الإسلام دين رسل الله

އިސްލާމްދީނަކީ މާތް الله ގެ ރަސޫލުންގެ ދީނެވެ

އިސްލާމްކަމަކީ: ކައުނު އުފެއްދެވި ޚާލިޤު އަދި އެ ކައުނު ތަދުބީރުކުރައްވާ ﷲ އަށް ބޯލަނބާ އަމާންދިނުމެވެ. އަދި އެކަލާނގެއަށް ލޯތްބާއި ޤަދަރާއެކު ކިޔަމަންވުމެވެ. އިސްލާމްކަމުގެ އަސާސަކީ މާތް الله އަށް އީމާންވެ، އަދި އެކަލާނގެއީ ޚާލިޤުކަމާއި އެނޫން ހުރިހާ އެއްޗެއް އެއީ އުފެއްދެވިގެންވާ މަޚްލޫޤުންކަމާއި، އަދި އެކަލާނގެއީ އެއްވެސް ބައިވެރިއެއްނެތި އަޅުކަން ހަމައެކަނި ޙައްޤުވާ ފަރާތްކަމަށް އީމާންވުމެވެ. އެކަލާނގެ ފިޔަވައި ޙައްޤު ގޮތުގައި އަޅުކަންވެވޭ ފަރާތެއް ނުވެއެވެ. އެންމެ ރިވެތި ނަންފުޅުތަކާއި އެންމެ މަތިވެރި ޞިފަފުޅުތައް އެކަލާނގެއަށް ލިބިވޮޑިގެންވެއެވެ. އަދި އެއްވެސް އުނިކަމެއް ނެތި، މުޠުލަޤު ފުރިހަމަކަން އެކަލާނގެއަށް ވެއެވެ. އެކަލާނގެއަކަށް އެއްވެސް އެއްޗެއް އުފަންވެގެނެއް ނުވެތެވެ. އަދި އެއްވެސް އެއްޗަކަށް އެކަލާނގެ އުފަންވެވޮޑިގެނެއް ނުވެއެވެ. އަދި އެކަލާނގެއާ އެއްފަދަވެގެންވާ، އެއްހަމަވެގެންވާ ހަމަ އެކައްޗެއްވެސް ނުވެއެވެ. އަދި އެކަލާނގެ ޚަލްޤުތަކުންކުރެ އެއްވެސް އެއްޗެއްގެ ކިބައިގައި އެކަލާނގެ ނިވައިވެވޮޑިގެން އަދި ބައްޓަންވެވޮޑިގެން ނުވެއެވެ.

އިސްލާމްދީނަކީ މީސްތަކުންގެ ކިބައިން އެނޫން ދީނެއް ﷲ ތަޢާލާ ޤަބޫލުނުކުރައްވާނޭ އެކަލާނގެ (ހަމައެކަނި) ދީނެވެ. އަދި އެއީ ހުރިހާ ނަބިއްޔުން عليهم السلام ގެންނެވި ދީނެވެ.

އިސްލާމްދީނުގެ އަސާސްތަކުގެ ތެރޭގައި ހުރިހާ ރަސޫލުންނަށް އީމާންވުން ހިމެނެއެވެ. އަދި އެކަލާނގެ ރަސޫލުން ފޮނުއްވީ އަޅުތަކުންނަށް އެކަލާނގެ އަމުރުފުޅުތައް ފޯރުކޮށްދިނުމަށްޓަކައި ކަމާއި، އަދި އެކަލާނގެ އެބޭކަލުންނަށް ފޮތްތައް ބާވައިލެއްވިކަމެވެ. އޭގެ ތެރެއިން އެންމެ ފަހުގެ ބޭކަލަކީ މުޙައްމަދު عليه السلام އެވެ. ﷲ އެކަލޭގެފާނު ފޮނުއްވީ އެކަލޭގެފާނުގެ ކުރީގައި އުޅުއްވި ރަސޫލުންގެ ޝަރީޢަތްތައް އުވާލާ، އެންމެ ފަހުގެ އިލާހީ ޝަރީޢަތާއެކުގައެވެ. ބޮޑެތި ހެކިތަކުން އެކަލާނގެ އެކަލޭގެފާނަށް ބާރު ދެއްވިއެވެ. އޭގެ ތެރެއިން އެންމެ ބޮޑު ހެއްކަކީ ކީރިތި ޤުރުއާނެވެ. ޢާލަމްތަކުގެ ވެރިރަސްކަލާނގެ ކަލާމްފުޅެވެ. އިންސާނުން ދެކުނު އެންމެ މަތިވެރި ފޮތެވެ. އޭގައި އެކުލެވޭ ބައިތަކާއި، ލަފްޒުތަކާއި، އެމުނުމުގައިވެސް މުޢުޖިޒާތެއް ކަމުގައިވާ ފޮތެކެވެ. ދުނިޔެއާއި އާޚިރަތުގައި އުފާވެރިކަމަށް ވާޞިލުކޮށްދޭ ޙައްޤަށްވާ ހިދާޔަތު އެ ފޮތުގައިވެއެވެ. އެ ފޮތް ބާވައިލެއްވުނު ޢަރަބި ބަހުން އަދިއަދަށް ދާންދެންވެސް ރައްކާކުރެވިގެންވެއެވެ. އެ ފޮތުގެ އެންމެ އަކުރެއްވެސް ބަދަލުވެ ތަޣައްޔަރުވެގެން ނުވެއެވެ.

އަދި އިސްލާމްދީނުގެ އަސާސްތަކުގެ ތެރޭގައި މަލާއިކަތުންނަށް އީމާންވުމާއި، އާޚިރަތް ދުވަހަށް އީމާންވުން ހިމެނެއެވެ. އެ ދުވަހުގައި މީސްތަކުން ކުޅަ ޢަމަލުތަކުގެ ޙިސާބު ބެއްލެވުމަށްޓަކައި، ޤިޔާމަތްދުވަހު ﷲ ތަޢާލާ އެމީހުން އަލުން ދިރުއްވާނެއެވެ. ދެންފަހެ މުއުމިނެއްގެ ގޮތުގައި ހުރެ ޞާލިޙު ޢަމަލުތައް ކުރި މީހަކަށް ސުވަރުގޭގައި ދާއިމީ ނިޢުމަތްވެއެވެ. އަދި ކާފަރުވެ ނުބައި ޢަމަލުތައް ކުރި މީހަކަށް ނަރަކައިގައި ބޮޑުވެގެންވާ ޢަޛާބު ހުއްޓެވެ. އަދިވެސް އިސްލާމްދީނުގެ އަސާސްތަކުގެ ތެރޭގައި ﷲ ތަޢާލާ މިންވަރުކޮށް ޤަދަރުކުރެއްވި ހެޔޮ މިންވަރު ނުވަތަ ނުބައި މިންވަރަށް އީމާންވުންވެއެވެ.

މުސްލިމުން ޤަބޫލުކުރާ ގޮތުގައި ޢީސާގެފާނަކީ الله ގެ އަޅެކެވެ. އަދި އެކަލާނގެ ރަސޫލެކެވެ. އަދި އެކަލޭގެފާނަކީ ﷲ ގެ ދަރިކަލެއް ނޫނެވެ. އެހެނީ ﷲ ތަޢާލާ މާ މަތިވެރިވެ މާތްވެގެންވެއެވެ. އެކަލާނގެއަށް އަތްނބަކު ނުވަތަ ދަރިޔަކުވުމަކީ ވާނޭކަމެއް ނޫނެވެ. އެކަމަކު ޤުރްއާނުގައި ﷲ އަހަރުމެންނަށް ޚަބަރުދެއްވާފައިވަނީ ޢީސާގެފާނަކީ ﷲ އެކަލޭގެފާނަށް އެތަކެއް މުޢުޖިޒާތެއް ދެއްވި ނަބިއްޔެއްކަމެވެ. އަދި ﷲ އެކަލޭގެފާނު ފޮނުއްވީ ﷲ އަށް އެއްވެސް ޝަރީކަކު ނުލާ އެކަލާނގެ އެއްކައުވަންތަކޮށް އަޅުކަންކުރުމަށް އެކަލޭގެފާނުގެ ޤައުމަށް ގޮވާލެއްވުމަށްޓަކައިއެވެ. އަދި އެކަލާނގެ އަހަރުމެންނަށް ޚަބަރުދެއްވާފައިވަނީ މީސްތަކުންގެ ކިބައިން އެކަލޭގެފާނަށް އަޅުކަންކުރުމަށް ޢީސާގެފާނު އެދިވަޑައިނުގަންނަވާކަމަށެވެ. ކިއެއްތަ، އެކަލޭގެފާނު އަޅުކަންކުރައްވަމުން ގެންދެވީ އެކަލޭގެފާނު ހެއްދެވި ފަރާތަށެވެ.

އަދި އިސްލާމްދީނަކީ، ފިޠުރަތާއި ސަލާމަތްތެރި ބުއްދިއާ އެއްގޮތްވާ، އަދި ހަމައަށް ސީދާކޮށްވާ ނަފްސުތައް ޤަބޫލުކުރާނޭ ދީނެކެވެ. މަތިވެރިވެގެންވާ ޚާލިޤު، އެކަލާނގެ ޚަލްޤުތަކުންނަށްޓަކައި އެ ދީން ޝަރުޢުކޮށްދެއްވިއެވެ. އަދި އެއީ ހުރިހާ މީސްތަކުންނަށް ދުނިޔެއާއި އާޚިރަތުގައި، ހެޔޮކަމާއި ބާއްޖަވެރިކަން ލިއްބައިދޭ ދީނެވެ. އެ ދީނުގައި އެއް ނަސްލު އަނެއް ނަސްލުގެ މައްޗަށް، އަދި އެއް ކުލަ އަނެއް ކުލައިގެ މައްޗަށް ތަފާތެއް ނުކުރެއެވެ. ހުރިހާ މީސްތަކުން އެ ދީނުގައި ވަނީ ހަމަހަމަވެގެންނެވެ. އިސްލާމްދީނުގައި އެމީހެއްގެ ހެޔޮ ޢަމަލުތަކުގެ މިންވަރުން މެނުވީ އެކަކުވެސް އަނެކަކުގެ މައްޗަށް ފާހަގަވެ ތަފާތު ނުވެތެވެ.

ބުއްދި ސަލާމަތުންހުރި ކޮންމެ އިންސާނަކު ﷲ އީ ރައްބުކަމުގައި، އަދި އިސްލާމްދީނަކީ ދީން ކަމުގައި، އަދި މުޙައްމަދުގެފާނީ ރަސޫލެއް ކަމުގައި އީމާންވާން ޖެހެއެވެ. މިއީ އެއްވެސް އިންސާނަކަށް އޭގައި ކުރުމާއި ނުކުރުމުގެ އިޚްތިޔާރު އޮތްކަމެއް ނޫނެވެ. އެހެނީ އޭނާ ރަސޫލުންނަށް ދިން ޖަވާބަކީ ކޮބައިކަމާމެދު ޤިޔާމަތްދުވަހު ﷲ އޭނާއާ ސުވާލުކުރައްވާނެއެވެ. ދެންފަހެ އޭނާއީ މުއުމިނެއްނަމަ ފަހެ އޭނާއަށް ކާމިޔާބާއި ބޮޑުވެގެންވާ ނަޞީބުވެއެވެ. އޭނާއީ ކާފަރެއްނަމަ ފަހެ އޭނާއަށްވަނީ ބަޔާންވެގެންވާ ގެއްލުމާއި ހަލާކެވެ.

އިސްލާމްދީނަށް ވަންނަން ބޭނުން މީހަކުގެ މައްޗަށް އޮތީ މިހެން ކިޔުމެވެ: (أشهد أن لا إله إلا الله وأشهد أن محمدًا رسول الله) (މާނައީ: ﷲ ފިޔަވައި ޙައްޤުވެގެން އަޅުކަންވެވޭ އިލާހަކު ނުވާކަމަށް އަޅު ހެކިވަމެވެ. އަދި މުޙައްމަދުގެފާނީ ﷲ ގެ ރަސޫލާ ކަމަށް އަޅު ހެކިވަމެވެ.) އެއީ އެކަލިމައިގެ މާނަ އެނގި އެއަށް އީމާންވާ ޙާލުގައިއެވެ. މިއިން އޭނާ މުސްލިމަކަށް ވެދެއެވެ. ދެން އޭނާ އިސްލާމްދީނުގެ ބާކީ ހުރި ޝަރީޢަތްތައް މަޑުމަޑުން ކަމަކަށް ފަހު ކަމެއް ދަސްކުރަމުން ގެންދާނީއެވެ. އެއީ الله އޭނާއަށް ވާޖިބުކުރައްވާފައިވާ ކަންތައް އަދާކުރުމަށްޓަކައިއެވެ.

އިތުރު މައުލޫމާތު