ສະຫຼຸບ ພ້ອມອະທິບາຍຖ້ອຍຄຳໃນອະຊານ

ອະທິບາຍຖ້ອຍຄຳໃນອະຊານ

ຄະນະກຳມະການວິຊາການ ປະຈຳ ສະມາຄົມບໍລິການເນື້ອຫາສາສະໜາອິສລາມໃນພາສາຕ່າງໆ

ອະຊານ ຄືສຽງຮຽກຮ້ອງຈາກພຣະຜູ້ອະພິບານ ທີ່ມຸສລິມຈະໄດ້ຍິນຫ້າຄັ້ງໃນແຕ່ລະມື້, ເພື່ອເຕືອນສະຕິລາວເຖິງຄວາມຍິ່ງໃຫຍ່ຂອງອັລລໍຫ໌ ແລະ ເຊີນຊວນລາວໄປສູ່ຄວາມດີງາມ ແລະ ໄຊຊະນະ. ມັນເປັນຊ່ວງເວລາແຫ່ງການເຊື່ອມຕໍ່ລະຫວ່າງມະນຸດກັບພຣະຜູ້ສ້າງຂອງລາວ, ເຊິ່ງລາວຈະຕັດຂາດຈາກຄວາມສັບສົນວຸ້ນວາຍຂອງໂລກດຸນຍາ ເພື່ອຢືນຂຶ້ນວິງວອນຕໍ່ພຣະຜູ້ອະພິບານຂອງລາວ.

ອະຊານນັ້ນປະກອບດ້ວຍຄວາມໝາຍອັນສູງສົ່ງ ເຊິ່ງເລີ່ມຕົ້ນດ້ວຍການໃຫ້ຄວາມຍິ່ງໃຫຍ່ແດ່ພຣະເຈົ້າ ແລະ ສິ້ນສຸດລົງດ້ວຍການຮຽກຮ້ອງເຊີນຊວນສູ່ການລະຫມາດ, ເຊິ່ງໃນນັ້ນມຸສລິມຈະໄດ້ພົບກັບຄວາມສະງົບ.

ຄຳກ່າວອະຊານ:

ອັລລໍຮຸ ອັກບັຣ ອັລລໍຮຸ ອັກບັຣ, ອັລລໍຮຸ ອັກບັຣ ອັລລໍຮຸ ອັກບັຣ

ອັລລໍຫ໌ພຣະເຈົ້າຜູ້ຊົງຍິ່ງໃຫຍ່ທີ່ສຸດ

ພຣະນາມ "ອັລລໍຫ໌" ຫມາຍເຖິງ ຜູ້ທີ່ສົມຄວນໄດ້ຮັບການເຄົາລົບກາບໄຫວ້, ເປັນພຣະນາມຂອງພຣະເຈົ້າຜູ້ຊົງສ້າງ ຜູ້ຊົງສູງສົ່ງ, ໂດຍທີ່ພຣະນາມອື່ນໆ ທັງໝົດຂອງພຣະອົງລ້ວນເປັນຄຸນລັກສະນະທີ່ຂຶ້ນກັບພຣະນາມນີ້. ອັລລໍຫ໌ຄືຜູ້ຊົງເອກະອົງດຽວ, ຜູ້ທີ່ບໍ່ໄດ້ໃຫ້ກຳເນີດ ແລະ ບໍ່ໄດ້ຖືກໃຫ້ກຳເນີດ, ແລະ ພຣະອົງຄືຜູ້ຊົງສ້າງບັນດາຊັ້ນຟ້າ ແລະ ແຜ່ນດິນທັງຫລາຍ.

ການກ່າວ "ອັລລໍຮຸ ອັກບັຣ", ໝາຍຄວາມວ່າ ອັລລໍຫ໌ຊົງຍິ່ງໃຫຍ່ກວ່າທຸກສິ່ງ, ແລະ ຊົງສູງສົ່ງເກີນກວ່າທີ່ຈະຖືກອ້າງເຖິງໃນສິ່ງທີ່ບໍ່ເໝາະສົມກັບຄວາມສູງສົ່ງ ແລະ ຄວາມສົມບູນຂອງພຣະອົງ.

ອັລລໍຮຸ ອັກບັຣ... ວະລີນີ້ເຕືອນສະຕິຊາວມຸສລິມວ່າ ບໍ່ມີສິ່ງໃດໃນຊີວິດນີ້ທີ່ຄວນຈະມາລົບກວນລາວໃຫ້ຫັນເຫອອກຈາກພຣະຜູ້ສ້າງໂຕລາວ, ແລະ ມະນຸດຕ້ອງດຳເນີນຊີວິດຂອງຕົນຕາມພຣະປະສົງຂອງອັລລໍຫ໌ ແລະ ບົດບັນຍັດຂອງພຣະອົງ, ບໍ່ແມ່ນຕາມອະລົມໄຝ່ຕ່ຳ ແລະ ຕັນຫາຂອງຕົນ, ເພາະອັລລໍຫ໌ຊົງຍິ່ງໃຫຍ່ກວ່າທຸກສິ່ງໃນໂລກນີ້.

ອັຊຮາດຸ ອັລລາ ອິລາຮະ ອິລລັລລໍຫ໌, ອັຊຮາດຸ ອັລລາ ອິລາຮະ ອິລລັລລໍຫ໌,

ຂ້ອຍຂໍປະຕິຍານວ່າບໍ່ມີພຣະເຈົ້າອື່ນໃດທີ່ຄວນແກ່ການເຄົາລົບພັກດີ ນອກຈາກອັລລໍຫ໌

ນີ້ຄືການປະຕິຍານຕົນຂໍ້ທຳອິດ, ຄວາມໝາຍຂອງມັນຄື ການຍອມຮັບຕໍ່ອັລລໍຫ໌ວ່າ ພຣະອົງຄືຜູ້ສ້າງທຸກສັບພະສິ່ງ, ເປັນພຣະຜູ້ເປັນເຈົ້າ, ເປັນຜູ້ປົກຄອງ ແລະ ເປັນຜູ້ບໍລິຫານຈັດການມັນ, ແລະ ພຣະອົງຄືຜູ້ດຽວເທົ່ານັ້ນທີ່ສົມຄວນໄດ້ຮັບການເຄົາລົບພັກດີ ໂດຍປາດສະຈາກສິ່ງອື່ນໃດ. ແລະ ບໍ່ມີຜູ້ໃດທີ່ຄູ່ຄວນແກ່ການເຄົາລົບພັກດີຢ່າງແທ້ຈິງນອກຈາກອັລລໍຫ໌ພຽງອົງດຽວ, ພຣະອົງຊົງເປັນໜຶ່ງດຽວ ບໍ່ມີພາຄີໃດໆ, ບໍ່ມີລູກ ແລະ ບໍ່ມີສິ່ງໃດສະເໝີເໝືອນພຣະອົງ; ດັ່ງນັ້ນ, ການເຄົາລົບພັກດີ (ອີບາດະຫ໌) ຈະຕ້ອງບໍ່ຖືກມອບໃຫ້ຜູ້ອື່ນນອກຈາກອັລລໍຫ໌ ແລະ ຈະຕ້ອງບໍ່ມີການວິງວອນຂໍຕໍ່ຜູ້ອື່ນນອກຈາກພຣະອົງ.

ແລະ ການປະຕິຍານນີ້ຄືການປະຕິຍານທີ່ຍິ່ງໃຫຍ່ທີ່ສຸດໃນການມີຢູ່ທັງໝົດ, ແລະ ມັນຄືຮາກຖານຂອງການສັດທາ (ອີມານ) ໃນທຸກໆ ສານທີ່ມາຈາກພຣະເຈົ້າ. ສະນັ້ນ ບັນດານະບີທຸກໆ ທ່ານ, ຂໍຄວາມສັນຕິຈົ່ງປະສົບແດ່ພວກທ່ານ, ເຊັ່ນ: ນູຫ໌, ອິບຣໍຮີມ, ມູຊາ, ອີຊາ ຈົນເຖິງມຸຮຳມັດ, ລ້ວນໄດ້ຮຽກຮ້ອງເຊີນຊວນປະຊາຊາດຂອງພວກທ່ານໄປສູ່ການຍອມຮັບ ແລະ ການສັດທາວ່າ ບໍ່ມີພຣະເຈົ້າອື່ນໃດທີ່ສົມຄວນໄດ້ຮັບການເຄົາລົບພັກດີນອກຈາກອັລລໍຫ໌. ແລະ ມັນຄືຄຳກ່າວທີ່ອັລລໍຫ໌ໄດ້ສ້າງສັບພະສິ່ງທັງຫຼາຍຂຶ້ນມາເພາະເຫດນັ້ນ, ແລະ ໄດ້ສົ່ງບັນດາຣໍຊູລມາເພື່ອມາຢັ້ງຢືນມັນ, ແລະໄດ້ປະທານຄຳພີຕ່າງໆ ລົງມາເພື່ອຊີ້ແຈງມັນ, ແລະ ໄດ້ເຮັດໃຫ້ສວນສະຫວັນເປັນລາງວັນຕອບແທນແກ່ຜູ້ທີ່ກ່າວມັນດ້ວຍຫົວໃຈທີ່ບໍລິສຸດ.

ເພາະຄຳໆ ນີ້ ມະນຸດຈຶ່ງຖືກຟື້ນຄືນຊີບຈາກຫລຸມຝັງສົບຂອງພວກເຂົາ ແລະ ຈະຖືກສອບສວນໃນວັນກິຍາມະຫ໌; ຜູ້ໃດທີ່ດຳລົງຊີວິດຕາມຄຳ ໆ ນີ້ ແລະ ໄດ້ສິ້ນສຸດຊີວິດລົງດ້ວຍຄຳ ໆ ນີ້, ແທ້ຈິງເຂົາກໍໄດ້ຮັບໄຊຊະນະອັນຍິ່ງໃຫຍ່, ສ່ວນຜູ້ໃດທີ່ປະຕິເສດມັນ ແລະ ບໍ່ກ່າວມັນອອກມາ ກໍສົມຄວນທີ່ຈະຢູ່ໃນໄຟນາຮົກຊົ່ວນິລັນດອນ.

ອັຊຮາດຸ ອັນນະ ມຸຮຳມະດັຣ ຣໍຊູລລຸລລໍຫ໌, ອັຊຮາດຸ ອັນນະ ມຸຮຳມະດັຣ ຣໍຊູລລຸລລໍຫ໌,

ຂ້ອຍຂໍປະຕິຍານວ່າ ມຸຮຳມັດ ເປັນ ຣໍສູລຂອງອັລລໍຫ໌

ຄວາມໝາຍ ຂອງການປະຕິຍານຕົນນີ້ ຄືການທີ່ຊາວມຸສລິມປະຕິຍານຕົນວ່າ ອັລລໍຫ໌ໄດ້ສົ່ງມຸຮຳມັດມາເປັນສາສະນະທູດທ່ານສຸດທ້າຍ, ແລະ ເປັນຜູ້ແຈ້ງຂ່າວສານຈາກພຣະຜູ້ເປັນເຈົ້າຂອງພວກເຂົາສູ່ມວນມະນຸດ, ແລະ ຊາວມຸສລິມຕ້ອງເຊື່ອໝັ້ນຢ່າງແນ່ວແນ່ວ່າ ບໍ່ມີຫົນທາງໃດໃນການເຄົາລົບພັກດີຕໍ່ອັລລໍຫ໌ ແລະ ການໄດ້ຮັບຄວາມພໍພຣະໄທຈາກພຣະອົງ ນອກຈາກການປະຕິຍານຕົນວ່າທ່ານນະບີມຸຮຳມັດ ຊໍລລັລລໍຮຸ ອະໄລຮິ ວະຊັລລຳ ເປັນສາສະນະທູດ, ປະຕິບັດ ແລະ ດຳເນີນຮອຍຕາມທ່ານ, ແລະ ການເຄົາລົບພັກດີຕໍ່ອັລລໍຫ໌ ຕາມບົດບັນຍັດທີ່ສາສະນະທູດມຸຮຳມັດ (ຊລ.) ໄດ້ນຳມາເຜີຍແຜ່.

ແລະ ການປະຕິຍານຕົນນັ້ນລວມເຖິງການທີ່ທ່ານຣໍສູລ ໄດ້ຖືກສົ່ງມາເພື່ອນຳພາຜູ້ຄົນກັບຄືນສູ່ຫຼັກເຕົາຮີດ, ເຊັ່ນດຽວກັບທີ່ບັນດານະບີກ່ອນຫນ້າທ່ານໄດ້ກະທຳມາ ເຊັ່ນ: ທ່ານນະບີອິບຣໍຮີມ, ທ່ານນະບີມູຊາ ແລະ ທ່ານນະບີອີຊາ. ເພາະ ທ່ານຄືສາດສະນະທູດຂອງພຣະຜູ້ເປັນເຈົ້າແຫ່ງສາກົນລະໂລກ, ໂດຍເປັນການຍ່າງຕາມແນວທາງດຽວກັນກັບທີ່ບັນດານະບີທັງຫຼາຍໄດ້ເດີນຜ່ານມາ ໃນການເຜີຍແຜ່ສານຈາກພຣະຜູ້ເປັນເຈົ້າຂອງພວກທ່ານ, ພຽງແຕ່ວ່າຈະບໍ່ມີນະບີທ່ານໃດອີກແລ້ວຫຼັງຈາກທ່ານ.

ໄຮຍາອະລັສ ຊໍລາຫ໌, ໄຮຍາອະລັສ ຊໍລາຫ໌.

ຈົ່ງມາສູ່ການລະຫມາດເຖິດ

ຄວາມໝາຍ: ບັນດາຜູ້ສັດທາເອີຍ ຈົ່ງຫັນມາສູ່ການເຄົາລົບອີບາດະຫ໌ພຣະຜູ້ເປັນເຈົ້າຂອງພວກເຈົ້າ, ເພາະແທ້ຈິງພຣະອົງເປັນຜູ້ຊົງອະໄພໂທດ ຜູ້ຊົງເມດຕາສະເຫມີ, ພຣະອົງຊົງຮັບການກັບຕົວ, ແລະ ຊົງອະໄພໃນຄວາມຜິດບາບທັງຫຼາຍ.

ນີ້ຄືການຮຽກຮ້ອງ ແລະ ການຕັກເຕືອນແກ່ບັນດາຜູ້ສັດທາ ວ່າໄດ້ຮອດເວລາຂອງພວກເຂົາແລ້ວ ທີ່ຈະຕ້ອງຢືນຢູຕໍ່ໜ້າພຣະຜູ້ເປັນເຈົ້າຂອງພວກເຂົາໃນການລະຫມາດ.

ໄຮຍາ ອະລັລ ຟາລາຫ໌, ໄຮຍາ ອະລັລ ຟາລາຫ໌.

ຈົ່ງມາສູ່ຄວາມສຳເລັດເຖິດ

ຄວາມສຳເລັດ ຫມາຍເຖິງຄວາມພໍໃຈ, ໄຊຊະນະ, ຄວາມປອດໄພ ແລະ ການຫຼຸດພົ້ນຈາກໂລກນີ້ ແລະ ໂລກໜ້າ.

ແລະ ໜຶ່ງໃນຄວາມໝາຍຂອງມັນກໍຄື ໄຊຊະນະໃນການໄດ້ຮັບຄວາມພໍໃຈຈາກອັລລໍຫ໌, ການໄດ້ເຂົ້າສະຫວັນ ແລະ ການຫຼຸດພົ້ນຈາກໄຟນາຮົກ; ເພາະວ່າຜູ້ທີ່ສັດທາ ແລະ ເຮັດລະຫມາດນັ້ນ ຖືວ່າລາວໄດ້ຮັບໄຊຊະນະແລ້ວ, ແລະ ຜູ້ທີ່ໄດ້ຮັບໄຊຊະນະນັ້ນ, ລາວກໍຈະຫຼຸດພົ້ນ ແລະ ໄດ້ຮັບຄວາມສຸກຕະຫຼອດການໃນສະຫວັນ.

ອັລລໍຮຸ ອັກບັຣ, ອັລລໍຮຸ ອັກບັຣ, ອັລລໍຫ໌ຊົງຍິງໃຫຍ່, ອັລລໍຫ໌ຊົງຍິງໃຫຍ່. ລາອິລາຮະ ອິລລັລລໍຫ໌, ບໍ່ມີພຣະເຈົ້າອື່ນໃດນອກຈາກອັລລໍຫ໌.

ການຈົບທ້າຍດ້ວຍການຕັກບີຣ ແລະ ຫຼັກເຕົາຮີດ

ການອະຊານ ຈົບລົງດ້ວຍການກ່າວຊ້ຳປະໂຫຍກ "ອັລລໍຮຸ ອັກບັຣ", ແລະ ການຢືນຢັນຄຳວ່າ "ລາອິລາຮະ ອິລລັລລໍຫ໌". ທັງສອງປະໂຫຍກນີ້ເປັນການຢໍ້າເຕືອນເຖິງຄວາມໝາຍທີ່ກ່າວມາກ່ອນໜ້ານີ້, ແລະ ເປັນແກນຫຼັກໃນການດຳລົງຊີວິດຂອງມະນຸດ, ສັດຈະທຳນີ້ຈະບໍ່ມີການປ່ຽນແປງ ບໍ່ວ່າເວລາຈະຜ່ານໄປດົນນານພຽງໃດ ຫຼື ຈະມີເຫດການໃດໆ ເກີດຂຶ້ນກໍ່ຕາມ, ນັ້ນກໍ່ຄື ອັລລໍຫ໌ຊົງຍິ່ງໃຫຍ່ເໜືອທຸກສັບພະສິ່ງ, ແລະ ພຣະອົງຄືພຣະເຈົ້າທີ່ແທ້ຈິງ, ພຣະອົງຄືຜູ້ດຽວເທົ່ານັ້ນທີ່ສົມຄວນໄດ້ຮັບການເຄົາລົບບູຊາ, ແລະ ການເຄົາລົບບູຊາສິ່ງອື່ນນອກເໜືອຈາກພຣະອົງນັ້ນລ້ວນເປັນໂມຄະ ບໍ່ຖືກຕ້ອງ.

ສະຫຼຸບແລ້ວ, ອະຊານບໍ່ແມ່ນພຽງແຕ່ການຮຽກຮ້ອງສູ່ການລະຫມາດ, ແຕ່ມັນເປັນການຮຽກຮ້ອງໄປສູ່ຄວາມສຳເລັດ, ໄຊຊະນະ ແລະ ຄວາມຈະເລີນ, ມັນເປັນສານທີ່ດັງກ້ອງກັງວານໃນບັນດາມັສຍິດ 5 ເທື່ອຕໍ່ມື້, ເພື່ອປຸກບັນດາດວງໃຈໃຫ້ຕື່ນຂຶ້ນ; ແລະ ເພື່ອເຕືອນສະຕິພວກເຮົາວ່າ ອັລລໍຫ໌ຊົງຢູ່ໃກ້.

ຈົ່ງເປີດໃຈຂອງທ່ານເພື່ອການສັດທາ, ແລະ ຈົ່ງກ່າວວ່າ: “ຂ້ອຍຂໍປະຕິຍານວ່າ ບໍ່ມີພຣະເຈົ້າອື່ນໃດທີ່ຄວນແກ່ການເຄົາລົບພັກດີຢ່າງແທ້ຈິງນອກຈາກອັລລໍຫ໌ ແລະ ຂ້ອຍຂໍປະຕິຍານວ່າມຸຮຳມັດເປັນສາສະນະທູດຂອງອັລລໍຫ໌”, ແລ້ວທ່ານຈະໄດ້ເຂົ້າສູ່ຄວາມເມດຕາຂອງອັລລໍຫ໌, ໄດ້ຮັບຄວາມສຸກໃນໂລກນີ້ ແລະ ການໄດ້ຮັບໄຊຊະນະໃນໂລກໜ້າ, ແລະ ຈະຖືກໃຫ້ຟື້ນຄືນຊີບໃນວັນກິຍາມະຫ໌ ໃນໝູ່ຂອງບັນດາຜູ້ສັດທາ.