Ānd n nɑɑn dũni wã (bõn-yɩtɩ wã?) Lɑ ãnd n nɑɑn mɑɑm? Lɑ yɑɑ bõe yĩngɑ?
Rẽ yĩngɑ mɑm bee so-sõngã zugu? Ãnd n naan saasã la Tẽngã la sẽn be b yiibã pʋgẽ, sẽn yaa bõn-bεdã, b sẽn ka tõe n bãng b tεkã? Ãnd n maan na-kẽndr-kãngã sẽn manegã saasẽ wã la Tẽngã zugã? Ãnd n naan ninsaalã n kõ-a tʋb la nin la yam la a maan-a t'a tar tõog n tõe n bao bãngre la a bãng yεlã haƙɩɩk-rãmbã?
These files are generated automatically from the book's text; their layout may differ from the printed edition.
Ānd n nɑɑn dũni wã (bõn-yɩtɩ wã?) Lɑ ãnd n nɑɑn mɑɑm? Lɑ yɑɑ bõe yĩngɑ?
Rẽ yĩngɑ mɑm bee so-sõngã zugu?
Ãnd n naan saasã la Tẽngã la sẽn be b yiibã pʋgẽ, sẽn yaa bõn-bεdã, b sẽn ka tõe n bãng b tεkã?
Ãnd n maan na-kẽndr-kãngã sẽn manegã saasẽ wã la Tẽngã zugã?
Ãnd n naan ninsaalã n kõ-a tʋb la nin la yam la a maan-a t'a tar tõog n tõe n bao bãngre la a bãng yεlã haƙɩɩk-rãmbã?
Ānd n yẽbg nɑɑn-kãngã sẽn tũnugã fo yĩn-wilẽ wã, lɑ ɑ sig foo n mɑneg fo sigbã?
Tɑgs n ges bõn-vɩtɩ wã nɑɑnegã b yõs tɑɑbã lɑ b sẽn pɑ yembrã, lɑ ãnd n yẽbg-b ne gesr sẽn pɑ tɑr todse?
Yalε ning dũni-kãngã sẽn kẽnde, la a yõgendẽ ne na-kẽnã nins sẽn yõgneg sõmã, yʋʋmã wʋsg sẽn looge?
Yaa ãnd n ning na-kẽnd-kãngã dũni-kãngã (vɩɩmã la kũumã, vɩtbã rogmã, la yʋngã la wĩndgã, wakat-rãmbã toeengã, n tall n teese)?
Ānd n nɑɑn dũni-kãngã mengã? Bɩ ɑ wɑɑ zɑɑlemẽ? Bɩ ɑ wɑɑ ne lingri? Wẽnd yeelɑme (A Nɑɑm zẽk yã): (Bɩ b naana bãmb tɩ pɑ tũ ne bũmbu, bɩ yaa bãmb la naandbã? (35) Bɩ bãmb n naan saasã la Tẽngã? Pa woto ye! B pa bãng n wãag ye)(36) [52 Aṭ-ṭʋʋr (Tʋʋr tãngã sʋʋra): 35-36].
Rẽnd tõnd sã n pɑ nɑɑn d mensã, tɩ leb n pɑ tõe yɩ tɩ tõnd wɑɑ zɑɑlemẽ mɑɑ ling-n-wɑ, rẽnd sɩd ning sik sẽn kɑ ɑ pʋgẽ wã: yɑɑ tɩ bõn-yɩtɩ-kãngã yɑɑ tɩlɑe t'ɑ tɑra Nɑɑndɑ sẽn yɑɑ Zɩsgo n yɑɑ Tõodɑ, bɑlɑ pɑ tõe tɩ wɑ yɑɑ bõn-yɩtɩ-kãnsã n nɑɑn ɑ meng ye! Mɑɑ ɑ wɑɑ zɑɑlemẽ ye! Mɑɑ ɑ ling n wɑɑme ye!
Yaa bõe tɩ ninsaal kõt sɩd ne yεl nins yẽ sẽn ka ne yã belem? Wala (bãngre la yam la yõorã, la yĩngã wʋmbo, la nonglem) Ka a sẽn ne a vũunã yĩngã laa? La yaa bõe tɩ ninsaal kɩɩsd Naand belem ne dũni-kãngã sẽn yaa bedrã, tɩ yẽ yaool n ne A naanegã vũun-rãmba la A yolsgã?!
Ned baa a yembr ka na n sak n yeele, tɩ zak-kãngã waame tɩ ka ned n me-a ye, maa b yeel-a lame tɩ yaa zaalem n wa ne zak-kãngã, rẽnd yaa wãna, tɩ neb sãndɑ sɩdgd neb nins sẽn yet tɩ ween-vɩ-kãngã waame tɩ ka tũ ne naandã? Na n yɩɩ wãnã tɩ yam soab sak tɩ b yeel tɩ ween-n-vɩ-kãngã, sẽn kẽnd ne na-kẽndr sẽn maneg n ta tεkã, waa ne lingri?
Wãnde fãɑ tɑɑsdɑ tõnd bũmb ɑ yembre, yɑɑ tɩ bõn-yɩtɩ-kãnsã ɑ tɑrɑ Soɑb sẽn Zɩse n yɑɑ Tõodɑ n rɑbsd ɑ yεlã, lɑ yɑɑ Yẽndɑ A Yembre n sõmb ne tũudumã, lɑ zẽng fãɑ sẽn tũud tɩ pɑ Yẽ yɑɑ tũud zɑɑlle, ɑ pɑ sõmb me tɩ b tũ-ɑ ye.
Soɑbã sẽn yɑɑ Nɑɑndã n yɑɑ Zɩsgã
Soɑb n be beenẽ n yɑɑ Nɑɑndɑ n yɑɑ A Yembre, Yẽndɑ yaa Soɑɑlã, n yɑɑ Rɑbsdã, n yɑɑ Rɩlgdã, sẽn vɩɩmsdã lɑ A kʋʋdã, lɑ yɑɑ Yẽ n nɑɑn Tẽngã lɑ A nom-ɑ, n mɑɑn-ɑ t'ɑ sɑkd zĩigɑ ne A bõn-nɑɑndsã, lɑ Yẽ n nɑɑn sɑɑsã lɑ sẽn be a pʋgẽ sẽn yɑɑ bõn-nɑɑnds sẽn bedme, lɑ A ning wĩntoogã lɑ kiuugã lɑ yʋngã lɑ wĩndgã, nɑ-kẽnd-kãngã sẽn tɑ tεkã sẽn wilgd A zɩslemã.
La Yẽnda la sẽn wõr pemsem ning tõnd sẽn ka tar vɩɩm tɩ ka tũ ne-a wã, la Yẽnda n sikd sa-koomã n kõt tõndo la A wõr mogã la kʋɩlsã n kõ tõndo la Yẽnd n da yɩ n rɩlgd tõndo tɩ tõnd ra yaa kom-peels n be d ma-rãmbã pʋsẽ, tɩ tõnd rag n ka tar pãng ye, la Yẽnda n maan tɩ zɩɩmã zoet tõnd zɩ-soyẽ wã, la A maan tɩ tõnd sũyã kẽnd wakat fãa gilli, d rogmã raare n na n tʋg n ta d kũumã.
Soɑb-kãngã sẽn yɑɑ Nɑɑndã n yɑɑ Rɩlgdã Yẽ lɑ Wẽnde, (A Nɑɑm yɩlgɑme n zẽke)
Wẽnd yeelame (A Naam zẽk yã): ﴾Ad yãmb Soɑbã lɑ Wẽnd sẽn nɑɑnɑ sɑɑsã lɑ Tẽngã rɑsem ɑ yoob pʋgẽ, rẽ poorẽ t'A zẽk Al-ʿAršã yĩngri, A buiidɑ yʋngã ne wĩndgã tɩ b bɑbsd tɑɑb kʋdɑe, lɑ wĩntoogã ne ãdsã yɑɑ sẽn wõr ne A sɑgelle; rẽ yĩngɑ nɑɑnegã lɑ sɑgellã kɑ Yẽ soolem? Rẽnd Wẽnd sẽn yɑɑ bõn-nɑɑndsã fãɑ Soɑbã, A nɑɑm yɩ wɑgelle n zẽke﴿. [7 Al-ʿAɑrɑɑf (Arzãn la Bugumã sʋk lalgã sʋʋra): 54].
Wẽnde Yẽ lɑ Soɑbã sẽn yɑɑ bũmb ning sẽn be wã fãɑ Nɑɑndã, tõnd sẽn ne-ba lɑ d sẽn pɑ ne b rãmbã, lɑ zẽng sẽn pɑ Yẽ yɑɑ bõn-nɑɑndg sẽn be A bõn-nɑɑndsã pʋgẽ, lɑ yɑɑ Yẽ n sõmb ne tũudmã Yẽ A yembre, lɑ b rɑ sɑk n tũ bũmb zẽng n lɑgm-A ye, A pɑ tɑr lɑgm-n-tɑɑgɑ A Nɑɑmã pʋgẽ, mɑɑ A nɑɑnegã pʋgẽ, mɑɑ A rɑbsgã pʋgẽ, mɑɑ A tũudmã pʋgẽ.
Lɑ tõnd sã n sɑɑg gomd woglg yĩngɑ tɩ soɑb-rãmbɑ n be be zẽng sẽn pɑ Wẽnd n lɑgem Soɑbã (A nɑɑm yɩ wɑgelle n zẽke) dũni wã nɑɑn n sãɑme: bɑlɑ pɑ nɑ n mɑnege tɩ soɑb-rãmb ɑ yiib kẽnes dũni wã yεlã wɑkɑt ɑ yembr pʋgẽ ye, Wẽnd yeelɑme (A Nɑɑm zẽk yã): {Lɑk tɩ sã n dɑ beẽ b yiibã (sɑɑgã lɑ Tẽngã) pʋgẽ soɑb-rãmbɑ tɩ pɑ Wẽnde b yiibã nɑɑn n sãɑme}. [21 Al-anbiyaa'ʋ (Nabiyaam-rãmbã sʋʋra): 22].
Soɑbã sẽn yɑɑ Nɑandã sɩf-rãmba
Soɑbã (A Nɑɑm yɩlg yã) A tɑrɑ yʋy sẽn mɑnegã sẽn pɑ tɑr tεkɑ, A tɑrɑ sɩf-rãmb sẽn zẽkã n yɑɑ wʋsgo n bedmã, tɩ b wilgd A sẽn pidã, lɑ sẽn be A yʋyã pʋgẽ: yɑɑ Nɑɑndã, lɑ "Wẽnde" lɑ ɑ võorã: b sẽn tũud ɑ soɑbã t'A sõmb ne tũudmã Yẽ A yembre lɑgm-n-tɑɑg pɑ be ne-A ye, lɑ ɑ Vɩtɑ, lɑ ɑ Mɑɑn-m-toor Soɑbɑ, lɑ ɑ Yolsdɑ, lɑ ɑ Rɩlgdɑ, lɑ ɑ Kõtɑ, Wẽnd yeelame, (A Naam zẽk yã), Alkʋrãan wagellã pʋgẽ: (Wẽnde, soɑb sẽn tũud n tɩlg kɑ be tɩ sã n pɑ Yẽ ye, A yɑɑ Vɩta sẽn pid Soɑbɑ, n yɑɑ a Mɑɑn-m-toor Soɑbɑ, gõeem pɑ yõnkd-A, pɑ suusgu. A soo sẽn be sɑɑsẽ wã lɑ sẽn be Tẽngẽ wã, ãnd n nɑ n sugs A nengẽ, tɩ sã n pɑ ne A yɑrdɑ, A mii sẽn be bãmb neng tɑoore, lɑ b poorẽ, lɑ b pɑ gũbg bũmb A bãngrẽ wã ye, sã n pɑ A sẽn tʋll tɩ b bãng ɑ soɑbɑ, A Nɑɑmã Goeel tɑgr zĩigẽ yãmbɑ sɑɑsã lɑ Tẽngã, lɑ b yiibã gũudum pɑ pɑk Wẽnd tɩ yɑɑ toog ye, lɑ Yẽ yaa Zẽkr Nɑɑbɑ n yɑɑ Zɩsgo) [2 Al-baƙara (Naafã sʋʋra) : 255].
Wẽnd leb n yeelame (A Naam zẽk yã): (Yeel tɩ Wẽnd yaa A Yembre(1) Wẽnd la Tεεgda (2) A ka roge, b ka rog-A (3) A leb n ka tar mak-n-taag baa a yembre). [112 Al-Iẖlaaṣ (Pʋ-peelmã sʋʋra): 1-4].
Soɑb ning b sẽn tũudã, A sɩfdɑ ne sɩf-rãmb sẽn pidi.
Sẽn be A sɩf-rãmbã pʋgẽ, A yɑɑ b sẽn nongɑ soɑbɑ b sẽn tũudɑ soɑbɑ, lɑ zẽng sẽn pɑ Yẽ, yẽ soɑb yɑɑ bõn-nɑɑndg b sẽn roglg ɑ soɑb tʋʋmã n pɑ tɑr ɑ sẽn nɑ n mɑɑnegɑ n yɑɑ b sẽn kẽnesd ɑ soɑbɑ.
Sẽn be A sɩf-rãmbẽ wã, A yɑɑ Vɩtɑ n yɑɑ Mɑɑn-m-toor Soɑbɑ, rẽnd vɩt fãɑ sẽn be, yɑɑ Wẽnd n vɩɩms-ɑ lɑ A wɑ ne-ɑ ɑ sẽn dɑ kɑ be poorẽ, lɑ Yẽ n yãs ne-ɑ ɑ belmẽ wã lɑ ɑ rɩtlẽ wã, lɑ ɑ sekrẽ wã. Rẽnd Soɑbã ɑ yɑɑ Vɩtɑ A pɑ kiid ye, sɑɑb pɑ tõe n yi ne Yẽ ye, n yɑɑ Yãsd ne yεlã wɑkɑt fãɑ A pɑ gõe ye, ɑd suusg pɑ rɩkd-A, pɑ gõeem.
Sẽn be A sɩf-rãmbã pʋgẽ yɑɑ tɩ Yẽ lɑ Mit ming bũmb sẽn pɑ solgd-A Tẽngã zugu, pɑ sɑɑsẽ wã me,
Lɑ sẽn be A sɩf-rãmbã pʋgẽ, A yɑɑ Wʋmdɑ, n yɑɑ Netɑ, n wʋmd bũmbã fãɑ, lɑ A ne bõn-nɑɑndg fãɑ, A mii bũmb ning yõyã sẽn tɑgsdã lɑ sũyã sẽn solgã, lɑ bũmb pɑ solgd-A ye Tẽngã pʋgẽ pɑ sɑɑsẽ wã (A Nɑɑm yɩlg yã).
Sẽn be A sɩf-rãmbã pʋgẽ, Yẽ lɑ Tõodã Soɑb ning bũmb sẽn pɑ tõe n põsg-A ned bɑɑ ɑ yembr me pɑ tõe n lebs A rɑɑbã ye, A mɑɑndɑ A sẽn rɑte lɑ A gɩdgd A sẽn tʋlle, lɑ A lʋɩɩsd A sẽn rɑt tɑoore lɑ A yɑoond A sẽn tʋlle, Yẽ me n tɑr bʋʋd minim bãngr sẽn ka tar tεka.
Sẽn be A sɩf-rãmbã pʋgẽ, ad Yẽ, Yẽndɑ lɑ Nɑɑndã n yɑɑ Rɩlgdã n yɑɑ Rɑbsdã sẽn nɑɑnɑ bõn-nɑɑndsã lɑ A rɑbsdb yεlã, lɑ bõn-nɑɑndsã b bee A wẽbgrã lɑ A kẽnesgã pʋgẽ.
Sẽn be A sɩf-rãmbã pʋgẽ, Yẽndɑ n deegd yell sẽn pɑk ɑ soɑb kosgo, lɑ A fãɑgd sεsdɑ, lɑ A pãrgd keelem, lɑ bõn-nɑɑndg fãɑ ɑ sã n lʋɩ keelem pʋgẽ mɑɑ pɑkre ɑ lebsd ɑ mengã A nengẽ tɩlɑe.
Tũudmã pɑ yɩte rẽndɑ Wẽnd yĩngɑ (A Nɑɑm zẽk yã), rẽnd Yẽ n pidi n sõmb ne tũudmã A Yembre n bɑs zẽng sẽn pɑ Yẽ. Lɑ b sẽn tũ fãɑ zẽng tɩ pɑ Yẽ, yẽndɑ yɑɑ b sẽn tũud ne zĩri-beedo, ɑ leb n yɑɑ wεdgɑ, ɑ leb n yɑɑ sẽn kiid lɑ ɑ sɑtẽ.
Wẽnd rɩlgɑ tõndo (A Nɑɑm yɩlg yã) yɑm t'a tõe n bãng bũmb A zɩslmã wεεngẽ, lɑ A ning tõnd pʋsẽ wã Fɩtra (rog-ne) tɩ d nong sõmã, lɑ d kis wẽngã, lɑ ɑ pɑɑmdɑ bɑs-m-yɑm t'ɑ sã n rell ɑ meng ne Wẽnde sẽn yɑɑ bõn-nɑɑndsã Soɑɑdã, lɑ rog-ne-kãngã wilgdɑ A sẽn pidi lɑ pɑ tõe t'A wɑ sɩf ne boogr ye (A Nɑɑm yɩlg yã).
Pɑ sõmb ne yɑm soɑbɑ t'ɑ tũ rẽndɑ sẽn pidã, rẽnd yɩɩ wãn-wãn t'ɑ tũud bõn-nɑɑndg sẽn yɑɑ wεdg wɑlɑ yẽ mɑɑ a pʋs n pɑ tɑ yẽ ye!
B sẽn tũud a soabã, a ka tõe n yɩ ninsaala, maa rʋbga, maa tɩɩga, maa rũng ye!
Soɑbã A bee A sɑɑsã yĩngri, A AL-Arsã yĩngri, n yõsg ne A bõn-nɑɑndsã, A bõn-nɑɑndsã baɑ ɑ ye pɑ be A Mengẽ wã ye, A Mengã me bɑɑ fʋɩ pɑ be A bõn-nɑɑndsẽ wã ye, A pɑ kẽede, A pɑ lebgd yĩngɑ bɑɑ fʋɩ A bõn-nɑɑndsẽ wã ye.
Soɑbã bũmb baɑ a yembr kɑ wõnd-A ye, A pɑ tɑr mak-n-taag baa a yembre, lɑ Yẽ lɑ Sek-m-men Soɑbɑ n yi A bõn-nɑɑndsã, A pɑ gõe A pɑ rɩt rɩɩbo, A yɑɑ Bedre pɑ tõe t'A tɑll pɑgɑ mɑɑ biigɑ; rẽnd Nɑɑndã A tɑra zɩslem sɩf-rãmbɑ lɑ pɑ tõe lɑe t'A wɑ sɩfd ne tʋlsem mɑɑnego mɑɑ boogr ye.
Wẽnd yeelame (A Naam zẽk yã): (Yãmb ɑ nebã, b gãnega bilgri, bɩ y kelg-a, ad bũmb nins yãmb sẽn tũud zẽng sẽn pa Wẽndã, b pa tõe n naan baa zõaag ye, ba tɩ b naag taab a zugu, la zõaag sã n fãag bũmb b nengẽ, b pa tõe n dig-a n reeg ye, baood yɩ valenga, b sẽn baood ned ning nengẽ wã me yɩ valenga (73) B pa waoog Wẽnd A waoogr sɩd-sɩd ye, ad Wẽnd yaa pãng kεgeng Naaba, n yaa wilb Naaba) (74) [22 Al-Haǧ (Hagiimdã sʋʋra): 73-74].
Yɑɑ bõe yĩng lɑ Nɑɑnd-kãngã sẽn yɑɑ Bedrã nɑɑnd tõndo? Lɑ yɑɑ bõe lɑ A rɑt tõnd nengẽ?
Rẽ yĩnga sakda ne yam tɩ Wẽnde, A naana bõn-naands-kãensã fãa gill tɩ ka tar bila, rẽ yĩnga A naan-b-la reem yĩnga, tɩ Yẽnd n yaool n yaa bʋʋd Mitã n yaa Bãngdã?
Rẽ yĩnga sakda yam pʋgẽ tɩ Naab ning sẽn naana na-kẽnd-kãngã, sẽn manegã, la A wõr n kõ tõnd sẽn be saasẽ la sẽn be Tẽngã, t'A tʋg n naan tõnd tɩ ka tũ ne raabo, maa A bas tõnd n ka loek sogsg nins sẽn be tõnd yamẽ wã, wala: yaa bõe tɩ tõnd wa be dũni kaanẽ? Yaa bõe n be kũumã poorẽ? La tõnd naanegã yõod yaa bõe?
Lɑ rẽ yĩngɑ sɑkdɑ yɑm pʋgẽ, tɩ sɩbgr rɑ zĩnd wẽgdbã yĩngɑ lɑ kũun ka zĩnd mɑnegdbã yĩngɑ?
Wẽnd yeelɑme (A Nɑɑm yɩlg yã): (Rẽ yĩnga yãmb tẽedame tɩ Tõnd naana yãmb zaalem (wɩsg) yĩngɑ lɑ y ka na n lebg n tʋg Tõnd nengẽ?) [23 Al-muu'minuun (Sɩd-kõtbã sʋʋra): 115].
Pɑ woto ye Wẽnd tʋmsɑ Tẽn-tʋʋmbã bʋl yĩng tɩ d nɑ bãng tõnd belmã yõodo, lɑ A wĩnig tõnd d sẽn nɑ tũ-A to-to lɑ d bɑo pẽnegr ne-A, lɑ yɑɑ bõe lɑ A rɑt tõnd nengẽ! Lɑ wãn-wãn lɑ d pɑɑmd A yɑrdã, lɑ A wilg tõnd d bɑɑsgã zĩigẽ kũumã poorẽ.
Rẽnd Wẽnd tʋmsa tẽn-tʋʋmbã tɩ b kõ tõnd kibare, tɩ ad Yẽnd A Yembr tãa n sõmb ne tũudum la d bãng d sẽn tũud-A to-to ninga, la b leb n taas tõnd A sagl-rãmba la A gɩdg-rãmba. La b wilg tõnd zʋg-sõmse tɩ d sã n rɩk-a n vɩɩm ne-a d vɩɩmã yɩta neere, tɩ yaa yel-sõma la bark-rãmb n na n gũbg-a.
Lɑ Wẽnd tʋmsɑ Tẽn-tʋʋmb wʋsgo wɑlɑ (ɑ Nuuh, lɑ ɑ ɭbrɑɑhɩɩm, lɑ ɑ Muusɑ, lɑ ɑ ʿɭɩsɑ) lɑ A keng-b ne yel-soondɩ lɑ tɑgmes-rãmbɑ, sẽn wilgd b sɩdã, lɑ b yɑɑ tẽn-tʋʋmbɑ n yi A nengẽ (A Nɑɑm yɩlg yã) lɑ b bɑɑsdgã yɩɩ ɑ Mʋhɑmmɑd (Wẽnd pʋʋsg lɑ A tɩlgr be ɑ yĩngɑ).
La tẽn-tʋʋmbã kõo tõnd kibare, tɩ yaa vẽenega tɩ dũni-kãngã vɩɩmã ad a yaa zarb-n-gesga, la ad vɩɩmã sɩd-sɩda na n yɩɩ kũumã poorẽ.
La arzãn n be beenẽ ne sɩd-kõtb nins sẽn tũ Wẽnd A Yembr tãa, n ka maan lagem-n-taar ne-A wã la b kõ sɩd ne tẽn-tʋʋmbã fãa gilli, la ad Bugum n be beenẽ, tɩ Wẽnd segl-a n bĩng kɩfr-rãmb nins sẽn tũ soben-rãmb zẽms n lagem Wẽndã maa b kɩfla ne tẽn-tʋʋm fãa sẽn yi Wẽnd tẽn-tʋʋmbẽ wã.
Wẽnd yeelame (A Naam zẽk yã): (Yãmb a Adam koambã! Tẽn-tʋʋmb sã n wa yãmb nengẽ, n togsd yãmb Mam yel-soalmã, rẽnd neb nins sẽn sak n zoe Wẽnde la b maneg b tʋʋmã, yaeesg ka be bãmb zugu, sũ-sãang me ka na n paam-b ye (35) Lɑ sẽn yɑgs-b Tõnd yel-soalmã la b maan waoog-m-menga n yi-ba, bãmb rãmbã lɑ Bugum koɑmbɑ, n na n yɩ paadb ɑ pʋgẽ (36) [7 Al-ʿAɑrɑɑf (Arzãn la Bugumã sʋk lalgã sʋʋra): 35-36].
Wẽnd yeelame (A Naam zẽk yã): (Yãmb ɑ nebɑ, tũ-y y Soɑbã, sẽn nɑɑnɑ yãmb lɑ sẽn deng b yãmb tɑoorã, tɩ sãnd-sãnde y nɑ pɑɑm Wẽnd-zoεεgɑ (21) Saob nig sẽn mɑɑnɑ Tẽngã tɩ yɑɑ sẽn yɑdge, lɑ sɑɑsã tɩ yɑɑ sẽn me, lɑ A sik koom sɑɑsẽ wã n yiis ne ɑ sɑbɑbo tɩ-biis buud fãa tɩ yɑɑ rɩtlɑ yãmb yĩnga, bɩ y ra mɑɑn gees-n-tɑɑse n lɑgem ne Wẽnde tɩ yãmb yɑool n miẽ tɩ pɑ sõmɑ ye (22) Lɑ yãmb sã n be sik pʋgẽ ne bũmb ning Tõnd sẽn sik D Yambã zugã, bɩ y wɑ ne sʋʋrɑ wɑlɑ ɑ buudu lɑ y bool y sõngdbã zẽng sẽn pɑ Wẽnde tɩ sã n mik tɩ yãmb yɑɑ sɩd rãmbɑ (23) Lɑ yãmb sã n pɑ mɑɑne, y kõn n mɑɑn me lae! Bɩ y zoe Bugum ningɑ ɑ bõn-yõgende wã sẽn yɑɑ nebã lɑ kugã, tɩ b sεglg-a-la Kɩfr-rãmbã yĩnga (24) Lɑ f noog rãmb nins sũy sẽn kõ-b sɩdã lɑ b tʋm sẽn be neerã, tɩ b tɑrɑ arzãn-rãmbɑ tɩ ko-sood yɑɑ sẽn zoet bãmb tẽngre, b sẽn rɩlg bãmbɑ ɑ pʋgẽ fãa sẽn yɑɑ tɩ-biis buudu lɑ b sẽn yete: " yãwã bɑl lɑ b sẽn rɩlg tõnd tɩ loogã". Tɩ b nɑ n wɑ ne ɑ wõneg tɑɑgɑ, lɑ b tɑr ɑ pʋgẽ pɑgbɑ b sẽn yɩlge tɩ bãmb yɑɑ sẽn be ɑ pʋgẽ n duumdẽ) [2 Al-baƙara (Naafã sʋʋra): 21-25].
Bõe yĩng la tẽn-tʋʋmbã sẽn yɩ wʋsgã?
Sɩd lɑ hɑkɩɩkɑ Wẽnd tʋmsɑ A Tẽn-tʋʋmbã tɩ tʋg zãmã-rãmbẽ wã, rẽnd zãmɑ pɑ zĩndi rẽndɑme tɩ Wẽnd tʋmes tẽn-tʋʋmɑ b nengẽ, sẽn nɑ yɩl tɩ b bool-bɑ n tʋg b Soabã tũudum, lɑ b tɑɑs-bɑ A sɑglsã lɑ A sẽn gɩdgã, lɑ b fãɑ gillã boollã bilã yɩɩ: Wẽnd A Yembr tũubu (A Nɑɑm yɩ wɑgelle n zɩsge), lɑ zãmɑ fãɑ sẽn wɑt n sɩng n bɑsdẽ mɑɑ b sãɑm bũmb ning b tẽn-tʋʋmã sẽn wa ne wã, sẽn yɑɑ sɑgell ne Wẽnd yembgã, lɑ Wẽnd sẽn tʋm Tẽn-tʋʋmɑ ɑ to t'ɑ mɑneg nɑ-kẽndrã, lɑ ɑ lebs nebã Fɩtrã (rog-ne) ning sẽn mɑnegã pʋgẽ, ne Wẽn-yembgo lɑ A tũubu. Hɑlɩ tɩ Wẽnd wɑ pids tẽn-tʋʋmbã ne ɑ Mʋhɑmmɑd (Wẽnd pʋʋsg lɑ A tɩlgr be ɑ yĩngɑ), sẽn wɑɑ ne dĩin sẽn pidã lɑ sãri sẽn duumdã n gũbg ne ninsɑɑlbã gilli n tʋg n tãɑg dũni yikrã rɑɑre, sẽn pidsd lɑ ɑ yẽesd sãri-rãmb nins sẽn reng tɑoorã, lɑ Soɑbã (A Nɑɑm yɩlg n zẽke) A reegɑ A zugẽ ne dĩin-kãngã nɑ pɑ lɑ ɑ duume n tɩ tãɑg dũni yikr rɑɑrã.
Ned ka yɩt sɩd-kõta, rẽndame t'a wa tʋg n kõ sɩd ne tẽn-tʋʋmbã gilli
Wẽnd lɑ Naab ning sẽn tʋmsa tẽn-tʋʋmbã, lɑ A sɑglg A bõn-nɑɑndsã gilli tɩ b tũ-bɑ, la ned ning sẽn kɩfl ne tẽn-tʋʋm a yembre, rẽnd yẽ soab kɩfla ne b fãa gilli, rẽnd zũnuub ka leb n be beenẽ t'a zɩslemã yɩɩd ned sẽn na n lebs Wẽnd wahɩ (tẽn-tʋmdã) ye, la ned na paam n kẽ arzãnã yaa tɩlae t'a kõ sɩd ne tẽn-tʋʋmbã gilli.
Rẽnd sẽn yɑɑ wɑɑɠib (tɩlɑe) ne ned fãɑ zãmɑɑn-kãngã pʋgẽ yɑɑ kõ-sɩd ne Wẽnde lɑ Wẽnd tẽn-tʋʋmbã gilli, lɑ ɑ kõ sɩd ne yɑoolem rɑɑrã, lɑ rẽ pɑ yɩte rẽndɑme t'ɑ kõ sɩdɑ lɑ ɑ pʋg b Bɑɑsdgã lɑ b Pidsdã ɑ Mʋhɑmmɑd (Wẽnd pʋʋsg lɑ A tɩlgr be ɑ yĩngɑ), b sẽn kεngɑ soɑb ne yel-solemd sẽn duumdã, yẽ me lɑ Alkʋrãɑn wɑgellã, ning Wẽnd sẽn roglg A meng t'A nɑ n gũ-ɑ lɑme hɑlɩ tɩ Wẽnd wɑ rɩk Tẽngã fɑɑdo lɑ sẽn be ɑ zugã.
Wẽnd togsɑ Alkʋrãɑn wɑgellã pʋgẽ tɩ ned ning sẽn tõdgɑ kõ-sɩdɑ ne tẽn-tʋʋmã sẽn yɑɑ ɑ soɑb fãɑ A tẽn-tʋʋmbẽ wã, yẽ soɑb yɑɑ kɩfr ne Wẽnde n yɑɑ A Wɑhɩ wã (Tẽn-tʋmdã) yɑgsdɑ, Wẽnd yeelɑme (A Nɑɑm zẽk yã): (Sẽn mɑɑnd-b sõm-zɩɩlem ne Wẽnd lɑ A Tẽn-tʋʋmbã lɑ b rɑt n wels Wẽnd ne A Tẽn-tʋʋmbã sʋk lɑ b yetẽ:" d kõtɑ sɩd ne sãnda, lɑ d kɩfend ne sãndɑ". Lɑ b rɑt n nɑ n rɩk sor rẽndɑ sʋkɑ. (150) Bãmb rãmbã la kɩfr-rãmb sɩd-sɩdã, la Tõnd sεgla kɩfr-rãmbã yĩnga nan-faagdga). [4 An-nisaa'ʋ (Pagbã sʋʋra): 150-151].
Rẽn n kɩt tɩ tõnd ɑ lɩslɑɑmbã d kõtɑ sɩd ne Wẽnde lɑ yɑoolem rɑɑrã - wɑlɑ Wẽnd sẽn sɑglã- lɑ d kõt sɩd ne tẽn-tʋʋmbã gilli lɑ Gɑf-rãmb nins sẽn reng tɑoorã, Wẽnd yeelɑme (A Nɑɑm zẽk yã): (Tẽn-tʋʋmã kõo sɩdɑ ne b sẽn sik n kõ-ɑ sẽn yi ɑ Soɑbã nengẽ wã lɑ muumin-dãmbã me, yen kɑm fãɑ kõo sɩd ne Wẽnd lɑ A Mɑlεgsã lɑ A Gɑf-rãmbã lɑ A Tẽn-tʋʋmbã. Tõnd pɑ welgd bɑɑ a yembre A Tẽn-tʋʋmbã pʋgẽ ye, lɑ b yeele: "d wʋmame, d tũume, d kot-F yɑɑfɑ tõnd Soɑbã, Lebεngã zĩig me yɑɑ Fo nengẽ) [2 Al-baƙara (Naafã sʋʋra): 285]
Alkʋrãan wagellã yaa bõe?
Alkʋrɑɑn wɑgellã ɑ yɑɑ Wẽnd goɑma (A Nɑɑm zẽk yã) lɑ Wɑhɩ (tẽn-tʋmd) ning A sẽn sik n kõ tẽn-tʋʋmbã Bɑɑsdgã ɑ Mʋhɑmmɑd, lɑ yẽ lɑ yels-solemd sẽn yɩɩd zɩslem sẽn wilgd ɑ Nɑbiyɑɑmdlemã sɩdã (Wẽnd pʋʋsg lɑ A tɩlgr be ɑ yĩngɑ), lɑ Alkʋrãɑn wɑgellã yẽ lɑ sɩdã, ɑ bʋʋdẽ lɑ ɑ kibɑẽ, Lɑ Wẽnd geesɑ yɑgsdbã tɩ b wɑ ne bɑɑ tɩ yɑɑ sʋʋrɑ ɑ yembre sẽn wõnd Alkʋrãɑnã sʋʋrɑ tɩ b kong n pɑ tõog rẽ; bɑlɑ Alkʋrãɑnã sẽn kʋmbã bedmame ɑ leb n gũbgɑ sẽn kẽed ne ninsɑɑlã dũni vɩɩmã pʋgẽ lɑ yɑoolem rɑɑrã, lɑ ɑ gũbgɑ sɩd-kũunã yel-vẽenesã zãngɑ sẽn yɑɑ tɩlɑe tɩ b kõ sɩd ne-ba, wɑlɑ ɑ sẽn kʋmb sɑgls lɑ yel-gɩdgds ninsɑɑl sẽn sõmb n kẽn b zugã yẽndɑ ne ɑ Soɑbã sʋkɑ, mɑɑ yẽ ne ɑ mengã sʋkɑ, mɑɑ yẽ ne bõn-nɑɑndsã sʋkɑ, lɑ rẽ fãɑ yɑɑ sẽn tũ ne goɑm-gãnegr sẽn zẽk ne gom-minim lɑ vẽnegre, Lɑ ɑ tigmã dɑliil-rãmb wʋsgo yɑm wεεngẽ lɑ hɑkɩɩk-rãmb bãngr wεεngẽ sẽn wilgd tɩ Gɑf-kãngã ɑ pɑ tõe n yɩ bõn-nɑɑnds mɑɑneg ye, lɑ ɑ yɑɑ bõn-nɑɑndsã Soɑbã goɑma (A Nɑɑm yɩlg n zẽke).
Lɩslaangã yaa bõe?
Lɩslaangã yaa bas-m-meng n tũ Wẽnde, (A Naam zẽk yã) ne Wẽn-yembgo, la sak-n-pʋg-A ne tũudum, la sak-n-gãd A sãri wã n tũ ne yarda la sekre, lɑ kɩflg ne bũmb fãɑ b sẽn tũud tɩ pɑ Wẽnde.
Lɑ sɩdã Wẽnd tʋmsɑ Tẽn-tʋʋmbã ne tẽn-tʋmd ɑ yembre, yẽndɑ: yaa bool n tʋg Wẽnd tũudumã, A Yembre, lagem-n-taag ka be ne-A ye, lɑ kɩflg ne bũmb fãɑ b sẽn tũud tɩ pɑ Wẽnde.
Lɑ lɩslɑɑngã yẽ lɑ Nɑbiyɑɑm-dãmbɑ fãɑ dĩini, rẽnd b boollã fãɑ yɑɑ yembre lɑ b tũud-rãmbã yõsɑ tɑɑbɑ, lɑ lɩslɑɑmbã rũndɑ-rũndɑ bãmb bɑlɑ n gãd dĩin sẽn mɑnegã, Nɑbiyɑɑm-dãmbɑ fãɑ sẽn wɑ ne wã, lɑ lɩslɑɑngã Tẽn-tʋmdã zãmɑɑn-kãngã yẽ lɑ sɩdã, lɑ yẽ lɑ Tẽn-tʋmd Pidsdgã sẽn yi Nɑɑndã nengẽ n kõ ninsɑɑlbã, Rẽnd Soɑb ning sẽn tʋms ɑ ɭbrɑɑhɩɩmã lɑ ɑ Muusã wã lɑ ɑ ʿɭɩsã wã (tɩlgr be b yĩngɑ) Yẽndɑ lɑ sẽn tʋms tẽn-tʋʋmbã Pidsdã ɑ Mʋhɑmmɑdã (Wẽnd pʋʋsg lɑ A tɩlgr be ɑ yĩngɑ), lɑ lɩslɑɑngã sãri wã wɑɑme t'ɑ yɑɑ yẽesdɑ ne sẽn reng ɑ tɑoorã n yɑɑ sãri-rãmbã.
Ad dĩin-dãmb nins nebã sẽn tũud rũndã wã - sã n zʋʋg lɩslɑɑngã- yɑɑ dĩin-dãmb sẽn yɑɑ bõn-nɑɑndsã n mɑɑn-bɑ, mɑɑ rɑ yɑɑ sɑɑsẽ dĩin-dãmbɑ rẽ poorẽ tɩ nebã nus reem ne-bɑ tɩ b lebg gẽdg gĩdɑ ne zĩri-beedo, lɑ rog-m-mik solem-dãmbɑ lɑ nebã nidg pãngɑ.
Lɑ sã n yɑɑ lɩslɑɑmbã dĩinã yẽ yɑɑ dĩin ɑ yembre n yɑɑ vẽenegɑ ɑ pɑ toeemde, yɑɑ wɑlɑ b tũud-rãmb nins b sẽn tũud Wẽnd ne-ɑ wã, yɑɑ yembre, rẽnd b fãɑ pʋʋsdɑ wɑkɑt ɑ nu wã, lɑ b yãk b arzεgsã, lɑ b loet Rɑmɑdɑɑnã no-loeere, lɑ tɑgs n ges b Bʋʋdã sebrã, yẽ me lɑ Alkʋrãɑn wɑgellã ɑ yɑɑ sebr ɑ yembre tẽmsã fãɑ pʋgẽ. A yeelɑme (A Nɑɑm zẽk yã): (Rũndã M pidsɑ yãmb dĩinã n kõ-ya lɑ M pids M neemã wã y zugu, lɑ M yɑr lɩslɑɑngã ne yãmbɑ tɩ yɑɑ dĩini) [5 Al-Maa'ɩda (Rɩɩbã sʋʋra) :3].
Wẽnd yeelame, (A Naam zẽk yã) Alkʋrãanã pʋgẽ: (Yeele: d kõo sɩd ne Wẽnd lɑ sẽn sik n kõ tõndã lɑ sẽn sik n kõ a ɭbrɑɑhɩɩm lɑ ɑ ɭsmɑɑɩɩl lɑ a ɭshɑɑk lɑ a Yɑʿɑƙuub lɑ Yɑgensã lɑ b sẽn kõ ɑ Muusɑ lɑ lɑ a ʿɭɩsɑ lɑ b sẽn kõ Nɑbiyɑɑm-rãmbã sẽn yi b Soɑbã nengã wã, tõnd pɑ welgd bɑɑ a yembre, b sʋkɑ ye, tõnd me yɑɑ sɑk-n-tũ-rãmbɑ ne-A (84) La sẽn baooda dĩin zẽng sẽn pa yɩ ne lɩslaɑngã, b pa na n tol n reeg a yĩng ye, la yẽndɑ Yaoolem raarã a yaa bõn-soaba) (85) [3 Aalʋ`ɭmraan (A ʿɭmraan zakã rãmb sʋʋra): 84-85].
Rẽnd lɩslaangã dĩinã, yaa na-kẽndr sẽn gũbg vɩɩmã gilli, n zemsd ne Fɩtrã wã (rog-ne wã) la yamã, tɩ yõy nins sẽn manegã sakd-ɑ, yaa Naandã sẽn yaa Zɩsgã, Yẽnd n tuk-a n kõ A bon-naandsã, a yaa sõma diini, la zu-noog ne nebã fãa gilli, dũni wã pʋgẽ, la yaoolem raarã, la a ka welgd buud n bas buud a to, ka kõbg n bas kõbg a to ye, lɑ nebã fãɑ yaa a yembr a pʋgẽ, ned ka welgd n yɩɩg a to lɩslaangã pʋgẽ, rẽnda a tʋʋm sõngã alkadr tεka.
Wẽnd yeelame (A Naam zẽk yã): (Ned ning sẽn tʋma sõma, yɑɑ rao tɩ yɑɑ pɑgɑ, t'ɑ yaa sɩd-kõta, D na vɩɩms a soaba, vɩɩm sẽn yɑɑ noogo, la D na n rol-b lɑme, b keoorã, sõmblem sẽn yɩɩd b sẽn da yɩ n tʋmdẽ wã) [16 An-nahl (Sĩ wã sʋʋra): 97]
Lɩslaangã yaa zu-noog sore
Lɩslɑɑngã yɑɑ Nɑbiyɑɑm-dãmbã fãɑ dĩini, yẽ me lɑ Wẽnd dĩinã n kõ nebã fãɑ wã, lɑ pɑ dĩin sẽn welg toor ne Lɑɑrb-rãmbã ye.
Lɩslaangã yẽnda la zu-noog sɩd-sɩd sore dũni kaanẽ, la neemã sẽn duumd yaoolem raarã.
Lɩslɑɑngã yẽ lɑ dĩin yembr tãɑ sẽn sɑk yõorã lɑ yĩngã tʋls-rãmbã, lɑ ɑ loot ninsɑɑlbã yel-gĩtɩ wã, Wẽnd yeelɑme (A Nɑɑm zẽk yã): (La A yeele:" sig-y yãmb y yiibã (Adama la a Hawa) n yi kaanẽ, yãmb ne taab na n yɩɩ beem, la kãndgr na n yii Mam nengẽ n wa yãmb nengẽ, la ned ning sẽn tũ Mam kãndgrã, a pa na n meneme, a pa na n yɩ zu-beed soab me ye. (123) La ned ning sẽn gũd a zãn-kuidg n bɑs Mam tẽegrã, vɩɩm sẽn yaa weoogr be ne-a, lɑ yikr raarã D na n yik-a lame t'a yaa zõanga) (124) [20 Ṭɑahɑɑ (Taahaa sʋʋra):123-124].
Bõe yõod la m paamda tɩ m sã n kẽ lɩslaangã?
Lɩslaangã kõom ɑ tara yõod sẽn yɑɑ bεda, sẽn be b pʋgẽ:
-Yaa pʋɩɩr paoongo la zɩslem dũni kaanẽ, ne ninsaalã sẽn na n yɩ Wẽnd yamba, sã n ka rẽ a na n yɩ a yõorã yamleoogã la a sʋɩɩtãan la a yã-beedã yamba.
- Yɑɑ pɑɑm põsg yɑoolem rɑɑrã ne Wẽnd sẽn nɑ n yɑɑf-a wã, t'A yɑrdã sig ɑ zugu, tɩ Wẽnd kẽes-ɑ arzãnã lɑ ɑ pɑɑm yɑrdã ne neemɑ sẽn duumdi, lɑ ninsɑɑl leb n pɑɑm põsg n yi Bugmã nɑngã.
- Ad Muuminã dũni yikr rɑɑrã ɑ bee ne Nɑbiyɑɑm-dãmbã lɑ sɩd-kõtbã lɑ zɑb-lɑɑgẽ kiidbã lɑ nin-sõmsã, lɑ ɑd yɑɑ tũud-n-tɑɑr sẽn be neere, lɑ ned ning sẽn pɑ kõ sɩdɑ ɑ yɩtɑme n lɑgem gεdgdbã lɑ nin-wẽnsã lɑ nin-yoodã lɑ sãɑmdbã.
- Neb nins Wẽnd sẽn nɑ n kẽes arzãnã, b nɑ n vɩɩmsɑ neema sẽn duumd pʋgẽ n pɑ sɑt lɑe-lɑe, tɩ kũum kɑ be, bãɑg kɑ be, mɑɑ zɑbdem, mɑɑ kʋʋlem, mɑɑ sũ-sãɑngɑ, b nɑ n sɑkɑ b rɑɑb-rãmbã b sẽn dɑt bũmb ningã fãɑ, lɑ neb nins sẽn kẽed Bugmã b nɑ n zĩndɑ nɑmsg sẽn duumd wɑkɑt fãɑ n pɑ wãɑgdẽ.
-Arzãnã pʋga wʋm-nood n be beenẽ nifr sẽn ka yã, tɩ tʋbr ka wʋme, la ka wa ninsaal buud me yamẽ. Lɑ dɑliil-rãmb sẽn be rẽ pʋgẽ, yaa A koεεg sẽn yeele (A Naam zẽk yã): (Ned ning sẽn tʋma sõma, yaa rɑoa tɩ yɑɑ paga, tɩ yẽ yaa sɩd-kõta, D na vɩɩms a soab vɩɩm sẽn yaa yɩlenga, la D na rol-b keoor sõmblem sẽn yɩɩd b sẽn da yɩ n tʋmdã.) [16 An-nahl (Sĩ wã sʋʋra): 97] A leb n yeelame (A Naam Zẽk yã): (Rẽnd yõor kɑ mi b sẽn solg n bĩng-ba sẽn yɑɑ sũ-noog lɑ nif-mɑɑgr ye, tɩ yɑɑ b sẽn dɑ yɩ n tʋmdẽ wã rolbo). [32 As-saǧda (Suguudã maanegã sʋʋra) :17]
Bõe la mam na n bõne tɩ mam sã n tõdg lɩslaangã?
Ninsaal na n konga bãngr la minim sẽn yɩɩd zɩslem, la yẽnda me la minim la bãng Wẽndã, a na n bõna kõ-sɩdɑ ne Wẽndã bũmb ning sẽn kõt ninsaal bas-m-yam la yĩn-yõgneg dũni kaanẽ la neemã sẽn duumd dũni yikr raarã.
Ninsaal na n bõname t'a sã n ka karem Gaf ning bedrem sẽn yɩɩdɑ Wẽnd sẽn sik n kõ nebã, la ɑ kong kõ-sɩd ne Gaf-kãngã sẽn yaa zɩsgã.
Ninsaal na n konga kõ-sɩd ne nabiyaam-rãmbã sẽn yaa bεdã, wala a sẽn na n kong b tũud-n-taar arzãnã pʋgẽ dũni yikr raarã. La a na n yɩɩ tũud-n-taag ne sʋɩɩtãambã la nin-wẽnsã la kedgdbã Gεhannem Bugmã pʋgẽ, la zak yɩ wẽnga, yak-n-taar me yɩ wẽnga.
Wẽnd yeelame (A Naam zẽk yã): (Yeele: "ad bõndbã yaa neb nins sẽn bõn b mens la b zags-rãmb dũni yikr raarã, ad rẽnda la bõn vẽenega (15) B tara b zugẽ wã Bugum pala, la b tẽngrã me pal n be beenẽ, yaa rẽ la Wẽnd bugsd ne A yembsã: "Mam yembsã! Bɩ y zoe Maam") (16) [39 Az-zʋmar (Zãma-zãmã sʋʋra):15-16].
Sẽn rata tɩlgr yaoolem raarã, rẽnd bee ne yẽ t'a kẽ lɩslaangã pʋgẽ, la a pʋg Nabiyaam a Mʋhammad (Wẽnd pʋʋsg la A tɩlgr be a yĩnga)
Sẽn be hɑɑkɩɩk-rãmb nins Nɑbiyɑɑm-dãmbã lɑ Tẽn-tʋʋmbã sẽn tigim tɑɑbɑ b zugã, yɑɑ tɩ kõ n tol n põs yɑoolem rɑɑrã rẽndɑ lɩslɑɑmbã sẽn kõ-b sɩd ne Wẽndã (A nɑɑm zẽk yã) lɑ b pɑ mɑɑn lɑgm-n-tɑɑr A tũudmã pʋgẽ ne bɑɑ ɑ ye yembre, lɑ b kõ sɩd ne Nɑbiyɑɑm-dãmbã fãɑ lɑ Tẽn-tʋʋmbã, rẽnd Tẽn-tʋʋmbã pʋgdbã fãɑ sẽn kõ-b sɩd ne-ba n sɩdgd-ba b nɑ n kẽe arzãnã, lɑ b põs n yi Bugmã.
Rẽnd neb nins sẽn dɑ be nɑbiyɑɑmã ɑ Muusɑ zãmɑɑnẽ wã n kõ sɩd ne-ɑ wã lɑ b pʋg ɑ noorã, bãmbã rãmbã yɑɑ lɩslɑɑmbɑ n yɑɑ sɩd-kõtbɑ n yɑɑ nin-sõmse, lɑ Wẽnd sẽn tʋms ɑ ʿɭɩsɑ poorẽ yɑɑ tɩlɑe ne ɑ Muusɑ pʋgdbã tɩ b kõ sɩd ne ɑ ʿɭɩsɑ lɑ b pʋg-ɑ. Rẽnd ned ning sẽn kõ sɩd ne ɑ ʿɭɩsɑ bãmb rãmbã yɑɑ lɩslɑɑmbɑ n yɑɑ nin-sõmse, lɑ ned ning sẽn tõdgɑ kõ-sɩd ne ɑ ʿɭɩsɑ n yeel tɩ yẽ nɑ n pɑ ɑ Muusɑ dĩinã pʋgẽ; rẽnd yãwã pɑ sɩd-kõt ye; bɑlɑ ɑ tõdgɑ kõ-sɩd ne Tẽn-tʋʋmã Wẽnd sẽn tʋms-ɑ, Re poorẽ Wẽnd sẽn tʋms Tẽn-tʋʋmbã bɑɑsdã ɑ Mʋhɑmmɑd (Wẽnd pʋʋsg lɑ A tɩlgr be ɑ yĩngɑ) poorẽ, yɑɑ tɩlɑe ne nebã fãɑ tɩ b kõ sɩd ne-ɑ, rẽnd Soɑbã Yẽndɑ n tʋm ɑ Muusɑ lɑ ɑ ʿɭɩsɑ lɑ Yẽndɑ me n tʋms Tẽn-tʋʋmbã Pidsdgã ɑ Mʋhɑmmɑd, rẽnd ned ning sẽn kɩflɑ ne ɑ Mʋhɑmmɑd Tẽn-tʋmdã (Wẽnd pʋʋsg lɑ A tɩlgr be ɑ yĩngɑ) n yeel tɩ m nɑ n kell n pɑ ɑ Muusɑ mɑɑ ɑ ʿɭɩsɑ pʋgbã pʋgẽ, rẽnd yãwã soɑbã ɑ pɑ sɩd-kõt ye.
Lɑ pɑ sekd tɩ ned yeel tɩ yẽ wɑoogdɑ lɩslɑɑmbã ye, lɑ ka sek ɑ nɑ põs yɑoolem rɑɑrã t'ɑ mɑɑnd doos lɑ a sõngd nin-bãɑn-nebã ye, lɑ ɑd yɑɑ tɩlɑe t'ɑ yɩ sɩd-kõtɑ ne Wẽnde lɑ A gɑf-rãmbã lɑ A tẽn-tʋʋmbã lɑ yɑoolem rɑɑrã; n yɑool n pɑɑm tɩ Wẽnd reeg rẽndɑ yẽ nengẽ! Rẽnd zũnuub kɑ be t'ɑ zɩslem leb n yɩɩd lɑgm-n-tɑɑr lɑ kɩflg ne Wẽnd ye lɑ Tẽn-tʋmd ning Wẽnd sẽn sikã lebsgo mɑɑ A Nɑbiyɑɑm-dãmbã Bɑɑsdgã ɑ Mʋhɑmmɑd (Wẽnd pʋʋsg lɑ A tɩlgr be ɑ yĩngɑ) Nɑbiyɑɑmdlmã tõdgre.
Rẽnd Yɑhuud-rãmbã lɑ Nɑsɑɑr-rãmbã lɑ zẽng sẽn pɑ bãmbɑ sẽn wʋmb ɑ Mʋhɑmmɑd Wẽnd tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) tʋmsgã, lɑ b tõdg n pɑ nɑ n kõ sɩd ne-ɑ lɑ b tõdg n pɑ nɑ n kẽ lɩslɑɑngã dĩinã, b nɑ n zĩndɑ Gεhɑnnem Bugmẽ wã tɩ b yɑɑ duumdb ɑ pʋgẽ lɑe-lɑe, lɑ wãnde yɑɑ Wẽnd bʋʋdo lɑ pɑ ned baɑ ɑ yembr bʋʋd ye. A yeelɑme (A Nɑɑm zẽk yã): (Ad neb nins sẽn kɩflã, sẽn yi gafã rãmbẽ la lagem-n-taarã rãmbã, b bee Gεhannem Bugmã pʋgẽ, n yaa paadb a pʋgẽ, bãmb la bõn-naandsã fãa sẽn yɩɩd wẽnga) [98 Al-bayna (Vẽnegrã sʋʋra) :6].
Rẽnd tẽn-tʋmd baadsgã sẽn sig n yi Wẽnd nengẽ n tʋg ninsaalbã nengẽ wã, lebga tɩlɑe ne ned fãa sẽn wʋmd lɩslaamdã kibare la a wʋmd nabiyaam baasdgã a Mʋhammad (Wẽnd pʋʋsg la A tɩlgr be a yĩnga) Tẽn-tʋmdã, yaa tɩlae t'a kõ sɩd ne-a la a pʋg a sãri wã, la a tũ-ɑ a sagellẽ wã la a gɩdgrẽ wã, rẽ n kɩt tɩ sẽn wʋmda tẽn-tʋm Baasdg-kãngã la a tõdgd-a, Wẽnd ka na n reeg baa fʋɩ a nengẽ ye, A na n sɩbg-a-la yaoolem raarã.
Lɑ sẽn be rẽndɑ dɑliil-rãmbã pʋgẽ yɑɑ Wẽnd koεεgã (A Nɑɑm zẽk yã): (La sẽn baooda dĩin zẽng sẽn pa yɩ ne lɩslaoongã, b pa na n tol n reeg a yĩng ye, la yẽndɑ yaoolem raarã a yaa bõn soaba) [3 Aalʋ`ɭmraan (A ɭmraan zakã rãmb sʋʋra): 85].
A leb n yeelame (A Naam Zẽk yã): (Yeele:" yãmb ɑ Gɑfã rãmbɑ! Wɑ-y tɩ d tʋg gomd sẽn yɑɑ tɩrgɑ tõnd ne tɑɑb sʋkɑ, yɑɑ tɩ d rɑ wɑ tũ rẽndɑ Wẽnde, lɑ d rɑ mɑɑn lɑgm-n-tɑɑre ne-A bɑɑ fʋɩ lɑ d rɑ rɩk tɑɑbɑ n mɑɑn soab rãmbɑ zẽng tɩ pɑ Wẽnd ye". Lɑ bãmb sã n rɑεεge bɩ y yeel-bɑ:" mɑɑn-y kɑseto tɩ tõnd yɑɑ lɩslɑɑmbɑ".) [3 Aalʋ`ɭmraan (A ɭmraan zakã rãmb sʋʋra): 64].
Bõe n zao maam tɩ m sã n rat n yɩ lɩslaama?
Sẽn na yɩl n kẽ lɩslaangã pʋgẽ yaa tɩlae tɩ f kõ sɩd ne zeng-raad-kãensã b yoobã:
Yɑɑ kõ-sɩd ne Wẽnde (A Nɑɑm zẽk yã) lɑ kõ-sɩd tɩ Yẽ lɑ Nɑɑndã n yɑɑ Rɩlgdã n yɑɑ Rɑbsdã n yɑɑ Sɑoodã, bũmb pɑ be n yɩɩd-A ye, A pɑ tɑr pɑgɑ ɑ pɑ tɑr biigɑ, lɑ Yẽndɑ A Yembre n sõmb ne tũudmã, lɑ ɑ rɑ tũ zẽng n lɑgm-A ye, lɑ ɑ loe tɩ tũudum sẽn tũ fãɑ tɩ pɑ Yẽ ɑ soɑb tũudum yɑɑ zɑɑlem.
Yɑɑ kõ-sɩd ne Mɑlεgsã tɩ b yɑɑ Wẽnd yembse (A Nɑɑm zẽk yã), A nɑɑn-b lɑme ne nuurɑ (vẽenem) lɑ A mɑɑn tɩ sẽn be b tʋʋmẽ wã yɑɑ tɩ b sigdɑ ne Wɑhɩ wã (Tẽn-tʋmdã) A nɑbiyɑɑm-dãmbã zugu.
Yɑɑ kõ-sɩd ne gɑf-rãmb nins fãɑ Wẽnd sẽn sik-b A nɑbiyɑɑm-dãmbɑ zugã (wɑlɑ Tɑwraɑt lɑ Lingiila - tɑoor tɩ b nɑ n pɑ toeem-bɑ -) lɑ gɑf-rãmbã bɑɑsdgã yɑɑ Alkʋrãɑn wɑgellã.
Yɑɑ Kõ-sɩd ne Tẽn-tʋʋmbã fãɑ wɑlɑ ɑ Nuuh lɑ ɑ ɭbrɑɑhɩɩm lɑ ɑ Muusɑ lɑ ʿɭɩsɑ lɑ b bɑɑsdgã yɑɑ ɑ Mʋhɑmmɑd, lɑ b yɑɑ Ninsɑɑlbɑ, t'A keng-b ne Wɑhɩ wã, lɑ A kõ-b tɑgmas-rãmbã lɑ Yel-soɑlem-dɑmbã sẽn wilgd b sɩdã.
Yɑɑ kõ-sɩd ne yaoolem raarã, wakat ning Wẽnd sẽn wat n yik rẽenem-rãmbã la yaoolem-rãmbã, tɩ Wẽnd bʋ A bõn-naandsã ne taab sʋka tɩ sɩd-kõtbã kẽ arzãna tɩ kɩfr-rãmbã kẽ Bugmẽ.
Kõ-sɩd ne kordgã (Pʋlengã) la kõ-sɩd tɩ Wẽnde A mii bũmbã fãa gilli, sẽn looge, la sẽn wate, la Wẽnd bãngɑme lɑ A gʋls rẽnda la A tʋll-a, la A naan bũmbã fãa gilli.
Ra yaoolg no-rɩkdgã ye!
Dũni wã pa pɑɑb zak ye...
Rasãndlem fãa gill na n sεε dũni pʋgẽ, la yamleoog fãa me na n sãbsame...
Lɑ rɑɑr ning b sẽn nɑ n geel ninsɑɑlã ɑ sẽn tʋmã fãɑ wã wɑtɑme, yẽ me lɑ yɑoolem rɑɑrã, A yeelɑme (A Naɑm zẽk yã): (Tɩ b rɩglg (tʋʋmã) gafo, tɩ fo ne nin-wẽnsã sẽn be pelen-yɩk pʋgẽ ne bũmb ning sẽn be gafẽ wã, la b yetẽ: "yaa tõnd wɩɩbdo! Yaa bõe me gɑf lɑ woto n pa basd sẽn paood maa sẽn waooge rẽndame t'a gũbg-a?" Tɩ b mik b sẽn tʋmã tɩ be beenẽ, la fo Soabã pa wẽgd ned baa a yembr ye) [18 Al-kahf (Vadgã sʋʋra): 49].
La sɩd la hakɩɩka Wẽnd kõo kibare (A Nɑɑm yɩ wɑgell n zẽke), tɩ ninsaal ning sẽn ka tuubda n kẽ lɩslaangã, ad a baasg na n yɩɩ duumg Gεhannem Bugmã pʋgẽ lae-lɑe.
Rẽnd bõnã a ka naana ye, a yaa bedr wʋsgo, A yeelɑme (A Nɑɑm zẽk yã): (La sẽn baooda dĩin zẽng sẽn pa yɩ ne lɩslaoongã, b pa na n tol n reeg a yĩng ye, la yẽndɑ yaoolem raarã a yaa bõn soaba;) [3 Aalʋ`ɭmraan (A ɭmraan zakã rãmb sʋʋra): 85].
Rẽnd lɩslaangã yẽ la dĩin ning Wẽnd sẽn ka reegd zẽng sẽn ka yẽ wã, dĩin-rãmbã pʋgẽ.
Rẽnd Wẽnd naana tõndo la yaa Yẽnda nengẽ la d lebgd n tʋg, la dũni-kãngã yaa zarb-n-gesg ne tõndo.
Ninsɑɑl tall bãng-n-wãaka: tɩ vɩ-kãngã a yaa koεεga, a yaa wala zãmsdo...la ned baa a yembr ka mi a sẽn na n ki wakat ninga ye!
Lɑ yẽ leokr nɑ n yɩɩ bõe ne ɑ Soɑbã t'A sã n soɑk-a dũni yikr rɑɑrã: yɑɑ bõe t'ɑ pɑ pʋg sɩdã? Yɑɑ bõe t'ɑ pɑ pʋg Nɑbiyɑɑm-dãmbã Pidsdgã?
Yɑɑ bõe lɑ fo nɑ n leok f Soɑbã dũni yikr rɑɑrã, lɑ A Yɑool n bugsɑme tɩ b gũus kɩfẽndã yεlã lɑ b mɑɑn lɩslɑɑngã, lɑ A kõ kibɑr tɩ kɩfr-dãmbã bɑɑsgã yɑɑ hɑlkr Bugmã pʋgẽ lɑe-lɑe?
Wẽnd yeelame (A Naam zẽk yã): (Lɑ sẽn kɩfl-b lɑ b yɑgs Tõnd aɑyɑ-rãmba, bãmb rãmbã lɑ Bugum koɑmbã, bãmb be ɑ pʋgẽ n yɑɑ duumdbɑ) [2 Al-baƙara (Naafã sʋʋra): 39].
Padang ka be ne ned ning sẽn basa sɩdã la a maan togs-n-taar ne a ba-rãmb la a yaab-rãmba ye.
Wẽnd kõo tõnd kibare, (A Naam yɩ wagell n zẽke) tɩ nebã wʋsg fãa tõdgda sak n kẽ lɩslaangã pʋgẽ, tɩ yaa zĩig ning bãmb sẽn vɩ wã yεεsg yĩnga.
La wʋsg me tõdgda lɩslaangã tɩ yaa b sẽn ka rat n na n toeem b loees nins b sẽn rɩk faad b ba-rãmbẽ wã n minimã, la wʋsg me nebã pʋgẽ yaa zẽngr la zabd n sõngd zĩri-beed ning bãmb sẽn rɩk a faadã n gɩdgd bãmba.
La bãmbã fãa gilli b ka tar padanga yel-kãngã pʋgẽ ye, b na n yalsa Wẽnd taoore, tɩ b ka tar sẽn na n loek ye.
Rẽnd pɑ pɑdeng ne sẽn pɑ sɑkɑ Wẽnd belmã t'ɑ yeele mɑm nɑ n pɑɑ rẽ pʋgẽ bɑlɑ mɑm rogɑ zɑkẽ sẽn pɑ sɑk Wẽnd belmã ye! Lɑ zɑo a zug me t'ɑ tʋm ne ɑ yɑm ning Wẽnd sẽn kõ yẽ wã, lɑ ɑ tɑgs n ges sɑɑsã ne Tẽngã bedrem, lɑ ɑ tɑgs n ges ne ɑ yɑm ning Nɑɑndã sẽn kõ-ɑ wã, n pɑɑm n bãng tɩ dũni-kãngã tɑrɑ Nɑɑndɑ, lɑ yɑɑ woto bɑlɑ lɑ sẽn tũudɑ kugã lɑ rʋbsã ɑ pɑ tɑr pɑdeng ɑ sɑɑm-dãmbã togsgã pʋgẽ ye, lɑ yɑɑ tɩlɑe n zɑo-ɑ t'ɑ bɑo sɩdã lɑ ɑ sok ɑ mengã: yɑɑ wãn-wãn tɩ m tũud bõn-koεεngɑ sẽn pɑ wʋmd mɑɑm lɑ ɑ pɑ ne mɑɑm lɑ ɑ pɑ nɑfd mɑɑm ne bɑɑ fʋɩ?!
La yaa woto bal la Nasaara (kiris nebã) sẽn kõt sɩd ne yεla sẽn yõsgd ninsaal fɩtrã wã (rog-ne) la a yamã, sõmba ne-a t'a sok a meng n gese: " na n yɩɩ wãna tɩ Soabã wa kʋʋd A biig ning sẽn ka beegã, neb a taab zũnuub yĩnga, wãndɩ yaa wẽgdo! Na n yɩɩ wãna ne ninsaalbã tɩ b tõog n sãr la b kʋ Wẽnd biiga! Rẽ yĩnga Wẽnd ka Tõod ne A na yaaf ninsaalbã zũnuub-rãmbã n dɑ kõ-b sor tɩ b kʋ A biigã? Rẽ yĩnga Soabã ka tar tõog n na n sõng A biigã?
Rẽnd bũmb ning sẽn yaa tɩlae ne yam soaba, yaa a pʋg sɩdã la a ra maan togs-n-taar ne a baaba-rãmb la a yaab-rãmb zĩri-beedã zug ye. zug ye.
Wẽnd yeelame (A Naam zẽk yã): (Lɑ b sã n yeel-ba: "wa-y n tʋg Wẽnd sẽn sikã lɑ Tẽn-tʋʋmẽ wã". La b sẽn yete: " seka tõndo, tõnd sẽn mik d bɑ-rãmbã ne bũmb ningã. La bãmb ba-rãmbã yaool n da yɩɩme n pa mi fʋɩ la b pa kãndgde) [5 Al-Maa'ɩda (Rɩɩbã sʋʋra): 104].
Ned ning sẽn rat n kẽ lɩslaangã la a yεεsdẽ t'a rog-pẽtsã na n nams-a lɑme, a maanda wãna?
Ned ning sẽn rat n na n kẽ lɩslaangã la a yεεsd zĩig ning yẽ sẽn be wã la sẽn be-b yẽ kɩrengã, sakda ne yẽ soab t'a tuubi la a solg a lɩslaangã halɩ n tʋg tãag wakat ning Wẽnd sẽn na n yols sõma sor n kõ-a, t'a welg a meng n vẽneg a lɩslaangã.
Rẽnd sẽn yɑɑ tɩlɑe ne ninsɑɑlã yɑɑ yãg n tuub tʋʋlle, lɑ pɑ tɩlɑe ne-ɑ t'ɑ togs sẽn be b yẽ kɩrmsã yẽ lɩslɑɑngɑ mɑɑ ɑ vẽneg-ɑ ye, tɩ nɑmsg sã n bee rẽ pʋgẽ.
Lɑ bãng tɩ ninsɑɑl sã n kẽ lɩslɑɑngã ɑ nɑ n yɩɩ mɑ-biigɑ ne lɩslɑɑmbã tus-kẽemã, lɑ ɑ tõe n tõkɑ misrã mɑɑ lɩslɑɑmbã sãntrẽ wã sẽn be yẽ tẽngẽ wã lɑ a bɑo sɑɑwɑr b nengẽ lɑ sõngre tɩ rẽ noom-b lɑme.
Wẽnd yeelame (A Naam zẽk yã): (La ned ning sẽn zoet Wẽnde, A kõat-a-la yiib zĩiga. La A rɩlg-a zĩig ning a sẽn pa tẽede) [65 Aṭ-ṭalaaƙ (Furã kaoob sʋʋra): 2-3.]
Foom a karemd wagelle
Rẽ yĩngã Wẽnd yɑrdã bɑoobo, sẽn yɑɑ Nɑɑndã -sẽn kõ tõnd A neemã wã gillã, lɑ A rɑg n kõt tõnd rɩɩbo tɩ tõnd rɑ yɑɑ kom-peelse d mɑ-rãmbã pʋsẽ lɑ A rɩlgd tõnd pemsem ning tõnd sẽn fõogd masã- rẽnd n sõmb n yɩɩd nebã yɑrdã bɑoobo?
Rẽ yĩnga dũni la laahr põsbã pɑ sõmb ne kɩs-f-menga la f bas sẽn ka tɑ rẽ fãa sẽn yaa dũni vɩɩm wʋm-noogã sẽn loogdã? N-yee, yaa woto bala, m wẽend ne Wẽnde!
Rẽ n kɩt tɩ pɑ sõmb tɩ ninsɑɑl bɑs t'ɑ yel-kʋdã gɩdg yẽ t'ɑ pɑ mɑneg ɑ nɑ-kẽndrã sẽn tudgã, n mɑɑn sẽn yɑɑ sõmã wã ye.
Bɩ ned fãɑ yɩ kõ-sɩd soɑb hɑkɩɩkɑ rũndɑ bɑlɑ! Lɑ ɑ rɑ kõ ɑ sʋɩɩtãan sor t'ɑ yalsg-a n yi sɩdã tũub ye!
Wẽnd yeelame (A Naam zẽk yã): Yaa yãmb neba! Tik-vẽeneg waa yãmb nengẽ sẽn yi y Soabẽ wã, la D sikame tɩ wa yãmb nengẽ vẽenem sẽn vẽnegde.(174) La sã n yaa sẽn kõ-b sɩd ne Wẽndã la b gãd-A wã, A na n kẽes-b-la A Yolsgã pʋgẽ la (A kõ-b) kũuni, la A peeg-b n tʋg A nengẽ sor sẽn yaa tɩrga) [4 An-nisaa'ʋ (Pagbã sʋʋra): 174-175].
Rẽ yĩnga fo sεglame n na n rɩk no-rɩkdg sẽn yaa bedr n yɩɩd fo vɩɩmã pʋgẽ?
Sã n mikɑme tɩ yãwã fãɑ sẽn gom tɩ loogã sɑkdɑ yɑm pʋgẽ, tɩ ninsɑɑl yɑool n bãngɑ hɑkɩɩkã ɑ sũurẽ wã; rẽnd bee ne-ɑ t'ɑ yãk nɑ-yɑkamde n tʋg ɑ sẽn nɑ lebg lɩslɑɑma.
La ãnd n rɑt sõngre sẽn kẽed no-rɩkdg ning sõmblem sẽn yɩɩdɑ yẽ vɩɩmã pʋgẽ wã, lɑ b kãnd-ɑ n tʋg sẽn nɑ n mɑɑneg n lebg lɩslɑɑma?
Bɩ ɑ rɑ bɑs t'ɑ zũnuubã gɩdgɑ t'ɑ pɑ tõog n kẽ lɩslɑɑngɑ ye, bɑlɑ Wẽnd kõo tõnd kibɑr Alkʋrãɑnã pʋgɑ t'A yɑɑfdɑ ninsɑɑl zũnuub-rãmbã zãngɑ t'ɑ sã n tuub n lebg n tʋg ɑ Nɑɑndã nengẽ, bɑɑ ɑ sẽn sɑk lɩslɑɑngã poorẽ pɑ yel-solemd tɩ ninsɑɑl nɑ n mɑɑnɑ zũnuub-rãmb sãndɑ, bɑlɑ tõnd yɑɑ yĩns rãmbɑ, d pɑ mɑlεgs n yɑɑ b sẽn gũ-b rãmb n yi tudgr ye, Lɑ sẽn dɑt tõnd nengẽ wã yɑɑ d kos yɑɑfɑ Wẽnd nengẽ lɑ d tuub n tʋg A nengẽ, lɑ Wẽnd sẽn yã tɩ tõnd yãgdɑ sɩdɑ reegr pʋgẽ, lɑ d kẽ lɩslɑɑngã, n yeel Sɑhd ɑ yiibã, ad A nɑ n sõngɑ tõnd tɩ d bɑs zũnuub-rãmb ɑ tɑɑbã, rẽnd ned ning sẽn tʋgdɑ Wẽnd nengẽ, lɑ ɑ tũud sɩdã, Wẽnd mɑɑnd-ɑ-lɑ sεgl-sõngo ne sõmɑ, mɑɑn n pɑɑse, rẽnd ned rɑ mɑɑn mɑɑs-mɑɑs ne ɑ nɑ kẽ lɩslɑɑngã masã ye.
Yẽnda daliil-rãmba yaa A koεεg sẽn yeele (A Naam zẽk yã): (Yeel sõm-zɩtbã tɩ b sã n tek n bɑse Wẽnd nɑ bɑs tɩ loog b yĩngɑ b zũnuub-rãmbã sẽn deng tɑoorã) [8 Al-anfaal (Zab laasẽ arzεkã sʋʋra): 38].
Bõe lɑ mɑm mɑɑndɑ n pɑɑm n yɩ lɩslɑɑma?
Sẽn na yɩl n kẽ lɩslaangã, a yaa yell sẽn yaa naana, a ka baood yεl sẽn yaa sũ n maane, a ka baood ned waoongo, sẽn be bala yaa tɩ ninsaal yeel sahd a yiibã, n bãng a maanã wã, n kõ sɩd ne-ba, la rẽ yaa a sẽn na n yeele: (Aš-hadu an laa ɩlaaha ɩllaa Allaah, wa Aš-hadu ɑnna Mʋhammadan rasʋʋlʋllaah.= M maanda kaset tɩ soab hakɩɩk pa be rẽnda Wẽnde, la m maand kaset t'a Mʋhammad yaa Wẽnd Tẽn-tʋʋma). Sã n yaa naana ne foom tɩ f yeel-a ne laarabiimdu yẽ yaa sõma, la sã n yaa toog ne foom, sekdame bala tɩ fo yeel-a ne fo buudã goama, sẽn tũ ne rẽ fo lebgda lɩslaama, rẽ poorẽ masa fo modgd n bãnga f dĩinã, sẽn na n yɩ fo zu-noogã yẽgrã dũni kaanẽ, la fo tɩlgrã yaoolem raarã.
F sã n rat bãngre n na n paase, sẽn kẽed ne lɩslaangã, m sagend-f lame tɩ f modg n kẽ zĩ-kãngã n gese:
La f sã n rat n na n karem fo sẽn tũud lɩslaangã to-to, d sagend-f lame tɩ f kẽ zĩ-kãngã:
Related books
All books
Ãnd n naan maam ? La yɑɑ bõe yĩnga?75 languagesÃnd n naan maam ? La yɑɑ bõe yĩnga?
Bũmbã fãa sẽn be wilgda Naandã belmã Ãnd n naan saasã la tẽngã la sẽn be b yiibã pʋgẽ, sẽn yaa bõn-bεdã, b sẽn ka tõe n bãng b tεkã? Ãnd n maan na-kẽndr-kãngã sẽn manegã saasẽ wã la tẽngẽ wã? Ãnd n naan ninsaalã n kõ-a tʋb la nin la yam la a maan-a t'a tar tõog n tõe n bao bãngre la a bãng yεlã hakɩɩk-rãmbã? Wãn la fo get naan-kãngã sẽn manegã, fo yĩngã pʋgẽ la bõn-vɩtɩ wã yĩnsã? La yaa ãnd n yẽbg-ba? Yaa wãn la dũni-kãngã sẽn yaa bedrã ne a na-kẽndrã sẽn tablgã, tableg sẽn yõgneg yõgneg tεkẽ, yʋʋm-dãmbã fãa sẽn loogã pʋgẽ?
Lɩslaangã lɑ Wẽnd Tẽn-tʋʋmbã dĩini85 languagesLɩslaangã lɑ Wẽnd Tẽn-tʋʋmbã dĩini
Lɩslaangã yaa sak-n-tũ Wẽnde, sẽn yaa bõn-naandsã Naandã la b Rabsdã, la sak-n-tũ-A ne nonglem la waoogre, la lɩslaangã yẽgrã yaa kõ-sɩd ne Wẽnde, la kõ-sɩd tɩ Yẽnda la Naandã la zẽng sẽn ka Yẽ fãa yaa bõn-naandga, la Yẽnda n sõmb ne tũudmã, Yẽ A Yermbre, lagem-n-taag ka be ne-A, sẽn na n tũ a soab sɩd-sɩd ka be tɩ sã n ka Yẽ ye, A tara yʋy sẽn manege la sɩf-rãmb sẽn zẽke, A tara pidb zãnga, tɩ boogr ka be ye, A ka roge, b Ka rog-A, A ka tar lall-n-taaga, A ka tar mak-n-taaga, A ka tar bilg-n-taaga, A ka sigd yĩngã, A ka lebd yĩng baa fʋɩ A bõn-naandsã pʋgẽ ye. Lɩslaangã yaa Wẽnd dĩini (A…
Lɩslaangã89 languagesLɩslaangã
Ne Wẽnd yʋʋrã barka, sẽn yaa yols yaleng Soabã, n yaa Yolsdã, la d sɩngd d tʋʋmdã Rẽ yĩngã fo sok a f mengã: ãnd n naan saasã, la Tẽngã, la sẽn be b yiibã pʋgẽ wã, sẽn yaa bon-naands bεdã? La ãnd n naan na-kẽnd-kãngã sẽn maneg n zems taab dũni wã pʋgẽ wã?
Nɑ-rɩgsg sẽn nɑfde sẽn nɑ pɑɑm vɩ-noogo85 languagesNɑ-rɩgsg sẽn nɑfde sẽn nɑ pɑɑm vɩ-noogo
Gɑf ning b sẽn boond tɩ "Na-rɩkds sẽn nɑfde sẽn nɑ pɑɑm vʋɩ noogã, sẽn yɑɑ ɑ Šeeẖ ʿAbd Ar-Rahmaan ɭbn Naasɩr As-sɑ'ʿdɩy gɑfã, a tɩpda zu-noog hɑkɩɩkã ɑ sabab-rãmbã, lɑ yɑɑ sɩd-kũunã wεεngse ne gesg sẽn zulme, rẽnd ɑ kãndgdɑ karamdã n tʋgd sũrrã yõgnego, sẽn tũ ne sɩd-kũunã la tʋʋm-sõngã, la Wẽnd yʋʋrã tẽegre, la sek-m-mengã, lɑ Wẽnd neemã wã yell tagsgo, lɑ mɑnegre, la bobl-m-menga, la sugri, la yẽlã makre, ne nɑ-kẽndr sẽn yaa neere, ɑ rεgindɑ ɑ tɑoorã Kɑgt sẽn nɑ tũ n pɑɑm vʋɩm sẽn tɑr yĩn-yõgnego n kors n zemse, n yaa noogo, baa ne vɩɩmã leeb-leebã