ການອະທິບາຍຄຳກ່າວຕ່າງໆ ໃນອະຊານ
ຄະນະກຳມະການວິຊາການ ປະຈຳ ສະມາຄົມບໍລິການເນື້ອຫາສາສະໜາອິສລາມໃນພາສາຕ່າງໆ
ອະຊານ ຄືສຽງຮຽກຮ້ອງຈາກພຣະຜູ້ອະພິບານ ທີ່ມຸສລິມຈະໄດ້ຍິນຫ້າຄັ້ງໃນແຕ່ລະມື້, ເພື່ອເຕືອນສະຕິລາວເຖິງຄວາມຍິ່ງໃຫຍ່ຂອງອັລລໍຫ໌ ແລະ ເຊີນຊວນລາວໄປສູ່ຄວາມດີງາມ ແລະ ໄຊຊະນະ. ມັນເປັນຊ່ວງເວລາແຫ່ງການເຊື່ອມຕໍ່ລະຫວ່າງມະນຸດກັບພຣະຜູ້ສ້າງຂອງລາວ, ເຊິ່ງລາວຈະຕັດຂາດຈາກຄວາມສັບສົນວຸ້ນວາຍຂອງໂລກດຸນຍາ ເພື່ອຢືນຂຶ້ນວິງວອນຕໍ່ພຣະຜູ້ອະພິບານຂອງລາວ. ອະຊານບໍ່ແມ່ນພຽງແຕ່ການປະກາດບອກເວລາລະຫມາດເທົ່ານັ້ນ, ແຕ່ຫາກເປັນການຮຽກຮ້ອງສູ່ຄວາມສະຫງົບ, ການສັດທາ ແລະ ການຟື້ນຟູປະຕິຄວາມສຳພັນກັບອັລລໍຫ໌. ອະຊານນັ້ນປະກອບດ້ວຍຄວາມໝາຍອັນສູງສົ່ງ ເຊິ່ງເລີ່ມຕົ້ນດ້ວຍການໃຫ້ຄວາມຍິ່ງໃຫຍ່ແດ່ພຣະເຈົ້າ ແລະ ສິ້ນສຸດລົງດ້ວຍການຮຽກຮ້ອງເຊີນຊວນສູ່ການລະຫມາດ, ເຊິ່ງໃນນັ້ນມຸສລິມຈະໄດ້ພົບກັບຄວາມສະງົບ. ທຸກໆ ຄັ້ງທີ່ສຽງອະຊານດັງຂຶ້ນ, ມັນຈະກະຊິບໃນຫົວໃຈວ່າ ຊີວິດທີ່ແທ້ຈິງນັ້ນເລີ່ມຕົ້ນດ້ວຍການເຂົ້າໃກ້ອັລລໍຫ໌.
ອັລລໍຮຸ ອັກບັຣ ອັລລໍຮຸ ອັກບັຣ,
ອັລລໍຮຸ ອັກບັຣ ອັລລໍຮຸ ອັກບັຣ
ພຣະນາມ "ອັລລໍຫ໌" ຫມາຍເຖິງ ຜູ້ທີ່ສົມຄວນໄດ້ຮັບການເຄົາລົບກາບໄຫວ້, ເປັນພຣະນາມຂອງພຣະເຈົ້າຜູ້ຊົງສ້າງຜູ້ຊົງສູງສົ່ງ, ໂດຍທີ່ພຣະນາມອື່ນໆ ທັງໝົດຂອງພຣະອົງລ້ວນເປັນຄຸນລັກສະນະທີ່ຂຶ້ນກັບພຣະນາມນີ້.
ອັລລໍຫ໌ຄືຜູ້ຊົງເອກະອົງດຽວ, ຜູ້ທີ່ບໍ່ໄດ້ໃຫ້ກຳເນີດ ແລະ ບໍ່ໄດ້ຖືກໃຫ້ກຳເນີດ, ແລະ ພຣະອົງຄືຜູ້ຊົງສ້າງບັນດາຊັ້ນຟ້າ ແລະ ແຜ່ນດິນທັງຫລາຍ
ການກ່າວ "ອັລລໍຮຸ ອັກບັຣ", ໝາຍຄວາມວ່າ ອັລລໍຫ໌ຊົງຍິ່ງໃຫຍ່ກວ່າທຸກສິ່ງ, ແລະ ຊົງສູງສົ່ງເກີນກວ່າທີ່ຈະຖືກອ້າງເຖິງໃນສິ່ງທີ່ບໍ່ເໝາະສົມກັບຄວາມສູງສົ່ງ ແລະ ຄວາມສົມບູນຂອງພຣະອົງ.
ອັລລໍຮຸ ອັກບັຣ... ວະລີນີ້ເຕືອນສະຕິຊາວມຸສລິມວ່າ ບໍ່ມີສິ່ງໃດໃນຊີວິດນີ້ທີ່ຄວນຈະມາລົບກວນລາວໃຫ້ຫັນເຫອອກຈາກພຣະຜູ້ສ້າງໂຕລາວ, ແລະ ມະນຸດຕ້ອງດຳເນີນຊີວິດຂອງຕົນຕາມພຣະປະສົງຂອງອັລລໍຫ໌ ແລະ ບົດບັນຍັດຂອງພຣະອົງ, ບໍ່ແມ່ນຕາມອະລົມໄຝ່ຕ່ຳ ແລະ ຕັນຫາຂອງຕົນ, ເພາະອັລລໍຫ໌ຊົງຍິ່ງໃຫຍ່ກວ່າທຸກສິ່ງໃນໂລກນີ້.
ເມື່ອໄດ້ຍິນຄຳວ່າ “ອັລລໍຮຸ ອັກບັຣ” ຊ່າງຝີມືກໍ່ຈະຢຸດວຽກຂອງລາວ, ຊາວກະສິກອນກໍ່ຈະຢຸດການໄຖນາ, ພໍ່ຄ້າກໍ່ຈະປິດຮ້ານຂອງລາວ ແລະ ຄູອາຈານກໍ່ຈະຢຸດການສອນຂອງລາວ; ເພາະວ່າ ອັລລໍຫ໌ນັ້ນຊົງຍິ່ງໃຫຍ່ກວ່າທຸກໜ້າທີ່ວຽກງານ.
ການຢຸດພັກ ແລະ ຫັນໄປສູ່ການກາບໄຫວ້ພຣະອົງນີ້ ເປັນສິ່ງຢັ້ງຢືນວ່າ ອັລລໍຫ໌ນັ້ນຊົງຍິ່ງໃຫຍ່ໃນຫົວໃຈຂອງຜູ້ສັດທາ ຍິ່ງກວ່າຄວາມສຸກສະບາຍທັງຫຼາຍໃນໂລກນີ້. ອັລລໍຫ໌ຊົງຍິ່ງໃຫຍ່ເໜືອທຸກໄພພິບັດ ແລະ ອຸປະສັກທັງປວງ, ແລະ ເໜືອທຸກສະຖານະການໃນຊີວິດ, ແລະ ຜູ້ທີ່ສັດທາໃນສິ່ງນັ້ນ ຍ່ອມເຫັນວ່າວິກິດການຕ່າງໆ ເປັນເລື່ອງເລັກນ້ອຍ, ແລະ ຫົວໃຈຂອງລາວກໍ່ຈະສະຫງົບ ເພາະລາວຢູ່ກັບອັລລໍຫ໌, ເປັນຜູ້ທີ່ພໍໃຈໃນກົດກຳຫນົດຂອງພຣະອົງ, ເປັນຜູ້ທີ່ໄວ້ວາງໃຈໃນພຣະປຣີຊາສາມາດ ແລະ ການຈັດການຂອງພຣະອົງ.
ອັຊຮາດຸ ອັລລາ ອິລາຮະ ອິລລັລລໍຫ໌, ອັຊຮາດຸ ອັລລາ ອິລາຮະ ອິລລັລລໍຫ໌,
(ຂ້ອຍຂໍປະຕິຍານວ່າບໍ່ມີພຣະເຈົ້າອື່ນໃດທີ່ຄວນແກ່ການເຄົາລົບພັກດີ ນອກຈາກອັລລໍຫ໌)
ນີ້ຄືການປະຕິຍານຕົນຂໍ້ທຳອິດ, ຄວາມໝາຍຂອງມັນຄື ການຍອມຮັບຕໍ່ອັລລໍຫ໌ວ່າ ພຣະອົງຄືຜູ້ສ້າງທຸກສັບພະສິ່ງ, ເປັນພຣະຜູ້ເປັນເຈົ້າ, ເປັນຜູ້ປົກຄອງ ແລະ ເປັນຜູ້ບໍລິຫານຈັດການມັນ, ແລະ ພຣະອົງຄືຜູ້ດຽວເທົ່ານັ້ນທີ່ສົມຄວນໄດ້ຮັບການເຄົາລົບພັກດີ ໂດຍປາດສະຈາກສິ່ງອື່ນໃດ. ແລະ ບໍ່ມີຜູ້ໃດທີ່ຄູ່ຄວນແກ່ການເຄົາລົບພັກດີຢ່າງແທ້ຈິງນອກຈາກອັລລໍຫ໌ພຽງອົງດຽວ, ພຣະອົງຊົງເປັນໜຶ່ງດຽວ ບໍ່ມີພາຄີໃດໆ, ບໍ່ມີລູກ ແລະ ບໍ່ມີສິ່ງໃດສະເໝີເໝືອນພຣະອົງ; ດັ່ງນັ້ນ, ການເຄົາລົບພັກດີ (ອີບາດະຫ໌) ຈະຕ້ອງບໍ່ຖືກມອບໃຫ້ຜູ້ອື່ນນອກຈາກອັລລໍຫ໌ ແລະ ຈະຕ້ອງບໍ່ມີການວິງວອນຂໍຕໍ່ຜູ້ອື່ນນອກຈາກພຣະອົງ.
ແລະ ການປະຕິຍານນີ້ຄືການປະຕິຍານທີ່ຍິ່ງໃຫຍ່ທີ່ສຸດໃນການມີຢູ່ທັງໝົດ, ແລະ ມັນຄືຮາກຖານຂອງການສັດທາ (ອີມານ) ໃນທຸກໆ ສານທີ່ມາຈາກພຣະເຈົ້າ.
ສະນັ້ນ ບັນດານະບີທຸກໆ ທ່ານ, ຂໍຄວາມສັນຕິຈົ່ງປະສົບແດ່ພວກທ່ານ, ເຊັ່ນ: ນູຫ໌, ອິບຣໍຮີມ, ມູຊາ, ອີຊາ ຈົນເຖິງມຸຮຳມັດ, ລ້ວນໄດ້ຮຽກຮ້ອງເຊີນຊວນປະຊາຊາດຂອງພວກທ່ານໄປສູ່ການຍອມຮັບ ແລະ ການສັດທາວ່າ ບໍ່ມີພຣະເຈົ້າອື່ນໃດທີ່ສົມຄວນໄດ້ຮັບການເຄົາລົບພັກດີນອກຈາກອັລລໍຫ໌. ແລະ ມັນຄືຄຳກ່າວທີ່ອັລລໍຫ໌ໄດ້ສ້າງສັບພະສິ່ງທັງຫຼາຍຂຶ້ນມາເພາະເຫດນັ້ນ, ແລະ ໄດ້ສົ່ງບັນດາຣໍຊູລມາເພື່ອມາຢັ້ງຢືນມັນ, ແລະໄດ້ປະທານຄຳພີຕ່າງໆ ລົງມາເພື່ອຊີ້ແຈງມັນ, ແລະ ໄດ້ເຮັດໃຫ້ສວນສະຫວັນເປັນລາງວັນຕອບແທນແກ່ຜູ້ທີ່ກ່າວມັນດ້ວຍຫົວໃຈທີ່ບໍລິສຸດ, ແລະ ໄດ້ຫ້າມໄຟນະຮົກບໍ່ໃຫ້ແຕະຕ້ອງຜູ້ທີ່ຕາຍໄປໃນສະພາບທີ່ເຊື່ອໝັ້ນຢ່າງແທ້ຈິງຕໍ່ຄຳກ່າວນັ້ນ.
ນີ້ຄື ກະແຈແຫ່ງການສັດທາ, ປະຕູແຫ່ງການລອດພົ້ນ, ຮາກຖານຂອງສາດສະໜາ ແລະ ພື້ນຖານຂອງຫຼັກເຕົາຮີດ.
ເພາະຄຳໆ ນີ້ ມະນຸດຈຶ່ງຖືກຟື້ນຄືນຊີບຈາກຫລຸມຝັງສົບຂອງພວກເຂົາ ແລະ ຈະຖືກສອບສວນໃນວັນກິຍາມະຫ໌; ຜູ້ໃດທີ່ດຳລົງຊີວິດຕາມຄຳ ໆ ນີ້ ແລະ ໄດ້ສິ້ນສຸດຊີວິດລົງດ້ວຍຄຳ ໆ ນີ້, ແທ້ຈິງເຂົາກໍໄດ້ຮັບໄຊຊະນະອັນຍິ່ງໃຫຍ່, ສ່ວນຜູ້ໃດທີ່ປະຕິເສດມັນ ແລະ ບໍ່ກ່າວມັນອອກມາ ກໍສົມຄວນທີ່ຈະຢູ່ໃນໄຟນາຮົກຊົ່ວນິລັນດອນ.
ອັຊຮາດຸ ອັນນະ ມຸຮຳມະດັຣ ຣໍຊູລລຸລລໍຫ໌, ອັຊຮາດຸ ອັນນະ ມຸຮຳມະດັຣ ຣໍຊູລລຸລລໍຫ໌,
(ຂ້ອຍຂໍປະຕິຍານວ່າ ມຸຮຳມັດ ເປັນ ຣໍສູລຂອງອັລລໍຫ໌)
ຄວາມໝາຍຂອງການປະຕິຍານຕົນນີ້ ຄືການທີ່ຊາວມຸສລິມປະຕິຍານຕົນວ່າ ອັລລໍຫ໌ໄດ້ສົ່ງມຸຮຳມັດມາເປັນສາສະນະທູດທ່ານສຸດທ້າຍ, ແລະ ເປັນຜູ້ແຈ້ງຂ່າວສານຈາກພຣະຜູ້ເປັນເຈົ້າຂອງພວກເຂົາສູ່ມວນມະນຸດ, ແລະ ຊາວມຸສລິມຕ້ອງເຊື່ອໝັ້ນຢ່າງແນ່ວແນ່ວ່າ ບໍ່ມີຫົນທາງໃດໃນການເຄົາລົບພັກດີຕໍ່ອັລລໍຫ໌ ແລະ ການໄດ້ຮັບຄວາມພໍພຣະໄທຈາກພຣະອົງ ນອກຈາກການປະຕິຍານຕົນວ່າທ່ານນະບີມຸຮຳມັດ (ຊລ.) ເປັນສາສະນະທູດ, ປະຕິບັດ ແລະ ດຳເນີນຮອຍຕາມທ່ານ, ແລະ ການເຄົາລົບພັກດີຕໍ່ອັລລໍຫ໌ ຕາມບົດບັນຍັດທີ່ສາສະນະທູດມຸຮຳມັດ (ຊລ.) ໄດ້ນຳມາເຜີຍແຜ່, ແລະທຸກ ໆ ການເຄົາລົບພັກດີທີ່ມະນຸດໃຊ້ເພື່ອເຂົ້າໃກ້ຊິດຕໍ່ອັລລໍຫ໌ ທີ່ບໍ່ໄດ້ຖືກນຳມາເຜີຍແຜ່ໂດຍສາສະນະທູດ ກໍຖືເປັນການເຄົາລົບພັກດີທີ່ເປັນໂມຄະ ແລະ ຈະບໍ່ເປັນປະໂຫຍດແກ່ຜູ້ປະຕິບັດທັງໃນໂລກນີ້ ແລະ ໂລກໜ້າ, ແຕ່ກົງກັນຂ້າມ ລາວຈະຖືກສອບສວນ ແລະ ຖືກລົງໂທດ; ເພາະວ່າລາວໄດ້ເຄົາລົບພັກດີຕໍ່ອັລລໍຫ໌ ໃນສິ່ງທີ່ສາສະນະທູດຂອງພຣະອົງ ຊັລລໍລຮຸ ອະໄລຮິ ວະສັລລຳ ບໍ່ໄດ້ນຳມາເຜີຍແຜ່.
ແລະ ຄຳປະຕິຍານຕົນນີ້ລວມເຖິງວ່າ ທ່ານສາດສະດາທູດ ເປັນບ່າວຂອງອັລລໍຫ໌ ແລະ ເປັນສາດສະດາທູດຂອງພຣະຜູ້ເປັນເຈົ້າແຫ່ງສາກົນລະໂລກ, ແລະ ຍັງລວມເຖິງວ່າ ທ່ານສາດສະດາທູດ ເປັນສາດສະດາທູດຄົນສຸດທ້າຍ ຂໍຄວາມສະຫງົບສຸກຈົ່ງເກີດຂື້ນກັບພວກທ່ານ, ແລະ ບໍ່ມີນະບີທ່ານໃດອີກຫຼັງຈາກທ່ານ, ພ້ອມກັນນັ້ນຍັງລວມເຖິງຄວາມເຊື່ອຕໍ່ທຸກ ໆ ສັນຍານທີ່ທ່ານໄດ້ນຳມາ ແລະ ທີ່ຍິ່ງໃຫຍ່ທີ່ສຸດຄື ອັລ-ກຸຣອານ ອັນຊົງກຽດ, ເຊິ່ງເປັນສານອັນສູງສົ່ງສະບັບສຸດທ້າຍ ທີ່ຍັງຄົງຢູ່ໃນພາສາເດີມທີ່ຖືກປະທານລົງມາ, ຖືກປົກປ້ອງຮັກສາໄວ້ຈາກການເພີ່ມເຕີມ, ການຕັດທອນ ແລະ ການບິດເບືອນ. ແລະ ຄຳພີອັລກຸຣອານນີ້ ບໍ່ມີສິ່ງໃດທຽບເທົ່າໄດ້ໃນດ້ານໂວຫານ, ບົດບັນຍັດ ແລະ ການຊີ້ນຳ, ພຣະເຈົ້າໄດ້ທ້າທາຍມວນມະນຸດໃຫ້ຜະລິດຂຶ້ນພຽງບົດດຽວໃຫ້ປຽບສະເໝືອນຄຳພີອັລກຸຣອານ, ແຕ່ຕະຫຼອດຫຼາຍປີທີ່ຜ່ານມາຈົນຮອດທຸກມື້ນີ້ ມວນມະນຸດກໍຫຍັງຄົງບໍ່ສາມາດເຮັດສຳເລັດໄດ້.
ແລະ ການປະຕິຍານຕົນນັ້ນລວມເຖິງການທີ່ທ່ານຣໍສູລ ໄດ້ຖືກສົ່ງມາເພື່ອນຳພາຜູ້ຄົນກັບຄືນສູ່ຫຼັກເຕົາຮີດ, ເຊັ່ນດຽວກັບທີ່ບັນດານະບີກ່ອນຫນ້າທ່ານໄດ້ກະທຳມາ ເຊັ່ນ: ທ່ານນະບີອິບຣໍຮີມ, ທ່ານນະບີມູຊາ ແລະ ທ່ານນະບີອີຊາ.
ເພາະ ທ່ານຄືສາດສະນະທູດຂອງພຣະຜູ້ເປັນເຈົ້າແຫ່ງສາກົນລະໂລກ, ໂດຍເປັນການຍ່າງຕາມແນວທາງດຽວກັນກັບທີ່ບັນດານະບີທັງຫຼາຍໄດ້ເດີນຜ່ານມາ ໃນການເຜີຍແຜ່ສານຈາກພຣະຜູ້ເປັນເຈົ້າຂອງພວກທ່ານ, ພຽງແຕ່ວ່າຈະບໍ່ມີນະບີທ່ານໃດອີກແລ້ວຫຼັງຈາກທ່ານ.
ໄຮຍາອະລັສ ຊໍລາຫ໌, ໄຮຍາອະລັສ ຊໍລາຫ໌.
ຄວາມໝາຍ: ບັນດາຜູ້ສັດທາເອີຍ ຈົ່ງຫັນມາສູ່ການເຄົາລົບອີບາດະຫ໌ພຣະຜູ້ເປັນເຈົ້າຂອງພວກເຈົ້າ, ເພາະແທ້ຈິງພຣະອົງເປັນຜູ້ຊົງອະໄພໂທດ ຜູ້ຊົງເມດຕາສະເຫມີ, ພຣະອົງຊົງຮັບການກັບຕົວ, ແລະ ຊົງອະໄພໃນຄວາມຜິດບາບທັງຫຼາຍ.
ຖືເປັນກຽດອັນຍິ່ງໃຫຍ່ ທີ່ອັລລໍຫ໌ໄດ້ຊົງບັນຊາໃຫ້ມະນຸດຄົນໜຶ່ງ ໃນທຸກໆ ສະຖານທີ່ ທີ່ມີກຸ່ມຊາວມຸສລິມອາໄສຢູ່ ເພື່ອປະກາດການເອີ້ນ, ແລະ ເຊີນຊວນພວກເຂົາ 5 ເວລາໃນທຸກໆ ມື້ ໂດຍກ່າວກັບພວກເຂົາວ່າ: ຈົ່ງພາກັນມາສູ່ການເຄົາລົບພັກດີຕໍ່ພຣະເຈົ້າຂອງພວກທ່ານເຖີດ.
ນີ້ຄືການຮຽກຮ້ອງ ແລະ ການຕັກເຕືອນແກ່ບັນດາຜູ້ສັດທາ ວ່າໄດ້ຮອດເວລາຂອງພວກເຂົາແລ້ວ ທີ່ຈະຕ້ອງອີບາດະຫ໌ຕໍ່ພຣະຜູ້ເປັນເຈົ້າຂອງພວກເຂົາ, ແລະ ພວກເຂົາຕ້ອງລະຖິ້ມສິ່ງທີ່ເຮັດໃຫ້ພວກເຂົາຫຍຸ້ງຢູ່ກັບເລື່ອງຂອງໂລກນີ້, ແລະ ຫັນໜ້າມາສູ່ການອີບາດະຫ໌; ແລະ ໃຫ້ພວກເຂົາລະຖິ້ມສິ່ງທີ່ຢູ່ໃນມືຂອງພວກເຂົາ ບໍ່ວ່າຈະເປັນການຄ້າຂາຍ ຫຼື ການກະສິກຳ ແລະ ຫັນໜ້າມາສູ່ອັລລໍຫ໌, ນີ້ຄືຫຼັກຖານທີ່ພິສູດເຖິງຄວາມສັດຈິງຂອງການສັດທາ, ແລະ ວ່າການສັດທານັ້ນສຳຄັນເໜືອກວ່າທຸກຄວາມສຸກສຳລານຂອງໂລກນີ້.
ເປັນການຮຽກຮ້ອງເຊີນຊວນມະນຸດສູ່ການລະຫມາດ, ເຊິ່ງເປັນການພົວພັນໂດຍກົງລະຫວ່າງບ່າວກັບພຣະຜູ້ເປັນເຈົ້າຂອງເຂົາ, ເປັນການອີບາດະຫ໌ທີ່ທຳລາຍລະບົບຊົນຊັ້ນ ແລະ ເຮັດໃຫ້ມະນຸດເທົ່າທຽມກັນຕໍ່ໜ້າພຣະຜູ້ເປັນເຈົ້າຂອງພວກເຂົາ.
ໄຮຍາ ອະລັລ ຟາລາຫ໌, ໄຮຍາ ອະລັລ ຟາລາຫ໌.
ຄວາມສຳເລັດ ຫມາຍເຖິງຄວາມພໍໃຈ, ໄຊຊະນະ, ຄວາມປອດໄພ ແລະ ການຫຼຸດພົ້ນຈາກໂລກນີ້ ແລະ ໂລກໜ້າ, ຄວາມສຸກຕະຫຼອດການ, ແລະ ການຖືກນຳພາສູ່ແນວທາງທີ່ທ່ຽງກົງ.
ແລະ ໜຶ່ງໃນຄວາມໝາຍຂອງມັນກໍຄື ໄຊຊະນະໃນການໄດ້ຮັບຄວາມພໍໃຈຈາກອັລລໍຫ໌, ການໄດ້ເຂົ້າສະຫວັນ ແລະ ການຫຼຸດພົ້ນຈາກໄຟນາຮົກ; ເພາະວ່າຜູ້ທີ່ສັດທາ ແລະ ເຮັດລະຫມາດນັ້ນ ຖືວ່າລາວໄດ້ຮັບໄຊຊະນະແລ້ວ, ແລະ ຜູ້ທີ່ໄດ້ຮັບໄຊຊະນະນັ້ນ, ລາວກໍຈະຫຼຸດພົ້ນ ແລະ ໄດ້ຮັບຄວາມສຸກຕະຫຼອດການໃນສະຫວັນ.
ແທ້ຈິງແລ້ວ ຜູ້ອະຊານ ຍ່ອມເຕືອນບັນດາຜູ້ສັດທາ ໃນທຸກໆ ການລະຫມາດວ່າ ຈົ່ງຫັນໜ້າມາສູ່ຄວາມປອດໄພ ແລະ ຄວາມສະຫງົບສຸກ, ຄວາມສະງົບນິ່ງຂອງຫົວໃຈ, ຄວາມບໍລິສຸດຂອງຈິດວິນຍານ, ແລະ ຄວາມຜາສຸກທັງໃນໂລກນີ້ ແລະ ໂລກໜ້າ.
ອັລລໍຮຸ ອັກບັຣ, ອັລລໍຮຸ ອັກບັຣ, ອັລລໍຫ໌ຊົງຍິງໃຫຍ່, ອັລລໍຫ໌ຊົງຍິງໃຫຍ່.
ລາອິລາຮະ ອິລລັລລໍຫ໌, ບໍ່ມີພຣະເຈົ້າອື່ນໃດນອກຈາກອັລລໍຫ໌.
ການຈົບທ້າຍດ້ວຍການຕັກບີຣ ແລະ ຫຼັກເຕົາຮີດ
ການອາຊານຈົບລົງດ້ວຍການກ່າວຊ້ຳປະໂຫຍກ "ອັລລໍຮຸ ອັກບັຣ", ແລະ ການຢືນຢັນຄຳວ່າ "ລາອິລາຫະ ອິລລັລລໍຫ໌". ທັງສອງປະໂຫຍກນີ້ເປັນການຢໍ້າເຕືອນເຖິງຄວາມໝາຍທີ່ກ່າວມາກ່ອນໜ້ານີ້, ແລະ ເປັນແກນຫຼັກໃນການດຳລົງຊີວິດຂອງມະນຸດ.
ຄວາມຈິງນີ້ຄືຄວາມຈິງທີ່ສຸດຂອງຈັກກະວານ ແລະ ການມີຢູ່ຂອງສັບພະສິ່ງ, ບໍ່ວ່າມະນຸດຈະເຂົ້າໃຈມັນ ຫຼື ບໍ່ເຂົ້າໃຈກໍ່ຕາມ, ຈະຮູ້ ຫຼື ບໍ່ຮູ້ກໍ່ຕາມ; ແທ້ຈິງແລ້ວ ບັນດາຄວາມຈິງອັນຍິ່ງໃຫຍ່ນັ້ນ ຈະບໍ່ໄດ້ຮັບຄວາມເສຍຫາຍຈາກການບໍ່ຮັບຮູ້ຂອງມະນຸດບາງຄົນເລີຍ. ສັດຈະທຳນີ້ຈະບໍ່ມີການປ່ຽນແປງ ບໍ່ວ່າເວລາຈະຜ່ານໄປດົນນານພຽງໃດ ຫຼື ຈະມີເຫດການໃດໆ ເກີດຂຶ້ນກໍ່ຕາມ, ນັ້ນກໍ່ຄື ອັລລໍຫ໌ຊົງຍິ່ງໃຫຍ່ເໜືອທຸກສັບພະສິ່ງ, ແລະ ພຣະອົງຄືພຣະເຈົ້າທີ່ແທ້ຈິງ, ພຣະອົງຄືຜູ້ດຽວເທົ່ານັ້ນທີ່ສົມຄວນໄດ້ຮັບການເຄົາລົບບູຊາ, ແລະ ການເຄົາລົບບູຊາສິ່ງອື່ນນອກເໜືອຈາກພຣະອົງນັ້ນລ້ວນເປັນໂມຄະ ບໍ່ຖືກຕ້ອງ.
ນີ້ຄືການເຊີນຊວນເພື່ອໃຫ້ຄວາມຍິ່ງໃຫຍ່ແກ່ສິ່ງທີ່ອັລລໍຫ໌ໄດ້ຊົງໃຫ້ຄວາມຍິ່ງໃຫຍ່ໄວ້, ແລະ ການເປັນພະຍານຕໍ່ອັລລໍຫ໌ດ້ວຍສິ່ງທີ່ພຣະອົງໄດ້ຊົງເປັນພະຍານແກ່ພຣະອົງເອງ, ແລະ ທີ່ບັນດາຣໍ່ຊູລຂອງພຣະອົງໄດ້ເປັນພະຍານຕໍ່ພຣະອົງ, ແລະ ທີ່ບັນດາຜູ້ສັດທາໄດ້ເປັນພະຍານຕໍ່ສິ່ງນັ້ນ.
ສະຫຼຸບແລ້ວ, ອະຊານບໍ່ແມ່ນພຽງແຕ່ການຮຽກຮ້ອງສູ່ການລະຫມາດ, ແຕ່ມັນເປັນການຮຽກຮ້ອງໄປສູ່ຄວາມສຳເລັດ, ໄຊຊະນະ ແລະ ຄວາມຈະເລີນ, ມັນເປັນສານທີ່ດັງກ້ອງກັງວານໃນບັນດາມັສຍິດ 5 ເທື່ອຕໍ່ມື້, ເພື່ອປຸກບັນດາດວງໃຈໃຫ້ຕື່ນຂຶ້ນ; ແລະ ເພື່ອເຕືອນສະຕິພວກເຮົາວ່າ ອັລລໍຫ໌ຊົງຢູ່ໃກ້, ແລະ ຄວາມຈິງສະຫງົບສຸກນັ້ນເປັນສິ່ງທີ່ເປັນໄປໄດ້, ແລະ ເສັ້ນທາງໄປສູ່ຄວາມສຳເລັດນັ້ນເລີ່ມຕົ້ນດ້ວຍການລະຫມາດ ແລະ ຄວາມສຳພັນລະຫວ່າງບ່າວ ແລະ ພຣະຜູ້ສ້າງຂອງລາວ.
ດັ່ງນັ້ນ ຈົ່ງກ່າວຕາມຜູ້ປະກາດເຊີນຊວນສູ່ການລະຫມາດ: ອັລລໍຮ໌ ຜູ້ຊົງຍິ່ງໃຫຍ່, ອັລລໍຮ໌ ຜູ້ຊົງຍິ່ງໃຫຍ່, ບໍ່ມີພຣະເຈົ້າອື່ນໃດນອກຈາກອັລລໍຮ໌, ຈົ່ງກ່າວຄຳປະຕິຍານແຫ່ງເອກະພາບ, ແລະ ຈົ່ງເປັນພະຍານໃນສິ່ງທີ່ອັລລໍຮ໌ຊົງເປັນພະຍານໃຫ້ແກ່ພຣະອົງເອງ, ແລະໃນສິ່ງທີ່ບັນດາສາດສະດາທູດຂອງພຣະອົງໄດ້ນຳມາຈາກສັດຈະທຳ, ແລ້ວເຈົ້າຈະໄດ້ເປັນສ່ວນຫນຶ່ງຂອງຜູ້ທີ່ໄດ້ຮັບໄຊຊະນະ, ບັນດາຜູ້ທີ່ເປັນມຸສລິມ ແລະ ຜູ້ທີ່ໃຫ້ເອກະພາບຕໍ່ພຣະອົງ.
ຈົ່ງເປີດໃຈຂອງທ່ານເພື່ອການສັດທາ, ແລະ ຈົ່ງກ່າວວ່າ: “ຂ້ອຍຂໍປະຕິຍານວ່າ ບໍ່ມີພຣະເຈົ້າອື່ນໃດທີ່ຄວນແກ່ການເຄົາລົບພັກດີຢ່າງແທ້ຈິງນອກຈາກອັລລໍຫ໌ ແລະ ຂ້ອຍຂໍປະຕິຍານວ່າມຸຮຳມັດເປັນສາສະນະທູດຂອງອັລລໍຫ໌”, ແລ້ວທ່ານຈະໄດ້ເຂົ້າສູ່ຄວາມເມດຕາຂອງອັລລໍຫ໌, ໄດ້ຮັບຄວາມສຸກໃນໂລກນີ້ ແລະ ການໄດ້ຮັບໄຊຊະນະໃນໂລກໜ້າ, ແລະ ຈະຖືກໃຫ້ຟື້ນຄືນຊີບໃນວັນກິຍາມະຫ໌ ໃນໝູ່ຂອງບັນດາຜູ້ສັດທາ.
