أصول كلاو دان دليل٢ پو

أصول كلاو دان دليل٢ پو

شيخ محمد التميمي رحمه الله

سوڠ أڠن الله ڤوٛ كوڠ ڤهوت٢ مغه ڬايء ڤهوت٢ أنيت غنم

بغاي تهاو ويٚء هاۛ – الله هو نيت غنم ڤاء هاۛ - سبياء٢ پو واجب دڠوۤء دغاي مڬو بايء ڤآء مسألة:

يڠكسا: علمو، دان پو نن كاۛن الله، دان كاۛن نبي پو، دان كاۛن أوڬام إسلام سبيء هوڠ هدوم٢ دليل .

يڠكدوا: عمال توي پو.

يڠككلاو: بغوء دعوة (جياء إياو) ناو ڤاء پو.

يڠكڤآء: دغوم صبر دڠوۤء بغوء ڤڎيء ڤڎوۤ ددالم پو.

دان دليل: الله تعالى فرمان لايء: بسم الله الرحمن الرحيم الله سمڤه هوڠ بيل ويليا (وقتو) 1 سبياء٢ مأنسي نن ضوۤء ددالم كهات 2 ملينكن أغاڠ٢ كوڠ حو إيمان دان حو ڠاء هدوم٢ عمال صالح دان حو حكاي ڤيوآ ڬاوء هوڠ بغوء څاوء (بياء) دان حكاي ڤيوآ ڬاوء هوڠ بغوء دغوم صبر 3 . [سورة العصر: آية 1- 3.]

الإمام الشافعي رحمه الله تعالى حو مياي لايء: "يهلايء الله دمدا أو ڤتغون دليل ناو دڠوۤء مخلوق پو ملينكن هسا سورة ني ڬنوۤب ياۛه أونتوق ڤهوڠ پو."

دان الإمام البخاري رحمه الله تعالى حو مياي لايء: "باب: مڬو علمو دلاو مڠ مياي دان ڠاء عمال، دان دليل پو: الله فرمان لايء: معنا پو لايء ﴿مك تهاو ويٚء هاۛ سبياء٢ پو دمدا أو ڤوٛ ملينكن الله دان لكاو معاف أمڤون ويٚء هاۛ ڤاء دوسا هاۛ ...﴾ سورة محمد آية: 9، مك چب ڤڎاۛم هوڠ مڬو علمو نن" دلاو مياي دان عمال.

بغاي تهاو ويٚء هاۛ – الله هو نيت غنم ڤاء هاۛ -: سبياء٢ پو واجب دڠوۤء غيل٢ أغاڠ إسلام لكاي دان إسلام كماي نن، څاوء مڬو بايء كلاو مسألة ني، دان عمال توي هوڠ توڠبيه پو:

يڠكسا: سبياء٢ الله نن حو ڤجياڠ دغاي، دان بغاي رزقي ڤاء دغاي، دان پو دمدا أو لواٛي كلاء دغاي هوڠ تهويٚه ڤواحيٚه، بهكن پو حو ڤجون ماي ڤاء دغاي هغاڠ رسول، مك حاي٢ ياۛه حو طاعة توي پو؛ حو تماۛ شرڬا، دان حاي٢ ياۛه حو كملاه هوڠ پو؛ حو تماۛ نراكا.

دان دليل نن: الله تعالى فرمان لايء: سبياء٢ كاو حو ڤجون ناو ڤاء ڤهوڠ هاۛ هغاڠ رسول (محمد) كوڠ جيا سكسي ناو دڠوۤء ڤهوڠ هاۛ ياوكا كاو حو ڤجون هغاڠ رسول (موسى) ناو ڤاء فرعون ننغاي، 15 مك فرعون حو ڤچحڠ هوڠ رسول نن مك كاو حو ڤبناس كوڠ ڤهوت٢ تغاوء. 16 [سورة المزمل آية: 15-16.]

يڠكدوا: سبياء٢ الله نن پو دحو ريضا أو ڠاء شريك سبيء هوڠ پو هسا٢ ڤكا ددالم عبادة ناو ڤاء پو، دان دحو مدا أو ڤتاو كوڠ جيء، دان دحو مدا أو غاي نبي كوڠ غاڠ ڤجون، دان دليل پو: الله تعالى فرمان لايء: دان سبياء٢ هدوم٢ مسجد نن ننياۛه ميليك الله مك جواٛي ياۛه توڠبيه ڤهوڠ هاۛ لكاو ڤاء حاي هغاڠ سبيء هوڠ پو . [سورة الجن آية: 18.]

يڠككلاو: سبياء٢ حاي ياۛه طاعة توي ناو ڤاء رسول دان ڤهسا ڤاء الله، دحو حروس أو سمغب پو مييت مياو هوڠ غاڠ كوڠ ڤچحڠ هوڠ الله دان ڤچحڠ هوڠ رسول پو، ولوڤون پو جيا بوت ڤجيٚه ڤهوت٢ جيٛء كڎيٚه.

دان دليل پو: الله تعالى فرمان لايء: هاۛ (محمد) دمدا أو طوۤم ڤهوڠ كوڠ پو إيمان هوڠ الله دان هغاي آخيرة تبلوۤه ڤهوڠ پو أنيت غنم ناو ڤاء أغاڠ٢ كوڠ ڤچحڠ هوڠ الله دان رسول پو سمو مدا ڤهوڠ پو نن جيا أماۛ٢ ڤهوڠ پو أتو أناۛء ڤهوڠ پو أتو هتيان٢ ڤهوڠ پو أتو بوت ڤجيٚه ڤهوڠ پو كڎيٚه. توڠبيه ڤهوڠ پو ننياۛه الله حغاء چيٚء ددالم هتاي توڠبيه ڤهوڠ پو إيمان دان الله ڤكهڠ ناو ڤاء توڠبيه ڤهوڠ پو هوڠ ضوۤڠ مڠ پو، دان پو ڤتماۛ توڠبيه ڤهوڠ پو ناو ددالم شرڬا٢ كوڠ مدا هدوم٢ كغوۤڠ ڎويٚء دملا پو هوڠ توڠبيه ڤهوڠ پو ككل ددالم پو (شرڬا). الله حو ريضا بغاي كتوڠبيه ڤهوڠ پو دان توڠبيه ڤهوڠ پو كوۤ ريضا مڠ پو واۛء غاي، توڠبيه ڤهوڠ پو ننياۛه ڤهوڠ الله. تهاو ويٚء سبياء٢ ڤهوڠ الله ننياۛه أغاڠ٢ كوڠ حو چحناۛه. [سورة المجادلة آية: 22.]

تهاو ويٚء هاۛ – لكاو بغاي الله تچاي ڤطوٓ هاۛ أونتوق طاعة ڤاء پو-: سبياء٢ حنيفية نن – أوڬام إبراهيم -: ڠاء عبادة ناو ڤاء الله هغاڠ ڬوٓت هوڠ إخلاص ددالم عبادة ناو ڤاء پو، دان ياو ننياۛه الله حو ڤڎاغ توڠبيه مأنسي دان الله حو ڤجياڠ توڠبيه ڤهوڠ پو كيوا عبادة، ياوكا الله تعالى حو فرمان لايء: دمدا أو كاو ڤجياڠ جين دان مأنسي نن ملينكن كيوا ڤهوڠ پو ڠاء عبادة ماي ڤاء كاو 56. [سورة الذاريات آية: 56]. دان معنا " يَعْبُدُونِ " ڤهوڠ پو ڤهسا .

دان ڤكا كوڠ ڤهوت٢ ڤغوڠ كوڠ الله حو ڤڎاغ ڤاء پو نن ننياۛه: توحيد، دان پو نن ڤهسا الله هوڠ عبادة.

دان ڤكا كوڠ ڤهوت٢ ڤغوڠ كوڠ الله حو كهاء مڠ پو نن ننياۛه: شريك، دان پو نن جياء إياو كغاي مڠ الله سبيء هوڠ پو.

دان دليل پو: الله تعالى فرمان لايء: دان ڠاء عبادة ويٚء توڠبيه هاۛ ناو ڤاء الله دان جواٛي ياۛه توڠبيه ڤهوڠ هاۛ ڠاء شريك ڤاء پو هسا ڤكا... [سورة النساء آية: 36.]

مك هبيانلاي غاڠ سواٛ هاۛ لايء: حڬيء غاي أصول كلاو كوڠ واجب دڠوٓء مأنسي څاوء تهاو پو نن؟

مك بغاي هاۛ جواب لايء: حلين نن څاوء كاۛن ڤوٛ پو، دان كاۛن أوڬام پو، دان كاۛن نبي پو محمد صلى الله عليه وسلم.

[أوصول يڠكسا]

مك هبيانلاي غاڠ سواٛ هاۛ لايء: حاي ڤوٛ هاۛ؟

مك بغاي هاۛ جواب لايء: ڤوٛ هلين نن الله غاڠ كوڠ ڤجياڠ هلين دان ڤجياڠ توڠبيه عالم هوڠ هدوم٢ نعمة پو، دان پو جيا أغاڠ كوڠ څاوء هلين ككوه دحو مدا أو سمغب هلين غاڠ كوڠ څاوء ككوه كغاي مڠ پو، دان دليل نن: الله تعالى فرمان لايء: هدوم٢ ميوٓم نن تنتو ڤاء الله ڤوٛ كوڠ غقسا توڠبيه عالم 2 [سورة الفاتحة آية: 2]. دان غيل٢ حڬيء كوڠ كغاي مڠ الله پو نن عالم، دان هلين هسا مڠ چمنوٓم نن ننياۛه عالم.

مك هبيانلاي غاڠ سواٛ هاۛ لايء: هوڠ حڬيء غاي هاۛ كاۛن ڤوٛ هاۛ؟

مك بغاي هاۛ جواب لايء: هوڠ هدوم٢ آية پو دان هدوم٢ مخلوق پو.

دان مڠ هدوم٢ آية پو نن: مالم، هغاي، إيا هغاي، دان إيا بلان.

دان مڠ هدوم٢ مخلوق پو نن: لڠيء تجوه تال دان غاڠ كوڠ ضوٓء ددالم پو، دان حلوء تجوه تال دان غاڠ كوڠ ضوٓء ددالم پو، دان حڬيء كوڠ ضوٓء دأنتارا توڠدوا پو.

دان دليل نن الله تعالى فرمان لايء: دان مڠ آية٢ (تندا٢) نن مدا مالم دان هغاي دان إيا هغاي دان إيا بلان، جواٛي ياۛه توڠبيه ڤهوڠ هاۛ سجود ناو ڤاء إيا هغاي دان جواٛي غاي سجود ناو ڤاء إيا بلان، دان سجود ويٚء توڠبيه ڤهوڠ هاۛ ناو ڤاء الله كوڠ پو حو ڤجياڠ توڠبيه پو يهلايء مدا ياۛه توڠبيه هاۛ ككوه ناو ڤاء پو 37 [سورة فصلت آية: 37].

دان الله تعالى فرمان ڬايء لايء: سبياء٢ الله ڤوٛ توڠبيه ڤهوڠ هاۛ نن أغاڠ كوڠ حو ڤجياڠ هدوم٢ لڠيء دان حلوء تحوا أنم هغاي هداي مڠ نن پو حو ضوٓء دڠوٓء عرش (ضوٓء كوڠ سوم هوڠ كمليأن پو كوڠ دحو أو ڤمياو هوڠ مخلوق) پو ڤتماۛ مالم ناو ددالم هغاي دان پو ڤتماۛ هغاي ناو ددالم مالم هوڠ پو سليه پو چحياٚب٢ دان (پو ياۛه أغاڠ كوڠ ڤجياڠ) إيا هغاي دان إيا بلان دان هدوم٢ ڤتوء هوڠ بغاي توڠبيه پو طاعة توي ڤرينته پو، تهاو ويٚء بغوء ڤجياڠ مخلوق دان بغوء تغوت تغآ نن جيا ميليك الله، ڤهوت٢ لو بركة ياۛه الله ڤوٛ كوڠ غقسا توڠبيه عالم 54 [سورة الأعراف آية: 54]

دان ڤوٛ نن پو نن غاڠ كوڠ څاوء غاڠ ككوه؛ دان دليل پو: الله تعالى فرمان لايء: واهاۛي مأنسي ككوه ويٚء توڠبيه ڤهوڠ هاۛ ناو ڤاء ڤوٛ توڠبيه ڤهوڠ هاۛ كوڠ پو حو ڤجياڠ توڠبيه ڤهوڠ هاۛ دان ڤجياڠ أغاڠ٢ كوڠ دلاو مڠ توڠبيه ڤهوڠ هاۛ هغب٢ لايء توڠبيه ڤهوڠ هاۛ تقوى 21 الله ننياۛه أغاڠ كوڠ حو ڤجياڠ حلوء ڠاء جياڠ ڤڎاب لآڠ دان لڠيء نن ڠاء جياڠ ڤبوڠ بغاي كتوڠبيه هاۛ دان حو ڤتغون إيا جآن مڠ مڠوۤء لڠيء ماي مك هوڠ سبب إيا جآن نن پو حو ڤتبياء جنيه٢ بوٓه كياو أونتوق جياڠ رزقي بغاي كتوڠبيه ڤهوڠ هاۛ. مك جواٛي ياۛه توڠبيه ڤهوڠ هاۛ ڠاء شريك ناو ڤاء الله والحال توڠبيه ڤهوڠ هاۛ تهاو چڢايه ياۛه نن 22 [سورة البقرة آية: 21-22]

ابن كثير رحمه الله تعالى حو مياي لايء: "غاڠ كوڠ ڤجياڠ ڤاء هدوم٢ سسواتو ني، پو ياۛه غاڠ كوڠ حو حق أونتوق ڠاء عبادة."

دان جنيه٢ عبادة كوڠ الله حو ڤڎاغ هوڠ پو نن: - ياوكا: إسلام، دان إيمان، دان إحسان، دان مناۛڠ مڠ پو ڬايء: دعاء، دان حواٛيء، دان هغب، دان سغاه غوب، دان تماۛ تكاۛ، دان حواٛيء كڎا، دان خشوع، دان حويء، دان توبة، دان لكاو ضوٓڠ، دان لكاو ڤكواۛء، دان ڎوء ضوٓڠ، دان سيء، دان نذر، دان كغاي٢ ناو ڬايء مڠ هدوم٢ جنيه عبادة كوڠ الله حو ڤڎاغ هوڠ پو نن – توڠبيه پو سمغب الله تعالى، دان دليل پو: الله تعالى فرمان لايء: دان سبياء٢ هدوم٢ مسجد نن ننياۛه ميليك الله مك جواٛي ياۛه توڠبيه ڤهوڠ هاۛ لكاو ڤاء حاي هغاڠ سبيء هوڠ الله. 18 [سورة الجن آية: 18]

مك حاي٢ ياۛه چمناي هسا سسواتو سمغب كغاي مڠ الله؛ مك پو جياڠ غاڠ كوڠ شريك ڬايء جياڠ غاڠ كوڠ كفور (ڨچهڠ)؛ دان دليل پو الله تعالى فرمان لايء: دان حاي٢ ياۛه پو لكاو ناو ڨاء ڨوٛ كغاي سبيء هوڠ الله هوڠ دمدا أو دليل ڨچڢايه ڨاء پو نن مك سبياء٢ جنوم جمغه پو نن دسيسي ڨوٛ پو، سبياء٢ پو دمدا أو حو چهناۛه ڨهوڠ كوڠ ڨچهڠ [سورة المؤمنون آية: 117].

دان ددالم حديث: "دعاء نن جيا ڬلوٓ قوٓء ڨاء عبادة"

دان دليل: الله تعالى فرمان لايء دان ڨوٛ توڠبيه ڨهوڠ هاۛ حو مياي لايء: لكاو دعاء ويٚء توڠبيه ڨهوڠ هاۛ ماي ڨاء كاو تنتو كاو حي تدواٛل ماۛء دعاء توڠبيه ڨهوڠ هاۛ، سبياء٢ ڨهوڠ أغاڠ كوڠ تكبر مڠ هدوم٢ حلين كاو نن ڨهوڠ پو ضوٓء حي تماۛ نراكا جهنم هوڠ حينا 60 [سورة غافر آية: 60].

دان دليل حويء نن، الله تعالى فرمان لايء: ﴿ ... مك جواٛي ياۛه توڠبيه ڨهوڠ هاۛ حواٛيء دڨهوڠ پو دان حواٛيء ويٚء توڠبيه ڨهوڠ هاۛ ماي ڨاء كاو يهلايء مدا ياۛه توڠبيه ڨهوڠ هاۛ جيا أغاڠ٢ كوڠ مؤمين﴾ [سورة آل عمران آية: 175].

دان دليل ڨاء بغوء هغب نن، الله تعالى فرمان لايء: ﴿ ... مك حاي٢ ياۛه پو هغب لايء حو طوٓم هوڠ ڨوٛ پو نن مك كهين ياۛه بغاي پو ڠاء عمل صالح دان جواٛي ياۛه پو ماۛء حاي هغاڠ ڠاء شريك ددالم عبادة ڨوٛ پو﴾ [سورة الكهف آية: 110].

دان دليل توكل (سغه غوب)، الله تعالى فرمان لايء: ﴿ ... مك سغه غوب ويٚء توڠبيه ڨهوڠ هاۛ ناو ڨاء الله يهلايء توڠبيه ڨهوڠ هاۛ جيا أغاڠ٢ كوڠ حو إيمان﴾ [سورة المائدة آية: 23]. دان الله تعالى فرمان ڬايء لايء: دان حاي٢ ياۛه پو سغه غوب ناو ڨاء الله مك الله نن ڬنوٓب ياۛه سمغب پو [سورة الطلاق آية: 3].

دان دليل تماۛ تكاۛ دان حواٛيء دان خشوع، الله تعالى فرمان لايء: سبياء٢ توڠبيه ڨهوڠ پو غوٓ چهماغ ناو ڨاء هدوم٢ ڨكا كوڠ سيام مكاۛ دان توڠبيه ڨهوڠ پو لكاو دعاء هوڠ تماۛ تكاۛ دان حواٛيء ماي ڨاء كاو دان مدا ياۛه توڠبيه ڨهوڠ پو جيا أغاڠ٢ كوڠ خشوع تواضع ماي ڨاء كاو [سورة الأنبياء آية: 90].

دان دليل حواٛيء نن، الله تعالى فرمان لايء: مك جواٛي ياۛه توڠبيه ڨهوڠ هاۛ حواٛيء دڨهوڠ پو دان حواٛيء ويٚء توڠبيه ڨهوڠ هاۛ ماي ڨاء كاو [سورة المائدة آية: 3].

دان دليل توبة نن، الله تعالى فرمان لايء: دان تلوب ويٚء توڠبيه ڨهوڠ هاۛ هوڠ توبة ناو ڨاء ڨوٛ توڠبيه ڨهوڠ هاۛ [سورة الزمر آية: 54].

دان دليل لكاو ضوٓڠ نن؛ الله تعالى فرمان لايء: ناو ڨاء هاۛ ياۛه كوڠ توڠبيه ڨهوڠ كاو ككوه دان ناو ڨاء هاۛ ياۛه كوڠ توڠبيه ڨهوڠ كاو لكاو بغاي ضوٓڠ 5 [سورة الفاتحة آية: 5]. دان ضوٓء ددالم حديث واۛء: "هبيانلاي هاۛ لكاو ضوٓڠ مك لكاو ضوٓڠ ويٚء هاۛ هوڠ الله".

دان دليل لكاو ڨكواۛء؛ الله تعالى فرمان لايء: لايء ويٚء هاۛ (محمد) لكاو ڨكواۛء هوڠ ڨوٛ كوڠ ڨجياڠ وقتو صبح 1 [سورة الفلق آية: 1]، دان لايء ويٚء هاۛ (محمد) كاو لكاو ڨكواۛء هوڠ ڨوٛ مأنسي 1 [سورة الناس آية: 1]

دان دليل لكاو ضوٓڠ؛ الله تعالى فرمان لايء: ﴿تاءكل توڠبيه ڨهوڠ هاۛ لكاو ضوٓڠ ناو ڨاء ڨوٛ توڠبيه ڨهوڠ هاۛ تبلوٓه پو حو تدواٛل ماۛء بغوء لكاو دعاء توڠبيه ڨهوڠ هاۛ...﴾ [سورة الأنفال آية: 6]

دان دليل سيء نن، الله تعالى فرمان لايء: ﴿ لايء ويٚء هاۛ (محمد) سبياء٢ سمياڠ كاو دان عبادة قربان حج دان عمرة) كاو دان هديوء كاو دان متاي كاو نن ننياۛه كيوا الله ڨوٛ كوڠ غقسا توڠبيه عالم 162 دمدا أو شريك ڨاء پو... [سورة الأنعام آية: 162-163] دان دليل مڠ سنة واۛء: "الله حو لعنة حاي٢ ياۛه سيء سمغب كغاي مڠ الله"

دان دليل نذر نن، الله تعالى فرمان لايء: توڠبيه ڨهوڠ پو ڨسمڨرنا هوڠ نذر دان توڠبيه ڨهوڠ پو حواٛيء ڨاء هغاي كوڠ مدا ياۛه عذاب پو نن باوء سمو توڠبيه 7 [سورة الإنسان آية: 7]

[أصول يڠكدوا]

كاۛن أوڬام إسلام نن هوڠ هدوم٢ دليل، دان پو نن: ڨڬول غوب سمغب الله سبيء هوڠ توحيد، دان ڠاء توي پو سبيء هوڠ طاعة، دان هچيه سئآت مڠ شريك دان أهلي پو.

دان پو نن مدا كلاو جنيه: إسلام، إيمان، دان إحسان.

دان غيل٢ جنيه نن مدا ڨاء پو هدوم٢ روكن.

مك روكن إسلام نن مدا لماۛ ڨكا: تڬوء سكسي لايء دمدا أو ڨوٛ كوڠ څاوء غاڠ ككوه هوڠ بياء نن ملينكن الله دان سبياء٢ محمد نن رسول الله، ڨداٛڠ سمياڠ، سواء زكاة، عاۛء دبلان رمضان، دان ڠاء حج دبيت الله الحرام.

مك دليل تڬوء سكسي نن؛ الله تعالى فرمان لايء: ﴿الله حو تڬوء سكسي لايء سبياء٢ پو دمدا أو ڨوٛ كوڠ څاوء غاڠ ككوه هوڠ بياء نن ملينكن پو دان ملائكة دان أغاڠ٢ كوڠ حو علمو نن تڬوء سكسي هوڠ عدل (لايء) دمدا أو ڨوٛ كوڠ څاوء غاڠ ككوه هوڠ بياء نن ملينكن پو (الله) ڨوٛ كوڠ ڨهوت٢ كهڠ ككوٛه ڬايء ڨهوت٢ جك كحاۛه 18﴾ [سورة آل عمران آية: 18].

دان معنا پو لايء: دمدا أو ڨوٛ كوڠ څاوء غاڠ ككوه هوڠ بياء نن ملينكن الله.

" لَا إِلَهَ = دمدا أو ڨوٛ" نافي توڠبيه حڬيء كوڠ غاڠ ككوه كغاي مڠ الله.

" إِلَّا اللَّهُ = ملينكن الله" إثبات ڨاء عبادة نن سمغب الله هغاڠ ڬوٓت.

دحو مدا أو شريك ڨاء پو ددالم عبادة، سياوكا سبياء٢ پو الله دحو مدا حون حوٓي ددالم بغوء تغوت تغآ پو أو.

دان تفسير پو كوڠ غاڠ ڨچڢايه پو، الله تعالى فرمان لايء: دان دتوء كوڠ إبراهيم حو مياي ناو ڨاء أماۛ پو دان قوم پو لايء: سبياء٢ كاو ڎوٓه أته مڠ حڬيء كوڠ ڨهوڠ هاۛ ضوٓء ككوه نن 26 ملينكن أغاڠ كوڠ حو ڨجياڠ كاو... [سورة الزخرف آية: 26-27] دان الله تعالى فرمان ڬايء لايء: لايء ويٚء هاۛ (محمد): واهاۛي أهلي كتاب! ماي ويٚء ڨهوڠ هاۛ ناو ڨاء كلمة كوڠ سمو ڬاو دأنتارا قوٓن كاو هوڠ قوٓن هاۛ پو نن دغاي دحو څاوء ككوه أو ملينكن ناو ڨاء الله دان دغاي دحو څاوء ڠاء شريك هوڠ پو أو دان دغاي دحو څاوء أو غاي ماۛء مناۛڠ مڠ ڬاوء دغاي ڠاء ڨوٛ كغاي مڠ الله، مك يهلايء ڨهوڠ پو ڨليٚء لكوء مك لايء ويٚء توڠبيه هاۛ (أغاڠ٢ مؤمين): توڠبيه هاۛ ڠاء سكسي ويٚء سبياء٢ توڠبيه كاو أغاڠ٢ كوڠ إسلام 64﴾ [سورة آل عمران آية: 64]

دان دليل تڬوء سكسي لايء سبياء٢ محمد نن رسول الله؛ الله تعالى فرمان لايء: حڨه ويٚء سبياء٢ حو تل ماي ڨاء توڠبيه ڨهوڠ هاۛ هغاڠ رسول (محمد) مڠ بڠسا توڠبيه ڨهوڠ هاۛ ڨهوت٢ تغاوء دڠوٓء پو ڨاء حڬيء كوڠ توڠبيه ڨهوڠ هاۛ ضوٓء سيقسا ڬايء ڨهوت٢ طمع كهين بغاي توڠبيه ڨهوڠ هاۛ (حو سيام) ڬايء ڨهوت٢ أنيت ڬايء ڨهوت٢ غنم ڨاء أغاڠ٢ كوڠ مؤمين 128 [سورة التوبة آية: 128]

دان معنا تڬوء سكسي لايء سبياء٢ محمد نن رسول الله: طاعة توي پو ڨاء حڬيء٢ كوڠ پو ڨڎاغ، دان جياٚ ڨاء حڬيء٢ كوڠ پو كهان، دان ڨأته مڠ حڬيء كوڠ پو كهاء، دان دمدا أو ككوه ڨاء الله ملينكن هوڠ حڬيء كوڠ پو حو ڨجلان بلوٓه.

دان دليل سمياڠ، دان زكاة، دان ڨچڢاية ڨاء توحيد نن؛ الله تعالى فرمان لايء: دان دمدا أو غاڠ ڨڎاغ توڠبيه ڨهوڠ پو ملينكن أنتوق توڠبيه ڨهوڠ پو ڠاء عبادة ناو ڨاء الله هوڠ إخلاص عبادة ناو ڨاء پو ڬايء هوڠ څاوء دان أونتوق توڠبيه پو ڨداٛڠ سمياڠ دان سواء زكاة، دان ياو ننياۛه أوڬام كوڠ څاوء 5 [سورة البينة آية: 5]

دان دليل عاۛء نن؛ الله تعالى فرمان لايء: واهاۛي أغاڠ٢ كوڠ حو إيمان الله حو چيٚء فرضو عاۛء (رمضان) ناو دڠوٓء توڠبيه ڨهوڠ هاۛ ياوكا الله حو چيٚء فرضو ناو دڠوٓء أومة دلاو مڠ توڠبيه ڨهوڠ هاۛ ننغاي، هغب لايء توڠبيه ڨهوڠ هاۛ تقوى [سورة البقرة آية: 183]

دان دليل حج نن، الله تعالى فرمان لايء: دان الله حو ڨواجب ناو دڠوٓء مأنسي بغاي ڨدغاۛه روكن حج دبيت الله الحرام ڨاء أغاڠ كوڠ كواسا ناو ڨاء پو، دان أغاڠ هلاي ياۛه پو كملاه مك سبياء٢ الله نن ڨهوت٢ كيآ جياڠ توڠبيه عالم. [سورة آل عمران آية: 97]

جنيه يڠكدوا: إيمان جياٚ؛ دان پو نن: لبيه تجوه ڨلوه تحآن، دان إيمان ڬلوٓڠ جياڠ غاڠ نن لايء: لَا إِلَهَ إِلَّا اللَّهُ، دان إيمان بياٚ جياڠ غاڠ نن ڨلحيوء بغوء ڨڎيء ڨڎوا مڠ جلان، دان بغوء ملاو نن حتحآن مڠ إيمان.

دان روكن پو مدا نم ڨكا: إيمان جياٚ هوڠ الله، دان هدوم٢ ملائكة پو، دان هدوم٢ كتاب پو، دان هدوم٢ رسول پو، دان هغاي آخيرة، دان قضا قدر سيام پو دان كڅه پو.

دان دليل دڠوٓء روكن إيمان نم ڨكا ني؛ الله تعالى فرمان لايء: پو دحو كين سيام مكاۛ أو ڨهوڠ هاۛ ڢيٚ ڢوٓء ڨهوڠ هاۛ ناو ڨيٛڠ ڬه إيا هغاي تڬوٛء دان ناو ڨيٛڠ ڬه إيا هغاي تماۛ نن، تتاڨي بغوء سيام نن ننياۛه أغاڠ كوڠ حو إيمان هوڠ الله دان هغاي آخيرة دان هدوم٢ ملائكة دان هدوم٢ كتاب دان هدوم٢ نبي... [سورة البقرة آية: 177]

دان دليل قدر (بغوء كمنوٓت) نن؛ الله تعالى فرمان لايء: سبياء٢ كاو حو ڨجياڠ غيل٢ جنيه نن هوڠ مدا كمنوٓت 49 [سورة القمر آية: 49]

جنيه يڠككلاو: إحسان – روكن پو هسا -، دان پو نن هاۛ ككوه ناو ڨاء الله سياوكا هاۛ ڢوه پو، مك هاۛ دحو ڢوه پو أو، مك سبياء٢ پو ميٚن ڢوه هاۛ.

دان دليل پو الله تعالى فرمان لايء: سبياء٢ الله نن سبيء هوڠ أغاڠ٢ كوڠ تقوى دان أغاڠ٢ كوڠ ڠاء سيام 128. [سورة النحل آية: 128]

دان الله تعالى فرمان ڬايء لايء: دان توكل (سغه) غوب ويٚء هاۛ ناو ڨاء الله ڨوٛ كوڠ ڨهوت٢ كهڠ ككوٛه ڬايء ڨهوت٢ أنيت غنم 217 كوڠ پو ڢوٛه هاۛ بيل كوڠ هاۛ داٛڠ سمياڠ 218 دان (ڬايء پو ڢوٛه) ڨڎيء بنياي هاۛ سبيء هوڠ أغاڠ٢ كوڠ سجود 219. [سورة الشعراء آية: 217-218-219].

دان الله تعالى فرمان ڬايء لايء: دان دحو مدا أو هاۛ (محمد) ڠاء ڨاء هسا بغوء دان دحو مدا أو غاي هاۛ بايء هسا آية مڠ قرآن  دان دحو مدا أو توڠبيه ڨهوڠ هاۛ ڠاء هسا عمل ملينكن كاو جياڠ سكسي دڠوٓء توڠبيه ڨهوڠ هاۛ دبيل كوڠ توڠبيه ڨهوڠ هاۛ ضوٓء ڠاء پو... [سورة يونس آية: 61] آية

دان دليل مڠ سنة: حديث جبريل كوڠ مشهور، مڠ عمر رضي الله عنه حو مياي لايء: ڨاء هسا هغاي ڨهوڠ دغاي كبوڠ ضوٓء لا دسيسي رسول الله صلى الله عليه وسلم، سغب تيٛ حو تل ماي ڨاء ڨهوڠ دغاي هغاڠ لكاي،غوي چوء كوڠ ڨهوت٢ ڨتيه، ڢوٛء ڨهوت٢ جوء، دمدا أو حو تندا كهان لايء پو غاڠ مسافر، دان دمدا أو حاي هغاڠ دأنتارا ڨهوڠ دغاي كوڠ كاۛن پو تلوٓه پو ضوٓء لآ جيء نبي صلى الله عليه وسلم هوڠ دوا ڬه تعوء پو جيء ڨعيٛق هوڠ دواڬه تعوء نبي، هداي مڠ نن پو چيٛء دوا ڬه ڨلاء تاڠن دڠوٓء ڨحا پو، تبلوٓه پو مياي لايء: واهاۛي محمد!

مياي إيكهان ويٚء هاۛ ڨاء كاو مڠ إسلام؟

مك رسول الله صلى الله عليه وسلم حو جواب لايء: إسلام نن پو ياۛه بغاي هاۛ مڠوچف دوا كلمة شهادة سبياء٢ دمدا أو ڨوٛ كوڠ څاوء غاڠ ككوه هوڠ بياء نن ملينكن الله دان سبياء٢ محمد نن رسول الله، ڨداٛڠ سمياڠ، سواء زكاة، عاۛء بلان رمضان، دان ڠاء حج دبيت الله سكهيا٢ يهلايء هاۛ كواسا ناو، غاڠ لكاي نن حو مياي لايء: هاۛ مياي بياء ياۛ، مك كاو مغسا چهڠوٓل ڨاء غاڠ لكاي كوڠ سواٛ تبلوٓه پو ڨبياء ڨاء نبي،

غاڠ لكاي نن حو سواٛ ڬايء: إيكهان ويٚء هاۛ ڨاء كاو مڠ إيمان؟

رسول الله حو جواب لايء: إيمان نن پو ياۛه جياٚ ناو ڨاء الله، جياٚ هدوم٢ ملائكة پو، جياٚ هدوم٢ كتاب پو، جياٚ هدوم٢ رسول پو، جياٚ هوڠ هغاي آخيرة، دان إيمان جياٚ هوڠ جنجي سيام دان كڅه نن مڠ الله، غاڠ لكاي حو لايء: هاۛ مياي بياء.

تبلوٓه غاڠ لكاي نن حو سواٛ ڬايء: إيكهان ويٚء هاۛ ڨاء كاو مڠ إحسان؟

رسول الله صلى الله عليه وسلم جواب لايء: كهين ياۛه بغاي هاۛ ككوه ناو ڨاء الله ياوكا هاۛ ڢوٛه پو، دان يهلايء هاۛ دحو إياوء ڢوٛه پو أو مك بيد ڨقد الله تتف إياوء ڢوٛه هاۛ.

غاڠ لكاي نن حو سواٛ ڬايء: مك بغاي إيكهان ويٚء هاۛ ڨاء كاو مڠ هغاي قيامة بيان پو تل ماي؟

ڬيت حو جواب لايء: دحو كين أو مين غاڠ كوڠ څاوء غاڠ سواٛ پو نن لبيٚه تهاو مڠ غاڠ كوڠ سواٛ.

غاڠ لكاي نن حو سواٛ ڬايء: مك ڨچڢايه إيكهان ويٚء هاۛ ماي ڨاء كاو مڠ هدوم٢ علامة هغاي قيامة نن؟

رسول الله حو جواب لايء: هبيانلاي حلين كماي ڢمراۛ كوڠ حو ڎيه تڨوي أناۛء هداي ماي أناۛء نن جياڠ چواي دڠوٓء پو، دبيل أغاڠ كوڠ كن دمن كوڠ دحو تكهوٓء أو ڬايء دحو كهن عاو أو أغاڠ٢ كوڠ غوٓڠ ڨبيٚ نن، ڨهوڠ پو ماۛء چهناۛه ڬاوء ڠاء ساڠ ڬلوٓڠ٢.

عمر حو مياي لايء: هداي مڠ نن غاڠ لكاي نن حو ناو واۛء مك كاو حو ضوٓء حرا ييآء، هداي مڠ نن نبي حو سواٛ لايء: واهاۛي عمر! هاۛ تهاو غيٚ أو حاي غاڠ لكاي كوڠ سواٛ كاو نن؟ عمر حو جواب لايء: الله دان رسول پو ياۛه كوڠ ترلبيٛه تهاو، نبي حو إيكهان لايء: مك سبياء٢ پو ننياۛه جبريل عليه السلام، پو ماي نن أونتوق ڨطوٓ غاۛڠ غاو أوڬام تل ناو ڨاء توڠبيه ڨهوڠ هاۛ".

[أصول يڠككلاو]

كاۛن نبي توڠبيه ڨهوڠ هاۛ محمد صلى الله عليه وسلم، دان پو نن محمد بن عبدالله بن عبدالمطلب بن هاشم، دان هاشم ماي مڠ قريش، دان قريش ماي مڠ بڠسا عرب، دان بڠسا عرب نن ماي مڠ بوت ڨجيٚه إسماعيل بن إبراهيم الخليل – عليه وعلى نبينا أفضل الصلاة والسلام -.

دان عمور ڬيت نم ڨلوه كلاو تهون – ڨآء ڨلوه تهون دلاو جياڠ نبي، دان دوا ڨلوه كلاو تهون جياڠ نبي دان رسول.

غاڠ ڨتل ڎومناٛڠ ڨاء ڬيت هوڠ بايء، دان غاڠ ڨجون ڨاء ڬيت سورة المدثر، دان ڨلاي ڬيت مكة.

الله حو ڨجون ڬيت سبيء هوڠ ڨڠت جڬا مڠ ڨكا شريك، دان دعوة (جياء إياو) ناو ڨاء توحيد؛ دان دليل پو الله تعالى فرمان لايء: ﴿واهاۛي أغاڠ كوڠ مسوم ڨحواٛي (محمد)! 1 بوه تڬوء ويٚء هاۛ (محمد مڠ ڎيه) مك ڨڠت جڬا ويٚء هاۛ (دعوة ناو ڨاء مأنسي) 2. دان ناو ڨاء ڨوٛ هاۛ نن مك كهين ياۛه بغاي هاۛ ڨڨغوڠ 3. دان كهن عاو ڠوي چوء هاۛ نن مك كهين ياۛء بغاي هاۛ هچيه سئآت 4. دان بغوء ڠاء دوسا نن مك كهين ياۛه بغاي هاۛ كلاء 5. دان جواٛي ياۛه هاۛ بغاي دغب آغ كغاڠ هوڠ هاۛ ڨڢوٛه كهين حو فائدة لو مڠ غاڠ واۛء 6. دان ناو ڨاء ڨوٛ هاۛ نن مك صبر ويٚء هاۛ (محمد) 7. [سورة المدثر آية: 1 – 7]

دان معنا پو قُمۡ فَأَنذِرۡ: پو ڨڠت جڬا مڠ ڨكا شريك، دان دعوة (جياء إياو) ناو ڨاء توحيد.

وَرَبَّكَ فَكَبِّرۡ پو نن : ڨڨغوڠ پو (الله) هوڠ توحيد.

وَثِيَابَكَ فَطَهِّرۡ معنا پو: ڨهچيه سئآت هدوم٢ عمل هاۛ مڠ ڨكا شريك.

وَٱلرُّجۡزَ فَٱهۡجُرۡ الرُّجْزُ: ڨاء هدوم٢ يآڠ. وَهَجْرُهَا: لواٛي كلاء پو، دان هچيه سئآت مڠ پو دان أهلي پو.

ڬيت حو ماۛء تحوا هڨلوه تهوت ني دعوة (جياء إياو) ناو ڨاء توحيد، دان هداي مڠ هڨلوه تهون، غاڠ حو ڨتڬوء ڬيت ناو مڠوٓء لڠيء، دان غاڠ حو ڨفرضو سمياڠ لماۛ وقتو ناو دڠوٓء ڬيت، دان ڬيت حو سمياڠ ضوٓء دڨلاي مكة كلاو تهون، دان هداي مڠ نن غاڠ ڨڎاغ بغاي هجرة ناو ڨلاي مدينة.

دان هجرة نن: سليه لبيء مڠ ڨلاي كوڠ شريك ناو ڨاء ڨلاي إسلام.

دان هجرة نن غاي واجب دڠوٓء أومة ني مڠ ڨلاي كوڠ شريك ناو ڨاء ڨلاي إسلام، دان پو ضوٓء ڬم لحوت ڢياه تل هغاي قيامة.

دان دليل پو الله تعالى فرمان لايء: سبياء٢ أغاڠ٢ كوڠ ڠاء ظالم ڨاء غوب ڨهوڠ پو ئيٛڠ دبيل ملائكة ماۛء پاوا ڨهوڠ پو نن توڠبيه ملائكة حو سواٛ لايء: ڨهوڠ ڠاء حو حڬيء مناۛڠ (دالم أوڬام ڨهوڠ هاۛ نن) ڨهوڠ پو جواب لايء: مدا ياۛه ڨهوڠ كاو أغاڠ٢ كوڠ ضعيف دڢوٓء حلوء، توڠبيه ملائكة حو سواٛ ڬايء لايء: ننكوٓ حلوء الله نن دحو غناۛڠ أو حڬيء جياڠ ڨهوڠ هاۛ هجرة ناو ڨاء پو أو؟ مك لبيء لبيا ڨهوڠ پو نن ننياۛه نراكا جهنم، دان ڨهوت٢ كڅه لبيء تلوٓب 97. ملينكن أغاڠ٢ كوڠ صعيف (عذور) مڠ ڨهوڠ لكاي٢ دان ڨهوڠ كماي٢ دان ڨهوڠ أناۛء نيٚه كوڠ توڠبيه ڨهوڠ پو دحو كواسا ڨنده أو دان توڠبيه ڨهوڠ پو دحو تهاو كاۛن جلان أو 98 [سورة النساء آية: 97-98]

دان الله تعالى فرمان لايء: واهاۛي هدوم٢ حلين كاو كوڠ حو إيمان! سبياء٢حلوء كاو نن ڨهوت٢ غناۛڠ غنيا مك ككوه ويٚء توڠبيه ڨهوڠ هاۛ ماي ڨاء كاو 56. [سورة العنكبوت آية: 56].

إمام البغوي رحمه الله تعالى حو مياي لايء: "سبب غاڠ ڨتغون آية ني: ڨاء أغاڠ٢ إسلام دڨلاي مكة كوڠ ڨهوڠ پو دحو هجرة أو، الله حو إياو توڠبيه ڨهوڠ پو هوڠ أڠين إيمان."

دان دليل تچاي ناو دڠوٓء بغوء هجرة مڠ سنة؛ نبي صلى الله عليه وسلم برسبدا لايء: "هجرة نن دحو كلوٓه أو هيڠڬا ڨياه تيٚ توبة نن كلوٓه، دان توبة نن دحو كلوٓه أو هيڠڬا ڨياه تيٚ إيا هغاي نن تبياء مڠ ڬه إيا هغاي تماۛ."

مك دبيل ڬيت حو ضوٓء تتب دڨلاي مدينة؛ غاڠ حو ڨڎاغ هدوم٢ شريعة إسلام كوڠ ضوٓء لبيٚه – ياوكا: زكاة، عاۛء، ڠاء حج، أذان، جهاد، دان ڨڎاغ ڬاوء بغاي ڠاء سيام دان كهاء ڬاوء مڠ ڠاء كڅه – ڬيت حو ماۛء دڠوٓء غاۛڠ غاو ني تحوا پو هڨلوه تهون.

دان نبي صلى الله عليه وسلم حو وفاة ناو ياۛ تتاڨي أوڬام ڬيت ضوٓء، دان ني ياۛه أوڬام ڬيت، دحو مدا أو ڨكا سيام ملينكن پو ڨحاۛن جلان ناو دڠوٓء أومة پو، دان دحو مدا أو ڨكا كڅه ملينكن پو ڨڠت جڬا مڠ پو.

دان ڨكا سيام كوڠ حو ڨحاۛن جلان ناو دڠوٓء پو نن ننياۛه: توحيد، دان توڠبيه حڬيء كوڠ الله غنم دان ريضا ڨاء پو.

دان ڨكا كڅه كوڠ حو ڨڠت جڬا مڠ پو نن ننياۛه: شريك، دان توڠبيه حڬيء كوڠ الله ڨموٓه دان ڨچهڠ هوڠ پو.

الله حو ڨجون ڬيت ناو ڨاء مأنسي توڠبيه، دان واجب دڠوٓء جن دان مأنسي نن څاوء طاعة توي پو؛ دان دليل پو الله تعالى فرمان لايء: لايء ويٛء هاۛ (محمد) واهاۛي مأنسي سبياء٢ كاو رسول الله ناو ڨاء ڨهوڠ هاۛ توڠبيه ڬاوء... [سورة الأعراف آية: 158].

دان الله حو ڨسمڨرنا ڨاء أوڬام پو: دان دليل پو الله تعالى فرمان لايء: ...ڨاء هغاي ني كاو ڨسمڨرنا ياۛه أوڬام توڠبيه ڨهوڠ هاۛ بغاي كتوڠبيه ڨهوڠ هاۛ دان كاو ريضا ياۛه إسلام نن جيا أوڬام مڨياٚه بغاي كتوڠبيه ڨهوڠ هاۛ... . [سورة المائدة آية: 3].

دان دليل دڠوٓء وفاة پو؛ الله تعالى فرمان لايء: سبياء٢ هاۛ (محمد) نن متاي دان سبياء٢ توڠبيه ڨهوڠ پو كـوٓ متاي غاي 30 هداي مڠ نن سبياء٢ توڠبيه ڨهوڠ هاۛ دهغاي قيامة ڨديه نن توڠبيه ڨهوڠ هاۛ كڎاه ڬاوء دسيسي ڨوٛ ڨهوڠ هاۛ 31 [سورة الزمر آية: 30-31].

دان مأنسي نن هبيانلاي ڨهوڠ پو متاي بلوٓه څاوء غاڠ ڨتڬوء ڨهوڠ پو (مڠ قبور) واۛء؛ دان دليل پو الله تعالى فرمان لايء: مڠ پو (حلوء نن) كاو حو ڨجياڠ توڠبيه ڨهوڠ هاۛ دان ددالم پو ننغاي كاو ضوٓء حي ڨتلوٓب (ڨمتاي) توڠبيه ڨهوڠ هاۛ دان مڠ پو ننغاي كاو ضوٓء حي ڨتبياء توڠبيه ڨهوڠ هاۛ هڢڠ تڬايء 55 [سورة طه آية: 55] الله تعالى فرمان لايء: دان الله حو ڨجياڠ ڨاء جنياڠ جياڠ توڠبيه ڨهوڠ هاۛ مڠ حلوء 17 هداي مڠ نن پو ڨتلوٓب توڠبيه ڨهوڠ هاۛ ناو ڨاء پو (حلوء) دان پو ڨتبياء توڠبيه ڨهوڠ هاۛ ماي واۛء هوڠ تبياء هڢڠ تڬايء (تڬوء مڠ قبور 18. [سورة نوح آية: 17-18]

دان هداي مڠ تڬوء مڠ قبور غاڠ جنوم جمغه دان غاڠ بلاسن ڨاء عمال٢ توڠبيه ڨهوڠ پو؛ دان دليل پو الله تعالى فرمان لايء: ...أونتوق پو حي بلاسن ناو ڨاء أغاڠ٢ كوڠ توڠبيه ڨهوڠ پو حو ڠاء كڅه نن توي هوڠ حڬيء كوڠ توڠبيه ڨهوڠ پو حو ڠاء بلوٓه، دان پو حي بلاسن ناو ڨاء أغاڠ٢ كوڠ توڠبيه ڨهوڠ پو حو ڠاء سيام نن هوڠ سيام (شرڬا). [سورة النجم لآية: 31]

دان حاي٢ كملاه هوڠ تڬوء مڠ قبور واۛء نن جياڠ كافر؛ دان دليل پو الله تعالى فرمان لايء: ڨهوڠ أغاڠ كوڠ كافر نن ڨمان لايء غاڠ دحو ڨتڬوء ڨهوڠ پو(مڠ قبور) أو، لايء ويٚء هاۛ (محمد) دحو كين ياو نن أو بهكن كاو سمڨه هوڠ ڨوٛ كاو چڢايه جيا غاڠ حي ڨتڬوء توڠبيه ڨهوڠ هاۛ واۛء، هداي مڠ نن غاڠ حي ڨتڎاڠ بغاي كتوڠبيه ڨهوڠ هاۛ تهاو ڨاء حڬيء كوڠ توڠبيه ڨهوڠ هاۛ حو ڠاء، دان كوڠ ياو نن ڨهوت٢ ڢواٛن دڠوٓء الله. [سورة التغابن آية: 7]

دان الله حو ڨجون توڠبيه رسول٢ نن جيا غاڠ ڨسڢاي دان جيا غاڠ كوڠ ڨحويء ڨكڎا؛ دان دليل پو الله تعالى فرمان لايء: (كاو حو ڨجون) رسول٢ نن كيوا إيكهان بغوء سڢاي سوكا دان إيكهان بغوء حويء كڎا أنتوق جواٛي بغاي مأنسي نن ماۛء حجة كملاه ناو دڠوٓء الله هداي مڠ تڬوء رسول٢ نن... [سورة النساء آية: 165]

دان أول مڠ ڨهوڠ پو نن ننياۛه نوح عليه السلام.

دان آخير مڠ ڨهوڠ پو نن ننياۛه محمد صلى الله عليه وسلم، دان پو جيا نبي كوڠ آخير ڨبيه حو مدا أو نبي هداي مڠ پو؛ دان دليل پو الله تعالى فرمان لايء: دمدا أو محمد نن أماۛ حاي هغاڠ مڠ لكاي٢ توڠبيه ڨهوڠ هاۛ تتاڨي پو نن جيا هغاڠ رسول دان نبي كوڠ آخير... [سورة الأحزاب آية: 40]

دان دليل دڠوٓء سبياء٢ نوح نن أول رسول مڠ ڨهوڠ پو؛ الله تعالى فرمان لايء: سبياء٢ كاو حو واحي ناو ڨاء هاۛ (محمد) ياوكا حڬيء كوڠ كاو حو واحي ناو ڨاء نوح دان نبي٢ هداي مڠ پو... [سورة النساء آية: 163]

دان غيل٢ أومة نن الله حوڨجون هغاڠ رسول ناو ڨاء پو – مڠ نوح ڢياه تل محمد – ڨڎاغ توڠبيه ڨهوڠ پو هوڠ ڠاء عبادة ناو ڨاء الله هغاڠ ڬوٓت، دان كهاء توڠبيه ڨهوڠ پو مڠ ڠاء عبادة ناو ڨاء طاغوت (عبادة كغاي مڠ الله)؛ دان دليل پو الله تعالى فرمان لايء: دان حڨه ويٚء سبياء٢ كاو حو ڨتڬوء ڨاء غيل٢ أومة نن هغاڠ رسول، سبياء٢ ككوه ويٚء توڠبيه ڨهوڠ هاۛ ناو ڨاء الله دان ڨأته ويٚء توڠبيه ڨهوڠ هاۛ مڠ طاغوت (حڬيء كوڠ غاڠ ككوه كغاي مڠ الله)... [سورة النحل آية: 36]

دان الله ڨواجب دڠوٓء توڠبيه حلين نن: كفور (ڨچهڠ) هوڠ طاغوت، دان إيمان جياٚ هوڠ الله.

ابن قيم – رحمه الله تعالى – حو مياي لايء:- "معنا كاغوت نن: حڬيء كوڠ حلين نن ڨتغوه كحنآت ڨاء پو – مڠ غاڠ كوڠ څاوء ككوه، أتو غاڠ كوڠ څاوء توي، أتو غاڠ كوڠ څاوء طاعة توي"

دان ڨكا طاغوت نن مدا لو٢، دان قوٓء ڨاء پو نن مدا لماۛ: إبليس لعنة الله، دان حاي٢ ياۛه غاڠ ككوه پو دان پو ريضا، دان غاڠ كوڠ إياو مأنسي بغاي ككوه ناو ڨاء پو، دان غاڠ كوڠ لايء پو تهاو بغوء غيب (بغوء تڎاوء)، دان غاڠ كوڠ كـوٓه حكوم كغاي مڠ حڬيء كوڠ الله حو ڨتغون.

دان دليل پو الله تعالى فرمان لايء: دحو كتاۛء كغاۛء أو ددالم أوڬام إسلام، سبياء٢ حو تڎاڠ چڢايه ياۛه بغوء څاوء مڠ بغوء چهوڠ. مك حاي٢ ياۛه پو ڨچهڠ هوڠ طاغوت (حڬيء كوڠ غاڠ ككوه كغاي مڠ الله) دان پو حو إيمان هوڠ الله مك پو ماۛء ڨن ياۛه هوڠ تلاي كوڠ ككوٛه دحو كلوٓه أو ڨاء پو، دان الله نن ڨوٛ ڨهوت٢ حميت ڬايء ڨهوت٢ تهاو 256. [سورة البقرة آية: 256]. دان ني معنا "لَا إِلَهَ إِلَّا اللَّهُ"، ددالم حديث: "قوٓء ڨاء بغوء حيت نن: إسلام، دان ڬاٛڠ پو نن: سمياڠ، دان ڨبوڠ پو نن: جهاد توي جلان الله"

دان الله نن ڨهوت٢ تهاو.