Muzita raAllah, vane tsitsi, vane ngoni.
Islam chitendero chaTenzi wezvisikwa zvose. Uyu ndiwo mubvunzo mukurusa pakuvapo; uye ndiwo mubvunzo wakakosha zvikuru uyo zvinosungirwa kune munhu kuti azive mhinduro yawo.
Tenzi vedu ndivo vakasika matenga nepasi, uye vanonaisa mvura kubva kudenga, uye kubva mairi akaita kuti michero nemiti ibereke sekudya kwedu, uye kwemhuka dzatinodya. Ndivo vakatisika uye vakasika madzibaba edu, uye vakasika zvinhu zvose, uye ndiye vakasika husiku nemasikati, uye ndivo vakaita kuti husiku huve nguva yekurara nekuzorora, nekuita kuti masikati ive nguva yekutsvaga chokudya neraramo. Ndivo vakatigadzirira zuva, mwedzi, nyeredzi nemakungwa, uye vakatisikira mhuka kuti tidzidye, nekubatsirwa nemukaka wadzo nemvere dzadzo.
Ndeapi mamiriro aTenzi wazvose? Tenzi ndivo vakasika zvisikwa, uye ndivo vanozvitungamira kuchokwadi negwara rakarurama, uye ndivo vanofambisa zvinhu zvezvisikwa zvose, uye ndivo vanozvipa raramo. Uye ndivo Muridzi wezvose zviri muhupenyu hwepasi pano nezviri muhupenyu unotevera, uye chinhu chose chiri muhumambo hwavo, uye zvose zvisiri ivo ndezvavo. Uye ndivo Mupenyu nekusingaperi vasingafi uye vasinga rari, uye ndivo Mutsigiri wezvese, avo kuchengetedzwa kwechipenyu chose kunobva pamurairo wavo. Uye ndivo avo tsitsi dzavo dzinosvika pachinhu chose, uye ndivo avo vasina chinhu chinovanzika kwavari panyika pano kana kudenga. Hapana chakafanana navo, uye ndivo Munzwi wezvese, Muoni wezvese, uye vari pamusoro pematenga avo, vasingatarisire chinhu pazvisikwa zvavo, uye zvisikwa ndizvo zvinotarisira kwavari. Havapindi muzvisikwa zvavo, uye hapana chinhu chezvisikwa zvavo chinopinda mumamiriro avo, ngavarumbidzwe, vekumusoro-soro. Tenzi ndivo vakasika nyika ino inoonekwa nehurongwa hwayo hwose hwakadzikama husingakundikani, hungava hurongwa hwemuviri wemunhu nehwemhuka, kana hurongwa hwenyika yakatipoteredza nezuva rayo, nenyeredzi dzayo nezvimwe zvose zvirimo.
Uye chose chinonamatwa kunze kwavo hachina simba rekuzviwanira rubatsiro kana kuzvidzivirira kune zvakaipa, saka chingava sei nesimba rekuwanira rubatsiro uyo anochinamata, kana kumudzivirira kubva kune zvakaipa?
Ndeipi kodzero yaTenzi wedu pamusoro pedu? Zvirokwazvo kodzero yavo pavanhu vose ndeyekuti vanamate ivo vari vega uye vasavasanganise nechero chii zvacho. Saka havafanirwe kunamata kunze kwavo kana pamwechete navo munhu, kana dombo, kana rwizi, kana chinhu chisina hupenyu, kana nyenyedzi, kana chero chii zvacho, asi vanofanirwa kuita kuti kunamata kuitirwe Allah vega, Tenzi wezvisikwa zvose.
Ndeipi kodzero yevanhu pana Tenzi vavo? Zvirokwazvo, kodzero yevanhu kuna Allah kana vakavanamata ndeyekuti vanovapa hupenyu hwakanaka mavanowana chengetedzo, dziviriro, runyararo, kugadzikana nekugutsikana. Uye muhupenyu hwemangwana vanovapinza muJannah (Paradhiso), umo mune mufaro usingaperi nekugara kusingaperi. Uye kana vakasavateerera nekutyora mirairo yavo, vanoita kuti hupenyu hwavo huve hwekutambudzika nenhamo, kunyangwe vachifunga kuti vari mumufaro nerugare. Uye muhupenyu hwemangwana vanovapinza muMoto wavasingazobudi mauri, uye vachawana mauri murango usingaperi, nekugara kusingaperi.
Chii chinangwa chekuvapo kwedu? Uye takasikirwei? Zvirokwazvo Tenzi vanokudzwa zvikuru vakatiudza kuti vakatisika nechinangwa chinoremekedzwa, icho chinova kuvanamata vari vega, uye kuti tisavabatanidze nechimwe chinhu, uye vakatipa mutoro wekuvaka nyika nezvakanaka nekuivandudza. Saka uyo anonamata mumwe asiri Tenzi vake neMusiki wake, haana kuziva chinangwa chaakasikirwa, uye haana kuita zvakakodzera kune Musiki wake. Uye uyo anoita zvakaipa munyika, haana kuziva basa raakapihwa.
Tinonamata sei Tenzi vedu? Zvirokwazvo Tenzi, vane hukuru nekukudzwa, havana kutisika votisiya pasina chinangwa, uye havana kuita kuti hupenyu hwedu huve husina basa, asi vakasarudza kubva muvanhu vatumwa kuenda kumarudzi avo, avo vane tsika dzakakwana kupfuura vanhu vose, vane mweya yakachenesesa, uye vane moyo yakachenesa. Saka vakadzikisa kwavari mashoko avo, uye vakaisa mavari zvose zvinofanira kuzivikanwa nevanhu pamusoro paTenzi, vane hukuru nekukudzwa, uye nezvekumutswa kwevanhu kuZuva reKumutswa, iro riri zuva rekuzvidavirira nerekuwana mubairo, Uye vatumwa vakasvitsa kuvanhu vavo kuti vanonamata sei Tenzi vavo, uye vakavatsanangurira maitirwo emabasa ekunamata nenguva dzawo nemibairo yawo panyika pano nemuhupenyu hunotevera. Uye vakavayambira pane zvakarambidzwa naTenzi vavo kwavari pane zvekudya, nezvekunwa, newanano, uye vakavadzidzisa tsika dzakarurama, uye vakavarambidza tsika dzakashata.
Ndechipi chitendero chinotambirwa naTenzi, Samasimba vanoremekedzwa? Chitendero chinogamuchirwa naAllah iIslam, uye ndicho chitendero chakasvitswa nemaporofita ose. Uye Allah havazogamuchiri pazuva rekutongwa chimwe chitendero kunze kwacho. Uye chitendero chese chinotevedzwa nevanhu kunze kweIslam chitendero chenhema, uye hachibatsiri muteveri wacho, asi chinova nhamo kwaari panyika nemuhupenyu hunotevera.
Hwaro hwechitendero ichi (Islam) nemapango acho chii? Chitendero ichi Allah vakachiita nyore kuvaranda vavo, saka mapango makurusa acho ndeekuti utende muna Allah saTenzi vanofanirwa kunamatwa, uye utende mungirozi dzavo, mabhuku avo, vatumwa vavo, Zuva Rekupedzisira neQadar (kutara kwaAllah, uye kuti upupure kuti hapana chakakodzera kunamatwa kunze kwaAllah uye kuti Muhammad Mutumwa waAllah, uye kuti uite Swalah, uye kuti upe Zakaah kana uine pfuma inosungirwa Zakaah, uye kuti utsanye Ramadhan, unova mwedzi mumwe chete pagore, uye kuti uite Hajj uchida kufadza kwaAllah kuImba Tsvene yekare iyo yakavakwa naIbrahim (rugare ngaruve paari) nemurairo waTenzi vake, kana uine zvikwanisiro. Uye kuti uswedera kure neizvo zvakarambidzwa naAllah kwauri zvakaita seShirk (kusanganisa Allah nezvimwe), kuuraya munhu, Zina (hupombwe), nekudya pfuma isingabvumirwi. Naizvozvo kana ukatenda muna Allah, ukaita zviito zvekunamata izvi, uye ukasaita zvinorambidzwa izvi, unenge uri muMuslim panyika, uye pazuva rekutongwa Allah vachakupa mufaro usingaperi nehupenyu husingaperi muJannah.
Islam chitendero chedzinza kana rudzi here? Islam ndicho chitendero chaAllah kuvanhu vose, hapana munhu anopfuura mumwe machiri kunze nekutya Allah nemabasa akanaka, uye vanhu machiri vakaenzana.
Vanhu vanoziva sei kutendeseka kwevatumwa, rugare nemakomborero zvaAllah ngazvive pavari? Vanhu vanoziva chokwadi chevatumwa nenzira dzakasiyana-siyana dzinosanganisira:
Kuti izvo zvavanouya nazvo zvechokwadi nenhungamiro zvinotambirwa nepfungwa nechizvarirwo chakanaka, uye pfungwa dzinopupurira kunaka kwazvo, uye avo vasiri vatumwa havaunze zvakafanana nezvavakauya nazvo.
Kuti izvo zvakauya nevatumwa zvine kunaka kwezvitendero zvevanhu nehupenyu hwavo hwepasi pano, nekururama kwemagariro avo nekuvakwa kwebudiriro yavo, pamwe nekuchengetedzwa kwezvitendero zvavo, njere dzavo, pfuma yavo nechiremera chavo.
Kuti vatumwa, rugare ngaruve pavari, havakumbiri mubairo kubva kuvanhu pakuvatungamira kwavo kune zvakanaka negwara rakarurama, asi vanotarisira mubairo wavo kubva kuna Tenzi vavo.
Kuti zvirokwazvo izvo zvakaunzwa nevatumwa ichokwadi nechokwadi chakazara chisingasanganiswe nekukahadzika, hazvipokani kana kuvhiringidzika, uye muporofita wese anopupurira maporofita akauya iye asati auya, uye anodaidza kune zvakafanana nezvavaidaidza kwazviri.
Zvirokwazvo Allah vanotsigira vatumwa (rugare ngaruve kwavari) nezviratidzo zviri pachena uye neminana ine simba guru (inokurira kupikisa kwese), izvo zvinoitwa naAllah kuburikidza nemaoko avo; kuti zvive zvinopupura chokwadi chekuti vatumwa vanobva kuna Allah. Uye munana mukurusa paminana yevaporofita munana waMutumwa wekupedzisira Muhammad (rugare netsitsi dzaAllah ngazvive kwavari), unova Qur'an rinoera.
Qur'an rinoera ibhuku raTenzi wezvisikwa zvese, uye ishoko raAllah rakaunzwa nengirozi Gabrieri (rugare ngaruve kwaari) kuna Mutumwa Muhammad (Allah ngavavakomborere nekuvapa rugare), uye mariri mune zvese zvakasungirwa naAllah kuti vanhu vazive pamusoro paAllah, nengirozi dzavo, nemagwaro avo, nevatumwa vavo, neZuva Rekupedzisira, uye neQadar (hurongwa hwaAllah nezvavakatara) zvakanaka zvahwo nezvakaipa zvahwo. Uye mariri mune manamatiro anosungirwa kuitwa, nezvinorambidzwa izvo zvinofanirwa kungwarirwa, netsika dzakarurama nedzakaipa, nezvese zvine chekuita nechitendero chevanhu pamwe nehupenyu hwavo hwepasi rino, nehupenyu hwavo huchazouya. Uye ibhuku rinoshamisa iro Allah vakaudza vanhu kuti vauye nerimwe rakangofanana naro (asi hapana anogona kuita izvozvo), uye rakachengetedzwa kusvika Zuva reKumutswa mururimi rwarakadzikiswa narwo. Hapana kana vara rimwechete rakabviswa mariri, uye hapana kana izwi rimwechete rakashandurwa.
Ndehupi humbowo hwekumutswa kwevakafa nekutongwa? Hauoni here nyika yakafa isina hupenyu, asi mvura painonaya pairi, inotanga kumera nekuburitsa mhando dzose dzezvinomera dzinoyevedza. Zvirokwazvo, avo vanoipa hupenyu vane simba rekumutsa vakafa. Zvirokwazvo, uyo akasika munhu kubva kudonhwe remvura yakaderera anokwanisa kumumutsa paZuva reKumutswa nekumutonga, uye nekumupa mubairo kana murango wake wakakwana, kana aiita zvakanaka achawana zvakanaka, uye aiita zvakaipa achawana zvakaipa. Zvirokwazvo, avo vakasika matenga nenyika nenyeredzi vane masimba ekusika munhu zvekare; nokuti kusika munhu zvekare kechipiri kuri nyore kudarika kusika matenga nenyika.
Chii chinoitika paZuva reKutongwa? Tenzi (Hukuru hwavo ngahukudzwe) vachamutsa zvisikwa kubva mumakuva azvo, vozvitonga pamabasa azvo. Saka, uyo anotenda uye achigamuchira chokwadi chevatumwa, vachamupinza muParadhiso, mune makomborero asingaperi asingapindi mupfungwa dzemunhu nekuda kwehukuru hwawo, uye uyo anoramba kutenda vachamupinza muMoto, mune kurangwa kusingaperi kusingafungidziriki kumunhu. Uye kana munhu apinda muParadhiso kana muMoto, haachafi zvachose, asi kuti anogara nekusingaperi mumakomborero kana mukurangwa.
Kana munhu achida kupinda muIslam chii chaanofanirwa kuita, uye pane tsika dzechitendero dzaanofanirwa kuita here, kana kuti pane vanhu vanofanirwa kumupa mvumo? Kana munhu akaziva kuti chitendero chechokwadi iIslam, uye kuti ndicho chitendero chaTenzi wezvakasikwa zvese, anofanirwa kukurumidza kupinda muIslam; nekuti munhu ane pfungwa dzakakwana, kana chokwadi chikabuda pachena kwaari, anofanirwa kukasira kuchitevera, uye haafanirwi kunonotsa nyaya iyi. Uyo anoda kupinda muIslam haasungirwi kuita tsika dzechitendero dzakati kuti, uye haasungirwi kuve pamberi pemunhu upi zvake, asi kana izvi zvikaitwa pamberi pemuMuslim kana pamuzinda weIslam zvinotonyanya kunaka, zvikasadaro zvinomukwanira kutaura kuti: Ndinopupura kuti hapana chakakodzera kunamatwa kunze kwaAllah, uye ndinopupura kuti Muhammad Mutumwa waAllah(Ash’hadu alla ilaaha illallahu wa ash’hadu anna Muhammad abduhu warasuuluh), achiziva zvazvinoreva uye achitenda mazviri. Akaita izvi anobva ava muMuslim; zvadaro anodzidza mimwe mitemo yeIslam zvishoma nezvishoma; kuti aite zvakasungirwa naAllah paari.
Kuti muwane rumwe ruzivo endai pawebhusaiti iyi: