Most Searched
Rezime istwa lavi Pwofèt Mouhammad (ke benediksyon ak lapè Allah poze sou li)
Yon liv tou kout sou Istwa lavi Pwofèt la, ki egzamine evènman ki pi enpòtan nan lavi Pwofèt la (ke benediksyon ak lapè Allah poze sou li) depi nan nesans li ak jan li te grandi, pase nan kòmansman revelasyon an ak mesaj li te preche , emigrasyon an ansanm ak batay yo, rive nan moman lanmò li (ke benediksyon ak lapè Allah poze sou li), avèk yon stil ki fasil epi senp ki rasanble prezantasyon evènman yo ansanm ak benefis ak leson nou ka tire ladan yo; pou li ka sèvi kòm yon èd pou moun konnen gidans li epi pran li kòm modèl.
These files are generated automatically from the book's text; their layout may differ from the printed edition.
Yon kout rezime sou istwa lavi Pwofèt Muhammad (ke benediksyon ak lapè Allah poze sou li)
Prepare pa
Komite Syantifik nan Asosyasyon pou Sèvis Kontni Islamik nan plizyè Lang
Entwodiksyon an.
Nan non Allah, tout louwanj pou Allah, epi se pou benediksyon ak lapè poze sou dènye Pwofèt la. Aprè sa :
Donk, sa a se yon kout rezime sou istwa lavi pi gran pami tout pwofèt ak mesaje yo, dènye pwofèt la, epi pi gran pami tout pitit Adan yo nèt. Li menm (ke benediksyon ak lapè Allah poze sou li), li se modèl pafè a, ak pi bèl egzanp lan ; mond lan pa janm wè pèsonn ki gen yon grandè ki ka konpare avè l. Anfèt, konpòtman l se te Koran an. Se sa ki fè, lè yo te poze manman kwayan yo, Aicha (ke Allah satisfè avèk li), kesyon sou karaktè Mesaje Allah a (ke benediksyon ak lapè Allah poze sou li), li te reponn : « "Èske ou pa li Koran an ?" Mwen reponn : "Wi." Li di : "Enben, konpòtman Pwofèt Allah a (ke benediksyon ak lapè Allah poze sou li) se te Koran an." » [Rapòte pa Mouslim], Men sa senyè toupwisan an di: 4- « Epi vrèmanvre, ou gen yon karaktè ki gran anpil. » [Al-Qalam: 4].
Anfèt, si nou ap li istwa lavi li ki tèlman bèl la, se sitou pou nou ka tire bon konsèy ak leson ladan l ; paske li se gid nou, sila a nou pran kòm modèl nan lafwa nou, nan aksyon nou, ak nan pawòl nou ; kòm yon fason pou nou obeyi pawòl Allah (Trèwo a) kote Li di : 21- « Vrèmanvre, nou jwenn nan Mesaje Allah a yon bèl modèl pou nenpòt moun ki mete espwa li nan Allah ak nan Dènye Jou a, epi ki sonje Allah anpil. » [Sourat Al-Ahzab vèsè 21].
Nou ekri istwa lavi sa a nan yon fason ki senp epi fasil, ki apwopriye pou granmoun epi ki bon anpil pou anseye timoun. Nou prezante li kòm yon istwa kap deroule, kote nou makònen evènman yo ansanm ak leson nou ka tire ladan yo. Epitou, nou ranje l sou fòm yon seri leson ki byen swiv nan lòd, yon fason pou li ka pi fasil pou moun konprann epi kenbe nan lespri yo.
Nan liv sa a, nou chita sitou sou pwen esansyèl yo ansanm ak evènman ki pi enpòtan nan istwa lavi l, san nou pa antre nan tout ti detay yo. Istwa a kòmanse depi lè li fèt (ke lapè ak benediksyon Allah poze sou li) pou rive jouktan li mouri (ke benediksyon ak lapè Allah poze sou li).
Nou priye Allah, ki gen tout Grandè a, pou li fè travay sa a itil, pou li fè li jwenn yon bèl akseptasyon, epi pou li padone nou ansanm avèk nou tout.
(1) Objektif Mesaj yo
Tout mesaj ki soti nan Allah yo pataje menm gwo objektif yo ; men ki jan nou ka rezime yo:
Premyèman : Envite lèzòm adore Allah Li menm sèl, epi abandone adorasyon tout lòt bagay ki pa Li. Jan Allah (Trèwo a) di l la : 25- Nou pa te voye okenn mesaje anvan ou (Muhammad), san Nou pa te revelel sa: 'Pa gen lòt dye ki merite adorasyon pase Mwen (Allah). Konsa, se Mwen menm sèl pou nou adore.' [Sourat Al-Anbiya: 25].
Dezyèm nan: retire moun yo nan fènwa pa kwè nan Allah ak fènwa asosye lòt bagay ak Allah, pou mennen yo nan limyè inite Allah (Tawhid), Allah Granmèt la di: "Allah se pwotekè moun ki gen lafwa yo; Li retire yo soti nan tenèb pou li mennen yo nan limyè. Kanta pou moun ki pa kwè yo, se fòs rebèl yo ki pwotekè yo; yo retire yo soti nan limyè pou mennen yo nan tenèb. Moun sa yo se moun dife a; y ap rete ladan li pou toutan." [Sourate Al-Baqarah: 257], Men sa senyè toupwisan an di: 16- Avèk li (Liv la), Allah gide moun kap chèche fè Li plezi nan chemen lapè yo. Li fè yo soti nan fènwa pou yo al nan limyè ak pèmisyon li , epi Li gide yo sou yon chemen ki dwat. [Sourate Al-Ma'idah:16].
Twazyèmman: Kreyati yo pa dwe pran youn lòt kòm mèt (seyè) nan plas Allah. Allah Trèwo a di: 64: Di: O nou menm moun ki te resevwa Liv la! Vini non pou nou antann nou sou yon sèl pawòl ki valab ni pou nou ni pou ou : Ke nou pa dwe adore pèsonn esepte Allah, nou pa dwe bay li okenn asosye, epi pèsonn nan nou pa dwe pran lòt moun kòm mèt nan plas Allah. Si yo vire do yo, lè sa a di yo: 'Temwaye ke nou menm, nou se Mizilman (moun ki soumèt devan Allah).' [Sourat Al Imran: 64], Men sa senyè toupwisan an di: 80- Epi li pa kòmande nou tou pou nou pran zanj yo ak pwofèt yo kòm mèt. Èske li tap kòmande nou pou nou tonbe nan mekreyans aprè nou fin vin Mizilman (moun ki soumèt devan Allah) ?" [Surah Al Imran:80].
Katriyèmman : Rejte Taghout (tout sa yo adore ki pa Allah). Men sa Allah ki gen tout pouvwa a di: "...konsa, nenpòt moun ki rejte fo dye yo (Taghout) epi ki kwè nan Allah, moun sa a kenbe yon kòd ki byen solid, ki pap janm kase. Epi Allah Tande tout bagay, Li Konnen tout bagay." [Sourate Al-Baqarah:256], Kidonk, yon mizilman dwe kwè fèm ke tout sa moun adore apa Allah, se yon fo dye.
Senkyèm nan : Rejte Chirk (bay Allah asosye) epi pran distans ak moun kap pratike li yo, jan Allah ki Trèwo a di : « Nou genyen yon bèl egzanp nan Ibrawim (Abraram) ak moun ki te avè l yo, lè yo te di pèp yo a : "Nou pran distans nou avèk nou ansanm ak tout sa nap adore ki pa Allah yo. Nou rejte nou. Gen lènmi ak rayisab ki tabli aklè ant nou menm avèk nou pou tout tan, jiskaske nou kwè nan Allah, Li menm Sèl..." » [Sourat Al-Mumtahanah:4].
Kidonk, tout pwofèt yo (ke lapè Allah sou yo) te envite pèp yo pou yo swiv gwo prensip fondamantal sa yo.
Sizyèm nan : Tout relijyon an (ak adorasyon an) dwe pou Allah nèt, jan Allah ki Trèwo a di : 39- « Epi konbat yo jiskaske pa gen okenn "Fitnah" (pèsekisyon oswa adorasyon fo dye) ankò, epi pou tout relijyon an vin pou Allah nèt. Men, si yo sispann, sètènman Allah wè tout sa yap fè byen klè. » [sourat Al-Anfal vèsè 39], Men sa senyè toupwisan an di: « Se Li menm ki te voye Mesaje Li a avèk gidans lan ansanm ak relijyon verite a, pou Li ka fè l triyonfe (parèt pi wo) sou tout lòt relijyon yo nèt. Epi Allah sifi kòm temwen. » [Sourat Al-Fath:28], Kidonk, kreyati yo pa dwe adore Allah nan okenn lòt fason apa nan relijyon Islam nan, jan Allah ki Trèwo a di : 85- « Nenpòt moun kap chache yon lòt relijyon ki pa Islam, yo pap janm aksepte sa nan men li, epi nan lavi apre lanmò a, lap pami moun kap pèdi yo. » [Sourat Al Imran:85].
Setyèm nan : Aji dapre lwa (Chariya) Allah a nan tout zafè lavi a, kit se nan relijyon, kit se nan zafè mond sa a. Epi, moun yo pa dwe swiv okenn lòt lwa ki pa lwa Allah a, jan Allah ki Trèwo a di : 21- « Oubyen èske yo genyen asosye ki etabli lwa pou yo nan relijyon an san pèmisyon Allah ? Si se pa te yon desizyon Li te gentan pran (pou ranvwaye jijman an), koze a tap gentan regle pami yo. Sètènman, gen yon chatiman kap fè mal anpil ki pare pou moun ki enjis yo [Sourat Ash-Shura:21].
(2) Entwodiksyon sou lavi Pwofèt la
Premyèman: Definisyon Istwa lavi Pwofèt la:
« Se syans ki kouvri tout sa yo rapòte ban nou sou lavi Pwofèt la (Se pou lapè ak Benediksyon Allah kouvril) tradisyon li yo (Sounnah), aparans fizik li, karaktè moral li, ansanm ak kanpay ak ekspedisyon militè li yo, kòmanse depi lè li te fèt jiskaske li retounen al jwenn Granmèt li a. »
Dezyèmman : Benefis ak enpòtans nan etidye biyografi Pwofèt la :
1- Akonplisman temwayaj mesaje a : Paske, lè nou etidye lavi Pwofèt la (ke lapè ak Benediksyon Allah kouvril) nou egzamine fason li te konn viv epi nou swiv chemen li, lafwa ak konviksyon sèvitè a ogmante. Sa pèmèt li akonpli toutbonvre temwayaj ki di : « Mouhammad se mesaje Allah ».
2- Modèl ak egzanp lan : Pou Pwofèt la (Lapè ak Benediksyon Allah kouvril) ka sèvi kòm limyè pou gide nou, ak egzanp pafè pou nou swiv nan tout aspè nan lavi nou, jan Allah ki Trèwo a di : « Sètènman, nou genyen nan Mesaje Allah a yon bèl egzanp pou nenpòt moun kap mete espwa li nan Allah ansanm ak nan Dènye Jou a, epi ki sonje Allah anpil. » [Sourat Al-Ahzab vèsè 21].
3- Konprann Koran an (Al-Qur'an) ki Nòb la: paske lavi Pwofèt la (Sira) se aplikasyon pratik vèsè Liv ki gen anpil valè a; paske konpòtman li (se pou lapè ak Benediksyon Allah kouvri li) se te Koran an, epi se atravè li nou rive konnen nan ki kontèks vèsè yo te desann ansanm ak objektif revelasyon an.
4- Konprann Sounna Pwofèt la: Se atravè pozisyon li yo ak aksyon li yo (Ke la lapè ak benediksyon Allah sou li), ke siyifikasyon adis li yo ak aplikasyon reyèl yo vin klè pou nou.
5- Kiltive lanmou pou li (Ke lapè ak Benediksyon Allah kouvril) : Paske lanmou vini apati konesans. Epi pa gen okenn fason pou nou rive konnen gwo favè li ak kokennchenn valè l genyen, eksepte lè nou etidye detay sou lavi li ansanm ak tout sakrifis li te fè yo.
6- Tire leson ak jwenn bon konprann : Pou nou ka tire leson ak ansèyman nan lavi l (ke lapè ak Benediksyon Allah kouvril) paske se li menm ki modèl nan gen pasyans lè gen eprèv, nan montre rekonesans lè gen byenfè, epi nan kenbe fèm nan kèlkeswa sikonstans lan
7- Jwenn bònè nan toulède mond yo : Paske, pa gen okenn reyisit nan lavi isiba, ni okenn siksè nan lavi apre lanmò a, eksepte lè nou mache nan tras li epi nou pran egzanp sou gidans li (Se pou lapè ak Benediksyon Allah kouvril)
Twazyèmman : Pami pratik Salaf yo (premye jenerasyon mizilman yo) nan etidye biyografi a :
Bon zansèt yo (Salaf yo) te byen konprann valè syans sa a ; se sa ki fè, yo te konn atache avè l epi etidye li avèk menm atansyon yo te konn bay Koran Sen an :
Zayn al-Abidin Ali bin Al-Hussein bin Ali (se pou Allah satisfè ak yo) te di : «Yo te konn aprann nou kanpay militè Mesaje Allah a (se pou lapè ak Benediksyon Allah kouvri li) ak ekspedisyon li yo, menm jan yo te konn aprann nou yon sourat nan liv Koran an.»
Epi Ismayil bin Muhammad bin Saad bin Abi Waqqas (se pou Allah satisfè ak yo) te di : «Papa mwen te konn anseye nou istwa batay Mesaje Allah a (ke lapè ak benediksyon Allah sou li), epi li te konn di: O pitit mwen yo, sa yo se gwo zèv zansèt nou yo, kidonk pa kite souvni yo pèdi.» [Gade: Al-Jami‘ li Akhlaq ar-Rawi wa Adab as-Sami‘ pa Al-Khatib Al-Baghdadi 2/ 287 - 288].
(3) Jeneyaloji onorab Pwofèt la (Ke la lapè ak benediksyon Allah sou li).
Premyèman: Jeneyaloji l sou bò papa li :
Li se Mizèrikòd la ki se yon kado, ak byenfè yo akòde a: Abou Al-Qasim Mouhammad pitit Abdoullah, pitit Abdoul-Mouttalib, pitit Hachim, pitit Abdoul-Manaf, pitit Qousayy, pitit Kilab, pitit Mourrah, pitit Ka'b, pitit Lou'ayy, pitit Ghalib, pitit Fihr, pitit Malik, pitit An-Nadr, pitit Kinanah, pitit Khouzaymah, pitit Moudrikah, pitit Ilyas, pitit Moudar, pitit Nizar, pitit Ma'add, pitit Adnan.
Epi Jeneyaloji nòb sa a remonte jiska pwofèt Allah a, Ismayèl, pitit gason Abraham (ke lapè ak benediksyon Allah sou yo).
Dezyèmman : Jeneyaloji li sou bò manman li :
Li se: Amina bint Wahb, pitit Abdoul-Manaf, pitit Zouhra, pitit Kilab, pitit Mourra. Epi liy fanmi manman Pwofèt la (lapè ak benediksyon Allah sou li) rankontre ak liy fanmi papa li nan granpapa a "Kilab pitit Mourra", sa ki montre ke orijin li soti pami fanmi ki pi onorab ak pi pwòp nan Qouraych sou tou 2 bò yo.
Ansenyman nou tire yo :
1- Jeneyaloji li (Se pou lapè ak benediksyon Allah kouvril) konekte ak papa pwofèt yo, Ibrahim (se pou lapè sou li), sa ki konfime kontinwite pwofesi a nan pyebwa jeneyalojik beni sa a.
2- Jeneyaloji li (se pou lapè ak Benediksyon Allah kouvril) kouvri ak pi gwo lonè a absoliman; li donnen soti nan yon rasin ki san tach, epi li pote eritaj ki pi bèl la. Se Allah ki te chwazi li nan kè pi bon tribi yo, pou li te ka wè jou anndan fanmi ki gen plis grandè ak prestij yo. Pami sa, gen pawòl li, (ke lapè ak benediksyon Allah sou li): « Sètènman, Allah te chwazi Kinana pami desandan Ismayil yo, Li te chwazi Quraysh pami Kinana, Li te chwazi Bani Hashim pami Quraysh, epi Li te chwazim pami Bani Hashim. » [Rapòte pa Mouslim].
(4) Nesans li (ke lapè ak benediksyon Allah sou li) ak anfans li.
Lanmò papa li: Papa li te mouri (lapè ak benediksyon Allah sou li) pandan li te yon fetis nan vant manman li.
Nesans li : Pwofèt la (se pou lapè ak Benediksyon Allah kouvril) te fèt nan vil Lamèk nan Ane Elefan an, yon jou Lendi. Sepandan, te gen divèjans (diferans nan opinyon) sou dat ak mwa egzak jou sa a te tonbe. Gen moun ki di se te dezyèm jou nan mwa Rabi’ al-Awwal la; gen lòt ki di se te twazyèm, nevyèm, dizyèm, oubyen douzyèm jou nan menm mwa a. Gen opinyon tou ki rapòte li te fèt nan mwa Safar, epi lòt ki di se te nan mwa Rabi’ al-Akhir.
Nouris li yo (madam ki te bal tete yo): Halima as-Sa'diyyah te ba li tete, ak Touwayba, esklav tonton li (frè papa li) Abu Lahab, epi se li menm ki te premye moun ki te ba li tete apre manman li, epi moun ki te pran swen li se te Umm Ayman Barakah al-Habashiyyah, esklav afwanchi papa li.
Evènman fann pwatrin lan: Sa te rive lè li (lapè ak benediksyon Allah sou li) te piti nan dezè Bani Sad; nan epòk li tap tete nan men Halima As-Sadiyya, zanj Gabriyèl (Jibril), kè poze sou li, te vin jwenn li pandan li tap jwe ak lòt ti gason yo, epi li te gen anviwon katran (4 an). Se konsa, li te fann pwatrin li, li retire yon boul san ladan li, epi li di: « Sa a se pati Satan an ki te nan ou a », apre sa, li lave kè li anndan yon bòl an lò avèk dlo Zamzam. [Mouslim rapòte l].
Lanmò manman l ak granpapa l : Manman l, Amina, te mouri nan zòn Al-Abwa pandan li tap tounen avèk li (Ke lapè ak Benediksyon Allah kouvril) nan vil Lamèk, sot nan yon vizit yo te al rann tonton papa li yo (fanmi Bani Adi bin An-Najjar). Nan moman sa a, li te gen sizan sèlman. Konsa, granpapa li, Abdul Muttalib, te pran li sou respoksabilitel, Aprèsa, granpapa li te vin mouri tou lè li te gen 8 ane , epi se tonton li, Abu Talib, ki te pran responsablite li apre sa.
Leson nou tire yo:
1- Pwofèt la (lapè ak benediksyon Allah sou li) te fèt òfelen, epi manman li te mouri lè li te piti, epi nan sa genyen yon konsolasyon pou moun ki pèdi papa li oswa manman li pandan li piti, epi ak plis rezon ankò pou moun ki pèdi yo tou 2 lè li gran.
2- Swen ak pwoteksyon Allah te genyen pou Pwofèt Li a depi nan anfans li ; pami egzanp ki montre sa, nou jwenn pawòl Allah Trèwo a ki di : 6- « Èske Li pa te jwenn ou òfelen, epi Li te ba ou refij ? "[Ad-Duha: 6]." Sa vle di : Li te jwenn ou alòske 2 paran ou yo te gentan mouri, epi ou pa te gen okenn mwayen pou ou te pran swen tèt ou. Konsa, Allah te ba w refij, Li te pwoteje w, epi Li te dispoze granpapa ou ، Abdul Muttalib, pou li okipe w. Aprèsa, lè granpapa w vin mouri, tonton w, Abu Talib, te pran responsablite w.
3- Nou dwe konnen se Allah ki vrè Pwotektè ak Gadyen sèvitè a ; paske gade, Pwofèt sa a (Se pou lapè ak Benediksyon Allah kouvril) te grandi kòm yon òfelen, epi Allah te dispoze moun pou pran responsablite li. Aprèsa Li te voye li bay lèzòm, Li fè li tounen pi bon pami tout pitit Adan yo nèt, ak yon modèl pou tout linivè.
Pirifikasyon kè Pwofèt la (Se pou lapè ak Benediksyon Allah kouvril) ansanm ak prezèvasyon li kont move enfliyans Satan depi nan anfans li. Paske, Allah Trèwo a te prepare li pou pwofesi a, lè Li te pirifye kèl ni fizikman, ni espirityèlman.
5- Pwen enpòtan : Pa gen okenn prèv ki etabli nan men Pwofèt la ( Se pou lapè ak Benediksyon Allah poze sou li) ni nan men Konpayon li yo (se pou Allah satisfè ak yo), ki montre yo te konn konsakre nwit oswa jou nesans li pou okenn selebrasyon oubyen pou yon zak adorasyon byen presi. Kidonk, pi gwo byen an chita nèt nan swiv egzanp yo, epi nan evite sa yo pa te pratike.
(5) Lavi Pwofèt la (ke lapè ak Benediksyon Allah kouvril) anvan Misyon Pwofetik la : Sa se peryòd ki te vin anvan desant Revelasyon an, yon etap kote li pa te ko ni yon pwofèt ni yon mesaje.
Pwoteksyon Allah sou Pwofèt Li a : Pwofèt la (Se pou lapè ak Benediksyon Allah kouvril) te grandi byen lwen koutim ak pratik politeyis epòk Inyorans lan . Li pa te janm pwostène devan okenn zidòl, li pa te janm pran nan bwason entoksikan, epi li pa te janm komèt okenn zak imoral. Li te moun ki te gen pi bon kalite moral yo ak moun ki te pi sensè nan pawòl li, jiskaske yo te vin ba li tit « As-Sadiq Al-Amin » (Veridik la, Moun ki diy de konfyans lan). Li te toujou kenbe bon jan relasyon ak fanmi li, li te konn onore envite, epi li te konn pote moun ki pòv yo sekou.
Premye vwayaj nan peyi Siri (Cham) a: Li te vwayaje avèk tonton li, Abu Talib, pou ale nan peyi Siri, epi li te gen douzan.
Lagè Fijar la: Pwofèt la (Kè poze ak benediksyon Allah sou li) te temwen lagè sa a lè li te gen 14 oswa 15 zan. Lagè a te fèt ant tribi Quraysh ak Kinana ki tap goumen kont tribi Qays 'Aylan. Wòl Pwofèt la nan batay sa a se te ede tonton li yo; sa vle di, li te konn ranmase flèch epi lonje yo ba yo pou yo te ka tire sou lènmi yo.
Alyans Foudoul la : Li te prezan nan alyans sa a, kote tribi Lamèk yo te fè sèman pou yo defann nenpòt moun yap fè enjistis, jiskaske yo remèt moun nan dwa li.
Travay ak mwayen pou viv : Li te konn travay kòm bèje pou abitan Lamèk yo an echanj yon salè. Apre sa, nan jenès li, li te vwayaje yon dezyèm fwa nan peyi Cham kòm komèsan, avèk lajan Khadija (se pou Allah satisfè ak li).
Maryaj li: Lè Kadidja (se pou Allah kontan avè l) te wè onètete li ak benediksyon ki te genyen nan komès li a, li te vle marye avè l, epi li te marye avèk li lè li te gen vennsenkan (25 an).
Retrèt li ak adorasyon li : Li te renmen retire kò l apa pou li adore Allah nan twou wòch Hira a. Li te konn pote manje ak sa pou li bwè, epi li te pase plizyè nwit ap fè retrèt espirityèl nan gwòt la, jouk lè li te resevwa revelasyon an.
Rekonstriksyon Kaba a : Lè li te gen 35 ane, tribi Quraysh la tap rebati Kaba a. Yo te vin nan gwo dezakò sou kiyès ki ta dwe plase Wòch Nwa a nan plas li, jouk yo te manke goumen. Konsa, yo te antann yo pou yo chwazi premye moun ki tap parèt kote yo ye a kòm jij. Epi, se te Pwofèt la (Kè poze ak benediksyon Allah sou li) ki te vin parèt an premye. Lè yo wè li, yo di : "Men moun yo fè konfyans lan (Al-Amiyn), nou dakò avèk li." Li te mete wòch la nan yon moso twal epi li mande chèf tribi yo pou yo chak kenbe yon kwen nan twal la pou yo leve li ansanm. Apre sa, li pran l ak pwòp men beni li a, epi li poze li nan plas li.
Leson nou tire yo:
1- Allah te pwoteje Pwofèt Li a (Kè poze ak benediksyon Allah sou li) kont idolatri ak peche anvan misyon pwofetik la. Epi sa fè pati premye siy ak prèv ki ateste li tap vin pwofèt.
2- Yo te konnen li( kè poze ak benediksyon Allah sou li) kòm « As-Sadiq Al-Amin » (Moun ki veridik la, Moun yo fè Anpil konfyans la). Kalite sa yo te pi gwo prèv ki te montre li tap di verite a; paske yon moun ki kenbe kò li lwen manti nan relasyon li ak moun, li pa ka janm bay manti sou Allah.
3- Enpòtans verite ak onètete : Yo se pi gwo kalite yon moun ki gen lafwa, epi se gras ak yo yon moun jwenn konfyans ak lanmou lòt moun.
4- Pwofèt la (Ke lapè ak Benediksyon Allah sou li) te toujou bay sa ki halal yon gwo enpòtans nan lavi l, li te travay ak pwòp men l: li te konn gade mouton epi li te fè komès. Sa anseye nou enpòtans pou nou fè efò nan sa nap fè epi sèvi ak mwayen ki disponib yo.
5- Imilite : Pwofèt la (ke lapè ak benediksyon Allah sou li) pa te wont mansyone travay li te konn fè nan gade mouton apre li te fin vin yon pwofèt, pou li te ka anseye nou ke travay se yon onè; li te di (ke lapè ak benediksyon Allah sou li): « Allah pa janm voye yon pwofèt san li pa te gade mouton. » Konpayon li yo mande l: « E ou menm tou, O Mesaje Allah ? » Li reponn: « Wi, mwen menm tou, mwen te konn gade yo pou abitan Lamèk yo an echanj kèk pyès lajan. » [Se Al-Boukari ki rapòte li].
6-Bon sans : Nan sitiyasyon kote yo tap mete Wòch Nwa a, li te demontre yon gwo entèlijans ak anpil sajès pou evite san koule epi satisfè tout moun; se yon lide ki te echape gran chèf nan tribi Korech yo.
(6) Kòmansman Revelasyon an epi fason li te desann sou Pwofèt la (se pou lapè ak benediksyon Allah kouvri li)
Kòmansman Revelasyon an: Premye siy revelasyon ak pwofesi a te kòmanse parèt lè Pwofèt la, (se pou lapè ak benediksyon Allah kouvril) te gen karantan (40 an).
Vizyon (rèv) ki toujou vrè yo: Premye fason revelasyon an te kòmanse parèt sou li se te "vizyon (rèv) ki toujou vrè yo"; konsa, li (Se pou lapè ak benediksyon Allah poze sou li) pat janm fè yon rèv nan dòmi li ki pat rive vrèman nan reyalite, klè kou dlo kokoye, menm jan solèy leve nan maten, Epi, bò kote Manman Kwayan yo, Aicha (ke Allah satisfè avèk li), li te di: « Premye sa Mesaje Allah la (ke lapè ak benediksyon Allah sou li) te kòmanse avèk li a se vrè rèv la... » [Tout moun tonbe dakò sou li].
Nan gwòt Hira a: Pandan Pwofèt la (ke lapè ak Benediksyon Allah kouvril) te pou kont li ap adore Allah nan gwòt la, zanj Gabriyèl (Gibril) te pote revelasyon an ba li soti nan Allah Toupwisan an.
Zanj Gabriyèl (Jibril), kè poze sou li, « Li ! ». Pwofèt la reponn : « Mwen pa konn li ». Zanj la repete sa 3 fwa, epi nan twazyèm fwa a, Gibril te li kòmansman sourat Al-Alaq la pou li : 1-Li nan non Senyè ou a, Li menm ki te kreye a 2-Li te kreye moun n soti nan yon moso san ki kole. 3-Li, epi Seyèw la se Limenm ki gen plis jenerozite. 4-Se li menm ki te aprann moun sèvi ak plim pou yo ekri. 5- Li te aprann moun sa yo pat konnen. [Al-Alaq: 1-5]. Epi sa yo te premye vèsè ki te revele nan Koran an. [Tout moun tonbe dakò sou li].
Sipò Kadidja (se pou Allah kontan avèl) pou Pwofèt la (Se pou lapè ak benediksyon Allah poze sou li): Pwofèt la (Se pou lapè ak benediksyon Allah poze sou li) te tounen lakay madanm li Kadidja pandan li tap tranble akòz gravite sitiyasyon an, li rakontel sak te pase a, epi li te rasirel, li di li konsa: « Non, mwen fè sèman Nan non Allah, Allah pap janm mete ou nan lawont ! Ou toujou konsève lyen fanmi ou, ou di verite a toutan, ou pote chay moun ki fèb yo, ou bay moun ki nan nesesite yo, ou akeyi envite ou yo ak tout kè ou, epi ou soutni moun nan moman difisil ak gwo eprèv. »
Bòn nouvèl Waraqa ibn Nawfal : Apre sa, Khadija( ke Allah satisfè avèk li) te mennen Pwofèt la (ke lapè ak Benediksyon Allah kouvril) bay kouzen li, Waraqa ibn Nawfal. Li te yon savan nan mitan kretyen yo, epi li te fè pati moun ki te rete fèm sou relizyon Abraram lan (ke lapè sou li) . Li te konn ekri an arab nan Evanjil la sa Allah te vlel ekri a. Lè li te tande sa ki te rive Pwofèt la (Se pou lapè ak Benediksyon Allah kouvril) nan gwòt Hira a, li te di : «Sa a se menm zanj lan Allah te voye bò kote Moyiz . O! Mwen ta swete jenn epi djanm toujou! Mwen ta swete vivan toujou lè pèp ou a pral metew deyò nan vil la!» Mesaje Allah a (Lapè ak benediksyon Allah poze sou li) mandel: «Èske yap mete m deyò vre?» Waraka reponn li: «Wi, pa janm gen yon moun ki pote saw pote la a san yo pat pèsekitel. Si mwen ta vivan jou sa a rive, map ba ou yon gwo sipò solid.» Aprèsa, pat pran lontan pou Waraka te mouri, epi revelasyon an te sispann pou yon ti tan, jiskaske Mesaje Allah (Lapè ak benediksyon Allah poze sou li) te vin tris anpil. [Tout moun tonbe dakò sou li].
Revelasyon an te sispann pou yon ti tan, epi apre sa, kòmansman sourat Al-Muddaththir te desann : 1: O ou menm ki vlope nan rad la! 2: Leve, epi bay avètisman ! 3:Epi pwoklame grandè Senyè ou a 4: Epi rad ou yo, netwaye yo. 5: Epi abandone tout idolatri [Al-Mouddassir: 1-5].
Leson nou tire yo:
1-- Laj karantan (40) an : Allah te chwazi laj sa a pou desann revelasyon an, paske li reprezante matirite konplè lespri a ak fòs konpreyansyon an, jan Allah Toupwisan an te di a : « ...jiskaske li rive nan tout fòs matirite li epi li atenn laj karantan (40) an... » Vèsè 15 nan Sourat Al-Ahqaf
2- Pwofèt la (Se Lapè ak Benediksyon Allah kouvril) te pase karantan (40) an ap viv nan mitan moun li yo anvan Allah te chwazi li kòm pwofèt; bèl vi li te mennen nan mitan yo se te pi gwo prèv ki montre li tap di laverite sou misyon li ak mesaj li tap bay la.
3- Allah te prepare pwofèt Li a pou gwo misyon revelasyon an Gras avèk rèv ak vizyon ki te toujou reyalize toutbon, epi Li te fè l renmen mete kò li poukont li pou medite.
4- Enpòtans pou yon mizilman rezève yon ti tan poukont li ak Seyè li a, pou li sonje Allah epi medite sou grandè wayòm Li an.
5- Enpak yon bon madanm : Sa parèt byen klè nan fason Kadidja (se pou Allah satisfè ak li) te aji epi konsole mari l; li se yon bèl modèl nan bay soutyen ak kanpe fèm bò kote lòt nan moman difisil.
6- Fason Kadidja (se pou Allah satisfè ak li) te sèvi ak bon konpòtman Pwofèt la (Se pou lapè ak Benediksyon Allah kouvril) kòm prèv pou montre Allah ap toujou pwoteje l; paske lè yon moun gen bon kalite moral, se yon gwo rezon pou li sove anba sa ki mal.
7- Premye lòd Pwofèt la te resevwa nan Sourat Al-Moudassir, se te pou li envite moun adore Allah Sèlman epi avèti yo pou yo pa mete anyen ak Li; paske kwayans nan yon sèl Allah a se fondasyon relijyon an epi se devwa ki pi enpòtan an.
Imam Al-Tabari (se pou Allah Toupwisan an fè l mizèrikòd) te di nan kòmantè li sou vèsè sa a : Konsènan pawòl Allah a : ﴿Leve, al bay avètisman!﴾, Allah, Glwa pou Li) di pwofèt Li a, Muhammad (Se pou lapè ak Benediksyon Allah kouvril) konsa : « Leve kote w kouche a, avèti pèp ou a sou chatiman Allah a, yo menm ki mete lòt dye ansanm ak Allah epi kap adore lòt bagay nan plas Li. [Tafsir Al-Tabari (Tòm 23 / paj 9)].
(7) Travay predikasyon Pwofèt la (ke lapè ak Benediksyon Allah kouvril) nan Lamèk
Predikasyon an sekrè : Travay predikasyon an te kòmanse an kachèt nan Lamèk pandan anviwon twazan. Premye moun ki te anbrase Islam nan mitan medam yo se te madanm li, Kadija pitit fi Kouwaylid; nan mitan gason yo, se te Abou Bakr As-Siddiq; nan mitan timoun yo, se te Ali pitit gason Abou Talib; nan mitan moun ki te libere anba esklavaj yo, se te Zayd pitit gason Arisa; epi nan mitan esklav yo, se te Bilal Etyopyen an (se pou Allah satisfè ak yo tout nèt).
Gras avèk travay predikasyon Abou Bakr la, yon gwoup konpanyon remakab te vin anbrase lafwa; pami yo te genyen : Ousman pitit gason Afan, Abdourahmann pitit gason Awf, Sad pitit gason Abou Wakas, Sayid pitit gason Zayd, ak Abou Oubayda pitit gason Al-Jarah.
Kay Al-Arkam : Premye mizilman yo te konn reyini ansanm ak Mesaje Allah a (ke lapè ak Benediksyon Allah kouvril) nan kay Al-Arkam pitit gason Abou Al-Arkam, pou yo te ka aprann prensip relijyon yo a epi adore Allah lwen zye moun kap adore zidòl yo.
Predikasyon an piblik : Apre sa, Allah te bay pwofèt Li a lòd pou li pwoklame laverite aklè devan tout moun, jan Allah Toupwisan an te di a : 94: Kidonk, pwoklame aklè lòd ou resevwa a , epi vire do bay moun ki bay Allah asosye yo. Sourat Al-Hijr, vèsè 94 Apre sa, Allah Toupwisan an te ba li lòd pou li pote mesaj la bay fanmi l ak tout branch fanmi ki pi pwòch li yo, jan Li te di a: 214: Epi avèti fanmi ou ki pi pwòch yo. Sourat Ach-Chouara, vèsè 214 Konsa, Pwofèt la (ke lapè ak Benediksyon Allah rete sou li) te lanse yon apèl bay tout moun pou envite yo adore Allah Sèlman ; li te pote bon nouvèl Paradi a pou moun ki kwè, epi li te avèti moun ki refize kwè yo kont dife lanfè a.
Daprè Abou Hurayrah (ke Allah satisfè de li), li te di: Lè Allah te fè desann vèsè sa a : ﴿Epi avèti fanmi w ki pi pwòch yo﴾ [Ach-Chouara : 214], Mesaje Allah a (Se pou lapè ak Benediksyon Allah kouvril) te kanpe epi li te di : « Nou menm pèp Kouraych la ! » — oswa yon pawòl konsa — « Rachte tèt nou ! Mwen pap ka fè anyen pou nou devan Allah. Nou menm desandan Abdou Manaf yo, mwen pap ka fè anyen pou nou devan Allah ! Ou menm Abbas, pitit gason Abdoul Moutalib, mwen pap ka fè anyen pou ou devan Allah ! Ou menm Safiya, matant Mesaje Allah a, mwen pap ka fè anyen pou ou devan Allah! Epi ou menm Fatima, pitit fi Muhammad, mandem sa ou vle nan tout byen mwen genyen, men mwen pap ka fè anyen pou ou devan Allah ! » [Tout moun tonbe dakò sou li].
Pèsekisyon moun ki ap adore zidòl yo ak premye emigrasyon an : Lè mizilman yo te kòmanse deklare relijyon yo aklè, moun kap adore zidòl yo te vin ogmante mechanste yo pi rèd sou yo : yo tap pase yo nan betiz epi tòtire yo san pitye. Se sa ki fè Pwofèt la ( Se pou lapè ak Benediksyon Allah kouvril) te bay konpanyon li yo pèmisyon pou yo pati pou peyi Abisini, pou yo te ka sove lafwa yo.
Pwoteksyon Allah pou Pwofèt Li a : Moun ki ap adore zidòl yo te vle touye Pwofèt la (se pou lapè ak Benediksyon Allah kouvril) men Allah te pwoteje li gras avèk tonton li, Abou Talib; li te konn pran defans Pwofèt la (ke lapè ak Benediksyon Allah kouvril) tout tan, malgre li te rete nan kwayans pèp li a.
Konvèsyon Hamza ak Omar : Kominote mizilman an te vin pran anpil jarèt lè tonton Pwofèt la Hamza pitit gason Abdoul Moutalib, ansanm ak Omar pitit gason Al-Khattab te anbrase Islam. (se pou Allah satisfè ak yo tou 2) . Ibn Mas'oud (se pou Allah satisfè avè l) te di : « Nou pa te janm sispann kanpe tèt wo ak tout diyite nou depi lè Omar te anbrase Islam. » [Al-Boukhari].
Boykòt ak Blokis la : Tribi Kouraych te antann yo pou mete branch fanmi Bani Hachim ak Bani al-Moutalib anba yon boykòt total : yo pa t ap ni vann yo anyen ni achte nan men yo, yo pa tap fè okenn alyans maryaj avèk yo, ni gen okenn kontak sosyal ak yo. Blokis san pitye sa a te dire pandan twa lane nan vale 'Chèb Abi Talib', jiskaske yon ti gwoup pami moun ki pi eklere nan Kouraych yo te pran inisyativ pou anile pak enjis sa a epi leve restriksyon yo. Lè sa a, yo te vin rann yo kont ke tèmit te fin devore tout dokiman pak la nèt, sof fòmil 'Bismika Allahouma' (Nan non Ou, O Allah ; tout kote non Allah te enskri nan tèks la, bèt yo pa te manyen li ditou.
Prezantasyon Apèl la : Pwofèt la (se pou lapè ak Benediksyon Allah kouvril) te kontinye prezante mesaj li a bay divès tribi pandan sezon pelerinaj yo, jiskaske li te rankontre Ansar yo ki te soti nan vil Medin ; yo te kwè nan li epi yo te pran angajman solanèl pou ba li tout soutyen ak pwoteksyon li te bezwen.
Leson pou nou tire :
1. Misyon envite moun lan te kòmanse an sekrè pou pèmèt yon chanjman gradyèl, pou pwoteje premye kwayan mizilman yo, epi rasanble patizan ak soutyen.
2- Kadidja, Abou Bakr, ak premye jenerasyon an gen yon gwo merit; paske yo te sakrifye tèt yo ak byen yo, epi yo te pran pasyans anba pèsekisyon nan moman difisil yo.
3- Pwofèt la (Lapè ak Benediksyon Allah kouvril) te kòmanse pa pataje mesaj la ak fanmi li ansanm ak madanm li ; konsa, yon predikatè pa dwe janm neglije pwòp fanmi li nan envite yo vin jwenn Allah, anseye yo, epi ba yo konsèy. Senyè nou an, ki beni e ki pi wo a, deklare : (O nou menm ki gen lafwa ! Prezève tèt nou ansanm ak fanmi nou kont yon Dife kote se lèzòm ak wòch ki sèvi li kòm chabon....) Sourat At-Tahrim, 66:6
4. Prese pou akonpli sa ki byen : Nou tire nan temwayaj lavi yo valè pou nou pran devan nan anbrase laverite epi mete li an pratik san okenn ezitasyon.
5- Wout misyon envite moun nan mande anpil pasyans; paske Pwofèt la (Ke lapriyè ak lapè Allah sou li) te pran pasyans pandan plizyè ane, epi nan kòmansman an se sèlman yon ti kantite moun ki te kwè ansanm avè l.
6. Enpak konvèsyon Oumar ibn al-Khattab ak Hamzah : Adezyon Oumar ibn al-Khattab ak Hamzah (se pou Allah agreye yo tou 2) nan lislam te make yon veritab delivrans ak yon renesans diyite pou kominote mizilman an ; sa ki mete an limyè jan misyon an dwe apiye sou yon fòs reyèl pou asire defans li.
7- Rasanbleman konpayon yo (Sahaba yo) nan kay Al-Arqam nan te yon prèv sou enpòtans bon relasyon, kominikasyon, epi kolabore nan fè sa ki byen ak gen krentif pou Allah, ansanm ak enpòtans pou mache ak bon moun. Li montre tou nesesite pou itilize mwayen ki disponib yo epi fè efò pou prezève mesaj la (Dawa a), epi evite chita bra kwaze san fè efò.
8. Enpòtans Tawhid la (Inisite Allah a) : Li reprezante premye nan tout devwa fondamantal yo ; se pou rezon sa a fòmil « La ilaha illa Allah » (Pa gen okenn divinite ki merite adorasyon Sèlman Allah) se te premye verite Pwofèt la (se pou lapè ak Benediksyon Allah kouvril) te pwoklame aklè an piblik nan misyon li.
9- Yon Mizilman pa dwe wont relijyon li, okontrè, li dwe montre li byen klè epi ak sajès pou li jwenn satisfaksyon Allah sèlman.
10- Tòti, moke moun, ak pèsekisyon, se ansyen metòd mesaje Allah yo ak disip yo te fè fas ak yo. Epi modèl pou nou swiv la chita nan fèmte Pwofèt la (se pou benediksyon ak lapè Allah sou li) ak konpayon li yo.
11. Lejitimite emigrasyon an (Al-Hijra) : Abandone peyi natal ak patrimwàn pou kòz lafwa se yon demach ki totalman lejitim pou nenpòt moun ki nan enposiblite pou li viv relijyon l an tout libète ; paske lafwa se richès ki pi presye yon moun posede.
12- Lyen lafwa a se baz nan relijyon an, epi se pa lyen ras oswa rasin fanmi. Menm jan Pwofèt la (Lapè ak Benediksyon Allah kouvril) te pwoklame mesaj li a (Dawa) aklè epi li te rele moun yo pou yo adore Allah ki inik la, se konsa tou Allah toupwisan an te kòmande li pou li rele fanmi li ak fanmi pwòch li, dekwa pou sa te kapab tounen yon prèv klè devan moun yo sou bi ak objektif mesaj la depi nan premye moman an.
13- Rele moun vin jwenn Allah se responsabilite chak mizilman: Men gwo konpayon sa a, Al-Arqam bin Abi Al-Arqam Al-Makhzoumi (se pou Allah kontan avèk li), moun Pwofèt la (Ke lapriyè ak lapè Allah sou li) te pran kay li kòm yon sant pou envitasyon an nan kòmansman an; li te yon jenn gason ki te aksepte Islam lè li te gen anviwon 16 Lane. Aprè kèk tan, li te patisipe nan gwo evènman yo ansanm ak Pwofèt la (Ke lapriyè ak lapè Allah sou li), epi laj li ki te piti lè sa a pat anpechel patisipe nan rele moun vin jwenn Allah ak tout sa li te kapab.
(8) Lanmò Kadidja ak Abou Talib, epi apèl bay moun Taif yo
Ane Tristès la: Nan dizyèm ane misyon pwofetik la, manman kwayan yo, Khadija (se pou Allah agreye l), te mouri, epi Abou Talib, tonton Pwofèt la (ke lapè ak benediksyon sou Allah li), ki te konn pwoteje li epi defann li, te mouri tou kòm enkwayan. Avèk lanmò 2 moun sa yo, pèsekisyon ak mechanste branch fanmi Kouraych la kont Pwofèt la (lapè ak benediksyon Allah sou li) te vin pi rèd anpil pase jan sa te ye anvan.
Envitasyon bay moun Taïf yo : Pwofèt la (lapè ak benediksyon Allah sou li) te pati ale Taïf avèk espwa li tap jwenn nan mitan yo yon soutyen pou relijyon li an, men yo te rejte apèl li a epi yo te pase li nan rizib. Pi rèd ankò, yo te monte moun san konprann nan mitan yo kont li, ki te kalonnen li ak kout wòch jiskaske 2 pye li yo te koule san.
Yon atitid plen mizèrikòd : Pwofèt la (lapè ak benediksyon Allah sou li) te kite Taïf ak anpil tristès nan kè l. Sou wout retou a, Allah te voye Djibril ba li ansanm ak zanj ki responsab mòn yo, pou ba li chwa si li ta vle pou li kraze 2 gwo mòn yo (Al-Akhchabayne) sou moun Lamèk yo pou detwi yo nèt.
Repons nòb li a : Pwofèt la (lapè ak benediksyon Allah sou li) te reponn zanj mòn yo avèk mizèrikòd yon moun ki gen pasyans, li te di : « Okontrè, mwen espere Allah va fè soti nan desandans yo moun ki pou adore Allah Sèlman san yo pa asosye anyen avèk Li. » [Rapòte pa Al-Bukhari ak Muslim].
Leson nou tire yo:
1- Fèmte Pwofèt la (lapè ak benediksyon Allah sou li) : Pasyans li te parèt aklè nan fason li te sipòte pèt 2 pi gwo soutyen li yo (madanm li Khadija ak tonton li Abou Talib) nan yon sèl ane, e malgre sa, gwo eprèv sa a pa te anpeche li kontinye apèl li a.
2- Defans Abou Talib te pran pou Pwofèt la (lapè ak benediksyon Allah sou li) pa te sèvi li pou l chape anba dife lanfè a, paske li te mouri nan politeyis (chirk) ; an reyalite, yon aksyon pa itil moun ki fè li a anyen nan lavi apre a, sòf si li baze sou lafwa nan Allah ak yon senserite total anvè Li.
3- Tout difikilte fizik ak sikolojik ki te rive Pwofèt la (se pou benediksyon ak lapè Allah sou li) nan Taïf la, se yon leson pou Mizilman an sou sakrifis ak andirans pou kapab leve pawòl Allah a byen wo.
4- Pèfeksyon padon lè yon moun gen pouvwa pou sa : Pwofèt la (lapè ak benediksyon Allah sou li) te refize detwi moun ki te fè l mal yo, li te pito pran pasyans ak yo nan espwa Allah va gide desandans yo.
5- Pwofèt la (se pou lapè ak Benediksyon Allah kouvri li) te gen mizèrikòd pou moun yo, li te swete gidans pou yo, pa destriksyon, jan sa konfime nan pawòl Allah ki anwo nan syèl la: 107- Epi Nou pa te voye ou (O Muhammad), esepte kòm yon mizèrikòd pou tout linivè a. [Al-Anbiya: 107].
6- Akonpli devwa yo epi poze aksyon: Yon mizilman dwe toujou fè efò pou li reyalize objektif lejitim li, pandan lap konte sou Allah, epi li dwe poze tout aksyon ki disponib yo; pou li ka reyalize objektif sa a, epi sa pa dwe dekouraje li si li ta pèdi youn nan mwayen sa yo oswa si moun kap sipòte li yo vin mwens.
(9) Vwayaj lannwit lan ak moute nan syèl la (Al-Isra wal Mi'radj) ak mirak lalin nan ki te fann an 2
Vwayaj lannwit lan ak moute nan syèl la (Al-Isra wal Mi'radj):
Apre Ane Tristès lan, epi apre vwayaj Taïf la kote Pwofèt la (lapè ak benediksyon Allah sou li) te sibi tout soufrans sa yo, vwayaj beni sa a ansanm ak gwo mirak sa a ki soti nan Mèt linivè a te vini kòm yon omaj pou Pwofèt Li a (lapè ak benediksyon Allah sou li), pou ranfòse fèmte l, epi pou soutni li devan tout soufrans ak pèsekisyon branch fanmi Kouraych la te fè li sibi nan epòk sa a.
Gwo mirak sa a te rive apre laj senkant (50) an nan lavi li (lapè ak benediksyon Allah sou li).
Ouvèti pwatrin Pwofèt la (ke lapè ak benediksyon Allah sou li): Abou Dharr (ke Allah satisfè de li) te rakonte ke Mesaje Allah a (ke lapè ak benediksyon Allah sou li) te di: « Twati kay mwen te louvri pandan mwen te Lamèk, epi Djibril (lapè sou li) te desann, li fann pwatrin mwen, li lavel avèk dlo Zamzam, apre sa li te pote yon kivèt fèt an lò ki te plen ak sajès ansanm ak lafwa, li videl nan pwatrin mwen, epil refèmen li» [Rapòte pa Al-Bukhari ak Muslim].
Al-Isra : Se vwayaj lannwit li a (lapè ak benediksyon Allah sou li) soti nan Moske Sakre a (Al-Masjid Al-Haram) nan Lamèk pou rive nan Moske Al-Aqsa nan Jerizalèm (Bayt Al-Maqdis).
Al-Mi'raj : Se asansyon li soti nan Moske Al-Aqsa pou monte nan syèl ki pi wo yo, jiskaske li rive nan « Sidrat Al-Muntaha », ki se yon pye bwa ki gran anpil nan setyèm syèl la.
Men sa senyè Toupwisan an di: « 1: Glwa pou Sila a ki te fè sèvitèl vwayaje lannwit soti nan Moske Sakre a (Al-Masjid Al-Haram) pou rive nan Moske ki pi lwen an (Al-Masjid Al-Aqsa), li menm nou te beni tout anviwonnmanl lan, pou nou te ka montre li kèk nan siy nou yo. Anverite, se li menm ki tande tout bagay, ki wè tout bagay. » [Al-Isra: 1].
Sèn mizèrikòd ak pwisans : Nan lannwit sa a, Pwofèt la (lapè ak benediksyon Allah sou li) te wè pi gwo siy Mèt li a ; li te wè Paradi a ak Lanfè a, li te rankontre pwofèt yo (lapè sou yo) epi li te dirije yo nan lapriyè nan Moske Al-Aqsa. Allah Toupwisan an te pale avèk li dèyè yon vwal, san okenn entèmedyè, epi Li te preskri 5 priyè obligatwa yo sou li.
Reyaksyon moun yo : Nan denmen maten, lè Pwofèt la (lapè ak benediksyon Allah sou li) te nan Lamèk epi li te fè moun yo konnen sa ki te pase a, kwayan yo te vin gen plis lafwa ak plis konviksyon, pandan tèt di enkwayan yo ansanm ak demanti yo a te vin pi rèd toujou.
Fann lalin nan : Politeyis yo te mande Pwofèt la (lapè ak benediksyon Allah sou li) yon siy konkrè ki pwouve lap di verite, konsa Allah te fann lalin nan an 2 pou li, jiskaske moun yo te wè sa aklè ak pwòp je yo. Malgre sa, Moun ki pa kwayan nan branch Kouraych yo te vire do bay sa epi yo te di se maji.
Men sa senyè Toupwisan an di: 1- Lè a pwoche, epi lalin nan fann. 2- « Epi si yo wè yon siy, yo vire do bay sa epi yo di : “Se yon maji ki ap kontinye” » (Sourat Al-Qamar, vèsè 1-2)
Leson nou tire yo:
1- Allah, li menm ki san defo a, gen pwisans sou tout bagay, epi 2 mirak Vwayaj lannwit lan ak moute nan syèl la (Al-Isra wal Mi'radj) ansanm ak fann lalin nan, yo pa anyen lòt ke youn nan prèv ki montre pèfeksyon pwisans li, li menm ki san defo a.
2- Vwayaj sa a te fèt apre Ane Lapènn lan, tankou se te yon gwo onè pou Pwofèt la (ke lapè ak benediksyon Allah kouvri li), yon ranfòsman pou kè li ak yon konsolasyon pou li, apre anpil ane long nan fatig ak soufrans nan chemen predikasyon an.
3- Lapriyè se sèl adorasyon ki te preskri nan syèl la, dirèkteman soti nan Allah pou rive jwenn Mesaje li a san entèmedyè zanj Djibril (lapè sou li), sa ki montre grandè plas li ak enpòtans li nan lavi yon mizilman.
4- Allah te fè mirak sa yo vin yon prèv klè sou verite pwofesi a, men moun ki fèmen kè li devan verite a, siy yo pap itil li anyen kèlkeswa grandè yo.
5- Pwen enpòtan : Pa gen okenn prèv ki montre Pwofèt la (lapè ak benediksyon Allah sou li) ni konpanyon li yo (se pou Allah agreye yo) te konn mete lannwit Al-Isra ak Al-Mi'raj la apa pou yon selebrasyon oswa yon adorasyon espesyal ; se poutèt sa, tout sa ki bon nèt chita nan swiv gidans yo epi evite sa yo pa te fè.
6- *Vwayaj Al-Isra ak Al-Mi'raj la te fèt ni ak nanm nan ni ak kò a ansanm, pandan Pwofèt la (lapè ak benediksyon Allah sou li) te byen reveye; e se sa ki montre grandè mirak la ak pèfeksyon pwisans Allah Toupwisan an.
7- An verite, avèk difikilte gen fasilite: Mizilman an dwe kontinye avanse sou wout li, epi li pa dwe bay difikilte li pral jwenn yo enpòtans, epi li dwe gen konfyans total nan Allah ki gen tout pouvwa a, epi konnen an verite viktwa mache avèk pasyans, epi soulajman mache avèk traka, epi an verite, avèk difikilte gen fasilite.
(10) Al-Ansar yo, epi premye ak dezyèm sèman Al-Aqabah
Rankont ak Al-Ansar yo : Nan onzyèm ane misyon pwofetik la, Mesaje Allah a (lapè ak benediksyon Allah sou li) te rankontre yon ti gwoup pami Al-Ansar yo (moun Medina yo) nan Al-Aqabah, nan Mina toupre Lamèk. Li te chita avèk yo epi li te envite yo nan Lislam ; yo te reponn apèl li a epi yo te kwè nan li. Lè yo te retounen Medina, yo te transmèt nouvèl li ansanm ak mesaj li a bay pèp yo a, jiskaske Lislam te gaye nan mitan yo, epi pa te rete yon sèl kay pami kay Al-Ansar yo kote yo pa tap pale sou Mesaje Allah a (lapè ak benediksyon Allah sou li).
Premye sèman Al-Aqabah : Nan douzyèm ane misyon pwofetik la, yon delegasyon ki te soti nan branch fanmi Al-Aws ak Al-Khazraj (Al-Ansar yo) te vini, epi yo te prete Pwofèt la (lapè ak benediksyon sou li) « premye sèman Al-Aqabah a ». Li te anseye yo Lislam epi li te envite yo prete sèman; konsa, yo te pretel sèman sou pwen sa yo : pou yo pa asosye anyen ak Allah, pou yo pa vòlè, pou yo pa fè adiltè, pou yo pa touye pitit yo, pou yo pa envante okenn fo akizasyon ak kalomni, epi pou yo pa dezobeyi Pwofèt la (lapè ak benediksyon Allah sou li) nan anyen ki dwat e ki byen.
Apre sa, li te eksplike yo rekonpans lan, epi li di: «Nenpòt moun pami nou ki kenbe angajman li, rekonpans li se nan men Allah. Epi, nenpòt moun ki fè youn nan bagay sa yo (nan peche yo) epi yo pini li pou sa nan mond sa a, sa se yon padon (ekspyasyon) pou li. Epi, nenpòt moun ki fè youn nan bagay sa yo epi answit Allah kache sa pou li, afè li rete nan men Allah; si Li vle, Li padone li, epi si Li vle, Li pini li.» [Rapòte pa Al-Bukhari ak Muslim].
Premye anbasadè nan Lislam : Apre sèman an te fin fèt epi sezon pelerinaj la (Hadj la) te fini, Pwofèt la (lapè ak benediksyon Allah sou li) te voye premye anbasadè nan Lislam ale ansanm ak moun sa yo ki te prete sèman an, pou li te ka anseye nouvo mizilman yo nan Medina lwa ak pratik Lislam yo epi fè yo byen konprann relijyon an. Pou misyon sa a, li te chwazi yon jèn gason pami jèn Lislam yo ki te pami tout premye moun ki te anbrase lafwa, ki se Mus'ab ibn Umayr (se pou Allah agreye l).
Dezyèm sèman Al-Aqabah : Nan trèzyèm ane misyon pwofetik la, yon pi gwo delegasyon te deplase pou vin rankontre Pwofèt la (lapè ak benediksyon Allah sou li), epi yo te prete li « dezyèm sèman Al-Aqabah a ». Yo te pran angajman pou yo pwoteje li epi ba li sipò si li imigre vin jwenn yo, epi pou yo defann li menm jan yo ta defann pwòp tèt yo, fanmi yo, ak pitit yo.
Gwo benefis la: Ansar yo te mande Mesaje Allah la,( ke lapè ak benediksyon Allah sou li): « Kisa nou ap jwenn si nou kenbe sèman sa a, o Mesaje Allah a ? », epi li (lapè ak benediksyon Allah sou li) reponn yo ak yon sèl pawòl : « Paradi a pou nou », konsa yo te prete li sèman ak tout senserite epi ak tout kè kontan.
Leson nou tire yo:
1- Pèseverans Pwofèt la (lapè ak benediksyon Allah sou li) nan kontinye prezante Islam bay tout moun san li pa janm fatige ni dekouraje, se yon gwo modèl pou predikatè yo; paske fèmte ak konviksyon se yo ki kle siksè a.
2- Merit Al-Ansar yo : Grandè plas moun Medina yo parèt aklè nan jan yo te kouri reponn apèl verite a, ansanm ak devouman yo te genyen pou gaye Lislam nan mitan fanmi yo ak vwazen yo, jiskaske benediksyon sa a te gaye nan tout kay yo.
3- 2 sèman Al-Aqabah yo te wòch fondasyon nan mete kanpe Leta Lislam lan ; paske yo te gen ladan yo angajman pou obeyi, pou pwoteje Pwofèt la (lapè ak benediksyon Allah sou li), epi pou defann relijyon li an.
4- Pwofèt la (lapè ak benediksyon Allah sou li) pa te pwomèt Al-Ansar yo okenn gwo pozisyon ni lajan an echanj pou sipò yo, men li te pwomèt yo Paradi a ; pou li te ka montre nou ke vrè benefis yon kwayan se satisfaksyon Allah ansanm ak favè Li ki pap janm fini.
5- Al-Ansar yo (se pou Allah agreye yo) te prete Pwofèt la (lapè ak benediksyon Allah sou li) sèman pou yo sakrifye ni lavi yo ni byen yo poutèt lanmou pou Allah ak Mesaje Li a ; se sak fè yo te merite Paradi a kòm rekonpans.
6- Nan sajès Allah, Li te vle pou premye moun ki vin pote Lislam sekou pa te soti nan pwòp anviwònman ni nan pwòp pèp Pwofèt la, pou pèsonn pa ta panse apèl Mesaje a (lapè ak benediksyon Allah sou li) se te yon mouvman nasyonalis oswa yon kous dèyè gwo plas ak pouvwa ; men se te pito yon apèl divin ki soti nan Allah pou tout limanite.
7- Remak enpòtan: Al-Aqaba se yon zòn nan « Mina » toupre Lamèk, pwofèt la (ke lapè ak Benediksyon Allah kouvril) te chwazi pou li te ka rankontre Ansar yo an sekrè; paske se te yon kote ki te byen kache nan mitan mòn yo, byen lwen zye moun Quraysh yo.
(11) Migrasyon Pwofèt la pou ale Medin
Se vwayaj istorik desizif sa a ki te chanje kou listwa, epi avè l etap pou bati Leta Islamik la te kòmanse:
Otorizasyon pou migrasyon an ak kòmansman depa a: Lè dezyèm sèman Al-Aqaba a te fin fèt epi Mesaje Allah a (Lapè ak Benediksyon Allah kouvril) te fin asire sipò moun Medin yo, li te bay konpanyon li yo pèmisyon pou yo emigre pou yo te ka an sekirite; konsa, konpanyon yo te pati pou chèche rekonpans Allah, yo te kite kay yo, byen yo ak fanmi yo dèyè, epi yo te ale an ti gwoup separe, pandan yo tap kache anba zye moun Quraysh yo; te genyen ki te apye epi te genyen ki te sou bèt. Pwofèt la (ke lapè ak Benediksyon Allah kouvril) li menm te rete Lamèk ap tann pou Mèt li a ba li pèmisyon poul ale, ansanm ak konpanyon li Abu Bakr ak Ali ibn Abi Talib (se pou Bondye satisfè avèk yo tou 2).
Konplo Dar Al-Nadwa a ak pwoteksyon Allah pou Pwofèt li a: Lè moun Quraysh yo te wè konpanyon Pwofèt la te jwenn yon pwoteksyon solid ak anpil fòs nan Medin, yo te vin pè pou relijyon li an pa gaye. Se konsa lidè enkwayan yo te rasanble nan « Dar Al-Nadwa » pou yo konsilte, epi yo te tonbe dakò pou yo elimine Pwofèt la nan yon sèl kou kote chak tribi tap voye yon jenn gason, yon fason pou responsablite san li te ka gaye nan mitan tout branch fanmi yo. Men Allah Toupwisan an te revele Pwofèt li a pyèj yo a, epi Li te ba li pèmisyon pou li emigre. Konsa, Pwofèt la ( se pou Lapè ak Benediksyon Allah kouvril) te mande Ali ibn Abi Talib (se pou Allah satisfè avè l) pou li kouche nan kabann li, dekwa pou fè enkwayan yo kwè li te toujou anndan kay la epi pou li te ka remèt mèt yo tout depo yo te konfye l. Pwofèt la (se pou Lapè ak Benediksyon Allah kouvril) te soti nan mitan yo san yo pa te wè l, paske Allah te avegle zye yo.
Nan kavèn(gwòt) Thawr ak prezans Allah a: Pwofèt la, (benediksyon ak lapè Allah sou li) te pati avèk konpayonl Abou Bakr As-Siddiq, epi yo te pran wout pou "kavèn(gwòt) Thawr" pou yo te ka kache ladan li, epi yo te rete ladan li pandan 3 jou. Pandan tan sa a, moun Kouraych yo te fè tout jefò yo pou yo chache yo, epi yo te ofri yon gwo rekonpans (1000 chamo) pou nenpòt moun ki ta touye yo oswa ki ta mennen yo tounen. Lè moun ki tap adore zidòl yo te kanpe devan pòt kavèn(gwòt) lan, Abou Bakr te pè pou lavi Pwofèt la, (benediksyon ak lapè Allah sou li), epi li di konsa: «Si youn nan yo te gade anba pye li, li ta wè nou», Konsa, Pwofèt la (ke lapè ak benediksyon Allah sou li) te rasire li avèk yon gwo sètitid, li te di: «O Abou Bakr, kisa ou panse sou 2 moun kote Allah se twazyèm yo a?» [Al-Bukhari ak Muslim], Konsa, Allah te detounen moun ki tap adore zidòl yo lwen yo, malgre yo te trè pwòch.
Konstriksyon moske Quba a ak antre nan Medin: Aprè li te fin soti nan gwòt la, Pwofèt la (Pè ak Benediksyon Allah sou li) te pran yon wout ki lwen zye enkwayan yo jiskaske li te rive nan zòn « Quba ». Se la li te bati premye moske nan listwa Islam nan, ki se « Moske Quba ». Kèk jou apre, li te pati pou ale Medin; moun nan vil la te resevwa li ak yon kè kontan ki pa gen limit, epi tout kay yo te vibre anba vwa takbir ak tahmid tèlman yo te kontan pou arive beni li a.
Fondasyon Leta a ak lejislasyon sou djihad la: Touswit aprè li te fin etabli li nan Medin, li te kòmanse bati « Moske Pwofèt la » pou sèvi kòm syèj Leta a, epi li te tabli yon lyen fratènite ant Emigran yo ak Ansar yo pou yo te ka fè yon sèl. Lè sitiyasyon an te fin estabilize e mizilman yo te vin gen fòs ak yon defans solid, Allah te ba yo pèmisyon pou mennen djihad nan chemen Li lan pou konbat enjistis; konsa Allah te fè desann pawòl Li a: 39- « Yo bay moun yap atake yo pèmisyon [pou defann tèt yo], paske yo te sibi enjistis; epi anverite, Allah gen tout pouvwa pou ba yo laviktwa. » [Al-Hadj: 39].
Leson nou tire yo:
1- Grandè sakrifis la: Migrasyon Pwofèt la (ke lapè ak Benediksyon Allah kouvril) ak konpanyon li yo, kote yo te kite peyi yo ak tout byen yo dèyè, te fèt sèlman pou Allah Toupwisan an; epi sa aprann nou ke relijyon an gen plis valè pase tout bagay.
2- Merit Abou Bakr As-Siddiq: kote li te resevwa onè pou li akonpaye Pwofèt la (se pou Lapè ak Benediksyon Allah poze sou li) nan pi gwo vwayaj la, epi sa konfime gwo pozisyon li kòm moun ki pi pre Mesaje Allah a .
3- Lefèt ke Allah (ki gen tout pouvwa a) te garanti pwoteksyon Pwofèt li a (Se pou lapè ak benediksyon Allah Toupwisan an kouvri li), epi li te detounen konplo mekreyan yo lwen li; konsa, nenpòt moun Allah avèk li, pa gen pèsonn ki ka ranpòte laviktwa sou li.
4- Konfyans Pwofèt la (Se pou lapè ak benediksyon Allah Toupwisan an kouvri li) nan Seyè li a te parèt aklè nan moman ki pi difisil yo anndan gwòt la, sa ki aprann nou ke delivrans lan vini avèk pasyans ak sètitid ke Allah ansanm avèk nou.
5- Merit Ansar yo: kote lanmou moun Medina yo pou Pwofèt la (se pou benediksyon ak lapè Allah sou li) ak jwa yo te genyen pou li te parèt aklè; sa ki te demontre bon nati yo, ak fason yo te pote sekou bay Allah ak Mesaje Li a ak tout senserite.
6- Djihad la te vin enstitye(etabli ) nan moman ki te pi apwopriye a, apre Leta a te fin tabli epi yo te vin gen kapasite pou sa; epi sa temwanye mizèrikòd ak sajès Allah nan fason Li pran swen sitiyasyon mizilman yo.
7- Enpòtans moske a nan lavi Mizilman yo: Akòz plas ak enpòtans moske a genyen nan lavi Mizilman yo, premye bagay Pwofèt la (ke lapè ak benediksyon Allah sou li) te fè pandan li te sou wout pou Medin, se te konstwi moske Quba a, epi apre sa lè li te antre Medin, li te konstwi Moske Pwofèt la nan plas yo konnen li ye kounye a.
8- Enpòtans pou fè yon bon planifikasyon anvan yon moun kòmanse nenpòt travay; paske Pwofèt la (ke lapè ak benediksyon Allah sou li) te konnen Quraysh yo ta apral dirije rechèch yo an premye nan wout ki mennen Medin nan direksyon nò a, se poutèt sa li te pran wout ki opoze a, ki se wout ki sitiye nan sid Lamèk la, ki ap mennen nan direksyon Yemen. Menm jan an tou, Pwofèt la (ke lapè ak benediksyon Allah sou li) ansanm ak Abu Bakr te angaje 'Abdullah ibn Urayqit pou li te kapab sèvi yo kòm gid pou ale Medin, epi li te yon ekspè ki te byen konnen wout yo ak ti chemen etwat yo.
(12) Kòmansman djihad nan chemen Allah Toupwisan an, ak Gran Batay Badr la
Kòmansman batay ak ekspedisyon militè yo:
Mesaje Allah a (se pou Lapè ak Benediksyon Allah kouvril) te mennen 21 batay, e gen moun ki di plis pase sa; premye a se te batay Al-Abwa (Waddan) nan dezyèm ane apre Migrasyon an, epi dènye a se te batay Tabouk (Al-Usrah) nan mwa Rajab nan nevyèm ane apre Migrasyon an; epitou li te konn voye plizyè ekspedisyon militè.
Epi Batay la : se lè Pwofèt la (ke lapè ak benediksyon Allah sou li) te soti, epi li te dirije mizilman yo pèsonèlman, kit te gen konba ki te fèt ladan li oswa li pa te fèt.
Epi Sariyya a: se ekspedisyon kote Pwofèt la (Se pou lapè ak benediksyon Allah kouvri li) pat patisipe ladan li an, ka gen batay ki fèt ladan li, epi ka pa genyen tou, epi an jeneral, kantite moun ki nan Sariyya a konn piti.
Gran Batay Badr la nan dezyèm ane apre Migrasyon an:
Rezon batay sa a se te paske Pwofèt la (ke lapè ak Benediksyon Allah kouvril) te aprann rive yon gwo karavàn moun Quraysh ki tap soti nan Cham avèk anpil richès ladan li: konsa li te mobilize moun yo pou al entèsepte li, epi li te soti avèk anviwon 300 ak enpe plis pase 10 gason, kòm yon pinisyon kont moun Quraysh yo poutèt yo te chase Emigran yo soti nan peyi yo, te sezi kay yo ak tout sa yo te posede, epi te vòlè richès yo. Lè nouvèl la te rive jwenn Quraysh, yo te rasanble mil twasan (1 300) konbatan oswa plis toujou. Pwofèt la (ke lapè ak Benediksyon Allah kouvril) te konsilte konpanyon li yo, epi yo te pran desizyon fèm pou fè fas ak yo. Batay la te fèt nan mwa Ramadan an; lame Islam nan te rankontre ak lame enkwayan yo, epi konba a te vin rèd anpil. Konsa, Allah te bay Pwofèt li a yon gwo viktwa eklatan; katòz (14) gason nan mitan mizilman yo te tonbe an mati, tandiske swasanndis (70) nan enkwayan yo te mouri epi swasanndis (70) lòt te tonbe prizonye, pifò ladan yo se te gwo lidè ak chèf ki te gen plis enfliyans nan Quraysh. Se konsa Allah te glorifye Islam ak mizilman yo, Li te imilye politeyis la ak moun ki tap adore zidòl yo; epi louwanj pou Allah, Mèt linivè a.
Leson nou aprann yo:
1- Lejitimite djihad nan chemen Allah Toupwisan an pou leve pawòl Allah a byen wo, gaye Islam, tabli lajistis, epi elimine tout fòm opresyon ak enjistis.
2- Pwofèt la (Ke la lapè ak benediksyon Allah sou li) se lidè ki se modèl la ak moun vanyan ki se egzanp pou swiv la: moun ki soti li menm pèsonèlman pou konbat enkwayan yo.
3- Dwa lejitim pou sezi byen moun ki pa kwè kap fè lagè yo, ak koupe wout komès Quraysh la, epitou afebli yo ekonomikman; e se sa ki te rezon prensipal pou Gwo Batay Badr la.
4- Konsiltasyon Pwofèt la (se pou Lapè ak Benediksyon Allah kouvril) te fè ak konpanyon li yo pou soti epi fè fas ak lènmi an: Nan sa gen lejitimite prensip konsiltasyon an nan tout zafè, sitou sa ki pi enpòtan yo.
5- Allah bay ti gwoup kwayan an laviktwa sou gwo gwoup enkwayan an: menm jan Li te bay Pwofèt la (Ke lapè ak Benediksyon Allah kouvril) ak konpanyon li yo laviktwa sou enkwayan Quraysh yo, alòske kantite yo te plizyè fwa plis pase kantite mizilman yo, jan Allah Toupwisan an te fè nou konnen sa: « ...Moun ki te gen sètitid yo tap rankontre Allah te di: "Konbyen fwa yon ti gwoup te ranpòte laviktwa sou yon gwo gwoup gras avèk pèmisyon Allah ! Epi Allah avèk moun ki gen pasyans yo." » [Al-Baqarah: 249].
6- Kouraj Pwofèt la (Ke la lapè ak benediksyon Allah sou li) ak konpanyon li yo: paske yo te fè fas ak ènmi ki te plizyè fwa pi plis pase yo an kantite ak an ekipman.
7- Se Allah ki bay moun Li vle glwa epi ki imilye moun Li vle: Li te glorifye moun Islam yo nan Badr, epi Li te imilye moun ki tap adore zidòl yo.
8- Kèk nan sajès ki genyen nan preskripsyon djihad nan chemen Allah a:
أ- Envite moun yo vin nan Islam, epi fè yo soti nan adore kreyati pou mennen yo nan adore Mèt tout kreyasyon an; Allah Toupwisan an di: 193- « Epi konbat yo jiskaske pa gen pèsekisyon ankò, epi relijyon an vin pou Allah sèlman; men si yo sispann, pa dwe gen okenn ostilite eksepte kont moun ki enjis yo. » [Al-Baqarah: 193].
B- Repouse agresyon kont mizilman yo; Allah Toupwisan an di: Konbat nan chemen Allah moun kap konbat nou yo, men pa depase limit. Anverite, Allah pa renmen moun kap depase limit yo. [Al-Baqarah: 190].
(13) Batay Uhud la ak sa ki te pase apre sa
Epi se batay sa a kote gwo leson nan obeyisans te parèt aklè, epi kote senserite lanmou Konpanyon yo pou Pwofèt yo a (Ke lapriyè ak lapè Allah sou li) ak sakrifis yo te fè ak pwòp lavi yo te manifeste.
Rezon batay la ak preparasyon pou li : Batay Uhud la, ki te fèt nan twazyèm ane Emigrasyon an (Ijra), te gen plizyè kòz; pi enpòtan ladan yo se te : dezi politeyis yo pou yo te pran revanj pou moun pa yo ki te mouri ak pou defèt yo te sibi nan batay Badr la. Konsa, branch fanmi Quraysh la te rasanble twa mil (3 000) konbatan sou kòmandman Abou Soufyan. Bò kote pa l, Pwofèt la (Se pou lapè ak Benediksyon Allah kouvril) te soti ak mil (1 000) nan konpanyon li yo pou al rankontre yo. Men pandan lame a te sou wout, chèf ipokrit yo, Abdoullah ibn Oubayy ibn Saloul, te fè bak ak yon tyè (1/3) nan lame a, epi yo pat patisipe nan batay la.
Evènman batay la ak move konsekans dezobeyisans lan : 2 lame yo te rankontre nan mòn Uhud, epi yon batay ki te rèd anpil te pete kote nan kòmansman an politeyis yo te bat. Apre sa, tirè flèch mizilman yo te desann mòn lan, alòske Pwofèt la (ke lapè ak Benediksyon Allah kouvril) te ba yo lòd pou yo pa janm desann kèlkeswa sa ki ta rive (kèlkeswa sikonstans yo). Poutèt tirè flèch yo te dezobeyi lòd sa a, lame mekreyan yo te vire pran mizilman yo pa dèyè, epi yon gwo kantite mizilman te mouri (te tonbe kòm mati). Allah ki Pi Wo a di : 152 : Anverite, Allah te kenbe pwomès Li te fè nou an, lè nou tap detwi yo ak pèmisyon Li. Jiskaske nou te pèdi kouraj, epi nou te tonbe nan diskisyon sou kòmandman an, epi nou te dezobeyi aprè Li te fin fè nou wè sa nou te renmen an. Te gen moun pami nou ki te vle mond sa a, epi te gen moun pami nou ki te vle lavi aprè lanmò a. Aprè sa, Li te fè nou fè bak devan yo pou Li te kapab teste nou. Sètènman, Li padone nou. Epi Allah gen anpil byenfavè pou moun ki gen lafwa yo. [Sourat Al Imran:152].
Gwo eprèv la ak sakrifis konpayon yo: Batay Ouhoud la se te youn nan batay ki te pi difisil Pwofèt la (Se pou lapè ak benediksyon Allah poze sou li) te travèse; kote youn nan dan devan li yo te kase, epi 2 bag kas li a - ki se yon bagay ki pwoteje tèt la - te antre nan vizaj li . Sitiyasyon an te vin grav anpil pou li, men Allah, Trèwo a, te pwoteje li. Swasanndis (70) mati pami konpayon yo (Se pou Allah satisfè ak yo) te tonbe nan batay la, epi pami yo te genyen mèt mati yo, Hamza bin Abdul Muttalib, tonton Pwofèt la. Epi nan batay sa a, vrè lanmou konpayon yo te genyen pou Pwofèt yo a te parèt aklè, konsa yo te sakrifye lavi yo pou yo te ka pwoteje li. Apre batay la te fini epi yo te fin antere mati yo, Pwofèt la ansanm ak konpayon li yo te retounen Medin.
Epi, pami sitiyasyon yo, Pwofèt la (ke lapè ak benediksyon Allah sou li) te kanpe devan mati Uhud yo, li te kriye pou yo, epi li te di: «Mwen se temwen sou moun sa yo nan Jou Jijman an.» [Al-Boukhari], « Li te bay lòd pou yo antere yo ak tout san sou yo ansanm ak rad yo san yo pa lave kò yo . Li te konn mete 2 gason nan yon sèl tonbo, kote li te mete devan sila a ki te memorize plis Koran pou onore valè l. Apre sa, li te al vizite moun ki te blese ki te vivan yo, li tap siye blesi yo epi remonte moral yo. Li te fè lwanj pou gwo bravou Oum Amarah (Umm 'Umara) ak fanmi l, epi li te fè priyè (doua) pou yo ka ansanm avèk li nan Paradi a poutèt gwo detèminasyon yo ak fason yo te defann li. Lè yo te fin antere tout mati yo, li te mete tout konpanyon li yo an ranje dèyè l; yo te louwe Allah, yo te fè lwanj pou Li pandan yo te soumèt devan volonte L, epi yo te di li mèsi pou favè pasyans ak kouraj nan batay la. »
Batay Hamra al-Asad: Batay sa a te fèt sèlman yon jou aprè Ouhoud, epi rezon an se te sa ki te rive jwenn Mesaje Allah a (lapè ak benediksyon Allah sou li) konsènan Abu Sufyan ibn Harb, kòmkwa li te vle retounen avèk Quraish yo nan Medin pou yo te elimine nèt rès konpayon Pwofèt la (lapè ak benediksyon Allah sou li) yo. Konsa, Pwofèt la (lapè ak benediksyon Allah sou li) te bay moun yo lòd pou yo soti, epi li te mete kòm kondisyon pou okenn moun pa soti avèk li eksepte moun ki te asiste konba a nan jou Ouhoud la; konsa yo te soti malgre blesi yo te genyen yo. Lè Abu Sufyan te tande pale de yo, li te vin pè epi li te retounen nan Lamèk avèk moun ki te avèk li yo.
Leson nou tire yo:
1- Move konsekans peche ak dezobeyisans : Lefètke tirè flèch yo te dezobeyi Mesaje a (Se pou lapè ak Benediksyon Allah kouvril), sa te lakòz yon gwo epi grav domaj sou tout mizilman yo.
2- Pozisyon oswa nivo Pwofèt la (Ke la lapè ak benediksyon Allah sou li) ak kouraj li: li te konbat pèsonèlman epi li te blese nan chemen Allah, (Ke la lapè ak benediksyon Allah sou li).
3- Merit konpayon yo (se pou Allah kontan ak yo): ak sakrifis yo te fè ak pwòp lavi yo nan chemen Allah, ansanm ak pwoteksyon yo te bay mesaje Li a (se pou benediksyon ak lapè Allah sou li).
4- Fè diferans ant kwayan an ak ipokrit la: moun ipokrit yo te fè bak epi yo pa te patisipe nan batay Ouhoud la, epi nan tèt yo te gen Ibn Saloul, chèf ipokrit yo.
5- Enpak sakrifis Konpanyon yo : Si se pa te gras ak Allah epi sakrifis yo (se pou Allah agreye yo), Islam pa tap janm rive jwenn pèsonn, paske Allah te fè yo tounen mwayen pou sa ; Imam Ibn al-Qayyim (se pou Allah fè l mizèrikòd) te di :
Sila yo se moun ki swiv Pwofèt la ak gwoup li a.. si se pat yo, patap gen okenn Mizilman sou tè a.
6- Lefètke konpanyon yo te soti pou ale nan « Hamra al-Asad » ak tout blesi yo ki tap senyen toujou, yon sèl jou sèlman apre batay « Ouhoud » la : fason yo te reponn apèl Pwofèt la (Ke Lapè ak Benediksyon Allah kouvril) se te pi gwo prèv sou fòs lafwa yo ak yon wo nivo detèminasyon ke okenn doulè pa te kapab venk.
7- Yon shahid (yon mati) ki mouri nan batay nan chemen Allah, yo pa benyen li, ni yo pa anvlòpe li, ni yo pa fè lapriyè pou li, menm jan Pwofèt la (lapè ak benediksyon Allah sou li) te fè ak shahid nan batay Ouhoud yo, kote li te bay lòd pou yo antere yo ak san yo ak rad yo sou yo, san yo pa benyen yo.
(14) Batay Al-Khandaq (Al-Ahzab) nan senkyèm lane aprè emigrasyon an (ijra)
Evènman batay sa a te kòmanse lè Jwif yo te kase alyans yo te genyen avèk Mesaje a (Ke lapriyè ak lapè Allah sou li), epi yo te monte tèt divès tribi Arab yo e yo te rasanble yo pou atake lavil Medin, nan objektif pou elimine Mizilman yo ansanm ak nouvo Leta yo a ki tap devlope. Se konsa, yon gwo lame te rasanble pami tribi politeyis yo, ki te rive dimil (10.000) konbatan anba kòmandman Abou Soufyan bin Harb, alòske lame Pwofèt la (Ke lapriyè ak lapè Allah sou li) te gen yon kantite twa mil (3.000) konbatan sèlman.
Lè Pwofèt la(Lapè ak Benediksyon Allah kouvril) te vin aprann yo tap rive, li te mande konpanyon li yo konsèy. Se konsa, yon konpanyon enpòtan ki te rele Salman Pès la te ba li lide pou yo fouye yon tranche toutotou vil Medina pou sèvi kòm yon gwo rempa pou anpeche lènmi yo antre. Lide sa a te fè Pwofèt la plezi anpil epi li te bay lòd pou yo egzekite l. Pwofèt la pa te sèlman rete nan bay direksyon, men li te bay yon bèl egzanp imilite ak lidèchip lèl te desann travay pèsonèlman ak konpanyon yo nan fouye tranche a, pandan li tap pataje tout fatig ak difikilte yo.
Fòs kowalisyon yo te debake nan vil Medina epi yo te sènen vil la, jiskaske kè sere ak soufrans lan te vin lou anpil sou mizilman yo akoz syèj la ki te dire lontan. Yo te twouve yo nan yon sitiyasyon kote laperèz te makonnen ak yon grangou terib, e Koran an dekri moman kritik sa a lè Allah ki Pi Wo a di : 10- « Lè yo te debake sou nou soti anwo kou anba, lè je nou te twouble anba laperèz, lè kè nou te monte nan gòj nou, epi nou tap fè tout kalite sipoze sou Allah. » 11- Lè sa a, kwayan yo te pase anba eprèv, epi yo te tranble ak yon gwo tranbleman. [Sourat Al-Ahzab vèsè 10-11].
Nan mitan kriz sa a, mirak Pwofèt la (ke lapè ak benediksyon Allah sou li) te parèt: Allah te beni ti kal manje a jiskaske tout lame a te fin rasazye; li te anonse konpayon li yo bon nouvèl sou konkèt peyi Pès ak Wòm malgre sitiyasyon difisil la, pou li te ka remonte kouraj yo. Lè zafè a te vin pi rèd, Pwofèt la ( ke lapè ak Benediksyon Allah kouvril ) te vire bò kote Seyè li a ak yon priyè sensè pou mande li delivre mizilman yo. Allah te reponn lapriyè li a, li te voye yon gwo van sou lame kowalisyon yo ki te rache tant yo, li te desann zanj pou simen laterè nan kè yo; konsa yo te gaye epi yo te pati dekouraje san anyen, epi sekirite te retounen nan vil Medina. Allah ki gen tout pouvwa a di : 9- « O nou menm ki kwè! Sonje byenfè Allah fè pou nou, lè lame te vin atake nou, epi Nou te voye yon gwo van sou yo ansanm ak lame nou pat ka wè. Epi Allah wè tout sa nap fè trè byen. » [Al-Ahzab: 9].
Epi Li menm ki glorifye a di : 25- « Epi Allah te fè moun ki pa te kwè yo retounen ak tout raj yo, yo pat jwenn okenn avantaj; e Allah te epaye kwayan yo batay la. E Allah gen tout fòs, Li gen tout pouvwa. » [Sourat Al-Ahzab vèsè 25].
Leson nou tire yo:
1- Lènmi Islam yo kapab rasanble ansanm malgre diferans nan kwayans yo pou konbat mizilman yo, e sa fè pati lwa Allah nan kreyasyon Li sou lit kontinyèl ant laverite ak sa ki fo, sa ki mande yon vijilans konstan ak yon bon preparasyon.
2- Batay la mete an valè merit Salman al-Farisi (se pou Allah agreye l) ak enpòtans konsiltasyon nan Islam.
3- Lefètke Pwofèt la (Benediksyon ak lapè Allah kouvri li) te pataje fatig ak konpayon li yo, sa konfime ke yon lidè ki reyisi se moun ki pran inisyativ nan travay la, ki gen imilite avèk moun li ap dirije yo, epi ki sèvi kòm yon bon egzanp pou yo.
4- Fouye tranche a aprann nou nesesite pou nou fè tout efò posib, itilize mwayen lejitim ki disponib yo, epi pran tout mezi nesesè, pandan nap kolabore nan sa ki byen ak krentif pou Allah.
5- Enpòtans konviksyon ak pasyans : konpayon yo te demontre yon fèmte ekstrawòdinè malgre blokaj la, konsa laviktwa te nan kan moun ki pasyan epi ki gen yon konviksyon total nan pwomès Allah a. Allah ki Pi Wo a di : 23- « Pami kwayan yo, gen gason ki te fidèl ak alyans yo te fè ak Allah a. Gen ladan yo ki fin akonpli angajman yo (ki tonbe kòm mati), epi gen ladan yo kap tann toujou; epi yo pa janm chanje angajman yo ditou. » [Sourat Al-Ahzab:23].
6- Bonte Allah pou sèvitè li yo, lè Pwofèt la (Ke la lapè ak benediksyon Allah sou li) te bay konpanyon li yo bon nouvèl nan moman ki pi difisil yo konsènan konkèt kap vini yo.
7- Lapriyè se kle viktwa a ; toutbonvre, balans batay la te chanje gras ak jan Pwofèt la (lapè ak benediksyon Allah sou li) te chèche refij ak tout senserite bò kote Senyè li a, epi sa montre tout enpòtans lapriyè genyen.
8- Laviktwa soti nan men Allah: Kèlkeswa fòs lènmi yo ta genyen ak gwo kantite yo ta ye a, sètènman Allah se Sila ki fò a, Li menm ki gen tout pouvwa a, ki pote viktwa pou sèvitè li yo.
(15) Trete Lapè Oudaybiya, Batay Khaybar ak Oumra Konpansasyon an (Viktwa Eklatan an)
Pwofèt la (benediksyon ak kè poze Allah sou li) te wè nan rèv li ke li menm ak konpanyon li yo tap antre nan Moske Sakre a an sekirite, avèk tèt yo raze epi cheve yo koupe tou kout. Epi rèv pwofèt yo se Revelasyon, se konsa li te enfòme konpanyon li yo, epi yo te kontan anpil pou bon nouvèl sa a.
Pwofèt la (lapè ak benediksyon Allah sou li) te pati nan mwa Dou-l-Qida nan sizyèm ane Ejir la, avèk anviwon mil katsan (1 400) moun pami Emigran yo (Al-Muhajirun) ak Oksilyè yo (Al-Ansar). Yo te ap mennen bèt pou ofrann yo kòm mak respè pou Kay Sakre a, epi yo pa te pote anyen lòt pase zam tradisyonèl yon vwayajè (epe ki rete anndan fouwo yo), yon fason pou yo te ka konfime bay branch fanmi Kourèych la se kòm pèleren ('Ummar) yo te vini, e non pa kòm anvayisè.
Lè moun Quraysh yo te vin aprann mach pèleren yo, yo te pran desizyon pou bare wout la pou yo ak fòs, epi yo te al monte kan militè yo nan « Dhi Touwa ». Pwofèt la (lapè ak benediksyon Allah sou li) te modifye wout li jiskaske li te fin tabli kan li nan Oudaybiya, kote te gen yon seri long korespondans ak negosyasyon ki te fèt. Pandan echanj sa yo, Pwofèt la (lapè ak benediksyon Allah sou li) te delege Ousman ibn Afann (se pou Allah agreye l) pou al negosye avèk yo, men yon rimè te gaye ki fè konnen yo te asasinen li. Lè sa a, Pwofèt la (lapè ak benediksyon Allah sou li) te konvoke konpanyon li yo pou yo te vin prete sèman pou yo pa janm kouri devan batay la. Yo tout te prete li sèman anba pye bwa Samoura a; e se sèman sa a yo rele « Sèman Ridwann nan », kote Allah te revele : « Toutbonvre, Allah te agreye kwayan yo lè yo tap prete w sèman anba pye bwa a... » Sourat Al-Fath, 48:18
Pwen nan akò a: Suhayl bin Amr te vini kòm reprezantan pou Quraysh, epi yo te rive fè yon akò lapè ki te gen ladan li plizyè kondisyon ki te parèt difisil sou deyò, pami yo: sispann lagè a pandan 10 ane, epi pou mizilman yo retounen nan ane sa a san yo pa fè pelerinaj (Umrah) a, avèk kondisyon pou yo tounen nan ane ki ap vini an pou yo akonpli pelerinaj yo a epi rete nan vil Lamèk pandan 3 jou sèlman, epitou nenpòt moun nan Quraysh ki vin jwenn Muhammad san pèmisyon responsab (Wali) li, li dwe voye li tounen ba yo. Malgre kèk nan konpayon yo te kontrarye anpil ak kondisyon sa yo, Pwofèt la (lapè ak benediksyon Allah sou li) te aksepte yo pou li te ka obeyi lòd Seyè li a. Li te fè sakrifis ofrann bèt li a epi li te soti nan eta sakre a konsa mizilman yo te swiv li tou. Apre sa, pandan yo te sou wout ap retounen nan vil Medin, Allah te fè desann pawòl Li a: 1- Toutbonvre, Nou akòde w yon viktwa eklatan. 2- Pou Allah ka padonnen peche ou ki pase ak sa ki gen pou vini yo, epi pou Li konplete favè Li sou ou, epi pou Li gide ou sou yon chemen dwat. 3- ...epi pou Allah akòde w yon viktwa ki gen yon pwisans san parèy. [Sourat Al-Fath:1-3]
Batay Khaybar (Premye gwo fwi trete a) : Youn nan pi gwo avantaj trete lapè a te pote, se te estabilite sou fwon sid la ak Quraysh, sa ki te retire tout menas sou do vil Medina. Se konsa, nan mwa Mouharam nan setyèm ane Ijra a, Pwofèt la (lapè ak benediksyon Allah sou li) te pran direksyon fwon nò a. Se la fòtrès Jwif Khaybar yo te ye, yo menm ki te monte kowalisyon lènmi an epi tise konplo kont Mizilman yo. Kòm rekonpans pou fidelite yo, Pwofèt la (lapè ak benediksyon Allah sou li) te aksepte sèlman moun ki te Oudaybiya e ki te prete Sèman Ridwann nan pou patisipe nan batay sa a. Mizilman yo te sènen gwo fòtrès solid Khaybar yo youn apre lòt; Allah te mete yon gwo laperèz nan kè Jwif yo epi Li te fè Mizilman yo ranpòte laviktwa sou tout fòtrès yo. Lè sa a, yo te mande yon antant pou sove lavi yo: yo te dakò remèt tout byen yo ak tè yo bay Mizilman yo, sou kondisyon pou yo kontinye kiltive tè a epi kenbe mwatye nan rekòt la. Se konsa pwomès viktwa Allah a te reyalize nèt, lè Li te fè yo jwenn san pèdi tan « tout gwo richès sa yo yo te ranmase nan batay la ».
Oumra Konpansasyon an (Reyalizasyon vizyon an) : « Nan ane ki te vin apre a (nan mwa Doul-Kida, nan setyèm ane Ijra a), Pwofèt la (lapè ak benediksyon Allah sou li) te pran wout la ansanm ak konpanyon ki te prezan nan Oudaybiya yo, pou yo te ka akonpli Oumra yo te anpeche yo fè a. Pwofèt la (lapè ak benediksyon Allah sou li) te antre nan Lamèk pandan li tap repete pawòl sakre Talbiya yo (Labbayk Allahoumma Labbayk), epi tout Mizilman ki te bò kote li yo tap fè lwanj pou Allah epi pwoklame grandè Li. Yo te akonpli tout rityèl yo nan lapè ak tout kè poze. Moun Quraysh yo menm te monte sou tèt mòn yo pou gade yo, ak yon melanj gwo respè ak admirasyon devan prestij yo. Konsa, Oumra sa a te vin konfime vizyon Pwofèt la (lapè ak benediksyon Allah sou li) te fè nan rèv li a, epi se poutèt sa yo te rele li « Oumra Konpansasyon an » (Oumrat al-Qada) oswa « Oumra Akò a » (Oumrat al-Qadiyya). »
Leson nou tire yo:
1- Trete sa a te pèmèt Mizilman yo gaye predikasyon yo a an sekirite, konsa moun yo te antre nan relijyon Allah a an kantite ki te plizyè fwa pi plis pase anvan, se poutèt sa konkèt la pa te toujou fèt avèk kout nepe.
2- Batay la te pwouve ke reyisit la chita nan obeyi lòd Allah ak Mesaje Li a (Se pou lapè ak Benediksyon Allah kouvril) , menm si sajès la pa parèt klè pou lespri yo nan kòmansman an (jan sa te fèt nan kondisyon akò lapè a).
3- Ran moun ki te prete sèman yo : Konpanyon yo te resevwa yon gwo onè paske Allah te agreye yo, e se sa ki fè yo te rele sèman sa a « Sèman Ridwann nan ». Se te yon temwayaj diven ki te desann depi anwo 7 syèl yo pou konfime jan lafwa yo te sensè toutbonvre.
4- Lejitimite trete yo : Li otorize pou Mizilman yo konkli yon akò lapè ak lènmi an depi sa nan enterè kominote a; e sa antre nan kad sajès ansanm ak prensip gouvènans ki konfòm ak lwa diven an.
5- Retou Pwofèt la (lapè ak benediksyon Allah sou li) pou « Oumra Konpansasyon an » nan ane ki te vin apre a te konfime verite vizyon li a, li te brize lògèy tribi Quraysh la, epi li te fè wè aklè tout diyite ak grandè Islam nan kè menm vil Lamèk.
6- Pwofèt la (Ke la lapè ak benediksyon Allah sou li) te bay pi bèl egzanp yo nan respekte angajman ak kontra yo (kenbe pawòl yo), epi se sa ki te fè moun renmen bon konpòtman Islam nan ak relijyon li an.
7- Benediksyon ki genyen nan obeyi lòd Pwofèt la (Ke la lapè ak benediksyon Allah sou li): Menm jan nou te mansyone sa nan batay Ouhoud la, dezobeyisans gen yon move konsekans ki kapab lakòz defèt tonbe sou Mizilman yo lè yo ap fè fas ak ènmi yo. Konsa tou, obeyi Pwofèt la (Ke la lapè ak benediksyon Allah sou li) epi fè tout sa li bay lòd fè gen yon benediksyon ladan li ki pote laviktwa pou Mizilman yo. Jan Allah nan grandè Li te di sa: ...si nou obeyil, nap jwenn bon chemen an ... [An-Nour: 54].
(16) Lèt Pwofèt la (lapè ak benediksyon Allah sou li) te voye bay wa ak prens yo aprè Trete Lapè Oudaybiya a
Lè zafè trete lapè Houdaybiya a te fin etabli byen fèm epi lagè te sispann, Pwofèt la (ke lapriyè ak lapè Allah sou li) te jwenn sekirite kont tribi Kouraychinn yo. Li te vire atansyon li pou l fè travay envite moun vin jwenn Allah a tounen yon misyon pou lemond antye epi gaye li toupatou sou tè a; kidonk li te pran desizyon byen fèm pou li ekri lèt bay wa yo sou tè a, chèf Arab yo ak moun ki pa Arab yo, pou envite yo antre nan Islam. Avèk anpil konpasyon li te genyen pou nasyon li an ak bon jan kapasite li te genyen pou li byen dirije, li menm (ke lapriyè ak lapè Allah sou li) te fè fè yon bag an ajan kote li te fè grave pawòl sa a: «Muhammad Mesaje Allah», pou yo te ka poze li kòm so sou lèt yo. Li te fè sa paske koutim wa yo ak kondisyon yo te toujou poze, se te pou yo pa te janm li okenn lèt amwenske li te sele ak yon so [Al-Bukhari ak Muslim]. Apre sa, li te chwazi pami pi bon nan konpayon (disip) li yo, (se pou Allah kontan avèk yo), kòm mesaje ki te genyen nan yo menm yon bèl fason pou byen pale ,fòs ak kouraj nan kè yo, ansanm ak anpil bon konprann nan lespri yo, pou yo te kapab akonpli gwo responsablite sa a.
Pwofèt la (lapè ak benediksyon Allah sou li) te delege Dihya ibn Khalifa al-Kalbi (se pou Allah agreye l) bò kote Èrakliyis, gran lidè Women yo ; li te voye Abdoullah ibn Houdhafa as-Sahmi (se pou Allah agreye l) bò kote Kisra, wa peyi Pès la ; Amr ibn Oumayya ad-Damri (se pou Allah agreye l) bò kote Negis, wa peyi Abisini an ; epi Hatib ibn Abi Balta'a (se pou Allah agreye l) bò kote Moukawkis, gran lidè yo nan peyi Ejip. Li te ekri prens ki te nan zòn Cham ak Yamama yo tou, tankou Al-Harith ibn Abi Chamir al-Ghassani ak Hawdha ibn Ali al-Hanafi. Mesaje beni sa yo te pran wout la avèk lèt gidans sa yo, ki te pote anndan yo apèl san tach Islam lan ansanm ak yon mesaj plen sajès ki te pale dirèkteman ni ak lespri ni ak kè moun. Lèt sa yo tap envite yo vin rasanble sou yon pawòl ki ini tout moun : pou yo pa adore okenn lòt bagay sof Allah sèlman, tout pandan yo tap avèti yo sou gwo konsekans sa tap genyen si yo ta bare wout pou pèp yo pa jwenn limyè laverite ak gidans diven an.
Reyaksyon wa yo te varye fas ak lèt ak mesaj sakre sa yo; te gen pami yo moun kè yo te vin dou epi ki te bay yon bèl repons, tankou Al-Muqawqis, Najashi, ak wa Eraki (Heraclius) ki te chèche konnen kalite Pwofèt la nan men Abu Sufyan. Konsa, li te vin sèten li te yon pwofèt tout bon vre, menm si pouvwa li te anpeche li swiv verite a. Te gen lòt tou ki te rebèl ak awogan, epi ki te dechire lèt li a, tankou Kisra (Khosrow). Kifè Pwofèt la (lapè ak benediksyon sou li) te priye kont li pou pouvwa li a kraze an miyèt moso. Allah te reponn priyè li a, epi wayòm li an te disparèt byen vit. Avèk lèt sa yo, mesaj Islam nan te rive jwenn wa ak chèf ki sou latè yo, epi gwo wayòm yo te vin konnen bon relijyon an. Etap sa a te sèvi kòm kòmansman faz mondyal nan zafè gaye Islam lan, pou li te ka soti nan fwontyè Penensil Arabik la pou li rive nan rès peyi ki nan mond lan.
Leson nou tire yo:
1- Sa a se yon prèv klè ki montre mesaj Pwofèt Muhammad (se pou lapè ak benediksyon Allah sou li) la se yon mesaj ki pou tout limanite nèt, pou Arab yo ak moun ki pa Arab yo, epi li pa limite sèlman pou moun ki rete nan Penensil la, an akò ak sa Allah Granmèt la di: « ...E Nou pa te voye w si se pa pou tout limanite nèt... » Sourat Saba, Vèsè 28
2- Aplikasyon prensip gouvènans ki konfòm ak lwa diven an : Sa parèt aklè nan bèl fason li te pwofite peryòd lapè ak trèv yo pou li simaye relijyon an ak mesaj la. Vrèmanvre, Pwofèt la (lapè ak benediksyon Allah sou li) te itilize akò lapè Oudaybiya a ansanm ak estabilite ak sekirite entèn sa te kreye a, pou li te ka konsakre tout tan li pou adrese lèt bay wa ak gran dirijan sou latè yo epi envite yo antre nan Islam.
3-Otorizasyon pou respekte koutim ak pwotokòl lòt Leta yo nan lèt ak kominikasyon ofisyèl depi sa pa an dezakò ak lwa islamik lan : Prèv sa a parèt aklè nan desizyon Pwofèt la (lapè ak benediksyon Allah sou li) te pran pou fè you fè yon bag kòm "So" lè yo te fè li konnen gran dirijan sa yo pa te janm konn li yon lèt si li pa pote yon sele; sa te fèt yon fason pou fasilite transmisyon prèv laverite a epi pèmèt apèl Islam lan louvri tout pòt pou li gen tout enpak li.
(17) Batay pou pran lavil Lamèk (Fathou Makka): Sa te fèt nan wityèm lane aprè emigrasyon an (Hijra).
Pi Gwo Viktwa a : Sa a se gran viktwa beni an, konkèt Lamèk; jou kote Allah te elve diyite relijyon Li an, Li te akòde Mesaje Li a laviktwa, epi Li te pirifye vil sakre Li a ansanm ak Kay Ansyen(Kaba a) anba tout fòm idolatri.
Pwofèt la (lapè ak benediksyon Allah sou li) te kòmanse prepare pou batay lan epi li te bay konpanyon li yo lòd pou yo pare tèt yo. Li te pran rout la ansanm ak konpanyon li yo (se pou Allah agreye yo) nan tèt yon lame ki te gen dis mil (10 000) konbatan, jiskaske yo te rive nan zòn ki antoure Lamèk yo. Lè Abou Soufyan te wè pwisans lame mizilman an ansanm ak kantite sòlda li yo ki te rive dis mil gason, li te konprann aklè moun Lamèk pa te gen okenn mwayen pou fè fas ak yon fòs konsa; sa te fè li aksepte rann tèt li. Aprèsa, Allah te fè li favè Islam lan, epi li te aksepte lafwa.
Antre nan Lamèk : Pwofèt la (lapè ak benediksyon Allah sou li) te antre nan Lamèk depi nan pati ki pi wo nan vil la, nan yon sèn majeste ki te enpoze anpil respè. Li te bese tèt li byen ba kòm siy imilite, soumisyon devan Allah ak rekonesans pou Li, toutpandan Mouhadjiroun yo ak Ansar yo te antoure li epi ranpli tout alantou an.
Pirifikasyon Kaba a : Pwofèt la (lapè ak benediksyon Allah sou li) te bay lòd touswit pou kraze tout zidòl yo epi retire tout imaj ki te anndan ak toutotou Kaba a, pou moun te ka adore yon sèl Allah Toupwisan an san okenn asosye.
Apre Pwofèt la (lapè ak benediksyon Allah sou li) te fin garanti sekirite tout moun Lamèk yo, anpil ladan yo te vin ak tout kè yo bò mòn Safa pou prete li sèman fidelite, pou antre nan Islam epi obeyi li. Gen lòt menm ki te rete dèyè epi kouri al kache poutèt laperèz; men Pwofèt la (lapè ak benediksyon Allah sou li) te ba yo garanti sekirite tou, sa ki te fè yo vin aksepte Islam pi devan. Konsa, antre yo nan relijyon an pa te fèt anba okenn kontrent ni fòs, men se te pito apre yon bèl padon plen jenerozite Pwofèt la te akòde yo, yon padon ki te touche epi transfòme kè yo nèt.
Enpak Konkèt la: Laviktwa sa a te gen yon gwo enpak; kidonk, aprè Pwofèt la (Ke lapriyè ak lapè Allah sou li) te ranpòte laviktwa sou Kouraych (ki te alatèt Arab yo) ansanm ak lòt viktwa ki te fèt aprè sa, tout moun te vin sèten sou verite pwofesi li a. Konsa, delegasyon yo te kòmanse vini soti toupatou pou yo antre nan relijyon Allah a an gwoup ak an foul.
Leson nou aprann yo:
1- Allah te rann Konkèt Lamèk la fasil pou Pwofèt la, (ke lapriyè ak lapè Allah sou li) ak konpayon li yo san yo pa te bezwen goumen, epi sa se piman yon favè nan men Allah dèske Li te anpeche san yo koule epi Li ba yo laviktwa an tout sekirite.
2- Karaktè imilite nan moman laviktwa: Pwofèt la (Se pou lapè ak benediksyon Allah Toupwisan an kouvri li) te antre Lamèk pandan li te nan pi gwo nivo soumisyon ak imilite devan Allah, pou li te ka aprann nou ke tout favè se pou Allah sèlman, paske se Li menm ki bay laviktwa epi ki pote sekou a, epi tou pou li montre ke kwayan an, kèlkeswa fòs li ta rive genyen, li vin gen plis imilite devan Seyè li a.
3- Enpòtans Tawhid la :« Premye aksyon Pwofèt la (lapè ak benediksyon Allah sou li) te fè se te kraze zidòl yo; epi sa konfime fondasyon relijyon sa a ak tout fòs li chita sou « Tawhid » (adorasyon Allah Sèlman), ansanm ak pirifye tout kè ak tout mezon anba nenpòt sa moun konn adore ki pa Allah. »
4- Tribi arab yo tap veye rezilta konfli a ak anpil atansyon; men lè yo te wè viktwa Allah te bay Pwofèt Li a sou pwòp pèp li a, delegasyon yo te kòmanse defile youn apre lòt pou vin deklare yo antre nan Islam. Konsa, konkèt Lamèk la te vin tounen vrè kle ki te louvri kè tout moun nan Penensil Arabik la pou akeyi lafwa.
5- Bòn nouvèl ki nan Koran an: Allah te imòtalize gran evènman sa a nan Liv Nob Li a(koran an), lè Li di: 1- Lè sekou Allah a vini ansanm ak gwo viktwa a Epi, ou wè moun yo ap antre nan relijyon Allah a an foul. 3- Alò, bay Mèt ou a (Allah) glwa ak lwanj, epi mande li padon. Sètènman, li se moun ki konn aksepte repantans anpil. [An-Nasr 1-3].
(18) Batay Ounayn
Kòz batay la : Aprè konkèt Lamèk la, Pwofèt la (lapè ak benediksyon Allah sou li) te resevwa enfòmasyon ki fè konnen tribi « Hawazin » yo (moun Tayif yo) te ap rasanble yon lame kolosal anpil pou vin goumen avèk li. Konsa, Pwofèt la (lapè ak benediksyon Allah sou li) te pran desizyon pou li soti al rankontre yo nan pwòp teritwa pa yo, anvan yo te gen tan rive sou Lamèk.
Fòs 2 lame yo: Apeprè ven mil (20 000) konbatan nan tribi Hawazin te rasanble, epi yo te pran wout la avèk tout byen yo, madanm yo ak pitit yo (yon fason pou ankouraje tèt yo pou yo pa kouri kite batay la). Kanta pou mizilman yo, yo te deplwaye ak yon gwo lame ki te gen douz mil (12 000) konbatan; pami yo te gen 2 mil (2 000) moun ki soti Lamèk ki te fèk konvèti nan lislam.
Leson sou siperyorite nan kantite : Lè kèk nan mizilman yo te wè jan yo te anpil, yo te di : « Nou pap janm pran defèt jodi a poutèt mank konbatan », men twòp konfyans sa a nan pwòp fòs yo te make kòmansman yon gwo eprèv difisil.
Men sa Granmèt nou an, Sila a ki beni an e ki egzalte a, di konsènan sitiyasyon sa a: 25: « San okenn dout, Allah te akòde nou laviktwa sou plizyè chan batay, epi nan jou batay Ounayn an, lè gwo kantite nou an te fè nou pran lògèy, men sa pa te itil nou anyen ; tout latè te vin etwat pou nou malgre jan li vas, epi nou te vire do kouri fè bak. » Sourat At-Tawba : 25
Apre sa, Allah te fè desann serenite Li sou kwayan yo, epi Li te pini moun ki te refize kwè yo. « Apre sa, Allah te fè desann serenite Li sou Mesaje Li a ansanm ak sou kwayan yo, Li te voye desann lame nou pa te wè, epi Li te pini moun ki pa te kwè yo; e se sa ki chatiman pou moun ki pa kwayan yo. » Sourat At-Tawba : 26
Sipriz difisil la : Lè mizilman yo te kòmanse antre nan vale « Ounayn » , konbatan Hawazin yo te gentan tann anbiskad byen kache pou yo. Britsoukou, yo te fonse sou lame mizilman an tankou yon sèl moun epi yo te krible yo anba yon lapli flèch, sa ki te lakòz anpil moun nan lame a te fè bak epi kouri akoz gwo sipriz sa a.
Fèmte lidè a : Nan moman difisil sa a, Pwofèt la (lapè ak benediksyon Allah sou li) te rete fèm nan plas li avèk yon kouraj ki ra, epi te gen yon ti kantite moun pami Mouhadjiroun yo ak Ansar yo avèk li, pami yo te gen Abou Bakr, Omar ak Ali (se pou Allah satisfè avèk yo).
Kouraj Pwofèt la : Pwofèt la (lapè ak benediksyon Allah sou li) te fonse sou do milèt li nan direksyon lame politeyis yo, pandan li tap rele byen fò ak tout fòs vwa li pou remete konfyans nan kè konpayon li yo : « Mwen se Pwofèt la, pa gen manti, mwen se pitit gason Abdul Muttalib » [Al-Bukhari ak Muslim], Epi konba a te vin pi entans ankò.
Laviktwa Allah ak zanj yo : Lè konpayon yo te retounen epi yo te rasanble toutotou Pwofèt yo a, pandan konba a te vin pi rèd, Allah te soutni kwayan yo lè Li te fè zanj yo desann; zanj sa yo te simen gwo lapèrèz nan kè mekreyan yo epi fè yo pye yo ap tranble.
Rezilta batay la ak byen lagè yo : Mekreyan yo te sibi yon gwo defèt epi yo te pran kouri pandan mizilman yo tap pouswiv yo. Yo te abandone dèyè yo yon kantite imans byen lagè ak gwo richès ki te vin tounen pwopriyete mizilman yo gras avèk favè Allah. Kòm yon estrateji ak yon siy jenerozite pou Pwofèt la (lapè ak benediksyon Allah sou li) te ka touche kè moun Hawazin yo epi rale yo vin jwenn li, li pa te pataje byen lagè sa yo touswit; li te prefere tann kèk tan ak lespwa yo tap tounen vin konvèti nan lislam epi mande li pou li rann yo sa yo te posede. Men, lè li te wè yo pran twòp tan pou yo vini, li te finalman distribye byen yo bay lame a (lapè ak benediksyon sou li).
Leson nou tire yo:
1- Konte sou Allah olye sou kantite : Vrèmanvre, mizilman yo te aprann nan batay Ounayn an se nan men Allah sèlman laviktwa soti, epi yon gwo kantite konbatan pa itil anyen lè lògèy antre nan kè yo.
2- Nan batay Badr la, Mizilman yo te aprann ke "ti kantite" pa nwi lè gen pasyans ak krentif pou Allah, epi nan Hounayn, yo te aprann ke "gwo kantite" pa itil anyen si pa gen pasyans epi si yo pa konte sou Allah.
3- Pwofèt la (Se pou lapè ak benediksyon Allah Toupwisan an kouvri li) ansanm ak moun ki te avèk li yo te rete fèm gras ak lafwa solid yo, epi sa aprann nou ke Allah fè kè ki sensè yo rete fèm nan sitiyasyon ki pi difisil yo.
4- Pwofèt la (Ke lapè ak benediksyon Allah sou li) te montre yon gwo kouraj nan batay sa a, malgre lame a te fè bak, li menm li te avanse byen fèm pou afwonte lènmi an pèsonèlman, pandan li tap rele non li avèk tout onè ak sètitid.
5- Allah te pote viktwa pou Mesaje Li a ak kwayan yo avèk sòlda pami zanj yo ke yo pa te wè, epi sa konfime ke Allah toujou avèk alye Li yo.
6- Apre difikilte ak gwo eprèv yo, Allah te beni mizilman yo ak laviktwa ansanm ak anpil byen lagè, kòm rekonpans pou pasyans yo ak fèmte yo.
7- Vèsè sen ki imòtalize souvni an: Men sa senyè toupwisan an di: 25- « San okenn dout, Allah te akòde nou laviktwa sou plizyè chan batay, epi nan jou batay Ounayn an, lè gwo kantite nou an te fè nou pran lògèy, men sa pat itil nou anyen ditou; tout latè te vin etwat pou nou malgre jan li vas, epi apre sa nou te vire do kouri fè bak. » 26- Apre sa, Allah te fè desann trankilite li sou mesaje li a ak sou kwayan yo, epi li te fè desann kèk lame (zanj) nou pa te wè, epi li te bay moun ki pa kwè yo yon chatiman. Epi sa se chatiman pou moun ki pa kwè yo. 27: Epi apre sa, Allah aksepte repantans nan men moun Li vle. Epi Allah se moun ki konn padone anpil, epi li gen anpil mizèrikòd. [Sourat At-Tawba vèsè 25-27]
8- Rekonpans lan koresponn ak nati travay la : Lè Pwofèt la (lapè ak benediksyon Allah sou li) te kenbe fèm nan batay la ansanm ak yon ti ponyen nan konpayon nòb li yo, laviktwa te vin jwenn li jan Allah Toupwisan an te pwomèt sa. Allah ki Pi Wo a di : 7- « O nou menm ki kwè yo ! Si nou soutni kòz Allah a, Lap soutni nou epi Lap fè pye nou rete fèm. » (Sourat Muhammad, vèsè 7) Epi sa a se yon prensip jeneral : Allah Toupwisan an pwomèt chak mizilman laviktwa ak soutyen Li si li defann relijyon Allah a, li envite moun vin jwenn Li, epi li lite nan chemen Li pandan lap chèche sèlman satisfaksyon Allah Toupwisan an.
(19) Akèy delegasyon yo ak Pelerinaj Adye a
Apre konkèt Lamèk ak laviktwa mizilman yo, tribi arab yo te rasanble soti nan tout direksyon pou vin Madin pou deklare yo aksepte lislam. Se konsa yo te vin rele nevyèm ane apre Ijra a « Ane Delegasyon yo ». Pwofèt la (lapè ak benediksyon Allah sou li) te resevwa anpil delegasyon, pami pi enpòtan yo te genyen : delegasyon Bani Tamim, delegasyon Najran, ak delegasyon Tayy (kote Adiyy pitit Hatim [‘Adiyy ibn Hâtim] te fè pati). Delegasyon sa yo te gen yon gwo wòl nan inifikasyon Penensil Arabik la anba banyè lislam; manm delegasyon yo te aprann pilye relijyon an epi yo te tounen nan zòn pa yo pou anseye pèp yo, sa ki te louvri chemen pou lislam te ka gaye tout kote.
Epi nan dizyèm ane apre Ijra a, yo te anonse pami pèp la ke Pwofèt la (lapè ak benediksyon Allah sou li) te gen entansyon al fè pelerinaj nan ane sa a. Sa te fè yon kantite moun imans soti toupatou vin rasanble Madin; yo tout te anvi akonpanye Pwofèt la (lapè ak benediksyon Allah sou li) pou yo te ka aprann nan men li epi swiv modèl li nan tout rityèl pelerinaj yo.
Rezon ki fè yo ba li non sa a : Yo te rele li "Hadj Adye a" ; paske Pwofèt la, (ke lapriyè ak lapè Allah sou li), te di moun yo orevwa ladan li avèk pawòl li yo, epi paske li menm, (ke lapriyè ak lapè Allah sou li), pa te janm fè hajj ankò aprè sa.
Gran rasanbleman peleren yo : Plis pase san mil (100 000) moun te akonpanye Pwofèt la (lapè ak benediksyon Allah sou li) nan vwayaj beni sa a; li te mennen avèk li nèf madanm li yo (se pou Allah dakò avèk yo) ansanm ak pitit fi li Fatima (se pou Allah dakò avè l).
Akonplisman favè a : Pandan Pwofèt la (lapè ak benediksyon Allah sou li) tap akonpli rityèl pelerinaj yo, nan jou Arafat la, pawòl Allah Toupwisan an te desann sou li kote Li di : « ...Jodi a, Mwen fin pèfeksyone relijyon nou an pou nou, Mwen fin akonpli favè mwen sou nou, epi Mwen aksepte lislam kòm relijyon pou nou... » (Sourat Al-Ma'ida : Yon pati nan Vèsè 3) Konsa, vèsè sa a te yon deklarasyon ki te anonse mesaj la te fin akonpli nèt.
Gwo konsèy la: Pwofèt la (ke lapè ak benediksyon Allah sou li) te fè gwo prèch pou pèp la nan jou Arafat la ak nan jou Sakrifis la, kote li te mete aksan sou prensip fondamantal pou mizilman an, inite Allah a, swiv Souna a, epi fè diferans ak politeyis yo. Li te eskplike dwa mizilman yo ansanm ak dwa mari ak madanm yo, epi pami sa li te di ladan l: « Anverite, lavi nou, byen nou, ak onè nou sakre pou nou, menm jan jou sa a (jou Arafat la) sakre, nan mwa sa a (mwa Dhul-Hijjah) ki sakre, epi nan vil sa a (Lamèk) ki sakre. Èske mwen pa transmèt mesaj la? » [Al-Bukhari ak Muslim]; Pou konfime jan lavi mizilman an sakre, ansanm ak byen li ak repitasyon li.
Epi li te bay rekòmandasyon ki pwoteje kont egareman an, lè li di: « Epi mwen kite nan mitan nou sa kap fè nou pa janm pèdi chemen aprèsa si nou kenbe fèm ladan li : Liv Allah a(koran an). » [Mouslim rapòte l].
Retou a : Apre Pwofèt la (lapè ak benediksyon Allah sou li) te fin akonpli tout rityèl pelerinaj yo epi anseye moun yo relijyon yo, li te retounen Medin.
Leson nou tire nan sa:
1- Resevwa delegasyon yo anseye nou ke fòs Islanm nan chita nan tèt ansanm ak inite sou laverite ansanm ak pwopaje konesans, epi yon lidè ki reyisi se moun ki bati pon kominikasyon pou li pwopaje sa ki byen.
2- Rekòmandasyon Pwofèt la (lapè ak benediksyon sou li) pou kenbe fèm nan Liv la ak Sounnah a se vrè mwayen delivrans pou mizilman an; paske se nan yo 2 a gidans lan ansanm ak pwoteksyon kont devyasyon ak egareman chita, nan tout epòk ak tout kote.
3- Pwofèt la (lapè ak benediksyon Allah sou li) te deplase an pèsòn pou li akonpli rityèl pelerinaj yo epi pou li anseye moun yo sa « pa aksyon » olye nan pawòl sèlman, pou li te ka yon modèl vivan tout moun wè epi swiv. Li te di (lapè ak benediksyon Allah sou li) : «Pran nan men mwen (aprann nan men m) fason pou nou fè rityèl pèlerenaj nou yo.» [Rapòte pa Al-Bayhaqi, Abou Dawoud ak An-Nasa'i], Epi nan yon vèsyon nan Sahih Mouslim : «Se pou nou pran (aprann) fason pou nou fè rityèl pèlerenaj nou yo.»
4- Allah fè nou konnen Li te fin pèfeksyone relijyon an pou nou, epi Li te fin akonpli favè li; se poutèt sa, pèsonn pa gen dwa ajoute "inovasyon" ki soti nan tèt pa li nan relijyon an, oswa pou li diminye ladan li. Paske relijyon Islam nan gen ladanl tout sa ki bon pou lavi moun yo isiba ak nan lavi apre lanmò a. Epitou lalwa a te fin konplete lè Pwofèt la (lapè ak benediksyon Allah sou li) te mouri epi revelasyon an te sispann.
5- Karaktè sakre yon Mizilman: Pwofèt la (lapè ak benediksyon Allah sou li) te ensiste avèk fòs sou envyolabilite san, onè ak byen chak mizilman, epi li te deklare li entèdi fòmèlman pou pèsonn atake yo san yon dwa lejitim.
(20) Lanmò Pwofèt la (Ke la lapè ak benediksyon Allah sou li)
Nan maten lendi, douzyèm jou nan mwa Rabi' al-Awwal nan onzyèm ane apre Ijra a, maladi a te vin pi grav sou Pwofèt la (lapè ak benediksyon Allah sou li) pandan li te lakay madanm li Aïcha (se pou Bondye dakò avè l).
Agoni lanmò a : Pwofèt la (lapè ak benediksyon Allah sou li) te andire gwo doulè ak agoni lanmò a; li te konn pase dlo sou figi li epi li tap di : «Pa gen okenn lòt dye ki merite adorasyon esepte Allah, se sèten lanmò gen doulè pal.» [Se Al-Boukari ki rapòte li].
Lanmò: Nanm nòb li a (ke lapè ak benediksyon Allah poze sou li) te ale pandan li te apiye sou pwatrin Aicha (se pou Allah kontan ak li), epi lè sa a li te gen swasann-twazan (63 lane).
Fineray li an : Yo te antere Pwofèt la (lapè ak benediksyon Allah sou li) nan menm kote li te rann dènye souf li a, ki se te kay Aïcha (se pou Allah dakò avè l).
Misyon konplè a: Pwofèt la (ke lapè ak benediksyon Allah sou li) te mouri apre li te fin akonpli misyon an nèt, epi li te kite kominote li a sou yon chemen klè tankou klète solèy la nan mitan lajounen, konsa pa gen okenn byen li pat montre nou, ni okenn mal li pat avèti nou kont li.
Leson nou tire yo:
1- Sitiyasyon sa a montre nou merit Manman Kwayan yo, Aïcha (se pou Allah kontan ak li), ak pozisyon wo li te genyen bò kote Pwofèt la (se pou lapè ak benediksyon Allah poze sou li), kote li te chwazi pase dènye jou li yo nan kay li a, epi li te mouri sou janm li.
2- Lanmò se yon lwa Allah tabli pou tout kreyasyon Li an; si te gen yon moun ki ta dwe rete vivan etènèlman sou tè a, se tap Mesaje Allah a (lapè ak benediksyon Allah sou li). Epi jan Allah Toupwisan an te di a : 30: « Anverite, ou gen pou w mouri, epi yo menm tou gen pou yo mouri. » Sourat Az-Zoumar : Vèsè 30
3- Anverite, lanmò Pwofèt la (lapè ak benediksyon Allah sou li) se pi gwo kalamite ki te janm frape mizilman yo; epi nenpòt moun ki sonje eprèv lanmò Pwofèt la (lapè ak benediksyon Allah sou li), tout lòt kalamite ap vin parèt pi lejè pou li. Jan powèt Mesaje a, Hassan ibn Thabit (se pou Allah dakò avè l), te di a :
Moun ki te pase anvan yo pat janm pèdi yon moun tankou Mouhammad... Epi pèsonn tankou li pap janm pèdi jiskaske Jou Rezireksyon an rive.
4- Yon mesaj pou predikatè yo : Se devwa chak moun ki pote konesans relijyon an pou li deplwaye tout efò posib li nan gaye li epi anseye moun yo sa, jiskaske li rankontre Allah pandan li fin akonpli responsablite ki te sou kont li a, menm jan Pwofèt la (lapè ak benediksyon Allah sou li) te fè sa.
5- Pwofèt la (lapè ak benediksyon Allah sou li) te kite nou sou verite ki klè a ak sou yon chemen ki dwat e ki sen; pèsonn pa devye sou wout sa a amwenske se yon moun ki sedwi pa yon inovasyon nan relijyon an (bid'ah) oubyen pa pasyon lachè. Konsa, tout vrè bonè a nèt chita nan swiv gidans Pwofèt la (lapè ak benediksyon Allah sou li), jan li te di a (lapè ak benediksyon Allah sou li) : «…Paske, moun nan mitan nou ki va viv lontan aprè mwen, li gen pou li wè anpil divizyon ak dezakò. Lè sa a, se pou nou swiv chemen mwen an (Sunnah) ak chemen ranplasan mwen yo (Khalif) ki byen gide yo. Kenbe chemen sa yo fèm, mare ak yo ak tout fòs nou. Veye kò nou ak bagay moun envante nan relijyon an, paske tout sa yo envante se yon inovasyon (Bid’ah), epi tout inovasyon se yon pèdi chemen.» [Sounan Abou Dawoud].
Madanm Pwofèt la yo [lapè ak benediksyon Allah sou li]
Madanm li yo (lapè ak benediksyon Allah sou li):
1. Kadidja pitit fi Khouwaylid (se pou Allah kontan avèl).
2. Sawda bint Zam'a (ke Allah satisfè de li).
3. Aicha bint Abou Bakr As-Siddiq (ke Allah satisfè de li).
4. Hafsa bint Omar ibn Al-Khattab, (ke Allah satisfè de li).
5. Zaynab bint Khuzayma (ke Allah kontan avèk li).
6. Oum Salamah (Hind bint Abi Oumayyah) (ke Allah satisfè de li).
7. Oumm Habiba (Ramla bint Abi Soufyan) (ke Allah satisfè de li).
8. Jouwayriyah bint Al-Harith (se pou Allah kontan avè l).
9. Maymouna bint Al-Harith (ke Allah satisfè de li).
10. Safiyya bint Huyayy (ke Allah satisfè avèk li).
11. Zaynab bint Jahsh (ke Allah kontan avèk li).
Leson nou tire yo:
1. Manman Kwayan yo: Madanm Pwofèt la yo (lapè ak benediksyon Allah sou li) se "manman kwayan yo" daprè tèks Koran Sen an, Allah Toupwisan an di: Pwofèt la gen plis dwa sou kwayan yo pase yo menm genyen sou pwòp tèt yo, epi madanm li yo se manman yo... [Al-Ahzab: 6], Epi Pwofèt la (Se pou lapè ak benediksyon Allah poze sou li) se tankou yon papa pou kwayan yo nan edikasyon ak konpasyon, kidonk madanm li yo vin tankou manman pou nou nan obligasyon pou nou respekte yo, ba yo valè, epi nan entèdiksyon pou nou marye avèk yo. Men, yo pa tankou manman an sa ki konsène "Mahramiyyah" la, ki pèmèt yon moun rete an prive avèk yo oswa pou yo retire ijab yo.
2. Onè pozisyon Pwofèt la (Se pou lapè ak Benediksyon Allah kouvril): Pami karakteristik madanm Pwofèt la (Ke lapè ak Benediksyon Allah kouvril) yo, sèke li pa pèmèt pou okenn moun marye avèk yo aprè lanmò li pou toutan, Allah ki Trè O a di: «... Epi nou pa gen okenn dwa pou nou ofanse Mesaje Allah a, ni pou nou marye ak madanm li yo aprè li, jamè. Anverite, sa se yon bagay ki grav anpil devan Allah.» [Al-Ahzab: 53], Sa se yon pwoteksyon pou Ran Pwofèt la (benediksyon ak lapè Allah sou li) ak yon fason pou onore li, epi paske relasyon maryaj ant limenm ak yo ap rete epi lap kontinye nan Paradi a, avèk pèmisyon Allah.
3- Grandè responsablite a ak doub rekonpans lan : Lè Pwofèt la (lapè ak benediksyon Allah sou li) te bay epouz li yo chwa ant atirans mond sa a ak rete avèk li pou pasyante devan difikilte lavi a, yo te chwazi Allah, Mesaje Li a ak dènye paradi a. Poutèt pozisyon wo yo okipe a, Allah te fè rekonpans yo double 2 fwa pou bon aksyon yo, menm jan Li te rann jijman pou nenpòt fot ki ta soti nan yo pi sevè pase pou lòt moun, yon fason pou vijilans yo ak rekonesans yo anvè Allah ka toujou rete nan pi wo degre.
4- Yo fè pati moun nan kay Pwofèt la (lapè ak benediksyon Allah sou li) : madanm Pwofèt la yo (lapè ak benediksyon Allah sou li) fè pati « Ahl al-Bayt » (moun nan kay la) Allah te fè konnen Li pirifye yo a. Allah Toupwisan an te di nan kontèks kote li te ap pale de yo a : ...Se sèl sa Allah vle: pou li retire tout sa ki pa pwòp (sou fòm peche oswa move lide) lwen nou, O nou menm moun lakay Pwofèt la (Ahl al-Bayt), epi poul netwaye nou nèt ale. [Sourat Al-Ahzab vèsè 33] Epi, se yon obligasyon pou chak mizilman renmen yo, pou li mande pou Allah kontan ak yo, epi pou li defann onè yo, paske se yo menm ki pi bèl egzanp ki san tach yo.
5. Revelasyon an ki te konn desann anndan kay yo : Youn nan pi gwo favè ak merit yo te genyen, se dèske Koran Sen an te konn desann pandan Pwofèt la (lapè ak benediksyon sou li) te lakay yo. Allah Toupwisan an te di : « ...Epi sonje sa kap resite anndan kay nou yo pami vèsè Allah yo ak sajès la... » [Al-Ahzab: 34], Gras avèk gwo pwoksimite yo te genyen avèk li (lapè ak benediksyon Allah sou li), yo te rapòte ban nou detay ki pi egzat sou Sounah li ak fason li te konn konpòte li anndan lakay li; konsa, yo chak te sèvi relijyon an lè yo te transmèt konesans sa a bay tout kominote a.
(22) Pitit Pwofèt la yo (lapè ak benediksyon Allah sou li)
Pwofèt la (lapè ak benediksyon Allah sou li) te gen 7 pitit, epi yo se:
Premyèman : Pitit gason yo (3) : Al-Qâsim : se sou non li yo te konn bay Pwofèt la (lapè ak benediksyon Allah sou li) non onorifik li a (kounyah li), kote yo te konn rele l « Abou Al-Qâsim » ; Abdoullah ; ak Ibrahim.
Dezyèmman: Pitit fi yo (4): Zaynab, Ruqayyah, Oumm Koulthoum, ak Fatima.
Tout pitit li yo te soti nan madanm li Khadija (se pou Allah satisfè avèk li), sof Ibrahim ki li menm te fèt ak sèvant li Mâriyah Kòpt la (al-Qibtiyyah). Yo tout te mouri pandan Pwofèt la (lapè ak benediksyon Allah sou li) te vivan toujou sou tè a, sof Fatimah ki te viv 6 mwa aprè li, answit li te al jwenn li.
Leson nou tire yo:
1- Nou aprann nan men Pwofèt la (lapè ak benediksyon Allah sou li) pasyans ak espwa jwenn rekonpans nan men Allah lè nou pèdi pitit. Paske, li te goute amètim pèt la nan lavi li ak lanmò 6 nan pitit li yo, epi malgre sa, li te kenbe fèm epi li te remèsye Seyè li a.
2- Merit Fatima (se pou Allah kontan avè l): Allah te fè li favè pou li te sèl ki te rete vivan aprè li, konsa li te fè pasyans epi li te espere rekonpans nan men Allah, jiskaske li te rejwenn papa l (Lapè AK benediksyon Allah kouvri li).
3- Pitit gason Pwofèt la (lapè ak benediksyon Allah sou li), "Ibrahim", ki te mouri toupiti a, manman li se te Mariya al-Qibtiyyah, epi li te pami esklav fi Pwofèt la (lapè ak benediksyon Allah sou li), li pa te pami madanm li yo, Manman Kwayan yo.
(23) Kèk nan kalite fizik ak karaktè Pwofèt la (ke lapè ak benediksyon Allah sou li)
Pwofèt la (ke lapè ak benediksyon Allah sou li) te pi bèl pami moun yo nan kalite fizik li, epi pami kalite li:
Nan sans wotè: Li te gen yon wotè mwayen pami gason yo; li pat ni twò wo ni li pat kout, okontrè, li te byen balanse.
Koulè a: Li te blan, yon blan ki melanje ak yon ti wouj lejè ki te ba li bote ak frechè.
Vizaj la: zye li te laj, bouch li te laj epi li te bèl, li te gen yon bab ki byen pwès, epi chevel te nwa kou lank. Lè li te vin granmoun, te gen kèk ti cheve blan ki te parèt ki pat menm rive 20 grenn cheve, nan bab li ak sou bò tanp li yo.
Kò a: Li laj ant 2 zepòl li yo, li toujou santi bon menm si li pa mete pafen.
Epi, kanta pou kalite li nan sa ki gen pou wè ak karaktè (moralite):
Pwofèt la (se pou lapè ak benediksyon Allah sou li) te moun ki te gen bon jan konpòtman ki pi pafè pami tout moun, epi Allah te rasanble tout bèl kalite moral yo pou li, epi pami yo genyen:
Onètete ak konfyans: Li te moun ki pi onèt nan pawòl li pami tout moun, epi ki te pi fidèl nan angajman li, tèlman, anvan misyon li an, yo te konn relel: ''Moun ki di verite a'' (Al-Sadik) ak ''Moun ki serye a'' (Al-Amin).
Jenerozite ak bay ak tout kè: Li (Ke lapè ak benediksyon Allah sou li) te moun ki te konn bay ak tout kè li plis pase tout moun, li te konn bay tankou yon moun ki pa pè vin pòv, epi yo pa te janm mande li yon bagay pou li ta di "Non".
Pasyans ak padon : Li te moun ki te pi lwen pou fache e ki te pi rapid pou kalme; li te konn padone moun ki te fè li enjistis, li te kenbe lyen ak moun ki te koupe relasyon avè l, epi lè yon moun te aji avè li ak ensolans, sa te sèlman fè li vin gen plis pasyans toujou.
Imilite ak mizèrikòd : Li te konn (lapè ak benediksyon Allah sou li) montre anpil imilite ak dousè devan kwayan yo, li te konn rann tèt li sèvis poukont li, repare sapat li, ede fanmi li nan travay kay la, onore envite li yo, epi li te konn souri ak tout moun li te rankontre. Li te moun ki te gen plis mizèrikòd ak konpasyon pou moun ki fèb yo, pou timoun yo, e menm pou bèt yo.
Kouraj: Pwofèt la (ke lapè ak Benediksyon Allah kouvril) te pi vanyan nan kè li pami tout moun, konpayon li yo te konn kouri al jwenn li lè batay la te vin pi rèd, epi se li menm ki te pi pre lènmi an pami yo.
Epi li te vrèman jan Manman Kwayan yo, Aicha (ke Allah satisfè avèk li), te dekri li a: nan yon pawòl konplè «Moralite li se te Koran an.» [Ahmad ak An-Nasa'i].
Leson nou aprann yo:
1- Byenfè nan konnen deskripsyon fizik li yo : Youn nan pi gwo favè ki genyen nan konnen karakteristik fizik li yo, se dèske Allah ka onore ou nan fè ou wèl nan rèv; konsa, nenpòt moun ki wè li ak deskripsyon li yo jan yo byen konnen yo a, se li menm toutbonvre li wè, paske Satan pa ka pran fòm li, jan li te di a (lapè ak benediksyon Allah sou li) : «Moun ki wè mwen nan rèv, se vrèman mwen menm li wè, paske dyab la pa kapab pran aparans mwen» [Rapòte pa Al-Bukhari ak Muslim].
2. Yon moun ki renmen toutbonvre toujou gen gwo anvi pou li konnen tout detay sou moun li renmen an; epi youn nan pi gwo bagay nan sa, se konnen aparans mèt tout kreyasyon an ansanm ak istwa lavi l (lapè ak benediksyon Allah sou li).
3- Nou reyalize nan ki pwen konpayon yo te gen lanmou ak atachman pou Pwofèt la (se pou benediksyon ak lapè Allah sou li), kote yo rapòte ban nou detay ki pi presi nan lavi li, epi Kominote a te prezève gwo eritaj sa a aprè yo.
4- Bèl modèl ki konplè epi ki pafè a: etidye kalite sa yo pouse mizilman an pran Pwofèt li a (Ke la lapè ak benediksyon Allah sou li) kòm modèl pou li swiv, nan aparans li avèk pwòpte ak bon sant, epi nan karaktè li avèk onètete, dousè, imilite, ansanm ak anpil lòt ankò.
Konklizyon an.
Pou fini, gen anpil liv Sounah otantik ak lavi Pwofèt la (Sira), kidonk Mizilman an dwe refere a yo pou li ka etidye lavi Pwofèt la (Sira), (Ke la lapè ak benediksyon Allah sou li), moral li, ak bèl kalite ak karaktè li epi pami yo:
1- Istwa lavi Pwofèt la pa Al-Hafiz Ibn Kathir (ke Allah fè li mizerikòd).
2- Zad al-Ma'ad pa Ibn al-Qayyim ( se pou Allah gen pitye pou li).
3- Liv Ash-Shama'il pa At-Tirmidhi, (se pou Allah fè l mizèrikòd).
E nou mande Allah ki Gran anpil la pou Li fè travay sa a fèt ak tout senserite sèlman pou Li menm , pou Li akòde nou ansanm avèk nou tout favè pou nou byen swiv Pwofèt Li a (lapè ak benediksyon Allah sou li), pou Li fè efò sa a itil tout mizilman yo, epi pou Li fè li tounen yon trezò rekonpans ki sere pou nou nan Jou Jijman an.
E tout lwanj se pou Allah ,Mèt tout linivè a, epi se pou Allah voye lapè ak benediksyon sou lidè nou Muhammad, sou fanmi li ak sou tout konpanyon li yo nèt ansanm.
Related books
All books
Pwofèt islam nan, Mouhammad, ke benediksyon ak lapè Allah poze sou li.79 languagesPwofèt islam nan, Mouhammad, ke benediksyon ak lapè Allah poze sou li.
Liv ki pote tit 'Pwofèt Islam nan, Mouhammad (ke benediksyon ak lapè Allah poze sou li) egzamine lavi Pwofèt Mouhammad (ke benediksyon ak lapè Allah poze sou li ), depi nan ras li ak janl te grandi, rive nan maryaj beni li ak kòmansman revelasyon an ki te make kòmansman dènye mesaj li a. Liv la montre prèv ak siy ki sètifye li se yon pwofèt tout bon vre, epi li esplike lwa (Charia) li te pote a ansanm ak wòl li nan pwoteje dwa ak diyite moun. Epitou, liv la mete aksan sou pozisyon advèsèl yo ak temwayaj yo te bay sou li, pandan lap klere bèl kalite moral li yo ki fèl tounen yon modèl pou moun…
Islam89 languagesIslam
Nan non Allah, Sila a ki gen anpil mizèrikòd la. Èske w janm mande tèt ou: Kilès ki kreye syèl la ak tè a ansanm ak tout gwo kreyati ki ladan yo? Epi kilès ki bati sistèm ki tèlman presi epi ki tèlman pafè sa a?
Kijan pou nou fè lapriyè (Yon ti videyo tou kout)86 languagesKijan pou nou fè lapriyè (Yon ti videyo tou kout)
Yon gid pratik tou kout sou fason pou akonpli lapriyè a, pou nou ka adore Allah ak konesans, epi pou lapriyè nou an kapab konplè avèk tout pilye l ak kondisyon li yo. Fason pou fè lapriyè a. Si nou vle fè lapriyè, se pou nou pwòp nèt. Sa vle di, nou dwe retire tout sa ki ka gate ablisyon nou, kit se ti mankman yo, kit se gwo mankman yo ki mande pou nou benyen nèt. Epi, nou dwe priye ak rad ki pwòp nèt, rad ki kouvri tout pati nan kò nou relijyon an mande pou nou kache yo. Fòk kò nou ak kote nap fè lapriyè a pwòp nèt, san okenn tras salte ki ka gate lapriyè a Nou vire fas nou nan direksyon…
Mwayen ki itil pou yon lavi ki gen kè kontan.85 languagesMwayen ki itil pou yon lavi ki gen kè kontan.
Liv ki rele "Mwayen ki itil pou yon lavi ki gen kè kontan" nan men Chek Abdurrahman bin Nasir Al-Saadi, pale sou rezon ki bay vrè kè kontan an nan yon nivo lafwa ki fon anpil. Li gide moun kap lil la pou li jwenn lapè nan kèl gras ak lafwa, bon aksyon, sonje Allah, satisfaksyon nan sa li posede, ak kalkile sou tout benediksyon li resevwa. Li pale tou sou bay sa ki bon, mete konfyans nan Allah, pasyans, ak jan pou moun byen analize sitiyasyon yo. Avèk yon bèl fason li ekri, li mete nan menw yon plan pou yon lavi ki trankil, ki balanse, epi ki gen kè kontan, malgre tout tèt chaje ki gen nan…