الإسلام دين رب العالمين

Waxaan ku bilaabayaa Magaca Allaah Ee Naxariista Naxariis guud oo cid walba ugu naxariista midda gaarka ahna ugu naxariista Mu'miniinta.

Islaamku waa Diinta Rabbiga Caalamka

Yaa Rabi kuu ah?

Taasi waa su`aasha ugu weyn uunka, waana su`aasha ugu muhiimsan ee waajibka ku ah Aadamuhu inuu jawaabteeda garto.

Rabbigayo waa kan abuuray samooyinka iyo dhulka, oo samada ka soo dajiyey biyaha kuna soo saaray miraha iyo dhirta inoo ah cunto, Xayawaankuna uu quuto. Rabigeen waa kan ina abuuray oo abuuray aabayaasheen, oo wax walba abuuray, oo ahaysiiyey habeenkii iyo maalintii, waana kan ka dhigay habeenkii waqti hurdo iyo raaxo, maalintii waqti quud iyo macaash la raadiyo Rabigeen waa kan inoo sakhiray Qoraxda, Dayaxa, Xidigaha, Baddaha, oo inoo sakhiray Xayawaanka aynu cunayno oo aynu ka faa`iiday sanayno caanaheeda iyo dhogorteeda.

Waa maxay sifoofinka iyo tilmaamaha Rabbil caamalamiinku.

Rabbi waa kan abuuray khalqiga, kuna hanuuninyey xaqa, Rabbi waa kan kala maamulaya arimaha khalqiga oo dhan, Isagaana arsaaqa, waana kan hantiyey oo leh wax walba oo dunida jooga iyo wixii aakhiro jiraba, wax walbana Illaahay mulkigiisa ayey ku jiraan wixii Isaga ka soo harayna Illaahay ayaa is ka leh. Rabbi waa nool yahay mana dhimanaayo mana seexanaayo, Illaahay waa qayuum oo amarkiisa ay ku istaageen wax walba oo nool, oo naxariistiisu wax walba gaartay, Rabi waa kan waxna uusan kaga qarsooneyn dhulka iyo samada. Rabbi wax u eg ma jiro waana maqal badane Arag badane ah, waxuuna ka sarreeyaa samooyinkiisa khalqigiisana wuu ka deeqtoon yahay, khalqigu Isagay u baahan yihiin, uma dhigmo oo la mid ma aha kuwuu abuurey, umana bannaana in wax khalqigiisa ah lagu tilmaamo oo la garab dhigo Isagaa xumaan ka hufan oo sareeya. Rabbi Isagaa abuuray caalamkan aynu u jeedno ee nidaamkiisa isu dheelitiran yahay ee aan is ka hor imaatin laheyn, ha ahaado nidaamka jirka iinsaanka iyo xayawaanka, ama nidaamka koonkaan inagu wareegsan ee qoraxdiisa iyo xidigihiisa iyo waxyaabaha kal ee uu ka kooban yahay leh.

Wax walba oo Ilaahay sokadii la caabudo naftiisa uma heli karo wax tar inuu u keeno ama dhib uu ka celiyo, sidee ayuu ugu helayaa qofka caabudaya inuu wax tar u keeno ama dhib uga celin karaa.

Muxuu yahay xaqa Rabigeen inagu leeyahay?

Rabbi xaqa uu ku leeyahay dadka oo dhan waa iney kaligi caabudaan oo aaney cidna ugu shariig yeelin, waa ineysan Rabi sokadi cidna caabudin ama la caabudin Bashar, Xajar, Wabi, Jamaad, Xidig iyo wax kale midna, balse cibaadada waxay u khaalis yeelayaan Rabiga Caalamka.

Muxuu yahay Xaqa dadku ku leeyihiin Rabigood?

Dadku xaqa ay ku leeyihiin Ilaahay haddii ay caabudaan waa inuu siiyo nolol fiican oo ay ka helayaan, amaan, nabad, daganaansho iyo raalli ahaansho, daarta Aakhirona waa inuu geliyo Janno laga helaayo nicmo joogto ah oo waligeed lagu waarayo, haddii ay ku caasiyaan oo amarkiisa diidaana wuxuu ka dhigayaa noloshooda mid dhibaato iyo baas leh iyagu haba u maleeyeen iney sacaado iyo raaxo ku jiraane, Aakhirona wuxuu gelindoonaa naar aysan ka bixidoonin oo lagu ciqaabidoono waligoodna ku waarayaan.

Muxuu yahay ujeedada aynu u joogno? maxaase la inoo abuuray?

Rabbiga Kariimka ahi wuxuu inoo sheegay inuu inoo abuuray ujeeddo sharaf leh, taasoo ah inaan Isaga kaligii caabudno, oo aynaan cidna ugu shariig yeelin, wuxuuna ina amray inaan dhulka ku qurxino oo ku dhisno kheyr iyo wanaag, qofkii caabuda cidaan ahayn Rabigiisii abuuray ma uusan ogaan ujeedadii loo abuuray, mana uusan fulin waajibkiisii Ilaahii abuuray uu saaray, qofka dhulka fasahaadiyana ma uusan garan shaqada Alle u diray.

Sideen u caabudnaa Rabbigeen?

Rabbigeen Jalla Jalaaluhu nooma abuurin in la iska keen daayo oo aan waxba nalaku falin, kamana uu dhigin nolosheena mid ciyaar ah, balse dadka wuxuu ka doortay Rusuul loo diray dadkey la noolayeen oo kamid ahayen, waana kuwa dadka ugu akhlaaq fiican, naf ahaanna ugu qiimo badan, uguna qalbi fiican, Ilaahay wuxuu ku soo dajiyey Risaalooyinkiisii, oo xambaarsan wax walba oo ay waajib tahay iney dadku ka ogaadaan Rabbi Jalla Jalaaluhu, iyo in dadka la soo saaridoono maalinta qiyaame waana maalinta xisaabinta iyo abaal marinta. Rusushu wey gaarsiiyeen qolooyinkoodii siday Rabbigood u caabudi lahaayeen, weyna u cadeeyeen qaabkii ay u cibaaday sanayaan iyo waqtiga ay cibaadaysanba iyo ajarka laga helaayo aduunka iyo aakhiroba, waxey uga digeen dadka wixii uu ka xarrimay Rabbigood ee cunno, cabitaan, iyo guur ah, waxeyna ku guubaabiyeen akhlaaqda wanaagsan, waxeyna ka reebeen oo uga digeen akhlaaqda xun.

Maxay tahay Diinta Rabbi Jalla Jalaaluhu uu aqbalaayo?

Diinta Ilaahay aqbalaayo waa Islaamka, waana Diinta Ambiyada oo dhan ay dadka soo gaarsiiyeen, Ilaahay ma aqbalaayo Diin aan Islaamka aheyn maalinta qiyaame, Diin walba oo dadku rumeeyaan oon Islaamka aheyn waa Diin baadila, mana anfacayso qofkii rumeeya, balse dhib ayey u keenaysaa aduunka iyo aakhiroba.

Waa maxay Diinta (Islaamka) asalkeeda iyo arkaanteedu?

Diintan Ilaahay ayaa addoomadiisa u fududeeyey, arkaantiisa kan ugu weyn waa inaad Ilaahay u rumayso Rabi iyo Ilaah inuu yahay, oo aad rumayso Malaa`igtiisa, Kutubtiisa, Rusushiisa, Maalinta Qiyaame iyo Qadarka, waxaad qiraysaa in uusan jirin Ilaah xaq lagu caabudo Ilaahay mooyee, Maxamadna yahaya Rasuulkii Ilaahay, oo aad salaada oogtid, oo sakada bixisid hadii aad leedahay xoolo sakadu ku waajibtay, oo aad soonto Ramadaanka oo ah hal bil sanadkii, oo aad Ilaahay darti u soo xajido Baytul Catiiqa haddaad awoodid, kaasoo Nabi Ibraahim ku dhisay amarkii Rabigi. oo aad ka fogaatid wixii Ilaahay kaa xarrimay sida shirkiga, dilka nafta, sinada iyo cunidda xoolaha xaaraanta ah, haddii aad Ilaahay rumayso oo cibaadaadkaas samayso oo aad ka fogaato wax yaabahaas lagaa xarimay aduunka Muslim ayaad tahay, Maalinta Qiyaamena Ilaahay wuxuu ku siinayaa nicmo joogto ah iyo inaad Janada ku waarto.

Islaamku ma Diin qolo ama jinsiyad gaara leedahay baa?

Islaamku waa Diinta Ilaahay uu u soo dajiyey dadka oo dhan, qof qof kale ka xigaa ma jiro, in taqwada iyo camalka saalixa ah lagu dheereyo mooyee, dadkuna Diinta waa u siman yihiin.

Sidee dadku ku garanayaan in Rusushu run sheegayaan scw?

Dadku waxay ku garanayaan in Rusushu run sheegayaan dhowr dariiqo oo ay ka mid tahay:

Xaqa iyo hanuunka ay la yimaadeen waa mid ay aqbalayaan Caqliga iyo fitrada saliimka ahi, oo caqligu ka markhaati kacayo wanaagiisa, waxa ay la yimaadeena cidaan Rusul aheyn lama timaado.

Rusushu waxay la yimaadeen waa wax hagaajinaya dadka diintooda iyo aduunyadooda, oo arimahoodu ku toosayaan oo xadaaradooda ay dhisayaan, oo ay ku xafidayaan Diintooda, Caqligooda, Maalkooda iyo Cirdigooda.

Rusushu csw dadka ma waydiistaan ajar iney tusaan dadka oo ku hanuuniyaan kheryka, balse Ilaahay ayey ka sugayaan ajarkooda.

Rusushu waxa ay la yimaadeen waa xaq iyo yaqiin aan shaki ku jirin oo aan is burinayn oo aan isbedelayn, Nabi walba wuxuu rumaynayaa Rusushii ka horeysay wixii ay dadka ugu yeeri jireen ayuu isna ugu yeerayaa.

Ilaahay wuxuu ku ayiday Rususha csw Aayado cad cad iyo mucjisooyin xoog badan taaso Ilaahay ku muujinaayo gacmahooda, si ay markhaati ugu noqoto iney run tahay in xaga Ilaahay laga soo diray, mucjisooyinka Rususha la siiyeyna waxaa ugu weyn mucjisada Rasuulka ugu dambeyey ee Maxamad ah scw la siiyey taasoo ah Quraanka Kariimka ah.

Muxuu yahay Qur'aanka kariimka ahi?

Quraanka Kariimka ahi waa Kitaabka Rabiga Caalamka, waana hadalkii Ilaahay oo Malakul Jibriil cs ku soo dajiyey Rasuulka Maxamada scw waxaana ku yaal wax walba oo Ilaahay ku waajibiyey dadku iney ka ogaadaan Ilaahay, Malaa`igtiisa, Kutubtiisa, Rusushiisa, Maalinta Aakhiro iyo Qadarka Khayrkiisa iyo Shartiisaba. Kitaabka waxaa ku yaal Cibaadaadka waajibka ah, iyo wixii la xarimay ee ay waajibka tahay in laga digtoonaado, iyo akhlaaqda fiican iyo tan xunba, iyo wax walba oo la xiriira dadka arimahooda Diiniga ah, aduunyadooda iyo akhiradooda, waana Kitaab mucjiso ah, Ilaahay dadka wuxuu ka dalbay si taxadi ah iney isagoo kale la yimaadaan, Kitaabka waxaa lagu xifdiyey luuqadii uu ku soo dagay ilaa Qiyaamaha kama naaqusin hal xaraf, lagama badalin hal kalimad.

Maxaa u daliil ah in la isa soo saarayo iyo xisaabinta?

Miyaadan arag dhulka oo dhintay oo aysan nololi ka jirin haddii Roob ku da`o inuu dhaqaaqo oo soo saaro midho quruxsan, Illaahii dhulkaa nooleeyey wuu awoodaa inuu soo nooleeyo dad dhintay. Ilaahii ka abuuray iinsaanka dhibic biyo ah oo liidata wuu awoodaa inuu soo saaro maalinta qiyaame oo uu xisaabiyo oo uu ku abaal mariyo abaal marin waafi ah haduu kheyr falay kheyr ayuu heli hadii uu shar falayna shar ayuu heli. Ilaahii abuuray samooyinka iyo dhulka iyo xidigaha wuu awoodaa inuu soo celiyo abuurida iinsaanka, waayo in la soo celiyo abuurida iinsaanka mar labaad ayaa ka sahlan in la abuuro samooyinka iyo dhulka.

Muxuu ahaandoona Maalinta Qiyaame?

Rabbi Jalla Jalaaluhu wuxuu ka soo saaridoonaa dadka qubuurtooda, ka dibna camalkoodii ayaa la xisaabin, qofkii rumeeyey oo raacay Rususha Ilaahay Janaduu galin, taasoo nicmadeedu joogto tahay oo weynideeda aysan ku soo dhaceyn qof iinsaana qalbigii, qofkii Ilaahay ku kufriyana wuxuu gelin naarta taasoo cadaabkeedu joogto tahay oo uusan suuraysan karin qof iinsaan ahi, hadii qofku uu galo Janada ama naarta waligi ma dhimanaayo ee wuu waarayaa wuxuuna ku waarayaa Jano ama Naar.

Haddii uu damco iinsaanku inuu soo galo Islaamka muxuu samaynayaa, mase waxaa jira wax Duquus ah oo ay waajib tahay in la sameeyo, ama shakhsiyaat gaara oo u soo idmaaya?

markuu iinsaanku ogaado in Diinta Islaamku xaq tahay, oo ay tahay Diintii Rabbiga Caalamka, waxaa laga rabaa inuu u degdego soo galida Islaamka, waayo qofka caaqilka ah haduu ogaado xaqa, waxaa laga rabaa inuu u degdego xaqa, oo uusan arinkaa dib u dhigin. Qofkii damca inuu Islaamka soo galo loogama baahno inuu Duquus gaara sameeyo, waajibna kuma aha in qof gaara oo khalqiga ka mid ahi joogo, laakiin haddii meeshaa uu joogo qof muslim ah ama meeshu tahay goob diineed oo Islaami ah waa kheyr kheyr lagu daray, haddii kale waxaa ku filan inuu yiraahdo: (Ashhadu an laa Ilaaha ilaa Allaah wa Ashhadu ana Maxamad Rasuulu Allaah), isagoo og macnaheeda oo rumaysan, sidaasuuna Muslim ku noqon, ka dibna sharciga Islaamka tartiib tartiib ayuu u baran si uu u guto wixii Illaahay ku waajibiyey.

Macluumaad intan ka badan: