Nɑ-rɩgsg sẽn nɑfde sẽn nɑ pɑɑm vɩ-noogo
Gɑf ning b sẽn boond tɩ "Na-rɩkds sẽn nɑfde sẽn nɑ pɑɑm vʋɩ noogã, sẽn yɑɑ ɑ Šeeẖ ʿAbd Ar-Rahmaan ɭbn Naasɩr As-sɑ'ʿdɩy gɑfã, a tɩpda zu-noog hɑkɩɩkã ɑ sabab-rãmbã, lɑ yɑɑ sɩd-kũunã wεεngse ne gesg sẽn zulme, rẽnd ɑ kãndgdɑ karamdã n tʋgd sũrrã yõgnego, sẽn tũ ne sɩd-kũunã la tʋʋm-sõngã, la Wẽnd yʋʋrã tẽegre, la sek-m-mengã, lɑ Wẽnd neemã wã yell tagsgo, lɑ mɑnegre, la bobl-m-menga, la sugri, la yẽlã makre, ne nɑ-kẽndr sẽn yaa neere, ɑ rεgindɑ ɑ tɑoorã Kɑgt sẽn nɑ tũ n pɑɑm vʋɩm sẽn tɑr yĩn-yõgnego n kors n zemse, n yaa noogo, baa ne vɩɩmã leeb-leebã
These files are generated automatically from the book's text; their layout may differ from the printed edition.
Nɑ-rɩgsg sẽn nɑfde sẽn nɑ pɑɑm vɩ-noogo
Sẽn gʋlsa sebrã
A Šeeẖ ʿAbd Ar-Rahmaan ɭbn Naasɩr As-sɩ'ʿdɩy (Wẽnd na yols-a)
Tɩʋʋsgã
Pẽgr be ne Wẽnde sẽn so pẽgrã gilli, la m maanda kaset tɩ soab sẽn na n tũ n tɩlg ka be tɩ sã pa Wẽnd a Yembr ye, lagm-n-taag ka ne-A ye, la m maanda kaset t'a Mʋhammad yaa A yamb la A Tẽn-tʋʋma, (Wẽnd pʋʋsg be a yĩnga la a zakã rãmb la a Ṣahaabsã la A tɩlgre).
Rẽ poore: ad sũurã pemsgã la a yõgnegã la a noogrã a yel-pakdsã la a yɩɩgrã yẽesgo, yẽ yaa ned fãa bõn-daabo la ne yẽ la vɩ-noogã me paamda, tɩ kɩdengã ne sũ-noogã pidi, la woto tara sabab-rãmba dĩinã pʋgẽ, la sabab-rãmba rog-n-mikã pʋgẽ, la tʋʋmã pʋgẽ, la a fãa gill pa tõe n tigm taaba sã n pa ne sɩd-kõatbã nengẽ, la sã n yaa nin-zẽms nins sẽn pa bãmbã wã, baa tɩ b sã n paam-a ne neng ninga, maa sabab ning b yam-rãmbã sẽn nidgd pãng a yĩngã, ad a põsg-b-la nems a taaba yõod la tablg la halhaal la baasg neerem sẽn yɩɩde.
La ad mam na n tẽega m seb-kãngã pʋgẽ bũmb ning mam sẽn tẽrẽ sẽn yaa sabab-rãmb bõn-daab zẽkdg-kãngã pʋgẽ ned fãa sẽn nidgd n baoodẽ wã.
La be b pʋgẽ neb sẽn paam sabab-kãensã wʋsgo, n vɩɩms vɩɩm sẽn be neere, la vɩɩm sẽn sõmbe. La leb n be b pʋgẽ sẽn koang-b gill n vɩɩms zu-beed vɩɩm, la a vɩɩms toom vɩɩm. La leb n be b pʋgẽ sẽn be pʋsʋkã, tɩ zems ne bũmb ning Wẽnd sẽn yols t'a paam-a. La Wẽnd la segl sõng Maanda la Sõngda sõmã fãa gill zugu, la wẽng fãa tus n zãag pʋgẽ.
Gom-sɑkɑ: Kõ-sɩd ne Wẽndã la tʋʋmd-sõngo
La sabab-rãmbã sẽn yɩɩd zɩslem la yẽgr la yẽbgre, yaa kõ-sɩd ne Wẽnde la tʋʋm-sõng mango, Wẽnd yeelame (A Naam zẽk yã): (97. Ned ning sẽn tʋma sõma - yɑɑ rao tɩ yɑɑ pɑgɑ -, t'ɑ yaa sɩd-kɩta, D na vɩɩms a soab vɩɩm sẽn yɑɑ noogo, la D na rol-b keoor sõmblem sẽn yɩɩd b sẽn da yɩ n tʋmdẽ wã.) [An-naẖlʋ 97]
Rẽnd Wẽnd kõo kibare, (A Naam zẽk yã), la A pʋlem sẽn tigma lɩɩmaoongã la tʋʋmd-sõngã ne vɩ-noogo dũni zakã pʋgẽ, la rolb sẽn be neere zak-kãngã pʋgẽ, la tablg zakẽ wã.
La rẽ sababã yaa vẽenega, bala sẽn kõ-b sɩd ne Wẽndã sɩd-kũun sẽn manegã, sẽn womd tʋʋm-sõngã la manegd sũyã la zʋgdã la dũni wã la laahrã, b tara yẽga la tikri tɩ b sεgd a pʋgẽ bũmb ning fãa sẽn wat bãmbã, sẽn yaa kɩdeng la sũ-noogã sabab-rãmba, maa peleng-yɩka la yɩɩgr la sũ-sãamsã sabab-rãmba.
B segda yεl-noodã la sũ-noogã ne beelgo, la bark pʋʋsgo, la b rɩk-b n tʋm ne bũmb ning sẽn nafda pʋgẽ, rẽnd b sã n maan-b neng-kãngã zugu, b paamda kɩdeng ne-ba, la b maand yã-beed ne b na pa la b tall barka, la b leb n tẽed bark pʋʋsdbã yεl-sõmde, (la b tẽed) yεl-bεd a taaba tɩ b sõmblemã la b barkã yɩɩd sũ-nood-kãensã sẽn yaa yel-sõmdã tɩ-biisã.
La b yãs kãenkãe yεl-toodã la keelmã la yɩɩgrã la sũ-sãangã taoore, ne bũmb ning b sẽn tõe n nidg pãng tεka, la b boog bũmb ning b sẽn tõe n boogã, la b maand sugr sẽn be neer ne bũmb ningã b sẽn pa tar a tõogã, la ne woto b paamda yεl-toodã vũun pʋgẽ, nidg pãng sẽn, tar yõodo, la zarb-n-ges, la pãnga, (la b paam) b sugrã la b keoorã baoob pʋgẽ la b yel-sõmã wã tẽebã pʋgẽ, yεl-bεd sẽn kɩt tɩ yεl-toodã lebg faaga, tɩ sũ-noog la tẽ-sõmã wã la yã-beed maaneg ne Wẽnd yɩɩdlemã la A yel-sõmdã leds b zĩigã, wala Nabiyaamã (Wẽnd pʋʋsg la A tɩlgr be a yĩnga) sẽn togs Yel-kãngã hadiis sẽn maneg pʋgẽ wã, a yeelame: «Yel-soalem be ne sɩd-kõt yellã, ad a yellã fãa gill yaa sõma, sõmã sã n paam-a a pʋʋsda barka tɩ rẽnda yɩ sõma ne-a, la wẽng sã n paam-a, a maanda sugri tɩ rẽnda yɩ sõma ne-a, la yẽ me ned ka tõe n paam-a tɩ sã n ka sɩd-kõt ye» A Muslim n reeg-a.
T'a (Wẽnd pʋʋsg lɑ A tɩlgr be ɑ yĩngɑ) kõ kibare tɩ sɩd-kõata a yõodã fãoodame la a yel-sõme wã la a tʋʋmã tɩ-biisi, la bũmb fãa sẽn paamd-a sẽn yaa sũ-noogo la sũ-sãanga. Woto n kɩt tɩ fo tõe n yã neb a yiibu yell sẽn paamd-ba sẽn yaa yel-sõma maa yel-wẽnga tɩ b yõs taab yõsb tεkẽ yellã reegrã pʋgẽ, la rẽnda yaa b sẽn põs taaba sɩd-kũunã la tʋʋm-sõmã wã pʋgẽ yĩnga. Rẽnd b sẽn sɩf a soaba ne sɩf-kãensã b yiibã, a segda sẽn sõmbã la sẽn yaa wẽnga ne tõnd sẽn togsã sẽn yaa bark pʋʋsgo la sugr maanego la sẽn tũud b yiibã, t'a paam sũ-noogo la kɩdenga, tɩ yɩɩgrã la sũ-sãang la peleng-yɩka la sũur-weoogrã la vɩɩmã zu-beed yẽese, t'a vɩ-noogã pidi dũni-kãnga pʋgẽ. Tɩ ned a to wã yekd yel-noodã ne wẽnga la pugbu la maan-n-zʋʋka, t'a zʋgdã kedgẽ. T'a yekd-b wala rũmsã sẽn yekd-ba ne volemd la zaεεbo, la sẽn lagem ne rẽ fãa a pa tar vʋʋsg a sũurẽ wã ye, a pʋs n yirbda ween-n-vɩɩs wʋsg sẽnẽ, a yirbdame a sẽn yaεεsd a bõn-nongdɩ wã na n wa sε wã vεεngẽ, la yεl-kɩɩsds nins sẽn paamd-a rẽ pʋgẽ naoor wʋsgo yĩnga, la ween-n-vɩɩg a to yõyã sẽn pa tar toaag n yãsẽ wã, bala b ketd n maanda nonglem ne yεl a taaba, b sẽn tõe n paame maa b sẽn tõe n ka paame, la baa t'a sã n paame mikdame t'a ket n tara peleng-yɩka tõnd sẽn togs tɩ loogã wεεngẽ.La a yekd yεl-toodã ne yaεεs la rabeem la sugr kaalego. Bɩ f ra sok bũmb ning sẽn paamd-a sẽn yaa vɩɩmã yel-beedã ye, la tagsg bãase la yaεεs ning sẽn tõe n taas-a halhaal wẽns tεkẽ, la yell sẽn namsd ned n tʋg n yɩɩda; bala a pa tẽed yel-sõmd ye, a pa tar sugr me sẽn na yubs a nengã tɩ yɩ naana a zug ye.
La wãnde fãa yaa bũmb sẽn yãt vẽenega, la ned sẽn yaa woto, fo sã n tags a yellã n ges la f mak-a ne nebã yεla, fo yãta welg-kãseng sɩd-kõat ning sẽn tʋmd ne a sɩd-kũunã ne sẽn pa woto sʋka. Tɩ bala dĩinã pirsda pirsg tεkẽ tɩ b maan sek-m-meng ne Wẽnd rɩtlã, la bũmb A sẽn kõ yembsã sẽn yaa A yɩɩdlem la A kũunã kõbg toor-toorã.
Rẽnd sɩd-kõtã, b sã n zarb-a ne bãaga, maa talemdo, maa sẽn wõnd rẽnda sẽn yaa yεl nins sẽn tõe n paam ned fãa wã, rẽnd yẽnda ne a lɩɩmaoongã yĩngã la a sẽn tar sek-m-meng la yard ne Wẽnd sẽn pʋɩ n kõ-a wã, a sũurã maagdame, a pa baood ne a sũurã yell Wẽnd sẽn pa pʋlem ne-a ye, a geta ned ning sẽn ka ta yẽ wã, a pa get sẽn be a yẽ zugẽ wã ye, la tõeeme meng t'a sũ-noogã la a kɩdengã la a vʋʋsgã yɩɩd ned ning sẽn paam dũni wã bõn-daab gilli, tɩ Wẽnd sã n pa kõ-a sek-m-menga.
Wala fo sẽn na n ne yãwã soaba sẽn ka tar tʋʋmde, lɩɩmaoongã kaalem yĩnga, b sã n zarb-a ne bũmbu sẽn yi talemdo maa a kong dũni wã bõn-daab sãnda, f mikdame t'a be pεt la zu-beed tεkẽ pʋgẽ.
La bilgr a to: Yaεεsã sabab-rãmb sã n yɩ tɩ yel-namsdɩ gũbg ninsaala fo mikda sɩd-kõt sẽn manegã wã soaba, t'a sũurã yaa sẽn keeme, t'a yĩngã yaa sẽn yõgne, n tõe n zã yel-kãngã sẽn paam-a wã la a kẽnes-a ne bũmb ning a sẽn tõe, zem tɩ yaa tags maa gomd maa tʋʋmde, a minmsa a mengã ne nams-kãensã sẽn paam-a wã, la wãnde yaa halhaal-rãmb sẽn kõt ninsaal vʋʋsg la kengd a sũurã.
Wala fo sẽn yãt sẽn pa tara lɩɩmaoongã t'a be halhaal-kãngã tull pʋgẽ wã, yaεεsã sã n yɩ la a sũ-bila sẽn namsd ne-a, t'a gĩinã maage, t'a yamã yiki, tɩ rabeemã la peleng-yɩkã kẽ-a, tɩ yɩng rabeemã la pʋgẽ peleng-yɩkã sẽn pa tõe n togs nedã tigm taab a zugu, la ning-kãngã buudã, a sã n pa paam sabab-rãmb sãnda nebã fãa sẽn mi wã sẽn rat t'a mininms a meng b wʋsgã, b pãngã satame tɩ b gĩinã maage, la rẽ yaa b sẽn pa tar sɩd-kũun ning sẽn tõe n kɩt tɩ b maan sugrã, sẽn tʋg n yɩɩda pakr wakat, la halhaal nins sẽn yaa sũ-sãams halhaal n namsd nedã.
Rẽnd manegda la sãamda, la sɩd-kõta la kɩfre, b zema taaba sũ-keelem ning sẽn baood n paamã paoong pʋgẽ, la yεl nins sẽn lomsd rabeemã la a faagd-a wã pʋgẽ, la sɩd-kõtã a welgdame ne a lɩɩmaoongã pãng yĩnga la a sugrã la a bobl-m-mengã ne Wẽndã la a sẽn tẽeg-A wã yĩnga, la a sẽn tẽed Wẽnd yel-sõmdã yĩnga, tɩ rẽ fãa yaa yεl sẽn sõngd t'a raoodã paasd ne-a, tɩ rabeemã boogd a zugu, tɩ masɩɩb-rãmbã yaa lom-lom a zugu, wala A sẽn yeele (A Naam zẽk yã): (...Yãmb sã n pɑɑmdɑ zɑbdem ɑd bãmb me zɑbd-b lɑme wɑlɑ sẽn zɑbd yãmbã, lɑ yãmb tẽedã Wẽnd nengẽ bũmb ning b sẽn pɑ tẽede) [An-nisaa'ʋ: 104]. Tɩ Wẽnd sõngrã la A fãagrã sẽn welg toorã paamd-a, tɩ yaεεsa menemd ne rẽnda, la A leb n yeelame, (A Naam zẽk yã): (...Lɑ y mɑɑn sugri, ɑd Wẽnd bee ne sugr rãmbɑ.) [Al-Anfaalʋ: 46].
Yaa maan neer n tʋg bõn-naadsã, ne gomde la tʋʋmde. Be sabaab-rãmbã sẽn yẽesd yɩɩgrã la zu-loeesã la sũ-sãang pʋgẽ, yaa maan neer n tʋg bõn-naamdsã, ne gomd la tʋʋmde, la manegr kõbg toor-toore, la rẽ fãa gillã yaa neer la manegre, yaa ne rẽ me la Wẽnd tusd yɩɩgrã la zu-loeesã n yi manegda la wẽngda n zems ne ned fãa manegr tεka, la ad sɩd-kõtã yẽ pʋɩɩrã la a zu-noogã n yɩɩd pidb a pʋgẽ, a leb n welga toore, tɩ bala yẽ maan neerã yɩɩ ne pʋ-peelem la yel-sõmd tẽebo.
tɩ Wẽnd yols maan neerã n kõ-a, a sẽn tẽed yel-sõmã wã yĩnga, la Wẽnd tus yεl nins a sẽn kisã n zãag-a a pʋ-peelmã la a Wẽnd tẽebã yĩnga, A yeelame, (A Naam zẽk yã): (114. Sõmã kɑe b vũn-vũn wʋsg fãɑ pʋgẽ ye, rẽnda sẽn sɑgl-ɑ ne sãrɑ mɑɑnego, mɑɑ mɑnegre, mɑɑ nebã ne tɑɑb sʋk mɑnegre, lɑ sẽn mɑɑnd-ɑ rẽ Wẽnd yɑrdã bɑoob yĩnga, D nɑ kõ-ɑ keoor sẽn bedme.) [An-nisaa'ʋ: 114 ].
Rẽnd Wẽnd kõo kibare (A Naam zẽk yã) tɩ yεl-kãensã fãa yaa neere a sẽn yi ned ning nengẽ fãa, la neer me wata ne neere, la a tusd wẽnga, tɩ muumin me sẽn tẽed Wẽnd yel-sõmdã, Wẽnd kõt-a-la keoor sẽn bedme, la be keo-bedrã pʋgẽ: yɩɩgrã la sũ-sãangã la zu-loeesã la sẽn wõd bãmb yẽesgo.
Gom-Saka: Sogl-m-menga ne tʋʋmɑ maa bãngr nins sẽn nafdã
La sẽn be sabab-rãmb nins sẽn tusd peleng-yɩkã sẽn yaa giing-maagrã, la sũurã sẽn maand soaglã ne yεl-gudgds sãnda wã: Yaa sogl-m-meng ne tʋʋm nins maa bãngr nins sẽn nafde, bala rẽnda liibda sũurã t'a pa maan soagl ne yel ning sẽn namsd-a wã ye. La a pʋs n tõe n yĩma sabab-rãmb nins sẽn maand-a yɩɩgrã la sũ-sãangã, t'a sũurã yɩ noogo, t'a yĩn-yẽegrã paase, la sabab-kãngã yεsa sɩd-kõt ne nin-zẽng naaga taab a pʋgẽ. La ad sɩd-kõtã welgdame ne yɩɩdlem a lɩɩmaoongã yĩngã la a pʋ-peelemã la a sẽn tẽed yel-sõmd a sẽn maan soaglã ne bãng-kãngã a sẽn karemd-a wã maa a wĩnigd-a wã, la ne a tʋʋm sõngã a sẽn maand-a wã, sã n mik tɩ yaa tũudum rẽnd yaa tũudum, la sã n mik tɩ yaa dũni soagla maa yεl-minmids a tũnugd-a ne Anniya sõngo. La a maan a raabã tɩ rẽnda yaa sẽn na n sõng-a Wẽnd tũudmã pʋgẽ, rẽnd yel-kãng tara vũun sẽn yaa vẽenega yɩɩgrã la yaεεsã la sũ-sãamsã tusb pʋgẽ. La sõor waoog ninsaal b sẽn zarb ne peleng-yɩk la yεl-toodo, tɩ bãasã kõbg toor-toor sig-a, t'a tɩεmã sẽn tar pãng yɩɩ (a sẽn yĩm sabab ning sẽn gudg-a la a nams-a wã, la a sogl-m-meng ne a tʋʋm sẽn yi yẽ yʋʋmẽ wã).
La sõmbame tɩ tʋʋm ning a sẽn maan soagl ne a wã yɩ yõor sẽn yubsd ne, la a nongẽ, bala wãnde n tog ne na paam raab-kãnga sẽn nafdã, la Wẽnd la Mita.
Yaa f sẽn na n tigm f tagsã gilli fãa tɩ yaa rũnda tʋʋmdã yell n pak foom, La yεl nins sẽn tusd yɩɩgrã la peleng-yɩkã n yi wã, yaa f tigm f tagsã gilli fãa tɩ yaa rũnda tʋʋmdã yell n pak foom, la f bas pakr ning sẽn wat beoogã, la wakat sẽn loog sũ-sãang maanego, la wã n kɩt tɩ Nabiyaamã (Wẽnd pʋʋsg la A tɩlgr be a yĩnga) kos gũudum n yi yɩɩrgr la sũ-sãanga, rẽnd sũ-sãanga ne yεl nins sẽn loog tɩ pa tõe n lebs la pa tõe n paamã, pa nafd ye, la yɩɩgr ning sẽn yɩt beoog yell yĩnga tõe n sãam-a. Rẽnd yamb yɩta a raarã biig bala, n tigimd a nidg pãngã la a wɩk-m-mengã a raarã ne a wakat ning a sẽn be wã manegr pʋgẽ, bala a sũurã yõgeng rẽ zugã kɩtdame tɩ tʋʋmã pidi, tɩ ninsaal paam nen-yubsg n yi peleng-yɩkã la sũ-sãangã. La Nabiyaamã (Wẽnd pʋʋsg la A tɩlgr be a yĩnga) a sã n kos doaaga, maa a togla a zamã wã n tʋg kosgo, rẽnda a kengdame –sẽn lagem ne sõngr kosg ne Wẽnd la tẽeb a yɩɩdlemã pʋgẽ- ne nidg pãnga la keng-m-menga, hakɩɩk baoob pʋgẽ sẽn na paam bũmb ning a sẽn boond n tʋgdẽ wã. La bas bũmb ninga b sẽn kot tɩ b tus n yi a zugã; bala kosgã tõkda ne tʋʋmde, rẽnd yamb nidgda pãnga bũmb ning sẽn nafd-a dĩinã la dũni wã pʋgẽ, la a kot a Soaba t'a pids a raabã, la a kot-A sõngr ne rẽnda, wala Nabiyaamã (Wẽnd pʋʋsg la A tɩlgr be a yĩnga) sẽn yeelã: «Maan yã-beed ne bũmb ning sẽn nafd foomã, la f kos sõngr ne Wẽnd la f ra kong ye, la bũmb sã n paam foom bɩ f ra yeele: "m sã n da maan woto yɩtẽ la woto la woto". La yeele: "Wẽnd n korde, A sẽn ratã me la A maan yã". Bala (sã n da yɩ woto wã) a pakda sʋɩɩtãan tʋʋma». A Mulim n reeg-a. Tɩ Nabiyaamã (Wẽnd pʋʋsg la A tɩlgr be a yĩnga) tigim saglg ne maan yã-beedo yεl nins sẽn nafdã halhaah fãa gill pʋgẽ, la sõng kosg ne Wẽndã la f ra bas f meng n tũ pãng kongr ning sẽn yaa kʋɩɩng sẽn namsd nedã ye, n paas ne yεl nins sẽn loogã, la Wẽnd pʋlengã ne a kordgã gesgo.
La a maan yεlã buk a yiibu: Buk ning tɩ yamb tõe n bao n paame, maa a paam a sẽn tõe a pʋgẽ maa a tus-a maa a woog-a, rẽnd yãwã yamb maanda nidg pãng a pʋgẽ la a kos sõngr ne a Tũudã. La buka a sẽn pa tõe n maan rẽ, rẽnd wãnde yambã basda a yam ne-a la a yarẽ la a sak n tũ, la sik ka be tɩ yẽg-kãngã tẽegrã yaa sabab sẽn wat ne sũ-noogo, la loogd ne yɩɩgr la sũ-sãanga.
Gom-sɑkɑ: Wẽnd yʋʋrã tẽegr wʋsgre
Sẽn be sabab bεd-bεd nins sẽn wat ne sũ-maagrã la yĩn-yõgnegã: Yaa Wẽnd Yʋʋrã tẽegr wʋsgre, ad rẽndã tara vũun sẽn yaa yel-soalma sũurã maagrã la a yĩn-yõgnegã pʋgẽ, la a yɩɩgrã ne sũ-sãanga saasgo, Wẽnd yeelame (A Naam zẽk yã): (...La pa Wẽnd yʋʋrã tẽegr la sũyã rɑg n yõgend ne la?) [Ar-ra'ʿdʋ: 28] Rẽnd Wẽnd yʋʋrã tẽegr tara vũun sẽn bedme bõn-daab-kãngã paoong pʋgẽ, a sẽn yaa toorã yĩnga, la yambã sẽn leb n tẽed a keoorã la a yel-sõmdã yĩnga.
Wẽnd neemã-rãmbã yell yẽsgo sẽn vẽnege la sẽn solge, leb n yaa woto bala, la Wẽnd neemã-rãmbã yell yẽsgo sẽn vẽnege la sẽn solge, bala b bãngrã la b yellã goamã, Wẽnd tusda yɩɩgrã la sũ-sãangã ne rẽ, a leb n pirsda yambã ne barkã pʋʋsg zẽkr sẽn yɩɩd dargε-rãmba fãa wã baa tɩ yambã sã n yɩɩme n be talemd maa bãag pʋgẽ, maa zẽng sẽn pa b yiibã sẽn yaa zarbg kõbg toor-toore. Bala yẽnda sã n mak Wẽnd neemã-rãmbã -sẽn be a zugã sẽn pa tar tεk la pa tõe n geelã-, ne bũmb ning sẽn paam yẽ wã sẽn yaa toog buud fãa wã, mikdame tɩ toogã paoodame.
Yεl-toodã la masɩɩb-rãmbã Wẽnd sã n pʋs n zarb yamb ne-b, t'a maan sugr la a yardẽ la bas-tɩ-looge, a zabdmã boogdame, t'a musakã faage, tɩ yambã sẽn tagsd b keoorã la b rolbã la a sẽn tũ Wẽndã ne a sẽn maan sugrã la yardã, maanda yel-toodã tɩ lebg noogo, t'a keoorã noomã yĩms-a a sugrã toomã.
Neb nins sẽn ka ta tõndã gesgo, La yεl nins sẽn yɩɩd naf zĩ-kãngã yaa Nabiyaamã sẽn togl tõnd n tʋg bũmb ningã maanego, (Wẽnd pʋʋsg la A tɩlgr be a yĩnga), hadiisã sẽn manegã pʋgẽ, ne a sẽn yeele: (Ges-y neb nins sẽn be yãmb tẽngrã, la y ra ges neb nins sẽn be yãmb yĩngrã ye, rẽnda n pẽ n yɩɩd tɩ yãmb ra wa paoog Wẽnd neemã wã sẽn be yãmb zugã) A Mulim n reeg-a. Rẽnd ad yamba, a sã n ning a yamẽ wã yel-kãngã sẽn bedmã, a mikdame t'a yɩɩda neb wʋsgo bõn-naandsã pʋgẽ ne laafɩ la sẽn tũud ne rẽ wεεngẽ, la rɩtl la sẽn tũud ne rẽ wεεngẽ, baa a halhaalã sẽn yaa a soab fãa, t'a peleng-yɩkã la a yɩɩgrã sε, t'a sũ-noogã la a kɩdengã paas ne Wẽnd neemã-rãmb nins yẽ sẽn põs neb a taabã a pʋgẽ wã.
La yamb sã n tags wok Wẽnd neemã-rãmbã zug fãa, sẽn solgã la sẽn vẽnegã, dĩinã la dũni wã yεlã pʋgẽ, a mikdame t'a Soabã kõ-a-la sẽn yaa sõmã, la A tus wẽns wʋsg n yi-a, la sik ka be tɩ wãnde yiisda yɩɩgr la sũ-sãang ye, la a kẽesd kɩdeng la sũ-noogo.
Gom-sɑkɑ: Kẽn n yẽes sabab-rãmb nins sẽn wat ne yɩɩgrã, la paam sabab-rãmb nins sẽn wat ne sũ-noogã.
La sabab-rãmb nins sẽn wat ne sũ-noog la yẽesd yɩɩgrã la sũ-sãangã saasgã sʋka, yaa nidg pãnga sabab-rãmb nins sẽn wat ne yɩɩgrã saasg pʋgẽ, la sabab-rãmb nins sẽn wat ne sũ-noogã paoong pʋgẽ; la rẽnda yaa a yĩm sẽn loogã sẽn yaa yel-tood nins a sẽn pa tõe n lebs-ba, la a sẽn na n miẽ tɩ yẽ sogl a tagsã ne rẽ wã yaa reem la bũmb sẽn pa tõe n tol n paame, tɩ rẽ leb n yaa yalemd la gãeemse, t'a namsd a sũurã ne tags a pʋgẽ wala a sẽn namsd a sũurã ne a sẽn maan peleng-yɩk ne sẽn watã, ne a sẽn sãmbd tɩ yaa talemdo la yaεεs maa zẽng sẽn pa rẽnda sẽn yaa yel-tood nins a sẽn ninged a yamẽ a beoog vɩɩmã pʋgẽ. T'a bãng tɩ yεl nins sẽn watã ned pa mi sẽn na n yɩ a pʋgẽ sẽn yaa sõma maa wẽnga maa tẽebo maa zabdem, la ad rẽ fãa bee Wilb Naabã sẽn yaa bʋʋd Mitã Nugẽ, tɩ yembsã pa tar tõog a pʋgẽ rẽnda b kẽn n bao a sõmã wã paoongo la a wẽngã tusbu. La yamb bãng tɩ ad yẽ sã n wẽneg a tagsã n yi a beoog yellã rabeemã, la a bobl a mengã ne a Soabã a manegrã pʋgẽ, la a gãneg a yam ne-a rẽ pʋgẽ. A sã n maan woto, a sũurã yõgendame t'a halhaalã manege, t'a yɩɩgrã ne a peleng-yɩkã sa.
Kosg mɑɑnego, La yɛlã sẽn tar nafa n yɩɩd sẽn kẽed ne beoog yɛlã wɛɛngẽ wã yaa doa-kãngã maanego, Nabiyaamã (Wẽnd pʋʋsg la A tɩlgr be a yĩnga) sẽn da kot ne-a wã: «M Soab a Wẽnde maneg m dĩinã n kõ-ma, sẽn yaa mam yellã gũudmã, la F maneg m dũni wã n kõ-ma sẽn yaa mam vɩɩmã sẽn be a pʋgẽ wã, la F maneg m laahrã n kõ-ma, sẽn yaa mam lebεngã sẽn togdẽ wã, la F maan vɩɩmã tɩ yaa paasg ne-ma sõma fãa pʋgẽ, la F maan kũumã tɩ yaa vʋʋsg ne maam n yi wẽng buudã fãa» A Muslim n reeg-a. La woto bala a koεεgã: «M Soab a Wẽnde, Fo Yolsgã la m tẽeda, bɩ F ra bobl-m ne m mengã nif-kamsg pʋgẽ ye, la F maneg m yellã fãa n kõ-ma, Soab kae sẽn tũud n tɩlg tɩ sã n pa Foom ye» A Abʋʋ Daawʋʋd n reeg-a ne tõkr sẽn yaa Ṣahɩɩhe (manege). Rẽnd yamb sã n yɩlem kos-kãngã a dĩinã la a dũni wã yel manegr yĩnga, ne ning-m-yamẽ pʋgẽ, ne sɩd-sɩda la Anniy sẽn manege, n lagm ne nidg pãng maanego bũmb ning sẽn na kɩt t'a paam rẽ wã pʋgẽ, Wẽnd kõt-a la bũmb ning a sẽn kosã la bũmb ning a sẽn tẽ wã, la a bõn-baoodɩ wã, t'a yɩɩgrã lebg sũ-noogo la kɩdenga.
Gom-sɑkɑ: sẽn tõe n yɩ wẽng n tʋg n yɩɩdã mɑmesgo
La sẽn be sabab-rãmb sẽn nafd n yɩɩd sẽn tusd peleng-yɩkã la yɩɩgrã, bũmb sã n wa paam yambã sasa, yaa a kẽn n bao a yolsgo, la rẽ yaa a sẽn na n mams yellã wẽng sẽn tõe n ta to-to fãa, n ning a mengã zĩ-kãnga, a sã n maan woto, bɩ a kẽn n bao n na n yols a sẽn tõe tεka, yaa sẽn tũ ne ning-n-mengẽ kãnga la kẽn-kãngã sẽn tar nafã wã, la a yɩɩrã la a sũ-sãangã sata, tɩ kẽn-kãngã yɩ naf-bũmb paoong pʋgẽ, la wẽngã yambã sẽn tõe tus pʋgẽ.
La rabeem la bãas la talemd sabab-rãmb sã n wa sig-a, la a kong yεl nins kõbg toor-toor yẽ sẽn nong-a, bɩ a sak rẽnda ne yĩn-yõgneg la a minmis a yõorã ne rẽ, pa rẽ bɩ a minmis yõorã ne yεl-tood fãa a sẽn tõe, tɩ ad minims yõorã ne yεl-toodã maandame tɩ b lebg faasens la a menemes b zabdamã, sẽn tʋg n yɩɩda yaa a sã n sogl a mengã ne b tusbu a pãng tõog tεka, tɩ tigim yẽ nengẽ yõora minimsgã ne kẽn-nafã nins sẽn maan yẽ soagl t'a a yĩm yεla, la a modg a mengã n palms a pãng ning a sẽn teedg ne yεl-toodã, n lagm ne a sẽn na n tik Wẽnd rẽ pʋgẽ wã, la a maan bas-m-yam ne-A wã, la sik ka be tɩ yεl-kãensã tara yõod wʋsgo sũ-noogã paoong pʋgẽ la sũyã maagre, n lagem ne yambã sẽn tẽed yεl-sõmdã dũni wã la laahrã, la wãnde yaa bũmb sẽn maan n yã, la a sẽn yɩ ne neb nins sẽn maan-a wã yaa wʋsgo.
Gom-sɑkɑ: Sũurã keelem la ɑ ra zɑbã la a ra yiki
La sẽn be tɩt nins sẽn yɩɩd sõmblem ne sũyã bãasã, b pʋs n lagma ne yĩnsã bãase: Yaa sũurã sẽn na n yaa kεgenga la a pa sãamdẽ maa a yikd ne tagsã la saagr nins sẽn yaa tags-wẽnsã sẽn wat ne-ba. La gẽeg la gudgr ne sabab-rãmb nins sẽn zabda, la yaεεsd tɩ yεl-toodã na n wa yɩ, la bõn-nongdsã loogre yεl-kãensã fãa kẽesda la yɩɩgr la sũ-sãams la sũy la yĩns bãas pʋgẽ, la gĩin-mar ning sẽn tar vũun wẽnga, tɩ ninsaalbã yã a namsgã wʋsgã.
Bobl-m-meng ne Wẽnde, La wakat ning fãa sũurã sẽn wat n dell Wẽnde, la a bobl a meng ne-A, la a pa sak n tũ sãmbsã, tɩ tags-kɩɩm wẽnsã pa soog-a, la a maan bas-m-yam ne Wẽnde la a maan yã-beed A yɩɩdlemã pʋgẽ; yɩɩgrã la sũ-sãamsã zãagd-a lame, tɩ sũyã la yĩnsã bãas wʋsg sε n bas-a, tɩ sũurã paam kengr la maagr la sũ-noog sẽn pa tõe n togse, sõor waoog logtoy-yiy sẽn pid ne sãmbsã la tags-yoodã bãas sẽn tar-b rãmba, la sõor waoog yεl-kãensã sẽn maan vũun pãens rãmb wʋsg sũyã, tɩ pa gomd nin-valems ye, sõor waoog yεl-kãensã sẽn wa ne yalemd la gãeemdo, la laafɩ soab yaa Wẽnd sẽn bas-a soab laafɩ la A maan-a sεgl sõng t'a zab ne a yõorã n na paam sabab-rãmb sẽn nafda, sẽn kengd sũyã, n tusd a peleng-yɩkã, A yeelame (A Naam zẽk yã): (...Lɑ ned ning sẽn bobld a meng ne Wẽnde, Yẽ sεk-a lame.) [Aṭ-ṭalaaƙʋ: 3] Rat n yeel t'A na n sek-a lame, sẽn pak-a wã gilli, sẽn yaa a dĩinã la a dũni wã yelle.
Rẽnd bobl-m-meng ne Wẽnd soaba sũur kegmame, sãmbsã pa rʋʋgd-a ye, yεlã me pa namsd-a ye, a sẽn mi tɩ rẽnda yaa yõ-valeng tagmas la rabeem la yaεεs nins sẽn pa tar hakɩɩkã yĩnga. La a leb n mi ne rẽ fãa tɩ ad Wẽnd reega A Zugẽ t'A na n seka ned ning sẽn teega yẽnda sekr tεkẽ, t'a maan bas-m-yam ne Wẽnde la a leb maan bas-m-yam ne A pʋlengã, t'a yɩɩgrã ne a pelen-yɩkã satẽ, t'a keelmã lebg yol-yole, t'a sũ-pa-noaangã lebg sũ-noogo (tɩ tarahã yaa sũ-sãanga), t'a rabeemã lebg bas-m-yam, rẽnd d kota Wẽnd t'A kõ-d laafɩ la A kõ-d sũ-kεgεnga la sũ-tabendga, ne bobl-m-meng ne Wẽnd sẽn pidi Wẽnd sẽn reeg A Zugẽ n na n kõ-b rãmbã sẽn sõmb fãa, la A tus toog la nang fãa n yi-ba.
Gom-sɑkɑ: Yõora minmsg t'a tõog neb a taabã zamse.
La Nabiyaam koeegã a sẽn yeelã pʋgẽ (Wẽnd pʋʋsg A lɑ tɩlgr be ɑ yĩngɑ): «Muumin raoog ra wa kisg muumin poak ye, a sã n kisg zʋgd a nengẽ, a yarda zʋgd a to a nengẽ» A Mulim n reeg-a.
Yõod a yiib sẽn yaa zɩsdo:
B yiibã yembrã: yaa teesg n tʋg f pag vɩt-n-taare la f rog-pẽta la tũud-n-taaga la f tʋʋm-biiga, ned fãa fo sẽn kĩ maa tõkr n be foom ne a sʋka, tɩ sõmbame tɩ f ning f yamẽ tɩ yaa tɩlae tɩ zanga maa boogre maa yel fo sẽn kis zĩnd ne nedã; tɩ f sã n yã rẽ bɩ f mak-a ne bũmb ning sẽn yaa tɩlae fo zugã maa sẽn sõmb ne foom sẽn yaa tok-n-taarã kengrã la nonglemã na pa wã, la rẽ yaa f sẽn na n tags sõmã wã, la bõn-daab-rãmb sẽn welg toor la sẽn gũbgi, la yaa ne mum-f-nin n yi yεl-wẽns-kãensã n tʋg yεl-sõmã wã gesgo, la tũud-n-taarã la tõk-n-taarã ruumda, tɩ fo paam vʋʋsgã tɩ pid ne-fo.
Yõod a yiib soabã: La rẽ yaa yɩɩgrã la sũ-sãangã saabo, la pʋ-peelemã paabo, la fo sẽn na n yik ne waagib-rãmb la yεl a taab nins b sẽn maan nonglemã, sẽn rog fo zugã, la laafɩ paoongo bugs a yiibã sʋka, la ned ning sẽn pa tũ a Nabiyaamã (Wẽnd pʋʋsg la A tɩlgr be a yĩnga) sẽn togs woto wã maa a pʋs n maan a tullã ne a sẽn n gũusd yel-wẽnsã n yaool n yĩmd yel-sõmã wã, yaa tɩlae t'a pelεngã yɩke, leb n yaa tɩlae tɩ tʋmd-n-taar ning sẽn be yẽ ne nebã sʋkã gudgi, t'a hakε-rãmbã la a waagib-rãmbã wʋsg nins sẽn be ne b yiibã yembr fãa wã fãse.
La neb wʋsg sẽn yaa raab-bεdã-rãmbã, b segenda b mensã ne sugri la yĩn-yõgnego masɩɩb-rãmbã la yel-gudgdsã yɩɩb wakato. La ad yεl-yaalsã wakato b pelensã yɩgdame, tɩ b yam-gãagã gudgi, la wãnde sababã yaa tɩ bãmb minimsa b yõyã yεl-bεdã wakato, la b bas b mensã yεl-bãanegã wakato, tɩ rẽnda yɩ sabab n nams-ba la maan vũun b vʋʋsgã pʋgẽ. Rẽnd sẽb-sʋk soaba minImsda a yõorã ne yεl-bi la yεl-bεda la a kot Wẽnd t'A sõng-a ne-ba, la A ka rɩkd yεlã n bas ne a mengã nin-kamsg pʋgẽ ye, yaa rẽ n so tɩ wakat-kãngã yεl-bil wã yɩta naana a zugu, wala yεl-bεdã me sẽn yɩt naana a wugã. La a kell n be yĩn-yõgneg pʋgẽ, t'a sũurã maage, la a vʋʋsgẽ.
Gom-sɑkɑ: Rɑ zoe n pʋg yɩɩrã ye.
Yam soab miime tɩ yẽ sɩd-sɩd vɩɩmã, a yaa vɩ-noog la yĩn-yõgneg vɩɩm la a miẽ t'a yaa koεεg wʋsg me. Rẽnd pa sõmb ne-a t'a kʋʋg-a ne yɩɩgre la yεl-gudgdɩ wã tũnugr ye, bala rẽnda pa zemsd ne vɩ-sõngã. A ra maan beed ne a vɩɩmã, t'a wʋsgã fãa wa pa yɩɩgrã la gudgrã pʋgẽ ye, wato yaa vɩɩmã tulli. La welgr ka be nin-sõng la nin-vẽnga sʋka yãwã pʋgẽ ye, la sɩd-kõta tara pʋɩɩr sẽn yɩɩd bedrem, la paoong sẽn yɩɩd nafa, t'a sã n yik ne bõn-kãngã, pĩnd-pĩnda maa kaoosg pʋgẽ.
Wẽnd neemã-rãmbã la bũmb ning sẽn paamd-a sẽn yaa toogã makr ne taaba. La sõmba ne-a yεsa tɩ toog sã n paam-a maa a yaεεsd-a lame, t'a mak neemã-rãmb nins yẽ sẽn paamã, zem tɩ yaa dĩinã maa yaa dũnĩ wã yεla, la toog ning sẽn paam yẽ wã. Rẽnd makrã wakato neemã wʋsg ning yẽ sẽn be a pʋgẽ wã na n vẽnegame, tɩ toom ning sẽn paam yẽ wã meneme.
La woto bala, bɩ a mak namsg ning yẽ sẽn yaεεsd tɩ na n wa paam-a lame wã, ne yẽ sẽn tõe n põs wʋsg n tɩlg n yi-a wã, bɩ a ra bas tẽ-valengã tɩ wil tẽeb wʋsg nins sẽn tar pãngã ye, woto la a yɩɩgrã la a yaεεsã sεta. A sõmb n mamsa masɩɩb ning tεk sẽn tõe n paam yẽndã la a segl a mengã ne a yɩɩbã t'a sã n wa yɩ, la a keng n tus bũmb ning sẽn na n pa yɩ wã la a zẽk sẽn yɩ wã, maa a boog-a.
Nebã namsg yaa bãmb la namsda, tɩ f sã n ka maan f meng soagl ne-a. La sẽn be yεl nins sẽn nafdã pʋgẽ, yaa f bãng tɩ nebã namsd foo wã, sẽn tʋg n yɩɩda b goam wẽnsã pʋgẽ wã, pa foo la namsd ye, ad yaa bãmb la namsda, sã n pa mikame tɩ fo sogla f meng ne-a n bas-a t'a tõog foom, wakat-kãngã a namsda foom wala a sẽn nams-ba, la fo sã n pa ning f toaag ne-a a pa namsd foom baa fʋɩ.
Kɩt tɩ fo vɩɩmã yɩ noog ne nafa tagsa, La bãng tɩ fo vɩɩmã tũuda ne fo tagsã, sã n mikame tɩ yaa tags sẽn kõt foo yõodo dĩina maa dũni wã yεl pʋgẽ, rẽnd fo vɩɩmã yaa sõma n yaa noogo, sã n pa rẽ yellã yɩta tulli.
Tɩ tʋmd-n-taarã yɩ Wẽnd yĩnga, pa bõn-naandsã yĩnga ye. La yɛl nafa nins sẽn tusd yɩɩgrã n yɩɩdã, yaa f minims f mengã tɩ f ka na n bao bark pʋʋsgo tɩ sã n pa Wẽnd nengẽ ye, tɩ fo sã n maan ned sẽn tar hakε fo zug neere maa ned sẽn pa tar hakε, bɩ f bãng tɩ yaa ne Wẽnd la f tʋmda, bɩ f ra loe f zug ne ned ning fo sẽn maan neemã wã bark pʋʋsg ye, wala A sẽn yeele (A Naam zẽk yã), A yemb-tũusdsã yεl pʋgẽ: (9. Tõnd sẽn rɩlgd yãmbã, yaa Wẽnd yĩnga, tõnd pa rat yaood yãmb nengẽ, pa bark pʋʋsg me.) [Al-ɭnsaanʋ:9].
La wãnde kengda tõnd tʋmd-n-taarã ne d zak-rãmb la d koambã la neb nins tõnd sẽn tar tõk-n-taarã sẽn yaa pãng ne-b pʋgẽ, la d bãng tɩ wakat ning tõnd sẽn wat n segl d mensã n na n zãag wẽngã n yi-ba, sɩd la hakɩɩka d vʋʋsame. La leb n be yεl nins sẽn wat ne vʋʋsgo, yaa tõnd sẽn na n dɩk yel-sõmã wã n gãde la d tʋm ne-ba sẽn zemsd ne d mensã tɩ pa tũ ne loog-m-menga sẽn yɩkd pεlεng ye, tɩ d wa lebg zaalem, bala d tũ so-golengo. La rẽnda yaa bũmb sẽn yaa yam bedr yelle, la leb n yaa rɩk yεl-gudgds n maan tɩ yaa yεl neeba, n yaa yεl-noodo. Yaa ne rẽ me la yƐl-noodã yɩlengã paasda, tɩ yεl-gudgdsã sεtẽ.
Maan soagl ne bũmb ning sẽn nafdã, la b bas sẽn namsdã. Ning yεl nins sẽn nafda f ninã taoore, la f tʋm b na yɩ yĩnga, la f ra wẽneg n ges yεl nins sẽn namsda ye. Rogl f zugẽ ne rẽnda n yi sabab nins sẽn wat ne yɩɩgrã la sũ-sãangã. La bao sõng-m-menga ne vʋʋsg la nidg pãnga tigengu yεl-tɩrsã pʋgẽ.
Tʋʋmã saasg moas-moasa, La sẽn be yεl-nafdɩ wã pʋgẽ, yaa tʋʋmã sεεsg zĩig pʋgẽ, la paam wεεnga sẽn wate; bala tʋʋmã sã n ka sε, tʋʋm nins sẽn loogã fãa sũuda taab fo zugu, n lagem ne tʋʋm nins sẽn watã, tɩ b toomã kenge, rẽnd fo sã n saas bũmbã fãa a wakatẽ, fo kẽeda yεl nins sẽn watã ne tags sẽn tar pãnga la tʋʋmd sẽn tar pãnga.
Yεl nins sẽn pɑkã rengre, n lɑgem ne saawar maanego, La sõmbame tɩ fo tũus yεl-nafdɩ wã pʋgẽ sõma sẽn yɩɩde, la f bãng yεl nins fo yõorã sẽn lalldã, tɩ fo raabã be ne-ba n tʋg n yɩɩdã, bala sã n pa yɩ woto, yɩta yam-yiisgu la sɩ-lakre la gudgri. La f sõng f meng rẽ pʋgẽ ne tags-sõngo la saawar maanego, tɩ sẽn maana saawar pa maan mims ye, la f karem bũmb ning fo sẽn rat n maan-a kareng sẽn bɩ, tɩ sã n mikame tɩ yõod n be a pʋgẽ, tɩ f loe n wãag f sũurẽ wã n na tʋm-a, bɩ f bobl f meng ne Wẽnde, ad Wẽnd nonga bobl-m-meng-rãmba.
La Pẽgr tiging be ne Wẽnde sẽn yɑɑ bõn-naandsã Nɑɑbã.
La Wẽnd na pʋʋs la A tɩlg tõnd Zu-soabã a Mʋhammad, la a zak rãmbã la a Ṣahaabsã.
Related books
All books
Ãnd n naan maam ? La yɑɑ bõe yĩnga?75 languagesÃnd n naan maam ? La yɑɑ bõe yĩnga?
Bũmbã fãa sẽn be wilgda Naandã belmã Ãnd n naan saasã la tẽngã la sẽn be b yiibã pʋgẽ, sẽn yaa bõn-bεdã, b sẽn ka tõe n bãng b tεkã? Ãnd n maan na-kẽndr-kãngã sẽn manegã saasẽ wã la tẽngẽ wã? Ãnd n naan ninsaalã n kõ-a tʋb la nin la yam la a maan-a t'a tar tõog n tõe n bao bãngre la a bãng yεlã hakɩɩk-rãmbã? Wãn la fo get naan-kãngã sẽn manegã, fo yĩngã pʋgẽ la bõn-vɩtɩ wã yĩnsã? La yaa ãnd n yẽbg-ba? Yaa wãn la dũni-kãngã sẽn yaa bedrã ne a na-kẽndrã sẽn tablgã, tableg sẽn yõgneg yõgneg tεkẽ, yʋʋm-dãmbã fãa sẽn loogã pʋgẽ?
Toagsg sẽn kʋʋg koεεga sẽn wiligd Lɩslaoongã wala a sẽn wa Alkʋrãan wagellã la Nabiyaamã sunnah pʋgã71 languagesToagsg sẽn kʋʋg koεεga sẽn wiligd Lɩslaoongã wala a sẽn wa Alkʋrãan wagellã la Nabiyaamã sunnah pʋgã
Lɩslaoongã yaa gaf sẽn be sʋka, n gũbg wĩngri sẽn kʋʋg koεεgɑ n wilgd Lɩslɑɑngã sẽn yaa a soaba, n vẽnegd a yẽg nins sẽn tʋg n pak n yɩɩdã, lɑ ɑ sɑglsã, la a sõmblemã, n yiisd-ɑ Lɩslɑɑngã tikr nins sẽn yaa yẽgã pʋgẽ, yẽ me la Alkʋrãan wagellã la Nabiyaamã Sunnah, la gafã b tognd-a lɑ Sãri tʋʋmã sẽn zao b rãmb fãa gilli (bɑɑlɩgsã) sẽn yaa b lɩslaamba la sẽn ka b lɩslaamba, ne bãmb buudɑ goamɑ sẽn yaa zĩig ningã fãa la zãmaan ning fãa, n lɑgem ne yεlã sẽn yõs taabã fãa lɑ allhɑɑl-rãmbã. (Kopɩ (yiisegu) sẽn tigim daliil-rãmb sẽn yi Alkʋrãan wagellẽ wã la Nɑbiyɑɑmɑ Sunnãh) 1- Lɩslaoongã yaa Wẽnd…
Toagsg sẽn kʋʋg koεεga sẽn wilgd Lɩslaoongã wεεngẽ, wala a sẽn wa Alkʋrãan wagellã la Nabiyaamã sũnnɑh pʋga61 languagesToagsg sẽn kʋʋg koεεga sẽn wilgd Lɩslaoongã wεεngẽ, wala a sẽn wa Alkʋrãan wagellã la Nabiyaamã sũnnɑh pʋga
Ne Wẽnd Yʋʋrã Albarka, sẽn yɑɑ Dũni yols zãng naabã, n leb yɑɑ Sɩd-kõatbã welg n yols naabã Lɩslaoongã. (Wãnde yɑɑ yiisgu, (Kopɩ) b sẽn n yãk daliil-rãmbã n bɑse) [1] [1] seb-kãngã tara yiisgɑ (kopɩ) a to sẽn tigim daliil-rãmbã sẽn yi Alkʋrãan wagellã la Sunnɑh, masaal fãa sẽn be a pʋgẽ ne ɑ dɑliil. Lɑ sẽn na yɩl n pɑɑm-ɑ n gese tũudɑ so-kãngã .https://islamhouse.com/ar/books/2830071 Yaa gaf sẽn be sʋka, a gũbgɑ wĩnig-rãmbɑ sẽn kʋʋg kεoogɑ n wĩngd Lɩslɑoongã sẽn yɑɑ ɑ soɑba, n vẽnegd a yẽg nins sẽn tʋg n pak n yɩɩda, la a sɑglsã, lɑ ɑ sõmblemã, n yõnged n yit a tigsg nins sẽn yaa yẽgã, yẽndɑ…
Lɩslaangã lɑ Wẽnd Tẽn-tʋʋmbã dĩini85 languagesLɩslaangã lɑ Wẽnd Tẽn-tʋʋmbã dĩini
Lɩslaangã yaa sak-n-tũ Wẽnde, sẽn yaa bõn-naandsã Naandã la b Rabsdã, la sak-n-tũ-A ne nonglem la waoogre, la lɩslaangã yẽgrã yaa kõ-sɩd ne Wẽnde, la kõ-sɩd tɩ Yẽnda la Naandã la zẽng sẽn ka Yẽ fãa yaa bõn-naandga, la Yẽnda n sõmb ne tũudmã, Yẽ A Yermbre, lagem-n-taag ka be ne-A, sẽn na n tũ a soab sɩd-sɩd ka be tɩ sã n ka Yẽ ye, A tara yʋy sẽn manege la sɩf-rãmb sẽn zẽke, A tara pidb zãnga, tɩ boogr ka be ye, A ka roge, b Ka rog-A, A ka tar lall-n-taaga, A ka tar mak-n-taaga, A ka tar bilg-n-taaga, A ka sigd yĩngã, A ka lebd yĩng baa fʋɩ A bõn-naandsã pʋgẽ ye. Lɩslaangã yaa Wẽnd dĩini (A…