Nchịkọta nkọwa mkpụrụokwu nke Adhan.

Nkọwa mkpụrụokwu nke Adhan

Kọmitii Mmụta nke Òtù Na-ahụ Maka Nkwalite Ọdịnaya Islam n'Asụsụ Dị Iche Iche

Al-Adhan (Ịkpọ òkù ekpere) bụ òkù sitere n'aka Chineke nke onye Alakụba na-anụ ugboro ise n'ụbọchị, nke na-echetara ya ịdị ukwuu nke Chineke ma na-akpọkwa ya òkù gaa n'ihe ọma na nzọpụta. ​Ọ bụ oge njikọ n'etiti mmadụ na Onye okike ya, ebe ọ na-ahapụ ụzụ nke ụwa iji guzoro na-arịọ Onyenwe ya arịrịọ.

Adhan (Ịkpọ òkù ekpere) na-ebu nkọwa ndị dị omimi nke na-amalite site n'ibuli Chineke elu, ma na-agwụcha site n'ịkpọ òkù gaa n'ekpere, ebe onye Alakụba na-enweta udo nke obi ya.

Mkpụrụokwu Adhan:

Chineke kachasị ukwuu Chineke kachasị ukwuu, Chineke kachasị ukwuu Chineke kachasị ukwuu

Chineke kachasị ukwuu.

Aha Ebube ahụ: "Allah" nke pụtara Onye a na-efe ofufe, ya bụ Onye kwesịrị ofufe, ọ bụ aha Onyenwe Anyị, Onye Okike (Onye dị ebube), ma aha Chineke niile dị ka ihe na-eso ya nakwa njirimara ya. Chineke bụ Otu, Onye Pụrụ Iche, Onye na-amụghị nwa, a mụghịkwa Ya amụ, Ọ bụkwa Onye kere eluigwe na ụwa.

N'ikwu "Allahu Akbar", ihe ọ pụtara bụ na Chineke kachasị ihe niile ukwuu, Ọ dịkwa ebube karịa ka a tụkwasị Ya ihe na-ekwesịghị n'ebube Ya na izu okè Ya.

​"Chineke kachasị ukwuu".. okwu a na-echetara onye Alakụba na ọ dịghị ihe ọ bụla n'ime ndụ a kwesịrị idọpụ uche ya n'ebe Onye Okike ya nọ, nakwa na mmadụ kwesịrị ibi ndụ ya dịka uche Chineke nakwa iwu Ya siri dị, ọ bụghị dịka ọchịchọ obi ya nakwa agụụ anụ ahụ ya siri dị, n'ihi na Chineke dị ukwuu karịa ihe niile dị n'ụwa.

​A na m agba àmà na ọ dịghị chi kwesịrị ofufe n'eziokwu ma e wezụga Chineke, a na m agba àmà na ọ dịghị chi kwesịrị ofufe n'eziokwu ma e wezụga Chineke.

​A na m agba àmà na ọ dịghị chi kwesịrị ofufe n'eziokwu ma e wezụga Chineke.

Nke a bụ ịgba àmà nke mbụ. Ihe ọ pụtara bụ ikwupụta na Chineke bụ Onye Okike ihe niile, Onye Nwe ya, Eze ya, nakwa Onye Na-achịkwa ya, nakwa na Ọ bụ Ya kwesịrị ofufe naanị Ya ma e wezụga ihe ọ bụla ọzọ, nakwa na ọ nweghị onye kwesịrị ofufe n'eziokwu ma e wezụga naanị Chineke, na Ọ dị Otu, O nweghị onye mmekọ, O nweghị nwa, ọ dịghịkwa ihe yiri Ya; ya mere a gaghị ekenye ofufe onye ọzọ na-abụghị Chineke, a gaghịkwa akpọku onye ọzọ na-abụghị Chineke.

Ịgba àmà a bụ nke kachasị ukwuu dị adị, ọ bụkwa ntọala okwukwe n'ozi niile sitere n'aka Chineke. N'ihi na ndị amụma niile, udo dịrị ha, dị ka Nuh, Ibrahim, Musa, na Isa ruo na Muhammad ﷺ, kpọrọ ndị ha òkù ka ha kwupụta, nabata, ma kwenye na ọ dịghị chi kwesịrị ofufe n'eziokwu ma e wezụga Chineke. Ọ bụkwa okwu ahụ ka Chineke kere ihe okike maka ya, zite ndị ozi iji kwado ya, wedata akwụkwọ nsọ iji kọwapụta ya, ma mee Aljannah ka ọ bụrụ ụgwọ ọrụ maka onye ọ bụla jiri ya bịa site n'ezi obi ya.

​Ọ bụ n'ihi okwu a ka a ga-akpọlite ndị mmadụ site n'ili ha, ma zaa ajụjụ n'Ụbọchị Mbilite n'Ọnwụ; ya mere onye ọbụla biri ndụ na ya, ma jiri ya mechie ndụ ya, enwetala nnukwu mmeri, ma onye jụrụ ya ma ghara ikwupụta ya ga-anọgide n'ime ọkụ ruo mgbe ebighị ebi.

A na m agba àmà na Muhammad bụ Onye Ozi Chineke, a na m agba àmà na Muhammad bụ Onye Ozi Chineke.

​A na m agba àmà na Muhammad bụ Onye Ozi Chineke.

Ihe ịgba àmà a pụtara bụ na onye Alakụba ga-agba àmà na Chineke zipụrụ Muhammad dị ka onye na-emechi ozi niile sitere n'aka Chineke, nakwa onye na-ezisara ndị mmadụ ozi Onyenwe ha degaara ha, nakwa na onye Alakụba ga-enwe nkwenye siri ike na ọ dịghị ụzọ a ga-esi efe Chineke ofufe nakwa inweta ihu ọma Ya ma e wezụga site n'ịgba àmà na Onye Ozi ﷺ bụ onye e nyere ozi, isoro ya na iṅomi ya, tinyere ife Chineke ofufe n'ụzọ iwu nke Onye Ozi bụ Muhammad ﷺ zisara.

Ịgba àmà ahụ na-egosikwa na Onye Ozi ﷺ bịara ka o wee weghachi ndị mmadụ n'ịdị n'otu Chineke (Tawhid), dị ka Ibrahim, Musa, nakwa Isa (udo dịrị ha), ndị bu ya ụzọ mere. Ọ bụ onye ozi nke Onyenwe ụwa niile, onye sooro n'ụzọ ahụ ndị amụma niile sooro n'ịzisa ozi nke Onyenwe ha, ma ọ dịghị onye amụma ọ bụla mgbe ọ gasịrị.

"Bịanụ n'ekpere, bịanụ n'ekpere"

Bịanụ n'ekpere

Ihe ahịrịokwu a pụtara bụ: Unu ndị kwere ekwe, bịanụ n'ife Onyenwe unu ofufe, n'ihi na Ọ bụ Onye na-agbaghara mmehie, Onye na-eme ebere, Ọ na-anabata nchegharị, ma na-agbaghakwara ajọ omume.

N'ezie, ọ bụ ọkpụkpọ òkù na ncheta nye ndị kwere ekwe na oge ha eruola iguzo n'ihu Onyenwe ha n'ekpere.

Bịanụ na nzọpụta, bịanụ na nzọpụta

"Bịanụ na nzọpụta"

Nzọpụta pụtara afọ ojuju, mmeri, nchekwa, nlanarị n'ụwa a na n'Ụwa Nke Ọzọ.

N'ime ihe ọ pụtara bụ inweta ihu ọma Chineke, inweta Aljannah, nakwa ịgbanahụ Ọkụ; n'ihi na onye kwetara ma kpee ekpere enwetala ọganihu, ma onye nwere ọganihu agbanarịala ma nweta ndụ ebighị ebi n'ime Aljannah.

Chineke kachasị ukwuu, Chineke kachasị ukwuu, ọ dịghị chi kwesịrị ofufe n'eziokwu ma e wezụga Chineke.

Imechi site na Takbiir nakwa Tawhid.

A na-emechi Adhan site n'ikwughachi ahịrịokwu ahụ bụ "Allahu Akbar" (Chineke kachasị ukwuu), nakwa imesi ike na "La ilaha illa Allah" (Ọ dịghị chi kwesịrị ofufe n'eziokwu ma e wezụga Chineke). Ahịrịokwu abụọ ndị a bụ nkwenye maka ihe ndị e kwuru na mbụ, ọ bụkwa na ha ka ịdị adị nke ụmụ mmadụ gbadoro ụkwụ. Eziokwu a anaghị agbanwe agbanwe n'agbanyeghị otú oge siri gaa, nakwa n'agbanyeghị otú ihe omume siri na-esochi onwe ha, nke bụ na Chineke kachasị ihe niile ukwuu, nakwa na Chineke bụ ezi Chi, nakwa na Ọ bụ naanị Ya kwesịrị ofufe, nakwa na ife ihe ọ bụla ọzọ na-abụghị Ya bụ ofufe ụgha.

N'ikpeazụ: Al-Adhan (Oku ekpere) abụghị naanị ịkpọ òkù maka ekpere, kama ọ bụ òkù maka nzọpụta, mmeri na ihe ịga nke ọma, ọ bụ ozi na-ekwughachi n'ụlọ alakụba ugboro ise kwa ụbọchị, iji kpọtee obi; ma na-echetara anyị na Chineke nọ nso.

Mepee obi gị maka okwukwe, ma kwuo: “A na m agba àmà na ọ dịghị chi kwesịrị ofufe n'eziokwu ma e wezụga Chineke, ma na m agba àmà na Muhammad bụ Onye Ozi Chineke”, ị ga-abanye n'ime ebere Chineke, nweta obi ụtọ n'ụwa, nakwa nzọpụta n'Ụwa Nke Ọzọ, a ga-akpọlitekwa gị n'Ụbọchị Mbilite n'Ọnwụ n'ime igwe ndị kwere ekwe.