مجالس تدارس القرآن للمبتدئين (سورة الفاتحة وقصار المفصّل)

مبتدی طلبہ کے لیے قرآنی مطالعہ کی مجلسیں (سورۃ فاتحہ اور قصار مفصل)

مقدمہ

کتاب اللہ کی خدمت اور اس کی ہدایت کی نشر واشاعت کی ذمہ داری کو محسوس کرتے ہوئے‘ معاشرہ کے مختلف طبقات پر مشتمل زیادہ سے زیادہ لوگوں کی ضرورت کے پیش نظر‘ بطور خاص حفظ قرآن کے حلقات اور مدارس کے ابتدائی درجات میں پڑھنے والے طلبہ کو سامنے رکھتے ہوئے...

(مؤسسۃ وقف النبأ العظیم) یہ سہل اور آسان کورس منظر عام پر لا رہا ہے‘ جس کا مقصد (مبتدی طلبہ کو سورۃ فاتحہ اور قصار مفصل) کا درس دینا ہے‘ تاکہ اس سنت مبارکہ کو امت کی زندگی میں اعلی پیمانے پر زندہ کرنے کے لیے یہ پپش رفت ایک روشن منارہ ثابت ہو‘ (قرآنی محفلوں) کو قائم کرنے کا یہ ایک عمدہ ترین وسیلہ ہے‘ جس کے فوائد وثمرات بے شمار ہیں‘ کیوںکہ ان محفلوں میں درس لینے والے حضرات بیش بہا اجر وثواب سے ہمکنار ہوتے ہیں‘ اور ان کے سامنے ایسے معانی ومفاہیم اور قرآنی تجلیات نمایاں ہوتی ہیں جو انہیں عظیم ترین مقصد تک پہنچاتی ہیں‘ وہ یہ کہ انسان قرآن مجید کی آیتوں سے عفت وپاکیزگی حاصل کرے۔

اللہ تعالی ہمیں اور آپ کو اپنی کتاب کی خدمت کرنے کی توفیق دے اور ہمیں اس کی دعوت دینے والا اور اس کے تقاضوں پر عمل کرنے والا بنائے۔

علمی کمیٹی برائے مؤسسہ وقف النبأ العظیم

مبتدی طلبہ کے لیے درس وتدریس کی محلفلیں قائم کرنے سے متعلق گائیڈ لائن

تمہید - اس کامقصددلچسپ تمہید کے ذریعہ مجلس کا آغاز کرنا ہے‘ مثال کے طور پر اس کے درج ذیل طریقے ہیں جن میں سے کسی ایک کو اختیار کیا جا سکتا ہے:

۱- کوئی ایسا مبنى بر حقیقت موقف ذکر کرنا جس کو آیتوں سے جوڑا جا سکے‘ یا ماضى قریب میں وقوع پذیر کسى پریشانی یا مسئلہ کو پیش کیا جائے جس کا حل ان آیتوں میں بیان کیا گیا ہو۔

۲- حوصلہ افزا سوالات پوچھے جائیں‘ یا کسى ایسے مسئلہ پر گفتگو کی جائے جس کی طرف اس سورت میں اشارہ کیا گیا ہو۔

۳- سورہ کا تعارف: بایں طور کہ سورہ کے اسماء سے واقفیت حاصل کی جائے‘ اس کی جائے نزول‘ موضوع‘ فضیلت‘ سبب نزول... اور اس سے متعلق تمام ضروری باتوں سے آگاہی حاصل کی جائے۔

(تنبیہ): "اس بات کا خیال رکھا جائے کہ لکچر دینے کے بجائے باہمی گفتگو اوربحث ومباحثہ کے انداز میں درس ہو"۔

پہلی مجلس - مجلس کا موضوعاتی عنوان

تلاوت - مجلس کا استاد ترتیل وتجوید کے ساتھ آیتوں کی تلاوت کرے‘ پھر کسی ایسے شخص سے تلاوت کرنے کو کہے جو تجوید کے ساتھ تلاوت کر سکتا ہو‘ اس کے بعد تمام حاضرین سے تلاوت کروائے۔

تفسیر - کتاب میں موجود مواد کی روشنی میں آیتوں کی مختصر تفسیر پیش کرے۔

تدبر وتزکیہ - یہ ایک جدول ہے جس میں "تدبر" کے ذریعہ درس وتدریس کا طریقہ واضح کیا گیاہے‘ "تزکیہ" سے متعلق پیغامات مستنبط کیے گئے ہیں اور ان سے اپنے اخلاق کو مزین کرنے کی دعوت دی گئی ہے‘ بایں طور کہ مختلف قسم کے سوالات پیش کیے گئے ہیں جن میں ہدایت کا پہلو اجاگر کیا گیا ہے‘ اس سے اپنے اخلاق کو آراستہ کرنے کی کیفیت پوچھی گئی ہے اور اس کے بعد دلیل کے بارے میں سوال کیا گیا ہے‘ اسی طرح دلیل ذکر کی گئی ہے‘ اخلاق کو آراستہ کرنے کی کیفیت بیان کی گئی ہے اور ہدایت کے بارے میں سوال کیا گیا ہے‘ اور دلیل وہدایت ذکر کرنے کے بعد اخلاق کو آراستہ کرنے کی کیفیت پوچھی گئی ہے‘ طلبہ کے اندر استنباط اور استدلال کی مہارت پیدا کرنے کے لیے استاد مختلف طریقوں سے سوال کرے۔

ہر سورت کے اخیر میں استاد طلبہ سے یہ مطالبہ کرے کہ (کتاب میں) مذکور ہدایات کے علاوہ نئی ہدایات مستنبط کریں اور آیتوں سے ان کی دلیل پیش کریں اور ان کے ذریعہ اخلاق کو آراستہ کرنے کی کیفیت بیان کریں۔

اس سورہ کو سیکھنے کے بعد ہم اس پر عمل کیسے کریں؟ - استاد طلبہ سے یہ مطالبہ کرے کہ وہ ان آیتوں سے ایسے عملی پہلو مستنبط کریں جن کا تعلق افراد اور معاشرہ سے ہو۔

گائیڈ لائن ختم ہوا

سورۃ الفاتحہ

تمہید

شوق آمیز مقدمہ: اس کے بہت سے طریقے ہیں‘ مثلا:

۱- طلبہ سے یہ سوال کرنا کہ سورۃ الفاتحہ کی وجہ تسمیہ کیا ہے۔

۲- اس سورۃ کی فضیلت۔

سورہ کا تعارف:

۱- سورۃ الفاتحہ کے کون کون سے نام ہیں؟

(فاتحة الكتاب)، (ام الكتاب)، (ام القرآن)، (سبع مثانی)، (القرآن العظيم)، سورة (الحمد)، اور سورة (الصلاة)، نیز اس کے اور بھی بہت سے نام ہیں جو تفسیر کی کتابوں میں مذکور ہیں جیسے سورة (الشفاء)، (الشافية)، (الرقية)، اور (الأساس)، وغیرہ[1]. [1] الكشف والبيان (1/126-129)، الجامع لأحكام القرآن (1/111-114)، أسماء سور القرآن وفضائلها (ص: 98- 128)۔

۲- سورۃ الفاتحہ کہاں نازل ہوئی؟

جمہور کی رائے یہ ہے کہ سورۃ الفاتحہ مکہ میں نازل ہوئی[2]‘ ایک قول یہ ہے کہ یہ سورت دو مرتبہ نازل ہوئی: ایک دفعہ مکہ میں اور دوسری دفعہ مدینہ میں[3]۔ [2] اسباب النزول للواحدی (ص: 20)، الكشف والبيان (1/89-90)، الجامع لاحكام القرآن (1/115)۔ [3] الكشف والبيان (1/90)، تفسير السمعاني (1/31)، الجامع لاحكام القرآن (1/115)۔

سورۃ الفاتحہ کا موضوع کیا ہے؟

سورۃ الفاتحہ قرآن مجید کی سب سے بڑی سورت ہے‘ کیوں کہ یہ توحید کی تمام قسموں پر مشتمل ہے‘ اس میں اللہ کی صفت کمال کا ذکر ہے اور سب سے نفع بخش دعا بھی اس میں شامل ہے۔[4] [4] دیکھیں: مصاعد النظر للإشراف بمقاصد السور (1/210)، مقاصد سور المفصل (ص:1)

۴- سورۃ الفاتحہ کی کیا فضیلتیں ہیں؟

یہ قرآن کی سب سے بڑی سورت ہے‘ اس کی دلیل یہ ہے کہ نبی صلی اللہ علیہ وسلم نے سعید بن المعلی رضی اللہ عنہ سے فرمایا: کیا مسجد سے نکلنے سے پہلے پہلے میں تجھے قرآن کریم کی ایک عظیم سورت کی تعلیم نہ دوں؟...آپ نے فرمایا: ﴿ٱلْحَمْدُ لِلَّـهِ رَبِّ ٱلْعَـٰلَمِينَ﴾ یہی سورت سبع مثانی ہے اور یہی قرآن عظیم ہے جو مجھے دیا گیا ہے۔[5] [5] اس حدیث کو بخاری نے اپنی صحیح (6/17) (4474) میں روایت کیا ہے۔

- یہ ایک نور ہے جو محمد صلی اللہ علیہ وسلم سے قبل کسی نبی کو نہیں دیا گیا‘ جیسا کہ حدیث میں آیا ہے (آپﷺ کو دو نور ملنے کی خوشخبری ہو جو آپﷺ سے پہلے کسی نبی کو نہیں دیے گئے: (ایک ) فاتحہ الکتاب (سورۃ الفاتحہ) اور (دوسری) سورۃ البقرۃ کی آخری آیات) ۔[6] [6] اس حدیث کو امام مسلم نے اپنی صحیح (1/554) (806). میں روایت کیا ہے۔

- یہ ایک رقیہ ہے جو اللہ کی اجازت سے شفابخش ثابت ہوتا ہے‘ جیسا کہ حدیث میں ہے: (اسے کیسے پتہ چلا کہ وہ رقیہ ہے)[7] [7] اس حدیث کو بخاری نے اپنی صحیح(6/187) (5007) میں روایت کیا ہے۔

پہلی مجلس: اللہ تعالی کے لئے عبودیت کو پورا بجا لانا

تلاوت:

- اللہ تعالیٰ نے فرمایا: شروع اللہ کے نام سے جو بڑا مہربان نہایت رحم والا ہے ساری تعریف اللہ کے لیے ہے جو سارے جہان کا رب ہے۔ وہ بڑا مہربان نہایت رحم کرنے والا ہے، بدلے کے دن کا مالک ہے۔ ہم بس تیری ہی عبادت کرتے ہیں اور بس تجھ ہی سے مدد چاہتے ہیں۔ ہمیں سیدھے راستے کی ہدایت عطا فرما، ان لوگوں کا راستہ جن پر تونے انعام کیا ہے، نہ کہ ان لوگوں کا (راستہ) جن پر تیرا غضب نازل ہوا اور نہ ان کا جو گمراہ ہوئے۔ سورۃ الفاتحہ: 1-7

تفسیر:

(1) {بِسْمِ اللهِ}... اللہ کے نام سے مدد طلب کرتے ہوئے میں تلاوت کا آغاز کرتا ہوں۔

(1) {الرَّحْمنِ}... جس کی رحمت تمام مخلوقات کو شامل ہے۔

(1) {الرَّحِيمِ}... جو مومنوں پر خصوصی رحمت کرتا ہے۔

(2) {الحمد لله}... ہر قسم کی تعریفات اور عظمت وکمال کی صفات صرف اسی ایک اللہ کے لیے لائق وزیبا ہیں‘ اس کے سوا کسی اور کے لیے نہیں۔

(2) {رَبِّ} ...وہ ہر چیز کا پالنہار‘ خالق اور مدبر ہے‘ رب کے معنی ہیں: اپنی نعمتوں کے ذریعہ اپنی مخلوق کی تربیت کرنے والا۔

(2) {الْعَالَمِينَ} ... اللہ تعالی کے سوا ہر چیز۔

(4) {مالك} ... یہ اللہ تعالی کی تعریف ہے کہ وہ قیامت کے دن ہر چیز کا مالک ہوگا بایں طور کہ کسی بھی جان کو کسی بھی جان کے لیے کسی بھی چیز کی ملکیت حاصل نہیں ہوگی۔

(4) {يَوْمِ الدِّينِ}... جزا وسزا اور حساب وکتاب کا دن۔

(5) {إِيَّاكَ نَعْبُدُ} ... ہم تیری ہی عبادت کرتے ہیں۔

(5) {وإِيَّاكَ نَسْتَعِينُ} ... اپنی ضروریات کی تکمیل کے لیے تیرے سوا کسی اور سے مدد طلب نہیں کرتے۔

(6) { اهدنا}... ہمیں صراط مستقیم کی ہدایت عطا فرما‘اور ہمیں اس راہ پر چلا‘ اس پر ثابت قدم رکھ اور ہماری ہدایت میں اضافہ فرما۔

(6) {الصِّرَاطَ المُستَقِيمَ} ... ’’صراط مستقیم‘‘ سے مراد ایسا واضح راستہ ہے، جس میں کوئی ٹیڑھا پن نہ ہو۔ در اصل وہ مذہب اسلام ہی ہے، جسے دے کر اللہ تعالیٰ نے محمد رسول اللہﷺ کو مبعوث فرمایا۔

(7) {صراط الذين أنعمت عليهم}... ان لوگوں کی راہ جن پر تو نے انعام کیا۔

(7) {غَيرِ المَغضُوبِ عَلَيهِمْ} ... ( نہ کہ ان لوگوں کی راہ جن پر تیرا غضب نازل ہوا) یعنی یہود اور علم پر عمل نہ کرنے میں ان کی مشابہت اختیار کرنے والے لوگ۔

(7) {الضَّالِّينَ} ... (اور نہ گمراہ ہونے والوں کی راہ) یعنی نصاری اور بغیر علم کے عمل کرنے میں ان کی مشابہت اختیار کرنے والے لوگ۔ [8] [8] المختصر في تفسير القرآن الكريم (ص: 1)

تدبر (غور وفکر) اور تزکیہ (نفس کی پاکیزگی):

تدبر

تزکیہ

ہم اس سورہ سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

سب سے بڑی اور بابرکت کتاب کا آغاز بسم اللہ سے کیا گیا ہے‘ بنابریں اس کے علاوہ دیگر امور کا آغاز بدرجہ اولی اللہ کے نام سے ہونا چاہئے۔

(شروع کرتا ہوں اللہ کے نام سے، جو بڑا مہربان اور نہایت رحم کرنے والا ہے)

یعنی ہم اپنے تمام امور کی ابتدا اللہ کے ذکر سے کریں۔

تمام تعریفات اپنی تمام تر قسموں اور اجناس کے ساتھ صرف ایک اللہ پاک کے لیے زیبا ہیں‘ جس کے سوا نہ کوئی رب ہے اور نہ کوئی معبود برحق۔

(سب تعریف اللہ کے لئے ہے جو تمام جہانوں کا پالنے والا ہے)

یعنی کہ اللہ کے اسماء وصفات میں ہم اس کے کمال کو محسوس کریں اور اس کی عظیم نعمتوں پر اس کی تعریف کریں اور ان میں سب سے بڑی نعمت قرآن ہے۔

اللہ پاک کی ربوبیت اور بادشاہت اس کی رحمت سے مربوط ہیں‘ چنانچہ وہ اپنی کامل ربوبیت کے باوجود اپنے بندوں پر ان کی ماؤں سے بھی زیادہ مہربان ہے۔

(بڑا مہربان نہایت رحم کرنے والا ہے)

- ہم اس کی رحمت کی مدد طلب کریں‘ بطور خاص اپنی مشکل گھڑیوں میں‘ مثلا ان حالات میں جن میں ہم آج زندگی گزار رہے ہیں۔

آخرت كی زندگی میں اللہ تعالی مومنوں پر جو فضل واحسان کرے گا اس سے ہم خوش ہوں۔

اللہ پاک ہی مالک حقیقی ہے‘ اس کے سوا کوئی مالک نہیں‘ یہ حقیقت قیامت کے دن مخلوقات کے سامنے عیاں ہوجائے گی‘ جب ان کی ساری ملکیتیں ختم ہوجائیں گی۔

(بدلے کے دن (یعنی قیامت) کا مالک ہے)

ہم جزا وسزا اور حساب وکتاب کے دن کی تیاری کریں‘ بایں طور کہ نیک اعمال کریں اور برائیوں سے دور رہیں۔

عبادت الہی کی بجا آوری میں ہم اسی وقت کامیاب ہوسکتے ہیں جب اللہ سے مدد طلب کریں اور اسی پر بھروسہ رکھیں۔

(ہم تیری ہی عبادت کرتے ہیں اور تجھ ہی سے مدد طلب کرتے ہیں)

ہم اپنی زندگی میں صرف ایک اللہ کی عبادت بجا لائیں اور اس کے لیے اسی سے مدد طلب کریں۔

ہدایت اللہ پاک کی جانب سے ملتی ہے‘ رہنمائی اور رہبری صرف اللہ پاک ہی کرتا ہے‘ صرف وہی یکتا پروردگار دلوں کو ہدایت دیتا ہے۔

(ہمیں سیدھے راستے کی ہدایت عطا فرما)

ہم اللہ پاک سے ہدایت کی دعا کریں‘ کہ وہ ہمیں حق وراستی‘ خیر وبھلائی اور فلاح وکامرانی کے راستے کی رہنمائی فرمائے‘ جو ہمیں اس کی خوشنودی اور جنت سے سرفرازی تک پہنچا سکے‘ اور یہ بھی دعا کرتے ہیں کہ ہمیں اس راہ پر ثابت قدم رکھے۔

حق کا راستہ افراط وتفریط کے درمیان کا راستہ ہے‘ وہ دو گمراہیوں کے درمیان راہ ہدایت ہے‘ اس کا دار ومدار علم اور عمل کو بجا لانے پر ہے۔

(ان لوگوں کا راستہ جن پر تونے انعام کیا ہے، نہ کہ ان لوگوں کا (راستہ) جن پر تیرا غضب نازل ہوا اور نہ ان کا جو گمراہ ہوئے)

- یعنی ہم ہدایت کی رہنمائی کرنے والے ہدایت یافتگان اور عمل کرنے والے اہل علم کی راہ پر چلیں۔

- گمراہی کے دونوں راستوں سے ہوشیار رہیں‘ یعنی بغیر عمل کے علم کی راہ اور بغیر علم کے عمل کی راہ سے۔

اس سورت سے ہدایت کی اور بھی باتیں مستنبط کریں‘ ساتھ ہى جو آیت اس پر دلالت کرتی ہے اس کو بیان کریں‘ نیز اس میں جو اخلاقی پہلو پنہاں ہے اس پر بھی روشنی ڈالیں۔

اس سورت کو سیکھنے کے بعد ہم اس پر عمل کیسے کریں؟

اپنی ذات کے تئیں:

- میں اللہ تعالی کے اسمائے گرامی کو سیکھنے کی پوری کوشش کروں گا تاکہ اس کی روشنی میں اپنی تربیت کروں اور رسول اللہ صلی اللہ علیہ وسلم نے دخول جنت کا جو وعدہ فرمایا ہے‘ اس سے سرفراز ہوسکوں‘ آپ صلی اللہ علیہ وسلم نے فرمایا: "اللہ کے ننانوے یعنی ایک کم سو نام ہیں، جو ان کو شمار کرے گا، وہ جنت میں داخل ہوگا"[9]. [9] اس حدیث کو بخاری نے اپنی صحیح (3/198) (2736) میں، اور مسلم نے اپنی صحیح(4/2063) (2677). میں نقل کیا ہے۔

...

اپنے معاشرہ کے تئیں:

- میں اپنے اہل خانہ اور بھائیوں کو راہ مستقیم پر چلنے کی دعوت دوں گا‘ بایں طور کہ اللہ کی کتاب اور رسول صلی اللہ علیہ وسلم کی سنت کو مضبوطی سے تھامے رہیں اور ان کے تقاضوں کے مطابق عمل کریں‘یہ سب کچھ بدلے کے دن کی تیاری کے طور پر کریں گے‘ جس دن کہ مال اور اولاد کچھ کام نہ آئے گی لیکن فائدہ والا وہی ہوگا جو اللہ تعالی کے سامنے بے عیب دل لے کر جائے‘ اور اس بات کى دعوت دون گا کہ ہم ان یہودیوں کی طرح نہ ہوجائیں جنہوں نے علم حاصل کرنے کے بعد عمل کرنا چھوڑ دیا اور نہ ان نصاری کی طرح ہوجائیں جنہوں نے بغیر علم کے عمل کیا‘ بلکہ ہم ان لوگوں کی صف میں شامل ہو جائیں جن پر اللہ نے انعام فرمایا‘ ان کے بارے میں اللہ تعالی نے ارشاد فرمایا: "اور جو بھی اللہ تعالیٰ کی اور رسول (صلی اللہ علیہ وسلم) کی فرماں برداری کرے وه ان لوگوں کے ساتھ ہوگا جن پر اللہ تعالیٰ نے انعام کیا ہے، جیسے نبی اور صدیق اور شہید اور نیک لوگ۔ یہ بہترین رفیق ہیں"۔[النساء: 69]

...

سورۃ الضحیٰ

تمہید

شوق آمیز مقدمہ: اس کے بہت سے طریقے ہیں‘ مثلا:

۱- طلبہ سے ان واقعات کے بارے میں سوال کرنا جن میں نبی صلی اللہ علیہ وسلم کے تئیں اللہ تعالی کی توجہ اور عنایت ظاہر ہوئی۔

۲- سورت کا سبب نزول

سورت کا تعارف:

۱- سورۃ الضحى کہاں نازل ہوئی؟

سب کا اتفاق ہے کہ سورۃ الضحى مکہ میں نازل ہوئی [10] [10] دیکھیں: المحرر الوجيز (5/493)، زاد المسير (4/456)، الجامع لاحكام القرآن (20/91)

۲- سورۃ الضحى کا سبب نزول کیا ہے؟

صحیح بخاری میں ثابت ہے کہ رسول اللہ صلی اللہ علیہ وسلم بیمار ہو گئے اور دو یا تین راتیں نہ اٹھ سکے تو ایک عورت آئی اور کہنے لگی: اے محمد! میرا خیال ہے کہ تجھے تیرے شیطان نے چھوڑ دیا ہے، کیونکہ دو یا تین راتوں سے میں نے اسے تمہارے پاس نہیں دیکھا ہے، اس پر اللہ تعالٰی نے یہ آیات نازل فرمائیں: قسم ہے چاشت کے وقت کی اور قسم ہے رات کی جب چھا جائے نہ تو تیرے رب نے تجھے چھوڑا ہے اور نہ وه بیزار ہو گیا ہے [الضحى] [11]. [11] اس حدیث کو بخاری نے اپنی صحیح (6/172) (4959) میں، اور مسلم نے اپنی صحیح (3/1422) (1797) میں روایت کیا ہے۔

۳- سورۃ الضحى کا موضوع کیا ہے؟

اللہ تعالی نے اس عظیم سورہ میں چاشت کے وقت اور رات کے وقت کی قسم کھائی ہے تاکہ ولادت کے وقت سے ہی مکہ میں نبی صلی اللہ علیہ وسلم پر رب تعالی کی جو کامل عنایت اور توجہ تھی‘ اسے ظاہر کرسکے‘ بایں طور کہ اللہ نے آپ کی کفالت کی‘ آپ کو پناہ دیا‘ آپ کو ہدایت سے نوازا اور آپ پر یہ انعامات کیے‘ قسم کھانے کی وجہ یہ ہے کہ اس سورت کی تمام آیتوں میں نبى صلى اللہ علیہ وسلم اللہ کی عنایت وتوجہ اسی طرح نمایاں ہوسکے جس طرح چاشت کے روشن ترین وقت میں سورج روشن وتاباں ہوتا ہے‘ سورت کے اخیر میں اللہ تعالی نے آپ سے یہ مطالبہ کیا ہے کہ ان نعمتوں پر اللہ کا شکر ادا کیا کریں۔[12] [12] دیکھیں: مصاعد النظر للاشراف بمقاصد السور (3/207)، اسماء سور القرآن وفضائلها (ص:558)

دوسری مجلس: نبی صلی اللہ علیہ وسلم پر رب تعالی کی عنایت وتوجہ

تلاوت:

ارشادِ باری تعالیٰ ہے: قسم ہے چاشت کے وقت کی اور قسم ہے رات کی جب چھا جائے نہ تو تیرے رب نے تجھے چھوڑا ہے اور نہ وه بیزار ہو گیا ہے یقیناً تیرے لئے آخرت کی زندگی دنیا سے بہتر ہوگى تجھے تیرا رب بہت جلد (انعام) دے گا اور تو راضی (وخوش) ہوجائے گا۔ کیا اس نے تجھے یتیم پاکر جگہ نہیں دی اور تجھے راہ بھولا پاکر ہدایت نہیں دی اور تجھے نادار پاکر تونگر نہیں بنا دیا؟ پس یتیم پر تو بھی سختی نہ کیا کر اور نہ سوال کرنے والے کو ڈانٹ ڈپٹ اور اپنے رب کی نعمتوں کو بیان کرتا ره۔ سورۃ الضحیٰ

تفسیر:

(1) {والضحى} اللہ نے قسم کھائى ہے دن کے ابتدائی حصہ کی۔

(2) {والليل إذا سجى } اور اللہ نے قسم کھائى ہے رات کی جب وہ تاریک ہوجائے اور لوگ حرکت وعمل چھوڑ کر پرسکون ہوجائیں۔

(3) {ما ودّعك ربك وما قلى } اے رسول! نہ تیرے رب نے تجھے چھوڑا اور نہ تجھ سے بیزار ہوا‘ جیسا کہ وحی رکنے کے وقفہ میں مشرکین کہا کرتے تھے۔

(4) {وللآخرة خير لك من الأولى} آخرت کی زندگی آپ کے لیے دنیا سے بہتر ہے‘ کیوں کہ اس میں ہمیشہ رہنے والی نعمت ہوگی جو کبھی ختم نہ ہوگی۔

(5) {ولسوف يعطيك ربك فترضى } آپ کا رب آپ کو اور آپ کی امت کو اس قدر اجر عظیم سے نوازے گا کہ آپ اور آپ کی امت اپنے رب کی نوازش سے خوش ہوجائے گی۔

(6) {ألم يجدك يتيما فآوى} آپ کو بچپن میں یتیم پایا تو آپ کو ماوی وملجا عطا کیا‘ بایں طور کہ آپ کے دادا عبد المطلب کو آپ پر شفیق ومہربان بنادیا‘ اور ان کی وفات کے بعد آپ کے چچا ابو طالب آپ پر مہربان ہوگئے۔

(7) {ووجدك ضالا فهدى } آپ کو کتاب اور ایمان سے نا آشنا پایا تو آپ کو کتاب اور ایمان کی ایسی تعلیم دی جو آپ نہیں جانتے تھے۔

(8) {ووجدك عائلا فأغنى } آپ کو فقیر ونادار پایا تو آپ کو مالدار وبے نیاز کردیا۔

(9) { فأما اليتيم فلا تقهر } بنابریں جو شخص بچپن میں والد کے سایہ سے محروم ہو گیا ہو اس کے ساتھ برا سلوک نہ کریں اور نہ اسے ذلیل وخوار کریں۔

(10) { وأما السائل فلا تنهر } ضرورت مند سائل کو ڈانٹ ڈپٹ نہ کریں۔

(11) {وأما بنعمة ربك فحدّث } آپ پر اللہ کی جو نعمتیں ہیں‘ ان کا شکریہ ادا کریں اور انہیں بیان کریں- [13] [13] مختصر تفسير القرآن الكريم (ص:596)-

تدبر اور تزکیہ:

تدبر

تزکیہ

ہم اس سورت سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

اللہ تعالی اپنے نبی محمد صلی اللہ علیہ وسلم سے محبت رکھتا ہے‘ اللہ تعالی نے نہ آپ کو ترک کیا اور نہ کبھی ترک کرے گا‘ بلکہ اللہ آپ کی مدد ضرور کرے گا اور آپ کے دین کو غلبہ عطا کرے گا۔

(نہ تو تیرے رب نے تجھے چھوڑا ہے اور نہ وه بیزار ہو گیا ہے)

ہمیں اللہ کے وعدہ پر یقین رکھنا چاہئے کہ وہ اپنے بندوں اور ولیوں کو بے یار ومددگار نہیں چھوڑے گا‘ بلکہ وہ ان کے ساتھ ہے‘ ان کی تائید اور مدد کرتا ہے‘ اگرچہ یہ تائید ونصرت ان کے لئے دیر سے ہو۔

دنیا وآخرت میں بہتر انجام اللہ کے رسولوں اور اس کے مومن بندوں کے لیے ہی ہے۔

(یقیناً آخرت کی زندگی تمہارے کے لیے دنیا سے بہتر ہے)

- ہمیں اللہ کے اس وعدہ پر یقین ہونا چاہئے کہ بہتر انجام متقیوں کا ہی ہے نصرت ومدد اور عزت وتمکین کی شکل میں۔

- ہم اپنے دلوں کو آخرت سے وابستہ رکھیں کیوں کہ آخرت دنیا اور اس کے مظاہر سے بہتر ہے۔

نبی صلی اللہ علیہ وسلم پر اللہ کی نوازش دنیا سے آخرت تک پھیلی ہوئی ہے جو آپ کو راضی اور خوش کرنے والى ہے‘ اس نوازش میں اللہ تعالی کا آپ کی امت کو عزت واکرام سے نوازنا بھی شامل ہے۔

(تجھے تیرا رب بہت جلد (انعام) دے گا اور تو راضی (وخوش) ہوجائے گا)

- ہم اللہ تعالی سے دعا کرتے ہیں کہ ہمیں اپنے وسیع فضل واحسان سے نوازے اور ہمیں اپنی دی ہوئی روزی سے خوش کردے۔

- ہمیں رضائے الہی کی حصولیابی کے لیے تگ ودو کرنی چاہئے تاکہ قیامت کے دن ہم سعادت سے بہرہ ور ہوں۔

یتیم کی پرورش اور کفالت کی اہمیت اجاگر ہوتی ہے اور معلوم ہوتا ہے کہ نبی صلی اللہ علیہ وسلم ہر یتیم کے لیے اسوہ ونمونہ اور باعث تسلی ہیں۔

(کیا اس نے تجھے یتیم پاکر جگہ نہیں دی)

ہمیں یقین رکھنا چاہئے کہ یتیموں کو اللہ تعالی کی عنایت حاصل ہوتی ہے اور اللہ پاک ان کے لیے پرورش وپرداخت کے اسباب مہیا فرما دیتا ہے۔

یتیم کو مغلوب وبےبس بنانا‘ اسے حقیر جاننا اور اس کے ساتھ بد سلوکی کرنا حرام ہے۔

(پس یتیم پر تو بھی سختی نہ کیا کر)

ہمیں یتیم کی عزت اور اس پر رحم وکرم کرنا چاہئے‘ اس کے ساتھ بھلائی اور حسن سلوک روا رکھنا چاہئے او اس کے ساتھ اچھا برتاؤ کرنے کے لئے باہم ایک دوسرے کو نصیحت کرنا چاہئے ۔

سائل کو سوال کرنے کا حق ہے‘ خواہ علم کا سوال ہو یا مال کا سوال‘ اس لیے اسے ڈانٹنا یا اس پر سختی برتنا جائز نہیں ہے۔

(اور نہ سوال کرنے والے کو ڈانٹ ڈپٹ)

سائل کو بری بات کہہ کر ڈانٹ ڈپٹ نہیں کرنی چاہئے (نرم بات کہنا اور معاف کردینا اس صدقہ سے بہتر ہے جس کے بعد ایذا رسانی ہو)[البقرة: 263]

مالداری وبے نیازی دینے والا اللہ تعالی ہے‘ اللہ نے اپنی نبی کو بے نیاز کردیا بایں طور کہ آپ کے لیے اس شخص کو مسخر فرمایا جو آپ کے لیے کافی ہو جیسے خدیجہ رضی اللہ عنہا‘ اور اللہ نے آپ کو قرآن کے ذریعہ بے نیازی عطا کی اور آپ کو اس کے ذریعہ حقیقی بے نیازی کے عظیم ترین درجہ پر فائز کیا۔

(اور تجھے نادار پاکر تونگر نہیں بنا دیا؟)

ہمیں اس بات پر ایمان رکھنا چاہئے کہ اللہ پاک ہی ہمیں بے نیازی عطا کرتا ہے‘ اس کی بے نیازی صرف مال ودولت کی کثرت سے نہیں بلکہ علم سے ملتی ہے اور یہ سب سے بڑی بے نیازی ہے۔

تمام تر نعمتیں اللہ کی جانب سے حاصل ہوتی ہیں اور ان کا شکر ادا کرنا واجب ہے‘ نعمتِ قرآن کا شکر یہ ہے کہ ہم اس کی نشر واشاعات اور اس کی تبلیغ کریں۔

(اور اپنے رب کی نعمتوں کو بیان کرتا ره)

ہمارے اوپر اللہ کی جو نعمتیں ہیں ان کا شکر ادا کرتے ہوئے انہیں بیان کریں‘ بطور خاص نعمتِ قرآن کا شکر ادا کریں‘ چنانچہ لوگوں کو اس کی تعلیم دیں اور اس کی ہدایت کو نشر کریں۔

اس سورت سے ہدایت کی اور بھی باتیں مستنبط کریں‘ ساتھ ہی جو آیت اس پر دلالت کرتی ہے اس کو بیان کریں‘ نیز اس میں جو اخلاقی پہلو پنہاں ہے اس پر بھی روشنی ڈالیں۔

اس سورت کو سیکھنے کے بعد ہم اس پر عمل کیسے کریں؟

اپنی ذات کے تئیں:

- میرے اوپر اللہ کی جو نعمتیں ہیں ان کا شکر ادا کرنے میں سبقت کروں‘ چنانچہ اگر میں مالدار ہوں تو یتیمیوں اور فقیروں میں اپنامال صدقہ کروں اور اگر میں ذی علم ہوں تو لوگوں کے درمیان علم پھیلاؤں‘ کیوں کہ نبی صلی اللہ علیہ وسلم کی حدیث ہے: "حسد صرف دو صورتوں میں جائز ہے، ایک تو یہ کہ کسی شخص کو اللہ نے دولت دی ہو اور اس نے اس کو راہ حق میں خرچ کرنے پر لگا دیا ہو اور دوسرا یہ کہ کسی شخص کو اللہ نے حکمت ( کی دولت ) سے نوازا ہو اور وہ اس کے ساتھ فیصلہ کرتا ہو اور ( لوگوں کو) اس حکمت کی تعلیم دیتا ہو"۔[14] [14] اس حدیث کو بخاری نے اپنی صحیح (1/25) (73)میں، اور مسلم نے اپنی صحیح(1/559) (816) میں روایت کیا ہے۔

...

اپنے معاشرہ کے تئیں:

اپنے دوستوں کے ساتھ اللہ تعالی کے کسی گھر میں بیٹھ کر سورۃ الضحى کی تلاوت کروں گا اور اس پر غور وفکر کروں گا‘ اور انہیں اللہ کی نعمتوں کا شکر ادا کرنے کی رغبت دلاؤں گا (اور اس کا طریقہ بتاؤں گا کہ) یتیم کی عزت کریں‘ سائل کو نوازیں اور انہیں ڈانٹ ڈپٹ نہ کریں‘ کیوں کہ اللہ نے اس شخص کی مذمت بیان کی ہے جو نہ یتیم کی عزت کرتا ہے اور نہ مسکین کو نوازتا ہے‘ فرمان باری تعالی ہے: (ایسا ہرگز نہیں بلکہ (بات یہ ہے) کہ تم (ہی) لوگ یتیموں کی عزت نہیں کرتے. اور مسکینوں کے کھلانے کی ایک دوسرے کو ترغیب نہیں دیتے)۔ سورۃ الفجر

...

سورۃ الشرح

تمہید

شوق آمیز مقدمہ:

اس کے مختلف طریقے ہیں‘ مثلا:

۱- طلبہ سے ان نوازشوں کے بارے میں سوال کرنا جن سے اللہ نے اپنے نبی صلی اللہ علیہ وسلم کو نوازا۔

۲- سورت کا سبب نزول

سورت کا تعارف:

۲- سورۃ الشرح کہاں نازل ہوئی؟

سب کا اتفاق ہے کہ سورۃ الشرح مکہ میں نازل ہوئی [15] [15] النكت والعيون (6/296)، المحرر الوجيز (5/496)، زاد المسير (4/460)

۲- سورۃ الشرح کا سبب نزول کیا ہے؟

جب مشرکوں نے مسلمانوں کو فقر ومحتاجگی کی عار دلائی تو یہ سورت نازل ہوئی۔[16] [16] الكشف والبيان (10/232)، لباب النقول في أسباب النزول (ص: 213)

۳- سورۃ الشرح کے کون کون سے نام ہیں؟

(سورة الشرح)[17]، (ألم نشرح) [18]، (الانشراح)[19]۔ [17] الكشف والبيان (10/232)، النكت والعيون (6/296) [18] صحيح بخاری(6/172)، كتاب تفسير القرآن، باب "ما ودّعك ربك وما قلى"، جامع البيان (24/491)، مفاتيح الغيب (32/205) [19] مفاتيح الغيب (31/201)، تفسير الايجي (4/506)، مزید دیکھیں: أسماء سور القرآن وفضائلها (ص: 562)

4- سورۃ الشرح کا موضوع کیا ہے؟

اللہ کی ان نوازشوں کی وضاحت جنہیں اللہ نے اپنے نبی صلی اللہ علیہ وسلم پر مکمل فرمائی‘ وہ رب جس نے آپ پر نعمت کا آغاز کیا وہ آپ سے اپنے فضل کو روکنے والا نہ تھا‘ سورۃ الضحى میں جب اللہ نے آپ کو نعمتوں پر شکر ادا کرنے کا حکم دیا تو اس کے بعد آپ کے صدر مبارک کو کھول دیا۔

تیسری مجلس: نبی صلی اللہ علیہ وسلم پر نعمتوں کا اتمام

تلاوت:

ارشادِ باری تعالیٰ ہے: کیا ہم نے تیرا سینہ نہیں کھول دیا. اور تجھ پر سے تیرا بوجھ ہم نے اتار دیا. جس نے تیری پیٹھ توڑ دی تھی. اور ہم نے تیرا ذکر بلند کر دیا. پس یقیناً مشکل کے ساتھ آسانی ہے. پس یقیناً مشکل کے ساتھ آسانی ہے. پس جب تو فارغ ہو تو عبادت میں محنت کر. اور اپنے رب ہی کی طرف دل لگا۔ سورۃ الشرح: ١ - ٨

تفسیر:

(1) {ألم نشرح لك صدرك} اللہ تعالی نے آپ کا دل کھول دیا اور آپ کے لیے وحی کو حاصل کرنا محبوب بنا دیا۔

(2) {ووضعنا عنك وزرك} اور ہم نےآپ کے کندھوں سے گناہ کا بوجھ اتار دیا۔

(3) {الذي أنقض ظهرك} جس نے آپ کو تھکا دیا یہاں تک کہ قریب تھا کہ آپ کی پیٹھ ٹوٹ جائے۔

(4) {ورفعنا لك ذكرك} ہم نے آپ کا ذکر بلند کردیا‘ چنانچہ اذان اور اقامت وغیرہ میں آپ کا ذکر ہونے لگا۔

(5) {فإن مع العسر يسرا} تنگی اور سختی کے ساتھ آسانی اور کشادگی ہے۔

(6) {إن مع العسر يسرا} تنگی کے ساتھ آسانی اور فراخی ہے‘ جب آپ کو اس بات کا یقین ہے تو آپ اپنی قوم کی ایذا رسانی سے خائف نہ ہوں اور نہ اس کی وجہ سے دعوت الى اللہ کو ترک کریں۔

(7) {فإذا فرغت فانصب} جب اپنے اعمال سے فارغ ہوجائیں تو اپنے رب کی عبادت میں محنت کریں۔

(8) {وإلى ربك فارغب} اور اپنی رغبت اور ارادہ کو ایک اللہ کی طرف ہی مرکوز رکھیں[20] [20] المختصر في تفسيرالقرآن الكريم (ص:596-597).

تدبر اور تزکیہ:

تدبر

تزکیہ

ہم اس سورہ سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

اللہ پاک کا اپنے نبی محمد صلی اللہ علیہ وسلم پر یہ احسان ہے کہ اللہ نے آپ کو شرح صدر سے نوازا۔

(کیا ہم نے تیرا سینہ نہیں کھول دیا).

ہم اللہ سے دعا کریں کہ اللہ تعالی اپنے اوپر ایمان لانے‘ اپنی اطاعت کرنے اور اپنی مرضی کے کاموں میں بڑھ چڑھ کر حصہ لینے کے لیے ہمارا دل کھول دے۔

اللہ پاک کا اپنے نبی محمد صلی اللہ علیہ وسلم پر یہ احسان ہے کہ اللہ نے آپ کے کندھے سے بوجھ اتاردیا۔

(اور تجھ پر سے تیرا بوجھ ہم نے اتار دیا جس نے تیری پیٹھ توڑ دی)

ہمیں گناہوں سے دور رہنا چاہئے کیوں کہ گناہ دل کی تنگی اور زندگی کی کدورت کا سبب ہے۔

اللہ پاک کا اپنے نبی محمد صلی اللہ علیہ وسلم پر یہ احسان ہے کہ اللہ نے آپ کا ذکر بلند فرمایا۔

(اور ہم نے تیرا ذکر بلند کر دیا)

ہمیں علمی اور عملی طور پر ہمیشہ اللہ پاک کا ذکر کرتے رہنا چاہئے تاکہ اللہ پاک کے نزدیک بلند مقام سے سرفراز ہوں اور اپنے نبی صلی اللہ علیہ وسلم کی رفاقت سے بہرہ ور ہوسکیں۔

اللہ تعالی اپنے بندوں پر بڑا مہربان ہے‘ تنگی کے بعد فراخی اور سختی کے بعد آسانی سے نوازتا ہے۔

(یقینا مشکل کے ساتھ آسانی ہے۔ بے شک مشکل کے ساتھ آسانی ہے)

- ہمیں اللہ تعالی پر بھروسہ اور توکل رکھنا چاہئے اور اس کی رحمت وفراخی سے مایوس نہیں ہونا چاہئے۔

- ہمیں یہ یقین رکھنا چاہئے کہ اللہ پاک ہر غم کے بعد آسانی اور ہر تنگی کے بعد فراخی عطا کرتا ہے‘ اس لیے ہمیں ان حالات سے مایوس نہیں ہونا چاہئے جو ہمیں یا ہماری امت کو لاحق ہیں‘ کیوں کہ مشكل كشائى بہت قریب ہے۔

- خالی اوقات کو اچھے کاموں میں استعمال کرنا ایک بڑی نعمت ہے‘ اس لیے ہمیں ان اوقات کو اللہ پاک کی اطاعت میں لگانا چاہئے۔

(پس جب تو فارغ ہو تو عبادت میں محنت کر)

ایسا نہ ہو کہ ہم توکل کے نام پر دنیاوی امور سے غافل ہوجائیں‘ بلکہ ہمارے اوپر واجب ہے کہ ہم اپنے اوقات کا صحیح استعمال کریں‘ باعزت زندگی گزارنے اور روئے زمین کو اللہ کے پسندیدہ کاموں سے آباد کرنے کی کوشش کریں۔

اللہ تعالی کی طرف راغب ہونا ایک عظیم ترین عبادت اور مہتم بالشان اطاعت ہے‘ اللہ پاک تن تنہا تمام تر عبادتوں کا مستحق ہے۔

(اور اپنے پروردگار ہی کی طرف دل لگا)

ہمیں اپنی تمام عبادتوں کو صرف اللہ پاک کے لیے خالص رکھنا چاہئے‘ اسی کی رضا کی طلب ہونى چاہئے اور اسی کے اجر وثواب کی امید کرنی چاہئے۔

اس سورت سے ہدایت کی اور بھی باتیں مستنبط کریں‘ ساتھ جو آیت اس پر دلالت کرتی ہے اس کی وضاحت کریں‘ نیز اس میں جو اخلاقی پہلو پنہاں ہے اس پر بھی روشنی ڈالیں۔

اس سورت کو سیکھنے کے بعد ہم اس پر عمل کیسے کریں؟

اپنی ذات کے تئیں:

- میں اپنے خالی اوقات کو اللہ کی عبادت میں لگاؤں گا‘ اس کی اطاعت کو راحت وآرام پر ترجیح دوں گا‘ کیوں کہ وقت ضائع کرنا بندہ کے لیے گھاٹے کا سودہ ہے جیسا کہ نبی صلی اللہ علیہ وسلم نے فرمایا: "دونعمتیں ہیں جن میں اکثر لوگ (ان کے غلط استعمال کی وجہ سے) خسارے اور گھاٹے میں رہیں گے: صحت اور فراغت"[21]. [21] اس حدیث کو بخاری نے اپنی صحیح (8/88) (6412) میں روایت کیا ہے۔

...

اپنے معاشرہ کےتئیں:

- لوگوں کو اللہ تعالی کی رحمت ومہربانی کی بشارت دوں گا‘ انہیں صبر کی تلقین کروں گا‘ اور یہ بتاؤں گا کہ سارے معاملات اللہ ہی کے ہاتھ میں ہیں‘ وہ خوف کو امن میں اور فقیری کو امیری میں بدل دیتا ہے‘ آزمائش خواہ جس قدر بھی طویل ہو اور مصیبت خواہ جس قدر بھی بڑی ہو‘ اللہ کی مشکل کشائى بہت قریب ہے‘ اس لیے ہمیں اللہ کی رحمت سے مایوس نہیں ہونا چاہئے کیوں کہ اللہ کی رحمت سے مایوس ہونا کافروں کی علامت ہے جیسا کہ فرمان باری تعالی ہے: (یقینا رب کی رحمت سے نا امید وہی ہوتے ہیں جو کافر ہوتے ہیں) سورۃ یوسف

...

سورۃ التین

تمہید

شوق آمیز مقدمہ: اس کے بہت سے طریقے ہیں‘ مثلا:

۱- طلبہ سے ان خصوصیات کے بارے میں سوال کرنا جن سے اللہ نے انسان کو معزز مخلوق بنایا۔

۲- ایسے بعض مقامات کے بارے میں سوال کرنا جنہیں اللہ نے رسالت اور رسولوں سے مشرف کیا۔

وہ کونسی آسمانی کتابیں ہیں جن کا ذکر اللہ نے قرآن میں کیا ہے؟

سورت کا تعارف:

۱- سورۃ التین کے کون کون سے نام ہیں؟

یہ سورت سورۃ (التین) کے نام سے جانی جاتی ہے‘ اس کا ایک نام (والتین) بھی ہے‘ جوکہ ابن عباس سے منقول ہے[22]۔ [22] دیکھیں: الهداية الى بلوغ النهاية (12/8339)، الجامع لاحكام القرآن (20/110)، الدر المنثور (8/553).

4- سورۃ التین کہاں نازل ہوئی؟ اکثر علمائے تفسیر کے مطابق سورۃ التین مکہ میں نازل ہوئی[23]۔ [23] النكت والعيون (6/300)، زاد المسير (4/463)، الجامع لاحكام القرآن (20/110).

4-سورۃ التین کا موضوع کیا ہے؟

اس سورت میں اللہ تعالی نے ذکر کیا ہے کہ اس نے انسان کو سب سے خوبصورت اور معتدل شکل میں پیدا کیا‘ انسان کو ایمان اور عمل صالح سے رفعت وبلندی ملتی ہے اور ان دونوں کو ترک کرنے سے وہ پستی کا شکار ہوجاتا ہے۔

چوتھی مجلس: اللہ کے دین پر (عمل کرنے سے ہی) انسان کو بلند مقام ومرتبہ ملتا ہے

تلاوت:

ارشادِ باری تعالیٰ ہے: قسم ہے انجیر کی اور زیتون کی۔ اور طور سینین کی۔ اور اس امن والے شہر کی۔ یقیناً ہم نے انسان کو بہترین صورت میں پیدا کیا. پھر اسے نیچوں سے نیچا کر دیا. لیکن جو لوگ ایمان ﻻئے اور (پھر) نیک عمل کیے تو ان کے لئے ایسا اجر ہے جو کبھی ختم نہ ہوگا۔ پس تجھے اب روز جزا کے جھٹلانے پر کون سی چیز آماده کرتی ہے. کیا اللہ تعالیٰ (سب) حاکموں کا حاکم نہیں ہے۔ سورۃ التين 1-8

تفسیر:

(1) {والتين والزيتون} اللہ نے قسم کھائى انجیر اور اس کی جائے پیداوار کی‘ اور زیتون کی اور اس کی جائے پیداوار کی جو کہ فلسطین میں ہے جہاں اللہ تعالی نے عیسی علیہ السلام کو مبعوث فرمایا۔

(2) {وطور سنين} اللہ تعالی نے طور پہاڑ کی بھی قسم کھائی جس پر اللہ سے اپنے نبی موسی علیہ السلام کے ساتھ کلام کیا تھا۔

(3) {وهذا البلد الأمين} اللہ نے شہر حرام مکہ کی قسم بھی کھائی‘ جس شہر میں داخل ہونے والا مامون ہو جاتا ہے۔

(4) {لقد خلقنا الإنسان في أحسن تقويم} اللہ نے انسان کو سب سے معتدل اور افضل شکل وصورت میں پیدا کیا۔

(5) {ثم رددناه أسفل سافلين} پھر ہم نے اسے بڑھاپے اور نا عقلی میں لوٹا دیا چنانچہ وہ اپنے جسم سے فائدہ اٹھانے کے قابل نہیں رہ پاتا‘ اسی طرح وہ اپنے جسم سے اس وقت بھی فائدہ نہیں اٹھا پائے گا جب اپنی فطرت کو بگاڑنے کی وجہ سے جہنم میں ڈال دیا جائے گا۔

(6 {إلا الذين آمنوا وعملوا الصالحات فلهم أجر غير ممنون} سوائے ان لوگوں کے جو ایمان لائے اور نیک اعمال کیے‘ یہ لوگ اگر بڑھاپے میں بھی پہنچ جائیں تو ان کی نیکی جاری وساری رہتی ہےجوکہ جنت کی شکل میں ملنے والی ہے‘ اس کی وجہ یہ ہے کہ انہوں نے اپنی فطرت کا تزکیہ کیا۔

(7) {فما يكذبك بعد بالدين} اے انسان! جب تونے اللہ کی قدرت پر دلالت کرنے والی بیش بہا نشانیوں کو اپنی آنکھوں سے دیکھ لیا تو کونسی چیز جزا وسزا کے دن کو جھٹلانے پر تجھے آمادہ کرتی ہے؟

(8){أليس الله بأحكم الحاكمين} کیا اللہ تعالی -قیامت کے دن کو جزا وسزا کا دن بنا کر- سب حاکموں سے بڑا اور منصف حاکم نہیں ہے؟ کیا یہ معقول بات ہے کہ اللہ تعالی اپنے بندوں کو یوں ہی بے کار چھوڑ دے‘ ان کے درمیان فیصلہ نہ کرے کہ نیکو کار کو اس کی نیکی کا اور بدکار کو اس کی بدی کا بدلہ دے؟! [24] [24] المختصر في تفسير القرآن الكريم(ص:597).

تدبر اور تزکیہ:

تدبر

تزکیہ

ہم اس سورت سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورت کی آیتوں سے اپنے اخلاق کو کیسے مزین کریں؟

اللہ تعالی نے کچھ مقامات کو یہ شرف بخشا کہ وہاں اپنی وحی نازل فرمائی‘ یعنی توریت‘ انجیل اور قرآن نازل فرمایا‘ ان جگہوں کے لئے یہ نہایت فضیلت اور شرف کی بات ہے!!

(قسم ہے انجیر کی اور زیتون کی اور طور سینین کی اور اس امن والے شہر کی)

- ہمیں یاد رکھنا چاہئے کہ اللہ تعالی نے مخلوق کی ہدایت ورہبری اور انہیں گمراہیوں سے بچانے کے لیے رسولوں اور پیغامات کو بھیج کر بڑا انعام کیا۔

- ہم اپنے دلوں کو وحی سے آباد رکھیں‘ تاکہ ہر طرح کی خیرات وبرکات سے بہرہ ور ہوسکیں اور اللہ پاک کی جانب سے عزت ومرتبت پاسکیں-

اللہ تعالی نے ابن آدم کو یہ اعزاز بخشا کہ اسے سب سے کامل شکل وصورت میں پیدا کیا‘ پاک ہے پیدا کرنے والا اللہ!!

(یقیناً ہم نے انسان کو بہترین صورت میں پیدا کیا)

ہم صرف اپنے جسم اور ظاہری شکل وصورت کی حفاظت کرنے پر اکتفا نہ کریں‘ بلکہ اس فطرت سلیمہ کی حفاظت کریں جس پر اللہ نے ہمارے باطن کو پیدا فرمایا اور ہم باطل عقائد سے اس فطرت کو مکدر نہ کریں۔

یہ انسان جسے اللہ نے پیدا کیا اور خوبصورت شکل وصورت سے نوازا‘ اگر اللہ اسے ہدایت نہ دے تو وہ چوپایوں سے بھی بدتر حالت میں چلا جاتا ہے‘ جیسا کہ اللہ پاک نے حدیث قدسی میں ارشاد فرمایا:

(میرے بندو! تم سب کے سب گمراہ ہو، سوائے اس کے جسے میں ہدایت دے دوں، اس لیے مجھ سے ہدایت مانگو میں تمہیں ہدایت دوں گا) [25] [25] اس حدیث کو مسلم نے اپنی صحیح (4/1994) (2577) میں روایت کیا ہے۔

(پھر اسے نیچوں سے نیچا کر دیا)

میں ہدایت کے اسباب تلاش کروں گا تاکہ تاریکیوں سے نکل کر روشنی کی طرف جا سکوں‘ پستی کی کھائی سے نکل کر بلند مقام تک پہنچ سکوں جوکہ اللہ پاک کی بندگی کا مقام ہے۔

اللہ کے نزدیک رفعت ومرتبت حاصل کرنے اور لا متناہی نوازش سے بہرہ ور ہونے کا واحد راستہ ایمان اور عمل ہے‘ نہ کہ حسب ونسب وغیرہ۔

(لیکن جو لوگ ایمان ﻻئے اور (پھر) نیک عمل کیے تو ان کے لئے ایسا اجر ہے جو کبھی ختم نہ ہوگا)

ہمیں جنت اور اس کی دائمی نعمت سے فیض یاب ہونے کے لیے جد وجہد کرنی چاہئے‘ یہ نعمت صرف ایمان لانے سے حاصل نہیں ہوسکتی‘ بلکہ اعمال صالحہ بھی ضروری ہیں جن سے ایمان میں بڑھوتری اور تقویت آتی ہے‘ کیوں کہ اطاعت سے ایمان میں اضافہ ہوتا اور گناہ سے اس میں کمی آتی ہے۔

مرنے کے بعد دوبارہ زندہ کیے جانے کی بہت سی دلیلیں اللہ نے قائم کی ہیں‘ ان دلائل میں انسان کی تخلیق اور پیدائش بھی شامل ہے‘ اس لیے وہ بندہ جو کچھ نہ تھا لیکن اللہ نے اسے وجود بخشا‘ اسے یہ زیب نہیں دیتا کہ قیامت کے دن کو جھٹلائے۔

(پس تجھے اب روز جزا کے جھٹلانے پر کون سی چیز آماده کرتی ہے)

جن عقلوں کے ذریعہ اللہ نے ہمیں ممتاز کیا ہے انہیں استعمال میں لاکر ہمیں اس کی قدرت کی ان نشانیوں پر غور وفکر کرنا چاہئے جو ایجاد کرنے والے خالق کی عظمت پر دلالت کرتی ہیں‘ یہ غور وفکر ہمیں جزا وسزا کے دن پر ایمان لانے کی رہنمائی کرے گا۔

اللہ پاک تمام حاکموں سے بڑا حاکم ہے‘ اس کی حکمت ہی ہے کہ اس نے لوگوں کے لیے ایک ایسا دن مقرر فرمایا جس میں لوگ اس کی طرف لوٹ کر جائیں گے‘ جہاں وہ ان کے اچھے برے تمام اعمال کا بدلہ دے گا۔

(کیا اللہ تعالیٰ (سب) حاکموں کا حاکم نہیں ہے)

ہمیں اس بات پر ایمان رکھنا چاہئے کہ اللہ نے اپنے عدل اور حکمت کی بنا پر جزا وسزا کے لیے قیامت کا دن مقرر فرمایا ہے‘ جہاں وہ نیکو کار کو اس کى نیکی کا اور بدکار کو اس کى بدی کا بدلہ دے گا

اس سورت سے ہدایت کی اور بھی باتیں مستنبط کریں‘ ساتھ ہی جو آیت اس پر دلالت کرتی ہے اس کو بیان کریں‘ نیز اس میں جو اخلاقی پہلو پنہاں ہے اس پر بھی روشنی ڈالیں۔

اس سورہ کو سیکھنے کے بعد ہم اس پر عمل کیسے کریں؟

اپنی ذات کے تئیں:

- میں دخول جنت کو اپنا نصب العین بنا کر رکھوں گا‘ اس کی خاطر کثرت سے نیک اعمال کروں گا تاکہ میرے ایمان میں اضافہ ہو‘ جنت میں ایسی نعمتیں ہیں جنہیں نہ کسی کی آنکھوں نے دیکھا‘ نہ کانوں نے سنا اور نہ کسی انسان کے دل میں ان کا خیال ہی گزرا [26] جیسا کہ نبی صلی اللہ علیہ وسلم کی حدیث ہے‘ اس کی تصدیق اللہ تعالی کے اس فرمان سے بھی ہوتی ہے: (کوئی نفس نہیں جانتا جو کچھ ہم نے ان کی آنکھوں کی ٹھنڈک ان کے لئے پوشیده کر رکھی ہے، جو کچھ کرتے تھے یہ اس کا بدلہ ہے) [سورة: السجدة]- [26] اس حدیث کو بخاری نے اپنی صحیح (4/11) (3244) میں اور مسلم نے اپنی صحیح (4/2174) (2824) میں روایت کیا ہے۔

...

اپنے معاشرہ کے تئیں:

میں صحیح عقیدہ کا علم حاصل کروں گا جس کا اللہ نے اپنی کتاب میں اور رسول نے اپنی حدیث میں حکم دیا ہے اور اپنے اہل خانہ کو اس کی تعلیم دوں گا‘ نیز انہیں ان باطل عقائد سے خبردار کروں گا جو ہماری فطرت کو بگاڑ دیتے ہیں‘ تاکہ ہم ان عقائد کے سبب ہلاک نہ ہوں‘اللہ تعالی کے اس فرمان پر عمل کرتے ہوئے کہ: (اے ایمان والو! تم اپنے آپ کو اور اپنے گھر والوں کو اس آگ سے بچاؤ جس کا ایندھن انسان ہیں اور پتھر جس پر سخت دل مضبوط فرشتے مقرر ہیں جنہیں جو حکم اللہ تعالیٰ دیتا ہے اس کی نافرمانی نہیں کرتے بلکہ جو حکم دیا جائے بجا ﻻتے ہیں). سورۃ التحریم

...

سورۃ العلق

تمہید

شوق آمیز مقدمہ:

اس کے مختلف طریقے ہیں‘ مثلا:

۱- طلبہ سے یہ سوال کرنا کہ سب سے پہلے کون سورت نازل ہوئی۔

۲- سورت کا سبب نزول

سورت کا تعارف:

۳- سورۃ العلق کے کون کون سے نام ہیں؟

سورة (العلق)، سورۃ (اقرأ باسم ربك)، (اقرأ باسم ربك الذي خلق)[27]، اور مفسرین نے اس سورت کو سورة (القلم)، اور سورة (اقرأ) سے بھی موسوم کیا ہے [28]- [27] دیکھیں: صحيح بخاری (6/173)، كتاب تفسير القرآن، باب "ما ودّعك ربك وما قلى"- [28] دیکھیں: الكشف والبيان (10/242)، زاد المسير (4/466)، التحرير والتنوير (30/433)-

۲- سورۃ العلق کہاں نازل ہوئی؟

اس پر اجماع ہے کہ سورۃ العلق مکہ میں نازل ہوئی[29]۔ [29] المحرر الوجيز (5/501)، الجامع لاحكام القرآن (20/117)-

۳- سورۃ العلق کا سبب نزول کیا ہے؟

صحیحین میں آغاز وحی کے قصہ میں ام المومنین عائشہ رضی اللہ عنہا سے مروی ہے‘ وہ فرماتی ہیں: رسول اللہ ﷺ پر وحی کی ابتدا سچے خوابوں کی صورت میں ہوئی، آپ جو کچھ خواب میں دیکھتے وہ سپیدہ صبح کی طرح نمودار ہو جاتا، پھر آپ کو تنہائی محبوب ہو گئی، چنانچہ آپ غار حرا میں خلوت اختیار فرماتے اور کئی کئی رات گھر تشریف لائے بغیر مصروف عبادت رہتے، آپ کھانے پینے کا سامان گھر سے لے جا کر وہاں چند روز گزارتے، پھر حضرت خدیجہ رضی اللہ عنہا کے پاس واپس آتے اور تقریباً اتنے ہی دنوں کے لیے پھر توشہ لے جاتے،یہاں تک کہ ایک روز جبکہ آپ غار حرا میں تھے، (یکایک) آپ کے پاس حق آگیا اور فرشتے نے آ کر آپ سے کہا: پڑھو! آپ نے فرمایا:’’میں پڑھا ہوا نہیں ہوں۔‘‘ آپ کا کہنا ہے: اس پر فرشتے نے مجھے پکڑ کر خوب بھینچا، یہاں تک کہ میری قوت برداشت جواب دینے لگی، پھر اس نے مجھے چھوڑ دیا اور کہا: پڑھو! میں نے کہا: ’’میں تو پڑھا ہوا نہیں ہوں۔‘‘ اس نے دوبارہ مجھے پکڑ کر دبوچا، یہاں تک کہ میری قوت برداشت جواب دینے لگی، پھر چھوڑ کر کہا: پڑھو! میں نے پھر کہا: ’’میں پڑھا ہوا نہیں ہوں۔‘‘ اس نے تیسری بار مجھے پکڑ کر بھینچا، پھر چھوڑ کر کہا: ’’پڑھو اپنے رب کے نام سے جس نے پیدا کیا، جس نے انسان کو خون کے لوتھڑے سے پیدا کیا، پڑھو! اور تمہارا رب تو نہایت کریم ہے۔‘‘[30] الحدیث۔ [30] اس حدیث کو بخاری نے اپنی صحیح(1/7) (3). میں روایت کیا ہے۔

مسند احمد اور سنن ترمذی وغیرہ میں ابن عباس سے مروی ہے‘ وہ فرماتے ہیں: نبی اکرم ﷺنماز پڑھ رہے تھے کہ ابوجہل آ گیا،اس نے کہا:میں نے تجھے اس (نماز) سے منع نہیں کیا تھا؟ کیا میں نے تجھے اس (نماز) سے منع نہیں کیا تھا؟ نبی اکرم ﷺ نے نماز سے سلام پھیرا اوراسے ڈانٹا، ابوجہل نے کہا: تجھے خوب اچھی طرح معلوم ہے کہ مجھ سے زیادہ کسی کے ہم نشیں نہیں ہیں،اس پراللہ تعالیٰ نے یہ آیت نازل فرمائی ﴿فَلْيَدْعُ نَادِيَهُ سَنَدْعُ الزَّبَانِيَةَ﴾ابن عباس رضی اللہ عنہما کہتے ہیں: "قسم اللہ کی! اگر وہ اپنے ہم نشینوں کو بلا لیتا تو عذاب پر متعین اللہ کے فرشتے اسے دھر دبوچتے[31]. [31] اس حدیث کو ترمذی نے اپنے سنن (5/444) (3349) میں، اور احمد نے اپنی مسند(4/165) (2322) میں روایت کیا ہے اور البانی نے السلسلة الصحيحة (1/557) (275) میں اسے صحیح قرار دیا ہے۔

4- سورۃ العلق کا موضوع کیا ہے؟

اس سورہ میں بیان کیا گیا ہے کہ انسان کو اسی وقت کمال حاصل ہوتا ہے جب وہ وحی اور علم سے وابستہ رہے [32]، اس میں یہ بھی بیان کیا گیا ہے کہ انسان کی تخلیق کس چیز سے ہوئی تاکہ وہ سرکشی کرنے اور اللہ سے روگردانی سے بچتا رہے‘ کیوں کہ جس اللہ نے اسے پیدا کیا وہی اسے دوبارہ زندہ کرے گا اور اسے اس کے عمل کا بدلہ دے گا۔ [32] دیکھیں: مقاصد سور المفصل (ص: 9)

پانچویں مجلس: پڑھائى اور علم میں بہترى پیدا کرنا

تلاوت:

اللہ تعالی کا فرمان ہے: "پڑھ اپنے رب کے نام سے جس نے پیدا کیا۔ جس نے انسان کو خون کے لوتھڑے سے پیدا کیا۔ تو پڑھتا ره تیرا رب بڑے کرم واﻻ ہے۔ جس نے قلم کے ذریعے (علم) سکھایا۔ ’’انسان کو وہ باتیں سکھائیں جو وہ نہیں جانتا تھا۔‘‘ (العلق:1-5)۔

تفسیر:

(اقْرَأْ بِاسْمِ رَبِّكَ الَّذِي خَلَقَ) اے رسول! آپ پڑھیے وہ (قرآن) جسے اللہ آپ کی طرف وحی کیا کرتا ہے‘ اپنے اس رب کے نام سے آغاز کرتے ہوئے جس نے تمام مخلوقات کو پیدا کیا۔

(خَلَقَ الْإِنسَانَ مِنْ عَلَقٍ) اللہ نے انسان کو خون کے جمے ہوئے لوتھڑے سے پیدا کیا‘ جو لوتھڑا پہلے نطفہ تھا۔

(اقْرَأْ وَرَبُّكَ الْأَكْرَمُ) اے رسول! جو (قرآن) اللہ تعالی آپ کی طرف وحی کرتا ہے‘ آپ اسے پڑھتے رہیے‘ آپ کا رب بڑا کرم والا ہے‘ کوئی بھی سخی اس کی کرم فرمائی کا مقابلہ نہیں کرتا‘ وہ نہایت فیاض اور بڑا محسن ہے

(الَّذِي عَلَّمَ بِالْقَلَمِ) جس نے قلم کے ذریعہ تحریر کرنا اور لکھنا سکھایا۔

(عَلَّمَ الْإِنسَانَ مَا لَمْ يَعْلَمْ) انسان کو وہ باتیں سکھائیں جن سے وہ نا آشنا تھا۔

تدبر اور تزکیہ:

تدبر

تزکیہ

ہم اس سورہ سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

اللہ پاک نے انسان کو کمزوری کی حالت میں پیدا کیا‘ پھر وحی کی تلاوت اور علم کے ذریعہ اسے رفعت وبلندی عطا کی اور اسے علم حاصل کرنے کے وسائل کی رہنمائی فرمائی۔

(پڑھ اپنے رب کے نام سے جس نے پیدا کیا‘ جس نے انسان کو خون کے لوتھڑے سے پیدا کیا)

میں ربانی علم کو کتاب وسنت سے حاصل کروں گا تاکہ تاریکیوں سے نکل کر روشنی میں جا سکوں اور کمزوری سے نکل کر قوت حاصل کرسکوں۔

خود بھی علم حاصل کرو اور (دوسروں کو بھی) علم سکھاؤ‘ منتشر علوم کو وسائل علم کے ذریعہ ضبط میں لاؤ‘ کیوں کہ تیرا رب بڑا کرم والا ہے‘ اگر تو اس کے لیے مخلص بن کر رہے گا تو وہ تیرے علم اور اجر وثواب میں مزید اضافہ فرمائے گا۔

(تو پڑھتا رہ تیرا رب بڑے کرم والا ہے جس نے قلم کے ذریعے علم سکھایا)۔

- ہمیں اللہ کی یہ نعمت یاد رکھنی چاہئے کہ اس نے ہمیں قلم سے لکھنے کا اعزاز بخشا‘ تحریر وکتابت کے ذریعے ہی علم وحکمت کو مدون کیا گیا‘ اسی کے ذریعے سابقہ قوموں کی خبریں‘ حالات اور سیرتیں ہمیں معلوم ہوئیں۔

- جو علوم ومعارف ہم سیکھتے ہیں‘ انہیں ذہن نشیں کرنے کے لیے ہمیں کتابت کا استعمال کرنا چاہئے تاکہ نہ ہم اسے بھول سکیں اور نہ وہ ہم سے ضائع ہوسکے۔

علم اللہ پاک کی جانب سے حاصل ہوتا ہے‘ وہ (العلیم) خوب جاننے والا ہے‘ توحید پرست مومن اللہ پاک سے ہی علم طلب کرتا ہے‘ بایں طور کہ اس پر توکل کرتا ہے اور اس کی کتاب اوراس کے نبی کی سنت سے علم حاصل کرتا ہے۔

(انسان کو وہ باتیں سکھائیں جو وہ نہیں جانتا تھا)

نہ میں اپنے علم پر فخر کروں گا‘ نہ اس علم میں کسى عالم کو نیچا دکھاؤں گا‘ نہ کسی جاہل سے بحث ومباحثہ کروں گا‘ اور نہ کسی طالب علم سے اسے چھپاؤں گا‘ کیوں کہ وہ اللہ تعالی کی نعمت ہے جس سے اللہ نے مجھے نوازا ہے‘ اس میں میری قوت وطاقت کا کوئی عمل دخل نہیں۔

چھٹی مجلس: جہالت اور وحی سے روگردانی کرنے کا انجام

تلاوت:

ارشادِ باری تعالیٰ ہے: (سچ مچ انسان آپے سے باہر ہوجاتا ہے۔ اس لیے کہ وہ اپنے آپ کو بے پروا (یا تونگر) سمجھتا ہے۔ یقیناً لوٹنا تیرے رب کی طرف ہے۔ (بھلا) اسے بھی تونے دیکھا جو بندے کو روکتا ہے۔ جبکہ وہ بندہ نماز ادا کرتا ہے۔ بھلا بتلا تو اگر وه ہدایت پر ہو۔ یا پرہیزگاری کا حکم دیتا ہو۔ بھلا دیکھو تو اگر یہ جھٹلاتا ہو اور منہ پھیرتا ہو۔ کیا اس نے نہیں جانا کہ اللہ تعالیٰ اسے خوب دیکھ رہا ہے۔ یقیناً اگر یہ باز نہ رہا تو ہم اس کی پیشانی کے بال پکڑ کر گھسیٹیں گے۔ ایسی پیشانی جو جھوٹی خطا کار ہے۔ یہ اپنی مجلس والوں کو بلا لے۔ ہم بھی (دوزخ کے) پیادوں کو بلالیں گے۔ خبردار! اس کا کہنا ہرگز نہ ماننا اور سجده کر اور قریب ہو جا۔ سورۃ العلق: 6-19

تفسیر:

(كَلَّا إِنَّ الْإِنسَانَ لَيَطْغَىٰ) سچ مچ فاجر انسان جو ابو جہل کی طرح ہو‘ وہ حدود الہی کو پھلانگنے میں حد سے تجاوز کرجاتا ہے۔

(أَن رَّآهُ اسْتَغْنَىٰ) اس لیے کہ اپنے پاس مال ودولت دیکھتا ہے۔

(إِنَّ إِلَىٰ رَبِّكَ الرُّجْعَىٰ) اے انسان! یقینا قیامت کے دن تجھے اپنے رب کی طرف ہی لوٹ کر جانا ہے‘ جہاں وہ ہر انسان کو وہ بدلہ دے گا جس کا وہ مستحق ہوگا۔

(أَرَأَيْتَ الَّذِي يَنْهَىٰ) کیا آپ نے ایسى بات دیکھى ہے جو ابو جہل جو کہ روکتا ہے کی بات سے بھی زیادہ تعجب خیز ہو-

(عَبْدًا إِذَا صَلَّىٰ) بندے کو جب وہ اللہ کی خاطر نماز پڑھتا ہے؟ جسے روکتا ہے وہ اللہ کے رسول صلی اللہ علیہ وسلم ہیں۔

(أَرَأَيْتَ إِن كَانَ عَلَى الْهُدَىٰ) بھلا بتلا تو کہ جسے روکا جا رہا ہے وہ اگر اپنے رب کی دی ہوئی بصیرت اور ہدایت پر ہو؟

(أَوْ أَمَرَ بِالتَّقْوَىٰ) یا وہ لوگوں کو یہ حکم دیتا ہو کہ اللہ کے احکام کو بجا لاکر اور اس کی منہیات سے اجتناب کرکے اللہ کا تقوی اختیار کریں‘ کیا جس کی شان اور پہچان ایسی ہو اسے روکا جانا چاہئے؟

(أَرَأَيْتَ إِن كَذَّبَ وَتَوَلَّىٰ) بھلا دیکھو تو کہ اگر روکنے والا یہ شخص رسول کی لائی ہوئی شریعت کو جھٹلاتا ہو اور اس سے اعراض برتتا ہو‘ کیا اسے اللہ کا ڈر اور خوف نہیں؟

(أَلَمْ يَعْلَم بِأَنَّ اللَّهَ يَرَىٰ) اس بندے کو نماز سے روکنے والا یہ شخص جانتا نہیں کہ اللہ تعالی اس کی بدعملی کو دیکھ رہا ہے‘ اس سے کوئی بھی چیز مخفی نہیں؟

(كَلَّا لَئِن لَّمْ يَنتَهِ لَنَسْفَعًا بِالنَّاصِيَةِ) معاملہ ویسا نہیں ہے جیسا کہ اس جاہل نے سوچ رکھا ہے‘ اگر ہمارے بندے کو اذیت دینے اور جھٹلانے سے وہ باز نہیں آیا تو ہم سختی کے ساتھ پیشانی کے بل گھسیٹ کر اسے جہنم میں پھینک دیں گے۔

(نَاصِيَةٍ كَاذِبَةٍ خَاطِئَةٍ) وہ پیشانی اپنے قول میں جھوٹی اور فعل میں بدکار ہے۔

(فَلْيَدْعُ نَادِيَهُ) جس وقت اسے سر کے بل گھسیٹ کر جہنم میں ڈالا جائے گا‘ اس وقت وہ اپنے ہمنواؤں اور مجلس والوں کو بلالے اور ان سے مدد طلب کرے کہ وہ اسے عذاب سے بچالیں۔

(سَنَدْعُ الزَّبَانِيَةَ) ہم بھی دوزخ کے پیادوں بلا لیں گے یعنی ان سخت جان فرشتوں کو جو حکم الہی کی نافرمانی نہیں کرتے‘ جو حکم دیا جاتا ہے اسے بجا لاتے ہیں‘ اس لیے وہ دیکھ لے کونسا فریق زیادہ طاقت ور اور تونگر ہے۔

(كَلَّا لَا تُطِعْهُ وَاسْجُدْ وَاقْتَرِب ۩) معاملہ ویسا نہیں ہے جیسا اس ظالم نے گمان کر رکھا ہے کہ وہ آپ کو نقصان پہنچادے گا‘ آپ کسی بھی حکم اور ممانعت میں اس کی اطاعت نہ کریں‘ بلکہ صرف اللہ کے سامنے سجدہ کریں اور اطاعتوں کے ذریعہ اس کی قربت حاصل کرتے رہیں‘ اطاعتیں اللہ سے قریب کردیتی ہیں[33]۔ [33] المختصر في التفسير (ص: 597-598)-

تدبر اور تزکیہ:

تدبر

تزکیہ

ہم اس سورہ سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

مالداری بندہ کو سرکشی اور حد سے تجاوز کرنے پر آمادہ کرتی ہے‘ اس لیے بندہ کو چاہیے کہ آخرت کو یاد کرکے اپنے نفس کو قابو میں رکھے۔

(سچ مچ انسان تو آپے سے باہر ہو جاتا ہے‘ اس لیے کہ وہ اپنے آپ کو بے پروا (یا تونگر) سمجھتا ہے‘ یقینا لوٹنا تیرے رب کی طرف ہے)۔

- ہمیں ذہن نشیں رکھنا چاہئے کہ مالداری وفراخی‘ ہمنواؤں کی کثرت اور بے انتہا جاہ وحشمت کی حالت میں ہمیں سب سے زیادہ اللہ کی اور اس کی توفیق ومدد کی ضرورت ہوتی ہے۔

- ہمیں اپنے انجام پر غور وفکر کرنا چاہئے‘ کیوں کہ اس سے ہمارے اندر یہ داعیہ پیدا ہوگا کہ ہم حدود الہی سے تجاوز نہ کریں اوراللہ نے ہمارے اوپر مال ودولت کا جو انعام کیا ہے اس سے دھوکا نہ کھائیں۔

اللہ کی راہ سے روکنا دشمنان الہی کا وطیرہ ہے‘ اس لیے مسلمان کو اس سے ہوشیار رہنا چاہئے!!

(بھلا اسے بھی تونے دیکھا جو بندے کو روکتا ہے جبکہ وہ بندہ نماز ادا کرتا ہے)

ہم رسولوں کی راہ پر چلیں گے‘ بھلائی کا حکم دیں گے اور برائی سے روکیں گے اور لوگوں کے اندر دینی بصیرت پیدا کریں گے۔

بندہ کے لیے سب سے بڑا محرک یہ ہے کہ وہ اس بات کو ہمیشہ ذہن نشیں رکھے کہ وہ اللہ کی نگرانی میں ہے‘ اور یہ احسان کا مرتبہ ہے: (اللہ کی عبادت ایسے کرو گویا تم اسے دیکھ رہے ہو‘ اور اگر تم اسے نہیں دیکھ رہے تو وہ تمہیں دیکھ رہا ہے)[34]- [34] اس حدیث کو بخاری نے اپنی صحیح (1/19) (50)میں، اور مسلم نے اپنی صحیح(1/36) (88) میں روایت کیا ہے۔

(کیا اس نے نہیں جانا کہ اللہ تعالیٰ اسے خوب دیکھ رہا ہے)

ہمیں اپنے تمام اقوال واعمال میں اللہ کی نگرانی کو ملحوظ خاطر رکھنا چاہئے‘ کیوں کہ جو شخص اللہ کی نگرانی کو یاد رکھتا ہے وہ اس کے حکم کو بجا لاتا اور اس کی نافرمانی سے دور رہتا ہے‘ اللہ پاک ہمارے اعمال کو دیکھتا اور ہماری باتوں کو سنتا ہے۔

خالق کی معصیت کر کے مخلوق کی اطاعت کرنا جائز نہیں‘ بلکہ ظالم لوگ بندوں کو جب اللہ کی اطاعت سے روکتے ہیں تو مومنوں کے اندر اللہ پاک کی عبادت اور قربت کا جذبہ مزید بڑھ جاتا ہے۔

(خبردار! اس کا کہنا ہرگز نہ ماننا اور سجده کر اور قریب ہو جا)

اللہ تعالی کی خوشنودی سے قریب ہونے کی ہم بھر پور کوشش کریں گے‘ اللہ پر بھروسہ اور توکل رکھیں گے‘ جو لوگ ہمیں دینی شعائر کو قائم کرنے سے روکنے کی کوشش کریں گے‘ ہماری جانب سے اللہ تعالی ان لوگوں سے انتقام لے گا۔

اس سورہ سے ہدایت کی اور بھی باتیں مستنبط کریں‘ ساتھ جو آیت اس پر دلالت کرتی ہے اس کو بیان کریں‘ نیز اس میں جو اخلاقی پہلو پنہاں ہے اس پر بھی روشنی ڈالیں۔

اس سورہ کو سیکھنے کے بعد ہم اس پر عمل کیسے کریں؟

اپنی ذات کے تئیں:

میں علم حاصل کرنے اور اس پر عمل کرنے کی پوری کوشش کروں گا‘ کیوں کہ نبی صلی اللہ علیہ وسلم کی حدیث ہے: (جو شخص علم کی تلاش میں کسی راہ پر چل پڑے، اللہ تعالیٰ اس کے لیے اس کے ذریعہ جنت کی راہ آسان فرما دیتا ہے)[35]- یہ دنیا میں نجات حاصل کرنے اور آخرت میں کامیاب ہونے کا راستہ ہے۔ [35] اس حدیث کو مسلم نے اپنی صحیح (4/2074) (2699) میں روایت کیا ہے۔

...

اپنے معاشرہ کے تئیں:

میں علم حاصل کرنے اور اسے لوگوں میں عام کرنے کی کوشش کروں گا‘ یہ امت کے لیے رفعت اور عزت وسربلندی کی راہ ہے‘ انسان کو نبی صلی اللہ علیہ وسلم نے اپنی اس حدیث میں اس کا حکم بھی دیا ہے: "میرا پیغام لوگوں کو پہنچاؤ اگرچہ وہ ایک آیت پر مشتمل ہو"[36]- [36] اس حدیث کو بخاری نے اپنی صحیح (4/170) (3461) میں روایت کیا ہے۔

...

سورۃالقدر

تمہید

شوق آمیز مقدمہ:

اس کے مختلف طریقے ہیں‘ مثلا:

۱- طلبہ سے یہ سوال کرنا کہ سورۃ القدر کی فضیلت کیا ہے۔

۲- قرآن کی صحبت کے اثرات پر بحث ومباحثہ کرنا۔

۳- طلبہ سے اس سورہ کے ناموں کے بارے میں سوال کرنا۔

سورت کا تعارف:

۱- سورۃ القدر کہاں نازل ہوئی؟

علمائے تفسیر کا اس سورت کی جائے نزول کے بارے میں اختلاف ہے‘ کچھ مفسرین کہتے ہیں کہ: مکی ہے[37]‘ اور کچھ مفسرین کہتے ہیں کہ: مدنی ہے[38]۔ [37] النكت والعيون (6/311)، المحرر الوجيز (5/504)، زاد المسير (4/469)- [38] الكشف والبيان (10/247)، المحرر الوجيز (5/504)، زاد المسير (4/469)-

۲- اس سورہ کے کون کون سے نام ہیں؟

سورۃالقدر-

سورۃ (إنا أنزلناه في ليلة القدر) [39] [39] اسماء سور القرآن وفضائلها (ص: 572)

سورة (ليلة القَدْر)[40]- [40] المحرر الوجيز (5/504)، احكام القرآن للجصاص (5/373)، التحرير والتنوير (30/455)۔

سورة (إنا أنزلناه) [41]- [41] دیکھیں: صحيح بخاری (6/175)، كتاب تفسير القرآن، باب "كلا لئن لم ينته لنسفعن بالناصية ناصية كاذبة خاطئة"۔

3-سورۃ القدر کا موضوع کیا ہے؟

اس سورہ میں شب قدر کی عظمت پر روشنی ڈالی گئی ہے اور یہ بیان کیا گیا ہے کہ وہ ہزار مہینوں سے بہتر ہے‘ اللہ تعالی نے اس رات میں ہمارے اوپر یہ انعام کیا کہ لوح محفوظ سے آسمان دنیا میں پورا قرآن نازل فرمایا‘ اللہ تعالی نے قرآن کو یہ اعزاز بخشا کہ اسے نازل کرنے کی نسبت اپنی ذات پاک کی طرف کی۔

ساتویں مجلس: شب قدر کی (ایک) فضیلت یہ ہے کہ اس میں قرآن نازل ہوا

تلاوت:

ارشادِ باری تعالیٰ ہے: (یقیناً ہم نے اسے شب قدر میں نازل فرمایا۔ تو کیا سمجھا کہ شب قدر کیا ہے؟ شب قدرہزار مہینے سے بہتر ہے۔ اس (میں ہر کام) کے سر انجام دینے کو اپنے رب کے حکم سے فرشتے اور روح (جبرائیل) اترتے ہیں۔ یہ رات سراسر سلامتی کی ہوتی ہے اور فجر کے طلوع ہونے تک (رہتی ہے)۔ سورۃ القدر 1-5-

تفسیر:

(إِنَّا أَنزَلْنَاهُ فِي لَيْلَةِ الْقَدْرِ) ماہ رمضان کی شب قدر میں ہم نے نبی صلی اللہ علیہ وسلم پر قرآن نازل کرنے کا آغاز کیا۔

(وَمَا أَدْرَاكَ مَا لَيْلَةُ الْقَدْرِ) اے نبی! کیا آپ جانتے ہیں کہ اس رات میں کتنی خیرات وبرکات پنہاں ہیں؟

(لَيْلَةُ الْقَدْرِ خَيْرٌ مِّنْ أَلْفِ شَهْرٍ) یہ رات انتہائی خیر وبرکت والی رات ہے‘ جو شخص ایمان اور ثواب کی نیت سے اس رات میں قیام کرے‘ اس کے لیے یہ رات ہزار مہینوں سے بہتر ہے۔

(تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ) اس رات میں فرشتے اور جریل علیہ السلام اپنے پاک رب کے حکم سے ہر اس کام کو سر انجام دینے کے لیے اترتے ہیں جو اللہ تعالی نے اس سال کے لیے مقدر کر دیا ہے خواہ رزق کا معاملہ ہو یا موت کا یا ولادت کا یا کوئی اور۔

(سَلَامٌ هِيَ حَتَّىٰ مَطْلَعِ الْفَجْرِ) یہ مبارک رات آغاز سے انجام تک سراسر سلامتی کی ہوتی ہے اور طلوع فجر تک رہتی ہے[42]- [42] المختصر في التفسير (ص:598)-

تدبر اور تزکیہ:

تدبر

تزکیہ

ہم اس سورہ سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

یہ عظیم قرآن جو اس عظیم ماہ کی عظیم رات میں نازل ہوئی‘ یہ حق رکھتا ہے کہ ہم اس کی تعظیم کریں۔

(یقیناً ہم نے اسے شب قدر میں نازل فرمایا)

ہمیں اس قرآن کی عظمت شان کو محسوس کرنا چاہئے جسے اللہ تعالی نے ہمارے اوپر نازل فرمایا‘ اللہ نے یہ قرآن ہمارے اوپر اس لیے نازل فرمایا تاکہ ہمیں اس کے ذریعہ رفعت وبلندی عطا کرے اور ہمیں دنیا وآخرت میں عظیم مقام ومرتبہ سے سرفراز فرمائے۔

یہ بڑی عظیم الشان اور عالی مرتبت رات ہے‘ اس رات کو اللہ نے تمام راتوں سے زیادہ شرف ومنزلت اور اہمیت وفضیلت عطا کی‘ اس کے ذریعہ ہمارے اوپر احسان کیا‘ سو اسی کے لیے ہر طرح کی تعریف اور اسی کا فضل واحسان ہے۔

(تو کیا سمجھا کہ شب قدر کیا ہے؟)

ہمیں اس رات کی تعظیم کرنی چاہئے جس کے ذریعہ اللہ نے ہمارے اوپر احسان کیا اور ہمیں اس کی عظیم فضیلت سے باخبر کیا۔

لمبی زندگی کا اعتبار نہیں ہوتا بلکہ حسن اعمال کا اعتبار ہوتا ہے...یہ ایسی رات ہے جو اپنی فضیلت میں ہزار مہینوں سے بہتر ہے‘ پاک ہے رب کریم!!

(شب قدرہزار مہینے سے بہتر ہے)

ہمیں قیام‘ دعا اور اعمال صالحہ کے ذریعہ شب قدر کی تلاش کرنی چاہئے‘ کیوں کہ یہ بڑا بیش بہا موقع ہے۔

فرشتے اللہ تعالی کی ایک مخلوق ہیں جو اپنے رب کی نگرانی میں رہتے ہیں‘ وہ اللہ کے معزز بندے ہیں‘ کسی بات میں اللہ پر پیش دستی نہیں کرتے اور اس کے فرمان پر کاربند رہتے ہیں۔

(اس میں ہر کام کے سر انجام دینے کو اپنے رب کے حکم سے فرشتے اور روح (جبرائیل) اترتے ہیں)

ہمیں اللہ کے معزز فرشتوں سے شرم کرنی چاہئے‘ چنانچہ وہ ہمیں ایسی حالت میں نہ دیکھیں جس سے ہمارا پاک رب ناراض ہوتا ہے۔

یہ ایسی رات ہے جسے اللہ نے تمام عیوب سے پاک کردیا‘ چنانچہ اس میں کوئی شر اور برائی نہیں‘ وہ رات خیر وبھلائی والے مہینہ (رمضان میں) ہوتی ہے‘ (نیکیوں کے لیے) یہ سب سے افضل اور بہتر موسم بہار ہے‘ جو شخص اسے ضائع کردے وہ محروم ہے۔

(یہ رات سراسر سلامتی کی ہوتی ہے اور فجر کے طلوع ہونے تک رہتی ہے)۔

ہمیں اس رات کو اللہ کے پسندیدہ کاموں سے آباد کرنا چاہئے‘ کسی مومن کو ہم سے تکلیف نہ پہنچے اور ہم اپنے قول وعمل سے کسی کو اذیت نہ دیں۔

اس سورت سے ہدایت کی اور بھی باتیں مستنبط کریں‘ ساتھ ھى جو آیت ان پر دلالت کرتی ہے اس کو ذکر کریں‘ نیز اس میں جو اخلاقی پہلو پنہاں ہے اس پر بھی روشنی ڈالیں۔

اس سورت کو سیکھنے کے بعد ہم اس پر عمل کیسے کریں؟

اپنی ذات کے تئیں:

- رمضان کے آخری عشرے میں قیام کرکے شب قدر کی تلاش وجستجو کروں گا‘ تاکہ اس کی فضیلت سے بہرہ ور ہو سکوں‘ کیونکہ اس رات کو قیام کرنے سے گناہ معاف ہوتے ہیں‘ جیسا کہ نبی صلی اللہ علیہ وسلم کا ارشاد گرامی ہے: (جس نے شبِ قدر میں حالتِ ایمان کے ساتھ ثواب کی غرض سے قیام کیا اُس کے سابقہ گناہ بخش دیے جاتے ہیں)۔[43] [43] اس حدیث کو بخاری نے اپنی صحیح (3/26) (1901) میں روایت کیا ہے۔

...

اپنے معاشرہ کے تئیں:

میں اپنے گاؤں محلہ میں قرآن مجید کی تعلیم کے لیے حلقہ قائم کروں گا‘ تاکہ صحبت قرآن کا شرف حاصل کر سکوں‘ اور خیر وبھلائی سے ہمکنار ہونے والوں میں شامل ہوسکوں‘ نبی صلی اللہ علیہ وسلم کی اس حدیث پر عمل کرتے ہوئے کہ: (تم میں سب سے بہتر وہ شخص ہے جو قرآن سیکھے اور اسے سکھلائے)۔[44]- [44] اس حدیث کو امام مسلم نے اپنی صحیح(6/192) (5027).میں روایت کیا ہے۔

...

سورۃ البینہ

تمہید

شوق آمیز مقدمہ:

اس کے مختلف طریقے ہیں‘ مثلا:

1- طلبہ سے اس سورت کے ناموں کے بارے میں سوال کرنا۔

۲- اس سورت کے تعلق سے ابی بن کعب کا نبی صلی اللہ علیہ وسلم کے ساتھ ایک واقعہ پیش آیا-

انس رضی اللہ عنہ سے مروی ہے کہ نبی صلی اللہ علیہ وسلم نے ابی سے فرمایا: ’’اللہ تعالٰی نے مجھے حکم دیا ہے کہ میں تمہیں ﴿لَمْ يَكُنِ الَّذِينَ كَفَرُوا﴾ سناؤں۔‘‘ حضرت ابی بن کعب نے عرض کیا: اللہ تعالٰی نے میرا نام لیا ہے؟ آپ نے فرمایا: ’’ہاں۔‘‘ یہ سن کر حضرت ابی بن کعب (فرط مسرت سے) رونے لگے۔ [45] [45] اس حدیث کو بخاری نے اپنی صحیح (4/170) (3461) میں روایت کیا ہے۔

سورت کا تعارف:

۱- سورۃ البینۃ کہاں نازل ہوئی؟

۲- اکثر علماء کا قول ہے کہ سورۃ البینۃ مدینہ میں نازل ہوئی۔[46] [46] النكت والعيون (6/315)، المحرر الوجيز (5/507)، زاد المسير (4/475)-

۳- اس سورت کے کون کون سے نام ہیں؟

-سورۃ البینہ-

-سورۃ (لم يكن الذين كفروا)-

-سورة (لم يكن) [47]- [47] دیکھیں: صحيح بخاری (6/175)، كتاب تفسير القرآن، باب "كلا لئن لم ينته لنسفعن بالناصية ناصية كاذبة خاطئة"۔

- سورة (القَيِّمَة)-

- سورة (البريّة)-

- سورة (المنفكّين)-

- سورة (أهل الكتاب)[48]- [48] دیکھیں: محاسن التاويل (9/520)، التحرير والتنوير (30/467)، اسماء سور القرآن وفضائلها (ص: 573-579)-

4-سورۃ البینۃ کا موضوع کیا ہے؟

اس سورہ کا موضوع گفتگو خاتم الانبیاء صلی اللہ علیہ وسلم کی رسالت کو ثابت کرنا اور اس تعلق سے اہل کتاب کا موقف بیان کرنا ہے‘ اس سورت میں تمام تر عبادتوں کو اللہ کے لیے خالص کرنے پر زور دیا گیا ہے اور نیک بخت اور بد بخت لوگوں کے انجام کو واضح کیا گیا ہے۔

آٹھویں مجلس: محمدی رسالت کا کمال اور اس رسالت کی وضاحت

تلاوت:

ارشادِ باری تعالیٰ ہے: (اہل کتاب کے کافر اور مشرک لوگ جب تک کہ ان کے پاس ظاہر دلیل نہ آجائے باز رہنے والے نہ تھے (وه دلیل یہ تھی کہ) اللہ تعالیٰ کا ایک رسول جو پاک صحیفے پڑھے۔ جن میں صحیح اور درست احکام ہوں۔ اہل کتاب اپنے پاس ظاہر دلیل آجانے کے بعد ہی (اختلاف میں پڑ کر) متفرق ہوگئے۔ انہیں اس کے سوا کوئی حکم نہیں دیا گیا کہ صرف اللہ کی عبادت کریں، اسی کے لیے دین کو خالص کرکے اور یکسو ہو کر، نماز قائم رکھیں اور زکوٰة دیتے رہیں، یہی ہے دین سیدھی ملت کا) [5]- سورۃ البينة 1-5

تفسیر:

آيت (۱): کفر کرنے والے لوگ یعنی یہود ونصاری اور مشرکین بغیر واضح دلیل اور روشن حجت کے کفر پر اپنے باہمی اتفاق اور اجماع کو ترک کرنے والے نہیں تھے۔

آیت (۲): یہ واضح دلیل اور روشن حجت اللہ کی جانب سے مبعوث کردہ رسول ہو جو ایسے پاک صحیفے پڑھے جنہیں صرف پاک صاف لوگ ہی چھو سکتے ہیں۔

آیت (۳): ان صحیفوں میں سچی خبریں اور منصفانہ احکام ہوں جو لوگوں کو خیر وبھلائی کی رہنمائی کریں۔

آیت (4): وہ یہود جنہیں توریت دی گئی اور وہ نصاری جنہیں انجیل دیا گیا‘ ان میں اختلاف اسی وقت ہوا جب اللہ نے ان کے پاس اپنا نبی مبعوث فرمایا‘ چنانچہ ان میں سے کچھ لوگوں نے اسلام قبول کیا اور کچھ نبی کی صداقت کو جاننے کے باوجود کفر وسرکشی پر ڈٹے رہے۔

آیت (۵): یہود ونصاری کا جرم اور عناد اس سے ظاہر ہوتا ہے کہ انہیں اس قرآن میں ان باتوں کا ہی حکم دیا گیا جن کا حکم ان کی کتابوں میں دیا گیا تھا یعنی ایک اللہ کی عبادت‘ شرک سے اجتناب‘ نماز کا قیام اور زکاۃ کی ادائگی‘ انہیں جس چیز کا حکم دیا گیا وہی دین حق ہے جس میں کوئی کجی نہیں۔

تدبر اور تزکیہ:

تدبر

تزکیہ

ہم اس سورت سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

عالم اگر کفر کرے تو دوسروں کے مقابلہ میں وہ زیادہ قابل مذمت ہے اور جو شخص علم رکھنے کے باوجود اس پر عمل نہ کرے‘ سب سے پہلے اسی کی ملامت کی جاتی ہے‘ جیسا کہ اہل کتاب کی صورت حال ہے کہ ان کی کتابوں میں نبی صلی اللہ علیہ وسلم کی بعثت کی بشارت دی گئی اور انہیں آپ پر ایمان لانے کا حکم دیا گیا‘ اس کے باوجود انہوں نے آپ کا انکار کیا۔

(اہل کتاب کے کافر اور مشرک لوگ جب تک کہ ان کے پاس ظاہر دلیل نہ آجائے باز رہنے والے نہ تھے)

بغیر علم کے عمل کرنے سے ہمیں ہوشیار رہنا چاہئے‘ کیوں کہ یہ ان لوگوں کا طریقہ ہے جن پر غضب نازل ہوا‘ لیکن ہمیں اپنے علم پر عمل ضرور کرنا چاہئے تاکہ ہمارے علم میں برکت ہو اور ہم ثواب سے ہمنکار ہوسکیں۔

ہمارے دین کی سلامتی اس میں ہے کہ ہم (کتاب وسنت کی) پیروی کریں اور ان دونوں کو مضبوطی سے تھامے رہیں‘ دونوں ہی واضح دلیلیں ہیں‘ یعنی: رسول اللہ صلی اللہ علیہ وسلم اور اللہ تعالی کا کلام۔

(اللہ تعالی کا ایک رسول جو پاک صحیفے پڑھے جن میں صحیح اور درست احکام ہوں)

ہمیں وحی الہی یعنی کتاب وسنت کو پڑھنے کا خوب اہتمام کرنا چاہئے‘ انہیں یاد کرنا‘ سمجھنا اور ان میں غور وفکر کرنا چاہئے‘ یہی کامیابی کی راہ ہے۔

بندہ کے لیے سب سے بڑے خسارے کی بات یہ ہے کہ اللہ کی کتاب اس کے حق میں دلیل بننے کے بجائے اس کے خلاف حجت بن جائے‘ اور جو چیز باہمی اتحاد اور یکجہتی کا سبب ہے وہ آپسی اختلاف اور منافرت کی وجہ بن جائے۔

(اوراہل کتاب اپنے پاس ﻇاہر دلیل آجانے کے بعد ہی (اختلاف میں پڑ کر) متفرق ہوگئے)۔

ہمیں خواہشات نفس کی پیروی نہیں کرنی چاہئے کہ ہم اس کی وجہ سے حق واضح ہونے اور حجت قائم ہوجانے کے بعد بھی آپسی اختلاف کے شکار ہوجائیں۔

رب ایک اور دین ایک ہے‘ تو آخر یہ اختلاف کیوں؟!

(حالاں کہ انھیں یہی حکم ہوا تھا کہ اللہ کی ہی عبادت اس طرح کریں کہ دین کو اسی کے لیے خالص رکھیں، یکسو ہوکر، اور نماز کی پابندی کریں اور زکوۃ دیں، اور یہی درست دین ہے)

ہمیں اللہ کی عبادت میں مخلص ہونا چاہئے‘ اس کے ساتھ کسی اور کو شریک نہیں ٹھہرانا چاہئے‘ کیوں کہ عبادت کی قبولیت کے لیے اخلاص کا پایا جانا شرط ہے۔

نویں مجلس: بہترین مخلوق اور بدترین مخلوق

تلاوت:

ارشادِ باری تعالیٰ ہے: (بیشک جو لوگ اہل کتاب میں کافر ہوئے اور مشرکین سب دوزخ کی آگ میں (جائیں گے) جہاں وه ہمیشہ رہیں گے، یہ لوگ بدترین خلائق ہیں﴿6﴾ بیشک جو لوگ ایمان ﻻئےاور نیک عمل کیے یہ لوگ بہترین خلائق ہیں۔ (7) ان کا بدلہ ان کے رب کے پاس ہمیشگی والی جنتیں ہیں جن کے نیچے نہریں بہہ رہی ہیں جن میں وه ہمیشہ ہمیشہ رہیں گے۔ اللہ تعالیٰ ان سے راضی ہوا اور یہ اس سے راضی ہوئے۔ یہ ہے اس کے لئے جو اپنے رب سے ڈرے(8))۔ سورۃ البينة 6-8

تفسیر:

آیت (6): یہود ونصاری اور مشرکین میں سے جنہوں نے کفر کیا وہ قیامت کے دن جہنم میں داخل ہوں گے جہاں وہ ہمیشہ ہمیشہ رہیں گے‘ وہ بدترین خلائق ہیں‘ کیوں کہ انہوں نے اللہ کے ساتھ کفر کیا اور رسول کو جھٹلایا۔

آیت (7):بیشک جو لوگ ایمان ﻻئےاور نیک عمل کیے یہ لوگ بہترین خلائق ہیں۔

آیت (۸): ان کا ثواب ان کے رب کے پاس یہ ہوگا: ایسی جنت جس کے محلوں اور درختوں کے نیچے سے نہریں جاری ہوں گی‘ وہ ہمیشہ ہمیشہ اسی میں رہیں گے‘ اللہ پر ایمان لانے اور اس کی اطاعت کرنے کی وجہ سے اللہ تعالی ان سے راضی ہوا اور وہ اپنے رب سے راضی ہوئے کیوں کہ انہیں اللہ کی رحمت حاصل ہوئی‘ یہ رحمت اسی شخص کو حاصل ہوتی ہے جو اپنے رب سے ڈرتا ہے‘ چنانچہ اس کے حکم پر عمل کرتا اور اس کی منع کردہ چیزوں سے باز رہتا ہے[49]۔ [49] المختصر في تفسير القرآن الكريم (ص:598)-

تدبر اور تزکیہ:

تدبر

تزکیہ

ہم اس سورہ سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

جس شخص کی فطرت پلٹ چائے اور عقل ماؤف ہوجائے‘ جس کے نتیجے میں وہ اپنے خالق کا انکار کر بیٹھے اور اس کی کتاب کو جھٹلانے لگے‘ تو ایسا شخص بے عقل چوپایوں سے بھی بدتر ہے‘ گرچہ عقلمندوں کے بھیس میں ہی کیوں نہ نظر آئے۔

(بیشک جو لوگ اہل کتاب میں کافر ہوئے اور مشرکین سب دوزخ کی آگ میں (جائیں گے) جہاں وه ہمیشہ (ہمیشہ) رہیں گے۔ یہ لوگ بدترین خلائق ہیں)

اپنی اپنی گردنوں کو جہنم سے آزاد کرنے کی ہر ممکن کوشش کرنی چاہئے‘ بایں طور کہ اللہ پر‘ اس کی کتاب اور اس کے رسول پر ایمان لائیں اور اس کے تقاضے کے مطابق عمل کریں۔

جیسا عمل ہوتا ہے بدلہ بھی اسی جنس سے ملتا ہے‘ چنانچہ جو شخص اس دنیا میں اللہ کو اپنا رب اور معبود تسلیم کرتا ہے‘ اسے آخرت میں اللہ تعالی یہ اجر وثواب دے گا کہ اس سے راضی ہوگا اور اسے بھی راضی کردے گا‘ یہ کتنا بڑا اعزاز ہے!!

(ان کا بدلہ ان کے رب کے پاس ہمیشگی والی جنتیں ہیں جن کے نیچے نہریں بہہ رہی ہیں جن میں وه ہمیشہ ہمیشہ رہیں گے، اللہ تعالیٰ ان سے راضی ہوا اور یہ اس سے راضی ہوئے یہ ہے اس کے لئے جو اپنے پروردگار سے ڈرے)

اللہ کے پاس جو اجر وثواب ہے اسے عمل کے ذریعہ ہی حاصل کیا جا سکتا ہے‘ اس لیے ہمیں نیک اعمال کا اہتمام کرنا چاہئے تاکہ ہم اجر عظیم سے بہرہ ور ہوسکیں۔

اس سورت سے ہدایت کی اور بھی باتیں مستنبط کریں‘ ساتھ جو آیت ان پر دلالت کرتی ہے اس کو بیان کریں‘ نیز اس میں جو اخلاقی پہلو پنہاں ہے اس پر بھی روشنی ڈالیں۔

اس سورت کو سیکھنے کے بعد ہم اس پر عمل کیسے کریں؟

اپنی ذات کے تئیں:

- اللہ نے ہمارے لیے جو روشن دلیل بھیجی میں اس کی پیروی کروں گا تاکہ توحید باری تعالی کو بروئے عمل لاسکوں اور نماز وزکاۃ جیسی عبادتوں کو اخلاص کے ساتھ ادا کر سکوں‘ اور اللہ کی جنت اور خوشنودی سے فیض یاب ہوسکوں‘ نبی صلی اللہ علیہ وسلم کی حدیث ہے: (جو شخص اس حال ميں مرے كہ وه اللہ کے ساتھ کسی کو شریک نہ ٹھہراتا ہو تو وہ جنت میں جائے گا)۔[50]. [50] اس حدیث کو بخاری نے اپنی صحیح (2/71) (1237) میں روایت کیا ہے۔

...

اپنے معاشرہ کے تئیں:

- لوگوں کے سامنے خشیت الہی کی عظمت ومرتبت کو واضح کروں گا‘ وہ اس طرح کہ کبھی انہیں یہ بتاکر ڈراؤں گا کہ کفر اور اعراض کرنے والوں کے لیے جہنم کی آگ اور عذاب ہے‘ اور کبھی یہ بتاکر انہیں ترغیب دلاؤں گا کہ ایمان لانے اور عمل صالح کرنے والوں کے لیے اللہ کے یہاں جنتیں‘ نعمتیں اور دائمى خوشنودی ہے۔ اللہ تعالی کے اس فرمان پر عمل کرتے ہوئے کہ: (ہم نے اس کی دعا کو قبول فرما کر اسے یحيٰ (علیہ السلام) عطا فرمایا اور ان کی بیوی کو ان کے لئے درست کر دیا، یہ بزرگ لوگ نیک کاموں کی طرف جلدی کرتے تھے اور ہمیں ﻻلچ طمع اور ڈر خوف سے پکارتے تھے، اور ہمارے سامنے عاجزی کرنے والے تھے) سورۃ الانبیاء

...

سورۃ الزلزلہ

تمہید

شوق آمیز مقدمہ:

اس کے مختلف طریقے ہیں‘ مثلا:

۳- طلبہ سے اس سورت کے ناموں کے بارے میں سوال کرنا۔

۲- اس سورت کے ساتھ ابو بکر رضی اللہ عنہ کا قصہ

سورت کا تعارف:

۲- سورۃ الزلزلۃ کہاں نازل ہوئی؟

جمہور کے نزدیک سورۃ الزلزلۃ مدینہ میں نازل ہوئی[51] [51] النكت والعيون (6/318))، المحرر الوجيز (5/510)، زاد المسير (4/477)-

۲- اس سورہ کے کون کون سے نام ہیں؟

سورۃ الزلزلہ-

سورہ (إذا زُلْزِلَت الأرض زلزالها) [52]- [52] دیکھیں: صحيح بخاری (6/175)، كتاب تفسير القرآن، باب "كلا لئن لم ينته لنسفعن بالناصية ناصية كاذبة خاطئة"۔

سورة (إذا زُلْزِلَت)-

سورة (الزِّلْزال)-

سورہ (زُلْزِلَت) [53]- [53] دیکھیں: التحرير والتنوير (30/489)، اسماء سور القرآن وفضائلها (ص: 580-583)-

۳- اس سورہ کے ساتھ ابو بکر رضی اللہ عنہ کاکیا قصہ ہے؟

طبری نے اپنی تفسیر میں عبد اللہ بن عمرو بن العاص سے روایت کیا ہے‘ وہ فرماتے ہیں: جب سورہ (إذا زلزلت الأرض زلزالها) نازل ہوئی تو ابو بکر صدیق بیٹھے ہوئے تھے‘ جب یہ سورہ نازل ہوئی تو وہ رونے لگے‘ رسول اللہ صلی اللہ علیہ وسلم نے دریافت کیا: اے ابو بکر ! آپ کیوں رو رہے ہیں؟ انہوں نے جواب دیا: اس سورت نے مجھے رلا دیا‘ رسول اللہ صلی اللہ علیہ وسلم نے ان سے فرمایا: "اگر تم سے غلطی اور گناہ نہ ہوتا جس پر اللہ تمہاری مغفرت فرماتا تو اللہ تعالی ایک ایسی قوم کو پیدا کرتا جو غلطی اور گناہ کرتی اور اللہ تعالی اس کی مغفرت فرماتا"[54]۔ [54] اسے طبری نے اپنی تفسیر (24/553) میں اور بیقہی نے شعب الإیمان (5/41017) (7103) میں روایت کیا ہے، اور "المطالب العالية بزوائد المسانيد الثمانية" لابن حجر (15/443) (237) میں مجموعی طرق کو سامنے رکھتے ہوئے اسے حسن قرار دیا گیا ہے۔

4-سورۃ الزلزلۃ کا موضوع کیا ہے؟

یہ سورہ اس بات سے متنبہ کرتی ہے کہ بندوں پر ایک نہایت ہولناک دن آنے والا ہے جس دن زمین میں زلزلہ پیدا ہوگا اور روئے زمین پر جو بھی بھلائی یا برائی ہوگی اسے زمین بیان کرے گی‘ اس دن بندوں سے ذرہ ذرہ کا حساب لیا جائے گا۔

دسویں مجلس: آخرت اور اس دن کے باریک ترین محاسبہ کی یاد دہانی

تلاوت:

ارشادِ باری تعالیٰ ہے: (جب زمین پوری طرح جھنجھوڑ دی جائے گی- اور اپنے بوجھ باہر نکال پھینکے گی- انسان کہنے لگے گا کہ اسے کیا ہوگیا؟ اس دن زمین اپنی سب خبریں بیان کردے گی- اس لیے کہ تیرے رب نے اسے حکم دیا ہوگا- اس روز لوگ مختلف جماعتیں ہو کر (واپس) لوٹیں گے تاکہ انہیں ان کے اعمال دکھا دیے جائیں۔ سو جو کوئی ذرہ بھر بھی نیکی کرے گا اسے دیکھ لے گا- اور جس کسی نے ذرہ بھر بھی بدی کی ہوگی اسے بھی دیکھ لے گا۔ سورۃ الزلزلۃ: ۱-۸

تفسیر:

آیت (۱): جب قیامت کے دن زمین میں سخت بھونچال پیدا ہوگا۔

آیت (۲): زمین اپنے اندر سے مردوں کو باہر کردے گی۔

آیت (۳): انسان حیرانی کے ساتھ کہے گا: زمین کو کیا ہوا کہ وہ حرکت کرنے لگی اور اپنی جگہ سے ہلنے لگی؟

آیت (4): وہ بڑا ہولناک دن ہوگا جب زمین بتائے گی کہ اس کے اوپر کیا بھلائی اور کیا برائی کی گئی۔

آیت (۵): کیوں کہ اللہ تعالی اسےعلم عطا کرے گا اور بولنے کا حکم دے گا۔

آیت (6): اس ہولناک دن میں جب زمین میں زلزلہ برپا ہوجائےگا‘ لوگ حساب وکتاب کی جگہ سے جوق در جوق نکلیں گے تاکہ دنیا میں کیے ہوئے اعمال کا مشاہدہ کر سکیں۔

آیت (7): چنانچہ جس نے رائی کے دانے کے برابر بھی کوئی نیک اور بھلا کام کیا ہوگا وہ اسے اپنے سامنے دیکھے گا۔

آیت (۸): اور جس نے رائی کے دانے کے برابر بھی کوئی برائی اور گناہ کیا ہوگا وہ اسے اپنے سامنے دیکھے گا[55]. [55] المختصر في تفسير القرآن الكريم (ص:599)-

تدبر اور تزکیہ:

تدبر

تزکیہ

ہم اس سورہ سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورہ کی آیتوں سے اپنے اخلاق کو کیسے مزین کریں؟

وہ اللہ پاک جس نے اس کائنات کو توازن کے ساتھ قائم فرمایا اور استقرار عطا کیا‘ وہیقیامت کے دن اس میں حرکت اور زلزلہ پیدا کردے گا۔

(جب زمین پوری طرح جھنجھوڑ دی جائے گی)

ہمیں اس وحی پر توجہ مرکوز رکھنی چاہئے جو دلوں پر دستک دیتی اور انہیں اس دن کی تیاری کرنے پر آمادہ کرتی ہے جس دن زلزلہ برپا ہوگا-

اس دن زمین اپنے پاک رب کے سامنے کسی کو نہیں چھپائے گی‘ اے ابن آدم! حساب وکتاب سے بچنے کا کوئی بھی راستہ نہیں ہوگا!!

(اور زمین اپنے بوجھ باہر نکال پھینکے گی)

ہم اس بات پر ایمان رکھتے ہیں کہ ہمیں ایسے دن کا سامنا کرنا ہے جس دن ہمیں حساب وکتاب کے لیے قبروں سے اٹھایا جائے گا‘ ہمیں نیک عمل کے ذریعہ اس دن کی تیاری کرنی چاہئے۔

اے ابن آدم! ارد گرد کی مخلوقات تمہارے اوپر گواہ ہیں‘ یہاں تک کہ وہ زمین بھی جس پر تونے زندگی گزر بسر کی اور اسے آباد کیا‘ اس لیے اپنے رب سے شرم محسوس کراور اس کی نافرمانی سے گریز کیا کر۔

(اس دن زمین اپنی سب خبریں بیان کردے گی‘ اس لیے کہ تیرے رب نے اسے حکم دیا ہوگا)

روئے زمین پر نیک اعمال انجام دے کر اور ہلاکت خیز گناہوں سے بچ کر ہمیں زمین کو اپنے حق میں گواہ بنانا چاہئے نہ کہ اپنے خلاف۔

ہر انسان قیامت کے دن اپنا عمل دیکھ لے گا‘ جد وجہد کرنے والوں کی فرحت ومسرت کا کیا عالم ہوگا!! اور ناکارہ وبد عمل لوگوں کی حسرت وندامت کی کیا حالت ہوگی!!

(اس روز لوگ مختلف جماعتیں ہو کر (واپس) لوٹیں گے تاکہ انہیں ان کے اعمال دکھا دیے جائیں)

ہمیں اس دنیاوی زندگی کو غنیمت سمجھنا چاہئے بایں طور کہ ہم باقی رہنے والی نیکیوں سے اپنے دامن مراد کو بھر لیں‘ کیوںکہ آج عمل کا موقع ہے اور حساب وکتاب نہیں‘ اور کل حساب وکتاب ہوگا اور عمل کا موقع نہیں۔

عمل ہی معیار ہے‘ حسب ونسب اور جاہ وحشمت کا کوئی مقام نہیں‘ ایک ایسے میزان (میں ہمارے اعمال وزن کئے جائیں گے) جو ذرہ ذرہ کو وزن کرے گا‘ اے اللہ! ہمیں محفوظ رکھنا!!

(سو جو کوئی ذرہ بھر بھی نیکی کرے گا اسے دیکھ لے گا اور جس کسی نے ذرہ بھر بھی بدی کی ہوگی اسے بھی دیکھ لے گا)

ہم اللہ تعالی کے عدل وانصاف پر اس کی حمد بیان کرتے ہیں‘ وہ پاک رب نیک عمل کرنے کا اجر ضائع نہیں کرتا خواہ معمولی نیکی ہی کیوں نہ ہو‘ نیز کسی گناہ کو حقیر نہ جانیں ممکن ہے کہ وہی گناہ قیامت کے دن ہماری ہلاکت کا سبب بن جائے۔

اس سورت سے ہدایت کی اور بھی باتیں مستنبط کریں‘ ساتھ ہی جو آیت اس پر دلالت کرتی ہے اس کی وضاحت کریں‘ نیز اس میں جو اخلاقی پہلو پنہاں ہے اس پر بھی روشنی ڈالیں۔

اس سورہ کو سیکھنے کے بعد ہم اس پر عمل کیسے کریں؟

اپنی ذات کے تئیں:

- میں اس دنیاوی زندگی میں اللہ تعالی کی طرف رجوع وانابت کروں گا بایں طور کہ اطاعت اور نیکی کے کاموں سے اپنے دامن مراد کو بھروں گا‘ تاکہ بڑے خوف کے دن امن وامان سے بہرہ ور ہوسکوں‘ اس عظیم دن میں مومنوں کی جو حالت ہوگی‘ اسے بیان کرتے ہوئے اللہ تعالی نے فرمایا: (اور وه اس دن کی گھبراہٹ سے بےخوف ہوں گے) [النمل: ٨٩]

...

اپنے معاشرہ کے حق میں:

- میں اپنے دوستوں اور اہل خانہ کو یہ نصیحت کروں گا کہ کسی بھی نیکی کو حقیر سمجھ کر ترک نہ کریں‘ اور نہ کسی برائی کو معمولی جان کر کر بیٹھیں‘ کیوں کہ ابن آدم کے نامہ اعمال میں ذرے ذرے کا حساب شمار کیا جاتا ہے جیسا کہ لقمان نے اپنے بیٹے کو نصیحت کرتے ہوئے فرمایاتھا‘ جیسا کہ فرمان باری تعالی ہے: (پیارے بیٹے! اگر کوئی چیز رائی کے دانے کے برابر ہو پھر وه (بھی) خواه کسی چٹان میں ہو یا آسمانوں میں ہو یا زمین میں ہو اسے اللہ تعالیٰ ضرور ﻻئے گا اللہ تعالیٰ بڑا باریک بین اور خبردار ہے) [سورۃ لقمان]

...

سورۃ العادیات

تمہید

شوق آمیز مقدمہ:

اس کے مختلف طریقے ہیں‘ مثلا:

۱- طلبہ سے العادیات کا معنی پوچھنا۔

۲- گھوڑے کے بارے میں بات کرنا اور اس کی فضیلت پر تبصرہ کرنا۔

سورۃ کا تعارف:

۱- سورۃ العادیات کہاں نازل ہوئی؟

اس کے نزول کے سلسلے میں مفسرین کے دو اقوال ہیں[56]. [56] النكت والعيون (6/323)، المحرر الوجيز (5/513)، زاد المسير (4/480)-

۲- سورۃ العادیات کے کون کون سے نام ہیں؟

(العاديات) [57]، (والعاديات) واو کے ساتھ[58]- [57] بصائر ذوي التمييز (1/537)، التحرير والتنوير (30/497)، اسماء سور القرآن وفضائلها (ص: 585-586)- [58] دیکھیں: صحيح بخاری(6/176) باب تفسير القرآن، باب "ومن يعمل مثقال ذرة شرا يره"، التحرير والتنوير (30/497)، اسماء سور القرآن وفضائلها (ص: 585-586)-

۳- سورۃ العادیات کا موضوع کیا ہے؟

اس سورہ میں اللہ تعالی نے دوڑنے والے گھوڑوں کی رفعت شان کو بیان کرنے کی غرض سے ان کی قسم کھائی ہے‘ یہ گھوڑے اپنے مالک کی اطاعت کرتے اور اس کے دشمنوں کے درمیان گھس جاتے ہیں‘ اس کے بعد اللہ تعالی نے انسان کى حقیقت کے بارے میں جب وہ ایمانی اقدار وروایات سے دامن کش ہو جاتا ہے بیان فرمایا‘ چنانچہ وہ ایسى حالت میں اپنے رب کی بے شمار نعمتوں کا انکار کرنے لگتا ہے‘ وہ اپنے مال کا بڑا حریص ہوجاتا ہے‘ مال کی اتنی محبت رکھتا ہے کہ خرچ کرنے میں بخالت سے کام لیتا ہے۔

گیارہویں مجلس: اپنے مقصد اور آخرت سے انسان کی غفلت

تلاوت :

ارشادِ باری تعالیٰ ہے: ہانپتے ہوئے دوڑنے والے گھوڑوں کی قسم! پھر ٹاپ مار کر آگ جھاڑنے والوں کی قسم! پھر صبح کے وقت دھاوا بولنے والوں کی قسم! پس اس وقت گرد وغبار اڑاتے ہیں- پھر اسی کے ساتھ فوجیوں کے درمیان گھس جاتے ہیں- یقیناً انسان اپنے رب کا بڑا ناشکرا ہے- اور یقیناً وه خود بھی اس پر گواه ہے- یہ مال کی محبت میں بھی بڑا سخت ہے۔ کیا اسے وه وقت معلوم نہیں جب قبروں میں جو کچھ ہے نکال لیا جائے گا- اور سینوں کی پوشیده باتیں ظاہر کر دی جائیں گی- بیشک ان کا رب اس دن ان کے حال سے پورا باخبر ہوگا۔ العاديات: ١ - ١١

تفسیر:

(1)اللہ تعالی نے اس گھوڑے کی قسم کھائی ہے جو اتنی تیزی سے دوڑتا ہے کہ اس کے ہانپنے کی آواز سنائی دیتی ہے۔

(2) نیز اس گھوڑے کی بھی قسم کھائی ہے جو اتنے زور سے پتھروں پر ٹاپ مارتا ہے کہ چنگاری نکل آتی ہے۔

(3) اور اس گھوڑے کی قسم کھائی ہے جو صبح دم دشمنوں پر دھاوا بولتا ہے۔

(4) گرد وغبار اڑاتے ہوئے دوڑتا ہے۔

(5) اپنے شہسوار کے ساتھ دشمنوں کے غول میں گھس جاتا ہے۔

(6) انسان اس خیر کو اپنے پاس روک کر رکھتا ہے جو اس کا رب اس سے چاہتا ہے۔

(6) اس خیر کو روکنے پر وہ خود بھی گواہ ہے‘ یہ اتنا واضح معاملہ ہے کہ وہ خود بھی اس کا انکار نہیں کرسکتا۔

(8) مال سے وہ اس قدر شدید محبت رکھتا ہے کہ اسے خرچ کرنے میں بخالت سے کام لیتا ہے۔

(9) دنیاوی زندگی سے فریب کھانے والا یہ انسان نہیں جانتا کہ جب اللہ تعالی قبروں سے مردوں کو زندہ کرے گا اور حساب وکتاب نیز جزا وسزا کے لیے انہیں زمین سے باہر نکالے گا تو اس وقت معاملہ ایسا نہیں ہوگا جیسا وہ گمان کرتا ہے۔

(10) دلوں میں جو ارادے اور عقیدے وغیرہ مخفی ہوں گے‘ وہ سب ظاہر کردیے جائیں گے۔

(11) اس دن ان کا پروردگار ان کے حال سے پوری طرح باخبر ہوگا‘ اس سے بندوں کی کوئی بھی چیز مخفی نہیں ہوگی‘ اور اللہ تعالی انہیں اس کا بدلہ دے گا[59]- [59] المختصر في تفسير القرآن الكريم (ص:599)-

تدبر اور تزکیہ:

تدبر

تزکیہ

ہم اس سورت سے کیا سیکھتے ہیں؟

کونسی آیت اس پر دلالت کرتی ہے؟

ہم اس سورت کی آیتوں سے اپنے اخلاق کو کیسے مزین کریں؟

اللہ تعالی نے جہاد کوبڑا بلند مقام دیا ‘ چنانچہ اللہ پاک نے مجاہدوں کے گھوڑوں کی قسم کھائی اور ان کے تیز دوڑنے اور حملہ آور ہونے کی صفت بیان فرمائی۔

(ہانپتے ہوئے دوڑنے والے گھوڑوں کی قسم!)

ہمیں نیک کاموں میں جلدی کرنی چاہئے اور ان میں بڑھ چڑھ کر حصہ لینا چاہئے۔