الإسلام دين رب العالمين

Nan non Allah, ki gen anpil pitye, epi ki konn fè anpil byen yo.

Islam se relijyon Mèt tout linivè a.

Kiyès ki Mèt ou?

Sa a se pi gwo kesyon ki egziste ; se kesyon ki pi enpòtan yon moun dwe konnen repons li.

Mèt nou an se li menm ki kreye syèl yo ak tè a, li fè lapli desann sot nan syèl yo, epi avèk dlo sa a, li fè fwi ak pyebwa pouse pou bay nou manje, ansanm ak bèt nap elve pou nou manje yo. Se li menm ki kreye nou, li kreye zansèt nou yo, epi li kreye tout bagay. Se li menm ki fè lannwit ak lajounen ; li fè lannwit lan sèvi yon tan pou nou dòmi ak repoze, epi li fè lajounen an sèvi yon tan pou nou chache mwayen pou nou viv ak chache manje. Se li menm ki mete solèy la, lalin lan, zetwal yo ak lanmè yo nan sèvis nou; epi li mete bèt yo nan sèvis nou tou pou nou ka manje vyann yo, bwè lèt yo epi sèvi ak plim yo.

Ki kalite (oswa ki atribi) Mèt tout linivè a genyen?

Mèt la (Senyè a) se li menm ki kreye tout kreyati yo, se li menm ki mennen yo nan verite a ak nan bon chemen an. Se li menm ki jere tout sa kap pase nan lavi tout kreyati yo, epi se li menm ki bay yo tout sa yo bezwen pou yo viv. Li se mèt tout sa ki nan lavi a ak tout sa ki nan lavi aprè a. Tout bagay se pou li yo ye, epi tout sa ki egziste sof li menm, se kreyati li yo ye. Li se Senyè ki toujou Vivan an ki pap janm mouri a,epi ki pa janm dòmi. Se li menm ki Kenbe tout bagay kanpe (Al-Qayyoum), se anba lòd li tout sa ki vivan rete an vi. Mizèrikòd li depase tout bagay, epi pa gen anyen ki kache pou li, ni sou tè a, ni nan syèl la. Pa gen anyen ki sanble avèk li, se li menm ki tande tout bagay epi ki wè tout bagay. Li anlè syèl li yo, li pa bezwen kreyatil yo, men tout kreyati yo bezwen li. Li pa melanje ak kreyatil yo, epi anyen nan kreyatil yo pa ka antre nan li menm. Li sen epi li wo nèt (Sila ki merite egzalte a). Mèt la , Senyè nou an se li menm ki kreye mond sa a nou wè ak zyenou an, ak tout sistèm li yo ki balanse epi ki pa janm fayi ; kit se sistèm kò moun ak kò bèt, kit se sistèm linivè a ki bò kote nou an, ak solèy li, zetwal li yo, ak tout lòt bagay ki ladanl.

Epi, tout sa moun ap adore nan plas Allah pa gen okenn pouvwa pou yo fè tèt yo byen, ni pou yo fè tèt yo mal. Si yo pa ka fè anyen pou pwòp tèt yo, kouman yo ta ka fè moun kap adore yo a byen, oswa pwoteje moun sa a kont malè ?

Ki dwa Mèt nou an genyen sou nou ?

Dwa li genyen sou tout moun nèt, se pou yo adore li sèlman san yo pa ba li okenn asosye. Yo pa dwe adore okenn lòt moun nan plas li oswa ansanm avèl ; yo pa dwe adore ni ròch, ni rivyè, ni objè ki pa gen lavi, ni zetwal, ni okenn lòt bagay. Okontrè, yo dwe rezève tout adorasyon yo nèt pou Allah sèlman, ki se Mèt tout linivè a.

Ki dwa moun genyen sou Mèt yo ?

Dwa moun genyen sou Allah si yo adore li sèlman, se pou li ba yo yon bèl lavi kote yap jwenn sekirite, lapè, kè poze ak satisfaksyon. Epi nan lavi kap vini an (nan paradi a), pou li fè yo antre nan Paradi a kote yap jwenn yon bonè ki pap janm fini epi yap rete la pou toutan. Men, si yo dezobeyi li epi yo pa koute lòd li, lap rann lavi yo di ak malere, menm si yo ta panse yap viv nan plezi ak konfò. Epi nan lavi apre a, lap fè yo antre nan lanfè kote yo pap janm ka soti, epi yap jwenn yon chatiman ak yon soufrans ki pap janm fini.

Poukisa nou egziste? Poukisa Allah te kreye nou?

Mèt nou an ki gen anpil jenerozite fè nou konnen li kreye nou pou yon objektif ki nòb: se pou nou adore li sèlman, san nou pa ba li okenn asosye. Li ban nou misyon tou pou nou devlope tè a nan fè sa ki byen ak nan pote amelyorasyon. Konsa, nenpòt moun kap adore yon lòt bagay nan plas Mèt li ak Kreyatè li, moun sa a pa konprann pou ki rezon li egziste, epi li pa fè devwa li anvè Kreyatè li a. Konsa tou, moun kap simen dezòd sou tè a pa konnen misyon Allah te ba li a.

Kòman pou nou adore Senyè nou an?

Mèt nou an ki gen tout pouvwa pat kreye nou epi lage nou konsa san direksyon, li pat fè lavi nou an san sans. Okontrè, li te chwazi pami lèzòm kèk mesaje (pwofèt) pou voye yo bò kote pèp yo. Mesaje sa yo se moun ki te gen pi bon karaktè, ki te gen nanm ki pi sen, ak kè ki pi pwòp. Allah te voye mesaj li ba yo, kote li te mete tout sa moun dwe konnen sou Senyèz (Allah), ak tout sa ki konsène rezirèksyon moun pou jou Jijman an, ki se jou kote chak moun ap rann kont epi lap jwenn rekonpans oswa pinisyon li. Mesaje yo te moutre pèp yo kouman pou yo adore mèt linivèa; yo te esplike yo fason pou yo fè adorasyon yo, nan ki lè pou yo fè yo, ak ki rekonpans yap jwenn nan lavi sa a ak nan lavi kap vini an. Yo te avèti yo tou sou sa Senyè a entèdi yo manje, sa yo pa dwe bwè, ak sa ki entèdi nan maryaj. Yo te gide yo pou yo gen bèl konpòtman (bon moral), epi yo te anpeche yo swiv move mès ki pa bon.

Ki relijyon ki akseptab devan Seyè a, ki gen tout majeste a?

Sèl relijyon Allah aksepte se Islam. Se relijyon sa a tout pwofèt yo nèt te pote bay lèzòm. Nan jou Jijman an, Allah pap aksepte okenn lòt relijyon pase Islam. Nenpòt lòt relijyon moun swiv ki pa Islam, se yon relijyon ki fo; li pap sèvi moun sa a anyen, okontrè, sa ap rann lavi li malere ni nan mond sa a, ni nan lavi kap vini an.

Ki sa ki fondman relijyon sa a (islam) ak pilye li yo?

Relijyon sa a, Allah rann li fasil pou sèvitè li yo. Prensip ki pi enpòtan yo se pou ou gen lafwa nan Allah kòm sèl Mèt ak sèl Senyè ki egziste, epi pou ou kwè nan zanj li yo, nan liv li yo, nan mesaje li yo, nan jou dènye a, ak nan desten (sa ki fikse pou rive). Apre sa, se pou ou temwaye pa gen okenn lòt dye ki merite adorasyon sof Allah, epi Mouhammad se mesaje Allah. Se pou ou fè lapriyè, bay pòv si ou gen richès ki rive nan nivo pou sa, fè jèn nan mwa Ramadan ki se yon sèl mwa nan ane a, epi al fè pèlerenaj pou Allah nan Ansyen kay (kaba a) pwofèt Abraram (lapè sou li) te bati sou lòd Mèt li a, si ou gen mwayen ak kapasite pou sa. Epi se pou ou evite tout sa Allah entèdi ou, tankou bay Allah asosye , touye moun, fè adiltè , ak manje lajan ki mal sèvi. Si ou gen lafwa nan Allah, ou fè adorasyon sa yo, epi ou evite bagay sa yo ki entèdi, ou se yon mizilman nan lavi sa a; epi nan jou Jijman an, Allah ap ba ou yon bonè ki pap janm fini epiw ap rete pou toutan nan Paradi a.

Èske Islam se yon relijyon pou yon sèl pèp oswa yon sèl ras?

Islam se relijyon Allah pou tout moun nèt. Nan relijyon sa a, pa gen pèsonn ki pi bon pase yon lòt, sof si li gen plis krentif pou Allah epi li fè plis bon aksyon. Devan relijyon an, tout moun egal ego.

Kouman moun fè konnen si mesaje yo (pwofèt yo) ap di laverite tout bon?

Moun rekonèt verite mesaje yo (pwofèt yo) nan plizyè fason, tankou :

Sa yo pote a, ki se laverite ak bon chemen an, se bagay tout lespri ki sen ak tout nati moun ki dwat aksepte. Entelijans lèzòm rekonèt bèlte mesaj sa a, epi pèsonn lòt moun ki pa mesaje Allah pa janm ka pote yon bagay ki sanble ak sa yo te pote a.

Sa mesaje yo te pote a gen ladanl tout sa ki ka rann relijyon moun yo ak lavi yo sou tè a pi bon. Li rann tout zafè yo mache dwat epi li ede yo bati sivilizasyon yo; konsa tou, li pwoteje relijyon yo, lespri yo (entelijans yo), byen yo (lajan yo), ak diyite yo (onè yo).

Mesaje yo (lapè sou yo) pa mande moun okenn pèman (lajan) pou jan yo gide yo nan chemen sa ki byen ak limyè a; okontrè, yap tann se Senyè a ki pou ba yo rekonpans yo.

Sa mesaje yo te pote a se laverite ak yon sètitid ki pa gen okenn dout ladanl; li pa gen kontradiksyon epi li pa boulvèse. Chak pwofèt sètifye sa pwofèt ki te pase anvan yo te di, epi li rele moun nan menm chemen lòt yo te rele yo a."

Allah soutni mesaje yo (lapè sou yo) avèk siy ki klè ak mirak ki fò anpil li fè pase nan men yo; sa sèvi kòm temwayaj solid pou montre se Allah ki voye yo tout bon. Nan tout mirak pwofèt yo, pi gwo mirak la se sa dènye mesaje a, Mouhammad (benediksyon ak lapè Allah sou li), te pote a: ki se Koran ki Sen an.

Kisa Koran ki Sen an ye?

Koran ki Sen an se liv Mèt tout kreyasyon an, se pawòl Allah menm zanj Jibril (lapè sou li) te voye desann sou mesaje Mouhammad (benediksyon ak lapè Allah sou li). Gen ladanl tout sa Allah mande moun konnen sou li menm, sou zanj li yo, sou liv li yo, sou mesaje li yo, sou Jou Dènye a, ak sou desten, kit sa ki rive a bon kit li move. Epi gen ladan li tou tout adorasyon ki obligatwa yo, ak tout sa ki entèdi moun dwe fè atansyon pou yo pa fè. Li gen ladanl bèl konpòtman moun dwe genyen ak move mès moun dwe evite. Li pale sou tout sa ki konsène relijyon moun yo, lavi yo sou tè a, ak lavi aprèa. Koran an se yon liv ki se yon mirak; Allah te defi tout moun pou yo ta pote yon bagay ki sanble avèk . Li se yon liv ki pwoteje jouk Jou Jijman an, nan menm lang li te desann nan; pa manke yon sèl lèt ladanl epi yo pa chanje yon sèl mo ladan li.

Ki prèv ki genyen pou rezirèksyon ak jijman an?

Èske ou pa wè tè a ki mouri epi ki pa gen lavi nan li? Men, kou dlo desann sou li, li kòmanse sekwe epi li fè tout kalite bèl plant pouse. Sètènman, Sila a ki bay tè sa a lavi a, gen pouvwa tou poul bay moun ki mouri yo lavi. Sètènman, Sila a ki te kreye moun ak yon ti gout dlo ki san enpòtans, gen pouvwa poul fè li leve nan jou Jijman an poul ka jijel epi ba li rekonpans li merite a: si se byen li te fè, lap jwenn byen; si se mal li te fè, lap jwenn mal." Sètènman, Sila a ki te kreye syèl yo, tè a, ak zetwal yo, gen pouvwa pou li refè kreyasyon moun nan ankò; paske refè moun yon dezyèm fwa pi fasil pase kreyasyon syèl yo ak tè a.

Kisa ki pral pase nan Jou Jijman an?

Mèt la ki gen tout pouvwa ak tout glwa ap fè tout kreyati yo leve soti nan tonbo yo, apre sa, lap jije yo daprè aksyon yo. Konsa, moun ki te gen lafwa epi ki te kwè nan mesaje yo, lap fè yo antre nan Paradi a; kote ki gen yon bonè kap pap janm fini a, yon bèlte ki tèlman fò ke moun pa ka menm imajine sa nan lespri yo. Men, moun ki te voye verite a jete, lap fè yo antre nan lanfè; kote ki gen yon chatiman kap dire pou toutan epi ki tèlman rèd ke moun pa ka menm sispèk sa. Depi yon moun fin antre nan Paradi oswa nan Lanfè, li pa janm mouri ankò; lap rete la pou toutan, swa nan bonè nèt ale, swa nan soufrans nèt ale."

Si yon moun vle antre nan Islam, kisa pou li fè? Èske gen seremoni espesyal li dwe fè, oswa èske li bezwen pèmisyon nan men kèk moun?

Si yon moun vin konnen relijyon ki verite a se Islam, epi li konnen se relijyon Mèt tout kreyasyon an, li dwe prese antre ladanl; paske yon moun ki gen lespri, depi verite a parèt klè devan zye li, li dwe kouri dèyèl epi li pa dwe janm ranvwaye desizyon sa a pou pita. Epi nenpòt moun ki vle antre nan Islam, li pa oblije fè okenn seremoni espesyal, ni li pa oblije devan okenn lòt moun poul fè sa. Men, si sa fèt devan yon mizilman oswa nan yon sant islamik, se yon trè bèl bagay; sinon, li sifi pou li di: (Mwen temwaye pa gen okenn lòt dye ki merite adorasyon sof Allah, epi mwen temwaye Mouhammad se mesaje Allah), pandan li konnen sa sa vle di epi li kwè ladanl ak tout kè li.Konsa, li vin mizilman; apre sa, lap aprann rès lwa Islam yo tikras pa tikras, poul ka fè sa Allah mandel fè.

Pou plis enfòmasyon :