ننكوۤ هاۛ حو سواٛ غوب هاۛ غيٛ أو؟ حاي ڤجياڠ هاۛ؟ دان څاوء حڬيء غاي؟ دان مدا حڬيء غاي هداي مڠ متاي بلوۤه؟ لجنة (كناء كمكا) علمية ڤاء سماڬوم خدمة حڬيء كوڠ ڎوڠ ڤاء إسلام هوڠ هدوم٢ بهسا
حاي ڤجياڠ هاۛ واهاۛي مأنسي؟ يهلايء هاۛ إياوء ناو ڤاء غوب هاۛ هوڠ ميكرو دوه (ڤڎاب غاڠ ڤغآء)، هاۛ حي ڢوه عالم هوڠ چڢايه دان غاۛڠ غاو پو مك غيل٢ قوۤسيكا ضوۤء ددالم غوب هاۛ پو ڎوڠ هدوم٢ معلومات زيٛن كوڠ مدا قوٛت پو سموك سميٛڠ، ننكوۤ هاۛ حو سواٛ غوب هاۛ غيٛ أو حاي غاڠ كوڠ حو غاء هدوم٢ ليك قوٛت ني؟ دان حاي غاڠ كوڠ حو چيٚء پو دلبيء كوڠ څاوء نن؟
غيل٢ ساڠ ڤتاو ڬلوۤڠ، دان غيل٢ ساڠ بياٚ، پو چريتا غاۛڠ غاو غاڠ ڠاء پو؛ ننكوۤ تماۛ عقل غيٚ أو كوڠ لايء عالم ڤهوت٢ غناۛڠ سبيء هوڠ سيام پو دان چڢايه لايه پو دان مدا راڢياب عاچ جياڠ ماي هوڠ دحو مدا حاي ڤجياڠ أو؟!
واهاۛي مأنسي ياوكا عقل هاۛ دهو تدواٛل أو غاي يهلايء غاڠ لايء ماي ڤاء هاۛ: سبياء٢ دوراسب دومناۛب هبوۤه جياڠ ماي هوڠ چهياٚب٢ هوڠ دهو دمدا غاڠ تاء تيٚڠ دان ڠاء پو أو، أتو بوۤن ڎيٚڠ سموۤك سميٚڠ پو ڠاء بغوء هوڠ څاوء ڬاوء دان چڢايه هوڠ دحو حاي هغاڠ غاء كمويتهي أتو ڬروب ڬروۤڠ أو، مك ياو نن غاي عقل دحو تدواٛل أو غاي يهلايء پو مياي لايء: سبياء٢ عالم ڤهوت٢ ڤغوڠ ني هوڠ توڠبيه حڬيء كوڠ مدا ددالم پو مڠ دناوء داوء دان بغوء چهناي ڤڎيت دان هدوم٢ ڬمرو كوڠ چڢايه لايه دان لڢياٚب غياٚب چوم كوڠ سيام سبياء٢ پو حو ماي هوڠ دحو مدا حاي ڤجياڠ پو أو.؟!
سبياء٢ پو غيل٢ چڎيٚه ضوۤء ددالم عالم ني، مڠ تحوۤل ڤهوت٢ سيت ڢياه تل ڤتوء ڤهوت٢ ڤغوڠ نن، تچاي ناو دڠوۤء بغوء ڤغوڠ ڤاء أغاڠ كوڠ ڤجياڠ پو، مستحيل بغوء سناٛڠ كهيا لايء سبياء٢ مدا ياۛه لڢياٚب غياٚب چوم كوڠ چڢايه لايه ني پو حو جياڠ ماي مڠ بغوء سغاو كداو، سبياء٢ عقل نن تلاۛك كلاء بغوء سناٛڠ كهيا لايء عالم ني جياڠ ماي هوڠ ئيٛڠ٢، أتو ڤرابوان ڤهوت٢ ڤغوڠ سموۤك سميٚڠ ني جيا بغوء كوڠ حو ماي هوڠ دحو ڢمنوۤڠ أو!
دان ياوكا سبياء٢ عقل نن صحيح دان بغوء سناٛڠ كهيا نن سيام توڠدوا پو ضوۤء حي بآ مأنسي ناو ڤاء إيمان هوڠ مدا غاڠ ڤجياڠ ڤاء عالم ني، مك سبياء٢ توڠدوا پو كوۤ بآ دغاي بغاي ماۛء سناٛڠ كهيا ڤاء صفات٢ أغاڠ كوڠ ڤجياڠ ني دان حق پو ماي دڠوۤء دغاي.
سبياء٢ بغوء ماۛء سناٛڠ كهيا ڤاء صفات٢ أغاڠ كوڠ ڤجياڠ ني پو ضوۤء حي ڤاۛه أونتوق دغاي هدوم٢ بوۤه ڢاڠ مڠ بغوء ڤهم يوۤل كينتيٚ دالم تڢواء هوڠ ڤكا چمڢيك ڤاء صفات پو كوڠ ڤهوت٢ سمڤرنا توڠبيه دان ڤهچيه پو مڠ هدوم٢ ڤكا كوڠ كغاڠ.
دان ني حو معنا لايء سبياء٢ أغاڠ كوڠ ڤجياڠ نن پو ڤصفات هوڠ غيل٢ صفات نن ڤهوت٢ سيام ڬايء ڤهوت٢ ڤغوڠ، مك پو ننياۛه ڤهوت٢ هچيه كوڠ كواسا دڠوۤء غيل٢ سسواتو، تهاو ڤاء غيل٢ سسواتو، ڬايء ڤهوت٢ جك كهاۛه ڤاء غيل٢ حڬيء كوڠ پو حو ڤجياڠ دان پو حو كمنوۤت، دان ني بغوء سمڤرنا دهو كين داۛتيٚ كواسا هجنيه نن أو بهكن پو چمڢيك ڤاء عقل، كيوا كغاڠ حڬيء هسا ڤاء صفات پو ڠاء بغاي چهوڠ ددالم بغوء ڤجياڠ دان بغوء ڬروب ڬروۤڠ، دان پو چهوڠ مڠ حڬيء كوڠ إياوء ڢوه لايء ڤهوت٢ سمڤرنا ضوۤء ددالم عالم ني.
ياو نن غاي ڤهچيه پو مڠ بغوء كغاڠ نن ڤچڢايه لايء غاڠ كوڠ ڤجياڠ نن ڤهوت٢ كايا مڠ هدوم٢ مخلوق پو، مك پو دحو څاوء بغوء ڤاء حاي هغاڠ أو، تتاڤي مأنسي توڠبيه حو ناۛه نيٚك ناو ڤاء پو ددالم بغوء مدا ڤهوڠ پو دان بغوء هديوء ڤهوڠ پو، دان الله ڤهوت٢ هچيه سئآت كلاه مڠ بغوء حوٛن حوۤي دان مدا أناۛء تچوۤ، كيوا توڠدوا پو نن ڤتڎاڠ بغوء كغاڠ دان عوۤن، دان الله عزوجل نن كلاه مڠ غاۛڠ غاو توڠبيه نن.
مك هبيانلاي مدا ياۛه الله پو جيا غاڠ كوڠ ڤجياڠ ڤهوت٢ ڤغوڠ څاوء غاڠ ڤصفات هوڠ هدوم٢ صفات كوڠ سمڤرنا دان ڤهوت٢ ڤغوڠ دان پو ياۛه غاڠ كوڠ ڤمدا دغاي ماي دان ڤمدا عالم مڠ دحو مدا أو صوۤه، دان پو غاڠ كوڠ تغوت تغآ توڠبيه حڬيء كوڠ مدا ددالم پو، دان پو غاڠ كوڠ بغاي رزقي دان جغوۤي ماي ڤاء دغاي هوڠ رحمة (بغوء أنيت غنم) پو، دان پو غاڠ كوڠ چت چيٚڠ ڬروب ڬروۤڠ غيل٢ سسواتو؛ ننكوۤ دهو واجب أو حڬيء دڠوۤء دغاي څاوء شكور ناو ڤاء پو دان دغاي دواه حڬيء أونتوق حو ريضا مڠ پو دان ياو هباغ غاي دغاي ڤدغاۛه حق پو كوڠ واجب دڠوۤء دغاي دان سبياء٢ دغاي ڠاء عمل أونتوق ڤچڢايه ڬول ڢمنوۤڠ كوڠ پو حو ڤجياڠ دغاي ماي أونتوق پو؟!
ننكوۤ پو سوم حيد ڤهول غيٚ كوڠ الله هو ڤجياڠ دغاي ماي بلوۤه هداي مڠ نن پو دحو ڤچڢايه ڤاء دغاي أو خڬيء كوڠ پو كهين حو مڠ ڤهوڠ دغاي نن؟ څاوء
حڬيء ڤهوڠ دغاي ضوۤء موۤه ني؟ حڬيء ڬول ڢمنوۤڠ دان ڬول ڎاغ ڤاء مدا دغاي ددالم بغوء هديوء نن؟ حڬيء ضوۤء حي جياڠ تڬوٛء ڤاء دغاي هداي مڠ متاي بلوۤه نن؟
ماي ويٚء ماۛء سناٛڠ كهيا سبيء هوڠ هلين يهلايء مأنسي حو بنا هبوۤه واڠ ڤهوت٢ سيام، دان پو حو ڤتڢواء هوڠ ڤچيك ويجيا هداي ڤبيه، سهيڠڬا ولوڤون پو بنا بلوۤه ياۛه كڎيٚه، چهياٚب٢ نن پو يه كلاء واۛء توڠبيه هوڠ دهو مدا سبب حڬيء أو صوۤه، ننكوۤ دغاي عآچ مياي لايء مأنسي ني جيا غاڠ كوڠ جك كهاۛه حو غيٚ أو؟ پو دحو چڢايه أو حڬيء لايء ڠاء ياو ني نن مبذير تصوۤه٢ پو دحو سوم ڤاء أغاڠ كوڠ مدا عقل نن أو؟
مك هبيانلاي أنڠاء ني غاڠ دحو تدواٛل ماۛء ددالم حق مأنسي أو، مك دغاي سناٛڠ ڢوه لايء ياو هباغ غاي سبياء٢ الله نن ڤهوت٢ جك كهاۛه ڬايء ڤهوت٢ تهاو، بيد ڤقد پو حو ڤجياڠ عالم ني ڤهوت٢ سيام سبيء هوڠ بغوء چهناي ڤڎيت دان چڢايه لايه، هداي مڠ نن پو ڤبناس واۛء هوڠ دحو مدا ڬول ڎاغ أتو حكمة أو حڬيء؟
سبياء٢ الله حو ڤجياڠ مأنسي نن مدا حكمة ڤهوت٢ ڤغوڠ، پو نن ڠاء عبادة ناو ڤاء الله هغاڠ ڬوۤت دحو دمدا شريك ڤاء پو أو، دان ڤجياڠ توڠبيه پو أونتوق ڤلوۤڠ ڤهوڠ پو ضوۤء ددالم دنيا ني، دان الله سنيآ ڤهديوء ڤهوڠ پو واۛء دهغاي قيامة أونتوق جنوم جومغه دڠوۤء هدوم٢ عمل ڤهوڠ پو؛ مك حاي٢ ياۛه حو جياٚ هوڠ الله دان تدواٛل ماۛء بغوء جياء إياو پو مدا ياۛه سمغب پو حو نعمة شرڬا ككل ددالم پو، دان حاي٢ ياۛه كملاه مڠ بغوء بياء نن مدا ياۛه پو مڠ أهلي نراكا.
مك عبادة نن حق كوڠ واجب دڠوۤء دغاي كيوا سبياء٢ پو مڠ ڬول ڢمنوۤڠ كوڠ حو دغاي ماي، دان پو جيا دليل ڤاء بغوء تهاو شكور دان تدواٛل كاۛن هوڠ بغوء تغوت تغآ ڤاء الله دان بغوء عبادة ڤاء پو.
مك ماۛء سناٛڠ كهيا ويٚء هاۛ سبياء٢ الله سبحانه تعالى نن پو ياۛه حو ڤجياڠ هاۛ دان ڤمليا ڤاء هاۛ هوڠ بغاي هميت دان ڢوه، دان بغاي نعمة كوڠ دهو تهاو سمنواٛن أو، دان پو أغاڠ كوڠ ڤڎويء دغه كدالم هدوم٢ غاء هاۛ، دان پو بغاي رزقي ڤاء هاۛ إيا دان أڠين، دان هاۛ دغيل٢ بيل څاوء بغوء ناو ڤاء پو، يهلايء حو مدا بغوء أنيت غنم دان كابيآ مڠ پو أو، بغوء كهڠ كداڠ هاۛ نن څاوء بناس، تتاڤي الله سبحانه وتعالى غقسا ڤاء رزقي هاۛ والحال هاۛ ضوۤء ڎوڠ ددالم تيان أميٛء هاۛ، كوڠ ڤهوت٢ عوۤن دمدا أو هاۛ تغوت تغآ مڠ بغوء حيت هاۛ هسا٢ ڤكا.
مدا كه غاڠ كوڠ ڤجياڠ ڤهوت٢ ڤغوڠ ني دحو سوم حي تدواٛل بغوء ڠاء عبادة ياوكا پو كهين أو حڬيء؟ أتو ياوكا هاۛ كهين ميٚن حڬيء؟ ماۛء سناٛڠ ويٚء هاۛ يهلايء هاۛ كهين بغاي هدياه كأماء هاۛ هسا هدياه، ننكوۤ هاۛ ضوۤء حي ڤليه غواه
حڬيء كوڠ هاۛ باوء هتاي هأو، أتو هاۛ دواه حڬيء كوڠ ڬيت تماۛ تكاۛ أونتوق غياٚب چوم پو هوڠ حڬيء كوڠ سوم ڤاء ڬيت حڬيء؟ ياو ڬاوء غاي بغوء ڠاء عبادة ڤاء الله جل وعلا، دحو چمڢيك توي بغوء كهين دغاي أتو عادة غسم دغاي نن أو، بهكن ياوكا حڬيء كوڠ الله سبحانه وتعالى كهين، دان ياو كوڠ پو ڤڎاغ دغاي ڤاء پو.
مدا ياۛه پو واجب ڤاء عبادة نن إخلاص ناو ڤاء الله تعالى هغاڠ ڬوۤت دحو مدا شريك ڤاء پو أو، مك دحو حروس أو سمغب مأنسي نن ڠاء عبادة كغاي مڠ غاڠ كوڠ ڤجياڠ پو، دان پو دوسا ڤهوت٢ ڤغوڠ كوڠ واجب څاوء تماۛ نراكا پو ڠاء شريك هوڠ الله نن، دان ياو نن غاي يهلايء مأنسي نن ككوه كغاي مڠ الله مڠ هدوم٢ مخلوق پو، ياوكا ككوه يآڠ أتو إيا هغاي أتو إيا بلان، أتو ككوه مأنسي أتو چيم ڤغيم أتو سئوغاڠ لكاي صالح، مك توڠبيه نن مڠ هدوم٢ جنيه شريك دان كفور، دان حاي٢ ياۛه متاي دڠوۤء ياو نن مدا ياۛه غاڠ بلاسن پو تماۛ ددالم نراكا جهنم سلويء٢.
سبياء٢ الله ڤجون لو٢ نبي دان رسول نن أونتوق كهان كدغاي مڠ ڬول ڢمنوۤڠ كوڠ دغاي حو ماي ضوۤء ددالم دنيا دان ڬول ڎاغ ڤاء هديوء نن، دان غيل٢ رسول نن مدا ياۛه رسالة ڤهوڠ پو هسا دان پو نن رسالة إسلام دان دعوة (جياء إياو) أونتوق ڠاء عبادة ناو ڤاء غاڠ كوڠ ڤجياڠ (الله) هغاڠ ڬوۤت دحو مدا شريك ڤاء پو أو، تتاڤي مدا غاڠ سليه دان ڤهلايه ڤدوٛ حڬيء كوڠ حو بآ ماي ڤاء رسول دلاو٢، مك الله حو ڤجون أخير رسول نن ننياۛه محمد دان ڤتغون ناو دڠوۤء پو أخير هدوم٢ رسالة أونتوق مأنسي دان پو ننياۛه القرآن الكريم، دان لو٢ دليل عقل دان دليل علمية كوڠ ڤچڢايه لايء سبياء٢ القرآن نن بوۤه ڤنويء الله، دان سبياء٢ پو كتاب هسا ڬوۤت كوڠ دحو مدا تدواۛل بغوء سليه دان ڤهلايه ڤڎوٛ أو، دان بيد ڤقد الله حو كهان دغاي لايء سبياء٢ پو (الله) دحو تدواۛل ماۛء أو مڠ مأنسي نن كغاي مڠ أوڬام إسلام، دان سبياء٢ توڠبيه هدوم٢ رسول نن رسالة ڤهوڠ پو هسا ميٚن، پو نن دعوة ناو ڤاء توحيد (ڤهسا الله) غاڠ كوڠ ڤجياڠ دان ڠاء عبادة ناو ڤاء پو هغاڠ ڬوۤت دحو مدا شريك ڤاء پو أو، دان الله حو كهان دغاي ضوۤء ددالم القرآن لايء سبياء٢ دموۤه نن مدا شرڬا دان نعمة ككل پو ضوۤء حي حو سمغب أغاڠ٢ مؤمين، دان مدا نراكا سبيء هوڠ عذاب فهوت٢ ڤڎيء سمغب حاي كوڠ ڠاء عبادة ككوه كغاي مڠ الله دان كملاه ڤاء تماۛ إسلام.
حڬيء ناۛه نيٛك دأنتارا أوڬام إسلام هوڠ أوڬام كغاي مڠ پو مڠ هدوم٢ أوڬام نن پو نن سبياء٢ أغاڠ٢ إسلام نن ڤهوڠ پو ڤهسا ڬوۤت غاڠ كوڠ كواسا دڠوۤء ڤتل هدوم٢ دليل عقل دان حقيقة علمو نن، ڤئيٚك دڠوۤء لبيء تبياء ڤاء علمو كوڠ عآچ مڤياٚه هتاي حو، أونتوق ڤچڢايه لايء سبياء٢ قرآن الكريم كوڠ ضوۤء دتاڠن ڤهوڠ پو مغاي ني نن پو نن بوۤه ڤنويء الله غاڠ كوڠ ڤجياڠ سبحانه، څاوء غاڠ غقسا مڠ بغوء سليه دان ڤهلايه ڤڎو.
مك القرآن الكريم نن پو ياۛه كتاب كوڠ الله حو ڤتغون پو ناو دڠوۤء نبي پو محمد صلى الله عليه وسلم، دان سبياء٢ پو حو ڤراجيٚڠ ڬاوء هوڠ مأنسي تحوا لبيٚه مڠ هڤلوه ڤآء قرون ماي ياۛ بغاي ڤهوڠ پو بآ ياو پو (القرآن) نن، سهيڠڬا هسا سورة ياو پو مك ڤهوڠ پو دهو كواسا ڠاء ياو نن أو، دان پو ڬم٢ ڤراجيٚڠ ڢياه تل ماي دغاي غيل هغاي ني دحو حاي هغاڠ عآچ بآ ماي هوڠ هسا سسواتو ياو پو ددالم بوۤه ڤنويء دان چڢايه بهسا ڤهوت٢ چڢايه دان شريعة، دان سبيء هوڠ نن دحو حاي هغاڠ ددالم تاريخ عآچ بآ ماي هسا سسواتو ياو پو أتو سهيڠڬا چهياه٢ پو كوۤ حو أو غاي، دان بهسا ڤهوت٢ چڢايه ددالم القرآن نن دحو كين ڎاۛتيٚ بهسا كوڠ حو تل ماي ڤهوت٢ ڬلوۤڠ بهسا دان چڢايه، بهكن پو ڤلاناۛڠ أونتوق ڎوڠ هدوم٢ داليل عقل دان دليل علمية كوڠ ڤچڢايه لايء سبياء٢ پو جيا بوۤه ڤنويء الله، هبيانلاي مدا ياۛه القرآن الكريم نن ڎوڠ هدوم٢ دليل كوڠ ڤچڢايه لايء پو جيا بوۤه ڤنويء الله، مك سبياء٢ أنڠاء عقل دان بغوء سناٛڠ كهيا پو إيمان جياٚ ڤاء پو دان توي حڬيء كوڠ بآ ماي ڤاء پو، سليه مڠ بغوء باٛڠ ڤئيٚك ناو دڠوۤء كتاب٢ كغاي كوڠ چاوء عيد بول سبيء هوڠ ضوۤڠ ڤاء مأنسي ددالم بغوء ڠاء پو.
مك عقل كوڠ سيام نن پو بآ دغاي ناو ڨاء سبياء٢ پو جيا بوٓه ڨنويء غاڠ كوڠ ڨجياڠ (الله) غاڠ كوڠ ڨجياڠ عالم دان غياب چوم نظام پو ڨهوت٢ سيام، پو نن جيا لبيء تبياء كوڠ عآچ مڨياٚه هتاي أونتوق تهاو كاۛن بغوء بياء، دان دبيل دغاي حو طوٓم ددالم القرآن ني مڠ بغوء جك كهاۛه ڨاء بهسا نن، دان هدوم٢ حقيقة علمية، دان هدوم٢ حكوم شرع روم تماۛ ڬاوء، ڨعيٚك ناو دڠوۤء بغوء غقسا ڨاء پو مڠ كيٚ ڨريٚ توي هوڠ زمان ڨاء دنيا نن، مك حو عآچ ڎواٛيء ويٚه مڠ بغوء بياء أو هوڠ سبياء٢ پو نن جيا بوٓه ڨنويء الله.
ياو طوٓ ناو ني، مك سبياء٢ پو إيمان جياٚ هوڠ حڬيء كوڠ حو بآ ماي أوليه القرآن نن پو دحو كين غاۛڠ غاو ڨاء إيمان جياٚ نن أو، بهكن پو جيا بغوء تدواٛل ماۛء هوڠ عقل كوڠ ضوٓء سبيء هوڠ بغوء دواه مڠ هدوم٢ حقيقة (بغوء بياء
نن).
دان سبياء٢ الله سبحانه وتعالى حو ڨچڢايه ضوٓء ددالم القرآن الكريم نن سبياء٢ پو دمدا أو پو ڨجياڠ دغاي ماي هوڠ تصوٓه٢، دان سبياء٢ پو ڨجياڠ دغاي ماي أونتوق ڠاء عبادة ككوه ناو ڨاء پو.
دان الله حو إيكهان ڨاء دغاي ضوٓء ددالم القرآن لايء سبياء٢ بغوء هديوء ددنيا كوڠ دغاي ضوٓء هديوء ني پو ڎاۛتيٚ لبيء ضوٓء ڨڎوٓه أسوٓن ميٚن پو ضوٓء حي ڨچوب هوڠ دغه٢ ني ياۛ، تتاڨي بغوء هديوء بيد بياء نن ككل ضوٓء دهغاي آخيرة دبيل كوڠ أغاڠ٢ مؤمين نن پو تماۛ ڨاء شرڬا دان أغاڠ٢ كافر نن پو تماۛ ڨاء نراكا.
مك غاڠ كوڠ ڤجياڠ (الله) حو ڨجياڠ دغاي ماي مڠ دحو مدا حڬيء أو صوٓه، پو حو كواسا عآچ ڨتلوب دغاي بغاي هديوء واۛء هداي مڠ متاي بلوٓه، دان ضوٓء دطوٓم داغ دغاي نن مڠ هدوم٢ آية (تندا٢) الله ضوٓء ددالم عالم ني، دغاي ضوٓء ڢوه دليل كوڠ چڢايه دڠوٓء بغوء كواسا كوڠ دحو ڨهوت أو ڨاء الله نن ددالم بغوء ڨهديوء واۛء ڨاء حڬيء٢ كوڠ حو متاي بلوٓه، سياوكا الله پو حو ڨتبياء ڨوي مڠ ڨهوٓن كياو كوڠ جآو نن، دان پو ڨتبياء ملآ مليو دان بوٓه نن مڠ حلوء كوڠ تحو، دان پو حو ڨجياڠ أناۛء كمآ ضوٓء ددالم تيان ميٛء پو مڠ إيا مني، مك سبياء٢ الله سبحانه وتعالى كواسا ڨهديوء غاڠ كوڠ متاي دان ڨتڬوٛء ڨهوڠ پو مڠ قبور ڨهوڠ پو أونتوق بلاسن دهغاي قيامة، مك الله نن كواسا دڠوٓء غيل٢ سسواتو توڠبيه، دان پو جيا بغوء ظالم كوڠ پاوا غاڠ كوڠ ظالم دان غاڠ كوڠ څاوء غاڠ ڠاء ظالم نن هوڠ دحو مدا جنوم جومغه أتو بلاسن حڬيء أو نن.
دان سبياء٢ مأنسي نن ضوۤء سواٛ ڬاوء لايء څاوء ڬيء أوڬام إسلام دان دحو كين هدوم٢ أوڬام كغاي مڠ پو أو؟!
سبياء٢ ڤكا ڤهوت٢ ڤغوڠ كوڠ ناۛه نيٚك مأنسي مڠ هدوم٢ مخلوق كغاي نن پو نن ياۛه عقل سناٛڠ كهيا، دان طواٛ نيآدي پو سناٛڠ كهيا دان دواه مڠ هدوم٢ حقيقة (بغوء بياء) نن.
سبياء٢ إسلام نن أوڬام كوڠ موفقة سبيء هوڠ عقل كوڠ سيام دان سناٛڠ كهيا كوڠ سيام، مك پو ڤتل هدوم٢ جواب هوڠ عقل ڤاء سؤال كوڠ ڤهوت٢ ڤغوڠ نن: څاوء حڬيء دغاي ماي ضوۤء موۤه ني؟ دان حڬيء ڬول ڢمنوۤڠ مڠ بغوء هديوء دغاي؟ دان حڬيء غاي لبيء تلوب هداي مڠ متاي بلوه نن؟
دان إسلام نن پو داٛڠ دڠوۤء ڤهسا أغاڠ كوڠ ڤجياڠ (الله) سبيء هوڠ ڠاء عبادة دان تڬوء سكسي لايء دمدا أو ڤوٛ ملينكن الله، ننياۛه پو جيا سكسي كوڠ أول ڤبيه، دان پو ياۛه أصل ڤاء إيمان ددالم إسلام، دان حو معنا لايء سبياء٢ پو دمدا أو ڤوٛ كوڠ څاوء غاڠ ككوه هوڠ بياء نن ملينكن الله هغاڠ ڬوۤت.
دان ڎوڠ ڤاء سكسي ني مدا ياۛه:
توحيد نن: پو نن إيمان جياٚ هوڠ ڤوٛ كوڠ مدا حق أونتوق ڠاء عبادة هغاڠ ڬوۤت دمدا أو ڠاء شريك ڤاء پو، دان پو دمدا أو حو أناۛء، دان سمغب پو دمدا أو ڤڎوۤت ڤمياو.
هچيه مڠ شريك نن: پو نن كملاه توڠبيه ياڠ٢ دان ڤوٛ٢ كوڠ مأنسي غاڠ كوڠ ڤجياڠ پو نن.
دان إسلام نن واجب إيمان جياٚ هوڠ رسول٢ توڠبيه مك أغاڠ٢ إسلام نن جياٚ ياوكا الله حو إيكهان ددالم القرآن سبياء٢ عيسى نن حلين الله دان رسول پو دان سبياء٢ پو دحو كين أو أناۛء الله، كيوا سبياء٢ الله نن ڤهوت٢ ڤغوڠ دان پو ڤهوت٢ هچيه سئآت مڠ حي مدا ديوء أتو أناۛء، مك پو ڤهوت٢ كيآ مڠ توڠدوا پو دان مڠ غيل٢ سسواتو، دان سبياء٢ الله حو إيكهان دغاي ضوۤء ددالم القرآن لايء سبياء٢ عيسى نن مدا ياۛه هغاڠ نبي كوڠ الله حو ڤتل بغاي كپو لو٢ معجزة دان سبياء٢ الله حو ڤجون پو ماي أونتوق دعوة (جياء إياو) قوم پو بغاي ڠاء عبادة ناو ڤاء الله هغاڠ ڬوۤت دمدا أو ڠاء شريك ڤاء پو، دان حو إيكهان دغاي ڬايء لايء سبياء٢ عيسى دمدا أو لكاو مڠ مأنسي بغاي ككوه ناو ڤاء پو بهكن پو غوب ئيٚڠ مدا ياۛه پو ككوه ناو ڤاء غاڠ كوڠ ڤجياڠ پو، مك هبيانلاي هاۛ كهين إيمان جياٚ هوڠ عيسى دڠوۤء څاوء كوڠ الله غنم نن مك چمڢيك دڠوۤء هاۛ څاوء تماۛ إسلام.
دان الله حو إيكهان دغاي ضوۤء ددالم القرآن لايء سبياء٢ عيسى حو ڤڎاغ قوم پو هوڠ بغاي ككوه ناو ڤاء الله دان ڤڠت جڬا ڤهوڠ پو مڠ شريك.
ننكوۤ سوم غيٚ أو غاڠ كوڠ مدا عقل نن پو ككوه مخلوق ياو پو غاي، پو لڤآ ڢاٛڠ دان پو لڤآ مپوم دان پو دمدا أو كواسا كابيآ غوب پو مڠ متاي أتو مضرة نن؟! ياو هباغ غاي هاۛ ككوه واهاۛي مأنسي عيسى أناۛء مريم پو نن مأنسي غاي څاوء بغوء ناو ڤاء مكانن ڢاٛڠ دان مپوم، دان مدا ياۛه پو ڢيٚ ناو ڤاء غاڠ كوڠ ڤجياڠ پو هوڠ سمياڠ نن؟! ننكوۤ عآچ مين حڬيء سمغب عقل سناٛڠ لايء سبياء٢ ڤوٛ نن پو سمياڠ أونتوق غوب پو ئيٚڠ؟! دحو كين أو الله نن پو حو ڤصفات هوڠ ڤهوت٢ ڤغوڠ، ڤهسا ددالم بغوء سمڤرنا پو، كلاه مڠ بغوء ڤمياو، دان توڠبيه حڬيء كوڠ ضوۤء ددالم عالم ني ضوۤء ملا بغوء كمنوۤت پو دان بغوء تغوۤت تغآ پو؟ ياو هباغ غاي غاڠ حو عقل پو ڤبياٚ غاڠ كوڠ ڤجياڠ هدوم٢ لڠيء دان حلوء نن پو ڤڎيه تڤوي أناۛء نيٚه، هداي مڠ نن پو ڤڬول غوب پو كيوا مخلوق پو أونتوق حي چكاڠ پو؟ سبياء٢ غاڠ كوڠ څاوء غاڠ چكاڠ دان څاوء غاڠ ڤمتاي توڠبيه ڤهوڠ پو مأنسي كوڠ بناسا، تتافي أغاڠ كوڠ ڤجياڠ واۛء نن مك پو هديوء دحو مدا أو متاي، غاڠ كوڠ تغوت تغآ پو دحو تنوۤء متا أو دان دحو ڎيه أو، دحو كين أو حڬيء مڠ بغوء سمڤرنا ڤهوت٢ ڤغوڠ دان ڤهوت٢ ڬلوۤڠ پو مدا ياۛه پو كلاه مڠ بغوء ياو ني؟
سبياء٢ الله حو إيكهان دغاي ضوۤء ددالم القرآن الكريم لايء سبياء٢ توڠبيه رسول نن ڤهوڠ پو حو بآ ماي هوڠ رسالة هسا ضوۤء ددالم بغوء دعوة (جياء إياو) قوم٢ ڤهوڠ پو ناو ككوه الله هسا ڬوۤت دمدا أو ڠاء شريك ڤاء پو، تتاڤي حو تڤآ تغوه لو٢ زمان ناو پو مدا سليه مناۛڠ مڠ رسالة كوڠ ككل ني، مك ڤهوڠ پو دواه نور (چهيآ) توحيد كوڠ حو بآ ماي ڤاء پو هدوم٢ نبي نن مك الله حو ڤجون آخير رسول نن محمد صلى الله عليه وسلم دان حو ڤتغون ناو دڠوۤء پو القرآن الكريم أونتوق ڤبهاو ڤاء توحيد كوڠ حو بآ هوڠ پو توڠبيه رسول٢ مڠ دلاو نن.
دان دآخير دغاي ضوۤء حي لايء ناو ڤاء هاۛ واهاۛي مأنسي: سبياء٢ إسلام نن جيا أوڬام عقل دان سناٛڠ كهيا كوڠ سيام، دان پو جيا أوڬام توحيد كوڠ حو ڤجلان پو أوليه غاڠ كوڠ ڤجياڠ ڤهوت٢ ڤغوڠ أونتوق مأنسي، مك واجب دڠوۤء غيل٢ مأنسي كوڠ مدا عقل سناٛڠ كهيا بغاي چهماغ٢ ناو تماۛ أوڬام إسلام دان ياو نن غاي چاوء جياٚ هوڠ الله جيا ڤوٛ، دان هوڠ إسلام نن جيا أوڬام، دان هوڠ محمد نن جيا رسول، دان ني هسا بغوء كوڠ دحو كين سمغب مأنسي ڤليه غواه ڤاء پو أو، كيوا الله ضوۤء حي سواٛ پو دهغاي قيامة مڠ حڬيء كوڠ حو جواب هوڠ پو ڤاء رسول٢ نن، مك سبياء٢ مدا ياۛه پو غاڠ مؤمين حو سمغب پو بغوء چهناۛه ڤهوت٢ ڤغوڠ، دان سبياء٢ مدا ياۛه پو غاڠ كافر حو سمغب پو بغوء كحات ڤهوت٢ چڢايه.
يهلايء هاۛ دواه بغوء سعادة كوڠ بيآء ددالم دنيا دان بغوء چهناۛه دآخيرة نن، مك تهاو ويٚء هاۛ بغوء سمغيك هتاي ڤهوت٢ ڤغوڠ كوڠ هاۛ عآچ ماۛء پو ددالم هديوء هاۛ پو نن هاۛ څاوء تماۛ إسلام. دان دحو مدا حڬيء أو دڠوۤء هاۛ ملينكن هاۛ څاوء لايء هدوم٢ كلمة ني مڠ هتاي كوڠ بيد بياء (إخلاص): پو نن "أشهد أن لا إله إلا الله، وأشهد أن محمدا رسول الله" هداي مڠ نن بغاي چب ڤڎاۛم مڬو ڤاء
أوڬام هاۛ دان عمال توي حڬيء كوڠ دوا كلمة شهادة نن كهين حو مڠ إيمان جياٚ ناو ڤاء الله دان رسول پو دان ڤن ڤڬم هوڠ هدوم٢ روكن إسلام.
لايء ويٚء هاۛ بيل ني، دان جواٛي ياۛه سدياء سداۛ، مك متاي نن پو تل ماي چهياٚب٢، مك جواٛي هاۛ ڤتيٚ بغوء سمغيك هتاي كوڠ ڤهوت٢ سمكهن ني، جواٛي هاۛ كلاء أوكه سمغب شيطان ريآ ريآڠ (كهاء) هاۛ مڠ ڤكا كوڠ ڤهوت٢ سيام نن، هيآن ويٚء هاۛ، دان چب ڤڎاۛم ويٚء جلان هاۛ ناو ڤاء نور چهيا دان هداية.
سمغيك هتاي ويٚء هاۛ ڤاء بيل ني، دان چب ڤڎاۛم بغوء هديوء روه نآغ بهاو كوڠ پو باوء هوڠ طمأنيتة (ناٛڠ نوۤ) دان باوء هتاي.
"كاو تڬوء سكسي لايء دمدا ڤوٛ كوڠ څاوء غاڠ ككوه هوڠ بياء نن ملينكن الله، دان كاو تڬوء سكسي لايء سبياء٢ محمد نن رسول الله"
