ኣገደስቲ ትምህርትታት ንሓፈሻዊ ህዝቢ ሙስሊም
መጽሓፍ "ኣገደስቲ ትምህርትታት ንሓፈሻዊ ኡማ" ናይ ሼኽ ዓብዱል ዓዚዝ ቢን ባዝ (ኣላህ ይርሓመሎም)፡ ንሓፈሻዊ ሙስሊም ፍልጠታዊ ስንቂ ንክኸዉን በቲ ኢማም ዝተዳለወት ዓቢ ጠቅሚ ዘለዋ ሕጽር ዝበለት መልእኽቲ ኢያ። ኣብ'ዚ መጽሓፍ ድማ፡ ንነፍሲ ወከፍ ሙስሊም ቅኑዕ እምነትን ኣምልኾትን ንምቕራብ፡ ካብ ቁርኣንን ሱናን ብዝተመስረተ ብቐሊልን ብንጹርን ኣገባብ፡ ካብ ተውሒድ፡ እምነትን እስልምናን ጀሚሩ ክሳብ ሕግታት ጠሃራን (ጽርየት) ሰላትን፡ ስነ-ምግባር እስልምናን፡ ከምኡ'ውን መጠንቀቕታታት ሺርክን ሓጢያትን ምግላጽን መብርሂ ምሃብን ብዛዕባ መሰረታትን ዓንድታትን ሃይማኖት ዝምልከት ይገልጽ።
These files are generated automatically from the book's text; their layout may differ from the printed edition.
ኣገደስቲ ትምህርትታት ንሓፈሻዊ ህዝቢ ሙስሊም
ናይ ክቡር ሼኽ ኣልዓ'ላማ
ዓብዱል ዓዚዝ ቢን ዓብዲላህ ቢን ባዝ
ረሒመሁላህ
መእተዊ ደራሲ
ምስጋና ንናይ ዓለማት ጎይታ ዝኾነ ኣላህ ዝተገበአ እዩ፡ ሰናይ ዝኾነ መወዳእታ ከኣ ነቶም ኣላህ ዝፈርሑ እዩ፡ ኣላህ ምውዳሱን ሰላምን ኣብ ልዕሊ ባርያኡን ልኡኹን ዝኾኑ ነቢና ሙሓመድ፡ ከምኡ'ውን ኣብ ልዕሊ ኩሎም ኣዝማዶምን ብጾቶምን የውርድ።
ካብ'ዚ ብምቅጻል
እዚኣቶም እምብኣር፡ ሓፈሻዊ ህዝቢ ብዛዕባ ሃይማኖት እስልምና ክፈልጦ ዝግባእ ገለ ነገራት ዝገልጹ ሓጸርቲ ቃላት ኮይኖም፡ (ኣገደስቲ ትምህርትታት ንሓፈሻዊ ኡማ) ኢለ ድማ ሰምየያ ኣለኹ።
በዚ ንሙስሊሚን ንኽጠቅምን፣ ከምኡ‘ውን ካባይ ንኽቕበላን ንኣላህ ይልምን፤ ንሱ ብሓቂ ለጋስን ክቡርን እዩ።
ዓብዱልዓዚዚ ብን ዓብዲላሂ ብን ባዝ ኣገደስቲ ትምህርትታት ንሓፈሻዊ ኡማ [1] [1] እኩብ ዝተፈላለዩ ፈትዋታትን ቃላትን (3/ 288- 298)።
ቀዳማይ ትምህርቲ፡ ኣል ፋቲሓን ሓጸርቲ ሱራታትን
ኣል ፋቲሓን ካብ ሓጸርቲ ሱራታት ዝተኻእለን፣ ካብ ሱረት ኣ'ዘልዘላ ክሳብ ሱረት ኣ'ናስ፡ ምምሃር፡ ንባብ ምእራም፡ ምሕፋዝን ክርዳእ ዝግበኦ ምብራህን።
ካልኣይ ትምህርቲ፡ ናይ ኢስላም ዓንድታት
መግለጺ ሓሙሽተ ዓንድታት እስልምና፣ እቲ ቀዳማይን ዝዓበየን ድማ፦ "ላኢላሃ ኢለላህ" ዝብል ቃል ምስክርነትን፣ "ነቢ ሙሓመድ ልኡኽ ኣላህ" ምዃኖም ምእማንን ትርጉማቶም ብምብራህን፣ ቅድመ-ኩነታት "ላኢላሃ ኢለላህ" ብምግላጽን፣ ትርጉሙ ድማ፦ (ላ ኢላሃ) ብዘይካ ኣላህ ዝምለኽ ኩሉ ብምንጻግ፣ (ኢለላህ) ኣምልኾ (ዒባዳ) መሻርኽቲ ንዘይብሉ ኣላህ በይኑ ጥራይ ብምርግጋጽ እዩ። ቅድመ-ኩነት ናይ (ላኢላሃ ኢለላህ) እዚ ዝስዕብ ኢዩ፦ ንድንቁርና ዝጻረር ፍልጠት፣ ንጥርጣረ ዝጻረር ርግጸኝነት፣ ንሽርኪ ዝጻረር ኢኽላስ፣ ንሓሶት ዝጻረር ቅንዕና፣ ንጽልኢ ዝጻረር ፍቕሪ፣ ንምሕዳግ ዝጻረር ምቅያድ፣ ንምንጻግ ዝጻረር ምቕባል፣ ከምኡ’ውን ብዘይካ ኣላህ ብዝምለኽ ኩሉ ምኽሓድ ኢዩ። በዘን ዝስዕባ ክልተ ጥቕስታት ድማ ተጠቓሊለን ኣለዋ፦
ፍልጠት፡ ርግጽነት፡ ኢኽላስን ሓቅነትን፡ ምስ ፍቕርን ተኣዛዝነትን ንዓኣ ምቕባልን። ሻሙናይ ድማ ተወሰኸ፡ ነቲ ብዘይካ ኣላህ ካብ ኩሉ ነገራት ከም ኣምላኽ ተገዛእነቱ ምኽሓድ ኢዩ።
ምስ መግለጺ ሙሓመድ ልኡኽ ኣላህ ምዃኑ ዝብል ምስክርነትን እቲ ጠለባቱ ድማ፦ ዝተዛረቦ ሓቂ ምባል፡ ኣብ ዝኣዘዞ ምእዙዝ ምዃን፡ ካብቲ ዝኸልከሎን ዝኾነኖን ምርሓቕ፡ ንኣላህ ብዘይካ በቲ ኣላህ ዓዘ ወጀለን ናቱ ሉኡኹን (ﷺ) ዝሓገግዎ ብኻልእ ዘይምምላኽ። ድሕሪኡ ነቲ ተምሃራይ እተን ዝተረፋ ካብ ሓሙሽተ ዓንዲ እስልምና ይገልጸሉ፣ ንሳተን ድማ፡- ሰላት ምስጋድ፡ ዘካት ምሃብን፡ ረመዳን ምጻምን፡ ንዓቅሚ ዘለዎ ቤት ኣላህ ኣል ሓራም ሓጅ ምግባር።
ሳልሳይ ትምህርቲ፡ ዓንድታት ኢማን
ንሳተን ሽዱሽተ ኢየን፡ ብኣላህ፡ ብመልኣኽቱ፡ ብመጻሕፍቱ፡ ብልኡኻቱ፡ ብመወዳእታ መዓልቲ ምእማን፡ ከምኡ'ውን ብጽሕፍቶ(ቀደር) ጽቡቕ ይኹን ሕማቕ ካብ ልዑል ኣላህ ምዃኑ ምእማን።
ራብዓይ ትምህርቲ፡ ናይ ተውሒድ ክፋላትን ናይ ሽርኪ ክፋላትን
መግለጺ ናይ ታውሕድ ክፋላት፣ ንሳተን ከኣ ሰለስተ እየን:- ተውሒድ ኣ'ሩቡቢያ፣ ተውሒድ ኣልኡሉሂያ፣ ከምኡ'ውን ተውሒድ ኣልኣስማእ ወ'ሲፋት።
1-ተውሒድ ኣ'ሩቡብያ:_ ንሱ ድማ ኣላህ ሱብሓነሁ ንኹሉ ነገር ፈጣሪን፣ ንኩሉ ነገር ኣማሓዳርን ምዃኑ፡ ኣብዚ ድማ መሻርኽቲ ከምዘይብሉ ምእማን እዩ።
2- ተውሒድ ኣል ኡሉሁያህ፦ ንሱ ድማ ንኑጹህ ዝኾነ ኣላህ ሓቀኛ ዝምለኽ ምዃኑን፡ ኣብዚ መሻርኽቲ ከምዘይብሉን ምእማን እዩ። እዚ ኸኣ ትርጉም ናይ "ላ ኢላሃ ኢለላህ" እዩ፣ ትርጉሙ ድማ፦ ብዘይካ ኣላህ ሓቀኛ ዝምለኽ የለን ማለት እዩ። ስለዚ ኩሉ ኣምልኾታት ከም ስግዳን፡ ጾምን ካልእን ንኣላህ ንበይኑ ጥራይ ብሕታዊ ክግበር ይግባእ፡ ካብኡ ዝኾነ ነገር ንኻልእ ምሃብ ኣይፍቀድን እዩ።
3- ተውሒድ ኣልኣስማእ ወ'ሲፋት፦ እዚ ከኣ ብኹሉ ኣብ ቁርኣን ኣልከሪም ወይ ኣብ ሰሒሕ ሓዲሳት ብዝተጠቐሱ ኣስማትን መግለጺታትን ናይ ኣላህ ምእማን፡ ከምኡ'ውን ብዘይ ምልዋጥን፡ ዝግባእ ትርጉም ከምቲ ንዓኡ ዝግቦኦ ምሃብ፡ ከመይነቱ ብዘይ ምግላጽን፡ ንፍጡራቱ ብዘይ ምምስሳልን ንኣላህ ጥራይ ብሕታዊ ብምግባር ንዕኡ (ሱብሓነሁ) ብዝምጥን መልክዑ ምርግጋጽ እዩ፤ ነዚ ዝስዕብ ቃል ኣላህ (ሱብሓነሁ) ብምትግባር፦ « በል "ንሱ ኣላህ ሓደ እዩ።"1 ኣላህ እቲ ሙሉእ ዘይጉዱል ጎይታ፡ ኩሉ ፍጡር ድልየቱ ንምርካብ ናብ ኣላህ ዝምዕቀበሉ እዩ2 ኣላህ ኣይወለደን ኣይተወልደን 3 ንዑኡ ዝመሳሰል ወላ ሓደ የለን 4» [ኣል ኢኽላስ: 1-4] ኣላህ ዓ'ዛ ወጀል ከምዚ ይብል፡ {...ዋላ ሓደ ንዑኡ ዝመስል የለን፡ ንሱ ድማ ንኩሉ ሰማዒ ንኩሉ ረኣዪ ዝኾነ እዩ}። [ኣ'ሹራ፡11]፡ ገሊኦም ሰብ ፍልጠት ድማ ክልተ ክፋላት ገይሮምዋ እዮም፣ ንተውሒድ ኣልኣስማእ ወ'ሲፋት ድማ ኣብ ተውሒድ ሩቡብያ ኣእትዮምዎ፣ ኣብዚ ድማ ዝኾነ ክርክር የለን፤ ምኽንያቱ እቲ ዕላማ ኣብ ክልቲኡ ኣከፋፍላ ንጹር ስለዝኾነ።
ናይ ሺርኪ ክፋላት ድማ ሰለስተ ኢየን፡ ዓቢ ሺርኪ፣ ንእሽተይ ሺርኪን ስውር ሺርኪን።
ዓቢይ ሺርኪ ድማ፦ንኹሉ ሰናይ ስራሓት ኮንቶ ይገብሮ(የበላሽዎ)፡ ነቲ ኣብ(ሺርክ) ዝሞተ ድማ ኣብ ሓዊ ገሃነም ንዘልኣለም የስፍሮ፡ ከምቲ ልዑል ኣላህ ዝበሎ፦ {...ንኣላህ መሻርኽቲ እንተዝገብሩ ነይሮም፡ እቲ ዝገብርዎ ዝነበሩ ስራሕ ምተበላሸዎም ነይሩ}። [ኣልኣንዓም፡ 88]፡ ካብ ኩሉ ጉድለት ንጹህ ዝኾነ ኣላህ ይብል፡ {ንሙሽሪካት፡ ኣብ ልዕሊ ርእሶም ብክሕደት እናመስከሩ ናይ ኣላህ መሳጊድ ክሃንጹ ኣይግብኦምን እዩ። ንሳቶም ስራሖም ዝተበላሸወ እዩ፣ ኣብ ሓዊ ድማ ንሳቶም ንሓዋሩ ነበርቲ እዮም17} [ኣ'ተውባ፡ 17]፣ ኣብኡ(ኣብ ሺርክ) ዝሞተ ድማ፡ ኣላህ ኣይምሕሮን ኢዩ፡ ገነት'ዉን ንዕኡ ሓራም ትኾኖ፡ ከምቲ ኣላህ ዓ'ዘ ወጀል ዝበሎ፡ {ብርግጽ ኣላህ ምስኡ ሽርክነት ምግባር ኣይምሕርን'ዩ። ኮይኑ ግን ካብ ሽርኪ ዝነኣሰ ሓጥያት ንዝገበረ፡ ንዝደለዮ ይምሕር'ዩ...} [ኣ'ኒሳእ፡ 48]፡ ካብ ኩሉ ጉድለት ንጹህ ዝኾነ ኣላህ ይብል: ﴾...እቲ ምስ ኣላህ ሽርካ ዝገብር፡ ብርግጽ ኣላህ ገነት ንዕኡ ሓራም ጌርዋ፡ መዕቆቢኡ ድማ ሓዊ ገሃነም ኢዩ፡ ንዓመጽቲ ድማ ዝኾነ ሓጋዚ የብሎምን﴿ [ኣል ማኢዳ፡ 72]።
ካብ ዓይነታቱ ድማ፡ ንምዉታትን ጣቆታትን ምልማን፡ ካብኣቶም ሓገዝ ምሕታት፡ ናብኣቶም መብጽዓ ምእታዉ፡ ንዓኣቶም ምሕራድን ዝኣመሰሉን ኢዩ።
ንእሽተይ ሺርክ፡ እዚ በቲ ካብ ቁርኣን ወይ ሱና ዝመጸ መርትዖታት ሽርኪ ተባሂሉ ዝተሰመየ ኮይኑ፡ ግን ካኣ ካብ ዓይነት ዓቢ ሺርኪ ዘይኮነ እዩ፤ ከም ኣብ ገለ ተግባራት ክረኣየሉ ኢሉ ምስራሕ፡ ካብ ኣላህ ወጻኢ ብኻልእ ምምሓል፡ 'ኣላህ ዝደለዮን እከሌ ዝደለዮን' ምባልን ፡ከምዚኦም ዝኣመሰሉን እዩ፤ ነቢ ﷺ ከምዚ ስለዝበሉ፡ «እቲ ዝያዳ ኣብ ልዕሌኹም ዝፈርሆ ነገር፡ ንእሽቶ ሽርኪ ኢዩ» ብዛዕባኡ ምስ ተሓተተ ድማ፡ ከምዚ በለ፦ «ሪያእ(ርኣዩለይ)» ምባል [2]። ኢማሙ ኣሕመድን ኣ'ጠበራኒን ኣልበይሃቅን ካብ ማሕሙድ ብን ለቢድ ኣል-ኣንሳሪ ረቢ ይፍተወሎም ብጽቡቕ ሰነድ ዘዉረይዎ፣ ኣ'ጠበራኒ ድማ ብጽቡቕ ሰነዳት ካብ ማሕሙድ ብን ለቢድ፣ ካብ ራፊዕ ብን ኸዲጅ፣ ካብ ነቢ ﷺ ኣዉረዮ። [2] ኢማም ኣሕመድ (5/ 428)፡ ኣ'ጠበራኒ ኣብ ኣልከቢር (4/ 338) ከምኡ'ዉን በይሀቂ ኣብ ኣ'ሹዓብ (14/ 355) ሰኒደሞ፡ ኣብ መጅማዕ ኣ'ዘዋኢድ (1/ 121) ድማ 'ኣሕመድ ኣዉሪዎ፡ ዘዉረይዎ ድማ ቅኑዓት ኣዉረይቲ ኢዮም' ኢሉ።
ነቢ ﷺ ከም'ዚ ምባሎም ድማ፡ «ብኣላህ ገዲፉ ብኻልእ ነገር ዝመሓለ ምስ ኣላህ መሻርኽቲ ጌሩ ኣሎ» [3]። ኢማም ኣሕመድ ካብ ዑመር ብን ኣል-ኸጣብ (ኣላህ ይፍተወሎም) ብቅኑዕ ሰነድ ኣውሪዮሞ፣ ኣቡ ዳውድን ኣ'ቲርሚዝን ብትኽክለኛ ሰነድ ዘዉረይዎ፡ ካብ ሓዲስ ዓብዱ'ላህ ቢን ዑመር፡ ኣላህ ይፍተወሎም፡ ካብ ነቢና ሰለላሁ ዓለይሂ ወሰለም ከም'ዚ በሉ፡ «ብኣላህ ገዲፉ ብኻልእ ዝመሓለ ክሒዱ ወይ ምስ ኣላህ መሻርኽቲ ጌሩ ኣሎ» [4] ነቢ ﷺ ድማ ከም'ዚ ይብሉ፡ «"ኣላህ ዝደለዮን እገሌ ዝደለዮን" ኣይትበሉ፣ እንታይ ደኣ "ኣላህ ዝደለዮ ብድሕሪኡ ድማ እገሌ ዝደለዮ" በሉ»[5] ኣቡ ዳውድ ትኽክለኛ ብዝኾነ ሰነድ(መንገዲ)፣ ካብ ሑዘይፋ ኢብኑ ኣል-የማን {ኣላህ ይፍተወሎም} ሓቢሩዎ። [3] ኢማም ኣሕመድ ዝሰነድዎ (1/ 47)። [4] ኣቡ ዳውድን ብቑጽሪ (3251)፡ ኣ'ቲርሚዝን ብቑጽሪ (1535) ሰኒደሞ። [5] ኣቡ ዳውድን ብቑጽሪ (4980)፡ ኣሕመድን (5/ 384) ሰኒደሞ።
እዚ ዓይነት'ዚ ካብ እስልምና ምውጻእ ኣየስዕብን፣ ከምኡ'ውን ኣብ ሓዊ ንዘልኣለም ምጽናሕ ኣየስዕብን ኢዩ፣ እንተኾነ ግን ነቲ ግዴታ ዝኾነ ምልኣተ ተውሒድ ይጻረር ኢዩ።
ሳልሳይ ዓይነት፡ ስዉር ሽርኪ፤ መርትዖኡ ድማ ቃል ነቢ ﷺ ፦ «ኣነ ንዓኻትኩም ካብ መሲሕ ኣ'ደጃል ንላዕሊ ብዝያዳ ዝፈርሓልኩም ነገር ክነግረኩም ዶ፧» በሉ:- «እወ ያ ረሱለላህ»፣ በለ:- «ዝተሰወረ ሽርኪ ኢዩ፡ ሓደ ሰብ ንሰላት ደው ይብል'ሞ፡ ሰብ ይጥምቶ ከምዘሎ ብምርኣይ ንሰላቱ የጸብቖ»[6]። ኢማሙ ኣሕመድ ኣብ ሙስነዶም ካብ ኣቡ ሰዒድ ኣልኹድሪ ኣላህ ይፍተወሉ ዘዉረዮ። [6] ኢብኑ ማጃህ ብቑጽሪ (4204)፡ ኢማም ኣሕመድ ድማ (3/ 30) ሰኒደሞ።
ሺርኪ ኣብ ክልተ ዓይነታት ጥራይ ክኽፈል ይከኣል እዩ፡
ዓቢን ንእሽተይን፡ ሕቡእ ሺርክ ግን ንኽልቲኦም የጠቓልሎም ኢዩ፤ ኣብቲ ዝዓበየ ይወድቕ፡ ከም ሽርኪ ሙናፊቂን፤ ምኽንያቱ ንሳቶም ጌጋ (ባጢል) እምነቶም ብወሽጢ ሓቢኦም፡ ንእስልምና ድማ ክረኣየሎም ብደገ ግልጺ ኣዉጺኦም፡ ንነብሶም ስለ ዝፈረሑላ ከምዚ ዝገብሩ።
ኣብ ንእሽተይ ሺርክ ድማ ይኸውን እዩ፡ ከም ሪያእ፣ ከምቲ ኣብቲ ኣቐዲሙ ዝሓለፈ ሓዲስ ማሕሙድ ብን ለቢድ ኣል-ኣንሳሪ፡ ከምኡ'ውን ኣብቲ ሓዲስ ኣቢ ሰዒድ ዝተጠቕሰ። ኣላህ ድማ ወሃቢ ኣሳልጦ(ተውፊቕ) እዩ።
ሓሙሻይ ትምህርቲ፦ ኣልኢሕሳን
ዓንዲ ኣል-ኢሕሳን፡ ንሱ ድማ ንኣላህ ልክዕ ከም እትርኦ ዘሎኻ ኮንካ ምምላኽ፡ ንስኻ እንተዘይረኣኻዮ ንሱ ይርእየካ ከምዘሎ ምእማን ማለት ኢዩ።
ሻድሻይ ትምህርቲ፡ ናይ ሰላት ቅድመ-ኩነት
ትሽዓተ ኢየን፡
ምስልምና፡ ጥዑይ ኣእምሮ፡ (ተምይዝ) ንእሽቶይ ቆልዓ ቁኑዕን ጌጋን ክፈላሊይ ምኽኣል፡ ሓደስ ምልዓል፡ ነጃሳ ምእላይ፡ ሕፍረትካ ምሽፋን፡ ግዜ ሰላት ምእታው፡ ናብ ቒብላ ምቕናዕ፡ ከምኡ'ውን ኒያ።
ሻዉዓይ ትምህርቲ፦ ዓንድታት ናይ ሰላት
ንሰን ድማ ዓሰርተ ኣርባዕተ ኢየን፦
ዓቕሚ እናሃለወካ ደው ምባል፣ ናይ መእተዊ ተክቢራ ምባል፣ ፋቲሓ ምቕራእ፣ ሩኩዕ ምግባር፣ ድሕሪ ሩኩዕ ቀጥ ደዉ ምባል፣ ብሸውዓተ ኣካላት ሱጁድ ምውራድ፣ ካብኡ ሓፍ ምባል፣ ኣብ መንጎ ክልተ ሱጁድ ኮፍ ምባል፣ ኣብ ኩሉ ተግባራት ህድእ ምባል፣ ኣብ መንጎ ኣርካናት ቕደም ተኸተል ምሕላው፣ ናይ መወዳእታ ተሸሁድ ምግባር፣ ንዕኡ ኮፍ ምባል፣ ንነቢ ﷺ ሰላዋት ምግባር፣ ከምኡ’ውን ክልተ ተስሊማ ምግባር።
ሻሙናይ ትምህርቲ፡ ኣብ ሳላት ግዴታ ዝኾነ (ዋጂባታት)
ሸሞንተ ኢየን፡
ኩለን እተን ብዘይ ናይ መእተዊ ዘለዋ ተክቢራታት፡ ንኢማምን በይኑ ንዝሰግድን "ሰሚዓላሁ ሊመን ሓሚዳህ" ምባል፣ ንኹሉ "ረበና ወለከልሓምድ" ምባል፣ ኣብ ሩኩዕ "ሱብሓነ ረብየል ዓዚም" ምባል፣ ኣብ ሱጁድ "ሱብሓነ ረብየል ኣዕላ" ምባል፣ ኣብ መንጎ ክልተ ሱጁድ "ረቢ ኢቅፊርሊ" ምባል፣ ቀዳማይ ተሸሁድን ንዕኡ ኮፍ ምባልን።
ተሽዓይ ትምህርቲ፡- መግለጺ ኣ'ተሻሁድ
ንሱ ድማ ከም'ዚ ምባል እዩ፡
(ኣተሒያቱ ሊላሂ፡ ወሰለዋቱ ወጠዪባቱ፡ ኣሰላሙ ዓለይካ ኣዩሃነቢዩ ወራሕመቱላሂ ወበረካቱሁ፡ ኣሰላሙ ዓለይና ወዓላ ዒባዲላሂ ሳሊሒን፡ ኣሽሃዱ ኣላኢላሃ ኢለላህ፡ ወኣሽሃዱ ኣነ ሙሓመደን ዓብዱሁ ወረሱሉሁ)።
ድሕሪኡ ንነቢ ﷺ ሰለዋትን በረካን ይገብር፡ ከምዚ ድማ ይብል፥ (ኣላሁመ ሰሊ ዓላ ሙሓመዲን፡ ወዓላ ኣሊ ሙሓመዲን፡ ከማ ሰለይተ ዓላ ኢብራሂም ወዓላ ኣሊ ኢብራሂም፡ ኢነካ ሓሚዱን መጂድ፡ ወባሪክ ዓላ ሙሓመዲን፡ ወዓላ ኣሊ ሙሓመዲን፡ ከማ ባረክተ ዓላ ኢብራሂም፡ ወዓላ ኣሊ ኢብራሂም፡ ኢነካ ሓሚዱን መጂድ)።
ብድሕሪኡ ኣብ ናይ መወዳእታ ተሸሁድ ካብ መቕጻዕቲ ገሃነም፡ ካብ መቕጻዕቲ ቀብሪ፡ ካብ ፈተና ህይወትን ሞትን፡ ከምኡ'ዉን ካብ ፈተና ''መሲሕ ኣ'ደጃል'' ብኣላህ ክሕሎ ይምሕጸን። ብድሕሪኡ ካብ ዱዓ ዝደለዮ ይመርጽ፡ ብፍላይ ድማ ኣብ ሱና ዝመጸ፡ ካብኡ ድማ፦
(«ኣላሁመ ኣዒኒ ዓላ ዚክሪከ ወሹክሪከ ወሑስኒ ዒባደቲከ፣ ኣላሁመ ኢኒ ዘለምቱ ነፍሲ ዙልመን ከሲረን፣ ወላ የቕፊሩዙኑበ ኢላ ኣንተ፣ ፈቕፊር ሊ መቕፊረተን ሚን ዒንዲከ፣ ወርሓምኒ ኢነከ ኣንተል ቐፉሩ ረሒም» (ኦ ኣላህ፣ ንምዝካርካን ንምምስጋንካን ኣምልኾኻ ብጽቡቕ ንምፍጻምን ሓግዘኒ። ኦ ኣላህ፣ ኣነ ንነብሰይ ብዙሕ በዲለያ ኣለኹ፣ ብዘይካኻ ሓጢኣት ዝምሕር የለን እሞ፡ ካባኻ ብዝኾነ ምሕረት መሓረኒ፣ ራህራሃለይ ውን፡ ብርግጽ ንስኻ መሓርን ርህሩህን ኢኻ)።
ኣብ'ቲ ናይ መጀመርያ ኣተሻሁድ ግና፡ ነተን ሸሃደተይን ምስ በለ ኣብ ሰላት ኣ'ዙህርን፡ ኣልዓስርን፡ ኣልመቕሪብን፡ ኣልዒሻን ናብ ሳልሰይቲ ይትስእ። ኣብ ልዕሊ ነቢ ﷺ ሰለዋት እንተኣውረደ ግና ዝበለጸ እዩ፤ እዚ ድማ ብመሰረት እቶም ኣብዚ ጉዳይ ዝመጹ ሓፈሻዊ ኣሓዲስ እዩ፡ ብድሕሪኡ ናብ ሳልሰይቲ ይትስእ።
ዓስራይ ትምህርቲ፡ ናይ ሰላት (ሱናታት) ፍቱ ዝኾነ
ካብኣተን ድማ፡
1- ኣልኢስቲፍታሕ (ናይ ሰላት መኽፈቲ ዱዓ ምግባር)።
2- ቅድሚ ሩኩዕን ድሕሪኡን ኣብ ዝግበር ደዉ ምባል፡ ግምቦ ኢድ የማነይቲ ኣብ ልዕሊ ጸጋም ኢድ ብምግባር ኣብ ልዕሊ ኣፍ ልቢ ምሓዝ።
3- ኣብታ ቀዳመይቲ ተክቢራ ኣብ ዝግበር እዋን፣ ከምኡ'ውን ሩኩዕ ኣብ ንገብረሉን፣ ካብኡ ሓፍ ክብል ከሎን፣ ካብ ቀዳማይ ተሸሁድ ናብ ሳልሰይቲ ደዉ ኣብ ዝብል እዋን፡ ክልተ ኣእዳው ኣጻብዕትን ዝተኣከባን ዝተዘርገሓን ኮይኑ ናብ ማዕረ ክልተ ሞንኮብ ወይ ክልተ ኣእዛን ምልዓል።
4- ኣብ ናይ ሩኩዕን ሱጁድን ተስቢሕ ካብ ሓንቲ ንላዕሊ ምዉሳኽ።
5- ካብ ሩኩዕ ድሕሪ ምትሳእ "(ረበና ወለከል ሓምድ)" ካብ ምባል ዝወሰኸ፣ ከምኡ'ውን ኣብ መንጎ ክልተ ሱጁዳት ኣብ ናይ ምሕረት ዱዓ ካብ ሓንቲ ዝወሰኸ።
6- ኣብ ግዜ ሩኩዕ ርእስኻን ሑቐኻን ማዕረ ምግባር
7- ኣብ ሱጁድ፡ ክልተ ቀላጽም ካብ ጎኒ ኣፍልብኻ፣ ከብዲ ካብ ክልተ ስለፋት፣ ከምኡ'ውን ክልተ ስለፋት ካብ ክልተ ዳንጋ ምፍላይ።
8- ኣብ ግዜ ሱጁድ ክልተ ኣእዳዉካ ካብ መሬት ምልዓል።
9- ሰጋዳይ ኣብ ቀዳማይ ኣተሓያቱን ኣብ ማእኸል ክልተ ስጁድን ጸጋማይ እግሩ ኣንጺፉ የማናይ እግሩ ተኺሉ ኮፍ ክብል።
10- ኣብ ናይ መወዳእታ ኣ'ተሻሁድ ናይ'ተን ሰላት በዓልቲ ኣርባዕተን ሰለስተን ረክዓ (ኣተወሩክ) ብመቐመጫኻ ኮፍ ምባል፣ እዚኻኣ፡ ብመቐመጫኡ ኮፍ ምባል፣ ጸጋማይ እግሩ ብትሕቲ የማን እግሩ ምግባር፣ የማናይ እግሩ ምትካል ምባል እዩ።
11- ኣብ ቀዳማይን ካልኣይን ኣታሓያቱ ካብቲ ኮፍ ዝበለሉ ጀሚሩ ክሳብ መወዳእታ ኣታሓያቱ በታ ኣመልካቲት ኣጻብዕቲ ሓፍ ኣቢልካ ምምልካት፣ ኣብ እዋን ዱዓ ድማ ምንቅስቓሳ።
12- ኣብ ቀዳማይ ተሸሁድ ኣብ ልዕሊ ሙሓመድን ስድራ ሙሓመድን፡ ከምኡ 'ውን ኣብ ልዕሊ ኢብራሂምን ስድራ ኢብራሂምን (ሰላት) ዱዓ ምወራድን በረከት ምልማንን።
13- ኣብ ናይ መወዳእታ ተሸሁድ ዱዓ ምግባር።
14- ኣብ ሰላት ኣልፈጅር፣ ሰላት ኣልጁምዓ፣ ሰላት ክልቲኡ ኣልዒድን፣ ሰላት ኣልኢስቲስቃእን፣ ከምኡ'ውን ኣብተን ቀዳሞት ክልተ ረክዓ ናይ ሰላት ኣልመቅሪብን ኣልዒሻእን ድምጺ ዓው ኢልካ ምቅራእ።
15- ኣብ ዙህርን ዓስርን፣ ኣብታ ሳልሰይቲ ናይ መቕሪብን ኣብተን ዳሕረዎት ክልተ ናይ ኣልዒሻን ድምጺ ኣትሕት ኣቢልካ ምቕራእ።
16- ካብ ፋቲሓ ዝወሰኸ ቑርኣን ምቕራእ፡ ብዘይካ እቶም ዝጠቐስናዮም ዝተረፉ ኣብ ሰላት ዝመጹ ሱናታት እናሓለወ፤ ካብኣቶም ከኣ፡ ንኢማም፡ ንመእሙምን ንበይኑ ንዝሰግድን ካብ ሩኩዕ ሓፍ ድሕሪ ምባል እቲ ሰጋዲ ካብ ዝብሎ «ረበና ወለከል ሓምድ» ንላዕሊ ምዉሳኽ ሱና እዩ፤ ከምኡ ውን ካብዚ፡ ኣብ ሩኩዕ ክልተ ኣእዳዉ ኣጻብዕቲ ዝተበታተና ኮይነን ኣብ ልዕሊ ክልተ ኣብራኹ ምቕማጥ።
መበል ዓሰርተ ሓደ ትምህርቲ፡ ንሰላት ዘበላሽዉ ነገራት
ሸሞንተ ኢየን፡-
1- እናዘከርካን እናፈለጥካን ኮነ ኢልካ ዝግበር ዘረባ፣ እቲ ዝረሰዐን ዘይፈልጥን ግና ስግዳኑ በዚ ኣይበላሾን እዩ።
2- ምስሓቕ።
3- ምብላዕ።
4- ምስታይ።
5- ሕፍረት ነብሲ ምቅላዕ።
6- ካብ ቒብላ ኣጸቢቕካ ምዝንባል።
7- ኣብ ሰላት ቡዙሕን ዝተኸታተለን ዘይጠቅም ምንቅስቓስ ምፍጻም።
8- ውዱእ ምፍታሕ።
መበል ዓሰርተ ክልተ ትምህርቲ፡- ቅድመ-ኩነት ናይ ዉዱእ
ንሰን ዓሰርተ ኢየን፡-
ምስልምና፣ ዓቕሊ፣ (ተምዪዝ) ቆልዓ ቁኑዕን ጌጋን ክፈሊ ምኽኣል፣ (ኒያ) ድልየት ልብን፣ ሕጊ ኒያ ምቕጻል ውዱእ ክሳብ ዝፍጸም ነቲ ናይ ውዱእ ኒያ ምቁራጽ ክህሉ የብሉን፣ ውዱእ ዘውጅብ(ዘገድድ) ነገር ምቁራጽ፣ ቅድሚኡ ኢስቲንጃ ወይ ኢስቲጅማር ምግባር፣ ናይቲ ማይ ጽሬትን ፍቑድ ምዃኑን፣ ማይ ናብ ቆርበት ከይበጽሕ ዝኽልክል ነገር ምእላይ፣ ከምኡ'ውን ነቲ ቀጻሊ ሓደስ ዘለዎ ሰብ ናይ ሰላት ግዜ ምእታው።
ዓሰርተ ሰለስተ ትምህርቲ፡- ግዴታታት ኣብ ውዱእ
ሹዱሽተ ኢየን፡-
ገጽ ምሕጻብ፡ ኣፍ ምጉጽጋጽ ኣፍንጫ ማይ ኣእቲኻ ምሕጻብ ዉን ኣብ ገጽ ይኣቱ እዩ፣ ክልተ ኣእዳው ምስ ብርኪ ኢድ ምሕጻብ፣ ንኹሉ ርእሲ ምድራዝ፡ ክልተ ኣእዛን ዉን ኣብኡ ይኣቱ፣ ክልተ ኣእጋር ምስ ዓንካር ዓንካሪት ምሕጻብ፣ እዘን ዝተዘከራ ብ መስርዕ(ተርቲብ) ምስራሕን፡ ከየቋረጽካ ምግባርን። ምሕጻብ ገጽ፡ ኣእዳዉን ኣእጋርን፡ ከምኡ'ውን መድመዳን ኢስቲንሻቕን ምግባር ሰለስተ ግዜ ምድጋም ዝተፈተወ ኢዩ። ካብዚ እቲ ፈርዲ ዝኾነ ሓደ ግዜ ጥራይ ኢዩ። ርእሲ ምድራዝ ግን፡ ከምቲ ሰሒሕ ሓዲሳት ዘመላኽቶ፡ ምድጋሙ ዝተፈተወ ኣይኮነን።
መበል ዓሰርተ ኣርባዕተ ትምህርቲ፡- ውዱእ ዘፍርሱ ነገራት
ሹዱሽተ ኢየን፡-
ካብ ክልተ ቦታታት መዉጽኢ ርስሓት ዝወጽእ፡ ካብ ሰብነት ዝወጽእ ብዙሕ ርስሓት (ነጃሳ)፡ ብድቃስ ወይ ብኻልእ ኣእምሮኻ ምስሓት፡ ብዘይ መከላኸሊ ንሕፍረት (ቅድሚት ይኹን ድሕሪት) ብግንቦ ኢድ ምትንካፍ፡ ስጋ ገመል ምብላዕ፡ ከምኡ'ዉን ካብ እስልምና ምዉጻእ ኣላህ ንዓናን ንሙስሊሚንን ካብ'ዚ የድሕነና።
ኣገዳሲ ሓበሬታ፦ ሙውት ምሕጻብ ብዝምልከት፡ እቲ ቅኑዕ ርእይቶ ውዱእ ኣየፍርስን እዩ፣ ነዚ ዝድግፍ መረጋገጺ (ደሊል) ስለዘየለ ድማ እዚ ናይ መብዛሕቶም ኣህሉል ዒልሚ (ሰብ ፍልጠት) ርእይቶ እዩ። እንተኾነ ግና ኢድ ናይቲ ሓጻቢ ብዘይ ዝኾነ መከላኸሊ (ሽፋን) ንሕፍረቱ ናይቲ ሙውት እንተተንኪፋ፡ ውዱእ ክገብር ግዴታ ይኸውን።
ግዴታ ዝኾኖ ድማ ሕፍረቱ ናይቲ ሙውት ብመሸፈኒ ኣቢሉ እንተዘይኮይኑ ክትንክፍ ኩልኩል ኢዩ። ከምኡ'ዉን ንጓል ኣንስተይቲ ምትንኻፍ ዉዱእ ብፍጹም ኣየፍርስን ኢዩ፡ እዚ ብስምዒት ይኹን ወይ ብዘይ ስምዒት፡ ካብኡ ዝኾነ ነገር ክሳብ ዘይወጸ ኣብቲ ዝያዳ ቅኑዕ ዝኾነ ካብ ክልተ ርእይቶታት ናይ ፈላጣት ዑለማእ። ምኽንያቱ ነቢ ﷺ ንገሊአን ኣንስቶም ስዒሞም ድሕሪኡ ሰጊዶም፡ ዉዱእ ድማ ኣይገበሩን።
ብዛዕባ'ቲ ኣብተን ክልተ ዓንቀጻት ናይ ሱረት ኣ'ኒሳእን ኣልማኢዳን ዘሎ ቃል ናይ ኣላህ፡ ﴾...ወይ ኣንስቲ እንተ ተንኪፍኩም...﴿ [ኣ'ኒሳእ፡ 43] [ኣል-ማኢዳ: 6]፣ እቲ ዝድለ ቱርጉሙ ድማ፥ ስጋዊ ርክብ እዩ፡ ብመሰረት እቲ ዝያዳ ቅኑዕ ዝኾነ ካብ ክልተ ኣበሃህላታት ናይ ዑለማእ፡ ንሱ ድማ ኣበሃህላ ኢብኑ ዓባስ ኣላህ ይፍተወሎም፡ ሓደ ጉጅለ ካብቶም ቀዳሞትን ዳሕረዎትን እዩ። ኣላህ ድማ፡ ምንጪ ኩሉ ዓወት ኢዩ።
መበል ዓሰርተ ሓሙሽተ ትምህርቲ፡ ነፍሲ ወከፍ ሙስሊም ክላበሶ ዝግባእ ሕጋዊ ስነ-ምግባር
ካብኣተን ከኣ ፦ ሓቅነት፡ ተኣማኒነት፡ ጽፈት፡ ሓያእ[ሕፍረት]፡ ትብዓት፡ ልግሲ፡ ኣብ ቃልካ ምጽናዕ፡ ካብ ኩሉ ረቢ ክልኩል ዝገበሮ ነገራት ርሑቕ ምዃን፡ ሰናይ ጉርብትና፡ ዓቕሚ ብዝፈቕዶ ንጹጉማት ምሕጋዝን፡ ከምኡ'ውን ካልእ እቲ ቁርኣንን ሱናን ብሕጋውነቱ ዘመላኽቶ ጹቡቅ ስነ ምግባራት ይርከብዎም።
መበል ዓሰርተ ሹድሽተ ትምህርቲ፡- እስላማዊ ስርዓት ምሕላው
ካብኣተን ድማ፡ ሰላምታ ምሃብ፡ ፍሽኽታ ምርኣይ፡ ብየማን ምብላዕን ምስታይን፡ ኣብ መጀመርታ ስም ኣላህ ምዝካር፡ ምስ ወዳእካ ንኣላህ ምምስጋን፡ ድሕሪ ምህጣስ ንኣላህ ምምስጋን፡ እቲ ዝሃጠሰ ንኣላህ ምስ ኣመስገነ ዱዓ ክግበረሉ፡ ሕሙም ምብጻሕ፡ ጀናዛ ንምስጋድን ምቅባርን ምስዓብ፡ ናብ መስጊድ ወይ ገዛ ኣብ እትኣትወሉን እትወጸሉን እዋን ዝግበሩ ናይ ሸሪዓ ስርዓታት፡ ኣብ እዋን ጉዕዞ፡ ምስ ወለዲ፡ ኣዝማድ፡ ጎረባብቲ፡ ዓበይትን ነኣሽቱን ዝህልወካ ስነስርዓት፡ ንዝተወልደ ህጻን እንቋዕ ሓጎሰኩም ምባል፡ ኣብ መርዓ ናይ በረካ ዱዓ ምግባር፡ ኣብ እዋን ሓዘን ምጽንናዕ፡ ከምኡ’ውን ኣብ ምኽዳንን ምውጻእን ክዳወንትን ጫማን ዝግበሩ ካልኦት እስላማዊ ስርዓታት እዮም።
መበል ዓሰርተ ሸውዓተ ትምህርቲ፡- ካብ ሽርክን ዓይነታት ሓጢኣትን ምጥንቃቕ
ካብኡ ድማ፡ እተን ሸውዓተ ዘጥፍኣ (መህለኽቲ) ሓጢኣታት፡ ንሳተን ድማ፡- ብኣላህ ሽርኪ ምግባር፣ ስሕሪ፣ ኣላህ ሓራም ዝገበራ ነፍሲ ብዘይ ሓቂ ምቕታል፣ ሓረጣ ምብላዕ፣ ገንዘብ ዘኽታም ምብላዕ፣ ኣብ መዓልቲ ኲናት ንድሕሪት ምምላስ (ምህዳም)፣ ከምኡ'ውን ንጹሃት ሓሳብ እከይ ዘይብለን ኣመንቲ ዝኾና ደቂ ኣንስትዮ ብዝሙት ምኽሳስ እዮም።
ካብኣተን ድማ፡ ንወለዲ ምእዙዝ ዘይሙዃን፡ ዝምድና ምቑራጽ፡ ናይ ሓሶት ምስክርነት ምሃብ፡ ናይ ሓሶት መሓላ፡ ንጎረቤትካ ምብዳል፡ ንሰባት ኣብ ደሞምን፡ ገንዘቦምን ክብሮምን ምብዳል፡ ዘስክር ነገር ምስታይ፡ ቁማር [መይሲር] ምጽዋት፡ ሕሜታ፡ ወረ ምብጽጻሕ ምእንቲ ቅርሕንትን ጽልእን ምፍጣር [ነሚማ]፡ ከምኡ'ውን ካልእ ልዑል ኣላህ ወይ ልኡኹ ﷺ ዝኸልከልዎ ነገራት ይርከብዎም።
መበል ዓሰርተ ሸሞንተ ትምህርቲ፡- ምድላው ንምውት፡ ኣብ ልዕሊኡ ሰላት(ሰላት ኣልጀናዛ) ምስጋድን ምቕባርን
ናይ'ዚ ዝርዝር ድማ:-
ቀዳማይ፦ ነቲ ክመዉት ዝቐርብ ዘሎ ሰብ፡ (ላኢላሃ ኢለላህ) ክብል ምዝኽኻር ፍቁድ 'ዩ፤ ነቢ ﷺ ከም'ዚ ስለ ዝበሉ፦ «ነቶም ክሞቱ ዝቐረቡ ሰባትኩም፡ "ላኢላሃ ኢለላህ" ክብሉ ኣዘኻኽርዎም»[7]። ኢማም ሙስሊም ኣብ መጽሓፎም ኣውሪዮሞ፣ ኣብዚ ሓዲስ ምዉታት ማለት፦ እቶም ኣብ ኣፋፍ ሞት ዘለዉ ኢዮም፡ ንሳቶም ድማ ምልክታት ሞት ዝተራእየሎም ኢዮም። [7] ሙስሊም ብቑጽሪ (916-917) ሰኒድዎ።
ካልኣይ፡ ሞቱ ምስ ተረጋገጸ ኣዒንቱ ይዕመት፣ መንከሱ ይእሰር፣ እዚ ኸኣ ብሱና ስለ ዝተረጋገጸ ኢዩ።
ሳልሳይ፡ ዝሞተ ኣስላማይ ምሕጻብ ግዴታ ኢዩ፡ ኣብ ኲናት ዝሞተ ሸሂድ እንተዘይኮይኑ። ንሱ ኣይሕጸብን ሰላት ኣልጀናዛ'ውን ኣይስገደሉን ኢዩ፡ የግዳስ ብኽዳኑ ኢዩ ዝቕበር፣ ምኽንያቱ ነቢ ﷺ ነቶም ኣብ ኡሑድ ዝተቐትሉ ኣይሓጸብዎምን፡ ኣይሰገዱሎምን ስለዝኾኑ።
ሕፍረቱ ክሽፈን፡ ቀጺሉ ቁሩብ ኣልዕል ኣቢልካ ከብዱ ቀስ ኢልካ ይጽቀጥ፡ ድሕሪኡ እቲ ሓጻቢ ኣብ ኢዱ ጨርቂ ወይ ከምኡ ዝኣመሰለ ብምጥምጣም ነቲ ርስሓት የጽርዮ። ቀጺሉ ከምቲ ናይ ስግዳን ውዱእ፡ ውዱእ የግብሮ። ድሕሪኡ ርእሱን ጭሕሙን ብማይን ብሲድርን(ቆጽሊ ጋባ) ወይ ከምኡ ዝኣመሰለን ይሓጽቦ። ቀጺሉ የማናይ ሸነኹ፡ ድሕሪኡ ድማ ጸጋማይ ሸነኹ ይሓጽቦ። ብተመሳሳሊ ካልኣይን ሳልሳይን ግዜ ይሓጽቦ፡ ኣብ ነፍሲ ወከፍ ግዜ ድማ ኢዱ ብከብዱ የሕልፍ። ካብኡ ዝወጸ ነገር እንተልዩ ይሓጽቦ፡ ነቲ ዝወጸሉ ቦታ ድማ ብጡጥ ወይ ከምኡ ዝኣመሰለ ይዓብሶ። በዚ እንተዘይተታሒዙ ድማ ብጽሩይ ጭቃ፡ ወይ ብዘመናዊ ሕክምናዊ መሳርሒታት ከም ፕላስተርን ከምኡ ዝኣመሰለን ይዓብሶ።
ራብዓይ፡ ኣገባብ ምዉት ምሕጻብ፡-
ውዱእ ይደግመሉ፡ ብሰለስተ ግዜ ሕጻብ እንተዘይጸርዩ፡ ናብ ሓሙሽተ፡ ወይ ድማ ናብ ሸውዓተ ግዜ ይውሰኾ። ድሕሪኡ ብጨርቂ የንቅጾ፡ ኣብ መዕጸፊ ኣካላቱን ቦታታት ስግዳኑን ድማ ሽቶ ይገብረሉ፡ ንብምሉእ ኣካላቱ ሽቶ እንተገርሉ ድማ ጽቡቕ ኢዩ። ነቲ ከፈን ድማ ብዕጣን (ቡኹር) የዕጥኖ። ላዕለዋይ ናይ ከንፈር ጭሕሚ ወይ ጽፍሩ ነዊሕ እንተኾይኑ የሕጽረሉ (ይቐንሰሉ)፡ እዚ እንተገደፎ 'ውን ጸገም የብሉን። ጸጉሩ ኣይምሽጠሉን፡ ጸጉሪ ሕፍረቱ ኣይላጽዮን፡ ከምኡ'ውን ኣይኽንሽብን፤ ምኽንያቱ ነዚ ዝሕብር መርትዖ (ደሊል) ስለ ዘየለ። ጓል ኣንስተይቲ እንተኾይና ድማ፡- ጸጉራ ሰለስተ ቁኖ ተቆኒና ናብ ድሕሪኣ ይድርበ።
ሓሙሻይ፦ ምዉት ምክዳን
ወዲ ተባዕታይ ቀሚሽ ይኹን ዒማማ ዘይኮነ ብሰለስተ ጻዕዳ ጨርቂ ክሽፈን ዝበለጸ ይኸዉን፤ ከምቲ ንነቢ ﷺ ዝተገብረሎም ኣብኡ ኣጸቢቑ ይጥቕለል። እንተኾነ ግን ብቀሚሽ፡ ኢዛርን መሸፈኒ(ሊፋፋ)ን እንተተከፊኑ ጸገም የብሉን።
ጓል ኣንስተይቲ ድማ ብሓሙሽተ ኣጭርቅቲ ትሽፈን)፥ ድርዕ(ቀሚስ)፡ ጸጉሪ ድሽፍን(ኺማር)፡ ታሕተዋ ኣካል ድሽፍን (ኢዛርን)፡ ክልተ ሊፋፋ(መጠቕለሊ ጨርቂ)ን። ንእሽቶ ወዲ ተባዕታይ ድማ ካብ ሓደ ክሳብ ሰለስተ ኣጭርቅቲ ይሽፈን፡ ንእሽቶ ጓል ኣንስተይቲ ድማ ብቀሚስን ክልተ ኣጭርቅቲን ትኽፈን።
ንኹሎም ዝምልከት ግዴታ፥ ንኹሉ ነብሲ ናይቲ ዝሞተ ዝሰትር (ዝሽፍን) ሓደ ክዳን እዩ። እንተኾነ ግን እቲ ዝሞተ ኣብ እዋን ኢሕራም ዝነበረ (ሙሕሪም) እንተኾይኑ፡ ብማይን ብስድርን ይሕጸብ፣ ኣብ ኢዛሩን ሪዳኡን ወይ ብካልእ ይኽፈን (ብጨርቂ ይሽፈን)፣ግና ርእሱን ገጹን ኣይሽፈንን፡ ከምኡ'ውን ሽቶ(ጬና) ኣይግበረሉን፤ ምኽንያቱ ከምቲ ካብ ልኡኽ ኣላህ ﷺ ብቕኑዕ ሓዲስ ዝተረጋገጸ፡ኣብ ማዓልቲ ቂያማ ታልቢያ እናበለ ስለ ዝትስእ። እታ ኣብ ኢሕራም ዝነበረት (ሙሕሪም) ጓል ኣንስተይቲ እንተኾይና ድማ፥ ከም ካልኦት ትክፈን፣ እንተኾነ ግን ሽቶ ኣይግበረላን፡ ገጻ ብኒቃብ ኣይሽፈንን፡ ኢዳ ድማ ብጓንቲ ኣይሽፈንን። እንተኾነ ግን ልክዕ ከምቲ ኣቐዲሙ ኣብ ኣገባብ ኣከፋፍና ጓል ኣንስተይቲ ዝተገልጸ፡ ገጻን ኢዳን በቲ ዝተከፈነትሉ ከፈን (ጨርቂ) ይሽፈን።
ሻድሻይ፡ ንምሕጻቡ፣ ሳላት ኣልጀናዛ ንምግባርን ንምቕባሩን ዝያዳ መሰል ዘለዎም ሰባት
ኣብዚ ጉዳይ እዚ ዝተላወቦ፡ ቀጺሉ ኣቦ፡ ቀጺሉ ኣባሓጎ፡ ቀጺሉ ድማ ካብቶም ብወገን ሰብኣይ ዝኾኑ ናይ ስጋ ዘመድ እቲ ዝያዳ ቀረባ ዝኾነ።
ንጓል ኣንስተይቲ ንምሕጻብ ዝያዳ ቀዳምነት ዝወሃባ፦ እታ ለበዋ ዙተዋሃበት፡ ብድሕሪኡ ኣዲኣ፡ ብድሕሪኡ ዓባያ፡ ብድሕሪኡ ኸኣ ካብ ደቀኣንስትዮ ቤተሰባ በብደረጃ ቀረባ ዝኾና እየን። ንሰብ ሓዳር ኸኣ ሓዲኦም ነቲ ሓደ ክሓጽቦ ይፍቀድ እዩ፤ ምኽንያቱ ኣቡበከር ኣ'ሲዲቕ -ረድየላሁ ዓንሁ-በዓልቲ ቤቱ ስለ ዝሓጸበቶ፡ ከምኡ'ዉን ዓሊ -ረድየላሁ ዓንሁ- ንበዓልቲ ቤቱ ፋጢማ-ረድየላሁ ዓንሃ-ስለ ዝሓጸባ።
ሻዉዓይ፦ ናይ ሰላት ኣል ጀናዛ ኣገባብ፡
ኣርባዕተ ተክቢራታት ይገብር፡ ድሕሪ'ታ ቀዳመይቲ ድማ ኣልፋቲሓ ይቐርእ፡ ምስኣ ሓጻር ሱራ ወይ ሓንቲ ኣያ ወይ ክልተ ኣያታት እንተቐረአ'ውን ጽቡቕ እዩ፤ ብዛዕባ እዚ ካብ ኢብኑ ዓባስ -ረደየላሁ ዓንሁማ- ዝመጸ ሰሒሕ ሓዲስ ስለ ዘሎ፡ ብድሕሪኡ ካልአይቲ ተክቢራ ይገብር፡ ከምቲ ኣብ ተሸሁድ ዝገብሮ ድማ ንነቢ ሰለላሁ ዓለይሂ ወሰለም ሰላዋት ይገብር፡ ብድሕሪኡ ሳልሰይቲ ተክቢራ ይገብር፡ ከምዚ ድማ ይብል፡ (ኣላሁመ ቕፊር ሊሓዪና ወመዪቲና፡ ወሻሂዲና ወቓኢቢና፡ ወሰቒሪና ወከቢሪና፡ ወዘከሪና ወኡንሳና፡ ኣላሁመ መን ኣሕየይተሁ ሚና ፈኣሕዪሂ ዓለል ኢስላም፡ ወመን ተወፈይተሁ ሚና ፈተወፈሁ ዓለል ኢማን፡ ኣላሁመ ቕፊር ለሁ፡ ወርሓምሁ፡ ወዓፊሂ፡ ወዕፉ ዓንሁ፡ ወኣክሪም ኑዙለሁ፡ ወወሲዕ ሙድኸለሁ፡ ወቕሲልሁ ቢልማኢ ወሰልጂ ወልበረድ፡ ወነቂሂ ሚነል ኸጣያ ከማ ዩነቃ ሰዉቡል ኣብየዱ ሚነ'ደነስ፡ ወኣብዲልሁ ዳረን ኸይረን ሚን ዳሪሂ፡ ወኣህለን ኸይረን ሚን ኣህሊሂ፡ ወኣድኺልሁ ኣልጀነተ፡ ወኣዒዝሁ ሚን ዓዛቢል ቐብር፡ ወዓዛቢናር፡ ወፍሳሕ ለሁ ፊ ቐብሪሂ፡ ወነዊር ለሁ ፊሂ፡ ኣላሁመ ላ ተሕሪምና ኣጅረሁ ወላ ቱዲ'ለና ባዕደሁ)፡ ብድሕሪኡ ራብዓይቲ ተክቢራ ገይሩ፡ ሓደ ግዜ ናብ የማኑ ሰላምታ ይገብር።
ምስ ነፍሲ ወከፍ ተክቢራ ክልተ ኣእዳው ምልዓል ዝተፈተወ እዩ። እታ ዝሞተት ጓል ኣንስተይቲ እንተኾይና፡ (ኣላሁመ ቕፊር ለሃ ...) ወዘተ ይበሃል። እቶም ጀናዛ ክልተ እንተኾይኖም ድማ፡ (ኣላሁመ ቕፊር ለሁማ ...) ወዘተ ይበሃል። ጀናዛታት ካብኡ ዝበዝሑ እንተኾይኖም ድማ ብናይ ብዙሕ ኣጸዋውዓ፡ (ኣላሁመ ቕፊር ለሁም ...) ወዘተ ይበሃል። እቲ ዝሞተ ህጻን (ፈረጥ) እንተኾይኑ ግና፡ ኣብ ክንዲ ናይ ምሕረት ዱዓ ዝግበረሉ ከምዚ ይበሃል፡ (ኣላሁመ ጅዓልሁ ፈረጠን ወዙኽረን ሊዋሊደይሂ፡ ወሸፊዓን ሙጃበን፡ ኣላሁመ ሰቒል ቢሂ መዋዚነሁማ፡ ወኣዕዚም ቢሂ ኡጁረሁማ፡ ወኣልሒቕሁ ቢሳሊሒ ሰለፊል ሙእሚኒን፡ ወጅዓልሁ ፊ ከፋለቲ ኢብራሂመ ዓለይሂ ኣሰላቱ ወሰላም፡ ወቒሂ ቢረሕመቲከ ዓዛበል ጀሒም)።
እቲ ሱና:- ኢማም ኣብ መንጽር ርእሲ ናይ ወዲ ተባዕታይ፡ ናይ ጓል ኣንስተይቲ ድማ ኣብ ማእከላ ደዉ ምባል። ጀናዛታት ኣብ ዝእከበሉ እዋን ድማ፡ ወዲ ተባዕታይ ብሸነኽ ኢማም፡ ጓል ኣንስተይቲ ድማ ብሸነኽ ቂበላ ይኾኑ። ቆልዑት ምሳኣቶም እንተሃልዮም ድማ፡ ወዲ ተባዕታይ ቆልዓ ቅድሚ ጓል ኣንስተይቲ ይቐርብ፡ ቀጺሉ ጓል ኣንስተይቲ፡ ቀጺሉ ድማ ጓል ኣንስተይቲ ቆልዓ ይኾና። ርእሲ ናይቲ ወዲ ተባዕታይ ቆልዓ ኣብ መንጽር ርእሲ ናይቲ ወዲ ተባዕታይ ይኸውን፡ ማእከል ናይ ጓል ኣንስተይቲ ድማ ኣብ መንጽር ርእሲ ናይቲ ወዲ ተባዕታይ ይኸውን። ከምኡ'ዉን ጓል ኣንስተይቲ ቆልዓ ርእሳ ኣብ መንጽር ርእሲ ናይ ጓል ኣንስተይቲ ይኸውን፡ ማእከላ ድማ ኣብ መንጽር ርእሲ ናይ ወዲ ተባዕታይ ይኸውን። ኩሎም ሰገድቲ ድማ ብድሕሪ ኢማም ደዉ ይብሉ፡ እንተኾነ ግን ሓደ ሰብ ብድሕሪ ኢማም ቦታ እንተዘይረኺቡ ብየማኑ ደዉ ይብል።
ሻምናይ፦ ኣገባብ ናይ ምቕባር ምውት
እቲ ፍቁድ ተግባር፡ ነቲ ቐብሪ ክሳብ ፍርቂ ናይ ሓደ ሰብ ምዕማቝን፡ ኣብ ውሽጡ ድማ ብሸነኽ ቂበላ ላሕዲ ክህሉ ምግባርን ኮይኑ፡ እቲ ምውት ከኣ ኣብቲ ላሕዲ ብየማናይ ጎኑ ይቕመጥ። መእሰሪ ናይቲ ከፈን ይፍታሕ፡ ኣይእለን እዩ የግዳስ ኣብኡ ይሕደግ፡ እቲ ምውት ወዲ ተባዕታይ ኮነ ጓል ኣንስተይቲ ብዘየገድስ ገጹ ኣይቅላዕን እዩ። ቀጺሉ ሓመድ ምእንቲ ክከላኸለሉን ክጸንዕን ብጡብ (ናይ ጭቃ ጡብ) ይዕጸውን ብጭቃ ይልበጥን። ጡብ እንተዘይተረኺቡ ግና፡ ሓመድ ካብ ምእታው ዝከላኸል ካልእ ከም ጣውላ፡ ወይ እምኒ፡ ወይ ዕንጨይቲ ይግበር። ድሕሪኡ ሓመድ ይምለሶ። ኣብዚ እዋን'ዚ ከኣ፡ (ቢስሚላሂ፡ ወዓላ ሚለቲ ረሱሊላህ) ምባል ዝምረጽ እዩ። እቲ ቐብሪ ድማ ክንዲ ሓደ ስድሪ ዝኣክል ልዕል ይብል፡ እንተተኻኢሉ ኸኣ ኣብ ልዕሊኡ ጸጸር ይንጸፈሉ፡ ማይ ውን ይንጸገሉ።
ነቶም ኣሰነይቲ ኣብ ጥቓ እቲ ቐብሪ ደው ኢሎም ነቲ ምውት ዱዓ ክገብሩሉ ይግባእ፤ ምኽንያቱ ነቢ ﷺ ነቲ ምውት ቀቢሮም ምስ ወድኡ ኣብኡ ደው ብምባል ከምዚ ይብሉ ነይሮም፡ «ንሓውኹም ምሕረት ለምንሉ፡ ጽንዓት 'ውን ለምንሉ፡ ምኽንያቱ ንሱ ሕጂ ይሕተት ኣሎ»[8]። [8] ኣቡ ዳውድ ብቑጽሪ (3221) ከምኡ'ዉን ኣል-ሓኪም (3/ 399) ሰኒዶሞ።
ታሽዓይ፡ ነቲ ኣብ ልዕሊኡ ዘይሰገደ ሰብ፡ ድሕሪ ምቅባር ኣብ ልዕሊኡ ክሰግድ ይፍቀድ እዩ፤
ምኽንያቱ ነቢ ﷺ ነዚ ፈጺሞሞ ኢዮም፡ እዚ ድማ ኣብ ውሽጢ ሓደ ወርሕን ትሕቲኡን ክኸውን ኣለዎ፡ እቲ ግዜ ካብኡ ንላዕሊ እንተደኣ ኮይኑ ግና ኣብ ልዕሊ መቓብር ሰላት ምግባር ኣይተፈቀደን፤ ምኽንያቱ ነቲ ምውት ካብ ዝቕበር ድሕሪ ሓደ ወርሒ ነቢ ﷺ ኣብ ልዕሊ መቓብር ሰጊዱ ዝብል ከም ዘይተመሓላለፈ ስለ ዝኾነ እዩ።
መበል ዓሰርተ፡ ንስድራ ናይቲ ዝሞተ ንሰባት መግቢ ከዳልዉ ኣይፍቀደሎምን ኢዩ፤ ከም'ቲ ክቡር ሰሓቢ ጀሪር ኢብን ዓብደላህ ኣልበጀሊ ረድየላሂ ዓንሁ ዝበሎ፥ «ናብ ስድራቤት ናይቲ ምውት ምእካብን፡ ድሕሪ ቀብሪ ምግቢ ምስራሕን፡ ካብ ኒያሓ (ዋይዋይታ) ንቘጽሮ ኔርና» [9] ኢማሙ ኣሕመድ ብሓሰን ሰነድ ኣዉሪዮሞ፣ [9] ኢብኑ ማጃህ ብቑጽሪ (1612)፡ ኢማም ኣሕመድ ድማ (2/ 204) ሰኒደሞ።
ንዓኣቶም ወይ ንኣጋይሾም ምግቢ ምስራሕ ግና ጸገም የብሉን፣ ዘመዶምን ጎረባብቶምን ድማ ምግቢ ክሰርሑሎም ሱና እዩ፣ ምኽንያቱ ነቢ ﷺ ጃዕፈር ቢን ኣቢ ጣሊብ ረድየላሁ ዓንሁ ኣብ ሻም ከምዝሞተ ዜና ምስ መጾም፡ ንስድራ ቤቶም ንስድራ ቤት ጃዕፈር ምግቢ ክሰርሑሎም ኣዚዞም፡ ከምዚ ድማ ኢሎም፡- «ብርግጽ ዘሻቕሎም ነገር መጺዎም ኣሎ»[10]። [10] ሙስሊም ጃናዛታት (976)፡ ኣ'ነሳኢ ጃናዛታት (2034)፡ ኣቡ ዳውድ ጃናዛታት (3234)፡ ኢብኑ ማጃህ ብዛዕባ ጃናዛታት ዝመጸ (1569)፡ ኣሕመድ (2/441)።
ስድራ ምዉት ንጎረባብቶም ወይ ንካልኦት፡ ካብ'ቲ ህያብ ዝተዋህቦም ምግቢ ንምብላዕ ክዕድሙ ጸገም የብሉን፤ ካብ ሸሪዓ ብንፈልጦ መሰረት ከኣ ንዕኡ ዝተወሰነ ግዜ የብሉን።
መበል ዓሰርተ ሓደ፡ ንጓል ኣንስተይቲ ኣብ ልዕሊ ምዉት ካብ ሰለስተ መዓልቲ ንላዕሊ ሓዘን ክትገብር ኣይፍቀደላን ኢዩ፡ ብዘይካ ኣብ ልዕሊ በዓል ቤታ።
ስለዚ ኣብ ልዕሊኡ ኣርባዕተ ወርሕን ዓሰርተ መዓልትን ሓዘን(ሒዳድ) ክትገብር ግዴታ ይኸውን፡ ጥንስቲ እንተኾይና ግን ጥንሳ ክሳብ እትወልድ ይኸውን፣ እዚ ድማ በዚ ጉዳይ ካብ ነ ﷺ ትኽክለኛ ሱና ስለዝተረጋገጸ ኢዩ።
ወዲ ተባዕታይ ግና፡ ንዝኾነ ካብ ቀረባ ቤተሰቡ ኮነ ንዝኾነ ካልእ ሰብ ሒዳድ(ሓዘን) ክገብር ኣይፍቀደሉን ኢዩ።
መበል ዓሰርተ ክልተ፡ ንደቂ ተባዕትዮ፡ ንዓኣቶም ዱዓ ንምግባር፡ ራሕማ ንምሕታት፡ ከምኡ'ውን ሞትን ድሕሪኡ ዘሎን ንምዝካር፡ ካብ ግዜ ናብ ግዜ ናብ ቀብሪ (ዝያራ) ምብጻሕ ብሸሪዓ ዝተሓገገ እዩ፤
ነቢና ﷺ ይብሉ: «ቀብርታት (ዝየሩ) ብጽሑ፣ ምኽንያቱ መጻኢት ዓለም (ኣኼራ) ተዘክረኩም እያ»[11] ሙስሊም ኣብ ሰሒሑ ሰኒድዎ። [11] ኢብኑ ማጃህ ብቑጽሪ (1569) ሰኒድዎ፡ ኣልኣልባኒ ድማ ሰሒሕ ኢልዎ።
ነቢ ﷺ ንብጾቶም መቓብራት ኣብ ዝበጽሑሉ እዋን ከም'ዚ ክብሉ ይምህርዎም ነይሮም፡ «ኣሰላሙ ዓለይኩም ኣህለ ዲያር ሚነል ሙእሚኒን ወልሙስሊሚን፡ ወኢና ኢንሻኣላህ ቢኩም ላሒቁን፡ ነስኣሉላህ ለና ወለኩሙል ዓፊያ፡ የርሓሙላህ ኣልሙተቀዲሚነ ሚና ወልሙስታእኺሪን» [12]። [12] ሙስሊም ብቑጽሪ (975) ሰኒድዎ።
ንደቂ ኣንስትዮ ዝምልከት ግን፡ ናይ ቀብርታት ዝያራ ኣይፍቀደለንን ኢዩ፤ ምኽንያቱ ረሱል ﷺ ነተን ቀብርታት ዝዝይራ ደቂ ኣንስትዮ ስለ ዝረገምወን፣ ከምኡ’ውን ካብ ዝያረአን ፊትናን ዋሕዲ ትዕግስትን ስለ ዝስጋእ ኢዩ። ከምኡ ድማ ጀናዛ ስዒበን ናብ መቓብር ክኸዳ ኣይፍቀደለንን ኢዩ፤ ምኽንያቱ ረሱል ﷺ ካብዚ ስለ ዝኸልከልወን። ሰላት ኣልጀናዛ ኣብ መስጊድ ወይ ኣብ ሙሰላ(ን መስገዲ ተባሂሉ ዝተፈለየ ቦታ) ብዝምልከት ግና፡ ንሳ ንኹሎም ደቂ ተባዕትዮን ደቂ ኣንስትዮን ዝተፈቀደት ኢያ።
እዚ እቲ ናይ መወዳእታ ምጥርናፉ ዝተኸኣለሉ'ዩ። ኣላህ ምውዳስን ሰላምን ኣብ ልዕሊ ነብይና ሙሓመድ ከምኡ'ውን ኣብ ስድሮኦምን ብጾቶምን የውርድ።
Related books
All books
ሓጺር መግለጺ ብዛዕባ ዓቂዳ እስልምና75 languagesሓጺር መግለጺ ብዛዕባ ዓቂዳ እስልምና
እዚ መጽሓፍ እዚ፡ ነቶም ብኣላህን፡ መላእኽቱን፡ መጻሕፍቱን፡ ልኡኻቱን፡ ናይ መወዳእታ መዓልትን፡ ጽሕፍቶን ምእማን ዘጠቓልሉ መሰረታት እምነት ይገልጽ፣ ከምኡ'ውን ሓደ ሙስሊም ክኣምነሎምን በቲ መሰረት ክሰርሓሎምን ዝግባእ መሰረታዊ መትከላት የቕርብ፣ እዚ ኸኣ ንናይ እስልምና ዓቂዳ ብዕምቆት ብምርዳእ ምስ ኣላህ ዘሎ ዝምድና ናይ ምድልዳል ኣገዳስነት የጕልሕ።
ብሱና (መንገዲ) ረሱል (ሰላትን ሰላምን ይብጸሓዮም) ምሰራሕ ግድነት ኮይኑ ንዕኡ ዘይቕበል ድማ ካብ እስልምና ምውጽኡን ይምልከት፤23 languagesብሱና (መንገዲ) ረሱል (ሰላትን ሰላምን ይብጸሓዮም) ምሰራሕ ግድነት ኮይኑ ንዕኡ ዘይቕበል ድማ ካብ እስልምና ምውጽኡን ይምልከት፤
ኣዳላዊ: ሼኽ ዓብዱል ዓዚዝ ቢን ዓብዲላህ ቢን ባዝ (ኣላህ ይርሓመሎም) ብስም ኣዝዩ ሩህሩህን ኣዝዩ ራህራህን ዝኾነ ኣላህ ድርሰተይ [ጽሑፈይ] እጅምር መእተዊ ምስጋና ንናይ ዓለማት ጎይታ ዝኾነ ኣላህ ዝተገበአ እዩ፡ ሰናይ ዝኾነ መወዳእታ ከኣ ነቶም ኣላህ ዝፈርሑ እዩ፡ ናይ ኣላህ ውዳሰን ሰላምን ድማ ኣብ ልዕሊ ባርያ ኣላህን፡ ልኡኹን ዝኾኑ፡ ንዓለማት ምሕረት ዝተላኣኹ ነቢይና ሙሓመድ ይውረድ። ከምኡ'ውን ኣብ ልዕሊ እቶም ንመጽሓፍ ፈጣሪኦምን መንገዲ ነቢዮምን ብእምነትን ብጥንቃቐን ተቀቢሎም፡ ቃላቱን መልእኽቱን ከምዘለዎ ናብ ቀጻሊ ትውልዲ ዘመሓላለፉ ኣዝማዶምን ሳዓብቶምን ብጾቶምን ይውረድ። ኣላህ ሰናይ ስርሖም ይፍተወሎም ንዕኦም ውን ይፍተዎም፡ ከምኡ ውን ንዓና ብሰናይ ምግባር ካብ ዝስዕቡዎምን፡ ንኹሉ ህዝቢ መርትዖን ይግበረና፡ ካብኡ ብምቅጻል ብርግጽ ቀዳሞትን ዳሕረዎትን ዑለማእ (ሙሁራት) እስልምና፡ ሕጋጋት(ፍርድታት) እስልምና ኣብ ምቕማጥን፡ ሓላልን ሓራምን ኣብ ምብራህ መሰረታዊ ዝኾነ፡ ብቕድሚኡን ብድሕሪኡን ሓሶት ዘይመፆ ቁርኣን…
ሰለስተ መሰረታትን መርትዖታቱን73 languagesሰለስተ መሰረታትን መርትዖታቱን
እዚ መጽሓፍ እዚ፡ ሓደ ሙስሊም ክመሃሮም ዝግባእ መሰረታዊ መትከላት ዝኾኑ ንኣላህ ምፍላጥ፡ ንሃይማኖት እስልምና ምፍላጥ፡ ከምኡ'ዉን ንነቢ ሙሓመድ ሰለላሁ ዓለይሂ ወሰለም ምፍላጥ ይገልጽ፡ ኣብ ናይ ቑርኣንን ሓዲስን መርትዖታት ተመርኲሱ ድማ ናይ'ዞም መትከላት እዚኦም ኣብ ምህናጽ እምነትን ሰናይ ግብርን ዘለዎም ኣገዳስነት የተኰር።
ኣገባብ ውዱእ (ተግባራዉን ሓጺርን መግለጺ)79 languagesኣገባብ ውዱእ (ተግባራዉን ሓጺርን መግለጺ)
ናይ ውዱእ ኣገባብ (ዝተቓለለ ቪድዮ) ውዱእ ብኸመይ ከምዝግበር ቀስ ብቀስ ዘርኢ ተግባራዊ ኣፈጻጽማ፣ንትኽክለኛ ሰላት ውዱእ ቅድመ-ኩነት ስለዝኾነ ድማ ኣዝዩ ኣገዳሲ ኢዩ። ነዚ መቕረጽ ተዓዚብካ፡ ትኽክለኛ ኣገባብ ውዱእ ተመሃር። ኣገባብ ውዱእ