ຂໍ້ຄວາມສັ້ນໆ ເຖິງຄົນທີ່ບໍ່ເຊື່ອໃນພຣະເຈົ້າ

ຂໍ້ຄວາມສັ້ນໆ ເຖິງຜູ້ທີ່ບໍ່ເຊື່ອໃນພຣະເຈົ້າ

ຄະນະກຳມະການວິຊາການ ປະຈຳສະມາຄົມບໍລິການເນື້ອຫາສາສະໜາອິສລາມໃນພາສາຕ່າງໆ

ແທ້ຈິງແລ້ວ ພວກເຮົາດຳລົງຊີວິດຢູ່ໃນຈັກກະວານທີ່ໜ້າອັດສະຈັນ, ເຊິ່ງຖືກຄວບຄຸມດ້ວຍກົດລະບຽບອັນລະອຽດຮັດກຸມ ທີ່ສະແດງໃຫ້ເຫັນເຖິງຄວາມສອດຄ່ອງກົມກຽວກັນຢ່າງໜ້າປະຫຼາດໃຈ, ແລະ ການຈັດລະບຽບຢ່າງຮັດກຸມ ແລະ ແມັ່ນຍຳ ທີ່ໜ້າຕື່ນຕາຕື່ນໃຈ.

ຍິ່ງມະນຸດລົງເລິກໃນການເຮັດຄວາມເຂົ້າໃຈກັບກົດເກນຂອງຈັກວານຫຼາຍເທົ່າໃດ, ກໍຍິ່ງເກີດມີຄຳຖາມທີ່ວິຊາຟີຊິກບໍ່ມີຄຳຕອບໃຫ້ວ່າ: ແຫຼ່ງທີ່ມາຂອງກົດເກນເຫຼົ່ານີ້ແມ່ນຫຍັງ? ແລະ ເປັນຫຍັງພວກມັນຈຶ່ງເກີດຂຶ້ນມາຕັ້ງແຕ່ຕົ້ນ?

ຂ້າພະເຈົ້າ ບໍ່ໄດ້ຂຽນເພື່ອໃຫ້ຄຳຕອບທີ່ເປັນຮູບສຳເລັດ; ແຕ່ເພື່ອແບ່ງປັນຄຳຖາມທີ່ສົມເຫດສົມຜົນ ເຊິ່ງສົມຄວນຈະຕັ້ງຂຶ້ນມາຮ່ວມກັບທ່ານ, ໂດຍບໍ່ຄຳນຶງເຖິງພູມຫຼັງທາງສາສະໜາ ຫຼື ແນວຄິດ.

ມັນສົມເຫດສົມຜົນແລ້ວບໍ ທີ່ກົດລະບຽບຈະກຳເນີດຂຶ້ນຈາກຄວາມວ່າງເປົ່າ? ທີ່ລະບົບລະບຽບຈະເກີດຂຶ້ນໂດຍປາສະຈາກຄວາມຕັ້ງໃຈ? ທີ່ຈິດສຳນຶກຈະກຳເນີດຂຶ້ນຈາກວັດຖຸທີ່ບໍ່ມີສະຕິປັນຍາ?

ໃຫ້ເຮົາເລີ່ມຈາກຈຸດເລີ່ມຕົ້ນ, ຈາກຄຳຖາມທີ່ຊັດເຈນທີ່ສຸດ ແລະ ເລິກເຊິ່ງທີ່ສຸດໃນຂະນະດຽວກັນ:

ຄວາມວ່າງເປົ່າສາມາດສ້າງສິ່ງໃດໜຶ່ງໄດ້ບໍ?

ມັນສົມເຫດສົມຜົນບໍທີ່ຈະກ່າວວ່າ: ແທ້ຈິງ ຈັກກະວານອັນສວຍງາມນີ້, ດ້ວຍລະບົບທີ່ລະອຽດຮັດກຸມນີ້, ແລະ ດ້ວຍຄວາມສອດຄ່ອງກົມກືນອັນສົມບູນລະຫວ່າງກົດເກນຕ່າງໆ ຂອງມັນ, ໄດ້ເກີດຂຶ້ນມາຈາກຄວາມວ່າງເປົ່າ, ແລະ ໂດຍປາສະຈາກສາເຫດໃດໆ?

ແທ້ຈິງແລ້ວ, ສະຕິປັນຍາອັນສົມບູນຂອງມະນຸດປະຕິເສດສິ່ງນີ້ຢ່າງສິ້ນເຊີງ; ເພາະໃນຊີວິດຂອງເຮົາ ເຮົາບໍ່ເຄີຍເຫັນສິ່ງໃດທີ່ເກີດຂຶ້ນມາຈາກຄວາມວ່າງເປົ່າ.

ຈົ່ງໄຕ່ຕອງເບິ່ງໂຕເຈົ້າເອງຮ່ວມກັບຂ້າພະເຈົ້າເຖີດ: ໃຜແມ່ນຜູ້ສ້າງໂຕເຈົ້າຈາກນ້ຳອະສຸຈິອັນຕ້ອຍຕ່ຳ, ແລະ ໄດ້ສ້າງຮູບຮ່າງເຈົ້າໃຫ້ເປັນມະນຸດທີ່ສາມາດໄດ້ຍິນ ແລະ ເບິ່ງເຫັນ?

ໃຜແມ່ນຜູ້ສ້າງຮ່າງກາຍຂອງເຈົ້າດ້ວຍຄວາມແມັ້ນຍຳຮັດກຸມນີ້, ແລະ ເຮັດໃຫ້ເຈົ້າມີຕາທີ່ແນມເຫັນ, ຫູທີ່ໄດ້ຍິນ, ແລະ ສະມອງປັນຍາທີ່ວິເຄາະ ແລະ ໄຕ່ຕອງ?

ແມ່ນໃຜຄືຜູ້ທີ່ປະທານປັດໄຈຍັງຊີບໃຫ້ແກ່ເຈົ້າ ຂະນະທີ່ເຈົ້າຢູ່ໃນຄັນຂອງມານດາ ໃນສະພາບທີ່ເຈົ້າອ່ອນແອ ແລະ ບໍ່ສາມາດຊ່ວຍເຫຼືອຕົນເອງໄດ້ເລີຍ, ຜູ້ຊົງໃຫ້ອາຫານແກ່ເຈົ້າຈາກເລືອດຂອງມານດາ, ແລະ ໄດ້ຈັດກຽມທຸກສິ່ງທີ່ເຈົ້າຕ້ອງການໄວ້ໃຫ້ແກ່ເຈົ້າ ເພື່ອໃຫ້ເຈົ້າເຕີບໂຕ ແລະ ອອກມາມີຊີວິດ?

ເຈົ້າໄດ້ເຮັດສິ່ງນັ້ນໃຫ້ກັບຕົວເຈົ້າເອງບໍ່? ຫຼື ທຳມະຊາດທີ່ປາສະຈາກຄວາມຮູ້ສຶກນຶກຄິດເປັນຜູ້ເຮັດມັນ?

ທຳມະຊາດນັ້ນບໍ່ມີສະຕິປັນຍາ, ບໍ່ມີຈຸດປະສົງ ແລະ ບໍ່ມີເຈດຈຳນົງ. ແລ້ວມັນຈະສ້າງລະບົບທີ່ຊັບຊ້ອນຍິ່ງກວ່າຄອມພິວເຕີທີ່ຍິ່ງໃຫຍ່ທີ່ສຸດໄດ້ແນວໃດ? ມັນຈະສ້າງຈິດສຳນຶກ, ການຮັບຮູ້ ແລະ ຄວາມຮູ້ສຶກຂຶ້ນມາໄດ້ແນວໃດ?

ເປັນໄປໄດ້ແນວໃດ ທີ່ທຳມະຊາດຈະໃສ່ຄວາມຮັກຕາມສັນຊາດຕະຍານຕໍ່ລູກໄວ້ໃນຈິດໃຈຂອງຜູ້ເປັນແມ່? ຫຼື ເຮັດໃຫ້ຈິດໃຈຂອງເຈົ້າຮູ້ສຶກຫົດຫູ່ເມື່ອເຫັນຄວາມອະຍຸດຕິທຳ, ແລະ ຮູ້ສຶກເບີກບານເມື່ອເຫັນຄວາມຍຸດຕິທຳ?

ໃຜເປັນຜູ້ປູກຝັງຄວາມປະເສີດອັນສູງສົ່ງເຫຼົ່ານີ້ໄວ້ໃນຕົວເຮົາ? ຄຸນຄ່າມາແຕ່ໃສ? ຈິດສຳນຶກມາແຕ່ໃສ?

ແທ້ຈິງແລ້ວ, ທຸກໆ ສິ່ງທີ່ຢູ່ອ້ອມຕົວທ່ານ ລ້ວນບົ່ງຊີ້ຢ່າງຊັດເຈນເຖິງການມີຢູ່ຂອງຜູ້ສ້າງ.

ຈົ່ງເບິ່ງທ້ອງຟ້າ: ແມ່ນໃຜເປັນຜູ້ຍົກມັນຂຶ້ນໂດຍປາສະຈາກເສົາຄ້ຳ?

ຈົ່ງເບິ່ງດວງອາທິດ: ໃຜແມ່ນຜູ້ກຳນົດເສັ້ນທາງຂອງມັນຢ່າງແມັ່ນຍຳທີ່ບໍ່ປ່ຽນແປງ?

ຈົ່ງເບິ່ງຫົວໃຈຂອງເຈົ້າ: ໃຜເປັນຜູ້ເຮັດໃຫ້ມັນເຕັ້ນໂດຍບໍ່ຕ້ອງຂໍອະນຸຍາດຈາກເຈົ້າ ຕະຫຼອດຊີວິດຂອງເຈົ້າ?

ທັງໝົດນີ້ ເກີດຂຶ້ນໂດຍຄວາມບັງເອິນແນວນັ້ນບໍ? ແລະ ຄວາມບັງເອິນຈະເກີດຂຶ້ນຊ້ຳແລ້ວຊ້ຳອີກເປັນພັນລ້ານໆ ຄັ້ງ ຢ່າງເປັນລະບົບລະບຽບເຊັ່ນນີ້ໄດ້ບໍ?

ເຈົ້າເຊື່ອບໍວ່າ ປຶ້ມທີ່ມີຄວາມລະອຽດ ແລະ ແມ່ນຍຳ ເຊັ່ນ: ວັດຈະນານຸກົມ ຫຼື ສາລານຸກົມວິທະຍາສາດ ຈະເກີດຂຶ້ນມາໂດຍຄວາມບັງເອິນ ຈາກການລະເບີດຂອງເຄື່ອງພິມ?

ສະນັ້ນ ທ່ານຈະເຊື່ອໄດ້ແນວໃດວ່າ ຈັກວານ ເຊິ່ງຍິ່ງໃຫຍ່ກວ່າໜັງສືທັງໝົດ ໄດ້ເກີດຂຶ້ນຈາກການລະເບີດທີ່ຕາບອດ?

ສາສະໜາອິສລາມບໍ່ໄດ້ຮຽກຮ້ອງໃຫ້ທ່ານປິດກັ້ນສະຕິປັນຍາຂອງທ່ານ; ແຕ່ສົ່ງເສີມໃຫ້ທ່ານນຳໃຊ້ມັນ, ພຣະອົງ ອັລລໍຫ໌ ຜູ້ຊົງສູງສົ່ງ ຊົງກ່າວໄວ້ໃນຄຳພີ ອັລກຸຣອານ ວ່າ: (...ຍັງມີຄວາມສົງໄສໃນ ອັລລໍຫ໌ ຜູ້ຊົງສ້າງບັນດາຊັ້ນຟ້າ ແລະ ແຜ່ນດິນ ອີກຫຼື?...) [ອິບຣໍຮີມ: 10].

ມັນເປັນໄປໄດ້ບໍທີ່ຈະສົງໄສການມີຢູ່ຂອງຜູ້ທີ່ສ້າງທຸກສິ່ງທຸກຢ່າງ?

ແລະ ຊົງກ່າວໄວ້ວ່າ: (ແລະ ໃນຕົວຂອງພວກເຈົ້າເອງ ພວກເຈົ້າບໍ່ເຫັນດອກຫຼື ) [ອັຊ-ຊາຣິຍາຕ: 21]

ນີ້ຄືການເຊີນຊວນແກ່ທ່ານ ເພື່ອໃຫ້ພິຈາລະນາໃນຮ່າງກາຍ ແລະ ຈິດວິນຍານຂອງທ່ານ, ເພື່ອຈະໄດ້ເຫັນຫຼັກຖານຢູ່ຕໍ່ໜ້າທ່ານ.

ຈາກນັ້ນ ຈົ່ງພິຈາລະນາເຖິງຄຳພີອັລກຸຣອານ ເຊິ່ງເປັນຄຳພີຈາກພຣະເຈົ້າເຫຼັ້ມສຸດທ້າຍທີ່ຖືກປະທານລົງມາ.

ຄຳພີທີ່ຖືກປະທານລົງມາຫຼາຍກວ່າ 1400 ປີ, ໄດ້ທ້າທາຍມວນມະນຸດໃຫ້ສ້າງສິ່ງທີ່ທຽບເທົ່າຂຶ້ນມາ, ແຕ່ພວກເຂົາກໍບໍ່ສາມາດເຮັດໄດ້.

ເປັນຄຳພີທີ່ໄດ້ຮວບຮວມເອົາທັງ ຄວາມເຊື່ອ, ບົດບັນຍັດ, ເລື່ອງລາວເຫດການຕ່າງໆ, ຄວາມຮູ້, ແລະ ພາສາ, ດ້ວຍສຳນວນທີ່ບໍ່ມີສິ່ງໃດທຽບເທົ່າ.

ບອກເລົ່າເຖິງປະຊາຊາດຕ່າງໆ ທີ່ສູນຫາຍໄປ, ເຫດການຕ່າງໆ ໃນອາດີດ, ແລະ ການຄົ້ນພົບຕ່າງໆ ທີ່ບໍ່ເຄີຍເປັນທີ່ຮູ້ຈັກຈົນກວ່າຫຼາຍສະຕະວັດຕໍ່ມາ ເຊັ່ນ: ການກຳເນີດຂອງທາລົກໃນຄັນ, ການກໍ່ຕົວຂອງກ້ອນເມກ, ຊັ້ນຕ່າງໆ ຂອງແຜ່ນດິນ, ແລະ ຄວາມແມັ່ນຍຳຂອງການໂຄຈອນຂອງດາວເຄາະຕ່າງໆ.

ຈາກນັ້ນ ຈົ່ງພິຈາລະນາເຖິງຊີວະປະຫວັດຂອງທ່ານນະບີ ມູຮຳມັດ (ຂໍຄວາມສັນຕິສຸກຈົ່ງມີແດ່ທ່ານ) .. ບຸລຸດຜູ້ໜຶ່ງທີ່ເຕີບໃຫຍ່ໃນທະເລຊາຍທີ່ຫ່າງໄກຈາກສູນກາງອະລິຍະທຳ, ທ່ານບໍ່ສາມາດອ່ານ ແລະ ຂຽນ, ທັງບໍ່ເຄີຍໄດ້ຮັບຄວາມຮູ້ຈາກມະນຸດຄົນໃດ, ແຕ່ທ່ານພັດໄດ້ນຳສະເໜີສານອັນເປັນອຳມະຕະໃຫ້ແກ່ມວນມະນຸດ ເຊິ່ງສ່ອງສະຫວ່າງແກ່ສະຕິປັນຍາ, ຂັດເກົາຈິດໃຈໃຫ້ບໍລິສຸດ ແລະ ສ້າງການປ່ຽນແປງອັນຍິ່ງໃຫຍ່ໃນເສັ້ນທາງແຫ່ງປະຫວັດສາດ.

ດ້ວຍຄຳດຳລັດທີ່ໄດ້ຖືກປະທານແກ່ທ່ານຢູ່ໃນຖ້ຳ, ທ່ານໄດ້ນຳພາມວນມະນຸດຈາກການເຄົາລົບບູຊາມະນຸດ ແລະ ກ້ອນຫີນ ໄປສູ່ການໃຫ້ເອກະພາບຕໍ່ພຣະຜູ້ສ້າງຈັກກະວານ, ແລະ ວາງຮາກຖານຄຸນຄ່າແຫ່ງຄວາມຍຸດຕິທຳ, ຄວາມເມດຕາ ແລະ ກຽດສັກສີ.

ພະລັງອັນໃດເລົ່າ ທີ່ປ່ຽນແປງໂລກ, ແລະ ສຳຜັດເຖິງຫົວໃຈ, ແລະ ສຽງສະທ້ອນຂອງມັນຍັງຄົງດັງກ້ອງກັງວານ ເຖິງແມ່ນວ່າເວລາຈະຜ່ານໄປຫຼາຍສະຕະວັດກໍ່ຕາມ?

ໂອ້ ຜູ້ທີ່ອ່ານຖ້ອຍຄຳເຫຼົ່ານີ້: ພຣະເຈົ້າຂອງທ່ານບໍ່ຕ້ອງການສິ່ງໃດຈາກທ່ານ, ແຕ່ທ່ານເອງຄືຜູ້ທີ່ຕ້ອງການພຣະອົງ.

ພຣະອົງໄດ້ສ້າງທ່ານ, ແລະ ລ້ຽງດູທ່ານ, ແລະ ປົກປັກຮັກສາທ່ານ, ແລະ ໃຫ້ເວລາແກ່ທ່ານ; ເພື່ອໃຫ້ທ່ານໄດ້ໄຕ່ຕອງ ແລະ ກັບຄືນມາ.

ພຣະອົງບໍ່ອະທັມຕໍ່ຜູ້ໃດ, ແລະ ໃຜກໍ່ຕາມທີ່ກັບຕົວມາຫາພຣະອົງດ້ວຍຄວາມຈິງໃຈ; ພຣະອົງຈະຊົງຕອບຮັບເຂົາ, ຊົງອະໄພໂທດໃຫ້ແກ່ເຂົາ, ແລະ ຊົງປ່ຽນບາບຂອງເຂົາໃຫ້ເປັນຄວາມດີ.

ຂ້ອຍບໍ່ໄດ້ບັງຄັບສິ່ງໃດຕໍ່ໂຕເຈົ້າ, ແຕ່ຂ້ອຍຂໍຮ້ອງໃຫ້ເຈົ້າມອບໂອກາດໃຫ້ຫົວໃຈຂອງເຈົ້າເພື່ອຄວາມສັດຈະທຽງແທ້.

ໃຫ້ປ່ອຍວາງຈາກຄວາມໂກດໂມໂຫ, ແລະ ຄວາມວຸ້ນວາຍພາຍໃນຈິດໃຈ, ແລ້ວຄິດໄຕ່ຕອງສັກຄູ່ໜຶ່ງ:

ຈະເປັນແນວໃດ ຫາກຂ້ອຍຜິດພາດ ?

ຈະເປັນແນວໃດ ຖ້າຫາກວ່າມີພຣະເຈົ້າ, ມີຊີວິດຫຼັງຄວາມຕາຍ, ແລະ ມີສະຫວັນ ແລະ ມີນະລົກ?

ເຮົາຈະເສຍໃຈບໍ ໃນເວລານັ້ນ, ເມື່ອການເສຍໃຈຈະບໍ່ອຳນວຍປະໂຫຍດຢັງ?

ຈົ່ງເລີ່ມກ້າວຢ່າງຈິງໃຈໄປສູ່ຄວາມຈິ່ງ, ແລະ ເລີ່ມຕົ້ນເສັ້ນທາງຂອງເຈົ້າພ້ອມກັບອັລ-ກຸຣອານ... ເພາະ ທ່ານອາດຈະພົບຄຳຕອບທີ່ເຄີຍຂາດຫາຍໄປໃນນັ້ນ, ແລະ ແສງສະຫວ່າງທີ່ເຈົ້າເຄີຍໂຫຍຫາ.

ການແປຄວາມໝາຍຂອງພຣະຄຳພີອັລກຸຣອານ.