ஏகத்துவத்தைப் பாதுகாத்தல்

இஸ்லாத்தின் உண்மையான நம்பிக்கை கோட்பாடும் அதற்கு எதிரானவைகளும்

அப்துல் அஸீஸ் இப்னு பாஸ்

சரியான நம்பிக்கைக் கோட்பாடே இஸ்லாத்தின் அடிப்படை என்பதை இந்நூல் உறுதிப்படுத்துகிறது. இது ஆறு அடிப்படைகளை ஆதாரமாகக் கொண்டுள்ளது; அவை: அல்லாஹ்வையும், அவனது மலக்குகளையும், அவனால் இறக்கியருளப்பட்ட வேதங்களையும், அவனால் அனுப்பப்பட்ட தூதர்களையும், மறுமை நாளையும், மேலும் நன்மையும் தீமையும் இறை விதியின் அடிப்படையிலேயே நிகழும் என்பதையும் ஈமான் கொள்வதாகும். மேலும், இது ஷிர்க் (இணைவைப்பு), பித்அத் (நூதன அனாச்சாரம்) மற்றும் வழிகேடுகளிலிருந்து எச்சரிப்பதோடு, இறைவேதத்தையும் நபி (ஸல்) அவர்களின் ஸுன்னாவையும் உறுதியாகப் பற்றிப்பிடித்துக் கொள்ள வேண்டியதன் அவசியத்தையும், ஸலபுஸ் ஸாலிஹீன்களின் (நல்லோர்களான முன்னோர்களின்) வழிமுறையைப் பின்பற்றுவதையும் வலியுறுத்துகிறது.

முதலாவது தூது;

இஸ்லாத்தின் உண்மையான நம்பிக்கை கோட்பாடும் அதற்கு எதிரானவைகளும்

தொகுப்பு மதிப்பிற்குரிய அஷ்ஷேய்க்

அஷ்ஷேய்க் அப்துல் அஸீஸ் இப்னு அப்துல்லாஹ் இப்னி பாஸ் (ரஹ்)

புகழனைத்தும் அல்லாஹ் ஒருவனுக்கே உரித்தாகட்டும், ஸலாத்தும் ஸலாமும் இறுதித் தூதர் நபி (ஸல்) அவர்களின் மீதும், அவர்களின் குடும்பத்தார் மற்றும் அவர்களின் தோழர்கள் மீதும் உண்டாவதாக.

சரியான(அகீதா) நம்பிக்கைக் கோட்பாடானது இஸ்லாமிய மார்கத்தின் அடிப்படையாகவும், இச்சன்மார்க்கத்தின் அத்திவாரமாகவும் இருப்பதால், இத்தலைப்புக் குறித்து பேசுவதும், இதனை தெளிவுபடுத்தும் வகையில் எழுதுவதும், நூற்களை தொகுப்பதும் மிக முக்கியமானது என நான் கருதுகிறேன்.

மிகச்சரியான இஸ்லாமிய நம்பிக்கை க்(அகீதா) கோட்பாட்டின் அடிப்படையாக தோன்றும் வார்த்தைகளும் செயல்களும் இறைவனால் ஏற்றுக்கொள்ளப்படும் என்பது அல்குர்ஆன் அல்ஹதீஸின் ஆதாரங்களினால் அறியப்படுகின்ற விடயமாகும்.ஆனால் அகீதா சரியானதாக இல்லையெனில் அதிலிருந்து தோன்றும் சொல், செயல்கள் அனைத்தும் வீணானவையாகும். இது குறித்து அல்லாஹ் பின்வருமாறு கூறுகிறான்: இன்னும், எவர் (இந்த சட்டங்களை) நம்பிக்கைகொள்ள மறுக்கிறாரோ அவருடைய (நற்)செயல் திட்டமாக அழிந்துவிடும். இன்னும், அவர் மறுமையில் நஷ்டவாளிகளில் இருப்பார். (அல் மாயிதா :5)

மேலும் அல்லாஹ் கூறுகிறான் : திட்டவட்டமாக உமக்கும் உமக்கு முன்னுள்ளவர்களுக்கும் வஹீ மூலம் நிச்சயமாக அறிவிக்கப்பட்டது என்னவென்றால்: “நீர் இணைவைத்தால் நிச்சயமாக உமது அமல்கள் நாசமாகிவிடும். இன்னும், நீர் நஷ்டவாளிகளில் ஆகிவிடுவீர்.” (அஸ்ஸுமர் : 65)

இதே கருத்தில் அதிகமான திரு வசனங்கள் வந்துள்ளன அல்லாஹ்வின் இறைவேதமும் நபி (ஸல்) அவர்களின் ஸுன்னாவும், சரியான நம்பிக்கைக் கோட்பாடானது ஆறு விடயங்களில் அமையப்பெற்றுள்ளதாக சுட்டி க்காட்டுகின்றன. அவை; அல்லாஹ்வையும், அவனின் மலக்குகளையும், அவனது வேதங்களையும், அவனது தூதர்களையும், மறுமை நாளையும், நன்மை தீமைகள் அனைத்தும் அல்லாஹ்வின் விதிப்படி நடைபெறும் என்பதையும் ஈமான் கொள்வதாகும். ஆகவே இந்த ஆறு விடயங்களும் சரியான நம்பிக்கைக் கோட்பாட்டின் அடிப்படைகள் என அல்லாஹ்வினால் இறக்கியருளப்பட்ட இறைவேதமும் அவனினால் அனுப்பப்ப்ட அவனின் தூதரான முஹம்மத் (ஸல்) அவர்களின் கூற்றுக்களும் குறிப்பிடுகின்றன.

இந்த ஆறு அடிப்படைகளுக்கான ஆதாரங்கள் அல் குர்ஆனிலும் ஸுன்னாவிலும் மிக அதிகமாகக் காணப்படுகின்றன, எடுத்துக்காட்டாக சில ஆதாரங்களை தருகிறோம்;

முதலில்: அல் குர்ஆனில் உள்ள சில ஆதாரங்கள்; அல்லாஹ் பின்வருமாறு கூறுகிறான்.: " நன்மை என்பது கிழக்கு, மேற்கு நோக்கி உங்கள் முகங்களை நீங்கள் திருப்புவது அல்ல. மாறாக, அல்லாஹ்வையும், இறுதிநாளையும், வானவர்களையும், வேதத்தையும், நபிமார்களையும் நம்பிக்கை கொள்வதாகும்....." (அல்பகரா : 177)

மேலும் அல்லாஹ் தஆலா கூறுகிறான் "(இத்)தூதரும் நம்பிக்கையாளர்களும் தமது இறைவனிடமிருந்து தமக்கு இறக்கப்பட்டதை நம்பிக்கை கொண்டார்கள். (அவர்கள்) எல்லோரும் அல்லாஹ்வையும், அவனுடைய வானவர்களையும், அவனுடைய வேதங்களையும், அவனுடைய தூதர்களையும் நம்பிக்கை கொண்டார்கள். இன்னும், அவர்கள் கூறினார்கள்: “அவனுடைய தூதர்களில் எவருக்கிடையிலும் நாம் வேறுபாடு காட்டமாட்டோம்..." (அல் பகரா : 285)

தொடர்ந்தும் அல்லாஹ் கூறுகிறான்: " நம்பிக்கையாளர்களே! அல்லாஹ்வையும், அவனின் தூதரையும், அவன் தன் தூதர் மீது இறக்கிய வேதத்தையும், (இதற்கு) முன்னர் அவன் இறக்கிய வேதத்தையும் நம்பிக்கை கொள்ளுங்கள். எவர் அல்லாஹ்வையும், அவனின் வானவர்களையும், அவனின் வேதங்களையும், அவனின் தூதர்களையும், மறுமை நாளையும் நிராகரிப்பாரோ அவன், திட்டமாக மிகப்பெரும் வழிகேட்டில் சென்று விட்டான்". (அந்நிஸா : 136)

தொடர்ந்தும் அல்லாஹ் கூறுகிறான்: " (நபியே!) நிச்சயமாக அல்லாஹ், வானத்திலும் பூமியிலும் உள்ளவற்றை நன்கறிவான் என்பதை நீர் அறியவில்லையா? நிச்சயமாக இவை (அனைத்தும்) ‘லவ்ஹுல் மஹ்பூல்’ எனும் பதிவேட்டில் இருக்கிறது. நிச்சயமாக இது அல்லாஹ்விற்கு மிக சுலபமானதே! (அல் ஹஜ் : 70)

இரண்டாவது : ஸுன்னாவில் இருந்து ஆதாரங்கள்; அவற்றுள் இமாம் முஸ்லிம் அவர்கள் பதிவு செய்துள்ள அமீருல் முஃமினீன் உமர் (ரழி) அவர்களினால் அறிவிக்கப்பட்ட ஸஹீஹான பிரபல்யமான ஹதீஸ் உள்ளது. அதில் ஜிப்ரீல் (அலை) அவர்கள் நபி (ஸல்) அவர்களிடம் ஈமான் பற்றிக் கேட்டார்கள்; அப்போது நபி (ஸல்) அவர்கள் கூறினார்கள் : "ஈமான் என்பது அல்லாஹ்வையும், அவனின் மலக்குகளையும், அவனின் வேதங்களையும், அவனின் தூதர்களையும், மறுமை நாளையும், நன்மை தீமைகள் அனைத்தும் அல்லாஹ்வின் விதிப்படி நடைபெறும் என்பதையும் விசுவாசம் கொள்வதாகும்."[1] ஹதீஸ், இமாம்களான புஹாரியும் முஸ்லிமும் -சிறிய மாற்றத்துடன்- இதனை அபூஹுரைரா (ரழி) அவர்களின் ஹதீஸ்களில் ஒன்றாக பதிவு செய்துள்ளனர். (1) ஆதாரம் : முஸ்லிம் (8).

இந்த ஆறு அடிப்படைகளிலிருந்துதான் ஒரு முஸ்லிம்  அல்லாஹ் மற்றும் மறுமை தொடர்பாகவும் மேலும் அது அல்லாத மறைவான விடயங்கள் குறித்தும் அல்லாஹ்வும் அவனது தூதரும் (ஸல்) அறிவித்த அனைத்தும் பிரிந்து செல்கின்றன.

இந்த ஆறு அடிப்படைகளின் விபரம் பின்வருமாறு:

முதலாம் அடிப்படை : அல்லாஹ்வை நம்புதல் ( ஈமான் கொள்ளுதல்)

இது பல விடயங்களை உள்ளடக்குகிறது; அவற்றுள் சில : வணங்குவதற்கு மிகத்தகுதியான உண்மையான கடவுள் அல்லாஹ்வைத் தவிர வேறு எவரும் இல்லை என ஈமான் நம்பிக்கை கொள்வதே அல்லாஹ்வை நம்புதல் என்பதன் கருத்தாகும். வணங்குவதற்கு மிகத்தகுதியான உண்மையான கடவுள் அல்லாஹ்த் தவிர வேறு எவரும் இல்லை என ஈமான் நம்பிக்கை கொள்வதற்கான காரணம் அவனே அடியார்களை படைத்து அவர்களுக்கு நன்மை புரிந்து அவர்களின் வாழ்வாதாரங்களை பொறுப்பேற்றுள்ளான். அவர்களின் அந்தரங்கமான வெளிப்படையான விடயங்களை அறிந்திருப்பவனும் அவனே. மேலும் அவர்களில் அவனுக்கு கட்டுப்பட்டு நடப்பவனுக்கு நற்கூலி வழங்கி அவர்களில் மாறு செய்வோருக்கு தண்டனை வழங்குபவனும் அவனே என்பதினாலாகும்.

இவ்வாறு தனக்கு கட்டுப்பட்டு வணங்கவே அல்லாஹ் மனித ஜின் இனங்களை படைத்து அவர்களுக்கு இதனை கட்டளையிட்டுள்ளான் அல்லாஹ் இது குறித்து பின்வருமாறு குறிப்பிடுகிறான் : " ஜின்களையும் மனிதர்களையும் - அவர்கள் என்னை வணங்குவதற்கே தவிர - நான் படைக்கவில்லை. நான் அவர்களிடம் (அவர்கள் எனது படைப்புகளுக்கு) வாழ்வாதாரம் எதையும் (கொடுக்க வேண்டுமென்று) நாடவில்லை. இன்னும், அவர்கள் என(து படைப்புகளு)க்கு உணவளிப்பதையும் நான் நாடவில்லை. நிச்சயமாக அல்லாஹ்தான் உணவளிப்பவன் (எல்லோருக்கும் வாழ்வாதாரத்தையும் எல்லா தேவைகளையும் வழங்குபவன்), வலிமை உடையவன், மிக உறுதியானவன்". 58﴾ (அத்தாரியாத் : 56- 58).

மேலும் அல்லாஹ் கூறுகிறான்: "மக்களே! நீங்கள் (உண்மையான) இறையச்சமுள்ளவர்களாக ஆகுவதற்கு உங்களையும் உங்களுக்கு முன்னிருந்தவர்களையும் படைத்த உங்கள் இறைவனை வணங்குங்கள். அவன் பூமியை உங்களுக்கு விரிப்பாகவும், வானத்தை முகடாகவும் ஆக்கினான். இன்னும், வானத்தி(ன் மேகத்தி)லிருந்து (மழை) நீரை இறக்கினான். ஆக, அதன் மூலம் உங்களுக்கு (பல விதமான) கனிகளை உங்களுக்கு உணவாக வெளிப்பெடுத்தினான். ஆகவே, (இந்த உண்மையை) நீங்கள் அறிந்தவர்களாக இருக்கும் நிலையில், அல்லாஹ்விற்கு நிகரானவர்களை (-பொய்யான இணை தெய்வங்களை) ஏற்படுத்தாதீர்கள்". (அல்பகரா : 21,22)

ஆகவே இந்த சத்தியத்தை தெளிவு படுத்தி அதன் பால் அழைக்கவும் இதற்கு எதிரான மற்றும் முரணானவைகளை விட்டு எச்சரிக்கை செய்யவுமே அல்லாஹ் தூதர்களை அனுப்பி வேதங்களை இறக்கியருளினான். இது பற்றி அல்லாஹ் பின்வருமாறு கூறுகிறான்: “அல்லாஹ்வை வணங்குங்கள்; இன்னும்(அல்லாஹ் அல்லாத வணங்கப்படும் அனைத்து) ஷைத்தானை விட்டும் விலகுங்கள்” என்று (போதிப்பதற்காக) ஒவ்வொரு சமுதாயத்திலும் திட்டவட்டமாக ஒரு தூதரை அனுப்பினோம்". (அன்நஹ்ல் : 36)

மேலும் அல்லாஹ் கூறுகிறான் : “நிச்சயமாக என்னைத் தவிர (உண்மையில் வணங்கத்தகுதியான) இறைவன் அறவே இல்லை. ஆகவே, என்னையே வணங்குங்கள்.” என்று நாம் வஹ்யி அறிவித்தே தவிர உமக்கு முன்னர் எந்த ஒரு தூதரையும் நாம் அனுப்பவில்லை". (அல் அன்பியா :25)

மேலும் அல்லாஹ் கூறுகிறான்: அலிஃப் லாம் றா. (இது) இது இறை வேதமாகும் . நேர்த்தியாக சீரமைக்கப்பட்டு பின்னர் யாவற்றையும் அறிந்த ஞானமிக்கவனிடமிருந்து அவை விபரிக்கப்பட்டுள்ளன. “நிச்சயமாக நீங்கள் அல்லாஹ்வைத் தவிர (யாரையும்) வணங்காதீர்கள்! நிச்சயமாக நான் உங்களுக்கு அவனிடமிருந்து (அனுப்பப்பட்ட) எச்சரிப்பாளரும் நற்செய்தியாளரும் ஆவேன்.” (ஹூத் : 1-2)

வணக்கத்தின் உள்ளார்ந்த யதார்த்தமானது; அடியார்கள் புரியும் வணக்கங்கள் யாவற்றிலும் அல்லாஹ்வை தனித்துவப்படுத்துவதில்தான் உள்ளது; அதாவது பிரார்த்தனை செய்தல், பயப்படுதல், ஆதரவு வைத்தல், தொழுதல், நோன்புநோற்றல், அறுத்துப் பலியிடுதல், நேர்ச்சை செய்தல் போன்றவைகளிலும் அவை தவிர்ந்த ஏனைய வணக்கங்களிலும், அவனுக்கே முழுமையாக கீழ்ப்பணிந்து , அவனுடைய நற்கூலியை விரும்பியும் அவன் தண்டனையை அஞ்சியும், அவனுக்கான முழுமையான அன்புடனும், அவனின் மகத்துவத்தின் முன் தாழ்மையுடனும் அவற்றைச் செலுத்துதலாகும்.

அல் குர்ஆனின் பெரும்பாலான வசனங்கள் இம்மாபெரும் அடிப்டையை பிரதிபளித்து அருளப்பட்டுள்ளன என்பதை பின் வரும் வசனங்கள் காட்டுகின்றன. " நிச்சயமாக நாம் இந்த வேதத்தை உண்மையுடன் உமக்கு இறக்கினோம். ஆகவே, அல்லாஹ்வுக்கே கட்டுப்பட்டு, உளத்தூய்மையோடு வணங்குவீராக, தூய மார்க்கம் அல்லாஹ்வுக்கே உரியது " "அறிந்து கொள்ளுங்கள்! பரிசுத்தமான மார்க்க (வழிபாடு யாவு)ம் அல்லாஹ்விற்கே உரியது. அவனை அன்றி (பல) தெய்வங்களை (தங்களுக்கு) எடுத்துக் கொண்டவர்கள், “அவர்கள் எங்களை அல்லாஹ்வின் அருகே சமீபமாகக் கொண்டு செல்வார்கள் என்பதற்காகவேயன்றி நாங்கள் அவர்களை வணங்கவில்லை” என்று கூறுகிறார்கள். நிச்சயமாக அல்லாஹ் அவர்களுக்கு மத்தியில் அவர்கள் கருத்து வேறுபாடு கொண்டிருப்பவற்றில் தீர்ப்பளிப்பான். பொய்யர்களை நிராகரிப்பாளர்களை நிச்சயமாக அல்லாஹ் நேர்வழி செலுத்தமாட்டான்". (அஸ்ஸுமர் : 2-3)

மேலும் தூய்மை மிகு அல்லாஹ் கூறுகிறான்: " மேலும், (நபியே!) உமது இரட்சகனை தவிர வேறு யாரையும் வணங்க கூடாது என்று உமது இரட்சகன் கட்டளையிட்டுள்ளான்...." (அல் இஸ்ராஉ 23)

மேலும் அல்லாஹ் கூறுகிறான் " ஆகவே, நிராகரிப்பாளர்கள் வெறுத்த போதிலும் அல்லாஹ்வுக்கு கட்டுப் பட்டவர்களாக, உளத்தூய்மையுடன் அல்லாஹ் ஒருவனையே (பிரார்த்தித்து) அழையுங்கள்" (ஹாபிர் :14)

இவ்வாறே நபி (ஸல்) அவர்களின் ஸுன்னாவைப் உற்றுநோக்கும் ஒருவர், இந்த மகத்தான அடிப்படைக் கொள்கைக்கான முக்கியத்துவத்தை அதிலேயும் கண்டு கொள்ளவார். அதில் ஒன்றாக, முஆத் (ரழி) அவர்கள் மூலம் அறிவிக்கப்பட்டு புஹாரியிலும் முஸ்லிமிலும் பதிவாகியுள்ள ஹதீஸிலே நபி (ஸல்) அவர்கள் கூறுகின்றார்கள் : 'அல்லாஹ்வுக்கு அடியார்கள் செய்ய வேண்டியது அவனை உரிய முறையில் வணங்குவதும் அவனுக்கு எதனையும் இணைவைக்காது இருப்பதுமாகும்'. (2) (2) ஆதாரம் : புஹாரி (2856), முஸ்லிம் (30).

அடியார்களின் மீது அல்லாஹ் விதியாக்கி கடமையாக்கியுள்ள இஸ்லாத்தின் வெளிப்படையான ஐம்பெரும் கடமைகளை நம்புவதும் அல்லாஹ்வை ஈமான் கொள்வதில் உள்ள ஓர் அம்சமாகும்.

அவையாவன: உண்மையாக வணங்கப்படத் தகுதியானவன் அல்லாஹ்வைத் தவிர வேறு இறைவன் இல்லையென்றும், முஹம்மது (ஸல்லல்லாஹு அலைஹி வஸல்லம்) அவர்கள் அல்லாஹ்வின் தூதர் என்பதையும் சாட்சியம் கூறுதல், தொழுகையை நிலைநாட்டுதல், ஸகாத் கொடுத்தல், ரமழான் மாதத்தில் நோன்பு நோற்றல், வசதியிருந்தால் அல்லாஹ்வின் பரிசுத்த இல்லமான கஃபாவிற்கு ஹஜ் செய்தல், மேலும் புனித ஷரீஆ குறிப்பிடுகின்ற ஏனைய கட்டாய கடமைகள் யாவும் இதில் உள்ளடங்கும்.

இவ்வடிப்படைகளில் மிகப் பிரதானமானதும் மிக உயர்ந்ததுமானது; ‘அல்லாஹ்வைத்தவிர உண்மையான இறைவன் வேறு யாரும் இல்லை; முஹம்மத் (ஸல்) அவர்கள் அல்லாஹ்வின் தூதர்’ எனச் சாட்சி கூறுவதாகும். இந்தச் சாட்சியுரை, வணக்கங்களை முழுமையாக அல்லாஹ்விற்கு மாத்திரமே செலுத்தி, அவனல்லாத யாவற்றிலிருந்தும் வணக்கத்தை நீக்கிக் கொள்ள வேண்டி நிற்கிறது. இதுவே ‘லா இலாஹ இல்லல்லாஹ்’ என்பதன் அர்த்தமாகும். அதாவது, அறிஞர்கள் (ரஹிமஹுமுல்லாஹ்) கூறியதுபோல்: உண்மையாக வணங்கப்படக்கூடியவன் அல்லாஹ்வைத்தவிர வேறு யாரும் இல்லை. இதன் அடிப்படையில், அல்லாஹ்வைத்தவிர வணங்கப்படுகின்ற மனிதன், மலக்கு, ஜின் அல்லது வேறு எதுவாயினும் அனைத்தும் உண்மைக்குப் புறம்பான தவறான கடவுள்களாகும்; உண்மையாக வணங்கப்படக்கூடியவன் இணையில்லா அல்லாஹ் ஒருவனே. இது குறித்து அல்லாஹ் பின்வருமாறு குறிப்பிடுகிறான்: "அது ஏனெனில், நிச்சயமாக அல்லாஹ்தான் உண்மையானவன். இன்னும், அவனையன்றி அவர்கள் அழைக்கின்றவை பொய்யானவையாகும்". (அல் ஹஜ் : 62)

இவ்வடிப்படைக்காகவே மனித ஜின் இனங்களைப் படைத்து, அவர்களுக்கு கட்டளை பிரப்பித்து, நபிமார்களை அனுப்பி, வேதங்களை இறக்கினான் என்ற விபரம் ஏற்கனவே விபரிக்கப்பட்டுவிட்டது. அதிகமான முஸ்லிம்கள் இவ்வடிப்படை பற்றிய அறியாமையின் காரணமாக அல்லாஹ்வுடன் ஏனையவற்றையும் இணைத்து வணங்குவதை இது குறித்து சிந்திக்கின்ற போது அறிந்து கொள்ள முடிகிறது. அவர்கள் அல்லாஹ்வுக்குரிய முழுமையான உரிமையை அவனல்லாதவற்றிற்கு கொடுத்து விட்டனர். அல்லாஹ்வே இதிலிருந்து பாதுகாத்து உதவி செய்யப் போதுமானவன்.ஒரு முஸ்லிமைப் பொருத்தவரை இந்த விடயம் குறித்து நன்கு சிந்தித்து காரியமாற்றவேண்டும்.

அல்லாஹ்வே இப்பிரபஞ்சத்தைப் படைத்தவன் அதன் விவகாரங்களை திட்டமிடுபவன் அவனது அறிவாலும் வல்லமையாலும் அவனின் விருப்பப்படி நடாத்திச் செல்பவன் என நம்புதல். மேலும் அவனே இம்மை மறுமை இரண்டினதும் உரிமையாளன், உலகங்களின் இறைவன்; அவனைத் தவிர படைப்பாளன் யாருமில்லை; அவனைத் தவிர இறைவன் யாருமில்லை. இம்மை மறுமை விமோசனத்தை அடைந்து கொள்ளதற்கு அதன் பால் அழைப்புவிடுத்து அடியார்களை சீர்திருத்துவதற்காக அல்லாஹ் தூதர்களை அனுப்பி வேதங்களை இறக்கிவைத்தான். இந்த விடயங்கள் அனைத்திலும் அவனுக்கு இணையாக எவரும் கிடையாது; அல்லாஹ் கூறுகிறான் : " அல்லாஹ்தான் எல்லாவற்றுக்கும் படைப்பாளன் ஆவான். அவன்தான் எல்லாவற்றையும் (கண்காணித்து) பாதுகாப்பவன் ஆவான் ". ( அஸ்ஸுமர் : 62)

மேலும் அல்லாஹ் கூறுகிறான்: " நிச்சயமாக உங்கள் இறைவனாகிய அல்லாஹ் தான் வானங்களையும், பூமியையும் ஆறு நாட்களில் படைத்துப் பின், அர்ஷின் மீது (தன் மகிமைக்குத் தக்கவாறு) அமர்ந்தான். அவனே இரவால் பகலை மூடுகிறான். அது வெகு விரைவாக பகலை பின் தொடர்கிறது. இன்னும் சூரியனையும், சந்திரனையும், நட்சத்திரங்களையும் தன் கட்டளைக்கு கீழ்படிந்தவையாக(ப் படைத்தான்) அறிந்து கொள்ளுங்கள் “படைத்தல் மற்றும் (-படைப்புகள் அனைத்தின் மீது) அதிகாரம் செலுத்துதல்” அவனுக்கே உரியன. அகிலங்களின் இறைவனான அல்லாஹ் மிகுந்த பாக்கியவான், மிகவும் உயர்ந்தவன், மிக்க மகத்துவமானவன் ஆவான்". (அல் அஃராப் : 54)

புனித அல்குர்ஆனிலும் அவனின் தூதரின் மூலமும் உறுதிப்படுத்தப்பட்ட அல்லாஹ்வின் திருநாமங்களையும் உயர் பண்புகளையும் திரிபுபடுத்தாமலும் மறுக்காமலும் அமைப்பைக் கூறாமலும் உதாரணம் கூறாமலும் நம்புதல் அல்லாஹ்வை ஈமான் கொள்வது சார்ந்த விடயமாகும். " அவனைப் போன்று எதுவும் இல்லை. அவன்தான் நன்கு செவியுறுபவன், உற்று நோக்குபவன் ஆவான் ". (அஷ்ஷூரா :11)

அவை வந்தபடியே அதன் வடிவத்தை (அமைப்பை) கூறாமல் ஏற்றுக்கொள்ளல் வேண்டும்; மேலும் அவை உள்ளடக்கியுள்ள, அல்லாஹ்வின் –عز وجل– பண்புகளாகிய உயர் கருத்துக்களை நம்புதல் அவசியமாகும்; மேலும் அவற்றின் மூலம் அல்லாஹ்வை அவனுக்குத் தகுதியான முறையில், அவனின் எந்தப் பண்பிலும் அவன் படைப்புகளுக்கு ஒப்பாக்காமல் வர்ணிப்பதும் அவசியமாகும். அல்லாஹ் கூறுகின்றான் : மேலும் அல்லாஹ்கூறுகிறான் "ஆகவே, அல்லாஹ்விற்கு நீங்கள் உதாரணங்களை(யும் தன்மைகளையும்) விவரிக்காதீர்கள். நிச்சயமாக அல்லாஹ் (தன் தன்மையை) அறிவான்; நீங்களோ (அவனது தன்மைகளை அவன் உங்களுக்கு அறிவித்தால் தவிர) அறிய மாட்டீர்கள்". அன் நஹ்ல் (74)

இது தான் நபித்தோழர்களினதும் அவர்களின் வழியை நல்ல முறையில் பின்பற்றியோரான அஹ்லுஸ்ஸுன்னா வல் ஜமாஅத்தினரின், அல்லாஹ்வின் பெயர்கள் மற்றும் பண்புகள் தொடர்பான நம்பிக்கை கோட்பாடாகும். இதைத்தான் 'அல்மகாலாத் அன் அஸ்ஹாபில் ஹதீஸ் வஅஹ்லிஸ்ஸுன்னா' என்ற நூலில் இமாம் அபுல் ஹஸன் அல் அஷ்அரிய் அவர்களும் ஏனைய அறிஞர்களும் இக்கருத்தைக் குறிப்பிட்டுள்ளனர்

இமாம் அவ்ஸாஈ (ரஹ்) அவர்கள் கூறுகின்றார்கள்: ஸுஹ்ரியிடமும் மக்ஹூலிடமும் அல்லாஹ்வின் பண்புகள் பற்றிய அல்குர்ஆனிய வசனங்கள் குறித்து கேட்கப்பட்ட போது, அவர்கள்: 'அவை எவ்வாறு வந்துள்ளதோ, அவ்வாறே ஏற்றுக்கொள்ளுங்கள்' என்று கூறினார்கள்.[3] (3) ஆதாரம்: லால்காயி தனது ஷர்ஹ் உஸூல் இஃதிகாத் (735) லும் , இப்னு அப்தில் பர் தனது ஜாமிஉல் இல்ம் வபழ்ழுஹு (1801) லும் இதனை பதிவு செய்துள்ளார்கள், ஆனால் அதில் வசனங்கள் என்பதற்கு பதிலாக அஹாதீஸ் -ஹதீஸ்கள் எனக் குறிப்பிடப்பட்டுள்ளது, அதன் வாசகம் இவ்வாறு அமைந்துள்ளது.: "இந்த ஹதீஸ்களை அவ்வாறே கூறுங்கள், அவற்றில் விவாதிக்க வேண்டாம்.

இமாம் அவ்தாஈ (ரஹ்) அவர்கள் மேலும் கூறுகின்றார்கள்: நாமும் தாபியீன்களில் பெரும்பாலானோரும் அல்லாஹ் தன் அர்ஷின் மீதானான் என்றே கூறுகிறோம் மேலும் ஹதீஸ்களில் கூறப்பட்ட அல்லாஹ் வின் பண்புகளையும் நம்பிக்கை கொள்கிறோம் என்றே கூறக்கூடியவர்களாக இருந்தோம் (4). (4) ஆதாரம் : பைஹகி அவர்கள் அல்அஸ்மாஉ வாஸ்ஸிஃபாத் (865) இல் இதனை பதிவு செய்துள்ளார்கள். இமாம் இப்னு தைமிய்யா அவர்கள் அல்ஹமவிய்யா (பக்கம்: 269) இல் இதன் அறிவிப்பாளர் தொடரானது உறுதியானது எனக் கூறியுள்ளதுடன், இமாம் தஹபி அவர்கள் அல்அர்த் (2/223) இல் இதன் அறிவிப்பாளர்கள் அனைவரும் நம்பகத்தன்மை வாய்ந்தவர்களாக உள்ளனர் எனக் குறிப்பிட்டுள்ளார்.

அல்-வலீத் பின் முஸ்லிம் ரஹிமஹுல்லாஹ் கூறினார்கள் : மாலிக், அல் அவ்ஸாயீ, லைஸ் இப்னு ஸஃது, சுப்யானுஸ் ஸெளரீ(ரஹ்) ஆகியோரிடம் அல்லாஹ்வின் பண்புகள் குறித்து வந்துள்ள ஹதீஸ்களைப் பற்றிக் கேட்கப்பட்ட போது, அவர்கள் அனைவருமே அவை எப்படி என்பதுபற்றி ஏதும் கூறாமல் அவை எவ்வாறு வந்துள்ளதோ, அவ்வாறே ஏற்றுக்கொள்ள வேண்டும் எனக் கூறினார்கள். [5] (5) ஆதாரம் : லால்காயீ தனது ஷர்ஹ் உஸூல் அல் இஃதிகாத் (930), பைஹகீ தனது அஸ்மாஉவஸ் ஸிஃபாத்தில் (955).

மாலிக்(ரஹ்) அவர்களின் ஷைக் ரபீஆ இப்னு அபூ அப்திர்ரஹ்மான் (ரஹ்) அவர்களிடம் 'அல் இஸ்திவா'(அல்லாஹ் அர்ஷின் மீதாகுதல்) பற்றிக் கேட்கப்பட்டபோது 'அல் இஸ்திவா (என்ற வார்த்தை) யாவரும் அறிந்த விடயமாகும் அது எவ்வாறு என்பதுதான் அறிவுக்கு எட்டாதது! அல்லாஹ்விடமிருந்து தூது கிடைக்கப்பெற்றுள்ளது அதை (அப்படியே) அறிவிப்பது ரஸுல் (ஸல்) அவர்களது கடமை அதை உண்மை என நம்புவது நம்மீது கடமை எனக் குறிப்பிட்டார்கள் [6] இமாம் மாலிக் அவர்கள் அதைப் பற்றி கேட்கப்பட்டபோது கூறியதாக அறிவிக்கப்பட்டது: 'அல் இஸ்திவா' என்பது எல்லோராலும் அறியப்பட்டவிடயமாகும் அது எவ்வாறு என்பது யாரும் அறியாத விடயமாகும் அப்படி ஒரு பண்பு ;அல்லாஹ்வுக்கு உள்ளது என நம்புவது நமது கடமை. அது பற்றி தேவையற்ற கேள்வி கேட்பது பித்அத் எனும் வழிகேடு. பின்னர் இந்தக் கேள்வி கேட்டவரைப் பார்த்து நீ ஒரு மகாகெட்ட மனிதன் எனக் காண்கிறேன் என்று கூறி அவரை வெளியேற்றுமாறு உத்தரவிட அவரை அங்கிருந்தவர்கள் வெளியேற்றிவிட்டனர். [7] முஃமின்களின் தாயாகிய உம்மு சல்மா ரழியல்லாஹு அன்ஹா அவர்கள் மூலமும் இதே கருத்து அறிவிக்கப்பட்டுள்ளது [8]. (6) ஆதாரம் : லால்காயி அவர்கள் ஷர்ஹ் உசூலுல் இஃதிகாத் (665), பைஹகி அவர்கள் அஸ்மாஉவஸ் ஸிஃபாத் (868). (7) ஆதாரம்: லால்காயி தனது ஷர்ஹ் உசூலுல் இஃதிகாத் (664), அபூ நுஐம் ஹில்யதுல் அவ்லியா (6/325), பைஹகி அஸ்மாஉவஸ் ஸிஃபாத் (867) எனும் நூல்களில் பதிவு செய்துள்ளனர். (8) ஆதாரம் : மஸ்கீ (மஸ்கியாத் 29), இப்னு பத்தா (இபானா 120), லால்காயீ (ஷர்ஹ் உஸூலுல் இஃதிகாத் 663).

இமாம் அபூ அப்துர் ரஹ்மான் இப்னுல் முபாரக் (அவர்மேல் அல்லாஹ் இரக்கம் புரிவானாக) கூறினார்: “எங்கள் இரட்சகன் வானங்களுக்கு மேலால் அமைந்துள்ள அர்ஷின்மேல் தனது படைப்பினங்களிலிருந்து வேறுபட்டவனாக உள்ளான் என எங்கள் இரட்சகன் பற்றி நாம் அறிந்துவைத்துள்ளோம்.” [9] (9) ஆதாரம் : தாரிமீ, நூல் அர்ரத்து அலல் ஜஹ்மிய்யா (67), பைஹகீ நூல் அல்அஸ்மாஉ வஸ்ஸிபாத் (903).

இத்தலைப்பு குறித்து இமாம்களின் கருத்துக்கள் அளவிட முடியாத அளவுக்கு அதிகமாக உள்ளன; இவ்வுரையில் அவற்றையெல்லாம் மேற்கோள் கொள்ள முடியாது. யாராவது அவற்றில் பலவற்றை அறிந்து கொள்ள விரும்பினால், நபி வழியில் நடந்த இஸ்லாமிய பேரறிஞர்கள் இத்துறையில் எழுதியவற்றைப் பார்வையிடலாம். உதாரணமாக: இமாம் அஹ்மது (ரஹ்) அவர்களின் மகன் அப்துல்லாஹ் அவர்களின் 'அஸ்ஸுன்னா', இமாம் ஜலீல் முகம்மது இப்னு குஸைமா அவர்களின் 'அத்தௌஹீது', அபுல் காஸிம் அல்-லால்காயி அத்-தபரீ அவர்கள் எழுதிய 'அஸ்ஸுன்னா', அபூபக்கர் இப்னு அபீ ஆஸிம் அவர்கள் எழுதிய 'அஸ்ஸுன்னா', மேலும் ஹமாத் வாசிகளுக்கு ஷைகுல் இஸ்லாம் இப்னு தைமிய்யா அவர்கள் அளித்த பதில். அது அதிகம் பயனுள்ள ஒரு பதிலாகும்; அதில் அவர் அஹ்லுஸ்ஸுன்னாவினரின் அகீதா (நம்பிக்கை கோட்பாடு) பற்றி தெளிவுபடுத்தியதுடன், அவர்களின் பல கூற்றுகளையும் மேற்கோள் கொண்டுள்ளார்; மேலும் அஹ்லுஸ்ஸுன்னா கூறியது சரி என்பதற்கான ஷரீஆ ரீதியிலானதும் பகுத்தறிவுரீதியிலானதுமான ஆதாரங்களையும், அவர்களுக்கு எதிராக இருப்போர் கூறியது பிழையானது என்பதையும் தெளிவு படுத்தியுள்ளார்.

மேலும் அவரின் அத்ததம்முரிய்யா என்ற நூலில் அவர்கள் அஹ்லுஸ் ஸுன்னாக்களின் கருத்தை மார்க்க அடிப்படையிலும் அறிவு ரீதியாகவும் விரிவாகவும் விளக்கியுள்ளார். உண்மை வெளிப்படும் வகையிலும் அசத்தியத்தை நிர்மூலமாக்கும் வகையிலும் மாற்றுக் கருத்துடையவர்களுக்கு அதிலே மறுப்புக்களை வழங்கியுள்ளார். யாராவது ஒருவர் நல்லெண்ணத்துடனும் சத்தியத்தை அறியும் நோக்கிலும் இந்நூலில் உள்ளவற்றை அவதானித்தால் அவர் இப்பேருண்மையை அறிந்து கொள்வார். சுருக்கமாக: அஹ்லுஸ் ஸுன்னா வல் ஜமாஅத்தினரின் ‘பெயர்கள் மற்றும் பண்புகள்’ குறித்த நம்பிக்கை கோட்பாடு இதுவாகும்: அல்லாஹ் தனது வேதத்தில் தனக்கென்று எப்பெயர்களும் பண்புகளும் இருப்பதாக உறுதிப்படுத்தியதையும், அல்லது அவனது தூதரான முஹம்மது (ஸல்) அவர்கள் தமது ஸுன்னாவில் அல்லாஹ்வுக்குரியதாக உறுதிப்படுத்தியதையும், அவர்கள் ஒப்பாக்காமல் அப்படியே உறுதிப்படுத்துகின்றனர்; மேலும் அவனை அவன் படைப்புக்களுடன் ஒப்பிடுவதிலிருந்து, நிராகரிப்பின் சாயமுமின்றி அவனை தூய்மைப் படுத்துகின்றனர்; இதனால் அவர்கள் முரண்பாடுகளிலிருந்து பாதுகாப்பைப் பெற்று வெற்றி பெற்றனர். அல்லாஹ்வின் உதவியால் அவர்கள் எல்லா ஆதாரங்களையும் அடிப்படையாகக் கொண்டு செயல்பட்டார்கள்; ஏனெனில் தூதர்களின் மூலம் அனுப்பப்பட்ட சத்தியத்தைத் தழுவிக் கொண்டு, அதில் தம் முழு முயற்சியையும் செலுத்தி, அதை அல்லாஹ்வுக்காக இதயசுத்தியோடு நாடுபவர்களைப் பற்றிய அல்லாஹ்வின் விதி என்னவெனில், அவர்களுக்கு சத்தியத்தை அறிந்து கொள்ள நல்வாய்ப்பை வழங்கி, தன் சான்றாதாரத்தை வெளிப்படுத்துவதே ஆகும்; இது குறித்து அல்லாஹ் கூறுகிறான்: " மாறாக, நாம் சத்தியத்தை அசத்தியத்தின் மீது எறிகிறோம். அதை உடைத்து விடுகிறது அது. அப்போது அ(ந்த அசத்தியமான)து அழிந்து விடுகிறது..." (அல் அன்பியா :18)

மேலும் அல்லாஹ் கூறினான்: "(நபியே!) அவர்கள் உம்மிடம் எவ்விதமான உவமானத்தைக் கொண்டு வந்தாலும், (அதை விடவும்) உண்மையானதும், அழகானதுமான ஒரு விளக்கத்தை நாம் உமக்குக் கொடுக்காமல் இல்லை". (அல் புர்க்கான் :33)

அல்லாஹ்வின் பெயர்கள் (அஸ்மாஉ) மற்றும் பண்புகள் (ஸிபாத்) பற்றிய விடயத்தில் அஹ்லுஸ்ஸுன்னாக்கள் நம்பியிருக்கும் நிலைப்பாட்டுக்கு எதிராக நிற்பவர்கள் பற்றி கூறப்படுகின்றதேயானால், அவர்கள் தவிர்க்க இயலாத முறையில் மார்க்க அடிப்படையிலும் பகுத்தறிவுரீதியிலுமுள்ள ஆதாரங்களுக்கு முரணாகிவிடுகின்றனர்; மேலும் அவர்கள் உறுதிப்படுத்தும் அனைத்திலும் மற்றும் மறுக்கும் அனைத்திலும் வெளிப்படையான முரண்பாட்டில் விழுகின்றனர். இப்னு கஸீர் ரஹிமஹுல்லாஹ் அவர்கள் தமது புகழ்பெற்ற தஃப்ஸீரில் இத்தலைப்பில் சிறந்த கருத்தை குறிப்பிடுகிறார்; அது அல்லாஹ் அஸ்ஸவ்வஜ்ஜல் கூறிய இவ் வசனத்தை விளக்கும் போது: " நிச்சயமாக உங்கள் இறைவன், வானங்களையும் பூமியையும் ஆறு நாட்களில் படைத்தவனாகிய அல்லாஹ்தான். பிறகு, (அவன்) ‘அர்ஷ்’ மீது (தன் கண்ணியத்திற்குத் தக்கவாறு) உயர்ந்து விட்டான்..." (அல் அஃராப் : 54)

இவ்விடத்தில் அதன் மிகப் பெரும் பயன் கருதி குறிப்பிடுவது பொருத்தம் எனக் கருதுகிறேன்; இமாம் இப்னு கதீர் ரஹிமஹுல்லாஹ் அவர்கள் பின்வருமாறு கூறுகிறார்கள் :

இந்த விடயம் குறித்து மக்களிடம் அநேகமான கருத்துக்கள் காணப்படுகின்றன; அவற்றையெல்லாம் இவ்விடத்தில் விரிவாகக் கூறுவதற்குரிய இடமல்ல. ஆகவே, இவ்விடயத்தில் நன்னெறிசார்ந்த ஸலபுகளான இமாம் மாலிக், அவ்ஸாஈ, ஸவ்ரி, லைஸ் இப்னு ஸஃத், ஷாபிஈ, அஹ்மத் இப்னு ஹன்பல், இஸ்ஹாக் இப்னு ராஹவைஹி ஆகியோரும், முன்னும் பின்னுமுள்ள முஸ்லிம் இமாம்கள் பலரும் பின்பற்றிய வழிமுறையையே நாம் பின்பற்றுகிறோம். அதுவே: அவற்றை வந்துள்ளபடி மறுக்கமாலும், உவமைகூறாமலும், அமைப்பைக் கூறாமலும் ஏற்றுக்கொள்வதாகும். அல்லாஹ்விற்கு உவமைக்கற்பிப்போரின் கற்பனையில் உதிக்கும் விடயங்களைவிட்டும் அல்லாஹ் மிகவும் தூய்மையானவன். ஏனெனில் அவன் படைப்பினங்களில் எதற்கும் ஒப்பானவனாக இல்லை. "அவனைப் போன்று எதுவும் இல்லை. அவன்தான் நன்கு செவியுறுபவன், உற்று நோக்குபவன் ஆவான்". (அஷ்ஷூரா :11) ஆனால் விஷயம், இமாம்கள் கூறியபடியே உள்ளது; அவர்களில், அல்-புகாரியின் ஆசானாகிய நுஐம் பின் ஹம்மாத் அல்-குஸாஇ அவர்கள் கூறினார்: (அல்லாஹ்வைப் அவன் படைப்பினங்களுக்கு ஒப்பாக்குபவன் இறைநிராகரிப்பாளனாகிறான்; மேலும், அல்லாஹ் தன்னையே பற்றி கூறியவற்றில் ஒன்றையாவது மறுப்பவன் நிச்சயமாக இறைநிராகரிப்பாளனாகிறான்). [10] அல்லாஹ் தன்னைப் பற்றியும் அவனது தூதர் அவர்களைப் பற்றியும் கூறியவற்றில் எந்த உவமைக்கூட இல்லை. தெளிவான அல் குர்ஆன் வசனங்களிலும் உறுதியான நபி மொழிகளிலும் வந்துள்ளபடி, அல்லாஹ்வுக்கு தகுதியான முறையில் அவனது மகிமைக்கு பொருந்துமாறு அவனது பண்புகளை ஏற்றுக் கொண்டு, அல்லாஹ்வை குறைகளிலிருந்து அவனைப் பரிசுத்தப் படுத்தி, அவனது பண்புகளை கூறக் கூடியவர்கள் தாம் நேர்வழியில் நடப்போராவர் (11) இப்னு கதீர் (ரஹ்) அவர்களின் கூற்று இத்துடன் முடிவடைகிறது. (10) தஹபி அவர்கள் அல்உலூவில் (464) இதனை பதிவு செய்துள்ளார். அல்பானி அவர்கள் முக்தஸர் அல்உலூவில் (பக்கம்: 184) இந்த ஹதீஸின் அறிவிப்பாளர் தொடர் ஸஹீஹ் எனவும், அறிவிப்பாளர்கள் நம்பகத்தன்மை வாய்ந்தவர்களாகவும் உள்ளனர் எனக் கூறியுள்ளார். (11) இப்னு கஸீர் ரஹ்மதுல்லாஹ் அவர்களின் தப்ஸீரில் (பாகம் 3 பக்கம் 426, 427) ப் பார்க்க.

அல்லாஹ்வை ஈமான் கொள்வதில் கூட: ‘ஈமான் என்பது சொல்லும் செயலுமாகும். அது அல்லாஹ்வுக்குக் கட்டுப்படுவதன் மூலம் அதிகரிக்கும், மாறு செய்வதன் மூலம் குறைந்து விடும்’ என்று நம்புவதும் உள்ளடங்கும். மேலும் முஸ்லிம்களில் எவரையும்; இணை வைத்தல், இறைவனை நிராகரித்தல் தவிர்ந்த பெரும் பாவங்களான விபச்சாரம் செய்தல், திருடுதல், வட்டி கொடுக்கள் வாங்கள், போதைப்பொருள் பாவனை, பெற்றோரை நோவினை செய்தல் போன்றவையும்— இவை போன்ற பெரும்பாவங்களை ஒருவர் (ஹலாலானது) இஸ்லாத்தில் அனுமதிக்கப்பட்டது என்று கருதாத வரையில்; காஃபிர் என்று தீர்ப்பளிப்பது கூடாது. இதற்கான ஆதாரமாக பின்வரும் திருவசனம் அமைந்துள்ளது: "நிச்சயமாக அல்லாஹ் தனக்கு இணைவைக்கப்படுவதை மன்னிக்க மாட்டான். இன்னும், அதைத் தவிர மற்றதை அவன், தான் நாடியவருக்கு மன்னிப்பான்..." (அந்நிஸா : 48) நபி (ஸல்லல்லாஹு அலைஹி வஸல்லம்) அவர்கள் கூறியதாக, தொடர்ச்சியாகப் பரவி வந்த (முதாவதிர்) ஹதீஸ்களில் பதிவுசெய்யப்பட்டுள்ளது; அவற்றிலிருந்து ஒரு ஹதீஸிலே அவர் கூறியதாவது : " நிச்சயமாக அல்லாஹ், யாருடைய உள்ளத்தில் கடுகளவேனும் இறைநம்பிக்கை (ஈமான்) இருக்கிறதோ அவரை நரகத்திலிருந்து வெளியேற்றி விடுகிறான்." [12] (12) ஆதாரம் : புஹாரி (22), அபூ சயீத் அல்-குத்ரி (ரழி) அவர்களிடமிருந்து அறிவிக்கப்பட்ட ஹதீஸ்.

ஈமானின் இரண்டாவது அடிப்படை : மலக்குகளை ஈமான் கொள்வதாகும்.

இது இரண்டு விஷயங்களை உள்ளடக்கியுள்ளது: முதலாவது : சுருக்கமாக மலக்குகளை ஈமான் கொள்வது ; அதாவது நாம் அல்லாஹ்விற்கு மலக்குகள் உள்ளனர் என்று நம்புவது, அல்லாஹ் தனக்குக் கட்டுப்பட்டு நடப்பதற்காக அவர்களைப் படைத்துள்ளான்; மேலும் அவர்கள் இவ்வாறு வர்ணிக்கப்படுகின்றனர்: “ரஹ்மான் (தனக்கு) ஒரு குழந்தையை எடுத்துக் கொண்டான்” என்று அவர்கள் கூறுகிறார்கள். அவன் மகா தூயவன். (அந்த வானவர்கள் அவனுடைய மகள்கள் அல்ல) மாறாக, அவனுடைய கண்ணியமான அடியார்கள் ஆவார்கள். அவர்கள் பேச்சில் அவனை முந்தமாட்டார்கள். (எதிர்த்து பேச மாட்டார்கள்.) இன்னும், அவர்கள் அவனுடைய கட்டளையின்படியே செய்கிறார்கள். அ(ந்த வான)வர்களுக்கு முன் உள்ளதையும் அவர்களுக்குப் பின் உள்ளதையும் அவன் நன்கறிவான். அவன் விரும்பியவர்களுக்கே தவிர அவர்கள் சிபாரிசு செய்யமாட்டார்கள். இன்னும், அவர்கள் அவனுடைய அச்சத்தால் (அவனுக்கு மாறு செய்யாமல்) மிகுந்த எச்சரிக்கையுடன் பயந்தவர்களாக இருப்பார்கள்". (அன்பியாஃ : 26-28)

அவர்களில் பல பிரிவினர் உள்ளனர்; அவர்களுள் அல்லாஹ்வின் அர்ஷைச் சுமப்பதற்கும் , சுவர்க்க நரகத்தின் காவலர்களாக சிலரும் , மேலும் சிலர் அடியார்களின் செயல்களைக் கண்காணிக்கவும் நியமிக்கப்பட்டுள்ளனர். இரண்டாவது: மலக்குகளை விரிவாக ஈமான் கொள்வது; அதாவது அல்லாஹ்வும் அவனது ரஸூலும் பெயர் குறிப்பிட்டுக் கூறியுள்ளோரை நம்புவதை -ஈமான் கொள்வதை இது குறிக்கும். இதற்கு வஹியை கொண்டு செல்ல பொறுப்புச்சாட்டப்பட்ட ஜிப்ரீல், மழைக்கு பொறுப்பான மீகாயீல், நரகத்தின் காவலாளி மாலிக், ஸூர் ஊதுவதற்கு பொறுப்பான இஸ்ராபீல் போன்றொரை உதாரணமாக குறிப்பிடலாம். அவர்களைப் பற்றிய குறிப்புகள் ஆதார பூர்வமான ஹதீஸ்களிலும் வந்துள்ளன; அவற்றில்: நபி ஸல்லல்லாஹு அலைஹிவஸல்லம் அவர்கள் கூறியதாக ஆஇஷா ரழியல்லாஹு அன்ஹா அவர்கள் அறிவிக்கும் ஹதீஸ் ஸஹீஹ்(முஸ்லிம்) கிரந்தத்தில் பதியப்பட்டுள்ளது: 'வானவர்கள் ஒளியால் படைக்கப்பட்டனர். "ஜின்"கள் தீப்பிழம்பால் படைக்கப்பட்டனர். (ஆதி மனிதர்) ஆதம், உங்களுக்கு (குர்ஆனில்) கூறப்பட்டுள்ளதைப் போன்று (களிமண்ணால்) படைக்கப்பட்டார்'. இந்த ஹதீதை முஸ்லிம் தனது ஸஹீஹில் பதிவு செய்துள்ளார் (13) முஸ்லிமில் ஹதீஸ் எண் 2996 ல் பதிவுசெய்யப்பட்டுள்ளது. ஆயிஷா (ரழி) அவர்கள் மூலம் இந்த ஹதீஸ் அறிவிக்கப்பட்டுள்ளது.

மூன்றாவது அடிப்படை : இறை வேதங்களை நம்புதல் (ஈமான் கொள்ளுதல்) இது இரண்டு விடயங்களையும் உள்ளடக்கியிருக்கிறது :

முதலாவது : வேதங்களை சுருக்கமாக ஈமான் கொள்ளல்; அதாவது அல்லாஹ் மக்களைத் தனது நேரான பாதையை நோக்கி அழைக்கவும், உண்மையை விளக்கவும் தன் தூதர்களுக்கு வேதங்களை இறக்கி அருளினான் என்று நம்புவது ஆகும்; இது பற்றி பின்வருமாறு அல்லாஹ் குறிப்பிடுகிறான் : " திட்டவட்டமாக நாம் நமது தூதர்களை தெளிவான அத்தாட்சிகளைக் கொண்டு அனுப்பினோம். இன்னும், மனிதர்கள் நீதியை நிலைநாட்டுவதற்காக அவர்களுடன் வேதத்தையும் தராசையும் நாம் இறக்கினோம்..." (அல் ஹதீத்: 25) மேலும் அல்லாஹ் கூறினான்: " (ஆரம்ப காலத்தில்) மக்கள் ஒரே ஒரு சமுதாயமாக (-ஒரே ஒரு கொள்கையுடையவர்களாக) இருந்தனர். (பிறகு, தங்களுக்கு மத்தியில் வேறுபட்டார்கள்.) ஆக, அல்லாஹ் நபிமார்களை நற்செய்தியாளர்களாகவும் (அச்சமூட்டி) எச்சரிப்பவர்களாகவும் (தொடர்ந்து) அனுப்பி வைத்தான். (இஸ்ரவேலருடைய) மக்களுக்கு மத்தியில் அவர்கள் கருத்து வேறுபாடு செய்த விஷயங்களில் (இறை வேதம்) தீர்ப்பளிப்பதற்காக அவர்களுடன் உண்மையான (தவ்ராத்) வேதத்தையும் இறக்கினான். (அல் பகரா : 213)

இரண்டாவது: வேதங்களை விரிவான முறையில் ஈமான் கொள்ளல்; அதாவது அல்லாஹ் பெயரிட்டு குறிப்பிட்ட தௌராத், இன்ஜீல், ஸபூர், அல்குர்ஆன் போன்றவற்றை நம்புதல். மேலும் அல்குர்ஆன் அவை அனைத்தையும் விட மிகவும் சிறந்ததும் இறுதியானதுமாகவும், அவற்றை மிகைக்கக் கூடியதும் உண்மைப்படுத்தக் கூடியதுமாகவும் இருப்பதை நம்புதல். மேலும் அல்குர்ஆனையும் ஆதாரபூர்வமான நபி முஹம்மத் (ஸல்) அவர்களின் ஹதீஸ்களையும் பின்பற்றி வாழ்க்கையில் நடைமுறைப்படுத்துவது சமுதாயத்தில் அனைவர் மீதுள்ள கடமையாகும்; ஏனெனில் அல்லாஹுதஆலா முஹம்மத் நபி (ஸல்) அவர்களை ஜின், மனித இனங்களுக்கு பொதுவாக தூதராக அனுப்பி வைத்தான்; அவர்களிடையே தீர்ப்பு வழங்குவதற்கு இந்த அல்குர்ஆனை அவர்மீது இறக்கி வைத்தான்; மேலும் இதனை உள்ளத்திற்கான நோய்நிவாரணியாகவும் எல்லாவற்றுக்கும் தெளிவான விளக்கமாகவும் விசுவாசிகளுக்கு அருட்கொடையாகவும் நேர்வழியாகவும் ஆக்கியுள்ளான். இது பற்றி அல்லாஹ் பின்வருமாறு குறிப்பிடுகிறான் (மனிதர்களே!) இதுவோ பாக்கியமிக்க (அதிமான நன்மைகளை உடைய) வேதமாகும். இதை நாமே இறக்கினோம். ஆகவே, நீங்கள் கருணை காட்டப்படுவதற்காக இதைப் பின்பற்றுங்கள். இன்னும் (அல்லாஹ்வை) அஞ்சுங்கள். (அல் அன்ஆம் :155) மேலும் அல்லாஹ் குறிப்பிடுகிறான்: "எல்லாவற்றையும் தெளிவுபடுத்தக்கூடியதாகவும் நேர்வழி காட்டியாகவும் (அதை ஏற்று செயல்படுகின்ற) முஸ்லிம்களுக்கு அருளாகவும் நற்செய்தியாகவும் இவ்வேதத்தை உம்மீது இறக்கினோம்". (அன்நஹ்ல் : 89) மேலும் அல்லாஹ் கூறுகிறான்: "(நபியே!) கூறுவீராக: “மனிதர்களே! நிச்சயமாக நான் உங்கள் அனைவருக்கும் அல்லாஹ்வின் தூதர் ஆவேன். வானங்கள் இன்னும் பூமியின் ஆட்சி அவனுக்குரியதே! அவனைத் தவிர (உண்மையில் வணங்கத்தகுதியான) இறைவன் அறவே இல்லை. (அவன்தான்) உயிர்ப்பிக்கிறான்; இன்னும், மரணிக்கச் செய்கிறான். ஆகவே, நீங்கள் நேர்வழி பெறுவதற்காக அல்லாஹ்வை நம்பிக்கை கொள்ளுங்கள். இன்னும், (நீங்கள் நேர்வழி பெறுவதற்காக) அல்லாஹ்வையும் அவனுடைய வாக்குகளையும் நம்பிக்கை கொள்பவரான, எழுதப் படிக்கத் தெரியாதவரான, நபியான அவனுடைய தூதரையும் நம்பிக்கை கொள்ளுங்கள்! இன்னும், அவரைப் பின்பற்றுங்கள்!" (அல அஃராப் : 158) இதே கருத்தில் அதிகமான திரு வசனங்கள் வந்துள்ளன.

நான்காவது அடிப்படை: இறைத்தூதர்களை ஈமான் கொள்ளல்.

இது இரண்டு விடயங்களை உள்ளடக்கியுள்ளது: முதலாவது: இறைத்தூதர்களை சுருக்கமாக ஈமான் கொள்ளல்; அதாவது, அல்லாஹ் தனது அடியார்களிடம் சில தூதுவர்களை நன்மாறாயம் கூறக்கூடியவர்களாகவும், அச்சமூட்டி எச்சரிக்கை செய்பவர்களாகவும், உண்மையின் பக்கம் அழைக்கக்கூடியவர்களாகவும் அனுப்பியுள்ளான் என்பதை நாங்கள் நம்புதல். எவர் அவர்களின் அழைப்பை ஏற்றுக் கொண்டார்களோ அவர்கள் நற்பாக்கியத்தால் வெற்றி பெற்றனர். எவர் அவர்களுக்கு மாறு செய்தார்களோ அவர்கள் கைசேதமடைந்தவர்களாகவும் நஷ்டப்பட்டவர்களாகவும் ஆகிவிட்டனர். அவ்விறைத்தூதர்களுள் இறுதியானவரும் மிகச்சிறப்புக்குரியவரும் எமது நபி முஹம்மது இப்னு அப்தில்லாஹ் (ஸல்) அவர்களாவார்கள். அல்லாஹ் இது பற்றி பின்வருமாறு குறிப்பிடுகிறான் “அல்லாஹ்வை வணங்குங்கள்; இன்னும், ஷைத்தானை விட்டும் விலகுங்கள்” என்று (போதிப்பதற்காக) ஒவ்வொரு சமுதாயத்திலும் திட்டவட்டமாக ஒரு தூதரை அனுப்பினோம். (அன்நஹ்ல் : 36) மேலும் அல்லாஹ் கூறுகிறான்: "தூதர்களுக்குப் பின்பு அல்லாஹ்வின் மீது (குற்றம் கூற) மக்களுக்கு ஓர் ஆதாரமும் இல்லாதிருக்க, நற்செய்தி கூறுபவர்களாக, (அச்சமூட்டி) எச்சரிப்பவர்களாக (பல) தூதர்களை (எமது அடியார்களுக்கு தொடர்ந்து நாம் அனுப்பினோம்)..." (அந்நிஸா : 165) மேலும் அல்லாஹ் கூறுகிறான்: " முஹம்மத் உங்கள் ஆண்களில் ஒருவருக்கும் தந்தையாக இருக்கவில்லை. என்றாலும், அவர் அல்லாஹ்வின் தூதராகவும் நபிமார்களின் இறுதி முத்திரையாகவும் இருக்கிறார்..." (அல் அஹ்ஸாப் : 40)

இரண்டாவது: இறைத்தூதர்களை விரிவாக ஈமான் கொள்ளல்; அதாவது, அல்லாஹ் பெயர் குறிப்பிடப்பட்டவர்களாகவோ, அல்லது அல்லாஹ்வின் தூதர் (ஸல்) அவர்களிடமிருந்து பெயர் உறுதிசெய்யப்பட்டவர்களாகவோ இருப்பவர்களை, பெயரைத் தெளிவாகக் குறிப்பிட்டு ஈமான் கொள்ளல்; நூஹ் (அலை), ஹூத் (அலை), ஸாலிஹ் (அலை), இப்றாஹீம் (அலை) மற்றும் பிறர் போன்றோர். அவர்கள்மேலும், அவர்களது குடும்பத்தார்மேலும், அவர்களைப் பின்பற்றுவோர்மேலும் அல்லாஹ்வின் அருளும் சமாதானமும் உண்டாவதாக.

ஐந்தாவது அடிப்படை : மறுமை நாளை நம்பிக்கை கொள்வது

இது பின்வரும் விடயங்களை உள்ளடக்குகிறது :

மரணத்திற்குப் பின்னர் நிகழும் விடயங்கள் குறித்து அல்லாஹ்வும் அவனது தூதரும் அறிவித்த அனைத்தையும் ஈமான் கொள்வது; அதாவது கப்ரின் சோதனை, அதன் இன்பமும் வேதனையும், மேலும் மறுமை நாளில் ஏற்படும் அமலிதுமலிகள், பயங்கர துன்பங்கள் கஷ்டங்கள், ஸிராத் எனும் பாலம், நன்மை தீமை நிறுக்கப்படும் தராசு, விசாரணை, கூலி வழங்கப்படுதல், மக்கள் மத்தியில் அவர்களின் (நன்மை தீமை பற்றிய) ஏடுகள் விரித்துக்காட்டப்படுதல்; அப்போது அந்த ஏடுகளை ஒருவன் வலது கரத்தில் அல்லது இடது கரத்தில் அல்லது பின்புறமாகப் பெறுதல்.

மேலும்; எமது நபி முஹம்மது (ஸல்) அவர்களுக்குரிய ஹவ்ல் எனும் தடாகம் பற்றி விசுவாசம் கொள்வதும் உள்ளடங்குகிறது. மேலும் சுவர்க்கம் நரகம், முஃமீனான அடியார்கள் இறைவனை காண்பது, அவனுடன் உரையாடுவது போன்ற விடயங்கள் மற்றும் இவை தவிர புனித அல் குர்ஆனிலும் ஆதார பூர்வமான ஹதீஸ்களிலும் வந்துள்ளவையும் இதில் உள்ளடங்கின்றன. இவை அனைத்தையும் அல்லாஹ்வும் அவனின் தூதரும் தெளிவு படுத்தி விவரித்த முறையில் ஈமான் கொள்வது அவசியமாகும்.

ஆறாவது அடிப்படை: இறை விதியை(களா கத்ர்) ஈமான் கொள்ளல்

இறை விதியை (நம்புவது) ஈமான் கொள்ளல் என்பது நான்கு விடயங்களை உள்ளடக்குகிறது : அவை பின்வருமாறு :

முதலாவது விடயம் : அல்லாஹ்வின் ‌அறிவாற்றல் பற்றி நம்பிக்கை கொள்ள வேண்டும்‌. அதாவது , இதுவரை நடந்தவை இனியும் நடக்க இருப்பவை அனைத்தையும் அவன் நன்கறிவான். மேலும் தன் அடியார்களின் நிலமைகள், அவர்களது வாழ்வாதாரம், அவர்களது ஆயுற் காலம், அவர்களது செயல்பாடுகள் மற்றும் இவைகள் அல்லாத அவர்களது விவகாரங்கள் அனைத்தையும் அல்லாஹ் நன்கறிவான். இவற்றுள் எதுவும் அவனுக்கு மறைவாகாது என நம்புதல், இது குறித்து அல்லாஹ் பின்வருமாறு குறிப்பிடுகிறான்: " நிச்சயமாக அல்லாஹ் எல்லாவற்றையும் நன்கறிந்தவன் என்பதை அறியுங்கள்". (அல் பகரா : 231) மேலும் அல்லாஹ் கூறுகிறான்: "நிச்சயமாக அல்லாஹ் எல்லாப் பொருள்கள் மீதும் பேராற்றலுடையவன், நிச்சயமாக அல்லாஹ் எல்லாப் பொருள்களையும் அறிவு ஞானத்தால் சூழ்ந்துள்ளான்" (அத்தலாக் : 12)

இரண்டாவது விடயம்: படைப்புகள் குறித்து அல்லாஹ் தீர்மானித்து முடிவு செய்த அனைத்தையும் (லவ்ஹுல் மஹ்பூலில்) எழுதிவைத்துள்ளான் என நம்பவேண்டும்; இது பற்றி அல்லாஹ் பின்வருமாறு குறிப்பிடுகிறான் : : "அவர்களி(ன் உடல்களி)ல் பூமி குறைப்பதை (-தின்று அழித்துவிடுவதை) திட்டமாக நாம் அறிவோம். (எழுதப்பட்ட செய்திகளை) பாதுகாக்கக்கூடிய பதிவு நூல் நம்மிடம் இருக்கிறது. (அதில் இவை எல்லாம் தெளிவாக பதியப்பட்டு மிக்க பாதுகாப்பாக இருக்கிறது.) (காப் : 4) மேலும் அல்லாஹ் கூறுகிறான்: "எல்லாவற்றையும் நாம் தெளிவான பதிவேட்டில் பதிவு செய்துள்ளோம்". (யாஸீன் :12) மேலும் அல்லாஹ் கூறுகிறான் : "(நபியே!) நிச்சயமாக அல்லாஹ், வானத்திலும் பூமியிலும் உள்ளவற்றை நன்கறிவான் என்பதை நீர் அறியவில்லையா? நிச்சயமாக இவை (அனைத்தும்) ‘லவ்ஹுல் மஹ்பூல்’ எனும் பதிவேட்டில் இருக்கிறது. நிச்சயமாக இது அல்லாஹ்விற்கு மிக சுலபமானதே!" (அல் ஹஜ் : 70)

மூன்றாவது விடயம்: பிரபஞ்சத்தில் நடைபெறும் அனைத்துமே அல்லாஹ்வின் நாட்டப்படியே நடைபெறுகின்றன என்று நம்புதல் வேண்டும்.அதாவது அல்லாஹ் நாடியவை மட்டுமே நடக்கும் ; நாடாதவை எதுவுமே இடம் பெறாது. அத்தோடு அவனது நாட்டத்தில் அடங்காத எதுவுமே இருக்காது எனவும் ஈமான் கொள்ளவேண்டும் என பின்வரும் அல்குர்ஆன் வசனங்கள் விபரிக்கின்றன : "நிச்சயமாக அல்லாஹ், தான் நாடுவதை செய்வான்." (அல் ஹஜ் : 18) மேலும் அல்லாஹ் கூறுகிறான்: "அவன் எதையும் நாடினால் அவனது கட்டளை எல்லாம், ‘ஆகு’ என்று அதற்கு அவன் கூறுவதுதான். உடனே அது ஆகிவிடும்". (யாஸீன் : 82) மேலும் அல்லாஹ் குறிப்பிடுகிறான்: "அகிலத்தார்களின் இறைவனான அல்லாஹ் நாடினால் தவிர, (நீங்கள் நல்லறிவு பெற) நாடமாட்டீர்கள் ". (தக்வீர் : 29).

நான்காவது விடயம் : அல்லாஹ் அனைத்து படைப்பினங்களையும் படைத்தான் என நம்புதல்; வேறு படைப்பாளனோ பரிபாலிப்பவனோ இல்லை என நம்புதல்; அல்லாஹ் இது பற்றிக் குறிப்பிடுதாவது: "அல்லாஹ்தான் எல்லாவற்றுக்கும் படைப்பாளன் ஆவான். அவன்தான் எல்லாவற்றையும் (கண்காணித்து) பாதுகாப்பவன் ஆவான்". ( அஸ்ஸுமர் : 62) மேலும் அல்லாஹ் கூறுகிறான் : " மக்களே! உங்கள் மீதுள்ள அல்லாஹ்வுடைய அருட்கொடையை நினைவு கூருங்கள். வானங்களில் இருந்தும் பூமியில் இருந்தும் உங்களுக்கு உணவளிக்கிற படைப்பாளன் அல்லாஹ்வை அன்றி யாரும் உண்டா? அவனைத் தவிர (உண்மையில் வணங்கத்தகுதியான) இறைவன் அறவே இல்லை. ஆகவே, நீங்கள் எப்படி (அவனை விட்டு) திருப்பப்படுகிறீர்கள்". (பாதிர் : 03)

விதியை நம்புவது (ஈமான்) கொள்வது என்பது, அஹ்லுஸ்ஸுன்னாவினரின் நம்பிக்கையாக இருப்பதுபோல், இந்த நான்கு விடயங்களையெல்லாம் ஈமான் கொள்வதை உள்ளடக்கியதாகும்; இவற்றுள் சிலவற்றை பித்அத் வாதிகளாகிய மாற்றுக் கருத்துக்கொண்டோர் மறுக்கின்றனர்.

அஹ்லுஸ் ஸுன்னாவின் சரியான நம்பிக்கைக் கோட்பாட்டில் முக்கியமான விடயங்களில் ஒன்று: அல்லாஹ்வுக்காக நேசம் கொள்வதும் அல்லாஹ்வுக்காக வெறுப்பதும் அல்லாஹ்வுக்காக உறவு வைத்துக் கொள்வதும் அல்லாஹ்வுக்காக பகைத்துக் கொள்வதும் ஆகும். இதுவே ; உற்ற நேசிப்பும் பகையும் பற்றிய கொள்கையாகும், இது அல்லாஹ்வை ஈமான் கொள்வதின் ஒரு பகுதியாகும்.

ஆகவே முஃமின்கள் ஏனைய முஃமின்களை நேசம் கொள்வதுடன் அவர்களுடன் ஒப்புறவோடு நடந்து கொள்வார்கள்; காஃபிர்களின் செயற்பாடுகள் குறித்து வெறுப்புக்கொள்வதுடன் அவர்களுடன் நற்புறவு கொள்ளாது பகைத்து நிற்பார்கள். இந்தச் சமூகத்தில் முஃமின்களுள் நபித்தோழர்கள் பிரதானமானவர்கள் — அஹ்லுஸ்ஸுன்னாக்களில் நிலைபெற்றிருப்பது போலவே — ஆகையால் அவர்கள் அவர்களை நேசித்து அவர்களுடன் நற்புறவு பேணி நடக்கின்றனர்; நபிமார்களுக்குப் பின் மனிதர்களிலேயே சிறப்பானவர்கள் அவர்கள் தாமே என நம்புகின்றனர். நபி (ஸல்) அவர்கள் இது பற்றி கூறும்போது : ((சமுதாயத்தில் மிகச் சிறந்தோர் எனது நூற்றாண்டில் வாழும் என் தோழர்கள், பின்னர் மிகச் சிறப்புக்குரியோர் அதனைத் தொடர்ந்து வந்த நூற்றாண்டில் வாழ்ந்தோர்; அதன் பின்னர் சிறப்புக்குரியோர் அதனைத் தொடர்ந்து வந்த நூற்றாண்டில் வாழ்ந்தோர் ஆவார்கள்)) (14) இந்த நபிமொழி ஸஹீஹானது என்பது ஏகோபித்த கருத்தாகும் (14) ஆதாரம் : புஹாரி (3651), முஸ்லிம் (2533), அப்துல்லாஹ் இப்னு மஸ்ஊத் (ரழி) அவர்கள் மூலம் இந்த ஹதீஸ் அறிவிக்கப்பட்டுள்ளது.

அந்த நபித் தோழர்களில் மிகச் சிறந்தவர் அபூபக்கர் ஸித்தீக் (ரழி) பின்னர் உமருல் பாரூக்(ரழி) பின்னர் உஸ்மான்(துன்னூரைன் ரழி) பின்னர் அலி அல்முர்தழா (ரழி) ஆகியோராவார்கள். இவர்கள் அனைவரையும் அல்லாஹ் பொருந்திக் கொள்வானாக! சுவர்க்கத்தைக் கொண்டு நன்மாராயம் கூறப்பட்ட பத்துப் பேர்களுள் மேற்குறிப்பிட்ட நால்வரைத்தவிர எஞ்சியவர்களும், ஏனை ய நபித்தோழர்களும் சிறந்தவர்கள் என்றும் நம்புகிறார்கள். மேலும் நபித்தோழர்களுக்கு மத்தியில் நடந்த சில கருத்து வேறுபாடுகளை உண்மையான அஹ்லுஸ்ஸுன்னத் வல் ஜமாஅத்தை சேர்ந்தோர் விமர்சிக்காது தவிர்ந்து கொள்வதுடன் அவர்கள் இப்பிரச்சினை குறித்து சரியான நிலைப்பாட்டை அறிய பாடுபட்ட முஜ்தஹிதுகள் என்று ஏற்றுக்கொள்வதுடன் இப்பிரச்சினை தொடர்பாக யார் சரியான நிலைப்பாட்டை பெற்றுகொண்டாரோ அவருக்கு இரண்டு கூலியும், தனது ஆய்வில் சரியானதைப் யார் பெற்று கொள்ளவில்லையோ அவர் (முயற்சி செய்தமைக்காக) ஒரு கூலியும் இருக்கிறது எனவும் நம்பிக்கை கொள்கிறார்கள்.

மேலும் அவர்கள் நபி(ஸல்) அவர்களின் குடும்பத்தினரில் நபியவர்களை நபியாக ஏற்று விசுவாசம் கொண்டவர்களை நேசித்து, அவர்களுடன் நற்புறவு பேணி நடக்கின்றனர்; மேலும் நபி(ஸல்) அவர்களின் மனைவியரான முஃமின்களின் தாய்மார்களுடனும் நற்புறவு பேணி நடந்து, அவர்கள் எல்லோரையும் பொருந்தியும் கொள்கிறார்கள். அவர்கள், நபி(ஸல்) அவர்களின் தோழர்களை வெறுத்து திட்டுகின்ற, நபியவர்களின் குடும்பத்தினரை அல்லாஹ் குறிப்பிட்ட அந்தஸ்தை விட அதிகமாக உயர்த்துகின்ற ராபிழாக்களின் வழிமுறையை விட்டும் நீங்கி இருப்பதுடன், நபி(ஸல்) அவர்களின் குடும்பத்தினரை சொல்லாலும் செயலாலும் துன்புறுத்தக் கூடிய (நவாஸிப்) என்ற கூட்டத்தினரின் வழிமுறையை விட்டும் நீங்கி இருக்கிறார்கள்.

நாம் குறிப்பிட்ட இவை அனைத்தும் சரியான இஸ்லாமிய கொள்கையில் (அகீதாவில்) உள்ளடங்குபவையாகும். அக் கொள்கையை நிலைநாட்டவே முஹம்மது (ஸல்) அவர்களை தூதராக அல்லாஹ் அனுப்பினான். இதுவே ஒவ்வொருவரும் நம்பிக்கையாக ஏற்றுக்கொள்ளவும், உறுதியாக கடைப்பிடிக்கவும், அதன்பேரில் நேர்வழியில் நிலைத்திருக்கவும் வேண்டிய இஸ்லாமிய அடிப்படைக் கொள்கையாகும்; இதற்கு முரணாக காணப்படும் அனைத்திலிருந்தும் எச்சரிக்கையாக இருத்தல் அவசியமாகும். இது தான் ஈடேற்றம் பெற்ற பிரிவினரான 'அஹ்லுஸ் ஸுன்னத் வல்ஜமாஅத்தினரின் கொள்கையாகும். இது பற்றி நபி(ஸல்) அவர்கள்: ' எனது உம்மத்தில் ஒரு பிரிவினர் எப்போதும் சத்தியத்தின் மீது மேலோங்கிக் கொண்டிருப்பார்கள்; அவர்களுக்கு முரணாக நடக்கும் எவராலும் அவர்களுக்கு தீங்கிழைக்க முடியாது. அல்லாஹ்வின் கட்டளை வரும் வரை அவ்வாறே இருப்பார்கள்'. [15] மற்றொரு அறிவிப்பில்; "எனது உம்மத்தில் ஒரு பிரிவினர் உதவி செய்யட்ட நிலையில் எப்போதும் சத்தியத்தில் நிலைத்திருப்பார்கள்." (16) மேலும் ஸல்லல்லாஹு அலைஹி வஸல்லம் கூறினார்கள்: ((யூதர்கள் (71) எழுபத்தியொரு கூட்டமாகப் பிரிந்தனர், கிறித்தவர்கள் (72) எழுபத்திரண்டு கூட்டமாகப் பிரிந்தனர். எனது இந்த சமுதாயத்தினர் (73) எழுபத்தி மூன்று கூட்டமாகப் பிரிவர். இவற்றுள் ஒரேயொரு கூட்டத்தினர் தவிர மற்றையோர் அனைவரும் நரகிற்கு உரியவர்கள்' என நபி (ஸல்) அவர்கள் குறிப்பிட்டபோது, 'அல்லாஹ்வின் தூதரே! அவர்கள் யார்?' என நபித்தோழர்கள் கேட்டனர். அப்போது 'நானும் எனது தோழர்களும் எந்த வழியில் இருக்கின்றோமோ அந்த வழியில் இருப்பவர்கள்' என பதிலளித்தார்கள்)) [17] (15) ஆதாரம் : முஸ்லிம் (1920), ஸவ்பான் (ரழி) ஹதீஸ். (16) ஆதாரம் : இப்னு மாஜா (3952), ஸவ்பான் (ரழி) அவர்களிடமிருந்து ஹதீஸ். இப்னு ஹிப்பான் (6714), ஹாகிம் (8653) ஆகியோர் இதனை ஸஹீஹ் எனக் கூறியுள்ளனர். (17) ஆதாரம் : திர்மிதி (2641), அப்துல்லாஹ் இப்னு அம்ர் (ரழி) அவர்களிடமிருந்து வந்த ஹதீஸ். ஃபைழுல் கதீர் (5/347) இல் மனாவி அவர்கள் கூறியதாவது: "இதில் அப்துர் ரஹ்மான் இப்னு ஸியாத் அல்-அஃப்ரீகீ உள்ளார், தஹபீ அவர்கள்: அவரை பலர் பலவீனமாகக் கூறியுள்ளனர்" எனக் குறிப்பிட்டுள்ளார். அஷ்ஷேக் அல்பானி அவர்கள் ஸஹீஹுல் ஜாமிஇல் (5343) இல் இதனை ஸஹீஹ் எனக் கூறியுள்ளார்.

இஸ்லாத்தின் உண்மை இறையியல் கோட்பாட்டிற்கு எதிரான நம்பிக்கைக் கோட்பாடுகள்

இந்த சரியான அகீதாவை விட்டும் நெறிபிறழ்ந்தோரும், இதற்கு முரணான கொள்கையில் செல்லக் கூடியவர்களும் ஏராளமானோர் உள்ளனர். அவர்களுள் சிலைகளையும் விக்கிரகரங்களையும் வணங்குவோர், வானவர்களையும் அவ்லியாக்களையும் (இறை நேசர்களையும்) ஜின்களையும் வணங்குவோர், மரங்களையும் கற்களையும் மற்றும் ஏனயவைகளை வணங்குவோர்கள் உள்ளனர். இவர்களும் குறைஷிகள் மற்றும் அரபுகளில் உள்ள ஏனைய பிரிவினரும் நபி (ஸல்) அவர்களுடன் நடந்து கொண்டது போல் நபியின் ஏகத்துவ அழைப்பை ஏற்காது அவர்களுக்கு முரணாக நடந்து, அவர்களது பிழையான கொள்கையில் மனமுரண்டாக இருந்தார்கள். அவர்கள் தாங்கள் வணங்கும் தெய்வங்களிடம் தங்களது தேவைகளை நிறைவேற்றுமாறும், நோயாளிகளை குணப்படுத்துமாறும், எதிரிகளுக்கு எதிராக தமக்கு உதவி செய்யுமாறும் கேட்பார்கள். மேலும் தங்களின் தெய்வங்களுக்கு அருத்துப்பலியிடுவதுடன் நேர்ச்சையையும் நிறைவேற்றினார்கள். இவர்களின் இச்செயற்பாடுகளை நபியவர்கள் மறுத்துரைத்து, அல்லாஹ்வுக்கு மாத்திரம் இதயசுத்தியுடன் வணக்கத்தை செலுத்துங்கள் என்று கட்டளையிட்ட போது, அதனை புதுமையான ஒரு விடயமாக கருதி அவர்களின் அழைப்பை மறுத்து, பின்வருமாறு கூறினர்; "(இன்னும் அவர்கள் கூறினார்கள்:) “இவர் தெய்வங்களை (எல்லாம்) ஒரே ஒரு தெய்வமாக மாற்றிவிட்டாரா? நிச்சயமாக இது ஒரு ஆச்சரியமான விஷயம்தான்.” (ஸாத்: 05)

நபியவர்கள் தொடர்ந்து அவர்களை அல்லாஹ்வின்பால் அழைத்த வண்ணம் இருந்ததுடன், இணைவைத்தலை எச்சரிப்பவர்களாகவும் இருந்து, அவர்கள் அழைக்கும் கொள்கையின் யதார்த்தத்தை அவர்களுக்கு தெளிவுபடுத்தி வந்தார்கள்; அவர்களில் சிலருக்கு அல்லாஹ் நேர்வழி காட்டினான்; அதனைத் தொடர்ந்து அவர்கள் கூட்டம் கூட்டமாக இஸ்லாமிய மார்க்கத்தினுள் நுழைந்தனர். எனவே நபிவர்களினதும் அவர்களின் தோழர்களினதும் –رضي الله عنهم– அவர்களை தொடர்ந்து வந்த நேர்வழி நடந்த தாபியீன்களின் தொடரான பிரச்சார முன்னெடுப்பினாலும் நீண்ட இறைவழிப்போராட்டதினாலும் இச்சன்மார்கமானது ஏனைய அனைத்து மதங்களையும் மிகைத்த பெரும் மார்க்கமாக மாறியது. பின்னர் நிலமைகள் மாறி, பெரும்பாலான மக்களிடத்தில் அறியாமை மேலோங்கியது; எனவே பெரும்பாலானோர் ஜாஹிலிய்யா காலத்தின் மார்க்கத்திற்கு திரும்பி, நபிமார்கள் மற்றும் அவ்லியாக்களை நேசிப்பதில் எல்லை மீறி, அவர்களிடம் துஆவும் பாதுகாப்பும் தேடுதல் போன்ற இணைவைப்பின் பல்வேறு வகைகளைச் செய்தனர், 'லாஇலாஹ இல்லல்லாஹ்' என்ற கலிமாவின் பொருளை அரபுக்காபிர்கள் அறிந்த அளவுக்கு இவர்கள் அறியவில்லை. அல்லாஹ்தான் இந்நிலைமையிலிருந்து அவர்களைப் பாதுகாக்கப் போதுமானவன்.

இந்த இணைவைப்பானது இஸ்லாம் பற்றிய அறியாமை மற்றும் நபித்துவத்தின் நீண்ட இடைவெளியின் காரணமாக எமது இக்காலம் வரையில் மிகவும் வேகமாகவும் பரவிக் கொண்டிருக்கிறது.

அல்லாஹ்வைத் தூய்மையான முறையில் வணங்குதல் என்ற விடயத்தில் பிற்பட்ட காலத்தில் வந்தோரிடத்தில் ஆரம்ப கால மக்களின் சந்தேகங்களையே காணக்க கூடியதாக உள்ளது; அதாவது இவர்கள் நம்பிக்கை கொண்டிருக்கும் அவ்லியாக்கள் குறித்து ஜாஹிலிய்யா மக்கள் குறிப்பிட்ட விடயத்தையே இவர்களும் கூறுகிறார்கள் " இவை அல்லாஹ்விடம் எங்களுடைய பரிந்துரையாளர்கள்" ( யூனுஸ் : 18) மேலும் : "அல்லாஹ்வின் பக்கம் அந்தஸ்தால் எங்களை அவர்கள் நெருக்கமாக்குவதற்காகவே தவிர நாங்கள் அவர்களை வணங்குவதில்லை ". (அஸ்ஸுமர் : 3) இந்த சந்தேகத்தை அல்லாஹ் முறியடித்துள்ளான்; மேலும், அல்லாஹ்வைத் தவிர வேறொருவரை வணங்குபவன் அவர் எவனாக இருந்தாலும், அவனுக்கு இணை வைத்தவனாகவும் காபிரனாகவும் ஆகிறான். அல்லாஹ் கூறுகின்றான் : "எது அவர்களுக்கு தீங்கிழைக்காதோ; இன்னும், அவர்களுக்கு பலனளிக்காதோ அதைத்தான் அவர்கள் அல்லாஹ்வை அன்றி வணங்குகிறார்கள். இன்னும், “இவை அல்லாஹ்விடம் எங்களுடைய பரிந்துரையாளர்கள்” என்று கூறுகிறார்கள்..." ( யூனுஸ் : 18) இவ்வாறு கூறிய அவர்களுக்கு அல்லாஹ் பின்வருமாறு பதிலளிக்கிறான்: “வானங்களிலும் பூமியிலும் அல்லாஹ்விற்கு அவன் அறியாதவற்றை நீங்கள் அறிவிக்கிறீர்களா? அவன் மிகப் பரிசுத்தமானவன்; இன்னும், அவர்கள் இணைவைப்பவற்றை விட்டும் அவன் (தகுதியால்) மிக உயர்ந்தவனாக இருக்கிறான்” ( யூனுஸ் : 18)

ஆகவே அல்லாஹ்வைத் தவிர்த்து நபிமார்களையும் அவ்லியாக்களையும் வணங்குவது மிகப்பெரும் இணைவைத்தல் என்பதாகவும் இதனை செய்வோர் வேறுபட்ட பெயர்களை சூட்டிக்கொண்டாலும் அது பிழையானது என்பதாகவும் அல்லாஹ் இத்திருவசனத்தின் மூலம் தெளிவுபடுத்துகிறான். "அவனை அன்றி (பல) தெய்வங்களை (தங்களுக்கு) எடுத்துக் கொண்டவர்கள், “நாங்கள் அவர்களை வணங்குவதில்லை, அல்லாஹ்வின் பக்கம் அந்தஸ்தால் எங்களை அவர்கள் நெருக்கமாக்குவதற்காகவே தவிர.” (அஸ்ஸுமர் : 3) பின்னர் அல்லாஹ் அவர்களுக்கு பின்வருமாறு பதிலளிக்கிறான்: " நிச்சயமாக அல்லாஹ் அவர்களுக்கு மத்தியில் அவர்கள் கருத்து வேறுபாடு செய்கின்றவற்றில் தீர்ப்பளிப்பான். பொய்யர்களை நிராகரிப்பாளர்களை நிச்சயமாக அல்லாஹ் நேர்வழி செலுத்தமாட்டான்". (அஸ்ஸுமர் : 3)

அல்லாஹ் இந்த வசனத்தின் மூலம், அல்லாஹ் அல்லாதவர்களிடம் துஆக் கேட்டல், பயப்படுதல், ஆதரவு வைத்தல், போன்ற ஏனைய காரியங்கள் அனைத்தும் அவனை நிராகரிக்கும் செயல் என்பதை தெளிவுபடுத்தி விட்டான். மேலும் அவர்கள் வணங்கும் கடவுள்கள் அவனிடம் தம்மை நெருக்கி வைப்பார்கள் என்ற அவர்களின் கூற்றையும் பொய்ப்படுத்திவிட்டான்.

சரியான இஸ்லாமிய அடிப்படைக் கொள்கைக்கு மாற்றமானதும், நபி (ஸல்) அவர்கள் கொண்டு வந்த கொள்கைக்கு முரணானதுமான கொள்கைகளுள் இக்காலத்தில் மக்களை நாத்திகம், இறைநிராகரிப்பின் பால் அழைத்து கொண்டிருக்கும் கால்மார்க்ஸ், லெனின் ஆகியேரின் சித்தாந்தாங்களை பின்பற்றியவர்களின் நாத்திகக் கொள்கையாகும். அவர்கள் இக்கொள்கைக்கு சோசலிசம் என்றோ கம்யூனிஸம் என்றோ பாத்திஸம் (தேசியவாத சித்தாந்தம்) என்றோ மற்றும் இதுவல்லாத எப் பெயரிட்டுக் கொண்டாலும் இவை அனைத்தும் சரியான இஸ்லாமிய அகீதாவுக்கு முரணான நம்பிக்கைகளாகும். அத்துடன் இக்கோட்பாடுகளின் அடிப்படைகளாக கடவுள் மறுப்பு, வாழ்கை என்பது வெறும் ஒரு சடம் சார்ந்த அம்சம் என்பதாகும்.

அத்துடன் மறுமை வாழ்க்கை, சுவர்க்கம், நரகம் ஆகியவற்றை மறுப்பதும், எல்லா மார்க்கங்களையும் மதங்களையும் நிராகரிப்பதும் இவர்களது மற்றொரு அடிப்படையாக உள்ளது. இவர்களது புத்தகங்களை ஆழமாக படிப்பவர்கள் இவற்றை மிகத் தெளிவாக அறிந்து கொள்வர். இக்கொள்கையானது அல்லாஹ்வால் அருளப்பட்ட இறைமார்கங்கள் அனைத்திற்கும் முரணாக உள்ளது என்பதிலும் இதைப் பின்பற்றுவோர் இவ்வுலகிலும் மறு உலகிலும் மிக சோகமான முடிவுகளுக்கு ஆளாவார்கள் என்பதிலும் எவ்விதச் சந்தேகமும் இல்லை.

அல்குர்ஆன்,அல்ஹதீஸ்களுக்கு மறைபொருள் உண்டென்று கூறும் சூபிய்யாக்கள் ஏற்றுக்கொண்டிருக்கும் கொள்கையும் உண்மையான இஸ்லாமியக் கொள்கைகளுக்கு முரணானது என்பதை தெரிந்து கொள்ள வேண்டும். அத்துடன் இவர்கள் அவ்லியாக்கள் என்ற பெயரால் அழைப்பவர்களுள் சிலர் அல்லாஹ்வுடன் இணைந்து இவ்வுலகை நிர்வகிக்கின்றனர் எனக் கூறி அல்லாஹ்வுக்கு இணை கற்பிக்கின்றனர். அந்த அவ்லியாக்களுக்கு 'குத்புகள்' (இப்பிரபஞ்ச இயக்கத்திற்கு அச்சாணி போன்றவர்கள்;) 'அவ்தாது' (மார்க்கத்தை நிலை நாட்டுவதில் பிரதானிகள்,முளைக்குச்சி போன்றவர்கள்) 'கவுஸுகள்' (பாதுகாத்து இரட்சிப்பவர்கள்;) என்றெல்லாம் பெயர் சூட்டுகின்றனர். இது 'ரூபூபிய்யாவில்' அதாவது படைத்துப் பரிபாலிக்கும் இறைத் தன்மையில் வைக்கப்படும் மிக மோசமான (ஷிர்க்) இணைவைத்தலாகும்.

முற்கால ஜாஹிலிய்யா காலத்தவர்களின் இணைவைப்பில் ஆழ்ந்து சிந்தித்து, அதனை தற்போதுள்ள இணைவைப்பாளர்களின் இணைவைப்புடன் ஒப்பிடுபவர்களுக்கு, தற்போதுள்ள இணைவைப்பு மிகப் பெரியதும், மிகக் கடுமையானதும் என்பதை உணர முடியும். இதற்கான விளக்கம் பின்வருமாறு: அறிவில்லாத காலத்தில் அரபு நிராகரிப்பாளர்கள் இரண்டு விஷயங்களில் தனித்துவம் பெற்றிருந்தனர்: முதலாவது : அவர்கள் 'ருபூபிய்யா' என்ற படைத்துப் பரிபாலித்தலில் இணைவைக்கவில்லை, ஆனால் அவர்களின் இணைவைப்பு வணக்கத்திலேயே இருந்தது; அவர்கள் அல்லாஹ்வின் 'ருபூபிய்யா'வுக்கு ஒருவனே உரியவன் என ஏற்றுக்கொண்டிருந்தார்கள், இது பற்றி அல்லாஹ் கூறுகின்றான்: "அவர்களை யார் படைத்தான் என்று நீர் அவர்களிடம் கேட்டால், நிச்சயமாக அவர்கள் கூறுவார்கள்: “அல்லாஹ்”... (அஸ்ஸுஹ்ருப் : 87) மேலும் அல்லாஹ் கூறுகின்றான்; " (நபியே! அவர்களை நோக்கி) கூறுவீராக: “வானத்திலிருந்தும் பூமியிலிருந்தும் உங்களுக்கு யார் உணவளிக்கிறான்? அல்லது, (உங்கள்) செவிக்கும் பார்வைகளுக்கும் யார் உரிமை கொள்வான்? இன்னும், இறந்ததிலிருந்து உயிருள்ளதையும்; உயிருள்ளதிலிருந்து இறந்ததையும் யார் உற்பத்தி செய்கிறான்? இன்னும், எல்லா காரியங்களையும் யார் திட்டமிட்டு நிர்வகிக்கிறான்?” ஆக, (அதற்கு பதிலில்), “அல்லாஹ்தான்” என்று கூறுவார்கள். ஆக, நீர் கூறுவீராக: “ஆகவே, நீங்கள் அந்த அல்லாஹ்வை அஞ்சவேண்டாமா?” (யூனுஸ் : 31) இக்கருத்தைப் பிரதிபளிக்கும் அல்குர்ஆனிய வசனங்கள் அதிகம் காணப்படுகின்றன.

இரண்டாவது: அவர்களின் வணக்க வழிபாடுகளில் உள்ள இணைவைப்பு எப்போதும் இருந்ததல்ல; மாறாக அது செல்வ செழிப்பான நிலையின் போதே நிகழ்ந்தது. ஆனால் கஷ்டமான நிலைகளில் அவர்கள் தங்களது வணக்கத்தை அல்லாஹ்வுக்கு மட்டுமே செலுத்தினர்; இது குறித்து அல்லாஹ் கூறுகின்றான்: "ஆக, அவர்கள் கப்பலில் பயணித்தால் அல்லாஹ்வை - அவனுக்கு மட்டும் வணக்க வழிபாட்டை தூய்மைப்படுத்தியவர்களாக - அழைக்கிறார்கள். ஆக, அவன் அவர்களை கரைக்கு காப்பாற்றிக் கொண்டு வந்தால் அப்போது அவர்கள் (அவனுக்கு சிலைகளை) இணையாக்குகிறார்கள்." (அல் அன்கபூத் : 65)

தற்போதுள்ள இணைவைப்பாளர்கள் முற்காலத்து இணை வைப்பாளர்களை விடவும் இரண்டு விடயத்தை அதிகப்படுத்தியுள்ளனர்: அவற்றுள் முதலாவது: அவர்களுள் சிலர் படைத்து பரிபாலித்தல் எனும் (தவ்ஹீதுர்) 'ருபூபிய்யா' விடயத்தில் இணை வைத்திருத்தல். இரண்டாவது: செல்வசெழிப்பிலும் கஷ்ட துன்பத்திலும் இணை வைத்தல், இதனை அவர்களுடன் கலந்து அவர்களின் நிலைகள் பற்றி ஆழமாக அறியும் போது காணமுடிகிறது. எகிப்து நாட்டில் ஹூஸைன், பதவி மற்றும் பலருடைய கப்ருகளில் மக்கள் என்ன செய்கின்றனர் என்பதையும், ஏடனில் 'அல் அய்த்ரூஸ்' அவர்களின் கப்ரிலும், எமனில் 'ஹாதி' அவர்களின் கப்ரிலும், சிரியாவில் 'இப்னு அரபியின்' கப்ரிலும், இராக்கில் 'ஷைக் அப்துல் காதிர் ஜீலானி' அவர்களின் கப்ரிலும் என்ன நிகழ்கிறது என்பதையும் பார்த்தால் இதனை நன்கு புரிந்து கொள்ள முடியும். இது தவிர மற்ற பிரபலமானவர்களின் கப்ருகளிலும் பொதுமக்கள் இங்கே வரம்பு மீறி நடந்து கொள்கின்றனர்; அல்லாஹ்வுக்குச் செலுத்தவேண்டிய கடமைகளில் பெரும்பாலானவற்றை இவற்றுக்குச் செலுத்துகின்றனர். மேற்கண்ட அனாச்சாரங்களை மறுத்து அவர்களைத் தடை செய்வோரும், தனது தூதர் முஹம்மது(ஸல்) அவர்களும், அவர்களுக்கு முன்னர் வந்த நபிமார்களும் கொண்டு வந்த ஏகத்துவத்தின் உண்மை நிலையை விளக்கிக் கூறுவோரும் மிகக் குறைந்த எண்ணிக்கையினரே உள்ளனர். இன்னாலில்லாஹி வஇன்னா இலைஹி ராஜிஊன்.(நாம் அல்லாஹ்வுக்கே உரியவர்கள். இன்னும் நாம் அவனிடமே திரும்பக் கூடியவர்களும் ஆவோம்)

அல்லாஹ்வின் பெயர்கள் (அஸ்மாஉ) அல்லாஹ்வின் பண்புகள் ( ஸிபாத் ) விடயத்தில் முஃதஸிலா ஜஹ்மிய்யா என்ற பிரிவினரின் கொள்கையும் இந்த வழியில் நடக்கின்ற மற்ற பித்அத்வாதிகளின் கொள்கையும், இஸ்லாமிய அடிப்படைக் கொள்கைக்கு மாற்றமான கொள்கையே. அதாவது அவர்கள் அல்லாஹ்வுக்கு இருக்கின்ற அனைத்துப் பண்புகளையும் தன்மைகளையும் மறுக்கின்றனர். அவனுக்குள்ள நிறைவான தன்மைகளையெல்லாம் மறுத்து வீணாக்கிவிட்டு, அவனுக்குத் தகாத தன்மைகளையும் பிற உயிரற்ற திடப் பொருளுக்கு இருக்கின்ற தன்மைகளையும் வர்ணனைகளையும் அவனுக்கு உரித்தாக்குகின்றனர். இவர்களின் இது போன்ற தவறான கூற்றுக்களை விட்டும் அல்லாஹ் தூய்மையாகிவிட்டான்.

இப்பிரிவில் அழ்ழாஹ்வுக்குச் சில பண்புகள் உண்டெனக் கூறிச் சிலவற்றை மறுக்கின்ற அஷ்அரிய்யாக்களும் அடங்குவர். அந்தவகையில் அழ்ழாஹ்வின் பண்புகளில் அவர்கள் மறுத்து வியாக்கியானம் செய்த ஆதாரங்களைப் போன்று அவர்கள் உறுதிப்படுத்தும் பண்புகளையும் அவ்வாறு செய்தல் வேண்டும். இதில் அவர்கள் செவிவழி மற்றும் பகுத்தறிவுரீதியிலான ஆதாரங்களுக்கு முரணாக இருப்பதுடன் இவ்விடயத்தில் மிகப்பெரும் முரண்படுகின்ற நிலையும் காணப்படுகிறது.

அஹ்லுஸ்ஸுன்னாக்களைப் பொருத்தவரை: அல்லாஹ் தனக்கென எந்தெந்தப் பெயர்களையும் பண்புகளையும் உறுதிப்படுத்தியுள்ளானோ அவற்றையும், அவனின் தூதர் முஹம்மது (ஸல்) அவர்கள் அல்லாஹ்வுக்கு இருப்பதாக உறுதிப்படுத்தினார்களோ அவற்றையும் முழுமையான முறையில் உறுதிப்படுத்துவோராவர். மேலும் அவனது படைப்பினங்களுக்கு அவனை ஒப்பாக்குவதை விட்டும் அல்லாஹ்வுக்குரிய பெயர்களையும் உயர்பண்புகளையும் நிராகரிக்காது அவனை முழுமையாக தூய்மைப் படுத்துகின்றனர். அவர்கள் அனைத்து ஆதாரங்களையும் செயல்படுத்துகின்றனர், திரிபுபடுத்தவும் இல்லை, பாழ்படுத்தவும் இல்லை. அத்துடன் மற்றவர்கள் சிக்கியிருக்கும் முரண்பாடுகளை விட்டும் தங்களை காத்தும் கொண்டனர் இது குறித்த விபரம் முன்னரே தெளிவுபடுத்தப்பட்டுள்ளது.

இவ்வழிமுறைதான் வெற்றிக்கானதும் இம்மை மறுமையின் மகிழ்சிக்கானதுமான பாதையாகும். மேலும் இச்சமுதாயத்தின் இமாம்களும் நன்நெறிசார்ந்த முன்னோர்களின் நேரான பாதையுமாகும். அத்தகைய முன்னோர்கள் எந்த வழியில் நடந்து சீர்பெற்றனரோ அவ்வாறான பாதையைப் பின்பற்றி சென்றாலே தவிர இச்சமூகத்தின் தற்போது வாழ்ந்து கொண்டிருப்போரும் சீர்பெற முடியாது. சீர்பெறுதலானது புனித அல் குர்ஆனையும் ஸுன்னாவையும் பின்பற்றி அதற்கு மாற்றமான அனைத்தையும் விட்டு வாழ்கின்றபோதே சாத்தியமாகும. அல்லாஹ்விடம் எமது சமுதாயம் நேர்வழி பெறவும், அதில் நேர் வழியில் அழைக்கும் அழைப்பாளர்கள் அதிகரிக்கவும், முஸ்லிம் தலைவர்களும் அறிஞர்களும் ஷிர்க்கை எதிர்த்து அதனை முற்றாக ஒழிக்கவும், அதன் வழிமுறைகளில் எச்சரிக்கவும் நல்வாய்ப்பும் வெற்றியும் கிடைக்க பிரார்த்திக்கின்றோம். நிச்சயமாக அவனே அனைத்தையும் கேட்பவனாகவும் அடியார்களுக்கு மிகவும் நெருக்கமானவனாகவும் இருக்கின்றான். எல்லா விடயங்களிலும் நல்லதை தெரிவு செய்து ஈடேற்றத்தை அடைந்து கொள்ள உதவியாளனாய் அல்லாஹ்வே உள்ளான், அல்லாஹ் எங்களுக்கு போதுமானவன். மேலும்பொருப்பேற் கின்றவர்களில் அவனே சிறந்தவன், தீமையிலிருந்து விலகி நடக்கவும் நன்மை செய்வதற்கு சக்திபெறவும் அவனின் உதவியின்றி முடியாது. ஸலாத்தும் ஸலாமும் எங்கள் நபியும் அல்லாஹ்வின் அடியாரும் தூதருமாகிய முஹம்மத் ஸல்லல்லாஹு அலைஹிவஸல்லம் அவர்கள் மீதும், அவர்களின் குடும்பத்தார் மற்றும் தோழர்கள் அனைவர் மீதிலும் உண்டாவதாக.

அல்லாஹ் அல்லாதோரிடம் உதவி தேடுபவரின் மார்க்கத் தீர்ப்பு குறித்து ஆதாரங்களை நிலைநாட்டுதல்.

அப்துல் அஸீஸ் இப்னு அப்துல்லாஹ் இப்னு பாஸ்

இந்நூல் அல்லாஹ் அல்லாதவர்களிடம் உதவி தேடுவதன் சட்டத்தை விளக்குகிறது. மேலும், பிரார்த்தனையும் உதவி தேடுதலும் அல்லாஹ்வுக்கு மாத்திரமே உரியதாக இருக்க வேண்டும் என்பதை வலியுறுத்துகிறது. வணக்கம் அல்லது பிரார்த்தனையை அல்லாஹ் அல்லாதவற்றின் பக்கம் திருப்புவது இணைவைத்தலாகும் என்பதைச் சுட்டிக்காட்டுவதோடு, சிலர் அல்லாஹ்வின் நேசர்களிடமோ அல்லது நபி ﷺ அவர்களிடமோ உதவி தேடலாம் என எண்ணிக் கொள்ளும் சில சந்தர்ப்பங்களையும், இச்செயலானது மார்க்கத்தின் அடிப்படையாகத் திகழும் ஏகத்துவத்திற்கு முரணானது என்பதையும் இது தெளிவுபடுத்துகிறது;

இரண்டாவது தூது : நபி ﷺ அவர்களைக் கொண்டு பாதுகாப்புத் தேடுதல் பற்றிய தீர்ப்பு

புகழனைத்தும் அல்லாஹ் ஒருவனுக்கே உரித்தாகட்டும். ஸலாத்தும், ஸலாமும் அல்லாஹ்வின் தூதர் மீதும் அவர்களின் குடும்பத்தார் மீதும், அவர்களின் தோழர்கள் மீதும், அவர்களின் வழிகாட்டள்களைப் பின்பற்றியோர் மீதும் உண்டாவதாக.

அதன் பின்: குவைத் நாட்டின் ‘அல்-முஜ்தமஅ’ப் பத்திரிகை தன் 15ஆம் இதழில், ஹி. 19/4/1390 அன்று வெளியானதில், (கண்ணியமிக்க நபி (ஸல்) அவர்களின் பிறந்தநாளை முன்னிட்டு ) என்ற தலைப்பில் சில கவிதைகளை வெளியிட்டது. இ க்கவிதைககள் நபி (ஸல்) அவர்களைக் கொண்டு பாதுகாப்புத் தேடுதல் மற்றும் அவர்மூலம் உதவி நாடுதல் ஆகியவற்றை உள்ளடக்கியிருந்தன, சமூகத்தை அறிவூட்டி அதை வெற்றி பெறச் செய்து அது விழுந்திருக்கும் பிளவு மற்றும் கருத்து வேறுபாட்டிலிருந்து விடுவிக்கும் நோக்கில், தன்னை: (ஆமினா) என்று அழைத்துக் கொண்ட ஒருவரின் கையொப்பத்துடன் எழுதப்பட்டிருந்தது. குறிப்பிடப்பட்ட அந்த கவிதைகள் சிலவற்றின் வரிகள் இதோ:

அல்லாஹ்வின் தூதரே! போரைத்தூண்டி அதன் தீயில் வெந்துகொண்டிருக்கும் உலகை காப்பாற்றுவீராக!

அல்லாஹ்வின் தூதரே! சந்தேகத்தின் இருளில் நெடுங்காலமாய் தடுமாறிக்கொண்டிருக்கும் உம்மத்தை இரட்சிப்பீராக.

அல்லாஹ்வின் தூதரே! துயரத்தின் குழப்பங்களில் அககண்ணை இழந்துவிட்ட உம்மத்தை காப்பாற்றுவாயாக

ஈற்றில் அவர் இவ்வாறு கூறுகிறார்;.

பத்ர் தினத்தில்; நீர் இறைவனை அழைத்து, அதில் நீர் உதவியை விரைவு படுத்தியது போன்று தற்போதும் உதவியை விரைவுபடுத்துவாயாக!.

அவமானம் ஒரு அற்புதமான வெற்றியாக மாற்றப்பட்டது.... உங்கள் புறக்கண் காணா படைகள் அல்லாஹ்வுக்கு உண்டு.

இவ்வாறு இந்த எழுத்தாளர் தன் பிரார்த்தனையையும், உதவி வேண்டுதலையும் தூதர் (ஸல்) அவர்களின் பால் திருப்பி, உதவியை விரைவாக்கி உம்மத்தை காப்பாற்றுமாறு அவர்களிடம் கேட்டுக்கொள்கிறாள்; தனது மறதியால் அல்லது அறியாமையால் உதவி அல்லாஹ்விடம் மாத்திரமே இருப்பதையும், அது நபி (ஸல்) அவர்களின் கையிலோ அல்லது அவரைத் தவிர்ந்த பிற எந்தப் படைப்பினங்களின் கையிலோ அல்ல என்பதையும் மறந்துவிடுகிறாள்; அல்லாஹ் தன் தெளிவான நூலில் கூறியது போல: "அல்லாஹ் விடத்திலல்லாமல் வேறு உதவியில்லை; அவன் மிக்க வல்லமையுடையவன்; மிகுந்த ஞானமுடையவன்". (ஆல இம்ரான் : 126) மேலும் அல்லாஹ் குறிப்பிடுகிறான் : "அல்லாஹ் உங்களுக்கு உதவினால் உங்களை மிகைப்பவர் அறவே இல்லை. இன்னும், அவன் உங்களை கைவிட்டால் அதற்குப் பின்னர் உங்களுக்கு உதவுபவர் யார்..." (ஆல இம்ரான் : 160).

இது பிரார்த்தனை மற்றும் பாதுகாப்புத் தேடுதலுடன் தொடர்பான செயல்சார் வணக்கமாகும்.இங்கு அந்த எழுத்தாளர் வணக்கத்தின் வகைகளில் ஒன்றான உதவி தேடுதல் மற்றும் இரட்சிக்குமாறு மன்றாடுதல் என்பதை அல்லாஹ் அல்லாத ஒருவருக்கு செலுத்தியுள்ளார். இவ்வாறு செய்வது தெளிவான ஆதாரம் மற்றும் அறிஞர்களின் ஏகோபித்த முடிவின் படி தடைசெய்யப்பட்ட அனுமதிக்கப்படாத ஒருவிடயமாகும்.அல்லாஹுத்தஆலா மனிதர்களை தன்னை வணங்குவதற்காகவே படைத்தான். அவ்வணக்கம் குறித்து தெளிவு படுத்தவும்,அதன் பால் அவர்களை அழைக்கவும் தூதர்களை அனுப்பி வேதங்களை இறக்கி வைத்தான். இதனை பின்வரும் அல்குர்ஆன் வசனம் தெளிவு படுத்துகிறது.: "இன்னும், ஜின்களையும், மனிதர்களையும் அவர்கள் என்னை வணங்குவதற்காகவேயன்றி நான் படைக்கவில்லை". (அத்ஸாரியாத் : 56). மேலும் அல்லாஹ் கூறுகிறான்: “அல்லாஹ்வை வணங்குங்கள்; இன்னும், ஷைத்தானை விட்டும் விலகுங்கள்” என்று (போதிப்பதற்காக) ஒவ்வொரு சமுதாயத்திலும் திட்டவட்டமாக ஒரு தூதரை அனுப்பினோம்..." (அந்நஹ்லு : 36) மேலும் அல்லாஹ் கூறுகிறான்: " (நபியே!) உமக்கு முன்னர் நாம் அனுப்பிய ஒவ்வொரு தூதரிடமும்: “நிச்சயமாக (வணக்கத்திற்குரிய) நாயன் என்னைத் தவிர வேறு எவருமில்லை; எனவே, என்னையே நீங்கள் வணங்குங்கள்” என்று நாம் வஹீ அறிவிக்காமலில்லை". (அல் அன்பியா :25) மேலும் அல்லாஹ் குறிப்பிடுகிறான் : "அலிஃப், லாம், றா. (இது) வேதமாகும்; இதன் வசனங்கள் (பல்வேறு அத்தாட்சிகளால்) உறுதியாக்கப்பட்டு பின்னர் தெளிவாக விவரிக்கப்பட்டுள்ளன- மேலும், (இவை யாவற்றையும்) நன்கறிபவனும், ஞானம் மிக்கோனுமாகிய(இறை)வனிடம் இருந்து(வந்து)ள்ளன. நிச்சயமாக நீங்கள் அல்லாஹ்வைத் தவிர (யாரையும்) வணங்காதீர்கள்! நிச்சயமாக நான் உங்களுக்கு அவனிடமிருந்து (அனுப்பப்பட்ட) எச்சரிப்பாளரும் நற்செய்தியாளரும் ஆவேன்". (ஹூத் : 1، 2).

இந்தத் தெளிவான வசனங்களில், அல்லாஹ் ஜின் மற்றும் மனித இனங்களை அவனை மட்டுமே வணங்குவதற்காகவே படைத்துள்ளான்; அவனுடன் எவரையும் இணைக்காமல் மேலும் இந்த இபாதத்திற்கு உத்தரவு வழங்கவும், அதற்கு முரணானவற்றைத் தடை செய்யவும் நபிமார்களை அனுப்பியதாகவும் வெளிப்படுத்தியுள்ளான். மேலும் அவன் மகிமைமிக்கவன் அல்குர்ஆனின் வசனங்களை உறுதிப்படுத்தி, அவற்றை விரிவாக விளக்கியிருப்பதாகவும், அவனல்லாதவை வணங்கப்படாதிருக்கும்படி அறிவித்துள்ளான்.

வணக்க வழிபாடு (இபாதத்) என்பது: அல்லாஹ்வை ஒருமைப்படுத்தி, அவனது கட்டளைகளை ஏற்று, அவனால் தடைசெய்யப்பட்டவற்றை விட்டுவிட்டு, அவனுக்கு கீழ்படிந்து நடப்பதாகும். இது யாவரும் அறிந்த ஒரு விடயம். இது குறித்து பேசும் அதிகமான அல்குர்ஆன் வசனங்கள் உண்டு. அவற்றுள் பின்வரும் வசனத்தை குறிப்பிடுகிறோம் : "அவர்களுக்கு ஏவப்பட்டதெல்லாம், அவர்கள் வழிபாட்டை அவனுக்கு மட்டும் தூய்மைப்படுத்தியவர்களாக, இணைவைப்பை விட்டு விலகியவர்களாக இருக்கும் நிலையில் அல்லாஹ்வை வணங்குவதற்கும்..." (அல் பய்யினா :5) மேலும் அல்லாஹ் கூறுகிறான்: " (நபியே!) உமது இறைவன் தன்னைத் தவிர (மற்றெவரையும்) வணங்கக் கூடாதென்று கட்டளையிட்டிருக்கிறான்..." (அல் இஸ்ராஉ 23), தொடர்ந்தும் அல்லாஹ் கூறுகிறான்: "(நபியே!) நிச்சயமாக நாம், உமக்கு இவ்வேதத்தை முற்றிலும் உண்மையைக் கொண்டு இறக்கி வைத்திருக்கிறோம். ஆகவே, முற்றிலும் அல்லாஹ்வுக்கு வழிப்பட்டு, பரிசுத்த மனதுடன் அவனை வணங்கி வருவீராக. ." " பரிசுத்தமான வழிபாடு அல்லாஹ் ஒருவனுக்கே சொந்தமானது என்பதை அறிந்து கொள்ளுங்கள். எவர்கள் அல்லாஹ் அல்லாதவற்றை, தங்களுக்குப் பாதுகாவலர்களாக எடுத்துக் கொண்டிருக்கிறார்களோ அவர்கள், ‘‘அத்தெய்வங்கள் எங்களை அல்லாஹ்வுக்கு மிக்க சமீபமாக்கி வைக்கும் என்பதற்காகவே தவிர நாம் இவற்றை வணங்கவில்லை'' (என்று கூறுகின்றனர்). அவர்கள் தர்க்கித்துக் கொண்டிருக்கும் இவ்விஷயத்தைப் பற்றி, அல்லாஹ் (மறுமையில்) அவர்களுக்கிடையில் தீர்ப்பளிப்பான். நிச்சயமாக அல்லாஹ் (இத்தகைய) பொய்யர்களையும், (மனமுரண்டாக) நிராகரிப்பவர்களையும் நேரான வழியில் செலுத்துவதில்லை". (அஸ்ஸுமர் : 2-3)

இக்கருத்தில் பல இறைவசனங்கள் உள்ளன. அவை அனைத்தும் அல்லாஹ்வுக்கு மாத்திரமே தூய்மையாக வணக்கத்தை செலுத்துவதன் அவசியத்தையும், அவனல்லாத, நபிமார்கள் உட்பட மற்ற எவரையும் வணங்குவதை விட்டு விட வேண்டும் என்பதையும் தெளிவு படுத்துகின்றன.

பிரார்த்தனை வணக்கங்களில் மிகப் பிரதானமானதும்; எல்லா விடயங்களை உள்ளடக்கியுதமான வணக்க முறைகளுள் ஒன்று என்பதில் சந்தேகமில்லை. எனவே, அதை அல்லாஹ்வுக்கு மாத்திரம் சிரத்தையுடனுடனும்,மனத்தூய்மையுடன் செலுத்துவது கடமையாகும். அல்லாஹ் இதனை பின்வரும் வசனத்தில் வலிறுத்திக் குறிப்பிடுகிறான்: "ஆகவே, (நம்பிக்கையாளர்களே!) நிராகரிப்பவர்கள் வெறுத்தபோதிலும் நீங்கள் முற்றிலும் அவனுக்கே வழிப்பட்டு, கலப்பற்ற மனதுடையவர்களாக அல்லாஹ் ஒருவனையே (பிரார்த்தனை செய்து) அழையுங்கள்!" (ஹாபிர் : 14), மேலும் அல்லாஹ் கூறுகிறான்: " இன்னும் நிச்சயமாக மஸ்ஜிதுகள் அல்லாஹ்விற்கு உரியன. ஆகவே, அல்லாஹ்வுடன் வேறு ஒருவரை அழைக்காதீர்கள்!" (அல்ஜின் : 18), பிரார்த்தனை புரிவது அல்லாஹ் ஒருவனிடம் மாத்திரமே இருக்க வேண்டும் என்ற இவ்ழிகாட்டலானது நபிமார்கள் உட்பட மற்ற அனைவரையும்; உள்ளடக்கியதாகும். இது குறித்து அல்லாஹ் குறிப்படுகையில் இன்னும், அல்லாஹ்வை அன்றி உமக்கு பலனளிக்காதவற்றையும் உமக்குத் தீங்களிக்காதவற்றையும் நீர் அழைக்காதீர்! ஆக, நீர் (அல்லாஹ் அல்லாதவருக்கு வணக்க வழிபாடு) செய்து விட்டால் அப்போது நிச்சயமாக நீர் அநியாயக்காரர்களில் ஆகிவிடுவீர். (யூனுஸ் : 106) இது நபி(ஸல்)அவர்களை நோக்கிய உரையாகும். மேலும், அல்லாஹ் மிகப் பரிசுத்தவன் நபி(ஸல்)அவர்களை இணைவைப்பிலிருந்து பாதுகாத்திருக்கின்றான் என்பது அறியப்பட்டதே. ஆகையால் இதன் நோக்கம், நபி(ஸல்)அவர்களைத் தவிர்ந்தவர்களை எச்சரித்தலே. பின்னர் மகிமையுள்ள அல்லாஹ் கூறுகிறான்: : " இன்னும், அல்லாஹ்வை அன்றி உமக்கு பலனளிக்காதவற்றையும் உமக்குத் தீங்களிக்காதவற்றையும் நீர் அழைக்காதீர்! ஆக, நீர் (அல்லாஹ் அல்லாதவருக்கு வணக்க வழிபாடு) செய்து விட்டால் அப்போது நிச்சயமாக நீர் அநியாயக்காரர்களில் ஆகிவிடுவீர்". (யூனுஸ் : 106) இது நபி(ஸல்)அவர்களை நோக்கிய உரையாகும்; ஆனால் அதனால் நாடப்படுவது நபி(ஸல்)அவரைத் தவிர பிறரை எச்சரிப்பதே. ஏனெனில் அல்லாஹ் சுபுஹானஹு தஆலா தமது தூதரை இணைவைப்பிலிருந்து பாதுகாத்திருப்பது நன்கு அறியப்பட்ட ஒன்றே. பின்னர் தடை மற்றும் எச்சரிக்கை விஷயத்தில் அல்லாஹ் தஆலா மிகக் கடுமையாகச் கூறுகிறான்: "ஆக, நீர் (அல்லாஹ் அல்லாதவருக்கு வணக்க வழிபாடு) செய்து விட்டால் அப்போது நிச்சயமாக நீர் அநியாயக்காரர்களில் ஆகிவிடுவீர்". 'லுழ்ம்' (அநியாயம்) என்ற வார்த்தை பொதுவாகப் பயன்படுத்தப்படும் போது, அது ஷிர்குன் அக்பரைக்கு குறிக்கும் இதற்கு பின்வரும் வசனம் ஆதாரமாகும். " ... நிராகரிப்பவர்கள்தான் (பெரும்) அநியாயக்காரர்கள் ஆவார்கள்." (அல்பகரா : 254) மேலும் அல்லாஹ் கூறினான்: " நிச்சயமாக இணைவைத்தல் மிகப் பெரிய அநியாயமாகும்." (லுக்மான் : 13). மனிதகுலத்தின் தலைவன் ஸல்லல்லாஹு அலைஹி வஸல்லம் தாமே அல்லாஹ் அல்லாதோரை அழைத்துப் பிரார்த்தித்தால் அநியாயக்காரர்களில் ஒருவராவார் எனில், பிறரின் நிலை எப்படி?!

மேலே குறிப்பிட்ட வசனங்கள் மூலம், மரணித்தோர்,மரங்கள், சிலைகள் போன்ற அல்லாஹ் அல்லாதவற்றை அழைத்துப் பிரார்த்திப்பது அல்லாஹ்வுக்கு இணைவைத்தாலாகும் என்பதையும், மனித ஜின் வர்க்கத்தைப் படைத்து, தூதர்களை அனுப்பி, வேதங்களை இறக்கிய நோக்கமான வணக்கவழிபாட்டின் மூலம் அல்லாஹ்வை ஏகத்துவப்படுத்துவதற்கு முரணானது என்பதனையும், வணக்கம் என்பது அல்லாஹ்வுக்கு மாத்திரமே உரியது அது வேறு எவருக்கும் செலுத்தப்பட முடியாது என்ற திருக்கலிமாவான ''லா இலாஹா இல்லல்லாஹ்' கூறும் கருத்துக்கு- அர்த்தத்திற்கு- எதிரானதாகவும் உள்ளது என்பதை அறிய முடிகிறது. இந்த கருத்தை வலியுறுத்தும் விதத்தில் பின்வரும் வசனம் உள்ளது. அதிலே அல்லாஹ் கூறுகின்றான்: "அது ஏனெனில், நிச்சயமாக அல்லாஹ்தான் உண்மையானவன். இன்னும், அவனையன்றி அவர்கள் அழைக்கின்றவை பொய்யானவையாகும். இன்னும், நிச்சயமாக அல்லாஹ்தான் மிக உயர்ந்தவன், மகா பெரியவன்." (அல் ஹஜ் : 62)

இது இஸ்லாத்தின் அடிப்படையாகவும், இச்சன்மார்க்கத்தின் அத்திவாரமாகவும் உள்ளது. இந்த அடிப்படை சரியாக அமையாது வணக்கங்கள் ஏற்றுக்கொள்ளப்படுவதில்லை. இது குறித்து அல்லாஹ் பின்வருமாறு கூறுகிறான்: " (நபியே!) உமக்கும், (நபிமார்களின்) உமக்கு முன்னிருந்தவர்களுக்கும் மெய்யாகவே வஹ்யி மூலம் அறிவிக்கப்பட்டது: (அது என்ன வென்றால், அல்லாஹ்வுக்கு) நீர் இணைவைத்தால், உமது நன்மைகள் அனைத்தும் அழிந்து, நிச்சயமாக நீர் நஷ்டமடைந்தவர்களில் ஆகிவிடுவீர்..” (அஸ்ஸுமர் : 65). மேலும் அல்லாஹ் கூறுகிறான் : " இன்னும், அவர்கள் இணைவைத்தால் அவர்கள் செய்து கொண்டிருந்தவை அவர்களை விட்டு அழிந்துவிடும்." (அல் அன்ஆம் : 88)

மேற்கூறியவற்றிலிருந்து, இஸ்லாம் மார்க்கத்திற்கும், லாஇலாக இல்லல்லாஹ் 'உண்மையாக வணங்கப்படத் தகுதியானவன் அல்லாஹ்வைத் தவிர யாருமில்லை' என்ற சாட்சியத்திற்கும் இரண்டு முக்கியமான அடிப்படைகள் உள்ளன என்பது தெளிவாகிறது. அவை பின்வருமாறு :

முதலாவது அடிப்படை : அல்லாஹ்வை மட்டுமே வணங்க வேண்டும், அவனுக்கு எதையும் இணையாகக் கொள்ளக்கூடாது;. யார் ஒருவர் இறந்த நபிமார்கள் அல்லது அவர்கள் அல்லாதோர்,அல்லது சிலைகள் மரங்கள், கற்கள் அல்லது இவைகள் அல்லாத பிற படைப்புகளை அழைத்து பிரார்தித்தாலோ,அல்லது அவர்களிடம் உதவி தேடினாலோ, அல்லது அவைகளை நெருங்குவதற்காக பலியிட்டு, நேர்த்திக்கடன்களையோ செலுத்தினாலோ, அல்லது அவர்களுக்காக தொழுதாலோ, அல்லது அவர்களுக்கு ஸுஜுத் செய்தாலோ அவர்கள் அல்லாஹ்வைத் தவிர்த்து அவைகளை கடவுள்களாக எடுத்துக்கொணடார்கள் என்பது அர்த்தமாகும்; அத்துடன் அவைகளை அல்லாஹ்வுக்கு இணையாக ஆக்கிக் கொண்டதற்கு நிகராகும். மேலும் ' லாஇலாஹ இல்லல்லாஹு பிரதிபளிக்கும் கருத்தான 'உண்மையாக வணங்கப்படக்கூடிய இறைவன் அல்லாஹ்வைத் தவிர வேறு இறைவன் இல்லை' என்பதற்கு எதிரானதாகவும் முரணானதாகும் அமையும்.

இரண்டாவது : நபி (ஸல்) அவர்கள் மார்க்கமாக குறிப்பிட்டவற்றை கொண்டு மாத்திரமே அல்லாஹ்வை வணங்கவேண்டும். ஆகவே, அல்லாஹ் அனுமதிக்காதவற்றை இந்த மார்க்கத்தில் புதிதாக உருவாக்குகிறவன், முஹம்மது (ஸல்) அவர்கள் அல்லாஹ்வின் தூதர் என்பதான சாட்சியின் அர்த்தத்தை நிறைவேற்றவில்லை; அவரது செயல் அவருக்கு பயனளிக்காது, அது நிராகரிக்கப்படுவதோடு அல்லாஹ்விடத்தில் அவரிடமிருந்து ஏற்றுக் கொள்ளப்படமாட்டாது. அல்லாஹ் கூறுகின்றான் : "(அல்லாஹ்வை நிராகரித்த) அவர்கள் செய்த (நற்) செயல்களை நாம் (அவற்றுக்கு கூலி கொடுப்பதற்காக) நாடுவோம். ஆக, அவற்றை பரத்தப்பட்ட புழுதியாக (நன்மைகள் இல்லாமல்) ஆக்கிவிடுவோம்". (அல் ஃபுர்கான் : 23), ஆயத்தில் குறிப்பிடப்பட்ட செயல்களால் குறிக்கப்படுவது: அல்லாஹ்வுக்கு இணைவைத்த நிலையில் மரணித்தவரின் செயல்களே.

இதில் மேலும் அடங்குவது: அல்லாஹ் அனுமதிக்காத பித்அத் செயல்கள்; அவை அவருடைய தூய மார்க்கத்துக்கு உடன்படாததனால், கியாமத் நாளில் சிதறிய தூளாகி விடும்; நபி ஸல்லல்லாஹு அலைஹிவஸல்லம் அவர்கள் கூறியது போல: 'எமது இந்த மார்க்த்தில் இல்லாத புதிய ஒரு விடயத்தை மார்க்கமாக யார் உண்டாக்குகிறானோ அவனுடைய அந்தப் புதுமை நிராகரிக்கப்பட்டதாகும்'. இந்த நபிமொழி ஸஹீஹானது என்பது ஏகோபித்த கருத்தாகும்

முடிவாகச் சொல்வதாவது: இக்கட்டுரையாசிரியை தன் உதவி தேடுதலையும், பிரார்த்தனையையும் அல்லாஹ்வின் தூதர் ﷺ அவர்களை நோக்கி செலுத்தி, வெற்றி, தீங்கு, நன்மை அனைத்தையும் தன் வசம் வைத்துள்ள உலகங்களின் இறைவனிடமிருந்து விலகினாள்; அவற்றில் ஒன்றும் வேறொருவரின் கையிலில்லை.

இவ்வாறு அல்லாஹ் அல்லாதாரிடம் பிரார்த்திப்பதும் மன்றாடுவதும் மிகப் பெரிய அநீதி என்பதில் சந்தேகமில்லை. அல்லாஹ் தன்னை அழைத்து பிரார்த்திக்குமாறு கட்டளையிட்டுள்ளான், அவனை அழைப்பவருக்கு பதிலளிப்பதாக வாக்களித்துள்ளான், மேலும் அவனை வணங்குவதிலும் பிராரத்திப்பதிலும்; கர்வம் கொண்டவர்களுக்கு நரகத்தில் நுழைவிப்பதாக எச்சரித்துள்ளான், இதனை பின்வரும் வசனம் சுட்டிக்காட்டுகிறது. அல்லாஹ் கூறுகிறான் : "உங்கள் இறைவன் கூறுகிறான்: “என்னையே நீங்கள் பிரார்த்தியுங்கள்; நான் உங்(கள் பிரார்த்தனை)களுக்கு பதிலளிக்கிறேன்; எவர்கள் என்னை வணங்குவதை விட்டும் பெருமையடித்துக் கொண்டிருக்கிறார்களோ, அவர்கள் சிறுமையடைந்தவர்களாக நரகத்தில் நுழைவார்கள்.” (ஃகாபிர் : 60), இந்த வசனத்தில் உள்ள தாகிரீன் என்பதன் ஒத்த கருத்து அதாவது 'தலீலீன்' என்பதாகும் இதன் கருத்து இழிவடைந்தவர்களாகவும் சிறுமைப்பட்டவர்களாகவும் நரகினுள் நுழைவார்கள் என்பதாகும். இதனால் இந்தப் பெருமைமிக்க வசனம், பிரார்த்தனை (துஆ) வணக்கம் என்பதையும், அதிலிருந்து பெருமையடித்து விலகுபவனின் தங்குமிடம் நரகம் என்பதையும் காட்டுகிறது. ஆகவே அல்லாஹ்விடம் பிரார்த்தனை செய்வதை விட்டுப் பெருமையடிப்பவனின் நிலை இப்படிப்பட்டதாக இருக்குமாயின், அவனை விட்டு பிறரை அழைத்து அவனைப் புறக்கணிப்பவனின் நிலை எவ்வாறு இருக்கும்! தூய்மை மிக்க வல்ல நாயகன் அல்லாஹ் நெருக்கமானவன், அனைத்திற்கும் உரிமையாளன், எல்லாம் செய்ய வல்லவன்; அவன் கூறியதுபோல: " இன்னும், என் அடியார்கள் என்னைப் பற்றி உம்மிடம் கேட்டால், “நிச்சயமாக நான் சமீபமானவன்; என்னை அழைத்தால் அழைப்பவரின் அழைப்புக்குப் பதிலளிக்கிறேன்” (எனக் கூறுவீராக!). ஆக, அவர்கள் நேர்வழி பெறுவதற்காக அவர்கள் எனக்குப் பதிலளி(த்து கீழ்ப்படிந்து நட)ப்பார்களாக! இன்னும், அவர்கள் என்னையே நம்பிக்கை கொள்வார்களாக! (அல் பகரா : 186) நபி (ஸல்) அவர்கள் ஒரு ஸஹீஹான ஹதீஸிலே “பிரார்த்தனையே (துஆவே) ஒரு வணக்கமாகும்” என்று தெரிவிக்கிறார்கள்; மேலும் தமது சாச்சாவின் மகன் அப்துல்லாஹ் பின் அப்பாஸ் (ரலி) அவர்களிடம் கூறினார்கள்: "நீ அல்லாஹ்வை பாதுகாத்துக்கொள்!அவன் உன்னைப் பாதுகாப்பான். நீ அல்லாஹ்வை பாதுகாத்துக்கொள். அவனை உனக்கு முன் கண்டுகொள்வாய். நீ கேட்டால் அல்லாஹ்விடமே கேள்! உதவி தேடினால் அல்லாஹ்விடமே தேடு". இந்த ஹதீஸை இமாம் திர்மிதி மற்றும் ஏனையோர் பதிவு செய்துள்ளனர்.

மேலும் நபி(ஸல்) அவர்கள் கூறினார்கள்: " அல்லாஹ்வுக்கு இணை கற்பித்த நிலையில் யாராவது இறந்தால் அவர் நரகில் நுழைவார்". ஆதாரம் : புஹாரி, புகாரி, முஸ்லிம் ஆகியோரின் அறிவிப்பில், நபி ஸல்லல்லாஹு அலைஹிவஸல்லம் அவர்களிடம் 'பாவங்களிலேயே மிகப் பெரியது எது?' என்று வினவப்பட்டது; அதற்கு அவர்கள் பின்வருமாறு கூறினார்கள்: «அல்லாஹ் உன்னை படைத்திருக்க, அவனுக்கு இணையாக மற்றொன்றை அமைப்பது» 'நித்'; என்பது நிகரானவன்;, ஒப்பானவன் என்பது கருத்தாகும்; இந்த வகையில், அல்லாஹ் அல்லாதோரை அழைத்துப் பிரார்த்தித்தல், அல்லது அவனிடம் உதவி தேடுதல், அல்லது நேர்ச்சை வைத்தல், அல்லது அறுத்துப் பலியிடல், அல்லது மேற் குறிப்பிடப்பட்டவற்றைத் தவிர வேறு ஏதாவதொரு வணக்கத்தை செலுத்துதல் ஆகியவற்றில் தன்னை ஈடுபடுத்திக் கொள்பவன் அல்லாஹ்வுக்கு நிகரான மற்றும் இணையான ஒருவனை கடவுளாக எடுத்துக்கொண்டவனாகக் கருதப்படுவான். அதாவது, அவன் தனது தேவைகளை முன்வைக்க எடுத்துக் கொண்டது நபியாகவோ, இறைநேசராகவோ, மன்னராகவோ, ஜின்னாகவோ, சிலையாகவோ, அல்லது பிற படைப்புகளாகவோ இருந்தாலும் சரியே!

இங்கே இன்னொரு கேள்வி எழலாம்; அதாவது உயிரோடுள்ள, தொடர்பு கொள்ள முடியுமான ஒருவரிடம் அவரது சக்திக்குட்பட்ட விடயங்களில் உதவி கேட்பதன் சட்டம் என்ன? என்று கேட்டால், அதற்கான பதில் பின்வருமாறு : இவ்வாறு உதவி கோருவது இணைவைப்பாக அமைய மாட்டாது.காரணம் இவ்வாறு உதவி கோருவது வணக்கத்தின் அடிப்படையில் அமைந்ததல்ல. மாறாக இது முஸ்லிம்களிடையே பரஸ்பரம் உதவிக்கொள்ளுதல் என்ற அடிப்படிடையில் அனுமதிக்கப்பட்ட சாதாரண விஷயங்களில் ஒன்றாகும்.இதற்கான ஆதாரமாக அல்லாஹ் மூஸா (அலை) அவர்களின் சம்பவத்தில் கூறிய விடயத்தை குறிப்பிட முடியும்: " இவருடைய பிரிவைச் சேர்ந்தவன் தனது எதிரிகளில் உள்ளவனுக்கு எதிராக அவரிடம் உதவி கேட்டான்..." (அல்கஸஸ் : 15). தொடர்ந்து அல்லாஹ் மூஸா அலை அவர்களின் சம்பவத்தில் குறிப்பிடுகையில் இவ்வாறு கூறுகிறான் : " ஆக, அவர் (தனது குற்றத்தின் தண்டனையை) பயந்தவராக (தன்னைத் துரத்தி பிடிக்க வருபவர்களை) கண்காணித்தவராக அதிலிருந்து வெளியேறினார்..." (கஸஸ் : 21) சண்டை சச்சரவுகளின் போதும்; தமக்குள் ஏற்படும் ஏனைய விவகாரங்களிலும் மனிதன் தனது சக தோழர்களிடம் ஆபத்திலிருந்து உதவி மற்றும் பாதுகாப்புக் கோருவது போல, ஒவ்வொருவரும் தமது அன்றாட உலகியல் சார் விவகார்ங்களில் பிறரின் உதவி மற்றும் பரஸ்பர ஒத்துழைப்பை வேண்டி நிற்கின்றனர்.

அல்லாஹ் தனது தூதரிடம், யாருக்கும் நன்மை செய்யவோ அல்லது தீங்கு செய்யவோ தனக்கு சக்தி இல்லை என்பதை தனது சமூகத்தவரிடம் தெரிவிக்கும்படி கட்டளையிட்டான். இதனை அல்லாஹ் அல்குரானில் பின்வருமாறு கூறுகிறான் : " (நபியே! அவர்களுக்கு) கூறுவீராக: ‘‘நான் பிரார்த்தனை செய்து அழைப்பதெல்லாம் என் இறைவனையே! அவனுக்கு ஒருவரையும் நான் இணையாக்க மாட்டேன். (நபியே!) நிச்சயமாக நான் உங்களுக்கு நன்மை செய்யவோ, தீமை செய்யவோ ஒரு சிறிதும் சக்தியற்றவன்'' என்றும் கூறுவீராக! (அல்ஜின் : 21، 22). மேலும் அல்லாஹ் கூறுகிறான்: "(மேலும்,) நீர் கூறுவீராக: ‘‘அல்லாஹ் நாடினாலே தவிர நான் எனக்கு ஒரு நன்மையையோ தீமையையோ செய்து கொள்ள சக்தி பெறமாட்டேன். நான் மறைவானவற்றை அறியக்கூடுமாயின் நன்மைகளையே அதிகமாகத் தேடிக் கொண்டிருப்பேன்; ஒரு தீங்குமே என்னை அணுகி இருக்காது. நான் (பாவிகளுக்கு) அச்சமூட்டி எச்சரிக்கை செய்பவனும், நம்பிக்கை கொள்பவர்களுக்கு நற்செய்தி கூறுபவனுமே தவிர வேறில்லை.'' (அல்அஃராப் : 188).

இதே கருத்தில் அதிகமான திரு வசனங்கள் வந்துள்ளன.

நபி (ஸல்) அவர்கள் தமது இறைவனை தவிர வேறு யாரையும் அழைக்கமாட்டார்கள் என்பது அனைவரும் அறிந்ததே, அவரிடமிருந்து உறுதிப்படுத்தப்பட்ட செய்திப்படி, பத்ர் நாளில் அவர்கள் அல்லாஹ்விடம் உதவி வேண்டி, இறைவனிடம் அபயம் தேடினார்கள், அல்லாஹ்விடம் மன்றாடி வேண்டிக்கொண்டார்கள்; மேலும் இப்படிச் சொன்னார்கள்: “என் இறைவா! நீ எனக்குக் கொடுத்த வாக்குறுதியை நிறைவேற்றுவாயாக.” இதைக் கண்டு அபூபக்ர் றழியல்லாஹு அன்ஹு: “போதும், அல்லாஹ்வின் தூதரே! நிச்சயம் அல்லாஹ் உமக்கு வாக்குத்தந்ததை நிறைவேற்றுவான்” என்று கூறினார். அதனைப்பற்றி அல்லாஹ் திருமறையில் பின்வருமாறு கூறுகின்றான்: “உங்கள் இறைவனிடம் நீங்கள் பாதுகாப்புத்தேடிய சமயத்தை நினைவு கூருங்கள். ஆக, “தொடர்ந்து வரக்கூடிய ஆயிரம் வானவர்களின் மூலம் நிச்சயமாக நான் உங்களுக்கு உதவுவேன்” என்று (அல்லாஹ்) உங்களுக்குப் பதிலளித்தான்.” (அல்அன்பால் : 9) இந்த வசனங்களில் அவர்கள் உதவி தேடியதை மகிமைமிக்க அல்லாஹ் நினைவூட்டினான்; மேலும் அவர்களுக்கு அவன் பதிலளித்து, வெற்றியின் நற்செய்திக்காகவும் உள்ளங்கள் அமைதியடையவும் வானவர்களைக் கொண்டு அவர்களுக்கு உதவிசெய்தான். மேலும் வெற்றி வானவர்களால் அல்ல; மாறாக அவனிடமிருந்தே வெற்றி கிடைக்கிறது என்பதை அவன் தெளிவாக்கினான். அல்லாஹ் கூறுகிறான்: உதவி என்பதை, அல்லாஹ்விடமிருந்தே தவிர வரமாட்டாது (ஆல இம்ரான் : 126) மேலும் அல்லாஹ் குறிப்பிடுகிறான் : பத்(ர் போ)ரில் நீங்கள் குறைவானவர்களாக இருந்த நிலையில், திட்டவட்டமாக அல்லாஹ் உங்களுக்கு உதவினான். ஆகவே, நீங்கள் நன்றி செலுத்துவதற்காக அல்லாஹ்வை அஞ்சுங்கள். (ஆல இம்ரான் : 123). இந்த வசனத்தில் உயர்ந்தவனாகிய அல்லாஹ், பத்ர் நாளில் அவர்களுக்கு உதவி புரிந்தவன் அவனே என்பதைத் தெளிவுபடுத்தியுள்ளான். இதனால், அவன் அவர்களுக்கு அளித்த ஆயுதமும் வலிமையும், மேலும் மலக்குகள் மூலம் அவர்கள் பெற்ற ஆதரவும்—இவை அனைத்தும் வெற்றிக்கான காரணிகளாகவும், ஒரு நற்செய்தியாகவும், மன அமைதியாகவும் அமைந்தவை என்பதும் அறியப்படுகின்றது. ஆனால் உதவி இவற்றிலிருந்து கிடைப்பதில்லை; மாறாக அல்லாஹ்விடமிருந்தே மட்டுமே கிடைக்கும். அப்படியிருக்க, இந்த எழுத்தாளி அல்லது அவள்போன்ற வேறெவரும் நபியவர்களைக் கொண்டு பாதுகாப்புத் தேடியும், வெற்றியை நபி (ஸல்) அவர்களிடம் வேண்டியும், அனைத்துலகங்களின் இறைவனாகிய—எல்லாவற்றிற்கும் உரிமையாளன்; எல்லாவற்றுக்கும் வல்லவன்—அல்லாஹ்வை விட்டு எவ்வாறு விலகிச் செல்லத் துணிகிறார்கள்?!

உண்மையில் இது மிகப்பெரும் அறியாமை மட்டுமல்ல மாறாக மிகப்பெரும் இணைவைப்புமாகும் என்பதில் எவ்விதச் சந்தேகமுமில்லை. ஆகவே, இந்த எழுத்தாளர் அல்லாஹ்விடம் தூய்மையான முறையில் தவ்பா (பாவமீட்சி) கோர வேண்டும். தூய தவ்பாவானது பின்வரும் பல அம்சங்களை உள்ளடக்கியுள்ளது. அவையாவன: முதலாவது: செய்த பாவத்தைக் குறித்து வருந்துதல். இரண்டாவது: செய்த பாவத்தைக் கைவிடுதல், மூன்றாவது: அல்லாஹ்வை மகிமைப்படுத்தி, அவனைத் தூய்மைப்படுத்தி உளத்தூய்மையுடன், அவனின் கட்டளையைப் பின்பற்றி, அவன் தடைசெய்தவற்றிலிருந்து எச்சரிக்கையாக இருப்பதாகவும், இனியும் அப்பாவத்தை எக்காலத்திலும் செய்வதில்லை என்றும் உறுதி கொள்ளுதல். இதுவே தூய்மையான மனத்திருத்தம் அல்லது தவ்பாவாகும். இத்துடன் நான்காவது ஒரு விடயமும் உள்ளது. குறிப்பிட்ட குற்றம் அல்லது அநியாயம் மனிதர்கள் உரிமை சார்ந்ததாக இருப்பின் குறிப்பிட்ட அந்த மனிதரின் உரிமையை மீளளித்து அவரிடம் மன்னிப்புக் பெறுதல் வேண்டும்.

அல்லாஹ் தனது அடியார்களை தௌபா செய்யுமாறு வலியுறுத்துவதோடு அதை ஏற்றுக்கொள்வதாகவும் வாக்களித்துள்ளான். இது குறித்து அல்லாஹ் பின்வருமாறு குறிப்பிடுகிறான்: “இன்னும், நம்பிக்கையாளர்களே! நீங்கள் வெற்றி பெறுவதற்காக அல்லாஹ்விடம் பாவமன்னிப்புக் கோரி திரும்பி விடுங்கள்.” (அந்நூர் : 31) மேலும் கிறிஸ்தவர்களைப் பற்றிக் குறிப்பிடும் போது இவ்வாறு கூறுகிறான்: (இவர்கள் இப்பாவத்திலிருந்து) திருந்தி அல்லாஹ்வின் பக்கம் திரும்பமாட்டார்களா? இன்னும் அவனிடம் மன்னிப்புக் கோரமாட்டார்களா? அல்லாஹ், மகா மன்னிப்பாளன், பெரும் கருணையாளன் ஆவான். (அல்மாஇதா : 74) மேலும் அல்லாஹ் கூறுகின்றான்: இன்னும், அவர்கள் அல்லாஹ்வுடன் வேறு ஒரு கடவுளை அழைக்க மாட்டார்கள் (-வணங்க மாட்டார்கள்), (கொல்லக்கூடாது என்று) அல்லாஹ் தடுத்த உயிரை கொல்ல மாட்டார்கள் (அதற்குரிய) உரிமை இருந்தாலே தவிர. இன்னும், விபச்சாரம் செய்யமாட்டார்கள். யார் இவற்றை செய்வாரோ அவர் (மறுமையில்) தண்டனையை சந்திப்பார். அவருக்கு அந்த தண்டனை மறுமை நாளில் பன்மடங்காக ஆக்கப்படும். இன்னும், அவர் அதில் இழிவுபடுத்தப்பட்டவராக நிரந்தரமாக தங்கி விடுவார். எனினும், எவர்கள் (பாவங்களை விட்டு) திருந்தி (அல்லாஹ்விடம்) மன்னிப்புக் கோரி, நம்பிக்கைக் கொண்டு, நன்மையான செயலை செய்வார்களோ அவர்களுடைய தீய செயல்களை நல்ல செயல்களாக அல்லாஹ் மாற்றி விடுவான். அல்லாஹ் மகா மன்னிப்பாளனாக, பெரும் கருணையாளனாக இருக்கிறான். (அல் ஃபுர்கான் : 68-70). மேலும் அல்லாஹ் கூறுகின்றான்: அவன் தனது அடியார்களிடமிருந்து (அவர்கள்) திருந்தி பாவமன்னிப்பு கோருவதை ஏற்றுக் கொள்கிறான்; இன்னும், (திருந்தியவர்களின்) பாவங்களை அவன் முற்றிலுமாக மன்னிக்கிறான்; இன்னும், நீங்கள் செய்வதை அவன் நன்கறிகிறான். (அஷ் ஷூரா : 25).

ஆதாரப்பூர்வமான ஓர் அறிவிப்பில், நபி ஸல்லல்லாஹு அலைஹி வஸல்லம் அவர்கள் இவ்வாறு கூறினார்கள் : “இஸ்லாம் அதற்கு முன்னுள்ள பாவங்களை அழித்து விடுகின்றது; பாவமீட்சி (தௌபா) அதற்கு முன்னுள்ள பாவங்களை அழித்து விடுகின்றது.”

இணைவைப்பின் பெரும் ஆபத்தை உணர்த்தவும், அது மிகப்பெரிய பாவமாக இருப்பதாலும், குறித்த எழுத்தாளரல் வெளியிடப்பட்டவற்றால் பிறரும் ஏமாறும் அச்சம் இருப்பதினாலும், அல்லாஹ்விற்கும் அவனது அடியார்களுக்கும் நலன் நாடுவது அவசியம் என்ற வகையிலும் இந்த சுருக்கமான பதிலை நான் எழுதினேன். இதன் மூலம் பயனளிக்கவேண்டும் என்றும், எங்கள் நிலைகளையும் முஸ்லிம்கள் அனைவரின் நிலைகளையும் சீர்படுத்தவேண்டும் என்றும், எங்களெல்லாருக்கும் மார்க்கத்தை விளங்கி அதில் உறுதியாக இருக்கும் பாக்கியத்தைத் தரவேண்டும் என்றும், எம்மையும் அனைத்து முஸ்லிம்களையும் எங்கள் உள்ளங்களின் தீமைகளிலிருந்தும் எங்கள் தீய செயல்களின் தீமைகளிலிருந்தும் பாதுகாக்கவேண்டும் என்றும் அல்லாஹ்விடம் பிரார்த்திக்கிறேன். அதற்கு உதவிசெய்பவனாகவும் வல்லமை படைத்தவனாகவும் அவனே உள்ளான்.

அல்லாஹ்வின் ஸலாத்தும், ஸலாமும், பரிபூரண ஆசீர்வாதமும் எங்கள் நபியும் அல்லாஹ்வின் அடியாரும் தூதருமாகிய முஹம்மத் ஸல்லல்லாஹு அலைஹிவஸல்லம் அவர்கள் மீதும், அவர்களின் குடும்பத்தார் மற்றும் தோழர்கள் அனைவர் மீதிலும் உண்டாவதாக.

இஸ்லாமிய கொள்கை விளக்க நூல் வரிசை - 3

ஜின்களிடமும் ஷைதான்களிடமும் பாதுகாப்புத் தேடுதல் மற்றும் அவர்களுக்காக நேர்த்திக்கடன் ஏற்குதல் பற்றிய மதத் தீர்ப்பு

அப்துல் அஸீஸ் இப்னு அப்துல்லாஹ் இப்னு பாஸாஹிய நான் இம்மார்கத்தீர்ப்பை பார்க்கும் முஸ்லிம்கள் அனைவருக்கும் எழுதிக்கொள்வது, (அல்லாஹ் எனக்கும் அவர்களுக்கும் அவனின் மார்க்கத்தைப் உறுதியாகக் கடைப்பிடித்தொழுகவும்;, அதில் நிலைத்திருக்கவும் உதவிசெய்யவானாக. ஆமீன்)

அஸ்ஸலாமு அலைக்கும் வரஹ்மதுல்லாஹி வபரகாதுஹு. (உங்கள் மீது சாந்தி உண்டவதாக மேலுமஅல்லாஹ்வின் அருளும் பரகத்தும் உண்டாவதாக).

மார்க்கம் பற்றிய அறியாமையின் காரணமாக சில அறிவிலிகள் செய்யும் செயல்களான, அல்லாஹ் அல்லாதோரை அழைத்துப் பிரார்த்தித்தல், அவசர நிலைகளில் அவர்களிடம் உதவி தேடுதல், ஜின்களை அழைத்துப் பிரார்த்தித்தல், அவர்களிடம் பாதுகாப்புத் கோருதல், அவர்களுக்கு நேர்ச்சை செய்தல், மற்றும் அவர்களுக்கு அறுத்துப் பலியிடுதல் குறித்து என்னிடம் சில சகோதரர்கள் கேட்டனர். அவர்கள் பின்வருமாறு அவர்களிடம் கோரிக்கைகளை முன்வைப்பதாகவும் குறிப்பிட்டனர்: ‘ஓ எழுவரே!’ — அதாவது: ஜின்ன்களின் தலைவர்களில் ஏழு பேர் — ‘அவனைப் பிடியுங்கள், அவன் எலும்புகளை உடைத்துவிடுங்கள், அவன் இரத்தத்தைப் பருகுங்கள், அவனின் உடலை விகாரப்படுத்துங்கள்; ஓ எழுவரே! அவனுக்கு இவ்வாறு செய்யுங்கள்!’ வேறு சிலர், (மதிய வேளையில் உலாவும் ஜின்களே, மாலை வேளையில் உலாவும் ஜின்களே!, அவனைப் பிடியுங்கள்), என்றும் கூறுகின்றனர். இந்நடைமுறை தெற்குப் பகுதிகளில் அதிகமாக காணப்படுகிறது. இத்துடன் : இறந்த நபிமார்கள், சான்றோர்கள் மற்றும் ஏனையோரிடம் பிரார்த்திப்பதும், மலக்குமார்களிடம் பிரார்த்திப்பது மற்றும் அவர்களிடம் பாதுகாப்புத் தேடுதல் போன்ற அநாச்சாரங்களும் நிகழ்கின்றன. இவை அனைத்தும் இது போன்றவைகளும், தம்மை முஸ்லிம் என்று கூறிக்கொள்ளும் பலரால்; அறியாமை மற்றும், முன்னோர்களை கண்மூடித்தனமாக எவ்வித ஆதாரமுமின்றி பின்பற்றுதல் ஆகிய காரணங்களினால் நிகழ்கின்றன.சில போது அவர்கள் இந்த விடயத்தில் மெத்தனப்போக்குடன், இவை வெறுமனே சாதாரனமாக பேசப்படுபவை இதில் எமக்கு ஆழ்ந்த நாட்டமோ நம்பிக்கையோ கிடையாது என்றும் வாதிடுகின்றனர்.

அத்துடன் இவ்வாறான செயல்களில் ஈடுபடுவோருடன் திருமண உறவுகளை ஏற்படுத்திக்கொள்வது, அவர்களின் குர்பானிகளை ஏற்றுக்கொள்வது, அவர்களின் பின்னால் தொழுவது மற்றும் அவர்களில் மரணித்தவர்களுக்காக ஜனாஸாத் தொழுவது ஆகியவை பற்றிய மார்க்கத்தீர்ப்பு குறித்தும், நோயாளியின் உடலைத் தொட்ட மாத்திரத்தில் நோய் அறிகுறிகள் பற்றி மந்திரவாதிகள் மற்றும் சோதிடர்களை கூறுவதை நம்புவது பற்றிய மார்க்கத்தீர்ப்புக் குறித்தும் என்னிடம் கேட்டார்கள்.

பதில்: எல்லாப் புகழும் அல்லாஹ் ஒருவனுக்கே உரியது. ஸலாத்தும் ஸலாமும் இறுதி நபி (ஸல்) அவர்களின் மீதும், அவர்களின் குடும்பத்தார், தோழர்கள் மற்றும் மறுமை நாள்வரை அவர்களைப் பின்பற்றியோர் மீதும் உண்டாவதாக.

நிச்சயமாக அல்லாஹ், ஜின் மற்றும் மனித இனங்களை அவனையே மாத்திரம் வணங்குவதற்காகவும், அவனல்லாத எதையும் வணங்காமல், இறைஞ்சுதல், அபயம் தேடுதல், அறுத்துப் பலியிடுதல், நேர்ச்சை செய்தல் மற்றும் பிற அனைத்துவகை வணக்கங்களை அவனுக்கே மாத்திரம் உளத்தூய்மையுடன் ஒதுக்குவதற்காகவும் தான் படைத்துள்ளான். இதற்காகவே நபிமார்களை அனுப்பி, இதனை அவர்களுக்கு கட்டளையிட்டுள்ளான். மேலும் அதற்காகவே வான்வழி இறக்கப்பட்ட வேதங்களை இறக்கியுள்ளான். அவற்றில் மிகமகத்தானது, இதை தெளிவுபடுத்துவதற்காகவும் இதன் பால் அழைப்பதற்காகவும், அல்லாஹ்வுடன் ஏனையவற்றையும் இணைத்து வணங்குதல் மற்றும் அவனல்லாதவற்றை வணங்குதல் ஆகியவற்றிலிருந்து மக்களை எச்சரிப்பதற்காகவும் இறக்கப்ட்டுள்ள மகத்துவமிக்க குர்ஆன் ஆகும். இதுவே இந்த சன்மார்க்கத்தினது மிகப்பெரும் அடிப்படையாக திகழ்வதோடு 'லாஇலாஹ இல்லழ்ழாஹ்' என்ற ஷஹாதா கலிமாவின் கருத்துமாகும்! அதாவது 'உண்மையாக வணங்கப்படக்கூடியவன் அல்லாஹ்வைத் தவிர வேறு யாரும் இல்லை’ என்பதே இதன் உட்பொருளாகும். இது அல்லாஹ்வைத் தவிரவுள்ள அனைத்து வஸ்துக்களுக்கும் இறைமைத்துவம் (உலூஹிய்யா) மற்றும் வணக்கவழிபாடுகளை செலுத்துவதை முற்றாக மறுத்துரைப்பதோடு அல்லாஹ் மாத்திரமே வணக்கவழிபாடுக்கு உரியவன் என்பதையும் உறுதிப்படுத்துகிறது. இதற்கான ஆதாரங்கள் அல்லாஹ்வின் வேதத்திலும் அவனுடைய தூதர் ﷺ அவர்களின் ஸுன்னாவிலும் மிக அதிகம் காணப்படுகின்றன. உதாரணமாக, அல்லாஹ் கூறுகிறான்: ஜின்களையும் மனிதர்களையும் - அவர்கள் என்னை வணங்குவதற்கே தவிர - நான் படைக்கவில்லை. (அத்ஸாரியாத் : 56). மேலும் அல்லாஹ்கூறுகிறான்: மேலும், (நபியே!) உம் இறைவன் (உமக்கும் உமது சமுதாயத்திற்கும்) கட்டளையிடுகிறான்: “அவனைத் தவிர (யாரையும்) நீங்கள் வணங்காதீர்கள்... என (அல் இஸ்ராஉ 23), மேலும் அல்லாஹ் கூறுகின்றான் : அவர்கள் வழிபாட்டை அவனுக்கு மட்டும் தூய்மைப்படுத்தியவர்களாக, இணைவைப்பை விட்டு விலகியவர்களாக இருக்கும் நிலையில் அல்லாஹ்வை வணங்குமாறே தவிர ஏவப்படவில்லை (அல் பய்யினா :5) மேலும் அல்லாஹ் கூறுகின்றான் : இன்னும், உங்கள் இறைவன் கூறுகிறான்: “என்னிடம் பிரார்த்தியுங்கள்! நான் உங்களுக்கு (உங்கள் பிரார்த்தனையை) அங்கீகரிப்பேன். நிச்சயமாக எனது வணக்க வழிபாடுகளை விட்டு பெருமை அடிப்பவர்கள் சிறுமைப்பட்டவர்களாக விரைவில் நரகத்தில் நுழைவார்கள்.” (ஃகாபிர் : 60), மேலும் அல்லாஹ் கூறினான்: இன்னும், என் அடியார்கள் என்னைப் பற்றி உம்மிடம் கேட்டால், “நிச்சயமாக நான் சமீபமானவன்; என்னை அழைத்தால் அழைப்பவரின் அழைப்புக்குப் பதிலளிக்கிறேன்... (அல் பகரா : 186)

இவ்வசனங்களில் அல்லாஹ், ஜின் மற்றும் மனித இனங்களைத் தன்னை வணங்குவதற்காகவே படைத்ததாகத் தெளிவுபடுத்துகின்றான். மேலும் தன் தெளிவான அல்குர்ஆனிலும் மற்றும் தம் தூதர் (அலைஹிஸ்ஸலாத்து வஸ்ஸலாம்) அவர்களின் நாவின்மூலமும், அவனது அடியார்களுக்கு தங்கள் இறைவனைத் தவிர வேறு எவரையும் வணங்கக் கூடாது என்று கட்டளையிட்டு அறிவுறுத்தியிருப்பதையும் விளக்குகின்றான்.

துஆ மிகப் பெரும் மகத்தான ஒரு வணக்கமாகும்; யார் அந்த வணக்கத்தை செய்யாது பெருமையடிக்கிறாரோ அவர் நரகத்தில் நுழைவார் என அல்லாஹுத்தஆலா தெளிவுபடுத்தியுள்ளான். அது மாத்திரமின்றி தனது அடியார்கள் தன்னிடம் மாத்திரம் பிரார்த்தனை செய்ய வேண்டும் எனவும் வலியுறுத்தியுள்ளான். மேலும்,அவன் அடியார்களுக்கு மிகவும் நெருக்கமானவன் எனவும் அவர்களின் பிரார்த்தனைக்கு பதிலளிப்பவன் எனவும் குறிப்பிட்டுள்ளான். ஆகவே அனைத்து அடியார்களும் தங்களது உண்மையான இரட்சகனான அல்லாஹ்விடம் பிரார்த்தனை செய்வது அவசியமாகும். ஏனெனில் இது அல்லாஹ்வுக்கு செலுத்தும் வணக்க வழிபாடுகளில் ஒரு வகையாகும். இதற்காகவே அடியார்களாகிய மனிதர்கள் படைக்கப்பட்டு இவ்வணக்கத்ததை செய்யுமாறு கட்டளையிடப்பட்டவர்களாகவும் உள்ளனர்.இது குறித்து அல்லாஹ் பின்வருமாறு குறிப்பிடுகிறான்: (நபியே!) கூறுவீராக: “நிச்சயமாக என் தொழுகையும், என் பலியும் (எனது வணக்க வழிபாடுகளும்), என் வாழ்வும் என் மரணமும் அகிலத்தாரின் இறைவனாகிய அல்லாஹ்வுக்கே உரியவை.” அவனுக்கு இணை அறவே இல்லை; இ(ந்த தூய்மையான ஏகத்துவத்)தையே நான் ஏவப்பட்டுள்ளேன். இன்னும், முஸ்லிம்களில் (-அவனுக்கு முற்றிலும் கீழ்ப்படிந்தவர்களில்) நான் முதலாமவன்.163 (அல்அன்ஆம் : 162, 163).

ஆகவே அல்லாஹ் தனது நபி முஹம்மத் (ஸல்லலல்லாஹு அலைஹிவஸல்லம்) அவர்களிடம், பின்வருமாறு மக்களுக்குத் தெரிவிக்குமாறு ஆணையிட்டான்: அவரின் தொழுகையும் அறுத்துப் பலியிடுதலும், வாழ்வும் மரணமும் உலகங்களின் இறைவனாகிய அல்லாஹ்வுக்கே மாத்திரமே; அவனுக்கு எவரும் இணை இல்லை. அதன் அடிப்படையில், அல்லாஹ் அல்லாதோருக்காக அறுத்துப் பலியிடுபவன் அல்லாஹ்வுக்கு இணையாக்கியவனாகிறான்; அது அல்லாஹ் அல்லாதோருக்காக தொழுகின்றது போலவே ஆகும். ஏனெனில் அல்லாஹ் தொழுகையையும் அறுத்துப் பலியிடுதலையும் ஒன்றோடொன்று இணைத்திருக்கின்றான்; அவை இரண்டும் அல்லாஹ் ஒருவனுக்கே உரியன என்றும், அவனுக்கு எவரும் இணை இல்லை என்றும் அறிவித்திருக்கின்றான். ஆகவே ஒருவர் அல்லாஹ் அல்லாத ஜின்கள் மலக்குகள் இறந்தவர்கள் மற்றும் ஏனையவற்றிற்கு அறுத்துப் பலியிட்டு அதன் ஊடாக அவர்களை நெருங்க முயற்சிப்பது அல்லாஹ் அல்லாதவற்றிற்கு தொழுவதற்கு சமமாகும். நபி ஸல்லல்லாஹு அலைஹிவஸல்லாம் அவர்கள் கூறினார்கள்: அல்லாஹ் அல்லாதோருக்காக அறுத்துப் பலியிடுவோரை அல்லாஹ் சபிப்பானாக! நபி (ஸல்) அவர்கள் கூறியதாக தாரிக் இப்னு ஷிஹாப் (ரழி) அவர்கள் அறிவிக்கும் ஹதீஸை இமாம் அஹ்மத் ஹஸன் தரத்திலான சனதின் மூலம் பதிவு செய்துள்ளார்கள்: இரு மனிதர்கள் ஒரு விக்கிரகம் வைத்துக்கொண்டிருந்த சில மக்களைத் தாண்டிச் சென்றார்கள். அந்த விக்கிரகத்திற்காக ஏதாவது ஒன்றை அர்ப்பணிக்காமல் யாரும் அதைத் தாண்டிச் செல்ல முடியவில்லை. அவர்கள் இருவரில் ஒருவரிடம்: 'அர்ப்பணி' என்றார்கள். அவர்: 'என்னிடம் அர்ப்பணிக்க ஏதும் இல்லை' என்றார். அவர்கள்: 'ஓர் ஈயாயினும் அர்ப்பணி' என்றார்கள். அவர் ஓர் ஈயை அர்ப்பணித்தார். அவர்கள் அவரை விடுவித்தார்கள்; அவர் நரகம் நுழைந்தார். மற்றவரிடமும்: 'அர்ப்பணி' என்றார்கள். அவர்: 'அல்லாஹ் ஜல்ல ஜலாலுஹுவைத் தவிர வேறு யாருக்காகவும் நான் எதையும் அர்ப்பணிப்பதில்லை' என்றார். அவர்கள் அவரது கழுத்தை அறுத்தனர்; அவர் சுவனம் நுழைந்தார்.

ஈ மற்றும் அது போன்ற சாதாரன பட்சிகளை சிலை மற்றும் அது போன்றவற்றை நெருங்குவதற்காக யார் பலியிடுகிறாரோ அவர் இணைவைத்தவராக மாறி நரகத்திற்கு செல்வதற்கான தகுதியையையும் பெறுகிறார் என்றால், ஜின்கள், மலக்குகள், இறைநேசர்கள் ஆகியோரிடம் பிரார்த்தனை செய்பவன், அவர்களிடம் உதவி தேடுபவன், அவர்களுக்கு நேர்ச்சை செலுத்துபவன், பலியிடுவதன் மூலம் அவர்களை நெருங்குபவனின் நிலை பற்றி குறிப்பிடத் தேவையில்லை. இவ்வாறு பலியிடுவதன் மூலம்; அவன் தனது செல்வம் பாதுகாக்கப்பட வேண்டும், நோயாளியின் நோய் குணப்படுத்தப்பட வேண்டும், தன் வளர்ப்பு மிருகங்கள்; மற்றும் பயிர்களை பாதுகாக்கப்பட வேண்டும் என எதிர்பார்க்கிறான். ஆக இவ்வாறான செயற்பாடுகளை ஜின்களின் தீங்கை தவிர்ப்பதற்காக அல்லது இதனை ஒத்த விடயங்களிருந்து தன்னை பாதுகாத்துக்கொள்வதற்கு பலியிடுவாத இருப்பின் அவர் ஒரு இணைவைப்பளாராக மாறிவிடுவதோடு சிலைக்கு ஈயை பலியிட்டவனைவிடவும் நரகில் நுழைவதற்கு அதிக தகுதியுள்ளவனாக மாறிவிடுகிறான் என்பதில் எவ்வித சந்தேகமுமில்லை.

பின்வரும் வசனமும் இதுபற்றிப் பேசும் ஒன்றாகும்: 'நிச்சயமாக நாம் இந்த வேதத்தை உண்மையுடன் உமக்கு இறக்கினோம். ஆகவே, அல்லாஹ்வை வணங்குவீராக, வணக்க வழிபாடுகளை - தீனை அவனுக்கு முற்றிலும் தூய்மைப்படுத்தியவராக.' அறிந்து கொள்ளுங்கள்! பரிசுத்தமான வணக்க வழிபாடுகள் எல்லாம் அல்லாஹ்விற்கே உரியன. அவனை அன்றி (பல) தெய்வங்களை (தங்களுக்கு) எடுத்துக் கொண்டவர்கள், “அல்லாஹ்வின் பக்கம் அந்தஸ்தால் எங்களை அவர்கள் நெருக்கமாக்குவதற்காகவே தவிர, நாங்கள் அவர்களை வணங்குவதில்லை.” என்று கூறுகிறார்கள். நிச்சயமாக அல்லாஹ் அவர்களுக்கு மத்தியில் அவர்கள் கருத்து வேறுபாடு கொள்கின்றவற்றில் தீர்ப்பளிப்பான். பொய்யர்களை, நிராகரிப்பாளர்களை நிச்சயமாக அல்லாஹ் நேர்வழி செலுத்தமாட்டான். (அஸ்ஸுமர் : 1-3) மேலும் அல்லாஹ் கூறுகின்றான்: எது அவர்களுக்கு தீங்கிழைக்காதோ; இன்னும், அவர்களுக்கு பலனளிக்காதோ அதைத்தான் அவர்கள் அல்லாஹ்வை அன்றி வணங்குகிறார்கள். இன்னும், “இவை அல்லாஹ்விடம் எங்களுடைய பரிந்துரையாளர்கள்” என்று கூறுகிறார்கள். (ஆகவே, நபியே! அவர்களை நோக்கி,) “வானங்களிலும் பூமியிலும் அல்லாஹ்விற்கு அவன் அறியாதவற்றை நீங்கள் அறிவிக்கிறீர்களா? அவன் மிகப் பரிசுத்தமானவன்; இன்னும், அவர்கள் இணைவைப்பவற்றை விட்டு அவன் (தகுதியால்) மிக உயர்ந்தவனாக இருக்கிறான்” என்று கூறுவீராக. ( யூனுஸ் : 18)

இந்த இரு வசனங்களில் அல்லாஹ், இணைவைப்பாளர்கள் அல்லாஹ்வைத் தவிர படைக்கப்பட்டவற்றிலிருந்து பாதுகாவலர்களை எடுத்துக்கொண்டு, அவனுடன் அவர்களைப் பயப்படுதல், ஆதரவு வைத்தல், பலியிடுதல், நேர்த்தி எடுத்தல், துஆக் கேட்டல் போன்ற ஏனைய காரியங்கள் மூலம் வணங்குகிறார்கள் என்று கூறுகின்றான். அவர்கள், அந்த பாதுகாவலர்கள் அவர்களை வணங்குகிறவர்களை அல்லாஹ்விடத்தில் நெருக்கி வைப்பார்கள்; அவர்களுக்காக அவனிடத்தில் பரிந்துரை செய்வார்கள் என்று கூறிக் கொண்டிருக்கிறார்கள். பின்னர் அல்லாஹ் அவர்களைப் பொய்ப்படுத்தி, அவர்களின் அசத்தியத்தை வெளிப்படுத்தி, அவர்களைப் பொய்யர்கள், நிராகரிப்பாளர்கள், இணைவைப்பாளர்கள் என அழைத்ததுடன், அவர்களின் இணைவைப்பிலிருந்து தன்னைத் தூயமைப்படுத்தினான். அவன் கூறுகின்றான்: அவன் மிகப் பரிசுத்தமானவன்; இன்னும், அவர்கள் இணைவைப்பவற்றை விட்டு அவன் மிக உயர்ந்தவன். (அந்நஹ்லு : 1). இந்த வகையில், யாரேனும் ஒருவர் மலக்கை, அல்லது நபியை, அல்லது ஜின்னை, அல்லது மரத்தை, அல்லது கல்லை அல்லாஹ்வுடன் இணைத்து பிரார்த்தனை செய்து, அவைகளிடம் இரட்சிக்கத் தேடுகிறாரோ,அல்லது நேர்ச்சை மற்றும் அறுத்துப்பலியிடுவதன் மூலம் அவைகளிடம் நெருக்கத்தைப் பெற முயல்கிறாரோ, அல்லது அல்லாஹ்விடம் பரிந்துரைக்க அவைகளிடம் உதவியை நாடுகிறாரோ, அல்லது நோயாளியை குணப்படுத்த, செல்வத்தை பாதுகாக்க, அல்லது காணாமல் போனவர் எவ்வித ஆபத்துமின்றி பாதுகாப்பாக திரும்பக்கிடைக்க இது போன்ற விடயங்களை செய்கிறாரோ அவர் மிகப்பெரும் இணைவைப்பிலும், கடுமையான சோதனையிலும் விழுந்துவிட்டார். இது குறித்து அல்லாஹ் இவ்வாறு குறிப்பிடுகின்றான்: நிச்சயமாக அல்லாஹ் தனக்கு இணைவைக்கப்படுவதை மன்னிக்க மாட்டான். இன்னும், அதைத் தவிர மற்றதை அவன், தான் நாடியவருக்கு மன்னிப்பான். எவர் அல்லாஹ்விற்கு இணையை ஏற்படுத்துவாரோ அவர் திட்டமாக (அல்லாஹ்வின் மீது) பெரும் பாவத்தை இட்டுக் கட்டிவிட்டார். (அந்நிஸா : 48) மேலும் அல்லாஹ் கூறுகின்றான்: நிச்சயமாக எவர் அல்லாஹ்விற்கு இணைவைக்கிறாரோ அவர் மீது திட்டமாக, அல்லாஹ் சொர்க்கத்தை தடுத்து விடுகிறான். இன்னும் அவருடைய தங்குமிடம் நரகம்தான். இன்னும் அநியாயக்காரர்களுக்கு உதவியாளர்களில் எவரும் இல்லை. (அல்மாஇதா : 72).

மறுமை நாளில் பரிந்துரை என்பது ஒற்றைத்தெய்வ நம்பிக்கையுடனும் உள்ளத் தூய்மையுடனும் இருப்பவர்களுக்கு மட்டுமே கிடைக்கும்; இணை வைப்பவர்களுக்கு அல்ல. நபி ஸல்லல்லாஹு அலைஹிவஸல்லம் அவர்களிடம், “இறைத்தூதர் அவர்களே! தங்களின் பரிந்துரைக்கு மிகத்தகுதி பெற்றவர் யார்?” என்று அவரிடம் கேட்கப்பட்டபோது, அவர்கள் இவ்வாறு கூறினார்கள்: யார் ஒருவர் தனது உள்ளத்தினால் மிகத்தூய்மையான எண்ணத்துடன் 'லாஇலாஹ இல்லல்லாஹ்' (உண்மையாக வணங்கப்படத் தகுதியான ஒரே இறைவன் அல்லாஹ்வைத் தவிர வேறு யாருமில்லை) என்று கூறுகிறாரோ. (அவருக்கே) மேலும் ஸல்லல்லாஹு அலைஹிவஸல்லம் கூறினார்கள் ஒவ்வொரு நபிக்கும் ஏற்றுக்கொள்ளப்படும் ஒரு பிரார்த்தனை இருக்கிறது. ஆகவே ஒவ்வொரு நபியும் தன் பிரார்த்தனையை விரைந்து செய்து விட்டார். ஆனால் நான் என் பிரார்த்தனையை, மறுமை நாளில் என் சமுதாயத்திற்கான சபாஆவாகச் சேமித்து வைத்துள்ளேன். எனவே, இன்ஷா அல்லாஹ், என் சமுதாயத்தில் அல்லாஹ்வுடன் எதையும் இணை வைக்காமல் இறந்தவர்களுக்கு அது கிடைக்கும்.

ஏலவே குறிப்பிடப்பட்ட வசனங்களில் வநதுள்ளதன் அடிப்படையில் ஆரம்ப கால இணைவைப்பாளர்கள் அல்லாஹ்வே தங்களின் இறைவனும் படைப்பாளனும் வாழ்வாதாரமளிப்பவனும் என நம்பினார்கள். ஆனால் அவர்கள், நபிமார்கள், இறைநேசர்கள், மலக்குகள், மரங்கள், கற்கள் மற்றும் அவை போன்றவைகளை, அல்லாஹ்விடம் அவைகள் தங்களுக்காக பரிந்துரை செய்யும் என்ற எதிர்ப்பார்ப்பிலும், அவைகள் அவனின் நெருக்கத்தை ஏற்படுத்தித்தரும் என்ற நம்பிக்கையிலும் தான் பற்றிக்கொண்டனர். அதனால் அல்லாஹ் அவர்களுக்கு விலக்கு அளிக்கவில்லை; மாறாக, தனது மாபெரும் வேதத்தில் அவர்கள்மீது கண்டனம் செய்து, அவர்களை இறைநிராகரிப்பாளர்கள் மற்றும் இணைவைப்பாளர்கள் என அழைத்தான். மேலும், இவர்கள் வணங்கும் கடவுள்கள் தமக்காக பரிந்துரையிடும், மேலும் அவனிடம் தம்மை நெருக்கி வைப்பார்கள் என்ற அவர்களின் கூற்றையும் பொய்ப்படுத்திவிட்டான். நபி ஸல்லல்லாஹு அலைஹிவஸல்லம் அவர்களும் அவர்களுக்கு விலக்கு அளிக்கவில்லை; மாறாக, அவர்கள் தமது வணக்கங்களை அல்லாஹ் ஒருவனுக்கே தூய்மைப்படுத்தும்வரை, இவ்விணைவைப்பிற்கு எதிராக பினவரும் வசனத்தின் அடிப்படையில் அவர்களுடன் போரிட்டார்கள்: இன்னும், (மக்காவில்) இணைவைத்தல் நீங்கும் வரை, வணக்க வழிபாடு அல்லாஹ்விற்கு மட்டும் ஆகும் வரை அவர்களிடம் போர் புரியுங்கள்... (அல் பகரா : 193) நபி (ஸல்) கூறுகிறார்கள் : 'அல்லாஹ்வைத் தவிர வேறு இறைவன் இல்லை என்றும் முஹம்மத் அல்லாஹ்வின் தூதர் என்றும் சாட்சி கூறி, தொழுகையை நிலைநாட்டி, ஸகாத்தும் கொடுக்கும் வரை மக்களுடன் போர் புரியும்படி நான் கட்டளையிடப்பட்டுள்ளேன். யார் இவற்றை செய்கிறாரோ அவர் தம் உயிரையும் உடைமையையும் என்னிடமிருந்து காப்பாற்றிக்கொள்வார்; நியாயமான காரணம் இருந்தால் தவிர. அவர்களது விசாரணை அல்லாஹ்வின் பொறுப்பாகும்.' மேலும் நபி (ஸல்) அவர்களது, “அவர்கள் அல்லாஹ்வையன்றி வணக்கத்திற்குத் தகுதியானது எதுவுமில்லை என்று சாட்சி பகரும்வரை” என்ற கூற்றின் பொருளாவது, 'வணக்கத்தை அல்லாஹ்வைத் தவிரவுல்லவற்றை விட்டு அவனுக்கு மாத்திரம் செலுத்துதல்'(குறிப்பாக்குதல்) என்பதாகும்.

முஷ்ரிக்குகள் -இணைவைப்பாளர்கள்- ஜின்களைப் பயந்து அவர்களிடம் பாதுகாப்பு தேடிக்கொண்டிருந்தனர், இதனை கண்டித்து பின்வரும் திருவசனத்தை அல்லாஹ் அருளினான்: இன்னும் நிச்சயமாக விஷயமாவது, மனிதர்களில் உள்ள ஆண்கள் சிலர் ஜின்களில் உள்ள ஆண்கள் சிலரிடம் பாதுகாவல் தேடினர். எனவே அவர்கள் (-ஆண் ஜின்கள்) அவர்களுக்கு (மனித ஆண்களுக்கு) பயத்தை (திகிலை) அதிகப்படுத்தினர். (அல்ஜின் : 6). அல்குர்ஆன் விரிவுரையாளர்கள இவ்வசனத்திற்கான விளக்கத்தை பின்வருமாறு குறிப்பிடுகின்றனர் “எனவே அவர்கள் (-ஆண் ஜின்கள்) அவர்களுக்கு (மனித ஆண்களுக்கு) பயத்தை (திகிலை) அதிகப்படுத்தினர்.” அதாவது: 'ரஹகா' என்பது பயத்தாலும்; அச்சத்தாலும்; என்ற கருத்தை குறிக்கும். ஜின்கள், மனிதர்கள் தங்களிடம் பாதுகாப்புக் கோருவதை கண்டால்; தங்களை பெரிதாக எண்ணி பெருமிதம் கொள்கின்றனர். அப்போது அவர்கள் தங்களை அதிகம் வணங்கி வழிபட்டு தஞ்சமடைய வேண்டும் என்பதற்காக மனிதர்களுக்கு பயத்தையும் அச்சத்தையும் அதிகரிக்கின்றனர். என்பதே இதன் விளக்கமாகும்.

அல்லாஹ் முஸ்லிம்களுக்கு இதற்குப் பதிலாக அவனுடைய முழுமையாக வார்த்தைகளைக் கொண்டு பாதுகாப்பு கோரி தன்னிடம் தஞ்சமடையுமாறும் பாதுகாப்புக்கோருமாறும் ஏவியதோடு, இது குறித்து பின்வரும் வழிகாட்டல்களை அவன் இறக்கியருளியுள்ளான்: ஷைத்தானிடமிருந்து (மனக்) குழப்பம் (அல்லது கோபம்) உம்மைக் குழப்பினால் (உம்மை யாரும் கோபமூட்டினால்) அல்லாஹ்விடம் பாதுகாப்புக் கோருவீராக. நிச்சயமாக அவன் நன்கு செவியுறுபவன், நன்கறிந்தவன் ஆவான். (அல் அஃராப் : 200) மேலும் அல்லாஹ் கூறுகின்றான் : (நபியே!) நீர் சொல்வீராக: அதிகாலையின் இறைவனிடத்தில் நான் காவல் தேடுகிறேன். ஆதாரப்பூர்வமான ஓர் அறிவிப்பில், நபி ஸல்லல்லாஹு அலைஹி வஸல்லம் அவர்கள் இவ்வாறு கூறினார்கள் : யாரேனும் (பயணத்தில்) ஓரிடத்தில் தங்குவதற்காக இறங்கி பின்னர் "அஊது பி கலிமாத்தில் லாஹித் தாம்மாத்தி மின் ஷர்ரி மா கலக்" என்று கூறிப் பிரார்த்தித்தால், அந்த இடத்திலிருந்து அவர் புறப்பட்டுச் செல்லும்வரை எதுவும் அவருக்குத் தீங்கிழைக்காது. (பொருள்: அல்லாஹ்வின் பரிபூரண வார்த்தைகளைக் கொண்டு, அவன் படைத்தவற்றின் தீங்கை விட்டும் பாதுகாப்புத் தேடுகின்றேன்)

மேற்கூறப்பட்ட வசனங்கள் மற்றும் நபிமொழிகள் அடிப்படையில், விமோசனத்தை தேடி தனது மார்க்கத்தைப் பேணிப்பாதுகாக்கவும், சாதாரண மற்றும் பெரிய இணைவைப்பில் இருந்து தன்னைக் காத்துக்கொள்ளவும் ஆசைப்படும் ஒருவர், மரணித்தோர், வானவர்கள், ஜின்கள் மற்றும் பிற படைப்புகள் மீது பற்றுதல் கொள்ளுதல், அவர்களிடம் பிரார்த்தித்தல், பாதுகாப்பு தேடுதல் போன்றவை, அறியாமை காலத்து இணைவைப்பாளர்களின் செயல்களாகும் என்பதையும், அத்துடன் இது அல்லாஹ்வுக்கு இணைகற்பிக்கும் அசிங்கமான விடயமாகும் என்பதையும் அறிந்துகொள்ஙார். ஆகவே அவற்றை விட்டு விலகி நடப்பதும், அவற்றிலிருந்து எச்சரிக்கையாக இருப்பதும், அவற்றை விட்டு விலகுமாறு ஒருவருக்கொருவர் அறிவுறுத்துவதும், அவற்றைச் செய்பவர்களை கண்டிப்பதும் கடமையாகும்.

இவ்வகை இணைவைப்புச் செயல்களால் மக்களிடையே அறியப்படுபவரைப் பொறுத்தவரை, இதிலிருந்து அவர் சர்வவல்லமையுள்ள அல்லாஹ்விடம் வெளிப்படையாகத் தவ்பா செய்து, பிரார்த்தனையையும் வணக்கங்களையும் அல்லாஹ்வுக்கே ஏகமாகப் பரிசுத்தமாகச் செலுத்தும் வரை, அவருடன் மணமுடிப்பதோ; அவரது அறுத்த மிருகத்தின் இறைச்சியை உண்ணுவதோ; அவருக்காக இறுதித் தொழுகை (ஜனாஸா) செய்வதோ, அவரின் பின்னால் (இமாமாக) தொழுவதோ கூடாது. ஏனெனில் பிரார்த்தனையே வணக்கமாகும்; மாறாக, அது அதன் சாறாகும். நபி (ஸல்) அவர்கள் கூறினார்கள்: துஆ என்பது வணக்கமாகும் இன்னொரு அறிவிப்பில் நபி ஸல்லல்லாஹு அலைஹிவஸல்லம் அவர்கள் பின்வருமாறு கூறினார்கள் என்று அறிவிக்கப்பட்டுள்ளது: துஆ என்பது வணக்கத்தின் சாராம்சமாகும். இணைவைப்பாளர்களை மணம் முடிப்பது குறித்து அல்லாஹ் கூறும்போது: இணைவைக்கும் பெண்களை - அவர்கள் நம்பிக்கை கொள்ளும் வரை - மணக்காதீர்கள். திட்டமாக, நம்பிக்கையாளரான ஓர் அடிமைப்பெண் இணைவைப்பவளைவிடச் சிறந்தவள். (இணைவைக்கும்) அவள் உங்களைக் கவர்ந்தாலும் சரியே! இணைவைக்கும் ஆண்களுக்கு - அவர்கள் நம்பிக்கை கொள்ளும் வரை - நீங்கள் (நம்பிக்கையாளரான பெண்ணை) மணமுடித்துக் கொடுக்காதீர்கள். திட்டமாக நம்பிக்கையாளரான ஓர் அடிமை இணைவைப்பவனைவிடச் சிறந்தவர், அவன் உங்களைக் கவர்ந்தாலும் சரியே. (இணைவைக்கும்) அவர்கள் (உங்களை) நரகத்திற்கு அழைக்கிறார்கள். அல்லாஹ்வோ, தன் கட்டளையினால் சொர்க்கம் இன்னும் மன்னிப்பிற்கு (உங்களை) அழைக்கிறான். இன்னும், மக்களுக்குத் தன் வசனங்களை அவர்கள் நல்லுபதேசம் பெறுவதற்காக விவரிக்கிறான். (அல் பகரா : 221) ஆக, சிலைகள், ஜின்கள், மலக்குகள் முதலியவற்றை வணங்குபவர்கள் உட்பட்ட இணைவைத்து வணங்கும் பெண்கள், அல்லாஹ் ஒருவனுக்கே வணக்கங்களை செலுத்தி, அவனது தூதர் கொண்டு வந்தவற்றை உண்மையென ஏற்றுக்கொண்டு, அவருடைய வழியைப் பின்பற்றும்வரை, அவர்களை முஸ்லிம்கள் மணமுடிப்பதை அல்லாஹ் தடைசெய்கின்றான். மேலும், இணைவைத்து வணங்கும் ஆண்கள், அல்லாஹ் ஒருவனுக்கே வணக்கங்களை செலுத்தி, அவனது தூதர் கொண்டு வந்தவற்றை உண்மையென ஏற்றுக்கொண்டு, அவருடைய வழியைப் பின்பற்றும்வரை, அவர்களுக்கு முஸ்லிமான பெண்களை மணமுடித்துக் கொடுப்பதையும் அவன் தடைசெய்கின்றான்.

மேலும், இணைவைக்கும் சுதந்திரமான பெண், தன்னைப் பார்ப்பவர்களைத் தன் அழகாலும், தான் பேச்சைக் கேட்பவர்களைத் தான் இனிய பேச்சாலும் கவருபவளாக இருந்தாலும், அவளை விட அடிமையான முஃமினான பெண் சிறந்தவள் என்றும், இணைவைக்கும் சுதந்திரமான ஆண், தன்னைப் பார்ப்பவர்களைத் தன் அழகு, நாவண்மை, வீரம் போன்றவற்றால் கவருபவனாக இருந்தாலும், அவனை விட அடிமையான முஃமினான ஆண் சிறந்தவன் என்றும் அல்லாஹ் அறிவித்துவிட்டு, அதற்கான காரணங்களை இவ்வாறு தெளிவுபடுத்துகின்றான்: (இணைவைக்கும்) அவர்கள் (உங்களை) நரகத்திற்கு அழைக்கிறார்கள். (பகரா : 221) அதன் மூலம், இணைவைக்கும் ஆண்களையும், பெண்களையும் அல்லாஹ் நாடுகின்றான். ஏனெனில், அவர்கள் தமது சொல்லாலும் செயல்களாலும் நடத்தையாலும் பண்புகளாலும் நரகத்திற்கு அழைப்பவர்களாக இருக்கிறார்கள். ஆனால் முஃமினான ஆண்களும் பெண்களும், தமது பண்புகளாலும் செயல்களாலும் நடத்தைகளாலும் சொர்க்கத்திற்கே அழைக்கின்றனர். இவர்களும் அந்த இணைவைப்பாளர்களும் சரி நிகராக முடியுமா என்ன!

இணைவைத்தவர்களுக்காக (ஜனாஸா) தொழுகை நடத்துவதைப் பொறுத்தவரை, நயவஞ்சகர்கள் குறித்து அல்லாஹ் பின்வருமாறு கூறுகின்றான்: (நபியே!) இன்னும், அவர்களில் யார் இறந்துவிட்டாரோ அவருக்கு ஒருபோதும் (ஜனாஸா தொழுகை) தொழாதீர். அவருடைய புதைகுழிக்கு அருகில் நிற்காதீர். நிச்சயமாக அவர்கள் அல்லாஹ்வையும் அவனுடைய தூதரையும் நிராகரித்தனர். இன்னும், அவர்களோ பாவிகளாக இருக்கும் நிலையில் இறப்பெய்தினர். (அத்தவ்பா : 84) அல்லாஹ் இவ்வுயரிய வசனத்தில் தெளிவுபடுத்துவதாவது: நயவஞ்சகனும் இறைநிராகரிப்பாளனும், அல்லாஹ்வையும் அவனுடைய தூதரையும் நிராகரித்துள்ளமையினால், அவர்களுக்காக தொழுகை நடத்தப்படமாட்டாது. மேலும், அவர்களின் பின்னால் தொழக்கூடாது; முஸ்லிம்களுக்கு இமாம்களாகவும் அவர்கள் நியமிக்கப்படக் கூடாது. ஏனெனில், அவர்கள் நிராகரிப்பாளர்களாகவும், நம்பக்காமற்றவர்களாகவும் உள்ளதோடு, அவர்களுக்கும் முஸ்லிம்களுக்கும் இடையிலுள்ள பெரும் பகைமையும் உள்ளது. மேலும் அவர்கள் தொழுகை மற்றும் வணக்கங்கள் கொண்டவர்கள் அல்ல. ஏனெனில் இறைநிராகரிப்பும் இணைவைப்பும் இருந்தால் எந்த நற்செயலும் நிலைநிற்காது. அதிலிருந்து பாதுகாப்பை அல்லாஹ்விடத்தில் வேண்டுகிறோம். இணைவைத்தோர் அறுத்தவற்றை சாப்பிடுவதைப் பொறுத்தவரை, இறந்த பிராணிகளையும், இணைவைத்தோர் அறுத்தவற்றையும் தடைசெய்துள்ளதைத் தெளிவுபடுத்தி அல்லாஹ் இவ்வாறு கூறுகின்றான் : இன்னும், (நம்பிக்கையாளர்களே!) அல்லாஹ்வுடைய பெயர் கூறப்படாதவற்றிலிருந்து புசிக்காதீர்கள். நிச்சயமாக அது பாவமாகும். உங்களிடம் அவர்கள் தர்க்கிப்பதற்காக நிச்சயமாக ஷைத்தான்கள் தங்கள் நண்பர்களுக்கு சொல்லித் தருகிறார்கள். நீங்கள் அவர்களுக்கு கீழ்ப்படிந்தால் நிச்சயமாக நீங்கள் இணை வைப்பவர்களாக ஆகிவிடுவீர்கள். (அல் அன்ஆம்: 121) ஆகவே மிக உயர்ந்த அல்லாஹ், இறந்தவற்றையும் இணைவைப்பாளர் அறுத்ததையும் உண்ணுவதை முஸ்லிம்களுக்குத் தடைசெய்துள்ளான்; ஏனெனில் இணைவைப்பாளர் அசுத்தமானவன். ஆகையால் அவன் அறுத்தது இறந்தவற்றாகவே கருதப்படும்; அதன்மேல் அல்லாஹ்வின் பெயர் கூறப்பட்டிருந்தாலும் கூட. ஏனெனில் அவனிடமிருந்து வரும் அந்த பெயர்கூறுதல் செல்லாது, அதற்கு எந்தத் தாக்கமும் இல்லை; ஏனெனில் அது ஒரு வழிபாடு. இணைவைப்பாளர் அல்லாஹ்விடம் மீண்டு, தவ்பா செய்யும் வரை, இணைவைப்பு வழிபாட்டை வீணாக்கி செல்லாமற் செய்கிறது. வேதமுடையவர்களின் உணவை மாத்திரமே எல்லாம் வல்ல அல்லாஹ் அனுமதித்துள்ளான்; இது குறித்து பின்வருமாறு அவனது திருமறையில் இவ்வாறு பிரஸ்தாபிக்கிறான் : வேதம் கொடுக்கப்பட்டவர்களின் புலால் உணவும் உங்களுக்கு ஆகுமானதாகும்! உங்கள் புலால் உணவும் அவர்களுக்கு ஆகுமானதாகும்! (அல் மாயிதா : 5) ஏனெனில் அவர்கள் ஒரு வான்வழி மார்க்கத்தைச் சார்ந்தவர்கள். மேலும், தாம் மூஸா (அலை), ஈஸா (அலை) அவர்களைப் பின்பற்றிவோர் என்று வாதிடுகின்றனர்; -அதில் அவர்கள் பொய்யர்கள் என்றாலும்- மேலும், முஹம்மத் (ஸல்) அவர்களை எல்லா மக்களுக்கும் பொதுவாக அனுப்பியதன் மூலம், அல்லாஹ் அவர்களது மார்க்கத்தை ரத்து செய்து செல்லாது ஆக்கிவிட்டான். இருந்தபோதும், அல்லாஹ் எங்களுக்கு எஹ்லுல் கிதாபின் உணவையும் அவர்களது பெண்களுடன் (திருமணம் செய்வதையும்) அனுமதித்தான்; மிகுந்த ஞானம் நிரம்பிய காரணங்களாலும் கவனத்தில் கொள்ளப்பட்ட மறைக் காரணங்களாலும், அவற்றை அறிஞர்கள் தெளிவுபடுத்தியுள்ளனர். இதற்கு மாறாக, விக்ரகங்களையும் இறந்தவர்களையும் — நபிமார்கள், அவ்லியாப் பெருமக்கள் முதலியோர் — வணங்கும் முஷ்ரிக்கள்: அவர்களது மார்க்கத்திற்கு எந்த அடிப்படையும் இல்லை; அதில் (உண்மையெனத் தோன்றும்) எந்தச் சாய்மையும் இல்லை; மாறாக அது அடிப்படையிலேயே பொய்மையே. ஆகவே, அவர்களது அறுப்பானது செத்த உயிராகவே கருதப்படும்; அதை உண்ண அனுமதி இல்லை.

ஒருவரை நோக்கி 'ஜின் உன்னைத் தாக்கியுள்ளது', '; உன்னை ஜின் பிடித்துள்ளது', 'ஷைத்தான் உன்னை கொண்டு சென்றுவிட்டான்' போன்ற வார்த்தைகளைப் பயன்படுத்துவது, ஏசுதல் மற்றும் திட்டுதல் வகையைச் சேர்ந்ததாகும். இது வேறு திட்டுதல் மற்றும் ஏசுதல் வகையைப் போன்றே, முஸ்லிம்களுக்கிடையே கூறுவது கூடாது. ஆகவே, இவ்வாறான வார்த்தைகள் இணைவைப்பை உள்ளடக்கியதல்ல. ஆனால் இதை கூறுபவர், ஜின்கள் அல்லாஹ்வின் அனுமதி மற்றும் அவனது நாட்டம் இன்றி மனிதர்களில் தாக்கம் செலுத்துகின்றனர் என்று நம்புபவராக இருந்தாலே தவிர. இவ்வாறான தன்மைகள் ஜின்களுக்கோ அல்லது பிற படைப்பினங்களுக்கோ என்று யாராவது நம்பினால், அந்த நம்பிக்கையாலே அவன் காஃபிர் ஆகிறான். ஏனெனில் அல்லாஹ்தான் அனைத்திற்கும் உரிமையாளன். எல்லாவற்றிலும் வல்லமையுடையவன்; நலனளிப்பவனும் தீங்கு விளைவிப்பவனும் அவனே. அவனது அனுமதியும் நாட்டமும், அவன் முன்கூட்டியே நிர்ணயித்ததுமில்லாமல் எதுவும் நிகழ்வதில்லை. மக்களுக்குத் இந்த மாபெரும் அடிப்படை உண்மையை அறிவிக்கும்படி தன் நபியிடம் ﷺ கட்டளையிட்டு, அல்லாஹ் பின்வருமாறு கூறுகின்றான் : (நபியே!) கூறுவீராக: “அல்லாஹ் நாடியதைத் தவிர எனக்கு எந்த ஒரு பலனுக்கும் (அதை எனக்கு தேடுவதற்கு) இன்னும், எந்த ஒரு கெடுதிக்கும் (அதை என்னை விட்டு அகற்றுவதற்கு) நான் உரிமை பெறமாட்டேன். இன்னும், நான் மறைவானவற்றை அறிபவனாக இருந்திருந்தால் நன்மையை அதிகம் பெற்றிருப்பேன்; இன்னும், தீங்குகள் ஏதும் எனக்கு ஏற்பட்டிருக்காது. (பாவிகளை) எச்சரிப்பவராகவும் நம்பிக்கை கொள்கின்ற மக்களுக்கு நற்செய்தி கூறுபவராகவுமே தவிர நான் இல்லை.” (அல்அஃராப் : 188) படைப்பினங்களின் தலைவரும் சிறந்தவருமான நபி ஸல்லல்லாஹு அலைஹிவஸல்லம் அவர்களே, அல்லாஹ் நாடியாதைத் தவிர, தனக்காக எந்த நன்மையையோ, தீமையையோ செய்யமுடியாமல் இருக்கும் போது, பிற படைப்பினங்களால் எவ்வார முடியும்?! இந்த அர்த்தத்தில் ஆயத்துகள் பல உள்ளன.

குறிசொல்லிகள், கண்கட்டி வித்தை செய்பவர்கள், நட்சத்திரக் குறி சொல்பவர்கள் மற்றும் அவர்களுக்கு ஒத்த, மறைவானவற்றைப் பற்றிய செய்திகள் கூறுவதாக முன்வருபவர்களிடத்தில் சென்று வினவுதல் கூடாத கண்டிக்கப்பட்ட செயலாகும்; அவர்களை உண்மைப்படுத்துவது அதைவிடக் கடுமையானதும் மிகுந்த கண்டனத்திற்குரியதுமாகும். உண்மையில் அது இறைநிராகரிப்பின் ஒரு கிளையாகும். நபியவர்கள் கூறுகின்றார்கள்: யார் (சோதிடன்) குறி சொல்பவனிடம் சென்று ஏதேனும் ஒன்றைப் பற்றி விசாரிக்கின்றாரோ, அவனுடைய நாற்பது நாட்களின் தொழுகைகள் ஏற்றுக் கொள்ளப்படமாட்டாது. ஆதாரம் : முஸ்லிம் முஆவியா இப்னுல் ஹகம் அஸ்ஸுலமி (ரழியல்லா{ஹ அன்ஹு) அவர்கள் கூறியதாக ஸஹீஹ் முஸ்லிமில்  பின்வரும் செய்தியும் இடம்பெற்றுள்ளது: நபி ஸல்லல்லாஹு அலைஹிவஸல்லம் அவர்கள் சோதிடர்களிடம் செல்வதையும் அவர்களிடம் கேள்வி கேட்பதையும் தடுத்தார்கள்".

மேலும் நபி (ஸல்) அவர்கள் கூறியதாக ஸுனன் கிரந்தங்களில் இவ்வாறு அறிவிக்கப்பட்டுள்ளது: 'யார் ஒரு சோதிடனிடம் சென்று அவன் சொல்வதை நம்புகின்றாரோ, அவர் முஹம்மத் ஸல்லல்லாஹூ அலைஹிவஸல்லம் அவர்களின் மீது இறக்கியருளப்பட்டதை நிராகரித்தவனாவான். இதே அர்த்தத்தில் அதிகமான ஹதீஸ்கள் இடம்பெற்றுள்ளன. எனவே, சோதிடர்கள், குறி சொல்பவர்கள், மற்றும் பிற மந்திரவாதிகள்—‘இல்முல் ஃகைப்’ மறைவான விஷயங்களைப் பற்றி கூறுவதில் ஈடுபட்டு, முஸ்லிம்களைக் குழப்பத்தில் ஆழ்த்துபவர்கள்—ஆகியோரிடம் சென்று விளக்கம் கேட்பதிலிருந்து விலகி எச்சரிக்கையாக இருப்பது மீது முஸ்லிம்கள் மீது கட்டாயமாகும். அது மருத்துவம் என்ற பெயரிலோ அல்லது வேறொன்றின் பெயரிலோ இருந்தாலும் சரியே. ஏனெனில் இதனை நபி ஸல்லல்லாஹு அலைஹிவஸல்லம் அவர்கள் தடைசெய்ததோடு, அதிலிருந்து எச்சரித்தும் உள்ளார்கள். சிலர்  மருத்துவம் என்ற பெயரில், மறைவான விடயங்களில் சில தமக்குத் தெரியுமென வாதிடுவது இதில் உள்ளடங்கும் உதாரணமாக. ஒரு ஆண் நோயாளியின் தலைப்பாகை அல்லது பெண் நோயாளியின் முகத்திரையை அல்லது அதற்கு இணையானவற்றை நுகர்ந்து விட்டு, 'இந்த  ஆண் அல்லது பெண் நோயாளி இதைச் செய்தார், இதை உருவாக்கினார்' என்று கூறுவார்கள். இவை மறைவான விடயங்கள் ஆகும், நோயாளியின் தலைப்பாகையில்; அல்லது அதற்கு இணையானவற்றில் இதற்கான எந்த ஆதாரமும் இல்லை. பொதுமக்களை குழப்பி, 'இவர் மருத்துவத்தில் நிபுணர், நோய்களின் வகைகள் மற்றும் அவற்றின் காரணங்களை அறிந்தவர்' என்று சொல்ல வைப்பதே இதன் நோக்கமாகும். சில நேரங்களில், அவர்கள் கொடுத்த மருந்துகளால் அல்லாஹ்வின் விதியின் அடிப்படையில் நிவாரணம் கிடைக்கும், இவ்வாறான சந்தர்பங்களில் அவர்கள் தங்கள் மருந்தின் காரணமாகவே குறித்த நபர் குணமடைந்ததாக எண்ணுவார்கள். தனக்கும் வைத்தியம் தெரியும் என்று வாதிடும் ஒருவருக்கு சேவகம் செய்யும் சில ஜின்கள் மற்றும், ஷைத்தான்களின் காரணமாகவும் நோய்கள் ஏற்பட வாய்பபிருக்கிறது. அவர்கள் அறிந்து வைத்துள்ள மறைவானவற்றில் சிலவற்றை அவருக்கு தெரிவிக்கின்றனர். அதனை அவர் நம்பி, அதற்காக ஜின்களையும், ஷைத்தான்களையும் தங்களுக்கு ஏற்ற வழிபாடுகளால் திருப்திப்படுத்துகிறார். இதனால் அவர்கள் அந்த நோயாளியிடமிருந்து விலகி, அவர்களால் ஏற்படுத்தப்பட்ட தீங்குகளை விட்டு விடுகின்றனர்.இவை ஜின்கள் மற்றும் ஷைத்தான்களிடமிருந்தும் அவர்களை பயன்படுத்துபவர்களிடமிருந்தும் பரவலாக அறியப்பட்ட ஒரு விடயமாகும்.

மேலும், அதிலிருந்து விலகி எச்சரிக்கையாக இருப்பதும், அதை புறக்கணிக்கும் படி ஒருவரையொருவர் அறிவுறுத்துவதும், அல்லாஹ்வை சார்ந்திருத்தலும், எல்லா காரியங்களிலும் அவன் மீது மாத்திரம் தவக்குல் கொள்வதும் முஸ்லிம்கள் மீது கடமை ஆகும். மேலும் ஷரீஆவில் இடம்பெற்றிருக்கும் ஓதிப்பார்ப்புகளையும் அனுமதிக்கப்பட்ட மருந்துகளையும் பயன்படுத்துவதில் எவ்விதப் பிரச்சினையும் இல்லை; நோயாளியைச் சோதனை செய்து புலன் மற்றும் அறிவு சார்ந்த வழிமுறைகள் மூலம், அவரது நோயை உறுதிப்படுத்தும் மருத்துவர்களிடம் சிகிச்சை பெறுவதும் (அனுமதிக்கப்பட்டதே). ஆதாரப்பூர்வமான ஹதீஸில் நபி (ஸல்) அவர்கள் இவ்வாறு கூறியுள்ளார்கள்: எந்தவொரு நோயையும் அதற்குரிய நிவாரணி இல்லாமல் அல்லாஹ் இறக்கியதில்லை. அதனை அறிந்தவர் அறிந்து கொண்டார், அறியாதவர் அறியாதிருக்கின்றார்". மேலும் கூறினார்கள்: ஒவ்வொரு நோயுக்கும் ஒரு மருந்து உண்டு; அந்த மருந்து அந்த நோய்க்குச் சரியாகப் பொருந்தினால், அது அல்லாஹ்வின் அனுமதியால் குணமடையும். மேலும் கூறினார்கள்: 'அல்லாஹ்வின் அடியார்களே! சிகிச்சை செய்யுங்கள்; ஆனால் தடுக்கப்பட்டதைக் கொண்டு சிகிச்சை செய்யாதீர்'. இதே அர்த்தத்தில் அதிகமான ஹதீஸ்கள் இடம்பெற்றுள்ளன.

உயர்ந்தோனாகிய அல்லாஹ்விடம் அனைத்து முஸ்லிம்களின் நிலைகளைச் சீர்செய்யுமாறும், அவர்களின் இதயங்களையும் உடல்களையும் எல்லா தீமைகளிலிருந்தும் குணப்படுத்துமாறும், அவர்களை நேர்வழியின் மீது ஒன்றிணைக்குமாறும், எம்மையும் அவர்களையும் அனைத்துவிதமான குழப்பங்களிலிருந்தும், சைத்தானுக்கும் அவனுடைய கூட்டாளிகளுக்கும் கீழ்ப்படிதலிலிருந்தும் காத்தருளுமாறும் பிரார்த்திக்கின்றோம். நிச்சயமாக அவன் அனைத்திலும் வல்லவன்; உயர்ந்தும் மகத்தானுமாகிய அல்லாஹ்வினாலன்றி ஆற்றலும் சக்தியும் இல்லை.

அல்லாஹ்வின் ஸலாத்தும், ஸலாமும், பரிபூரண ஆசீர்வாதமும் எங்கள் நபியும் அல்லாஹ்வின் அடியாரும் தூதருமாகிய முஹம்மத் ஸல்லல்லாஹு அலைஹிவஸல்லம் அவர்கள் மீதும், அவர்களின் குடும்பத்தார் மற்றும் தோழர்கள் அனைவர் மீதிலும் உண்டாவதாக.

நான்காவது கடிதம் :

பித்அத் மற்றும் இணைவைப்புச் சார்ந்த விர்துகளை (ஓதல்களை) வணக்கமாக நிறைவேற்றுவது பற்றிய மார்க்கத் தீர்ப்பு

மதிப்புக்குரிய சகோதரர் .. (வஃப்பகஹுல்லாஹு லிகுல்லி கைர், ஆமீன்.) க்கு அப்துல் அஸீஸ் இப்னு அப்தில்லாஹ் இப்னு பாஸ் எழுதிக் கொள்வது

அஸ்ஸலாமு அலைக்கும் வரஹ்மதுல்லாஹி வபரகாதுஹு. (உங்கள் மீது சாந்தி உண்டவதாக மேலும் அல்லாஹ்வின் அருளும் பரகத்தும் உண்டாவதாக).

உங்களின் கௌரவமான கடிதம் எனக்குக் கிடைத்தது. அல்லாஹ் உங்களுக்கு அவனின் நேரான பாதையை அடையச்செய்வானாக. உங்களின் கடிதத்தில் நீங்கள் குறிப்பிட்ட விடயம் யாதெனில் உங்கள் நாட்டில் சிலர் அல்லாஹ் இறக்கியருளாத சில அவ்ராத்களை கடைப்பிடித்து வருகின்றனர். அவற்றில் சில பித்அத் ஆகவும், சில ஷிர்க் ஆகவும் உள்ளன. மேலும் அவற்றை அமீர் அல் முஃமினீன் அலி இப்னு அபி தாலிப் (ரழியல்லாஹு அன்ஹு) அவர்களும் வேறு பலரும் ஓதியதாகக் கூறுகின்றனர். அவர்கள் அந்த அவ்வராதுகளை திக்ர் மஜ்லிஸ்களிலும் அல்லது பள்ளிவாசல்களில் மஃக்ரிப் தொழுகைக்குப் பிறகும் ஓதுகின்றனர், அவை அல்லாஹ்வுக்காக செய்யப்படும் வணக்கம் என்று நம்புகின்றனர். உதாரணமாக, 'பிஹக்கில்லாஹ்', 'ரிஜாலல்லாஹ்', 'அஈனூனா பிஅவ்னில்லாஹ்', 'வகூனூ அவ்னனா பில்லாஹ்'. என்றெல்லாம் அவர்கள் பிரார்த்திக்கின்றனர். அதே போல: ‘‘ஓ அஃப்தாபுகளே, ஓ தலைவர்களே, எங்களுக்கு உதவி செய்பவர்களே! எமக்கு பதில் அளியுங்கள்! அல்லாஹ்விடம் பரிந்துரை செய்யுங்கள்! இவன் உங்கள் அடிமை, உங்கள் கதவின் முன் நிற்கின்றான், தன் குறைகளைப் பற்றி பயப்படுகின்றான், எங்களை இரட்சித்துப் பாதுகாத்துவிடுங்கள்! ஓ இறைதூதரே, உங்களைவிட்டு வேறு எவரும் இல்லை, உங்களிடமிருந்து தான் எங்கள் வேண்டுதல் நிறைவேறும், நீங்கள் அல்லாஹ்வின் மக்கள், தலைசிறந்த ஷஹீதாகிய ஹம்ஸாவை முன்நிறுத்திக் கேட்கின்றோம், எங்களுக்கு உதவியாக இருப்பவர்களே, எங்களை உதவுங்கள், ஓ இறைதூதரே." என்றும் கூறுகின்றனர் மேலும், "யா அல்லாஹ்! யாரை உன் இறை ரகசியங்கள் வெளிப்படவும், உனது அருள் ஜோதிகள் வெளிப்படவும் காரணமாக வைத்தாயோ அவரின் மீது அருள் புரிவாயாக! அவர் இறைவனின் சந்நிதியில் பிரதிநிதியாகவும், உனது தனிப்பட்ட ரகசியங்களின் கலீபாவாகவும் ஆகிவிட்டார்." என்றும் பிரார்த்திக்கின்றனர்.

இவற்றில் பித்அம் என்ன, ஷிர்க் என்ன என்பதை விளங்கிக்கொள்ளவும், மேலும், இந்த துஆவைச் சொல்லும் இமாமின் பின்னால் தொழலாமா என்பதை விளங்கிக்கொள்ளவும் நீங்கள் விரும்புகின்றீர்கள்.

பதில்: எல்லாப் புகழும் அல்லாஹ் ஒருவனுக்கே உரியது, ஸலாத்தும் ஸலாமும் இறுதி நபி (ஸல்) அவர்கள் மீதும், அவர்களின் குடும்பத்தார், தோழர்கள் மீதும், மேலும் அவர்களின் வழிகாட்டுதலைப் பின்பற்றி மறுமை வரை நேர்வழியில் நடப்போர் மீதும் உண்டாவதாக.

அறிந்துகொள் — அல்லாஹ் உனக்கு அருள் புரியட்டும் — அல்லாஹ் படைப்புகளைப் படைத்ததும், தூதர்களை அனுப்பியதுமாகியதின் நோக்கம், அல்லாஹ்வைத் தவிர அனைத்தையும் விட்டு, இணையே இல்லாத அவன் மாத்திரம் வணங்கப்படுவதற்காகவே! அல்லாஹ் கூறுகின்றான்: ஜின்களையும் மனிதர்களையும் - அவர்கள் என்னை வணங்குவதற்கே தவிர - நான் படைக்கவில்லை. (அத்தாரியாத் :56)

இபாதத் என்பது: — முன்னதாக விளக்கப்பட்டதுபோல் — அல்லாஹ் تعالى விற்கு கீழ்ப்படிதலும், அவன் தூதர் முஹம்மது ﷺ அவர்களுக்கு கீழ்ப்படிதலும் ஆகும்; அதாவது, அல்லாஹும் அவன் தூதரும் கட்டளையிட்டதைச் செய்தலும், அல்லாஹும் அவன் தூதரும் தடை செய்ததை விட்டொழித்தலும்; இதனை அல்லாஹ் மற்றும் அவன் தூதரிடம் ஈமான் கொண்டு, செயலில் அல்லாஹ்வுக்கே சுத்தமான நோக்கத்துடன், அல்லாஹ்வுக்கான மிக உயர்ந்த அன்புடன், அவனைத் தவிர வேறொருவருக்கும் அல்லாமல் அவனுக்கே முழுமையான தாழ்ப்பும் அடக்கமும் செலுத்துவதோடு மேற்கொள்ளுதல்; அல்லாஹ் تعالى கூறியதுபோல்: மேலும், (நபியே!) உம் இறைவன் (உமக்கும் உமது சமுதாயத்திற்கும்) கட்டளையிடுகிறான்: “அவனைத் தவிர (யாரையும்) நீங்கள் வணங்காதீர்கள்..." என (அல் இஸ்ராஉ 23) அதாவது, அவனை மட்டுமே வணங்குமாறு கட்டளையிட்டு, அறிவுறுத்துகின்றான் மேலும் அல்லாஹ் கூறுகின்றான்: புகழ் (அனைத்தும்) அகிலத்தார்களின் இறைவன் அல்லாஹ்விற்கே உரியது! (அவன்,) பேரருளாளன் பேரன்பாளான்; கூலி (கொடுக்கப்படும் தீர்ப்பு) நாளின் அதிபதி! (அல்லாஹ்வே!) உன்னையே வணங்குகிறோம். இன்னும் உன்னிடமே உதவி தேடுகிறோம். (அல்பாதிஹா : 2 - 5), இந்த வசனங்களின் மூலம் அல்லாஹ் ஸுப்ஹானஹூ வதஆலா, தான் ஒருவன் மாத்திரமே வணங்கப்படுவதற்குத் தகுதியானவன், தன்னிடமே உதவி தேடப்பட வேண்டும் என தெளிவுபடுத்துகின்றான். மேலும் அவன் கூறுகின்றான்: "நிச்சயமாக நாம் இந்த வேதத்தை உண்மையுடன் உமக்கு இறக்கினோம். ஆகவே, அல்லாஹ்வை - தீனை (வணக்க வழிபாடுகளை) அவனுக்கு முற்றிலும் தூய்மைப்படுத்தியவராக - வணங்குவீராக!" அறிந்து கொள்ளுங்கள்! பரிசுத்தமான வணக்க வழிபாடுகள் எல்லாம் அல்லாஹ்விற்கே உரியன. (அஸ்ஸுமர் : 2-3), மேலும் அல்லாஹ் கூறுகின்றான்: ஆகவே, அல்லாஹ்வை - அவனுக்கு மார்க்கத்தை (-வழிபாடுகளை) பரிசுத்தமாக்கியவர்களாக - அழையுங்கள்! (இணைவைக்கின்ற) நிராகரிப்பாளர்கள் (அதை) வெறுத்தாலும் சரியே! (ஹாபிர் : 14), மேலும் அல்லாஹ் கூறுகின்றான்: இன்னும் நிச்சயமாக மஸ்ஜிதுகள் அல்லாஹ்விற்கு உரியன. ஆகவே, அல்லாஹ்வுடன் வேறு ஒருவரை வணங்காதீர்கள்! (அல்ஜின் : 18), இதே கருத்தில் அதிகமான திரு வசனங்கள் வந்துள்ளன, அவை அனைத்தும் அல்லாஹ்வுக்கு மாத்திரமே வணக்கத்தை செலுத்துவதன் அவசியத்தை அறிவிக்கின்றன.

அனைத்து வகையான பிரார்த்தனைகளும் வணக்கமாகும் என்பது தெரிந்ததே. எனவே, யாரும் தமது இறைவனைத் தவிர வேறொருவரிடம் பிரார்த்திக்கக் கூடாது, உதவி கேட்கக் கூடாது, இரட்சிக்குமாறு வேண்டக்கூடாது. இதனை இந்தப் புனித வசனங்களும் அவற்றின் பொருளில் வந்த வேறு வசனங்களும் கூறுகின்றன. இது, அவ்விடத்தில் உள்ள, உயிருள்ள மனிதர்களால் செய்யமுடியுமான புலன் காரணிகள் மற்றும் சாதாரண விடயங்கள் அல்லாதவை தொடர்பான சட்டமாகும். அவை வணக்கமாகக் கருதப்படுவதில்லை. மாறாக, அல்குர்ஆன் ஸுன்னா மற்றும் இஜ்மாவின் அடிப்படையில், ஒரு மனிதன், சக்தியுள்ள, உயிருள்ள மனிதனைக்கொண்டு, அவனால் முடியுமான சாதாரண விடயங்களில் உதவி நாடலாம். உதாரணமாக, தனது பிள்ளை, வேலைக்காரர் அல்லது நாய் போன்றவற்றின் தீமையைத் தடுக்க ஒருவரிடம் உதவி தேடல் அல்லது பாதுகாப்புத் தேடல். அதேபோன்று, ஒரு மனிதன், உயிரோடுள்ள, சக்தியுள்ள, அருகாமையில் உள்ள ஒரு மனிதனைக்கொண்டோ, அல்லது தொலைவில் உள்ள ஒருவரிடம் கடிதம் போன்ற வெளிப்படையான காரணிகள் கொண்டோ தனது வீட்டை கட்டுவதற்கோ, வாகனத்தை சீரமைப்பதற்கோ, அல்லது அதற்கு ஒத்த விடயங்களில் உதவி தேடுவது. ஜிஹாத் மற்றும் போர் போன்றவற்றில் மனிதன் தனது தோழர்களிடம் உதவி தேடுவதும் அவ்வாறான ஒன்றாகும். மூஸா (அலை) அவர்களின் சம்பவத்தில் பின்வரும் அல்லாஹ்வின் கூற்றும் இவ்வாறான ஒன்றாகும்: "இவருடைய பிரிவைச் சேர்ந்தவன் தனது எதிரிகளில் உள்ளவனுக்கு எதிராக அவரிடம் உதவி கேட்டான்." (கஸஸ் : 15).

மரணித்தோரிடம், ஜின்களிடம், மலக்குகளிடம், மரங்களிடம், கற்களிடம் பாதுகாப்பு தேடுவது பெரிய இணைவைப்பாகும், இது முதல் கால இணைவைப்பாளர்கள் தங்கள் தெய்வங்களான உஸ்ஸா, லாத்து மற்றும் பிறருடன் செய்த செயல்களை ஒத்ததாகும். அதேபோல, நோயாளிகளை குணப்படுத்துதல், இதயங்களை நேர்வழிப்படுத்தல், சுவர்க்கத்தில் நுழைதல், நரகத்திலிருந்து பாதுகாத்தல் போன்ற அல்லாஹ்வால் மாத்திரம் முடியுமான விடயங்களில், இறைநேசர்கள் என தாம் நினைக்கும் உயிருடன் இருப்பவர்களிடம் பாதுகாப்பு தேடுவதும், உதவி கேட்பதும் கூட அதே வகையைச் சார்ந்ததாகும்.

முன்னர் குறிப்பிடப்பட்ட வசனங்களும் அவற்றின் பொருளில் உள்ள ஏனைய வசனங்களும் ஹதீஸ்களும் அனைத்தும் அனைத்து விஷயங்களிலும் அல்லாஹ்வை நோக்கி உள்ளங்களை திருப்புவதன் அவசியத்தையும், அல்லாஹ்வுக்கு மாத்திரமே தூய்மையாக வணக்கத்தை செலுத்துவதன் அவசியத்தையும் வலியுறுத்துகின்றன. ஏனெனில் அடியார்கள் இதற்காகவே படைக்கப்பட்டுள்ளார்கள். இதைக் கொண்டே ஏவப்பட்டுள்ளார்கள் முன்னர் கூறிய வசனங்களும், பின்வரும் வசனங்களும் அதையே அறிவிக்கின்றன: "இன்னும், அல்லாஹ்வை வணங்குங்கள்; இன்னும், அவனுக்கு எதையும் இணைவைத்து வணங்காதீர்கள்..." ( அந்நிஸா : 36) மேலும் அல்லாஹ் கூறுகிறான்: "அவர்கள் வழிபாட்டை அவனுக்கு மட்டும் தூய்மைப்படுத்தியவர்களாக அல்லாஹ்வை வணங்குமாறே தவிர அவர்கள் ஏவப்படவில்லை (அல் பய்யினா :5) முஆத் (ரலி) அவர்களின் ஹதீஸில் நபி (ஸல்) அவர்கள் கூறுகின்றார்கள் : "அல்லாஹ்வுக்கு அடியார்கள் செய்ய வேண்டிய கடமை, அவனை உரிய முறையில் வணங்குவதும் அவனுக்கு எதனையும் இணைவைக்காது இருப்பதுமாகும்." ஆதாரம் : புகாரி, முஸ்லிம் நபி ஸல்லல்லாஹு அலைஹிவஸல்லம் அவர்கள் கூறியதாக, இப்னு மஸ்ஊத் ரழியல்லாஹு அன்ஹு அவர்கள் அறிவிக்கின்றார்கள்: "அல்லாஹ்வுக்கு நிகராக வேறொருவரை அழைக்கும் நிலையில் மரணித்தவர் நரகில் நுழைவார்." (ஆதாரம் : புஹாரி). புகாரி மற்றும் முஸ்லிமின் அறிவிப்பில், இப்னு அப்பாஸ் ரலியல்லாஹு அன்ஹுமா அவர்கள் அறிவிக்கின்றார்கள்: நபி ஸல்லல்லாஹு அலைஹி வஸல்லம் அவர்கள் முஆத் ரலியல்லாஹு அன்ஹு அவர்களை யமன் நாட்டிற்கு அனுப்பிய போது அவர்களிடம் பின்வருமாறு கூறினார்கள் : "நீர் வேதக்காரர்கள் இருக்கும் சமூகத்திற்குச் செல்கின்றீர். நீர் முதலில் அழைப்பது 'உண்மையாக வணங்கப்படத் தகுதியானவன் அல்லாஹ்வைத் தவிர வேறு யாருமில்லை' எனும் சாட்சியமாக இருக்கட்டும்." இன்னொரு அறிவிப்பில்: அவர்களை 'உண்மையாக வணங்கப்படத் தகுதியானவன் அல்லாஹ்வைத் தவிர வேறு யாருமில்லை என்றும், நான் அல்லாஹ்வின் தூதன் என்றும்' என்று சாட்சியமளிக்குமாறு அழையுங்கள். புஹாரியின் அறிவிப்பில் நீர் முதலில் அழைப்பு விடுக்கும் விடயம், அவர்கள் அல்லாஹ்வை மாத்திரம் வணங்கவேண்டும் என்பதாக இருக்கட்டும். முஸ்லிமின் அறிவிப்பில், நபி ஸல்லல்லாஹு அலைஹிவஸல்லம் அவர்கள் கூறியதாக தாரிக் இப்னு அஷ்யம் அல்அஷ்ஜஈ ரழியல்லாஹு அன்ஹு அவர்கள் அறிவிக்கிறார்கள்: 'அல்லாஹ்வைத் தவிர வேறு இறைவன் இல்லை (லாஇலாஹ இல்லல்லாஹ்) என்று யார் (உறுதிமொழி) கூறி, (மக்களால்) வழிபாடு செய்யப்படும் இதர தெய்வங்களை நிராகரித்து விடுகிறாரோ அவரது உடைமையும் உயிரும் பாதுகாப்புப் பெற்றுவிடும். அவரது (அந்தரங்கம் குறித்த) விசாரணை அல்லாஹ் (ஜல்ல ஜலாலுஹு) அவரின் பொறுப்பில் உள்ளது'. இதே அர்த்தத்தில் அதிகமான ஹதீஸ்கள் இடம்பெற்றுள்ளன.

ஓரிறைக்கொள்கைதான் இஸ்லாமிய மார்க்கத்தின் அடிப்படை; அதுவே இந்த மார்க்கத்தின் அடித்தளமும் தலையாய காரியமும், மார்க்கக் கடமைகளில் மிக முக்கியமானதும் ஆகும். ஜின்னும் மனிதரும் அதற்காகவே படைக்கப்பட்டனர்; அனைத்து தூதர்களும் அதற்காகவே அனுப்பப்பட்டனர். இதனைச் சுட்டிக்காட்டும் வசனங்கள் முன்பே வந்துள்ளன. உதாரணமாக, ஜின்களையும் மனிதர்களையும் - அவர்கள் என்னை வணங்குவதற்கே தவிர - நான் படைக்கவில்லை. (அத்ஸாரியாத் : 56). பின்வரும் வசனமும் அதற்கான ஒரு ஆதாரமாகும்: “அல்லாஹ்வை வணங்குங்கள்; இன்னும், ஷைத்தானை விட்டும் விலகுங்கள்” என்று (போதிப்பதற்காக) ஒவ்வொரு சமுதாயத்திலும் திட்டவட்டமாக ஒரு தூதரை அனுப்பினோம்... (அந்நஹ்லு : 36) மேலும் அல்லாஹ் தஆலா கூறுகின்றான் : “நிச்சயமாக விஷயமாவது, என்னைத் தவிர (உண்மையில் வணங்கத்தகுதியான) இறைவன் அறவே இல்லை. ஆகவே, என்னையே வணங்குங்கள்.” என்று நாம் வஹ்யி அறிவித்தே தவிர உமக்கு முன்னர் எந்த ஒரு தூதரையும் நாம் அனுப்பவில்லை. (அல் அன்பியா :25) நூஹ் (அலை), ஹூத் (அலை), சாலிஹ் (அலை), ஷுஐப் (அலை) தமது சமூகத்திற்குக் கூறியதாக அல்லாஹ் (ஜல்ல ஜலாலுஹு) கூறுகின்றான் : "அல்லாஹ்வை வணங்குங்கள். அவனை அன்றி (உண்மையில் வணங்கத்தகுதியான) இறைவன் யாரும் உங்களுக்கில்லை." (அல்அஃராப் : 59), இதுவே தூதர்கள் அனைவரினதும் அழைப்பாகும்; முன்னர் வந்த இரு வசனங்களும் இதை உறுதிப்படுத்துகின்றன. மேலும், தூதர்களின் பகைவர்கள்கூட, தூதர்கள் அவர்களை அல்லாஹ்வை ஒரிறைவனாக ஏற்று வழிப்படுமாறு கட்டளையிட்டதாகவும், அவனல்லாது வணங்கப்படும் தெய்வங்களை புறக்கணிக்குமாறு கூறியதாகவும் ஒப்புக்கொண்டனர். ஆத் கூட்டத்தின் சம்பவத்தில், அவர்கள் ஹூத் (அலைஹிஸ்ஸலாம்) அவர்களிடம் இவ்வாறு கூறியதாக அல்லாஹ் கூறுகின்றான்: ...நாங்கள் அல்லாஹ் ஒருவனை மட்டும் வணங்குவதற்காகவும் எங்கள் மூதாதைகள் வணங்கிக் கொண்டிருந்தவற்றை நாங்கள் விட்டுவிடுவதற்காகவும் நீர் எங்களிடம் வந்தீரா?... (அல்அஃராப் : 70) எங்கள் நபி முஹம்மது (ஸல்) அவர்கள், குரைசியர்களிடம், அவர்களை அல்லாஹ்வை மட்டுமே வணங்கி வழிபடுமாறும், அவனைத் தவிர அவர்கள் வணங்கிவரும் மலக்குகள், நேசர்கள், சிலைகள், மரங்கள் மற்றும் பிறவற்றை கைவிடுமாறும் அழைத்தபோது, குரைசியர் இவ்வாறு கூறியதாக அல்லாஹ் தஆலா கூறுகிறான்: (இன்னும் அவர்கள் கூறினார்கள்:) “இவர் தெய்வங்களை (எல்லாம்) ஒரே ஒரு தெய்வமாக மாற்றிவிட்டாரா? நிச்சயமாக இது ஒரு ஆச்சரியமான விஷயம்தான்.” (ஸாத்: 05), மேலும் அவர்களை குறித்து அல்லாஹ் பின்வருமாறு கூறுகிறான்: “அல்லாஹ்வைத் தவிர (உண்மையில் வணங்கத்தகுதியான) இறைவன் அறவே இல்லை” என்று அவர்களுக்கு கூறப்பட்டால் நிச்சயமாக அவர்கள் (அதை ஏற்றுக் கொள்ளாமல்) பெருமை அடி(த்து புறக்கணி)ப்பவர்களாக இருந்தனர். இன்னும், “பைத்தியக்காரரான ஒரு கவிஞருக்காக எங்கள் தெய்வங்களை நிச்சயமாக நாங்கள் விட்டுவிடுவோமா?” என்று அவர்கள் கூறுகிறார்கள். (அஸ்ஸாஃப்ஃபாத் : 35-36) இக்கருத்தை உணர்த்தும் திரு வசனங்கள் அதிகம் காணப்படுகின்றன.

- அல்லாஹ் எனக்கும், உங்களுக்கும் மார்க்கத்தில் விளக்கத்தையும், அகிலத்தாரின் இரட்சகனின் உரிமைகள் பற்றிய விளக்கத்தையும் தருவானாக - நாம் மேலே குறிப்பிட்டுள்ள வசனங்கள் மற்றும் ஹதீஸ்கள் அடிப்படையில், உங்களது கேள்வியில் தெளிவுபடுத்திய துஆக்கள் மற்றும் பாதுகாப்புத் தேடல் வகைகள் அனைத்துமே பெரிய இணைவைப்பின் வகைகள் என்பது உமக்குத் தெளிவாகின்றது. ஏனெனில், இது அல்லாஹ் அல்லாதவரை வழிபடுவதும், அல்லாஹ்வைத் தவிர, மறைவானவர்கள், மரணித்தவர்கள் போன்றோரால் முடியாத விடயங்களைக் கேட்பதுமாகும். இது முன்னோரின் இணைவைப்பை விட மோசமானதாகும். ஏனெனில், முன்னையவர்கள் செழிப்பாக இருக்கும் நிலையிலேயே இணைவைத்தார்கள். ஆனால் கடினமான சூழ்நிலையில், அவர்கள் அல்லாஹ்வுக்கே வணக்கங்களை தூய்மையாக செலுத்துவார்கள்; ஏனெனில் நிச்சயமாக அவனே அவர்களை இக்கடினத்திலிருந்து விடுவிக்க வல்லவன், வேறு யாருமல்ல என்பதை அவர்கள் அறிந்தே இருந்தார்கள். அல்லாஹ் தனது தெளிவான அல்குர்ஆனில் அந்த இணைவைப்பாளர்களைப் பற்றி இவ்வாறு கூறுகின்றான்: "ஆக, அவர்கள் கப்பலில் பயணித்தால் அல்லாஹ்வை - அவனுக்கு மட்டும் வணக்க வழிபாட்டை தூய்மைப்படுத்தியவர்களாக - அழைக்கிறார்கள். ஆக, அவன் அவர்களை கரைக்கு காப்பாற்றிக் கொண்டு வந்தால் அப்போது அவர்கள் (அவனுக்கு சிலைகளை) இணையாக்குகிறார்கள். (அல் அன்கபூத் : 65) மற்றொரு வசனத்தில் அவர்களை நோக்கி அல்லாஹ் பின்வருமாறு கூறுகிறான்: இன்னும், கடலில் உங்களுக்கு துன்பம் ஏற்பட்டால், அவனைத் தவிர நீங்கள் பிரார்த்தித்தவை (அனைத்தும் உங்கள் எண்ணங்களை விட்டு) மறைந்து விடுகின்றன. அவன் உங்களை பாதுகாத்(து கரையில் சேர்ப்பித்)தபோது (அவனை) புறக்கணிக்கிறீர்கள். மனிதன் மகா நன்றி கெட்டவனாக இருக்கிறான். (அல்இஸ்ராஃ : 67).

இந்த பின்வந்த இணைவைப்பவர்களில் யாரேனும், 'நாம், அவர்கள் தாமாகவே எமக்கு பயன் அளிக்கவோ, எமது நோய்களை குணமாக்கவோ, தாமாகவே எமக்கு நன்மை செய்யவோ, தீமை செய்யவோ செய்கின்றார்கள் என்று நாடவில்லை. மாறாக, அவர்கள் அதுபற்றி அல்லாஹ்விடம் பரிந்துரை செய்வதையே நாடுகிறோம்" என்று கூறினால்,

அதற்கான பதிலாக அவர்களிடம் இவ்வாறு கூறப்பட வேண்டும்: 'இதுவே முதற்கால நிராகரிப்பாளர்களின் நோக்கமும் விருப்பமுமாகும்; தமது கடவுள்கள் படைக்கும், வாழ்வாதாரம் வழங்கும், அல்லது தாமாகவே பலன் அளிக்கவோ தீங்கு இழைக்கவோ செய்யும் என்று அவர்கள் நாடவில்லை. அக்கருத்தை, அல்லாஹ் அவர்களைப் பற்றிக் குர்ஆனில் கூறியுள்ள அம்சங்கள் பொய்ப்படுத்துகிறன. அவர்கள் நாடியது அவற்றின் பரிந்துரையையும், செல்வாக்கையும், மேலும் அவை அவர்களை அல்லாஹ்விடம் நெருக்கி வைப்பதையும் ஆகும். அல்லாஹ் கூறுகின்றான்: எது அவர்களுக்கு தீங்கிழைக்காதோ; இன்னும், அவர்களுக்கு பலனளிக்காதோ அதைத்தான் அவர்கள் அல்லாஹ்வை அன்றி வணங்குகிறார்கள். இன்னும், “இவை அல்லாஹ்விடம் எங்களுடைய பரிந்துரையாளர்கள்” என்று கூறுகிறார்கள்... ( யூனுஸ் : 18) அல்லாஹ் அவர்களின் இக்கூற்றுக்கு பின்வருமாறு பதிலளிக்கிறான்: “வானங்களிலும் பூமியிலும் அல்லாஹ்விற்கு அவன் அறியாதவற்றை நீங்கள் அறிவிக்கிறீர்களா? அவன் மிகப் பரிசுத்தமானவன்; இன்னும், அவர்கள் இணைவைப்பவற்றை விட்டு அவன் (தகுதியால்) மிக உயர்ந்தவனாக இருக்கிறான்” ( யூனுஸ் : 18) ஆகவே, அல்லாஹ், இணை வைப்பவர்கள் நோக்குவதுபோல, அவனிடம் பரிந்துரையாளர் என வானத்திலோ, பூமியிலோ எவரும் இருப்பதாக அவன் அறியவில்லை எனத் தெளிவுபடுத்துகின்றான். ஒன்று இருப்பதாக அல்லாஹ் அறியவில்லை என்றால், அதற்கு இருப்பே கிடையாது; ஏனெனில் வானத்திலோ, பூமியிலோ (உள்ள) எதுவும் அவனுக்கு மறைந்ததல்ல. மேலும் அல்லாஹ் கூறுகின்றான்: ஸாத்! அறிவுரைகள் நிறைந்த அல்குர்ஆன் மீது சத்தியமாக! நிச்சயமாக நாம் இந்த வேதத்தை உண்மையுடன் உமக்கு இறக்கினோம். ஆகவே, அல்லாஹ்வை வணங்குவீராக, வணக்க வழிபாடுகளை - தீனை அவனுக்கு முற்றிலும் தூய்மைப்படுத்தியவராக. அறிந்து கொள்ளுங்கள்! பரிசுத்தமான வணக்க வழிபாடுகள் எல்லாம் அல்லாஹ்விற்கே உரியன. அவனை அன்றி (பல) தெய்வங்களை (தங்களுக்கு) எடுத்துக் கொண்டவர்கள், “நாங்கள் அவர்களை வணங்குவதில்லை, அல்லாஹ்வின் பக்கம் அந்தஸ்தால் எங்களை அவர்கள் நெருக்கமாக்குவதற்காகவே தவிர.” என்று கூறுகிறார்கள். நிச்சயமாக அல்லாஹ் அவர்களுக்கு மத்தியில் அவர்கள் கருத்து வேறுபாடு செய்கின்றவற்றில் தீர்ப்பளிப்பான். பொய்யர்களை நிராகரிப்பாளர்களை நிச்சயமாக அல்லாஹ் நேர்வழி செலுத்தமாட்டான். (அஸ்ஸுமர் : 1-3)

இங்கு தீன் என்பதன் பொருள்: இபாதத் (வணக்க வழிபாடு) ஆகும். அது — முன்னதாகக் கூறியபடி — அல்லாஹ்வுக்கும் அவனது தூதர் ﷺ-க்கும் கட்டுப்படுதல் ஆகும். இதற்குள், துஆ, பாதுகாப்புக் கேட்டல், அச்சம், எதிர்பார்ப்பு, அறுத்தல், நேர்ச்சை ஆகிய அனைத்தும் உள்ளடங்கும். மேலும், தொழுகை, நோன்பு உட்பட, அல்லாஹ்வும் அவனது தூதரும் ஏவிய அனைத்தும் உள்ளடங்கும். எனவே, அல்லாஹ், வணக்கவழிபாடு அவனுக்கே மாத்திரம் உரியது எனவும், அடியார்கள் அதனை அவனுக்கே இதய சுத்தியுடன் செய்ய வேண்டும் எனவும் தெளிவுபடுத்துகின்றான். ஏனெனில் வணக்கத்தை அவனுக்கே இதய சுத்தியுடன் செய்யுமாறு நபி ஸல்லலல்லாஹு அலைஹிவஸல்லம் அவர்களுக்கு அளிக்கப்பட்ட அவனது கட்டளை, இந்த உம்மத்தினருக்கெல்லாம் வழங்கப்பட்ட பொதுக் கட்டளையாகும்.

பின்னர் அல்லாஹ் அல்குர்ஆனில் காபிர்கள் பற்றிக் கூறுகின்றான்: அவனை அன்றி (பல) தெய்வங்களை (தங்களுக்கு) எடுத்துக் கொண்டவர்கள், “நாங்கள் அவர்களை வணங்குவதில்லை, அல்லாஹ்வின் பக்கம் அந்தஸ்தால் எங்களை அவர்கள் நெருக்கமாக்குவதற்காகவே தவிர.” என்று கூறுகிறார்கள். (அஸ்ஸுமர் : 3). அல்லாஹ் பின்வருமாறு அவர்களுக்கு பதிலளிக்கிறான்: நிச்சயமாக அல்லாஹ் அவர்களுக்கு மத்தியில் அவர்கள் கருத்து வேறுபாடு செய்கின்றவற்றில் தீர்ப்பளிப்பான். பொய்யர்களை நிராகரிப்பாளர்களை நிச்சயமாக அல்லாஹ் நேர்வழி செலுத்தமாட்டான். (அஸ்ஸுமர் : 3), அல்லாஹ் இந்த வசனத்தின் மூலம், இறைநிராகரிப்பாளர்கள், அவனையன்றி பாதுகாவலர்களை, தம்மை அல்லாஹ்விடம் மிகவும் நெருக்கத்தை ஏற்படுத்திவைப்பதற்காகத்தவிர வணங்கியதில்லை என்று அறிவிக்கின்றான். இதுவே பழங்காலத்திலும் இக்காலத்திலும் இறைநிராகரிப்பாளர்களின் நோக்கமாக இருந்து வந்துள்ளது. இதனை அல்லாஹ் பின்வரும் வசனத்தில் பொய்ப்படுத்திவிட்டான்: நிச்சயமாக அல்லாஹ் அவர்களுக்கு மத்தியில் அவர்கள் கருத்து வேறுபாடு செய்கின்றவற்றில் தீர்ப்பளிப்பான். பொய்யர்களை நிராகரிப்பாளர்களை நிச்சயமாக அல்லாஹ் நேர்வழி செலுத்தமாட்டான். (அஸ்ஸுமர் : 3), அல்லாஹ், அவர்கள் வணங்கும் கடவுள்கள் அவனிடம் தம்மை நெருக்கி வைப்பார்கள் என்ற அவர்களின் கூற்றின் பொய்மையையும், அவற்றுக்குச் செலுத்திய வணக்கங்களால் அவர்களின் நிராகரித்துவிட்டதையும் தெளிவுபடுத்திவிட்டான். எனவே, சிறிதளவு கூட விவேகம் உள்ள ஒவ்வொருவரும், முன்னைய காபிர்களின் இறைநிராகரிப்பு என்பது, நபிகளையும் நேசர்களையும், மரங்களையும் கற்களையும், இதுபோன்ற பிற படைப்புகளையும் தமக்கும் அல்லாஹ்வுக்கும் இடையில் தரகர்களாக எடுத்துக்கொண்டு, மிகப் பரிசுத்தவானும் உயர்ந்தவனுமான அல்லாஹ்வின் அனுமதியும் திருப்தியும் இன்றியே, அமைச்சர்கள் மன்னர்களிடத்தில் சிபாரிசு செய்வதுபோல, அவர்கள் எடுத்துக்கொண்ட இடைநிலையாளர்கள் அவர்களின் தேவைகளைப் பூர்த்தி செய்து விடுவர் என்று நம்பிக்கை வைத்தமைதான் என்பதைப் புரிந்துகொள்வான். அவர்கள் அல்லாஹ்வை மன்னர்களுக்கும் தலைவர்களுக்கும் ஒப்பிட்டு, “ஒரு அரசன் அல்லது தலைவனிடம் தேவையுள்ளவன், அவனிடம் செல்ல அவனுடைய நெருங்கியோர் மற்றும் அமைச்சர்கள் மூலம் பரிந்துரையைக் கோருவது போலவே, நாங்களும் அல்லாஹ்வின் நபிமார்கள் மற்றும் அவனுடைய நேசர்களை வணங்குவதன் மூலம் அல்லாஹ்விடம் நெருக்கம் பெறுகிறோம்.” என்று கூறுகின்றார்கள். இது அசத்தியங்களில் மிக அசத்தியமானது; ஏனெனில் அல்லாஹ்வுக்கு ஒப்பானவன் எவருமில்லை; அவனை அவன் படைப்புகளோடு ஒப்பிட இயலாது. பரிந்துரை செய்வதற்கு அவன் அனுமதி வழங்காது யாரும் அவனிடம் பரிந்துபேச முடியாது; மேலும் அவன் அனுமதி அளிப்பது ஏகத்துவ நம்பிக்கையாளர்களுக்கே. நிச்சயமாக அவன் அனைத்திற்கும் வல்லமையுடையவன்; அனைத்தையும் அறிவான்; அவன் இரக்கமிக்கோரில் மிக இரக்கமிக்கவன். அவன் யாரையும் அஞ்சுவதில்லை, யாரிடமும் பயப்படுவதில்லை; ஏனெனில் அவனே தன் அடியார்களின்மேல் அடக்கி ஆள்பவன்; அவர்களைத் தன் விருப்பப்படி நடத்துபவன். மன்னர்களும் தலைவர்களும் அவ்வாறல்ல. அவர்கள் அனைத்துக்கும் சக்தி பெற்றவர்கள் அல்ல. அவர்களுக்கு தமக்கு உதவக்கூடிய அமைச்சர்கள், நெருங்கியவர்கள், படைவீரர்கள் ஆகியோரின் உதவி தேவைப்படுகின்றது; மேலும், அவர்களுக்கு தெரியாதவர்களின் தேவைகளை அவர்களுக்கு தெரிவிக்கவேண்டிய தேவையும் உள்ளது. இதனால், அவர்கள்து திருப்தியையும், நெருக்கத்தையும் பெற்றுத்தரும், அமைச்சர்கள் மற்றும் நெருங்கியவர்களின் உதவியை அவர்கள் நாடுகிறார்கள். ஆனால் இறைவன், அல்லாஹ் தன்னுடைய அனைத்து படைப்புகளிலிருந்தும் தேவையற்றவன், தன்னிறைவானவன். அவன் தாய்களை விடவும் கருணையுள்ளவன். அவன் நீதிமான், தன் ஞானம், செயல்திறன் மற்றும் வல்லமைக்கேற்ப அனைத்தையும் தக்க இடத்தில் வைக்கிறான். அவனை எந்தவிதத்திலும் படைப்புகளுடன் ஒப்பிட முடியாது. அதனால் அல்லாஹ் தன் அருள்நூலில், இணைவைப்பாளராகள் கூட, அவனே படைத்து, போசித்து, திட்டமிடுபவன் என்பதையும், மேலும் நெருக்கடியில் திணறும் ஒருவரின் வேண்டுதலை ஏற்றுக்கொள்பவன், தீங்கை அகற்றுபவன், உயிர் அளிப்பவன், உயிர் நீக்குபவன் என்பதையும், இவைகளுக்கு அப்பாலும் அவனது பல்வேறு செயற்பாடுகள் உள்ளன என்பதையும் ஏற்றுக்கொண்டிருந்தார்கள் எனத் தெளிவுபடுத்துகின்றான். இணைவைப்பாளர்களுக்கும் தூதர்களுக்கும் இடையே முரண்பாடு இருந்தது, அல்லாஹ் ஒருவனுக்கு மட்டுமே வணக்கத்தை செலுத்துதல் என்ற விடயத்தில் ஆகும். அல்லாஹ் கூறுகின்றான்: அவர்களை யார் படைத்தான் என்று நீர் அவர்களிடம் கேட்டால், நிச்சயமாக அவர்கள் கூறுவார்கள்: “அல்லாஹ்”... (அஸ்ஸுஹ்ருப் : 87) மேலும் அல்லாஹ் கூறுகின்றான்: (நபியே! அவர்களை நோக்கி) கூறுவீராக: “வானத்திலிருந்தும் பூமியிலிருந்தும் உங்களுக்கு யார் உணவளிக்கிறான்? அல்லது, (உங்கள்) செவிக்கும் பார்வைகளுக்கும் யார் உரிமை கொள்வான்? இன்னும், இறந்ததிலிருந்து உயிருள்ளதையும்; உயிருள்ளதிலிருந்து இறந்ததையும் யார் உற்பத்தி செய்கிறான்? இன்னும், எல்லா காரியங்களையும் யார் திட்டமிட்டு நிர்வகிக்கிறான்?” ஆக, (அதற்கு பதிலில்), “அல்லாஹ்தான்” என்று கூறுவார்கள். ஆக, நீர் கூறுவீராக: “ஆகவே, நீங்கள் அந்த அல்லாஹ்வை அஞ்சவேண்டாமா?” (யூனுஸ் : 31) இதே கருத்தில் அதிகமான திரு வசனங்கள் வந்துள்ளன

முன்னதாகவே, தூதர்கள் மற்றும் மக்களுக்கிடையேயான மோதல் அல்லாஹ்வுக்கு மாத்திரமே தூய்மையாக வணங்குவதில் தான் என்பதை அறிவிக்கும் வசனங்கள் குறிப்பிடப்பட்டுள்ளன. அல்லாஹ் பின்வருமாறு கூறுகின்றான்: “அல்லாஹ்வை வணங்குங்கள்; இன்னும், ஷைத்தானை விட்டும் விலகுங்கள்” என்று (போதிப்பதற்காக) ஒவ்வொரு சமுதாயத்திலும் திட்டவட்டமாக ஒரு தூதரை அனுப்பினோம். (அந்நஹ்லு : 36) அதன் பொருளில் வேறு வசனங்களும் இடம்பெற்றுள்ளன. அல்குர்ஆனில் பல இடங்களில் ஷஃபாஆ பற்றிய விவகாரத்தை அல்லாஹ் தெளிவுபடுத்தியுள்ளான். அல்லாஹ் கூறுகிறான் : அவனின் அனுமதியுடனே தவிர அவனிடம் (எவருக்கும்) யார் பரிந்துரைப்பார்? (பகரா : 255), மேலும் அல்லாஹ் கூறுகிறான்: வானங்களில் உள்ள எத்தனையோ வானவர்கள், அவர்களின் சிபாரிசு (அல்லாஹ்வின் தண்டனையில் இருந்து) எதையும் தடுக்காது அல்லாஹ்வின் அனுமதிக்கு பின்னரே தவிர, (அதுவும்) அவன் நாடுகிற, அவன் விரும்புகிறவருக்கு (மட்டுமே பலன் தரும்). (அந்நஜ்ம் : 26).

மலக்குகளைப் பற்றி அவன் கூறுவதாவது: அவன் விரும்பியவர்களுக்கே தவிர அவர்கள் சிபாரிசு செய்யமாட்டார்கள். இன்னும், அவர்கள் அவனுடைய அச்சத்தால் (அவனுக்கு மாறு செய்யாமல்) மிகுந்த எச்சரிக்கையுடன் பயந்தவர்களாக இருப்பார்கள். (அல் அன்பியா :28)

இங்கு அல்லாஹ், தன் அடியார்கள் (தன்னை) நிராகரிப்பதை அவன் விரும்புவதில்லை எனவும், அவர்களிடமிருந்து (அவனுக்கான) நன்றி செலுத்துதலிலேயே அவன் திருப்தியடைகிறான் எனவும் அறிவிக்கின்றான். அந்த நன்றிச் செலுத்துதல் என்பதன் பொருள், அவனை ஒருவனாக ஏற்றுக்கொள்வதும், அவனுக்குக் கீழ்ப்படிந்து செயல்படுவதுமாகும். அல்லாஹ் கூறுகின்றான் : நீங்கள் நிராகரித்தால் நிச்சயமாக அல்லாஹ் உங்களை விட்டும் முற்றிலும் தேவையற்றவன் - (எல்லா வகையிலும் அவன்) நிறைவானவன். அவன் தனது அடியார்களுக்கு நிராகரிப்பை விரும்ப மாட்டான். நீங்கள் நன்றி செலுத்தினால் அவன் உங்களுக்கு அதை விரும்புவான்... (அஸ்ஸுமர் : 7).

புகாரி (ரஹ்) அவர்களது ஸஹீஹுல் புகாரியில் அறிவிக்கப்பட்டுள்ளதாவது, அபூ ஹுரைரா (ரலி) அவர்கள் நபி (ஸல்) அவர்களிடம், 'மறுமை நாளில் உமது பரிந்துரைக்கு மிகத் தகுதியானவர் யார்?' எனக் கேட்டார்கள். அதற்கு நபியவர்கள்: 'தனது உள்ளத்தினால் மிகத்தூய்மையான எண்ணத்துடன் 'லாஇலாஹ இல்லல்லாஹ்' (உண்மையாக வணங்கப்படத் தகுதியான ஒரே இறைவன் அல்லாஹ்வைத் தவிர வேறு யாருமில்லை) என்று கூறுகிறவரே' என்று கூறினார்கள் அல்லது நபி ஸல்லல்லாஹு : “தன் ஆத்மாவிலிருந்து.” என்று கூறினார்கள்

புகாரியின் அறிவிப்பில், நபி ஸல்லல்லாஹு அலைஹிவஸல்லம் அவர்கள் கூறியதாக அனஸ் ரழியல்லாஹு அன்ஹு அவர்கள் அறிவிக்கிறார்கள் : ஒவ்வொரு நபிக்கும் ஏற்றுக்கொள்ளப்படும் ஒரு பிரார்த்தனை உண்டு; ஆகையால் ஒவ்வொரு நபியும் தமது பிரார்த்தனையை முன்கூட்டியே பயன்படுத்திக் கொண்டார்கள். ஆனால் நான் என் பிரார்த்தனையை மறுமை நாளில் என் உம்மத்திற்கான சபாஆவாகச் சேமித்து வைத்துள்ளேன். ஆகையால், அல்லாஹ் விரும்பினால், என் உம்மத்தில் இருந்து அல்லாஹ்வுடன் எதையும் இணைக்காமல் இறந்த எவருக்கும் அது கிடைக்கும். இதே அர்த்தத்தில் அதிகமான ஹதீஸ்கள் இடம்பெற்றுள்ளன.

நாம் மேற்கூறிய வசனங்களும் ஹதீஸ்களும் வணக்கம் என்பது அல்லாஹ்வுக்கு மாத்திரமே உரியதாகும் என்பதையும், அதனை அல்லாஹ்வைத் தவிர, நபிமார்களுக்கோ, வேறு எவருக்குமோ செலுத்தக் கூடாது என்பதையும் மேலும், சபாஆ என்பது அல்லாஹ்வின் உரிமையாகும் என்பதையும் தெளிவுபடுத்துகின்றன. அவன் கூறுகின்றான்: (நபியே) கூறுவீராக! சிபாரிசுகள் அனைத்தும் அல்லாஹ்விற்கே சொந்தமாகும்... (அஸ்ஸுமர் : 44) பரிந்துரையாளருக்கு அல்லாஹ் அனுமதியளித்தது, பரிந்துரை செய்யப்படுபவனை அல்லாஹ் பொருந்திக்கொண்ட பிறகே தவிர, பரிந்துரைக்கும் யாரும் தகுதிபெறமாட்டார்கள். மேலும், முன் கூறியபடி, தௌஹீதைத் தவிர வேறொன்றையும் அல்லாஹ் பொருந்திக்கொள்ளமாட்டான். இதனடிப்படையில், இணைவைப்பாளர்களுக்கு பரிந்துரையில் எந்தப் பங்கும் கிடையாது, இதை அல்லாஹ் தனது பின்வரும் கூற்றில் தெளிவாக விளக்குகின்றான்: ஆக, பரிந்துரை செய்பவர்களின் பரிந்துரை (இப்போது) அவர்களுக்கு பலனளிக்காது. (அல் முத்தஸ்ஸிர் : 48) மேலும் அல்லாஹ் கூறுகின்றான்: அந்த அநியாயக்காரர்களுக்கு நண்பர் எவரும் இருக்கமாட்டார். (பரிந்துரை) ஏற்றுக்கொள்ளப்படும்படியான பரிந்துரையாளரும் இருக்க மாட்டார். (ஃகாபிர் : 18)

'அநியாயம்' (ழுல்ம்) என்று (அல்குர்ஆனில்) பொதுவாகக் கூறப்படும் போது, அது இணைவைப்பையே குறிக்கும் என்பது அறிந்ததே. அல்லாஹ் கூறுகின்றான்: நிராகரிப்பவர்கள்தான் (பெரும்) அநியாயக்காரர்கள் ஆவார்கள். (அல் பகரா : 254), மேலும் அல்லாஹ் கூறுகின்றான்: நிச்சயமாக இணைவைத்தல் மிகப் பெரிய அநியாயமாகும். (லுக்மான் : 13).

சில சூஃபிகள் பள்ளிவாசல்களிலும் பிற இடங்களிலும் கூறும்: 'அல்லாஹும்ம சல்லி அலை மன் ஜஅல்தஹு ஸபபன் லின்ஷிகாக் அஸ்ராரிகல் ஜபரூதிய்யா, வான்ஃபிலாகன் லின்வாரிகல் ரஹ்மானிய்யா, பஸார நாயிபன் அநில் ஹத்ரதிர் ரப்பானிய்யா, வ களீபத அஸ்ராரிகல் தாதிய்யா..' போன்ற பிரார்த்தனைகளின் பொருள் குறித்து நீங்கள் கேள்வி எழுப்பியிருந்தீர்கள்.

அதற்கான பதிலாக இவ்வாறு கூறப்படும்: இந்தக் கூற்றும் இதற்கு ஒத்தவையும் செயற்கை மிகைப்பும் அளவுக்கு மீறிய சீரமப்படுத்திக்கொள்தலின் வர்க்கத்தில் அடங்குபவையாகும். அவற்றிலிருந்து எங்கள் நபி முஹம்மது (ஸல்) அவர்கள் எச்சரித்திருக்கின்றார்கள். ஸஹீஹ் முஸ்லிமின் அறிவிப்பில், நபி (ஸல்) அவர்கள் கூறியதாக, அப்துல்லாஹ் இப்னு மஸ்ஊத் ரழியல்லாஹு அன்ஹு அவர்கள் அறிவிக்கின்றார்கள்: "எல்லை மீறுபவர்கள் அழிந்தனர்" (இவ்வாறு நபியவர்கள் மூன்று தடவை கூறினார்கள்)

இமாம் கத்தாபீ (ரஹ்) அவர்கள் கூறுகின்றார்கள்: முதனத்திஉ என்பவன்: தமக்கு அவசியமற்ற விடயங்கள் பற்றி ஆராய்ந்துகொண்டும், தமது அரிவாள் புரிந்துகொள்ளமுடியாத விடயங்கள் பற்றி பேசிக்கொண்டும் இருக்கும் 'அஹ்லுல் கலாம்' ஐச் சேர்ந்தவர்களின் அணுகுமுறை அடிப்படையில், வீணாக சீரமப்பட்டு ஆராய்ந்து கொண்டிருப்பவன் ஆவான்.

அபூஸ்ஸஅதாத் இப்னு அத்தீர் கூறுகின்றார்: அவர்கள் பேச்சில் அளவுகடந்து பேசுபவர்கள், மிகுந்த ஆழத்துடன் பேசுபவர்கள், தங்கள் தொண்டை முழுவதும் பயன்படுத்தி பேசுபவர்கள். இது 'நத்அ்' எனப்படும் வாயின் மேல் பகுதி என்ற அர்த்தம் தரும் சொல்லில் இருந்து பெறப்பட்டதாகும். பின்னர், இது சொல் மற்றும் செயலில் (அளவுக்கதிகம்) ஆலமாகச் செல்பவர்களைக் குறிக்கப் பயன்படுத்தப்பட்டது.

மேற்கூறிய இரு மொழியறிஞர்களும் குறிப்பிட்டவற்றின் மூலம், நமது நபியும் தலைவருமான ரசூலுல்லாஹ் ஸல்லல்லாஹு அலைஹிவஸல்லம் அவர்கள்மீது ஸலவாதும் ஸலாமும் கூறுவதில் இந்த முறை, மார்க்கம் தடை செய்திருக்கும் செயற்கை மிகைப்படுத்தலும் தேவையற்ற கடினப்படுத்தலும் கொண்டவற்றில் ஒன்றாகும் என்பது உங்களுக்கும் சிறிதளவு நுண்ணறிவு உடைய யாவருக்கும் தெளிவாகிறது. இந்த விவகாரத்தில் ஒரு முஸ்லிமுக்கான ஷரீஆ அங்கீகரித்த நடைமுறை, நபி ஸல்லல்லாஹு அலைஹிவஸல்லம் அவர்கள் மீது ஸலவாத்தும், ஸலாமும் கூறும் விஷயத்தில், அவர்களிடமிருந்து உறுதிப்படுத்தப்பட்ட முறையையே ஆராய்ந்து அதையே கடைப்பிடிப்பதாகும்; அதுவே போதுமானது; இதர ஒன்றும் தேவையில்லை.

உதாரணமாக, புகாரி மற்றும் முஸ்லிம் கிரந்தங்களில் பதியப்பட்டுள்ள ஹதீஸில், கஃப் இப்னு உஜ்ரா ரழியல்லாஹு அன்ஹு அவர்கள் அறிவிக்கிறார்கள், சஹாபாக்கள் நபியவர்களிடம், "அல்லாஹ்வின் தூதரே! நாங்கள் தங்கள்மீது ஸலவாத் கூறவேண்டும் என அல்லாஹ் எமக்குக் கட்டளையிட்டுள்ளான்; எனவே, எவ்வாறு ஸலவாத் கூறவேண்டும்?" என்று கேட்டபோது, நபி ஸல்லல்லாஹு அலைஹிவஸல்லம் அவர்கள் இவ்வாறு கூறினார்கள்: "அல்லாஹும்ம ஸல்லி அலா முஹம்மதின் வஅலா ஆலி முஹம்மதின் கமா ஸல்லைத அலா இப்ராஹீம வஅலா ஆலி இப்ராஹீம இன்னக ஹமீதுன் மஜீத். அல்லாஹும்ம பாரிக் அலா முஹம்மதின் வஅலா ஆலி முஹம்மதின் கமா பாரக்த அலா இப்ராஹீம வஅலா ஆலி இப்ராஹீம இன்னக ஹமீதும் மஜீத்". என்று கூறுங்கள்

மேலும் புகாரி மற்றும் முஸ்லிம் கிரந்தங்களில் பதியப்பட்டுள்ள ஹதீஸில், அபூ ஹுமைத் அஸ்ஸாஇதீ ரழியல்லாஹு அன்ஹு அவர்கள் அறிவிக்கிறார்கள், தாம் நபியவர்களிடம், அல்லாஹ்வின் தூதரே! தங்கள்மீது எவ்வாறு நாங்கள் ஸலவாத் கூறவேண்டும்? என்று கேட்டதாகவும், நபி ஸல்லல்லாஹு அலைஹிவஸல்லம் அவர்கள் பின்வருமாறு கூறியதாகவும் அறிவிக்கின்றார்கள்: "அல்லாஹும்ம ஸல்லி அலா முஹம்மதின் வஅலா அத்வாஜிஹீ வதுர்ரிய்யாதிஹீ கமா ஸல்லைத அலா இப்ராஹீம வபாரிக் அலா முஹம்மதின்வஅலா அத்வாஜிஹீ வதுர்ரிய்யாதிஹீ கமா பாரக்த அலா இப்ராஹீம வஅலா ஆலி இப்ராஹீம இன்னக ஹமீதும் மஜீத்". என்று கூறுங்கள் (பொருள்: யா அல்லாஹ்! இப்ராஹீம் (அலை) அவர்களின் குடும்பத்தார் மீது நீ அருள் புரிந்தது போல், முஹம்மத் (ஸல்) அவர்கள் மீதும் அவர்களின் மனைவிமார் மற்றும் சந்ததிகள் மீதும் அருள்புரிவாயாக. யா அல்லாஹ்! இப்ராஹீம் (அலை) அவர்களின் குடும்பத்தார் மீது நீ அபிவிருத்தி (பரகத்து) செய்தது போல், முஹம்மத் (ஸல்) அவர்கள் மீதும் அவர்களின் மனைவிமார் மற்றும் சந்ததிகள் மீதும் அபிவிருத்தி (பரகத்து) செய்வாயாக. நிச்சயமாக நீ புகழுக்குரியவன் கீர்த்திமிக்கவன்.

சஹீஹ் முஸ்லிம் நூலில் அபூ மஸ்ஊத் அல் அன்சாரி ரழியல்லாஹு அன்ஹு அவர்கள் அறிவிக்கிறார்கள்: பஷீர் இப்னு சஅத் அவர்கள், அல்லாஹ்வின் தூதரே! அல்லாஹ் நமக்கு தங்கள்மீது ஸலவாத் கூறுமாறு கட்டளையிட்டுள்ளான்; எவ்வாறு நாங்கள் தங்கள்மீது ஸலவாத் கூறவேண்டும்? என்று கேட்டார்கள். அதற்கு நபி ﷺ அவர்கள் சிறிது நேரம் மௌனமாக இருந்து பின்னர் கூறினார்கள்: கூறுங்கள்: அல்லாஹும்ம ஸல்லி அலா முஹம்மதின் வஅலா ஆலி முஹம்மதின்; கமா ஸல்லைத அலா ஆலி இப்ராஹீம; அல்லாஹும்ம பாரிக் அலா முஹம்மதின் வஅலா ஆலி முஹம்மதின்; கமா பாரக்த அலா ஆலி இப்ராஹீம பில் ஆலமீன்; இன்னக ஹமீதுன் மஜீத்; ஸலாமையும் நீங்கள் (ஏற்கனவே) கற்றுக் கொண்டபடி கூறுங்கள்

நபி ஸல்லல்லாஹு அலைஹிவஸல்லம் அவர்களிடமிருந்து உறுதிப் படுத்தப்பட்ட, இவ்வாசகங்களையும் அவற்றை ஒத்தவைகளையுமே, ஒரு முஸ்லிம், தனது தொழுகையில் ரசூலுல்லாஹ் ஸல்லல்லாஹு அலைஹிவஸல்லம் அவர்கள்மீது ஸலவாத்தும் ஸலாம் கூறும்போது பயன்படுத்த வேண்டும்; ஏனெனில் ரசூலுல்லாஹ் (ஸல்) அவர்களே தம்மைப் பற்றிக் கூறும்போது பயன்படுத்துவதற்கு உகந்தது எது என்பது குறித்து மக்களிலேயே மிக அறிந்தவர்; அதுபோலவே தமது இறைவனைப் பற்றிக் கூறும்போது பயன்படுத்தப்பட வேண்டிய வாசகங்கள் எவை என்பதிலும் மக்களிலேயே மிக அறிந்தவர்.

வலிந்து பயன்படுத்தப்படும் மற்றும் புதிதாக உருவாக்கப்பட்ட வாசகங்களும், தவறான பொருளுக்கு வாய்ப்பளிக்கும் வாசகங்களும் — கேள்வியில் குறிப்பிடப்பட்ட வாசகங்களைப்போல் — பயன்படுத்தப்படக் கூடாது; ஏனெனில் அவற்றில் வலிந்துபேசுதல் உள்ளது, மேலும் அவை தவறான அர்த்தங்களுக்கு விளக்கப்படக்கூடியவையாக உள்ளன. அதோடு, அவை நபிகள் நாயகம் (ஸல்லல்லாஹு அலைஹிவஸல்லம்) அவர்கள் தேர்ந்தெடுத்து தமது உம்மத்துக்கு வழிகாட்டிய வாசகங்களுக்கு முரணானவையாகும்; அவர் படைக்கப்பட்டவர்களில் அறிவில் மிக உயர்ந்தவரும், நலன் நாடுதலில் மிகச் சிறந்தவரும், வலிந்து கூறுவதிலிருந்து மிகவும் விலகியவரும் ஆவார். அவர்மேல் அவரது இறைவனிடமிருந்து மிகச் சிறந்த ஸலவாத்தும் சமாதானமும் உண்டாவதாக.

இத்துடன், தௌஹீதின் உண்மை, இணைவைப்பின் உண்மை, இவ்விடயத்தில் முதற்கால இணைவைப்பாளர்களின் நிலைமைக்கும் பிந்தைக்கால இணைவைப்பாளர்களின் நிலைமைக்கும் இடையிலான வேறுபாடு, மேலும் அல்லாஹ்வின் தூதரான நபியவர் ﷺ மீது நியமிக்கப்பட்ட முறைப்படி ஸலவாத்து செலுத்துவது எப்படி என்பதையும் விளக்கும் நாம் மேற்கூறிய ஆதாரங்கள் சத்தியத்தைத் தேடுபவனுக்குப் போதுமானதாகவும், திருப்தியளிக்கக் கூடியதாகவும் இருக்கும் என எதிர்பார்க்கின்றேன். உண்மையை அறிய விருப்பமில்லாதவர் தன் ஆசைக்கு அடிமையாக இருப்பவர்; அல்லாஹ் கூறுகின்றான்: ஆக, அவர்கள் உமக்கு பதிலளிக்கவில்லை என்றால் (அவர்களைப் பற்றி) நீர் அறிவீராக! “நிச்சயமாக அவர்கள் பின்பற்றுவதெல்லாம் தங்கள் மன விருப்பங்களைத்தான்.” அல்லாஹ்வின் நேர்வழி இன்றி தனது மன விருப்பத்தை பின்பற்றியவனை விட பெரும் வழிகேடன் யார்? நிச்சயமாக அல்லாஹ் (அவனது கட்டளைகளை மீறுகின்ற) அநியாயக்கார மக்களை நேர்வழி செலுத்த மாட்டான். (கஸஸ் : 50).

இந்த வசனத்தில் அல்லாஹ், தனது தூதர் முஹம்மத் (ஸல்) அவர்கள்மூலம் அனுப்பிய நேர்வழியும் சத்தியமதமும் குறித்து மக்கள் இரு பிரிவுகளாக இருக்கின்றனர் என்று தெளிவுபடுத்துகிறான்:

ஒரு தரப்பினர்: அல்லாஹ்வுக்கும் அவனுடைய தூதருக்கும் கீழ்ப்படிவோர்.

இரண்டாவது தரப்பினர் : தன் மனஇச்சையைப் பின்பற்றுபவன். அதனைத் தொடர்ந்து அல்லாஹ், தனது நேர்வழியின்றி தன் மனஇச்சையைப் பின்பற்றுகிறவனைவிட அதிகமாக வழிதவறியவன் யாருமில்லை என்றும் அறிவிக்கின்றான்.

உயர்ந்தோனாகிய அல்லாஹ்விடம் மனோஇச்சைகளைப் பின்பற்றுவதிலிருந்து பாதுகாப்பை வேண்டுகிறோம். மேலும், அல்லாஹ்விற்கும் அவருடைய தூதர் எங்கள் நபி முஹம்மத் ஸல்லல்லாஹு அலைஹி வஸல்லம் அவர்களுக்கும் இணங்கிச் செயல்படுகிறவர்களிலும், அவனது ஷரீஅத் நெறியைப் பெருமைப்படுத்துகிறவர்களிலும், அவனது ஷரீஅத்துக்கு முரண்படும் பித்அத்துகளும் ஆசைகளும் ஆகிய அனைத்திலிருந்து (மக்களை) எச்சரிப்பவர்களிலும் எமையும் உமையும் எமது முஸ்லிம் சகோதர, சகோதரிகளையும் சேர்த்தருள்வானாக. அவன் மிகப்பெரும் கொடையாளனும், தாராளத்தன்மையுடையனுமாவான்.

அல்லாஹ்வின் ஸலாத்தும் எமது நபியும் அல்லாஹ்வின் அடியாரும் தூதருமாகிய முஹம்மத் (ஸல்) அவர்கள் மீதும், அவர்களின் குடும்பத்தார், தோழர்கள் மற்றும் மறுமை நாள்வரை அவர்களை நல்ல முறையில் பின்பற்றி நடப்போர் மீதும் உண்டாவதாக.

பித்அத்துகளை விட்டும் எச்சரித்தல்.

அப்துல் அஸீஸ் இப்னு அப்துல்லாஹ் இப்னு பாஸ்

இந்நூல் அல்லாஹ்வின் குர்ஆனிலும் நபி (ஸல்) அவர்களின் சுன்னாவிலும் இடம்பெறாத மௌலித் கொண்டாட்டங்கள் மற்றும் ஏனைய பித்அத்துகளைக் குறித்து எச்சரிக்கிறது. மேலும், குர்ஆன் மற்றும் சுன்னாவிலிருந்து பெறப்பட்ட மார்க்க ஆதாரங்களை இது அடிப்படையாகக் கொண்டுள்ளது; அத்துடன் மார்க்கமாக்கப்படாத எந்தவொரு இணைப்பும் தவிர்க்கப்பட வேண்டிய பித்அத்தாகவே கருதப்படும் என்பதையும் நிறுவுகின்றது

ஐந்தாவது கடிதம் :

நபியவர்களின் பிறந்த தின விழாவையும், ஏனைய பிறந்த தின விழாக்களையும் கொண்டாடுவதற்கான சட்டம்

புகழனைத்தும் அழ்ழாஹ் ஒருவனுக்கே உரித்தாகட்டும். ஸலாத்தும், ஸலாமும் அல்லாஹ்வின் தூதர் மீதும் அவர்களின் குடும்பத்தார் மீதும், அவர்களின் தோழர்கள் மீதும், அவர்களின் வழிகாட்டல்களைப் பின்பற்றியோர் மீதும் உண்டாவதாக.

நபி (ஸல்) அவர்களின் பிறந்த தின விழாவைக் கொண்டாடுவதின் மார்க்கத் தீர்ப்பு, அந்நேரத்தில் அவருக்காக எழுந்து நிற்பது, அவர்களுக்கு ஸலாம் கூறுதல், மேலும் பிறந்த தின விழாக்களில் செய்யப்படும் இதர செயல்கள் குறித்து பலரிடமிருந்து மீண்டும் மீண்டும் கேள்விகள் வந்துள்ளன.

பதில் : நபி (ஸல்) அவர்களின் மௌலித் (பிறந்தநாள்) விழாவையும், இதர எவருடையதையும் கொண்டாடுவது அனுமதிக்கப்படாது; ஏனெனில் அது மார்க்கத்தில் புதிதாக அறிமுகப்படுத்தப்பட்ட பித்அத் ஆகும்; ஏனெனில் நபி (ஸல்) அவர்களோ, அவர்களின் நேர்வழிநடந்த கலீபாக்களோ, அவர்களல்லாத மற்ற நபித்தோழர்களோ அவ்வாறு செய்யவில்லை, மேலும் சிறந்த தலைமுறைகளில் அவர்களை நன்றாகப் பின்பற்றிய தாபிஈன்களும் செய்யவில்லை; அவர்கள் ஸுன்னாவை மிகவும் அறிந்தவர்களும், அல்லாஹ்வின் தூதர் (ஸல்) அவர்களுக்கான அன்பில் மிகச் சிறந்தவர்களும், அவர்களுக்குப் பிறகு வந்தவர்களை விட அவர்களின் மார்க்கத்தைப் பின்பற்றுவதிலும் முழுமையுடையவர்களுமாவர். மேலும் தன் தெளிவான நூலில் அல்லாஹ் பின்வருமாறு கூறுகிறான்:

தூதர் எதை உங்களுக்குக் கொடுத்தாரோ அதை உறுதியாக பற்றிப் பிடியுங்கள். அவர் எதை உங்களுக்குத் தடுத்தாரோ அதை விட்டும் விலகிவிடுங்கள். (அல் ஹஷ்ர் : 07) மேலும் அல்லாஹ் குறிப்பிடுகிறான் : (அவருடைய கட்டளைக்கு மாறுசெய்பவர்கள் (-உள்ளங்கள் இறுகி நிராகரிப்பு என்னும்) குழப்பம் தங்களை அடைந்துவிடுவதை; அல்லது, வலி தரும் (கடுமையான) தண்டனை தங்களை அடைந்துவிடுவதைப் பற்றி உஷாராக (பயந்தவர்களாக) இருக்கட்டும்.) (அந்நூர்: 63). மேலும் அல்லாஹ் குறிப்பிடுகிறான் அல்லாஹ்வின் தூதரில் உங்களுக்கு - அல்லாஹ்வையும் மறுமை நாளையும் பயந்தவராக இருப்பவருக்கு - திட்டவட்டமாக அழகிய முன்மாதிரி இருக்கிறது. இன்னும், அவர் அல்லாஹ்வை அதிகம் நினைவு கூர்பவராகவும் இருப்பார். (அல்அஹ்ஸாப் : 21), மேலும் அல்லாஹ் கூறினான்: (இஸ்லாமை ஏற்பதில்) முதலாமவர்களாகவும் முந்தியவர்களாகவும் இருந்த முஹாஜிர்கள்; இன்னும், அன்ஸாரிகள்; இன்னும், இவர்க(ளுக்கு பின்னர் வந்து இவர்க)ளை நன்மையில் பின்பற்றிய(மற்ற)வர்க(ள் ஆகிய இவர்க)ளைப் பற்றி அல்லாஹ் திருப்தியடைந்தான். இன்னும், இவர்களும் அவனைப் பற்றி திருப்தியடைந்தனர். இன்னும், சொர்க்கங்களை இவர்களுக்கு (அவன்) தயார் செய்து வைத்திருக்கிறான். அவற்றின் கீழ் நதிகள் ஓடும். அவற்றில் எப்போதும் (அவர்கள்) நிரந்தரமாக தங்கி இருப்பார்கள். இதுதான் மகத்தான வெற்றியாகும். (அத்தௌபா : 100) மேலும் அல்லாஹ் கூறுகின்றான்: இன்று உங்களுக்கு உங்கள் மார்க்கத்தை நான் முழுமையாக்கினேன். இன்னும், என் அருட்கொடையை உங்கள் மீது நிறைவு செய்தேன். இன்னும், இஸ்லாமை உங்களுக்கு மார்க்கமாக திருப்தியடைந்தேன். (அல்மாஇதா : 3). இதே கருத்தில் அதிகமான திரு வசனங்கள் வந்துள்ளன ஆதாரப்பூர்வமான அறிவிப்புக்களில், நபி (ஸல்) அவர்கள் இவ்வாறு கூறியுள்ளார்கள் : 'எமது இந்த மார்க்த்தில் இல்லாத புதிய ஒரு விடயத்தை மார்க்கமாக யார் உண்டாக்குகிறானோ அவனுடைய அந்தப் புதுமை நிராகரிக்கப்பட்டதாகும்'. அதாவது: அதாவது, அவனுக்கே திருப்பப்படும் மேலும் நபி ஸல்லல்லாஹு அலைஹிவஸல்லம் மற்றொரு ஹதீஸில் கூறினார்கள் : "நீங்கள் எனது வழிமுறையையும், எனக்குப் பின்னால் வரும் நேர்வழிபெற்ற கலீபாக்களினது வழிமுறையையும் பின்பற்றுங்கள், அவற்றைப் பற்றிக்கொண்டு உங்கள் கடைவாய் பற்களால் உறுதியாகப் பிடியுங்கள்; மார்க்கத்தின் பெயரால் உருவாக்கப்பட்ட நூதன அனுஷ்டானங்களை விட்டும் உங்களை நான் எச்சரிக்கிறேன், ஏனெனில் புதிதாக உருவாக்கப்பட்ட ஒவ்வொரு விடயமும் பித்அத் ஆகும், அனைத்து பித்அத்களும் வழிகேடாகும். இந்த இரண்டு ஹதீஸ்களிலும் பித்அத்தை உருவாக்குவதும், அவற்றைப் பின்பற்றுவதும் பற்றிய கடுமையான எச்சரிக்கை உள்ளது.

இவ்வகையான மௌலித்களைப் புதிதாக ஏற்படுத்துவது, அல்லாஹ் இந்த உம்மத்திற்கான மார்க்கத்தை முழுமையாக்கவில்லை என்றும், உம்மத்தினர் செய்ய வேண்டியவற்றை நபி ஸல்லல்லாஹு அலைஹிவஸல்லம் அவர்கள் அறிவித்துத் தரவில்லை என்றும் பொருள்தரும். இப்பிற்பட்ட காலத்தவர்கள் வந்து, அல்லாஹ்வின் ஷரீஅத்தில் அவன் அனுமதிக்காதவற்றை, அவை அல்லாஹ்விடம் தம்மை நெருக்கமாக்கி வைக்கும் என்ற எண்ணத்தில், புதிதாகக் கொண்டுவந்து (முழுமைப்படுத்தினார்கள் என்ற எண்ணத்தைத் தரும்) இது மிகப் பெரிய ஆபத்து என்பதில் எந்தச் சந்தேகமும் இல்லை. மேலும் இது அல்லாஹ்வையும், அவனது தூதர் (ஸல்) அவர்களையும் எதிர்த்து நிற்பதுமாகும். அல்லாஹ் தனது அடியார்களுக்காக மார்க்கத்தை முழுமைப்படுத்தி, அவர்கள்மேல் தனது அருட்கொடைகளைப் பூரணப்படுத்திவிட்டான். மேலும் தூதர் (ஸல்) அவர்கள் தெளிவாக எத்திவைத்துவிட்டார்கள். சுவர்க்கத்திற்குக் கொண்டு செல்லும் மேலும், நரகத்திலிருந்து தூரப்படுத்தும் எந்த வழியையும் அவர் இவ்வும்மத்திற்குத் தெளிவுபடுத்தாமல் விட்டுச்செல்லவில்லை. ஆதாரப்பூர்வமான ஹதீஸில் அப்துல்லாஹ் இப்னு அம்ர் (ரழி) அவர்கள் கூறியதாவது: அல்லாஹ்வின் தூதர் (ஸல்) பின்வருமாறு கூறினார்கள்: "அல்லாஹ் அனுப்பிவைத்த ஒவ்வொரு நபியின்மீதும், தமது சமூகத்திற்குக் அவர்களுக்கு நன்மை தருமெனத் தாம் அறிந்தவற்றில் மிகச் சிறந்தவற்றைக் காட்டிக் கொடுப்பதும், அவர்களுக்கு தீமை தருமெனத் தாம் அறிந்தவற்றில் மிகத் தீயவற்றிலிருந்து அவர்களை எச்சரிப்பதும் கடமையாக இருந்தது." இதனை இமாம் முஸ்லிம் தனது ஸஹீஹில் பதிவு செய்துள்ளார்.

யாவரும் அறிந்த விடயமாக என்னவென்றால், எமது நபி முஹம்மத் ஸல்லல்லாஹு அலைஹி வஸல்லம் அவர்கள் நபிமார்களில் மிகச் சிறந்தவரும் அவர்களில் இறுதியுமானவரும் ஆவார்கள்; மேலும், மார்கத்தை முழுமையாக எத்திவைத்தவரும், முழுமையாக நன்மை நாடியவரும் ஆவார்கள். ஆகவே, மௌலித் விழாக்களை கொண்டாடுதல், அல்லாஹ் ஏற்றுக்கொள்ளும் மார்கத்தின் ஒரு பகுதியாக இருந்திருந்தால், அல்லாஹ்வின் தூதர் ஸல்லல்லாஹு அலைஹி வஸல்லம் அதை உம்மத்துக்கு தெளிவாக விளக்கித் தந்திருப்பார்கள், அல்லது தமது வாழ்நாளில் தாமே செய்து காட்டியிருப்பார், அல்லது அவருடைய ஸஹாபாக்களும் — அல்லாஹ் அவர்களைப் பொருந்திக்கொள்வானாக — அதை செய்து காட்டியிருப்பார்கள். இவற்றில் எதுவும் நிகழாமல் போனதால், அதற்கு இஸ்லாமுடன் எந்தவிதத் தொடர்பும் இல்லை என்பது தெளிவாகிறது; மாறாக, அது நபி ஸல்லல்லாஹு அலைஹி வஸல்லம் அவர்கள் தமது உம்மத்தாரை எச்சரித்த, புதிதாக உருவாக்கப்பட்ட விடயங்களில் ஒன்றாகும்; இதுகுறித்து ஹதீஸ்களில் முன்கூட்டியே குறிப்பிடப்பட்டது. இக்கருத்தில் அதிகமான திரு வசனங்களும் ஹதீஸ்களும் இடம்பெற்றுள்ளன.

மேற்கூறப்பட்ட ஆதாரங்களையும் பிற ஆதாரங்களையும் அடிப்படையாகக் கொண்டு, உலமாக்களில் பலர் மௌலித் நிகழ்வுகளைத் தெளிவாக மறுத்து அவற்றிலிருந்து எச்சரித்துள்ளனர். ஆனால் பின்னாளைச் சேர்ந்த சிலர் இதற்கு முரண்பட்டு, அவற்றில் எந்தத் தீமைகளும் இடம்பெறாவிட்டால் அவை அனுமதிக்கப்படலாம் என்று கூறினர்; அதாவது, அல்லாஹ்வின் தூதர் (ஸல்லல்லாஹு அலைஹி வஸல்லம்) அவர்களைப் பற்றி அளவுக்கு மீறிப் புகழ்தல், ஆண்கள்-பெண்கள் கலந்திருத்தல், இசைக்கருவிகளைப் பயன்படுத்தல் போன்ற, இஸ்லாமிய ஷரீஆ மறுக்கும் விஷயங்கள் போன்றவை இல்லாதிருக்க வேண்டும். மேலும், அவை ‘நல்ல புதுமைகள்’ எனவும் அவர்கள் எண்ணினர்.

ஷரீஅத் அடிப்படை விதி என்னவெனில்: மக்கள் எந்த விடயத்தில் கருத்து வேறுபட்டாலும், அதை அல்லாஹ்வின் வேதத்தின் பக்கமும், அவன் தூதர் முஹம்மது ﷺ அவர்களின் ஸுன்னாவின் பக்கமும் திருப்பிவிடுதல் ஆகும். அல்லாஹ் கூறுகின்றான்: நம்பிக்கையாளர்களே! நீங்கள் அல்லாஹ்விற்கு கீழ்ப்படியுங்கள். இன்னும், (அல்லாஹ்வுடைய) தூதருக்கும், உங்கள் ஆட்சியாளர்களுக்கும் கீழ்ப்படியுங்கள். ஆக, (நம்பிக்கையாளர்களே!) நீங்கள் உங்களுக்குள் ஒரு விஷயத்தில் தகராறுசெய்தால், (மெய்யாகவே) நீங்கள் அல்லாஹ்வையும், இறுதிநாளையும் நம்பிக்கை கொண்டவர்களாயிருந்தால் அதை அல்லாஹ்விடமும் (அவனுடைய) தூதரிடமும் திருப்பிவிடுங்கள். (அவர்களுடைய தீர்ப்பை திருப்தியுடன் ஒப்புக் கொள்ளுங்கள்.) இதுதான் உங்களுக்கு சிறந்ததும், மிக அழகான முடிவும் ஆகும். (அந்நிஸா : 59), மேலும் அல்லாஹ் கூறுகின்றான்: எந்த ஒரு விஷயத்தில் நீங்கள் முரண்படுகிறீர்களோ அதன் இறுதி தீர்ப்பு அல்லாஹ்வின் பக்கம்தான் உள்ளது ... (அஷ்ஷூரா : 10)

இவ்விவகாரத்தை—அதாவது மௌலித் கொண்டாட்டத்தை—நாங்கள் அல்லாஹ்வின் கண்ணியமிக்க வேதத்துக்கே திருப்பிப்பார்த்தோம்; அப்போது அது, நபி (ஸல்) அவர்கள் கொண்டு வந்தவற்றில் அவர்களைப் பின்பற்றுமாறு எமக்கு ஏவுகின்றதையும், அவர்கள் விலக்கியவற்றைத் தவிர்க்குமாறு எம்மை எச்சரிக்கின்றதையும், மேலும் அல்லாஹ் இந்த உம்மத்திற்காக மார்க்கத்தை நிறைவு செய்துவிட்டான் என்று எமக்கு அறிவிக்கின்றதையும் கண்டோம். இக்கொண்டாட்டம் நபி (ஸல்) அவர்கள் கொண்டு வந்தவற்றில் ஒன்றல்ல; ஆகவே, அல்லாஹ் எமக்காக நிறைவு செய்த மார்க்கத்தின் பகுதியாக இது இருக்காது; மேலும் அதில் நபியவர்களைப் பின்பற்றுமாறு நம்மை அல்லாஹ் ஏவியுள்ளான்.

அதையும் நபி ஸல்லல்லாஹு அலைஹி வஸல்லம் அவர்களின் ஸுன்னத்துக்கு திருப்பிப் பார்த்தோம்; அதில் அதை அவர்கள் செய்ததாகவும், அதனை ஆணையிட்டதாகவும், அல்லது அவர்களின் தோழர்கள் (ரழி) அதைச் செய்ததாகவும் எதுவும் காணவில்லை. இதனால் அது மார்க்கத்தில் உட்பட்டதல்ல என்பது நமக்குத் தெளிவானது; மாறாக அது புதிதாக உருவாக்கப்பட்ட பித்அத் ஆகும்; மேலும் அது யூதர்களும் கிறிஸ்தவர்களும் தங்களின் பெருநாட்களில் செய்யும் செயல்களுக்கு ஒப்பாகச் செய்வதாகும்.

இதனால், சிறிதளவு புரிதலும், உண்மையை விரும்பும் மனமும், அதைத் தேடுவதில் நியாயநிலையும் கொண்ட எவருக்கும், மௌலித் கொண்டாட்டங்கள் இஸ்லாம் மார்க்கத்தில் உள்ளதல்ல என்பது தெளிவாகிறது. மாறாக, அல்லாஹ்வும் அவனது தூதரும் விட்டுவிடுமாறும், எச்சரிக்கையாக இருக்குமாறும் கூறிய, புதிதாக உருவாக்கப்பட்ட பித்அத்துகளில் ஒன்றாகும். மனிதர்கள் பலர் பல்வேறு இடங்களில் செய்யும் செயல்களை வைத்துக் கொண்டு அறிவாளி ஏமாந்து விடக்கூடாது. காரணம், ஒரு விடயம் உண்மையா என்பதை செய்பவர்களின் எண்ணிக்கையை வைத்து அறிய முடியாது. மார்க்க ஆதாரங்களே உண்மையை நிரூபிக்கும். அல்லாஹ் யூதர்களையும் கிறிஸ்தவர்களையும் பற்றி பின்வருமாறு கூறுகின்றான்: இன்னும், “யார் யூதர்களாக, அல்லது கிறித்தவர்களாக இருக்கிறார்களோ அவர்களைத் தவிர (எவரும்) சொர்க்கத்தில் நுழையவே மாட்டார்” என (அவர்கள்) கூறினார்கள். அவை அவர்களுடைய வீண் நம்பிக்கைகளாகும்! (நபியே!) கூறுவீராக: “நீங்கள் உண்மையாளர்களாக இருந்தால் உங்கள் ஆதாரத்தைக் கொண்டு வாருங்கள்.” [அல்-பகரா: 111] மேலும் அல்லாஹ் கூறுகின்றான்: இன்னும், இப்பூமியில் உள்ளவர்களில் அதிகமானோருக்கு நீர் கீழ்ப்படிந்தால் (அவர்கள்) உம்மை அல்லாஹ்வுடைய பாதையிலிருந்து வழிகெடுத்து விடுவார்கள்... (அல்அன்ஆம் : 116)

மேலும் இந்தப் பிறந்த தின விழாக்கள் பித்அத்களாக இருப்பதுடன், பெரும்பாலும் அவற்றில் மற்ற பாவங்களும் அடங்கியிருக்கும்; அதாவது, ஆண், பெண் கலப்பு, பாடல்கள் மற்றும் இசைக்கருவிகள் பயன்படுத்துதல், மது மற்றும் போதைப்பொருட்கள் அருந்துதல் போன்ற பல்வேறு தீமைகள் இருக்கும். அவற்றில் இதைவிடவும் பெரிதான ஒன்று நிகழக்கூடும்; அது பெரிய இணைவைப்பாகும். அதாவது, நபி (ஸல்) அவர்களையோ அல்லது பிற இறைநேசர்களையோ அளவுக்கு மீறிப் போற்றுவதும், அவர்களை நோக்கிப் பிரார்த்தனை செய்வதும், அவர்களிடம் துணை வேண்டுவதும், அவர்களிடமிருந்து பேருதவியை நாடுவதும் மேலும், அவர்கள் மறைவானவற்றை அறிந்திருப்பார்கள் என்று நம்புவதும் ஆகும். இவ்வாறான நிராகரிப்புச் செயல்களில் அநேகமான மக்கள் நபி (ஸல்) அவர்களது பிறந்த தினக் கொண்டாட்டத்திலும், தாம் இறைநேசர் எனப் போற்றுபவர்களின் பிறந்த தினக் கொண்டாட்டத்திலும் ஈடுபடுகின்றனர். ஆதாரப் பூர்வமான ஹதீஸில் நபி (ஸல்) அவர்கள் இவ்வாறு கூறனார்கள் : “மார்க்கத்தில் தீவிரப்போக்கையைத் தவிர்த்துக்கொள்ளுங்கள்; ஏனெனில், மார்க்கத்தில் தீவிரப்போக்குத்தான், உங்களுக்குமுன் வாழ்ந்தவர்களை அழித்தது.” மேலும் ஸல்லல்லாஹு அலைஹி வஸல்லம் கூறினார்கள் "கிறிஸ்தவர்கள் மர்யமின் மகனை (ஈஸாவை) அளவுகடந்து உயர்த்தியதைப் போன்று நீங்கள் என்னை உயர்த்திப் புகழ வேண்டாம். நான் ஓர் அடியானே, எனவே அல்லாஹ்வின் அடியார், தூதர் என்றே கூறுங்கள்". இந்த ஹதீதை, இமாம் புஹாரி தனது ஸஹீஹில், உமர் (ரழி) அவர்களது ஹதீசாகப் பதிவு செய்துள்ளார்.

ஆச்சரியமான ஒரு விடயம் என்னவென்றால், பித்அத்ஆவான இவ்விழாக்களில் பங்கேற்பதற்கு பலர் ஆர்வத்துடன் செயலாற்றி, அதனை ஆதரிக்கின்றனர். ஆனால் அல்லாஹ் கட்டாயமாக்கிய ஜும்ஆ மற்றும் ஜமாஅத் தொழுகைகளில் பங்கேற்காமல் பின்தங்குகின்றனர். அதற்கு முக்கியத்துவம் வழங்குவதுமில்லை. பெரிய ஒரு பாவத்தைச் செய்ததாகக் கருதுவதுமில்லை. இது, சந்தேகமின்றி, பலவீனமான ஈமான், குறைவான அறிவு, பல்வேறுபட்ட பாவங்களின் காரணமாக உள்ளங்களில் படிந்திருக்கும் கறை ஆகியவற்றின் விலைவாகும். அல்லாஹ் நமக்கும் மற்ற முஸ்லிம்களுக்கும் நலமளிக்க வேண்டுகிறோம்.

சிலர், நபி ஸல்லல்லாஹுஅலைஹிவஸல்லம் அவர்கள் மௌலித் நிகழ்ச்சிக்கு வருகை தருகின்றார்கள் என்று நினைப்பதும் அவ்வாறான ஒன்றாகும். அதனால், அவர்களை வாழத்தி, வரவேற்பதற்காக எழுந்து நிற்கின்றனர். இது மிகவும் பெரிய பொய்யும் மிகக் கேவலமான அறியாமையும் ஆகும். நபியவர்கள் ஸல்லல்லாஹுஅலைஹிவஸல்லம் அவர்கள் நியாயத் தீர்ப்பு நாள் வரும்வரை தமது மண்ணறையிலிருந்து வெளியே வரமாட்டார்கள்; எந்த மனிதருடனும் தொடர்புகொள்ளமாட்டார்கள்; அவர்களின் கூடுகைகளில் கலந்துகொள்ளமாட்டார்கள். மாறாக, அவர் நியாயத் தீர்ப்பு நாள் வரையிலும் தமது மண்ணறையிலேயே இருப்பார்கள். அவர்களுடைய உயிர் தன் இறைவனிடத்தில், கண்ணியத்தின் இல்லமான மிக உயர்ந்த இல்லிய்யீனில் உள்ளது. அல்லாஹ் கூறுகின்றான் : "பிறகு, நிச்சயமாக நீங்கள் இதற்குப் பின்னர் மரணித்து விடுவீர்கள்." பிறகு, நிச்சயமாக நீங்கள் மறுமை நாளில் எழுப்பப்படுவீர்கள். (அல்முஃமினூன் : 15, 16)

நபி (ஸல்) கூறுகிறார்கள் : "மறுமை நாளில் முதன் முதலில் மண்ணறை பிளந்து (உயிர்த்து) எழுபவனும் நானே. முதன்முதலில் பரிந்துரை செய்பவனும் நானே. முதன்முதலில் பரிந்துரை ஏற்கப்படுபவனும் நானே." அவர்கள் மீது தமது இறைவனிடமிருந்து மிகச் சிறந்த சலாத்தும் ஸலாமும் உண்டவதாக.

இவ்விரு இறைவசனங்களும், மாட்சிமைமிக்க நபிமொழியும், அவற்றின் பொருளுக்கு இணையான பிற வசனங்களும் நபிமொழிகளும் அனைத்தும், நபி ﷺ அவர்கள் மற்றும் பிற இறந்தோர் மறுமை நாள் அன்று மட்டுமே தமது கப்றுகளிலிருந்து எழுவர் என்பதை உணர்த்துகின்றன. இது முஸ்லிம் அறிஞர்களிடையே ஏகமனதாக ஒப்புக்கொள்ளப்பட்ட ஒரு விஷயமாகும்; இதில் அவர்களுக்குள் எந்த முரண்பாடும் இல்லை. ஆகவே, ஒவ்வொரு முஸ்லிமும் இவ்விடயங்களில் விழிப்புடன் இருக்க வேண்டும். மேலும் அறிவீனர்கள் மற்றும் அவர்களைப் போன்றவர்கள் மார்க்கத்தின் பெயரால் உருவாக்கிய, அல்லாஹ்வின் எந்த உத்தரவும் இல்லாத, பித்அத்துகள் மற்றும் மூடநம்பிக்கைகளை விட்டும் எச்சரிக்கையாக இருக்க வேண்டும். இவற்றிற்கு அல்லாஹ்வின் அனுமதி கிடையாது. அல்லாஹ் தான் உதவியாகவும், நம்பிக்கையாகவும் இருக்கின்றான். அவனின் உதவியின்றி எவருக்கும் சக்தி இல்லை.

அல்லாஹ்வின் தூதர் (ஸல்) அவர்கள்மீது ஸலவாத் கூறி சாந்தி வேண்டுவதென்பது, மிகச் சிறந்த வணக்கங்களில் ஒன்றாகவும், நல்லறச் செயல்களில் ஒன்றாகவும் இருக்கின்றது. அல்லாஹ் கூறுகின்றான்: "நிச்சயமாக அல்லாஹ்வும் அவனது மலக்குகளும் நபியை வாழ்த்துகிறார்கள். நம்பிக்கையாளர்களே! நீங்களும் அவரை வாழ்த்துங்கள்! இன்னும் ஸலாம் கூறுங்கள்!" (அஹ்ஸாப் : 56), நபி (ஸல்) அவர்கள் கூறுகிறார்கள் : "யார் என்மீது ஒரு முறை 'ஸலவாத்' கூறுகிறாரோ அவர் மீது அல்லாஹ் பத்து தடவைகள் ஸலவாத் கூறுவான்". இது அனைத்து நேரங்களிலும் செய்யப்பட வேண்டியதாகும், மேலும் ஒவ்வொரு தொழுகையின் இறுதியில் வலியுறுத்தப்பட்டதாகும். பல அறிஞர்களின் கருத்துப்படி, ஒவ்வொரு தொழுகையின் இறுதி தஷஹ்ஹுதில் இது கடமையாகும். பல இடங்களில் இது வலியுறுத்தப்பட்ட ஸுன்னாவாக மாறுகின்றது. உதாரணமாக, பாங்குக்குப் பின், நபி (ஸல்) அவர்களது பெயர் கூறப்படும் போது, ஜும்ஆ நாளிலும் அதன் இரவிலும். வேலு பல நபிமொழிகள் இதனை உறுதிப்படுத்துகின்றன.

எமக்கும் முஸ்லிம்கள் அனைவருக்கும் மார்க்கத்தில் விளக்கத்தையும், அதில் உறுதியையும் வழங்குமாறு அல்லாஹ்விடம் பிரார்த்திக்கின்றோம். மேலும் அனைவரும் சுன்னத்தைப் பின்பற்றவும், புதுமைகளைத் தவிர்க்கவும் அருள் புரிய வேண்டுமெனவும் பிரார்த்திக்கின்றோம். அவன் மிகப்பெரும் கொடையாளனும், தாராளத்தன்மையுடையனுமாவான்.

எமது நபி முஹம்மத் (ஸல்) அவர்களின் மீதும், அவர்களின் குடும்பத்தார் தோழர்கள் மீதிலும் அல்லாஹ்வின் ஸலாத்தும், ஸலாமும் உண்டாவதாக.

ஆறாவது கடிதம் :

இஸ்ரா, மிஃராஜ் இரவைக் கொண்டாடுவதன் சட்டம்

புகழனைத்தும் அழ்ழாஹ் ஒருவனுக்கே உரித்தாகட்டும். ஸலாத்தும், ஸலாமும் அல்லாஹ்வின் தூதர் மீதும் அவர்களின் குடும்பத்தார் மீதும், அவர்களின் தோழர்கள் மீதும் உண்டாவதாக.

இஸ்ரா மற்றும் மிஃராஜ் என்பது, அல்லாஹ்வின் தூதர் முஹம்மத் (ஸல்) அவர்கள் உண்மையாளர் என்பதையும், அவனிடம் அவர்களுக்கு இருக்கும் மகத்தான சிறப்பையும் அறிவிக்கும் இறை அத்தாட்சிகளில் ஒன்று என்பதில் எந்த சந்தேகமும் இல்லை. மேலும் அதேபோன்று, அது அல்லாஹ்வின் அபார வல்லமைக்கான ஆதாரங்களுள் ஒன்றாகவும், அவன் தனது எல்லாப் படைப்புகளுக்கும் மேலாக உயர்ந்திருக்கின்றான் என்பதற்கான ஆதாரமாகவும் இருக்கிறது. அல்லாஹ் கூறுகின்றான்: (மக்காவின்) புனிதமான மஸ்ஜிதிலிருந்து (பைத்துல் முகத்தஸில் உள்ள) அல் மஸ்ஜிதுல் அக்ஸா வரை தன் அடிமை(யாகிய முஹம்மத் நபி)யை இரவில் அழைத்துச் சென்ற (இறை)வன் மிகப் பரிசுத்தமானவன். அ(ந்த மஸ்ஜி)தைச் சுற்றி நாம் அருள் புரிந்தோம். நமது அத்தாட்சிகளிலிருந்து (பலவற்றை) அவருக்கு காண்பிப்பதற்காக அவரை அழைத்து சென்றோம். நிச்சயமாக அவன்தான் நன்கு செவியுறுபவன், உற்று நோக்குபவன் ஆவான். (அல்இஸ்ராஃ : 1)

அல்லாஹ்வின் தூதர் முஹம்மத் ﷺ அவர்களுக்கு வானங்களுக்கு உயர்த்தப்படும் மிஃராஜ் நிகழ்ந்தது பற்றிய செய்திகள் பல்வேறு அறிவிப்புக்கள் வாயிலாக உறுதியாக வந்துள்ளன. வானங்களின் கதவுகள் அவர்களுக்கு திறக்கப்பட்டு, அவர்கள் ஏழாவது வானத்தையும் தாண்டினார்கள். பின்னர் அவர்களுடைய இறைவனாகிய அல்லாஹ் தான் நாடியவை பற்றி அவர்களுடன் உரையாடி, அவர்கள்மீது ஐவேளைத் தொழுகைகளை கடமையாக்கினான். முதலில் அவற்றை அல்லாஹ் ஐம்பது தொழுகைகளாக விதியாக்கினான்; ஆனால் நம்முடைய நபி முஹம்மத் ﷺ அவர்கள் குறைக்குமாறு மீண்டும் மீண்டும் கேட்டுக் கொண்டே இருந்து, இறுதியில் அவை ஐந்தாக மாற்றப்பட்டன. ஆகவே கடமையில் அவை ஐந்தாக இருப்பினும், நற்கூலியில் ஐம்பதிற்கு சமம். ஏனெனில் ஒவ்வொரு நற்செயலும் பத்து மடங்கு பலனைத் தரும். ஆகையால் அல்லாஹ் அருளிய அனைத்து நன்மைகளுக்கும் எல்லாப் புகழும் நன்றியும் அவனுக்கே உரியது.

இஸ்ரா மற்றும் மிஃராஜ் நிகழ்ந்த இந்த இரவு, ரஜப் மாதத்தில் என்றோ, அல்லது வேறு மாதத்தில் என்றோ ஸஹீஹான ஹதீஸ்களில் குறிப்பிடப்பட்டு எங்கும் வரவில்லை. அதன் நாளை நிர்ணயித்து வரும் அனைத்தும், ஹதீஸ் அறிஞர்களின் பார்வையில், நபி ஸல்லல்லாஹு அலைஹிவஸல்லம் அவர்களிடமிருந்து உறுதிப்படுத்தப்படாதவையாகும். அதை மக்களிடம் இருந்து மறக்கச் செய்ததிலும் அல்லாஹ்வின் ஆழ்ந்த ஞானம் இருக்கிறது. அத்தினம் ஆதாரப்பூர்வமாக அறியப்பட்டாலும், முஸ்லிம்கள் அதை எந்த வகை வழிபாட்டாலும் சிறப்பிப்பது அனுமதிக்கப்படாது; அதை முன்னிட்டு கொண்டாட்டங்கள் நடத்துவதும் அனுமதிக்கப்படாது. ஏனெனில் நபி ஸல்லல்லாஹு அலைஹிவஸல்லம் அவர்களும், அவர்களின் ஸஹாபாக்களும் அதை விழாவாகக் கொண்டாடவில்லை; அதை எந்த விஷயத்திலும் தனித்துவப்படுத்தவுமில்லை . அதை கொண்டாடுவது மார்க்கத்தில் உள்ள ஒன்றாக இருந்திருந்தால், நபி ஸல்லல்லாஹு அலைஹி வஸல்லம் அவர்கள் அதனை உம்மத்துக்கு சொல்லாலோ, செயலாலோ விளக்கியிருப்பார்கள். அவ்வாறு ஏதேனும் நிகழ்ந்திருந்தால், அது அறியப்பட்டு பரவலாகப் பிரபல்யமடைந்திருக்கும். மேலும் அதை அவர்களின் தோழர்கள் (ரழி) எங்களுக்கு அறிவித்திருப்பார்கள். ஏனெனில் உம்மத்துக்கு தேவையான அனைத்தையும் அவர்கள் தங்கள் நபி ஸல்லல்லாஹு அலைஹி வஸல்லம் அவர்களிடமிருந்து அறிவித்துள்ளனர். மார்க்கத்தில் எதிலும் அவர்கள் அலட்சியம் செய்யவில்லை; மாறாக ஒவ்வொரு நன்மையிலும் அவர்கள் தாம் முன்னோடிகளாக இருந்தவர்கள். ஆகவே, இந்த இரவை கொண்டாடுவது மார்க்கத்தில் உள்ள ஒன்றாக இருந்திருந்தால், அதற்கு அவர்கள் மக்களில் யாவரையும் விட முந்திக்கொண்டிருப்பார்கள். நபி ஸல்லல்லாஹு அலைஹி வஸல்லம் அவர்கள் தான், மக்களிலேயே மக்களுக்கு மிகுந்த நலன்விரும்பியவர்களாக இருந்தார்கள். அவர்கள் அல்லாஹ்வின் செய்தியை முழுமையாக அறிவித்தார்கள்; அவர்கள்மீது வைக்கப்பட்ட அமானிதத்தையும் நிறைவேற்றினார்கள். ஆக, இந்த இரவைப் பெருமைப்படுத்துவதும் அதை விழாவாகக் கொண்டாடுவதும் அல்லாஹ்வின் மார்க்கத்தில் இருந்து இருந்திருந்தால், நபி ஸல்லல்லாஹு அலைஹி வஸல்லம் அவர்கள் அதை ஒருபோதும் புறக்கணித்தோ மறைத்தோ இருக்கமாட்டார்கள். அவ்வாறான எதுவும் நிகழாததால், அதை விழாவாகக் கொண்டாடுவதும் பெருமைப்படுத்துவதும் இஸ்லாமில் உள்ளதல்ல என்பது தெளிவாகிறது. மேலும், இந்த உம்மத்திற்காக சர்வவல்லமையுள்ள இறைவன் தனது மார்க்கத்தைப் பூரணப்படுத்தி, அவர்கள்மேல் தனது அருளை நிறைவு செய்துவிட்டான்; அல்லாஹ் அனுமதிக்காததை மார்க்கத்தில் உருவாக்குபவர்களை அவன் கண்டித்துள்ளான். தனது தெளிவான வேதத்தில் அல்லாஹ் இவ்வாறு கூறுகின்றான்: "இன்று உங்களுக்கு உங்கள் மார்க்கத்தை நான் முழுமையாக்கினேன். இன்னும், என் அருட்கொடையை உங்கள் மீது நிறைவு செய்தேன். இன்னும், இஸ்லாமை உங்களுக்கு மார்க்கமாக திருப்தியடைந்தேன்." (அல்மாஇதா : 3). மேலும் அல்லாஹ் குறிப்பிடுகிறான் : (அல்லாஹ்வின்) மார்க்கத்தில் அல்லாஹ் எதை கட்டளை இடவில்லையோ அதை இவர்களுக்கு சட்டமாக (-மார்க்கமாக) ஆக்கித்தருகின்ற தெய்வங்களும் இவர்களுக்கு உண்டா? (இவர்களுக்கு தண்டனை மறுமையில்தான் என்ற) தீர்ப்பின் வாக்கு மட்டும் இல்லை என்றால் அவர்களுக்கு மத்தியில் (இவ்வுலகிலேயே) தீர்ப்பளிக்கப்பட்டிருக்கும். நிச்சயமாக அநியாயக்காரர்கள், துன்புறுத்தும் தண்டனை அவர்களுக்கு உண்டு. (அஷ்ஷூரா : 21)

நபி (ஸல்) அவர்கள் பித்அத்களை எச்சரித்தும், அவை வழிகேடு எனத் தெளிவாகக் கூறியும், தமது சமுதாயத்தினருக்கு அதன் பாராதூரம் பற்றி உணர்த்தி, அதைச் செய்யவேண்டாம் என எச்சரித்திருப்பது ஆதாரப்பூர்வமான ஹதீஸ்களில் தரிபட்டுள்ளது. உதாரணமாக, புகாரி மற்றும் முஸ்லிமின் அறிவிப்பில், நபியவர்கள் கூறியதாக ஆயிஷா (ரலி) அவர்கள் இவ்வாறு கூறுகின்றார்கள் : 'எமது இந்த மார்க்த்தில் இல்லாத புதிய ஒரு விடயத்தை மார்க்கமாக யார் உண்டாக்குகிறானோ அவனுடைய அந்தப் புதுமை நிராகரிக்கப்பட்டதாகும்'. முஸ்லிமின் அறிவிப்பில்: "எவரேனும் ஒருவர் எமது மார்க்கத்தில் இல்லாத ஒன்றை செய்வாராயின் அது மறுக்கப்பட வேண்டிய ஒன்றாகும்". நபி (ஸல்) அவர்கள் ஜும்ஆத் தினத்தில் ( வெள்ளிக்கிழமை) தனது குத்பாக்களில் பின்வருமாறு கூறுவார்கள் என்று ஜாபிர்(ரழி) அறிவிக்கும் ஹதீஸ் முஸ்லியில் பதிவாகியுள்ளது : “இதன் பின்: வார்த்தைகளில் மிகச் சிறந்தது அல்லாஹ்வின் வேதமாகும். வழிகாட்டல்களில் மிகச் சிறந்தது முஹம்மத் (ஸல்) அவர்களின் வழிகாட்டலாகும். விடயங்களில் மிகக் கெட்டது (மார்க்கம் என்ற பெயரில்) புதிதாக உருவாக்கப்பட்டவையாகும். பித்அத்கள் அனைத்தும் வழிகேடாகும்.” நஸாயி அவர்கள், நல்ல ஓர் அறிவிப்பாளர் தொடர் மூலம் இவ்வாறு மேலதிகமாக அறிவித்துள்ளார்கள்: வழிகேடுகள் அனைத்தும் நரகத்திற்கே அல்-இர்பாழ் இப்னு ஸாரியா ரழியல்லாஹு அன்ஹு அவர்கள் அறிவிக்கும் ஹதீஸ் ஸுனன் நூற்களில் இவ்வாறு அறிவிக்கப்பட்டுள்ளது: 'அல்லாஹ்வின் தூதர் ஸல்லல்லாஹு அலைஹிவஸல்லம் அவர்கள் எமக்கு உள்ளங்கள் நடுங்கி, கண்கள் கண்ணீர் சிந்துமளவிற்கு மிகவும் ஆழமான ஓர் உபதேசத்தை செய்தார்கள். அப்போது நாங்கள்: “அல்லாஹ்வின் தூதரே! இது விரைவில் பிரிந்து செல்லும் ஒருவரின் அறிவுரையாயிற்றே. ஆகவே எங்களுக்கு உபதேசம் செய்யுங்கள்” என்று கூறினோம். அதற்கு அவர் கூறினார்கள்: “அல்லாஹ்வை அஞ்சுமாறும், செவிசாய்த்து கீழ்ப்படியுமாறும், ஒர் அடிமையே உங்களது தலைவராக வந்தாலும் அவருக்கு முழுமையாகக் கட்டுப்படுமாறும் உங்களுக்கு உபதேசிக்கின்றேன். நிச்சயமாக உங்களில் அதிக நாட்கள் வாழ்பவர்கள் அதிக கருத்து வேறுபாடுகளைக் காண்பார். அப்போது நீங்கள் எனது வழிமுறையையும், எனக்குப் பின்னால் (ஆளும்) நேர்வழிபெற்ற கலீபாக்களினது வழிமுறையையும் பின்பற்றுங்கள்; அவற்றைப் பற்றிக்கொண்டு உங்கள் கடைவாய் பற்களால் உறுதியாகப் பிடியுங்கள். மார்க்கத்தின் பெயரால் உருவாக்கப்பட்ட நூதன அனுஷ்டானங்களை விட்டும் உங்களை நான் எச்சரிக்கிறேன்; ஏனெனில் புதிதாக உருவாக்கப்பட்ட ஒவ்வொரு விஷயமும் பித்அத் ஆகும், அனைத்து பித்அத்களும் வழிகேடாகும்.” இதே அர்த்தத்தில் அதிகமான ஹதீஸ்கள் இடம்பெற்றுள்ளன.

அல்லாஹ்வின் தூதர் (ஸல்லல்லாஹு அலைஹி வஸல்லம்) அவர்களின் ஸஹாபாக்களும், அவர்களைத் தொடர்ந்து வந்த ஸலஃப் ஸாலிஹீன்களும் பித்அத்திலிருந்து எச்சரித்தமையும், அதைப் பற்றி அச்சுறுத்தியமையும் ஆதரப்பூர்வமாக பதிவுசெய்யப்பட்டுள்ளது. ஏனெனில் அது மார்க்கத்தில் அதிகரிப்பதாகவும்,, அல்லாஹ் அனுமதிக்காத ஒரு சட்டமாக்கலாகவும் இருக்கிறது. மேலும், அல்லாஹ்வின் பகைவர்களாகிய யூதர்களும் நஸ்ரானிகளும் தங்கள் மார்க்கத்தில் செய்த சேர்த்தல்களிலும், அல்லாஹ் அனுமதிக்காதவற்றை அதில் புதிதாக உருவாக்கிக் கொண்டதிலும் அவர்களை ஒத்துப் பின்பற்றுதலாகவும் அமைகிறது. மேலும், அதன் தவிர்க்க முடியாத விளைவு, இஸ்லாமிய மார்க்கத்தை இழிவுபடுத்துதலும், அதனை முழுமையற்றதென குற்றம்சாட்டுதலும் ஆகும். இதில் உள்ள பாரதூரமான சீர்கெடும், கொடிய பாவமும் நாம் அறிந்ததே. அல்லாஹ் கூறுகின்றான் : "இன்று உங்களுக்கு உங்கள் மார்க்கத்தை நான் முழுமையாக்கினேன்." (அல்மாஇதா : 3). பித்அத்திலிருந்து எச்சரிக்கும், அதிலிருந்து வெறுப்படையச் செய்யும் நபி (ஸல்) அவர்களின் ஹதீஸ்களுக்கு வெளிப்படையாக இது முரண்படவும் செய்கின்றது.

இத்துடன், இஸ்ரா மற்றும் மிஃராஜ் இரவைக் கொண்டாடுதல் என்ற இந்த புதுமையை மருப்பதற்கும், மேலும், இது இஸ்லாம் மார்க்கத்தில் உள்ளதல்ல என எச்சரிப்பதற்கும் சத்தியத்தைத் தேடுபவருக்கு, நாம் குறிப்பிட்ட ஆதாரங்கள் போதுமானதாகவும், ஏற்றுக்கொள்ளத்தக்கதாகவும் இருக்கும் என நான் நம்புகிறேன்.

முஸ்லிம்களுக்கு நலவுநாடுதல், அல்லாஹ் அவர்களுக்கு விதித்த மார்க்கத்தை விளக்குதல் என்பனவற்றை அல்லாஹ் கட்டாயமாக்கியுள்ளதாலும், அறிவை மறைப்பதைத் தடுத்துள்ளதாலும், சிலர் இதனை மார்க்கத்தின் ஒரு பகுதியாகக் கருதுமளவு பல இடங்களில் பரவியுள்ள இந்தப் புதுமையைப் பற்றி என் முஸ்லிம் சகோதரர்களை எச்சரிப்பது அவசியம் எனக் கருதினேன்.

அனைத்து முஸ்லிம்களின் நிலைமைகளை சீர்படுத்தவும், அவர்களுக்கு மார்க்க விளக்கத்தை வழங்கவும், எமக்கும் அவர்களுக்கும் சத்தியத்தைப் பற்றிக் கொள்வதிலும் அதில் உறுதியாக இருப்பதிலும் உதவவும், அதற்கு முரணானவற்றை விட்டு விடவும் அல்லாஹ்விடம் பிரார்த்திக்கின்றோம். இதற்கு அவனே பொறுப்பாளனும் வல்லமைமிக்கவனாகவும் உள்ளான்.

அல்லாஹ்வின் ஸலாத்தும், ஸலாமும், பரிபூரண ஆசீர்வாதமும் எங்கள் நபியும் அல்லாஹ்வின் அடியாரும் தூதருமாகிய முஹம்மத் ஸல்லல்லாஹு அலைஹிவஸல்லம் அவர்கள் மீதும், அவர்களின் குடும்பத்தார் மற்றும் தோழர்கள் அனைவர் மீதிலும் உண்டாவதாக.

ஏழாவது கடிதம்:

ஷஅபான் மாதத்தின் நடு இரவை கொண்டாடுவதற்கான சட்டம்

புகழனைத்தும் அல்லாஹ்வுக்கே, அவனே நமக்கு மார்க்கத்தை முழுமையாக்கி, நமக்கு அருளை நிறைவாக்கினான். ஸலாத்தும் ஸலாமும் அவனின் நபி மற்றும் தூதராகிய, தவ்பா மற்றும் ரஹ்மத்தின் நபி முஹம்மத் அவர்கள் மீது உண்டாகட்டும்.

அல்லாஹ் கூறுகின்றான்: இன்று உங்களுக்கு உங்கள் மார்க்கத்தை நான் முழுமையாக்கினேன். இன்னும், என் அருட்கொடையை உங்கள் மீது நிறைவு செய்தேன். இன்னும், இஸ்லாமை உங்களுக்கு மார்க்கமாக திருப்தியடைந்தேன். (அல்மாஇதா : 3). மேலும் அல்லாஹ் கூறுகின்றான்: (அல்லாஹ்வின்) மார்க்கத்தில் அல்லாஹ் எதை கட்டளை இடவில்லையோ அதை இவர்களுக்கு சட்டமாக (-மார்க்கமாக) ஆக்கித்தருகின்ற தெய்வங்களும் இவர்களுக்கு உண்டா? (அஷ்ஷூரா : 21) நபி ஸல்லல்லாஹு அலைஹிவஸல்லம் அவர்கள் கூறியதாக ஆஇஷா ரழியல்லாஹு அன்ஹா அவர்கள் அறிவிக்கும் ஹதீஸ் புகாரி மற்றும் முஸ்லிம் கிரந்தங்களில் பதியப்பட்டுள்ளது: 'எமது இந்த மார்க்த்தில் இல்லாத புதிய ஒரு விடயத்தை மார்க்கமாக யார் உண்டாக்குகிறானோ அவனுடைய அந்தப் புதுமை நிராகரிக்கப்பட்டதாகும்'. நபி (ஸல்) அவர்கள் ஜுமுஆக் உரையில் பின்வருமாறு கூறுவார்கள் என்று ஜாபிர்(ரழி) அறிவிக்கும் ஹதீஸ் முஸ்லியில் பதிவாகியுள்ளது: “நிச்சயமாக, வார்த்தைகளில் மிகச் சிறந்தது அல்லாஹ்வின் வேதமாகும்; வழிகாட்டல்களில் மிகச் சிறந்தது முஹம்மத் (ஸல்) அவர்களின் வழிகாட்டலாகும்; விடயங்களில் மிகக் கெட்டது (மார்க்கம் என்ற பெயரில்) புதிதாக உருவாக்கப்பட்டவையாகும்; பித்அத்கள் அனைத்தும் வழிகேடாகும்.” இதே பொருளை எடுத்துக்கூறும் வசனங்களும் நபிமொழிகளும் அநேகம் உள்ளன. அவை, அல்லாஹ் இந்த உம்மத்திற்காக அவர்களது மார்க்கத்தை முழுமைப்படுத்தி விட்டான் என்றும், அவர்கள் மீது தனது அருட்கொடையைப் பூரணப்படுத்தி விட்டான் எனவும், தம் நபி முஹம்மத் ஸல்லல்லாஹு அலைஹிவஸல்லம் அவர்கள் வெளிப்படையான அறிவித்தலின் பணியை முழுமையாக நிறைவேற்றிய பின்னரே அவர்களைத் தம்வசம் அழைத்தான் என்றும், மேலும் உம்மத்தினருக்காக அல்லாஹ் சட்டமாக்கிய சொல், செயல் அனைத்தையும் அவர்கள் தெளிவாக விளக்கி வைத்தார்கள் என்பதையும் மிகத் தெளிவாக அறிவிக்கின்றது. நபி ஸல்லல்லாஹு அலைஹி வஸல்லம் அவர்கள், தமக்குப் பிறகு மக்கள் உருவாக்கி, இஸ்லாம் மார்க்கத்திற்குச் சொந்தமானதாகக் கூறும் எந்தச் சொற்களாக இருந்தாலும், செயல்களாக இருந்தாலும், அவை அனைத்தும் பித்அத்; அவை நிராகரிக்கப்பட்டு, அதை உருவாக்கியவர் மீதே திருப்பப்படும்; அவருடைய நோக்கம் நன்றாக இருந்தாலும் சரியே எனத் தெளிவுவாடுத்தியுள்ளார்கள். இந்த விடயத்தை ரஸூலுல்லாஹ் ஸல்லல்லாஹு அலைஹி வஸல்லம் அவர்களின் தோழர்கள் நன்கு அறிந்திருந்தார்கள். அவர்களுக்கு பிந்தைய இஸ்லாமிய அறிஞர்களும் அதேபோல் பித்அத்துக்களை நிராகரித்து, அவற்றிலிருந்து எச்சரித்தார்கள். ஸுன்னாவை மேன்மைப்படுத்தி, பித்அத்தை நிராகரித்தல் குறித்த நூற்களை எழுதிய அனைவரும் இதனை குறிப்பிட்டுள்ளனர்; உதாரணமாக இப்னு வத்தாஹ், அத்துர்தூஷி, அபூ ஷாமா மற்றும் பிறர்.

சிலர் புதிதாக அறிமுகப்படுத்திய பித்அத்களில் ஒன்று, ஷஅபான் மாதத்தின் பதினைந்தாம் தின இரவின் கொண்டாட்டமும், அதன் நாளில் நோன்பு நோற்பதும் ஆகும். இதற்கான ஆதாரமாக நம்பத்தகுந்த ஆதாரம் எதுவும் இல்லை. அதன் சிறப்புக்கள் தொடர்பாக வந்துள்ள ஹதீஸ்கள் பலவீனமானவை, அவற்றை ஆதாரமாகக்கொள்ள முடியாது.

அவ்விரவில் தொழுவதன் சிறப்புகள் குறித்து வந்துள்ளவை அனைத்தும் இட்டுக்கட்டப்பட்டவையே! இதனைப் பற்றி அறிஞர் பெருமக்கள் பலர் எச்சரித்துள்ளனர். அவர்களின் கருத்துக்களில் சிலவற்றை இன்ஷா அல்லாஹ் பின்னர் குறிப்பிடுவோம்.

இது தொடர்பாக, ஷாம் பகுதியைச் சேர்ந்த ஸலப் அறிஞர்களின் செய்திகள் மற்றும் பிற அறிஞர்களின் செய்திகளும் உள்ளன.

பெரும்பான்மை அறிஞர்களின் ஏகோபித்த கருத்தின் படி, இதனை (மௌலித்) கொண்டாடுவது பித்அத்ஆவாகும். மேலும், இதன் சிறப்பு பற்றிய ஹதீஸ்கள் அனைத்தும் பலவீனமானவையாகும். சில ஹதீஸ்கள் முற்றிலும் பொய்யானவையாகும். இதனைப் பற்றி எச்சரித்தவர்களில் ஒருவரான, ஹாபிழ் இப்னு ரஜப் அவர்கள், தமது 'லதாயிஃபுல் மஆரிஃப்' போன்ற நூற்களல் இதனை குறிப்பிட்டுள்ளனர். மேலும், பலவீனமான ஹதீஸ்கள் என்பவை, ஸஹீஹான ஆதாரங்களால் உறுதிப்படுத்தப்பட்ட வணக்கங்களில் மட்டுமே பயன்படுத்தப்படுகின்றன என்பது தெரிந்ததே. ஷஅபானின் நடுப்பகுதி இரவைக் கொண்டாடுவதைப் பொறுத்தவரை, பலவீனமான ஹதீஸ்களால் ஆதரிக்கப்படுவதற்கு, அதற்கு சரியான அடிப்படையே இல்லை. இந்த மகத்தான விதியை இமாம் அபூ அல்-அப்பாஸ் ஷெய்க் அல்-இஸ்லாம் இப்னு தைமிய்யா (ரஹ்மதுல்லாஹி அலைஹி) குறிப்பிடுகிறார்.

எனவே, வாசகனே! இந்த விவகாரம் பற்றி நீர் தெளிவாக இருப்பதற்காக, சில அறிஞர்கள் கூறியதை உனக்கு எடுத்துரைக்கின்றேன்,

அல்லாஹ்வின் அருளால், மார்க்க அறிஞர்கள் அனைவரும், மக்கள் மத்தியில் ஏற்படும் முரண்பாடுகளை அல்லாஹ்வின் அல்குர்ஆனுக்கும், நபி -ஸல்லல்லாஹு அலைஹி வஸல்லம்- அவர்களின் ஸுன்னாவுக்கும் திருப்புவது கடமை என ஒருமித்த கருத்தில் உள்ளனர். அவை அல்லது அவற்றில் ஒன்று வழங்கும் தீர்ப்பே கடைப்பிடிக்க வேண்டிய ஷரீஅத் ஆகும். அவற்றிற்கு முரணானதை விட்டு விட வேண்டும். அவற்றில் வராத எந்தவொரு வழிபாடும் பித்அத் ஆகும்; அதைச் செய்வது கூடாது, அதனைப் பற்றி அழைப்பதும், ஊக்குவிப்பதும் கூடாது. அல்லாஹ் -அவனுக்கு மகிமை உண்டாகுக- பின்வருமாறு கூறுகிறான்: நம்பிக்கையாளர்களே! நீங்கள் அல்லாஹ்விற்கு கீழ்ப்படியுங்கள். இன்னும், (அல்லாஹ்வுடைய) தூதருக்கும், உங்கள் ஆட்சியாளர்களுக்கும் கீழ்ப்படியுங்கள். ஆக, (நம்பிக்கையாளர்களே!) நீங்கள் உங்களுக்குள் ஒரு விஷயத்தில் தகராறுசெய்தால், (மெய்யாகவே) நீங்கள் அல்லாஹ்வையும், இறுதிநாளையும் நம்பிக்கை கொண்டவர்களாயிருந்தால் அதை அல்லாஹ்விடமும் (அவனுடைய) தூதரிடமும் திருப்பிவிடுங்கள். (அவர்களுடைய தீர்ப்பை திருப்தியுடன் ஒப்புக் கொள்ளுங்கள்.) இதுதான் உங்களுக்கு சிறந்ததும், மிக அழகான முடிவும் ஆகும். (அந்நிஸா : 59), மேலும் அல்லாஹ் கூறுகின்றான் : எந்த ஒரு விஷயத்தில் நீங்கள் முரண்பட்டாலும் அதன் இறுதி தீர்ப்பு அல்லாஹ்வின் பக்கம்தான் உள்ளது... (அஷ்ஷூரா : 10) மேலும் அல்லாஹ் கூறுகின்றான் : (நபியே!) கூறுவீராக: “நீங்கள் அல்லாஹ்வின் மீது அன்பு வைப்பவர்களாக இருந்தால் என்னைப் பின்பற்றுங்கள். அல்லாஹ் உங்கள் மீது அன்பு வைப்பான்; இன்னும், உங்களுக்கு உங்கள் பாவங்களை மன்னிப்பான்... (ஆல இம்ரான் : 31) மேலும் அல்லாஹ் குறிப்பிடுகிறான் : ஆக, (உண்மை அவ்வாறு) இல்லை. உம் இறைவன் மீது சத்தியமாக! அவர்களுக்கிடையில் சச்சரவு ஏற்பட்டதில் அவர்கள் உம்மை தீர்ப்பாளராக்கி, பிறகு, நீர் தீர்ப்பளித்ததில் தங்கள் உள்ளங்களில் அறவே அதிருப்தி காணாமல் (-சங்கடத்தை உணராமல்) முழுமையாக (உமது தீர்ப்புக்கு) பணியும் வரை அவர்கள் நம்பிக்கையாளர்களாக ஆகமாட்டார்கள். (அந்நிஸா : 65) இக்கருத்தில் பல திரு வசனங்கள் உள்ளன. அவை முரண்பாடான கேள்விகளை அல்குர்ஆனுக்கும், நபிமொழிகளுக்கும் திருப்புவதன் அவசியத்தை வலியுறுத்துகின்றன. அவற்றின் தீர்ப்பை ஏற்றுக்கொள்வதும் அவசியம், ஏனெனில் அது ஈமான் கொண்டவர்களின் அடிப்படையாகும். இது அடியார்களுக்கு இம்மையிலும் மறுமையிலும் நன்மை தரும், மேலும் சிறந்த விளைவையும் கொண்டுள்ளது.

இப்னு ரஜப் (ரஹ்) அவர்கள் தமது 'லதாயிஃபுல் மஆரிஃப்' எனும் நூலில் இவ்விஷயத்தில் பின்வருமாறு கூறுகின்றார்கள்: (முன்னர் கூறியவற்றின் பின்னர்)

ஷஅபானின் நடுப்பகுதி இரவின் சிறப்பை, ஷாமின் தாபிஊன்களான, காளித் பின் மஅதான், மக்ஹூல், லுக்மான் பின் ஆமிர் மற்றும் பிறர், பெரிதும் மதித்து, அதில் வணக்க வழிபாடுகளில் அதிக முயற்சியுடன் ஈடுபட்டனர். அவர்களிடமிருந்து மக்கள் அதன் சிறப்பையும் மதிப்பையும் கற்றுக்கொண்டனர். அவர்களுக்கு இஸ்ராயீலிய அறிவிப்புக்கள் சில கிடைத்ததாகவும் கூறப்படுகின்றது. அது அவர்களிடமிருந்து பல நாடுகளில் பரவியபோது, மக்களில் அதில் கருத்து வேறுபாடு ஏற்பட்டது; சிலர் அதை ஏற்றுக்கொண்டு, மேலும் அதை புனிதப்படுத்துவதில் அவர்களைச் சரிகண்டனர், அதில் பஸ்ராவின் வணக்கவாளிகள் மற்றும் வேறு சிலரும் உள்ளனர். இதை அதா, இப்னு அபீ முலைகா போன்ற பெரும்பாலான ஹிஜாஸ் அறிஞர்கள் மறுத்தனர். அப்துர் ரஹ்மான் பின் ஸைத் பின் அஸ்லம் அவர்கள் மதீனா ஃபுகஹாக்களிடமிருந்து இதனை அறிவித்துள்ளார்கள். இது மாலிக் மற்றும் அவர்களது தோழர்கள் போன்றோரின் கருத்தாகும். அவர்கள், இது அனைத்தும் பித்அத் ஆகும் என்று கூறுகின்றனர்.

சிரியா பகுதியின் அறிஞர்கள் இதை உயிர்ப்பித்தல் தொடர்பாக இரண்டு வேறுபட்ட கருத்துக்களை கொண்டுள்ளனர்:

ஒன்று: பள்ளிவாயல்களில் கூட்டமாக அதனை உயிர்ப்பித்தல் விரும்பத்தக்கதாகும். காளித் இப்னு மஅதான், லுக்மான் இப்னு ஆமிர் மற்றும் பிறர் அதற்காக அழகிய ஆடைகளை அணிந்து, வாசணைப் பொருட்களை புகைபோட்டு, கண்ணில் சுர்மா இட்டு, அந்த இரவை பள்ளிவாசலில் கழிப்பார்கள். இஸ்ஹாக் இப்னு ராஹுவை அவர்களும் இதை சரிகண்டுள்ளார்கள். மேலும், பள்ளிவாசலில் கூட்டாக இதை நிறைவேற்றுவது பற்றி அவர்கள், “இது பித்அத் அல்ல” என்று கூறியுள்ளார்கள். இதனை ஹர்ப் அல் கர்மானி தனது மஸாஇல் எனும் நூலில் குறிப்பிட்டுள்ளார்.

இரண்டாவது: தொழுகை, சரித்திரம் கூறல் மற்றும் துஆக்களுக்காக கூட்டமாகச் சேர்வது வெறுக்கத்தக்கதாகும், ஆனால் தனிப்பட்ட முறையில் தொழுவது வெறுக்கப்படமாட்டாது. இது ஷாம் மக்களின் இமாம், ஃபகீஹ் மற்றும் அறிஞரான அவ்தாஈ (ரஹ்) அவர்களின் கருத்தாகும், இதுவே - இன் ஷா அல்லாஹ் - மிகச் சரியான கருத்தாகும். அவர்கள் தொடர்ந்து கூறுகின்றார்கள்: «ஷஅபான் மாதத்தின் பதினைந்தாம் இரவைப் பற்றி இமாம் அஹ்மத் அவர்கள் எதுவும் கூறியதாக அறியப்படவில்லை. அதன் கியாம் (இரவு தொழுகை) விருப்பமானது என்பதில், பெருநாள் இரவுகளில் நின்றுவணங்குவது பற்றிய அவரிடமுள்ள இரு அறிவிப்புகளை அடிப்படையாகக் கொண்டு அவரிடமிருந்து இரண்டு அறிவிப்புகள் பெறப்படுகின்றன. அவற்றில், ஒரு அறிவிப்பின் படி, அதை ஜமாஅத்தாக செய்வதை அவர் விரும்பவில்லை; ஏனெனில், நபி ஸல்லல்லாஹு அலைஹி வஸல்லம் அவர்கள் மற்றும் அவர்களின் தோழர்கள் (ரழி) யாரிடமிருந்தும் அவ்வாறு அறிவிக்கப்படவில்லை.» மற்ற அறிவிப்பில் அது விரும்பத்தக்கது எனக் கருதுகின்றார்கள்; ஏனெனில் தாபிஊனில் ஒருவரான அப்துர் ரஹ்மான் இப்னு யஸீத் இப்னுல் அஸ்வத் அவர்கள் அப்படிச் செய்ததாக வந்துள்ளது. இதேபோல ஷஅபான் மாதத்தின் பதினைந்தாம் இரவில் நின்று வணங்குவது குறித்தும், நபி ஸல் அவர்களிடமிருந்தோ நபித்தோழர்களிடமிருந்தோ எந்த உறுதிப்படுத்தப்பட்ட ஆதாரமும் இல்லை; ஆனால் அஷ்ஷாம் பகுதியின் சிறந்த ஃபுகஹாக்களில் அடங்கும் சில தாபிஊன் அறிஞர்கள் செய்ததாகத் தரிபட்டுள்ளது.

இப்னு ரஜப் (ரஹ்) அவர்களின் உரையின் முக்கிய நோக்கம் இத்துடன் நிறைவுபெறுகிறது; இதில் அவர் வெளிப்படையாகக் குறிப்பிட்டதாவது: ஷஅபான் மாதத்தின் பதினைந்தாம் இரவைப் பற்றி நபியவர்கள் (ஸல்) அவர்களிடமிருந்தும், அவர்களின் ஸஹாபாக்கள் (ரழி) அவர்களிடமிருந்தும் உறுதியான ஆதாரம் எதுவும் வரவில்லை.

இமாம் அவ்ஸாஈ (ரஹ்) அவர்கள், அவ்விரவில் தனிநபர்கள் தனித்தனியாகக் கியாமில் ஈடுபடுவது விரும்பத்தக்கது என்ற கருத்தைத் தேர்வு செய்ததும், இக்கருத்தை அல்-ஹாஃபிழ் இப்னு ரஜப் அவர்களும் தேர்வு செய்துள்ளமையும், விசித்திரமானதும் பலவீனமானதும் ஆகும். ஏனெனில், மார்க்க ஆதாரங்கள் ஊடாக, மார்க்கம் எனத் தரிபாடாத எந்த ஒரு விடயத்தையும், அல்லாஹ்வின் மார்க்கத்தில் புதிதாக உண்டாக்குவது முஸ்லிமுக்குக் கூடாது; அதை தனியாகச் செய்தாலும் அல்லது கூட்டாகச் செய்தாலும், மறைத்து செய்தாலும் அல்லது வெளிப்படையாகச் செய்தாலும் சரியே. ஏனெனில், நபி ﷺ அவர்களின் பின்வரும் ஹதீஸ் பொதுவாகவே உள்ளது: "எவரேனும் ஒருவர் எமது மார்க்கத்தில் இல்லாத ஒன்றை செய்வாராயின் அது மறுக்கப்பட வேண்டிய ஒன்றாகும்". இதுவல்லாத, பித்அத்தைக் கண்டிக்கும் மற்றும் எச்சரிக்கும் வேறு ஆதாரங்களும் உள்ளன.

இமாம் அபூபக்கர் தார்தூஷி அவர்கள் தமது 'அல் ஹவாதிஸ் வல் பிதஅ' எனும் நூலில் பின்வருமாறு கூறுகின்றார்கள்:

இப்னு வழ்ழாஹ் அவர்கள், ஸைத் இப்னு அஸ்லம் அவர்கள் வாயிலாக இவ்வாறு அறிவிக்கின்றார்கள்: எமது ஆசான்கள் மற்றும் ஃபிக்ஹ் அறிஞர்கள் யாரும் ஷஅபான் மாதத்தின் நாடு இரவைக் பற்றி கவனம் செலுத்தியதாகவோ, மக்ஹூல் அவர்களின் ஹதீஸை கருத்திற் கொண்டதாகவோ, ஏனைய நாட்களை விட அதற்கு சிறப்புள்ளதாகக் கருதியதாகவோ நாம் காணவில்லை.

இப்னு அபீ முலைகா அவர்களிடம் கூறப்பட்டது: "ஸியாத் அந்னுமைரி, "ஷஅபான் மாதத்தின் நடுப்பகுதி இரவின் நன்மை லைலத்துல் கத்ர் இரவின் நன்மையைப் போன்றது." என்று கூறுகிறார் எனக் கேட்கப்பட்ட போது, "நான் அதை கேட்டிருந்து, அந்நேரத்தில் என் கையில் ஒரு தாடி இருந்தால், அவரை அடித்திருப்பேன்" என்றார்கள். ஸியாத் கதை கூறுபவராக இருந்துள்ளார். முற்றும்.

அல்லாமா ஷௌகானி (ரஹ்) அவர்கள் தமது «அல்-ஃபவாயித் அல்-மஜ்மூஅ» எனும் நூலில் பின்வருமாறு கூறுகின்றார்கள்:

"அலீயே, யார் ஷஅபான் மாதத்தின் நடு இரவில் நூறு ரக்அத்துக்கள் தொழுது, ஒவ்வொரு ரக்அத்திலும் ஃபாத்திஹா மற்றும் 'குல் ஹுவல்லாஹு அஹத்' பத்து முறை ஓதுகின்றாரோ, அல்லாஹ் அவனது அனைத்து தேவைகளையும் நிறைவேற்றுவான்' என்ற ஹதீஸ், ஓர் இட்டுக்கட்டப்பட்ட ஹதீஸாகும். இதனை செய்பவருக்குக் கிடைக்கும் நன்மைகள் பற்றித் தெளிவாகக் கூறும் அந்த வசனங்களைப் பார்க்கும் விவரமுள்ள ஒரு மனிதன் இது இட்டுக்கட்டப்பட்டது என்பதில் சந்தேகம் கொள்ளமாட்டான். இதன் அறிவிப்பாளர்கள் அறியப்படாதவர்கள். மேலும், இது இரண்டாவது மற்றும் மூன்றாவது வழிகளிலும் அறிவிக்கப்பட்டுள்ளது. அவை அனைத்தும் இட்டுக்கட்டப்பட்டவையாகும். மேலும் அவற்றின் அறிவிப்பாளர்களும் அறியப்படாதவர்கள். "முக்தஸர்" இல் அவர்கள், "ஷஅபான் மாதத்தின் பதினைந்தாம் இரவின் தொழுகை பற்றிய ஹதீஸ் இட்டுக்கட்டப்பட்டது, இப்னு ஹிப்பானில், அலி (ரலி) அவர்கள் வாயிலாக வந்துள்ள "ஷஅபான் மாதத்தின் பாதி இரவு வந்தால், அதன் இரவை நின்று வணங்குங்கள், அதன் பகலை நோன்பு நோற்குங்கள்" என்ற ஹதீஸ் பலவீனமானது." என்று கூறுங்கள். லஆலி எனும் நூலில் அவர்கள் கூறுகின்றார்கள் : தைலமி போன்ற கிரந்தங்களில், "ஷஅபான் மாதத்தின் பதினைந்தாம் இரவில் 100 ரக்அத்களை உளத்தூய்மையுடன் பத்துத் தடவைகள் தொழுதால்" என்ற ஹதீஸ் நீண்ட சிறப்புடன் கூறப்பட்ட போதும், இட்டுக்கட்டப்பட்டதாகும். மூன்று வழிகளிலும் இதை அறிவித்துள்ளவர்களில் பெரும்பாலோர் அறியப்படாத பலவீனமானவர்கள் ஆவர். மேலும் அவர்கள் கூறுகின்றார்கள் : "முப்பது தடவைகள் இக்லாஸை ஓதி, பன்னிரண்டு ரக்அத்கள் தொழுதல்" என்ற ஹதீஸும் இட்டுக்கட்டப்பட்டது. "பதினான்கு ரக்அத்கள்" என்ற ஹதீஸும் இட்டுக்கட்டப்பட்டது.

(இஹ்யா) வின் நூலின் ஆசிரியர் போன்ற பலரும், மேலும் சில தஃப்ஸீர் அறிஞர்களும் இந்த ஹதீஸில் ஏமாந்துவிட்டனர். ஷஅபான் மாதத்தின் பதினைந்தாம் இரவின் தொழுகை பற்றி பல்வேறு விதங்களில் அறிவிக்கப்பட்டுள்ள அனைத்தும் பொய்யானவை, இட்டுக்கப்பட்டவை. இது, திர்மிதியில், ஆயிஷா (ரலி) அவர்கள் வாயிலாக அறிவிக்கப்பட்டுள்ள, நபி (ஸல்) அவர்கள் பகீஃ நோக்கிச் சென்றமை, ஷஅபான் மாதத்தின் நடுப்பகுதி (நிஸ்பு ஷஅபான்) இரவில் அல்லாஹ் கீழ் வானத்திற்கு இறங்குதல், கல்ப் குலத்தின் ஆடுகளின் முடி எண்ணிக்கையை விட அதிகமானவர்களுக்கு அவன் மன்னிப்பது ஆகியவற்றிற்கு முரண்படமாட்டாது; ஏனெனில் இங்கு பேசப்படுவது இந்த இரவுக்காகப் புனையப்பட்ட (மூலமற்ற) இந்த தொழுகை பற்றித்தான். அதேநேரம், ஆயிஷா (ரழி) அவர்களின் இந்த ஹதீஸில், பலவீனமும், துண்டிப்பும் உள்ளது. மேலும், இந்த இரவில் நின்றுவணங்குவது பற்றி முன் குறிப்பிடப்பட்ட அலீ (ரழி) அவர்களது ஹதீஸும், இந்த தொழுகை இட்டுக்கட்டப்படது என்பதற்கு முரணானதல்ல, அதிலும் ஏலவே குறிப்பிட்டது போன்று பலவீனம் உள்ளது.

அல்ஹாஃபிழ் அல்இராகீ (ரஹ்) அவர்கள் கூறுகின்றார்கள் : 'ஷஅபான் மாதத்தின் நடு இரவுத் தொழுகை குறித்து வந்துள்ள ஹதீஸ், நபி ஸல்லல்லாஹு அலைஹி வஸல்லம் அவர்கள்மீது கட்டுக்கதையாகச் சூட்டப்பட்டதுமாகவும், அவர்கள் குறித்து சொல்லப்பட்ட ஒரு பொய்யுமாகும்.' இமாம் நவவி அவர்கள் (அல் மஜ்மூ) என்ற புத்தகத்தில் கூறியதாவது: «ரஜப் மாதத்தின் முதல் வெள்ளிக்கிழமை, மஃரிப் மற்றும் இஷா தொழுகைகளுக்கு இடையில் தொழப்படும் பன்னிரண்டு ரக்அத்களைக் கொண்ட ரகாயிப் தொழுகை, ஷஅபான் மாதத்தின் பதினைந்தாம் இரவில் தொழப்படும் நூறு ரக்அத்களைக் கொண்ட தொழுகை ஆகிய இவ்விரண்டு தொழுகைகளும் கண்டிக்கப்படவேண்டிய பித்அத்களாகும் . அவற்றை (கூத் அல் குலூப்) மற்றும் (இஹ்யா உலூம் அல் தீன்) போன்ற புத்தகங்களில் குறிப்பிடப்பட்டிருப்பதைக் கொண்டோ, அவை பற்றிய ஹதீஸ்களைக் கொண்டோ ஏமாறவேண்டாம். அவை பொய்யானவை. இம்மாதிரியான தொழுகைகளின் சட்டம் தெளிவாகத் தெரியாத சில இமாம்கள், அவை விரும்பத்தக்கவை எனக் கூறி எழுதியுள்ள நூல்களைப் பார்த்தும் ஏமாற வேண்டாம். அவர்கள் அதில் தவறிழைத்துள்ளார்கள்.

அஷ்ஷெய்க் இமாம் அபூ முஹம்மத் அப்துர் ரஹ்மான் பின் இஸ்மாயில் அல்-மக்தஸி (ரஹ்) அவர்கள் இக்கருத்துக்களை மறுக்கும் விதமாக ஒரு அருமையான நூலை எழுதியுள்ளார். அதில் அவர் மிகச் சிறப்பாகவும் நன்றாகவும் எழுதியுள்ளார். இவ்விவகாரம் தொடர்பாக அறிஞர்களின் கருத்துக்கள் மிகுந்து காணப்படுகின்றன. இவ்விவகாரம் தொடர்பாக நாம் அறிந்துள்ள அனைத்தையும் இங்கு குறிப்பிட முயலினால் அது நீளமான உரையாகிவிடும். எனவே, நாம் இங்கு குறிப்பிட்டுள்ளவை உண்மையைத் தேடுபவருக்கு போதுமானதாகவும் நம்பிக்கையளிக்கக்கூடியதாகவும் இருக்கும்.

மேற்கூறிய வசனங்கள், ஹதீஸ்கள் மற்றும் அறிஞர்களின் கருத்துக்களின் மூலம்: ஷஅபான் மாதத்தின் பதினைந்தாம் இரவைத் தொழுகை அல்லது வேறு வழிகளில் கொண்டாடுதல், அதன் பகல்பொழுதில் நோன்பு நோற்பது; பெரும்பாலான அறிஞர்களின் பார்வையில் கண்டிக்கத்தக்க பித்அத்தாகும் என்பது உண்மையை நாடுபவருக்கு தெளிவாகிறது. இது தூய்மையான ஷரீஅத்தில் அடிப்படையற்ற வந்து. மாறாக இது சஹாபாக்களின் காலத்திற்குப் பிறகு இஸ்லாத்தில் தோன்றியது, மேலும் இந்தத் தலைப்பிலும், ஏனைய தலைப்புக்களிலும் உண்மையை நாடுபவருக்கு அல்லாஹ்வின் பின்வரும் வசனம் போதுமானதாகும்: இன்று உங்களுக்கு உங்கள் மார்க்கத்தை நான் முழுமையாக்கிவிட்டேன் (அல்மாஇதா : 3). அதன் பொருளுக்கு இணையான வேறு இறைவசனங்களும் உள்ளன. மேலும் நபி (ஸல்) அவர்கள் கூறுகின்றார்கள் : 'எமது இந்த மார்க்த்தில் இல்லாத புதிய ஒரு விடயத்தை மார்க்கமாக யார் உண்டாக்குகிறானோ அவனுடைய அந்தப் புதுமை நிராகரிக்கப்பட்டதாகும்'. இதே அர்த்தத்தில் பல ஹதீஸ்கள் இடம்பெற்றுள்ளன.

முஸ்லிமின் அறிவிப்பில், நபி ஸல்லல்லாஹு அலைஹிவஸல்லம் அவர்கள் கூறியதாக அபூ ஹுரைரா ரழியல்லாஹு அன்ஹு அவர்கள் அறிவிக்கிறார்கள்: வெள்ளிக்கிழமையின் இரவை, பிற இரவுகளுக்கிடையில் இரவுநேர வழிபாட்டிற்காக தனிப்படுத்த வேண்டாம்; அதன் நாளையும், பிற நாட்களுக்கிடையில் நோன்பிற்காக தனிப்படுத்த வேண்டாம்; வழமையாக நோன்பு நோற்பவனைத் தவிர (அவர் தனது வழமைப்படி நோன்பில் இருக்கலாம்). இரவுகளில் ஏதாவது ஒன்றை ஒரு வகை வழிபாட்டால் தனிப்படுத்துவது அனுமதிக்கப்பட்டதாக இருந்திருந்தால், ஜும்ஆ இரவுதான் பிறவற்றை விட முதன்மைக்கு உரியதாக இருந்திருக்கும். ஏனெனில் அந்த நாள்தான் சூரியன் உதயமாகும் நாட்களில் மிகச் சிறந்த நாள் ஆகும் என நபி ஸல்லல்லாஹு அலைஹிவஸல்லம் அவர்களிடமிருந்து வந்த ஸஹீஹ் ஹதீஸ்கள் தெளிவாக உறுதிப்படுத்துகின்றன. அந்த இரவையே நபிகள் நாயகம் (ஸல்) அவர்கள், மற்ற இரவுகளிலிருந்து தனியே இரவுநேர வணக்கத்திற்காக விசேடமாக்குவதிலிருந்து எச்சரிக்கின்றார்கள் என்றால், பிற இரவுகளுக்கு அதைவிட அதிகமாக இந்த விதி பொருந்தும் என்பது தெளிவாகிறது. அதாவது, அவற்றுள் எந்தொரு இரவையும் எந்த வகையான வணக்கத்திற்காகவும் விசேடமாகத் தனிப்படுத்துவது கூடாது. அத்தகைய தனிப்படுத்துதலை தெளிவாகக் காட்டும் ஸஹீஹான ஆதாரம் இருந்தாலே அன்றி.

லைலத்துல் கத்ர் மற்றும் ரமழானின் இரவுகளில், அதிக முயற்சியுடன் இரவுத்தொழுகைகளில் ஈடுபடுவது மார்க்கத்தில் உள்ளது என்பதால், அதனைப் பற்றி நபி ஸல்லல்லாஹு அலைஹி வஸல்லம் அவர்கள் கூறி, உம்மத்தாரை அவற்றில் நின்று வணங்குவதற்கு ஊக்குவித்ததோடு, தாமும் அதை நடைமுறைப்படுத்தினார்கள். புகாரி மற்றும் முஸ்லிமின் அறிவிப்பில், நபி ஸல்லல்லாஹு அலைஹி வஸல்லம் அவர்கள் கூறினார்கள்: "இறைநம்பிக்கையுடனும், நன்மையை எதிர்பார்த்தும் ரமழானில் நின்று வணங்கியவரின் முன்சென்ற (சிறு)பாவங்கள் மன்னிக்கப்படும், மேலும், இறைநம்பிக்கையுடனும், நன்மையை எதிர்பார்த்தும் லைலதுல் கத்ர் (கண்ணியமிக்க) இரவில் நின்று வணங்கியவரின் முன்சென்ற (சிறு)பாவங்கள் மன்னிக்கப்படும். ஷஅபான் மாதத்தின் பதினைந்தாம் இரவு, அல்லது ரஜப் மாதத்தின் முதல் வெள்ளிக்கிழமை இரவு, அல்லது இஸ்ரா மற்றும் மிஅராஜ் இரவு ஆகியவற்றை, விழாவாகக் கொண்டாடுவதற்கோ அல்லது ஏதேனும் வணக்கச்செயலைச் சிறப்பாகச் செய்வதற்காக தனிப்படுத்துவதற்கோ மார்க்கத்தில் அனுமதி இருந்திருந்தால், நபி (ஸல்) அவர்கள் அதனைத் தமது சமூகத்திற்கு அறிவித்து வழிகாட்டியிருப்பார்கள், அல்லது தாமே அதைச் செய்திருப்பார்கள். அவ்வாறு ஏதாவது நிகழ்ந்திருந்தால், நபித்தோழர்கள் அதனை சமூகத்திற்கு அறிவித்து எடுத்துரைத்திருப்பார்கள்; அதை அவர்களிடமிருந்து மறைத்து வைத்திருக்கமாட்டார்கள். ஏனெனில் அவர்கள் மக்களில் சிறந்தவர்களும், நபிகளாருக்குப் பின் மக்களுக்கு அதிகம் நன்மை நாடுபவர்களும் ஆவர். அல்லாஹ், அல்லாஹ்வின் தூதர் (ஸல்) அவர்களின் தோழர்களைப் பொருந்திக்கொள்வானாக; அவர்களையும் திருப்தியடையச்செய்வானாக.

ரஜப் மாதத்தின் முதல் ஜும்ஆ இரவின் சிறப்பைப்பற்றி, மேலும் ஷஅபான் மாதத்தின் நடு இரவின் சிறப்பைப்பற்றி, அல்லாஹ்வின் தூதர் நபி ஸல்லல்லாஹு அலைஹி வஸல்லம் அவர்கள், அல்லது அவர்களின் தோழர்கள் (ரழி) யாரிடமிருந்தும் எதுவும் தரிபடவில்லை என்பதை, அறிஞர்கள் கூறியதிலிருந்து நீர் அறிந்துள்ளீர்கள். இதன் மூலம், இவ்விரண்டையும் கொண்டாடுவது இஸ்லாத்தில் புதிதாக உருவாக்கப்பட்ட பித்அத்தாகும் என அறியப்படுகிறது. அதுபோலவே, அவற்றை ஏதாவது ஒரு வழிபாட்டால் தனிப்படுத்துவதும் மறுக்கத்தக்க பித்அத் ஆகும். இஸ்ரா மற்றும் மிஃராஜ் இரவாக சிலர் நம்பும் ரஜப் மாதம் 27ஆம் இரவும் இவ்வாறுதான். முந்தைய ஆதாரங்களுக்கிணங்க, அதற்கென வணக்கங்களைச் செய்யவோ, கொண்டாடவோ கூடாது; இது அவ்விரவுதான் என அறியப்பட்டிருந்தால். அப்படியாயின், அறிஞர்களின் சரியான கருத்துப்படி அது (இஸ்ரா, மிஃராஜ் இரவு) அறியப்படவில்லை என்றிருக்கும் போது எவ்வாறிருக்கும்? அது ரஜப் மாதத்தின் 27 ஆம் இரவாகும் என்று கூறுபவரின் கூற்றுக்கு, ஸஹீஹான ஹதீஸ்களில் எந்த அடிப்படையும் இல்லை. பின்வரும் கூற்று அழகான ஒரு கூற்றாக்கும் :

விடயங்களில் சிறந்தது, நேர்வழியில் முன்சென்றவையாகும். மிக மோசமான விடயங்கள் புதிதாக உருவாக்கப்பட்ட நூதன முறைகளாகும்.

அல்லாஹ் எமக்கும் மற்றுமுள்ள முஸ்லிம்களுக்கும் ஸுன்னத்தைப் பற்றிய உறுதியையும் அதில் நிலைத்திருப்பதையும் அதற்கு முரண்பட்டவற்றிலிருந்து எச்சரிக்கையையும் வழங்குவானாக! அவன் கண்ணியமானவன், கொடையாளன்.

ஸலாத்தும் ஸலாமும் எங்கள் நபியும் அல்லாஹ்வின் அடியாரும் தூதருமாகிய முஹம்மத் ஸல்லல்லாஹு அலைஹிவஸல்லம் அவர்கள் மீதும், அவர்களின் குடும்பத்தார், தோழர்கள் அனைவர் மீதிலும் உண்டாவதாக.

எட்டாவது கடிதம்:

புனித நபவீ ஹரமின் பணியாளர் அஷ்ஷெய்க் அஹ்மத் அவர்கள் மீது இணைத்துக் கூறப்படும்

வஸிய்யத் பொய்யானது என்பதைத் தெளிவுபடுத்தல்.

அப்துல் அஸீஸ் இப்னு அப்துல்லாஹ் இப்னு பாஸ், இதனைப் படிக்கும் அனைத்து முஸ்லிம்களுக்கும் எழுதிக் கொள்வது. அல்லாஹ் அவர்களை இஸ்லாத்தைக் கொண்டு காப்பாற்றுவானாக, நம்மையும் அவர்களையும் அறியாமை கொண்ட மூடர்களின் தீமையிலிருந்து பாதுகாப்பானாக, ஆமீன்.

அஸ்ஸலாமு அலைக்கும் வரஹ்மதுல்லாஹி வபரகாதுஹு. (உங்கள் மீது சாந்தி உண்டவதாக மேலும் அல்லாஹ்வின் அருளும் பரகத்தும் உண்டாவதாக).

நபி (ஸல்) அவர்களின் புனித பள்ளிவாசலின் சேவகர் ஷேக் அஹ்மத் அவர்களுக்குச் சொந்தமானதாகக் கூறப்படும் ஒரு உரையை நான் பார்த்தேன், அதன் தலைப்பு: «புனித மதீனாப் பள்ளிவாசலின் சேவகரான, ஷேக் அஹ்மத் அவர்களின் உபதேசம்» என்று உள்ளது. அதில் அவர் கூறியதாவது:

"வெள்ளிக்கிழமை இரவில் நான் விழித்திருந்து குர்ஆனை ஓதிக்கொண்டிருந்தேன். அல்லாஹ்வின் அழகிய பெயர்களான அஸ்மாஉல்லாஹில் ஹுஸ்னாவையும் ஓதி முடித்தபின், உறக்கத்திற்குத் தயாரானேன். அப்போது ஒளிவீசும் தோற்றமுடைய, குர்ஆன் வசனங்களையும் மேன்மையான சட்டங்களையும் கொண்டு வந்த, உலகங்களுக்கெல்லாம் இரக்கமாக அனுப்பப்பட்ட எங்கள் தலைவர் முஹம்மது (ஸல்லல்லாஹு அலைஹி வஸல்லம்) அவர்கள் என் முன்னே தோன்றினார்கள். அவர்கள் 'யா ஷைக் அஹ்மத்!' என்று கூறினார்கள். நான், 'இதோ வந்துவிட்டேன், அல்லாஹ்வுடைய தூதரே! அல்லாஹ்வின் படைப்புகளில் மிகக் கண்ணியமிக்கவரே!' என்று கூறினேன் அப்போது நபியவர்கள் இவ்வாறு கூறினார்கள்: "நான் மக்களின் அருவருப்பான செயல்களால் வெட்கப்படுகிறேன், அதனால், என்னால் என் இறைவனையும், மலக்குகளையும் சந்திக்க முடியவில்லை; ஏனெனில் ஒரு ஜுமுஆவிலிருந்து அடுத்த ஜுமுஆ வரையில், 160,000 பேர் இஸ்லாத்தை ஏற்காத நிலையில் மரணித்துள்ளனர். பின்னர் மக்கள் செய்த வேறு சில பாவங்களையும் கூறினார்கள். பின்பு நபியவர்கள், 'இந்த உபதேசம், வலிமையுள்ள, சக்திவாய்ந்த அல்லாஹ்வின் கருணையாகும்' என்று கூறினார்கள். பின்னர் மறுமையின் சில அடையாளங்களை அவர்கள் குறிப்பித்துவிட்டு, இறுதியாக இவ்வாறு கூறினார்கள்: 'ஷேக் அகமதே! இந்த வஸிய்யத்தை அவர்களுக்கு அறிவிக்கவும். ஏனெனில் இது லௌஹுள் மஹ்ஃபூளில் இருந்து, விதியின் எழுதுகோளால் எழுதப்பட்டதாகும். இதனை எழுதி, ஒரு நாட்டிலிருந்து மற்றொரு நாட்டிற்கு, ஒரு இடத்திலிருந்து மற்றொரு இடத்திற்கு அனுப்புபவருக்கு சொர்க்கத்தில் ஒரு மாளிகை கட்டப்படும். இதனை யார் எழுதவில்லையோ, அனுப்பவில்லையோ அவருக்கு மறுமை நாளில் எனது பரிந்துரை மறுக்கப்படும்.' இதை எழுதியவர் ஏழையாக இருந்தால், இந்த வாக்குறுதியின் பாக்கியத்தினால் அல்லாஹ் அவரை செல்வந்தராக ஆக்குவான், அல்லது கடனாளியாக இருந்தால் அல்லாஹ் அவரது கடனை தீர்த்து விடுவான், அல்லது அவருக்கு பாவம் இருந்தால் அல்லாஹ் அவரையும், அவரது பெற்றோர்களையும் மன்னித்து விடுவான். அல்லாஹ்வின் அடியார்களில் யாராவது இதனை எழுதவில்லை என்றால், இவ்வுலகத்திலும் மறுமையிலும் அவனுடைய முகம் கருப்பாகும். மேலும் அவர் கூறுகின்றார்: 'வல்லாஹில் அழீம்' (அல்லாஹ்வின் பெயரில் மூன்று முறை சத்தியமாக) இது உண்மை, நான் பொய்சொல்பவராக இருந்தால் இஸ்லாத்தை விட்டு வெளியேறி இறப்பேன், இதனை நம்புபவர் நரகத்தின் தண்டனையிலிருந்து மீட்கப்படுவார். இதனை மறுப்பவர் காபிராகிவிடுவார்.

இதுவே நபி ஸல்லல்லாஹு அலைஹிவஸல்லம் அவர்களின் பெயரில் பொய்யாகச் இட்டுக்கட்டப்பட்ட உயிலில் உள்ளவற்றின் சாராம்சமாகும். பல ஆண்டுகளாக இப்பொய்யான உயிலை நாங்கள் பல முறை கேட்டு வந்திருக்கிறோம்; அது மக்கள் மத்தியில் அவ்வப்போது பரப்பப்படுகின்றது, பொதுமக்களில் பலரிடத்தில் பெரிதும் பிரசாரம் செய்யப்படுகின்றது; மேலும் அதன் சொற்பிரயோகங்களில் சில வேறுபாடுகள் உண்டு. அந்தப் பொய்யன் தான் நபி (ஸல்) அவர்களை கனவில் கண்டதாகவும், அப்போது அன்னார் இந்த உபதேசத்தை அவனிடம் ஒப்படைத்ததாகவும் கூறுகின்றான். வாசகனே! நாங்கள் மேலே உமக்குக் குறிப்பிட்ட இந்த சமீபத்திய சிற்றேட்டில், அந்தப் பொய்யுரைப்பவன் தாம் தூங்குவதற்குத் தயாராகியிருந்தபோது நபி (ஸல்) அவர்களை கண்டதாகக் கூறியிருக்கிறான்; இதன் கருத்தாவது: அவன் அவர்களை கண் விழித்த நிலையில் கண்டதாக ஆகிறது!

இந்தப் பொய்யன் இந்த அறிவுறுத்தலில் பல விஷயங்களை கூறியுள்ளான். அவை மிகத் தெளிவான பொய்களும், மிகத் தெளிவான அசத்தியங்களும் ஆகும். அவற்றைப் பற்றி இக்குறிப்பில் விரைவில் - இன் ஷா அல்லாஹ் - உமக்குத் தெளிவுபடுத்துகின்றேன். கடந்த பல வருடங்களாகவும் அவற்றைப் பற்றி நான் தெளிவுபடுத்தி, அவை மிகத் தெளிவான பொய்யாகவும், மிகத் தெளிவான அசத்தியங்களாகவும் உள்ளன என்பதை விளக்கியுள்ளேன். இந்த சமீபத்திய வெளியீட்டை பார்த்தபோது, அதன் அசத்தியம் வெளிப்படையாக இருப்பதாலும், இட்டுக்கட்டியவருக்கு பொய் கூறுவதில் உள்ள மிகுந்த துணிச்சலாலும் அதைப் பற்றி எழுதத் தயங்கினேன். அடிமட்ட அறிவும், ஈடேற்றமான இயல்பு உணர்வும் உள்ள யாரிடமும் இந்த அசத்தியம் எடுபடும் என நான் நினைக்கவில்லை ஆயினும், பல சகோதரர்கள் இது பல மக்களிடையே பரவிவிட்டதாகவும், அவர்கள் இதை தமக்குள் ஒருவருக்கொருவர் பரிமாறிக் கொண்டதாகவும், சிலர் அதனை நம்பிவிட்டதாகவும் எனக்குத் தெரிவித்தனர்; எனவே, மக்கள் ஏமாறாது இருப்பதற்காக, இதைப் பற்றிக் எழுதி, இதன் போலித்தன்மையை வெளிச்சத்திற்குக் கொண்டுவந்து, இது நபியவர்கள் மீது இட்டுக்கட்டப்பட்டது எனத் தெளிவுபடுத்துவது என் போன்றோருக்குக் கட்டாயக் கடமையாக உள்ளது என்று நான் எண்ணுகின்றேன். அறிவும், ஈமான் கொண்டவர்களில் அல்லது நல்ல இயல்பும், நலமான புத்தியும் கொண்டவர்களில் யாராவது இதனை ஆராய்ந்தால், பல்வேறு காரணங்களால் இது பொய்யும், கற்பனையும் என்பதை அறிந்து கொள்வார்கள்.

ஷேக் அஹ்மத் அவர்கள் மீது இணைத்துக்கூறப்படும் இந்த பொய்யான வஸிய்யத்தைப் பற்றி, அவருடைய சில உறவினர்களிடம் நான் கேட்டபோது, 'இது ஷேக் அஹ்மத் அவர்கள் மீது பொய்யாக இட்டுக்கட்டப்பட்டதாகும், அவர் இவ்வாறு ஒருபோதும் கூறவில்லை.' என்றே அவர்கள் எனக்கு பதிலளித்தார்கள். மேற்கூறப்பட்ட ஷேக் அஹ்மத் சில காலங்களுக்கு முன்பே மரணம் அடைந்துவிட்டார். ஒரு வாதத்திற்காக, மேற்கூறப்பட்ட அந்த ஷேக் அஹ்மத் அல்லது அவரை விடப் பெரியவர் யாரேனும், தாம் கனவில் அல்லது கண் விழித்த நிலையில் நபி (ஸல்) அவர்களை கண்டதாகவும், நபி (ஸல்) அவர்கள் இவ்வாறு தனக்கு வஸிய்யத் செய்தார்கள் என்றும் கூறினால், அவர் நிச்சயமாக பொய்யன் என்று நாங்கள் உறுதியாக அறிந்திருப்போம்; அல்லது அவனிடம் அப்படிச் சொன்னது ரஸூல் (ஸல்) அவர்களல்ல, ஷைத்தானே ஆகும். இதற்கு பல காரணங்கள் உள்ளன; அவற்றில் சில:

முதலில்: நபி ﷺ அவர்கள் மரணத்திற்கு பின் விழிப்பில் காணப்படமாட்டார்கள். அறியாமை கொண்ட சூஃபிகள் யாராவது, தாம் விழிப்பில் நபி ﷺ அவர்களைப் பார்க்கிறோம், அல்லது அன்னார்கள் மவ்லித் விழாக்களுக்கு வருகை தருகிறார்கள், போன்ற கருத்துக்களைக் கூறினால், அவர்கள் மிகக் கேவலமான தவறில் விழுந்துள்ளனர், அவர்களுக்கு பரம அளவில் ஏமாற்றமும் குழப்பமும் ஏற்படுத்தப்பட்டுள்ளது, அவர்கள் மிகப் பெரிய தவறில் அகப்பட்டு, குர்ஆனுக்கும், ஸுன்னாவுக்கும் மற்றும் உலமாக்களின் ஒருமித்த கருத்துக்கும் முரண்பாட்டுள்ளனர். ஏனெனில் மரணித்தவர்கள் கப்றுகளில் இருந்து வெளிவருவது மறுமை நாளில்தான்; இவ்வுலகில் அல்ல. யார் இதற்கு முரணாகக் கூறுகிறாரோ அவர் வெளிப்படையாகப் பொய்யுரைப்பவராகவோ, அல்லது குழப்பத்தில் ஆழ்த்தப்பட்டு தவறில் வீழ்ந்தவராகவோ தான் இருப்பார். ஸலஃபுஸ்-ஸாலிஹீன் அறிந்திருந்த, நபி ஸல்லல்லாஹு அலைஹிவஸல்லம் அவர்களின் ஸஹாபாக்களும், அவர்களை நன்கு பின்பற்றியோரும் நடைமுறைப்படுத்திய சத்தியத்தை அவர் அறியவில்லை. அல்லாஹ் பின்வருமாறு கூறுகின்றான் : பிறகு, நிச்சயமாக நீங்கள் இதற்குப் பின்னர் மரணித்து விடுவீர்கள். பிறகு, நிச்சயமாக நீங்கள் மறுமை நாளில் எழுப்பப்படுவீர்கள். (அல்முஃமினூன் : 15, 16) நபி (ஸல்) கூறுகிறார்கள் : மறுமை நாளில் முதன் முதலில் மண் பிளந்து (உயிர்த்து) எழுபவனும் நானே. முதன்முதலில் பரிந்துரை செய்பவனும் நானே. முதன்முதலில் பரிந்துரை ஏற்கப்படுபவனும் நானே. இதே கருத்தில் அதிகமான திரு வசனங்களும் ஹதீஸ்களும் இடம்பெற்றுள்ளன.

இரண்டாவது: ரஸூல் (ஸல்) அவர்கள், தமது வாழ்நாளிலோ, மரணத்திற்குப் பின்னாரோ உண்மைக்கு முரணானதை கூறுவதில்லை; இந்த வஸிய்யத், பின்னர் குறிப்பிடப்படுவது போன்று, பல விதங்களில் அவர்களுடைய ஷரீஅத்திற்கு வெளிப்படையாக முரண்படுகிறது. நபி (ஸல்) அவர்கள் கனவில் காணப்படலாம், எவர் ரஸூல் (ஸல்) அவர்களை அவர்களின் உயரிய தோற்றத்திலேயே கனவில் கண்டாரோ, நிச்சயமாக அவர் அவர்களையே கண்டுள்ளார். ஏனெனில் - ஆதாரப்பூர்வமான ஹதீஸில் வந்ததுபோல் - ஷைத்தானால் அவர்களின் தோற்றத்தில் தோன்ற இயலாது; ஆனால் உண்மையில் கவனிக்கப்பட வேண்டியது, காண்பவரின் ஈமான், உண்மைத்தன்மை, நேர்மை, அறிவிப்பில் துல்லியம், மார்க்கப்பற்று மற்றும் நம்பகத்தன்மை ஆகியவற்றுடன், அவர் ரஸூல் (ஸல்) அவர்களை அவர்களுடைய உண்மைத் தோற்றத்தில்தானா கண்டார், அல்லது வேறு ஒரு தோற்றத்தில்தானா கண்டார் என்பதுமாகும்.

நபி (ஸல்) அவர்கள் தாம் உயிருடன் இருக்கும் காலத்தில் காலத்தில் கூறிய ஒன்று, நம்பகமான, நீதமான, மனனசக்திகொண்டவர்கள் வாயிலாக அல்லாமல் அறிவிக்கப்பட்டால் அது ஏற்றுக்கொள்ளப்படமாட்டாது. ஆதாரமாகவும் கொள்ளப்படமாட்டாது. அல்லது நம்பகமான, நீதமான, மனனசக்திகொண்டவர்கள் வாயிலாக அறிவிக்கப்பட்டும், அவர்களை விட மனனசக்திகொண்ட, நம்பகமானவர்களுடன் முரண்பட்டு, இரண்டையும் இணைத்துப் புரிந்துகொள்ளமுடியாத போது, அவற்றில் ஒன்று மாற்றப்பட்ட, செயற்படுத்தப்படாத ஒன்றாகவும், இரண்டாவது மாற்றக்கூடிய செயற்படுத்தப்படும் ஒன்றாகவும் - நிபந்தனைகள் அடிப்படையில் இயலுமான நிலையில் - கொள்ளப்படும். இணைத்துப் புரிந்துகொள்ளவோ, மாற்றப்பட்டதாக புரிந்துகொள்ளவோ முடியாத போது, மனனசக்தி குறைவான, நம்பகத்தன்மை குறைந்த அறிவிப்பாளரின் அறிவிப்பு கைவிடப்பட்டு, அது செயற்படுத்தப்படாத 'ஷாத்' எனத் தீர்ப்பு அளிக்கப்படும்.

அல்லாஹ்வின் தூதரிடமிருந்து இதை எடுத்ததாகக் கூறும் அந்த மனிதர் யார் என்பதே அறியப்படாததோடு, அவரது நேர்மையும் நம்பகத்தன்மையும் தெரியாத ஓர் உயில் பற்றிய நிலைமை எப்படி? இந்நிலையில், அது ஒதுக்கப்படவேண்டியது; அதைப் பொருட்படுத்தவே கூடாது. அதில் மார்க்கத்துக்கு முரணானது எதுவும் இல்லாவிட்டாலும் கூட! அப்படியானபோது, அந்த உயில் தன் பொய்மையை வெளிப்படுத்தும் பல அம்சங்களை உள்ளடக்கியதாகவும், அல்லாஹ்வின் தூதர் மீது பொய்யாகச் சுமத்தப்பட்டதாகவும், அல்லாஹ் அனுமதிக்காத மார்க்கச் சட்டமிடல்களையும் தாங்கியதாகவும் இருந்தால் எப்படி?!

நபி (ஸல்) கூறுகிறார்கள் : யார் என்மீது நான் கூறாததை (நான் கூறியதாக) கூறுகிறாரோ அவர் நரகில் தனக்குரியை இடத்தை ஒதுக்கிக் கொள்ளட்டும். இந்த வசிய்யத்தை நபி (ஸல்) அவர்கள்மீது இட்டுக்கட்டியவன், நபி அவர்கள் கூறாததை அவர்கள்மீது சேர்த்துவிட்டான்; அவர்மீது வெளிப்படையான, மிகக் கடுமையான பொய்யுரைத்துவிட்டான். ஆகவே, உடனடியாக தவ்பாவை மேற்கொண்டு, இந்த வசிய்யத்தின் நபி (ஸல்) அவர்கள்மீது சேர்க்கப்பட்ட பொய்யென்பதை மக்களுக்குத் தெளிவுபடுத்தி, வெளிப்படையாக அறிவிக்காவிட்டால், அத்தகைய பேரெச்சரிக்கைக்கு அவன் நிச்சயமாகத் தகுதியானவனாவான். ஏனெனில் மக்களிடையே ஒரு பொய்யை பரப்பி அதை மார்க்கத்துக்கு சேர்த்துக் காட்டியவன், தன் பொய்யிலிருந்து செய்யும் தவ்பா, அதை பொதுவாக அறிவித்து வெளிப்படுத்தினாலன்றி செல்லாது; ஏனெனில், மக்கள் அவன் தன் பொய்யிலிருந்து வாபஸ் வாங்கியிருப்பதையும், தன்னையே பொய்யனென நிராகரித்திருப்பதையும் அறிந்துகொள்ளவேண்டும். அல்லாஹ் கூறுகின்றான்: தெளிவான சான்றுகள் இன்னும் நேர்வழியை நாம் இறக்கி, அவற்றை மக்களுக்காக வேதத்தில் நாம் தெளிவுபடுத்திய பின்னர் நிச்சயமாக எவர்கள் அவற்றை மறைக்கிறார்களோ அவர்களை அல்லாஹ்வும் சபிக்கிறான். சபிப்பவர்களும் அவர்களைச் சபிக்கிறார்கள். எவர்கள் (தங்கள் தவறுகளிலிருந்து திருந்தினார்களோ), மன்னிப்புக்கோரினார்களோ, (தங்களை) சீர்திருத்திக் கொண்டார்களோ, (தாங்கள் மறைத்த உண்மைகளை மக்களுக்கு) தெளிவுபடுத்தினார்களோ அவர்களைத் தவிர. ஆக, அவர்களுடைய தவ்பாவை நான் அங்கீகரிப்பேன். நான்தான் தவ்பாவை (-பாவ மன்னிப்புத் தேடியவரின் பிரார்த்தனையை) அதிகம் அங்கீகரிப்பவன், மகா கருணையாளன் ஆவேன். (அல் பகரா : 159,160) இவ்வசனத்தில் அல்லாஹ், 'ஏதாவது ஒரு உண்மையை மறைத்தவன், சீர்திருத்திக்கொண்டு, தெளிவுபடுத்திய பின்பே அவனுடைய தவ்பா சரியானதாய் அமையும் என்று தெளிவுபடுத்துகின்றான். மேலும் அல்லாஹ்  அடியார்களுக்கு மார்க்கத்தை முழுமைப்படுத்தி,  தூதர் முஹம்மத் (ஸல்) அவர்களை அனுப்பியதாலும், அவர்மீது அவன் அருளிய முழுமையான இறைசட்டத்தாலும், அவர்கள்மீதான அருட்கொடையைப் பூரணப்படுத்தியுள்ளான். இம்முழுமைப்படுத்தலும் தெளிவுபடுத்தலும் நிறைவேற்றப்பட்ட பின்னரே அவரைத் தன்னிடத்திற்கு அழைத்துக் கொண்டான். அல்லாஹ் கூறுகின்றான் : இன்று உங்களுக்கு உங்கள் மார்க்கத்தை நான் முழுமையாக்கிவிட்டேன். இன்னும், என் அருட்கொடையை உங்கள் மீது நிறைவு செய்துவிட்டேன். இன்னும், இஸ்லாமை உங்களுக்கு மார்க்கமாக பொருந்திக்கொண்டுவிட்டேன். (மாஇதா : 3).

இந்த வஸிய்யத்தை உருவாக்கியவர் பதினான்காம் நூற்றாண்டில் வந்துகொண்டு மக்களுக்கு ஒரு புதிய மார்க்கத்தை உருவாக்கி, தன்னுடைய சட்டதிட்டங்களை பின்பற்றுபவர்கள் தான் சொர்க்கத்தில் நுழைவார்கள் என்றும், தன்னுடைய சட்டதிட்டங்களை பின்பற்றாதவர்கள் சொர்க்கத்திலிருந்து தடுக்கப்பட்டு நரகத்தில் நுழைவார்கள் என்றும் கூற விரும்புகின்றார். மேலும், தான் பொய்யாகப் புனைந்த இந்த வஸிய்யத்தை குர்ஆனைவிட உயர்ந்ததும் சிறந்ததுமாக ஆக்கவும் விரும்புகிறார். அதாவது, யார் இதனை எழுதி, ஒரு நாட்டிலிருந்து மற்றொரு நாட்டிற்கோ, அல்லது ஒரு இடத்திலிருந்து மற்றொரு இடத்திற்கோ அனுப்புகின்றாரோ, அவருக்காக சொர்க்கத்தில் ஒரு அரண்மனை கட்டப்படும் என்றும், அவ்வாறு எழுதவும் அனுப்பவும் செய்யாதவருக்கு கியாமத் நாளில் நபி ﷺ அவர்களின் ஷஃபாஅத் தடுக்கப்படும் என்றும் அபாண்டம் கூறுகின்றார். இது மிக மோசமான ஒரு பொய்யாகும். மேலும், இந்த வஸிய்யத் பொய்யானது என்பதற்கும், இதை இட்டுக்கட்டியவர் வெட்கமற்றவர் என்பதற்கும், பொய் கூறுவதில் அவருக்குள்ள மோசமான துணிச்சலுக்கும் மிகத் தெளிவான ஒரு ஆதாரமாகவும் உள்ளது. ஏனெனில், அல்குர்ஆனை எழுதி, அதை ஒரு இடத்திலிருந்து மற்றொரு இடத்திற்கோ அல்லது ஒரு நாட்டிலிருந்து மற்றொரு நாட்டிற்கோ அனுப்பியவர் கூட, குர்ஆனைப் பின்பற்றாவிட்டால், இந்த சிறப்புக் கிடைக்கமாட்டாது. அப்படியிருக்க, இந்தப் பொய்யை எழுதியவருக்கும், அதை ஒரு நாட்டிலிருந்து மற்றொரு நாட்டிற்கு எடுத்துச் சென்றவருக்கும் எவ்வாறு கிடைக்கும்? அல் குர்ஆனை எழுதாதவரும் அதை ஒரு நாட்டிலிருந்து மற்றொரு நாட்டிற்கு அனுப்பாதவரும், நபி (ஸல்) அவர்களை நம்புபவராகவும் அவர்களது மார்க்கத்தைப் பின்பற்றுபவராகவும் இருந்தால், நபி (ஸல்) அவர்களின் ஷஃபாஅத்தை விட்டும் தடுக்கபடமாட்டார். இந்த வசிய்யத்தில் உள்ள இவ்வொற்றைப் பொய்த்தூற்றல் மட்டுமே, இந்த வசிய்யத்தின் அபத்தத்தையும், அதைத் பரப்புபவனின் பொய்மையையும், அவனது வெட்கமின்மையையும் மடமையையும், மேலும் நபியவர்கள் கொண்டுவந்த ஹிதாயத்தை அறிதலிலிருந்து அவன் வெகுதொலைவில் இருப்பதையும் காட்டுவதற்கு போதுமானதாகும்.

இந்த வஸிய்யத்தில் - ஏற்கனவே குறிப்பிடப்பட்டவற்றைத் தவிர - மற்ற பல விஷயங்களும் உள்ளன. அவை அனைத்தும் அது பொய்யானது மற்றும் அசத்தியமானது என்பதைக் காட்டுகின்றன. அதன் உண்மைத்தன்மையை உறுதிப்படுத்துவதற்காக அதன் கற்பனைக்காரர் ஆயிரம் அல்லது அதற்கு மேற்பட்ட முறை சத்தியம் செய்தாலும், (பொய்யாக இருந்தால்) தம்மீது மிகப்பெரிய தண்டனையையும் கடுமையான கிடைக்கவேண்டும் என துஆக் கேட்டாலும் அவர் உண்மையாளர் அல்லர்; அது உண்மையானதல்ல. மாறாக, அல்லாஹ்வின் மீது சத்தியமாக! அது மிகப்பெரிய மற்றும் மிகக் கேவலமான பொய்யாகும். நாங்கள் அல்லாஹ்வையும் நம்முடன் இருக்கும் மலக்குகளையும், இந்த கடிதத்தை வாசிக்கும் அனைத்து முஸ்லிம்களையும் — எங்கள் இறைவன் முன்னிலையில் நாம் முன்வைக்கப் போகும் சாட்சியாக — இந்த வசிய்யத் அல்லாஹ்வின் தூதர் (ஸல்லல்லாஹு அலைஹிவஸல்லம்) அவர்கள்மீது கற்பிக்கப்பட்ட பொய்யும் இட்டுக்கட்டலும் ஆகும் என்பதற்கு சாட்சியாகக் கொள்கிறோம். இதனை கற்பித்து உருவாக்கியவரை அல்லாஹ் அவமானப்படுத்துவானாக; அவனுக்குரியவாறு அவனை நடத்துவானாக.

இந்த வஸிய்யத் பொய்யானது, அசத்தியமானனது என்பதற்கு, ஏற்கனவே கூறியவற்றுடன், அந்த வஸிய்யத்தின் வார்த்தைகளிலும் ஆதாரங்கள் உள்ளன. உதாரணமாக,

முதல் அம்சம்: (ஏனெனில் ஒரு ஜும்ஆவிலிருந்து அடுத்த ஜும்ஆ வரை, இஸ்லாம் மார்க்கத்தை ஏற்காத நிலையில் ஒரு இலட்சத்து அறுபது ஆயிரம் பேர் மரணித்துள்ளனர்) என்ற அவரது வார்த்தை. ஏனெனில் இது மறைவான விடயங்களின் அறிவிற்குள் உட்பட்டது; நபி (ஸல்) அவர்களின் வபாத்திற்கு பின் வஹ்யு நின்றுவிட்டது, மேலும் அவர்கள் தமது வாழ்நாளிலேயே மறைவானவற்றை அறிந்தவர்கள் அல்ல; அப்படியிருக்க அவர்கள் வபாத்திற்கு பின் எப்படி? அல்லாஹ் கூறுகின்றான்: (நபியே!) கூறுவீராக: ”அல்லாஹ்வின் பொக்கிஷங்கள் என்னிடம் உள்ளன” என்று நான் உங்களுக்குக் கூறமாட்டேன். இன்னும், நான் மறைவானவற்றை அறிய மாட்டேன்... (அல் அன்ஆம் : 50) மேலும் அல்லாஹ் கூறுகின்றான் : (நபியே!) கூறுவீராக: “அல்லாஹ்வைத் தவிர, வானங்களிலும் பூமியிலும் உள்ளவர்கள் மறைவானவற்றை அறியமாட்டார்கள்... (அந் நம்லு : 65), ஆதாரபூர்வமான நபிமொழியில் நபி ஸல்லல்லாஹு அலைஹி வஸல்லம் கூறினார்கள் : மறுமை நாளில் என் தடாகத்திலிருந்து சிலர் தடுக்கப்படுவார்கள். அப்போது நான், ‘இறைவா! என் தோழர்கள், என் தோழர்கள்’ என்பேன். அதற்கு எனக்கு, ‘உம் பின்னால் அவர்கள் என்ன புதிதாகச் செய்தார்கள் என்பதை நீர் அறியவில்லை.’ எனச் சொல்லப்படும். அப்போது நான், அந்த நல்ல அடியார் கூறியதுபோல் கூறுவேன்: ‘நான் அவர்களுடன் இருந்த வரை அவர்களின் செயலை நான் பார்த்துக்கொண்டிருந்தேன். நீ என்னைக் கைப்பற்றிய பின்னர் நீதான் அவர்களைக் கவனித்தவனாக இருந்தாய். அனைத்திற்கும் நீயே சாட்சி.’ (5:117)

இந்த வஸிய்யத் அசத்தியமானது மற்றும் பொய்யானது என்பதற்கான இரண்டாவது ஆதாரம்: அதிலுள்ள பின்வரும் வார்த்தையாகும். "இதனை எழுதியவர் ஏழையாக இருந்தால் அல்லாஹ் அவரை செல்வந்தராக ஆக்குவான், அல்லது கடனாளியாக இருந்தால் அல்லாஹ் அவரது கடனை தீர்ப்பான், அல்லது அவருக்கு பாவம் இருந்தால் அல்லாஹ் அவருக்கும் அவருடைய பெற்றோருக்கும் இந்த வஸிய்யத்தின் பாக்கியத்தால் மன்னிப்பான்" இது மிகப்பெரிய பொய்யாகும். மேலும், இதனைப் புனைந்தவரின் பொய்யர் என்பதற்கும், அல்லாஹ்வைப் பற்றியும், அவனது அடியார்கள் பற்றியும் வெட்கமற்றவர் என்பதற்கும் தெளிவான ஓர் ஆதாரமாகும். ஏனெனில் இந்த மூன்று விஷயங்களும் குர்ஆனை எழுதுவதால் கூட கிடைக்காது! அப்படியிருக்க, இந்த அசத்தியமான உபதேசத்தை எழுதியவருக்கு எப்படி கிடைக்கும்? இந்தக் கெட்டவன் மக்களை ஏமாற்றி, அவர்கள் இந்த வசியத்துடன் பற்றிக்கொண்டு, அதை எழுதிக்கொண்டும், இந்தக் கற்பனையான சிறப்புடன் பற்றிக்கொண்டு, அல்லாஹ் தனது அடியார்களுக்கு சட்டமாக்கிய காரணங்களை விட்டு விலகி, அவற்றை வளமும் கடன் தீர்க்கவும், பாவ மன்னிப்பும் பெறுவதற்கான வழியாக எடுத்துக்கொள்வதையும் நாடுகின்றான். தோல்வியின் காரணங்களிலிருந்தும், மனோஇச்சை மற்றும் ஷைத்தானின் கட்டளைகளிலிருந்தும் அல்லாஹ்வின் பாதுகாப்பை நாடுகிறோம்.

இந்த வஸிய்யத் அசத்தியமானது என்பதற்கான இரண்டாவது ஆதாரம்: அதில் கூறப்பட்டுள்ள பின்வரும் வார்த்தையாகும்: (அல்லாஹ்வின் அடியார்களில் யார் இதனை எழுதவில்லையோ, அவரின் முகம் இவ்வுலகிலும் மறுமை உலகிலும் கருமையாகும்). இதுவும் மிக மோசமான பொய்களில் ஒன்றாகும். மேலும், இந்த வஸிய்யத் பொய்யானது என்பதற்கும், அதனை உருவாக்கிப் பொய்யுரைத்தவன் பொய்யன் என்பதற்கும் தெளிவான ஒரு சான்றாகும். பதினாலாம் நூற்றாண்டில் தோன்றிய ஓர் அறியப்படாத மனிதன், ரஸூல் (ஸல்) அவர்களின் மீது பொய்யாக இட்டுக்கட்டி ஓர் வஸிய்யத்தைக் கொண்டு வந்து, அதை எழுதாதவன் இவ்வுலகிலும் மறுமையிலும் முகம் கருமையடைவான், அதை எழுதியவன் வறுமையில் இருந்து செல்வந்தனாவான், அவன்மேல் குவிந்திருந்த கடனிலிருந்தும் விடுபடுவான், அவன் புரிந்த பாவங்களெல்லாம் மன்னிக்கப்படும் என்று கூறுவதை, பகுத்தறிவுள்ள ஒருவனின் புத்தி எவ்வாறு ஏற்றுக்கொள்ளும்?

தூய்மையான இறைவனே! இது மிகப் பெரிய அபாண்டமாகும்!! ஆதாரங்களும் நிஜங்களும் இந்த பொய்யனின் பொய்யை நிரூபிக்கின்றன. அவன் அல்லாஹ்வின் மீது மிகுந்த துணிவுடன் பொய்யுரைத்ததையும், அல்லாஹ்விடமிருந்தும் மக்களிடமிருந்தும் அவனுக்கு வெட்கம் இல்லாததையும் காட்டுகின்றன. இதோ! இந்த வஸிய்யத்தை எழுதாத பல்வேறு சமூகங்கள் உள்ளன. அவர்கள் முகங்கள் கருமையடையவில்லை! இங்கே, அல்லாஹ்வைத் தவிர வேறு யாராலும் எண்ண முடியாத அளவுக்கு, எண்ணற்ற மக்கள் பல முறை அவற்றை எழுதிய போதும், அவர்கள் கடன் தீர்க்கப்படவில்லை, அவர்களின் வறுமை நீங்கவில்லை. இதயங்கள் நெறிதவறுதல், பாவங்கள் துருவாகப் படிதல் ஆகியவற்றிலிருந்து நாம் அல்லாஹ்விடம் பாதுகாப்பு தேடுகிறோம். இவை, மிகச் சிறந்த, மகத்தான நூலாக உள்ள அல்குர்ஆனை எழுதியவருக்கே மார்க்கம் கூறாத சிறப்புக்களும் கூலிகளும் ஆகும். அப்படியிருக்கும் போது, பொய்யான வாக்குறுதிகளை, பல்வேறு வகையான பொய்களை, பல்வேறு வகையான நிராகரிப்பை உள்ளடக்கியுள்ள இந்த வஸிய்யத்தை எழுதியவர்களுக்கு இவை எவ்வாறு கிடைக்கும்? அல்லாஹ்வின் மீது பொய் கூறி அவனை அவமதித்தவர்களைப் பொறுத்து, அவன் எவ்வளவு நிதானமாக நடந்துகொள்கின்றான்!سبحان الله!!

இந்த வஸிய்யத் தெளிவான பொய் மற்றும் அப்பட்டமான அசத்தியம் என்பதற்கான ஆதாரங்களில் நான்காவது விடயம் : அதில் உள்ள இந்த வார்த்தையாகும். (அதை உண்மைப்படுத்துபவர் நரக நெருப்பின் தண்டனையிலிருந்து மீளுவார், அதை மறுப்பவர் நிராகரிப்பில் ஆழ்ந்துவிடுவார்), இதுவும் ஒரு மிகத் துணிச்சலான பொய்யும், மிகக் கேவலமான அசத்தியமுமாகும். இந்த அபாண்டம் சுமத்துபவன், அவனுடைய அபாண்டத்தை அனைவரும் நம்புமாறு அழைக்கின்றான். அதனால் அவர்கள் நரகத்தின் வேதனையிலிருந்து மீளுவார்கள் எனவும், அதனை பொய்யெனக் கூறுபவன் காபிர ஆகிவிட்டான் எனவும் நம்புமாறு அழைக்கின்றான். இவ்வாறு பொய்யை இட்டுக்கட்டியவன் அல்லாஹ்வின் மீது மிகப்பெரும் அபாண்டத்தை சுமத்தி விட்டான். அல்லாஹ்வின் மீது பொய்யுரைத்துவிட்டான். இதனை நம்புபவனே காபிர் எனப்படுவதற்கு தகுதியானவன். மறுப்பவன் அல்ல. ஏனெனில் இது ஒரு அபாண்டமும் அசத்தியமும் பொய்யும் ஆகும், இதற்கு எந்தவித ஆதாரமும் இல்லை. இது பொய்யென்பதை அல்லாஹ்வை சாட்சியாகக் கொண்டு நாங்கள் அறிவிக்கின்றோம். இதனை இட்டுக்கட்டியவன் பொய்யன், அல்லாஹ் அனுமதிக்காததை மக்களுக்கு சட்டமாக்க விரும்புகிறான், அவர்களின் மார்க்கத்தில் இல்லாததை சேர்க்க விரும்புகிறான். அல்லாஹ், இந்த அபாண்டத்திற்கு பதினான்கு நூற்றாண்டுகளுக்கு முன்பே, இந்த சமுதாயத்திற்காக மார்க்கத்தை முழுமையாக்கிவிட்டான். வாசகர்களே மற்றும் சகோதரர்களே! அவதானமாக இருந்துகொள்ளுங்கள்! இவ்வாறான அபாண்டங்களை நம்புவதிலிருந்து உங்களைத் தற்காத்துக்கொள்ளுங்கள், அவை உங்களிடையே பரவக்கூடாது. ஏனெனில் சத்தியம் அதன் சான்றுகளுடன் வெளிப்படையாக இருக்கும், அதைத் தேடுபவருக்கு அது குழப்பமில்லாமல் இருக்கும். ஆதாரத்துடன் சத்தியத்தைத் தேடுங்கள், உங்களுக்கு சிக்கலான விடயங்களை அறிஞர்களிடம் கேளுங்கள், பொய்யர்களின் சத்தியத்தில் ஏமாறாதீர்கள். ஏனெனில், இப்லீஸ் உங்கள் பெற்றோர் ஆதம் மற்றும் ஹவ்வாவிடம் அவன் நலவு நாடுபவன் என சத்தியம் செய்தான், ஆனால் அவனோ, மிகப்பெரிய துரோகியாகவும் மிகப்பெரிய பொய்யனுமாக உள்ளான். அல்லாஹ் கூறுகின்றான் : இன்னும், “நிச்சயமாக நான் உங்களுக்கு நன்மை நாடுவோரில் உள்ளவன்தான்” என்று அவ்விருவரிடமும் சத்தியமிட்டான். (அல்அஃராப் : 21) அவனது விடயத்திலும் எச்சரிக்கையாக இருந்துகொள்ளுங்கள்! அவனைப் பின்பற்றும் பொய்யர்கள் விடயத்திலும் எச்சரிக்கையாக இருந்துகொள்ளுங்கள்! ஏனெனில் அவனும், அவர்களும் வழிகெடுக்கச் செய்வதற்காக எத்தனை பொய்யான சத்தியங்களையும், துரோகம் நிறைந்த வாக்குறுதிகளையும்,, அழகுபடுத்தப்பட்ட வார்த்தைகளையும் வைத்துக்கொண்டிருக்கின்றனர்! பாவங்கள் பரவியுள்ளமை சம்பந்தமாக அந்த அபாண்டக்காரன் கூறியது உண்மையானதே! அல்குர்ஆனும் தூய்மையான ஸுன்னாவும் அவற்றை கடுமையாக எச்சரித்துள்ளன. அவற்றில் வழிகாட்டலும் போதுமானதுமான அறிவுரையும் உள்ளன.

மறுமையின் அடையாளங்கள் குறித்து கூறப்பட்டதற்கேற்ப, மறுமையின் அடையாளங்கள் என்னவென்பதை நபிமொழிகள் தெளிவுபடுத்துகின்றன, மேலும், குர்ஆன் சிலவற்றை குறிப்பிட்டுள்ளது. இதனை அறிய விரும்புவோர், அது பற்றிய தகவல்களை சுன்னா நூல்களிலும், அறிஞர்கள் மற்றும் இறைநம்பிக்கை கொண்டவர்களின் எழுத்துக்களிலும் காணலாம். இவ்வாறான பொய்யையும், உண்மையையும் பொய்யுடன் கலந்துவிடும் இவ்வகையான விளக்கங்களுக்கு மக்களுக்கு தேவையில்லை. அல்லாஹ் என்னையும் உங்களையும் மற்ற முஸ்லிம்களையும் ஷைத்தான்களின் தீங்குகளிலிருந்தும், வழிகேடர்களின் சோதனைகளிலிருந்தும், வழிதவறியவர்களின் வழிதவறலிலிருந்தும், அல்லாஹ்வின் எதிரிகளின் பொய்யான சூழ்ச்சிகளிலிருந்தும் பாதுகாக்கட்டும். அவர்கள் அல்லாஹ்வின் ஒளியை தமது வாய்களால் அணைக்க விரும்புகின்றனர், மக்களின் மார்க்கத்தில் குழப்பத்தை உண்டாக்குகின்றனர். ஆனால் அல்லாஹ் தனது ஒளியை முழுமையாக்குவான், தனது மார்க்கத்துக்கு உதவுவான். அல்லாஹ்வின் எதிரிகளான ஷைத்தான்களும், அவர்களைப் பின்பற்றும் காஃபிர்களும், நாத்திகர்களும் வெறுத்தாலும் சரியே! முஸ்லிம்களின் நிலைகளைச் சீர்செய்யுமாறும், அவர்கள்மேல் அருள்புரிந்து உண்மையைப் பின்பற்றுவதில் அவர்களுக்கு அனுகூலம் வழங்குமாறும், அதன்மேல் உறுதியாக நிலைத்திருப்பதற்கும், மேலும் உயர்ந்தோனாகிய அல்லாஹ்விடம் அனைத்துப் பாவங்களிலிருந்தும் தவ்பா செய்து திரும்புவதற்கும், அல்லாஹ்விடம் பிரார்த்திக்கின்றோம். நிச்சயமாக அவனே தவ்பாவை ஏற்றுக்கொள்ளுபவனாகவும், கருணையுள்ளவனாகவும், அனைத்திலும் ஆற்றலுடையவனாகவும் உள்ளான். அல்லாஹ் எங்களுக்கு போதுமானவன். மேலும்பொருப்பேற்கின்றவர்களில் அவனே சிறந்தவன். மேலும் (எந்தவொரு தீமையிலிருந்து) திரும்பவோ (எந்தவொரு நற்காரியம்) செய்யவோ கண்ணியமும் உயர்வுமுடைய அல்லாஹ்வின் உதவியின்றி முடியாது.

அகிலங்களின் அதிபதியாகிய அல்லாஹ்வுக்கே எல்லாப் புகழும் உரித்தாகட்டும். அவனது உண்மையான தூதரும் நம்பிக்கைக்குரியவருமான அடியார் நபி முஹம்மத் ஸல்லல்லாஹு அலைஹி வஸல்லம் அவர்களுக்கும், அவர்களது குடும்பத்தார்கள், தோழர்கள் மற்றும் மறுமை வரையில் அவர்களைப் சிறந்த முறையில் பின்பற்றி வாழ்ந்தோர் அனைவருக்கும் அல்லாஹ்வின் அருளும், சாந்தியும் என்றென்றும் உண்டாகட்டும்.

சூனியம், குறிசொல்லல் மற்றும் அவை தொடர்பான சட்டம்

அப்துல் அஸீஸ் இப்னு அப்துல்லாஹ் இப்னு பாஸ்

இஸ்லாத்தில் சூனியம் மற்றும் குறிசொல்வது ஹராமாகும் என்பதை இந்நூல் தெளிவுபடுத்துவதோடு, சூனியம் செய்வோர், குறிசொல்வோரிடத்தில் செல்வது மற்றும் அவர்களை நம்புவதை விட்டும் எச்சரிக்கை செய்கிறது. மேலும், இவை தனிநபருக்கும் சமூகத்திற்கும் தீங்கு விளைவிக்கக்கூடிய (குஃப்ர்) இறைநிராகரிப்பான செயல்கள் என்பதை வலியுறுத்துவதுடன், அல்லாஹ்வின் மீது தவக்குல் (முழு நம்பிக்கை) வைக்குமாறும், ருக்யா மற்றும் அத்கார்கள் போன்ற ஷரீஆ அடிப்படையிலான சிகிச்சைகளைப் பயன்படுத்துமாறும் ஆர்வமூட்டுகிறது.

ஒன்பதாவது தூது : சூனியம், சோதிடம் மற்றும் அவை தொடர்பான சட்டம் (1)

(1) இவ்வசீய்யத் (கட்டளைகள்) அறிவியல் ஆராய்ச்சி, மார்க்கத் தீர்ப்புகள், அழைப்பு மற்றும் வழிகாட்டல் நிர்வாகத்தின் பொது தலைமையகத்தின் 17ஆம் இலக்கக் கையேட்டில் ஹி.1402 ஆம் ஆண்டு வெளியிடப்பட்டது.

எல்லாப் புகழும் அல்லாஹ் ஒருவனுக்கே உரியது, ஸலாத்தும் ஸலாமும் இறுதி நபி (ஸல்) அவர்களின் மீது உண்டாவதாக, பின்னர்:

இன்றைய காலத்தில் மருத்துவம் செய்வதாகக் கூறிக் கொண்டு சூனியம், சோதிடம் ஆகியவற்றின் மூலம் சிகிச்சை செய்யக் கூடிய மந்திரவாதிகள் அதிகரித்துவிட்டனர்; சில நாடுகளில் இவர்கள் பரவியும் வருகின்றனர். அறியாமைக்கு ஆளாகியுள்ள அப்பாவி மக்களை தமக்கு சாதமாக பயன்படுத்தி இவர்கள் ஏமாற்றுகின்றனர்! இந்நிலையைக் கருத்தில் கொண்டு, அல்லாஹ்வுக்கும் அவனுடைய அடியார்களுக்கும் நலன் நாடுதல் என்ற அடிப்படையில் – இந்த விடயத்தில் இஸ்லாத்திற்கும் முஸ்லிம்களுக்கும் பேராபத்து உள்ளதென்பதைத் தெளிவு படுத்த விளைகிறேன்; ஏனெனில், இம்மந்திரவாதிகளிடம் சிகிச்சை செய்வது என்ற பெயரில் சரணடைவது அல்லாஹ் அல்லாதவர்களுடன் தொடர்புகொள்கிற நிலை ஏற்படுவதோடு, மேலும் இந்நிலையானது அல்லாஹ்வுக்கும் – அவனின் தூதரின் கட்டளைகளுக்கும் முரணாக நடக்கும் நிலைக்கு ஆளாக்கி விடுகிறது!

அல்லாஹ்வின் உதவியை நாடியவனாக இது குறித்து பின் வரும் விடயங்களைக் குறிப்பிடுகிறேன் நோய்க்கு சிகிச்சை பெறுவது (இஸ்லாத்தில்)அனுமதிக்கப்பட்ட விடயம் என்பது அறிஞர்களின் ஏகோபித்த கருத்தாகும். எனவே ஒரு முஸ்லிமைப் பொருத்தவரை தனது நோயை இணங்கண்டு அந்நோய்க்குப் பொருத்தமான, ஷரீஆ அனுமதித்த சிகிச்சையைப் பெறுவதற்காக உள்ளக நோய்களிலும் அறுவை சிகிச்சை, நரம்பியல் நோய்கள் போன்ற துறைகளில் திறமை பெற்ற மருத்துவரிடம் சென்று மருத்துவம் செய்தல் வேண்டும்.அவர்கள் அந்நோய்களை கண்டறிந்து அவருக்கு சிகிச்சை அளிப்பர் இவ்வாறு மருத்துவம் செய்வதற்கு இஸ்லாத்தில் அனுமதி உண்டு ஏனெனில், இது வழமையான நடைமுறையிலுள்ள காரண காரியங்களுக்குட்பட்ட ஒரு விவகாரமாகும்.இது ஒரு போதும் 'தவக்குளுக்கு' (இறைவனையே முழுவதும் சார்ந்திருத்தல்) என்பதற்கு முரணானதல்ல. மேலும் அல்லாஹ், இவ்வுலகில் எந்த நோய்களை ஏற்படுத்தினாலும்; அவற்றிற்கான மருந்தையும் ஏற்படுத்தியே உள்ளான் அல்லாஹ்வின் ஆணையின் படி- இதனை அறிந்தோர் அறிந்துள்ளனர் அறியாதோர் அறியாது உள்ளனர் என்றாலும் அல்லாஹ்,தனது அடியார்களுக்கு ஹராமாக்கி விலக்கியவற்றில் எந்த நிவாரணத்தையும் ஏற்படுத்தவில்லை

எனவே ஒரு நோயாளி, மறைவானவற்றை அறிவதாகக் கூறிக்கொள்ளும் சோதிடர்களிடம், தனது நோயை அறிந்துகொள்ளும் நோக்கில் செல்லக் கூடாது. அதேபோன்று, அவர்கள் கூறுகின்றவற்றை நம்பவும் கூடாது. ஏனெனில் இவர்கள் மறைவானவற்றை ஊகித்தே இவ்வாறு பேசுகின்றனர். அல்லது தமது நோக்கத்தை நிறைவேற்ற உதவியாக ஜின்களை வரவழைத்துக்கொள்கின்றனர். இவர்கள் இவ்வாறு மறைவான அறிவிருப்பதாகக் கூறிக்கொண்டால், இவர்கள் காபிர்கள் மற்றும் வழிகேடர்கள் என்பதே தீர்ப்பாகும்.

நபி (ஸல்) அவர்கள் கூறியதாக, முஸ்லிம் (ரஹ்) அவர்கள தமது ஆதாரப் பூர்வமான கிரந்தத்தில் இவ்வாறு கூறுகின்றார்கள் : 'யார் (சோதிடன்) குறி சொல்பவனிடம் சென்று ஏதேனும் ஒன்றைப் பற்றி விசாரித்தால் அவனுடைய நாற்பது நாட்களின் தொழுகைகள் ஏற்றுக் கொள்ளப்படமாட்டாது'.

முஹம்மத் ஸல்லல்லாஹு அலைஹி வஸல்லம் அவர்கள் கூறியதாக அபூ ஹுரைரா ரலியல்லாஹு அன்ஹு அறிவிக்கிறார்கள் : யார் ஒரு சோதிடனிடம் சென்று அவன் சொல்வதை நம்பினால், முஹம்மத் ஸல்லல்லாஹூ அலைஹிவஸல்லம் அவர்களின் மீது இறக்கியருளப்பட்டதை நிராகரித்தவனாவான். இந்த ஹதீஸானது அபூதாவூத் உற்பட ஏனைய நான்கு ஸுனன்களிலும் பதிவுசெய்யப்பட்டுள்ளது. இமாம் ஹாகிம் அவர்கள் பின்வரும் வாசகத்தை பதிவு செய்து விட்டு ஸஹீஹான ஹதீஸ் எனத் தீர்ப்பளித்துள்ளார். நபி ஸல்லல்லாஹு அலைஹிவஸல்லம் அவர்கள் கூறினார்கள் 'யார் ஒருவர் குறி சொல்பவரிடமோ அல்லது சோதிடனிடமோ சென்று அவர் கூறுவதை நம்பி உண்மைப்படுத்தினால், முஹம்மத் ஸல்லல்லாஹு அலைஹிவஸல்லம் அவர்களின் மீது இறக்கியருளப்பட்டதை நிராகரித்தவனாவான் (காபிராகி விடுவான்)'.

இம்ரான் இப்னு ஹுஸைன் ரழி அவர்கள் அறிவிக்கிறார்கள். நபி ஸல்லல்லாஹு அலைஹி வஸல்லம் அவர்கள் கூறினார்கள் : 'சகுனம் பார்ப்பவனும், சகுனம் பார்க்கப் பட்டவனும், ஜோசியம் பார்த்தவனும், ஜோசியம் பார்த்துவிடப் பட்டவனும், சூனியம் செய்தவனும், யாருக்காக சூனியம் செய்யப்பட்டதோ அவனும் எங்களைச் சார்ந்தவன் அல்ல; யார் ஒரு ஜோசியனிடம் சென்று அவர் கூறுவதை நம்பி உண்மைப்படுத்துகின்றானோ, அவன் முஹம்மத் ஸல்லல்லாஹு அலைஹிவஸல்லம் அவர்களுக்கு அருளப்பட்ட மார்க்கத்தை மறுத்தவனாவான்'. இந்த ஹதீஸை பஸ்ஸார் அவர்கள் சிறந்த அறிவிப்பாளர் தொடரின் மூலம் பதிவு செய்துள்ளார்.

இந்த ஹதீஸ்களில்: குறி சொல்பவர்கள், சோதிடர்கள், சூனியக்காரர்கள் போன்றோரிடம் செல்வதையும், அவர்களிடம் கேள்வி கேட்பதையும், அவர்களை நம்புவதையும் தடைசெய்யப்பட்டுள்ளது, மேலும் அதற்கான கடுமையான எச்சரிக்கையும் உள்ளது;

சில விடயங்களில் இம்மந்திரவாதிகள் கூறுவது உண்மை என்பதை வைத்துக்கொண்டும், அவர்களிடம் வரும் பெருந்தொகையானோரை வைத்தும் ஏமாந்துவிடக்கூடாது. காரணம் இவர்களிடம் செல்வோர் மார்க்கம் பற்றிய அறியாமையில் உள்ளவர்களாவர். இறைத்தூதர்(ஸல்) அவர்கள், அந்த மந்திரவாதிகளிடம் சென்று வருவதையும், அவர்களிடம் கேட்பதையும், அவர்கள் கூறுவதை நம்புவதையும் தடைசெய்துள்ளார்கள்; ஏனெனில் அதில் மிகப் பெரும் தீமையும், பெரும் ஆபத்தும், பயங்கரமான பின் விளைவுகளும் உள்ளன. மேலும் அவர்கள் பொய்யர்களாகவும் கெட்டவர்களாகவும் உள்ளனர்.

அதே போன்று இந்நபிமொழிகள் சோதிடர்களும் மந்திரவாதிகளும் தாம் மறைவான விடயங்களை அறிந்துள்ளனர் என வாதிடுவது (குப்ர்) இறைநிராகரிப்பு என்பதற்கு தெளிவான ஆதாரங்களாகும். மேலும் இவர்கள் தங்களின் நோக்கங்களை நிறைவேற்றுவதற்காக அல்லாஹ்வை அன்றி ஜின்களின் உதவியைப் பெறுவதுடன் அவர்களுக்கு அடிபணிந்து வணங்குகின்றனர்; இவ்வாறு செய்வது (ஷிர்க்) இணைவைப்பும் (குப்ர்) இறைநிராகரிப்பும் ஆகும். மறைவான விடயங்களை அறிவதாக இவர்கள் வாதிடுவதில் இவர்களை உண்மைபடுத்துபவரும் இவர்களைப் போன்று நிராகரிப்பாளர்களே ஆவர். மேலும் இந்த மந்திரவாதிகளிடம் சென்று எவர் மந்திரத்தையும் சோதிடத்தையும் கற்கிறார்களோ அவர்களை விட்டும் அல்லாஹ்வின் தூதர் ஸல்லல்லாஹு அலைஹிவஸல்லம் அவர்கள் நீங்கிவிட்டார்கள்.

மேலும் ஒரு முஸ்லிம், மந்திரவாதிகள் தங்களது மந்திரங்களால் தாயத்துக்களில் முணுமுணுப்பதன் மூலம் அல்லது தாமிரத்தை ஊற்றுவதால் சிகிச்சை அளிக்கின்றனர் எனக் கூறி, அவர்களது மாயை மற்றும் பொய்யான செயல்களில் ஈடுபடக் கூடாது. ஏனெனில் இவை சோதிடத்திற்கும், பொதுமக்களை குழப்புவதற்கும் உட்பட்டவை. இதனை ஏற்றுக்கொள்பவர்கள், அவர்களின் பொய்யையும் குஃப்ரையும் ஆதரிக்கின்றனர்.

அதேபோன்று, எந்த முஸ்லிமும், அவர்களிடம் சென்று, தமது மகனையோ, உறவினரையோ திருமணம் செய்ய இருப்பவர் யார் என்றோ, அல்லது கணவன் மனைவியருக்கு மத்தியிலும் அவர்களது குடும்பங்களுக்கு மத்தியிலும் நிகழ வாய்ப்புள்ள நேசம், விசுவாசம், அல்லது விரோதம், பிரிவு போன்றவை பற்றியோ கேட்பது கூடாது. ஏனெனில், இது அல்லாஹ்வைத் தவிர வேறு யாருமே அறியாத, ஒரு மறைவான அம்சமாகும்.

எனவே, அதிகாரமும் பலமும் மிக்க, ஆட்சியாளர்கள் மற்றும் நன்மையை ஏவித், தீமையை தடுக்கப் பொறுப்பானவர்கள் போன்றோர், சோதிடர்கள், குறிசொல்பவர்கள் போன்றோரிடம் மக்கள் செல்வதைத் தடுப்பதும், சந்தைகள் போன்ற இடங்களில் இவ்வாறான வேளைகளில் ஈடுபடுபவர்களைக் தடுத்துக் கண்டிப்பதும், அவர்களிடம் செல்பவர்களையும் கண்டிப்பதும் கடமையாகும்.

சூனியம்: அது (குஃப்ர்)இறை நிராகரிப்பை ஏற்படுத்தும் தடை செய்யப்பட்ட காரியங்களில் ஒன்றாகும்; இது குறித்து அல்லாஹ் ஹாரூத், மாரூத் எனும் இருமலக்குகள் விடயத்தில் பின்வருமாறு குறிப்பிடுகிறான்: " அவ்விருவானவர்களோ, “நாங்களெல்லாம் ஒரு சோதனையாவோம். ஆகவே. (இதைக் கற்று) நீ நிராகரிக்காதே!” என்று கூறும் வரை (அதை) (யார்) ஒருவருக்கும் கற்றுக் கொடுக்கவில்லை. ஆக, அவர்கள் ஆணுக்கும் அவன் மனைவிக்கும் இடையில் எதன் மூலம் பிரிவினை உண்டாக்குவார்களோ அதை அவ்விரு(வான)வரிடமிருந்து கற்றார்கள். ஆனால், அல்லாஹ்வின் அனுமதி கொண்டே தவிர அதன் மூலம் அவர்கள் (யார்) ஒருவருக்கும் தீங்கிழைப்பவர்களாக இல்லை. இன்னும், அவர்களுக்குப் பலனளிக்காததை, அவர்களுக்குத் தீங்கிழைக்கக்கூடிய (மந்திரத்)தை அவர்கள் கற்கிறார்கள். இன்னும், அதை எவர் விலைக்கு வாங்கினாரோ அவருக்கு மறுமையில் எந்த பாக்கியமும் இல்லை என்பதை திட்டவட்டமாக (அவர்கள்) அறிந்திருந்தார்கள். அவர்கள் தங்களை எதற்கு பகரமாக விற்றார்களோ அது திட்டமாக கெட்டதாகும். (இதை) அவர்கள் அறிந்திருக்க வேண்டுமே! (அல் பகரா : 102)

இந்த வசனங்கள் சூனியம் என்பது இறைநிராகரிப்பு என்றும், சூனியக்காரர்கள் கணவன்–மனைவிக்கிடையில் பிரித்துவிடுகின்றனர் என்றும் அறிவிக்கின்றன. அதேபோன்று, சூனியம் என்பது அதுவாக எவ்வித நன்மையோ தீங்கையோ செய்யமாட்டாது என்றும், அல்லாஹ்வின் பிரபஞ்ச விதிகள் சார்ந்த அனுமதியுடனே அது நிகழும் என்றும் குறிப்பிடுகின்றன; ஏனெனில், நன்மை, தீமை ஆகிய இரண்டையும் படைத்தவன் அல்லாஹ்வே!

மேலும் இந்த வசனம் சூனியத்தைக் கற்றுக் கொள்பவர்கள், தங்களுக்கு எவ்விதப்பயனும் அளிக்காத, மாறாக, தீங்கு அளிக்கக் கூடியதையே கற்றுக் கொள்கிறார்கள். அல்லாஹ்விடத்தில் அவர்களுக்கு எவ்வித விமோசனமும் கிடையாது என்பதை சுட்டிக் காட்டுவதுடன் இம்மையிலும் மறுமையிலும் மிகப்பெரும் நஷ்டத்திற்கு ஆளாவார்கள் என்ற கடும் எச்சரிக்கையும் இருப்பதாக குறிப்பிடுகிறது. காரணம் யாதெனில் இத்தகையோர் தமது முயற்சிகளை அற்ப கிரயத்திற்காக விற்று விட்டார்கள். இதனால் அல்லாஹ் இந்த வசனத்தில் அவர்களுடைய வியாபாரத்தை மிகவும் கண்டித்துக் கூறியுள்ளான் "...அவர்கள் தங்களை எதற்கு பகரமாக விற்றார்களோ அது திட்டமாக கெட்டதாகும். (இதை) அவர்கள் அறிந்திருக்க வேண்டுமே!" (அல் பகரா : 102) இவ்வசனத்தில் (அஷ்ஷிராஉ' என்ற சொல் அல் பய்உ என்ற விற்றல் (கொடுக்கள் வாங்களில் ஈடுபடல் என்ற கருத்தை குறிக்கிறது)

இந்த பொய்யர்களால் ஏற்பட்ட தீங்கு மிகுந்தது, கேடும் மிகுந்தது. இவர்கள் இந்த அறிவுகளை புறநிலை வணங்கிகளிடமிருந்து பெற்றுக் கொண்டு, மனவளர்ச்சியற்றவர்களைத் தவறாக வழிநடத்தினர். நிச்சயமாக நாங்கள் அல்லாஹ்வுக்கே உரியவர்கள், அவனிடமே திரும்பிச் செல்வோம். அல்லாஹ்வே எங்களுக்கு போதுமானவன், அவனே சிறந்த பாதுகாவலன்.

இந்த மந்திரவாதிகள் (சூனியக்காரர்கள்) மற்றும் ஜோதிடர்களின் கெடுதியை விட்டும், மற்றும் பித்தளாட்டங்களை செய்து மக்களை வசியம் செய்வோரின் கெடுதியை விட்டும் அல்லாஹ்விடம் ஈடேற்றத்தையும் பாதுகாப்பையும் வேண்டுகிறோம். மேலும் முஸ்லிம் ஆட்சியாளர்களுக்கு இந்த சூனியக்காரர்களின் விடயத்தில் எச்சரிக்கையாக இருப்பதற்கும் அவர்களின் மீது அல்லாஹ்வின் கட்டளையைச் செயல்படுத்துவதற்கும் அல்லாஹ் நல்லருள்பாளிக்க வேண்டும் எனவும் பிரார்திக்கின்றோம். இவ்வாறு அல்லாஹ்வின் கட்டளையை அவர்களின் மீது நடைமுறைப்படுத்தும் போதே இந்த மந்திரவாதிகளின் தீமையை விட்டும் அவர்களுடைய தீய செயல்களை விட்டும் மக்கள் நிம்மதி பெற முடியும். நிச்சயமாக அல்லாஹ் பெரும் கொடையாளனும் கண்ணிய மிக்கவனுமாவான்.

அல்லாஹ் தனது அடியார்கள் மீது புரிந்த அருளினாலும் பேருபகாரத்தினாலும் அவனுடைய அருளை முழுமைப்படித்திட வேண்டுமென்பதற்காகவும் - சூனியம் செய்யப்படும் முன்பாக அதன் தீங்கிலிருந்து தற்காப்புப் பெறக்கூடிய வழிகாட்டல்களை அல்லாஹ் தன் ஷரீஅத்தில் விதித்துள்ளான். மேலும் சூனியம் செய்யப்பட்ட பின்பு எதன் மூலம் சிகிச்சை பெற முடியுமோ அவற்றையும் அவர்களுக்குத் தெளிவுபடுத்தியுள்ளான்

சூனியம் செய்யப்படும் முன்னர் அதன் ஆபத்திலிருந்து பாதுகாப்புப் பெறவும், சூனியம் செய்யப்பட்ட பின்னர் சிகிச்சை செய்யவும், ஷரீஅத்தின் அனுமதியளிக்கப்பட்ட திக்ர் மற்றும் துஆக்கள் பற்றிய விபரம் கீழே தரப்படுகிறது. இவற்றை ஓதீ நிவாரணம் பெற முடியும்; அதன் விளக்கம் வருமாறு:

முதலாவதாக: சூனியம் செய்யப்படுவதற்கு முன்னரே அதன் ஆபத்திலிருந்து பாதுகாப்பு பெறுதல்; இதில் மிகவும் முக்கியமானதும் பயன்மிக்கதுமானது என்னவெனில், அல் குர்ஆன் – அல் ஹதீஸில் வந்துள்ள திக்ர்கள், மஃஸுறாக வந்துள்ள துஆக்கள் மற்றும் பாதுகாப்புத்தேடும் துஆக்கள் மூலம் பாதுகாப்புத் தேடுதல் ஆகும். இவற்றில் முக்கியமான ஒன்றாக: ஆயதுல் குர்ஸியை — அது அல் குர்ஆனில் வந்துள்ள மிக முக்கியமான வசனம் — கடமையான ஒவ்வொரு தொழுகைக்குப் பிறகு ஸலாம் கொடுத்தவுடன் ஓதுதல்; அது அவர் கூறியது: " அல்லாஹ் - அவனைத் தவிர (உண்மையில் வணங்கத்தகுதியான) இறைவன் அறவே இல்லை. அவன் (என்றும்) உயிருள்ளவன், (தன்னில்) நிலையானவன். (படைப்புகளை நிர்வகிப்பவன்.) அவனுக்குள் சிறு உறக்கமும் பெரும் நித்திரையும் நிகழாது. (அவனை சிறு உறக்கமும் பெரும் நித்திரையும் ஆட்கொள்ளாது.) வானங்களில் உள்ளவையும் பூமியில் உள்ளவையும் அவனுக்குரியனவே. அவனின் அனுமதியுடனே தவிர அவனிடம் (எவருக்கும்) யார் பரிந்துரைப்பார்? அவர்களுக்கு முன்னுள்ளதையும் அவர்களுக்குப் பின்னுள்ளதையும் (எல்லாக் காலத்தையும்) அவன் நன்கறிவான். அவன் நாடியதைத் தவிர அவனுடைய அறிவிலிருந்து எதையும் அவர்கள் சூழ்ந்தறிய மாட்டார்கள். அவனுடைய குர்சிய் - பாதஸ்தலம், வானங்களையும் பூமியையும் விட விசாலமாக (-பெரியதாக) இருக்கிறது. அவ்விரண்டையும் பாதுகாப்பது அவனுக்குச் சிரமமளிக்காது. அவன் மிக உயர்வானவன், மிக மகத்தானவன் ஆவான்". (பகரா : 255), தூங்கும் போது இதையும் ஓதுவார், மேலும் நபியவர்கள் மூலம் ஸஹீஹான ஹதீஸ் பதிவாகியுள்ளது, அவர்கள் கூறினார்கள் : 'யார் ஒருவர் இரவில் (ஆயதுல்குர்ஸியை) ஓதுகிறாரோ அல்லாஹ்வின் புறத்திலிருந்து ஒரு பாதுகாவளர் அவருக்கு பக்கமாக இருந்து கொண்டிருப்பார் இதனால் காலைவரை அவரிடம் ஷைத்தான் நெருங்கமாட்டான்.'

அதில் ஒன்றுதான்: (நபியே!) கூறுவீராக! (வணங்கத் தகுதியான இறைவனாகிய) அல்லாஹ் ஒருவன்தான். (அல் இஃலாஸ் 1), மற்றும் (நபியே!) கூறுவீராக! அதிகாலையின் இறைவனிடம் பாதுகாப்புத் தேடுகிறேன், (அல்பலக் : 1) மற்றும் (நபியே!) கூறுவீராக! மனிதர்களின் இறைவனிடம் பாதுகாப்புத் தேடுகிறேன், ஸுறத்துன்னாஸ் :(1) கடமையான ஒவ்வொரு தொழுகைக்குப் பின்னரும், இந்த மூன்று ஸூராக்களை, பகலின் தொடக்கத்தில் ஃபஜ்ர் தொழுகைக்குப் பிறகு மூன்று தடவையும், இரவின் தொடக்கத்தில் மஃரிப் தொழுகைக்குப் பிறகு மூன்று தடவையும் ஓத வேண்டும்.

அதன் அடிப்படையில்: இரவின் ஆரம்பத்தில் ஸூரா அல்பகராவின் இறுதி இரு வசனங்களாகிய பின்வரும் வசனங்களையும் ஓதவேண்டும்: " தூதரும் நம்பிக்கையாளர்களும் தமது இறைவனிடமிருந்து தமக்கு இறக்கப்பட்டதை நம்பிக்கை கொண்டார்கள். (அவர்கள்) எல்லோரும் அல்லாஹ்வையும், அவனுடைய வானவர்களையும், அவனுடைய வேதங்களையும், அவனுடைய தூதர்களையும் நம்பிக்கை கொண்டார்கள். இன்னும், அவர்கள் கூறினார்கள்: “அவனுடைய தூதர்களில் யார் ஒருவருக்கு மத்தியிலும் பிரிவினை காட்டமாட்டோம். இன்னும், நாங்கள் செவியுற்றோம்; கட்டுப்பட்டோம். எங்கள் இறைவா! நாங்கள் உன் மன்னிப்பை வேண்டுகிறோம். உன் பக்கமே (எங்கள்) மீளுமிடம் இருக்கிறது.” ஸூறாவின் இறுதிவரை ஓதவும் (அல் பகரா : 285)

ஆதாரப்பூர்வமான ஓர் அறிவிப்பில், நபி ஸல்லல்லாஹு அலைஹி வஸல்லம் அவர்கள் இவ்வாறு கூறினார்கள் : ஸூரா பகராவின் இறுதி இரு வசனங்களை ஓரிரவில் ஓதினால் அதுவே அவனது பாதுகாப்பிற்குப் போதுமானதாகும். இந்த ஹதீஸின் கருத்தாவது (அல்லாஹ்வே மிக அறிந்தவன்) எல்லாவிதமான தீங்குகளை விட்டும் அவரைப் பாதுகாக்க இவ்வசனங்களை ஓதுவது ஒருவருக்கு போதுமானதாகும். மேலும் பின் வரும் திக்ரை அதிகமாகப் ஓத வேண்டும்: (அஊது பிகலிமாதில்லாஹித்தாம்மாதி மின் ஷர்ரி மா ஃகலக) இதனை இரவு – பகல் நேரங்களிலும், மேலும் பயணத்தின் போது ஏதாவது இடத்தில் இரவில் தங்க நேரிட்டாலும் அது கட்டிடத்தில் அல்லது பாலைவனத்தில், ஆகாயத்தில் அல்லது கடலில் இருந்தாலும் இந்த திக்ரை ஓதிக்கொள்ள வேண்டும். இது பற்றி நபி ஸல்லல்லாஹூ அலைஹிவஸல்லம் பின்வருமாறு கூறுகிறார்கள்: 'யாரேனும் (பயணத்தில்) ஓரிடத்தில் தங்குவதற்காக இறங்கி பின்னர் "அஊது பி கலிமாத்தில் லாஹித் தாம்மாத்தி மின் ஷர்ரி மா கலக்" என்று கூறிப் பிரார்த்தித்தால், அந்த இடத்திலிருந்து அவர் புறப்பட்டுச் செல்லும்வரை எதுவும் அவருக்குத் தீங்கிழைக்காது'.

ஒரு முஸ்லிம் காலையிலும் மாலையிலும் மூன்று முறை கூற வேண்டியது: 'பிஸ்மில்லாஹில்லதீ லா யழுர்ரு மஅஸ்மிஹீ ஷைஉன் ஃபில்அர்ழி வலா ஃபிஸ்ஸமாஇ, வஹுவஸ் ஸமீஉல் அலீம். (அல்லாஹ்வின் திருப்பெயரைக் கொண்டு (ஆரம்பிக்கிறேன்). அவனுடைய திருப் பெயருடன் பூமியிலும் வானத்திலும் உள்ள எதுவும் எந்த இடையூறும் செய்ய முடியாது. அவன் (அனைத்தையும்) செவியுறுபவன், முற்றும் அறிந்தவன்)'.

இவ்வாறு ஓதுமாறு நபி ஸல்லல்லாஹு அலைஹி வஸல்லம் அவர்கள் ஆர்வமூட்டிய ஆதாரப்பூர்மான ஹதீஸ்கள் இடம்பெற்றுள்ளன. மேலும் இவ்வாறு ஓதுவது அனைத்துவிதமான தீங்குகளிலிருந்தும் பாதுகாப்புப் பெறுவதற்கான காரணியாகும்

இரண்டாவது: சூனியம் ஏற்பட்ட பின் அதற்கான சிகிச்சை முறைகள். அவையும் பலவகைப்படும்:

முதலாவது: அல்லாஹ்விடம் அதிகமாக தாழ்மையுடன் பிரார்த்தனை செய்தல், துன்பத்தை நீக்கவும், கஷ்டத்தை அகற்றவும் அவனிடம் கேட்குதல்.

இரண்டாவது: சூனியம் வைத்த இடத்தைக் கண்டு பிடிப்பதற்கு முயற்சிசெய்தல். அவ்வாறு கண்டுபிடித்தால் அதனை வெளியே எடுத்து அழித்துவிட்டால் சூனியம் முறிந்து விடும். இது சூனியத்திற்கான மிகப்பயனுள்ள சிகிச்சை முறையாகும்.

மூன்றாவது: மார்க்கரீதியான துஆக்களும் திக்ர்களும், மந்திரித்தல், இவை பலவாக உள்ளன; அவற்றில் சில:

நபி (ஸல்) அவர்கள் கூறியதாக நிரூபிக்கப்பட்டது : யா அல்லாஹ்! மனிதர்களின் இரட்சகனே! துன்பத்தைப் போக்கி குணப்படுத்துவாயாக; நீயே குணப்படுத்துபவன். உனது குணப்படுத்தலைத் தவிர வேறு குணப்படுத்தல் கிடையாது. நோயை எஞ்சாத அளவு குணப்படுத்துவாயாக. இதனை மூன்று தடவைகள் ஓதுவார்.

ஜிப்ரீல் (அலை) அவர்கள் நபி (ஸல்) அவர்களுக்கு ஓதிய பின்வரும் ஓதலும் இதில் ஒன்றாகும்; அது பின் வருமாறு: அல்லாஹ்வின் பெயரால் உமக்கு ஒதிப்பார்க்கிறேன். உமக்குத் தொல்லை தரும் அனைத்து அம்சங்களிலிருந்தும், பொறாமை கொள்ளக்கூடிய அனைவரின் அல்லது கண்களின் தீமையிலிருந்தும் உமக்கு அல்லாஹ் நிவாரணமளிப்பானாக. அல்லாஹ்வின் பெயரால் உமக்கு ஓதிப்பார்க்கிறேன் இதனை மூன்று தடவைகள் மீண்டும் கூறவேண்டும்

இதில் ஒன்றாக - இது தனது மனைவியருடன் உறவில் ஈடுபடுவதைத் தவிர்க்கும் ஆணுக்கு மிகப் பயனுள்ளது - பச்சை இலந்தையின் ஏழு இலைகளை எடுத்து, ஏதாவது கற்கள் போன்றவற்றால் அவற்றை அரைத்து, ஒரு பாத்திரத்தில் இட்டு, குளிப்பதற்குப் போதுமான அளவு நீரை அதில் ஊற்றி, அதில் பின்வருவனற்றை ஓதவேண்டும்:

" ஆயதுல் குர்ஸீ " , மற்றும் "குல் யா அய்யுகள் காபிரூன்" 1 அல் காபிரூன் 1 " குல் ஹுவல்லாஹு அஹத் " 1 (அல் இக்ஹ்லாஸ் 1), மற்றும் "குல் அஊது பிறப்பில் பலக்" (அல்பலக் : 1), மற்றும் "குல் அஊது பிறப்பின்னாஸ்" (ஸுறத்துன்னாஸ் : 1)

இவற்றுடன், சூனியம் சம்பந்தப்பட்ட வசனங்களாகிய, ஸூரா அல்அஃராபின் பின்வரும் வசனங்களையும் ஓதவேண்டும். “நீர் உம் தடியை எறிவீராக” என்று மூஸாவிற்கு வஹ்யி அறிவித்தோம். (அவர் எறியவே) அப்போது அது அவர்கள் போலியாக செய்தவற்றை விழுங்கி விட்டது. ஆக, உண்மை (உறுதியாக) நிகழ்ந்தது. அவர்கள் செய்து கொண்டிருந்த (சூனியமான)து பொய்ப்பித்து விட்டது (-செயலற்றதாக ஆகிவிட்டது).118 ஆக, அவர்கள் அங்கே தோற்கடிக்கப்பட்டனர். இன்னும், (ஃபிர்அவ்னும் அவனுடைய மக்களும்) தாழ்ந்தவர்களாக (-சிறுமைப்பட்டவர்களாக இழிவானவர்களாக மைதானத்தை விட்டு) திரும்பினர்.119﴾ (அல் அஃராப் : 117-119)

மேலும்; ஸுறா யூனுஸின்;; பின்வரும் வசனங்களை ஓத வேண்டும்: இன்னும், ஃபிர்அவ்ன் கூறினான்: “(சூனியத்தை) கற்றறிந்த (திறமையான) எல்லா சூனியக்காரர்களையும் என்னிடம் அழைத்து வாருங்கள்!” ஆக, சூனியக்காரர்கள் வந்தபோது, அவர்களை நோக்கி மூஸா கூறினார்: “நீங்கள் (சூனியம் செய்வதற்காக) எதை எறியக்கூடியவர்களாக இருக்கிறீர்களோ அதை (மைதானத்தில்) எறியுங்கள்!” ஆக, அவர்கள் எறிந்தபோது, (அவர்களை நோக்கி) மூஸா கூறினார்: “நீங்கள் செய்தவை (அனைத்தும் வெறும்) சூனியம்தான். நிச்சயமாக அல்லாஹ் அவற்றை விரைவில் அழிப்பான். நிச்சயமாக அல்லாஹ் விஷமிகளின் செயலை சீர் செய்ய மாட்டான்.” இன்னும், “அல்லாஹ் தன் கட்டளைகளைக் கொண்டு உண்மையை நிரூபிப்பான், (அதை) குற்றவாளிகள் வெறுத்தாலும் சரியே!” (யூனுஸ் : 79-82)

மேலும் ஸூறதுத் தாஹாவின் பின்வரும் வசனங்கள்: (சூனியக்காரர்கள்) கூறினார்கள்: “மூஸாவே! ஒன்று, நீர் (முதலில்) எறிவீராக! அல்லது, எறிபவர்களில் முதலாமவர்களாக நாங்கள் இருக்கிறோம்.” (மூஸா) கூறினார்: “மாறாக, (முதலாவதாக) நீங்கள் எறியுங்கள்.” ஆக, அ(வர்கள் எறிந்த அ)ப்போது அவர்களுடைய கயிறுகளும் அவர்களுடைய தடிகளும் அவர்களுடைய சூனியத்தால் நிச்சயமாக அவை ஓடுவதாக அவருக்கு தோற்றமளிக்கப்பட்டது. ஆக, மூஸா தனது உள்ளத்தில் பயத்தை உணர்ந்தார்67. நாம் கூறினோம்: “பயப்படாதீர்! நிச்சயமாக நீர்தான் மிகைத்தவர் (வெற்றிபெறுபவர்) ஆவீர். இன்னும், உமது வலது கையில் உள்ளதை நீர் எறிவீராக! அது அவர்கள் செய்ததை (எல்லாம்) விழுங்கி விடும். அவர்கள் செய்ததெல்லாம் ஒரு சூனியக்காரனின் சூழ்ச்சிதான். இன்னும், சூனியக்காரன் எங்கிருந்து வந்தாலும் (அவன் என்னதான் தந்திரம் செய்தாலும்) வெற்றிபெற மாட்டான். (தாஹா : 65-69)

மேலே குறிப்பிட்ட வசனங்களை தண்ணீரில் ஓதிய பின் மூன்று மிடர்கள் அருந்தி விட்டு எஞ்சிய நீரைக் கொண்டு குளிக்க வேண்டும் இதன்மூலம் அல்லாஹ் நாடினால் நோய் நீங்கி குணம் கிடைக்கும். இதனை முதல் தடவை பயன்படுத்தி பலன் கிடைக்காது விட்டால் நோய் குணமாகும் வரையில் பல தடவைகள் இவ்வாறு செய்வதில் எவ்விதப்பிரச்சினையும் கிடையாது.

இந்த திக்ர்களும் பாதுகாப்புக் கோரி ஓதும் துஆக்களும் அவற்றோடு தொடர்புடைய வழிமுறைகளும் — இவற்றை உண்மையுடனும் ஈமான் உடனும் அல்லாஹ்வின் மீது நம்பிக்கை வைத்து அவனையே சார்ந்து, இவை சுட்டிக்காட்டும் அர்த்தங்களுக்கு தெளிந்த உள்ளத்துடன் தொடர்ந்து கடைப்பிடிப்போருக்கு — சூனியத்தின் தீங்குகளிலிருந்தும் இதர தீங்குகளிலிருந்தும் பாதுகாக்கும் மிகப் பெரிய காரணங்களாகவும், அது இடம்பெற்ற பின்னரும் அதை நீக்குவதற்கான மிகச் சிறந்த வழியாகவும் திகழ்கின்றன.

சூனியத்திலிருந்து தற்காத்து கொள்வதற்கும் அதற்கான சிகிச்சை பெறுவது சம்பந்தமாகவும் குறிப்பிடுவதற்கு முடிந்த வியங்கள் இவைதான் அல்லாஹ் இதற்கான நல்வாய்ப்பினை தருவதற்கு போதுமானவன்

இங்கு ஒரு முக்கியமான விஷயம் வருகிறது, அதாவது சூனியக்காரர்களின் செயலின் மூலம் அதாவது பிராணிகளை அறுத்துப் பலியிட்டோ அல்லது வேறு வணக்கங்களை செய்தோ சூனியத்திற்குச் சிகிச்சை செய்வது கூடாது. ஏனெனில் இவை ஷைத்தானியச் செயல்களாகும். அதுமட்டுமல்லாது அஷ்ஷிர்க்குல்அக்பர் எனும் பெரிய இணைவைப்புமாகும். அதே போல் சோதிடர்கள், குறி சொல்பவர்கள், மந்திரவாதிகள் ஆகியோரிடம் விளக்கம் கேட்டு அவர்கள் சொல்கிறபடி செயல்பட்டு சூனியத்திற்கு சிகிச்சை செய்வதும் கூடாது; ஏனெனில் அவர்கள் ஈமான் எனும் இறைநம்பிக்கை அற்றவர்கள், அத்துடன் அவர்கள் பொய்யர்களாகவும் கெட்டவர்களாகவும் உள்ளனர். மேலும் அவர்கள் 'இல்முல் ஃகைப்' மறைவான விஷயங்கள் பற்றிய ஞானம் தங்களிடம் இருப்பதாக வாதிடுவதோடு, பொதுமக்களைக் குழப்பத்தில் ஆழ்த்துகிறார்கள். இத்தகைய நபர்களிடம் சென்று விளக்கம் கேட்பதையும் அதனை நம்புவதையும் நபி ஸல்லல்லாஹு அலைஹிவஸல்லம் அவர்கள் தடைசெய்துள்ளார்கள். இதைப் பற்றிய தெளிவான விளக்கம் இந்நூலின் துவக்கத்தில் குறிப்பிடப்பட்டு விட்டது. ஆகவே அதிலிருந்து எச்சரிக்கையாக இருக்க வேண்டியது கடமை. நபி ஸல்லல்லாஹு அலைஹி வஸல்லம் அவர்களின் மூலம் ஸஹீஹான ஹதீதில் வந்துள்ளதாவது, நபியவர்களிடம் 'நுஷ்ரா' குறித்து கேட்கப்பட்டபோது அதற்கு நபியவர்கள்: "அது ஷைத்தானின் செயற்பாடு", இந்த ஹதீஸை இமாம்களான அஹ்மதும் அபூதாவூதும் நம்பகமான அறிவிப்பாளர் தொடரின் மூலம் பதிவு செய்துள்ளனர்.

நுஷ்ரா என்பது சூனியத்தினால் பாதிக்கப்பட்டவரின் சூனியத்தை அகற்றுதல் என்பது பொருள். நபி (ஸல்) அவர்களின் இந்தக் கூற்றின் கருத்து யாதெனில்: ஜாஹிலிய்யாக்கால மக்கள் செய்துகொண்டிருந்த நுஷ்ராதான் அது; அதாவது, சூனியக்காரனிடம் சென்று சூனியத்தை நீக்கி விடுமாறு கேட்பது, அல்லது அதுபோன்றதொரு சூனியத்தை இன்னொரு சூனியக்காரன் மூலம் செய்து அதை அவிழ்த்தல் என்பதாகும்.

ஆனால் ஓதிப்பார்ப்பதன் மூலமும் ஷரீஆவில் இடம்பெற்றிருக்கும் பாதுகாப்புக்கோரி ஓதும் பிரார்த்தனைகள் மூலமும் அனுமதிக்கப்பட்ட மருந்துகள் மூலமும் சிகிச்சை செய்வதில் - ஏற்கனவே கூறியதுபோன்று- எவ்விதப்பிரச்சினையும் கிடையாது. இமாம் இப்னுல் கய்யிம் (ரஹ்) அவர்களும், பத்ஹுல் மஜீத் நூலில் அஷ்ஷெய்க். அப்துர் ரஹ்மான் ஹஸன் அவர்களும் இக்கருத்தைத் தெளிவாகக் கூறியுள்ளனர். அவர்கள் தவிர வேறு பல அறிஞர்களும் அவ்வாறு கூறியுள்ளனர்.

அனைத்துவிதமான ஆபத்துகளிலிருந்து முஸ்லிம்கள் அனைவரையும் அல்லாஹ் காப்பாற்ற வேண்டுமெனவும் அவர்களது (தீனை) மார்க்கத்தைப் பாதுகாக்கவேண்டுமெனவும் மேலும் மார்க்கத்தைப் பற்றிய நல்லறிவையும் விளக்கத்தையும் அவர்களுக்கு வழங்கவேண்டுமெனவும் மார்க்கத்திற்கு முரணான எல்லா செயல்களிலிருந்தும் ஈடேற்றம் அளிக்கவேண்டும் என எல்லாம் வல்ல அல்லாஹ்விடம் இறைஞ்சுகிறோம்.

அல்லாஹ்வின் ஸலாத்தும் ஸலாமும் அவரின் அடியாரும் தூதருமாகிய முஹம்மத் (ஸல்) அவர்களின் மீதும், அவர்களின் குடும்பத்தார், தோழர்கள் அனைவர் மீதிலும் உண்டாவதாக.

அடக்கஸ்தளங்கள் மீது பள்ளிகள் கட்டுவதை எச்சரித்தல்

அப்துல் அஸீஸ் இப்னு அப்துல்லாஹ் இப்னு பாஸ்

நபிமார்கள், நல்லடியார்களின் சமாதிகளின் மீது பள்ளிகளைக் கட்டுவதை இந்நூல் எச்சரிக்கின்றது. மேலும், அது இணைவைப்பிற்கும், வரம்பு மீறுவதற்கும் இட்டுச் செல்லக் கூடியதாகும் என்பதை வலியுறுத்துகின்றது. இதிலிருந்து எச்சரிக்கின்ற மார்க்க ஆதாரங்களை இந்நூல் அடிப்படையாகக் கொண்டுள்ளதுடன், தவ்ஹீதைப் பாதுகாப்பதற்காக தூய மார்க்கத்தைப் பின்பற்றுவதன் அவசியத்தையும் கடுமையாக வலியுறுத்துகின்றது.

பத்தாவது தூது : அடக்கஸ்தளங்கள் மீது பள்ளிகள் கட்டுவதிலிருந்து எச்சரிக்கை

அல்லாஹ்வின் பெயர் கூறி ஆரம்பிக்கிறேன். எல்லாப் புகழும் அல்லாஹ்வுக்கே உரியது. ஸலாத்தும், ஸலாமும்; அல்லாஹ்வின் தூதர் மீதும் உண்டாவதாக!

இஸ்லாமிய அறிவியல் சங்கத்தின் இதழின் மூன்றாவது இதழில் (மாதத்தின் முஸ்லிம் செய்திகள்) பகுதியில் பிரசுரிக்கப்பட்டதை நான் பார்த்தேன்: ஜோர்டான் ஹாஷிமியத் இராச்சியத்தில் உள்ள இஸ்லாமிய அறிவியல் சங்கம் சமீபத்தில் கண்டுபிடிக்கப்பட்ட ரஹீப் கிராமத்தில் உள்ள குகையின் மீது ஒரு பள்ளிவாசல் அமைக்க திட்டமிட்டுள்ளது. அந்த குகை குர்ஆனில் குறிப்பிடப்பட்டுள்ள குகைவாசிகள் தங்கியிருந்ததாகக் கூறப்படுகிறது, முடிந்தது.

அல்லாஹ்வுக்காகவும் அவன் அடியார்களுக்காகவும் நல்வழி கூறும் கடமையை முன்னிறுத்தி, ஹாஷிமிய ஜோர்தான் இராச்சியத்தில் உள்ள இஸ்லாமிய அறிவியல் சங்கத்திற்கு அதே இதழிலேயே ஒரு நல்லுரையை நான் முன்வைக்க வேண்டும் என்று எண்ணினேன்; அதன் உள்ளடக்கம்: மேற்குறிப்பிட்ட அந்தக் குகையின் மீது ஒரு மஸ்ஜிதை எழுப்பும் தங்கள் நோக்கத்தை நிறைவேற்ற வேண்டாமென சங்கத்திற்கு அறிவுரை வழங்குதலாகும் . ஏனெனில், நபிமார்கள் மற்றும் நல்லடியார்களின் சமாதிகள் மற்றும் அவர்களின் சுவடுகள் மீது மஸ்ஜித்களை எழுப்புவது இஸ்லாமிய ஷரீஅத் மூலம் முழுமையாக தடைசெய்யப்பட்டிருப்பதோடு , அதைப் பற்றிக் கடுமையாக எச்சரிக்கையும் விடுக்கப்பட்டுள்ளது. காரணம், இது இணைவைப்பிற்கு (ஷிர்க்) இட்டுச்செல்லும் ஒரு விடயமாகவும் , நபிமார்கள் மற்றும் நல்லடியார்கள் குறித்து அளவுக்கு மீறிய புகழ்ச்சி மற்றும் அத்துமீறலுக்குக் காரணமாகவும் இருப்பதனாளாகும் நம் கண்களால் காணும் யதார்த்தம், சரீஅத் கொண்டு வந்ததின் உண்மைத்தன்மைக்கு சாட்சியாகும்; மேலும் அது, மகிமை மிகுந்த அல்லாஹ்விடமிருந்துதான் வந்தது என்பதற்கான ஆதாரமாகும்; மேலும், அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் அல்லாஹ்விடமிருந்து கொண்டு வந்து உம்மத்துக்கு அறிவித்த விடயங்களில், அவர்களின் உண்மைத்தன்மைக்கு உறுதியான சான்றாகவும் பலமான ஆதாரமாகவும் திகழ்கிறது. இஸ்லாமிய உலகின் நிலைமைகளை உற்று நோக்கினால், மண்ணறைகளின் மீது மஸ்ஜிதுகள் எழுப்பப்பட்டு, அவற்றை கண்ணியப்படுத்தி, அலங்கரித்து, பராமரிப்பவர்களை நியமித்து, அவற்றை வணக்கத்திற்குரிய இடமாக ஆக்குவதால் ஏற்பட்டுள்ள இணைவைப்பு மற்றும் அளவு மீறிய நேசம் ஆகியவற்றை நிச்சயமாக அறிந்து கொள்ளலாம். இவை அனைத்தும் இணைவைப்பிற்கு வழிவகுக்கும் வழிமுறைகளாகும். மேலும் இஸ்லாமிய ஷரீஅத் சட்டமானது இவற்றைத் தடுத்தும் எச்சரித்தும் வந்திருப்பதானது அதன் சிறப்பம்சங்களில் ஒன்றாகும் என்பதினையும் அறிந்து கொள்ளலாம்.

இதற்கான ஆதாரங்களில் ஒன்றாக, இமாம் புகாரி மற்றும் இமாம் முஸ்லிம் ஆகிய இருவரும் ஆஇஷா ரழியல்லாஹு அன்ஹா அவர்கள் கூறியதாக அறிவிக்கின்றார்கள்: நபி ஸல்லல்லாஹு அலைஹிவஸல்லம் அவர்கள் கூறினார்கள் : ‘தங்கள் நபிமார்களின் அடக்கஸ்தலங்களை வணக்கத்தலங்களாக ஆக்கிய யூத கிறிஸ்தவர்களின் மீது அல்லாஹ்வின் சாபம் உண்டாகட்டுமாக!' எனக் கூறி அவர்களின் செய்கை பற்றி எச்சரித்தார்கள். அவர்கள் மேலும் கூறினார்கள்: அல்லாஹ்வின் தூதர் (ஸல்) அவர்களது இந்த அறிவிப்பு (மட்டும்) இல்லாவிட்டால் நபியவர்களின் அடக்கத்தலம் (அனைவருக்கும் தெரியும்படி) வெளிப்பபடையாக அமைக்கப்பட்டிருக்கும். ஆயினும், அவர்களது அடக்கத்தலம் எங்கே வணக்கத்தலமாக ஆக்கப்பட்டுவிடுமோ என்று அஞ்சப்பட்டது. அதே போன்று ஸஹீஹுல் புஹாரி, ஸஹீஹ் முஸ்லிமில் பின்வரும் ஹதீஸும் பதிவு செய்யப்பட்டுள்ளது. உம்மு ஸலமா மற்றும் உம்மு ஹபீபா ரழியல்லாஹு அன்ஹுமா அவர்கள் அபீ ஸீனியாவில் தாம் கண்ட தேவாலயத்தையும், அதிலிருந்த உருவங்களையும் பற்றி அல்லாஹ்வின் தூதர் ஸல்லல்லாஹு அலைஹிவஸல்லம் அவர்களிடம் தெரிவித்தார்கள். அப்போது நபி ஸல்லல்லாஹு அலைஹிவஸல்லம் கூறினார்கள்: அவர்களில் ஒரு நல்ல மனிதர் வாழ்ந்து மரணித்து விட்டால் அவரது அடக்கத்தலத்தின் மேல் ஒரு வணக்கத்தலத்தை அவர்கள் எழுப்பி விடுவார்கள். அந்த நல்லவர்களின் உருவங்களையும் அதில் பதித்து விடுவார்கள். படைப்பினங்களிலேயே அவர்கள் தாம் மிகவும் கெட்டவர்களாவர்” என்று கூறினார்கள்

ஸஹீஹ் முஸ்லிமில், ஜுன்தப் பின் அப்தில்லாஹ் (ரலி) அவர்கள் கூறுகிறார்கள்: நபி (ஸல்) அவர்கள் இறப்பதற்கு ஐந்து நாட்களுக்கு முன் அவர்கள் கூறுவதை நான் கேட்டேன்: உங்களில் ஒருவர் என் (தேவைகளுக்காக நான் அணுகும்) உற்ற தோழராக இருப்பதிலிருந்து (விலகி) நான் அல்லாஹ்வையே சார்ந்திருக்கிறேன். ஏனெனில், உயர்வுக்குரிய அல்லாஹ் இப்ராஹீம் (அலைஹிஸ்ஸலாம்) அவர்களை (தன்) உற்ற தோழராக ஆக்கிக்கொண்டதைப் போன்று என்னையும் (தன்) உற்ற தோழனாக ஆக்கிக்கொண்டான். நான் என் சமுதாயத்தாரில் ஒருவரை என் உற்ற தோழராக ஆக்கிக்கொள்வதாயிருந்தால் அபூபக்ர் ரழியலல்லாஹு அன்ஹு அவர்களையே நான் என் உற்ற தோழராக ஆக்கிக்கொண்டிருப்பேன். அறிந்துகொள்ளுங்கள்: உங்களுக்கு முன்னிருந்த (சமுதாயத்த)வர்கள் தங்களுடைய நபிமார்கள் மற்றும் சான்றோர்களின் அடக்கத் தலங்களை வழிபாட்டுத்தலங்களாக ஆக்கிக் கொண்டார்கள். எச்சரிக்கை! நீங்கள் அடக்கத் தலங்களை வழிபாட்டுத்தலங்களாக ஆக்கிவிடாதீர்கள். அவ்வாறு செய்ய வேண்டாம் என்று உங்களுக்கு நான் தடை விதிக்கிறேன். இதே தலைப்பில் அதிகமான ஹதீஸ்கள் இடம்பெற்றுள்ளன.

நான்கு மத்ஹபுகளின் இமாம்களும், அவர்களல்லாத பிற முஸ்லிம் அறிஞர்களும், மண்ணறைகளை மஸ்ஜித்களாக எடுத்துக்கொள்வதைத் தடை எனத் தெளிவுபடுத்தி, அதிலிருந்து எச்சரித்துள்ளனர்; இது நபி ஸல்லல்லாஹு அலைஹிவஸல்லம் அவர்களின் ஸுன்னாவை அமுல்படுத்தும் பொருட்டும், உம்மத்திற்கான நல் அறிவுறுத்தலாகவும், முன்னர் யூதர், நசாராக்களில் அளவுக்கு மீறிச் சென்றவர்கள் செய்த தவறிலும், அவர்களை ஒத்த இந்த உம்மத்தின் வழி தவறியோர் செய்த தவறிலும், உம்மத் விழாதிருக்க எச்சரிப்பாகவும் அமைகிறது.

எனவே ஜோர்டானில் உள்ள இஸ்லாமிய அறிவியல் சங்கம் மற்றும் இதர முஸ்லிம்கள் அனைவரும் ஸுன்னாவை கடைப்பிடித்து, இமாம்களின் வழியில் நடந்து, அல்லாஹ் மற்றும் அவனது தூதர் எச்சரித்தவற்றை விட்டு விலகி நடப்பது அவசியமாகும்; ஏனெனில் அதில் தான் அடியார்களின் நல்வாழ்வு, மகிழ்ச்சி மற்றும் இவ்வுலக மறுவுலக வெற்றி உள்ளது. இக்கருத்தில் சிலர் ‘அஸ்ஹாபுல் கஹ்ஃப்’ பற்றிய கதையில் அல்லாஹ் ஜல்ல ஜலாலுஹு கூறியதை பிடித்துக்கொண்டனர்: "அவர்களின் விஷயத்தில் மிகைத்தவர்கள் கூறினார்கள்: “நிச்சயம் அவர்களுக்கருகில் ஒரு தொழுமிடத்தை (மஸ்ஜிதை) நாம் ஏற்படுத்துவோம்.” (அல்கஹ்ஃப் : 21).

இதற்கான விடை, பின்வருமாறு கூறப்படும்: அல்லாஹ் அந்தக் காலத்தின் ஆட்சியாளர்கள், தலைவர்கள் மற்றும் அதிகாரஸ்தர்கள் பற்றி, அவர்கள் இந்தக் கூற்றை கூறியதாகத் தகவல் அளித்திருக்கின்றான்; அது அவர்களுக்கு ஒப்புதலாகவோ அங்கீகாரமாகவோ அல்ல; மாறாக, அவர்களது செயலைக் கண்டித்தும் குற்றம் சாட்டியும், அவர்களின் செய்கையை மக்கள் வெறுத்து விலகச் செய்யும் நோக்கத்திலேயே ஆகும். இதற்குச் சான்றாக: இந்த வசனம் நபி ஸல்லல்லாஹு அலைஹிவஸல்லம் அவர்கள் மீது அருளப்பட்டதாகும், அவர்கள் அதன் கருத்ததை மிகவும் அறிந்திருந்தார்கள்.அன்னவர்கள் தமது சமூகம் சமாதிகளின் மீது மஸ்ஜித்களை அமைத்துக்கொள்வதைத் தடை செய்ததோடு அதிலிருந்து அவர்களை எச்சரித்தார்கள்; மேலும் அதனைச் செய்பவர்களை சபித்து கண்டித்தார்கள்.

அது அனுமதிக்கப்பட்ட ஒன்றாக இருந்திருந்தால், அதில் நபி அலைஹிஸ்ஸலாம் அவர்கள் இவ்வளவு கடுமையாகத் தடை விதித்திருக்கமாட்டார்கள்; அது மட்டுமல்லாது கடும் தொனியில் எச்சரித்ததோடு அதைச் செய்பவரைச் சபித்தார்கள். மேலும், அவன் அல்லாஹ்வின் படைப்புகளில் மிகக்கெட்டவன் என்றும் அறிவித்தார்கள். உண்மையை நாடுபவருக்கு இது போதுமான ஆதாரமாகும். ஒரு வாதத்துக்கு, முன் சென்ற சமூகங்களுக்கு அடக்கஸ்தலங்களில் பள்ளிவாயில்களை எழுப்புதல் அனுமதிக்கப்பட்டதாக நாம் கருதிக் கொண்டாலும் கூட, அதில் அவர்களை முன்னுதாரணமாக கொள்வது ஆகுமாகாது. ஏனெனில் எமது ஷரீஆ முன்னைய ஷரீஆக்களை மாற்றிவிட்டது; எமது நபி (ஸல்) அவர்கள் தூதர்களின் இறுதியாவார்; அவர்களின் ஷரீஆ முழுமையானதும் உலகமக்கள் அனைவருக்கும் பொதுவானதும் ஆகும். மேலும் அவர்கள் அடக்கஸ்தலங்களில் பள்ளிவாயில்களை எழுப்புவதைத் தடுத்துவிட்டார்கள்; ஆகையால் அவர்களுக்கு மாறாகச் செயல்படுவது எமக்கு அனுமதிக்கப்படாது. அவர்களைப் பின்பற்றுவது எமக்கு அவசியமாகும்; அவர்கள் கொண்டு வந்தவற்றைத் பற்றிப் பிடித்திருப்பதும், அதற்கு முரணான பழைய ஷரீஆக்களில் உள்ளவற்றையும், அதைச் செய்வோரால் நன்மையாகக் கருதப்படும் பழக்கவழக்கங்களையும் விட்டு விடுவதும் எமக்கு அவசியமாகும். ஏனெனில் அல்லாஹ்வின் ஷரீஆவைவிட முழுமையானது எதுவுமில்லை; அல்லாஹ்வின் தூதர் (ஸல்) அவர்களின் வழிகாட்டுதலைவிடச் சிறந்த வழிகாட்டுதல் இல்லை.

எங்களை அல்லாஹ் பொருந்திக்கொண்ட நிலையில் அவனை சந்திக்கும்வரை, அவனது மார்க்கத்தின் மீது உறுதியையும், அவனது தூதர் முஹம்மத் ஸல்லல்லாஹு அலைஹிவஸல்லம் அவர்களின் சட்டங்களைப் பற்றிய பற்றுதலையும், எங்கள் சொற்களிலும் செயல்களிலும், வெளிப்படையானவைகளிலும் மறைந்தவைகளிலும், அனைத்து விஷயங்களிலும் நல்குமாறும், முஸ்லிம்கள் அனைவருக்கும் நல்குமாறும் அல்லாஹ்விடம் பிரார்த்திக்கின்றோம். நிச்சயமாக அவனே கேட்கக் கூடியவன், சமீபத்திலுள்ளவன்.

அல்லாஹ்வின் அடியாரும் தூதருமாகிய முஹம்மத் (ஸல்) அவர்கள் மீதும், அவர்களின் குடும்பத்தார், தோழர்கள் மற்றும் மறுமை நாள்வரை அவரின் வழிகாட்டுதலை பின்பற்றி நடப்போர் அனைவர் மீதும் அல்லாஹ்வின் ஸலாத்தும் ஸலாமும் உண்டாவதாக.

மரணித்தவர்களை பள்ளிவாசல்களில் அடக்கம் செய்வது

அப்துல் அஸீஸ் இப்னு அப்துல்லாஹ் இப்னு பாஸ்

மரணித்தவர்களை பள்ளிவாசல்களில் அடக்கம் செய்வது இணைவைப்பிற்கு இட்டுச் செல்லும் வழிமுறைகளில் ஒன்றாக இருப்பதனால், அது அனுமதிக்கப்படாததாகும் என்பதை இந்நூல் விளக்குகிறது. மேலும், குர்ஆன் மற்றும் சுன்னாவில் வந்துள்ளவற்றை ஆதாரமாகக் கொண்டு, நபி (ஸல்) அவர்கள் மற்றும் அவர்களது தோழர்கள் செய்ததுபோல தங்கள் இறந்தவர்களை பள்ளிகளுக்கு வெளியே அடக்கம் செய்வது அவசியமாகும் என முஸ்லிம்களை வலியுறுத்துகிறது.

பதினொன்றாம் தூது : பள்ளிவாசல்களில் மரணித்தவர்களை அடக்கம் செய்வது

அல்லாஹ்வின் பெயர் கூறி ஆரம்பிக்கிறேன். எல்லாப் புகழும் அல்லாஹ்வுக்கே உரியது. ஸலாத்தும், ஸலாமும் அல்லாஹ்வின் தூதர் மீதும், அவர்களின் குடும்பத்தார் மீதும், அவர்களின் வழிகாட்டல்களைப் பின்பற்றியோர் மீதும் உண்டாவதாக!

ஹிஜ்ரி 1415/4/17 அன்று வெளியான 'அல் குர்தூம்' பத்திரிகையை நான் பார்த்தேன்; அதில் திரு. முகமது அல்-ஹசன் அல்-இத்ரீஸி அவர்களை அவரது தந்தையின் அருகில் உம் துர்மான் நகரில் உள்ள அவர்களின் பள்ளிவாசலில் அடக்கம் செய்ததாக ஒரு அறிவிப்பு வெளியிடப்பட்டிருந்தது... மேலும்.

முஸ்லிம்களுக்கு நசீஹத் செய்வதையும், தீமையை தெளிவாக மறுப்பதையும் அல்லாஹ் கட்டாயப்படுத்தியிருப்பதனால், பள்ளிகளுக்குள் அடக்கம் செய்வது அனுமதிக்கப்படாததாகும் என்பதை எச்சரிப்பது அவசியம் என நான் கண்டேன். அது மட்டுமல்ல, இது இணைவைப்பிற்கு இட்டுச் செல்லும் வழிமுறைகளில் ஒன்றாகவும், அல்லாஹ்வினதும், நபி (ஸல்) சாபத்துக்கும் கண்டிப்புக்கும் உள்ளான யூத, கிறிஸ்தவர்களுடைய வழிமுறைகளில் ஒன்றாகவும் உள்ளது. இது தொடர்பாக, புஹாரி, முஸ்லிம் ஆகிய இரு கிரந்தங்களிலும், ஆயிஷா (ரலி) அவர்களிடமிருந்து அறிவிக்கப்படுவதாவது: 'தங்கள் நபிமார்களின் அடக்கஸ்தலங்களை வணக்கத்தலங்களாக ஆக்கிய யூத கிறிஸ்தவர்களின் மீது அல்லாஹ்வின் சாபம் உண்டாகட்டுமாக!' முஸ்லிமின் அறிவிப்பில், நபி ஸல்லல்லாஹு அலைஹிவஸல்லம் அவர்கள் கூறியதாக ஜுந்துப் இப்னு அப்துல்லாஹ் ரழியல்லாஹு அன்ஹு அவர்கள் அறிவிக்கிறார்கள்: 'அறிந்து கொள்ளுங்கள் ! உங்களுக்குமுன் இருந்தவர்கள் தமது நபிமார்களின் மற்றும் நல்லோரின் மண்ணறைகளை வணக்கஸ்தளங்களாக ஆக்கிக் கொண்டார்கள். ஆகையால், மண்ணறைகளை வணக்கஸ்தளங்களாக ஆக்கிக் கொள்ள வேண்டாம்; ஏனெனில் இதை நான் உங்களுக்குத் தடை செய்துள்ளேன்.' இதே கருத்தில் அதிகமான ஹதீஸ்கள் இடம்பெற்றுள்ளன.

ஆகவே உலகமெங்குமுள்ள முஸ்லிம்கள் — அரசுகளும் மக்களும் —இந்த விடயத்தில் அல்லாஹ்வை அஞ்சி நடந்து கொள்ளவும், அவன் தடை செய்தவற்றை விட்டும் எச்சரிக்கையாக இருக்கவும், நபி (ஸல்) அவர்கள் மற்றும் அவர்களது தோழர்கள் ரலியல்லாஹு அன்ஹும் மற்றும் அவர்களை நல்ல முறையில் பின்தொடர்ந்தோர் இறந்தவர்களை பள்ளிவாசல்களுக்கு வெளியே அடக்கம் செய்து வந்ததுபோல தங்கள் இறந்தவர்களை பள்ளிகளுக்கு வெளியே அடக்கம் செய்வது அவசியமாகும் .

நபி ஸல்லல்லாஹு அலைஹி வஸல்லம் அவர்களின் மண்ணறையும், அவர்களின் இரு தோழர்களான அபூபக்ர் அஸ்ஸித்தீக் மற்றும் உமர் இப்னுல் கத்தாப் ரழியல்லாஹு அன்ஹுமா அவர்களின் மண்ணறைகளும், நபியவர்களின் பள்ளிவாயிலினுள் இருப்பது; பள்ளிவாயில்களுக்குள் இறந்தோரை அடக்கம் செய்வதற்கான ஆதாரமாகாது. ஏனெனில் நபி ஸல்லல்லாஹு அலைஹி வஸல்லம் அவர்கள் தமது வீட்டில் — ஆயிஷா ரழியல்லாஹு அன்ஹா அவர்களின் அறையில் — அடக்கம் செய்யப்பட்டார்கள்; பின்னர் அவர்களின் இரு தோழர்களும் அவருடனே அடக்கம் செய்யப்பட்டார்கள். பின்னால், அல்-வலீத் இப்னு அப்துல்-மலிக் அவர்களின் காலத்தில் பள்ளிவாயில் விரிவாக்கப்பட்டபோது, ஹிஜ்ரி முதலாம் நூற்றாண்டின் தொடக்கத்தில், அந்த அறை பள்ளியுடன் இணைக்கப்பட்டது. இதை அறிஞர்கள் கண்டித்தனர்; ஆனால் அவ்வாறு இணைப்பது விரிவாக்கத்திற்கு தடையாகாது, எனவே இது தெளிவான ஒரு விடயமாகும் இதில் எந்தக்குழப்பமில்லை என அவர் கருதினார்.

இதன் மூலம் நபி (ஸல்) அவர்கள் மற்றும் அவர்களின் இரு தோழர்கள் பள்ளிவாசலுக்குள் அடக்கம் செய்யப்படவில்லை. பள்ளிவாசல் விரிவாக்கத்தால் அவர்களின் மண்ணறைகள் பள்ளிவாசலுடன் இணைந்திருப்பது, பள்ளிவாசல்களில் அடக்கம் செய்வதை அனுமதிக்கக் கூடிய ஆதாரமாகாது என்பது ஒவ்வொரு முஸ்லிமுக்கும் தெளிவாகிறது; ஏனெனில் அவர்கள் பள்ளிவாசலுக்குள் இல்லை, அவர்கள் (ஸல்) அவர்களின் வீட்டிலேயே உள்ளனர். மேலும் வலீதின் இச்செயல் யாருக்கும் ஆதாரமாக அமையாது . ஏனெனில் ஆதாரம் என்பது அல்குர்ஆன் சுன்னா மற்றும் சமூகத்தின் முன்னோர்களால் (ஸலஃப்)ஏகோபித்து எடுக்கப்பட்ட முடிவு (இஜ்மா) ஆகியன மாத்திரமே! அல்லாஹ் அவர்கள் அனைவரையும் பொருந்திக் கொள்வானாக! மேலும் அவர்களை நல்ல முறையில் பின்பற்றுவோரில் நம்மையும் உட்படுத்துவானாக.

நல்லுபதேசத்துக்காகவும், பொறுப்பிலிருந்து விடுபடுவதற்காகவும் இந்நூல் ஹிஜ்ரி 1415/ 5/14 அன்று பதிக்கப்பட்டது.

எல்லா விடயங்களிலும் நல்லதை தெரிவு செய்து ஈடேற்றத்தை அடைந்து கொள்ள உதவியாளனாய் அல்லாஹ்வே உள்ளான். எமது நபி முஹம்மத் (ஸல்) அவர்களுக்கும், அவர்களது குடும்பத்தினருக்கும், தோழர்களுக்கும், நன்மையுடன் அவர்களைப் பின்பற்றுவோருக்கும் அல்லாஹ் ஸலாதும், ஸலாமும் சொறிவானாக.

நபி (ஸல்) அவர்களின் மார்க்கத்திலிருந்து வெளியேற அனுமதியுண்டு என்று கூறுபவனின் நிராகரிப்பு மற்றும் வழிகேடும் பற்றிய விளக்கம்

அப்துல் அஸீஸ் இப்னு அப்துல்லாஹ் இப்னு பாஸ்

நபி (ஸல்) அவர்களின் மார்க்கத்திலிருந்து வெளியேற அனுமதியுண்டு என்று கூறுபவனின் நிராகரிப்பை இந்த புத்தகம் தெளிவுபடுத்துகிறது. மேலும், யூத, கிறிஸ்தவர்கள் தமது மார்க்கத்திலேயே நிலைத்திருக்கலாம் என்ற சில எழுத்தாளர்களின் வாதத்தைக் கண்டிப்பதுடன், நபி ﷺ அவர்களின் தூதுத்துவம் முழு மனித சமுதாயத்திற்கும் பொதுவானது எனவும், குர்ஆன் மற்றும் சுன்னாவில் வந்துள்ளவாறு இஸ்லாம் மட்டுமே ஒரே உண்மையான மார்க்கம் எனவும் இது உறுதிப்படுத்துகிறது.

பன்னிரண்டாவது தூது : நபி (ஸல்) அவர்களின் மார்க்கத்திலிருந்து வெளியேற அனுமதியுண்டு என்று கூறுபவனின் நிராகரிப்பு மற்றும் வழிகேடும் பற்றிய விளக்கம்

அகிலங்களின் அதிபதியாகிய அல்லாஹ்வுக்கே எல்லாப் புகழும் உரித்தாகட்டும். இறுதி நபியாகவும் தூதராகவும் வந்த எமது நபி முஹம்மத் ஸல்லல்லாஹு அலைஹி வஸல்லம் அவர்கள் மீதும், அவர்களது குடும்பத்தார்கள், தோழர்கள் என அனைவரும் மீதும் அல்லாஹ்வின் அருளும், சாந்தியும் என்றென்றும் உண்டாகட்டும்.

நான் அஷ்ஷர்குள் அவ்சத் என்ற பத்திரிகையின் 5824-ஆம் இதழில் ஹிஜ்ரி 5/6/1415 தேதியிட்ட கட்டுரையைப் பார்த்தேன், அதை அப்துல் பாத்தாஹ் அல் ஹாயிக் என்பவர் எழுதியுள்ளார், தலைப்பு: (தவறான புரிதல்).

சுருக்கமாக : இஸ்லாம் மார்க்கத்தில் உறுதியாகத் தெரிந்திருக்க வேண்டியதும், அல்குரான் ஹதீஸ் மற்றும் இஜ்மா என்பவற்றின் மூலம் உறுதிசெய்யப்பட்டதுமான முஹம்மத் (ஸல்) அவர்களின் தூது அனைத்து மக்களுக்குமானதே என்பதைக் அவர் மறுத்ததாகும்; மேலும், முஹம்மத் (ஸல்) அவர்களைப் பின்பற்றாமல், அவருக்கு கீழ்ப்படியாமல் இருப்பவன், ஒரு யூதனாகவோ அல்லது கிறிஸ்தவராகவோ தொடர்ந்தும் உண்மை மார்க்கத்தில் இருப்பான் என்று கூறியதும் ; பின்னர் நிராகரிப்பாளர்களையும் பாவிகளையும் தண்டிப்பது தொடர்பான சர்வலோக இரட்சகனான அல்லாஹ்வின் ஏற்பாட்டை விமர்சித்து , அதை ஒரு வீண் காரியமாகக் சித்தரித்து பேசியதுமாகும் .

மேலும் அவன் மார்க்க ஆதாரங்களை திரித்து, அவற்றை அதன் உரிய இடங்களை விட்டுத் தவறான இடங்களில் பயன்படுத்தி, தனது மனோ இச்சை பிரகாரம் விளக்கம் அளித்தான் . மேலும், முஹம்மது நபி (ஸல்) அவர்களின் தூதுச்செய்தி மனித சமூகத்துக்கு பொதுவானது என்பதைத் தெளிவாகச் சுட்டிக்காட்டும் மார்க்க ஆதாரங்களையும் தெளிவான வசனங்களையும் புறக்கணிப்பதோடு , அவ்வசனங்களை பின்பற்றாதவன் குஃப்ரில் இருப்பான் என்பதையும், அல்லாஹ் இஸ்லாத்தை தவிர வேறு எந்த மார்க்கத்தையும் ஏற்றுக்கொள்ளமாட்டான் என்பதையும் உறுதிப்படுத்தும் இதர பல தெளிவான வசனங்களையும் அவன் புறக்கணிகிறான்; இதன் மூலம் அறிவீனர்களை ஏமாற்ற முடியும் என்று நினைக்கிறான் . இவரது இச்செய்கையானது வெளிப்படையான நிராகரிப்பாகும்; இஸ்லாத்திலிருந்து மதமாறுதலாகும்; அல்லாஹ்வையும் அவருடைய தூதர் ஸல்லல்லாஹு அலைஹி வஸல்லம் அவர்களையும் பொய்ப்படுத்துவதுமாகும் என்பதனை இக்கட்டுரையை வாசிக்கும் அறிவும் நம்பிக்கையும் உடையவர்கள் நன்கு அறிவார்கள்.

மார்க்கத்தின் அடிப்படையில் அவனை திருத்தி, அவனுக்கு உரிய தண்டனையை வழங்குவதற்காக அவனை நீதிமன்றத்திற்கு அனுப்புவது ஆட்சியாளரின் கடமையாகும்.

அல்லாஹ், முஹம்மது (ஸல்லல்லாஹு அலைஹிவ வஸல்லம்) அவர்களின் தூதுத்துவம் உலகிலுள்ளோர் யாவருக்கும் பொதுவானது என்பதைத் தெளிவுபடுத்தியுள்ளான்; மனித ஜின் ஆகிய இரு வகையினரும் அவர்களைப் பின்பற்றுவது அவசியமானது என்பதையும் அறிவித்துள்ளான். இது சிறிதளவு அறிவுள்ள ஒரு முஸ்லிமுக்கும் கூடத் தெரியாமல் இருக்காது.

அல்லாஹ் கூறுகிறான் : (நபியே!) கூறுவீராக: “மனிதர்களே! நிச்சயமாக நான் உங்கள் அனைவருக்கும் அல்லாஹ்வின் தூதர் ஆவேன். வானங்கள் இன்னும் பூமியின் ஆட்சி அவனுக்குரியதே! அவனைத் தவிர (உண்மையில் வணங்கத்தகுதியான) இறைவன் அறவே இல்லை. (அவன்தான்) உயிர்ப்பிக்கிறான்; இன்னும், மரணிக்கச் செய்கிறான். ஆகவே, நீங்கள் நேர்வழி பெறுவதற்காக அல்லாஹ்வை நம்பிக்கை கொள்ளுங்கள். இன்னும், (நீங்கள் நேர்வழி பெறுவதற்காக) அல்லாஹ்வையும் அவனுடைய வாக்குகளையும் நம்பிக்கை கொள்பவரான, எழுதப் படிக்கத் தெரியாதவரான, நபியான அவனுடைய தூதரையும் நம்பிக்கை கொள்ளுங்கள்! இன்னும், அவரைப் பின்பற்றுங்கள்! (அல் அஃராப் : 158) மேலும் அல்லாஹ் கூறுகிறான்: "...இந்த குர்ஆன் எனக்கு வஹி மூலம் அறிவிக்கப்பட்டது, இதன் மூலம் உங்களையும், அது யாருக்கு சென்றடைகிறதோ அவரையும் நான் எச்சரிப்பதற்காக..." (அல் அன்ஆம் : 19). மேலும் அல்லாஹ் கூறுகிறான்: (நபியே!) கூறுவீராக: “நீங்கள் அல்லாஹ்வின் மீது அன்பு வைப்பவர்களாக இருந்தால் என்னைப் பின்பற்றுங்கள். அல்லாஹ் உங்கள் மீது அன்பு வைப்பான்; இன்னும், உங்களுக்கு உங்கள் பாவங்களை மன்னிப்பான். அல்லாஹ் மகா மன்னிப்பாளன், மகா கருணையாளன் ஆவான்.’’ (ஆல இம்ரான் : 31) மேலும் அல்லாஹ் கூறுகிறான்: "இன்னும் இஸ்லாம் அல்லாத (வேறு) மார்க்கத்தை எவரேனும் விரும்பினால் (அது) ஒருபோதும் அவரிடமிருந்து ஒப்புக் கொள்ளப்பட மாட்டாது; மேலும் அ(த்தகைய)வர் மறுமை நாளில் நஷ்டமடைந்தோரில் தான் இருப்பார்" (ஆல இம்ரான் : 85) மேலும் அல்லாஹ் கூறுகிறான்: " இன்னும், (நபியே!) நாம் உம்மை மனித குலம் முழுமைக்கும் நன்மாராயங் கூறுபவராகவும் அச்சமூட்டி எச்சரிக்கை செய்பவராகவுமேயன்றி அனுப்பவில்லை..." (ஸபஃ : 28) மேலும் அல்லாஹ் C: " (நபியே!) உம்மை அகிலத்தார்களுக்கு ஓர் அருளாகவே தவிர நாம் அனுப்பவில்லை". (அல் அன்பியா: 107) மேலும் அல்லாஹ் கூறுகிறான்: " வேதம் கொடுக்கப்பட்டோரிடமும், பாமர மக்களிடமும்: “நீங்களும் (அவ்வாறே) வழிப்பட்டீர்களா?” என்று கேளும்; அவர்களும் (அவ்வாறே) முற்றிலும் வழிப்பட்டால் நிச்சயமாக அவர்கள் நேரான பாதையை அடைந்து விட்டார்கள்; ஆனால் அவர்கள் புறக்கணித்து விடுவார்களாயின் (நீர் கவலைப்பட வேண்டாம்,) அறிவிப்பதுதான் உம் மீது கடமையாகும்; மேலும், அல்லாஹ் தன் அடியார்களை உற்றுக்கவனிப்பவனாகவே இருக்கின்றான்" (ஆல இம்ரான் : 20) மேலும் அல்லாஹ் கூறுகிறான்: " உலகத்தார் யாவரையும் அச்சமூட்டி எச்சரிக்கை செய்வதற்காக (சத்தியத்தையும், அசத்தியத்தையும் தெளிவாகப்) பிரித்தறிவிக்கும் இவ்வேதத்தைத் தன் அடியார் மீது இறக்கியவன் மிக்க பாக்கியமுடையவன்". (அல் ஃபுர்கான் : 1)

புகாரி மற்றும் முஸ்லிம்-இல், நபி ஸல்லல்லாஹு அலைஹிவஸல்லம் அவர்கள் கூறியதாக ஜாபிர் ரழியல்லாஹு அன்ஹு அவர்கள் அறிவிக்கின்றார்கள் : ' எனக்கு முன்னர் (நபிமார்கள்) யாருக்கும் கொடுக்கப்படாத ஐந்து அம்சங்கள் எனக்குக் கொடுக்கப்பட்டுள்ளன: (எதிரிகளுக்கும் எனக்குமிடையில்) ஒரு மாத காலம் பயணம் செய்யும் இடைவெளியிலிருந்தாலும் அவர்களின் உள்ளத்தில் பயம் ஏற்படுத்தப்படுவதன் மூலம் நான் உதவப்பட்டுள்ளேன். பூமி முழுவதும் தொழுமிடமாகவும், சுத்தம் செய்யக்கூடியதாகவும் எனக்கு ஆக்கித் தரப்பட்டுள்ளது. என்னுடைய சமுதாயத்தில் தொழுகையின் நேரத்தை அடைந்தவர் (தான் இருக்கும் இடத்தில்) தொழுது கொள்ளட்டும்! போரில் கிடைக்கிற பொருள்கள் எனக்கு ஹலாலாக்கப்பட்டுள்ளன. ஒவ்வொரு நபியும் தங்களின் சமூகத்திற்கு மட்டுமே நபியாக அனுப்பப்பட்டார்கள். ஆனால், நான் மனித இனம் முழுமைக்கும் நபியாக அனுப்பப்பட்டுள்ளேன். (மறுமையில் என்னுடைய உம்மத்துக்காக) சிபாரிசு செய்யும் வாய்ப்பு கொடுக்கப்பட்டுள்ளேன்'.

இது எங்கள் நபி முஹம்மது நபி ஸல்லல்லாஹு அலைஹி வஸல்லம் அவர்களின் தூதுத்துவம் அனைத்து மனிதர்களுக்குமான பொதுவானதும் முழுமையானதும் என்பதற்கான தெளிவான விளக்கமாகும்; மேலும் அவர்களின் மார்க்கத்தின் மூலம் முன்னைய அனைத்து மார்க்கங்களும் மாற்றப்பட்டுவிட்டன; ஆகவே முஹம்மது நபி ஸல்லல்லாஹு அலைஹி வஸல்லம் அவர்களைப் பின்பற்றாமல், அவர்களுக்குக் கீழ்ப்படாமல் இருப்பவன் மறுப்பவனும் மாறு செய்பவனும்; அல்லாஹ்வின் தண்டனைக்கு உரியவனுமாகிறான். அல்லாஹ் கூறுகின்றான்: " ...இன்னும், (ஏனைய) கூட்டங்களிலிருந்து எவர் இதை நிராகரிப்பாரோ நரகம் அவருடைய வாக்களிக்கப்பட்ட இடமாக இருக்கும்". (ஹூத் : 17). மேலும் அல்லாஹ் கூறுகின்றான்: (அவருடைய கட்டளைக்கு மாறுசெய்பவர்கள் (-உள்ளங்கள் இறுகி நிராகரிப்பு என்னும்) குழப்பம் தங்களை அடைந்துவிடுவதை; அல்லது, வலி தரும் (கடுமையான) தண்டனை தங்களை அடைந்துவிடுவதைப் பற்றி எச்சரிக்கையாக(பயந்தவர்களாக) இருக்கட்டும்.) (அந்நூர் : 63) மேலும் அல்லாஹ் கூறுகின்றான்: " இன்னும், எவர் அல்லாஹ்விற்கும் அவனுடைய தூதருக்கும் மாறு செய்து, அவனுடைய சட்டங்களை மீறுவாரோ அவரை (அல்லாஹ்) நரகத்தில் பிரவேசிக்கச் செய்வான். அதில் (அவர்) நிரந்தரமாக தங்கி இருப்பார். இன்னும், இழிவுபடுத்தும் தண்டனையும் அவருக்கு உண்டு". (அந்நிஸா : 14) மேலும் அல்லாஹ் கூறுகின்றான்: " ...எவர் (இந்த தூதரையும் அவர் கூறுவதையும்) நம்பிக்கை கொள்வதற்கு பதிலாக (அதை) நிராகரிப்பதை எடுத்துக் கொள்வாரோ அவர் திட்டமாக நேர்வழியிலிருந்து வழிதவறிவிட்டார்". (அல் பகரா : 108) இதே கருத்தில் அதிகமான திரு வசனங்கள் வந்துள்ளன.

அல்லாஹ் தன் தூதருக்குக் கீழ்ப்படிதலைத் தனக்கு கீழ்ப்படிதலோடு இணைத்துள்ளான்; மேலும், இஸ்லாம் அல்லாததை மார்க்கமாக ஏற்றுக்கொள்கிறவன் நஷ்டவாளன் என்பதையும் அவன் தெளிவுபடுத்தியுள்ளான்; அவனிடமிருந்து எந்த மாற்றீடோ பரிகாரமோ ஏற்றுக்கொள்ளப்படமாட்டாது. அவன் கூறுகிறான்: " இன்னும் இஸ்லாம் அல்லாத (வேறு) மார்க்கத்தை எவரேனும் விரும்பினால் (அது) ஒருபோதும் அவரிடமிருந்து ஒப்புக் கொள்ளப்பட மாட்டாது; மேலும் அ(த்தகைய)வர் மறுமை நாளில் நஷ்டமடைந்தோரில் தான் இருப்பார்". (ஆல இம்ரான் : 85) மேலும் அல்லாஹ் கூறுகிறான்: " எவர் (அல்லாஹ்வின்) தூதருக்குக் கீழ்படிகிறாரோ, அவர் அல்லாஹ்வுக்குக் கீழ்படிகிறார்" (அந்நிஸா : 80) மேலும் அல்லாஹ் கூறுகிறான்: “அல்லாஹ்வுக்கு நீங்கள் கீழ்படியுங்கள்; இன்னும் (அவனுடைய) ரஸூலுக்கும் கீழ்ப்படியுங்கள்” என்று (நபியே!) நீர் கூறுவீராக; ஆனால் நீங்கள் புறக்கணித்தால் அவர் மீதுள்ள கடமையெல்லாம் தம் மீது சுமத்தப்பட்ட (தூதுச் செய்தியை உங்களிடம் அறிவிப்ப)துதான்; இன்னும் உங்கள் மீதுள்ள கடமையானது, உங்கள் மீது சுமத்தப்பட்ட (படி வழிபடுவ)துதான்; எனவே, நீங்கள் அவருக்குக் கீழ்படிந்து நடந்தால் நீங்கள் நேர்வழி பெறுவீர்கள்" (அந்நூர் : 54) மேலும் அல்லாஹ் கூறுகிறான்: " நிச்சயமாக வேதக்காரர்களிலும் முஷ்ரிக்குகளிலும் எவர்கள் நிராகரிக்கிறார்களோ அவர்கள் நரக நெருப்பில் இருப்பார்கள் - அதில் என்றென்றும் இருப்பார்கள் - இத்தகையவர்கள்தாம் படைப்புகளில் மிகக் கெட்டவர்கள் ஆவார்கள்". (அல் பய்யினா:6)

நபி (ஸல்) அவர்கள் கூறியதாக, முஸ்லிம் (ரஹ்) அவர்கள தமது ஆதாரப் பூர்வமான கிரந்தத்தில் இவ்வாறு கூறுகின்றார்கள் : முஹம்மதின் உயிர் யாருடைய கையிலுள்ளதோ அவன்மீது சத்தியமாக! இந்த(இறுதி)ச் சமுதாயத்திலுள்ள யூதரோ கிறிஸ்தவரோ யாரேனும் ஒருவர் என்னைப் பற்றிக் கேள்விப்பட்ட பிறகும்கூட நான் கொண்டுவந்த (மார்க்கத்)தை நம்பிக்கை கொள்ளாமல் இறந்துவிட்டால், அவர் நரகவாசிகளில் ஒருவராகவே இருப்பார்.

அல்லாஹ்வின் தூதர் ஸல்லல்லாஹு அலைஹிவஸல்லம் அவர்கள் தமது செயலாலும் சொல்லாலும் இஸ்லாத்தில் நுழையாதோரின் மார்க்கம் செல்லுபடியற்றது என்பதை விளக்கியுள்ளனர். ஆகவே, அவர்கள் நிராகரிப்பாளர்களுடன் எவ்வாறு போரிட்டார்களோ அவ்வாறே யூதர்களுடனும் கிறிஸ்தவர்களுடனும் , போரிட்டார்கள்; மேலும், அவர்களில் ஜிஸ்யாவை வழங்குபவர்களிடமிருந்து அதை பெற்றார்கள் — இதனால், அவர்களிலுள்ள மீதமுள்ளோரிடம் இஸ்லாத்தின் அழைப்புச் செய்தி சென்றடைவதை அவர்கள் தடுக்காமல் இருக்கவும், அவர்களில் யார் விரும்பினார்களோ அவர்கள் தம் சமூகத்தார் அவர்களைத் திருப்பிவிடுவார்கள், தடைசெய்வார்கள் அல்லது கொலைசெய்வார்கள் என்ற பயமின்றி இஸ்லாத்தில் நுழைய இயலும்படியாகவும் அமைந்தது.

புகாரி மற்றும் முஸ்லிம் இருவரின் அறிவிப்பில், அபூ ஹுரைரா (ரழி) அவர்கள் கூறுகின்றார்கள்: நாங்கள் பள்ளிவாசலில் இருந்தபோது, அல்லாஹ்வின் தூதர் ﷺ அவர்கள் வெளியே வந்து கூறினார்கள்: யூதர்களிடமே செல்க!" என்று (அவர்) கூறினார். அதனால் நாங்கள் அவருடன் புறப்பட்டு பைதுல் மித்ராஸ் என்ற இடத்திற்குச் சென்றோம். அங்கு நபி (ஸல்) அவர்கள் எழுந்து அவர்களை அழைத்துச் சொன்னார்கள்: "யூதர்களே, இஸ்லாத்தில் இணைந்திடுங்கள், ஈடேற்றமடைந்திடுவீர்." அவர்கள், "அபுல் காஸிமே! நீர் எத்திவைத்து விட்டீர்" என்று பதிலளித்தார்கள். அவர்களிடம் அல்லாஹ்வின் தூதர் (ஸல்) அவர்கள், "அதையே நான் விரும்புகிறேன். இஸ்லாத்தில் இணைந்திடுங்கள், ஈடேற்றமடைந்திடுவீர்" என்று கூறினார்கள். அவர்கள், "அபுல் காஸிமே! நீர் எத்திவைத்து விட்டீர்" என்றார்கள். அவர்களிடம் அல்லாஹ்வின் தூதர் (ஸல்) அவர்கள், "அதையே நான் விரும்புகிறேன்" என்று கூறினார்கள். பின்னர் அதையே மூன்றாவது தடவையாகவும் கூறினார்கள்... ஹதீஸ்

இதன் பொருள் : நபி (ஸல்) அவர்கள் யூதர்களின் கல்விக்கூடங்களுக்கு சென்று, அவர்களை இஸ்லாத்துக்கு அழைப்புவிடுத்தார்கள். மேலும் “இஸ்லாத்தில் இணைந்திடுங்கள், ஈடேற்றமடைந்திடுவீர்” என்று கூறி, அதை அவர்களிடம் திரும்பத் திரும்ப கூறினார்கள்.

அதேபோல்: நபி (ஸல்) அவர்கள் தமது கடிதத்தை ஹிரக்கில் மன்னனுக்கு அனுப்பினார்கள்; அதில், இஸ்லாத்தை ஏற்குமாறு அவரை அழைத்து, அவர் மறுத்துவிட்டால், அவருடைய மறுப்பினால் இஸ்லாத்தை ஏற்காமல் இருப்பவர்களின் பாவச் சுமையும் அவர்மேல் இருக்கும் என்று அறிவித்தார்கள். இதனைப் பற்றி புகாரி, முஸ்லிம் இருவரும் தங்கள் கிரந்தங்களில் அறிவித்ததாவது: ஹிரக்ல் அல்லாஹ்வின் தூதர் (ஸல்) அவர்களின் கடிதத்தை வரவழைக்கச் சொல்லி, அதை வாசித்தார்; அதில் வருமாறு இருந்தது: ' பிஸ்மில்லாஹிர் ரஹ்மானிர் ரஹீம், அல்லாஹ்வின் தூதர் முஹம்மது (ஸல்லல்லாஹு அலைஹி வஸல்லம்) அவர்களிடமிருந்து ரூமின் பேரரசர் ஹிரக்கலுக்கு: நேர்வழியைப் பின்பற்றியவர்மீது சாந்தி (சலாம்) நிலவட்டும். இறை வாழ்த்துக்குப் பின்! இஸ்லாத்தின் (ஏகத்துவ) அழைப்பை ஏற்குமாறு உங்களை நான் அழைக்கிறேன். இஸ்லாத்தை ஏற்றுக்கொள்க. (ஏற்றுக்கொண்டால் ஈருலகிலும்) பாதுகாப்புப் பெறுவீர். நீங்கள் இஸ்லாத்தை ஏற்றுக்கொண்டால் அல்லாஹ் உங்களுக்குச் சேர வேண்டிய நற்பலனை இரு மடங்காகத் தருவான்.நீங்கள் புறக்கணித்தால் குடி(யானவர்)களின் பாவமும் (அவர்கள் இஸ்லாத்தை ஏற்காமல் போனதற்கான குற்றமும்) உங்களையே சேரும். (நபியே!) கூறுவீராக: “வேதக்காரர்களே! எங்கள் மத்தியிலும் உங்கள் மத்தியிலும் (நீதமான) சமமான ஒரு விஷயத்தின் பக்கம் வாருங்கள்! அதாவது: அல்லாஹ்வைத் தவிர (எவரையும் நீங்களும் நாமும்) வணங்கமாட்டோம்; அவனுக்கு எதையும் (நீங்களும் நாமும்) இணையாக்க மாட்டோம்; அல்லாஹ்வைத் தவிர நம்மில் சிலர் சிலரை வணங்கப்படும் தெய்வங்களாக எடுத்துக் கொள்ளக் கூடாது.’’ (இதுதான் அந்த நீதமான சமமான விஷயம்.) ஆக, அவர்கள் (இதை ஏற்காமல் புறக்கணித்து) விலகி சென்றால், “நிச்சயமாக நாங்கள் முஸ்லிம்கள் என்பதற்கு நீங்கள் சாட்சி சொல்லுங்கள்!’’ என்று நீங்கள் (அவர்களிடம்) கூறிவிடுங்கள். (ஆல இம்ரான் : 64).

பின்னர் அவர்கள் விலகிச்சென்று, இஸ்லாத்தில் நுழைய மறுத்தபோது, நபி (ஸல்) அவர்களும் அவர்களது தோழர்களும் அவர்களுடன் போரிட்டார்கள்; மேலும் அவர்கள்மேல் வரிப்பணத்தை விதித்தார்.

அவர்களின் வழிகேட்டை உறுதிப்படுத்தவும், நபி முஹம்மத் ஸல்லல்லாஹு அலைஹிவஸல்லம் அவர்களின் மார்க்கத்தால் முன் இருந்த மார்க்கம் ரத்து செய்யப்பட்ட பின்னரும் அவர்கள் பொய்யான மார்க்கத்திலேயே இருப்பதை காட்டவும், ஒரு முஸ்லீம் ஒவ்வொரு நாளும், ஒவ்வொரு தொழுகையிலும், ஒவ்வொரு ரக்அதிலும், சரியானதும் அல்லாஹ்வால் ஏற்றுக்கொள்ளப்பட்டதுமான நேரான வழியை — அதாவது இஸ்லாம் — காட்டும் படி பிரார்த்திக்குமாறு அல்லாஹ் ஆணையிட்டுள்ளான். அல்லாஹ்வின் கோபத்திற்கு உள்ளானவர்களின் பாதையைத் தவிர்த்திருத்தலும் அவசியமாகும். அவர்கள் யூதர்களும், தாம் வழிகேட்டில் உள்ளோம் என்று தெரிந்தும் பிடிவாதமாய் அதில் உறுதியாக இருப்போருமாவர். மேலும், தாம் நேர்வழியில் இருப்பதாக நினைத்துக்கொண்டு அறிவின்றி வழிபடுபவர்களின் வழிகேடான பாதையில் இருந்தும் விடுபடவேண்டும்.அவர்கள் வழிகேட்டில் இருக்கிறார்கள். அவர்கள் கிறிஸ்தவர்களும் அவர்களைப் போன்று வழிகேட்டிலும் அறியாமையிலும் வழிபடுபவர்களும் உள்ளடங்குவர். இஸ்லாத்தைத் தவிர ஏனைய அனைத்து மதங்களும் அசத்தியமானவையே என்பதை ஒரு முஸ்லிம் உறுதியான நம்பிக்கையுடன் அறிந்து கொள்ள வேண்டும்; இஸ்லாத்தைத் தவிர வேறு வழியில் அல்லாஹ்வை வணங்குபவர் வழிதவறியவராவார், இதனை நம்பாதவர் முஸ்லிம்களில் ஒருவராகக் கணிக்கப்பட மாட்டார். இது சம்பந்தமாக திருக்குர்ஆன் மற்றும் ஸுன்னாவில் அதிகமான ஆதாரங்கள் காணப்படுகின்றன.

ஆகவே, கட்டுரையாளர் - அப்துல் ஃபத்தாஹ் - மீது கடமையாக இருப்பது: அவசரமாக பாவமன்னிப்பு செய்வதாகும், மேலும் தமது பாவமன்னிப்பை அறிவிக்கும் கட்டுரையை எழுத வேண்டும். எவர் உண்மையான பாவமன்னிப்புடன் அல்லாஹ்விடம் திரும்புகிறார்களோ அவர்களை அல்லாஹ் மன்னிக்கின்றான்; ஏனெனில் அல்லாஹ் கூறுகிறான்: " இன்னும், நம்பிக்கையாளர்களே! நீங்கள் வெற்றி பெறுவதற்காக அல்லாஹ்விடம் பாவமன்னிப்புக் கோரி திரும்பி விடுங்கள்". (அந்நூர் : 31) தொடர்ந்தும் அல்லாஹ் கூறுகிறான் இன்னும், அவர்கள் அல்லாஹ்வுடன் வேறு ஒரு கடவுளை அழைக்க மாட்டார்கள் (-வணங்க மாட்டார்கள்), (கொல்லக்கூடாது என்று) அல்லாஹ் தடுத்த உயிரை கொல்ல மாட்டார்கள் (அதற்குரிய) உரிமை இருந்தாலே தவிர. இன்னும், விபச்சாரம் செய்யமாட்டார்கள். யார் இவற்றை செய்வாரோ அவர் (மறுமையில்) தண்டனையை சந்திப்பார். அவருக்கு அந்த தண்டனை மறுமை நாளில் பன்மடங்காக ஆக்கப்படும். இன்னும், அவர் அதில் இழிவுபடுத்தப்பட்டவராக நிரந்தரமாக தங்கி விடுவார். எனினும், எவர்கள் (பாவங்களை விட்டு) திருந்தி (அல்லாஹ்விடம்) மன்னிப்புக் கோரி, நம்பிக்கைக் கொண்டு, நன்மையான செயலை செய்வார்களோ அவர்களுடைய தீய செயல்களை நல்ல செயல்களாக அல்லாஹ் மாற்றி விடுவான். அல்லாஹ் மகா மன்னிப்பாளனாக, பெரும் கருணையாளனாக இருக்கிறான். (அல் ஃபுர்கான் : 68-70). நபி ﷺ அவர்கள் கூறினார்கள் : இஸ்லாம் அதற்கு முன்னுள்ள பாவங்களை அழித்து விடும்; தவ்பா அதற்கு முன்னுள்ள பாவங்களை அழித்து விடும். மேலும் நபி (ஸல்) அவர்கள் கூறினார்கள் : 'பாவத்திலிருந்து பாவமீட்சி கோரியவன் எவ்விதப்பாவமும் அற்றவன் போலாவான்'.

இதே கருத்தில் அதிகமான திரு வசனங்களும் ஹதீஸ்களும் இடம்பெற்றுள்ளன.

எமக்கு சத்தியத்தை சத்தியமாகக் காட்டித் தருமாறும் அதனைப் பின்பற்ற எங்களுக்கு அருள் புரியுமாறும் அல்லாஹ்விடம் நான் வேண்டுகிறேன்; மேலும் எமக்கு பொய்யை பொய்யாகக் காட்டித் தருமாறும் அதிலிருந்து விலக எங்களுக்கு அருள் புரியுமாறும்; எம்மீதும் எழுத்தாளர் அப்துல் ஃபத்தாஹ் மீதும் அனைத்து முஸ்லிம்கள் மீதும் உண்மையான தவ்பாவை அருள்புரியுமாறும்; வழிதவறச் செய்யும் சோதனைகளிலும் மனோ இச்சைக்கு கீழ்ப்படிதலிலும் ஷைத்தானுக்குக் கீழ்ப்படிதலிலும் இருந்து எங்கள் அனைவரையும் பாதுகாக்குமாறும். அவனே இதற்கு உதவிசெய்பவனாகவும் வல்லமை படைத்தவனாகவும் உள்ளான்.

எமது நபியான முஹம்மத் ஸல்) அவர்கள் மீதும், அவர்களின் குடும்பத்தார் மற்றும் அவர்களின் தோழர்கள் மறுமை நாள்வரை அவர்களை நல்ல முறையில் பின்பற்றி நடப்போர் மீதும் அல்லாஹ்வின் ஸலாத்தும் ஸலாமும் உண்டாவதாக.