الدروس المهمة لعامة الأمة
Karen-dãmb sẽn pake, n na n kõ lɩslaambã fãa Yɑɑ bãng-kɑseng soɑbã rẽnde D na n sɩnga d koeesã ne Wẽnd Yʋʋrã Albarka, sẽn yaa Dũni yols zãng naabã, n leb yaa Sɩd-kõatbã welg n yols naabã Gafã gʋlsd gom-tɩʋʋsdgã Pẽgr be ne Wẽnd sẽn yaa bõn-naandsã Naabã, la baas neer bee ne Wẽnd zoεtbã, la Wẽnd na pʋʋs la A tɩlg A Yambã la A Tẽn-tʋʋmã, tõnd Nabiyaamã a Mʋhammad, ne a zakã rãmbã la a Ṣahaabsã fãa gilli.
These files are generated automatically from the book's text; their layout may differ from the printed edition.
Karen-dãmb sẽn pake, n na n kõ lɩslaambã fãa
Yɑɑ bãng-kɑseng soɑbã rẽnde
A Abdul Aziiz ɭbn Abdʋllaah ɭbn Baaz (Wẽnd na yols-a)
Gafã gʋlsd gom-tɩʋʋsdgã
Pẽgr be ne Wẽnd sẽn yaa bõn-naandsã Naabã, la baas neer bee ne Wẽnd zoεtbã, la Wẽnd na pʋʋs la A tɩlg A Yambã la A Tẽn-tʋʋmã, tõnd Nabiyaamã a Mʋhammad, ne a zakã rãmbã la a Ṣahaabsã fãa gilli.
Rẽ loogre poorẽ:
Wãnde yaa gom-biis sẽn kʋʋg koεεga, sẽn na vẽneg yεl nins sãnda sẽn kẽed ne lɩslaangã tɩ yaa tɩlae ne lɩslaam fãa t'a bãng-ba, m pʋd-a lame: (Karen-dãmb sẽn pake, n na n kõ lɩslaambã fãa).
La m kota Wẽnde, t'A naf-a ne lɩslaambã, la A reeg-a, bala A yaa Kõta n yaa kõ-wagell Soaba.
A Abdul Aziz ɭbn Abdʋllaah ɭbn Baaz Karen-dãmb sẽn pake, n na n kõ lɩslaambã fãa [1] [1] (Maǧmuuʿu Al-fataawaa wa maƙaalaat mutanawɩʿa) ( 3/ 288-298).
Rẽenem karengã, yaa Al-hamdã la sʋʋr koeesã.
Yaa Al-hamdã la bũmb ning f sẽn tõe tεka, sʋʋr koeesẽ wã, sẽn sɩng sʋʋra ning sẽn boond tɩ "Az-zalzalã wã" n tʋg n tãag "An-naasã" sẽn na n deeeg karen-saam nengẽ, la kareng remsgo, la a rulsgu, lɑ bũmb ning sẽn yɑɑ tɩlɑe tɩ b fɑhm-ɑ wã welesgo.
Kareng a yiib soaba: Yaa lɩslaangã zeng-raadã
Yaa lɩslaangã zeng-raad a nu wã vẽnegre, la a rẽenem la a sẽn yɩɩd zɩsgo, yaa: Yaa "Laa'ɩlaaha ɩlla Allaah wa anna Mʋhammadan Rasʋʋlʋllaah" n lagem ne "Laa'ɩlaaha ɩlla Allaah" sart-rãmbã vẽnegre. La "Laa'ɩlaaha" wã maanã: Yaa (Soab ka be), tɩ yaa sẽn kɩɩsd bũmb fãa b sẽn tũudi tɩ pa Wẽnde, "ɭlla Allaah" (tɩ sã n pa Wẽnde) tɩ yaa sẽn tabend tũudum fãa ne Wẽnd A Yembr, naag-n-taag pa be ne-A ye. La sã n yaa "Laa'ɩlaaha ɩlla Allaah"= (soab ka be sã n pa Wẽndã) sart-dãmbã rẽnda Yaa: bãngr ninga sẽn yiisd zɩɩlmã la bãng-n-wãak ning sẽn yiisd sikã, la pʋ-peelem ning sẽn yiisd lagm-n-taarã, la sɩd ning sẽn yiisd zĩri-beedã, la nonglem ning sẽn yiisd kisgrã, la sak-n-tũ ning sẽn yiisd bas-n-ra-maanã, la reegr ning sẽn yiisd tõdgrã, la f kɩfl ne bũmb fãa b sẽn tũud tɩ pa tũ ne Wẽnd ye. La sɩd la hakɩɩka b tigm-b-la yɩɩlã ro-tiuuds a yiibã sẽn watã:
Yaa bãngre, bãng-n-wãaka, pʋ-peelem, la f kõ-sɩdã n lɑgem ne...Nonglem la sak-n-tũ la ɑ sɑkre. La b pɑɑsɑ nii soabã tɩ f kɩfl ne bũmb... ning sẽn ka Wẽndã, sẽn yaa yεl nins b sẽn maan tɩ lebg sobend-rãmbã
N lagem ne vẽneg Kɑsetã t'a Mʋhammad yaa Wẽnd Tẽn-tʋʋma, la b sẽn baood a pʋgẽ wã: yaa fo sɩdg-a a sẽn kõ kibay ninsã, la f tũ-a a sẽn sagl yεl ninsã pʋgẽ wã, la f zãag bũmb nins a sẽn gɩdg la a bugsã, la f ra wa tʋg n tũud Wẽnde, rẽnda ne bũmb ning Wẽnd sẽn maan tɩ yaa sãri wã (A Naam yɩ wagell n zẽke) la A Tẽn-tʋʋmã (Wẽnd pʋʋsg la A tɩlgr be a yĩnga). Rẽ poorẽ b vẽnegdɑme n wilg karem-biigã lɩslaamdã zeng raad a nu wã sẽn kellã, bãmb me la: Pʋʋsgã, la Zakã, la Ramadaanã no-loeerã, la Wẽnd Roogã sẽn yaa Lohoremã kaagre ne ned ning sẽn paam sor n tʋg beenẽ.
Kareng piig la a tãab soaba: yaa liimaandã zeng-raado:
La b yaa yoobe: Yaa f kõ sɩd ne Wẽnde, la A malεgsã, la A gaf-rãmbã, la A Tẽn-tʋʋmbã, la laahr daarã, la f kõ sɩd ne Wẽnd Pʋlengã, a sẽn noom la a sẽn yaa toog fãa yii Wẽnd nengẽ (A Naam Zẽkame).
Kareng a naas soaba; Wẽnd yembgã (Tawhɩɩdã) bugsã la lagm-n-taarã bugsã.
Wẽnd yembgã (Tawhɩɩd) bugsã yaa a tãabo: Tawhɩɩd Ar-rʋbʋʋbɩya ( yemb Wẽnd A Wẽndlemẽ wã) la Tawhɩɩd Al-ʋlʋʋhɩyya (Wẽnd-yembgo A tũudumẽ wã) la Tawhɩɩd Al-asmaa-ɩ wa Aṣ-ṣɩfaat ( Wẽn-yembgo A Yʋyã la Sɩf-rãmbẽ wã).
1- La sã n yaa Tawhɩɩd Ar-rʋbʋʋbɩya (Wẽndlemã yeembgo): yẽnda yaa f kõ sɩd ne Wẽnde (A Naam yɩlg-yã) la Yẽnda la bũmbã fãa Naanda, la Kẽnesda bũmbã fãa pʋgẽ, lagem-n-taag ka be ne-A rẽnda pʋgẽ ye.
2- La sã n yaa Tawhɩɩd Al-ʋlʋʋhɩyya (Wẽnd-yembgo A tũudumã) wεεngẽ: yẽnda yaa f kõ Wẽnd sɩda, (A Naam yɩlg-yã) Yẽndã la b sẽn tũud sɩd-sɩda, lagem-n-taag ke be ne-A tũudmã pʋgẽ ye, yẽ me la " Laa ɩlaaha ɩlla Allaah= soab sẽn na n tũ n tɩlg ka be, sã n pa yɩ ne Wẽnde" võore, bala a võorã: sẽn na n tũ n tɩlg zẽng sẽn ka Wẽnd ka be ye, rẽnd tũud-rãmbã fãa gill sẽn yaa Pʋʋsgã la no-loeerã, la zẽng sẽn ka rẽnda, yaa tɩlae tɩ b yɩlg-ba Wẽnd A Yembr tãa yĩnga, ka sakd tɩ b wẽnes bũmb beenẽ n kõ zẽng sẽn ka Wẽnd ye.
3-La sã n yaa Tawhɩɩd Al-asmaa-ɩ wa Aṣ-ṣɩfaat (Wẽn-yembgo A Yʋyã la Sɩf-rãmbẽ wã) wεεngẽ wã: yẽnda yaa f kõ sɩd ne sẽn wa Alkʋrãanã pʋgẽ fãa, maa hadiis-rãmb sẽn manegã pʋgẽ, sẽn yaa Wẽnd yʋy la a sɩf-rãmba, la f tablg ne Wẽnd A yembr tãa yalε ning sẽn sõmb ne Wẽnde, (A Naam yɩlg-yã) tɩ ka tũ ne toeengo, ka tũ ne bas n ka yãk a maanã, ka tũ ne bilg A sẽn yaa A saob ye, ka tũ ne wõnes-A ne bũmb ye, la rẽnda yaa sẽn na n tʋm ne Wẽnd koεεgã sẽn yeelã (A Naam yɩlg-yã): (1) Yeele: "Yẽnda la Wẽnde, A yaa A Yembre. (2) Wẽnd la Tikda. (3) A ka roge, b ka rog-A. A leb n ka tar mak-n-taag ba a ye} [Al-Iẖlaaṣʋ: 1-4]. La A koεεgã sẽn yeele (A naam yɩ Wagell n zẽke): (Bũmb pa be n wõnd-A ye, la Yẽnda la Wʋmd n yaa Neta). [Aš-šʋʋrɑɑ: 11], La bãngdbã sãnda maan-a lame t'a yaa kõbg a yiibu, n rɩk Tawhɩɩd Al-asmaa-ɩ wa Aṣ-ṣɩfaat (Yʋyã la Sɩf-rãmbã yeembgo) n kẽes Tawhɩɩd Ar-rʋbʋʋbɩya (Wẽndlemã yeembgo) pʋgẽ, la tak-n-taar ka be yãwã pʋgẽ ye, bala raabã yaa vẽeneg pʋɩɩb a yiibã fãa pʋgẽ.
La lagm-n-taarã kõbg yaa a tãabo: lagm-n-ta-kasenga, la lagm-n-ta-bila, la lagm-n-taar sẽn solge.
Rẽnd lagm-n-ta-kasengã: a kɩtdame tɩ tʋʋmã lʋɩ la duung Bugmã pʋgẽ, wala A sẽn yeele a (Naam Zẽkame): {La ad b sã n maan lagem-n-taare b sẽn da tʋmdã fãa na lʋɩ} [Al-An'ʿaam: 88], A leb n yeelame (A Naam yɩlgame): (Kɑ sõmb tɩ lɑgm-n-tɑɑrã rɑmbɑ tɩ b meed Wẽnd Misɑ wã lɑ b yɑool n seet b mensã ne sõm-zɩtmã ye, bãmb-rãmb tʋʋmã lʋyɑme, lɑ b le yɑɑ bʋgme wã me pɑɑdbɑ) [At-tawba: 17], La sã n yɑɑ ned ning sẽn ki a pʋgẽ wã, b kõ n tol n yaaf-a ye, arzãnã me yaa haraam ne-a, wala Wẽnd sẽn yeele (A Naam yɩ wagell n zẽke): (Ad Wẽnd ka yaafde tɩ b sã maan mag-yiib ne-A ye, la A yaafda zẽng sẽn ka rẽnda ne A sẽn dat a soab). [An-Nisaa'ʋ: 48]. A leb n yeelame (A Naam yɩlgame): (Ad sẽn maana lagm-n-taar ne Wẽnde, sɩd la hakɩɩka Wẽnd harma arzãna a zugu, a gãag zĩig yaa Bugmẽ, lɑ wẽgdbã pɑ tɑr sõngd buud ye) [Al-Maa'ɩda: 72].
La sẽn be a kõbgã pʋgẽ: Yaa kũ-rãmbã la rʋbsã kosgo, la fãagr baoobo ne-ba, la Pʋleng maanego b yĩnga, la b kʋʋd b yĩnga, la sẽn wõnd woto.
La sã n yaa ne lagm-n-ta bilã: Yẽ yaa gom-sigdim sẽn tabl Alkʋrãanã maa Sunnã pʋgẽ, n pʋd-ɑ tɩ lagm-n-taare, la a pa lagm-n-ta-kasengã kõbg ye: wala maan-tɩ-b-yã tʋʋmã sãndã pʋgẽ, la wẽenego ne zẽng sẽn pa Wẽnde, la f sẽn na n yeele: Wẽnd sã n sak t'a zagl sake, maa Wẽnd la a zagl yĩnga la sẽn rã woto; Nabiyaamã (Wẽnd pʋʋsg la A tɩlgr be a yĩnga), koεεgã sẽn yeelã yĩngɑ: "Mam sẽn yεεsd yãmb zugẽ n tʋg n yɩɩda, yaa lagm-n-ta-bilã" tɩ b soak-a a võore, t'a yeele: "Yaa maan-tɩ-b-yã" [2] A limaam Ahmad la a Aṭ-ṭabaraanii la a Al-bayhaƙɩɩ n reeg-a n yi a Mahmuud ɭbn Labɩɩd Al-anṣaarɩyi nengẽ -Wẽnd yard be a yĩnga- ne tikr sẽn mɑnege, la a Aṭ-ṭabraani le reeg-a lame ne tikr sẽn manege n yi a Mahmuud ɭbn Labɩɩd n yi a Raafɩ'ɩ ɭbn Hʋdayǧ n yi Nabiyaamã nengẽ (Wẽnd pʋʋsg la A tɩlgr be a yĩnga). [2] Limɑɑm Ahmɑd yiis-a-lɑ ɑ gɑfẽ wã (5/ 428), lɑ ɑ Toɑbrɑɑniy kɑbiirẽ wã (4/ 338), lɑ ɑ Bɑyhɑƙɩy Sʋɑbɩ wã (14/ 355), ɑ yeelɑ Mɑgmɑ'ɩ Az-zɑwɑɑɩdɑ pʋgẽ(1/121) ɑ Ahmɑd n toɑgs-ɑ lɑ ɑ togsdbã yɑɑ Bʋhɑɑri togsdbã.
La Nabiyaamã sẽn yeele, (Wẽnd pʋʋsg la A tɩlgr be a yĩnga): (Ned ning sẽn wẽena ne bũmbu tɩ pa tũ ne Wẽnde, sɩd la hakɩɩka a maana lagm-n-taare} [3] Limaam Ahmad n reeg-a ne tõkr sẽn manege n yi a ʿƲmar ɭbn Haṭṭaab nengẽ (Wẽnd yard be a yĩnga). La Abʋʋ Dawʋʋd me la a At-tirmiizi reeg-a ne tikr sẽn manege n yi ɑ ɭbn ʿƲmar Hɑdiisẽ wã (Wẽnd yard be b yiibã yĩnga) n yi Nabiyamã nengẽ (Wẽnd pʋʋsg la A tɩlgr be a yĩnga) t'a yeelame: (Ned ning sẽn wẽena, tɩ pa yɩ ne Wẽnde, a soab kɩflame maa a maana lagm-n-taare) [4] La Nabiyaamã sẽn yeele (Wẽnd pʋʋsg la A tɩlgr be a yĩnga): (Ra n yeel-y tɩ: "Wẽnd sã n sak t'a zagl me sak ye", la yeel-y tɩ: "Wẽnd sã n sak, rẽ poorẽ t'a zagl sake) [5] A Abʋʋ Daawʋʋd n yiis hadiisã ne tikr sẽn manege n yi a Hʋzayfa ɭbn Al-yamaan nengẽ (Wẽnd yard be a yĩnga). [3] Limaam Ahmad n yiis-a (1/ 47). [4] Abuu Daawʋʋd n yiis-a limor (3251) la a At-tirmiizii limor (1535). [5] A Abbu Daawʋʋd n yiis-a limor (4980) la a Ahmad (5/ 384).
La kõb-kãngã pa yiisd ned lɩslaoongã pʋg ye, a pa maan ned t'a duum Bugmẽ wã me ye, la ad a pa zemsd ne Wẽnd-yembg ning sẽn pidã wã ye.
Kõbg a tãab soaba: sẽn yaa lagm-n-taar sẽn solgã: Yẽ daliil yaa Nabiyaamã (Wẽnd pʋʋsg la A tɩlgr be a koεεga) : (M pa na n kõ-y kibar bũmb mam sẽn yεεsd yãmb zugu n yɩɩd a Masɩɩh Ad-daǧaalɩ?} Tɩ b yeele: "n-ye". T'a yeele: {Yaa lagm-n-taar sẽn solgã... ned yikdame n pʋʋsdẽ, n maneg a Pʋʋsgã sõma a sẽn ne ned sẽn get-a yĩnga) [6]. A Limaam Ahmad n reeg-a a Musnadã pʋgẽ, n yi a Abɩɩ Saʿɩɩd Al-ẖʋdriy nengẽ (Wẽnd yard be a yĩnga). [6] A ɭbn Maagε n yiis-a limor (4204) la a Ahmad (3/ 30).
La sɑkdɑme tɩ b pʋɩɩ lagm-n-taarã kõbk a yiib bala:
kɑseng la bilfu, la sã n yaa ne lagm-n-taar ning sẽn solgã, ad yẽ gubgɑ kõbg a yiibã fãa; A tõe n yɩɩ kɑsengẽ wã, wala munaafɩgsã lagm-n-taare, bala bãmb solgda b loe-n-wãagsã sẽn yaa zĩrẽ wã, la b vẽnegd lɩslaoongo, tɩ yaa maan-tɩ-b-yã yĩnga, b sẽn yεεsd bũmb na n wa maan-ba yĩnga.
La a yɩta lagm-n-ta-bilfẽ wã me, wala maan-tɩ-b-yã, wala sẽn be a Mahmuud ɭbn Labɩɩd Al-Anṣaarɩ hadiisã sẽn loogã pʋgẽ, la a Abɩɩ Saɩɩd hadiisã d sẽn togsã. La Wẽnd la segl sõng Soaba.
Kareng piig la a nu soaba: yaa manegrã
Mɑnegrã zeng-rɑoogã togsgo, yẽ me lɑ f tũ Wẽnd tɩ yɑɑ wɑ fo nee-A lɑme, lɑ fo sã n pɑ ne-A, ɑd A nee foo.
Kareng a yoob soaba: Pʋʋsgã Sart-rãmba.
La b yaa wae:
Yaa: lɩslaoongo, la yam, la yam tallg sẽn tõe n wels yella ne taaba, la rẽgd kaalem, la rẽg-bondɩ yẽesgo, la yãnd ludbu, la wakatã taabo, la Al-kiblã toglgo, la ãnniyã.
Kareng a yopoe soaba: Pʋʋsgã zeng-raadã
La b yaa piig la a naase:
Yaa: yãnesgo tɩ tõog sã n beẽ, la Allah Akbarʋ ningã sẽn sɩnged ne pʋʋsgã, la Al-hamd karengo, la rukuu, la yãnas tɩrga rukuu wã poorẽ, la suguudu yĩng-wilã a yopoe wã zugu, la roog n yi suguudẽ wã, la zĩndig ning sẽn be suguud-rãmb a yiibã sʋka, la yĩ-yõgnogo tʋʋmã fãa pʋgẽ, la zeng-raadã tũnug taaba, la Sahd baasdgã, la zĩnd n maan-a wã, la nabiyaamã sallgo (Wẽnd pʋʋsg la tɩlgr be a yĩnga) la sallmã a yiibã ningri.
Kareng a nii soaba: Pʋʋsgã waagib-rãmba.
La b yaa nii:
Takbɩɩr-rãmbã gilli, sã n pa raẽenem takbɩɩrã bala, la (Sami Allah lɩman hamɩdahʋʋ) wã yeelgo, lɩmaamã la ned sẽn pʋʋsd a yembre: La (Rabbanaa walakal hamdʋ) yeelgo, nebã gilli: Lɑ Subhaana Rabiya Al-ʿAzɩɩm rukʋuẽ wã, lɑ Subhaana Rabiya Al- aʿlaa suguudẽ wã, yeelgo, Lɑ: (Rabɩ ɩgfɩr lɩɩ) yeelgo, suguud-rãmb a yiibã ne taab sʋka, la Sɑhd rẽengã, la zĩnd n maan-a wã.
Kareng a wae soaba: Tašahhudã maaneg vẽnegre.
La yẽ me yaa a sẽn na n yeele:
(Attahɩyaatʋ Lɩllaahɩ, waṣṣalawaatʋ waṭṭaybaatʋ, assalaamʋ ʿalayka, ɑyyʋha'nnabɩyyʋ, wa rahmatʋllaahɩ, wabarakaatʋhʋʋ, assalaamʋ ʿalaynaa, wa ʿalaa ʿɩbaadɩllaahɩ aṣṣaalɩhɩɩna, ašhadʋ anlaa ɩlaaha ɩlla Allaahʋ, wa Ašhadʋ ãnna Mʋhammadan ʿAbdʋhʋʋ wa rasʋʋlʋhʋʋ = Pʋʋs-rãmb be ne Wẽnde, lɑ Pʋʋsg lɑ yel Yɩlm be ne Wẽnde, Tɩlgr be ne foom a Nabiyaama, la Wẽnd yolsg la A barka, Tɩlgr be ne tõnd la Wẽnd yemb sõmsã, m tabenda m sũurẽ ne hakɩɩk tɩ soab sẽn na n tũ n tɩlg kae rẽnda Wẽnde, la m maand kaset t'a Mʋhammad yaa A yamb la A Tẽn-tʋʋma).
Rẽ poorẽ t'a pʋʋs Nabiyaamã (Wẽnd pʋʋsg la A tɩlgr be a yĩnga) la a kos Wẽnd t'A maan-a barka, n yeele: Allahʋmma ṣallɩ ʿAlaa Mʋhammadɩn wa' ʿalaa aalɩ Mʋhammadɩn, kamaa ṣallayta ʿAlaa ɭbraahɩɩma wa ʿalaa aalɩ ɭbraahɩɩma, ɩnnaka hamiidʋn maǧiidʋn, wa baarɩk ʿalaa Mʋhammadɩn wa ʿalaa aalɩ Mʋhammadɩn, kamaa baarakta ʿalaa ɭbraahɩɩma wa ʿalaa aalɩ ɭbraahɩɩma innaka hamiidʋn maǧiidʋn.
Rẽ poorẽ t'a kos gũudum ne Wẽnde a Sɑhd baasdgã poorẽ n yi Gεhannemã namsgo, la yaoogã namsgã la vɩɩm la kũum zarb-n-gesgã (fɩtna), la Al-Masɩɩh Addaǧaal zarb-n-gesgã, rẽ poorẽ t'a bao kosg ninga a sẽn rate n kose, sẽn tʋg n yɩɩda, Nabiyaamã la Sahaabsã sẽn kos ne doos ninsã, sẽn be rẽ pʋgẽ:
(Allaahʋmmã A'ɩnnɩɩ Alaa zɩkrɩka wa Šʋkrɩka wa hʋsnɩ ɩbaadatɩka ))= {M Soab a Wẽrnde sõng-ma F Yʋʋrã tẽegr pʋgẽ la F barkã pʋʋsgo la F tũudmã manegr pʋgẽ}. ((Allaahʋmma ɩnnɩɩ Ẓalamtʋ nafsɩɩ zʋlman kasɩɩran, walaa yagfɩrʋ azzʋnuuba ɩllaa anta, fagfɩr lɩɩ magfɩratan min ɩndɩka war hamnɩɩ, innaka anta algafʋʋrʋ arrahɩɩmʋ)) ={m Soab a Wẽnde, ad mam wẽga m menga wẽgb sẽn waooge, la ned pa tõe n yaaf zunuubã tɩ sã n pa Foo ye, bɩ F yaaf-ma yaafg sẽn yi Fo Nengẽ, la F yols-ma, ad Foo la Yaafg Naba n yaa Yolsda).
La sã n yaa sahd rẽengã pʋgẽ wã, a yikda sahd a yiibã poorẽ n keng rakaar a tãabẽ wã, Zafare la Laansare, la Magriba, la Sãanfo, la a sã n pʋʋs Nabiyaamã (Wẽnd pʋʋsg la A tɩlgr be a yĩnga) yẽ sõma n yɩɩde, ne hadiis-rãmbã sẽn wa rẽ pʋgẽ, wã, rẽ poorẽ t'a yik n kẽng rakaar a tãabẽ soaba.
Kareng piig soaba: Pʋʋsgã sũn-dãmba
La sẽn be b pʋgẽ:
1- Pʋʋsgã pakr doaagã.
2-Rɩtg nugã rɩk n dogl goabgã yãoogã zugu, yãnesgã wakato, tɑoor t'ɑ pɑ mɑɑn rukuu wã la a poorẽ.
3- Nus a yiibã zẽkre tɩ nus-biyã yɑɑ sẽn mobg taaba, n zems bãgd a yiibã, maa tʋb a yiibã, Allaahʋ Akbarʋ rẽengã sasa, la rukuu wã zĩigẽ, la sẽn wat n roogd beenẽ wã, la sẽn wat n yikd rẽenem Sɑhdẽ wã n rabd rakaar a tãab soabã.
4- Sẽn paas Sʋbhaanallaah wã yembrã poorẽ, rukuu wã la suguudẽ wã.
5- Bũmb ning sẽn paasd: (Rabba naa walakal hamdã) a sẽn roog n yi rukuu wã poore. Lɑ bũmb ning sẽn zʋʋg yembre yaafgã kosgo suguud-rãmb a yiibã ne taab sʋkã.
6- Maan zʋgã t'a zems poorã rukuu wã pʋgẽ.
7- Kams a yiibã zãagr ne lʋg a yiibã, la pʋgã zãagr ne gεy a yiibã suguudẽ wã.
8- Kams a yiibã zẽk n zãag Tẽngã suguudã sasa.
9- Pʋʋsdã sẽn na n zĩnd a goabg naoorã zugu la a tilg rɩtg soabã Sɑhd rẽengã wakato la suguud-rãmbã ne taabã sʋka.
10-La zĩnd n wũgũmsi (Põd n zĩnd sεεgã zugã) sahd baasdgẽ wã, Pʋʋs-rãmb nins sẽn yaa a naas la a tãabã pʋgẽ, la yẽ me yaa a zĩnd kɩgbã zugu n kẽes a goabg naoorã a rɩtg naoorã pʋgẽ, la a tilg rɩtg naoorã.
11-Yaa a tees ne nug-bi teesdgã rẽenem soab sahdẽ wã la yiibẽ soab sahdẽ wã, sẽn na n sɩng a zĩndgã sasa n tʋg n tãag sahdã sεεbẽ, la a rãmb a nug-bilã a sẽn wat n kotẽ wã.
12- Pʋʋsgo la albark kosgo n kõ a Mʋhammad la Mʋhammad zakɑ rãmba, ne a ɭbraahɩɩm la a ɭbraahɩɩm zaka rãmba, Sahd rẽengã pʋgẽ.
13-Doaag maanego Sɑhd baasdgã pʋgẽ.
14- Karem n vẽnegã Fagirã pʋʋsgã la arzũma, la tig a yiibã, la saag kosg Pʋʋsgẽ, la rẽenem rakaar a yiibã magrib la Sãanfẽ
15- karem n solge Zafar la Laasare, la Magrib rakaar a tãab soaba la Sãanfã yaoolem rakaa a yiibã.
16- Yaa kareg ning sẽn rogend Al-hamdã zugu sẽn yaa Alkʋrãanã pʋgẽ, n lagem ne Sũnn-rãmbã sẽn wa Pʋʋsgã pʋgẽ wã gũusgu, Sũnn-rãmb nins sẽn ka tõnd sẽn togsã, la sẽn be rẽ pʋgẽ, yaa sẽn paasd pʋʋsdã sẽn na n yeele: "Rabbanaa wa laka Alhamdu" a sẽn wat n roog Rukuuẽ wã, tɩ sã n yaa lɩmaam, la ned sẽn yaa almaa'muun la ned sẽn pʋʋsd a yembre, bala a yaa Sũnnah. Leb n bee rẽ pʋgẽ yεsa, yaa tik nus a yiibã rũm a yiibã zugu, n yaag nus-bi wã Rukuu wã sasa n welg nus-biyã ne taaba.
Kareng piig la yembr soaba: yεl nins sẽn kaood Pʋʋsgã.
La b yaa nii:
1- Goam ne pʋ-toogo n lagem ne minim la bãngre, la sã n yaa ned sẽn yĩmi, maa ned sẽn pa mi, a Pʋʋsgã pa sãamd ye.
2- Laado.
3- Rɩɩbo.
4- Yũubu.
5- Yãndã sẽn na n lɑke.
6- A sẽn na n wẽnegd wʋsg n zãag Kiblã sẽnẽ.
7- Reem wʋsgo sẽn pʋg taaba Pʋʋsgã pʋgẽ.
8- Yɩlgrã sẽn na n kao.
Kareng piig la a yiib soaba: Koomã yõgb Sart-rãmba.
La b yaa piiga:
Yaa lɩslaoongo. La yam La mi-n-bake. La Anniyã. La anniyã wã tũnungri, la rẽ yaa a ra wãag anniyã wã hal t'a koomã yõgb wa tɩ sε, la bũmb ning sẽn kɩt tɩ koomã yõgbã yɩ tɩlae wã sã n wa sε, La koom zẽkre maa yẽes ne kuga tɑoor t'ɑ pɑ yõke, la koomã yɩ yɩlemde, la a yɩ halaal koom, La bũmb ning sẽn gɩdg koomã na ta yĩnga yẽesgo. La Pʋʋsgã wakat sẽn na n ta ne ned ning koom kaoob sẽn dũumdi.
Kareng piig la a tãab soaba: Koomã yõgb Faril-rãmba
La b yaa yoobe:
Yaa nengã pekre, la sẽn be a pʋgẽ yaa noorã wugsgu la yõyã fẽesgo, la nus a yiibã pekre n lagem ne kãntɩɩsã, yaa zugã saagre la tʋb a yiibã naaga be, Lɑ Nao a yiibã pekre n lagm ne nao-kug a yiibã, lɑ tũnug-taaba, la pʋgl-taaba. B bʋʋ nonglem nengã pek n yɩlmã, lɑ nus ɑ yiibã, lɑ nɑo ɑ yiibã noor ɑ tãɑbo, yɑɑ woto bɑl lɑ noorã wugsgu, lɑ yõyã fẽesgo, lɑ fɑrilã rẽ fãɑ pʋgẽ yɑɑ vugri, lɑ sã n yɑɑ zugã sɑɑgrã b pɑ bʋ nonglem tɩ b yɩlm-ɑ ye, wɑlɑ hɑdiis-rãmbã sẽn mɑnegã sẽn togs to-to wã.
Kareng piig la a naas soaba: Koomã bõn-kaoodɩ wã
La b yaa yoobe:
Sẽn yit soy a yiibẽ wã (Rʋʋdem la bĩndu), la rẽgd sẽn yɑɑ wʋsgo n yit yĩngẽ wã, la yam-menengo sẽn tũ ne gõeem la zẽng sẽn pa rẽ, la taoorã sɩɩsg ne nugu, zem tɩ yaa tõoorã maa ɑ poorẽ, tɩ pa tũ ne bõn-lutɩ, la yʋgma nemd wãbre, la tar n yi dĩinã (Wẽnd na maan-d gũudum ne lɩslaambã fãa gilli n yi rẽnda).
Nekr sẽn sõmb n kelge: la sã n yaa kũumã soobo, sẽn maneg n yɩɩd bãngdbã koees pʋgẽ, yaa t'a ka kaood koom ye, yẽ me la bãngdbã sẽn yɩɩdã koεεga, bala daliil ka be a zug ye, la soaadã nug sã n ta kiidã taoore, t'a nugã ka ludi (nug-wʋʋdo) yaa tɩlae t'a yõk koom.
La sẽn yaa waagib a zugu, yaa a ra sɩɩs kiidã taoor ye, rẽnda ludb poorẽ. Woto bala pag sɩɩsgo pa kaood koom sẽn yaa to-to fãa; zem tɩ tũu ne yamleoogo maa tɩ pa tũ ne yamleoogo, bãngdbã koees a yiibã sẽn yɩɩda sõmblem pʋgẽ, tɩ bũmb sã n pa yi a nengẽ, bala Nabiyaamã (Wẽnd pʋʋsg la A tɩlgr be a yĩnga) moka a pagbã sãnda, rẽ poorẽ t'a pʋʋse, la a pa yõg koom ye.
La sã n yaa Wẽnd koεεgã, (A Naam yɩlgame), Aayae a yiibã sẽn be Annisaa'ʋ la Al-maa'ɩda pʋgẽ wã: ﴾Mɑɑ yãmb sɩɩsɑ pɑgbã﴿ [An-nisaa'ʋ: 43] [Al-maa'ɩda :6], B sẽn dat ne rẽ wã yaa kẽed-n-taare, bãngdbã koees a yiibã sẽn maneg n yɩɩda, la rẽ me la a ɭbn Abaas koεεga (Wẽnd yard be b yiibã yĩnga) la Zãma reng taoor rãmbẽ wã la yɑoolem rãmbẽ wã. La Wẽnd la segl sõng Soaba.
Kareng piig la a nu soaba: Yaa sãri wã sẽn maan zʋgd nins tɩ lɩslaam fãa sõmb n tall-ba.
La sẽn bee b pʋgẽ: Yaa sɩd-maanego, la bas-m-yam tallgo, la yõk-m-menga, la yãn-zoeega, la raoodo (Sũ-keelem), la kũuni, la ra-yĩm-zaamẽ, la zãag-m-meng n yi Wẽnd sẽn gɩdg yεl ninsã fãa, la yak-n-ta sõngo, la tʋlsem rãmb sõngre pãng tõog tεka, la zẽng sẽn pa woto, sẽn yaa zʋgd ninsi AlKʋraanã la sunnã sẽn wilgi t'a sõmba Šari wã pʋga.
Kareng piig la a yoob soaba: Lɩslaamdã zʋgdo.
La sẽn be a pʋgẽ: Yaa sallem ningri. La neng yõgnengo, la rɩ ne rɩtgo, la yũ ne rɩtgo, la yeel "Bismillah" a sɩngrẽ la a yeel "Alhamdu lillah" a baasgẽ, la yeel"Alhamdu lillaah" tĩsg poorẽ, la yeel tĩsd "yarhamukallaah" t'a sã n pẽg Wẽnde, la bãad kaagre, la kũum pʋgbo, la a Pʋʋsgo, la a mumbu, la zʋgd nins Šari wã sẽn maane miisr kõom wakato maa zakẽ, la f sẽn wat n yit b yiibã pʋgẽ, la sor-bobr wakato, la roagd a yiibã manegre, la rog-pẽtsã, la yagse, la kasẽmbã la kãm-baoonegã, la zu-noog pʋʋsg tɩ sã n paam bi-pεεlga. la fur bark ningi, la toog pʋʋsgo masiib wakato. La zẽng sẽn pa woto, sẽn yaa lɩslaamdã zʋdgo, fuug yeelgrẽ la a yeegrẽ la neoodr pidbẽ.
Kareng piig la yopoe soaba: yaa bugs n yi lagm-n-taare la Wẽn-kɩɩsg kõbg toor-toore.
La sẽn be b pʋgẽ: Yaa yel-halkdsã a yopoe wã, la bãmb me la: Lagm-n-taar ne Wẽnde, la tɩɩm sɑobo, la yõor ning Wẽnd sẽn harmã kʋʋbo, rẽndame tɩ yaa sẽn tũ ne a hakε, la rɩbaag rɩɩbo, la kɩɩb arzεk rɩɩbo, la lebg n wudg zabr (Gɩhaadɩ) raare, la muumim pogsã sẽn yaa gũus-m-mens-rãmbã, yam-yood sẽn pa be b rãmb zug rõdbo.
La sẽn be a pʋgẽ: Roadb a yiib namsgo. La rog-wãasgo. La kaset-zĩrẽ. La zĩri wẽenego. la yak namsgo. La nebã wẽgbo: b zɩ-rãmbẽ wã, la arzεgsẽ wã, la b burkĩndẽ wã. La zẽng sẽn pa woto, sẽn yaa bũmb ning Wẽnd sẽn gɩdgã, maa A Tẽn-tʋʋmã, (Wẽnd pʋʋsg la A tɩlgr be a yĩnga).
Kareng piig la a nii soaba: kiid soglg la a Pʋʋsgo la a mumbu.
La ad rẽnda welsgo:
Rẽenem: b maaname tɩ yaa sãri tɩ b leems kũum sẽn wat n wa a soab t'a yeel: "Laa ɩlaaha ɩlla Allaah= soab sẽn na n tũ sɩd-sɩd ka be, sã n pa yɩ ne Wẽnde"; ne Nabiyaamã koεεg sẽn yeele (Wẽnd pʋʋsg la A tɩlgr be a yĩnga): {Leems-y y kũ-rãmbã Laa ɭlaaha ɭlla Allaah} [7] A Muslim n reeg-a a gaf-manegdgã pʋgẽ, La b sẽn rat ne kiidbã hadiis-kãngã pʋgẽ wã, yaa sẽn rat n maan kaalemã, bãmb la neb nins kũumã tagmas-rãmb sẽn vẽneg b nengẽ wã. [7] A Muslim n yiis-a limor-rãmb a yiibu (916-917).
Yiib soaba: b sã n bãng n wãag ne a kũumã, b mumda a ninã yiibã, la b sẽbg a yεy a yiibã. Sũnnah sẽn wa ne rẽ wã yĩnga.
Tãab soaba: yaa tɩlae tɩ b so kũum sẽn yaa lɩslaama, sã n ka mikame tɩ yaa ned sẽn maan kaalem zab laag pʋgẽ. Sã n yaa rẽ, b ka sood-a, b ka pʋʋsd-a, b kelled n mum-a-la ne a futã, bala Nabiyaamã (Wẽnd pʋʋsg la A tɩlgr be a yĩnga), a ka so Ʋhd kiidbã, a ka pʋʋs-ba.
B luta a yãndã, rẽ poorẽ tɩ b zẽk-a bilfu n wẽoog a pʋga faag-faaga, rẽ poorẽ tɩ soaadã sẽbg a nugã ne peende maa sẽn wõnd rẽ n zẽk-a koom ne-a, rẽ poorẽ t'a yõk-a wala Pʋʋsg Koom yõgbo, rẽ poorẽ t'a pek a zugã la a toεεngã ne koom la mugnuga maa sẽn wõnd rẽ, rẽ poorẽ t'a pek a rɩtgã wεεngẽ, la rẽ poorẽ a goabgã wεεngẽ, rẽ poorẽ t'a le pek-a woto naoor a yiibu, la naoor a tãabo. Naoor a yembr fãa a pɩʋʋgd a nugã a pʋgã zugu faag-faaga, tɩ bũmb sã n yi a pʋgẽ wã bɩ a pek-a, la a sẽd zĩigã ne lamdo maa sẽn wõnd rẽ, la a sã n pa yalse, bɩ a yẽd-a ne tãn-moɑɑgɑ maa sẽn tũ ne tɩbgã (logtoεεmbã) te paalã, wala koll-rãmba la sẽn wõnd rẽnda.
Naas soaba: yaa kũumã soob sɩfo:
La a yɩlms a koomã yõgbã, la soob a tãabã sã n pa seke, a paasdame n tɩ tãag nu, maa n tɩ tãag yopoe, rẽ poorẽ t'a yẽes-a ne fuugu, la a ning yũ-noodo a pẽgsẽ wã, la a suguudã zĩisẽ, la a sã n ning a yĩngã fãa gillã yũ-noodo rẽ be neere, la b wis a kãsengã ne wuhd-rãmba, la a no-kõbdã maa a nus-yẽesã sã n yaa wogdo kʋrsdame, lɑ b sã n bɑsme tɑɑl kɑ be ye, la b pa sãasd a zugã ye, b pɑ põnd ɑ pendɑã, b pɑ kẽesd-ɑ bãngo; la sã n yaa paga, b wẽnda a zoobdã gεm a tãabo, n sik a poorã zugu.
Nu soaba: yaa kũumã kãseng ningri.
sõmblem sẽn yɩɩde, yaa b maan raoa kɑseng fut a tãabo, sẽn yaa peelse, fu-yεrdg ka a pʋgẽ ye, zu-vindg me ka a pʋgẽ ye, tɩ b kẽes-a a pʋgẽ, la b sã n maan a kãsengã ne fuug la fu-poko la fu-pindga, yell ka be ye.
La paga, b maanda yẽ kasenga fut a nu, fu-yerdga la zug-fuugu la fu-sẽka la fu-pinds a yiibu. La bi-bilf kɑsenga yaa fuug a yembr pʋgẽ, n tɩ tãag fut a tãabo, la sã n yaa bi-pʋgl kɩdga yaa fu-yerdɩ a yiibu sẽn yaa wogdo, la fu-pinds a yiibu.
kũ-rãmbã hakε yaa fuug a yembre, sẽn lut kũumã zãnga, la kũumã sã n yaa ned sẽn yelg ɭhraam futu, b sood-a lame ne koom la mugnuga la b kell n maan t'a fu-sẽkã la a fu-yorgã yɩ a kãsenga, maa zẽng sẽn ka bãmb b yiibã, la b ka lut a zugã b ka lut a nengã, b ka ningd-a yũ-noog me ye, bala a na n yika yaoolem raarã, t'a yaa sẽn maand Labbayka, wala hadiis sẽn maneg ne gom-kãngã, sẽn yi Wẽnd Tẽn-tʋʋmã nengẽ (Wẽnd pʋʋsg la A tɩlgr be a yĩnga), la sã n mikame tɩ hagiimdã maa ʿƲmrã wã maandã yaa paga b ningda yẽ me kãsengã wala raoã sẽn ningd to-to wã, la b ka ningd-a yũ-noogo, b ka lut a nengã ne niƙaab ye, b ka ningd a nusã nug-wʋʋd ye, b luta a nengã la a nus a yiibã ne kãseng ningã a sẽn beẽ wã, wala sẽn reng taoorã, sẽn wilgd pag kãseng sẽn ningd to-to wã.
Yoob soabã: nebã sẽn sõmb n yɩɩd ne kiid koomã soob la a Pʋʋsgã la a mumbã.
Tɩ b lʋɩɩs ɑ sẽn sɑgl ned ningã taoore, rẽ poorẽ, saamba, rẽ poorẽ sẽn pẽ-a n yɩɩda la sẽn pẽ-a n yɩɩda, n zems ned fãa gill pẽemã dargε raopẽ wã.
La sẽn sõmba ne pag soobo: Yaa a sẽn saglg ne ned ninga, rẽ poorẽ yaa a ma wã, rẽ poorẽ yaa a yaab poaka, rẽ poorẽ, yaa sẽn yɩɩda ne pẽem la sẽn yɩɩda ne pẽem, pagbẽ wã. La yi-kãadb a yiibu: n sood taaba, bala Sɩd-kõtã (Abʋʋ Bakr), Wẽnd yard be a yĩnga, a pagã n so-a, la ʿAli me (Wẽnd yard be a yĩnga), a so a pagã a Faatɩma (Wẽnd yard be a yĩnga).
Yopoe soaba: kũum Pʋʋsg sɩfo:
A yetame tɩ (Allaah Akbaar) la a karem rẽenem soaba poore, (Al-hamdo), la a sã n karem sʋʋr koεεg n paase, maa Aayare, maa Aayae a yiibu, be neere, sẽn tũ ne hadiis ning sẽn wa rẽ pʋgẽ, n yi ɭbn Abbaas nengẽ, (Wẽnd yard be b yiibã yĩnga), rẽ poorẽ t'a maan (Allaah Akbaar) a yiib soaba, la a pʋʋs Nabiyaama, wala a sẽn pʋʋsd-a Pʋʋsgã Sɑhdẽ wã, rẽ poorẽ t'a maan Takbɩɩr (Allaah Akbaar) a tãab soaba, la a yeele: (M Soab A Wẽnde, yaaf tõnd vɩta la d kiida, la sẽn zĩnda la sẽn pa zĩndã, la d bi-bilfu la d kãsma, la d raoa la d paga, m Soab A Wẽnde, F sẽn vɩɩms a soab tõnd pʋgẽ, bɩ F vɩɩms-a lɩslaoong zugu, la F sẽn kɩt ɑ soɑb maan kaalem tõnd pʋgẽ, bɩ F kɩt a maan kaalem lɩɩmaoong zugu, m Soab A Wẽnde yaaf-a la F yols-a, la F kõ-a laafɩ la F yaaf n bas-a, la F waoog a sãandã, la F yalg a kõomã zĩiga, la F so-a ne koom la sa-pɩlm (galaas) la ko-maasga, la F yɩlg-a n yi zũnuuba la yel-tuuti wã, wala b sẽn yɩlgd fũ-peelle n yi rẽgdã, la F tedg a zaka sõmblem sẽn yɩɩd a zakã, la neb sõmblem sẽn yɩɩd a nebã, la F kẽes-a arzãna, la F maan-a gũudum n yi yaoogã namsgã, la Bugmã namsgã, la F yalg a yĩnga a kabrẽ wã, la F maan vẽenem a pʋgẽ, m Soab a Wẽnde, ra mong tõnd a keoorã ye, la F ra menemes tõnd a kuidgẽ ye). Rẽ poorẽ t'a maan takbɩɩr a naas soaba, rẽ poorẽ t'a ning sallem a yembre a rɩtg wεεngẽ.
La b bʋʋ nonglem t'a zẽkda a nusã n lagm ne takbɩɩr fãa. La kũumã sã n yɩ n yaa paga, b yeteme: (M Soab a Wẽnde yaaf pagã yĩngã..). La sã n mikame tɩ yaa kũ-rãmb a yiibu, b yetame: (M Soab Wẽnde, yaaf b yiibã). B sã n yaa wʋsgo, b kota zãma yʋʋr yĩnga. La sã n mikame tɩ yaa bi-kɩdga, b tedgda yaafã wã kosgo ne: (M Soab a Wẽnde maan-a t'a yɩ reng taoor soaba la bingri a roagdb a yiibã yĩnga, la sugsda b sẽn sakd a soab yĩnga, m Soab A Wẽnde, zɩsg b yiibã tʋʋmã a yĩnga, la f zɩsg b yiibã keoorã a yĩnga, paas-a ne muunim sõmsã la F ning-a a ɭbraahɩɩm wubrã pʋgẽ, (tɩlgr be a zugu), la F tɩlg-a ne F yolsgã n yi Gεhɩɩm namsgã).
La Sũnnã yaa tɩ limaamã yãnes n zems raoa zugu, la sã n yaa paga, yaa a pʋsʋkã, la kũ-rãmbã sã n lagm taaba, raoã n be limaamã sẽnẽ tɩ pagã zĩnd Al-kiblã sẽnẽ, la kom-bãaneg sã n lagem-ba, b lʋɩɩsda bi-ribla pag taoore, rẽ poorẽ bi-pug kɩdga, tɩ bi-bilfã zug zems ne raoã zugu, tɩ pagã pʋsʋka zems raoã zugu, yaa woto bala bi-pugla me zugã zemsda pagã zugu, t'a pʋsʋkã zems raoã zugu, la pʋʋsdbã fãa zĩndida limaamã poorẽ, sã n pa ned sẽn pa paam zĩiga limaamã poorẽ, rẽnd yẽ soaba yãnesda limaamã rɩtg wεεngẽ.
Nii soaba: Kũum mumb sɩfo:
Sãri wã sẽn kõ sorã, yaa b zulg yaoogã, n tʋg n tãag ned pʋsʋka la b maan ya-bẽka Al-ƙiblã wεεngẽ, la b ning kũumã ya-bẽkẽ wã a rɩtg wεεngẽ, la b lodg kãsengã loeesã, la b ka yãkd kãsengã ye, b kelled n bas-a-la woto, la b ka lakd a nengã ye, zem tɩ kiidã yaa raoa maa paga, rẽ poorẽ tɩ b ning tãn-koεεmã la b fõog tãndã halɩ t'a tablg tɩ tomã ka tat-a ye, la sã n ka paam tãn-koεεmã b tõeeme n maan ne zẽnga, sẽn yaa rapegdo, maa kuga, maa raado, sẽn tõe n gɩdg tɩ tomã ra ta-a ye, rẽ poorẽ tɩ b gaag tomã n busi, la b bʋʋ nonglem tɩ b yeel wakat-kãngã (Bismillaah wa ʿalaa millatɩ Rasʋʋlɩllaah= Yaa ne Wẽnd yʋʋrã la Wẽnd Tẽn-tʋʋmã sorã zug la d mumd-a) la b zẽkda yaoogã n zems nug-yakemd tεka, la b ning kug-bãaneg a zugu, tɩ sã n yaa yol-yole, la b mes-a ne koom.
La sãri maaname tɩ kiidã yãagdb yals yaoogẽ wã n kos n kõ kiidã, bala Nabiyaamã (Wẽnd pʋʋsg la A tɩlgr be a yĩnga), a rag n yɩɩme t'a sã n mum kũum n sε, a yalsda a zugu, n yeele: (Kos y yaafa n kõ-y ma-biigã, la y kos tablg ne-a, tɩ ad moasa b sokd-a-lame) [8]. [8] Abuu Daawʋʋd n yiis-a limor (3221), la a Haakɩm (3/ 399).
Wae soaba: Sãri kõo sor ne kũum ninga b sẽn ka paam n pʋʋse tɩ b pʋʋs-a mumbã poorẽ;
Bala Nabiyaamã (Wẽnd pʋʋsg la A tɩlgr be a yĩnga) a maana woto, la rẽnda yaa a sẽn na n yɩ sẽn zems kiuug pʋgẽ, maa sẽn ka ta rẽ, la sã n mikame tɩ wakatã yɩɩda woto, sãri ka leb n kõ sor tɩ b pʋʋs-a yaoogẽ wã, bala yel-kãng ka togs tɩ yi Nabiyaamã nengẽ (Wẽnd pʋʋsg la A tɩlgr be a yĩnga) t'a pʋʋsa kiid a yaoogẽ wã, b sẽn mum-a kiuug poorẽ ye.
Piig soaba: ka sõmb ne kiidã rãmbã tɩ b segl rɩɩb n kõ nebã ye; Ne a Gεriir ɭbn Abdɩllaah Al-Bagaly, sẽn yaa Ṣahaab wagellã (Wẽnd yard be a yĩnga) koεεga. (Tõnd rag n rɩka tigim taaba la rɩɩb seglg kiidã zakẽ wã, mumbã poorẽ wã, tɩ yaa kũum kũnkũma) [9]. Limaam Ahmad n togsa ne tikr sẽn be neere, [9] A ɭbn Maagε n yiis-a limor (1612) la a Limaam Ahmad (2/ 204).
La sã n yaa maan rɩɩb n tʋg n kõ bãmbã wã maa sãambã, yell ka be beenẽ ye, la sãri wã kõo sore a rog-pẽtbã la a yagsã tɩ b maan rɩɩb n tʋg n kõ-a, bala Nabiyaamã (Wẽnd pʋʋsg la A tɩlgr be a yĩnga) kibarã sẽn wa n ta a nengẽ t'a Ga'afar ɭbn Abɩɩ Ṭaalib maana kaalemã (Wẽnd yard be a yĩnga), t'a be Šaamã, Nabiyaamã sagla a zakã rãmb tɩ b maan rɩɩb n tʋg n kõ a Ga'afar zakã rãmbã n yeele: (Ad bũmb ning sẽn maand b soagl n wa-ba) [10]. [10] Muslim, kʋya ragnoore (976), An-nasaa'iy, kʋyɑ ragnoore (2034) Abʋʋ daawʋʋd, kʋya ragnoore (3234), ɭbn Maagε, bũmb ning sẽn wa kʋya yell pʋgẽ (1569) Ahmad (2/441).
La yell ka be ne kiidã rãmbã tɩ b bool b yagse, maa zẽng sẽn ka bãmbã, tɩ b wa rɩ rɩɩb ninga b sẽn kõ-ba ye, la yẽ yaa bũmb sẽn ka yãk toaaga sãri wã pʋgẽ, tõnd minimã tεka.
Piig la a yembr soaba: ka sõmb ne paga t'a kʋm kiida (bas vɩɩmã la nagmã yεla) n yɩɩg rasem a tãab ye, sã n ka a sɩdã kʋmbo.
Sã n yaa a sɩdã kʋmbo, yẽnda yaa tɩlae ne-a t'a tall woto kiuug a naase la rasem piiga, sã n ka mikame t'a tara pʋga, rẽnd yaa a pʋgã sẽn wat n roge, ne Sũnn-kãng sẽn maneg n tablg n yi Nabiyaamã nengẽ (Wẽnd pʋʋsg la A tɩlgr be a yĩnga).
La sã n yaa raoa, ka sõmb ne yẽnda t'a tʋg n kũmdẽ, n bas vɩɩmã la nagem, ned baa a yembr zugu, zem tɩ yaa rog-pẽtbã maa zẽng sẽn ka bãmbã.
Piig la a yiib soaba: sãri kõo rapã sor tɩ b kaagd yaadã wakat la wakato, sẽn na kos yolsg n kõ-ba la tẽegd kũumã yelle, la bũmb ning sẽn be kũumã poorẽ;
Nabiyaamã koεεga yĩngɑ (Wẽnd pʋʋsg la A tɩlgr be a yĩnga): {Kaag-y yaadã, tɩ ad b tẽedga yãmb laahrã} [11]. A Muslim n yiis-a a gaf-manegdgã pʋgẽ. [11] A ɭbn Maagε n yiis-a limor (1569), t'a Al-baaniy yeel t'a manegame.
La Nabiyaamã (Wẽnd pʋʋsg la A tɩlgr be a yĩnga) rag n yɩɩme n wilgd a Ṣahaabsã tɩ b sã n tʋg n kaag yaadã, bɩ b yeele: (Tɩlgr be ne yãmb a zagsã rãmbɑ sẽn yaa muumin-rãmba la lɩslaambã, la tõnd na n pʋga yãmb ne lɩslɑɑngo tɩ Wẽnd sã n sake, d kota Wẽnd t'a kõ tõnd ne yãmb laafɩ, Wẽnd na yols sẽn reng taoor tõnd pʋgẽ la yaoolem rãmbã) [12]. [12] A Muslim n yiis-a limor (975).
La sã n yaa pagbã, bãmb ka tar yaadã kaagr ye, bala Wẽnd Tẽn-tʋʋmã (Wẽnd pʋʋsg la A tɩlgr be a yĩnga) a kãaba pagb nins sẽn kaadg yaadã, sẽn paasde, b yεεsda bãmb yaadã kaagrã wa yɩ sabab n kẽes-b kɩfẽnd la sugr kongre, yaa woto bala ka sõmb ne pagbã tɩ b tʋg n yãagd kũum n nɑ n kẽng yaadẽ ye, bala Wẽnd Tẽn-tʋʋmã (Wẽnd pʋʋsg la A tɩlgr be a yĩnga) gɩdg-b lame tɩ b ra maan rẽ ye. La sãn yaa kũumã Pʋʋsg miisrẽ wã, maa Pʋʋsgã zĩigẽ, sakdame, ne pagbã la rapã fãa gilli.
Bũmb ning Wẽnd sẽn yols ɑ tigungã n kõ-dã baasg lɑ woto. La Wẽnd na pʋʋs la A tɩlg tõnd Nabiyaamã a Mʋhammad, ne a zakã rãmba la a Ṣahaabsã.
Related books
All books
Toagsg sẽn kʋʋg koεεga sẽn wiligd Lɩslaoongã wala a sẽn wa Alkʋrãan wagellã la Nabiyaamã sunnah pʋgã71 languagesToagsg sẽn kʋʋg koεεga sẽn wiligd Lɩslaoongã wala a sẽn wa Alkʋrãan wagellã la Nabiyaamã sunnah pʋgã
Lɩslaoongã yaa gaf sẽn be sʋka, n gũbg wĩngri sẽn kʋʋg koεεgɑ n wilgd Lɩslɑɑngã sẽn yaa a soaba, n vẽnegd a yẽg nins sẽn tʋg n pak n yɩɩdã, lɑ ɑ sɑglsã, la a sõmblemã, n yiisd-ɑ Lɩslɑɑngã tikr nins sẽn yaa yẽgã pʋgẽ, yẽ me la Alkʋrãan wagellã la Nabiyaamã Sunnah, la gafã b tognd-a lɑ Sãri tʋʋmã sẽn zao b rãmb fãa gilli (bɑɑlɩgsã) sẽn yaa b lɩslaamba la sẽn ka b lɩslaamba, ne bãmb buudɑ goamɑ sẽn yaa zĩig ningã fãa la zãmaan ning fãa, n lɑgem ne yεlã sẽn yõs taabã fãa lɑ allhɑɑl-rãmbã. (Kopɩ (yiisegu) sẽn tigim daliil-rãmb sẽn yi Alkʋrãan wagellẽ wã la Nɑbiyɑɑmɑ Sunnãh) 1- Lɩslaoongã yaa Wẽnd…
Toagsg sẽn kʋʋg koεεga sẽn wilgd Lɩslaoongã wεεngẽ, wala a sẽn wa Alkʋrãan wagellã la Nabiyaamã sũnnɑh pʋga61 languagesToagsg sẽn kʋʋg koεεga sẽn wilgd Lɩslaoongã wεεngẽ, wala a sẽn wa Alkʋrãan wagellã la Nabiyaamã sũnnɑh pʋga
Ne Wẽnd Yʋʋrã Albarka, sẽn yɑɑ Dũni yols zãng naabã, n leb yɑɑ Sɩd-kõatbã welg n yols naabã Lɩslaoongã. (Wãnde yɑɑ yiisgu, (Kopɩ) b sẽn n yãk daliil-rãmbã n bɑse) [1] [1] seb-kãngã tara yiisgɑ (kopɩ) a to sẽn tigim daliil-rãmbã sẽn yi Alkʋrãan wagellã la Sunnɑh, masaal fãa sẽn be a pʋgẽ ne ɑ dɑliil. Lɑ sẽn na yɩl n pɑɑm-ɑ n gese tũudɑ so-kãngã .https://islamhouse.com/ar/books/2830071 Yaa gaf sẽn be sʋka, a gũbgɑ wĩnig-rãmbɑ sẽn kʋʋg kεoogɑ n wĩngd Lɩslɑoongã sẽn yɑɑ ɑ soɑba, n vẽnegd a yẽg nins sẽn tʋg n pak n yɩɩda, la a sɑglsã, lɑ ɑ sõmblemã, n yõnged n yit a tigsg nins sẽn yaa yẽgã, yẽndɑ…
صفة الوضوء والصلاة (مرئي)45 languagesالوضوءوالصلاةصفة الوضوء والصلاة (مرئي)
Wãn-wãn to la m yõkd Koom? m koε-wʋmdre. 1 Boolgã (laandãanã) koε-wʋmdre. 2
Gom-koεεg sẽn nɑfde, n kõ lɩslɑɑm pɑɑlã32 languagesGom-koεεg sẽn nɑfde, n kõ lɩslɑɑm pɑɑlã
Sεglgã Mʋhɑmmɑd Aššɑhrii 1441 – 2020 Ne Wẽnd Yʋʋrã Albarka, sẽn yaa Dũni gũbg n yols Naabã, n yɑɑ yɑoolem dɑɑr welg n yols Naabã Gomd tɩʋʋsgo