Taƙaitaccen Saƙo Zuwa ga Mulhidi

Taƙaitaccen Saƙo Zuwa Ga Mulhidi

Kwamitin ilimi na Cibiyar Hidimar Bayanan Addinin Musulunci A Cikin Harsuna Daban Daban.

Lallai mu muna rayuwa a cikin wata duniya mai ban mamaki, wanda wasu ƙa'idoji masu inganci suke kiyaye ta, waɗanda suke bayyana wata jituwa mai ban al'ajabi, da kuma wani tsari na ƙwarewa wanda yake sa ɗimuwa.

Duk lokacin da mutum ya zurfafa a cikin fahimtar ƙa'idojin wannan duniyar; sai bayyanar wata tambaya ta ƙaru wadda ilimin Fiziyya bai mallaki amsarta ba: Mene ne tushen waɗannan ƙa'idojin? Kuma saboda me aka samar da su tun asali?

Bana rubutawa don in gabatar da wata amsa a shirye; sai dai don in yi tarayya da kai a wata tambaya ta manɗiƙi (hankali) wadda ta cancanci a gabatar da ita, ba tare da duba zuwa ga asalin addini ko tinani ba.

Shin yana daga mafurta ne ƙa'idoji su samo asali daga babu? Ko tsari ya samo asali ba tare da wani nufi ba? Ko a haifi wayewa daga wata maddar da ba ta da hankali?

Bari mu fara daga farko, daga tambaya mafi bayyana kuma mafi zurfi a wannnan lokacin:

Shin zai yuwu babu ya halicci wani abu?

Shin zai yiwu a hankalce a ce: Lallai wannan duniya mai ban mamaki, da wannan tsari mai kyau, da kuma wannan tsayayyar jituwa a tsakanin dokokinsa, ya samo asali ne daga babu, kuma ba tare da wani sababi ba?

Lallai hankalin ɗan adam kuɓutacce yana kore wannan gaba ɗaya; domin mu a cikin rayuwarmu ba ma ganin wani abu ya samu ne daga babu.

Kayi lura tare da ni game da kanka: Waye Ya halicce ka daga ɗigon maniyyi wulaƙantacce, kuma Ya daidaitaka a matsayin mutum mai ji da kuma gani?

Waye Ya halicci jikinka da wannan gwanintar, Ya kuma ba ka ido mai gani, da kunne mai ji, da hankali mai tantancewa da kuma tunani?

Wane ne wanda Yake azurtarka alhali kai kana cikin mahaifiyarka, ba tare da wani wayo ko dabaraba, Yake ciyar da kai daga jinin mahaifiyarka, kuma Yake tanadar maka dukkan abin da kake buƙata domin ka girma kuma ka fito zuwa ga rayuwa?

Shin kai ne ka yi wa kanka wannan? Ko kuma kurmar ɗabi'a ce ta yi shi?

Ɗabi'a ba ta da hankali, ko wata manufa, ko wani nufi. Ta yaya za ta samar da tsari mai rikitarwa fiye da mafi girman na'ura mai ƙwaƙwalwa? Ta yaya za ta halicci sanin kai, da fahimta, da kuma motsin rai?

Ta yaya zai yiwu ga ɗabi'a ta sanya soyayya ta asali a cikin zuciyar uwa ga ɗanta? Ko kuma ta sanya zuciyarka ta ƙuntata a yayin ganin zalunci, kuma ta yalwata a yayin ganin adalci?

Waye ya shuka mana waɗannan ma'anoni maɗaukaka? Daga ina ƙimomi suka zo? Daga ina lamiri ya zo?

Lallai ko wanne abu da ke kewayenka yana kururuwa akan samuwar Mahalicci.

Ka yi dubi zuwa ga sama: Wanene ya ɗaga ta ba tare da ginshiƙi ba?

Ka dubi rana: Wa ya ƙaddara hanyarta a cikin matuƙar tsari wanda ba ya canzawa?

Ka dubi zuwa zuciyarka: Waye Ya sanya ta take bugawa ba tare da izini daga gare ka ba, a tsawon rayuwarka?

Shin dukkan wannan yazo katsahan ne? Kuma shin bijirowar katsahan tana maimaita kanta sau biliyoyi a kan wannan tsari?

Shin za ka gaskata cewa wani littafi mai cikakken tsari kamar ƙamus ko bakandamiya ta ilimi, ya bayyana kawai kwatsam daga fashewar na'urar buga takardu?

To ta yaya zaka yi imani cewa kasantacce (halittu), alhalin ya fi dukkan littattafai girma, ya bayyana daga wata fashewa makauniya?

Musulunci ba ya kiranka dan ka watsar da hankalinka; bari dai yana kiranka ne dan ka yi amfani da shi. Allah - Maɗaukakin sarki - Yana cewa a cikin Alƙur'ani: {...Ashe, akwai shakka a cikin (sha'anin) Allah, Mai ƙãga halittar sammai da ƙasa...} [Ibrahim: 10].

Shin zai yuwu a hankalce ace a yi shakka a kan samuwar wanda Ya halicci kowane abu?

Kuma Yana cewa: {Kuma a cikin rãyukanku (akwai ãyõyi). To, bã zã ku dũbã ba? 21} [al-Zāriyāt: 21]

Kira ne a gare ka domin ka yi tunani a cikin jikinka da ruhinka, don ka ga dalili a gabanka.

Sannan ka lura a cikin Alƙur'ani mai girma a littattafan Allah na ƙarshe da aka saukar.

Littafi ne da ya sauka tun fiye da shekaru 1400 da suka gabata, ya ƙalubalanci bil'adama akan su zo da kwatankwacinsa, amma suka kāsa.

Littafi ne da ya tattara tsakanin aƙida, da shari'a, da ƙissoshi, da ilimi, da harshe, a tsari wanda babu irinsa.

Ya bayar da labari game da al-ummomin da suka shuɗe, da al'amuran da suka ɓuya, da abubuwan da aka gano waɗanda ba a san su ba sai bayan ɗaruruwan shekaru, kamar: Farkon halittar ɗan tayi, da samuwar girgije, da matakan ƙasa, da kuma tsananin daidaiton kewayawar taurari.

Sannan ka lura da Tarihin Annabi Muhammad - ﷺ - .. Mutum ne wanda ya taso a wata sahara mai nisa daga cibiyoyin wayewa, ba ya karatu kuma ba ya rubutu, kuma bai karɓi wani ilimi daga wani ɗan Adam ba, sai ga shi ya gabatar wa ɗan Adam wani saƙo mai wanzuwa, wanda yake haskaka hankula, kuma yake tsarkake rayuka, sannan ya haifar da wani gagarumin sauyi a cikin tafiyar tarihi.

Da kalmomin da suka sauka a gare shi a cikin kogo, ya fitar da al'umma daga bautar mutane da duwatsu zuwa ga tauhidin Mahaliccin talikai, da kafa ginshiƙan adalci da rahama da karamci.

To wane irin ƙarfi ne wannan wanda ya canja duniya, kuma ya taɓa zukata, kuma har yanzu amonsa yana ci gaba da ɗaukaka duk da shigewar ƙarnoni?"

Ya kai wanda kake karanta waɗannan kalmomin: Ubangijinka ba Ya buƙatuwa zuwa ga komai daga gare ka, amma kai ne wanda kake buƙatuwa zuwa gare Shi.

Shine Ya halicce ka, kuma Yana azurta ka, kuma Yana kiyaye ka, kuma Ya ba ka jinkiri; domin ka yi tunani kuma ka koma.

Shi ba Ya zaluntar kowa, kuma wanda ya koma zuwa gare Shi yana mai gaskiya, to Zai karɓe shi, kuma Ya gafarta masa, kuma Ya canza munanan ayyukansa zuwa kyawawa.

Lallai ni ba na tilasta maka wani abu, amma ina roƙonka ka ba zuciyarka dama domin gaskiya.

Ka raba kanka daga fushi, da kuma hayaniyar ciki, sannan ka yi tunani na ɗan lokaci:

Yaya idan na kasance mai kuskure?

Me zai faru idan da akwai Ubangiji, da rayuwa bayan mutuwa, da Aljannah da kuma Wuta?

Shin za ka yi nadama a lokacin, lokacin da nadama ba za ta yi amfani ba?

Ka ɗauki mataki na gaskiya zuwa ga haƙiƙa, kuma ka fara tafiyar ka tare da Alƙur'ani... to za ka iya samun amsoshi a cikin sa waɗanda suka ɓuya a gare ka, da kuma hasken da ka kasance kā rasa.

Fassarar ma'anonin Alƙur'ani mai girma.