అజాన్ పదాల యొక్క వివరణ

అజాన్ పదాల యొక్క వివరణ

ఇస్లామీయ విషయావళిని భాషలవారీగా అందించేందుకు సేవ చేసే సంఘం యొక్క శాస్త్రీయ కమిటీ

అజాన్ ఒక దైవిక పిలుపు ముస్లిము దానిని రోజుకు ఐదు సార్లు వింటాడు. అది అల్లాహ్ యొక్క గొప్పతనాన్ని గుర్తు చేస్తుంది మరియు అతన్ని మంచి మరియు విజయం (ఫలాహ్) వైపు ఆహ్వానిస్తుంది. ఇది మనిషి మరియు తన సృష్టికర్తతో సంబంధం కలిగే క్షణం; ఆ వేళలో అతడు లోకపు కోలాహలంను వీడి, తన ప్రభువుతో సంభాషించడానికి నిలబడతాడు. “అజాన్” అనేది కేవలం నమాజ్ సమయాన్ని ప్రకటించే ఒక ప్రకటన మాత్రమే కాదు, అది మనశ్శాంతికి, విశ్వాసానికి మరియు అల్లాహ్‌తో ఉన్న సంబంధాన్ని పునరుద్ధరించడానికి ఒక పిలుపు. అజాన్ లో మహోన్నతమైన అర్థాలు నిక్షిప్తమై యున్నవి; అవి అల్లాహ్ ను మహిమపరచుటతో ప్రారంభమై,ముస్లింలు తమ శాంతిని పొందే నమాజ్ వైపు ఆహ్వానించడంతో ముగుస్తాయి. ప్రతి సారి అజాన్ పిలుపు ఇవ్వబడినప్పుడు, నిజమైన జీవితం అల్లాహ్‌కు దగ్గరగా ఉండటం నుండే మొదలవుతుందని అది హృదయంలో గుసగుసలాడుతుంది.

అజాన్ పదములు:

అల్లాహు అక్బర్ అల్లాహు అక్బర్, అల్లాహు అక్బర్ అల్లాహు అక్బర్

అల్లాహు అక్బర్ (అల్లాహ్ అందరికంటే గొప్పవాడు)

2"అల్లాహ్" అనే పదం "అల్-మా'లూహ్" (అంటే ఆరాధించబడేవాడు) నుండి వచ్చింది. ఈ పదం అత్యున్నతమైన సృష్టికర్త, ప్రభువు యొక్క నామం. అల్లాహ్ యొక్క ఇతర పవిత్ర నామాలన్నీ ఈ ప్రధాన నామాన్ని అనుసరించేవిగా మరియు ఆయన గుణాలను వర్ణించేవిగా ఉంటాయి. అల్లాహ్ ఏకైకుడు, అద్వితీయుడు. ఆయనకు సంతానం లేదు, ఆయన కూడా ఎవరి సంతానం కాదు. ఆయనే ఆకాశాలను మరియు భూమిని సృష్టించినవాడు.

“అల్లాహు అక్బర్” అని పలకడం అంటే: అల్లాహ్ అన్నిటికన్నా మరియు అందరికన్నా గొప్పవాడు; మరియు ఆయన వైభవానికి, పరిపూర్ణతకు తగని ఏ విషయాన్ని ఆయనకు ఆపాదించలేనంత మహోన్నతుడు.

అల్లాహ్ అందరి కంటే గొప్పవాడు. ఈ వాక్యం ముస్లింకు ఈ జీవితం లో తన సృష్టికర్త నుండి తన దృష్టిని ఏదీ మళ్లించకూడదని గుర్తు చేస్తుంది; మరియు మనిషి తన జీవితాన్ని అల్లాహ్ యొక్క చిత్తానుగుణంగా, ఆయన ధర్మశాసనానుసారం నడిపించవలెనని, తన స్వఇష్టాలనీ వాంఛలననీ అనుసరించి కాదు అని బోధిస్తుంది; ఎందుకంటే అల్లాహ్ ఈ లోకంలోని సమస్తానికన్నా కూడా గొప్పవాడు.

"అల్లాహు అక్బర్" (అల్లాహ్ గొప్పవాడు) అనే పదం వినిపించినప్పుడు, పారిశ్రామికుడు తన పనిని ఆపేస్తాడు, రైతు తన పొలం దున్నడం ఆపేస్తాడు, వ్యాపారి తన దుకాణాన్ని మూసివేస్తాడు, మరియు ఉపాధ్యాయుడు తన పాఠం చెప్పడం నిలిపివేస్తాడు. ఎందుకంటే అల్లాహ్ ప్రతి పని మరియు వృత్తి కంటే గొప్పవాడు. ఈ ఆగిపోవడం మరియు ఆరాధన వైపు మళ్లడం, ముస్లిం యొక్క హృదయంలో అల్లాహ్ ప్రపంచంలోని ప్రతి వస్తువు కన్నా గొప్పవాడని నమ్మడానికి ఒక రుజువు. అల్లాహ్ ప్రతి ఆపద, కష్టం మరియు జీవితంలోని ప్రతి పరిస్థితి కంటే గొప్పవాడు. ఎవరైతే ఈ సత్యాన్ని విశ్వసిస్తారో, వారు సంక్షోభాలను చిన్నవిగా చూస్తారు, మరియు వారి హృదయం ప్రశాంతంగా ఉంటుంది. ఎందుకంటే వారు అల్లాహ్ తో ఉన్నారు, ఆయన నిర్ణయాలతో సంతృప్తి చెంది, ఆయన జ్ఞానం మరియు ప్రణాళికపై విశ్వాసం కలిగి ఉంటారు.

అష్ హదు అన్ లాఇలాహ ఇల్లల్లాహ్, అష్ హదు అన్ లాఇలాహ ఇల్లల్లాహ్

అల్లాహ్ తప్ప వేరొక ఆరాధ్యుడు లేడని నేను సాక్షమిస్తున్నాను

ఇదే మొదటి సాక్ష్యం, మరియు దాని అర్థం: అల్లాహ్ సమస్తాన్ని సృష్టించిన సృష్టికర్త, సమస్తానికి ప్రభువు, యజమాని, నిర్వహణకర్త అని అంగీకరించడం; అలాగే ఆరాధించబడవలసినవాడు ఆయన ఒక్కడే, ఆయన తప్ప మరెవ్వరు కాదని నిర్ధారించడం; నిజంగా ఆరాధించబడే హక్కు అల్లాహ్‌కు తప్ప మరెవ్వరికీ లేదని స్థాపించడం; అలాగే ఆయన ఏకైకుడు—ఆయనకు భాగస్వామి లేదు, సంతానం లేదు సమానుడు లేడు  ఆరాధనను అల్లాహ్‌కు తప్ప మరెవ్వరికీ సమర్పించకూడదు, అలాగే అల్లాహ్‌ను తప్ప మరెవరినీ పిలువకూడదు.

ఈ సాక్ష్యం విశ్వంలోనే అత్యంత గొప్ప సాక్ష్యం. ఇది అన్ని దైవిక సందేశాలలో విశ్వాసానికి మూలం. ఆదం నుండి ముహమ్మద్ సల్లల్లాహు అలైహి వసల్లం వరకు వచ్చిన ప్రవక్తలందరూ, నూహ్, ఇబ్రాహీం, మూసా మరియు ఈసా అలైహిముస్సలాం వంటి వారు కూడా, తమ ప్రజలను (అల్లాహ్ తప్ప వేరే ఆరాధ్యుడు లేడు) అనే సత్యాన్ని అంగీకరించమని, స్వీకరించమని మరియు విశ్వసించమని ఆహ్వానించారు. ఇది ఏ మాట కోసమైతే అల్లాహ్ సృష్టిని సృష్టించాడో ఆ మాట. దానిని స్థాపించడానికి ఆయన ప్రవక్తలను పంపాడు, దానిని స్పష్టం చేయడానికి గ్రంథాలను అవతరింపజేశాడు. ఎవరు దీనిని తమ హృదయం నుండి స్వచ్ఛంగా తీసుకువస్తారో వారికి స్వర్గాన్ని ప్రతిఫలంగా ఇచ్చాడు మరియు ఎవరు దీనిపై దృఢమైన విశ్వాసంతో మరణిస్తారో వారిపై నరకాన్ని నిషేధించాడు.

ఇది విశ్వాసానికి తాళం, విమోచనానికి ద్వారం, ధర్మానికి మూలం మరియు ఏకత్వానికి ఆధారం."

ఈ వాక్యం కోసమే ప్రజలు తమ సమాధుల నుండి లేపబడతారు మరియు తీర్పుదినం రోజున విచారించబడతారు. ఎవరైతే దీని ప్రకారం జీవించి, దానితో తమ జీవితాన్ని ముగిస్తారో, వారు గొప్ప విజయాన్ని సాధిస్తారు. ఎవరు దీనిని తిరస్కరించి, పలకకుండా మరణిస్తారో, వారు నరకంలో శాశ్వతంగా ఉండటానికి అర్హులు.

అష్ హదు అన్న ముహమ్మదర్ర సూలుల్లాహ్, అష్ హదు అన్న ముహమ్మదర్ర సూలుల్లాహ్

ముహమ్మద్ అల్లాహ్ యొక్క సందేశహరుడని నేను సాక్షమిస్తున్నాను

మఈ సాక్ష్యం యొక్క అర్థం ఏమిటంటే, అల్లాహ్ ముహమ్మద్ (సల్లల్లాహు అలైహి వసల్లం) గారిని దైవ సందేశహారులకు ముగింపుగా పంపారని, మరియు ప్రజలకు వారి ప్రభువు సందేశాన్ని చేరవేశారని ముస్లిం సాక్ష్యం ఇవ్వడం. ఒక ముస్లిం స్పష్టంగా తెలుసుకోవలసినది ఏమిటంటే, అల్లాహ్‌ను ఆరాధించడానికి మరియు ఆయన ఇష్టాన్ని పొందే ఏకైక మార్గం, ముహమ్మద్ (సల్లల్లాహు అలైహి వసల్లం) గారు అల్లాహ్ యొక్క సందేశహరుడు అని సాక్ష్యం ఇవ్వడం, ఆయనను అనుసరించడం మరియు ఆయనను ఆదర్శంగా తీసుకోవడం ద్వారానే సాధ్యం. ముహమ్మద్ (సల్లల్లాహు అలైహి వసల్లం) గారు అందించిన దైవ నియమావళి ప్రకారం మాత్రమే అల్లాహ్‌ను ఆరాధించాలి. ఏ ఆరాధన అయితే మానవుడు అల్లాహ్‌కు దగ్గరవ్వడానికి చేస్తాడో, కానీ ఆ ఆరాధన గురించి ప్రవక్త (సల్లల్లాహు అలైహి వసల్లం) గారు అందించలేదో, ఆ ఆరాధన చెల్లనిది మరియు అది దానిని ఆచరించిన వారికి ఈ లోకంలో గానీ, పరలోకంలో గానీ ఏమాత్రం ప్రయోజనం కలిగించదు. అంతేకాకుండా, దాని కోసం అతడు లెక్క తీసుకోబడతాడు మరియు శిక్షించబడతాడు. ఎందుకంటే అతను తన సందేశహరుడు అందించని పద్ధతిలో అల్లాహ్‌ను ఆరాధించాడు.

ఈ సాక్ష్యం, ప్రవక్త ముహమ్మద్ సల్లల్లాహు అలైహి వసల్లం గారు అల్లాహ్ యొక్క దాసుడు మరియు లోకాలకు ప్రభువు యొక్క సందేశహరుడు అని కూడా కలిగి ఉంటుంది. అదే విధంగా, ఈ సాక్ష్యం ప్రవక్త సల్లల్లాహు అలైహి వసల్లం గారు సందేశహరుల పరంపరలో చివరివారని, మరియు ఆయన తర్వాత మరే ప్రవక్త లేరని కూడా కలిగి ఉంటుంది. అంతేకాకుండా, ఇది ఆయన తీసుకువచ్చిన అన్ని సూచనలపై విశ్వాసాన్ని కూడా కలిగి ఉంటుంది, వాటిలో అత్యంత గొప్పది దివ్య ఖుర్ఆన్. ఇది అంతిమ దైవ సందేశం, మరియు అది ఏ భాషలో అవతరించబడిందో అదే భాషలో నేటికీ ఉంది. దానిలో ఎటువంటి కలపడం, తీసివేయడం లేదా మార్పు లేకుండా సంరక్షించబడింది. మరియు ఈ పవిత్ర దివ్య ఖుర్ఆన్ దాని భాషా నైపుణ్యంలో, దాని చట్టాలలో మరియు దాని మార్గదర్శకత్వంలో సాటి లేనిది. నిజానికి, దాని వంటి ఒకే ఒక్క అధ్యాయాన్ని (సూరాను) అయినా తీసుకురావాలని అల్లాహ్ మానవాళికి సవాలు విసిరాడు. సంవత్సరాలు గడిచినా, ఈ రోజు వరకు వారు ఆ సవాలును స్వీకరించలేక విఫలమయ్యారు, మరియు మానవజాతి ఈ విషయంలో అసమర్థంగానే ఉంది.

ఈ సాక్ష్యం, ప్రవక్త ముహమ్మద్ సల్లల్లాహు అలైహి వసల్లం గారు, అంతకు ముందు వచ్చిన ఇబ్రాహీం, మూసా మరియు ఈసా (అలైహిముస్సలాం) వంటి ప్రవక్తల వలె, ప్రజలను తిరిగి ఏకత్వం (తౌహీద్) వైపు తీసుకురావడానికి వచ్చారని కూడా కలిగి ఉంది. ఆయన సర్వలోకాలకు ప్రభువు యొక్క సందేశహరుడు, తన ప్రభువు సందేశాలను తెలియజేయడంలో ప్రవక్తలందరూ నడిచిన మార్గంలోనే నడిచారు. అయితే, ఆయన తర్వాత మరే ప్రవక్త లేడు.

హయ్య అలస్సలాహ్, హయ్య అలస్సలాహ్

నమాజు వైపునకు తరలిరండి

వాక్యార్థం: ఓ విశ్వాసులారా, మీ ప్రభువు ఆరాధన వైపునకు వచ్చి చేరండి; నిశ్చయంగా ఆయన మన్నించేవాడు, కరుణామయుడు; ఆయన పశ్ఛాత్తాపాన్ని స్వీకరిస్తాడు, పాపములను మన్నించివేస్తాడు.

ఎంత గొప్ప గౌరవమో! ముస్లిముల సమూహం ఉన్న ప్రతి ప్రదేశంలో అజాన్ పిలుపును ప్రకటించమని, ప్రతి రోజు ఐదు పూటలు వారిని పిలిచి: “రండి, మీ ప్రభువు ఆరాధన వైపు ముందుకు రండి” అని చెప్పమని అల్లాహ్ తఆలా ఒక మనిషికి ఆజ్ఞాపించడం.

ఇది విశ్వాసపరులకు పిలుపు మరియు హితబోధన — తమ ప్రభువైన అల్లాహ్‌కు ఆరాధన చేయుటకు వారి సమయము వచ్చియున్నదని, మరియు వారిని నిమగ్నం చేసే ప్రాపంచిక విషయాలను విడిచిపెట్టి ఆరాధన వైపు దృష్టి మళ్లించవలెనని; తమ చేతిలో ఉన్న వ్యాపారమో వ్యవసాయమో వదలి అల్లాహ్ వైపు దృష్టి సారించవలెనని. ఇది విశ్వాసము యొక్క సత్యత్వమునకు సాక్ష్యము, మరియు అది ఇహలోకపు సమస్త భోగాలకన్నా ముందుగా ప్రాధాన్యము కలిగినది.

ఇది ప్రజలను నమాజు వైపుకు పిలిచే ఆహ్వానం; అది దాసుడు తన ప్రభువుతో కలిగే ప్రత్యక్ష బంధం. ఇది తారతమ్య భావాన్ని చెరిపివేసి ప్రజలను వారి ప్రభువు సమక్షంలో సర్వసమానులుగా నిలబెట్టే ఆరాధన.

హయ్య అలల్‌ఫలాహ్, హయ్య అలల్‌ఫలాహ్

సాఫల్యం వైపు తరలి రండి

"అల్-ఫలాహ్" అంటే సంతృప్తి, విజయం, భద్రత, ఈ లోకంలో మరియు పరలోకంలో విమోచనం, శాశ్వత సంతోషం మరియు సరైన మార్గానికి మార్గదర్శకత్వం.

దాని అర్థాలలో అల్లాహ్ మన్నతతో సాఫల్యం, స్వర్గంలో ప్రవేశం మరియు నరకాగ్ని నుండి ముక్తి ఉన్నాయి; ఎందుకంటే ఎవరు విశ్వసించి నమాజు చేసారో, నిశ్చయంగా అతను విజయవంతుడయ్యాడు, మరియు ఎవరు విజయవంతుడయ్యారో అతడు రక్షింపబడి స్వర్గంలో శాశ్వత నిత్య నివాసాన్ని పొందుతాడు.

ముఅజ్జిన్ ప్రతి నమాజు సందర్భంలో ముమినులకు స్మరణ చేసి ఇలా పలుకుతున్నాడు: శాంతి-భద్రత వైపు, హృదయ శాంతి వైపు, ఆత్మ పరిశుద్ధత వైపు, అలాగే ఇహలోకములోను పరలోకములోను సౌఖ్యం వైపు ముందుకు రండి.

అల్లాహు అక్బర్, అల్లాహు అక్బర్, లా ఇలాహ ఇల్లల్లాహు

తక్బీర్ మరియు తౌహీద్ (ఏకత్వం) ద్వారా సమాప్తం

అజాను "అల్లాహు అక్బర్" అనే వాక్యం యొక్క పునరావృతంతో మరియు "లా ఇలాహ ఇల్లల్లాహ్" అనే వాక్యం యొక్క నిర్ధారణతో ముగుస్తుంది. ఈ రెండు వాక్యాలు అంతకు ముందు చెప్పిన అర్థాలను ధృవీకరిస్తాయి, మరియు వీటిపైనే మానవ ఉనికి ఆధారపడి ఉంది. ఈ సత్యం, అత్యంత నిజమైన సార్వత్రిక, ఉనికి సంబంధిత సత్యం. మానవుడు దానిని గ్రహించినా, గ్రహించకపోయినా, దాని గురించి తెలిసినా, తెలియకపోయినా అది సత్యమే. ఎందుకంటే, గొప్ప సత్యాలకు కొంతమంది ప్రజల అజ్ఞానం వల్ల ఎటువంటి హాని జరగదు. ఈ సత్యం కాలం ఎంత దీర్ఘమైనా, సంఘటనలు ఎంత వరుసగా సంభవించినా మారదు, రూపాంతరం చెందదు. అదేంటంటే: అల్లాహ్ ఆయనే అన్నింటికన్న గొప్పవాడు, అల్లాహ్ ఆయనే నిజ ఆరాధ్యదైవం, ఆయన ఒక్కడే ఆరాధనకు అర్హుడు, ఆయన తప్ప ఇతరులను ఆరాధించడం అసత్యం.

ఇది అల్లాహ్ ఘనపరచిన దానిని మనమూ ఘనపరచమనే పిలుపు; అలాగే అల్లాహ్ స్వయంగా తనకోసం తానే సాక్ష్యంగా పేర్కొన్న దానిపై మనమూ సాక్ష్యమివ్వడం—అదే విషయంపై దూతలైన ప్రవక్తలు (అలైహిముస్సలాం) సాక్ష్యమిచ్చారు, విశ్వాసులు కూడా సాక్ష్యమిచ్చారు.

సౌముగింపుగా: అజాన్ కేవలం నమాజుకు పిలుపు మాత్రమే కాదు; అది ఫలాహ్, విజయం మరియు సఫలతకు పిలుపు. ఇది రోజుకు ఐదు పూటలు మస్జిద్‌లలో మారుమ్రోగే సందేశము, హృదయాలను మేల్కొలుపుటకు; అల్లాహ్ సమీపంలోనే ఉన్నాడని మనకు స్మరింపజేయుటకు; ఆత్మశాంతి సాధ్యమని తెలియజేయుటకు; మరియు ఫలాహ్ వైపు దారి నమాజుతో, అలాగే దాసుడు తన సృష్టికర్తతో కలిగే సంబంధంతో ప్రారంభమవుతుందని బోధించుటకు.

కాబట్టి ముఅజ్జిన్ (మస్జిద్ లో అజాన్ పలుకు వ్యక్తి) తో కలసి ఇలా పలుకు: “అల్లాహు అక్బర్, అల్లాహు అక్బర్”, “లా ఇలాహ ఇల్లల్లాహ్”. తౌహీదు యొక్క సాక్ష్యమును పునరావర్తించు, అల్లాహ్ తనకు తానే సాక్ష్యమిచ్చిన దానిపట్లను, ఆయన సందేశహరులు తెచ్చిన సత్యమునుపట్లను సాక్ష్యమిచ్చు; అప్పుడు నీవు విజయులలోను, ఏకదైవవాద ముస్లింలలోనూ ఉంటావు.

నీ హృదయాన్ని విశ్వాసానికి తెరువు, మరియు పలుకు: "అష్ హదు అల్లా ఇలాహ ఇల్లల్లాహ్, వఅష్హదు అన్న ముహమ్మదర్ర సూలుల్లాహ్", అప్పుడు నీవు అల్లాహ్ కరుణలో ప్రవేశిస్తావు, ఈ లోకంలో నిజమైన సంతోషాన్ని సాధిస్తావు, పరలోకంలో విముక్తిని పొందుతావు, పునరుత్థాన దినాన విశ్వాసుల సమూహంలో లేపబడుతావు.