විශ්වය මැව්වේ කවුද? මා මැව්වේ කවුද? ඒ ඇයි?
විශ්වය මැව්වේ කවුද? මා මැව්වේ කවුද? ඒ ඇයි?" යන කෘතිය විශ්වය හා මිනිසාගේ මූලාරම්භය පිළිබඳ සාකච්ඡා කරයි. විශ්වය අහඹු ලෙස හෝ ශූන්යයකින් පැමිණ නැති බව ස්ථිර ය. එයට සර්වබලධාරී මැවුම්කරුවෙකු සිටිය යුතු අතර ඔහු ඒකීය දෙවි ඳාණන් වන අල්ලාහ් ය. ජීවය හා විශ්වය පාලනය කරන නියමයන් නිවැරදි ව සකස් කළේ ද ඔහු ම ය. අල්ලාහ්ගේ ගුණාංග ගැන සහ ධර්ම දූතයින් කෙරෙහි ද දිව්ය පුස්තක කෙරෙහි ද තැබිය යුතු විශ්වාසයේ වැදගත්කම පිළිබඳ මෙහි දී පැහැදිලි කෙරෙනු ඇත. සත්ය දහම වන ඉස්ලාමය දූතවරුන්ගේ දේව පණිවුඩ ඒකරාශී කළ බවත්, මෙලෝ පරලෝ සැබෑ සතුට අත් කරගැනීම උදෙසා ඉස්ලාමය කෙරෙහි විශ්වාසය තැබිය යුතු බවත් තහවුරු කරනු ලැබේ.
These files are generated automatically from the book's text; their layout may differ from the printed edition.
විශ්වය මැව්වේ කවුද? මා මැව්වේ කවුද? ඒ ඇයි?
මා සිටිනුයේ නිවැරදි මාර්ගයෙහි ද?
අහස් හා මහපොළොව ද ඒ දෙක අතර පවතින ග්රහණය කළ නොහැකි තරම් අතිවිශාල නිර්මාණ ද මැව්වේ කවුද?
අහස්හි හා මහපොළොවෙහි මෙකී සූක්ෂ්ම සහ විශිෂ්ට පද්ධතිය නිර්මාණය කළේ කවුද?
මිනිසා නිර්මාණය කර, ඔහුට ශ්රවණය, දෘෂ්ටිය සහ විචාර බුද්ධිය ලබා දී ඔහුට දැනුම ලබන්නට සහ කරුණු අවබෝධ කර ගන්නට හැකියාව ලබා දුන්නේ කවුද?
ඔබේ ශරීරයේ අවයවවල මෙම සූක්ෂ්ම නිර්මාණය උත්පාදනය කොට, ඔබ ව හැඩගන්වා ඔබේ රුව අලංකාර කළේ කවුද?
විවිධත්ව හා වෙනස්කම් මත මවන ලද ජීවීන් ගැන සිතා බලන්න! අසීමිත හැඩතල සහ දසුන්වලින් ඒවා උත්පාදනය කළේ කවුද?
මෙම මහා විශ්වය, වසර ගණනාවක් පුරා නිසි ලෙසින් නියාමනය වෙමින්, එකී පාලන තන්ත්ර හා ඒකාබද්ධ ව අඛණ්ඩ ව පිහිටනුයේ කෙසේ ද?
මෙලොව ක්රමානුකූල ව පාලනය වන ක්රමවේද පද්ධතීන් (ජීවය, මරණය, ජීවීන්ගේ ප්රජනනය, රාත්රිය හා දහවල, සෘතු වෙනස් වීම යනාදිය) ස්ථාපිත කළේ කවුද?
මෙම විශ්වය එය විසින් ම නිර්මාණය වූයේ ද? නැත්නම් ශූන්යයකින් පැමිණියේ ද? එසේත් නැතිනම් අහඹු ලෙස සිදු වූවක් ද? උත්තරීතර අල්ලාහ් මෙපරිදි වදාළ සේක: එසේ නැතහොත් කිසිවක් නොමැති ව ඔවුහූ මවනු ලැබුවෝ ද? නොමැති නම්, මවන්නෝ ඔවුහු ද? එසේ නැතහොත් ඔවුහු අහස් හා මහපොළොව මැව්වෝ ද? එසේ නොව (ඔවුහූ කිසිවක් නිර්මාණය නොකළෝය) ඔවුහු තරයේ විශ්වාස නොකරති. (අත්-තූර් 52:35-36)
අප විසින් ම අප ව අපි නිර්මාණය නොකළෙමු නම් සහ අපට ශූන්යයක් මාර්ගයෙන් හෝ අහඹු සිදුවීමකින් පැමිණිය නොහැකි නම්, මෙම විශ්වයට ශ්රේෂ්ඨ, සර්ව බලධාරී මැවුම්කරුවෙකු සිටිය යුතු වීම නිසැක වශයෙන් ම සත්යයකි. මන්ද, මෙම විශ්වයට එය විසින් ම නිර්මාණය විය නොහැක; ශූන්යයක් මාර්ගයෙන් ද පැමිණිය නොහැක; නැතිනම් අහඹු ලෙසින් බිහි වීමට ද නොහැක්කේ ම ය.
පුද්ගලයෙකු තමාට නොපෙනෙන (ගෝචර කරගැනීම, විචාර බුද්ධිය, ආත්මය, හැඟීම් සහ ආදරය වැනි) දේවල්වල පැවැත්ම විශ්වාස කරන්නේ ඇයි? ඔහු ඒවායේ බලපෑම් හා ප්රතිඵල දකින නිසා නොවේ ද එසේ කරනුයේ? එසේ නම්, මේ සා අතිවිශාල විශ්වයේ නිර්මාතෘවරයා වන එකී මැවුම්කරුවාණන් ව මිනිසා ප්රතික්ෂේප කරනුයේ මන්ද? විශ්වයේ ඇති උතුමාණන්ගේ මැවීම්වල, උතුමාණන්ගේ ක්රියාදාමවල සහ උතුමාණන්ගේ කරුණාවේ ප්රතිඵල විද්යමාන ව දැක දැක උතුමාණන්ගේ පැවැත්ම ප්රතික්ෂේප කරන්නේ කෙසේද?
කිසිවකුගේ ඉදි කිරීමකින් තොර ව මෙම නිවස ඇති විය; එසේ නැතහොත් මෙම නිවස නිර්මාණය කළේ යම් ශූන්යයක් යැයි පැවසීම විචාර බුද්ධිය ඇති කිසිදු කෙනෙකු පිළිගන්නේ නැත. එසේ නම් මේ මහා සුවිසල් විශ්වය මැවුම්කරුවෙකු නොමැති ව ඇති වූවක් යැයි පවසන ඇතැම් උදවිය සිය ස්ථාවරය සත්ය බව සහතික කරන්නේ කෙසේ ද? මෙකී සූක්ෂ්ම ක්රියාන්විතයක් පවතින ක්රමානුකූල විශ්ව පද්ධතිය අහම්බෙන් ඇති වූවක් යැයි පැවසීම බුද්ධියක් ඇත්තෙකු පිළිගත හැක්කේ කෙසේ ද?
මේ සියල්ල අප ව එක් නිගමනයක් කරා රැගෙන එයි. එනම්, මේ විශ්වය පාලනය කරන ශ්රේෂ්ඨ, බලගතු පරමාධිපතිපතියෙකු සිටින බවත්, ඔහු පමණක් අවනතභාවය හිමි කරගනිමින් නැමදුම් ලබන්නට සුදුසු බවත්, ඔහු හැර නැමදුම් ලබන සෙසු සියල්ල ව්යාජ බවත්, නැමදුම් ලබන්නට සුදුසුකම් නොලබන බවත් ය.
සර්වබලධාරී ශ්රේෂ්ඨ මැවුම්කරුවාණෝ
මෙහි සිටිනුයේ සියල්ල මැවූ එක් පරමාධිපතියෙක් පමණි. ජීවී හා අජීවි සියල්ලට පෝෂණය සලසා, ඒවා සැලසුම් කරනුයේ ඔහු ය. ඔහු භූමිය මවා එය වසඟ කර ඔහුගේ මැවීම්වලට ගැළපෙන ලෙස සකස් කළේය. අහස් සහ ඒවායේ ඇති සියලු ම නිර්මාණ මැව්වේ ඔහු ය. ඔහුගේ ශ්රේෂ්ඨත්වය පෙන්නුම් කරන මෙකී සූක්ෂ්ම පද්ධතියට අනුගත ව හිරු, සඳු සහ රාත්රිය, දහවල ක්රියාත්මක කෙරෙව්වේය .
වාතය රහිත ජීවිතයක් නොමැති එකී වාතය අපට වසඟ කර දුන්නේ ඔහු ය. අප වෙත වැසි වස්වා මුහුදු හා ගංගාවන් වසඟ කර දුන්නේ ද ඔහු ය. කිසිදු හැකියාවකින් තොර ව අපගේ මව්වරුන්ගේ කුසවල්වල අප කළලයක් සේ සිටිය දී අපට ආහාර සපයා අප ආරක්ෂා කළේ ඔහු ය. අප උපන් දා පටන් මරණය දක්වා ම අපේ නහරවල් ඔස්සේ රුධිරය ගමන් කරවන්නා ද ඔහු ය.
මේ පරමාධිපති පෝෂක හා මැවුකරු උත්තරීතර සුවිශුද්ධ වූ අල්ලාහ් ය.
උත්තරීතර අල්ලාහ් මෙසේ පවසයි: නියත වශයෙන් ම අහස් හා මහපොළොව දින සයකින් මැව්වේ නුඹලාගේ පරමාධිපති වන අල්ලාහ් ය. පසු ව ඔහු (සිය තේජසට හා කීර්තියට සරිලන අයුරින්) අර්ෂ් (නම් පරමාසන)යට ඉහළින් සිටියේය. ඔහු රාත්රියෙන් දහවල ආවරණය කරයි. මෙය (දහවල) එය (රාත්රිය) සීඝ්රයෙන් සොයයි. තව ද හිරු, සඳු හා තරු ඔහුගේ නියෝගය අනුව වසඟ කරනු ලැබූ දෑ ය. දැනගනු! නිර්මාණය කිරීම හා නියෝගය ඔහු සතු ය. සකල විශ්වයේ පරමාධිපති වන අල්ලාහ් උත්කෘෂ්ට විය. (අල් අඃරාෆ් පරිච්ඡේදය: වැකිය 54)
විශ්වයේ ඇති, අපි දකින හා නොදකින සියලු දෑහි මැවුම්කරු හා පරමාධිපති ඔහු ය. ඔහු හැර සෙසු සියලු දෑ ඔහුගේ මැවීම් වෙති. නැමදුම් ලබන්නට සුදුස්සා ඔහු පමණ ය. ඔහු හැර වෙනත් කිසිවෙකු ඔහු සමඟ නැමදුම් නොලැබිය යුතු ය. ඔහුගේ ආධිපත්යයෙහි හෝ ඔහුගේ මැවීමෙහි හෝ ඔහුගේ සැලසුමෙහි හෝ ඔහුගේ නැමදුමෙහි හෝ කිසිදු හවුල්කරුවකු ඔහුට නොමැත.
සර්වබලධාරී, කිර්තිමත් පරමාධිපතියාණන් සමඟ තවත් දෙවියෙකු සිටින බව අප තර්කයක් ලෙස උපකල්පනය කළහොත් විශ්වය ව්යර්ථ වී යනු ඇත. හේතුව එක ම අවස්ථාවක දෙවිවරුන් දෙදෙනෙකුට විශ්වයේ කරුණු කළමනා කිරීම සුදුසු නොවන බැවිනි. උත්තරීතර අල්ලාහ් මෙසේ ප්රකාශ කරයි: (අහස් සහ මහ පොළොව වන) ඒ දෙකෙහි අල්ලාහ් හැර තවත් දෙවිවරු සිටියහ නම් ඒ දෙක ම අර්බුදකාරී විනාශයට පත්වනු ඇත. (අල් අන්බියා පරිචඡේදය: වැකිය 22)
මැවුම්කරුවාණන් වන පරමාධිපතියාණන්ගේ ගුණාංග
සුවිශුද්ධ පරමාධිපතියාණන්ට ගණනය කළ නොහැකි අලංකාර නාමයන් ඇත. එමෙන් ම ඔහුගේ පූර්ණත්වය පෙන්වා දෙන අතිමහත් උසස් ගුණාංග බොහෝමයක් ද ඇත. ඔහුගේ නාම අතුරින්, "අල්-(ක)හාලික්" (මැවුම්කරු), "අල්ලාහ්" එනම්, නැමදුම ලැබීමට සුදුසු දෙවියා ඔහු පමණ ය, ඔහුට කිසිදු හවුල්කරුවකු නැත යන්න ය. ඔහු ජීවමාන ය, සදා පැවැත්මක් ඇත්තා ය, මහාකාරුණික ය, පෝෂක ය, ත්යාගශීලී ය යන නම් ද ඇත. ශුද්ධ වූ අල් කුර්ආනයේ අල්ලාහ් මෙසේ පවසයි: අල්ලාහ් වනාහි ඔහු හැර වෙනත් දෙවියෙක් නොමැත. සදා ජීවමාන ය, සදා ස්ථාවර පැවැත්ම ඇත්තා ය. මද නින්ද හෝ (තද) නින්ද හෝ ඔහු ව ග්රහණය නොකරයි. අහස්හි ඇති දෑ ද මහපොළොවේ ඇති දෑ ද ඔහු සතු ය. ඔහුගේ අනුමැතියෙන් මිස ඔහු අබියස මැදිහත් වන්නෙකු විය හැක්කේ කවරෙකුට ද? ඔවුනට ඉදිරියෙන් ඇති දෑ ද ඔවුනට පසුපසින් ඇති දෑ ද ඔහු දන්නේය. ඔහු අභිමත කළ පරිදි මිස ඔහුගේ දැනුමෙන් කිසිවක් ඔවුහු ග්රහණය කර නොගනිති. ඔහුගේ පරමාසනය අහස්හි හා මහපොළොවෙහි ව්යාප්ත ව ඇත. ඒ දෙක ආරක්ෂා කිරීම ඔහුට දුෂ්කර නොවේ. තව ද ඔහු අතිඋත්තරීතර ය; සර්ව බලධාරී ය. (අල් බකරා පරිච්ඡේදය : වැකිය 255)
උත්තරීතර අල්ලාහ් මෙසේ පවසයි: (නබිවරය,) ඔබ පවසනු. ඔහු එනම් අල්ලාහ් ඒකීය ය. අල්ලාහ් ස්වාධීන ය. (٢) ඔහු ජනිත නොකළේ ය. තව ද ජනිත කරනු නොලැබුවේය. තව ද ඔහුට සමාන කිසිවෙක් නැත. (අල් ඉහ්ඃලාස් පරිච්ඡේදය : වැකි 1-4)
නැමදුම් ලැබීමට සුදුමු පරමාධිපතියාණන් පරිපූර්ණ ගුණාංග මඟින් වර්ණනා කරනු ලැබේ.
සැබැවින් ම ඔහු නැමදුම් ලබන්නටත් දේවත්වය ලබන්නටත් සුදුස්සෙකු වීම ඔහුගේ ගුණාංග අතුරිනි. ඔහු හැර සෙසු සියලු දෑ ඔහුගේ මැවීම් වන අතර ඒවා වගකීම් පවරන ලද, නියෝග කරන ලද හා යටහත්භාවයට ලත් නිර්මාණ ය.
එමෙන් ම සදා පැවැත්මැති ජීවමානීභාවය ද ඔහු සතු ගුණාංගය යි. එහෙයින් සෑම ජීවයක් ම උතුමාණන්ගේ එම පැවැත්ම මත රඳා පවතී. අල්ලාහ් යමක් එහි ශූන්ය තත්ත්වයෙන් එයට ජීවය ලබා දී බිහි කරන්නා ය. එමෙන් ම එහි නිර්මාණය, එහි පෝෂණය හා එහි ප්රමාණවත්භාවය තීන්දු තීරණ කරමින් ක්රියාත්මක කරනුයේ ඔහු ය. එහෙයින් පරමාධිපතියාණෝ අමරණීයවන්තයාණෝ ය; සදා ජීවමානී ය. විනාශය ඔහු කෙරෙහි නැත. නොනිදා අවදි ව සිටින්නා ය. ඔහුට නින්ද හෝ සුළු නින්දක් හෝ හට ගන්නේ නැත.
අහස්හි හෝ මහපොළොවෙහි හෝ කිසිවක් ඔහුගෙන් නොසැඟවෙන, සියල්ල දත් සර්වඥානීභාවය ද ඔහු සතු ගුණාංගයකි.
සැබැවින් ම සෑම දෙයකට ම සවන් දෙන සර්ව ශ්රාවක මෙන් ම සෑම දෙයක් ම දකින සර්ව නිරීක්ෂකභාවය ද ඔහු සතු ගුණාංග ය. සිත් තුළ දෝලනය වන දෑ ද හදවත් තුළ සැඟවී ඇති දෑ ද ඔහු මැනවින් දනී. අහස්හි හෝ මහපොළොවෙහි හෝ කිසිවක් සුවිශුද්ධයාණන් කෙරෙන් සැඟවී යන්නේ නැත.
කිසිවකට අපොහොසත් නොවන සර්ව බලධාරිත්වය ද ඔහු සතු ගුණාංගයකි. කිසිවෙක් හෝ ඔහු සිතන පරිදි නොසිතයි. ඔහු අභිමත කරන දෑ සිදු කරයි. ඔහු අභිමත කරන දෑ වළක්වයි. එය කල් ඇති ව හෝ ප්රමාද කර හෝ පිරිනමයි. ගැඹුරු ප්රඥාව ඇත්තේ ඔහු සතු ව ය.
සැබැවින් ම ඔහු මැවුම්කරු ය; පෝෂක ය; ඔහු මැවීම් මවා සැලසුම් කරන පාලකයා ය. මෙය ද ඔහු සතු ගුණාංගයකි. සියලු මැවීම් පවතින්නේ ඔහුගේ පාලනය තුළ හා ඔහුගේ බලය යටතේ ය.
ඔහුගේ තවත් ගුණාංගයක් වනුයේ සැබැවින් ම ඔහු අසරණයන්ට ප්රතිචාර දක්වන්නා ය. විපතට පත් වූවන්ට සහන සලසන්නා ය. විපත දුරු කරන්නාය. මවන ලද සෑම ජීවියෙකු ම විපතකට හෝ පීඩාවකට ලක් වුවහොත්, ඔවුන් සරණ පතා යොමු වනුයේ ඔහු වෙත ම ය.
නැමදුම, උත්තරීතර අල්ලාහ්ට පමණකි. ඔහු හැර, වෙනත් කෙනෙකුට නොවිය යුතු ය. ඒ සඳහා පූර්ණ සුදුසුකම් ලබනුයේ ඔහු පමණි. ඔහු හැර වෙනත් කිසිවෙක් හෝ එයට සුදුසු නොවේ. ඔහු හැර නැමදුම් ලබන සෙසු සියලු දෑ ව්යාජ ලෙස නැමදුම් ලබන දෑ ය. අඩුපාඩු ඇති දෑ ය. මරණය හා විනාශය ළඟා වන දෑ ය.
සර්වබලධාරී අල්ලාහ්, ඔහුගේ ශ්රේෂ්ඨත්වය යම් තරමකට හෝ අවබෝධ කර ගන්නා තරමට බුද්ධිමත්භාවය අපට ආශිර්වාද කර ඇති අතර, ඔහු අප තුළ යහපත්කම ප්රිය කරන, අයහපත පිළිකුල් කරන, සකල විශ්වයේ අධිපති අල්ලාහ් වෙත යොමුවන විට සැනසීමක් දැනෙන සහජ ස්වභාවයක් අප තුළ ඇති කර ඇත. ඔහු අසම්පූර්ණ ගුණාංගවලින් වර්ණනාවට ලක් විය නොහැකි අතර ඔහු සුවිශුද්ධ ය.
පරිපූර්ණ කෙනෙකුට හැර වෙනත් කිසිවකුට නැමදීම විචාර බුද්ධිය ඇත්තෙකුට සුදුසු නොවේ. එසේ නම් අඩුපාඩු සහිත, තමන් මෙන් වූ මැවීමකට හෝ තමන්ට වඩා පහත් මැවීමකට නැමදුම් කළ හැක්කේ කෙසේ ද?
නැමදුම් ලබන්නා, මිනිසකු හෝ පිළිමයක් හෝ ගසක් හෝ සතෙකු හෝ විය නොහැක.
පරමාධිපතියාණෝ ඔහුගේ මැවීම්වලින් වෙන් ව, ඔහුගේ අහස්වලට ඉහළින් ඔහුගේ අර්ෂය හෙවත් පරමාසනයට ඉහළින් සිටින සේක. ඔහුගේ ස්ව පැවැත්ම තුළ ඔහුගේ මැවීම් කිසිවක් පිහිටන්නේ නැති අතර ඔහුගේ මැවීම් තුළ ද ඔහුගේ පැවැත්මෙන් කිසිවක් පිහිටන්නේ ද නැත. ඔහුගේ මැවීම් අතුරින් කිසිදු ශරීරයකට ඔහු ආරූඪ වන්නේ ද නැත.
පරමාධිපතියා කිසිවක් මෙන් හෝ නැත. ඔහු සර්ව ශ්රාවකය; සර්ව ඥානී ය. ඔහුට සමාන කිසිවෙක් හෝ නැත. ඔහු ඔහුගේ මැවීම්වලින් ස්වාධීන ය. ඔහු නිදන්නේ හෝ ආහාර අනුභව කරන්නේ හෝ නැත. ඔහු බිරියක හෝ දරුවකු හෝ තබා ගන්නට අවශ්යතාවයක් නැති සර්වබලධාරියා ය. මැවුම්කරු වන ඔහුට අතිබලවත් ගුණාංග ඇත. අව්යතාවය හා අඩුපාඩුකම්වලින් ඔහු ගැන විස්තර කිරීම කිසිදා සිදු විය නොහැක්කකි.
උත්තරීතර අල්ලාහ් මෙසේ පවසයි: අහෝ ජනයිනි, උපමාවක් ගෙන හැර පෙන්වන ලදී. එහෙයින් නුඹලා එයට සවන් දෙනු. නියත වශයෙන් ම අල්ලාහ් හැර දමා නුඹලා (දෙවියන් ලෙස) ඇරයුම් කරන අය වනාහි, ඔවුන් සියලු දෙනා එකතු වුව ද මැස්සෙකු හෝ ඔවුනට මැවිය නොහැක්කේ ම ය. මැස්සා ඔවුන්ගෙන් යමක් පැහැර ගත්තේ නම් උගෙන් එය මුදවා ගන්නට පවා ඔවුනට නොහැක. අයැදින්නා හා අයැදිනු ලබන්නා දුර්වල වූහ. අල්ලාහ් ව ගරු කළ යුතු ප්රමාණයට ඔවුහු ඔහුට ගරු නොකළෝය. නියත වශයෙන් ම අල්ලාහ් අතිබලවත් ය; සර්ව බලධාරී ය. (අල්-හජ් පරිච්ඡේදය : වැකි 73,74)
මේ උතුම් මැවුම්කරු අප ව නිර්මාණය කළේ ඇයි? ඔහුට අපෙන් අවශ්ය වන්නේ කුමක් ද?
අල්ලාහ් කිසිදු අරමුණකින් තොර ව මේ සියලු මැවීම් නිර්මාණය කර තිබිය හැකි ද? ඔහු ඒවා නිකමට නිර්මාණය කළේ ද? ඔහු මහා ප්රඥාවන්ත ය. සර්වඥානී ය.
මෙතරම් නිරවද්යභාවයකින් හා උත්කෘෂ්ට අන්දමකින් අප ව නිර්මාණය කර අහසේ හා මහපොළොවේ ඇති සෑම දෙයක් ම අපට වසඟ කර දුන් තැනැත්තා අරමුණකින් තොර ව අප ව නිර්මාණය කරයි ද? නැතහොත් "ඇයි අපි මෙතන? මරණයෙන් පසු කුමක් ද? අපගේ නිර්මාණයේ අරමුණ කුමක් ද?" යනාදි අප ව වියවුල් කරන වැදගත් ම ප්රශ්නවලට පිළිතුරක් නොමැති ව අප ව නිකරුණේ අත්හැර දමයි ද?
අපරාධකරුට දඬුවමක් සහ ධර්මිෂ්ඨයාට සරිලන ප්රතිඵලයක් නොමැති විය හැකි ද?
සුවිශුද්ධ අල්ලාහ් මෙසේ ප්රකාශ කළ සේක: නියත වශයෙන් ම අපි නුඹලා ව නිකරුණේ මවා ඇතැ යි ද නියත වශයෙන් ම නුඹලා අප වෙත නැවත හැරී නොඑනු ඇතැ යි ද නුඹලා සිතුවෙහු ද? (අල්-මුඃමිනූන් පරිච්ඡේදය: වැකිය 115)
එසේ අල්ලාහ් දූතවරුන් එවා සිටියේ 'අපගේ පැවැත්මේ අරමුණ අප හඳුනාගනු පිණිසත්, අප ඔහු නැමද ඔහු වෙතට සමීප විය යුත්තේ කෙසේ ද? ඔහු අපෙන් අපේක්ෂා කරනුයේ කුමක් ද?' යන වග හා 'ඔහුගේ තෘප්තිය අප ලබනුයේ කෙසේ ද?' යන වග අපට දන්වා සිටිනු පිණිසත්, එමෙන් ම මියගිය පසු ව අප යොමුවන නවාතැන ගැන අපට දන්වා සිටිනු පිණිසත් ය.
එමෙන් ම, 'නැමදුම් ලැබීමට සුදුස්සා අල්ලාහ් පමණක් යන වග අපට දන්වා සිටිනු පිණිසත්, අප ඔහුට නැමදිය යුත්තේ කෙසේ දැ? යි අප දැනගනු පිණිසත්, ඔහුගේ විධාන හා තහනම් නියෝග ඔවුන් අපට දන්වා සිටිනු පිණිසත්, අප ක්රියා කළ විට අපගේ ජීවිත යහතින් හා සමෘද්ධියෙන් ආවරණය කෙරෙන උසස් ඍජු මාර්ගය අපට දන්වා සිටිනු පිණිසත්' අල්ලාහ් ධර්ම දූතයින් එවා සිටියේය.
(නූහ්, ඉබ්රාහීම්, මූසා හා ඊසා වැනි) ධර්ම දූතවරුන් බොහෝමයක් අල්ලාහ් එවීය. ඇතැම් සංඥා හා ප්රාතිහාර්යයන් මඟින් ඔවුන්ගේ සත්යයභාවයත්, ඇත්තෙන් ම ඔවුන් සුවිශුද්ධ වූ අල්ලාහ් වෙතින් එවනු ලැබූවන් බවත් සහතික කරමින් ඔවුන් ව ඔහු ශක්තිමත් කළේය. ඔවුන් අතුරින් අවසාන දූතයා වූයේ මුහම්මද් (සල්ලල්ලාහු අලයිහි වසල්ලම්) තුමාණෝ ය.
සැබැවින් ම මෙම ජීවිතය පරීක්ෂණයක් බවත්, සැබැවින් ම සැබෑ ජීවිතය මරණයෙන් පසු ව පිහිටන්නක් බවත් පෙන්වා දෙමින් සෑම පැහැදිලි කිරීමක් ම එම දූතවරු අප වෙත පැහැදිලි කර සිටියහ.
එමෙන් ම කිසිදු හවුල්කරුවකුගෙන් තොර ව අල්ලාහ්ට පමණක් නැමදුම් කළ, සියලු දූතවරුන් විශ්වාස කළ, එකී විශ්වාසවන්ත මුඃමින්වරුන්ට ස්වර්ගය මරණින් මතු ඇති අතර, අල්ලාහ් සමග වෙනත් දෙවිවරුන් නැමදුමට ගත් හෝ අල්ලාහ්ගේ දූතවරුන් අතුරින් යම් කිසි දූතයකු හෙළා දැක, දේවත්වය ප්රතික්ෂේප කළ කාෆිර් නම් ප්රතික්ෂේපකයින්ට අල්ලාහ් සූදානම් කර ඇති නිරය ද එහි ඇත.
උත්තරීතර අල්ලාහ් මෙසේ පවසයි: අහෝ ආදම්ගේ දරුවනි, මාගේ වදන් නුඹලාට පවසන නුඹලා අතුරින් වූ ධර්ම දූතවරු නුඹලා වෙත පැමිණියහ නම්, එවිට කවරෙකු දෙවිඳාණන් කෙරෙහි වූ භක්තිමත් හැඟීමෙන් කටයුතු කොට තමන් ව හැඩගස්වා ගත්තේ ද, එවිට ඔවුන් කෙරෙහි කිසිදු බියක් නොමැත. තව ද ඔවුහු දුකට පත් නොවෙති. තවද, කවරෙක් අපගේ වදන් බොරු කොට ඒ පිළිබඳ (විශ්වාස කිරීම ගැන) උඩඟු වන්නේද ඔවුහු නිරා ගින්නේ සගයෝය. ඔවුහු එහි සදාතනිකයෝ වෙති. (අල් අඃරාෆ්: 35-36)
උත්තරීතර අල්ලාහ් මෙසේ පවසයි: අහෝ ජනයිනි, නුඹලා බිය බැතිමත් විය හැකි වනු පිණිස නුඹලා හා නුඹලාට පෙර සිටි අය මැව්වා වූ නුඹලාගේ පරමාධිපතිට නමදිනු. ඔහු නුඹලාට මහපොළොව ඇතිරිල්ලක් බවට ද අහස වියනක් බවට ද නිර්මාණය කළේය. තව ද අහසින් (වැසි) ජලය පහළ කර එමඟින් නුඹලාගේ පෝෂණය පිණිස පලතුරු හට ගැන්වීය. එබැවින් දැනුම්වත් ව ම නුඹලා අල්ලාහ්ට ආදේශ නොතබනු. අපගේ ගැත්තාට අප පහළ කළ දෑහි නුඹලා සැකයෙහි පසු වූයෙහු නම්, එවැනි පරිච්ඡේදයක් ගෙන එනු. තව ද අල්ලාහ් හැර නුඹලාගේ සාක්ෂිකරුවන් (හවුල්කරුවන්) කැඳවනු. නුඹලා සත්යවාදිහු නම්. එහෙත් නුඹලා (එසේ) නොකළෙහු නම්, නුඹලාට (මෙය) කිසිසේත් ම කළ නොහැකි ය. එසේ නම් එහි (නිරයේ) මිනිසුන් හා ගල් ඉන්ධන වූ ගින්නට බිය වනු. එය දෙවිඳාණන් ව ප්රතික්ෂේප කරන්නන්ට සූදානම් කරනු ලැබ ඇත. තව ද විශ්වාස කොට යහකම් කළවුනට සැබැවින් ම පහළින් ගංගාවන් ගලා යන උයන් ඇතැ යි සුබාරංචි දන්වනු. එහි පලතුරුවලින් ඔවුන් පෝෂණය කරනු ලබන සෑම විටක ම මීට පෙර අප පෝෂණය කරනු ලැබුවේ ද මෙය ම යැයි පවසති. තව ද එකිනෙකට සමාන වූ දෑ ඔවුනට ගෙන දෙනු ලැබේ. තව ද ඔවුනට එහි නිර්මල බිරින්දෑවරු වෙති. ඔවුහු එහි සදාතනිකයෝ වෙති. (අල් බකරා :21-25)
මෙතරම් දූතවරු සංඛ්යාවක් කුමකට ද?
අල්ලාහ් තම දූතවරු විවිධ සමූහ වෙත පහළ කළේය. අල්ලාහ් දූතයෙකු නොඑවූ කිසිදු සමූහයක් නැත. එය ඔවුන්ගේ පරමාධිපතිට නැමදුම් කිරීම සඳහා ඔවුන් ඇරයුම් කිරීමටත්, ඔහුගේ විධාන හා ඔහුගේ තහනම් නියෝග ඔවුනට දන්වා සිටීම පිණිසත් ය. ඔවුන් සියලු දෙනාගේ අරමුණ වූයේ, සර්වබලධාරී අල්ලාහ්ට පමණක් නැමදුම් කිරීම ය. ඒ අනුව එක් සමූහයක් ඔවුන් වෙත ඔහු ගෙන ආ අල්ලාහ්ගේ ඒකීයත්වයේ කරුණ ඔවුන් අත්හැර දැමූ විට හෝ එය විකෘති කිරීමට පටන් ගන්නා විට එම ගමන විධිමත් කරනු පිණිසත් අල්ලාහ්ගේ ඒකීයත්වය හා ඔහුට අවනත වීමේ සහජ ධර්මය වෙත මිනිසා නැවත ගෙන එනු පිණිසත් අල්ලාහ් තවත් දූතයකු පත් කළේය.
අවසාන දූත මුහම්මද් (සල්ලල්ලාහු අලයිහි වසල්ලම්) තුමාණන් පැමිණෙන තෙක් ම එසේ විය. ලොව අවසන් වන තුරු ම පිළිපදිනු ලබන පූර්ණ දහමක් හා සියලු ම මිනිසුන් හට පොදු වූ සදාතනික ශික්ෂා පිළිවෙතක් එතුමා ගෙන ආහ. එය පරිපූර්ණ වූවක් මෙන් ම ඊට පෙර පැවති ආගමික පිළිවෙත් වෙනස් කරන්නක් විය. සර්වබලධාරී අල්ලාහ් ලොව අවසන් වන දිනය තෙක් ම සදා පැවැත්මක් එම දහමට ආශිර්වාද කළේය.
සියලු ම දූතවරුන් විශ්වාස කරන තෙක් පුද්ගලයකු දෙවිඳාණන් කෙරෙහි විශ්වාස කරන මුඃමින්වරයකු වන්නේ නැත.
ධර්ම දූතවරුන් එව්වේ අල්ලාහ් ය. ඔහුගේ සියලු ම මැවීම්වලට ඔවුන්ට අවනත වන මෙන් අල්ලාහ් නියෝග කළේය. ඔවුන් අතුරින් කිසිවෙකුගේ දූත මෙහෙවර කිසිවෙක් හෝ ප්රතික්ෂේප කළේ නම්, සැබැවින් ම ඔහු සියලු දුතයින් ප්රතික්ෂේප කළ අයෙකි. මිනිසා විසින් අල්ලාහ්ගේ දිව්ය පණිවිඩය ප්රතික්ෂේප කිරීමට වඩා මහත් පාපයක් වෙනත් නැත. සියලු ම දූතවරුන් විශ්වාස කිරීම තුළින් ස්වර්ගයට පිවිසීම අනිවාර්ය වනු ඇත.
අල්ලාහ් හා අල්ලාහ්ගේ සියලු දූතවරුන් විශ්වාස කිරීමත්, අවසන් දිනය විශ්වාස කිරීමත්, මෙම යුගයේ සියලු දෙනා හට අනිවාර්ය කරුණක් වී ඇත. එහෙත් ඔවුන්ගේ අවසානයා වූ, ඔවුන්ගේ මුද්රාව වූ, මහ පොළොව හා ඒ මත වෙසෙන්නන් උරුම කර ගන්නා තෙක් එය ආරක්ෂා කිරීමේ වගකීම අල්ලාහ් භාර ගෙන ඇති සදාතනික ප්රාතිහාර්යයක් වන ශුද්ධ වූ අල් කුර්ආනය තුළින් සහතික කරනු ලැබුවා වූ මුහම්මද් (සල්ලල්ලාහු අලයිහි වසල්ලම්) තුමාණන් ව විශ්වාස කිරීමෙන් තොර ව එය සිදු විය හැක්කක් නොවේ.
ඔහුගේ දූතවරුන් අතුරින් කිසියම් හෝ එක් දූතයෙකු ව විශ්වාස කිරීමට ප්රතික්ෂේප කරන්නා අල්ලාහ් ව ප්රතික්ෂේප කළ, ඔහුගේ දිව්ය පණිවිඩය බොරු කළ අයෙකු බව ශුද්ධ වූ අල්-කුර්ආනයේ අල්ලාහ් සඳහන් කළේය. උත්තරීතර අල්ලාහ් මෙසේ පවසයි: සැබැවින් ම අල්ලාහ් හා ඔහුගේ රසූල්වරුන් ප්රතික්ෂේප කර අල්ලාහ් හා ඔහුගේ රසූල්වරුන් අතර වෙනස්කම් කොට ඇතැමුන් ව අපි විශ්වාස කරමු. එමෙන් ම ඇතැමුන් ව අපි ප්රතික්ෂේප කරමු යැයි පවසා මේ (විශ්වාසය හා ප්රතික්ෂේපය) අතර මඟක් ගන්නට අපේක්ෂා කරන අය වනාහී… සැබෑ ලෙසින් ප්රතික්ෂේප කළ අය මොවුහු ම ය. තව ද අපි ප්රතික්ෂේපකයින්ට නින්දනීය දඬුවමක් සූදානම් කර ඇත්තෙමු. (අන්-නිසා : 150,151)
එබැවින් අපි අල්ලාහ්ට අවනත වන මුස්ලිම්වරු වෙමු. අපි -අල්ලාහ් නියෝග කර ඇති පරිදි- අල්ලාහ් හා අවසන් දිනය විශ්වාස කරමු. සියලු ම දූතවරුන් හා පෙර පහළ වූ ග්රන්ථ අපි විශ්වාස කරමු. උත්තරීතර අල්ලාහ් මෙසේ ප්රකාශ කරයි: තම පරමාධිපතිගෙන් තමන් වෙත පහළ කරනු ලැබූ දෑ කෙරෙහි ධර්ම දූතයා විශ්වාස කළේය. විශ්වාස කළවුන් ද (විශ්වාස කළෝ ය.) සියල්ලෝ ම අල්ලාහ් ව ද ඔහුගේ දේව ග්රන්ථ ද ඔහුගේ ධර්ම දූතයින් ව ද විශ්වාස කළෝ ය. ඔහුගේ ධර්ම දූතයින් අතුරින් කිසිවෙකු අතර හෝ අපි වෙනස්කම් ඇති නොකරන්නෙමු. තව ද අපි සවන් දුනිමු. අවනත වූයෙමු. අපගේ පරමාධිපතියාණනි, ඔබෙන් සමාව පතන්නෙමු. තව ද යොමු වන ස්ථානය ඇත්තේ ඔබ වෙත ය යැයි ඔවුහු පැවසුවෝය. (අල් බකරා :285)
ශුද්ධ වූ අල් කුර්ආනය යනු කුමක් ද?
ශුද්ධ වූ අල් කුර්ආනය යනු අවසන් දූත මුහම්මද් (සල්ලල්ලාහු අලයිහි වසල්ලම්) තුමාණන් වෙත පහළ කළ උත්තරීතර අල්ලාහ්ගේ වදන් හා ඔහුගේ දිව්යමය ප්රකාශ යි. එතුමාණන්ගේ නබිත්වය තහවුරු කරන අතිබලවත් ම ප්රාතිහාර්යය වේ. ශුද්ධ වූ අල් කුර්ආනයේ සඳහන් නීති යථාර්ථවාදී සත්යය යි; එහි සඳහන් පණිවුඩ නිර්මල නිරවද්යතාවයෙන් යුක්ත යි.
එවන් එක් පරිච්ඡේදයක් හෝ ගෙන එන මෙන් අල්ලාහ් එය බොරු කළවුන්ට අභියෝග කළේය. එහෙත් ඔවුහු ඒ සඳහා අපොහොසත් වූවෝය. ඊට හේතුව එහි මෙලොව ජීවිතයේ හා මතුලොව ජීවිතයේ මිනිසා හා බැඳුණු සියලු කරුණු අන්තර්ගත වූ ආවරණය වූ අතිමහඟු ග්රන්ථයක් වූ බැවිනි. එමෙන් ම විශ්වාස කළ යුතු, විශ්වාසය හා බැඳුණු සියලු ම යථාර්ථයන් එය ඇතුළත් කර ගෙන ඇත.
එමෙන් ම පුද්ගලයෙකු තමා සහ තම පරමාධිපතියාණන් අතර හෝ තමා සහ තම ආත්මය අතර හෝ තමා සහ සෙසු මැවීම් අතර අනුගමනය කළ යුතු නියෝග සහ තහනම් කිරීම් ද ඇතුළත් කර ගෙන ඇත. මේ සියල්ල උසස් සාහිත්යමය හා පැහැදිලි කිරීමේ ශෛලියකින් පිහිටා ඇත.
මෙම ග්රන්ථය මිනිසුන් විසින් නිර්මාණය කළ නොහැකි, උත්තරීතර සුවිශුද්ධ වූ පරමාධිපතියාණන්ගේ වචන බව පෙන්නුම් කරන තාර්කික සාක්ෂි සහ විද්යාත්මක කරුණු රාශියක් ඇතුළත් කර ගෙන ඇත.
ඉස්ලාම් යනු කුමක් ද?
ඉස්ලාම් යනු, අල්ලාහ්ගේ ඒකීයත්වය පිළිගෙන ඔහුට යටහත් වීම, ගැතිකම් කරමින් ඔහුට අවනත වීම, ඔහුගේ පිළිවෙත පිළිගනිමින් හා තෘප්තියෙන් පිළිපැදීම හා අල්ලාහ් හැර නැමදුම් ලබන සෙසු සියල්ල ප්රතික්ෂේප කිරීම යි.
සැබැවින් ම අල්ලාහ් එක ම දූත පණිවිඩය සමග දූතවරුන් එවීය. එනම්, අල්ලාහ්ට කිසිදු හවුල්කරුවකු නියම නොකර, ඔහුට පමණක් නැමදුම් කිරීම සඳහා ඇරයුම් කිරීම සහ අල්ලාහ් හැර නැමදුම් ලබන සෙසු සියලු දෑ ප්රතික්ෂේප කිරීම ය.
ඉස්ලාමය වනාහි සියලු නබිවරුන්ගේ දහම යි. ඔවුන්ගේ පිළිවෙත් වෙනස් වුව ද ඔවුන්ගේ ඇරයුම ඒකීය විය. වර්තමාන මුස්ලිම්වරු වනාහි, සියලු ම නබිවරු ගෙන ආ නිවැරදි ධර්මය පිළිපදින එක ම සමූහයා වෙති. වර්තමානයේ පවතින ඉස්ලාමයේ දූත පණිවිඩය වන මෙය සත්යය යි. මිනිස් සමූහයා වෙනුවෙන් වූ මැවුම්කරු විසින් ප්රදානය කරන ලද අවසන් දූත පණිවිඩය යි.
ඉබ්රාහීම්, මූසා හා ඊසා (අලයිහිමුස් සලාම්) වැනි නබිවරුන් එවූ පරමාධිපති වන අල්ලාහ් ම ය දූතවරුන්ගේ මුද්රාව වන දූත මුහම්මද් (සල්ලල්ලාහු අලයිහි වසල්ලම්) තුමාණන් එවා සිටියේ. ඊට පෙර පැවති නීති/පිළිවෙත් සියල්ල වෙනස් කරමින් ඉස්ලාමයේ නීති/පිළිවෙත පැමිණියේය.
ඉස්ලාමය හැර, වර්තමානයේ මිනිසා විසින් වන්දනාමානයට හා පිළිපැදීමට ලක් ව ඇති සියලු ආගම් මිනිසා විසින් නිර්මාණය කරනු ලැබුවා වූ ආගම් වෙති. එසේ නැතහොත් එය පෙර දිව්යමය ආගමක් වී පසු ව මිනිසා විසින් විකෘති කරන ලද, ව්යාජ අදහස්, ප්රවේණිගත මිථ්යාවන් සහ මිනිස් උත්සාහයන්ගේ මිශ්රණයක් බවට පත් වූ ආගම් ය.
මුස්ලිම්වරුන්ගේ ආගම වනාහි, එය වෙනස් නොවන පැහැදිලි එක ම දහම යි. එමෙන් ම අල්ලාහ්ට නැමදුම් කරන ඔවුන්ගේ නැමදුම් පිළිවෙත් ද ඒකීය ය. ඔවුන් සියලු දෙනා දිනපතා පස් වරක් සලාත් ඉටු කරති. ඔවුන්ගේ ධනයෙන් සකාත් නිකුත් කරති. රමළාන් මාසයේ උපවාසයේ නිරත වෙති. ඔවුන්ගේ ව්යවස්ථාව ලෙස සලකනුයේ ශුද්ධ වූ අල් කුර්ආනය යි. සියලු ම දේශයන් සඳහා වන එක ම ග්රන්ථය එය යි. උත්තරීතර අල්ලාහ් මෙසේ ප්රකාශ කරයි: අද දින නුඹලාට නුඹලාගේ දහම මම සම්පූර්ණ කළෙමි. නුඹලා කෙරෙහි වූ මාගේ ආශිර්වාදය ද පරිපූර්ණ කළෙමි. නුඹලා වෙනුවෙන් දහමක් ලෙස ඉස්ලාමය මම පිළිගතිමි. එහෙත් පාපයට නැඹුරු නො වී, දුගීබව හේතුවෙන් (මේවා ආහාරයට ගන්නා මෙන්) බල කරනු ලැබුවේ නම්, එවිට (දැන ගනු) සැබැවින් ම අල්ලාහ් අතික්ෂමාශීලී අසමසම කරුණාන්විත ය. (සූරා අල්-මාඉදා: 3)
උත්තරීතර අල්ලාහ් අල්-කුර්ආනයේ මෙසේ පවසා සිටියි: ‘අපි අල්ලාහ් ව ද, අප වෙත පහළ කරනු ලැබූ දෑ ද ඉබ්රාහීම්, ඉස්මාඊල්, ඉස්හාක්, යඃකූබ් හා යඃකූබ්ගේ පරපුරට දෙනු ලැබු දෑ ද තම පරමාධිපතිගෙන් මූසා, ඊසා හා නබිවරුන්ට දෙනු ලැබූ දෑ ද විශ්වාස කළෙමු. ඔවුන් අතුරින් කිසිවෙකු අතර වෙනස්කම් ඇති නොකරමු. තව ද අපි ඔහුට අවනත වන්නෝ (මුස්ලිම්වරු) වෙමු’ යැයි ඔබ පවසනු. කවරෙකු ඉස්ලාමය හැර වෙනත් දහමක් සොයන්නේ ද එවිට ඔහුගෙන් කිසිවක් පිළිගනු නොලබන්නේ ම ය. තව ද ඔහු මතු ලොවෙහි අලාභවන්තයින් අතුරින් කෙනෙකි. (සූරා ආලු ඉම්රාන් 3: 84, 85)
ඉස්ලාම් දහම පරිපූර්ණ ජීවන රටාවක් වන අතර එය සහජ මානව ස්වභාවයට හා විචාර බුද්ධියට අනුකූල වේ. එය නීරෝගී නිමල ආත්ම ඇත්තන් විසින් පිළිගනු ලබන්නකි. එය ශ්රේෂ්ඨ මැවුම්කරු විසින් ඔහුගේ මැවීම් සඳහා ආගමානුකූල කරන ලද්දකි. එය මේ ලෝකයේ මෙන් ම මතුලොවෙහි සියලු ම මිනිසුන්ට යහපත හා සතුට ගෙන දෙන දහමකි. එය එක් ජාතියකින් තවත් ජාතියක් හෝ එක් වර්ණයකින් තවත් වර්ණයක් හෝ උසස් යැයි වෙන් කරන්නේ නැත. ඒ තුළ මානවයෝ එක සමාන වෙති. යහපත් ක්රියාවේ ප්රමාණයට අනුව මිස ඉස්ලාමය තුළ කිසිවෙකු වෙනත් කිසිවකුට වඩා තරාතිරමෙන් වෙනස් වන්නේ නැත.
උත්තරීතර අල්ලාහ් මෙසේ පවසයි: යම් පිරිමියකුගෙන් හෝ වේවා කාන්තාවකගෙන් හෝ වේවා දේවත්වය විශ්වාස කරන්නෙකු වශයෙන් සිට යමෙකු දැහැමි කටයුත්තක් කළේ ද එවිට යහපත් ජීවිතයක් අපි ඔහුට උදා කරන්නෙමු. තව ද ඔවුන් සිදු කරමින් සිටි දෑට ඉතා යහපත් අයුරින් ඔවුන්ගේ ප්රතිඵල අපි ඔවුනට පිරිනමන්නෙමු. (අන් නහ්ල්: 97)
ඉස්ලාමය සතුට හා සොම්නස සඳහා වන මාර්ගය යි.
ඉස්ලාමය සියලු ම නබිවරුන්ගේ දහම යි. එය සමස්ත මිනිස් වර්ගයා සඳහා වන අල්ලාහ්ගේ දහම යි. එය අරාබිවරුන්ට පමණක් සුවිශේෂී දහමක් නොවේ.
ඉස්ලාමය මෙලොවෙහි සැබෑ සතුට මෙන් ම මතුලොවෙහි සදා සැපත සඳහා වන මාර්ගය යි.
ආත්මයේ සහ ශරීරයේ අවශ්යතා සපුරාලන සහ සියලු මිනිස් ගැටලු විසඳන එක ම දහම ඉස්ලාමය යි. උත්තරීතර අල්ලාහ් මෙසේ පැවසීය: නුඹලා දෙදෙනා ම පහළට බසිනු. නුඹලාගෙන් ඇතැමෙක් ඇතමෙකුට සතුරු ය. මගෙන් නුඹලා වෙත යහමඟ පැමිණෙනු ඇත. එහෙයින් කවරෙකු මාගේ යහමඟ පිළිපදින්නේ ද එවිට ඔහු නොමග නොයනු ඇත; අභාග්යවන්ත ද නොවනු ඇත. තවද මා මෙනෙහි කිරීමට කවරෙකු පිටුපෑවේ ද එවිට නියත වශයෙන් ම ඔහුට පීඩිත ජීවිතයක් ඇත. තව ද මළවුන් කෙරෙන් නැගිටුවනු ලබන දිනයේ අන්ධයකු ලෙස අපි ඔහු ව නැවත නැගිටුවන්නෙමු. (සූරා තාහා 20: 123, 124)
මුස්ලිම්වරයා මෙලොව හා මතුලොව දී හිමි කරගන්නා ඵල ප්රයෝජන කුමක් ද?
ඉස්ලාමය මඟින් ඉමහත් ප්රයෝජන රැසක් ඇත. ඒවා නම්:
- මිනිසා අල්ලාහ්ට පමණක් ගැතිකම් පාමින් මෙලොව ජය හා ගෞරවය හිමි කර ගැනීම. එසේ නොවූ විටෙක, ඔහු ආත්මයට, ෂෙයිතාන්ට හා ආශාවන්ට වහල් වනු ඇත.
- අල්ලාහ් ඔහුට සමාව දී තම පිළිගැනීමට ඔහු ව ලක් කර, අල්ලාහ් ඔහු ව ස්වර්ග උයනට ඇතුළත් කර, තෘප්තියෙන් හා සදාතනික සැප පහසුකම්වලින් යුතු සාර්ථකත්වය හිමි කර දීමෙන් හා අපා ගින්නේ දඬුවමින් එම පුද්ගලයා ආරක්ෂා වීමෙන් මතුලොවෙහි ජය ලබයි.
- සැබැවින් ම එසේ විශ්වාස කරන්නා මළවුන් කෙරෙන් නැගිටුවනු ලබන දිනයේ නබිවරුන් (දේව ධර්ම දූතයින්), සිද්දීක්වරුන් (සත්යවාදීන්), ෂුහදාවරුන් (දෙවිඳාණන් උදෙසා නිසි ලෙසින් දිවි පිදූවන්) සාලිහ්වරුන් (ධර්මිෂ්ඨයින්) සමග සිටිනු ඇත. එය මොනතරම් අනර්ඝ සහගාමී ඇසුරක් වන්නේ ද! එහෙත් කවරෙකු විශ්වාස නොකළේ ද ඔහු නපුරු බලවේග, දුෂ්ඨයින්, අපරාධකරුවන් හා කලහකාරීන් සමග සිටිනු ඇත.
- අල්ලාහ් ස්වර්ග උයනට පිළිගන්නා අය මරණය, අසනීපය, වේදනාව, මහලු විය හෝ දුකින් තොර ව සදාකාලින සැපයෙන් ජීවත් වෙති. ඔවුන් කැමති සෑම දෙයක් සඳහා ම ඔවුන්ගේ ආශාවන් ඉෂ්ට කර දෙනු ඇත. නිරයට ඇතුළු වන අය සදාකාලික, අඛණ්ඩ වධහිංසාවලට භාජනය වෙති.
- ස්වර්ගයේ කිසි ම ඇසකින් නොදුටු, කිසි ම කනකට නොඇසූණු, කිසි ම මිනිසෙකු නොසිතූ සැප සම්පත් තිබේ. ඒ සඳහා සර්වබලධාරි අල්ලාහ්ගේ ප්රකාශය සාක්ෂියකි: යම් පිරිමියකුගෙන් හෝ වේවා කාන්තාවකගෙන් හෝ වේවා දේවත්වය විශ්වාස කරන්නෙකු වශයෙන් සිට යමෙකු දැහැමි කටයුත්තක් කළේ ද එවිට යහපත් ජීවිතයක් අපි ඔහුට උදා කරන්නෙමු. තව ද ඔවුන් සිදු කරමින් සිටි දෑට ඉතා යහපත් අයුරින් ඔවුන්ගේ ප්රතිඵල අපි ඔවුනට පිරිනමන්නෙමු. (අන්-නහ්ල් :97)
උත්තරීතර අල්ලාහ් මෙසේ පවසා ඇත. එහෙයින් ඔවුන් සිදු කරමින් සිටි දෑ සඳහා ප්රතිඵලයක් වශයෙන් ඔවුන් සඳහා සඟවා තබනු ලැබූ නෙත් පින වන දෑ කිසිදු ආත්මයක් නොදනී. (සූරා අස් සජ්දා: 17)
මුස්ලිම් නොවන අය අත්කරගන්නා අලාභය කුමක් ද?
මිනිසාට ශ්රේෂ්ඨතම දැනුම වන අල්ලාහ් පිළිබඳ දැනුම සහ අවබෝධය අහිමි වී යයි. ඔහුට මෙලොව ආරක්ෂාව සහ සන්සුන්භාවය මෙන් ම මරණින් මතු ජීවිතයේ සදාකාලික සතුට හිමිකර දෙන අල්ලාහ් කෙරෙහි වූ විශ්වාසය නැති වී යයි.
අල්ලාහ් මිනිසුන්ට හෙළි කළ ශ්රේෂ්ඨතම ග්රන්ථය දෙස බැලීමටත් එම ශ්රේෂ්ඨ ග්රන්ථය කෙරෙහි විශ්වාස කිරීමටත් මිනිසාට නොහැකි වනු ඇත.
ශ්රේෂ්ඨ අනාගත වක්තෘවරුන් කෙරෙහි විශ්වාසය නැති වී යනු ඇත. එමෙන් ම නැවත නැගිටුවනු ලබන දිනයේ දී ස්වර්ග උයනේ ඔවුන් සමග වන සම්බන්ධතාව ද අහිමි කර ගනු ඇත. ඔහු ෂෙයිතානුන්, අපරාධකරුවන් සහ දුෂ්ඨයින් සමඟ අපා ගින්නේ සිටින අතර ම එම නිවහන හා අසල්වැසිකම නපුරු වනු ඇත.
උත්තරීතර අල්ලාහ් මෙසේ පවසයි: “නියත වශයෙන් ම පරාජිතයින් වනුයේ මළවුන් කෙරෙන් නැගිටුවනු ලබන දිනයේ තමන්ට හා තම පවුලට පාඩු ඇති කර ගත් අය යි. දැන ගනු! එය යි ප්රකට පරාජය” යැයි ඔබ පවසනු. ඔවුනට ඉහළින් (නිරා) ගින්නෙන් වූ මහල් ද ඔවුනට පහළින් මහල් ද ඔවුනට ඇත. එය වනාහි අල්ලාහ් එමඟින් තම ගැත්තන් ත්රාසයට පත් කරවයි.“අහෝ මාගේ ගැත්තනි, එහෙයින් නුඹලා මට බිය බැතිමත් වනු.” (යැයි තවදුරටත් පවසනු.) (අස්-සුමර් :15,16)
මරණින් මතු ජීවිතයෙහි සාර්ථකත්වය අපේක්ෂා කරන තැනැත්තා අල්ලාහ්ට යටත් වූ මුස්ලිම්වෙකු විය යුතු අතර, ඔහුගේ දූතයාණන් ව (සල්ලල්ලාහු අලයිහි වසල්ලම්) පිළිපැදිය යුතු වේ.
වක්තෘවරුන් සහ ධර්ම දූතයින් (ඔවුන්ට සාමය අත් වේවා!) සැවොම එකඟ වූ එක් යථාර්ථයක් නම්, සර්වබලධාරී අල්ලාහ් ව විශ්වාස කළ, ඔහුට නැමදුම් කිරීමේ දී කිසිවෙකු හවුල් නොකළ, සියලු ම වක්තෘවරුන් සහ පණිවිඩකරුවන් විශ්වාස කළ මුස්ලිම්වරුන් පමණක්, මරණින් මතු ජීවිතයේ දී ආරක්ෂා වන බව යි. දූතවරුන් ව විශ්වාස කරන, ඔවුන් සත්ය බව සහතික කරන ඔවුන්ගේ අනුගාමිකයින් සියලු දෙනා ම ස්වර්ගයට ඇතුළු වී නිරයෙන් මිදෙනු ඇත.
නබි මූසාතුමාගේ යුගයේ එතුමා ව විශ්වාස කරමින් සහ එතුමාගේ ඉගැන්වීම් පිළිපදිමින් සිටි උදවිය වනාහි, ඔවුහු ධර්මිෂ්ඨ දේවත්වය විශ්වාස කළ දේව අණට යටත් වූ මුස්ලිම්වරු වෙති. එහෙත් අල්ලාහ් ඊසා (අලෙයහීස් සලාම්) තුමා ව දූතයකු ලෙස එවූ පසු, මූසාතුමා ව අනුගමනය කළවුන් ඊසා තුමා ව විශ්වාස කොට ඔහු ව අනුගමනය කිරීම අනිවාර්ය වේ.
එපරිදි, කවරෙක් ඊසාතුමා ව අනුගමනය කළේ ද ඔවුන් දැහැමි මුස්ලිම්වරු වෙති. එහෙත් කවරෙකු ඊසාතුමා ව ප්රතික්ෂේප කොට 'මම මූසාගේ දහම මත රැඳී සිටිමි' යැයි පවසන්නේ ද එම තැනැත්තා දෙවිඳාණන් කෙරෙහි විශ්වාසය තැබූ මුඃමින්වරයකු වන්නේ නැත. හේතුව අල්ලාහ් එවූ නබිවරයා ව විශ්වාස කිරීමේ මූලිකාංගය ඔහු ප්රතික්ෂේප කළ බැවිනි.
පසු ව අවසන් දූත මුහම්මද් (සල්ලල්ලාහු අලයිහි වසල්ලම්) තුමාණන් ව අල්ලාහ් එවූ පසු, ඔවුන් සියලු දෙනා එතුමාණන් ව විශ්වාස කිරීම අනිවාර්යය වේ. මූසා හා ඊසා යැවූ පරමාධිපතියාණන් ම ය අවසන් දූත මුහම්මද් (සල්ලල්ලාහු අලයිහි වසල්ලම්) තුමාණන් ව ද දූතත්ත්වය පිණිස එවුවේ. එබැවින් කවරෙකු මුහම්මද් (සල්ලල්ලාහු අලයිහි වසල්ලම්) තුමාණන්ගේ දූත පණිවිඩය ප්රතික්ෂේප කොට, මම මූසා හෝ ඊසා ව අනුගමනය කිරීමෙහි ම රැඳී සිටිමි යැයි පවසන්නේ ද ඔහු මුඃමින්වරයකු වන්නේ නැත.
සැබැවින් ම තමන් මුස්ලිම්වරුන්ට ගරු කරන බව පුද්ගලයකු පවසා සිටීම ප්රමාණවත් වන්නේ නැත. එමෙන් ම මතුලොව ඔහු ජයග්රහණය ලබන්නට දිළිඳුන් හට දන් දී උපකාර කිරීම ද ප්රමාණවත් වන්නේ නැත. එහෙත් ඔහු අල්ලාහ්, ඔහුගේ ග්රන්ථ, ඔහුගේ දූතවරු, අවසන් දිනය විශ්වාස කරන්නෙකු විය යුතු ය. එවිට අල්ලාහ් ඔහුගෙන් එය පිළිගනු ඇත. ෂිර්ක් හෙවත් අල්ලාහ්ට හවුල්කරුවන් පත් කිරීම, කුෆ්ර් හෙවත් අල්ලාහ් ව ප්රතික්ෂේප කිරීම, අල්ලාහ් පහළ කළ දිව්ය පණිවිඩය හෙළා දැකීම හා ඔහුගේ අවසන් නබිවරයා වන මුහම්මද් (සල්ලල්ලාහු අලයිහි වසල්ලම්) තුමාණන් ව ප්රතික්ෂේප කිරීම යනාදියට වඩා බරපතළ වෙනත් පාපයක් නැත.
යුදෙව්වන් කිතුනුවන් හා වෙනත් ආගමිකයින් මුහම්මද් (සල්ලල්ලාහු අලයිහි වසල්ලම්) තුමාණන්ගේ සම්ප්රාප්තිය ගැන සවන් දී පසු ව ඔවුහු එතුමාණන් ව විශ්වාස කිරීමට ප්රතික්ෂේප කළෝය. ඉස්ලාමය තුළට පිවිසීම හෙළා දුටුවෝය. ඔවුහු අපා ගින්නේ සදාකල් වෙසෙන්නෝ වෙති. එය කිසියම් මිනිසකුගේ තීන්දුව නොව අල්ලාහ්ගේ තීන්දුව යි. උත්තරීතර අල්ලාහ් මෙසේ ප්රකාශ කරයි: සැබැවින් ම පුස්තක ලත් ජනයා අතුරින් වූ ප්රතික්ෂේප කළවුන් හා ආදේශ තබන්නන් නිරා ගින්නෙහි ය. ඔවුහු එහි සදාතනිකයෝ වෙති. ඔවුන් ම ය මැවීම් අතුරින් නපුරු ම මැවීම වනුයේ. (අල්-බය්යිනා :6)
මිනිස් සමූහයා වෙත අල්ලාහ්ගෙන් වූ අවසන් දිව්ය පණිවිඩය පහළ වීම හේතුවෙන් ඉස්ලාමය ගැන සවන් දීම, අවසන් දූත මුහම්මද් (සල්ලල්ලාහු අලයිහි වසල්ලම්) තුමාණණ්ගේ දූත පණිවිඩයට සවන් දීම, එතුමාණන් ව විශ්වාස කොට එතුමාණන්ගේ පිළිවෙත අනුගමනය කිරීම, එතුමාණන්ගේ විධාන පිළිපැද හා එතුමාණන් තහනම් කළ නියෝගවලින් වැළකී සිටීම අනිවාර්ය වේ. එබැවින් කවරෙකු හෝ අවසන් දූත පණිවිඩයට සවන් දී එය ප්රතික්ෂේප කරන්නේ ද අල්ලාහ් ඔහුගෙන් කිසිවක් පිළිගන්නේ නැත. මතුලොවෙහි ඔහුට දඬුවම් කරනු ඇත.
උත්තරීතර අල්ලාහ්ගේ ප්රකාශය ඒ සඳහා වන සාධකය වේ: කවරෙකු ඉස්ලාමය හැර වෙනත් දහමක් සොයන්නේ ද එවිට ඔහුගෙන් කිසිවක් පිළිගනු නොලබන්නේ ම ය. තව ද ඔහු මතු ලොවෙහි අලාභවන්තයින් අතුරින් කෙනෙකි. (ආලු ඉම්රාන් :85)
උත්තරීතර අල්ලාහ් මෙසේ පැවසූ සේක: ‘අහෝ දහම් ලත් ජනයිනි, අල්ලාහ් හැර වෙනත් කිසිවෙකු අපි නොනමදිමු. ඔහුට කිසිවක් ආදේශ නොතබමු. අල්ලාහ්ගෙන් තොර ව අප අතුරින් ඇතැමෙක් ඇතැමෙකු ව දෙවියන් ලෙස නොගත යුතු ය යනුවෙන් අප හා ඔබ අතර වූ පොදු සම්මත වදනක් කරා පැමිණෙනු’ යැයි (නබිවරය,) පවසනු. එවිට ඔවුහු පිටුපෑවෝ නම් ‘සැබැවින් ම අපි අවනත වූවන් (මුස්ලිම්වරුන්) බවට නුඹලා සාක්ෂි දරනු’ යැයි පවසනු. (ආලු ඉම්රාන්: 64)
මුස්ලිම්වරයෙකුට අවශ්ය වනුයේ කුමක් ද?
මුස්ලිම්වරයෙකුට පහත සඳහන් මූලිකාංග හය විශ්වාස කිරීම අනිවාර්ය වේ:
උත්තරීතර අල්ලාහ් කෙරෙහි විශ්වාසය තැබීම. එනම්, සැබැවින් ම ඔහු මැවුම්කරු, පෝෂක, සැලසුම්කරු හා පාලක ය. ඔහු මෙන් කිසිවක් නැත. ඔහුට කිසිදු සහකාරියක් හෝ දරුවෙක් හෝ නැත. නැමදුම් ලබන්නට සුදුස්සා ඔහු පමණ ය. ඔහු සමඟ වෙනත් කිසිවකු නැමදුමට ලක් නොවිය යුතු ය. ඔහු හැර නැමදුම් ලබන සෙසු සියලු නැමදුම් ව්යාජ මිථ්යා නැමදුම් බව විශ්වාස කළ යුතු ය.
සුර දූතයින් හෙවත් මලාඉකාවරුන් කෙරෙහි විශ්වාසය තැබීම. එනම්, ඔවුහූ උත්තරීතර අල්ලාහ් වෙනුවෙන් වූ ගැත්තෝ වෙති. ඔවුන් ව ඔහු ආලෝකයෙන් මවා ඇත. ඔවුන්ගේ රාජකාරීන් අතුරින් සැබැවින් ම ඔවුන් අල්ලාහ්ගේ ධර්ම දූතවරුන් වෙත දිව්ය පණිවිඩ රැගෙන පැමිණීම ද ඔවුනට පැවරුණු වගකීමකි.
අල්ලාහ් තම නබිවරුන්ට පහළ කළ (මානව සංශෝධනයට භාජනය වීමට පෙර පැවති තව්රාතය, ඉන්ජීලය වැනි) සියලු පුස්කත කෙරෙහි විශ්වාස කිරීම. එම පුස්තක අතුරින් අවසන් පුස්තකය වනුයේ ශුද්ධ වූ අල් කුර්ආනය යි.
නූහ්, ඉබ්රාහීම්, මූසා හා ඊසා යනාදි සියලු ම ධර්ම දූතවරුන් පිළිබඳ විශ්වාස කිරීම. ඒ අතුරින් අවසන් නබිවරයා වනුයේ මුහම්මද් (සල්ලල්ලාහු අලයිහි වසල්ලම්) තුමා ය. ඔවුහු සියල්ලෝ ම මිනිස්සු වෙති. දිව්ය පණිවිඩ තුළින් අල්ලාහ් ඔවුන් ව ශක්තිමත් කළේය. ඔවුන්ගේ සත්යයභාවය තහවුරු කරන සාක්ෂි, සාධක හා ප්රාතිහාර්යයන් ඔහු ඔවුනට පිරිනැමුවේය.
අවසන් දිනය පිළිබඳ විශ්වාස කිරීම. එනම්, එය පෙර ගිය අය ව මෙන් ම පසු යන අය වන සියල්ලන් ම අල්ලාහ් නැවත අවදි කරවන දිනය යි. එදින ඔහු ඔහුගේ මැවීම් අතර තීන්දු පිරිනමයි. දේවත්වය විශ්වාස කළ මුඃමින්වරුන් ස්වර්ගයට ඇතුළත් කරවන අතර දේවත්වය ප්රතික්ෂේප කළ කාෆිර්වරුන් ව අපා ගින්නට ඇතුළත් කරවනු ඇත.
පෙර නියමය පිළිබඳ විශ්වාස කිරීම. එනම් සැබැවින් ම අතීතයේ සිදු වූ දෑ මෙන් ම අනාගතයේ සිදු වන්නට යන සියල්ල පිළිබඳ අල්ලාහ් මැනවින් දන්නා ය. සැබැවින්ම අල්ලාහ් ඒවා දැන සිටි අතර ඒවා සටහන් කර තබා ඇත. ඔහු ඒවා අභිමත කළේය. එපරිදි සෑම දෙයක් ම නිර්මාණය කළේය.
ඔබට අල්ලාහ් දහම්ගත කළ සලාතය, සකාතය, උපවාසය හා පහසුකම් ඇතොත් හජ් වන්දනාව ඉටු කරමින් අල්ලාහ්ට ඔබ නැමදුම් කළ යුතු ය. ඉන්පසු සිය ලෞකික සොම්නස හා මතුලොව ගැලවුම සඳහා පාදක වන උතුමාණන්ගේ දහම අධ්යයනය කළ යුතු ය.
Related books
All books
මා මැව්වේ කවුද? ඒ කුමකට ද?75 භාෂාමා මැව්වේ කවුද? ඒ කුමකට ද?
පවතින සෑම දෙයක්ම මැවුම්කරුවකුගේ පැවැත්ම පෙන්වා දෙයි. අහස් හා මහපොළොව ද ඒ දෙක අතර පවතින ආවරණය කළ නොහැකි අති විශාල නිර්මාණයන් මැව්වේ කවු ද? අහස් හි හා මහපොළොවෙහි සූක්ෂතම හා විස්තීරණ පද්ධතිය නිර්මාණය කළේ කවු ද? මිනිසා නිර්මාණය කර, ඔහුට ඇසීම, පෙනීම සහ බුද්ධිය ලබා දී ඔහුට දැනුම ලබන්නට සහ කරුණු අවබෝධ කර ගන්නට හැකියාව ලබා දුන්නේ කවු ද? ඔබේ ශරීරයේ පද්ධතිවල සහ ජීවීන්ගේ ශරීරවල මෙම නිශ්චිත කාර්යය ඔබ පැහැදිලි කරන්නේ කෙසේද? එය නිර්මාණය කළේ කවුද? මෙම මහා විශ්වය, වසර ගණනාවක් පුරා නිශ්චිතව නියාමනය වෙමින්, එහි නීති සමඟ සංවිධානය වී ස්ථාවරව පිහිටනුයේ කෙසේ ද?
විශ්වය මැව්වේ කවු ද? මා මැව්වේ කවු ද? ඒ ඇයි?72 භාෂාවිශ්වය මැව්වේ කවු ද? මා මැව්වේ කවු ද? ඒ ඇයි?
මා සිටිනුයේ නිවැරදි මාර්ගයෙහි ද? අහස් හා මහපොළොවත් ඒ දෙක අතර ඇති ග්රහණය කළ නොහැකි අති විශාල නිර්මාණයන් මැව්වේ කවු ද? අහස් හි හා මහපොළොවෙහි සූක්ෂතම හා විස්තීරණ පද්ධතිය නිර්මාණය කළේ කවු ද? මිනිසා නිර් මාණය කර, ඔහුට ඇසීම, පෙනීම සහ බුද්ධිය ලබා දී ඔහුට දැනුම ලබා ගැනීමට සහ කරුණු අවබෝධ කර ගැනීමට හැකියාව ලබා දුන්නේ කවු ද?
ඔබ ඔබේම හදවතින් විමසා බැලුවෙහි ද? ඔබව මැව්වේ කවු ද? ඒ ඇයි? මරණයෙන් පසු කුමක් වේවි ද?68 භාෂාඔබ ඔබේම හදවතින් විමසා බැලුවෙහි ද? ඔබව මැව්වේ කවු ද? ඒ ඇයි? මරණයෙන් පසු කුමක් වේවි ද?
මෙම ග්රන්ථය පැවැත්මේ සහ මැවීමේ ප්රශ්නය පිළිබඳව සලකා බලයි. පරිපූර්ණ ප්රඥාව සහ පරිපූර්ණත්වය ඇති මැවුම්කරුගේ පැවැත්ම බුද්ධිමය සාධක තුළින් සහතික කරයි. ජීවිතයේ අරමුණ අල්ලාහ්ට පමණක් නැමදුම් ඉටු කිරීම බවත් ඉස්ලාම් යනු ආරක්ෂා කරන ලද සත්ය ආගම බවත් පැහැදිලි කරයි. අල්ලාහ්ගේ දූත මුහම්මද් (සල්ලල්ලාහු අලයිහි වසල්ලම්) තුමාණන්ව විශ්වාස කිරීමට හා එතුමාණන්ගේ ඉගැන්වීම් පිළිපදින්නට ඇරයුම් කරයි. ෂිර්ක් හෙවත් අල්ලාහ්ට ආදේශ තැබීම පිළිබඳව අවවාද කරයි. මතුලොවෙහි විනිශ්චය සහ ප්රතිඵල පිළිබඳව තහවුරු කරයි.
සත්යය වෙත වූ ඍජු මඟ6 භාෂාසත්යය වෙත වූ ඍජු මඟ
සංස්කරණය: පර්යේෂණ අංශය. විවිධ භාෂාවලින් ඉස්ලාමීය අන්තර්ගත සේවා සංගමය. හිජ්රි 1445 පෙරවදන මහා කාරුණික පරම දයාබර අල්ලාහ්ගේ නාමයෙන්