الإسلام دين رسل الله

Chisilamu ni chipopelo cha achimitume wa Mlungu.

Chisilamu kwalakweko ni kulipeleka mwa Mlungu,nkugumba chilambo nambo soni nkujendesya jwa chilambocho, nambo soni kunkuya jwalakwejo mwa chinonyelo ni uchimbichimbi. Mchiga wa ndanda wa chisilamu; nikulupilila mwa Mlungu, nikuti Mlungujo ni nkugumbaو nikuti ine yosope yankaniyiwa jwelejo, iwele yagumbidwa. Nikuti Mlungujo ni jwawele jwakuwajilana kupopeledwa jikape, jwali jwangali jwakupwatikana najo. Pangali wakuwajilana kupopeledwa niyikaweje jwalakwejo. Mlungu akwete mena gambone ni mbili sya penani, jwalakwejo nijwali jwankwanile kusyesyene pangali kupunguka,nganaweleka mwanache nambo soni nganawelechedwa, ni jwangali wakulandana nawo waliwose. Jwangasyuka kuwa mundu kapena kwinjila mwa chiumbe chilichose.

Chisilamu chele ni chipopelo cha Mlungu jwapenani, chipopelo chanti Mlungu ngajakupochela masengo galigose gampaka akamule mundu pangawaga gakamwile ali mu chipopelo cha chisilamu, chelechi ni chipopelo chawatumisye Mlungu kwa achimitume osope -utendele wa Mlungu uwe pa osopewo.

Jine mwa michiga ja chisilamu;nikukulupilila mwa achimitume osope,nikuti Mlungu watumisye achimitumewo kuti awichisye malamusi kwa achikapolo wakwe,niwatumichisye soni achimitumewo mabuku.,Jwambesi mwa wele achimitumewo waji Muhammadi-utendele wa Mlungu uwe pa mtumejo-,Mlungu wamtumisye mtumejo ni malamusi ga Mlungujo gagali gakumalisya nambo soni gagatyosisye malamusi gachimitume wawawiche wele mkanawiche.mlungu wamlimbikasisye mtumejo pakumpa ilosyo yaikulungwa mwa yele ilosyoyo mwana buku ja Quran jakuchimbichika,gagali malowe ga mbuje jwa iumbe yosope yene.Jeleji ni buku jajikulungwa jakuti wandu najimanyeje jine sawu jeleji.jakusimonjesya mu ngopolelo syakwe,malowe gakwe ni kagawe ka malowe gakwe. Mu buku jeleji mwana chongoko chakwajongolela wandu ku indu yakuona yakwawichisya ku utendele wa pachilambo ni umi waukuwika. Mlungu akujisunga buku ja Quran kuwichila lelo jino, buku jajili mu chiwecheto cha chalabu, chiwecheto chachatuluchile buku jeleji, ni nganijisinda namtamuno kuchenjedwa chilembo chimo mu buku jeleji.

Jine mwa michiga ja chisilamu; ni kulupilila mwa achimalaika, kulupilila lyuwa lya mbesi, lisiku litachijimusya Mlungu wandu osope kumila m'malembe muwagonile pa usiku wa mbesi kuti akawalanjisye wanduwo masengo gawaji ali mkamula pa chilambo chapasi. Kwa mundu juwaliji ali mkamula masengo gambone, nikutendaga waji wakulupilila mwa Mlungu; jwele takakole utendele wakutamilichika ku migunda jaku mbepo. Sano kwa mundu juwaji ali mkamula masengo gakusakala; jwele takakole ilagasyo yaikulungwa ku moto. Jine mwa michiga ja chisilamu; nikulupilila mu ikandu yalinganyisye Mlungu mu yambone kapena yakupweteka.

Asilamu akusakulupililaga kuti Yesu awele kapolo ni mtume jwa Mlungu. Nikuti nganawa mwanache jwa Mlungu, ligongo Mlungu awele jwa mkulungwa mnope ni nganiyiwa iwele yakuwajilana kuti akole jwa mkongwe kapena mwanache. Mlungu atusalile mu buku ja Quran kuti Yesu waji mtume jwa Mlungu juwampele Mlungu machili gakutenda yakusimosya yaijinji, nikuti soni Mlungu wamtumisye Yesujo kuti walamulile wandu wakwe yakupopela Mlungu jumope jwamkanakola wakupwatikana najo pa iliyose, nikuti soni Mlungu atusalile yanti Yesu niwalamulila wandu kuti ampopeleje Yesujo, nikuti Yesujo waji ali mkupopela Mlungu juwagumbile welewo.

Chisilamu ni chipopelo chakamulana ni chipago ni lunda lwaluli lwambone lwa mundu,mitima jajili jambone nijikusachijitichisya chipopelochi ,chelechi ni chipopelo chiwalamulile Mlungu mkugumba iumbe kuti wandu achikuyeje,chelechi ni chipopelo chachikwete yambone nichakuwikasya utendele kwa wandu osope.Chipopelo chelechi changalekangana mtundu wa mundu kapena kaoneche ka mundu,wandu osopene awele wakulandana pa malamusi gakwe,mu chipopelo cha chisilamu pangali jwali jwapenani kupunda jwine nakaweje pakujigalila masengo gambone gakusakamulaga mundujo.

Iwele soni yakanganichisidwa kwa mundu jwalijose jwa lunda lwakwe kuti akulupilile mwa Mlungu kuti jwelejo mbuje jwa iumbe yosope, nikulupilila chisilamu kuwa chipopelo chakwe, nikulupilila mwa Muhammad kuti mtume jwa Mlungu, yeleyi nganiyiwa yanti mundu akwete lusa lwakusagula; ligongo lyanti Mlungu tachim'busya mundujo lyuwa la lyambesi(Qiyama)pa ikandu iwajanjile achimitume ali nkwailanjila kwa Mlungu;ni mundu jutawe jwakulupilila jwalakwejo takawe jwakupunda kwekulungwa, nambo soni jutawe jwakanila jwalakwejo takawe jwakulusa kwakuonechela.

kwa mundu jwakusaka kwinjila chisilamu jwalakwejo akusosekwa kuwecheta malowe ganti: (Nguwichila umboni kuti pangali Mlungu jwakuwajilana kupopeledwa mwa chakuonadi niyikaweje Mlungu jumpepe basi, ninguwichila soni umboni kuti Muhammad mtume jwa Mlungu), nikuti awe soni akumanyilila ngopolelo sya malowe gelega nikugakulupililaga, naga mundu awechete malowe gelega akasasyuka kuwa msilamu; kaneko nalijiganyeje malamusi gosopegene gakusana chisilamu panandi panandi; kuti apakomboleje kupanganya masengo gawachisisye Mlungu kuti agapanganyeje.

Kusaka kupata umanyisi wejinji akamulisye masengo pakuwugula aga maloga: