلم : 804)

سرگرمیاں

سرگرمی (1) : میں تلاش کروں گا اور چارٹ بناؤں گا :

قرآن میں شرف واعزاز کے تمام وجوہ اکٹھا ہیں, اپنے معلم کی نگرانی میں ان کو جمع کریں۔ بعد ازاں ان کو نیچے دیے گئے چارٹ میں درج کریں :

اعزاز

مکانی اعزاز

زمانی اعزاز

وہ زبان جس میں قرآن اترا ہے

قرآن ساتھ لے کر اترنے والا فرشتہ

وہ رسول جس پر قرآن اتارا گیا ہے

اس کی وضاحت قرآن اترنے کا آغاز اللہ کے حرمت والے شہر مکہ مکرمہ میں ہوا۔ قرآن اترنے کا آغاز ماہ رمضان میں ہوا۔ قرآن عربی زبان میں اترا، جو کہ اہل جنت کی زبان ہے۔ وہ فرشتہ (جو قرآن لے کر آئے) جبریل علیہ السلام ہیں۔ (جس رسول پر قرآن نازل ہوا وہ) آخری رسول محمد صلی اللہ علیہ و سلم ہیں۔ امت اسلامیہ، جو کہ سب سے بہترین امت ہے اور جسے لوگوں کے لیے پیدا کیا گیا ہے۔

سرگرمی (2) : میں غور کروں گا اور جواب دوں گا :

نبی ﷺ کا ارشادِ گرامی ہے: "جو لوگ اللہ کے کسی گھر میں اللہ کی کتاب پڑھنے اور پڑھانے کے لیے جمع ہوتے ہیں، تو ان پر اللہ تعالیٰ کی سکینت اترتی ہے، رحمت ان کو ڈھانپ لیتی ہے، فرشتے ان کو گھیر لیتے ہیں اور اللہ تعالیٰ ان لوگوں کا ذکر اپنے پاس رہنے والوں (یعنی فرشتوں) میں کرتا ہے"۔ (صحیح مسلم : 2699) حدیث پر غور کرنے کے بعد درج ذیل سوالوں کے جواب دیں :

1- اس حدیث سے قرآن کی تلاوت اور اسے سیکھنے کی فضیلت معلوم کیجیے۔

الف) فرشتوں کا اترنا اور قرآن کی مجلسوں میں حاضر ہونا۔

ب) قرآن پڑھنے والوں پر سکینت اور رحمت کا اترنا۔

ج) اللہ تعالی قرآن پڑھنے والوں کا ذکر آسمان میں کرتا ہے۔

2- اپنے ساتھی کے ساتھ تلاوت قرآن کے تین آداب اور اسے سیکھنے کی مجلسوں کے بارے میں چرچا کریں۔

تلاوت کے وقت وضو کر لینا۔ پرسکون اور باوقار انداز میں بیٹھنا۔ خشوع کا مظاہرہ کرنا اور غور و فکر سے کام لینا۔

اندازۂ قدر

سوال 1 : صحیح عبارت کے سامنے صحیح (✓) اور غلط عبارت کے سامنے غلط (×) کا نشان لگائیں :

1- قرآن کریم ماہ شعبان میں اترا۔ (×)

2- قرآن پڑھنے والوں پر سکینت اور رحمت اترتی ہے۔

3- قرآن قیامت کے دن اسے پڑھنے اور اس پر عمل کرنے والوں کے لیے سفارش کرے گا۔

4- جنات قرآن جیسی کتاب پیش کر سکتے ہيں۔ (×)

5- قرآن ہدایت اور خیر پر مشتمل ہے، کیوں کہ وہ اللہ کا کلام ہے۔

سوال 2 : نیچے دیے گئے دونوں نصوص کو پورا کریں:

1- اللہ تعالی کا فرمان ہے : "إِنَّا نَحۡنُ نَزَّلۡنَا ٱلذِّكۡرَ وَإِنَّا لَهُۥ لَحَٰفِظُونَ..................."۔

2- نبی صلی اللہ علیہ و سلم کا فرمان ہے : "خَيْرُكُمْ مَنْ تَعَلَّمَ القُرْآنَ و................"

سوال 3 : قرآن کریم سے اپنی عقیدت اور اہل قرآن سے اپنی محبت کا تین فقروں میں اظہار کریں۔

دوسرا سبق : سورہ فاتحہ کی تفسیر

سبق کے مقاصد:

عزیز طالب علم! اس سبق کے بعد آپ سے یہ توقع ہوگی کہ آپ :

1۔ سورہ فاتحہ کی آیتوں کی مختصر تفسیر کر سکیں گے۔

2- سورہ فاتحہ کی آیتوں سے حاصل ہونے والے کچھ فوائد بتا سکیں گے۔

3- سورہ فاتحہ کی قدر و قیمت کو جان سکیں گے۔

سور ۂ فاتحہ

شروع کرتا ہوں اللہ تعالیٰ کے نام سے جو بڑا مہربان نہایت رحم واﻻ ہے۔ سب تعریف اللہ تعالیٰ کے لیے ہے، جو تمام جہانوں کا رب ہے۔ بڑا مہربان نہایت رحم کرنے واﻻ۔ بدلے کے دن (یعنی قیامت) کا مالک ہے۔ ہم صرف تیری ہی عبادت کرتے ہیں اور صرف تجھ ہی سے مدد چاہتے ہیں۔ ہمیں سیدھی راه دکھا۔ ان لوگوں کی راه جن پر تو نے انعام کیا، ان کی نہیں جن پر غضب کیا گیا (یعنی وه لوگ جنہوں نے حق کو پہچانا، مگر اس پر عمل پیرا نہیں ہوئے) اور نہ گمراہوں کی (یعنی وه لوگ جو جہالت کے سبب راه حق سے برگشتہ ہوگئے)۔ [سورہ فاتحہ : 1-7]

توضیح وتفسیر :

سورہ فاتحہ قرآن کریم کی عظیم ترین سورت ہے۔ اس میں توحید اور اللہ کی عبادت سے متعلق بنیادی باتیں بیان کی گئی ہیں۔

"بِسمِ ٱللَّهِ" میں اللہ کے نام سے قرآن کریم کی تلاوت کا آغاز کرتا ہوں۔ اللہ کی مدد طلب کرتے ہوئے اور اس کے نام کے ذکر کی برکت حاصل کرتے ہوئے۔

"ٱلرَّحمَٰنِ" تمام مخلوقات کو شامل عام رحمت کا حامل۔

"ٱلرَّحِيمِ" اپنے مؤمن بندوں کے ساتھ رحم و کرم کا معاملہ کرنے والا۔

"ٱلحَمدُ لِلَّهِ" شکر اور اچھی تعریف اللہ تعالی ہی کے لیے سزاوار ہے۔

"رَبِّ ٱلعَٰلَمِينَ" جو ہمارے اس جہان اور دیگر تمام جہانوں کی دیکھ بھال کرتا ہے۔

"مَٰلِكِ يَومِ ٱلدِّينِ" جو قیامت کے دن تنہا حساب لینے اور بدلہ دینے کا مالک ہوگا۔

"إِيَّاكَ نَعبُدُ وَإِيَّاكَ نَستَعِينُ" ہم صرف تیری ہی عبادت کرتے ہیں، کسی کو تیرا شریک نہيں ٹھہراتے اور سارے کاموں میں تجھ ہی سے مدد طلب کرتے ہيں۔

"ٱهدِنَا ٱلصِّرَٰطَ ٱلمُستَقِيمَ" ہمیں صحیح راستہ دکھا۔ یعنی اسلام اور اس کی تعلیمات پر عمل کا راستہ۔

"صِرَٰطَ ٱلَّذِينَ أَنعَمتَ عَلَيهِم" ان لوگوں کا راستہ، جنھیں اللہ نے اسلام کی راہ دکھائی۔ یعنی نبیوں اور ان کے پیروکاروں کا راستہ۔

غَيرِ ٱلمَغضُوبِ عَلَيهِم" ان لوگوں کا راستہ نہیں، جنھوں نے حق کو پہجاننے کے باوجود اسے نہیں مانا۔ جیسے یہود۔

"وَلَا ٱلضَّآلِّينَ" اور نہ ہی ان لوگوں کا راستہ جو حق سے عدم واقفیت کی بنیاد پر گمراہ ہو گئے۔ جیسے نصاری۔

سورہ فاتحہ کے کچھ فضائل :

سورہ فاتحہ کو نماز میں پڑھنا واجب ہے۔ یہ قرآن کی سب سے عظیم اور سب سے زیادہ فضیلت والی سورت ہے۔ اس کی فضیلت کے بارے میں جو کچھ آیا ہے، اس میں سے ایک اللہ کے رسول صلی اللہ علیہ و سلم کا یہ فرمان ہے : "اللہ تعالی نے کہا ہے : میں نے نماز کو اپنے اور اپنے بندے کے درمیان آدھا آدھا بانٹ دیا ہے اور میرے بندے کے لیے وہ سب کچھ ہے، جو وہ مانگے۔ جب بندہ {الْحَمْدُ لِلهِ رَبِّ الْعَالَمِينَ} کہتا ہے، تو اللہ تعالی کہتا ہے کہ میرے بندے نے میری حمد کی۔ جب بندہ {الرَّحْمَنِ الرَّحِيمِ} کہتا ہے، تو اللہ تعالی کہتا ہے کہ میرے بندے نے میری ثنا کی۔ جب بندہ {مَالِكِ يَوْمِ الدِّينِ} کہتا ہے، تو اللہ تعالی کہتا ہے کہ میرے بندے نے میری بڑائی بیان کی۔ اور ایک دفعہ فرمایا : میرے بندے نے اپنے سارے کاموں کو میرے حوالے کر دیا۔- جب بندہ {إِيَّاكَ نَعْبُدُ وَإِيَّاكَ نَسْتَعِينُ} کہتا ہے تو اللہ تعالی کہتا ہے کہ یہ میرے اور میرے بندے کے درمیان ہے اور میرے بندے کے لیے وہ سب کچھ ہے، جو وہ مانگے۔ پھر جب بندہ {اهْدِنَا الصِّرَاطَ الْمُسْتَقِيمَ، صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلا الضَّالِّينَ} کہتا ہے، تو اللہ تعالی کہتا ہے کہ یہ میرے لیے ہے اور میرے بندے کے لیے وہ سب کچھ ہے، جو وہ مانگے۔" (صحیح مسلم : 395)

مذکورہ بالا آیتوں سے حاصل ہونے والے کچھ فوائد :

1- ہر اچھی چیز، جیسے پڑھنے، کوئی کام کرنے اور کھانے پینے وغیرہ کو اللہ کے نام سے شروع کرنا چاہیے۔

2-۔ اللہ کی رحمت سے اس کی ساری مخلوقات عمومی طور پر اور اس کے مؤمن بندے خصوصی طور پر فیض یاب ہوتے ہیں۔

3- قیامت کے دن کے لیے، جو کہ بدلے کا دن ہے، تیاری کرنا ضروری ہے۔

4- اللہ کے سوا کسی اور کی عبادت جائز نہیں ہے۔

5۔ انبیا کی پیروی اور اہل کفر کے راستوں سے گریز کرنا واجب ہے۔

سرگرمیاں

سرگرمی (1) : میں غور کروں گا اور جوڑوں گا :

آیت اور اس سے حاصل ہونے والے معنی کے مابین تعلق جوڑیں :

آیت

معنی

"ٱلۡحَمۡدُ لِلَّهِ رَبِّ ٱلۡعَٰلَمِينَ ۔"

اللہ کے اچھے اچھے نام ہيں۔

"ٱلرَّحۡمَٰنِ ٱلرَّحِيمِ"۔

اللہ ہی اکیلے عبادت کا مستحق ہے۔

"إِيَّاكَ نَعۡبُدُ وَإِيَّاكَ نَسۡتَعِينُ۔"

اللہ ہی اکیلے ساری کائنات کا رب ہے۔

سرگرمی (2) : میں پڑھوں گا اور جوڑوں گا :

اللہ کے نبی صلی اللہ علیہ و سلم نے معاذ بن جبل رضی اللہ عنہ کو ہر نماز کے بعد یہ دعا پڑھنے کی وصیت کی : ’’”اے اللہ! اپنے ذکر، شکر اور اپنی بہترین عبادت کے سلسلہ میں میری مدد فرما۔‘‘

سورہ فاتحہ کی کون سی آیت اس معنی پر دلالت کرتی ہے؟

اندازۂ قدر

سوال 1 : کالم (الف) میں دیے گئے ہر لفظ کو کالم (ب) میں دیے گئے اس کے معنی کے ساتھ جوڑیں :

کالم : (الف) "ٱلرَّحمَٰنِ" "ٱلرَّحِيمِ" "ٱلمَغضُوبِ عَلَيهِم" "ٱلضَّآلِّينَ" "ٱهدِنَا" کالم : (ب)

ایسے لوگ جنھوں نے حق کو جاننے کے باوجود اسے نہيں مانا۔

جو اپنے مؤمن بندوں پر رحم کرتا ہے۔

ہماری رہ نمائی فرما۔

وہ جس کی رحمت ساری مخلوقات کو محیط ہے۔

ایسے لوگ جنھوں نے اللہ تعالی کی عبادت جہالت اور گمراہی کے ساتھ کی۔

سوال 2 : درج ذیل معانی پر دلالت کرنے والی آیات کریمہ لکھیے :

1- اللہ کی وسیع رحمت۔

2۔ نبیوں اور اللہ کے نیک بندوں کے راستے پر چلنا واجب و ضروری ہے۔

سوال 3 : اللہ تعالی کے اس قول سے جو فائدہ حاصل ہوتا ہے، اسے بیان کریں : "إِيَّاكَ نَعۡبُدُ وَإِيَّاكَ نَسۡتَعِينُ" ۵

تیسرا سبق : سورہ "الکوثر" اور سورہ " الکافرون" کی تفسیر

سبق کے مقاصد :

عزیز طالب علم! اس سبق کے بعد آپ سے یہ توقع ہوگی کہ آپ:

1- آپ ان دونوں سورتوں کی آیتوں کی مختصر تفسیر کر سکیں گے۔

2- اللہ کے نبی صلی اللہ علیہ و سلم کی فضیلت بیان کر سکیں گے۔

3- کفر اور اہل کفر سے براءت کا اظہار کریں گے۔

4- ان آیتوں سے حاصل ہونے والے فوائد کو بیان کر سکیں گے۔

سورۂ کوثر

شروع کرتا ہوں اللہ تعالیٰ کے نام سے جو بڑا مہربان نہایت رحم واﻻ ہے۔

"یقیناً ہم نے تجھے (حوض) کوﺛر (اور بہت کچھ) دیا ہے." ١ "پس تو اپنے رب کے لیے نماز پڑھ اور قربانی کر." ۲

"یقیناً تیرا دشمن ہی ﻻ وارث اور بے نام ونشان ہے." (سورۂ کوثر : 1-3)

توضیح وتفسیر :

سورۂ کوثر اللہ کے نبی صلی اللہ علیہ و سلم کی فضیلت اور دنیا و آخرت میں آپ کا مقام و مرتبہ بیان کرتی ہے۔

"إِنَّآ أَعطَينَكَ ٱلكَوثَرَ" اللہ تعالی نے ہمارے نبی محمد صلی اللہ علیہ و سلم کو دنیا اور آخرت کی بہت سی اچھی اچھی چیزیں عطا کی ہیں، جن میں سے ایک بہت ہی اچھی چیز جنت کی نہر کوثر ہے۔

"فَصَلِّ لِرَبِّكَ وَٱنحَر"۔ لہذا اس کے شکر کے طور پر اللہ کے لیے نماز قائم کریں اور اپنے ذبیحہ کو اللہ کے لیے ذبح کریں اور اس میں کسی کو اس کا شریک نہ ٹھہرائیں۔

"إِنَّ شَانِئَكَ هُوَ ٱلأَبتَرُ "۔ بلاشبہ آپ سے حسد اور بغض رکھنے والا ہی دنیا وآخرت میں بے نام و نشان اور خیر سے محروم ہے۔

سورۂ کافرون

شروع کرتا ہوں اللہ تعالیٰ کے نام سے جو بڑا مہربان نہایت رحم واﻻ ہے۔

"آپ کہہ دیجیے کہ اے کافرو! ۱ نہ میں عبادت کرتا ہوں اس کی جس کی تم عبادت کرتے ہو. ۲

اور نہ تم اس کی عبادت کرنے والے ہو جس کی میں عبادت کر رہا ہوں. ۳ اور نہ میں اس کی عبادت کروں گا جس کی تم عبادت کرتے ہو. ٤

اور نہ تم اس کی عبادت کرنے والے ہو جس کی میں عبادت کر رہا ہوں. ۵ تمہارے لیے تمہارا دین ہے اور میرے لیے میرا دین ہے. ٦ (سورۂ کافرون : 1-6)

توضیح وتفسیر :

قرآن کی یہ سورت اس بات کو بڑی مضبوطی کے ساتھ بیان کرتی ہے کہ عبادت صرف اللہ تعالی کی ہوگی اور کفر و اہل کفر سے براءت ضروری ہے۔

"آپ کہہ دیجیے کہ اے کافرو! ۱ نہ میں عبادت کرتا ہوں اس کی جس کی تم عبادت کرتے ہو. ۲ اے محمد! آپ کافروں سے کہہ دیں : میں ان بتوں کی عبادت نہيں کرتا، جن کی عبادت تم کرتے ہو۔

اور نہ تم اس کی عبادت کرنے والے ہو جس کی میں عبادت کر رہا ہوں. ۳ اور نہ تم اس کی عبادت کرنے والے ہو، جس کی میں عبادت کر رہا ہوں۔ میں تو بس ایک اللہ کی عبادت کرتا ہوں جو عبادت کا مستحق ہے اور کسی کو اس کا شریک نہیں ٹھہراتا۔

اور نہ میں عبادت کروں گا اس کى جس کی تم عبادت کرتے ہو. ٤ میں ہرگز ان بتوں کی پوجا نہیں کروں گا، جن کی پوجا تم لوگ کرتے ہو۔

اور نہ تم اس کی عبادت کرنے والے ہو جس کی میں عبادت کر رہا ہوں. ۵ تمہارے لیے تمہارا دین ہے اور میرے لیے میرا دین ہے. ٦ تمھارے لیے تمھارا دین ہے، جس پر تم کو اصرار ہے۔ میں اس سے بری ہوں۔ جب کہ میرے لیے میرا دین ہے، جسے اللہ نے مجھ پر اتارا ہے اور میں اس میں کوئی تبدیلی کرنے کا مجاز نہیں ہوں۔

مذکورہ بالا آیتوں سے حاصل ہونے والے کچھ فوائد :

1- اللہ تعالی کی بارگارہ میں نبی کریم صلی اللہ علیہ و سلم کا عظیم مقام و مرتبہ۔

2- اللہ دنیا میں اپنے نبی صلی اللہ علیہ و سلم کا دفاع کرتا ہے۔

3- اللہ تعالی نے اپنے نبی صلی اللہ علیہ و سلم کو جنت میں نہر کوثر عطا کی ہے۔

4- ذبح کرنا ایک عبادت ہے، جسے صرف اللہ وحدہ کے لیے کرنا ضروری ہے۔

5- ایک مسلمان پر واجب ہے کہ وہ اسلام سے اپنی نسبت کو باعث افتخار سمجھے۔

6- ایک مسلمان پر واجب ہے کہ ان چیزوں سے اپنی براءت کا اعلان کر دے، جن کی عبادت کفار کرتے ہیں۔

7- ایک مسلمان پر واجب ہے کہ وہ صرف ایک اللہ کی عبادت کرے۔

سرگرمیاں

سرگرمی (1) : میں غور کروں گا اور توقع رکھوں گا :

اللہ کے رسول صلی اللہ علیہ و سلم نے فرمایا ہے : "کوثر جنت کی ایک نہر ہے۔ اس کے دونوں کنارے سونے کے ہیں، اس کا پانی موتی اور یاقوت پر بہتا ہے، اس کی مٹی مشک سے زیادہ پاکیزہ ہے اور اس کا پانی شہد سے زیادہ میٹھا اور برف سے زیادہ سفید ہے۔" (سنن ترمذی : 3361، سنن ابن ماجہ : 4334)

اس حدیث پر اور اس میں بیان کی گئی اللہ کے نبی صلی اللہ علیہ و سلم اور آپ کی امت کی فضیلت پر غور کریں اور پھر ان لوگوں کى صفات کا توقع رکھیں، جن کو اللہ تعالی جنت میں واقع کوثر نامی نہر کا پانی پینے کا شرف عطا کرے گا۔

سرگرمی (2) : میں نص اور اس کے معنی کو جوڑوں گا :

نص اور اس سے حاصل ہونے والے معنی کو جوڑیں :

نص "جن لوگوں نے تم سے دین کے بارے میں لڑائی نہیں لڑی اور تمھیں جلاوطن نہیں کیا ان کے ساتھ سلوک و احسان کرنے اور منصفانہ بھلے برتاؤ کرنے سے اللہ تعالیٰ تمھیں نہیں روکتا، بلکہ اللہ تعالیٰ تو انصاف کرنے والوں سے محبت کرتا ہے." (سورۂ ممتحنہ : 8) اللہ تعالیٰ نے فرمایا : "نہ میں عبادت کرتا ہوں اس کی جس کی تم عبادت کرتے ہو." (سورۂ کافرون : 2) اسما بنت ابو بکر رضی اللہ عنہا سے روایت ہے، وہ کہتی ہیں کہ میری ماں جو کہ مشرکہ تھیں، اللہ کے رسول صلی اللہ علیہ و سلم کے زمانے میں میرے یہاں آئیں۔ چنانچہ میں نے اللہ کے رسول صلی اللہ علیہ و سلم سے مسئلہ دریافت کیا۔ میں نے پوچھا کہ کیا میں اپنی ماں کے ساتھ صلہ رحمی کروں؟ تو آپ نے جواب دیا :

"ہاں! تم اپنی ماں کے ساتھ صلہ رحمی کرو۔" (صحیح بخاری : 2620) معنی

مشرک رشتے دار کے ساتھ صلہ رحمی جائز ہے۔

غیر محارب کافر کے ساتھ حسن سلوک جائز ہے۔

مشرکوں کے دین سے براءت ضروری ہے۔

سرگرمی (3) : میں چرچا (بحث و مباحثہ) کروں گا اور فرق سمجھوں گا :

سورہ "کافرون" اسلام مخالف مذاہب سے براءت کو ضروری قرار دیتی ہے، یہ الگ بات ہے کہ ہمارے اوپر اپنے سماج کے غیر مسلموں کے ساتھ اچھا سلوک بھی واجب ہے۔

اس نکتے پر اپنے استاد کے ساتھ چرچا کریں، تاکہ اعتقاد کے مقام اور معاملات کے مقام کے درمیان موجود فرق کو جان سکیں۔

اندازۂ قدر

سوال 1 : صحیح عبارت کے سامنے صحیح (✓) اور غلط عبارت کے سامنے غلط (×) کا نشان لگائیں :

1- مسلمان اپنے دین کو اپنے لیے فخر کا سرمایہ سمجھتا ہے اور اپنے عقیدے کو مضبوطی سے پکڑا رہتا ہے۔ ( ✓)

2- ذبح کرنا بھی حج اور نماز کی طرح ایک عبادت ہے۔ ()

3- نہر کوثر کا تعلق نبی صلی اللہ علیہ و سلم کے ساتھ خاص ہے، آپ کی امت کے ساتھ نہیں۔ (×)

4- اچھے اخلاق کا مظاہرہ صرف مسلمان کے ساتھ ہونا چاہیے۔ غیر مسلم کے ساتھ نہيں۔ (×)

سوال 2 : نیچے دی گئی دونوں آیتوں کا معنی اختصار کے ساتھ لکھیے :

"یقیناً تیرا دشمن ہی ﻻ وارث اور بے نام ونشان ہے." ۳

"تمھارے لیے تمھارا دین ہے اور میرے لیے میرا دین ہے." ٦

سوال 3 : نیچے دی گئی باتوں پر دلالت کرنے والی آیت لکھیے :

1- صرف ایک اللہ کے لیے نماز پڑھنے اور ذبح کرنے کا حکم۔

2- معبودان کفار سے براءت ضروری ہے۔

چوتھا سبق : سورہ "نصر" اور سورہ "مسد" کی تفسیر :

طریقہ کار کے مقاصد:

عزیز طالب علم! اس سبق کے بعد آپ سے یہ توقع ہوگی کہ آپ:

1-ان دونوں سورتوں کی آیتوں کی مختصر تفسیر کر سکیں گے۔

2 - اللہ کی جانب سے اپنے نبی کے دفاع کی وضاحت کر سکیں گے۔

3- ان آیتوں سے حاصل ہونے والے فوائد کو بیان کر سکیں گے۔

4- اسلام اور مسلمانوں کی نصرت سے خوش ہوں گے۔

سورۂ نصر

شروع کرتا ہوں اللہ تعالیٰ کے نام سے جو بڑا مہربان نہایت رحم واﻻ ہے۔

جب اللہ کی مدد اور فتح آجائے. ۱ اور تو لوگوں کو اللہ کے دین میں جوق در جوق آتا دیکھ لے. ۲

تو اپنے رب کی تسبیح کرنے لگ حمد کے ساتھ اور اس سے مغفرت کی دعا مانگ۔ بے شک وه بڑا ہی توبہ قبول کرنے واﻻ ہے. ۳

(سورۂ نصر : 1-3)

تفسیر :

اس سورت میں ایمان والوں کے لیے فتح و نصرت اور عربوں کے بیچ اسلام کے پھیل جانے کی بشارت ہے۔

"إِذَا جَآءَ نَصرُ ٱللَّهِ وَٱلفَتحُ." ١ جب مسلمانوں کے حق میں مشرکین عرب کے خلاف اللہ کی مدد آ گئی اور اللہ نے تمھیں مکہ مکرمہ کو فتح کرنے کی توفیق عطا کر دی۔

"وَرَأيتَ ٱلنَّاسَ يَدخُلُونَ فِي دِينِ ٱللَّهِ أَفوَاجٗا" ٢ اور آپ نے لوگوں کو انفرادی اور اجتماعی طور پر اسلام میں داخل ہوتے ہوئے دیکھ لیا۔

"فَسَبِّح بِحَمدِ رَبِّكَ وَٱستَغفِرهُ." لہذا اپنے رب کو کسی بھی شریک سے پاک رکہیے، فتح و نصرت کی نعمت پر اپنے رب کا شکر ادا کیجیے اور اس سے عفوو درگزر اور مغفرت طلب کیجیے۔

"إِنَّهُۥ كَانَ تَوَّابَا ." ۳ بلاشبہ اللہ اپنے بندے کی توبہ اور استغفار بہت زیادہ قبول کرتا ہے۔

سورۂ مسد

شروع کرتا ہوں اللہ تعالیٰ کے نام سے جو بڑا مہربان نہایت رحم واﻻ ہے۔

ابو لہب کے دونوں ہاتھ ٹوٹ گئے اور وه (خود) ہلاک ہو گیا. ۱ نہ تو اس کا مال اس کے کام آیا اور نہ اس کی کمائی. ۲

وه عنقریب بھڑکنے والی آگ میں جائے گا. ۳ اور اس کی بیوی بھی (جائے گی،) جو لکڑیاں ڈھونے والی ہے.٤

اس کی گردن میں پوست کھجور کی بٹی ہوئی رسی ہوگی. ۵ (مسد : 1-5)

تفسیر :

یہ سورت اللہ کے نبی صلی اللہ علیہ و سلم کے چچا ابو لہب کا انجام بیان کرتی ہے، جس نے آپ کو جھٹلایا اور ذیت دی۔

"تَبَّت يَدَآ أَبِي لَهَبٖ وَتَبَّ." ۱ ابو لہب خسارے میں پڑ گیا، شقی ونامراد ہوا اور عذاب سے دوچار ہوا، کیوں کہ اس نے اللہ کے رسول صلی اللہ علیہ و سلم کو اذیت پہنچائی۔

"مَآ أَغنَىٰ عَنهُ مَالُهُۥ وَمَا كَسَبَ." ۲ اس کا مال اور اس کی اولاد اسے اللہ کے عذاب سے ہرگز بچا نہیں سکے گی۔

"سَيَصلَىٰ نَارٗا ذَاتَ لَهَبٖ." ۳ وہ بہت جلد ایسی آگ میں داخل ہوگا، جس کی لپٹیں اٹھ رہی ہوں گی۔

"وَٱمرَأَتُهُۥ حَمَّالَةَ ٱلحَطَبِ." ٤ اور اس کے ساتھ اس کی بیوی (ام جمیل) بھی ہوگی، جو کانٹے اور تکلیف دہ چیزیں اٹھا کر لاتی اور اللہ کے رسول صلی اللہ علیہ و سلم کے راستے میں رکھ دیا کرتی تھی۔

"فِي جِيدِهَا حَبل مِّن مَّسَدِ ." ۵ اس کی گردن میں پوست کھجور کی بٹی ہوئی کھردری رسی ڈال کر اسے جہنم کی جانب کھینچ کر لے جایا جائے گا۔

مذکورہ بالا آیتوں سے حاصل ہونے والے کچھ فوائد :

1- اللہ کی تسبیح اور اس کی حمد بیان کرنا اور توبہ و استغفار کرتے رہنا واجب ہے۔

2- اللہ بہت زیادہ توبہ قبول کرنے والا ہے۔ وہ اپنے بندوں کی توبہ قبول فرماتا ہے۔

3- اللہ تعالی اپنے نبی صلی اللہ علیہ و سلم کا دفاع کرتا ہے اور آپ کو اذیت دینے والے کو عذاب دیتا ہے۔

جو اللہ پر ایمان نہ لائے اور نیک عمل نہ کرے، اس کا مال اور اللہ کے رسول صلی اللہ علیہ و سلم سے اس کی قرابت اس کے کچھ کام نہيں آسکتی۔

سرگرمیاں

سرگرمی (1) : میں جستجو کروں گا اور جواب دوں گا :

اپنے معلم کی مدد سے یہ معلوم کریں کہ سورۂ نصر سے کیسے پتہ چلتا ہے کہ مسلمان صرف گناہ کے وقت ہی نہیں، بلکہ ہمیشہ اللہ سے بخشش طلب کرتا رہتا ہے۔

سرگرمی (2) : میں غور کروں گا اور واضح کروں گا :

قرآن کریم نے اللہ کے نبی صلی اللہ علیہ و سلم کے چچا ابو لہب کو اس بنا پر عذاب کی دھمکی دی ہے کہ اس نے آپ کو جھٹلایا تھا اور لوگوں کو اللہ کے راستے سے روکا تھا۔ خود اللہ کے نبی صلی اللہ علیہ و سلم نے بھی کہا ہے : "اے قریش کی جماعت! تم اپنی جانوں کو (اللہ کے عذاب سے) خرید لو، میں اللہ کی بارگاہ میں تمھارے کسی کام نہیں آؤں گا۔ اے بنو عبد مناف! میں اللہ کے ہاں تمھیں کوئی نفع نہیں دوں گا۔ اے عباس بن عبد المطلب! میں اللہ کی بارگاہ میں تمھارے کچھ کام نہیں آسکوں گا۔ اے صفیہ! جو رسول اللہ صلی اللہ علیہ و سلم کی پھوپی ہیں٬ میں اللہ کے ہاں تمھیں کچھ فائدہ نہیں پہنچا سکوں گا۔ اور اے فاطمہ بنت محمد! میرے مال میں سے جو چاہو مجھ سے طلب کرلو، میں اللہ کے ہاں تمھیں کوئی نفع نہیں دوں گا"۔ (صحیح بخاری : 4771، صحیح مسلم : 206)

یہ حدیث اسلام میں عدل کی اہمیت پر کیسے دلالت کرتی ہے؟ وضاحت کیجیے۔

اندازۂ قدر

سوال 1 : صحیح عبارت کے سامنے صحیح (✓) اور غلط عبارت کے سامنے غلط (×) کا نشان لگائیں :

1۔ مسلمان اسلام اور مسلمانوں کی فتح سے خوش ہوتا ہے۔ (✓)

2- استغفار گناہ میں ملوث ہونے کے بعد ہی مشروع ہے۔ (×)

3- اللہ کے رسول صلی اللہ علیہ و سلم کے رشتے دار گناہوں سے معصوم ہیں۔ (×)

4- اسلام عدل و رحمت کا دین ہے۔ (✓)

سوال 2 : آنے والی دونوں آیتوں کا معنی اختصار کے ساتھ لکھیے :

"اور اس سے مغفرت کی دعا مانگ، بیشک وه بڑا ہی توبہ قبول کرنے واﻻ ہے."

"نہ تو اس کا مال اس کے کام آیا اور نہ اس کی کمائی."

سوال 3 : سورۂ نصر اور سورۂ مسد کی آیتوں کے دو فائدے بیان کیجیے۔

پانچواں سبق : سورۂ اخلاص، سورۂ فلق اور سورۂ ناس کی تفسیر

طریقہ کار کے مقاصد:

عزیز طالب علم! اس سبق کے بعد آپ سے یہ توقع ہوگی کہ آپ:

1- سورۂ اخلاص، سورۂ فلق اور سورۂ ناس کی آیتوں کی مختصر تفسیر کر سکیں گے۔

4- ان آیتوں سے حاصل ہونے والے فوائد کو بیان کر سکیں گے۔

3- سورۂ اخلاص، سورۂ فلق اور سورۂ ناس کی عظمت کو محسوس کر سکیں گے۔

4- سورۂ اخلاص، سورۂ فلق اور سورۂ ناس کو روزانہ پڑھیں گے۔

سورۂ اخلاص

شروع کرتا ہوں اللہ تعالیٰ کے نام سے جو بڑا مہربان نہایت رحم واﻻ ہے۔

آپ کہہ دیجیے کہ وه اللہ تعالیٰ ایک (ہی) ہے. ۱ اللہ تعالیٰ بے نیاز ہے. ۲ نہ اس سے کوئی پیدا ہوا نہ وه کسی سے پیدا ہوا. ۳

اور نہ کوئی اس کا ہمسر ہے. ٤ (سورۂ اخلاص : 1-4)

تفسیر :

اس عظیم سورت کے اندر اللہ عز و جل کے کچھ صفات بیان کیے گئے ہیں۔

"قُل هُوَ ٱللَّهُ أَحَدٌ." ۱ اے رسول! آپ کہہ دیں : بے شک اللہ ایک ہے اور ربوبیت و الوہیت میں اکیلا ہے۔

"ٱللَّهُ ٱلصَّمَدُ." ۲ اللہ ہی وہ برتر ہستی ہے، جس کى طرف بندے اپنی ضرورتیں پوری کروانے کے لیے متوجہ ہوتے ہيں۔

"لَم يَلِد وَلَم يُولَد۔" ۳ اللہ کی نہ کوئی اولاد ہے اور نہ وہ کسی کی اولاد ہے۔

"وَلَم يَكُن لَّهُۥ كُفُوًا أَحَدُ." ٤ اللہ کا نہ کوئی مشابہ ہے اور نہ کوئی نظیر۔

سورۂ فلق

شروع کرتا ہوں اللہ تعالیٰ کے نام سے جو بڑا مہربان نہایت رحم واﻻ ہے۔

آپ کہہ دیجیے کہ میں صبح کے رب کی پناه میں آتا ہوں. ۱ ہر اس چیز کے شر سے جو اس نے پیدا کی ہے. ۲ اور اندھیری رات کی تاریکی کے شر سے جب اس کا اندھیرا پھیل جائے. ۳

اور گره (لگا کر ان) میں پھونکنے والیوں کے شر سے (بھی). ٤

اور حسد کرنے والے کی برائی سے بھی جب وه حسد کرے. (سورۂ فلق : 1-5)

تفسیر :

یہ سورہ ہمیں مخلوق، جادو اور حسد کی برائی سے اللہ کی پناہ مانگنا سکھاتی ہے۔

"قُل أَعُوذُ بِرَبِّ ٱلفَلَقِ" ۱ اے رسول! آپ کہہ دیں کہ میں صبح اور روشنی کے رب کی پناہ میں آتا ہوں۔

"مِن شَرِّ مَا خَلَقَ." ۲ ساری مخلوقات اور ان کی اذیتوں کی برائی سے۔

"اور اندھیری رات کى تاریکی کے شرسے جب اس کا ندھیرا چھا جائے" ۳ اور رات اور اس کی تاریکی، نیز اس میں موجود برائیوں اور اذیت ناک چیزوں سے۔

"وَمِن شَرِّ ٱلنَّفَّٰثَٰتِ فِي ٱلعُقَدِ" ٤ اور جادوگرنیوں کی برائی سے، جو جادو کرنے کے ارادے سے گرہ لگاکر اس میں پھونکتی ہیں۔

"وَمِن شَرِّ حَاسِدٍ إِذَا حَسَدَ." ۵ اور حسد کرنے والے کی برائی سے، جو کسی کی نعمت کے زائل ہونے کی تمنا کرتا ہے۔

سورۂ ناس

شروع کرتا ہوں اللہ تعالیٰ کے نام سے جو بڑا مہربان نہایت رحم واﻻ ہے۔

آپ کہہ دیجیے کہ میں لوگوں کے پروردگار کی پناه میں آتا ہوں. ۱ لوگوں کے مالک کی (اور)۔ ۲ لوگوں کے معبود کی (پناه میں)۔ ۳

وسوسہ ڈالنے والے پیچھے ہٹ جانے والے کے شر سے۔ ٤ جو لوگوں کے سینوں میں وسوسہ ڈالتا ہے۔ ۵

(خواه) وه جن میں سے ہو یا انسان میں سے۔ ٦ (سورۂ ناس : 1-6)

تفسیر :

یہ سورت ہمیں شیطان کی برائی اور اس کے وسوسے سے اللہ کی پناہ مانگنا سکھاتی ہے۔

"قُل أَعُوذُ بِرَبِّ ٱلنَّاسِ" ۱ اے رسول! آپ کہہ دیں کہ میں اللہ کی پناہ میں آتا ہوں، جو لوگوں کا خالق، رازق اور اس کائنات کا مدبر ہے۔

"مَلِكِ ٱلنَّاسِ" ۲ جس کے ہاتھ میں لوگوں کے سارے کام ہیں اور وہ خود ان سے بے نیاز ہے۔

"إِلَٰهِ ٱلنَّاسِ" ۳ جو اکیلے ہر طرح کی عبادت کا حق دار ہے اور جس کے سوا کوئی معبود برحق نہيں ہے۔

"مِن شَرِّ ٱلوَسوَاسِ ٱلخَنَّاسِ" ٤ شیطان کی اذیت سے، جو اللہ کے ذکر سے غفلت دیکھتے ہی انسان کے دل میں برے خیالات ڈالنے لگتا ہے اور جیسے ہی اللہ کا ذکر ہونے لگتا ہے، چھپ جاتا ہے۔

"ٱلَّذِي يُوَسوِسُ فِي صُدُورِ ٱلنَّاسِ" ۵ جو لوگوں کے دلوں میں برے خیالات ڈالتا اور شکوک پیدا کرتا ہے۔

"مِنَ ٱلجِنَّةِ وَٱلنَّاسِ" ٦ میں اللہ کی پناہ میں آتا ہوں ان جنوں سے جو چھپ چھپاکر وسوسے ڈالتے ہیں اور ان انسانوں سے جو غلط اور برے کاموں کا حکم دیتے ہيں۔

مذکورہ بالا آیتوں سے حاصل ہونے والے کچھ فوائد :

1- اللہ ایک اکیلا ہے۔ نہ اس کا کوئی شریک ہے، نہ اولاد ہے، نہ والد ہے، نہ مشابہ ہے اور نہ نظیر ہے۔

2- اللہ ہی معبود برحق اور ہر طرح کی عبادتوں کا مستحق ہے۔

مسلمان جب اللہ کی پناہ لے لیتا ہے، تو اللہ جنوں اور انسانوں کی برائیوں سے اس کی حفاظت فرماتا ہے۔

4- جادو اور حسد کے نقصانات حقیقی ہیں اور اللہ کی پناہ میں جانے اور اس پر بھروسہ کرنے سے ایک مسلمان کو اس سے تحفظ فراہم ہو جاتا ہے۔

5- اللہ تعالی کا ذکر، شیطان کے وسوسے سے مسلمان کی حفاظت کرتا ہے۔

سرگرمیاں

عملی کام (1) : میں سورۂ اخلاص، سورۂ فلق اور سورۂ ناس پڑھنے کا وقت متعین کروں گا :

اللہ کے نبی صلی اللہ علیہ و سلم نے ہمیں کچھ اوقات اور احوال میں سورۂ اخلاص، سورۂ فلق اور سورۂ ناس پڑھنے کی رہنمائی فرمائی ہے۔ اس وقت/حالت کے سامنے اشارہ رکھیے، جس میں ان سورتوں کو پڑھنا مشروع ہے۔

وقت/حالت پڑھنے کی مشروعیت

صبح کے وقت

شام کے وقت

مسجد میں داخل ہوتے وقت

مسجد سے نکلتے وقت

سونے سے پہلے کھانے سے فارغ ہونے کے بعد

عملی کام (2) : میں اپنے ساتھیوں کے ساتھ چرچا کروں گا :

اللہ نے سورۂ فلق اور سورۂ ناس کو جادو اور شیطان سے پناہ حاصل کرنے کا وسیلہ بنایا ہے۔ لیکن اس کے باوجود کچھ لوگ جادو کھولنے کے غیر مشروع طریقوں، جیسے تعویذوں اور شیطان کا تقرب حاصل کرنے وغیرہ کو اپناتے ہیں۔

آپ اپنے ساتھیوں کے ساتھ ان سلوکیات کی تشخیص اور مسلمانوں کے عقیدے پر پڑنے والے ان کے نقصان دہ اثرات کے بارے میں چرچا کریں۔

اندازۂ قدر

سوال 1 : صحیح عبارت کے سامنے صحیح (✓) اور غلط عبارت کے سامنے غلط (×) کا نشان لگائیں :

1- 'الأحد' سے مراد وہ ذات یکتا ہے، جو صفات الوہیت اور ربوبیت میں یگانہ ہو۔ (✓)

2- 'الصمد' سے مراد وہ ذات ہے، کہ بندے اپنی ضرورتوں کی تکمیل کے لیے جس کى پناہ لیتے ہیں۔ (✓)

3- مسلمان کے لیے جادو کے ذریعے جادو کا علاج کرنا جائز ہے۔ (×)

4- پھونک مارنے والیوں سے مراد جادوگرنیاں ہیں، جو لوگوں پر جادو کرتی ہیں۔ (✓)

5- سورۂ فلق اور سورۂ ناس کا پڑھنا حسد سے بچاتا ہے اور شیطان کو دور بھگاتا ہے۔ (✓)

6- تعویذوں میں ملوث ہونا اور جنوں کا تقرب حاصل کرنا شرکیہ کام ہیں۔ (✓)

سوال 2 : وہ آیت کریمہ لکھیے، جو نیچے دیے گئے معنی سے مناسبت رکھتی ہو :

معنی

اللہ کا کوئی مشابہ اور نظیر نہيں ہے۔

ہم رات اور اس کی برائیوں سے اللہ کی پناہ میں آتے ہیں۔

ہم انسانوں اور جنوں کی برائیوں سے اللہ کی پناہ میں آتے ہيں۔ اس پر دلالت کرنے والی آیت

سوال 3 : سورۂ اخلاص، سورۂ فلق اور سورۂ ناس پڑھنے کے اوقات کی نشان دہی کریں۔

اکائی : ایمان اور تزکیہ

پہلا سبق : ایمان اور اس کی اہمیت

سبق کے مقاصد :

عزیز طالب علم! اس سبق کے بعد آپ سے یہ توقع ہوگی کہ آپ:

1- ایمان کی تعریف کر سکیں گے۔

2- ایمان کے ارکان گنوا سکیں گے۔

3- اسلام، ایمان اور احسان کے بیچ فرق کر سکیں گے۔

4- ایمان اور عمل صالح کے بیچ کے مضبوط رشتے کو محسوس کر سکیں گے۔

5- اپنے ایمان اور عمل کو درست کرنے کی فکر کریں گے۔

تمہید :

اللہ تعالی نے جبریل علیہ السلام کو اللہ کے نبی صلی اللہ علیہ و سلم کے پاس بھیجا، تاکہ آپ صحابہ کو دین سکھائیں، جس کا ذکر اس حدیث میں موجود ہے :

عمر بن خطاب رضی اللہ عنہ سے روایت ہے، وہ کہتے ہيں : ایک دن ہم اللہ کے رسول ﷺ کے پاس بیٹھے ہوئے تھے۔ اتنے میں ایک شخص آیا۔ اس کے کپڑے بہت زیادہ سفید اور بال بہت زیادہ کالے تھے۔ اس پر سفر کے آثار بھی نہیں دکھائی دے رہے تھے اور ہم میں سے کوئی اسے جانتا بھی نہیں تھا۔ وہ رسول اللہ ﷺ کے پاس آ کر بیٹھا۔ اپنے گھٹنے کو آپ کے گھٹنے سے لگا لیا اور اپنی ہتھیلیاں اپنے رانوں پر رکھ لیں۔ پھر کہا : اے محمد (ﷺ)! مجھے اسلام کے بارے میں بتائیے؟ رسول اللہ ﷺ نے فرمایا : "اسلام یہ ہے کہ تم اس بات کی گواہی دو کہ اللہ تعالیٰ کے سوا کوئی عبادت کے لائق نہیں ہے اور محمد (ﷺ) اس کے رسول ہیں، نماز قائم کرو، زکاۃ ادا کرو، رمضان کے روزے رکھو اور اگر اللہ کے گھر تک جانے کی استطاعت ہو، تو اس کا حج کرو۔" وہ بولا : آپ نے سچ فرمایا۔ عمر رضی اللہ عنہ کہتے ہیں کہ ہمیں اس پر تعجب ہوا کہ آپ سے سوال بھی کرتا ہے اور پھر خود ہی آپ کی تصدیق بھی کرتا ہے۔ پھر کہا : مجھے ایمان کے بارے میں بتائیے۔ آپ ﷺ نے فرمایا : "ایمان یہ ہے کہ تم اللہ پر، اس کے فرشتوں پر، اس کی کتابوں پر، اس کے رسولوں پر، آخرت کے دن پر اور ہر اچھی و بری تقدیر پر ایمان لاؤ"۔ وہ بولا : آپ نے سچ فرمایا ۔ پھر اس نے کہا : مجھے احسان کے بارے میں بتائیے؟ آپ ﷺ نے فرمایا : "اللہ کی عبادت اس طرح کرو، گویا تم اسے دیکھ رہے ہو اور اگر تم اسے نہیں دیکھ رہے ہو، تو وہ تو تمھیں دیکھ رہا ہے"۔

(صحیح مسلم : 8)۔

اس صحیح حدیث کے مطابق دین کے درج ذیل تین مراتب ہیں :

پہلا مرتبہ : اسلام۔ اس کے درج ذیل پانچ ارکان ہیں : دو گواہیاں، نماز قائم کرنا، زکاۃ دینا، رمضان کے روزے رکھنا اور حج کرنا۔

دوسرا مرتبہ : ایمان۔ یہ اسلام کے بعد کا مرتبہ ہے۔

ایمان نام ہے دل سے تصدیق کرنے، زبان سے اقرار کرنے اور اعضا سے عمل کرنے کا۔

لہذا یہ ضروری ہے کہ انسان اپنے دل میں عقیدہ رکھے اور دل کے عقیدے کا اظہار زبان سے دونوں گواہیوں کی ادائیگی کے ذریعے کرے۔ ایمان اعضا کے عمل کے بغیر مکمل نہیں ہو سکتا۔ یہی وجہ ہے کہ اہل جنت کے وصف میں ایمان اور عمل صالح دونوں کا ذکر ہوا ہے۔ اللہ تعالی نے کہا ہے : "اور جو لوگ ایمان ﻻئیں اور نیک کام کریں، وه جنتی ہیں، جو جنت میں ہمیشہ رہیں گے۔" (سورۂ بقرہ : 82)۔

لہذا ہر مؤمن کو دونوں جہان میں سرخ روئی حاصل کرنے کے لیے عمل صالح میں کوشاں ہونا چاہیے۔

ایمان کے چھ ارکان ہیں : اللہ پر ایمان، اس کے فرشتوں پر ایمان، اس کی کتابوں پر ایمان، اس کے رسولوں پر ایمان، آخرت کے دن پر ایمان اور بھلی بری تقدیر پر ایمان۔

تیسرا مرتبہ : احسان۔ اس میں بندہ اپنے سارے اقوال اور افعال میں اپنے رب کا اس طرح دھیان رکھتا ہے کہ گویا وہ اسے دیکھ رہا ہو۔ اگر اسے دیکھ نہ رہا ہو، تو یہ احساس ضرور ہو کہ اس کا رب اسے دیکھ رہا ہے۔

سرگرمیاں

سرگرمی (1) : میں دین کے مراتب کے بیچ تمیز کروں گا :

ان آیتوں کا انتخاب کریں، جو بتاتی ہیں کہ اسلام کا مرتبہ ایمان کے مرتبے سے پہلے ہے :

"دیہاتی لوگ کہتے ہیں کہ ہم ایمان ﻻئے۔ آپ کہہ دیجیے کہ در حقیقت تم ایمان نہیں ﻻئے، لیکن تم یوں کہو کہ ہم اسلام ﻻئے (مخالفت چھوڑ کر مطیع ہوگئے)، حاﻻں کہ ابھی تک تمھارے دلوں میں ایمان داخل ہی نہیں ہوا ہے۔" (سورۂ حجرات : 14)۔

"اپنے باپ ابراہیم (علیہ السلام) کے دین پر (قائم رہو۔) اسی اللہ نے تمھارا نام مسلمان رکھا ہے اس قرآن سے پہلے۔۔۔" (سورۂ حج : 78)۔

"یقیناً ایمان والوں نے فلاح حاصل کرلی۔'' (سورۂ مؤمنون : 1)۔

سرگرمی (2) : میں نص کو اس کے مدلول کے ساتھ جوڑوں گا :

نیچے دیے گئے ہر نص کو اس کے مدلول کے ساتھ جوڑیں :

نص

اللہ تعالی کا فرمان ہے: "اور جو بھی اس کے پاس ایمان کی حالت میں حاضر ہوگا اور اس نے اعمال بھی نیک کیے ہوں گے۔ اس کے لیے بلند وباﻻ درجے ہیں۔" (سورۂ طہ : 75)۔

اللہ کے نبی ﷺ کا ارشادِ گرامی ہے: "مؤمن وہ ہے جس سے لوگ اپنے مال اور جان کے بارے میں خطرہ محسوس نہ کریں۔" (سنن ابن ماجہ : 3934)۔

اللہ کے نبی ﷺ کا ارشادِ گرامی ہے : "جو کوئی اللہ اور آخرت کے دن پر ایمان رکھتا ہو، وہ اپنے مہمان کی عزت کرے۔'' (صحیح بخاری : 6135، صحیح مسلم : 48)۔ حدیث جس پر دلالت کرتی ہے۔

ایمان، انسان کو دوسروں کے ساتھ برا سلوک کرنے سے روکتا ہے۔

حسن اخلاق ایمان کا ایک ثمرہ ہے۔

ایمان آخرت میں قدر و منزلت میں اضافے کا باعث ہے۔

سرگرمی (3) : میں ایک نصیحت کروں گا :

کسی کسی کا دعوی رہتا ہے کہ اس کا دل ایمان سے آباد ہے، جب کہ وہ فرض عبادتیں بھی ادا نہیں کرتا۔

اس طرح کے لوگوں کے حق میں آپ ایک نصیحت لکھیں۔

اندازۂ قدر

سوال 1 : صحیح عبارت کے سامنے صحیح (✓) اور غلط عبارت کے سامنے غلط (×) کا نشان لگائیں :

1- نماز قائم کرنا احسان کا ایک رکن ہے۔

2- جنت اور جہنم پر ایمان، ایمان کا ایک رکن ہے۔

3- ایمان دین کا پہلا مرتبہ ہے۔

سوال 2 : درج ذیل میں صحیح جواب کا انتخاب کریں :

1- ایمان کے ارکان :

(پانچ ہيں ۔ چھ ہیں۔ سات ہيں)

2- اللہ کے دھیان رکھنے کے مرتبے کا نام ہے :

(اسلام - ایمان - احسان)

3- ایمان کے اندر اعتقاد رکھنا ضرورى ہىے :

(دل - زبان - اعضا) کے ساتھ

سوال 3 : نیچے دیے گئے سوالوں کا جواب دو :

1- ایمان کی تعریف لکیھں۔

2- عمل صالح ایمان سے جڑا ہوا ہے، اس کی دلیل پیش کریں۔

3- دین کے مراتب (احسان - اسلام - ایمان) کو ادنی سے اعلی تک ترتیب دیں۔

دوسرا سبق : اللہ پر ایمان اور اس کے اثرات

سبق کے مقاصد :

عزیز طالب علم! اس سبق کے بعد آپ سے یہ توقع ہوگی کہ آپ :

1۔ اللہ پر ایمان کا معنی بتا سکیں گے۔

2- فرد اور سماج پر پڑنے والے اللہ پر ایمان کے اثرات کو بتا سکیں گے۔

3- بندے کے سلوک ورویہ پر پڑنے والے ایمان کے اثرات کی اہمیت کو محسوس کریں گے۔

4- اہل ایمان کے اخلاق اور سلوکیات سے آراستہ ہوں گے۔

آپ نے یہ جانا کہ ایمان کے چھ ارکان ہيں، جن میں سے پہلا رکن اللہ پر ایمان لانا ہے۔ اب سوال یہ پیدا ہوتا ہے کہ اللہ پر ایمان لانے کا کیا معنی ہے؟

اس سوال کا جواب ہم نیچے دیے گئے نقاط کے ذریعے جانیں گے:

اللہ تعالیٰ پر ایمان

اس کے وجود پر ایمان

اس کے رب ہونے پر ایمان

اس کے معبود ہونے پر ایمان

اس کے اسما و صفات پر ایمان

اولا : اللہ پر ایمان :

اللہ پر ایمان، ایمان کا پہلا اور سب سے بڑا رکن ہے۔ اس کے اندر درج ذیل چار باتیں شامل ہیں :

1- اللہ تعالی کے وجود پر ایمان۔ اس پر فطرت اور عقل سلیم بھی دلالت کرتی ہے۔

اللہ کے وجود کی ایک دلیل تخلیق کی دلیل ہے۔ کیوں کہ ہر مخلوق اپنے خالق کے وجود پر دلالت کرتی ہے اور وہ خالق اللہ تعالی ہے۔ اللہ تعالی نے کہا ہے : "کیا یہ بغیر کسی (پیدا کرنے والے) کے خود بخود پیدا ہوگئے ہیں؟ یا یہ خود پیدا کرنے والے ہیں؟" (سورۂ طور : 35)۔

2- اس بات پر ایمان کہ اللہ ہی ہر چیز کا رب، خالق اور مالک ہے۔ وہی روزی دیتا ہے، وہی زندگی دیتا ہے اور وہی مارتا ہے۔ اللہ تعالی نے کہا ہے : "پس اللہ کی تعریف ہے جو آسمانوں اور زمین اور تمام جہانوں کا رب ہے۔" (سورۂ جاثیہ : 36)۔

3- اس بات پر ایمان کہ اللہ کے اچھے اچھے نام اور اونچے صفات ہیں۔ اس جیسی کوئی چیز نہيں ہے۔ اللہ تعالی نے کہا ہے : " اس جیسی کوئی چیز نہیں۔ وه سننے اور دیکھنے واﻻ ہے۔" (سورۂ شوری : 11)۔

4- اس بات پر ایمان کہ اللہ ہی اکیلے عبادت کا مستحق ہے۔ کیوں کہ جس کے دل میں یہ بات بیٹھ جائے کہ اللہ ہی اس کا رب اور خالق ہے، تو وہ صرف اسی کی عبادت کرے گا اور کسی دوسرے کی عبادت سے دامن بچاکر رکھے گا۔ اللہ تعالی نے کہا ہے : "آسمانوں کا، زمین کا اور جو کچھ ان کے درمیان ہے، سب کا رب وہی ہے۔ تو اسی کی بندگی کر اور اس کی عبادت پر جم جا۔ کیا تیرے علم میں اس کا ہم نام ہم پلہ کوئی اور بھی ہے؟" (سورۂ مریم : 65)۔

ثانیا : مسلمان کے سلوک ورویہ پر، اللہ پر ایمان لانے کے اثرات :

1- اللہ پر ایمان مؤمن کے دل کو اللہ سے اس طرح معلق رکھتا ہے کہ وہ اس سے محبت رکھتا ہے، خوف کھاتا ہے، اور اسی پہ بھروسہ کرتا ہے۔ اس کی زبان پر اللہ کا ذکر جاری رہتا ہے، وہ اللہ کی کتاب کی تلاوت کرتا ہے اور اپنے اعضاۓ جسم سے نیکی کے کام کرتا اور گناہوں سے بچتا ہے۔

2- اللہ پر ایمان، انسان کے دل سے غیر اللہ کا خوف نکال باہر کرتا ہے۔ اللہ تعانی نے کہا ہے : "یہ (خبر دینے واﻻ) صرف شیطان ہی ہے، جو اپنے دوستوں سے ڈراتا ہے۔ تم ان کافروں سے نہ ڈرو اور میرا خوف رکھو، اگر تم مؤمن ہو۔" (سورۂ آل عمران : 175)۔

3- اللہ پر ایمان، مؤمن کو عبادتوں کی ادائیگی اور اللہ کا تقرب حاصل کرنے کے ساتھ ساتھ اس کی خشیت اور اس پر بھروسہ کرنے کا حریص بناتا ہے۔ اللہ تعالی نے کہا ہے : "بس ایمان والے تو ایسے ہوتے ہیں کہ جب اللہ تعالیٰ کا ذکر آتا ہے تو ان کے دل ڈر جاتے ہیں اور جب اللہ کی آیتیں ان کو پڑھ کر سنائی جاتی ہیں تو وه آیتیں ان کے ایمان کو اور زیاده کردیتی ہیں اور وه لوگ اپنے رب پر توکل کرتے ہیں۔ جو نماز کی قائم کرتے ہیں اور ہم نے ان کو جو کچھ دیا ہے وه اس میں سے خرچ کرتے ہیں۔ یہی لوگ سچے مؤمن ہیں۔ ان کے لیے ان کے رب کے ہاں بڑے درجے ہیں اور مغفرت اور عزت کی روزی ہے۔" (سورۂ انفال : 2-4)۔

4- اللہ پر ایمان، مؤمن کو بندوں کے حقوق ادا کرنے کا حریص بناتا ہے۔ اللہ کے رسول صلی اللہ علیہ و سلم نے فرمایا ہے : "مؤمن وہ ہے جس سے لوگ اپنے مال اور جان کے بارے میں خطرہ محسوس نہ کریں۔" (سنن ابن ماجہ : 3934)۔

اس طرح اللہ پر ایمان، ایک مسلمان کے طرز عمل و رویہ پر اثر انداز ہوتا ہے اور اسے اچھے اعمال کرنے اور گناہوں اور نافرمانیوں سے دور رہنے پر آمادہ کرتا ہے۔

سرگرمیاں

سرگرمی (1) : میں غور و فکر سے کام لوں گا اور استنباط کروں گا :

نیچے دیے ہر نص کو اس کے مدلول کے ساتھ جوڑیں :

نص

اللہ تعالیٰ نے فرمایا ہے : "اور نصیحت کرتے رہیں۔ یقیناً یہ نصیحت ایمان والوں کو نفع دے گی۔" (سورۂ ذاریات : 55)۔

اللہ کے نبی صلی اللہ علیہ و سلم نے فرمایا ہے : "اہل جنت جنت میں داخل ہوں گے اور اہل جہنم جہنم میں داخل ہوں گے۔ پھر اللہ تعالی کہے گا : جہنم سے ہر اس شخص کو نکال لاؤ، جس کے دل میں رائی کے دانے کے برابر بھی ایمان ہو۔" (صحیح بخاری : 22، صحیح مسلم : 184)۔

اللہ کے نبی صلی اللہ علیہ و سلم نے فرمایا ہے : ”اللہ کی قسم وہ ایمان والا نہیں، اللہ کی قسم وہ ایمان والا نہیں، اللہ کی قسم وہ ایمان والا نہیں، کہا گیا : اے اللہ کے رسول ﷺ ! کون ہے وہ ؟ آپ نے فرمایا : جس کا پڑوسی اس کی اذیتوں سے محفوظ نہ رہے“۔ (صحیح بخاری : 6016)۔ حدیث کا معنی (حدیث اس بات پر دلالت کرتی ہے کہ :)

ایمان بندوں کے حقوق سے جڑا ہوا ہے۔

نصیحت سے فائدہ اٹھا پانا اللہ پر ایمان کا ایک ثمرہ ہے۔

ایمان قیامت کے دن جہنم کی آگ سے نجات کا سبب ہے۔

سرگرمی (2) میں غور کروں گا اور جواب دوں گا :

ابو بکر صدیق رضی اللہ عنہ نے اللہ کے نبی صلی اللہ علیہ و سلم کے ساتھ ہجرت کے واقعے کا ذکر کرتے ہوئے فرمایا : "چنانچہ سورج ڈھلنے کے بعد ہم نکل پڑے۔ اسی بیچ سراقہ بن مالک نے ہمارا پیچھا کیا۔ اسے دیکھ کر میں نے کہا : اے اللہ کے رسول! ہم تک پہونچ گئے ہیں! تو اللہ کے رسول صلی اللہ علیہ و سلم نے فرمایا : "فکر مت کرو۔ یقینا اللہ ہمارے ساتھ ہے۔" چنانچہ آپ نے سراقہ کے حق میں بد دعا کی اور اس کا گھوڑا پیٹ تک زمین میں دھنس گیا۔" (صحیح بخاری : 3615، صحیح مسلم : 7706)۔

مذکورہ قصے کو پڑھنے کے بعد نیچے دیے گئے سوالوں کے جواب دیں :

اس قصے سے ہم کیا سیکھتے ہيں؟

اس قصے کا متعلقہ درس کے موضوع سے کیا تعلق ہے؟

اندازۂ قدر

سوال 1 : بریکٹ کے درمیان سے صحیح جواب کا انتخاب کریں :

1- مخلوقات کا وجود دلالت کرتا ہے :

(اللہ تعالی کے وجود پر - اللہ کے نبی صلی اللہ علیہ و سلم کی سچائی پر - قرآن کے اعجاز پر)

2- اللہ کے نبی صلی اللہ علیہ و سلم کا فرمان ہے : "مؤمن وہ ہے جس سے لوگ اپنے مال اور جان کے بارے میں خطرہ محسوس نہ کریں۔" دلالت کرتا ہے :

(توحید ربوبیت پر - ایمان کے عمل سے جڑے ہوئے ہونے پر - سماج کے مامون ہونے کی اہمیت پر)

3- سچا مؤمن :

(اللہ کو اس کی کسی مخلوق کے مشابہ قرار نہیں دیتا - اپنے پڑوسی کو اذیت پہنچاتا ہے- گفتگو کے دوران سچ نہيں بولتا)

سوال 2 : نیچے دیے گئے جملوں میں موجود غلطیوں کو درست کر کے ان کو دوبارہ لکھیں :

1- انسان اس وقت اسلام میں داخل ہوتا ہے، جب اللہ کے وجود پر ایمان لائے۔

بندہ اس وقت تک مسلمان نہيں ہوتا، جب تک اللہ کے وجود اور اس کے رب اور معبود ہونے پر ایمان نہ لائے۔

2- ایمان ایک قلبی عمل ہے۔ اس کا جسم کے اعضا سے کوئی تعلق نہيں ہے۔

ایمان ایک قلبی عمل ہے، لیکن اس کا اثر زبان اور اعضاۓ جسم پر ظاہر ہوتا ہے۔

سوال 3 : نیچے دیے گئے ہر بیان کی ایک ایک دلیل لکھیں :

1- ایمان انسان کو اپنے پڑوسی کو اذیت دینے سے روکتا ہے۔

2- سچا مؤمن اللہ تعالی سے ڈرتا ہے۔

سوال 4 : ایک مسلمان جب چار باتوں کا اقرار کر لیتا ہے، تو اللہ پر اس کا ایمان حقیقت بن جاتا ہے۔ ان چار باتوں کو آپ چار سطروں میں اختصار کے ساتھ لکھیں۔

تیسرا سبق : فرشتوں پر ایمان اور اس کے اثرات

سبق کے مقاصد :

عزیز طالب علم! اس سبق کے بعد آپ سے یہ توقع ہوگی کہ آپ:

1- فرشتوں سے مراد کون ہيں، بتا سکیں گے۔

2- فرشتوں پر ایمان کا مطلب بتا سکیں گے۔

3- فرشتوں پر ایمان لانا واجب ہے، اس کو دلیل سے ثابت کر سکیں گے۔

4- کچھ فرشتوں کے کام بتا سکیں گے۔

5- آپ فرشتوں سے حیا کریں گے۔

تمہیدی سرگرمی

آپ فرشتوں کے بارے میں کیا جانتے ہیں؟

"اللہ چنتا ہے فرشتوں میں سے پیغام پہنچانے والوں کو۔"

(سورۂ حج : 75)۔

اولا : فرشتوں سے مراد

ثانیا : فرشتوں پر ایمان کا معنی

ثالثا : فرشتوں کے کام

رابعا : فرشتوں پر ایمان لانے کے اثرات

فرشتوں پر ایمان رکھنا ہر مسلمان پر واجب ہے۔ یہ ارکان ایمان میں سے ایک رکن ہے۔ اس کے بغیر بندے کا ایمان درست نہيں ہو سکتا۔ اس کی دلیل :

ارشادِ باری تعالٰی ہے: "رسول اس چیز پر ایمان لایا جو اس کی طرف اللہ تعالیٰ کی جانب سے اتری اور مومن بھی ایمان ﻻئے۔ یہ سب اللہ تعالیٰ اور اس کے فرشتوں پر اور اس کی کتابوں پر اور اس کے رسولوں پر ایمان ﻻئے۔ اس کے رسولوں میں سے کسی میں ہم تفریق نہیں کرتے۔ انہوں نے کہہ دیا کہ ہم نے سنا اور اطاعت کی۔ ہم تیری بخشش طلب کرتے ہیں اے ہمارے رب! اور ہمیں تیری ہی طرف لوٹنا ہے۔" (سورۂ بقرہ : 285)۔

اسی طرح جب اللہ کے رسول صلی اللہ علیہ و سلم سے ایمان کے بارے میں پوچھا گیا، تو آپ نے کہا : "اللہ پر ایمان لانا، اس کے فرشتوں پر ایمان لانا، اس کی کتابوں پر ایمان لانا، اس کے رسولوں پر ایمان لانا، قیامت کے دن پر ایمان لانا اور اچھی وبُری تقدیر پر ایمان لانا۔" (صحیح مسلم : 102)۔

اولا : فرشتوں سے مراد

فرشتے اللہ کی بہت بڑی مخلوق ہیں۔ اللہ نے ان کو نور سے پیدا کیا ہے۔ فرشتے اللہ کے حکم کی نافرمانی نہيں کرتے۔ وہی کرتے ہيں، جس کا حکم ان کو ملتا ہے۔

فرشتے اللہ کی عظیم مخلوق ہيں، اس کی دلیل جبریل علیہ السلام کے وصف میں اللہ تعالی کا یہ قول ہے: "جو قوت واﻻ ہے، عرش والے (اللہ) کے نزدیک بلند مرتبہ ہے"۔ (سورۂ تکویر : 20)۔

ثانیا : فرشتوں پر ایمان کے معنی :

فرشتوں پر ایمان درج ذیل باتوں سے متحقق ہوتا ہے :

ان کے وجود کی تصدیق۔

فرشتوں کے ان ناموں پر ایمان جو ہم جاتنے ہیں اور جو قرآن کریم اور صحیح حدیثوں سے ثابت ہیں۔

ان کے ان صفات اور اعمال پر ایمان، جنھیں ہم جاتنے ہيں اور جو قرآن کریم اور صحیح سنت میں وارد ہوئے ہيں۔

ثالثا : فرشتوں کے کام :

فرشتوں کے ذمے بہت سے کام ہيں۔ ان میں سے چند یہ ہیں :

1- وحی لے کر اترنا۔ یہ کام جبریل علیہ السلام انجام دیتے ہيں۔

2- بارش برسانا۔ یہ کام میکائیل علیہ السلام انجام دیتے ہيں۔

3- بندوں کے اعمال لکھنا۔ اللہ تعالی نے کہا ہے : "یقیناً تم پر نگہبان۔ 10 عزت والے لکھنے والے مقرر ہیں۔" 11 (سورۂ انفطار _ 10-11)۔

4- روح قبض کرنا۔ یہ کام موت کا فرشتہ انجام دیتا ہے۔

5- قیامت کے دن صور پھونکنا۔ یہ کام اسرافیل علیہ السلام کریں گے۔

فرشتے یہ اور اس طرح کے کچھ دوسرے کام بھی انجام دیتے ہیں، جن کا ذکر قرآن اور سنت نبوی میں ہوا ہے۔

رابعا : فرشتوں پر ایمان لانے کے اثرات :

ایک مسلمان کے رویہ پر فرشتوں پر ایمان لانے کے بڑے بڑے اثرات مرتب ہوتے ہیں۔ ان میں کچھ اثرات یہ ہیں :

1- فرشتوں کے نقش قدم پر چلتے ہوئے اللہ کے احکام کی تعمیل کرنا۔

2- عمل میں غرور و فخر سے دور رہنا، کیوں کہ فرشتے معصوم ہوتے ہیں اور اس کے باوجود وہ ہمشیہ عبادت میں لگے رہتے ہيں۔ لہذا کوتاہیوں میں رہنے والے اور گنہگار انسان کو تو کہیں زیادہ عبادت اور استغفار کرنا چاہیے۔

3- پہلے اللہ کا ڈر رکھتے ہوئے اور اس کے بعد اعمال لکھنے پر مامور فرشتوں سے حیا کرتے ہوئے اللہ کی حرام کردہ چیزوں سے دور رہنے کی پوری کوشش کرنا۔

سرگرمیاں

سرگرمی (1) میں غور کروں گا اور جواب دوں گا :

اللہ تعالیٰ نے فرمایا ہے : "اللہ تعالیٰ اور اس کے فرشتے نبی پر رحمت بھیجتے ہیں۔ اے ایمان والو! تم (بھی) ان پر درود بھیجو اور خوب سلام (بھی) بھیجتے رہا کرو۔" (سورۂ احزاب : 56)۔

اس آیت میں اللہ تعالی نے فرشتوں کا ایک کام بیان کیا ہے اور ایمان والوں کو ان کی پیروی کرنے کا حکم دیا ہے۔ آپ بتائیں کہ وہ کام کیا ہے؟

سرگرمی (2) : آپس میں چرچا کروں گا اور اپنے خیالات کا اظہار کروں گا :

اللہ کے نبی ﷺ کا ارشادِ گرامی ہے : "بے شک فرشتے طالب علم سے خوش ہو کر اپنے پر بچھا دیتے ہیں۔" (سنن ابو داؤد : 3643)۔

ایک طالب علم کی حیثیت سے آپ اپنے احساس کا اظہار کیجیے کہ جب آپ کو پتہ چلا کہ فرشتے طالب علم کی عزت کرتے ہیں، تو آپ کو کیسا لگا؟

سرگرمی (3) : میں واضح کروں گا :

اللہ کے رسول ﷺ کا فرمان ہے : ’’جو پیاز اور لہسن اور گندنا (ایک بدبودار قسم کی ترکاری) کھائے، وہ ہماری مسجد کے قریب نہ آئے، کیوں کہ جس چیز سے اولادِ آدم کو اذیت پہنچتی ہے اُس چیز سے فرشتوں کو بھی اذیت پہنچتی ہے‘‘۔ (صحیح مسلم : 1282)۔

اس حدیث کے مد نظر آپ فرشتوں کے تئیں اپنی عملی ذمے داری واضح کیجیے۔

اندازۂ قدر

سوال 1 : صحیح عبارت کے سامنے صحیح (✓) کا اور غلط عبارت کے سامنے غلط (×) کا نشان لگائیں :

1- فرشتوں کو اللہ نے نور سے پیدا کیا ہے۔

2- اسرافیل کا کام نبیوں کو وحی پہنچانا ہے۔

3- اللہ نے جبریل علیہ السلام کے سپرد زمین میں بارش برسانے کا کام کر رکھا ہے۔

4- فرشتوں کے نقش قدم پر چلتے ہوئے ہمیں پوری تندہی کے ساتھ عبادت کرنی چاہیے۔

سوال 2 : نیچے دیے کئے بیانوں کی دلیل میں کوئی آیت یا حدیث پیش کیجیے۔

1- فرشتوں پر ایمان لانا واجب ہے۔

2- جبریل ایک عظیم الخلقت مخلوق ہيں۔

سوال 3 : نیچے دیے کئے دونوں سوالوں کے جواب دیجیے :

1- ایک مسلمان کا فرشتوں پر ایمان کیسے متحقق ہوگا؟

2- فرشتوں پر ایمان کا ایک اثر دل سے فخر و غرور کو دور کرنا ہے۔ اس کی وضاحت کیجیے :

چوتھا سبق : کتابوں اور رسولوں پر ایمان اور اس کے اثرات

سبق کے مقاصد :

عزیز طالب علم! اس سبق کے بعد آپ سے یہ توقع ہوگی کہ آپ:

1- کتابوں اور رسولوں پر ایمان کا معنی بتا سکیں گے۔

2- قرآن کریم کی روشنی میں کتابوں اور رسولوں کے نام گنوا سکیں گے۔

3- ديگر آسمانی کتابوں کے مقابلے میں قرآن کریم کے امتیازات کی نشان دہی کر سکیں گے۔

4- کتابیں اتارنے اور رسولوں کو بھیجنے کی نعمت کو محسوس کر سکیں گے۔

5- انبیا علیھم السلام کے اوصاف اور اعمال کی پیروی کریں گے۔

آسمانی کتابوں پر ایمان

رسولوں پر ایمان

دونوں پر ایمان کے اثرات

اولا : کتابوں پر ایمان :

1- کتابوں پر ایمان کا معنی اور حکم :

کتابوں پر ایمان کا مطلب : اس بات کی تصدیق اور ایمان ہے کہ اللہ نے لوگوں کی ہدایت اور ان کی دنیا و آخرت کی فلاح و کامرانی کے لیے اپنے رسولوں پر کتابیں اتاریں۔

لہذا اجمالی طور پر اللہ کی اتاری ہوئی ساری کتابوں پر ایمان رکھنا واجب ہے۔ اللہ تعالی نے کہا ہے : "اے ایمان والو! اللہ تعالیٰ پر، اس کے رسول (صلی اللہ علیہ وسلم) پر اور اس کتاب پر جو اس نے اپنے رسول (صلی اللہ علیہ وسلم) پر اتاری ہے اور ان کتابوں پر جو اس سے پہلے اس نے نازل فرمائی ہیں، ایمان لاؤ!" (سورۂ نساء : 136)۔

جب کہ ان کتابوں پر تفصیلا ایمان رکھنا ضروری ہے، جن کا ذکر قرآن میں ہوا ہے۔ وہ کتابیں ہیں : ابراہیم علیہ السلام کے صحیفے، داؤد علیہ السلام پر اترنے والی کتاب زبور، موسی علیہ السلام پر اترنے والی کتاب تورات، عیسی علیہ السلام پر اترنے والی کتاب انجیل اور آخری نبی محمد صلی اللہ علیہ و سلم پر اترنے والی کتاب قرآن۔

2- سب سے افضل کتاب :

ایک مسلمان کا اس بات پر ایمان ہونا چاہیے کہ قرآن :

اللہ کا کلام ہے اور اس میں بتائی گئی ساری باتیں صحیح ہيں۔

وہ تحریف اور تبدیلی سے محفوظ ہے۔ جب کہ پچھلی کتابیں تحریف کی شکار ہو گئيں۔ آج ہمارے پاس پچھلی کتابوں میں سے ایک بھی ایسی کتاب موجود نہیں ہے، جس کی نسبت ہم یقین کے ساتھ اللہ کی جانب کر سکیں۔

یہ اللہ کی سب سے عظیم اور سب سے آخری کتاب ہے نیز پچھلی کتابوں کو منسوخ کرنے والی کتاب ہے۔

قرآن خود معجزہ ہے کوئی اس جیسی کتاب لا نہيں سکتا۔

ثانیا : رسولوں پر ایمان لانا:

1) رسولوں پر ایمان کا معنی اور اس کا حکم :

رسولوں پر ایمان سے مراد اس بات کی تصدیق اور اقرار کرنا ہے کہ اللہ نے اپنی مخلوق کی جانب کچھ رسول بھیجے، جو ان کو صرف ایک اللہ کی عبادت کی جانب بلائیں اور اس سلسلے کی آخری کڑی ہمارے نبی محمد صلی اللہ علیہ و سلم ہيں۔

اجمالی طور پر تمام نبیوں پر ایمان رکھنا واجب ہے۔ چاہے ہمیں ان کے نام اور تعداد معلوم نہ بھی ہوں۔ اللہ تعالی کا فرمان ہے : "اور آپ سے پہلے کے بہت سے رسولوں کے واقعات ہم نے آپ سے بیان کیے ہیں اور بہت سے رسولوں کے نہیں بھی کیے اور موسیٰ (علیہ السلام) سے اللہ تعالیٰ نے صاف طور پر کلام کیا۔" (سورۂ نساء : 164)۔

جب کہ ان نبیوں پر تفصیلی ایمان رکھنا واجب ہے، جس کا ذکر قرآن کریم میں ہوا ہے۔ ان نبیوں کی تعداد پچیس ہے۔

اسی طرح اس بات پر ایمان رکھنا بھی ضروری ہے کہ انبیاء ہر گناہ اور بری صفت سے پاک ہوتے ہیں۔ ان کے بارے میں جھوٹ، خیانت اور کم عقلی وغیرہ جیسی بری باتوں اور کمیوں کا وہم و گمان بھی نہیں ہو سکتا۔

2- سب سے افضل رسول :

عزیز قاری! اس بات کو ذہن نشیں کرلیں کہ تمام رسولوں میں سب سے افضل رسول پانچ ہيں۔ انہی کو اولو العزم رسول کہا جاتا ہے۔ کیوں کہ انہوں نے اللہ کے دین کی دعوت کے لیے دیگر نبیوں اور رسولوں سے زیادہ صبر کیا ہے۔ ان کا ذکر اللہ تعالی نے اس آیت میں کیا ہے : "جب کہ ہم نے تمام نبیوں سے عہد لیا اور (بالخصوص) آپ سے اور نوح سے اور ابراہیم سے اور موسیٰ سے اور مریم کے بیٹے عیسیٰ سے، اور ہم نے ان سے (پکا اور) پختہ عہد لیا۔" (سورۂ احزاب : 7)۔

سب سے افضل رسول ہمارے نبی محمد صلی اللہ علیہ و سلم ہیں، جو آخری رسول ہيں اور جن کی رسالت قیامت تک آنے والے تمام لوگوں کے لیے عام ہے۔

ثالثا : کتابوں اور رسولوں پر ایمان لانے کے اثرات :

کتابوں اور رسولوں پر ایمان لانے کے کئی اثرات مرتب ہوتے ہیں۔ جن میں سے چند یہ ہیں :

1- اللہ کی رحمت پر یقین کہ اس نے ہماری ہدایت کے لیے رسول بھیجے اور کتابیں اتاریں۔

2) اللہ کی اتاری ہوئی کتابوں اور رسولوں کے بیان کے مطابق اللہ کی معرفت۔

3) کتابوں کی تعلیمات اور رسولوں کے عملی اسوہ کے مطابق بصیرت کے ساتھ اللہ کی عبادت۔

4) نبیوں کے اخلاق، اوصاف اور اعمال کی پیروی۔

سرگرمیاں

سرگرمی (1) : نبیوں کے نام لکھو :

اللہ تعالی نے سورۂ انعام کی آیت 83 سے 86 تک 18رسولوں کے نام بیان کیے ہيں۔ ان آیتوں کو پڑھیں اور ان میں ذکر کیے گئے نبیوں کے نام نکال کر لکھیں۔

سرگرمی (2) : تلاش کروں گا اور جواب دوں گا :

نبیوں کی زندگی اور صفات کے بہت سے پہلو ہیں تاکہ ان کى پیروی کی جائے۔ انہی پہلؤوں میں سے ایک پہلو اخلاق ہے۔ اللہ نے اپنے نبیوں کے اعلی اخلاق کے کئی نمونے بیان کیے ہیں۔ نبیوں کے جو اخلاق یاد ہيں، انھیں آپ نیچے دیے گئے چارٹ میں لکھیں :

اخلاق / نبی

فیاضی / ابراہیم علیہ السلام

صبر / ۔۔۔۔۔۔۔۔۔

اندازۂ قدر

سوال 1 : صحیح عبارت کے سامنے صحیح (✓) کا اور غلط عبارت کے سامنے غلط (×) کا نشان لگائیں :

1- اللہ کے نبی ابراہیم علیہ السلام سب سے افضل رسول ہيں۔ ()

2- زبور کتاب اللہ کے نبی داؤد علیہ السلام پر اتاری گئی تھی۔ ()

3- قرآن کریم میں تمام نبیوں کا نام آیا ہے۔

4- انبیاء کے اعمال اور اخلاق کی پیروی محال ہے۔

سوال 2 : قوسین (بریکٹ) کے درمیان سے صحیح جواب کا انتخاب کریں :

1- اس بات پر ایمان رکھنا واجب ہے کہ تمام انبیاء اس وصف سے متصف ہوتے ہیں :

(عقل کی تیزی - کثرت مال - بیمار کم ہونا)

2- اولو العزم رسولوں میں شامل ہیں :

(ابراہیم اور اسماعیل - نوح اور عیسی - آدم اور موسی)

3- ہم بیماری کی حالت میں صبر کے معاملے میں اس نبی کی اقتدا کریں گے :

(زکریا علیہ السلام - ایوب علیہ السلام - ادریس علیہ السلام)