الإسلام دين رسل الله

ئیسلام ئایینێ پێغەمبەرێن خودێیە

ئیسلام خۆڕادەستکرنە بۆ خودایێ چێکەرێ گەردوونی و ڕێڤەبەرێ وی،و سەرچەمییانە بۆ وی ب ڤیان و حەزژێکرن و مەزنڕاگرتنێ، بنیاتێ ئیسلامێ باوەری ئینانە ب خودێ و ب وێ چەندێ کو ب تنێ خودێ چێکەر و ئافراندەرە و هەر تشتەکێ دی ژ بلی وی یێ چێکری و ئافراندییە، دیسان باوەری ئینانە کو خودێ ب تنێ یێ ژ هەژی پەرستنێیە، ئەو خودایەکێ ب تنێیە و وی چ شریک و هەڤال نینن و ژ بلی وی چ تشت ژ هەژی پەرستنێ نینن، ناڤێن جوان و سالۆخەتێن بلند یێن وینە، ئەو خۆدانێ بلنداهییا ڕەهایە بیێ چ کێماسی د گەل بن، نە ئەو ژ کەسێ بوویە و نە کەس ژ وی بوویە و وی چ هەڤکویڤ ژی نینن و نە د حەلییێتە د ناڤ چ چێکرییێن خۆدا و نە دچیتە د ناڤ لەشێ چ چێکرییێن خۆدا.

ئیسلام ئایینێ خودایێ مەزنە کو خودێ ژ وی ئایینی پێڤەتر ب چ ئایینێن دی ڕازی نابیت و چ ئایینێن دی ژ مرۆڤان قەبویل ناکەت، ئیسلام ئەو ئایینە یێ هەمی پێغەمبەر (سلاڤ ل سەر هەمییان بن) پێ هاتین.

ژ بنیاتێن ئیسلامێ؛ باوەری ئینانە ب هەمی پێغەمبەران و ب وێ چەندێ کو خودێ پێغەمبەر یێن فڕێکرین دا فەرمانێن خودێ بگەهیننە عەبدێن خودێ، خودێ هندەک پەڕتووک بۆ ڤان پێغەمبەران هنارتینە. دویماهیک پێغەمبەرێ خودێ موحەممەدە صەلات و سەلامێن خودێ ل سەر بن، خودێ ئەو ب شەریعەتەکێ خودایی یێ دویماهیک ئینەر و نەسخکەر بۆ هەمی شەریعەتێن دی یێن بەری خۆ فڕێکر و ب نیشان و موعجیزەیێن مەزن پشتەڤانی ل وی کر، مەزنترین موعجیزەیا وی ژی قورئانا پیرۆزە کو ئاخڤتنا خودایێ مەزنە، ئەو مەزنترین پەڕتووکە مرۆڤایەتییێ نیاسی، د ناڤەڕۆک و پەیڤ و داڕشتنا خۆدا یا پەردەدڕە و کەسێ شیان نینن ئێکا وەکی وێ بینیت، هیدایەت و ڕاستەڕێکرن یا تێدا بۆ وێ ڕاستییا مرۆڤی دگەهینیتە بەختەوەرییا دونیا و ئاخرەتێ و هەتا ئەڤروکە ئەو هەر ب وی زمانێ عەرەبی یێ پێ هاتییە خوار یا پاراستییە و خۆ پیتەکا ب تنێ ژی ژ وێ نەهاتییە گوهاڕتن.

هەروەسا ژ بنیاتێن ئیسلامێ؛ باوەری ئینانە ب مەلائیکەتان و ب ڕۆژا دویماهیکێ کو د وێ ڕۆژێدا هەمی مرۆڤ دێ ژ قەبرێن خۆ ڕابن و دێ بەرەڤ گۆرەپانا مەحشەرێڤە چن دا خودایێ وان ل سەر کریارێن وان کرین لێپرسینێ د گەل وان بکەت، ڤێجا هەر کەسێ کارێن باش کربن و باوەردار بیت؛ خۆشی و نیعمەتەکا بەردەوام ل بەحەشتێ بۆ وی هەیە و هەر کەسێ کوفری کربیت و کریارێن خراب ئەنجام دابن؛ عەزابەکا مەزن د ناڤ ئاگرێ جەهنەمێدا بۆ وی هەیە. هەر ژ بنیاتێن ئیسلامێ؛ باوەری ئینانە ب وان هەمی تشتێن خودێ د قەدەرێدا نڤیسین ژ تشتێن باش و خۆش و یێن خراب و نەخۆش.

موسلمان باوەرییێ دئینن کو عیسا عەبدێ خودێ و پێغەمبەرێ وییە و کو ئەو کوڕێ خودێ نینە، ژ بەر کو خودێ یێ مەزنە و نەیا مومکنە وی ژن یان زارۆک هەبن، بەلکی خودێ د قورئانێدا بۆ مە بەحسێ وێ چەندێ کرییە کو عیسا پێغەمبەر بوو، خودێ گەلەک موعجیزە دانە وی و ئەو ژ دەڤ خۆ فڕێکر دا بچیت گازییێ د گەل مللەتێ خۆ بکەت بۆ عیبادەتێ خودێ ب تنێ بێی کو چ شریک و هەڤالان بۆ دروست بکەن و بۆ مە بەحس کر کو چ جاران عیسای داخواز ژ خەلکی نەکرییە ئەو عیبادەتێ وی بکەن، بەلکی وی ب خۆ ژی عیبادەتێ چێکەرێ خۆ دکر.

ئیسلام ئایینەکە د گەل خۆرستی و ئەقلێن ساخلەم دگۆنجیت، هەر دیسان نەفسێن ڕاست و دروست وێ قەبویل دکەن و پێ ڕازی دبن، خودێ ئەو بۆ چێکرییێن خۆ دانایە و کرییە شەریعەت، ئەو ئایینێ خێر و باشی و بەختەوەرییێيە بۆ هەمی مرۆڤان، چ نەژادان ب سەر چ نەژادێن دی نائێخیت و چ ڕەنگان ب سەر چ ڕەنگێن دی نائێخیت، بەلکی د ئیسلامێدا هەمی مرۆڤ وەکی ئێکن و د یەکسانن و تشتێ وان ژێک جۆدا دکەت و ئێکی ژ ئێکێ دی باشتر لێ دکەت؛ تەقوا و عیبادەتێ خودێ و کارێ باشە.

پێدڤییە هەر مرۆڤەکێ ئەقل هەبیت باوەرییێ بینیت کو ئەلڵاهـ خودایێ وی و ئیسلام ئایینێ وی و موحەممەد پێغەمبەرێ وییە، ئەڤە تشتەکە مرۆڤی چ حەز و هەلبژارتن تێدا نینە، چونکی ل ڕۆژا قیامەتێ خودێ دێ پرسیارێ ژ وی کەت کا وی چاوا بەرسڤا پێغەمبەرێن خودێ دا، ڤێجا ئەگەر باوەردار بیت؛ سەرکەفتن و سەرفەرازییا مەزن بەهرا وییە و ئەگەر کافر بیت؛ ژ دەستدان و خۆسارەتییا ئاشکەرا بەهرا وییە.

هەر کەسێ بڤێت بهێتە د ناڤ ئیسلامێدا و موسلمان بیت؛ پێدڤییە ئەو بێژیت: (أَشْهَدُ أَنْ لا إِلٰهَ إِلَّا اللَّهُ، وَأَشْهَدُ أَنَّ مُحَمَّدًا رَسُولُ اللَّهِ) و پێدڤییە ئەو ڕامانا وێ بزانیت و باوەری پێ هەبیت، ب ڤێ چەندێ دێ بیتە کەسەکێ موسلمان، پشتی هنگێ دێ خۆ فێری شەریعەت و عیبادەتێن دی یێن د ناڤ ئیسلامێدا هەین کەت، دا کو ب وی ئەرکێ خودێ ل سەر وی فەرکری ڕابیت و ئەنجام بدەت.

بۆ زێدەتر پێزانینان: