အဇာန်၏ စကားလုံးများ ရှင်းလင်းချက်အကျဉ်းချုပ်

အဇာန်စကားလုံးများ၏ ရှင်းလင်းချက်

ဘာသာစကားအမျိုးမျိုးဖြင့် အစ္စလာမ့်အကြောင်းအရာများကို ဝန်ဆောင်မှု‌ပေး နေသောအသင်း၏ ပညာ‌ရေးကော်မတီ

အဇာန်သည် မွတ်စ်လင်မ်တစ်ဦး တစ်နေ့လျှင် ငါးကြိမ် ကြားနာရသော အရှင်မြတ်ထံတော်မှ ဖိတ်ခေါ်သံဖြစ်ပြီး၊ ၎င်းသည် အလ္လာဟ်အရှင်မြတ်၏ ကြီးကျယ်မြင့်မြတ်မှုကို သတိရစေကာ မွတ်စ်လင်မ်အား ကောင်းမှုနှင့် အောင်မြင်မှုဆီသို့ ဖိတ်ခေါ်လေသည်။ ၎င်းသည် လူသားနှင့် မိမိဖန်ဆင်းရှင်အကြား ဆက်သွယ်မှုရယူသည့် အချိန်အခိုက်အတန့်ဖြစ်ပြီး၊ ထိုအချိန်တွင် လောကီ၏ ဆူညံရှုပ်ထွေးမှုများမှ ကင်းကွာကာ မိမိအရှင်နှင့် တိုးတီးစွာစကားပြောဆိုရန် ရပ်တည်ခြင်းဖြစ်သည်။

အဇာန်တွင် အလ္လာဟ်အရှင်မြတ်အား ကြီးကျယ်မြင့်မြတ်ကြောင်း ဖော်ပြခြင်းဖြင့် စတင်ပြီး၊ မွတ်စလင်တစ်ဦးအတွက် စိတ်အေးချမ်းမှုရရှိရာဖြစ်သော ဆွလာသ်ဘက်သို့ ဖိတ်ခေါ်ခြင်းဖြင့် အဆုံးသတ်ထားသည့် မြင့်မြတ်သော အဓိပ္ပာယ်များ ပါဝင်သည်။

အဇာန်၏ စကားလုံးများ

အလ္လာဟ်အရှင်မြတ်သည် အကြီးကျယ်ဆုံးဖြစ်တော်မူသည်။ အလ္လာဟ်အရှင်မြတ်သည် အကြီးကျယ်ဆုံးဖြစ်တော်မူသည်။ အလ္လာဟ်အရှင်မြတ်သည် အကြီးကျယ်ဆုံးဖြစ်တော်မူသည်။ အလ္လာဟ်အရှင်မြတ်သည် အကြီးကျယ်ဆုံးဖြစ်တော်မူသည်။

အလ္လာဟ်အရှင်မြတ်သည် အကြီးကျယ်ဆုံးဖြစ်တော်မူသည်။

ကြီးကျယ်မြင့်မြတ်သော “အလ္လာဟ်” ဟူသည့် နာမတော်၏ အဓိပ္ပါယ်မှာ ခဝပ်ကိုးကွယ်ခြင်းကို ခံထိုက်တော်မူသောအရှင်ဟူ၍ ဖြစ်သည်။ ၎င်းသည် ဘုန်းအာနုဘော် ကြီးမြတ်တော်မူသော ဖန်ဆင်းရှင်အရှင်မြတ်၏ နာမတော်ဖြစ်ပြီး၊ အရှင်မြတ်၏ အခြားသော နာမတော်များအားလုံးသည် ထိုနာမတော်၏ နောက်လိုက်များနှင့် ဂုဏ်ပုဒ်များသာဖြစ်သည်။ အလ္လာဟ်အရှင်မြတ်သည် တစ်ဆူတည်း၊ တစ်ပါးတည်းသောအရှင် ဖြစ်တော်မူ၏။ ထိုအရှင်မြတ်သည် မည်သူတစ်ဦးတစ်ယောက်ကိုမျှ မွေးဖွားတော်မမူခဲ့သလို၊ မည်သူ၏ မွေးဖွားခြင်းကိုမျှလည်း ခံခဲ့ရတော်မူသည် မဟုတ်ပေ။ ထို့ပြင် ၎င်းအရှင်မြတ်သည် မိုးကောင်းကင်များနှင့် မြေပထဝီတို့ကို ဖန်ဆင်းတော်မူသောအရှင် ဖြစ်သည်။

“အလ္လာဟုအက်ဗရ်” ဟုဆိုခြင်း၏ ဆိုလိုရင်းမှာ အလ္လာဟ်အရှင်မြတ်သည် အရာခပ်သိမ်းထက် အကြီးကျယ်ဆုံး ဖြစ်တော်မူသည်။ ထိုအရှင်မြတ်၏ ဘုန်းအာနုဘော် ကြီးကျယ်မြင့်မြတ်မှု၊ပြီးပြည့်စုံမှုတို့နှင့် မထိုက်တန်သည်များကို အရှင်မြတ်ထံသို့ ရည်ညွှန်းခြင်းမှလည်း မြင့်မြတ်ကင်းစင်ဆုံး ဖြစ်တော်မူသည်။

အလ္လာဟ်အရှင်မြတ်သည် အကြီးကျယ်ဆုံးဖြစ်တော်မူသည်။ ဤစကားရပ်သည် မွတ်စလင်တစ်ဦးအား ဤဘဝလောကရှိ မည်သည့်အရာကမျှ မိမိကို ဖန်ဆင်းတော်မူသောအရှင်ထံမှ အာရုံမလွှဲစေသင့်ကြောင်း သတိရစေပါသည်။ ထို့ပြင် လူသားသည် မိမိ၏ဘဝခရီးလမ်းကို မိမိ၏ စိတ်အလိုဆန္ဒများနှင့် ရမ္မက်များအတိုင်း မဟုတ်ဘဲ၊ အလ္လာဟ်အရှင်မြတ်၏ အလိုတော်နှင့် သာသနာနှင့်အညီ လျှောက်လှမ်းရမည်ဖြစ်သည်။ အမှန်စင်စစ် အလ္လာဟ်အရှင်မြတ်သည် ဤလောကရှိ အရာခပ်သိမ်းထက် အကြီးကျယ်ဆုံး ဖြစ်တော်မူသည်။

အလ္လာဟ်အရှင်မြတ်မှအပ အခြားခဝပ်ကိုးကွယ်ထိုက်သော အရှင်မရှိကြောင်းကို ကျွန်တော်မျိုးသက်သေခံအပ်ပါသည်။ အလ္လာဟ်အရှင်မြတ်မှအပ အခြားခဝပ်ကိုးကွယ်ထိုက်သော အရှင်မရှိကြောင်းကို ကျွန်တော်မျိုးသက်သေခံအပ်ပါသည်။

အလ္လာဟ်အရှင်မြတ်မှအပ အခြားခဝပ်ကိုးကွယ်ထိုက်သော အရှင်မရှိကြောင်းကို ကျွန်တော်မျိုးသက်သေခံအပ်ပါသည်။

၎င်းသည် ပထမဦးဆုံး သက်သေခံခြင်းဖြစ်သည်။ ၎င်း၏ အလိုသဘောမှာ အလ္လာဟ်အရှင်မြတ်သည် အရာခပ်သိမ်းအား ဖန်ဆင်းတော်မူသောအရှင်၊ ပြုစုပျိုးထောင်တော်မူသောအရှင်၊ ပိုင်စိုးတော်မူသောအရှင်နှင့် စီမံခန့်ခွဲတော်မူသောအရှင်ဖြစ်ကြောင်း ဝန်ခံခြင်းဖြစ်သည်။ ထို့ပြင် အရှင်မြတ်တစ်ဆူတည်းကိုသာ ခဝပ်ကိုးကွယ်ရမည်ဖြစ်ပြီး အရှင်မြတ်မှအပ အခြားမည်သည့်အရာကိုမျှ ခဝပ်ကိုးကွယ်မှု မပြုရကြောင်း၊ အလ္လာဟ်အရှင်မြတ်တစ်ဆူတည်းမှလွဲ၍ စစ်မှန်သည့် ခဝပ်ကိုးကွယ်ခြင်းကိုခံထိုက်သည့် အရှင်မရှိကြောင်း၊ အရှင်မြတ်သည် တွဲဖက်ယှဉ်တွဲသူကင်းမဲ့သော တစ်ဆူတည်းသောအရှင်၊ သားသမီးကင်းစင်တော်မူသောအရှင်၊ အလားတူနှိုင်းယှဉ်စရာကင်းမဲ့တော်မူသောအရှင်ဖြစ်ကြောင်း ဝန်ခံခြင်းဖြစ်သည်။ ထို့ကြောင့် အလ္လာဟ်အရှင်မြတ်မှအပ အခြားမည်သည့်အရာကိုမျှ ခဝပ်ကိုးကွယ်ခြင်း မပြုရပေ။ ထို့ပြင် အလ္လာဟ်အရှင်မြတ်မှအပ အခြားမည်သည့်အရာကိုမျှ ဆုတောင်းပတ္ထနာ မပြုရပေ။

ဤသက်သေခံခြင်းသည် လောကတွင် အကြီးကျယ်ဆုံးသော သက်သေခံခြင်းဖြစ်သည်။ ထို့ပြင် ၎င်းသည် အလ္လာဟ်အရှင်မြတ်၏ ရိစာလသ်(သာသနာ့လမ်းစဉ်)များအားလုံးရှိ အီမာန်သက်ဝင်ယုံကြည်မှု၏ အခြေခံအုတ်မြစ်ဖြစ်သည်။ သို့ဖြစ်၍ တမန်တော်များဖြစ်သည့် နူဟ်၊ အစ်ဗ်ရာဟီမ်၊ မူစာ၊ အီစာ (အလိုင်ဟိမွစ်စလာမ်)တို့မှစ၍ တမန်တော် မုဟမ္မဒ်(ﷺ) အထိ နဗီတမန်တော်များအားလုံးသည် မိမိတို့၏ လူမျိုးများကို အလ္လာဟ်အရှင်မြတ်မှအပ ခဝပ်ကိုးကွယ်ခြင်းခံထိုက်သည့် အရှင်မရှိကြောင်းကို ဝန်ခံထွက်ဆိုရန်၊ လက်ခံသဘောတူရန်နှင့် ယုံကြည်ရန် ဖိတ်ခေါ်ခဲ့ကြသည်။ ယင်းကလိမဟ်တော် အတွက်ကြောင့်ပင် အလ္လာဟ်အရှင်မြတ်သည် အဖန်ဆင်းခံအားလုံးကို ဖန်ဆင်းတော်မူခဲ့သည်။ ထိုကလိမဟ်တော်ကို အတည်ပြုရန် ရစူလ်တမန်တော်များကို စေလွှတ်တော်မူခဲ့ပြီး၊ ၎င်းအား ရှင်းလင်းတင်ပြရန် ကျမ်းဂန်များကို ချပေးတော်မူခဲ့သည်။ ထို့ပြင် ထိုကလိမဟ်တော်အား မိမိ၏စိတ်နှလုံးသားမှ ရိုးသားဖြူစင်စွာဖြင့် ယုံကြည်သက်သေခံသူများအတွက် ဂျန္နသ်သုခဘုံအား အကျိုးဆုလာဘ်အဖြစ် သတ်မှတ်ပေးတော်မူခဲ့သည်။

ဤကလိမဟ်တော်အတွက်ကြောင့် လူသားတို့သည် ၎င်းတို့၏ကဗရ်များမှ ရှင်ပြန်ထမြောက်ကြမည်ဖြစ်ပြီး ကိယာမသ်နေ့တွင် စစ်ဆေးမေးမြန်းခံရမည်ဖြစ်သည်။ သို့ဖြစ်ရာ မည်သူမဆို ၎င်းအပေါ်၌ အသက်ရှင်နေထိုင်ပြီး ၎င်းဖြင့် မိမိ၏ဘဝကို နိဂုံးချုပ်ခဲ့ပါက ထိုသူသည် ကြီးကျယ်သော အောင်မြင်မှုကို ရရှိပြီးဖြစ်သည်။ သို့သော် ၎င်းကို ငြင်းပယ်၍ မရွတ်ဆိုခဲ့သူသည် ဂျဟန္နမ်၌ ထာဝရနေထိုင်ရန် ထိုက်တန်သွားပြီဖြစ်သည်။

တမန်တော် မုဟမ္မဒ်(ﷺ)သည် အလ္လာဟ်အရှင်မြတ်၏ ရစူလ်တမန်တော်ဖြစ်တော်မူကြောင်းကို ကျွန်တော်မျိုး သက်သေခံအပ်ပါသည်။ တမန်တော် မုဟမ္မဒ် (ﷺ)သည် အလ္လာဟ်အရှင်မြတ်၏ ရစူလ်တမန်တော်ဖြစ်တော်မူကြောင်းကို ကျွန်တော်မျိုးသက်သေခံအပ်ပါသည်။

တမန်တော် မုဟမ္မဒ် (ﷺ)သည် အလ္လာဟ်အရှင်မြတ်၏ ရစူလ်တမန်တော်ဖြစ်တော်မူကြောင်းကို ကျွန်တော်မျိုးသက်သေခံအပ်ပါသည်။

ဤသက်သေခံခြင်း၏ အလိုသဘောမှာ- မွတ်စလင်မ်တစ်ဦးအနေဖြင့် အလ္လာဟ်အရှင်မြတ်သည် တမန်တော်မုဟမ္မဒ်အား အလ္လာဟ်အရှင်မြတ်၏ သာသနာတော်များကို အဆုံးသတ်သူအဖြစ် လည်းကောင်း၊ လူသားတို့ထံ ၎င်းတို့အရှင်မြတ်၏ သတင်းစကားကို ပို့ဆောင်ပေးသူအဖြစ် လည်းကောင်း စေလွှတ်တော်မူကြောင်း သက်သေခံခြင်းဖြစ်သည်။ ၎င်းပြင် တမန်တော်မြတ် (ﷺ) အား ရစူလ်တမန်တော်ဖြစ်ကြောင်း သက်သေခံခြင်း၊ ကိုယ်တော်အား လိုက်နာကျင့်သုံးခြင်းနှင့် စံနမူနာယူခြင်း၊ တမန်တော် မုဟမ္မဒ် (ﷺ) ပို့ဆောင်ပေးခဲ့သည့် ‘ရှရီအသ်’ တရားလမ်းစဥ်အတိုင်း အလ္လာဟ်အရှင်မြတ်အား ခဝပ်ကိုးကွယ်ခြင်းတို့မှတစ်ပါး အလ္လာဟ်အရှင်မြတ်ကို ခဝပ်ကိုးကွယ်ရန်နှင့် အရှင်မြတ်၏ နှစ်သက်ကျေနပ်မှုကို ရယူနိုင်ရန် အခြားမည်သည့်လမ်းစဥ်မျှ မရှိကြောင်းကို မွတ်စလင်မ်တစ်ဦးအနေဖြင့် ပြတ်သားခိုင်မာစွာ ယုံကြည်ရမည်ဖြစ်သည်။

ရစူလ်တမန်တော်မြတ်(ဆွလ္လလ္လာဟုအလိုင်ဟိဝစလ္လမ်)သည် ကိုယ်တော်မြတ်အလျင် ရှိခဲ့သည့် အစ်ဗ်ရာဟီးမ်၊ မူစာနှင့် အီစာ(အလိုင်ဟိမွတ်စ်စလာမ်)တမန်တော်များပြုလုပ်ခဲ့သကဲ့သို့ပင်၊ လူသားတို့ကို သောင်ဟီးဒ်တရားတော်ဘက်သို့ ပြန်လည်ခေါ်ဆောင်ရန်အတွက်သာ ကြွရောက်လာခဲ့ခြင်းဖြစ်ကြောင်းကို ယင်းသက်သေခံခြင်းတွင် အကျုံးဝင်ပါသည်။ ကိုယ်တော်မြတ်သည် စကြဝဠာခပ်သိမ်းကို ဖန်ဆင်းမွေးမြူတော်မူသော အရှင်မြတ်၏ ရစူလ်တမန်တော်ဖြစ်ပြီး၊ နဗီတမန်တော်အားလုံး မိမိတို့အရှင်မြတ်၏ သတင်းစကားများကို ပို့ချဟောကြားရာတွင် လျှောက်လှမ်းခဲ့ကြသည့် လမ်းစဉ်အတိုင်း လျှောက်လှမ်းခဲ့ခြင်းဖြစ်သည်။ သို့ရာတွင် ကိုယ်တော်မြတ်ပြီးနောက် မည်သည့်နဗီတမန်တော်မျှ မရှိတော့ပေ။

ဆွလာသ်ဝတ်ပြုရန် လာကြကုန်။ ဆွလာသ်ဝတ်ပြုရန် လာကြကုန်။

ဆွလာသ်ဝတ်ပြုရန် လာကြကုန်။

ဤဝါကျ၏ အဓိပ္ပါယ်မှာ- အို- ‘မုအ်မင်န်’ သက်ဝင်ယုံကြည်သူအပေါင်းတို့၊ အသင်တို့သည် မိမိတို့ကိုဖန်ဆင်းမွေးမြူတော်မူသော အရှင်မြတ်၏ အိဗာဒသ် ခဝပ်ကိုးကွယ်ခြင်းဘက်သို့ ရှေးရှုကြလေကုန်။ အကြောင်းမူကား စင်စစ်ဧကန် ထိုအရှင်မြတ်သည်ပင် အလွန်တရာ ခွင့်လွှတ်ချမ်းသာ ပေးသနားတော်မူသောအရှင်၊ အလွန်တရာ သနားကြင်နာ ညှာတာတော်မူသောအရှင် ဖြစ်တော်မူ၏။ ထိုအရှင်မြတ်သည် ဝန်ချတောင်းပန်ခြင်းကို လက်ခံတော်မူ၍ ပြစ်မှုများကို ခွင့်လွှတ်ချမ်းသာ ပေးသနားတော်မူပေသည်။

၎င်းသည် မုအ်မင်န်သက်ဝင်ယုံကြည်သူများကို ဆွလာသ်ဝတ်ပြုရာတွင် ၎င်းတို့၏ အရှင်မြတ် ရှေ့တော်မှောက်၌ ရပ်တည်ခစားရန် အချိန်ကျရောက်လာပြီဖြစ်ကြောင်း ဖိတ်ခေါ်ချက်နှင့် သတိပေးနှိုးဆော်ချက် ဖြစ်သည်။

အောင်မြင်မှုဘက်သို့ လာကြကုန်။ အောင်မြင်မှုဘက်သို့ လာကြကုန်။

အောင်မြင်မှုဘက်သို့ လာကြကုန်။

အောင်မြင်မှုဟူသည် လောကီဘဝနှင့် နောင်တမလွန်ဘဝတွင် ကျေနပ်နှစ်သက်မှုကို ရရှိခြင်း၊ အောင်မြင်ခြင်း၊ ဘေးကင်းလုံခြုံခြင်းနှင့် လွတ်မြောက်ခြင်းတို့ ဖြစ်သည်။

၎င်း၏အဓိပ္ပါယ်များအနက် အလ္လာဟ်အရှင်မြတ်၏ကျေနပ်နှစ်သက်မှုကို ရရှိခြင်း၊ ဂျန္နသ်သုခဘုံကို ရရှိခြင်းနှင့် ဂျဟန္နမ်ငရဲဘုံမှ လွတ်မြောက်ခြင်းတို့ ပါဝင်သည်။ အဘယ်ကြောင့်ဆိုသော် အကြင်သူသည် အီမာန်သက်ဝင်ယုံကြည်ခဲ့ပြီး၊ ဆွလာသ်ဝတ်ပြုခဲ့ပါက၊ ဧကန်စင်စစ်ထိုသူသည် အောင်မြင်မှုကို ဆွတ်ခူးရရှိခဲ့ခြင်းပင်ဖြစ်သည်။ ထိုသို့အောင်မြင်မှုကို ဆွတ်ခူးရရှိသူသည် ကယ်တင်လွတ်မြောက်ခွင့်ကို ရရှိမည်ဖြစ်ပြီး ဂျန္နသ်သုခဘုံတွင်အမြဲထာဝရနေထိုင်ခွင့်ရကာ အောင်မြင်မှုရရှိမည်ဖြစ်သည်။

အလ္လာဟ်အရှင်မြတ်သည် အကြီးကျယ်ဆုံးဖြစ်တော်မူ၏၊ အလ္လာဟ်အရှင်မြတ်သည် အကြီးကျယ်ဆုံးဖြစ်တော်မူ၏၊ အလ္လာဟ်အရှင်မြတ်မှတစ်ပါး အခြားကိုးကွယ်ရာအရှင် မရှိပေ။

သက္ကဗီးရ်နှင့် သောင်ဟီးဒ်ဖြင့် နိဂုံးချုပ်ခြင်း။

အဇာန်ကို "အလ္လာဟုအက်ဗရ်" စာသားအား အထပ်ထပ်အခါခါရွတ်ဆိုခြင်းနှင့် "လာအိလာဟ အိလ္လလ္လာဟ်" အား လေးနက်စေခြင်းဖြင့် အဆုံးသတ်ထားသည်။ ဤစာသားနှစ်ခုသည် ယခင်ဖော်ပြပါ အဓိပ္ပာယ်များကို အတည်ပြုခြင်းဖြစ်ပြီး လူသားတို့၏ တည်ရှိမှုသည် ၎င်းတို့အပေါ်တွင်သာ အခြေပြုလျက်ရှိသည်။ ဤအမှန်တရားသည် အချိန်ကာလ မည်မျှပင်ကြာညောင်းပါစေ၊ အဖြစ်အပျက်များ မည်သို့ပင်ဆက်တိုက်ဖြစ်ပေါ်နေပါစေ အလျဉ်းပြောင်းလဲမည်မဟုတ်ပေ။ ၎င်းမှာ မုချဧကန် အလ္လာဟ်အရှင်မြတ်သည် အရာရာတိုင်းထက် အကြီးကျယ်ဆုံး၊ အမြင့်မြတ်ဆုံး ဖြစ်တော်မူသည်ဟူသောအချက်၊ အလ္လာဟ်အရှင်မြတ်သည်သာလျှင် မှန်ကန်သည့် ကိုးကွယ်ရာအရှင် ဖြစ်တော်မူသည်ဟူသောအချက်၊ ထိုအရှင်မြတ်သည်သာလျှင် ဆည်းကပ်ကိုးကွယ်မှုအပေါင်းကို ခံထိုက်တော်မူသော တစ်ပါးတည်းသောအရှင် ဖြစ်တော်မူသည်ဟူသောအချက်နှင့် ထိုအရှင်မြတ်မှအပ အခြားအရာများကို ကိုးကွယ်ခြင်းသည် အချည်းနှီးသာဖြစ်သည်ဟူသောအချက်ပင် ဖြစ်သည်။

နိဂုံးချုပ်အနေဖြင့်- အဇာန်သည် ဆွလာသ်ဝတ်ပြုရန်အတွက် ဖိတ်ခေါ်ချက်သက်သက် မဟုတ်ဘဲ၊ ကြီးပွားချမ်းသာခြင်း၊ အောင်နိုင်ခြင်းနှင့် အောင်မြင်ခြင်းစသည့်အရာများဘက်သို့ ဖိတ်ခေါ်ချက်တစ်ခု ဖြစ်သည်။ ၎င်းသည် နှလုံးသားများကို နိုးကြားစေရန်နှင့် အလ္လာဟ်အရှင်မြတ်သည် အနီးအနားတွင်ရှိတော်မူကြောင်း ကျွန်တော်တို့ကို သတိပေးရန် နေ့စဉ် ငါးကြိမ်တိုင်တိုင် ဗလီဝတ်ကျောင်းတော်များတွင် ပဲ့တင်ထပ်နေသော သတင်းစကားတစ်ခု ဖြစ်သည်။

(အီမာန်)သက်ဝင်ယုံကြည်ခြင်း အတွက် သင်၏နှလုံးသားကို ဖွင့်လှစ်လိုက်ပါ။ ထို့နောက် “အလ္လာဟ်အရှင်မြတ်မှအပ အခြားခဝပ်ကိုးကွယ်ထိုက်သော အရှင်မရှိကြောင်းနှင့် မုဟမ္မဒ်သည် အလ္လာဟ်အရှင်မြတ်၏ ရစူလ်တမန်တော်ဖြစ်ကြောင်းကို ကျွန်တော်မျိုးသက်သေခံအပ်ပါ၏” ဟု ရွတ်ဆိုလိုက်ပါ။ သို့ဆိုလျှင် သင်သည် အလ္လာဟ်အရှင်မြတ်၏ ကရုဏာတော်ထဲသို့ ဝင်ရောက်သွားမည်ဖြစ်ပြီး၊ လောကီဘဝ၌ အေးချမ်းသာယာမှုနှင့် တမလွန်ဘဝ၌ အောင်မြင်လွတ်မြောက်မှုကို ရရှိလိမ့်မည်။ ထို့ပြင် ကိယာမသ်(ရှင်ပြန်ထမည့်)နေ့တွင်လည်း သက်ဝင်ယုံ ကြည်သူ(မွတ်အ်မင်န်)များအုပ်စုတွင် ရှင်ပြန်ထစေခြင်းခံရပေမည်။