Most Searched
NI NDE YAREMYE ISI N'IJURU N'IBIRI HAGATI YAVYO? NI NDE YANDEMYE? NI KUKI YANDEMYE?
Mbega jewe noba ndi mu nzira y'ukuri? Ni nde Yaremye amajuru n'isi hamwe n'ibiri hagati yavyo mu biremwa bihambaye ata n'uwoshobora kubihetura? Ni nde Yashizeho iyi ndinganizo itigera yihenda na rimwe mu kuntu itunganijwe mw'ijuru no mw'isi? Ni nde Yaremye umuntu, Akamuha amatwi, amaso n'ubwenge, Akamuha n'ububasha bwo kurondera ubumenyi no gutahura ukuri kw'ibishikira ibiremwa?
These files are generated automatically from the book's text; their layout may differ from the printed edition.
NI NDE YAREMYE ISI N'IJURU N'IBIRI HAGATI YAVYO? NI NDE YANDEMYE? NI KUKI YANDEMYE?
Mbega jewe noba ndi mu nzira y'ukuri?
Ni nde Yaremye amajuru n'isi hamwe n'ibiri hagati yavyo mu biremwa bihambaye ata n'uwoshobora kubihetura?
Ni nde Yashizeho iyi ndinganizo itigera yihenda na rimwe mu kuntu itunganijwe mw'ijuru no mw'isi?
Ni nde Yaremye umuntu, Akamuha amatwi, amaso n'ubwenge, Akamuha n'ububasha bwo kurondera ubumenyi no gutahura ukuri kw'ibishikira ibiremwa?
Ni nde Yatunganije iyi ndinganizo itigera yihenda mu kungene ibihimba vyawe vy'umubiri biremye? Ni nde Yakuremye Araheza Aguha indemo nziza ibereye?
Ihweze neza iremwa ry'ibinyabuzima mu butandukane bwavyo mu bwoko no mu ndemo, ni nde Yabiremye mu kungene biboneka mu buryo butagira aho bugarukira?
Ni gute iyi si n'ibiri kuri yo bitunganijwe binatururuye , uravye amategeko abigenga akabitunganya mu buryo butigera bwihenda imyaka yose kuva biremwa?
Ni nde Yashizeho amategeko yisungwa mw'iringanizwa ry'iyi si [Ubuzima no gupfa, ukurondoka kw'ibinyabuzima, ikurakuranwa ry'ijoro n'umurango, ikurakuranwa ry'ibihe bigize umwaka (ici n'agatasi) , n'ibindi]?
Mbega none iyi si n'ibiri muri yo, vyoba vyariremye? Canke vyaje ukwo gusa ata cabiremye? Canke vyoba vyabonetse giturumbuka ata ndinganizo ibanje kuba? Imana Allah Nyenuguhabwicubahiro nta ngere Yavuze Iti: ﴾Mbega ababangikanyamana, boba baremwe n’ubusa ata cabaremye! Canke boba bariremye! Usangwa bataremwe n’ubusa canke ngo bireme, nibamenye rero ko Imana Allah ari Yo Yabaremye, n’uko ari Yo rero, Ikwiye gusengwa Itabangikanywa. Canke boba bararemye amajuru n’isi muri ubu buryo buhimbaye! Ahubwo rero, ntibemera namba ko bazohanwa﴿ (At-Twuur: 35-36).
Nitwaba tutiremye, bikaba bitanashoboka ko twoba twaremwe n'ubusa, canke ko twoba twaje giturumbuka hatabanje kubaho indinganizo, none burya ukuri kudahinyuzwa, si uko iyi si itegerezwa kuba ifise Uwayiremye, Ahambaye kandi Ashoboye! Kuko ntibishoboka ko iyi si yoba yariremye! Canke ko yoba yaremwe n'ubusa! Canke ko yoba yabonetse gutyo gusa giturumbuka!
Ni kuki umuntu yemera ko hariho ibintu adashobora kubona? Akarorero: (ugutahura, kugira ubwenge, inkomoko y'ubuzima "Roho", ibigumbagumba n'urukundo), ubwo ntiyoba avyemera ukwo kuko abona ibimenyetso vyavyo? None umuntu bimugendera gute kuba yohakana ko Iyaremye iyi si ihambaye Ibaho kandi abona neza na neza ibimenyetso vy'ivyo Yaremye! Akabona n'ivyerekana itunganywa n'impuhwe zayo ku biremwa!?
Nta n'umwe yoba afise ubwenge bukwiye, yokwemera uwokwinamura akavuga ko iyi nzu yabonetse gutyo gusa ata n'umwe yayubatse! Canke uwomubwira ko iyi nzu yaremwe n'ubusa! None ni gute bamwe mu bantu bemera uwinamura akavuga ko iyi si ingana amahanga n'ibirimwo, yoba yabonetse gutyo gusa ata Wayiremye? Ni gute umuntu w'umunyabwenge yokwemera uwuvuga ko iyi ndinganizo n'itunganywa ritigera rihungabana mu vyerekeye isi n'ibirimwo, vyoba vyabonetse gutyo gusa giturumbuka?
Ibi vyose rero bidushikana ku kintu kimwe gusa, na co kikaba ari uko iyi si ifise Imana Rurema Yayiremye Ihambaye kandi Ishoboye, Iyibungabunga; n'uko ari Yo Yonyene Ikwiye kwiyegerezwa muri vyose; n'uko ikintu cose gisengwa mu gishingo cayo, isengwa ryaco ari ikinyoma ceruye, kuko kidakwiye gusengwa.
Imana Rurema Ihambaye
Hariho rero Imana Imwe Rudende Rurema, ni Yo Rugaba Ibungabunga ibiremwa, Mubeshaho Ibibeshejeho, ni Yo Itanga ubuzima Igashobora no kubwaka ikiremwa kigapfa, ni Yo Yaremye isi Iraheza Yorohereza ibiremwa kuyibako no kuyigendagenderako, Iyigira uburaro n'uburamuko ku biremwa vyayo, ni Yo Yaremye amajuru n'ibindi biremwa bihambaye biri muri yo, Ishiraho izuba n'ukwezi hamwe n'ijoro n'umurango indinganizo itigera yihenda mu kungene bikora, ibi vyose bikerekana ubuhambazi bw'Imana Allah.
Imana Rurema ni Yo Yaturemeye akayaga n'impwemu ubuzima bwacu bukenera kugira dushobore kubaho, ni Yo Ituma turonka imvura, Yaranaturemeye amabahari n'inzuzi, ni Yo Yama Yadufunguriye Ikanatubungabunga igihe twari tukiri inzoya mu mbanyi z'abavyeyi bacu mu buryo ata nguvu canke uruhara twabigiramwo, ni Yo Ituma amaraso atemba mu mitsi yacu, Yaranatugiriye imitima itera mu buryo bwamaho kuva umusi w'ivuka ryacu gushika ku musi wo gupfirako.
Iyo Mana Rurema Yaremye, Mubeshaho Ibeshejeho ibiremwa, ni Yo Allah Nyenukuninahazwa na Nyenuguhabwicubahiro nta ngere.
Imana Allah Nyenuguhabwicubahiro nta ngere Yavuze Iti: ﴾Bantu! Mu vy’ukuri Imana yanyu Rurema Allah, ni Yo Yaremye amajuru n’isi mu misi itandatu, hanyuma Iraheza Irahangama hejuru y'ibiremwa vyose ku Buhangamo bwayo "Al’Arsh" mu buryo buberanye n'icubahiro cayo, Ituma ijoro rihwikira umurango bugaheza bukira, Igatuma n'umurango uhwikira ijoro bugaheza bugaca; kimwe cose muri ivyo, kigakurikira ikindi bukebuke bikurakuranwa igihe cose. Ni na Yo Yaremye izuba, ukwezi n’inyenyeri, vyose bikaba vyicishije bugufi bigenzwa n’itegeko ryayo, ni n’ivyemezo vyerekana ko Imana Allah Iriho. Bantu nimwumve mwumvireho! Iremwa n’itegekwa ry’ivyo vyose ni iryayo, harakubahwa haninahazwe rero Imana Allah, Yo Mubungabunzi w’ibiremwa vyose﴿ (Al-A'raaf: 54).
Allah, ni Yo Mana Rurema Yaremye ikintu ico ari co cose kiri kw'isi no mw'ijuru mu vyo tubona n'ivyo tutabona, ikintu cose rero kitari Yo ni ikiremwa mu biremwa vyayo, ni Yo Ikwiye kwiyegerezwa Yonyene mu bikorwa nyegerezamana, nta n'ikintu na kimwe gikwiye gusengwa hambavu y'Imana Allah, ntigira na kimwe rero kibangikanije na Yo mu Bwami bwayo, canke mu kurema kwayo, canke mu bubungabunzi bwayo bw'ibiremwa, canke mu gusengwa kwayo.
No mu gihe rero twofata ko kw'isi canke mw'ijuru hariho izindi mana hambavu y'Imana Rurema Nyenicubahiro, ni ukuri indinganizo y'iyi si n'ijuru vyohungabanye; kuko bidashoboka namba ko iyi si n'ijuru vyotunganywa n'Imana zibiri mu mwanya umwe (na kare ngo inkuba zibiri ntizisangira igicu), Imana Allah Nyenuguhabwicubahiro nta ngere Yavuze Iti: ﴾Iyo mu majuru n’isi haba hariyo imana zindi atari Imana Allah, zitunganya ubuzima bw'ibiremwa bibayo, itunganywa rya nya buzima ryari guhungabana﴿ (Al-Ambiyaa-i: 22).
Amazina n'amatazirano y'Imana Rurema Yaremye ibiremwa vyose
Imana Rurema Nyenukuninahazwa, Irafise amazina menshi kandi meza ata woyadondagura, Irafise n'amatazirano menshi kandi yubashwe yerekana ko Irangwa n'ubutore n'ubutwari, mu mazina yayo twovuga: "Al-Khaaliq" (ٌRurema), na "ALLAAH", izina risigura ko ari Yo Mana Ikwiye gusengwa n'abantu Yonyene ata kuyibangikanya na kimwe mu biremwa. Mu mazina yayo kandi, ni "Al-Hayyu" (Nyenubugingobudashira), "Al-Qayyuum" (Muhagarikizi w'ibiremwa), "Ar-Rahiim" (Nyenimpuhwe ku biremwa), "Ar-Raaziq" (Rutunga Ibeshejeho ibiremwa vyose), "Al-Kariim" (Nyenubugiraneza). Imana Allah Nyenuguhabwicubahiro nta ngere Yavuze muri Qor'ani ntagatifu Iti: ﴾Allah ni Yo Mana ata yindi mana ibwirijwe gusengwa atari Yo, Nyenubugingo budashira nk’uko buyikwiye, Umuhagarikizi w’ibiremwa Yikwije muri vyose. Ntihunikira (Ntihunyiza) eka Ntinasinzira. Ni Yo Rugaba Igaba Ikaganza ibiri mu majuru n’ibiri mw’isi n’ibiri hagati yavyo. Nta n’umwe yokwubahuka kuvugira uwundi imbere yayo, kiretse ku burenganzira buvuye kuri Yo. Ni Yo Izi bikwiye inkuru z’ibiremwa vyose, kahise, kubu na kazoza kavyo. Nta n’umwe ashoboye kumenya na kimwe mu bumenyi bwayo kiretse ivyo Yo Yonyene Ishatse ko amenya. Ubuvyagiro bw’Ibirenge vyayo bukwiriye amajuru n’isi, kandi ntibiyiruhije kubungabunga amajuru n’isi. Ni na Yo rero Nyenicubahirogisumbavyose, Nyenicubahiro-ntangere﴿ (Al-Baqara: 255).
Imana Allah Nyenuguhabwicubahiro nta ngere Yavuze Iti: ﴾Ntumwa y’Imana! Vuga uti: “Imana Allah, ni Imwe Rudende mu bumana bwayo, mu bushobozi bwo kurema no mu mazina n’amatazirano yayo}. Imana Allah, ni Yo Nyenugutumberwa muri vyose. Ntiyavyaye kandi ntiyavyawe, eka ntigira n’umugore. Kandi ntigira ikiremwa na kimwe bisa canke bisusa, haba mu mazina n’amatazirano yayo, haba no mu bushobozi bwayo”﴿ (Al-ikhlaasw: 1-4).
Imana Rurema Ikwiye gusengwa, Itegerezwa kuba Ifise amatazirano atunganye aranga ubutore n'ubutwari bwayo
Mu matazirano yayo, ni uko ari Imana Isengwa, ikindi cose atari Yo, ni ikiremwa gihabwa amabwirizwa kiganzwa na Yo.
Mu matazirano yayo, ni uko ari Nyenubugingobudashira, Muhagarikizi Yikwije muri vyose, ikintu cose rero gifise ubuzima, Imana Allah ni Yo Yakibuhaye Iranakirema inyuma y'aho kitari kihari, ni Yo Muhagarikizi Ihagarariye ukubaho kw'ikintu ico ari co cose mu kukironsa ibikibeshaho bikwiye. Imana Rurema rero, ni Nyenubugingobudashira ntipfa, ntibinabaho ko Ihwera, Muhagarikizi Yikwije muri vyose ntiryama, ahubwo mbere ntinahunyiza ngo Ishake kuryama.
Mu matazirano yayo, ni uko ari Nyenubumenyikurivyose nta na kimwe kiyinyegeje kw'isi eka no mw'ijuru,
mu matazirano yayo, ni uko ari Nyenukwumva, Nyenukubona, Irumva ikintu ico ari co cose, kandi Irabona neza ikintu ico ari co cose mu biremwa, Irazi n'ibiri ku mutima hamwe n'ibihishijwe mu mushaha, nta na kimwe cinyegeje Imana Allah Nyenukuninahazwa haba kw'isi canke mw'ijuru.
Mu matazirano yayo, ni uko ari Mushoboravyose nta na kimwe kiyinanira, nta na kimwe gishobora kugabitanya kw'ishaka ryayo, Ikora ico Ishatse Ikabuza ico Idashatse ko kiba, Ishira imbere vyose aho bikwiye ku bushake bwayo no ku ntumbero Ishaka, Igashira ikintu cose mu kibanza caco kikibereye, vyose Ikabigira mu ntumbero nziza ku biremwa.
Mu matazirano yayo, ni uko ari Rurema, Mubeshaho, Mubungabunzi Yaremye ibiremwa, ibiremwa vyose biri mu minwe yayo ni na Yo Ibiganza.
Mu matazirano yayo, ni uko ari Yo Nyeninyishu Yumvira uwuri mu vyago, Ikanatabara uwuyiyambaje, Ikanakura mu kaga uwugeramiwe, burya ikiremwa ico ari co cose iyo kiguye mu kiza canke mu kaga, gisanga gitegerezwa kugaruka kwitura kuri Yo ngo Igitabare.
Ibikorwa nyegerezamana rero, bitegerezwa gutumberezwa ku Mana Allah Yonyene Nyenuguhabwicubahiro nta ngere; kuko ari Yo Ntore Itunganye Ikwiye kwiyegerezwa mu bikorwa nyegerezamana, ikintu ico ari co cose rero atari Yo gisengwa, kiba ari ikinyoma ceruye, kirangwa n'agahaze, kirindiriwe n'urupfu hamwe n'uguhona.
Imana Allah Nyenukuninahazwa Yaduhaye ubwenge ngo budushoboze gutahura ubuhambazi bwayo, Iduha ishaka-ndemanwa "fitwra" ryo gukunda ivyiza n'iryo kwanka ibibi, gutyo ubwenge Yaduhaye bugaturura iyo bugarutse ku Mana Allah, Mubungabunzi w'ibiremwa vyose, iryo shaka-ndemanwa rero rirerekana ubutore n'ubutwari bw'Imana Allah, bukerekana n'uko Nyenukuninahazwa Idashobora kurangwa n'agahaze.
Ntibibereye umuntu w'umunyabwenge ko asenga kiretse Uwurangwa n'ubutore n'ubutwari kumusumba, none burya umuntu bimugendera gute ngo asenge ikiremwa nka we canke igiciriritse cane mu ndemo!
Imana Ikwiye gusengwa ntishobora kuba ari umuntu, canke ikigirwamana, canke igiti canke ikinyabuzima ico ari co cose!
Imana Rurema Iri hejuru y'amajuru yayo, Ihangamye ku Buhangamo bwayo "Arshi", ntiyitiranwa n'ibiremwa vyayo mu kungene Iteye, ubwayo ntirangwa na kimwe mu biranga ibiremwa vyayo, eka no mu kungene ibiremwa vyayo biremye, nta na kimwe kibiranga mu biranga Imana Allah, ntiyihindura ngo Inyengetere mu kintu mu biremwa vyayo, eka ntinishushanya ngo Icike kimwe mu biremwa vyayo.
Imana Rurema, nta na kimwe rero gisa canke gisusa na Yo mu kuntu Iteye, mu mazina yayo, mu matazirano yayo no mu bikorwa vyayo, ni Yo Nyenukwumva, Nyenukubona, ntigira na kimwe gisusa na Yo, ni Yo Wikenuye ata co Ikeneye ku biremwa vyayo, ntiryama, ntirya, ni Yo Nyenicubahirogisumbavyose ntibishoboka kuba Ifise umugore canke umwana; kuko Imana Rurema Ifise amatazirano aranga icubahiro n'ubuhambazi bwayo, eka ntibinashoboka ko Ikenera na kimwe ku biremwa canke ngo Irangwe n'agahaze.
Imana Allah Nyenuguhabwicubahiro nta ngere Yavuze Iti: ﴾Emwe bantu! Mwaraciriwe agace, nimutege amatwi rero mukumvirize mwongere mukazirikane. Mu vy’ukuri, ibigirwamana musenga mu gishingo c’Imana Allah, ntibizopfa bishoboye kurema n’isazi imwe gusa n’aho vyogira urunani, nkeswe rero kurema igisumba isazi! No mu gihe isazi yogira ico yihagiye mu kununuza kimwe mu vyatanzweko ikimazi ku bigirwamana, nya bigirwamana ntivyoshobora kuyaka ico yihagiye. Ibigirwamana rero, nta na kimwe bishoboye kuko ata bubasha bwo kurema bifise, eka ntibinafise n’ububasha bwo guhabuza ivyo isazi yihagiye, bitayeko n’isazi ubwayo nyene nta co ishoboye. Ababangikanyamana ntibahaye namba Imana Allah icubahiro kiyikwiye mu kuyibangikanya n’ibiremwa, mu vy’ukuri Imana Allah ni Nyeninguvu, Nyenintsinzi-Mutaneshwa﴿ (Al-Hajji: 73-74).
Ni kuki Imana Rurema Ihambaye Yaturemye? Ishaka ko twokora iki?
Mbega vyoba bitahuritse kuba Imana Allah Yaremye ibi biremwa vyose ata hangiro ibifiseko? Yoba Yabiremye mu bufyinyi kandi ari Yo Nyenubutungane muri vyose, Nyenubumenyimurivyose?
Burya vyoba bitahuritse kuba Imana Allah Yaturemye muri iyi ndinganizo itunganye, Ikanaturemera amajuru n'isi, Yoturema ata hangiro Idufiseko, canke ko Yotureka gutyo gusa ata nyishu Iduhaye ku bibazo bihambaye biduhanze! Akarorero: Ni kuki twebwe turi ng'aha kw'isi? Mbega inyuma yo gupfa, hazokurikira iki? Ni irihe hangiro ry'iremwa ryacu?
Mbega vyoba bitahuritse kuba ata gihano gitegekanirijwe uwirenganya mw'ibangikanyamana, bigatahurika ko ata n'agahembo gategekanirijwe umugwaneza?
Imana Allah Nyenukuninahazwa Yavuze Iti: ﴾Mbega bantu! Mwiyumvira ko Twebwe Allah Twabaremye mu gufyina ata ntumbero Tubafiseko; n’uko mutazosubizwa iwacu mu buzima bw’inyuma yo gupfa, kugira Tubahembere ivyo mwakoze!﴿ (Al-Mu-minuuna: 115).
Ahubwo rero, Imana Allah Yarungitse Intumwa kugira tumenye ihangiro ryo kubaho kwacu, Yaratwerekeje n'ukungene tuyiyegereza mu bikorwa vyacu vyose tunayisenga ari Imwe Rudende, Iranatwerekeza n'ico Imana Allah Idushakako, n'ukungene twoshimwa na Yo, Yaranatwiganiye iherezo ryacu mu nyuma yo gupfa!
Imana Allah rero, Yarungitse Intumwa kugira zitubwire ko ari Yo Yonyene Ikwiye kwiyegerezwa mu vyo dukora vyose tunayisenga; Yazirungitse kandi zidushikirize amabwirizwa y'ibitegetswe n'ay'ibibujijwe gukorwa, zongere zitwigishe imico n'imigenzo myiza; mu gihe iyo mico n'imigenzo vyoturanga, ubuzima bwacu bwoba bwiza cane bukuzura ivyiza, imigisha n'imihezagiro.
Imana Allah rero, Yararungitse Intumwa nyinshi; nka Nuhu, Ibrahimu, Musa na Isa. Imana Allah Yaranahaye izo Ntumwa Aayah n'ibitangaro vyemeza ukuri kwazo, n'uko zarungitswe koko n'Imana Rurema Allah Nyenukuninahazwa; iyazisozereye ikaba ari Muhamadi (nyakugira amahoro n'impuhwe z'Imana Allah).
Intumwa rero, zaratwiganiye mu buryo butomoye ko ubu buzima bwo kw'isi ari ubuzima bw'igeragezwa, n'uko ubuzima nya buzima ari ubw'inyuma yo gupfa,
n'uko hariho Ubwami bw'ijuru bwagenewe abemeramana biyegereje Imana Allah mu vyo bakora vyose, bakanayisenga ari Imwe Rudende ata kuyibangikanya na kimwe, bakemera n'Intumwa zose; n'uko hariho umuriro Imana Allah Yategekanirije abagararizamana basenze ibigirwamana hambavu y'Imana Allah, canke bagararije Intumwa n'aho yoba imwe gusa mu zindi Ntumwa zarungitswe n'Imana Allah.
Imana Allah Nyenuguhabwicubahiro nta ngere Yavuze Iti: ﴾Emwe Bene Adamu! Nimwashikirwa n’Intumwa zanje zirungitswe muri mwebwe, zibasomera Aayah z’Igitabu canje, zikanabatomorera ivyemezo vyerekana ukuri kw’ivyo zibashikiriza, muraheza muzumvire. Abazokwirinda ishavu ryanje bagatunganya ibikorwa vyabo, ntibazogira ubwoba bwo guhanwa ku musi w’izuka, eka mbere bobo ntibazokwicwa n’intuntu y’ivyo basize kw’isi. Abahakanye bivuye inyuma ivyemezo vyacu vyerekana ko Imana Allah ari Imwe Rudende, bakanagira amanyama mu kuvyirengagiza, abo ni bo bantu rero bo mu muriro, bazowubamwo ibihe bidahera﴿ (Al-A'raaf: 35-36).
Imana Allah Nyenuguhabwicubahiro nta ngere Yavuze Iti: ﴾Emwe Bantu! Nimwiyegereze Imana yanyu Rurema Allah mu vyo mukora vyose munayisenge ari Imwe Rudende, Yo Yabaremye Irema n’abo hambere yanyu kugira ngo muyigamburukire mu kwubahiriza amabwirizwa yayo. Ni Yo Yabagiriye isi nk’isaso kugira ngo mushobore kuyibako; Ibubakira n’ijuru nk’igisenge, Imanura n’amazi y’imvura avuye mu bicu azananye mu kirere, Iraheza Imeza hakoreshejwe nya mazi ivyamwa bitandukanye kugira ngo bibe imfungurwa zanyu. Kubera ivyo rero, ntimukabangikanye Imana Allah mu gusenga ibigirwamana, kandi na mwe nyene muzi neza ko ari Yo Rurema, Rutunga. Nimwaba mufise amakenga yuko Twamanuriye Qor’ani Intumwa yacu (Muhamadi nyakugira amahoro n’impuhwe z’Imana Allah), murazana rero igisomwa kimwe gusa gisa canke gisusa na Qor’ani, kandi murarike n’abantu bababere ivyabona hatarimwo Imana Allah, nimwaba muri imvugakuri mw’ihakana ryanyu rya Qor’ani. Nimutabigira, kandi nta n’ivyo muzoshobora, muraheza rero mwiyubare ibihano vy’umuriro udahera wa Jahannamu, muheze mwemere Umuvugishwamana (nyakugira amahoro n’impuhwe z’Imana Allah) maze mugamburukire Imana Allah. Ivyegenyezo vya nya muriro ni abantu n’amabuye. Wateguriwe abagarariji. Ntumwa y’Imana! Shikiriza abemeye bakanakora ivyiza bitegetswe, inkuru ihumuriza ko bazohabwa imirima itotahaye yo mu Bwami bw’ijuru, musi y’ibiti n’inyubakwa vyabwo hatemba inzuzi. Igihe cose bafunguriwe mu vyamwa vyayo bavuga bati: “Izi mfungurwa ni nk’izo twafungurirwa hambere kw’isi!”. Bazihawe zisa n’izo kw’isi ariko zidasusa. Bamaze kuzifungura, bazosanga zisangije akanovera. Bazoba rero bahafise n’abakenyezi basukuye batagira akanenge. Bazobamwo ibihe bidahera﴿ (Al-Baqara: 21-25).
NI KUKI HARUNGITSWE INTUMWA NYINSHI ZITANDUKANYE?
Ni ukuri, Imana Allah Yararungitse Intumwa ku migwi n'iyindi y'abantu, ku buryo ata mugwi n'umwe w'abantu wabayeho kiretse ko Yawurungikiye Intumwa, kugira iwurarikire kwiyegereza Imana yabo Rurema mu vyo bakora vyose banayisenga, iheze ibashikirize amabwirizwa yayo y'ibitegetswe n'ay'ibibujijwe gukorwa, kandi rero intumbero y'irarikiramana ry'izo Ntumwa zose, yari ukurarikira abantu ko bakwiye kwiyegereza Imana Allah Yonyene Nyenintsinzi na Nyenicubahiro mu vyo bakora, bakanayisenga ari Imwe Rudende, igihe cose rero bishitse abantu bagatangura kureka canke gutosekaza inyigisho bazaniwe n'Intumwa yabo, mu bijanye n'isengwa ry'Imana Imwe Rudende, Imana Allah Yaca Irungika iyindi Ntumwa kugira ikosore amerekero, maze isubize abantu ku kwemera ndemanwa gushingiye kw'isengwa ry'Imana Imwe Rudende no kw'iyumviramana, gushika rero aho Imana Allah Iheturiye izo Ntumwa mu kurungika iya nyuma muri zo, na yo ikaba ari Muhamadi (nyakugira amahoro y'Imana Allah) yaje azanye amabwirizwa yamaho ahuriweko n'abantu bose gushika ku musi w'umuhero w'isi; ni amabwirizwa atunganye muri vyose, yasubiriye amabwirizwa yo hambere yayo, Imana Rurema Allah Ikaba Yarishinze kubungabunga ayo mabwirizwa n'ubu butumwa ku buryo bizokwamaho gushika ku musi w'umuhero w'isi.
UMUNTU NTASHOBORA KUBA UMWEMERAMANA ATABANJE KWEMERA INTUMWA ZOSE
Imana Allah, ni Yo Yarungitse Intumwa zose, Iraheza Itegeka abantu bose kuzumvira, ku buryo uwugararije ubutumwa bw'imwe muri zo, ni ukuri aba azigararije zose, nta n'icaha rero gihambaye cane coza gisumba umuntu gusubiza ku Mana Allah ivyo Yahishuriye Intumwa, ni ngombwa rero kugira umuntu yinjire mu Bwami bw'ijuru, ko yemera Intumwa zose ata n'imwe ivuyemwo.
Igitegetswe ku muntu uwo ari we wese muri kino gihe rero, ni uko yemera Imana Allah n'Intumwa zayo zose akanemera n'umusi w'iherezo; ivyo bikaba bidashoboka kiretse mu gihe yemeye akanakurikira uwazihetuye zose, Muhamadi (nyakugira amahoro n'impuhwe z'Imana Allah), yashigikijwe igitangaro kizokwamaho, na co kikaba ari Qor'ani ntagatifu, Imana Allah Yishinze Yo Nyene kuzokibungabunga gushika igihe Imana Allah Yatoranye isi n'ibiri kuri yo.
Imana Allah Yaravuze muri Qor'ani ntagatifu, ko uwanse kwemera Intumwa imwe mu Ntumwa zayo, aba agararije Imana Allah, ahakanye n'ivyo Yahishuriye Intumwa. Imana Allah Nyenuguhabwicubahiro nta ngere Yavuze Iti: ﴾Mu vy’ukuri, abagarariza bagahakana bivuye inyuma Imana Allah n’Intumwa zayo, mu bayahudi no mu banaswara , bagashaka kuvangura hagati y’Imana Allah n’Intumwa zayo mu kwemera Imana Allah gusa, bagahakana Intumwa zose canke zimwe muri zo, bagaheza bakinamura bati: “Twemera zimwe muri zo tugahakana izindi”, bagashaka kugira iryo vangura mu kwemera inzira n’idini ry’ubuhuvyi badukanye; Abo rero, ni bo bagarariji vy’ukuri. Twaranategekanirije abagarariji ibihano bisuzuguza﴿ (An-Nisaa-i: 150-151).
Ni kuri izo mvo rero, twebwe abislamu nk'uko Imana Allah Yabidutegetse, twemera Imana Allah n'umusi w'iherezo, twemera Intumwa zose tukemera n'Ibitabu vyose vy'aho hambere ya Qor'ani. Imana Allah Nyenuguhabwicubahiro nta ngere Yavuze Iti: ﴾Intumwa y’Imana (nyakugira amahoro n’impuhwe z’Imana Allah) yaremeye iranizigira ivyo yahishuriwe n’Imana yayo Rurema Allah muri Qor’ani, eka n’abemeramana baravyemeye baranabishira mu ngiro; umwe wese muri bo yaremeye Imana Allah, abamalayika bayo, Ibitabu vyayo n’Intumwa zayo zose, baraheza bavuga bati: “Ntituvangura n’imwe mu kwemera Intumwa zayo”. Barongeye baravuga hamwe n’Intumwa bati: “Twumvise kandi twumviye Imana Allah, turasavye rero imbabazi n’ikigongwe cawe, Mana yacu Rurema! Ni no kuri Wewe rero tuzosubira kugira Uduhembere ivyo twakoze”﴿ (Al-Baqara: 285)
Qor'ani ntagarifu, ni igiki?
Qor'ani ntagatifu, ni amajambo y'Imana Allah Nyenuguhabwicubahiro nta ngere, Yamanuriye Intumwa Muhamadi yahetuye Intumwa zose, ni co gitangaro gihambaye cerekana ukuri kw'ubuvugishwamana bwa Muhamadi (nyakugira amahoro n'impuhwe z'Imana Allah), Qor'ani ntagatifu ni co Gitabu c'ukuri mu ngingo no mu mabwirizwa vyaco, ni ic'ukuri no mu nkuru n'amateka gishikiriza. Imana Allah Yarahize n'abahakanyi ko bozana ibisusa na Qor'ani n'aho coba igisomwa kimwe gusa, maze barananirwa kuko Qor'ani yo irangwa n'ubwiza mu kuntu yanditse, mu kungene amajambo yayo atondetse mu mungane y'akaroruhore, Qor'ani kandi ihurikiyemwo vyinshi mu vyemezo bishingiye ku bwenge n'ibishingiye ku bumenyi, vyose bikaba vyerekana ko iki Gitabu ca Qor'ani ari ngombwa ko cemerwa; ni nk'uko hahurikiyemwo amabwirizwa y'ibitegetswe n'ibibujijwe gukorwa, ari ngombwa ko umuntu ayagendera mu gutunganya ibikorwa biri hagati yiwe n'Imana yiwe Rurema, canke ibimwega ku gatwe kiwe, canke ibiri hagati yiwe n'abandi bantu, ivyo vyose rero bigasigurwa mu buryo buhanitse, butunganye kandi butomoye; Qor'ani kandi ihurikiyemwo vyinshi mu vyemezo bishingiye ku bwenge n'ibishingiye ku bumenyi, vyose bikaba vyerekana ko iki Gitabu ca Qor'ani, bidashoboka ko coba canditswe n'iminwe y'abantu, ahubwo ko ari amajambo y'Imana Rurema Nyenukuninahazwa Nyenuguhabwicubahiro nta ngere, Yaremye abantu.
UBWISLAMU NI IGIKI?
Ubwislamu, ni ukwicisha bugufi ku Mana Allah Nyenuguhabwicubahiro nta ngere mu kuyemera ari Imwe Rudende, no mu kuyikurikira mw'iyumviramana, hamwe rero n'ukwubaha ukubahiriza amabwirizwa yayo mu gushimishwa n'ukwakira ibigushikiye uko biri kwose.
Imana Allah rero, Yarungikanye Intumwa zose ubutumwa bumwe, na bwo bukaba ari: ukurarikira abantu kwiyegereza Imana Allah mu vyo bakora vyose banayisenga ari Imwe Rudende ata kuyibangikanya na kimwe mu biremwa, no kugararariza birya vyose bisengwa mu gishingo c'Imana Allah.
Ubwislamu, ni ryo dini ry'Abavugishwamana bose, kanatsinda irarikiramana ryabo ryari rimwe n'aho amabwirizwa yabo vyashika agatandukana (ufatiye ku vyo umugwi w'umwumwe wese wari ukeneye), abislamu kuri uno musi rero, ni bo bonyene bagitsimbataye kw'idini ry'ukuri ry'Abavugishwamana bose, ubutumwa bw'ikislamu kuri uno musi, ni bwo bw'ukuri, kuko Imana Rurema Yatumye Intumwa Ibrahimu na Musa na Isa, ni Yo nyene Yatumye uwasozereye Intumwa, Muhamadi (nyakugira amahoro n'impuhwe z'Imana Allah), ni na co gituma amabwirizwa y'ubwislamu yasubiriye amabwirizwa yose yo hambere yayo.
Mu vy'ukuri, itunganywa ry'amasengesho y'abantu basenga mw'idini iri na ririya kuri uno musi havuyemwo ubwislamu gusa, ni itunganywa ry'abantu bishiriyeho, canke ni itunganywa ryigeze kuba rishingiye kw'idini ry'Imana, mu nyuma rero iminwe y'abantu irahindagura bimwe muri ryo, riraheza ricika uruvangatirane rw'amangetengete n'ibintazi abantu bagiye biyongereramwo, baraheza barabihanahana uruvyaro ku rundi hongewemwo ivyiyumviro vy'abantu.
Nayo ibijanye n'idini ry'abislamu, usanga ari idini rimwe kandi ritomoye ritigera rihinduka; ni nk'uko ibikorwa vyabo nyegerezamana bagira mu kwiyegereza ku Mana Allah, usanga bikorwa mu buryo bumwe, aho usanga bose basenga amasengesho-bwirizwa atanu ku musi, bagatanga ishikanwa-bwirizwa ry'amatungo yabo, bagapfunga ukwezi kwa Ramadhani, bakihweza kumwe n'ibwirizwa ngenderwako ryabo ari ryo Qor'ani ntagatifu, usanga ari Igitabu kimwe cubahirizwa mu makungu yose. Imana Allah Nyenuguhabwicubahiro nta ngere Yavuze Iti: ﴾Kuri uno musi, idini ryanyu ry’ubwislamu Ndaribakwirije ku kubashikana ku ntsinzi, Ndabatunganirije n’inema zanje ku kubakura mu muzimagiza, Nkabashira mu muco w’ukwemera, kira noneho, Naramaze kubahitiramwo ubwislamu kuba ari ryo dini ryanyu, nimuritsimbatareko rero. Ariko rero uwishwe n’inzara, bikaba ngombwa kuri we kurya intumvyi, atarondera gukora n’ibigirankana icaha, ararekuriwe kuyikorako mu kwikiza nya nzara. Mu vy’ukuri, Imana Allah ni Nyenimbabazi-ntangere ku bigaya, Nyenimbabazi ku batoni bayo﴿ (Al-Maa-ida: 3).
Imana Allah Nyenuguhabwicubahiro nta ngere Yavuze muri Qor'ani Iti: ﴾Ntumwa y’Imana! Bwira abagarariji uti: “Twaremeye Imana Allah, nta n’iyindi mana twemera atari Yo, twaranemeye ivyo Yaduhishuriye n’ivyo Yahishuriye Ibrahimu, abahungu biwe Ismayili na Is-haqa, umwuzukuru wiwe Yakubu mwene Is-haka, Intumwa zikomoka kuri Yakubu zarungitswe mu moko cumi n’abiri ya Bene Israyeli, ivyahawe Intumwa Musa na Isa muri Tawurati no mu Njili, hamwe rero n’ivyamanuriwe abandi Bavugishwamana, abo bose turabemera tutavanguye n’umwe muri bo, kandi rero twebwe turi abislamu twicisha bugufi ku Mana Allah”. Uwurondera kwubahiriza idini ritari iry’ubwislamu ntazoryakirirwa namba, kandi no mu buzima bw’inyuma yo gupfa azoba mu bahomvye ubuzima bwabo bwose﴿ (Aali Imraani: 84-85).
Idini ry'ubwislamu rero, ni indinganizo ihurikiyemwo ivyankenerwa vyose vyo mu buzima, irahuye n'imigenzo ndemanwa n'ubwenge, ryemerwa n'imishaha ikigororotse, Imana Rurema Yarishingiye ibiremwa vyayo, ni na ryo dini ryitwararika ineza n'ukuroranirwa kw'abantu mu buzima bwo kw'isi no mu bw'inyuma yo gupfa, ntirivangura ngo riheshe icubahiro uyu canke uriya ufatiye ku basangiye amaraso canke ubwoko, ufatiye kw'ibara ry'urukoba, abantu bose rero mu bwislamu barangana imbere y'amategeko, nta n'umwe yubashwe gusumba uwundi kiretse mu gihe hisunzwe ibikorwa vyiwe vyiza.
Imana Allah Nyenuguhabwicubahiro nta ngere Yavuze Iti: ﴾Uwukoze iciza rero, yaba umuhungu canke umukobwa, akaba yemera n’Imana Allah hamwe n’Intumwa yayo, ni ukuri Tuzomuha ubuzima bwiza bw’iteka n’itekane kw’isi n’aho yobaho akenye; kandi ni ukuri mu buzima bw’inyuma yo gupfa, azoba ari mu bo Tuzohemba indishi yabo nziza ibereye ku vyo bari barakoze﴿ (An-Nahl: 97).
UBWISLAMU NI INZIRA YO KURORANIRWA
Ubwislamu, ni idini ry'Abavugishwamana bose, ni na ryo dini ry'Imana Allah ku bantu bose, si idini ryagenewe gusa Abarabu.
Ubwislamu, ni yo nzira y'ukuroranirwa nya kuroranirwa mu buzima bwo kw'isi, no kuronswa inema zamaho mu buzima bw'inyuma yo gupfa.
Ubwislamu, ni ryo dini ryonyene rishoboye kuronsa umuntu ivyankenerwa vyose vy'umushaha n'ivy'umubiri, hamwe rero n'uburyo bw'ikemura ry'ingorane zishikira kiremwa-muntu. Imana Allah Nyenuguhabwicubahiro nta ngere Yavuze Iti: ﴾Imana Allah Yabwiye Adamu na Hawa Iti: “Nimuve mu Bwami bw’ijuru mumanuke kw’isi mwese muri kumwe na Ibilisi, mwebwe na we mwamaze gucika abansi hagati yanyu; nimwashikirwa n’uburongozi buvuye iwanje, uwuzokurikira uburongozi bwanje muri mwebwe, ntazokwigera ahuba kw’isi, eka ntazonagorwa mu buzima bw’inyuma yo gupfa; (Twaa Haa: 123) Nayo uwuzogenza umugongo mu kwirengagiza uburongozi bwanje, mu vy’ukuri azobaho ubuzima bw’ivyago n’amaganya kw’isi , Duheze Tumuzure ku musi w’izuka ari impumyi kuko yirengagije kubona ukuri kw’ivyemezo vyacu akiri kw’isi”﴿ (Twaa Haa: 123-124).
UKWINJIRA MU BWISLAMU, BIMARIYE IKI?
Ukwinjira mu bwislamu birafise inyungu n'akamaro kanini, aha twovuga:
- Kuronka intsinzi n'iteka mu buzima bwo kw'isi mu kuba umuntu ari umuja w'Imana Allah, bitagenze ukwo araheza akaba umuja w'ivyipfuzo vyiwe n'uwa shetani hamwe n'ibihendamaso vy'isi.
- Intinzi ihambaye mu buzima bw'inyuma yo gupfa, mu kugirirwa imbabazi no mu gushimwa n'Imana Allah, maze umuntu Izomwinjiza mu Bwami bw'ijuru yishimiwe n'Imana Allah, akazobayo mu nema zamaho, gutyo Akarokoka ibihano vy'umuriro.
- Abemeramana, ku musi w'izuka ry'ibiremwa, bazoba bari kumwe n'Abavugishwamana, imvugakuri, abapfiriye Imana Allah hamwe rero n'aberanda, ntiworaba impuhwe n'urukundo bizoba bibaranga! Nayo uwutazoba yemera Imana Allah, akazoba ari kumwe n'ibigirwamana vyo mu bwoko bwose, abanyeshari, abanyavyaha hamwe rero n'abagenzwa n'ubwononyi kw'isi.
- Abazokwinjizwa n'Imana Allah mu Bwami bw'ijuru, bazobubamwo bari mu nema zamaho, muri bwo nta gupfa, nta kurwara, nta kugira umubabaro, nta gusaza canke kugira agahinda, muri bwo bazohabwa ivyo bipfuza vyose. Nayo abazokwinjira mu muriro bazobayo ibihe bidahera mu bihano vyamaho ata gutezurirwa namba.
- Mu Bwami bw'ijuru, hariyo ibiryoshe ijisho ritarigera ribona, hariyo n'ivyiza vy'akaroruhore ugutwi kutarigera kwumva, hariyo n'ibihimbaye umushaha w'umuntu, agatima katarigera gakubita ngo kavyiyumvire. Mu vyemezo vyemeza ivyo, ni Aayah, aho Imana Allah Nyenuguhabwicubahiro nta ngere Yavuze Iti: ﴾Uwukoze iciza rero, yaba umuhungu canke umukobwa, akaba yemera n’Imana Allah hamwe n’Intumwa yayo, ni ukuri Tuzomuha ubuzima bwiza bw’iteka n’itekane kw’isi n’aho yobaho akenye; kandi ni ukuri mu buzima bw’inyuma yo gupfa, azoba ari mu bo Tuzohemba indishi yabo nziza ibereye ku vyo bari barakoze﴿ (An-Nahl: 97). Imana Allah Nyenuguhabwicubahiro nta ngere Yavuze Iti: ﴾Nta muntu n’umwe rero azi ivyategekanirijwe abemeramana mu vyiza biri aho vy'akaroruhore, biryoheye ijisho bikeza n’umutima. Iyo, ni yo ndishi ku vyiza bamye bakora kw’isi﴿ (As-Sajda: 17).
MU GIHE NOKWANKA KWINJIRA MU BWISLAMU, NOHOMBA IKI?
Umuntu yanse kwinjira mu bwislamu, aba ahomvye umushinge uhambaye w'ubumenyi n'ubwenge, na wo ukaba ari ukumenya Imana Allah; araheza kandi agahomba kwemera Imana Allah, Yo Iha umuntu iteka n'itekane mu buzima bwo kw'isi hamwe n'inema zamaho zo mu buzima bw'inyuma yo gupfa.
Umuntu aranahomba ubumenyi buhambaye bwo gutahura Igitabu gihambaye Imana Allah Yamanuriye abantu, agatako agahomba no kutacemera.
Aranahomba kwemera Abavugishwamana b'imboneza, arahomba kandi kuzoba ari kumwe na bo ku musi w'izuka mu Bwami bw'ijuru, akazoba ari kumwe n'amashetani hamwe n'abanyavyaha, hamwe rero n'ibigirwamana vy'ubwoko bwose, aho bazohurira mu muriro wa Jahannamu, rikaba ari ryo cumbi ribi ry'abaranzwe n'ubucuti bubi!
Imana Allah Nyenuguhabwicubahiro nta ngere Yavuze Iti: ﴾Babangikanyamana! Nimusenge ivyo mushaka mu bigirwamana mu gishingo c’Imana Allah, ivyo vyose nta co binyicira”. Ntumwa y’Imana! Vuga uti: “Mu vy’ukuri abari mu ruhombo nya ruhombo, ni barya bihombeye bagahomba n’imiryango yabo ku musi w’izuka ”. Bantu, nimwumve mwumvireho! Urwo rero, ni rwo ruhombo rugaragara. Abo bahomvye ku musi w’izuka, bagenewe ibihano bikaze vy’umuriro uzoba ubakikuje hejuru no musi, nk’amagorofa amahanga. Ivyo bihano rero, Imana Allah Ivyiganira abaja bayo, kugira bikebuke maze bavyiyubare. Emwe baja banje! Nimungamburukire rero mu kwubahiriza amabwirizwa yanje﴿ (Az-Zumar: 15-16).
Uwushaka rero kurokoka ibihano mu buzima bw'inyuma yo gupfa, ategerezwa kwinjira mu bwislamu agakurikira Umuvugishwamana Muhamadi (nyakugira amahoro n'impuhwe z'Imana Allah).
Mu bintu vy'ukuri Abavugishwamana n'Intumwa (ba nyakugira amahoro y'Imana Allah) bahurijeko, ni uko ata wuzorokoka ibihano mu buzima bw'Inyuma yo gupfa, kiretse abislamu bemeye Imana Allah Nyenuguhabwicubahiro nta ngere, batigeze bayibangikanya na kimwe mu bikorwa vyo kuyiyegereza, bakemera n'Abavugishwamana n'Intumwa; abakurikiye rero Intumwa bakanazemera vy'ukuri, bazoheza binjire mu Bwami bw'ijuru, banarokoke mu bihano vyo mu muriro.
Ababayeho mu gihe c'Umuvugishwamana Musa bakanamwemera, bagakurikira n'inyigisho ziwe, abo ni abislamu bakaba n'abemeramana b'aberanda; ariko inyuma y'aho Imana Allah Irungikiye Isa, vyari ngombwa ko abakurikiye Musa, bemera Isa bakanamukurikira. Abemeye Isa rero, abo ni abislamu bakaba n'abemeramana b'aberanda. Nayo uwuhakanye mu kutemera Isa maze akavuga ngo nzoguma kw'idini rya Musa, uwo ntaba ari umwemeramana; kuko yaretse kwemera Umuvugishwamana yarungitswe n'Imana Allah. Mu nyuma y'aho rero Imana Allah Irungikiye uwahetuye Intumwa zose Muhamadi (nyakugira amahoro n'impuhwe z'Imana Allah), vyari ngombwa ko abantu bose bamwemera, kuko Imana Rurema Yarungitse Musa na Isa, ni Yo nyene Yarungitse uwasozereye Intumwa zose ari we Muhamadi. Uwugararije ubutumwa bwa Muhamadi (nyakugira amahoro n'impuhwe z'Imana Allah), maze akavuga ngo nzoguma ndi mu bakurikiye Intumwa Musa canke Isa, uwo ntaba ari umwemeramana.
Ntibikwiye ko umuntu avuga gusa ko yubaha akubahiriza abislamu; ntibinakwiye kugira arokoke ibihano vyo mu buzima bw'inyuma yo gupfa, kuba yotanga imperezwa agafasha abakene, ahubwo ni ngombwa ko abanza kwemera Imana Allah, Ibitabu vyayo, Intumwa zayo hamwe rero n'ukwemera umusi w'iherezo. Kugira ngo Imana Allah Iheze Imwakirire ivyo yakoze vyose yibaza ko adakoze ivyo vyokunda! Burya nta caha gihambaye cane coza gisumba ibangikanyamana n'igararizamana hamwe rero no kwiyamiriza ivyahishuwe n'Imana Allah, canke kwanka ubutumwa bw'uwahetuye Abavugishwamana bayo, Muhamadi (nyakugira amahoro n'impuhwe z'Imana Allah).
Burya abayahudi n'abanaswara n'abandi atari bo, bumvise umuzo w'Intumwa Muhamadi (nyakugira amahoro n'impuhwe z'Imana Allah) bakanka kuyemera no kwinjira mw'idini ry'ubwislamu, bazokwinjizwa mu muriro wa Jahannamu bawubemwo ibihe bidahera bari mu bihano vyamaho. Iyo rero, ni ingingo y'Imana Allah, si n'ingingo y'umuntu n'umwe mu bantu. Imana Allah Nyenuguhabwicubahiro nta ngere Yavuze Iti: ﴾Mu vy’ukuri, abagararije mu bahawe Igitabu n’ababangikanyamana, bazohanwa mu muriro wa Jahannamu, bazowubamwo ibihe bidahera. Abo rero, ni bo babi cane mu biremwa﴿ (Al-Bayyina: 6).
Mu gihe rero hamaze kuza ubutumwa bw'uwasozereye Intumwa zarungitswe n'Imana Allah ku biremwa, ni ngomba ku muntu wese yumvise umuzo w'ubwislamu n'irungikwa ry'Unuvugishwamana wanyuma Muhamadi (nyakugira amahoro n'impuhwe z'Imana Allah), ko amwemera akanakurikira amabwirizwa yazanye, akanamwumvira mu vyo yategtse no mu vyo yabujije. Ni kuri iyo mvo rero, uwo ari we wese yumvise ubu ubutumwa bwahetuye ubundi akabwanka, Imana Allah Itazomwakirira ikintu na kimwe, kandi Izoheza Imuhane mu buzima bw'inyuma yo gupfa.
Mu vyemezo bivyemeza, ni Aayah aho Imana Allah Nyenuguhabwicubahiro nta ngere Yavuze Iti: ﴾Uwurondera kwubahiriza idini ritari iry’ubwislamu ntazoryakirirwa namba, kandi no mu buzima bw’inyuma yo gupfa azoba mu bahomvye ubuzima bwabo bwose﴿ (Aalu Imraani: 85).
Imana Allah Nyenuguhabwicubahiro nta ngere Yavuze Iti: ﴾Ntumwa y’Imana! Bwira abahawe Igitabu mu bayahudi n’abanaswara, uti: “Enda nimuze dukurikire twebwe na mwe ijambo ritunganye ry’ukuri; ryuko tutokwiyegereza mu vyo dukora vyose tugasenga kiretse Imana Allah; tutonayibangikanya n’ikindi kintu na kimwe; tutonagira bamwe muri twebwe ibigirwamana mu gishingo c’Imana Allah”. Nibaramuka bagenjeje umugongo bakirengagiza, muraheza mubabwire muti: “Nimwemange rero mutubere ivyabona ko twebwe turi abislamu twicisha bugufi ku Mana Allah mu kuyisenga ari Imwe Rudende”﴿ (Aalu Imraani: 64).
KUGIRA MBE UMWISLAMU, NTEGEREZWA GUKORA IKI?
Kugira winjire mu bwislamu, ni ngombwa ko wemera izi nkingi zitandatu:
Ukwemera Imana Allah Nyenuguhabwicubahiro nta ngere; ni ukwemera yuko ari Yo Rurema, Rutunga Ibeshejeho ibiremwa vyose, Umubungabunzi na Rugaba wavyo, ntigira ikintu na kimwe gisa canke gisusa na Yo, ntigira umugore, eka ntigira n'umwana; ukemera n'uko ari Yo Ikwiye kwiyegerezwa muri vyose Ikanasengwa ari Imwe Rudende, maze ntihagire na kimwe asenga hambavu y'Imana Allah, agaheza kandi akemanga ko isengwa ry'ikintu ico ari co cose mu gishingo c'Imana Allah, ari ikinyoma ceruye.
Ukwemera abamalayika ko ari abaja b'Imana Allah Nyenuguhabwicubahiro nta ngere, Yabaremye mu muco, Ibashinga imwe mu mirimo yabo, ko ari bo bamanukanira ihishurwabutumwa Abavugishwamana bayo.
Ukwemera Ibitabu vyose Imana Allah Yamanuriye Abavugishwamana bayo (nka Tawurati n'Injili imbere yuko bihindagurwa), n'ukwemera icabisozereye na co ni Qor'ani ntagatifu.
Ukwemera Intumwa zose; nka Nuhu, Ibrahimu, Musa na Isa, hamwe rero n'iyahetuye zose, na yo ikaba ari Muhamadi; izo Ntumwa zikaba zikomoka mu bantu, Imana Allah Yaziteye iteka Izishigikiza ihishurwabutumwa, Iziha na Aayah hamwe n'ibitangaro vyemeza ukuri kw'ubutumwa bwazo.
Ukwemera umusi w'iherezo, igihe Imana Allah Izozura aba mbere n'aba nyuma mu biremwa, Ikabacira urugororotse, maze Ikinjiza abemeramana mu Bwami bw'ijuru, Ikinjiza n'abagararizamana mu muriro.
Ukwemera ivyagezwe (n'ishirwa mu ngiro ryavyo); n'uko Imana Allah Izi ikintu ico ari co cose, caba ari icabaye muri kahise canke ikizoba muri kazoza; n'uko Imana Allah Yamaze kwandika vyose, Ikanashaka n'uko biba nk'uko biba, Ikanarema zina kintu cose caremwe.
NTUCEREZE GUFATA INGINGO!
Isi si bwo buraro n'uburamuko bwamaho...
Ubwiza bw'ikintu cose kiri kw'isi, buzoherengetera n'ibiryoheye umutima vyose bizozimangana bigende akagirire...
Hazoteba rero haze umusi umuntu wese azoharurirwa ivyo yakoze vyose, na wo ukaba ari umusi w'izuka ry'ibiremwa. Imana Allah Nyenuguhabwicubahiro nta ngere Yavuze Iti: ﴾Igitabu c’ibikorwa vy’umwumwe wese rero, azogihabwa mu kuboko kwiwe kw’iburyo canke kw’ibubamfu, aho uzobona abanyavyaha batekewe n’ubwoba ku biri muri nya gitabu, bamaze kubona ivyaha birimwo, bazoca bihebura bati: “Amagorwa arama yemwe! Iki ni igitabu nyabaki kitigeze kireka ikintu na kimwe mu vyo nakoze caba gito canke kinini, kiretse ko canditswe!”. Ivyo bakoze vyose kw’isi rero, bazobisanga ng’aho vyaranditswe. Kandi Imana yawe Rurema Allah, ntirenganya umuntu n’umwe mu kurengerezwa urugero rw’ibihano canke kugabanywa ku ndishi, n’aho yoba yakoze akantu kangana n’inzatsa, Izokamuhembera﴿ (Al-Kahf: 49).
Imana Allah Nyenintsinzi na Nyenicubahiro, Yaranatwiganiye ko umuntu aticishije bugufi ngo abe umwislamu, atazobura kugira iherezo ry'ubuzima budahera mu muriro wa Jahannamu, mu bihano vyamaho.
Uruhombo rero si ikintu gito, ahubwo ni ikintu gikomeye. Imana Allah Nyenuguhabwicubahiro nta ngere Yavuze Iti:: ﴾Uwurondera kwubahiriza idini ritari iry’ubwislamu ntazoryakirirwa namba, kandi no mu buzima bw’inyuma yo gupfa azoba mu bahomvye ubuzima bwabo bwose﴿ (Aalu Imraani: 85).
Ubwislamu rero, ni ryo dini gusa ryemewe, nta n'irindi dini Imana Allah Yemera atari ryo.
Imana Allah ni Yo Yaturemye, ni no kuri Yo tuzosubira nitwamara gupfa, kuri iyi si na ho turi mw'igeragezwa.
Umuntu rero ategerezwa kwizera neza na neza ko ubu buzima bwo kw'isi ari bugufi cane nka kurya kw'indoto... kira noneho nta n'umwe azi ahantu n'umusi azopfirako!
Mbega none Imana yiwe Yamuremye azoyishura iki igihe Yamubajije ku musi w'izuka ry'ibiremwa, ku catumye adakurikira Intumwa yahetuye Abavugishwamana bose?
Azokwishura iki Imana yiwe Rurema ku musi w'izuka ry'ibiremwa, kandi Yaramaze kumugabisha ku nkurikizi mbi zo kugarariza ubwislamu, Ikanamubwira ko iherezo ry'abagararizamana ari uguhonera mu muriro, mu bihano vyamaho!
Imana Allah Nyenuguhabwicubahiro nta ngere Yavuze Iti: ﴾Nayo abazogarariza Imana Allah bagahakana bivuye inyuma Aayah n’ivyemezo vyacu vyerekana ko hakwiye gusengwa Imana Imwe Rudende Allah Itabangikanywa, abo ni bo bantu bo mu muriro. Bazowubamwo ibihe bidahera﴿ (Al-Baqara: 39).
Nta citwazo rero ku wuretse gukurikira ukuri, agashishikara yigana ba Se na ba Sekuru.
Imana Allah Nyenintsinzi na Nyenicubahiro Yaratwiganiye ko abenshi mu bantu banka kwinjira mu bwislamu ku gutinya inkurikizi mbi z'aho basanzwe baba mu kibano.
Hari n'abantu benshi kandi banka kwinjira mu bwislamu ku kudashaka guhindura ivyo bemera barazwe na ba Se, canke babuye ku bandi mu kibano baraheza babimenyera ukwo; hari n'abandi benshi muri bo bareka kwinjira mu bwislamu ku kwihambaza no gukingira ikinyoma barazwe.
Abo bose rero, nta citwazo bafise, bazohagarikwa imbere y'Imana Allah ata cireguzo bafise berekana.
Nta cireguzo ku muhakanyi kuba yovuga ati: nzoguma mu buhakanyi bwanje kuko navukiye mu muryango w'abahakanyi! Ahubwo ategerezwa gukoresha ubwenge yahawe n'Imana Allah, maze akitegereza ubuhambazi bw'amajuru n'isi, agakoresha n'ubwenge yahawe na Rurema Yamuremye mu kwiyumvira kugira atahure ko iyi si n'ibirimwo bifise Imana Yabiremye. Ni nk'uko nyene no ku wusenga amabuye n'ibishusho, ata citwazo afise mu kwigana ba Se, ahubwo ategerezwa gukoresha ubwenge bwiwe mu kurondera ukuri, maze akibaza ati: ni gute nsenga ibigirwamana bitagira ubuzima, bidashoboye kunyumva bitanashoboye no kumbona, eka bitanashoboye kugira ico bimariye!?
Ni uko nyene no ku munaswara yemera ibihushanye n'ukwemera ndemanwa "fitwra", kandi ubwenge bwiwe bumusaba ko yibaza ati: ni gute Imana Rurema Yokwica umwana wayo kandi ata n'icaha Imuhora, ku mvo gusa zo gucungura abandi bantu mu vyaha vyabo! Aka ni akarenganyo koko. Mbega bishoboka gute ko abantu bokwica bakanabamba umwana w'Imana Allah!? Mbega none Iyo Mana Rurema ntishoboye kubabarira ivyaha vy'ibiremwa Itabanje kureka abantu ngo bice umwana wayo!? None Iyo Mana Rurema, ntishoboye gukingira umwana wayo ngo ntiyicwe?!
Ni ngombwa rero ku muntu w'umunyabwenge, gukurikira ukuri, ntaheze ngo yigane ba Se na ba Sekuru mu kubakurikira mu kinyoma ceruye.
Imana Allah Nyenuguhabwicubahiro nta ngere Yavuze Iti: ﴾Abaziririza ibitaziririjwe n’Imana Allah, iyo babwiwe bati: “Enda nyabuna nimuze ku vyamanuwe n’Imana Allah no ku nyigisho z’Intumwa yayo kugira mumenye ikizira n’ikirekuwe”; bishura bati: “Ivyo twarazwe n’abavyeyi bacu birahagije”. Mbega bavuga ivyo, n’aho abavyeyi babo boba ata na kimwe batahura, batanashobora no gutumbera inzira igororotse!﴿ (Al-Maa-ida: 104).
Uwushatse kwinjira mu bwislamu agatinya ibangamirwa ryiwe riterwa n'umuryango, asabwa gukora iki?
Uwushatse kwinjira mu bwislamu, agatinya igeramirwa ryiwe ryoterwa n'abo bari kumwe mu kibano, arashobora kwinjira mu bwislamu, maze agahisha ubwislamu bwiwe gushika igihe Imana Allah Yamworohereje inzira y'ukwigenga, akazoheza rero akagaragaza ubwislamu bwiwe.
Ni ngombwa rero ko umuntu yemera bukwi na bukwi (ubwo nyene) ata gutakaza umwanya, ariko si ngombwa ko abwira abari hambavu yiwe ko yinjiye mu bwislamu, canke ko aca abugaragaza mu gihe ukumenyekana ko yabaye umwislamu vyohava bimugirira ingaruka mbi.
Menya kandi ko umuntu igihe abaye umwislamu, azoba abaye umuvukanyi w'abandi bislamu benshi barenga imiriyoni n'izindi, arashobora rero kwegera umusigiti canke ikigo c'ikislamu kiri hafi yiwe mu gihugu abamwo, agasaba impanuro canke imfashanyo y'ukungene yobigenza, ivyo bizoheza bibanezere cane.
Imana Allah Nyenuguhabwicubahiro nta ngere Yavuze Iti: {Uwo wese atinya ibihano vy'Imana Allah mu kwubahiriza amabwirizwa yayo, Imana Allah Izomworohereza ibimukura mu ngorane; Izonamuha ibimubeshaho mu buryo ataziga. Uwishimikije Imana Allah akayizera rero, Iramurwanako. Mu vy’ukuri Imana Allah, Irashika ku vyo Ishaka, nta kiyinanira. Ni ukuri Imana Allah, Yaramaze kugera ikintu ico ari co cose﴿ (At-Twalaaq: 2-3).
Musomyi uhimbaye!
Burya none ugushimisha Imana Rurema Allah, Yo Yaduhaye inema zitandukanye z'ubwoko bwose, Ikaba ari Yo Idufungurira tukiri inzoya mu mbanyi z'abavyeyi bacu, Ikanaturonsa akayaga duhema ubu, si vyo bihambaye cane gusumba uko twoshimwa n'abantu!?
Mbega none intsinzi yo kw'isi n'iyo mu buzima bw'inyuma yo gupfa, si yo umuntu akwiye kwihebera cane gusumba ibiryohera amaso vyo mu buzima bwo kw'isi buhera? Ego cane ndarahiye kw'izina ry'Imana Allah ko bikwiye kuba ukwo!
Ni kuri izo mvo rero, umuntu adakwiye kureka kahise kiwe ngo kamubuze gukosora ingendo y'ukwihenda, agaheza agakora ikintu kizima.
Umuntu rero arakwiye kuba umwemeramana w'ukuri kuri uno musi! Ntiyemerere namba shetani ngo imubuze gukurikira ukuri!
Imana Allah Nyenuguhabwicubahiro nta ngere Yavuze Iti: ﴾Emwe bantu! Ni ukuri, icemezo co kurungikwa kw’Intumwa Muhamadi (nyakugira amahoro n’impuhwe z’Imana Allah), ivuye ku Mana yanyu Rurema Allah, caramaze kubashikira; Twaranabamanuriye n’Igitabu ca Qor’ani kugira kibabere umuco ubagaragariza uburongozi nyabwo. Abemeye rero Imana Imwe Rudende Allah bakanagumya n’umuco bamanuriwe muri Qor’ani, Imana Allah Izobinjiza mu Bwami bw’ijuru ku mpuhwe n’impano zayo, Iteko Ibashoboze gukurikira inzira igororotse ibashikana ku gushimwa na Yo﴿ (An-Nisaa-i: 174-175).
Mbega none wewe woba witeguriye gufata ingingo ihambaye mu buzima bwawe?
Ivyo vyose vyadondaguwe, nivyaba ari ibintu vyumvikana, umuntu akaba yamaze no kwemanga ukuri mu mushaha wiwe, ategerezwa rero gutera intanbwe ya mbere kugira abe umwislamu.
Ni nde yoba ashaka ko hari ico ndamufasha kugira afate ingingo nziza kandi ibereye mu buzima bwiwe, gutyo ngaheza nkamwereka ukungene ashobora kuba umwislamu?
Ivyaha vy'umuntu ntibikwiye kumuzingamika ngo bimubuze kwinjira mu bwislamu, ni ukuri Imana Allah Yaramaze kutwiganira muri Qor'ani ntagatifu ko Ibabarira ivyaha vyose vy'umuntu igihe yinjiye mu bwislamu, maze akigaya ku Mana yiwe Rurema Allah, no mu nyuma y'aho umuntu abereye umwislamu, birashoboka ko agwa mu vyaha bimwebimwe; kuko burya twese turi abantu, eka ntituri abamalayika bakingiwe gukora ivyaha, ariko igikenewe gusa kuri twebwe, ni ukwama twasavye imbabazi ku Mana Allah, tukanigaya kuri Yo ibicumuro vyacu, iyo rero Imana Allah Itubonyemwo ihurumbira ry'ukwemera ukuri, tugaheza tukinjira mu bwislamu mu kwatura iyemanga ry'ibintu bibiri "SHAHAADATAANI", muri ico gihe Iraheza Ikadufasha kureka no kuvavanura n'ibindi vyaha, burya uwutumbereye Imana Allah, akanakurikira ukuri, Imana Allah Ica Imushoboza gushishikara akora ivyiza, ntugire impungenge rero mu kwinjira mu bwislamu muri kano kanya.
Mu vyemezo bivyemeza, ni Aayah aho Imana Allah Nyenuguhabwicubahiro nta ngere Ivuga Iti: ﴾Ntumwa y’Imana! Bwira abagarariji ko nibaramuka baretse kugarariza bakanareka kurwanya Umuvugishwamana Muhamadi (nyakugira amahoro n’impuhwe z’Imana Allah), hanyuma bakemera Imana Imwe Rudende Allah, nta nkeka ko Imana Allah Izobagumiriza akabanga Ikabababarira ivyaha vyabo bakoze imbere yuko bemera. Nibasubira kurwanya Imana Allah n’Intumwa yayo naho, ni ukuri Tuzobahana nk’uko Twahanye ab’aho hambere yabo﴿ (Al-Anfaal: 38).
KUGIRA MBE UMWISLAMU NOKORA IKI?
Ukwinjira mu bwislamu biroroshe, eka nta n'imigirwa canke indinganizo nyezina ikenewe, eka nta n'umuntu kw'izina asabwa kuba ahari, igisabwa gusa, ni umuntu kwatura iyemanga ry'ibintu bibiri, azi neza insiguro yaryo, yemera n'ivyo risaba, maze akavuga ati: "ASH-HADU AN LAA ILAAHA ILLA LLAAHU WA-ASH-HADU ANNA MUHAMMADAN RASUULU LLAAHI", (ndemeye ku mutima wanje ndavyatuye n'ururimi rwanje, nemanga ko ata mana ibwirijwe gusengwa atari Imana Allah, kandi ndemeye ku mutima wanje ndavyatuye n'ururimi rwanje, nemanga ko Muhamadi ari Intumwa y'Imana). Iyo bikworoheye kubivuga mu rurimi rw'icarabu biba ari vyiza cane, bitakworoheye naho, biba bikwiye n'aho wobivuga mu rurimi rwawe kavukire, aho rero uba umaze kuba umwislamu. Ikiba gisigaye kuri wewe, ni uko wiga ivyerekeye idini ryawe rizoheza rikakubera isoko ry'ukuroranirwa kwawe kw'isi, rikazonakubera imvo y'ukurokoka ibihano mu buzima bw'inyuma yo gupfa.
Ushatse kumenya vyinshi ku bwislamu, noguhanura kuja ku rubuga ngurukanabumenyi:
Ushatse kwiga ukungene wogendera ubwislamu, twoguhanura kuja ku rubuga ngurukanabumenyi:
Related books
All books
NI NDE YANDEMYE? NI NO KUKI YANDEMYE?75 languagesNI NDE YANDEMYE? NI NO KUKI YANDEMYE?
IKINTU COSE KIREREKANA KO HARIHO UWAKIREMYE Ni nde Yaremye amajuru n'isi hamwe n'ibiri hagati yavyo mu biremwa bihambaye ata n'uwoshobora kubihetura? Ni nde Yashizeho iyi ndinganizo itigera yihenda na rimwe mu kuntu itunganijwe mw'ijuru no mw'isi? Ni nde Yaremye umuntu, Akamuha amatwi, amaso n'ubwenge, Akamuha n'ububasha bwo kurondera ubumenyi no gutahura ukuri kw'ibishikira ibiremwa? Ni gute wosigura iyi ndinganizo itigera yihenda mu kungene ibihimba vyawe vy'umubiri hamwe n'ibindi binyabuzima bikora? Ni nde Yabitunganije mu kubiha indemo ibereye? Ni gute iyi si ihambaye n'ibiri kuri yo…
UBWISLAMU89 languagesUBWISLAMU
Kw'izina ry'Imana Allah Nyenimpuhwe ku biremwa, Nyenimbabazi ku batoni bayo Mbega birashika aho wibaza uti: Ni nde yaremye amajuru n'isi hamwe n'ibindi biremwa bihambaye biri muri vyo? Ni nde Yashizeho iyi ndinganizo-ntasobwa y'ivyo biremwa itunganye itigera ihungabana?
الإسلام دين رب العالمين
أنا مسلم