Yon ti mesaj tou kout pou yon moun ki pa kwè nan Allah (yon ate)

Yon mesaj kout pou yon moun ki pa kwè nan Allah (yon ate)

Komite Syantifik nan Asosyasyon pou Sèvis sou Kontni Islamik nan plizyè Lang

Nap viv nan yon linivè ki estwòdinè, ki regle ak yon seri lwa ki tèlman egzak, yo montre yon amoni ki fò anpil ak yon lòd ki tèlman pafè sa fè moun sezi.

Plis yon moun fouye pi fon poul konprann lwa linivè yo, se plis gen yon keksyon ki parèt fizik pa gen repons pou li: Ki kote lwa sa yo soti? Epi poukisa yo egziste menm?

Mwen pa ekri poum ba ou yon repons ki tou pare; men se poum pataje avèk ou yon keksyon lojik ki merite poze, kèlkeswa kwayans relijye ou oswa fason ou panse.

Èske sa lojik pou lwa ta soti nan anyen? Pou yon lòd parèt san pa te gen yon entansyon dèyèl? Èske sa posib pou konsyans fèt nan yon matyè ki pa gen entèlijans?

Ann kòmanse nan kòmansman, ak keksyon ki pi klè a, men ki pi fon an tou anmenmtan.

Èske anyen ka kreye yon bagay?

Èske sa lojik pouw ta di: bèl linivè sa a, ak tout lòd egzak sa a, ak tout amoni pafè sa a ki gen ant lwa li yo, te parèt konsa san anyen pa kreyel epi san okenn rezon?

Yon lespri ki sen e ki nòmal rejte sa nèt; paske nan lavi nou, nou pa janm wè anyen ki parèt soti nan anyen.

Reflechi ansanm avèm sou tèt pa ou: Kiyès ki te kreyew ak yon ti gout dlo ki pa vo anyen, epi ki fòmew poul fèw tounen yon moun ki ka tande epi ki ka wè?

Kiyès ki kreye kò ou ak tout kalite detay sa yo, epi ki ba ou zye pou ou wè, zòrèy pou ou tande, ak yon lespri pou ou analize epi pou ou kalkile?

Kiyès ki te konn ba ou manje pandan ou te nan vant manman ou, lè ou pat gen okenn fòs ni okenn mwayen pou ou ede tèt ou? Kiyès ki te konn nouri ou ak san manman ou, epi ki te pare tout sa ou te bezwen pou ou te ka grandi epi vin parèt sou tè a?

Èske se ou menm ki te fè sa pou tèt ou? Osinon, èske se lanati ki bèbè e ki soud la ki te fèl?

Lanati pa gen lespri, li pa gen entansyon, ni li pa gen volonte. Kouman li ta ka kreye yon sistèm ki pi konplike pase pi gwo òdinatè ki egziste? Kouman li ta ka kreye konsyans, entèlijans ak santiman?

Kouman lanati ta ka fè mete yon renmen konsa nan kè yon manman pou pitit li? Osinon, kouman li ta ka fè kè ou sere lè ou wè lenjistis, epi pou kè ou kontan lè ou wè jistis ap fèt?

Kiyès ki plante bèl valè sa yo nan fon kè nou? Ki kote prensip sa yo soti? Ki kote konsyans nou soti?

Se sèten tout sa ki bò kote ou ap pwoklame egzistans Allah.

Gade syèl la: kiyès ki kenbel anlè a san okenn poto?

Gade solèy la: kiyès ki trase chemenl ak yon presizyon ki pa janm chanje?

Gade kè ou: kiyès ki fèl ap bat san li pa mande ou pèmisyon, pandan tout lavi ou?

Èske tout sa se chans ki fè yo la? Epi, èske chans ka repete menm bagay la plizyè milya fwa ak yon lòd konsa?

Èske ou ka kwè yon liv ki gen tout kalite enfòmasyon egzak ladanl, tankou yon diksyonè oswa yon gwo ansiklopedi syantifik, ta ka parèt konsa paske yon machin pou enprime eksploze?

Alò, kouman ou ka kwè linivè a, ki pi gran pase nenpòt liv, ta ka parèt konsa sèlman nan yon eksplozyon ki fèt konsa san konprann?

Relijyon Islam pa mande ou pou ou fèmen lespri ou; okontrè, li mande ou pou ou sèvi avèk li.Men sa Allah di nan Koran an: Èske moun ka gen dout sou Allah, li menm ki kreye syèl la ak tè a? [Ibrahim: 10].

Èske sa fè sans pou yon moun ta gen dout sou egzistans Sila a ki kreye tout bagay la?

Epi li di tou: Li nan pwòp tèt pa nou tou; èske nou pa wè sa? [Ad-Dariyat: 21]

Se yon envitasyon pou ou reflechi sou kò ou ak nanm ou, pou ou ka wè prèv la devan zye ou.

Apre sa, reflechi sou Koran an ki se dènye liv Allah te voye desann pou lèzòm.

Se yon liv ki te desann sa gen plis pase 1400 lane; li te lanse yon defi bay tout moun pou yo fè yon liv konsa, men yo pat janm kapab fè sa.

Se yon liv ki makonnen ansanm kwayans, lalwa, istwa, lasyans ak langaj, nan yon fòm ki pa gen parèy.

Li te rakonte istwa sou pèp ki te disparèt ak evènman ki te kache, epi li te pale sou dekouvèt moun vin konnen plizyè syèk apre sèlman. Tankou: kijan yon ti bebe fòme nan vant manmanl, kijan nwaj yo fòme, kouch ki gen nan tè a, ak fason planèt yo ap vire ak yon presizyon ki pa janm chanje.

Apre sa, reflechi sou lavi pwofèt Muhammad (ke lapè ak benediksyon Allah kouvri li)Yon moun ki te grandi nan yon dezè, byen lwen kote ki te gen gwo devlopman nan tan sa a. Li pat konn ni li ni ekri, epi li pat aprann konesans nan men okenn moun. Men, li te bay limanite yon mesaj kap la pou toutan, yon mesaj ki klere lespri moun, ki netwaye nanm yo, epi ki chanje tout istwa mond lan nèt.

Ak kèk pawòl li te resevwa nan yon kavèn(gwòt), li te rale limanite soti nan adore moun ak wòch poul mennen yo nan adore yon sèl Allah ki kreye linivè a, epi li te tabli valè tankou jistis, kòlè ak diyite.

Alò, ki kalite fòs sa a ye ki te chanje lemonn, ki te touche tout kè sa yo, epi ki kontinye ap fè eko jiska prezan malgre tout syèk sa yo ki pase?

Ou menm kap li pawòl sa yo: Senyè Kreyatè a pa bezwen anyen nan men ou, men se ou menm ki bezwen Li.

Se li ki te kreye ou, se Li kap ba ou manje, se Li kap pwoteje ou, epi li ba ou tan toujou pou ou ka reflechi epi pou ou tounen vin jwenn Li.

Li pa fè pyès moun lenjistis. Nenpòt moun ki tounen vin jwenn li ak tout kèl, lap akseptel, lap padonel, epi lap chanje tout move zak li yo poul fè yo tounen bèl aksyon.

Mwen pa fòse ou fè anyen, men mwen mande ou silvouplè, bay kè ou yon chans poul chèche laverite ak tout senserite.

Mande tèt ou pou ou mete kòlè ak tout bri kap fèt anndan ou yo sou kote, epi pran yon ti moman pou ou reflechi.

E sim ta nan erè vre ou E sim te trompe?

E si vrèman gen yon Bondye(Allah), si gen yon lavi apre lanmò, epi si gen yon paradi ak yon lanfè?

Èske ou pral regrèt lè sa a, nan yon moman kote regrèt pa sèvi anyen ankò?

Fè yon pa ak tout kè ou vè laverite, epi kòmanse vwayaj ou ak Koran an... Ou ka jwenn repons ou tap chèche yo ladanl, ak yon limyè ki te manke ou.

Esplikasyon sans pawòl Allah yo ki nan Koran an