N'aha Chineke, Onye ebere n'ụzọ niile, Onye ebere n'ụzọ pụrụ iche. Islam bụ okpukpe nke Onyenwe ụwa niile. Ònye bụ Onyenwe gị? Nke a bụ ajụjụ kachasị ukwuu n'ịdị adị; ọ bụkwa ajụjụ kachasị dị mkpa nke mmadụ kwesịrị ịma azịza ya. Onyenwe anyị, Ọ bụ Ya bụ Onye kere eluigwe na ala, wee zidata mmiri site n'eluigwe, ma were ya mee ka mkpụrụ osisi nakwa osisi si n'ala pụta dị ka ihe oriri maka anyị, na maka anụmanụ ndị anyị na-eri. Ọ bụ Ya kere anyị ma kee ndị nna anyị, keekwa ihe niile. Ọ bụ Ya mere abalị nakwa ehihie, Ọ bụkwa Ya mere abalị ka ọ bụrụ oge maka ihi ụra na izu ike, nakwa ehihie ka ọ…
N'aha Chineke, Onye ebere n'ụzọ niile, Onye ebere n'ụzọ pụrụ iche.
Islam bụ okpukpe nke Onyenwe ụwa niile.
Ònye bụ Onyenwe gị?
Nke a bụ ajụjụ kachasị ukwuu n'ịdị adị; ọ bụkwa ajụjụ kachasị dị mkpa nke mmadụ kwesịrị ịma azịza ya.
Onyenwe anyị, Ọ bụ Ya bụ Onye kere eluigwe na ala, wee zidata mmiri site n'eluigwe, ma were ya mee ka mkpụrụ osisi nakwa osisi si n'ala pụta dị ka ihe oriri maka anyị, na maka anụmanụ ndị anyị na-eri.Ọ bụ Ya kere anyị ma kee ndị nna anyị, keekwa ihe niile. Ọ bụ Ya mere abalị nakwa ehihie, Ọ bụkwa Ya mere abalị ka ọ bụrụ oge maka ihi ụra na izu ike, nakwa ehihie ka ọ bụrụ oge maka ịchọ ihe oriri na ihe e ji ebi ndụ.Ọ bụ Ya dobeere anyị anyanwụ, ọnwa, kpakpando, na oke osimiri, ma dobeere anyị ụmụ anụmanụ ndị anyị na-eri, ma na-erita uru na mmiri ara ha na ajị ha.
Gịnị bụ àgwà nke Onyenwe ụwa niile?
Onyenwe anyị bụ Onye kere ihe e kere eke, Ọ bụkwa Ya na-eduzi ha gaa n'eziokwu nakwa n'ụzọ ziri ezi, Ọ bụkwa Ya na-achịkwa ihe omume niile gbasara ihe niile e kere eke. Ọ bụkwa Ya na-enye ha ihe oriri, Ọ bụkwa Ya bụ Onye nwe ihe niile dị na ndụ ụwa a nakwa n'ụwa ọzọ; ihe ọ bụla nọ n'okpuru ọchịchị Ya, ma ihe ọ bụla ọzọ na-abụghị Ya bụ ihe O nwe.Ọ bụ Onye Dị Ndụ Ebighị Ebi, onye na-anaghị anwụ anwụ, anaghịkwa arahụ ụra, Ọ bụkwa Onye Na-akwado Ihe Niile, onye ndụ ihe ọ bụla dị ndụ na-adabere n'iwu Ya, Ọ bụkwa Ya bụ Onye ebere Ya gbara ihe niile gburugburu, Ọ bụkwa Ya bụ Onye ọ dịghị ihe ọ bụla na-ezobeere Ya n'ụwa ma ọ bụ n'eluigwe.Ọ dịghị ihe ọ bụla yiri Ya; Ọ bụkwa Ya bụ Onye na-anụ ihe niile, Onye na-ahụ ihe niile. Ọ nọ n'elu eluigwe Ya, na-enweghị mkpa ihe O kere eke, ma ihe e kere eke nwere mkpa Ya. Ọ naghị abanye n'ime ihe O kere, ọ dịghịkwa ihe ọ bụla sitere n'ihe O kere na-abanye n'ime Onwe Ya (Onye Dị Nsọ, Onye kachasị Elu).Onyenwe anyị bụ Onye kere ụwa a a na-ahụ anya, ya na usoro ya niile ziri ezi nke na-adịghị ada ada, ma ọ bụrụ usoro ahụ mmadụ na nke anụmanụ, ma ọ bụ usoro mbara igwe gbara anyị gburugburu, tinyere anyanwụ ya, kpakpando ya, nakwa ihe ndị ọzọ niile mejupụtara ya.
Ma ihe ọ bụla a na-efe ofufe na-abụghị Ya, o nweghị ike iwetara onwe ya uru ma ọ bụ ọghọm; keduzi otu ọ ga-esi nwee ike iwetara onye na-efe ya ofufe uru, ma ọ bụ chụpụrụ ya ọghọm.
Gịnị bụ ikike Onyenwe anyị nwere n'ebe anyị nọ?
N'ezie, ikike O nwere n'ahụ mmadụ niile bụ ka ha fee naanị Ya ofufe ma ghara ikunye Ya ibe n'ihe ọ bụla. Ya mere, ha agaghị efe mmadụ, okwute, osimiri, ihe na-adịghị ndụ, kpakpando, ma ọ bụ ihe ọ bụla ofufe na-abụghị Ya ma ọ bụ tinyere Ya. Kama, ha ga-eme ka ofufe bụrụ nke e jiri ezi obi (Ikhlas) mee maka naanị Chineke, Onyenwe ụwa niile.
Gịnị bụ ikike ndị mmadụ n'ebe Dinwenu ha nọ?
N'ezie, ihe ruuru ndị mmadụ n'aka Chineke ma ọ bụrụ na ha efee Ya ofufe bụ ka O nye ha ezigbo ndụ nke ha ga-enweta n'ime ya nchekwa, nchedo, udo, obi iru ala, nakwa afọ ojuju, ma n'Ụwa Nke Ọzọ ka O tinye ha n'Aljannah ebe ha ga-enwe aṅụrị na-adịgide adịgide na ịdịgide ebighị ebi. Ma ọ bụrụ na ha nupụrụ Ya isi ma megide iwu Ya, Ọ ga-eme ka ndụ ha bụrụ ahụhụ na mkpagbu, ọbụlagodi ma ha na-eche na ha nọ n'obi ụtọ na ntụsara ahụ; nakwa n'Ụwa Nke Ọzọ, Ọ ga-etinye ha n'Ọkụ Jahannam nke ha na-agaghị apụta na ya, ha ga-enwekwa ntaramahụhụ na-adịgide adịgide, nakwa ịdịgide ebighị ebi n'ime ya.
Gịnị bụ nzube nke ịdị adị anyị? Gịnịkwa kpatara e ji kee anyị?
N'ezie, Onyenwe anyị Dị Ebube gwara anyị na O kere anyị maka ebumnuche dị ùgwù, nke bụ ife naanị Ya ofufe, na ịghara iji ihe ọ bụla mee Ya mmekọ. O nyekwara anyị ibu ọrụ nke ịzụlite ụwa site n'ime ezi ihe na mmezi. Ya mere, onye ọ bụla fere ihe ọzọ ofufe nke na-abụghị Onyenwe ya na Onye Okike ya, onye ahụ amaghị nzube e ji kee ya, o mebeghịkwa ọrụ dịịrị ya n'ebe Onye Okike ya nọ. Ma onye ọ bụla kpatara mbibi n'ụwa, onye ahụ amaghị ọrụ ahụ e nyere ya.
Kedu ka anyị ga-esi fee Onyenwe anyị ofufe?.
N'ezie, Onyenwe anyị, Onye Dị Ebube, ekeghị anyị ma hapụ anyị n'efu, O mekwaghị ka ndụ anyị bụrụ ihe efu, kama O sitere n'ime ụmụ mmadụ họrọ ndị ozi zigara ndị obodo ha. Ha bụ ndị kachasị mma n'omume ha, ndị mkpụrụ obi ha kachasị dị ọcha, nakwa ndị obi ha kachasị dị nsọ. O wee wedata ozi Ya nye ha, ma tinye n'ime ha ihe niile ụmụ mmadụ kwesịrị ịma banyere Onyenwe anyị, Onye Dị Ebube, nakwa banyere ịkpọlite ụmụ mmadụ n'ọnwụ maka Ụbọchị Mbilite n'Ọnwụ, nke bụ ụbọchị ịza ajụjụ nakwa nkwụghachi ụgwọ.Ndị ozi kọọrọ ndị ha otu ha ga-esi fee Onyenwe ha ofufe, ma kọwaara ha usoro ofufe, oge ha, nakwa ụgwọ ọrụ ha n'ụwa na n'ụwa ọzọ. Ha dọrọ ha aka ná ntị megide ihe Onyenwe ha machibidoro ha n'ihe oriri, ihe ọṅụṅụ, nakwa alụmdi na nwunye, ma duzie ha n'àgwà ọma, ma machibido ha àgwà ọjọọ.
Gịnị bụ okpukpe a na-anabata n'aka Onye Nwe, Onye ebube Ya dị ukwuu?.
Okpukpe a na-anabata n'ihu Chineke bụ Islam, ọ bụkwa okpukpe nke ndị amụma niile kwusara. Chineke agaghị anabata okpukpe ọ bụla ọzọ n'Ụbọchị Ikpe ma e wezụga ya. Okpukpe ọ bụla ndị mmadụ nabatara ma e wezụga Islam bụ okpukpe ụgha, ọ gaghị abara onye na-eso ya uru, kama ọ ga-abụrụ ya ahụhụ n'ụwa a nakwa n'ụwa ọzọ.
Gịnị bụ ntọala okpukpe a (Islam) na ogidi ya?
Chineke emewo ka okpukpe a dịrị ndị ohu Ya mfe, ya mere ogidi ya kachasị ukwuu bụ ka i kwere na Chineke dịka Onye-nwe nakwa Chi, nakwa ikwere na ndị mmụọ ozi Ya, akwụkwọ Ya, ndị ozi Ya, Ụbọchị Ikpeazụ, nakwa akara aka; wee gbaa àmà na ọ dịghị chi kwesịrị ofufe n'eziokwu ma e wezụga Chineke, nakwa na Muhammad bụ Onye Ozi Chineke. Ị na-ekpe ekpere, na-enye Zakat ma ọ bụrụ na i nwere akụ na ụba nke inye Zakat bụ iwu na ya, na-ebu ọnụ nke Ramadan—nke bụ otu ọnwa n'afọ—nakwa ịga njem Hajj maka Chineke n'Ụlọ Nsọ ochie ahụ nke Ibrahim (udo dịrị ya) rụrụ site n'iwu Onye-nwe ya, ma ọ bụrụ na i nwere ike ịchọta ụzọ ije ya.Nakwa ka i zere ihe Chineke machibidoro gị n'iwu, nke gụnyere Shirk (isonyere Ya ihe ọzọ n'ofufe), igbu mmadụ, ịkwa iko, na iri akụ Haram. Ọ bụrụ na i kwere na Chineke, rụọ ọrụ ofufe ndị a, ma zere ihe ndị a amachibidoro iwu, ị bụ onye Alakụba n'ụwa a, ma n'Ụbọchị Mbilite n'Ọnwụ, Chineke ga-enye gị obi ụtọ na-adịgide adịgide nakwa ndụ ebighị ebi n'ime Aljannah.
Islam ọ̀ bụ okpukpe dịịrị otu ndị ma ọ bụ otu agbụrụ?.
Islam bụ okpukpe Chineke maka mmadụ niile. Ọ dịghị onye na-aka ibe ya mma n'ime ya ma e wezụga site n'ịtụ egwu Chineke na ezi ọrụ; ndị mmadụ niile hara nhata n'ime ya.
Kedu ka ndị mmadụ ga-esi amata eziokwu nke ndị ozi, udo na ngọzi dịrị ha?
Ndị mmadụ na-amata eziokwu nke ndị ozi n'ụzọ dị iche iche, ụfọdụ n'ime ha bụ:
Na ihe ha na-eweta nke bụ eziokwu na nduzi bụ ihe ezi uche na ọdịdị mmadụ ziri ezi na-anakwere, uche na-agbakwa akaebe maka ịdị mma ya, ọ nweghịkwa onye na-abụghị Ndị Ozi na-eweta ụdị ihe ahụ ha wetaara.
Na ihe ndị ozi wetara nwere n'ime ya ọdịmma maka okpukpe ndị mmadụ na ụwa ha, izi ezi nke ihe omume ha na iwulite mmepe ha, nakwa ichekwa okpukpe ha, uche ha, akụ na ụba ha, na ùgwù ha.
Na ndị ozi, udo dịrị ha, anaghị achọ ụgwọ ọrụ n'aka ndị mmadụ maka iduzi ha gaa n'ịdị mma na ezi nduzi, kama ha na-atụ anya ụgwọ ọrụ ha n'aka Dinwenu ha.
Na ihe ndị ozi wetara bụ eziokwu na ihe doro anya nke obi abụọ na-adịghị na ya, nke na-adịghị emegide onwe ya ma ọ bụ nwee mgbagwoju anya, nakwa na onye amụma ọ bụla na-akweta n'eziokwu ndị amụma bu ya ụzọ, ma na-akpọkwa òkù gaa n'ụdị ihe ahụ ha kpọrọ òkù gaa na ya.
N'ezie, Chineke na-akwado ndị ozi (ka udo dịrị ha) site na ihe ịrịba ama doro anya nakwa ihe ebube dị ike nke Chineke na-eme site n'aka ha; iji bụrụ ihe akaebe nke eziokwu na ha bụ ndị ozi sitere na Chineke. Ma ihe ebube kachasị ukwuu nke ndị amụma bụ ihe ebube nke Onye Ozi ikpeazụ, bụ Muhammad (ka udo na ngọzi Chineke dịrị ya), nke bụ Qur'an Dị Ebube.
Gịnị bụ Qur'an Dị Ebube?
Qur'an Dị Ebube bụ Akwụkwọ Onye Nwe Ụwa Niile, ọ bụkwa okwu Chineke nke Mmụọ ozi Jibril (udo dịrị ya) wedataara Onye Ozi Muhammad ﷺ. O nwere n'ime ya ihe niile Chineke nyere ụmụ mmadụ n'iwu ịmata gbasara Chineke, ndị mmụọ ozi Ya, akwụkwọ Ya, ndị ozi Ya, Ụbọchị Ikpeazụ, nakwa akara aka, ma nke ọma ya ma nke ọjọọ ya.O nwere n'ime ya ofufe ndị bụ iwu, na mmachibido iwu ndị e kwesịrị ịkpachara anya maka ha, ezi àgwà nakwa àgwà ọjọọ, na ihe niile metụtara ihe omume okpukpe ụmụ mmadụ, ndụ ụwa ha, nakwa Ụwa Nke Ọzọ ha. Ọ bụ akwụkwọ na-arụ ọrụ ebube nke Chineke mara mmadụ aka ka ha weta ihe yiri ya. Echekwara ya ruo Ụbọchị Mbilite n'Ọnwụ n'asụsụ e jiri kpughee ya; o nweghị otu mkpụrụedemede furu efu na ya, a gbanweghịkwa otu mkpụrụ okwu n'ime ya.
Gịnị bụ ihe akaebe maka mbilite n'ọnwụ na ịza ajụjụ?
Ị naghị ahụ ala ka ọ nwụrụ anwụ, nke na-enweghị ndụ dị n'ime ya, ma mgbe mmiri zoro n'elu ya, ọ ga-ama jijiji wee wepụta ụdị ihe ọkụkụ ọ bụla mara mma. N'ezie, Onye ahụ mere ka ọ dịghachi ndụ nwere ike ịkpọlite ndị nwụrụ anwụ n'ọnwụ.N'ezie, Onye kere mmadụ site na ntapụ mmiri a na-elelị, nwere ike ịkpọlite ya n'Ụbọchị Mbilite n'Ọnwụ, wee mee ka o zaa ajụjụ nakwa ịkwụ ya ụgwọ ọrụ zuru ezu; ọ bụrụ na ọ bụ ezi ihe, ọ ga-abụ ezi ihe, ma ọ bụrụkwa na ọ bụ ajọ ihe, ọ ga-abụ ajọ ihe.N'ezie, Onye kere eluigwe na ụwa nakwa kpakpando nwere ike imeghachi okike mmadụ; n'ihi na imeghachi okike mmadụ nke ugboro abụọ dị mfe karịa okike eluigwe na ụwa.
Gịnị bụ Ụbọchị Mbilite n'Ọnwụ?
Onyenwe anyị, Onye Dị Ukwuu ma Dị Ebube, ga-akpọlite ihe ndị O kere eke n'ili ha, ma emesịa Ọ boo ha ikpe maka omume ha. Ya mere, onye ọ bụla kwere ma kweta n'eziokwu ndị ozi, Ọ ga-etinye ya n'Aljannah, ebe obi ụtọ ebighị ebi dị, nke mmadụ na-enweghị ike ichetụ n'echiche n'ihi ịdị ukwuu ya. Ma onye ọ bụla jụrụ ikwere, Ọ ga-etinye ya n'Ọkụ Jahannam, ebe ahụhụ ebighi ebi na-adịgide adịgide dị, nke mmadụ na-enweghị ike ịghọta. Ma ọ bụrụ na mmadụ banye n'Aljannah ma ọ bụ n'Ọkụ Jahannam, ọ gaghị anwụ ma ọlị, kama ọ ga-adịgide ebighị ebi n'ime obi ụtọ ma ọ bụ n'ime ahụhụ ahụ.
Ọ bụrụ na mmadụ chọrọ ịbanye n'okpukpe Islam, gịnị ka ọ ga-eme, è nwere emume ndị ọ bụ iwu ka ọ mee, ma ọ bụ ndị mmadụ ga-enyerịrị ya ikike?
Ọ bụrụ na mmadụ amara na ezi okpukpe bụ Islam, nakwa na ọ bụ okpukpe nke Onyenwe ụwa niile, ọ ga-eme ngwa ngwa ịbanye n'ime Islam; n'ihi na onye nwere ezi uche, ọ bụrụ na eziokwu doro ya anya, ọ ga-eme ngwa ngwa ịnabata ya, ma ghara igbu oge n'ihe a.Onye ọ bụla chọrọ ịbanye n'okpukpe Islam, ọ bụghị iwu na ọ ga-eme emume ọ bụla pụrụ iche, ọ bụghịkwa iwu na ọ ga-abụ n'ihu onye ọ bụla n'ime ihe a kpọrọ mmadụ, mana ọ bụrụ na nke a emee n'ihu onye Alakụba ma ọ bụ n'ụlọ ọrụ okpukpe Islam, ọ ka mma nke ukwuu. Ma ọ bụghị ya, o zuuru ya ikwu: "A na m agba àmà na ọ dịghị chi kwesịrị ofufe n'eziokwu ma e wezụga Chineke, ma na m agba àmà na Muhammad bụ onye ozi Chineke," ebe ọ maara nke ọma ihe okwu a pụtara ma nwee okwukwe n'ime ya. Site na nke ahụ, ọ ga-aghọ onye Alakụba. Ọ ga-amụtakwa ihe ndị ọzọ dị n'okpukpe Islam nke nta nke nta, ka o wee nwee ike mezuo ihe niile Chineke nyere ya n'iwu.
Islam bụ okpukpe nke ndị ozi Chukwu (udo dịrị ha niile).
85 languages
Islam bụ okpukpe nke ndị ozi Chukwu (udo dịrị ha niile).
Islam bụ inyefe onwe nye Chukwu, Onye kere eluigwe na ala na Onye na-achịkwa ya, na irubere Ya isi n'ịhụnanya na nsọpụrụ. Ntọala Islam bụ inwe okwukwe na Chukwu, na ọ bụ Ya bụ Onye Okike na ihe ọ bụla ọzọ na-abụghị Ya bụ ihe e kere eke, na ọ bụ Ya kwesịrị ofufe naanị Ya, n'enweghị onye òkè. Ọ dịghị onye kwesịrị ofufe n'eziokwu ma e wezụga Ya. Ọ bụ Ya nwe aha kachasị mma na àgwà kachasị elu, na Ọ nwere izu oke kpamkpam n'enweghị ntụpọ ọ bụla. Ọ mụghị nwa, a mụghịkwa Ya, ma ọ dịghị onye ya na Ya ha nhata ma ọ bụ yiri Ya. Ọ naghị ebi n'ime ma ọ bụ were ọdịdị nke ihe ọ bụla n'ime ihe O kere eke.…
Nchịkọta dị nkenke banyere Islam dị ka o si dị na Qur'an Dị Ebube nakwa Sunnah nke Onye Amụma
71 languages
Nchịkọta dị nkenke banyere Islam dị ka o si dị na Qur'an Dị Ebube nakwa Sunnah nke Onye Amụma
Okpukpe Islam Nke a bụ akwụkwọ dị mkpa nke nwere nkọwa nkenke banyere okpukpe Islam, nke na-akọwa ntọala ya ndị kachasị mkpa, ozizi ya, nakwa ịdị mma ya site n'isi mmalite ya mbụ, nke bụ́ Qur'an dị Nsọ nakwa Sunnah nke Onye Amụma. Akwụkwọ a bụ nke e wepụtara maka mmadụ nile ruru ogo ibu ọrụ, ma ndị Alakụba ma ndị na-abụghị ndị Alakụba, n'asụsụ ha dị iche iche, n'oge nile nakwa n'ebe nile, n'agbanyeghị ụdị ọnọdụ ọ bụla. (Nnomi nke nwere n'ime ya ihe akaebe sitere na Qur'an Dị Ebube na Sunnah Onye Amụma). 1- Islam bụ ozi Chineke nye ndị mmadụ niile; ọ bụ ozi Chineke ebighị ebi, bụrụkwa ozi…
Akwụkwọ a na-akọwa isi ụkpụrụ ndị onye Alakụba aghaghị ịmụta: ịmara Allah, ịmara okpukpe Islam, na ịmara Onye Amụma Muhammad ﷺ. Ọ na-akọwakwa mkpa ụkpụrụ ndị a dị n'iwulite okwukwe na ezi omume, dabeere n'ihe akaebe sitere na Qur'an na Hadith.