صفة الوضوء (شرح عملي ومختصر)

ವುದೂ ಮಾಡುವ ವಿಧಾನ (ಪ್ರಾಯೋಗಿಕ ಮತ್ತು ಸಂಕ್ಷಿಪ್ತ ವಿವರಣೆ)

ವುದೂ ಮಾಡುವ ವಿಧಾನ (ಸರಳೀಕೃತ ವೀಡಿಯೊ)

ವುದೂವನ್ನು ಹಂತ ಹಂತವಾಗಿ ಹೇಗೆ ಮಾಡಬೇಕೆಂದು ತೋರಿಸುವ ಪ್ರಾಯೋಗಿಕ ವಿವರಣೆ. ಇದು ತುಂಬಾ ಮುಖ್ಯವಾಗಿದೆ; ಏಕೆಂದರೆ ವುದೂ ನಮಾಝ್‌ ಸಿಂಧುವಾಗಲು ಒಂದು ಷರತ್ತಾಗಿದೆ.

ವೀಡಿಯೊ ವೀಕ್ಷಿಸಿ ಮತ್ತು ವುದೂ ಮಾಡುವ ಸರಿಯಾದ ವಿಧಾನವನ್ನು ಕಲಿಯಿರಿ.

ವುದೂ ಮಾಡುವ ವಿಧಾನ

ಶುದ್ಧಿಯಿಲ್ಲದಿದ್ದರೆ ಯಾವುದೇ ನಮಾಝ್ ಸ್ವೀಕರಿಸಲ್ಪಡುವುದಿಲ್ಲ.

ಅಲ್ಲಾಹನ ಹೆಸರಿನಿಂದ ಆರಂಭಿಸಬೇಕು.

ಬಿಸ್ಮಿಲ್ಲಾಹ್

ವುದೂವಿನ ಆರಂಭದಲ್ಲಿ ಬಿಸ್ಮಿಲ್ಲಾಹ್ ಹೇಳುವುದನ್ನು ನಿಯಮಗೊಳಿಸಲಾಗಿದೆ. ಆದ್ದರಿಂದ ಅದನ್ನು ಹೇಳುವ ಮೂಲಕ ವುದೂ ಮಾಡಲು ಪ್ರಾರಂಭಿಸಬೇಕು.

ನಂತರ ಎರಡು ಮುಂಗೈಗಳನ್ನು (ಮಣಿಕಟ್ಟಿನವರೆಗೆ) ತೊಳೆಯಬೇಕು.

ನಂತರ ಬಾಯಿ ಮುಕ್ಕಳಿಸಬೇಕು ಮತ್ತು ಮೂಗಿಗೆ ನೀರು ಎಳೆಯಬೇಕು.

ಬಾಯಿ ಮುಕ್ಕಳಿಸುವುದು ಎಂದರೆ ಬಾಯಿಯಲ್ಲಿ ನೀರು ಹಾಕಿ ಅಲುಗಾಡಿಸುವುದು.

ಮೂಗಿಗೆ ನೀರು ಎಳೆಯುವುದು ಎಂದರೆ ಶ್ವಾಸದೊಂದಿಗೆ ನೀರನ್ನು ಮೂಗಿನೊಳಗೆ ಎಳೆದುಕೊಳ್ಳುವುದು.

ನಂತರ ನೀರನ್ನು ಮೂಗಿನಿಂದ ಹೊರಹಾಕಬೇಕು.

ಉಪವಾಸವಿಲ್ಲದಿದ್ದರೆ ಅಥವಾ ಯಾವುದೇ ಹಾನಿಯಾಗುವ ಭಯವಿಲ್ಲದಿದ್ದರೆ ಬಾಯಿ ಮುಕ್ಕಳಿಸುವುದನ್ನು ಮತ್ತು ಮೂಗಿಗೆ ನೀರು ಎಳೆಯುವುದನ್ನು ತೀಕ್ಷ್ಣಗೊಳಿಸುವುದು (ಹೆಚ್ಚು ಆಳವಾಗಿ ಮಾಡುವುದು) ಅಪೇಕ್ಷಿತವಾಗಿದೆ.

ನಂತರ ನೀರಿನಿಂದ ಮುಖವನ್ನು ತೊಳೆಯಬೇಕು.

ಮುಖದ ವ್ಯಾಪ್ತಿ

ಉದ್ದವಾಗಿ: ತಲೆಯ ಕೂದಲು ಬೆಳೆಯುವ ಸ್ಥಳದಿಂದ ಗಲ್ಲದವರೆಗೆ.

ಅಗಲವಾಗಿ: ಒಂದು ಕಿವಿಯಿಂದ ಇನ್ನೊಂದು ಕಿವಿಯವರೆಗೆ.

ಮುಖವನ್ನು ತೊಳೆಯುವಾಗ ಹುಬ್ಬು ಮುಂತಾದ ಅದರ ಮೇಲಿರುವ ಎಲ್ಲಾ ಕೂದಲುಗಳನ್ನು ತೊಳೆಯುವುದು ಕಡ್ಡಾಯವಾಗಿದೆ.

ಗಡ್ಡವು ತೆಳುವಾಗಿದ್ದರೆ, ಅದರ ಕೆಳಗಿರುವ ಚರ್ಮವನ್ನು ತೊಳೆಯುವುದು ಕಡ್ಡಾಯವಾಗಿದೆ.

ಗಡ್ಡವು ದಟ್ಟವಾಗಿದ್ದರೆ, ಅದರ ಹೊರಭಾಗವನ್ನು ತೊಳೆದರೆ ಸಾಕು.

ಅದರ ನಡುವೆ ಬೆರಳುಗಳನ್ನು ತೂರಿಸಿ ಒದ್ದೆಗೊಳಿಸುವುದು ಸುನ್ನತ್ ಆಗಿದೆ.

ಮುಖವನ್ನು ತೊಳೆದ ನಂತರ, ಎರಡು ಕೈಗಳನ್ನು ತೊಳೆಯಬೇಕು. ತೊಳೆಯುವಾಗ ಬಲಗೈಯಿಂದ ಪ್ರಾರಂಭಿಸಬೇಕು.

ಎರಡು ಕೈಗಳನ್ನು ಬೆರಳುಗಳ ತುದಿಗಳಿಂದ ಮೊಣಕೈಗಳವರೆಗೆ, ಮೊಣಕೈಗಳನ್ನು ಸೇರಿಸಿ ತೊಳೆಯಬೇಕು.

ನಂತರ ತಲೆಯನ್ನು ಸವರಬೇಕು.

ಸವರುವಾಗ ಕೈಗಳನ್ನು ನೀರಿನಿಂದ ಒದ್ದೆ ಮಾಡಬೇಕು.

ನಂತರ ಒದ್ದೆ ಕೈಗಳನ್ನು ತಲೆಯ ಮುಂಭಾಗದಲ್ಲಿ ಇಟ್ಟು ಕುತ್ತಿಗೆಯ ಹಿಂಭಾಗದವರೆಗೆ ಕೊಂಡೊಯ್ಯಬೇಕು.

ನಂತರ ಅವುಗಳನ್ನು ತಲೆಯ ಮುಂಭಾಗಕ್ಕೆ ಹಿಂತಿರುಗಿಸಬೇಕು.

ನಂತರ ತಲೆಯನ್ನು ಸವರಿ ಉಳಿದ ನೀರಿನಿಂದ ಎರಡು ಕಿವಿಗಳನ್ನು ಸವರಬೇಕು.

ಇದನ್ನು ಕೇವಲ ಒಮ್ಮೆ ಮಾಡಬೇಕು.

ಕಿವಿಗಳನ್ನು ಸವರುವ ವಿಧಾನ

ತೋರುಬೆರಳನ್ನು ಕಿವಿಗಳ ರಂಧ್ರದೊಳಗೆ ತೂರಿಸಿ ಒಳಭಾಗವನ್ನು ಸವರಬೇಕು ಮತ್ತು ಹೆಬ್ಬೆರಳಿನಿಂದ ಕಿವಿಗಳ ಹೊರಭಾಗವನ್ನು ಸವರಬೇಕು.

ಇದರಿಂದ ಕಿವಿಗಳ ಒಳಭಾಗ ಮತ್ತು ಹೊರಭಾಗವನ್ನು ಸವರಿದಂತಾಗುತ್ತದೆ.

ನಂತರ ಎರಡು ಕಾಲುಗಳನ್ನು ತೊಳೆಯಬೇಕು.

ತೊಳೆಯುವುದು ಕಡ್ಡಾಯವಾಗಿರುವ ಕಾಲುಗಳ ವ್ಯಾಪ್ತಿ:

ಕಾಲು ಬೆರಳುಗಳ ತುದಿಗಳಿಂದ ಹರಡುಗಂಟುಗಳವರೆಗೆ

ಮೊದಲು ಬಲಗಾಲನ್ನು ತೊಳೆಯಬೇಕು. ಕಾಲು ಬೆರಳುಗಳ ಸಂದುಗಳನ್ನು ಉಜ್ಜಬೇಕು ಮತ್ತು ಹಿಮ್ಮಡಿಗಳನ್ನು ತೊಳೆಯಲು ವಿಶೇಷ ಗಮನ ಹರಿಸಬೇಕು.

ನಂತರ ಬಲಗಾಲನ್ನು ತೊಳೆದಂತೆಯೇ ಎಡಗಾಲನ್ನು ತೊಳೆಯಬೇಕು.

ವುದೂವಿನ ಅಂಗಗಳನ್ನು ಕ್ರಮಪ್ರಕಾರ ತೊಳೆಯುವುದು ಕಡ್ಡಾಯವಾಗಿದೆ. ಅಂದರೆ ಒಂದು ಅಂಗಕ್ಕಿಂತ ಮೊದಲು ಮತ್ತೊಂದನ್ನು ತೊಳೆಯಬಾರದು.

ಹಾಗೆಯೇ ಅವುಗಳ ನಡುವೆ ವಿಳಂಬ ಮಾಡದಿರುವುದು ಕೂಡ ಕಡ್ಡಾಯವಾಗಿದೆ. ಅಂದರೆ ಒಂದು ಅಂಗದಿಂದ ಮುಂದಿನ ಅಂಗಕ್ಕೆ ಹೋಗುವಾಗ ಹೆಚ್ಚು ವಿಳಂಬ ಮಾಡಬಾರದು.

ವುದೂವಿನ ಎಲ್ಲಾ ಅಂಗಗಳನ್ನು ಒಮ್ಮೆ ತೊಳೆದರೆ ಸಾಕಾಗುತ್ತದೆ. ಆದರೆ ಮುಖವನ್ನು ತೊಳೆಯುವುದು, ಬಾಯಿ ಮುಕ್ಕಳಿಸುವುದು, ಮೂಗಿಗೆ ನೀರು ಎಳೆಯುವುದು ಮತ್ತು ಕೈ-ಕಾಲುಗಳನ್ನು ತೊಳೆಯುವುದನ್ನು ಎರಡು ಬಾರಿ ಅಥವಾ ಮೂರು ಬಾರಿ ಪುನರಾವರ್ತಿಸುವುದು ಸುನ್ನತ್ ಆಗಿದೆ. ಇದು ಶ್ರೇಷ್ಠ ವಿಧಾನವಾಗಿದೆ.

ವುದೂ ಮುಗಿದ ನಂತರ ಹೀಗೆ ಹೇಳುವುದು ಅಪೇಕ್ಷಿತವಾಗಿದೆ:

ಅಲ್ಲಾಹನ ಹೊರತು ಆರಾಧನೆಗೆ ಅರ್ಹರಾದ ಬೇರೆ ಆರಾಧ್ಯರಿಲ್ಲ, ಅವನು ಏಕೈಕನು ಮತ್ತು ಸಹಭಾಗಿಗಳಿಲ್ಲದವನೆಂದು ನಾನು ಸಾಕ್ಷ್ಯ ವಹಿಸುತ್ತೇನೆ ಹಾಗೂ ಮುಹಮ್ಮದ್ ಅವನ ದಾಸರು ಮತ್ತು ಸಂದೇಶವಾಹಕರೆಂದು ನಾನು ಸಾಕ್ಷ್ಯ ವಹಿಸುತ್ತೇನೆ.

ಅಶ್‌ಹದು ಅನ್ ಲಾ ಇಲಾಹ ಇಲ್ಲಲ್ಲಾಹು ವಹ್ದಹೂ ಲಾ ಶರೀಕ ಲಹು, ವ ಅಶ್‌ಹದು ಅನ್ನ ಮುಹಮ್ಮದನ್ ಅಬ್ದುಹೂ ವರಸೂಲುಹು

ಇದನ್ನು ಕೂಡ ಸೇರಿಸುವುದು ಉತ್ತಮವಾಗಿದೆ:

ಓ ಅಲ್ಲಾಹ್, ನನ್ನನ್ನು ಪಶ್ಚಾತ್ತಾಪ ಪಡುವವರಲ್ಲಿ ಸೇರಿಸು ಮತ್ತು ನನ್ನನ್ನು ಪರಿಶುದ್ಧರಾಗುವವರಲ್ಲಿ ಸೇರಿಸು.

ಅಲ್ಲಾಹುಮ್ಮ ಜ್ಅಲ್‌ನೀ ಮಿನತ್ತವ್ವಾಬೀನ, ವಜ್ಅಲ್‌ನೀ ಮಿನಲ್ ಮತತಹ್ಹಿರೀನ್

ಕೋಡ್ ಅನ್ನು ಸ್ಕ್ಯಾನ್ ಮಾಡಿ

ಮಸ್ಜಿದುಲ್ ಹರಾಮ್ ಮತ್ತು ಮಸ್ಜಿದುನ್ನಬವಿಯ ಧಾರ್ಮಿಕ ವ್ಯವಹಾರಗಳ ಅಧ್ಯಕ್ಷತೆ

ಎರಡು ಹರಮ್‌ಗಳ ಸಂದೇಶ

ಮಸ್ಜಿದುಲ್ ಹರಾಮ್ ಮತ್ತು ಮಸ್ಜಿದುನ್ನಬವಿಗೆ ಆಗಮಿಸುವವರಿಗಾಗಿ ವಿವಿಧ ಭಾಷೆಗಳಲ್ಲಿ ಧಾರ್ಮಿಕ ಮಾರ್ಗದರ್ಶಿ ವಿಷಯಗಳು