صفة الوضوء (شرح عملي ومختصر)

വുദൂഇൻ്റെ രൂപം (പ്രായോഗികവും ലഘുവുമായ വിശദീകരണം)

വുദൂഇൻ്റെ രൂപം (ലളിതമായ വീഡിയോ)

വുദൂഅ് എടുക്കേണ്ട രൂപം ഓരോ ഘട്ടമായി ഇതിൽ പ്രായോഗികമായി വിവരിക്കുന്നു. നിസ്കാരം ശരിയാകാനുള്ള നിബന്ധനയാണ് വുദൂഅ് എന്നതിനാൽ ഇത് വളരെ പ്രധാനമാണ്.

ഈ വീഡിയോ കണ്ട് വുദുവിൻ്റെ ശരിയായ രൂപം പഠിക്കുക.

വുദ്വൂഇൻ്റെ രൂപം

ശുദ്ധിയില്ലാതെയുള്ള നിസ്കാരം സ്വീകരിക്കപ്പെടുന്നതല്ല.

ബിസ്മില്ലാഹ് (അല്ലാഹുവിൻ്റെ നാമത്തിൽ)

ബിസ്മില്ലാഹ്

വുദ്വൂ ആരംഭിക്കുമ്പോൾ ആദ്യം 'ബിസ്മില്ലാഹ്' എന്ന് ചൊല്ലണം. അങ്ങനെയാണ് വുദ്വൂ ചെയ്യാൻ തുടങ്ങേണ്ടത്.

ശേഷം രണ്ട് കൈപ്പത്തികളും കഴുകുക.

പിന്നീട് വായിൽ വെള്ളം കയറ്റി കൊപ്ലിക്കുകയും, മൂക്കിൽ വെള്ളം കയറ്റി അത് പുറത്തേക്ക് ചീറ്റിക്കളയുകയും വേണം.

വായിലേക്ക് വെള്ളം പ്രവേശിപ്പിച്ച ശേഷം, വെള്ളം വായിൽ വെച്ച് നന്നായി കൊപ്ലിക്കുകയും ചെയ്യുക.

അതോടൊപ്പം മൂക്കിലേക്ക് വെള്ളം വലിച്ചു കയറ്റിയ ശേഷം,

അത് ചീറ്റി പുറത്തുകളയുകയും വേണം.

ഈ രണ്ട് കാര്യങ്ങളും ശക്തിയിൽ ചെയ്യുന്നത് സുന്നത്താണ്; എന്നാൽ നോമ്പുകാരും മൂക്കിനുള്ളിലേക്ക് വെള്ളം കയറിയാൽ എന്തെങ്കിലും പ്രയാസമുണ്ടാകാൻ സാധ്യതയുള്ളവരും ഇത് ശക്തിയിൽ ചെയ്യേണ്ടതില്ല.

ഇത്രയും ചെയ്തു കഴിഞ്ഞ ശേഷം, വെള്ളം കൊണ്ട് മുഖം കഴുകണം.

മുഖത്തിൻ്റെ അതിരുകൾ ഇനി പറയും വിധമാണ്:

മുഖത്തിൻ്റെ നീളം: മുടി മുളക്കുന്ന ഭാഗം മുതൽ കീഴ്ത്താടി വരെയാണ്.

രണ്ട് ചെവികൾക്കിടയിലാണ് മുഖത്തിൻ്റെ വീതി.

മുഖം കഴുകുമ്പോൾ കൺപുരികങ്ങൾ പോലെ മുഖത്തുള്ള മുഴുവൻ രോമങ്ങളും നിർബന്ധമായും കഴുകാൻ ശ്രദ്ധിക്കണം.

നേർത്ത താടിയുള്ളവർ താടിരോമങ്ങളുടെ കീഴിലുള്ള രോമങ്ങളിൽ വെള്ളം സ്പർശിച്ചു എന്ന് ഉറപ്പു വരുത്തുന്ന വിധത്തിൽ അവ കഴുകണം.

തിങ്ങിയ താടിയുള്ളവർ താടിരോമങ്ങളുടെ പുറംഭാഗം മാത്രം കഴുകിയാൽ മതിയാകും.

എന്നാൽ തിങ്ങിയ താടിയുള്ളവരും താടിരോമങ്ങൾക്കിടയിൽ വെള്ളം കയറ്റുന്നത് സുന്നത്താണ് എന്ന കാര്യം ഓർക്കുക.

മുഖം കഴുകിക്കഴിഞ്ഞു; ഇനി കൈകൾ രണ്ടും കഴുകുകയാണ് വേണ്ടത്. ആദ്യം വലതുകയ്യാണ് കഴുകേണ്ടത്.

വിരലുകളുടെ അറ്റം മുതൽ കൈമുട്ടുകൾ ഉൾപ്പെടെയാണ് രണ്ട് കൈകളും കഴുകേണ്ടത്.

ഇനി തല തടവാം!

അതിനായി ആദ്യം രണ്ട് കൈകളിലും വെള്ളം കൊണ്ട് നനവ് വരുത്തുക.

ശേഷം രണ്ട് കൈകളും തലയുടെ മുൻപിൽ നിന്ന് പിരടി വരെ കൊണ്ടുപോകണം.

എന്നിട്ട്, തുടങ്ങിയ സ്ഥലത്തേക്ക് തന്നെ രണ്ട് കൈകളും തിരിച്ചു കൊണ്ടുവരികയും ചെയ്യുക.

ഇനി ചെവികൾ രണ്ടും തടവണം; തല തടവാൻ വേണ്ടി കൈകളിലുണ്ടായിരുന്ന നനവിൻ്റെ ബാക്കി തന്നെ ചെവികൾ തടവാനും മതിയാകുന്നതാണ്.

തലയും ചെവിയും ഒരു തവണ മാത്രമേ തടവേണ്ടതുള്ളൂ.

ചെവികൾ ഇനി പറയുന്നത് പോലെയാണ് തടവേണ്ടത്:

രണ്ട് ചെവികളുടെയും ഉൾച്ചാലുകളിൽ ചൂണ്ടുവിരൽ പ്രവേശിപ്പിച്ചു കൊണ്ട് അവ തടവുകയും, തള്ളവിരൽ കൊണ്ട് ചെവികളുടെ പുറംഭാഗവും തടവുകയും ചെയ്യുക.

ഇങ്ങനെ ചെയ്യുമ്പോൾ ചെവിയുടെ ഉള്ളും പുറവും ഒരേ സമയം തടവാൻ കഴിയും.

ഇനി കാലുകൾ കഴുകുക എന്നതാണ് ബാക്കിയുള്ളത്.

കാൽ കഴുകുമ്പോൾ കാൽവിരലുകളുടെ അറ്റം മുതൽ നെരിയാണി വരെയാണ്

നിർബന്ധമായും കഴുകേണ്ടത്.

ആദ്യം വലതു കാൽ കഴുകുക. കാൽ കഴുകുമ്പോൾ കാൽവിരലുകൾക്കിടയിൽ കൈവിരലുകൾ പ്രവേശിപ്പിച്ചു കൊണ്ട് കഴുകണം. അതു പോലെ, രണ്ട് മടമ്പുകളും നനവെത്തുന്നുണ്ടോ എന്ന് പ്രത്യേകം ശ്രദ്ധിക്കുകയും ചെയ്യണം.

വലതു കാൽ കഴുകിയത് പോലെ, ഇടത് കാലും ശ്രദ്ധയോടെ കഴുകുക.

ഇത്രയും പറഞ്ഞ ക്രമത്തിൽ തന്നെ ഓരോ അവയവങ്ങളും കഴുകുക എന്നത് നിർബന്ധമാണ്. ഈ ക്രമം തെറ്റിച്ചാൽ വുദ്വൂ ശരിയാവുകയില്ല.

അതു പോലെ, വുദ്വു ആരംഭിച്ചത് മുതൽ അവസാനം വരെ ഇടതടവില്ലാതെ ചെയ്തു തീർക്കണം. ഒരു അവയവം കഴുകിയ ശേഷം അടുത്തത് കഴുകാൻ ദീർഘമായ ഇടവേള എടുക്കരുത്.

വുദൂഇൻ്റെ എല്ലാ അവയവങ്ങളും ഒരു തവണ കഴുകിയാൽ തന്നെ വുദ്വൂ സാധുവാകുന്നതാണ്. പക്ഷേ, മുഖം കഴുകുന്നതും, വായിൽ വെള്ളം കൊപ്ലിക്കുന്നതും മൂക്കിൽ വെള്ളം കയറ്റി ചീറ്റുന്നതും, കൈകളും കാലുകളും കഴുകുന്നതും രണ്ട് തവണയോ, കൂടിയാൽ മൂന്ന് തവണയോ ആവർത്തിക്കുന്നതാണ് ഏറ്റവും ശ്രേഷ്ഠം.

വുദ്വൂ ചെയ്തു കഴിഞ്ഞാൽ ഈ പ്രാർത്ഥന ചൊല്ലുന്നത് സുന്നത്താണ്:

(സാരം:) അല്ലാഹുവല്ലാതെ ആരാധനക്ക് അർഹനായി മറ്റാരുമില്ലെന്ന് ഞാൻ സാക്ഷ്യം വഹിക്കുന്നു. അവൻ മാത്രമാണ് ആരാധനക്കർഹൻ. അവന് യാതൊരു പങ്കുകാരനുമില്ല. മുഹമ്മദ് നബി(ﷺ) അല്ലാഹുവിൻ്റെ അടിമയും അവൻ്റെ ദൂതനുമാണെന്നും ഞാൻ സാക്ഷ്യം വഹിക്കുന്നു.

അശ്ഹദു അൻ ലാ ഇലാഹ ഇല്ലല്ലാഹു വഹ്ദഹു ലാ ശരീക്ക ലഹു, വ അശ്ഹദു അന്ന മുഹമ്മദൻ അബ്ദുഹു വ റസൂലുഹു

ശേഷം ഈ പ്രാർത്ഥന ചൊല്ലുന്നതും നല്ലതാണ്:

(സാരം:) അല്ലാഹുവേ! ധാരാളമായി പശ്ചാത്തപിക്കുന്നവരിൽ നീ എന്നെ ഉൾപ്പെടുത്തേണമേ! ധാരാളമായി ശുദ്ധി വരുത്തുന്നവരിലും നീ എന്നെ ഉൾപ്പെടുത്തേണമേ

അല്ലാഹുമ്മ ഇജ്അൽനീ മിനത്തവ്വാബീൻ, വജ്അൽനീ മിനൽ മുതത്വഹ്ഹിരീൻ.

കോഡ് സ്കാൻ ചെയ്യുക

മസ്ജിദുൽ ഹറാം, മസ്ജിദുൽ നബവി എന്നിവിടങ്ങളിലെ മതകാര്യ വകുപ്പ്

ഹറമൈൻ സന്ദേശം

മസ്ജിദുൽ ഹറാം, മസ്ജിദുൽ നബവി എന്നിവിടങ്ങളിലെത്തുന്നവർക്കുള്ള വിവിധ ഭാഷകളിലുള്ള മതപരമായ നിർദ്ദേശങ്ങൾ.