لڢياٚب ڠاء عمرة (شرح جياء سڎيٚڠ دان سوڠكهيٚب) ياو هباغ غاي ڠاء عمرة نن؟ (ڨديو ڨطوٓ بغاي سنڠ ڨهم) ڨديو ني ڨچڢايه چارا ڨدغاۛه عبادة عمرة هوڠ ترتيب مڠ چوء إحرام ڢياه تل تحلل، هوڠ أسلوب كوڠ سنڠ دان چڢايه، إياوء ڨديو ني دان سغم مڬو ياو هباغ غاي هاۛ ڨدغاۛه عمرة هاۛ هوڠ سنڠ دان چڢايه. لڢياٚب ڠاء عمرة
واجب دڠوٓء حاي٢ ياۛ كهين ڠاء عمرة نن بغاي پو نية إحرام مڠ ميقاد كوڠ تنتو ڨاء پو.
ميقاد نن: پو نن لبيء٢ كوڠ نبي ﷺ حو ڨتنتو پو أونتوق نية إحرام مڠ پو ڨاء حاي٢ ياۛ كوڠ كهين ڠاء حج أتو عمرة
مك حاي٢ ياۛه حو تڨآ كت هسا٢ مڠ پو كوڠ نية كهين ڠاء حج أتو عمرة نن: واجب دڠوٓء پو څاوء چوء إحرام مڠ پو، دان دحو حروس أو سمغب پو تڨآ ناو هوڠ دحو إحرام أو نن.
دان مدا ياۛه غاڠ كوڠ ضوٓء جيٛء ڨلاي مكة مڠ هدوم٢ ميقات ني ياوكا أهلي جدة: مك سبياء٢ ميقات پو دلبيء پو نن ياۛ؛ مك پو چوء إحرام مڠ پو سمغب حج دان عمرة.
دان أداڨون أهلي مكة واۛء نن: مك ڨهوڠ پو چوء إحرام سمغب حج نن مڠ ساڠ٢ ڨهوڠ پو دمكة. دان أداڨون عمرة واۛء نن، مك ڨهوڠ پو څاوء تبياء ناو لبيء لڠيو مڠ تناۛه حرام، دان ڨهوڠ چوء إحرام مڠ پو، ياوكا التنعيم دان لبيء كغاي٢ ڬايء.
دان حاي٢ ياۛه مدا ياۛه پو ضوٓء ڠوٓء كڨل حوٓه نن: مك سبياء٢ پو چوء إحرام هبيانلاي تل سمو هوڠ ميقات. مك پو غياۛب چوم چوء كهن إحرام دلاو مڠ تل سمو هوڠ ميقات نن، مك هبيانلاي تل سمو ڨاء پو نية إحرام دبيل نن، پو عآچ كمنوٓت بغوء ڠت جڬا دان ڠاء توي بغوء ڨڎاغ جنيه٢ دلاو ناو تل سمو هوڠ ميقات حويء تڨآ تغوه لبيء تلبية، كيوا بغوء غوٓ ڨاء كڨل حوٓه نن، دان دحو حروس أو سمغب پو ڨتيٛ ڢياه پو تغون ڨداۛه دتراڠ كڨل حوٓه نن.
لڢياۛب إحرام دان حكوم٢ پو حاي٢ ياۛه پو كهين إحرام مك سبياء٢ پو:
2. دان سنة ڨڎاغ مپاۛء باو سمغب لكاي٢ نن، دان مدا ياۛه پو دغوب سيٚء دان بلاو كاڠ، كغاي مڠ كهن عاو إحرام.
3. دان واجب ڠوي چوء كهن عاو إحرام، دان پو نن سمغب لكاي: كهن تڢاء ڬهڠوٓء دان ڠوي ڬهلا، دان سنة مدا ياۛه توڠدوا پو نن سڢو ڨتيه هچيبه سئآت أتو بهاو.
دان كماي نن چوء إحرام ڨاء حڬيء كوڠ پو كهين مڠ كهن عاو كوڠ دحو ڨحاۛن بغوء توب تيٚڠ أو، تتاڨي پو څاوء ڨڎوٓه ته مڠ چوء نقاب دان سغوٓم تاڠن، دان پو ڬوم ڢوٓء پو دان تاڠن پو هوڠ حڬيء كوڠ كغاي مڠ نن.
4. دان إحرام نن: پو نن نية ڨتماۛ ددالم النسك (بغوء ڠاء عبادة)، مك پو لايء: هاۛي الله كاو ماي لبيء ني ياۛه أونتوق ڨسمڨرنا عبادة عمرة. لبيك اللهمَّ عمرةً دان هبيانلاي مدا ياۛه غاڠ ڠاء عمرة كغاي مڠ غوب ئيٛڠ، مك پو لايء: هاۛي الله كاو ماي لبيء ني ياۛه أونتوق ڨسمڨرنا عبادة عمرة ڬنتي كغاڠ. لبيك اللهمَّ عمرةً عن فلانٍ
5. دان هبيانلاي غاڠ كوڠ كهين إحرام نن حواٛيء مڠ غاۛڠ غاو كوڠ كهاء پو مڠ حي ڨسمڨرنا عبادة عمرة پو مك حروس سمغب پو هسا شرط دبيل چوء إحرام نن مك پو لايء: هاۛي الله كاو ماي لبيء ني أونتوق ڨسمڨرنا عبادة عمرة، يهلايء مدا غاۛڠ غاو حلاي هسا كوڠ كهاء كاو نن لبيء كوڠ ڨچوب كاو مك دلبيء كوڠ غاڠ حو كهاء كاو ننياۛه لبيك اللهمَّ عمرةً، وإن حبسني حابسٌ فمَحِلِّي حيثُ حبستني مك بيل هلاي پو حوكمنوٓت شرط بلوٓه دان هداي مڠ نن حو طوٓم ڨاء پو هوڠ حڬيء كوڠ كهاء پو مڠ ڨسمڨرنا عبادة عمرة پو، مك سبياء٢پو حروس تحلل دان دحو مدا سسواتو حڬيء أو دڠوٓء پو.
6. هداي مڠ نن ڨلو٢ مڠ بايء تلبية: (كاو حو تدواۛل بغوء إياو هاۛ ياۛه واهاۛي الله كاو حو تدواۛل بغوء إياو هاۛ ياۛه، كاو حو تدواۛل بغوء إياو هاۛ ياۛه دحو مدا أو شريك ڨاء هاۛ، سبياء٢ بغوء ميوٓم دان نعمة نن تنتو ڨاء هاۛ دان بغوء تغوت تغآ نن دمدا أو حون حوٓي ڨاء هاۛ) (لبيكَ اللهمَّ لبيك، لبيك لا شريكَ لكَ لبيك، إنَّ الحمدَ والنعمةَ لكَ والملك لا شريكَ لكَ) لكاي نن ڨوٛء سب پو هوڠ ياو نن، دان ياو ننغاي كماي، يهلايء دحو أو مدا ضوٓء دسيسي نن لكاي٢ كوڠ دحو كين بوت ڨجيٚه پو أو.
7. واجب دڠوٓء غاڠ إحرام نن ڨأته مڠ هدوم٢ ڨكا كوڠ غاڠ كهاء دبيل إحرام نن هيڠڬا پو تحلل مڠ إحرام پو.
ڨكا٢ كوڠ غاڠ كهاء ڨاء إحرام نن مدا كلاو جنيه: يڠكسا: جنيه كوڠ غاڠ ڨحرام دڠوٓء لكاي٢ دان كماي٢ نن:
كواه بلاو أتو چكاوء پو أتو بويء پو، مڠ لبيء هلاي كڎيٚه مڠ غوب سيٚء پو.
چكاوء هدوم٢ ككاو توڠبيه أتو مناۛڠ مڠ پو مڠ دواڬه ليٚ أتو دواڬه تاڠن.
ڨڎاغ مپاۛق باو ڨاء غوب سيٚء، أتو كهن عاو إحرام.
ڨڬوي چب چيم ڠوٓء تحو، أتو چب پو ولوڨون دحو ڨمتاي پو أو كڎيٚه.
كحيا كماي، سمغب غوب پو ئيڠ أتو سمغب غاڠ كغاي.
ڨوٓه غوب سيٚء ڬه لڠيو كغاي مڠ ڨڎاب ملاو، ياوكا چوم، دان ڨوٓه هوڠ نفسو.
جماع: پو نن ڨتماۛ ڨڎاب ملاو لكاي ناو دالم ڨڎاب ملاو كماي.
يڠكدوا: جنيه كوڠ غاڠ ڨحرام دڠوٓء لكاي٢:
ڬوم قوٓء هوڠ حڬيء ڨوٓه ڨديل ڨاء پو، ياوكا: مواٛق دان سال، دان تڢاء عاو مڠوٓء قوٓء دان كغاي٢ ناو ڬايء مڠ حڬيء٢ كوڠ سومڎاغ هوڠ پو ڨاء ڬوم قوٓء.
چوء كهن عاو تهومڎا كوڠ چهيء بغاي څاوء هوڠ غوب سيٚء؛ هوڠ غوب غياڠ تهومڎا، ياوكا عاو غاڠ چكاوء، دان چڨحا، دان عاو سميء.
يڠككلاو: جنيه كوڠ غاڠ ڨحرام دڠوٓء كماي٢:
چوء نقاب أتو برقع أتو لاڠ ڬوم ڢوٓء ياو نقاب غاي، دان واجب دڠوٓء پو ڬوم ڢوٓء پو دسيسي لكاي٢ كوڠ صح نكاح هوڠ حڬيء كوڠ كغاي مڠ نن.
چوء سغوٓم تاڠن دتاڠن پو توڠدوا، دان واجب دڠوٓء پو ڬوم دواڬه تاڠن پو دسيسي لكاي٢ كوڠ صح نكاح.
غاڠ ڠاء عمرة نن پو چب ڨڎاۛم عمرة پو هوڠ طواف طوٓم داغ كعبة.
دان شرط أونتوق طواف دطوٓم داغ كعبة نن كهين ياۛه غاڠ نن حچيه سئآت.
هبيانلاي غاڠ إحرام نن تماۛ ڨاء مسجد الحرام سنة ڨاء پو بغاي چب ڨڎاۛم هوڠ ليٚ ڬه نواۛء پو. دان پو بايء دعاء تماۛ مسجد، دان پو نن: "" واهاۛي الله ڨاۛه حاي ويٚء سمغب كاو هدوم٢ بهڢڠ رحمة هاۛ"." اللهمَّ افتحْ لي أبوابَ رحمتِكَ
هبيانلاي پو حو ڢوٛه كعبة مك سبياء٢ پو څاوء ڨداۛه تلبية.
مك هبيانلاي پو كهين چب ڨڎاۛم طواف، سنة سمغب پو څاوء اضطباع، هوڠ چيٚء چوم كاۛه كهن إحرام پو دملا ڨعآء پو ڬه نواٛء دان جوڠ كهن توڠدواڬه نن چيٚء مڠوٓء بغآ پو ڬه عيو، مك هبيانلاي سله سلاي مڠ طواف ڨتلوب كهن إحرام پو واۛء مك ڬوم بغآ توڠدوا واۛء؛ كيوا سبياء٢ پو اضطباع نن لبيء پو ڎاۛتيٚ طواف مين.
چب ڨڎاۛم طواف نن مڠ حجر الأسود.
مك غاڠ ڨسنة بغاي ناو جيٛء حجر الأسود هوڠ تاڠن ڬه نواٛء پو دان چوم پو، مك يهلايء پو دحو عآچ چوم حو أو پو ڨن هوڠ تاڠن پو دان چوم تاڠن پو، مك يهلايء پو دحو عآچ ڠاء ياو نن حو أو، پو ڨوٓه هوڠ سسواتو ڬيء هسا كوڠ سبيء هوڠ پو ياوكا ڬاي جاۛ دان كغاي٢ ڬايء دان چوم پو، مك يهلايء پو دحو عآچ ڠاء ياو نن حو أو ڬايء مك سبياء٢ پو ڢيٚ ڢوٓء ناو موٓڠ حجر الأسود دان ڠاء إشارة هوڠ تاڠن پو دان دحو چمڢيك چوم پو أو. دان سسيام٢ نن جواٛي ياۛه چحول ڬاوء كوڠ ڠاء بغاي ڨڎيء ڨڎوا تل غاڠ كغاي دان ڠاء بغاي غوب ئيٛڠ ڨڎيء ڨڎوا كيوا ڨهوڠ پو.
دان سنة څاوء لايء دبيل ڨوٓه حجر الأسود دان ڠاء إشارة ناو ڨاء پو: الله ڨهوت٢ ڨغوڠ (اللهُ أكبرُ).
هداي مڠ نن پو ڢيٚ ناو ڬه نواٛء مك ڨجياڠ كعبة نن ضوٓء ڬه عيو پو. مك هبيانلاي پو ناو تل ركن يماني ڨوٓه پو هوڠ دحو چوم پو أو، مك يهلايء پو دحو عآچ ڠاء ياو نن حو أو مك جواٛي ياۛه پو محاء ڬاوء ناو دڠوٓء پو، دان جواٛي ڨحاۛن ناو ڨاء پو.
هاۛي ڨوٛ كاو بغاي ڨاء كاو حاي ويٚء ڨكا سيام مكاۛ ددنيا دان ڨكا سيام مكاۛ دآخيرة دان غقسا كاو حاي ويٚء مڠ عذاب نراكا (رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ).
دان پو لايء دأنتارا ركن يماني دان ڨتاو حجر الأسود:
دان غيل٢ ڢڠ پو تڨآ كت ڨتاو حجر الأسود نن پو ڠاء إشارة ڨاء پو هوڠ تاڠن پو، دان پو لايء: الله ڨهوت٢ ڨغوڠ (اللهُ أكبرُ)
دان تحوا كوڠ ضوٓء لبيٚه مڠ طواف پو نن پو عآچ بايء حڬيء كوڠ پو تكاۛ مڠ ذكر دان دعاء دان بايء قرآن.
دان سنة څاوء رمل (كبآء غوٓ) دكلاو جوم أول مين – يهلايء عآچ ڠاء ناو حو سمغب پو-، كبآء غوٓ سبيء هوڠ يآم جيٛء٢، دان أداڨون ڨآء جوم كوڠ ضوٓء لبيه نن دحو مدا أو څاوء غوٓ ڨاء پو.
مك هبيانلاي پو حو ڨسمڨرنا طواف بلوٓه سنة څاوء سمياڠ دوا ركعة دلكوء مقام إبراهيم يهلايء عآچ ڠاء ناو حو، يهلايء دحو عآچ أو پو سمياڠ لبيء هلاي كڎيٚه ددالم مسجد نن. بايء ڨاء ركعة يڠكسا هداي مڠ سورة فاتحة: ﴿قُلۡ يَٰٓأَيُّهَا ٱلۡكَٰفِرُونَ﴾ بايء ڨاء ركعة يڠكدوا هداي مڠ سورة فاتحة: ﴿قُلۡ هُوَ ٱللَّهُ أَحَدٌ﴾.
هداي مڠ نن سنة بغاي پو ڢيٚ ڢوٓء ناو موٓڠ قبلة (كعبة)، دان پو لايء: دمدا ڤوٛ كوڠ څاوء غاڠ ككوه هوڠ بياء نن ملينكن الله هغاڠ ڬوٓت، دمدا أو ڠاء شريك ڤاء پو، ڤاء پو بغوء بغوت تغآ دان ڤاء پو هدوم٢ ميوٓم، دان پو ڨهوت٢ كواس دڠوٓء توڠبيه سسواتو، دمدا ڨوٛ كوڠ څاوء غاڠ ككوه هوڠ بياء نن ملينكن الله هغاڠ ڬوٓت، پو حو ڨباوء بغوء سونيا، دان پو ضوڠ حلين پو، دان پو ڨكله هدوم٢ ستغو هغاڠ ڬوٓت. (لا إلهَ إلا اللهُ وحدهُ لا شريكَ لهُ، لهُ الملكُ ولهُ الحمدُ، وهوَ على كلِّ شيءٍ قديرٌ، لا إلهَ إلا اللهُ وحدهُ، أنجزَ وعدَهُ، ونصرَ عبدَهُ، وهزمَ الأحزابَ وحدهُ" أولڠ ياو نن كلاو ڢڠ دان لكاو دعاء دأنتارا نن.
هداي مڠ نن تغون مڠ چاۛء صفا ناو چاۛء مروة هوڠ كباء، مك هبيانلاي تل تندا سڢواٚ جاو ڨاء لكاي٢ مين كوڠ څاوء ڨغاٛڠ كباء، مك هبيانلاي تل تندا سڢواٚ جاو يڠكدوا كباء تهوم مڎا واۛء.
مك هبيانلاي ناو تل مروة غاڠ ڨشرع ڨاء پو ياوكا حڬيء كوڠ حو ڠاء دڠوٓء صفا نن غاي. مڠ تكبير دان دعاء دان بايء دان ڢيٚ ناو موٓڠ كعبة.
هداي مڠ نن تغون مڠ صفا ناو مروة هوڠ كبآء. مك هبيانلاي تل تندا سڢواٚ جاو څاوء ڨغاٛڠ كباء، مك هبيانلاي تل تندا سڢواٚ جاو يڠكدوا كباء تهوم مڎا واۛء.
دان ياو ننياۛه هيڠڬا سمڨرنا تجوه جوم. پو ناو مڠ صفا تل مروة نن حجوم، دان پو تلوب مڠ مروة ناو صفا نن حجوم كغاي ڬايء؛ چب ڨڎاۛم هوڠ صفا دان ڨچوب هوڠ مروة.
دان پو لايء دالم سعي پو حڬيء كوڠ پو تكاۛ مڠ ذكر دان دعاء دان بايء قرآن.
لڢياٚب كواه قوٓء دان چكاوء ڢوٛء:
مك هبيانلاي غاڠ ڠاء عمرة نن حو ڨسمڨرنا طواف دان سعي پو واجب دڠوٓء لكاي نن څاوء كواه ڢوٛء پو أتو چكاوء مناۛڠ مڠ پو. دان واجب كواء أتو چكاوء نن سوب توڠبيه حقوٓء.
دان كماي نن چكاوء مڠ جوڠ ڢوٛء پو ته جوڠ چناو تاڠن.
دان هوڠ ياو ني ياۛه عمرة حو سمڨرنا.
مدينة ذو الحليفة ذات عرق الجحفة
يلملم قرن المنازل هدوم٢ ميقات
مكة ميقات إحرام غاڠ كوڠ ضوٓء جيٛء ڨلاي مكة لبيء پو
إحرام إهل ڨلاي مكة سمغب حج مڠ ساڠ٢ ڨهوڠ پو سمغب عمرة تنعيم
إحرام غاڠ كوڠ حو تل ماي هوڠ كڨل حوٓه دلاو ماي تل سمو هوڠ ميقات چوء كهن عاو إحرام دبيل سمو نية إحرام چب ڤڎاۛم تلبية دحو حروس أو ڨتيٛ إحرام ڢياه تل تراڠ كڨل حوٓه
لڢياٚب إحرام دان حكوم٢ پو:
سمغب لكاي٢ كغاي مڠ كماي٢ غوب سيٚء بلاو كاڠ كهن عاو
چوء كهن عاو إحرام كهن ڠوي ڬهلا دان كهن معوٓم ڬه ڠوٓء لكاي سڢوٛ ڨتيه توڠدوا كماي كهن عاو حڬيء كڎيٚه كوڠ پو كهين چوء دحو طوٓب طيٚڠ أو نقاب سغوٓم تاڠن
حلال دحو مدا سسواتو حڬيء دڠوٓء پو أو
ڨأته مڠ ڨكا كوڠ غاڠ كهاء ڨاء إحرام
هيڠڬا ڽو تحلل مڠ إحرام ڽو ڨكا كوڠ غاڠ كهاء ڨاء إحرام نن حرام دڠوٓء لكاي٢ دان كماي٢ كهيا كماي سمغب غوب پو أتو سمغب غاڠ كغاي عقد نكاح حرام دڠوٓء لكاي٢ لكاي٢ حرام دڠوٓء كماي٢
لڢياٚب طواف شرط ڨاء طواف نن كهين ضوٓء ددالم وضوء
اضطباع اضطباع نن سمغب تيٛ طواف مين طواف نن چب ڨڎاۛم مڠ حجر الأسود
حڬيء كوڠ ڽو لايء دانتارا دوا ركن يماني
ذكر دعاء بايء قرآن غاڠ ڨشرع رمل دالم كلاو جوم أول
سمياڠ دلكوء مقام إبراهيم يهلايء عآچ ڠاء حو
دان ماۛء ويٚء توڠبيه هاۛ مڠ مقام إبراهيم لبيء سمياڠ
كلاو ڢڠ پو ڎواٛيء پو كباء تندا سڢوٛ جاو تكبير ڨموٓڠ ناو ڨاء كعبة تجوه جوم مڠ صفا ناو ڨاء مروة نن حجوم جوم 1 لڢياٚب كواه قوٓء دان چكاوء ڢوٛء
واجب كواه قوٓء دان چكاوء ڢوٛء نن ڨاء لكاي باوء توڠبيه حقوٓء واجب چكاوء ڢوٛء ڨاء كماي كماي٢
