الإسلام دين رسل الله

Islamsom; Allah asomafoɔ no som.

Islamsom ne sɛ wobɛbrɛ wo ho ase ama Allah a Ɔbɔɔ wiase na Ɔyɛɛ ntotoeɛ no, na wode ɔdɔ ne obuo soronko bɛbrɛ wo ho ase ama no, na Islamsom fapem ne sɛ wobɛgye Allah adi, na wahunu sɛ Ɔno ne Ɔbɔadeɛ, na biribiara a ɛnyɛ Ɔno no yɛ abɔdeɛ, na Ɔno nkoara na fata nyamesom a obiara nka ne ho, obiara nni hɔ a ɔfata nyamesom pa ara agye Ɔno, Ɔno na wɔ adinpa ahodoɔ ne abɔdin ahodoɔ a ɛkrɔn, na Ɔno na wie pɛyɔ prɛko pɛ a Ɔnni sintɔ biara, Wannwo ba na obi nso annwo No, na Ɔnni tipɛn ne sɛsoɔ biara, wontumi nsiesie No na wontumi mfa No nhyɛ N'abɔdeɛ biara mu.

Na Islamsom ne Allah Okokuroko No som a Ɔnnye ɛsom biara mfiri nnipa nkyɛn agye ɛno, na ɛno ne ɛsom a akɔmhyɛfoɔ no nyinara debaaɛ (Allah asomdwoeɛ nka wɔn).

Na Islamsom fapem no bi ne sɛ wobɛgye asomafoɔ no nyinara adi, na Allah somaa asomafoɔ no sɛ wɔmmɛmmɔ n'ahyɛdeɛ ho dawuro nkyerɛ Ne nkoa, ɛna Ɔsiane nwoma maa wɔn, na na neɛ ɔtwa wɔn to ne Muhammad (Allah nhyira ne n'asomdwoeɛ nka no), Allah de Ne mmrasɛm a ɛtwa toɔ somaa no a ɛrebɛyi asomafoɔ a wɔdii n'anim kan no mmrasɛm no, Allah de nsɛnkyerɛnne akɛseɛ ahodoɔ taa n'akyi, na kɛseɛ pa ara ɛwɔ mu ne Qur'ani Kronkron no, Awurade; abɔdeɛ nyinaa Wura no kasa, nwoma kɛseɛ a nnipa ahunu pɛn, sɛneɛ ɛmu nsɛm, atwerɛsɛm ne ne nhyehyɛeɛ ɛyɛ nwanwa, nsɛm a ɛkyerɛ kwan kɔ nokware so wɔ mu, a ɛwie asaase yi so ne atɛmmuada anigyeɛ mu. Na Wabɔ ho ban bɛsi ɛnnɛ yi wɔ Arab kasa a Wɔde sianeeɛ no mu, wɔnsesaaɛ na wɔnnanee atwerɛba koro kroaa wɔ mu.

Na fapem no mu bi ne sɛ wobɛgye abɔfoɔ no adi, na wagye atɛmmuada no adi, na ɛmu na Allah bɛnyane nnipa afiri wɔn adakamina mu; wusɔreɛ da no na Ɔnam wɔn nnwuma so abu wɔn atɛn, na neɛ ɔbɛyɛ papa na ɔyɛ ɔgyedini no wɔ ɛdɛmfinsa wɔ ɔsoro aheman mu, na neɛ ɔbɛyi bonniayɛ na wadi bɔne no nso wɔ asotwee a ɛso yie wɔ ogya dareɛ mu, na Islamsom fapem no bi ne sɛ wobɛgye hyɛberɛ Allah ahyehyɛ no atom; sɛ ɛyɛ papa anaasɛ bɔne.

Na muslimifoɔ gye di sɛ Iesa (Jesus) yɛ Allah akoa ne Ne somani na mmom ɔnnyɛ Allah ba, ɛfiri sɛ Allah Okokuroko no ɛmfata sɛ Ɔwɔ ɔyere anaasɛ ɔba, mmom, Allah rebɔ yɛn amaneɛ wɔ Qur'ani mu sɛ; esipi sɛ na Iesa (Jesus) yɛ ɔkɔmhyɛni a Allah maa no anwanwade bebree, na Allah somaa no sɛ ɔmmɛbɔ dawuro nkyerɛ ne dɔm sɛ wɔnsom Allah nko ara a Ɔnni hokafoɔ biara, na Ɔrebɔ yɛn amaneɛ sɛ Iesa (Jesus) anhwehwɛ amfiri nnipa nkyɛn sɛ wɔbɛsom no, na mmom na ɔno ankasa mpo ɔso ne Bɔfo (Allah).

Na Islamsom yɛ ɛsom bi a ɛne nnipa su ne adwene mu fann ɛkɔ, na kra a ɛwie pɛyɔ na ɛgye tom, Ɔbɔadeɛ Kokuroko no na ahyehyɛ ama n'abɔdeɛ, na ɛyɛ ɛsom a ɛyɛ papa ne anigyeɛ ma nnipa nyina ara, ɛnyiyi nnipa mu ɛnam abusuakuo obi firi mu nti, anaa n'ahosuo nti, na nnipa nyina ara yɛ pɛ wɔ mu, obiara nna nso wɔ Islamsom mu a ɔde sene obi agye ne nnwuma pa nko ara mu.

Na ɛfata sɛ onipa biara a ɔyɛ badwemba no gyedi sɛ Allah yɛ ne Wura, na Islamsom yɛ ne som, na Muhammad yɛ Allah somafoɔ (Allah nhyira ne n'asomdwoeɛ nka no), na wei yɛ asɛm a onipa nni ho kwan sɛ ɔpaw neɛ ɔpɛ, ɛfiri sɛ atɛmmuada no Allah bɛbisa no sɛneɛ ɔgyee asomafoɔ no so, na sɛ ɔyɛ ogyedini a ɛneɛ na ɔwɔ nkonim ne yiedie kɛseɛ pa ara mu, na sɛ ɔyɛ bonniayɛni nso a ɛneɛ na ɔwɔ nkoguo a ɛda adi pefee mu.

Na neɛ ɔpɛ sɛ ɔwura Islamsom mu no; na ɛsɛsɛ ɔka sɛ: ( Ash hadu allaa illaha illa llahu, wa ash hadu anna Muhammadar rasuulu llah) (Medi adanseɛ sɛ Onyankopɔn biara nni hɔ agye Allah na medi adanseɛ nso sɛ Muhammad yɛ Allah somafoɔ), wɔ berɛ a ɔte aseɛ na ɔgye die, na wei ma ɛbɛdane Muslimini, na afei wasua Islamsom mmrasɛm a aka no nkakrankakra, sɛneɛ ɔde bɛyɛ neɛ Allah ahyɛ no sɛ ɔnyɛ no.

Se wo pe Nyimdiye biara efa saa weyi nu