صفة الوضوء (شرح عملي ومختصر)

වුළූඃ කිරීමේ ප්‍රායෝගික සහ කෙටි ක්‍රමය

වුළූඃ ධෝවන ක්‍රමය පිළිබඳ සරල වීඩියෝවක්

වුළූඃ ධෝවනය සිදු කරන ආකාරය පියවරෙන් පියවර පැහැදිලි කරන ප්‍රායෝගික ක්‍රියාවලියකි මෙය. සලාතය වලංගු වීමට වුළූඃ කිරීම කොන්දේසියක් වන බැවින් මෙය අතිශයින් වැදගත් ය.

වීඩියෝව නරඹා වුළූඃ කරන නිවැරදි ආකාරය ඉගෙන ගන්න.

වුළූඃ ධෝවනයෙහි ක්‍රමය

පිරිසිදුකමින් තොර ව සලාතය පිළිගනු නොලැබේ.

බිස්මිල්ලාහ් (අල්ලාහ්ගේ නාමයෙන් ආරම්භ කරමි)

බිස්මිල්ලාහ්

වුළූඃ ධෝවනය ආරම්භයේ දී තස්මියා (බිස්මිල්ලාහ් යැයි) පැවසීම ආගමානුකූල නියමයකි. එහෙයින් අපි එමගින් අපගේ වුළූඃ ධෝවනය ආරම්භ කරමු.

දෙඅත් මැණික් කටුව තෙක් සෝදමු.

ඉන්පසු මුඛය හා නාස් පුඩු පිරිසිදු කිරීම.

මුඛය පිරිසිදු කිරීම යනු ජලය මුඛය තුළට ගෙන, ඇතුළත කැලැත්තීම යි.

නාස් පුඩු පිරිසිදු කිරීම යනු හුස්ම මඟින් ජලය නාස් පුඩු තුළට ඇද ගැනීම යි.

ඉන්පසු එම වතුර නාස් පුඩුවලින් හූරා එය බැහැර කිරීම.

උපවාසයේ නිරත ව සිටින අයෙකු හෝ යම් හානියකට බිය වන්නෙකු හැර, අනෙකුත් අය කට කලත්වා සේදීම ද, නාස් පුඩු පිරිසිදු කිරීම ද මැනවින් ඉටු කිරීම ප්‍රශංසනීය වේ.

මුහුණ ජලයෙන් සේදීම.

මුහුණේ සීමාව

දිගින්: සාමාන්‍යයෙන් හිසකෙස් වැවෙන ස්ථානයේ සිට, නිකට අවසානය දක්වා.

පළලින්: එක් කනක සිට අනෙක් කන දක්වා.

මුහුණ සෝදන විට, ඇහිබැමි වැනි මුහුණෙහි ඇති සියලු ම රෝම සේදීම අනිවාර්ය වේ.

යටි රැවුල තුනී ව වැවී ඇත්නම්, ඒ යට ඇති සම සේදීම අනිවාර්ය වේ.

එහෙත් එය ඝන රැවුලක් නම් එහි මතුපිට සේදිය යුතු යි.

ජලයෙන් පමණක් රැවුල් අතර සේදීම සුන්නතයකි (දේව දූත සම්ප්‍රදායකි).

මුහුණ සේදීමෙන් පසු ව, දකුණතින් ආරම්භ කරමින් අත් දෙක සේදීම.

ඇඟිලි තුඩුවල සිට වැළමිට තෙක්, වැළමිට දෙක ඇතුළු ව දෑත් සේදීම.

ඉන්පසු, ජලයෙන් හිස පිරිමැදීම.

නව ජලයෙන් අත් දෙක තෙමා ගැනීම.

පසු ව තෙත්වූ අත්ල දෙක හිසෙහි ඉදිරිපස තබා ඒ දෙක හිසෙහි පිටුපස දක්වා පිරිමදිමින් ගෙන යෑම.

පසු ව අප ආරම්භ කළ ස්ථානයට ම ඒ දෙක නැවත ගෙන ඒම.

හිස පිරිමැද ඉතිරි වූ ජලයෙන් කන් දෙක පිරිමදිමු.

මෙය එක් වරක් සිදු කරමු.

කන් දෙක පිරිමැදීමේ ක්‍රමය

දෙඅත් දබරැගිලි කන් විවර ඇතුළතෙහි ඇතුළු කොට ඒවා පිරිමදිමින්, මහපටැඟිලි ආධාරයෙන් දෙකන් මතුපිට පිරිමැදීම.

එවිට දෙකන් පිටතින් මෙන් ම ඇතුළතින් ද පිරිමැද අවසන් වේ.

පසු ව දෙපා සේදීමට යොමු වෙමු.

දෙපා සේදීමේ අනිවාර්ය සීමාව:

පාදයේ ඇඟිලි තුඩුවල සිට වළලුකර තෙක්.

දකුණු පාදයෙන් ආරම්භ කරමු. දෙපා ඇඟිලි අතර සෝදමු. විළුඹ දෙක සේදීම ගැන සැලකිලිමත් විය යුතු යි.

පසු ව දකුණු පාදය සේදුවාක් මෙන් වම් පාදය ද සෝදමු.

වුළූඃ ධෝවන අවයව අතර පිළිවෙළ රැකීම අනිවාර්ය වේ. එනම්, එක් අවයවයක් අනෙකට පෙර නොසේදීම යි.

එමෙන් ම ඒ අතර අඛණ්ඩතාවය රැකීම ද අනිවාර්ය වේ. ඒ අනුව එක් අවයවයකින් ඊළඟ අවයවයට මාරුවන විට දීර්ඝ වේලාවක් ප්‍රමාද නොවිය යුතු යි.

වුළූඃ ධෝවනයෙහි සියලු ම අවයව එක් වරක් සේදීම ප්‍රමාණවත් වේ. එහෙත්, මුහුණ, කට හා නාසය පිරිසිදු කිරීම, දෙඅත් හා දෙපා යනාදි අවයව දෙවරක් හෝ තුන් වරක් සේදීම සුන්නාහ්වකි. එය ඉතා උතුම් ය.

වුළූඃ කිරීමෙන් පසු මෙසේ පැවසීම මහඟු කර්තව්‍යයකි:

අදහස: අල්ලාහ් හැර සත්‍යවශයෙන් නැමදුම් ලැබීමට සුදුසු වෙනත් දෙවියෙකු නැති බවටත්; උතුමාණන් ඒකීයවන්තයා බවටත්; උතුමාණන්ට සම කළ හැකි කිසිදු හවුල්කරුවෙකු නැති බවටත් මම සාක්ෂි දරමි. එසේ ම, මුහම්මද් සල්ලල්ලාහු අලයිහි වසල්ලම් තුමා සැබැවින් ම උතුමාණන්ගේ ගැත්තා බවටත් උතුමාණන්ගේ ධර්ම දූතයාණන් බවටත් මම සාක්ෂි දරමි.

අෂ්හදු අන් ලා ඉලාහ ඉල්ලාල්ලාහ් වහ්දහූ ලා ෂරීක ලහූ, වඅෂ්හදු අන්න මුහම්මදන් අබ්දුහු වරසූලුහු.

එයට අමතර ව මෙසේ පැවසීම ද යහපත් ය:

අදහස: යා අල්ලාහ්, පාපක්ෂමාවේ නිරතවන්නන් අතරට මා පත් කරනු මැනව! එමෙන් ම පවිත්‍ර ව සිටින්නන් අතරට ද මා පත් කරනු මැනව!

අල්ලාහුම්ම-ජ්අල්නී මිනත් තව්වාබීන, වජ්අල්නී මිනල් මුතතහ්හිරීන.

QR කේතය ස්කෑන් කරන්න.

මස්ජිදුල් හරාම් සහ මස්ජිදුන් නබවි හි ආගමික කටයුතු පිළිබඳ මූලස්ථානය

මක්කා හා මදීනාවේ සන්දේශය

මස්ජිදුල් හරාම් සහ මස්ජිදුන් නබවි වෙත පැමිණෙන දැහැමියන් සඳහා විවිධ භාෂාවලින් සමන්විත ධර්මානුකූල මාර්ගෝපදේශ අන්තර්ගතය.