الأذكار التي تقال صباحًا ومساءً

Ырайымдуу жана Мээримдүү Аллахтын аты менен. Эртең менен жана кечинде айтылчу зикирлер

Аллах – Андан башка сыйынууга татыктуу кудай жок. Ал (түбөлүк) Тирүү, (бардыгын) башкарып Туруучу. Ал үргүлөбөйт жана уктабайт. Асмандар менен жердегинин баары Ага тандык. Эч ким Анын алдында, Анын уруксаты болмоюнча шапаат-колдоо көрсөтө албайт. Ал алардын келечегиндеги жана өтмүшүндөгү нерселерди билет. Ал эми, алар болсо, Анын илиминен Ал Өзү каалагандан башка эч нерсени билбейт. Анын Курсийи асмандар жана жерди камтып турат. Ал экөөнү (асмандар менен жерди) сактап туруу Ага эч тоскоолдук кылбайт. Ал Бийик жана Улуу Зат! Бакара, 255-аят, (Аят ал-Курси).

"Элчи анын өзүнө Раббисинен түшүрүлгөн нерсеге ыйман келтирди жана момундардын баары Аллахка, Анын периштелерине, Анын китептерине жана Анын элчилерине ыйман келтиришти. (Алар): "Элчилердин араларын ажыратпайбыз. Уктук жана моюн сундук. О, Раббибиз! Сенин кечиримиңди тилейбиз жана Сенин алдыңа кайтып барабыз" деп айтышты. Аллах эч бир жанды кудурети жетпеген нерсеге буюрбайт (ар кимдин) пайдасы да өз иши(нен), зыяны да өз иши(нен) Оо, биздин Рабби! Эгер унутсак же ката кетирсек бизди жазалаба?! Оо, Раббибиз! Мойнубузга, бизден мурункуларга жүктөгөндөй оор ишти жүктөбө! Оо, Раббибиз! Биздин үстүбүзгө кудуретибиз жетпеген нерселерди жүктөбө! Биздин күнөөлөрүбүздү өчүр жана кечир, бизге ырайым кыл! Өзүң биздин Кожоюнубузсуң! Каапыр коомдорго каршы бизге жардам бер! Бакара, 285-286-аяттар.

Кул хуваллааху ахад. Кул аъуузу бироббил фалак. Кул аъуузу бироббин-наас. Бул үч сүрөнү толук үч жолудан окуу керек.

Аллахтын толук, кемчиликсиз сөздөрү менен Өзү жараткан нерселердин жамандыгынан Анын Өзүнө коргономун. Үч жолу айтылат.

Анын ысымы менен коргоо сураймын. Ал Аллахтын ысымы менен (коргоо суралганда) асмандагы жана жердеги эч нерсе зыян бере албайт. Ал Угуучу жана Билүүчү! Үч жолу айтылат.

Аллахты – Раббим деп, Исламды – диним, жана Мухаммадды (ага Аллахтын тынчтыгы жана мактоосу болсун) – пайгамбарым деп ыраазы болдум. Үч жолу айтылат.

Биз жана бүткүл мүлк Аллахка таандык болуп таңга чыктык. Жана бардык мактоолор да Аллахка таандык. Жалгыз Аллах гана сыйынууга татыктуу Зат. Анын эч кандай шериги жок. Мүлк Ага гана таандык жана мактоолор да Ага гана ылайык. Ал бардык нерсеге Кудуреттүү. Оо, Раббим! Сенден бүгүнкү күндөгү жакшылыктарды жана эртеңки күндөгү жакшылыктарды суранам. Жана бүгүнкү күндөгү жамандыктардан жана эртеңки күндөгү жамандыктардан сактооңду сураймын. Оо, Раббим! Сени менен жалкоолуктан, ал-күчтөн тайган карылыктан жана анын жамандыгынан, тозок азабынан жана кабыр азабынан сактанам. Ал эми кечинде минтип айтат: Биз кеч киргиздик жана бардык мүлк Аллахка таандык болуп кеч киргизди. Ошондой эле "күн" дегендин ордуна минтип айтат: Раббим, Сенден ушул түндүн жакшылыгын сурайм. Ушинтип "таң атырдык, таң атырды, бул күн" деген жерлерин "кеч киргиздик, кеч киргизди, бул түн..." деп өзгөртүп айтат.

Оо, Аллах! Сенин (ырайымың) менен таң аттырдык, Сенин (ырайымың) менен кеч киргиздик. Сенин буйругуң менен жашайбыз жана Сенин буйругуң менен жан беребиз. Жана Сага гана кайтабыз. Ал эми кечинде минтип айтат: Оо, Аллах! Сенин (ырайымың) менен кеч киргиздик, Сенин (ырайымың) менен таң аттырдык. Сенин буйругуң менен жашайбыз жана Сенин буйругуң менен жан беребиз. Жана Сага гана кайтабыз.

Оо, Аллах! Ушул таңда мага же макулуктардын кайсы бирине берилген жакшылык Сенден гана. Сенин шеригиң жок. Бардык мактоо жана шүгүр Сага ылайык! Ал эми кечинде минтип айтат: ...ушул кечте мага...

Үч жолу айтат.

Аллахым, мен Сенден дүйнө жана Акыретте амандыкты тилеймин. Аллахым, мен Сенден динимде, жашоо-турмушумда, үй-бүлөмдө жана мал-мүлкүмдө кечирим жана амандыкты тилейм. Аллахым, менин уяттуу жерлеримди бекит жана коркунучтан аман сакта. Аллахым, мени алды-артымдан, оң тарап, сол тарабымдан жана төбөмдөн (келчү балээлерден) сакта. Ошондой эле түбүмөн келүүчү кыянат өлүмдөн Өз улуулугуң менен сактай көр!

Аллахым, Сен менин Раббимсиң, Сенден башка ибадатка татыктуу кудай жок. Сен мени жараттың, мен Сенин кулуңмун. Мен чолом жетишинче Сага берген убада, шартымды сактаймын. Жасаган иштеримдин жамандыгынан сактоону Сенден суранам. Мага берген нээмат-жакшылыктарыңа ынанам жана күнөөлөрүмдү мойнума алам. Мени кечир, Сенден башка күнөөлөрдү кечирүүчү эч ким жок.

Аллахым, асман-жердин Жаратуучусу, көмүскө жана ашкере нерселерди Билүүчү, бардык нерсенин Раббиси жана падышасы Сенсиң. Сенден башка ибадатка татыктуу кудай жок экендигине күбөлүк беремин. Напсимдин жамандыгынан, шайтандын жамандыгынан жана ширкинен сактоону, өзүмө же башка бир мусулманга жамандык кылып коюудан сактоону Өзүңдөн суранам.

Аллахым, ибадат кылууга татыктуу Сенден башка кудай жок, Жалгыз экениңе жана Мухаммад Сенин кулуң жана элчиң экенине, Сени, ошондой эле Аршыңды көтөрүп турган периштелерге, башка периштелериңе, пайгамбарларыңа жана бардык жаратылгандарга, күбөлүк берип таң аттырдым. Кечинде минтип айтат: Аллахым, мен кечти киргиздим... Акырына чейин айтып, төрт жолу кайталайт.

Жалгыз Аллахтын Өзүнөн башка ибадатка татыктуу кудай жок, Анын шериги да жок! Бардык мүлк жана алкыш-мактоолор Аллахка таандык! Ал бардык нерсеге күчү жетүүчү. Эртең менен да, кечинде да жүз жолудан айтат.

Мага Анын Өзүнөн башка ибадат кылууга татыктуу кудай болбогон Жалгыз Аллах Өзү жетиштүү! Мен Ага тобокел кылдым! Ал - улуу Арштын Раббиси. Жети жолу айтат.

Аллахка мактоолорду айтып, Аны бардык кемчиликтерден аруулаймын. Эртең менен же кечинде жүз жолудан айтылат. Эртең менен да кечинде да жүз жолудан айтса да болот.

Аллахтан кечирим тилейм жана Ага тобо кылам. Жүз жолу айтат.

Мына ушулар зикирлердин жазууга жеңил болгондору. Аллах Таала буларды пайдалуу кылуусун суранамын.

Жазган Мухаммад Салих ал-Уъсаймин, 20-1-1418 х.ж.