الإسلام دين رب العالمين

အနန္တကရုဏာတော်ရှင် ဖြစ်တော်မူသော အလွန်သနား ကြင်နာတော်မူသော အလ္လာဟ်အရှင်မြတ်၏ နာမတော်ဖြင့် (အစပြုပါ၏။)

အစ္စလာမ်သာသနာသည် စကြဝဠာအပေါင်းကို ဖန်ဆင်းတော်မူသော အလ္လာဟ်အရှင်မြတ်၏ သာသနာတော်ဖြစ်သည်။

အသင့်ကို ဖန်ဆင်းတဲ့အရှင်က ဘယ်သူလဲ။

ဒီမေးခွန်းဟာ လောကအရှိတရားအတွက် အကြီးကျယ်ဆုံး မေးခွန်းဖြစ်ပြီး လူသားတစ်ယောက်အနေနဲ့ ဒီမေးခွန်ရဲ့အဖြေကို သိဖို့အလွန်အရေးကြီးပါတယ်။

ကျွန်တော်တို့ကို ဖန်ဆင်းမွေးမြူတော်မူတဲ့အရှင်ဟာ မိုးကောင်းကင်တွေနဲ့ပထဝီမြေပြင်ကို ဖန်းဆင်းခဲ့တဲ့အရှင်လည်းဖြစ်ပါတယ်။ ထိုအရှင်ဟာ မိုးကောင်းကင်ကနေ မိုးရေကိုချပေးသနားတော်မူပြီး သစ်ပင်ပေါက်ပင် သီးနှံအစုံစုံကို ကျွန်တော်တို့အတွက် စားဖွယ်သောက်ဖွယ်အဖြစ် ပေါက်ရောက်စေသလို တိရစ္ဆာန်တွေအတွက်လည်း အစာအဟာရအဖြစ် ပြုလုပ်ပေးသနားတော်မူတယ်။ အဲ့ဒီအရှင်မြတ်ကပဲ ကျွန်တော်တို့တွေ ကျွန်တော်တို့ရဲ့မိဘဘိုးဘေးတွေနဲ့ခပ်သိမ်းကို ဖန်ဆင်းတော်မူခဲ့တာဖြစ်တယ်။ ကျွန်တော်တို့အတွက် နေ့နဲ့ညကို ပြုလုပ်ဖန်တီးပေးတော်မူတယ်။ ညကိုကျွန်တော်တို့ အိပ်စက်အနားယူဖို့ပြုလုပ်ပေးထားပြီး နေ့ကိုတော့ ကျွန်တော်တို့ စီးပွားရှာ၊ ရှင်သန်အားထုတ်ဖို့အတွက် ပြုလုပ်ပေးထားတော်မူတယ်။ အဲ့ဒီအရှင်မြတ်ကပဲ ကျွန်တော်တို့အတွက် နေ၊လ၊နက္ခတ်တာရာ၊သမုဒ္ဒရာရေပြင်ကျယ်ကြီးကို လည်ပတ်စီးဆင်းနေဖို့ နာခံသူများအဖြစ်ပြုလုပ်ပေးထားတော်မူပြီး သက်ရှိသတ္တဝါတွေကိုလည်း စားသောက်ဖို့ပြုလုပ်ပေးထားတော်မူတယ်။ သူတို့ဆီကရတဲ့ နို့ရည်နဲ့ အမွေးအမျှင်ကို အကျိုးရှိရှိသုံးစွဲခွင့်ကိုချီးမြှင့်ကာ အသုံးချခံများအဖြစ် ပြုလုပ်ပေးထားတော်မူတယ်။

စကြဝဠာအပေါင်းကို ဖန်ဆင်းတော်မူသော အရှင်မြတ်ရဲ့ ဂုဏ်တော်တွေက ဘာလဲ။

အရှင်မြတ်ဟာ ခပ်သိမ်းကုန်ရဲ့ တစ်ပါးတည်းသော ဖန်ဆင်းရှင်ဖြစ်တယ်။ ဖန်ဆင်းခံတွေကို သစ္စာနဲ့ ဓမ္မဘက်ကို လမ်းပြတော်မူတယ်။ ဖန်ဆင်းခံအလုံးစုံရဲ့ အရေးကိစ္စဟူသမျှကို သတ်မှတ်စီမံတော်မူတယ်။ ခပ်သိမ်းကိုရိက္ခာချီးမြှင့်တော်မူတယ်။ အရှင်မြတ်တစ်ပါးတည်းကသာ လောကီ၊တမလွန်ရှိရှိသမျှအရာခပင်းကို စိုးပိုင်တော်မူတယ်။ အရှင်မြတ်မှပ အဖန်ဆင်းခံအရာအားလုံးသည် အရှင်မြတ်ရဲ့အစေခံများသာဖြစ်ပါတယ်။ ဒီ့အပြင် ဖန်ဆင်းရှင်ဟာ အမြဲရှင်နေတော်မူတဲ့အရှင်၊ သေဆုံးခြင်း၊ အိပ်စက်ခြင်း မရှိတဲ့အရှင်ဖြစ်တယ်။ ထာဝရတည်ရှိလျက်ရှိပြီး သက်ရှိတိုင်းကို မိမိအမိန့်တော်နဲ့ ထိန်းသိမ်းစောင့်ရှောက်တော်မူတဲ့အရှင်ဖြစ် တယ်။ အရှင်မြတ်ရဲ့အနန္တကရုဏာတော်ဟာ အရာခပ်သိမ်းကိုလွှမ်းခြုံထားတော်မူတယ်။ မိုးကောင်းကင်နဲ့မြေပထဝီမှာ အရှင်မြတ်အတွက်ဖုံးကွယ် လျှို့ဝှက်နေတဲ့အရာဆိုတာ အလျှင်းမရှိပါ။ ဖန်ဆင်းရှင်နဲ့ ပုံတူပမာဆင်တူသောအရာဟူ၍ စိုးစဉ်းအလျှင်းမရှိ။အကြွင်းမဲ့ကြားတော်မူတဲ့အရှင်၊ အကြွင်းမဲ့မြင်တော်မူတဲ့အရှင်ဖြစ်တယ်။ ဖန်ဆင်းရှင်ဟာ မိုးကောင်းကင်တွေအားလုံးရဲ့အထက်မှာ အမြင့်မားဆုံးတည်နေတော်မူတဲ့အရှင်ဖြစ်တော်မူတယ်။ ဖန်ဆင်းရှင်ဟာ မိမိအဖန်ဆင်းခံတွေဆီကနေ လိုလားတောင့်တမှုကင်းပြီး အဖန်ဆင်းခံအားလုံးဟာ ဖန်ဆင်းရှင်ကို အမြဲတမ်းလိုအပ်လျက်ရှိကြတယ်။ ဖန်ဆင်းရှင်ဟာ ဖန်ဆင်းခံလောကကြီးနဲ့တစ်ပေါင်းတစ်စည်းတည်း ဖြစ်နေခြင်းလည်းမဟုတ်၊ လောကစကြာဝဠာကြီးကလည်း ဖန်ဆင်းရှင်နဲ့ပေါင်းစည်းနေခြင်းမဟုတ်ဘဲ သီးခြားသန့်ပြန်စင်ကြယ်စွာရှိနေတော်မူတဲ့အရှင်ဖြစ်တယ်။ အရှင်မြတ်တစ်ပါးတည်းကသာ ယခုမြင်နေရတဲ့လောကစကြာဝဠာကြီးကို ဖောက်လွဲဖောက်ပြန်မှုမရှိ အခိုင်မာဆုံးအစီစဉ်တွေနဲ့ အလွန်တိကျ၊ဟန်ချက်ညီစွာ ဖန်ဆင်းထားတော်မူတယ်။ လူသားနဲ့ သတ္တလောကရဲ့ဖွဲ့စည်းတည်ဆောက်ပုံကိုပဲကြည့်ကြည့်၊ ကျွန်တော်တို့ ပတ်ဝန်းကျင်မှာ ရှိနေတဲ့ နေ၊နက္ခတို့ရဲ့ လည်ပတ်နေမှု ယန္တရားကိုပဲကြည့်ကြည့်၊ အခြားသော အဖန်ဆင်းခံအစုစုတို့ကိုပဲကြည့်ကြည့် အလွန် ခိုင်မာတိကျတဲ့ တည်ဆောက်ပုံနဲ့ နည်းဥပဒေသတွေကို တွေ့ရှိရပါလိမ့်မယ်။

အလ္လာဟ်အရှင်မြတ်ကလွဲပြီး အခြားကိုးကွယ်ခံတွေက မိမိကိုယ်မိမိပင်ကောင်းကျိုးမပြုနိုင်၊ မိမိကိုယ်မိမိပင်ဆိုးကျိုးက မဖယ်ရှားနိုင်တာကိုတွေ့ရပါလိမ့်မယ်။ သူတို့ကိုယ်သူတို့အတွက်တောင် အကျိုးမဖြစ်ထွန်းစေနိုင်တဲ့အရာတွေက အခြားသူတွေဖြစ်တဲ့ အဖန်ဆင်းခံလောကကြီးကို ကောင်းကျိုးဆိုးကျိုးကိုဘယ်လိုများပြုနိုင်ပါလိမ့်မလဲ။

ဖန်ဆင်းရှင်နဲ့ပတ်သက်ပြီး ကျွန်တော်တို့အပေါ်မှာ ဘာတာဝန်တွေရှိပါသလဲ။

ဖန်ဆင်းရှင်နဲ့ပတ်သက်ပြီး ကျွန်တော်တို့အပေါ်မှာရှိတဲ့ တာဝန်တွေက အရှင်မြတ်တစ်ပါးတည်းကိုသာ တုဖက်နှိုင်းယှဉ်မှုအလျှင်းမပြုဘဲ ခဝပ်ကိုးကွယ်ဖို့ဖြစ်တယ်။ အခြားအဖန်ဆင်းခံတွေပဲဖြစ်တဲ့လူလူချင်း၊ ကျောက်တုံးကျောက်ဆိုင်တွေနဲ့ရုပ်တုဆင်းတုတွေ၊ မြစ်ချောင်းအင်းအိုင်တွေ၊ သက်မဲ့ဝတ္ထုပစ္စည်းတွေ၊ နက္ခတ်တာရာတွေကို ဖန်ဆင်းရှင်နဲ့ တွဲဖက်ယှဥ်တွဲ ကိုးကွယ်မှုအလျှင်းမပြုဘဲ ခဝပ်မှုအစုစုကို ဖြူစင်ခြင်းအတိနဲ့ အရောအနှောကင်းကင်း ဖက်စပ်မှုရှင်းရှင်းနဲ့ ဖန်ဆင်းရှင် အလ္လာဟ်အရှင်မြတ် တစ်ပါးတည်းအတွက်သာ သီးသန့်ပြုလုပ်ရခြင်းဖြစ်တယ်။

ဒါဆို ဖန်ဆင်းရှင်က ကျွန်တော်တို့ကို ချီးမြှင့်မဲ့ကျေးဇူးတော်တွေက ဘာတွေဖြစ်မလဲ။

လူသားအနေနဲ့ အလ္လာဟ်အရှင်မြတ် တစ်ပါးတည်းကိုသာ ခဝပ်ကိုးကွယ်မယ်ဆိုလျှင် ဖန်ဆင်းရှင်က ကောင်းမြတ်အေးချမ်းတဲ့ဘဝရှင်သန်ခြင်းနဲ့အတူ၊လုံခြုံမှု၊ တည်ငြိမ်မှု၊ စိတ်နှလုံးငြိမ်းချမ်းသာယာမှု၊ ကျေနပ်နှစ်သက်မှုတို့ကို ချီးမြှင့်တော်မူမှာဖြစ်တယ်။ နောင်တမလွန်ဘဝမှာလည်း အဆုံးအစမရှိစည်းစိမ်ချမ်းသားတွေနဲ့ ထာဝရသုခဘုံကို ဝင်ရောက်စေတော်မူမှာဖြစ်တယ်။ အရှင်မြတ်ကိုဖီဆန်ပြီး အမိန့်တော်တွေကို ဖောက်ဖျက်ခဲ့သူတွေ ကတော့ ဒီဘဝမှာ ပျော်ရွှင်မှု၊ ချောင်လည်မှုရှိတယ်ဆိုပြီး သူတို့ကိုယ်သူတို့ ထင်နေကြရင်လည်း သူတို့အတွက် ဆိုးရွားလှတဲ့ဘဝရှင်သန်ခြင်းနဲ့ ခက်ခဲခြင်းတို့သာရှိလိမ့်မယ်။ နောင်တမလွန်ဘဝမှာ ငရဲမီးထဲသို့ဝင်ရောက်စေခြင်းခံရမှာဖြစ်ပြီး သူတို့လုပ်ခဲ့တဲ့ ပြစ်မှုအကုသိုလ်ဒုစရိုက်တွေရဲ့အကျိုးဆက်ကို ထာဝရခံစားကြရမှာဖြစ်တယ်။

ကျွန်တော်ဖြစ်တည်နေမှုရဲ့ ရည်ရွယ်ချက်ပန်းတိုင်က ဘာလဲ။ ကျွန်တော်တို့ကို ဘာကြောင့်ဖန်ဆင်းထားတာလဲ။

ဖန်ဆင်းရှင်က ကျွန်တော်တို့ကို ဖန်ဆင်းထားတဲ့ အကြီးကျယ်ဆုံးသောရည်ရွယ်ချက်မှာ ဖန်ဆင်းရှင်တစ်ပါတည်းကိုသာ တုဖက်ယှဥ်တွဲမှုအလျှင်းမပြုဘဲ ဖြူစင်စွာခဝပ်ကိုးကွယ်ဖို့ဖြစ်ကြောင်း ပြောပြထားတော်မူတယ်။ ပြီးတော့ ကမ္ဘာမြေကြီးမှာ ကောင်းမှုကောင်းရာတွေကိုပြုလုပ်ဖို့၊ အချင်းချင်းအကောင်းလိုလားကာ ပြုပြင်တည့်မတ်ပေးဖို့ တာဝန်ပေးထားတော်မူတယ်။လူသားအနေနဲ့ မိမိကိုအမှန်တကယ်ဖန်ဆင်းထားတဲ့အရှင်ကိုစွန့်ပြီး အခြားတစ်စုံတစ်ရာကို သွားကိုးကွယ်တာဟာ သူ့ကိုဖန်ဆင်းထားတဲ့မူလရည်ရွယ်ချက်ကို မသိကျိုးကျွံပြုရာ၊ ဖန်ရှင်းပေးအပ်တဲ့ဝတ္တရားကိုချိုးဖြတ်ရာမည်တယ်။ ဒါကြောင့်လောကမှာ ဖျက်လိုဖျက်စီးလုပ်နေတဲ့သူဟာ ဖန်ဆင်းရှင်ပေးထားတဲ့ မိမိတာဝန်ကိုမိမိမသိတဲ့ မိုက်မဲမှုဖြစ်တယ်။

ဖန်ဆင်းရှင်ကို ကျွန်တော်တို့ဘယ်လို ခဝပ်ကိုးကွယ်မှုပြုရမလဲ။

ဖန်ဆင်းရှင်က ကျွန်တော်တို့ကိုဖန်ဆင်းပြီး အချည်းအနှီး အလဟဿစွန့်လွှတ်ထားတာမဟုတ်ပါ။ ကျွန်တော်တို့ရဲ့ဘဝတွေကို ရည်ရွယ်ချက်မရှိအဓိပ္ပာယ်မဲ့ ပြုလုပ်ထားတာလည်းမဟုတ်ပါ။ ဖန်ဆင်းရှင်က ခေတ်အဆက်ဆက် လူမျိုးစုအသီးသီးကနေ ပရောဖက်စေတမန်တွေကို ရွေးချယ် စေလွှတ်တော်မူတယ်။ ဖန်ဆင်းရှင် စေလွှတ်တဲ့ တမန်တော်တွေဆိုတာ လူသားတွေထဲက စာရိတ္တအကောင်းမြတ်ဆုံး၊ စိတ်ထားအမြင့်မြတ်ဆုံး၊ နှလုံးသားအသန့်စင်ဆုံးသူတွေဖြစ်ကြတယ်။ တမန်တော်တွေနဲ့အတူ လမ်းညွှန်ကျမ်းဂန်တွေကိုလည်း ချပေးသနားတော်မူတယ်။ အဲဒီ ကျမ်းဂန်တွေထဲမှာ ဖန်ဆင်းရှင်နဲ့ပတ်သက်ပြီး လူသားအနေနဲ့ သိထားရမယ့်အရာအားလုံး၊ သေပြီးနောက်တမလွန်မှာ သက်ရှိအားလုံးပြန်လည်ရှင်ထရမှာဖြစ်ကြောင်း၊ လူသားအားလုံးဖန်ဆင်းရှင်ရှေ့မှောက် စုရုံးကြရမယ့်ကမ္ဘာ့တရားခွင်နေ့ဟာ စာရင်းအင်းစစ်ဆေးမယ့်နေ့ဖြစ်ပြီး မိမိပြုခဲ့သမျှအတွက်အဆိုးအကောင်းအကျိုးအကြောင်းခံစားစံစားကြမှာဖြစ်ကြောင်း ပြည့်ပြည့်ဝဝဖော်ပြပါရှိပါတယ်။ ဖန်ဆင်းရှင်စေလွှတ်လိုက်တဲ့ တမန်တော်တွေက မိမိတို့လူမျိုးစု သားချင်းတွေထံ ဖန်ဆင်းရှင်ကိုဘယ်ပုံဘယ်နည်း ခဝပ်ကိုးကွယ်ရမယ်ဆိုတာနဲ့ပတ်သက်ပြီး ပုံစံနည်းနား၊ ဝတ်ပြုရမယ့်အချိန်နာရီနဲ့ လူသားတို့ကို ဖန်ဆင်းရှင်ချီးမြှင့်တော်မူမယ့် နှစ်ဘဝအကျိုးကုသိုလ်တွေကို ရှင်းပြပို့ချတော်မူတယ်။ ပြီးတော့ ဖန်ဆင်းရှင်တားမြစ်ထားတဲ့ အစားအသောက်အနေအထိုင်အမူအကျင့်၊ ဖန်ဆင်းရှင်တားမြစ်ထားတဲ့ တရားမဝင်ယောကျာ်းမိန်းမပေါင်းဖက်မှု ပုံစံတွေကနေလည်း ရှောင်ကြဉ်ဖို့ သတိပေးတော်မူတယ်။ တမန်တော်တွေက လူတွေကို ကောင်းမြတ်တဲ့စာရိတ္တမွန်တွေကိုရင်ဝယ်ပိုက်ထားဖို့၊ မကောင်းတဲ့အကျင့်စရိုက်တွေကနေ ဝေးစွာနေဖို့ သွန်သင်လမ်းညွှန်တော်မူတယ်။

ဖန်ဆင်းရှင်ထံ လက်ခံခြင်းခံရမယ့်သာသနာက ဘယ်သာသနာလဲ။

ဖန်ဆင်းရှင်ထံ လက်ခံခြင်းခံရမယ့် တစ်ခုတည်းသာသနာက လူ့ဘဝတည်ဆောက်မှုလမ်းကို ညွှန်ကြားပြသတဲ့ အစ္စလာမ်သာသနာပဲဖြစ်ပါတယ်။ ပွင့်လေခဲ့သမျှတမန်တော်အပေါင်း ပို့ချခဲ့တာဟာလည်း အစ္စလာမ်သာသနာပဲဖြစ်တယ်။ ဖန်ဆင်းရှင်ရှေ့မှောက်စုရုံးရမယ့်ကမ္ဘာ့တရားခွင်နေ့မှာ ဖန်ဆင်းရှင်လက်ခံတော်မူမယ့်တစ်ခုတည်းသော သာသနာဟာလည်း အစ္စလာမ်ပဲဲဖြစ်တယ်။ ဖန်ဆင်းရှင်ရဲ့အမိန့်တော်ကိုစွန့်ပြီး၊ အစ္စလာမ်ကိုကျောခိုင်းပြီးယုံကြည်သက်ဝင်တဲ့လမ်းစဉ်တိုင်းဟာ လမ်းမှားမှုဧကန်ဖြစ်တယ်။ မှားယွင်းတဲ့လမ်းစဉ်တွေဟာ လူသားအတွက် ဘာအကျိုးမှဖြစ်ထွန်းစေမှာမဟုတ်တဲ့အပြင် လူသားကို နှစ်ဘဝနှစ်ဌာနပျက်စီးဆုံးရှုံးစေမှာသာဖြစ်တယ်။

ဒါဆို အစ္စလာမ်ဆိုတဲ့ ဒီသာသနာရဲ့ ရင်းမြစ်မဏ္ဍိုင်တွေက ဘာတွေလဲ။

ဒီသာသနာကို ဖန်ဆင်းရှင်အလ္လာဟ်အရှင်မြတ်က ခပ်သိမ်းကုန်အတွက် လွယ်ကူအောင် ပြုလုပ်ပေးထားတော်မူတယ်။ ဒါကြောင့် အစ္စလာမ်သာသနာရဲ့ အကြီးဆုံးမဏ္ဍိုင်များမှာ- အလ္လာဟ်အရှင်မြတ်ကို တစ်ဆူတည်းသော ဖန်ဆင်းရှင်၊ ကိုးကွယ်ဆည်းကပ်မှုအစုစုကို ခံထိုက်တော်မူတဲ့တစ်ပါးတည်းသာအရှင်အဖြစ်ကြောင်း ယုံကြည်ခြင်း၊ ကောင်းကင်တမန်တွေကိုယုံကြည်ခြင်း၊ ဖန်ဆင်းရှင်ချပေးခဲ့တဲ့ လမ်းညွှန်တော်ကျမ်းဂန်တွေကိုယုံကြည်ခြင်း၊ ပွင့်လေခဲ့သမျှသော မဟာလူသားစေတမန်တော်အပေါင်းကိုယုံကြည်ခြင်း၊ သေပြီးနောက်ရှင်ပြန်ထရမယ့်တမလွန်ဘဝကိုယုံကြည်ခြင်းနဲ့ အကောင်းဆိုးကို ဖန်ရှင်းကသတ်မှတ်စီမံထားတော်မူကြောင်းကိုယုံကြည်ခြင်းတို့ဖြစ်တယ်။ အလ္လာဟ်အရှင်မြတ်မှအပ အခြားခဝပ်ကိုးကွယ်ထိုက်သောအရှင်မရှိကြောင်းနဲ့ တမန်တော်မုဟမ္မဒ်ဟာ အလ္လာဟ်အရှင်မြတ်ရဲ့နောက်ဆုံး တမန်တော်ဖြစ်ကြောင်းကို သက်သေခံအပ်ခြင်း၊ တစ်နေ့ကိုငါးကြိမ်’ဆွလားသ်’လို့ခေါ်တဲ့ ဝတ်ပြုမှုကိုပြုခြင်း၊ တစ်နှစ်တစ်ကြိမ် ချမ်းသာသူတွေက ဆင်းရဲသူဆင်းရဲသားတွေကို’ဇကားသ်’လို့တဲ့ ဓမ္မကြေးပေးဆောင်ခြင်း၊ တစ်နှစ်မှာ’ရမဇာန်’တစ်လ ဥပုသ်သီလစောင့်ထိန်းခြင်း၊ တက်စွမ်းနိုင်သူတွေအနေနဲ့ တစ်သက်မှာတစ်ကြိမ် တမန်တော်ကြီး အီဗရာဟင်မ်က ဖန်ဆင်းရှင်ရဲ့အမိန့်အရ တည်ဆောက်ခဲ့တဲ့ ကမ္ဘာဦးကျောင်းတော်ရှိရာ’မက္ကာ’မြို့ဆီ’ဟဂျ်’လို့ခေါ်တဲ့ဓမ္မခရီးနှင်ခြင်းတို့ပဲ ဖြစ်ပါတယ်။ အထက်ပါယုံကြည်လိုက်နာရမှာတွေကို ပြုကျင့်ပြီး အလ္လာဟ်အရှင်မြတ်တားမြစ်ထားတာတွေဖြစ်တဲ့ အလ္လာဟ်အရှင်မြတ်နဲ့အတူ အခြားအရာတွေကို ဖက်စပ်ယှဉ်တွဲကိုးကွယ်ခြင်း၊ မတရားသဖြင့် သူတစ်ပါးအသက် သတ်ခြင်း၊ တရားမဝင်ပေါင်းသင်းခြင်း(ကာမေသုမစ္ဆာစာရကံ ကျူးလွန်ခြင်း)၊သူတပါးပစ္စည်းဥစ္စာကို မတရားသဖြင့်စားခြင်းတို့ကို အထူးသတိထားရှောင်ကြဉ်ရမှာဖြစ်တယ်။ မိတ်ဆွေအနေနဲ့ အလ္လာဟ်အရှင်မြတ်ကို သက်ဝင်ယုံကြည်ပြီး အပေါ်မှာတင်ပြခဲ့တဲ့ ပြုလုပ်စောင့်တည်ရမယ့်အရာတွေကို ကျင့်ဆောင်တယ်၊ တားမြစ်ထားတဲ့ မကောင်းမှုဒုစရိုက်တွေကနေကြဉ်ရှောင်မယ်ဆိုလျှင် မိတ်ဆွေဟာ ယခုဘဝမှာ ယုံကြည်သူမွတ်စ်လင် တစ်ယောက်ဖြစ်ပါပြီ။ တမလွန်ရဲ့ ကမ္ဘာ့တရားခွင်နေ့မှာလည်း ဖန်ဆင်းရှင်က အမြဲစံစားရမယ့် စည်းစိမ်ချမ်းသာအဝဝနဲ့ ထာဝရသုခဘုံသို့ဝင်ရောက်စေတော်မူမှာဖြစ်တယ်။

အစ္စလာမ်ဟာ အုပ်စုတစ်စု၊ လူမျိုးတစ်မျိုးအတွက်ပဲလား။

အစ္စလာမ်သာသနာဟာ လူခပ်သိမ်းအတွက် အလ္လာဟ်အရှင်မြတ်ရဲ့ သာသနာဖြစ်တယ်။ အစ္စလာမ့်သွန်သင်ချက်အရ လူတိုင်းဟာ’လူ’ဆိုတဲ့ဖြစ်တည်မှုအောက်မှာအတူတူသာဖြစ်တယ်။ အစ္စလာမ်မှာလူတစ်ဦးနဲ့တစ်ဦး မြင့်မြတ်မှုကို အလ္လာရှင်မြတ်ရဲ့အမိန့်တော်ကို ဘယ်လောက် လိုက်နာသလဲ၊ တားမြစ်ချက်တွေကို ဘယ်လောက်ရှောင်ကြဥ်လဲ၊ ကောင်းမြတ်တာတွေကို ဘယ်လောက်လုပ်ဆောင်လဲ၊ ကောင်းမြတ်တဲ့အကျင့်တွေကိုဘယ်လောက်ပြုမူလဲဆိုတာနဲ့ပဲတိုင်းတာပါတယ်။ အစ္စလာမ်မှာ လူသားအားလုံးက တန်းတူပဲဖြစ်တယ်။

လူသားအနေနဲ့ ဖန်ဆင်းရှင်စေလွှတ်တော်မူတဲ့ တမန်တော်တွေဟာ မှန်ကန်ကြောင်းဘယ်လိုသိနိုင်မလဲ။

တမန်တော်တွေဟာ သစ္စာသမာဓိရှင်တွေဖြစ်ကြောင်းကို နည်းလမ်းပေါင်းများစွာနဲ့ သိနိုင်ပါတယ်။ တချို့ကိုဖော်ပြပါမယ်။

တမန်တော်တွေယူဆောင်လာတဲ့ လမ်းညွှန်ချက်တွေဟာ လူတစ်ဦးချင်းစီရဲ့ပင်ကိုယ်စရိုက်၊ အသိဉာဏ်နဲ့ကိုက်ညီတယ်။ ဖြောင့်မတ်တဲ့ စိတ်ဝိညာဉ်တိုင်းကလက်ခံနိုင်တယ်။ ဒီလမ်းညွှန်ချက်တွေကို အလုံးစုံကို ဖန်ဆင်းမွေးမြူတော်မူတဲ့အရှင်ကစေလွှတ်လိုက်တဲ့ တမန်တော်တွေကလွဲလို့ တခြားဘယ်လူသားကမှ ပုံပမာတူပြုလုပ်ဖန်တီးယူဆောင်လာဖို့မဖြစ်နိုင်ပါဘူး။

တမန်တော်တွေယူဆောင်လာတဲ့တရားလမ်းညွှန်ဟာ လူသားအတွက် ဘာသာရေးအရရော လောကီရှင်သန်ရေးအတွက်ပါ ကောင်းမြတ်ခြင်းတွေရှိတယ်။ လူသားရဲ့အရေးကိစ္စအဝဝကို ပြုပြင်တည့်မတ်ပေးပြီး ယဉ်ကျေးတဲ့လူ့ဘောင်တည်ဆောက်ဖို့၊ လူသားရဲ့ယုံကြည်ချက်၊ အသိဉာဏ်၊ ပိုင်ဆိုင်မှုဥစ္စာဓန၊ မြင့်မြတ်တဲ့ဂုဏ်သိက္ခာတို့ကို ကာကွယ်ထိန်းသိမ်းဖို့ ကြီးစွာကူညီစောင့်ရှောက်တော်မူတယ်။

အမှန်တရားနဲ့ ကောင်းမြတ်ခြင်းတွေဆီ လမ်းညွှန်ပြသခဲ့တဲ့ ပွင့်လေသမျှသော တမန်တော်အပေါင်းဟာ သူတို့သွန်သင်ပေးခဲ့တဲ့ လူတွေထံကနေ ဘာမှမျှော်လင့်ခဲ့တာ၊ တောင်းခံခဲ့တာမရှိပါ။ သူတို့ရဲ့အကြီးဆုံးသော ရည်ရွယ်ချက်၊ မျှော်လင့်ချက်၊ လိုလားချက်ဟာ ဖန်ဆင်းရှင်ထံကရရှိမယ့် ကျေနပ်နှစ်သက်မှုသာဖြစ်တယ်။

တမန်တော်တွေ ယူဆောင်လာတဲ့တရားဓမ္မတွေဟာ ဒွိဟသံသယ၊ ရှေ့နောက်မညီမှု၊ တစ်ခုနဲ့တစ်ခုဆန်ကျင်ဖီလာမှု စိုးစဉ်မျှမရှိတဲ့ အခိုင်မာဆုံး အမှန်တရားတွေဖြစ်တယ်။ ပွင့်လေခဲ့သမျှတမန်တော်တိုင်းဟာ သူတို့အရင်ရှိခဲ့တဲ့ တမန်တော်ကို ထောက်ခံအတည်ပြုတယ်။ သူတို့ဖိတ်ခေါ်ခဲ့တဲ့ သစ္စာတရားဖက်ကိုသာဖိတ်ခေါ်ခဲ့တယ်။

တမန်တော်အပေါင်းဟာ အလ္လာဟ်အရှင်မြတ် ရွေးချယ်စေလွှတ်မှုဖြစ်ကြောင်း၊ မှန်ကန်ကြောင်းကို လူတွေသိနိုင်ရန်အတွက် တမန်တော်တွေကိုဖန်ဆင်းခဲ့တဲ့ အလ္လာဟ်အရှင်မြတ်က မိိမရဲ့သက်သေလက္ခဏာတော်တွေ၊တန်ခိုးပြာဋိဟာတွေနဲ့ ကူညီဆောင်မတော်မူခဲ့တယ်။ ဒီအံ့ဖွယ်တွေကို တမန်တော်တွေရဲ့လက်ပေါ်မှာ ဖြစ်စေခဲ့တယ်။ တမန်တော်တွေကို ချီးမြှင့်ခဲ့တဲ့ သက်သေလက္ခာဏာတော်တွေအနက် အကြီးကျယ်ဆုံးသော သက်သေလက္ခဏာတော်ဟာ နောက်ဆုံးတမန်တော်မုဟမ္မဒ်အပေါ် ချပေးခဲ့တဲ့ကုရ်အာန်ကျမ်းတော်မြတ်ပဲဖြစ်ပါတယ်။

ကုရ်အာန်ကျမ်းမြတ်ဆိုတာ ဘာလဲ။

ကုရ်အာန်ကျမ်းတော်မြတ်ဆိုတာ ကောင်းကင်တမန် ဂျိဗ်ရီးလ်က ယူဆောင်လာပြီး နောက်ဆုံးတမန်တော် မုဟမ္မဒ်အပေါ်ချပေးခဲ့တဲ့ အလ္လာဟ်အရှင်မြတ်ရဲ့ အနှိုင်းမဲ့စကားတော်၊ အရှင်မြတ်ရဲ့မုက္ခပါဌ်တော်ဖြစ်တယ်။ ကုရ်အာန်ထဲမှာ လူသားအနေနဲ့ သိကိုသိထားရမယ့် အလ္လာဟ်အရှင်မြတ်နဲ့ပတ်သက်တဲ့အကြောင်း၊ ကောင်းကင်တမန်တွေနဲ့ ပတ်သက်တဲ့အကြောင်း၊ အရှင်မြတ်ချပေးခဲ့တဲ့ လမ်းညွှန်တော် ကျမ်းဂန်တွေနဲ့ပတ်သက်တဲ့အကြောင်း၊ ပွင့်လေခဲ့သမျှသော မဟာလူသား စေတမန်တော်တွေနဲ့ပတ်သက်တဲ့အကြောင်း၊ သေပြီးနောက်ရှင်ပြန်ထရမယ့် တမလွန်ဘဝအကြောင်းနဲ့ အကောင်းဆိုးဟူသမျှကို ဖန်ရှင်းက သတ်မှတ်စီမံထားတော်မူထားကြောင်းတွေကို ပြည့်ပြည့်ဝဝဖော်ပြပါရှိပါတယ်။ ကုရ်အာန်ကျမ်းမြတ်ထဲမှာ လူသားအနေနဲ့ပြုမူကျင့်ကြံအားထုတ်ရမယ့်အရာတွေ၊ သတိထားရှောင်ကြဉ်ရမယ့်အရာတွေ၊ ကောင်းမြတ်တဲ့စာရိတ္တမွန်တွေကိုရင်ဝယ်ပိုက်ထားဖို့တွေ၊ မကောင်းတဲ့အကျင့်စရိုက်တွေကနေ ဝေးစွာနေဖို့တွေ စုံလင်စွာပါဝင်ပါတယ်။ လူသားအနေနဲ့ နှစ်ဘဝနှစ်ဌာနနဲ့ဆိုင်တဲ့ ဘဝရပ်တည်မှုရဲ့အရေးကိစ္စအဝဝနဲ့ပတ်သက်ပြီးလည်း လမ်းညွှန်ချက်တွေခိုင် ခိုင်မာမာပါရှိတယ်။ ကုရ်အာန်ကျမ်းတော်မြတ်ကို ဖန်ဆင်းရှင် အလ္လာဟ်အရှင်မြတ်ရဲ့စကားမဟုတ်ဘူးလို့ မဟုတ်မမှန်ငြင်းပယ်သူတွေကို အရှင်မြတ်က ကုရ်အာန်ကဲ့သို့ကျမ်းစာတစ်အုပ်၊ ဒါမှမဟုတ် ကဏ္ဍတစ်ခုလောက်ပင် တူအောင်ယူဆောင်လာဖို့ စိန်ခေါ်ထားတော်မူတယ်။ ကုရ်အာန်ကျမ်းတော်မြတ်ဟာ အရဗီဘာသာစကားဖြင့်ချပေးခြင်းခံရပြီး စတင်ကျရောက်ခဲ့ချိန်မှယနေ့တိုင် တစ်လုံးတစ်ပါဒမျှ ပြောင်းလဲခြင်း၊ ဖြည့်စွက်ခြင်း၊ ပြင်ဆင်ခြင်း၊ ပယ်ဖျက်ခြင်းစိုးစဉ်းမျှမရှိဘဲ ပကတိမူရင်းအတိုင်းစစ်မှန်စွာရှိ‌နေတဲ့ တစ်ခုတည်း‌သောကျမ်းစာဖြစ်တယ်။

သေပြီးနောက်ရှင်ပြန်ထရခြင်း၊ စာရင်းအင်းစစ်ဆေးမေးမြန်ခြင်းတို့နဲ့ပတ်သက်ပြီး ဘာသက်သေအထောက်အထားရှိပါသလဲ။

မြေသေတစ်ခု။ သစ်ပင်ပန်းမန်ပေါက်ခြင်းမရှိ။ ခြောက်သွေ့ကွဲအပ်ကာ စိုမြတဲ့အသက်ဓာတ်လည်းမရှိတဲ့ မြေနေရာဒေသပေါ်မှာ မိုးရေရွာသွန်းချတဲ့အခါ ရှင်သန်တဲ့ပျိုးပင်၊ သစ်ပင်ပန်းမန်တို့ စိမ်းလန်းစွာတဖန်ပြန်လည်ထွက်ပေါ်လာပြီး ရှင်သန်ကြီးထွားလာတာကို မိတ်ဆွေမဆင်ခြင်မိပေဘူးလား။ မြေဆိုင်မြေခဲကိုတောင် မိုးရေဖြင့်ပြန်လည်စိမ်းလန်းရှင်သန်စေတော်မူတဲ့အရှင်ဟာ မုချလူသားကိုလည်း လောကီအသက်တာမှာ သေဆုံးခြင်းကိုဆိုက်ရောက်စေတော်မူပြီး တမလွန်အတွက်ပြန်လည်ရှင်ထစေတော်မူမယ့်အရှင်ဖြစ်ပါတယ်။ လူသားကိုသုက်ရေကြည်တစ်စက်ကနေ လူလားမြောက်စေခဲ့တဲ့အရှင်က သူသေဆုံးပြီးနောက် ကမ္ဘာ့တရားခွင်နေ့မှာ ပြန်လည်ရှင်ထစေမှုကို အကြွင်းမဲ့တက်စွမ်းနိုင်တော်မူတဲ့အရှင်ဖြစ်တယ်။ အလုံးစုံ စုရုံးရောက်ရှိရမယ့်ကမ္ဘာ့တရားခွင်နေ့မှာ စာရင်းအင်းစစ်ဆေးတော်မူမှာဖြစ်တယ်။ ကောင်းမြတ်တဲ့သူကို ကောင်းတဲ့အကျိုး၊ ဆိုးယုတ်တဲ့သူကိုဆိုးတဲ့အကျိုး စံစားခံစားစေမှာဖြစ်တယ်။ မိုးကောင်းကင်တွေ၊ ပထဝီမြေပြင်နဲ့ ကြယ်နက္ခတာရာတွေကို ဖန်ဆင်းဖြစ် တည်စေခဲ့တဲ့အရှင်ဟာ လူသားကိုနောက်တဖန်ပြန်လည်ဖန်ဆင်းပြီးရှင်သန်စေဖို့ဟာ မတတ်စွမ်းနိုင်စရာမရှိပါ။ လုံးဝမရှိခြင်း နတ္တိကနေတောင် ရှိခြင်းအတိအဖြစ် ဖန်ဆင်းခဲ့တဲ့အရှင်အတွက် ဒုတိယအကြိမ်ပြန်လည်ဖန်းဆင်ပြီးရှင်ပြန်ထစေခြင်းဟာ ပိုပြီးလွယ်ကူတယ်။ ကြီးကျယ်လှတဲ့ မိုးကောင်ကင်တွေနဲ့ မြေပြင်ကမ္ဘာကြီး ကိုဖန်ဆင်းရတာထက်ပိုမိုလွယ်ကူလွန်းတယ်ဆိုတာ ယတိပြတ်ဧကန်သဘောပါ။

ခပ်သိမ်းတို့စုရုံးရမယ့် ကမ္ဘာ့တရားခွင်နေ့မှာ ဘာတွေဖြစ်ပျက်မှာလဲ။

ဖန်ဆင်းရှင်က သက်ရှိတွေကို သူတို့ရဲ့သင်္ချိုင်းတွေကနေ ရှင်ပြန်ထစေမယ်။လောကမှာ သူတို့ပြုမူခဲ့တဲ့အရာတိုင်းနဲ့ပတ်သက်ပြီး စီရင်စစ်ဆေးတော်မူမယ်။ သက်ဝင်ယုံကြည်ပြီး တမန်တော်တွေကိုထောက်ခံလိုက်နာခဲ့သူတွေက သုခဘုံမှာဝင်ရောက်စံမြန်းရမယ်။ သုခဘုံရဲ့ ကြီးကျယ်ခန့်ညားမှုဆိုတာ လူသားတို့ စိတ်ကူးပင်မယဉ်ဖူး၊ စိတ်နှလုံးထဲမှာ အတွေးပင်မသက်ရောက်ဖူးသောထာဝရစည်းစိမ်ချမ်းသာဖြစ်တယ်။ အမိန့်တော်ကို မယုံကြည်ငြင်းပယ်ကာကျောခိုင်းမျက်နှာလွှဲခဲ့သူတွေကို ငရဲမီးထဲသို့ဝင်ရောက်စေမယ်။ တမလွန်ငရဲမီးရဲ့ပြစ်ဒဏ်ဆိုတာဟာ လူသားအနေနဲ့မှန်းဆလို့ပင်မရနိုင်တဲ့ အဆုံးမဲ့အရေးယူမှုဖြစ်တယ်။ သုခဘုံကိုဝင်ရောက်ရသူ၊ ငရဲကျရသူတို့အတွက် သေခြင်းတရားဆိုတာအလျှင်းရှိတော့မှာမဟုတ်ပါ။ စံစားမှုသုခဟာလည်းထာဝရဖြစ်ပြီး ခံစားမှုပြစ်ဒဏ်ဟာလည်းအဆုံးမဲ့ဖြစ်လိမ့်မယ်။

လူတစ်ယောက်အနေနဲ့ အစ္စလာမ်ထဲဝင်ချင်ရင် ဘာလုပ်ရမလဲ။ အစ္စလာမ်သာသနာထဲဝင်ဖို့ သီးသန့်ကျင့်စဉ်၊ ခွင့်တောင်းစရာ တစ်စုံတစ်ဦးဆိုပြီးရှိပါသလား။

လူသားအနေနဲ့ အစ္စလာမ်ဟာ မှန်ကန်တဲ့သာသနာဖြစ်ကြောင်း၊ လောကစကြာဝဠာအပေါင်းကို ဖန်ဆင်းတဲ့အရှင်ရဲ့ သာသနာဖြစ်ကြောင်းကို သိလျှင်သိချင်း လက်ခံလိုက်သင့်တယ်။ ဉာဏ်ပညာအမြာ်အမြင်ရှိသူတစ်ယောက်အတွက် အမှန်တရားဟာ နေလိုလလိုရှင်းလင်းစွာ ပေါ်လွင်ထင်ရှားသွားပြီဆိုရင် အချိန်ဆွဲ တုံ့ဆိုင်းမနေဘဲ လက်ခံလိုက်ဖို့အရေးကြီးလှပါတယ်။ အစ္စလာမ်သာသနာထဲကို ဝင်ရောက်ဖို့က အလွန်လွယ်ကူလှပါတယ်။ ကျင့်စဉ်ကျင့်ရပ်၊ အချိန်နာရီ သတ်မှတ်ချက်မရှိသလို တစ်စုံတစ်ဦး ရှိနေဖို့လည်း မလိုအပ်ပါဘူး။ ဒါပေမဲ့ မွတ်စ်လင်တစ်ယောက်ယောက်ရှိနေတာ၊ အစ္စလာမ့်အဖွဲ့အစည်းတစ်ခုခုမှာ ရောက်ရှိနေတာဆိုရင် ပိုကောင်းပါတယ်။ အစ္စလာမ့်သာသနာရဲ့ ငြိမ်းချမ်းသော နှစ်ဘဝလမ်းအေးရိပ်အောက်သို့လာရောက်ခိုလှုံချင်သူအနေနဲ့ “အလ္လာဟ်အရှင်မြတ်မှအပ အခြားခဝပ်ကိုးကွယ်ထိုက်သော အရှင်မရှိကြောင်းနှင့် တမန်တော်မုဟမ္မဒ်သည် အလ္လာဟ်အရှင်မြတ်၏ စေတမန်တော်ဖြစ်ကြောင်းကို ကျွန်တော်မျိုးသက်သေခံအပ်ပါ၏။” ဆိုသော သက်သေခံချက်ကို နားလည်သဘောပေါက်ကာ ယုံကြည်ခြင်းအတိနှင့် သစ္စာပြုရွတ်ဆိုတာနဲ့ အစ္စလာမ်သာသနာကို ယုံကြည်လက်ခံသည့် မွတ်စ်လင်မ်တစ်ဦးဖြစ်သွားပါမည်။ ဒီ့နောက်မှာတော့ ကျန်ရှိတဲ့အစ္စလာမ့်ကျင့်စဉ်ကျင့်ရပ်၊ အထိမ်းအမှတ်များကို တစ်ဆင့်စီ အေးဆေးစွာသင်ယူသွားပါက မိတ်ဆွေအနေနဲ့ လောကီဘဝရဲ့ အေးချမ်းသာယာမှုနဲ့ တမလွန်ဘဝရဲ့အောင်မြင်မှုကိုရရှိစေမယ်။ ဖန်ဆင်းရှင် အလ္လာဟ်အရှင်မြတ်ရဲ့ အမိန့်တော်များကို တဖြည်းဖြည်းတင်းပြည့်ကျပ်ပြည့် ဦးလည်မသုန် လိုက်နာနိုင်သွားပါလိမ့်မယ်။

အကျယ်တဝန့် ဆက်လက်သိလိုတာတွေအတွက်