الإسلام - نبذة موجزة عن الإسلام (مجردة من الأدلة)
ಪರಮ ದಯಾಮಯನೂ ಕರುಣಾನಿಧಿಯೂ ಆದ ಅಲ್ಲಾಹನ ನಾಮದಿಂದ ಇಸ್ಲಾಮ್ ಇಸ್ಲಾಮ್ ಧರ್ಮದ ಸಂಕ್ಷಿಪ್ತ ಸಂದೇಶ — ಪವಿತ್ರ ಕುರ್ಆನ್ ಮತ್ತು ಪ್ರವಾದಿ ಚರ್ಯೆಯಲ್ಲಿರುವಂತೆ (ಪುರಾವೆ ಸಾಕ್ಷ್ಯಾಧಾರಗಳಿಲ್ಲದ ಪ್ರತಿ)[1] [1] ಇದರಲ್ಲಿರುವ ಪ್ರತಿಯೊಂದು ವಿಷಯಕ್ಕೂ ಪವಿತ್ರ ಕುರ್ಆನ್ ಮತ್ತು ಪ್ರವಾದಿಯವರ ಸುನ್ನತ್ ನಿಂದ ಪುರಾವೆಗಳನ್ನು ಒಳಗೊಂಡಿರುವ ಈ ಪುಸ್ತಿಕೆಯ ಇನ್ನೊಂದು ಪ್ರತಿಯನ್ನು ಈ ಲಿಂಕ್ ಮೂಲಕ ಓದಬಹುದು: https://islamhouse.com/ar/books/2830071. ಇದು ಇಸ್ಲಾಮ್ ಧರ್ಮದ ಸಂಕ್ಷಿಪ್ತ ಪರಿಚಯವನ್ನು ಹೊಂದಿರುವ ಪ್ರಮುಖ ಸಂದೇಶವಾಗಿದೆ. ಇದು ಇಸ್ಲಾಮ್ ಧರ್ಮದ ಪ್ರಮುಖ ಮೂಲಾಧಾರಗಳು, ಬೋಧನೆಗಳು ಮತ್ತು ಸದ್ಗುಣಗಳನ್ನು ಅದರ ಮೂಲ ಆಧಾರ ಗ್ರಂಥಗಳಾದ ಪವಿತ್ರ ಕುರ್ಆನ್ ಮತ್ತು ಸುನ್ನತ್ (ಪ್ರವಾದಿಚರ್ಯೆ) ನಿಂದ ವಿವರಿಸುತ್ತದೆ. ಧರ್ಮವನ್ನು…
These files are generated automatically from the book's text; their layout may differ from the printed edition.
ಪರಮ ದಯಾಮಯನೂ ಕರುಣಾನಿಧಿಯೂ ಆದ ಅಲ್ಲಾಹನ ನಾಮದಿಂದ
ಇಸ್ಲಾಮ್
ಇಸ್ಲಾಮ್ ಧರ್ಮದ ಸಂಕ್ಷಿಪ್ತ ಸಂದೇಶ — ಪವಿತ್ರ ಕುರ್ಆನ್ ಮತ್ತು ಪ್ರವಾದಿ ಚರ್ಯೆಯಲ್ಲಿರುವಂತೆ
(ಪುರಾವೆ ಸಾಕ್ಷ್ಯಾಧಾರಗಳಿಲ್ಲದ ಪ್ರತಿ)[1] [1] ಇದರಲ್ಲಿರುವ ಪ್ರತಿಯೊಂದು ವಿಷಯಕ್ಕೂ ಪವಿತ್ರ ಕುರ್ಆನ್ ಮತ್ತು ಪ್ರವಾದಿಯವರ ಸುನ್ನತ್ ನಿಂದ ಪುರಾವೆಗಳನ್ನು ಒಳಗೊಂಡಿರುವ ಈ ಪುಸ್ತಿಕೆಯ ಇನ್ನೊಂದು ಪ್ರತಿಯನ್ನು ಈ ಲಿಂಕ್ ಮೂಲಕ ಓದಬಹುದು: https://islamhouse.com/ar/books/2830071.
ಇದು ಇಸ್ಲಾಮ್ ಧರ್ಮದ ಸಂಕ್ಷಿಪ್ತ ಪರಿಚಯವನ್ನು ಹೊಂದಿರುವ ಪ್ರಮುಖ ಸಂದೇಶವಾಗಿದೆ. ಇದು ಇಸ್ಲಾಮ್ ಧರ್ಮದ ಪ್ರಮುಖ ಮೂಲಾಧಾರಗಳು, ಬೋಧನೆಗಳು ಮತ್ತು ಸದ್ಗುಣಗಳನ್ನು ಅದರ ಮೂಲ ಆಧಾರ ಗ್ರಂಥಗಳಾದ ಪವಿತ್ರ ಕುರ್ಆನ್ ಮತ್ತು ಸುನ್ನತ್ (ಪ್ರವಾದಿಚರ್ಯೆ) ನಿಂದ ವಿವರಿಸುತ್ತದೆ. ಧರ್ಮವನ್ನು ಅನುಸರಿಸಿ ಜೀವಿಸಲು ಬದ್ಧರಾಗಿರುವ ಎಲ್ಲಾ ಮುಸ್ಲಿಮರು ಮತ್ತು ಮುಸ್ಲಿಮೇತರರಿಗೆ ಅವರದ್ದೇ ಭಾಷೆಯಲ್ಲಿ ವಿಭಿನ್ನ ಸಂದರ್ಭ ಹಾಗೂ ಸನ್ನಿವೇಶಗಳಿಗೆ ಅನುಗುಣವಾಗಿ ಎಲ್ಲಾ ಕಾಲ ಮತ್ತು ಸ್ಥಳಗಳಲ್ಲಿ ಈ ಸಂದೇಶವನ್ನು ನೀಡಲಾಗುತ್ತಿದೆ.
1. ಇಸ್ಲಾಮ್ ಧರ್ಮವು ಮಾನವಕುಲಕ್ಕಿರುವ ಅಲ್ಲಾಹನ ಸಂದೇಶವಾಗಿದೆ. ಅದು ಶಾಶ್ವತವಾದ ದೈವಿಕ ಸಂದೇಶವಾಗಿದೆ.
2- ಇಸ್ಲಾಮ್ ಧರ್ಮವು ಯಾವುದೇ ಒಂದು ಕುಲಕ್ಕೆ ಅಥವಾ ಜನತೆಗೆ ಸೀಮಿತವಾದ ಧರ್ಮವಲ್ಲ. ಬದಲಾಗಿ ಅದು ಸರ್ವ ಜನರಿಗಿರುವ ಅಲ್ಲಾಹನ ಧರ್ಮವಾಗಿದೆ:
3- ಇಸ್ಲಾಮ್ ಧರ್ಮವು ಗತ ಪ್ರವಾದಿಗಳು ಮತ್ತು ಸಂದೇಶವಾಹಕರು (ಅವರ ಮೇಲೆ ಅಲ್ಲಾಹನ ಶಾಂತಿ ಇರಲಿ) ತಮ್ಮ ಸಮುದಾಯಗಳಿಗೆ ಬೋಧಿಸಿದ ಸಂದೇಶಗಳನ್ನು ಪೂರ್ತಿಗೊಳಿಸುವುದಕ್ಕಾಗಿ ಬಂದ ದೈವಿಕ ಸಂದೇಶವಾಗಿದೆ.
4- ಎಲ್ಲಾ ಸಂದೇಶವಾಹಕರ ಧರ್ಮವು ಒಂದೇ ಆಗಿದೆ. ಆದರೆ ಅವರ ಧಾರ್ಮಿಕ ಶಾಸನಗಳು ವಿಭಿನ್ನವಾಗಿವೆ:
5-ನೂಹ್, ಇಬ್ರಾಹೀಮ್, ಮೂಸಾ, ಸುಲೈಮಾನ್, ದಾವೂದ್, ಈಸಾ (ಅಲೈಹಿಸ್ಸಲಾಮ್) ಮುಂತಾದ ಸಂದೇಶವಾಹಕರು ನೀಡಿದ ಕರೆಯಂತೆಯೇ, ಇಸ್ಲಾಮ್ ಧರ್ಮವು ಕೂಡ ಸರ್ವಲೋಕಗಳ ಪರಿಪಾಲಕನಾದ ಅಲ್ಲಾಹನ ಮೇಲಿನ ವಿಶ್ವಾಸಕ್ಕೆ ಆಹ್ವಾನಿಸುತ್ತದೆ. ಅವನೇ ಸೃಷ್ಟಿಕರ್ತ, ಅನ್ನದಾತ, ಜೀವ ಮತ್ತು ಮರಣ ನೀಡುವವನು, ಸಕಲ ಸಾಮ್ರಾಜ್ಯದ ಒಡೆಯ ಹಾಗೂ ಸಕಲ ಕಾರ್ಯಗಳ ನಿಯಂತ್ರಕ. ಆತನು ಅಪಾರ ದಯಾಮಯನು ಮತ್ತು ಅತ್ಯಂತ ಕರುಣಾಳುವಾಗಿದ್ದಾನೆ ಎಂಬ ವಿಶ್ವಾಸದೆಡೆಗೆ ಆಮಂತ್ರಿಸುತ್ತದೆ.
6- ಸರ್ವಶಕ್ತನಾದ ಅಲ್ಲಾಹನೇ ಸೃಷ್ಟಿಕರ್ತನು. ಆರಾಧನೆಗೆ ಅವನು ಮಾತ್ರ ಅರ್ಹನು. ಅವನೊಡನೆ ಇತರ ಯಾರನ್ನೂ ಆರಾಧಿಸುವಂತಿಲ್ಲ.
7- ಜಗತ್ತಿನಲ್ಲಿ ನಾವು ಕಾಣುತ್ತಿರುವ ಮತ್ತು ಕಾಣದೇ ಇರುವ ಎಲ್ಲದರ ಸೃಷ್ಟಿಕರ್ತ ಅಲ್ಲಾಹನಾಗಿದ್ದಾನೆ. ಅವನ ಹೊರತು ಇತರ ಎಲ್ಲವೂ ಅವನ ಸೃಷ್ಟಿಗಳಾಗಿವೆ. ಅಲ್ಲಾಹನು ಆರು ದಿನಗಳಲ್ಲಿ ಭೂಮಿ ಮತ್ತು ಆಕಾಶಗಳನ್ನು ಸೃಷ್ಟಿಸಿದನು.
8- ಸರ್ವಶಕ್ತನಾದ ಅಲ್ಲಾಹನಿಗೆ ಅವನ ಆಧಿಪತ್ಯದಲ್ಲಿ, ಅವನ ಸೃಷ್ಟಿಯಲ್ಲಿ, ಅವನ ಕಾರ್ಯನಿಯಂತ್ರಣದಲ್ಲಿ ಅಥವಾ ಅವನ ಆರಾಧನೆಯಲ್ಲಿ ಯಾವುದೇ ಭಾಗೀದಾರರಿಲ್ಲ.
9- ಪರಮ ಪಾವನನಾದ ಅಲ್ಲಾಹನು ಯಾರಿಂದಲೂ ಜನಿಸಿಲ್ಲ ಮತ್ತು ಯಾರಿಗೂ ಜನ್ಮ ನೀಡಿಲ್ಲ. ಅವನಿಗೆ ಸರಿಸಮಾನರಾಗಿ, ಸರಿಸಾಟಿಯಾಗಿ ಯಾರೂ ಇಲ್ಲ.
10- ಸರ್ವಶಕ್ತನಾದ ಅಲ್ಲಾಹನು ಯಾವ ವಸ್ತುವಿನಲ್ಲೂ ಅವತರಿಸುವುದಿಲ್ಲ. ಅವನ ಸೃಷ್ಟಿಯಲ್ಲಿ ಯಾವ ರೂಪದಲ್ಲೂ ಅವನು ಪ್ರತ್ಯಕ್ಷನಾಗುವುದಿಲ್ಲ.
11-ಸರ್ವಶಕ್ತನಾದ ಅಲ್ಲಾಹನು ತನ್ನ ದಾಸರ ಮೇಲೆ ಅತ್ಯಂತ ದಯಾಮಯನೂ, ಅಪಾರ ಕರುಣಾಳುವೂ ಆಗಿದ್ದಾನೆ. ಈ ಕಾರಣದಿಂದಲೇ ಅವನು ಸಂದೇಶವಾಹಕರನ್ನು ಕಳುಹಿಸಿದನು ಮತ್ತು ದಿವ್ಯಗ್ರಂಥಗಳನ್ನು ಅವತೀರ್ಣಗೊಳಿಸಿದನು.
12- ಅಲ್ಲಾಹನು ಮಹಾ ಕರುಣಾಮಯಿಯಾದ ಪ್ರಭು. ಪುನರುತ್ಥಾನದ ದಿನದಂದು ಎಲ್ಲಾ ಸೃಷ್ಟಿಗಳನ್ನು ಸಮಾಧಿಗಳಿಂದ ಎಬ್ಬಿಸಿದಾಗ, ಅವನೇ ಪ್ರತಿಯೊಬ್ಬರ ವಿಚಾರಣೆ ನಡೆಸುವನು. ನಂತರ ಅವರ ಒಳಿತು ಮತ್ತು ಕೆಡುಕುಗಳಿಗೆ ತಕ್ಕಂತೆ ಪ್ರತಿಫಲವನ್ನು ನೀಡುವನು. ಸತ್ಯವಿಶ್ವಾಸವಿಟ್ಟು ಸತ್ಕರ್ಮಗಳನ್ನು ಮಾಡುವವರಿಗೆ ಶಾಶ್ವತ ಸ್ವರ್ಗೋದ್ಯಾನಗಳಿವೆ; ಆದರೆ ಸತ್ಯವಿಶ್ವಾಸವನ್ನು ನಿರಾಕರಿಸಿ ಕೆಡುಕು ಮಾಡುವವರಿಗೆ ಪರಲೋಕದಲ್ಲಿ ಕಠಿಣ ಶಿಕ್ಷೆಯಿದೆ.
13- ಸರ್ವಶಕ್ತನಾದ ಅಲ್ಲಾಹನು ಆದಮರನ್ನು ಮಣ್ಣಿನಿಂದ ಸೃಷ್ಟಿಸಿದನು ಮತ್ತು ಅವರ ಮೂಲಕ ಮಾನವ ಸಂತತಿಯು ಅಭಿವೃದ್ಧಿಯಾಗುವಂತೆ ಮಾಡಿದನು. ಆದ್ದರಿಂದ ಮೂಲತಃ ಎಲ್ಲಾ ಮಾನವರು ಸಮಾನರು. ಧರ್ಮನಿಷ್ಠೆಯನ್ನು ಹೊರತಾಗಿ ಯಾವುದೇ ಒಂದು ವರ್ಗಕ್ಕೆ ಇನ್ನೊಂದು ವರ್ಗಕ್ಕಿಂತ ಅಥವಾ ಯಾವುದೇ ಒಂದು ಜನತೆಗೆ ಇನ್ನೊಂದು ಜನತೆಗಿಂತ ಶ್ರೇಷ್ಠತೆಯಿಲ್ಲ.
14- ಪ್ರತಿಯೊಂದು ಮಗುವೂ ಪ್ರಕೃತಿಯಲ್ಲೇ ಹುಟ್ಟುತ್ತದೆ.
15- ಮನುಷ್ಯರಲ್ಲಿ ಯಾರು ತಪ್ಪು ಮಾಡುವವನಾಗಿ ಅಥವಾ ಇತರರ ತಪ್ಪಿಗೆ ಹೊಣೆಗಾರನಾಗಿ ಹುಟ್ಟುವುದಿಲ್ಲ:
16- ಮನುಷ್ಯರನ್ನು ಸೃಷ್ಟಿಸಿದ ಪರಮೋಚ್ಛ ಉದ್ದೇಶ: ಅಲ್ಲಾಹನನ್ನು ಮಾತ್ರ ಆರಾಧಿಸುವುದಾಗಿದೆ:
17- ಇಸ್ಲಾಂ ಧರ್ಮವು ಮನುಷ್ಯನನ್ನು -ಸ್ತ್ರೀ ಪುರುಷರನ್ನು- ಗೌರವಿಸಿದೆ. ಅವನ ಎಲ್ಲಾ ಹಕ್ಕುಗಳ ಸಂಪೂರ್ಣ ಹೊಣೆಯನ್ನು ವಹಿಸಿಕೊಂಡಿದೆ. ಅವನ ಎಲ್ಲಾ ಆಯ್ಕೆಗಳು, ಕೆಲಸಗಳು ಮತ್ತು ವ್ಯವಹಾರಗಳಿಗೆ ಅವನನ್ನು ಜವಾಬ್ದಾರನನ್ನಾಗಿ ಮಾಡಿದೆ. ತನಗೆ ಹಾನಿ ಮಾಡುವ ಅಥವಾ ಇತರರಿಗೆ ಹಾನಿ ಮಾಡುವ ಯಾವುದೇ ಕಾರ್ಯಕ್ಕೆ ಅವನನ್ನು ಹೊಣೆಗಾರನನ್ನಾಗಿ ಮಾಡುತ್ತದೆ.
18- ಹೊಣೆಗಾರಿಕೆ, ಶಿಕ್ಷೆ ಮತ್ತು ಪ್ರತಿಫಲದ ವಿಷಯದಲ್ಲಿ ಸ್ತ್ರೀ-ಪುರುಷರನ್ನು ಸಮಾನರನ್ನಾಗಿ ಮಾಡಿದ್ದಾನೆ.
19. ಇಸ್ಲಾಮ್ ಧರ್ಮವು ಮಹಿಳೆಯನ್ನು ಗೌರವಿಸುತ್ತದೆ. ಮಹಿಳೆಯರನ್ನು ಪುರುಷರ ಸಮಾನಾರ್ಧವೆಂದು ಪರಿಗಣಿಸುತ್ತದೆ. ಪುರುಷನು ಸಾಮರ್ಥ್ಯವುಳ್ಳವನಾಗಿದ್ದರೆ ಖರ್ಚು ಮಾಡುವುದನ್ನು ಅವನಿಗೆ ಕಡ್ಡಾಯಗೊಳಿಸುತ್ತದೆ. ಮಗಳ ಖರ್ಚು-ವೆಚ್ಚಗಳನ್ನು ತಂದೆ ಭರಿಸುವುದು, ತಾಯಿಯ ಖರ್ಚು-ವೆಚ್ಚಗಳನ್ನು ಮಗನು, ಅವನು ಪ್ರೌಢನಾಗಿದ್ದರೆ, ಭರಿಸುವುದು ಮತ್ತು ಹೆಂಡತಿಯ ಖರ್ಚು-ವೆಚ್ಚಗಳನ್ನು ಗಂಡ ಭರಿಸುವುದು ಕಡ್ಡಾಯವಾಗಿದೆ.
20- ಮರಣ ಎಂದರೆ ಶಾಶ್ವತ ವಿನಾಶವಲ್ಲ. ಬದಲಾಗಿ ಅದು ಕರ್ಮಭೂಮಿಯಿಂದ ಪ್ರತಿಫಲದ ಭೂಮಿಗೆ ಸಾಗುವುದಾಗಿದೆ. ಮರಣವು ದೇಹ ಮತ್ತು ಆತ್ಮವನ್ನು ಒಳಗೊಂಡಿದೆ. ಆತ್ಮದ ಮರಣ ಎಂದರೆ ಆತ್ಮವು ದೇಹದಿಂದ ಬೇರ್ಪಟ್ಟು ಪುನರುತ್ಥಾನದ ದಿನದಂದು ಪುನರ್ಜೀವಗೊಳ್ಳುವಾಗ ದೇಹಕ್ಕೆ ಮರಳುತ್ತದೆ. ಮರಣದ ನಂತರ ಆತ್ಮವು ಮತ್ತೊಂದು ದೇಹಕ್ಕೆ ಸಾಗುವುದಿಲ್ಲ. ಅಥವಾ ಇನ್ನೊಂದು ದೇಹದ ಆತ್ಮವಾಗಿ ಮಾರ್ಪಡುವುದಿಲ್ಲ.
21- ಇಸ್ಲಾಂ ಧರ್ಮವು ಸತ್ಯವಿಶ್ವಾಸದ ಪ್ರಮುಖ ಮೂಲಭೂತ ತತ್ವಗಳ ಮೇಲೆ ವಿಶ್ವಾಸವಿಡಬೇಕೆಂದು ಆಹ್ವಾನಿಸುತ್ತದೆ. ಅವು ಅಲ್ಲಾಹನಲ್ಲಿ ವಿಶ್ವಾಸವಿಡುವುದು, ಅವನ ಮಲಕ್ಗಳಲ್ಲಿ (ದೇವಚರರು) ವಿಶ್ವಾಸವಿಡುವುದು, ವಿರೂಪಗೊಳ್ಳುವುದಕ್ಕೆ ಮುಂಚಿನ ಸ್ಥಿತಿಯಲ್ಲಿದ್ದ ತೌರಾತ್, ಇಂಜೀಲ್ ಮತ್ತು ಝಬೂರ್ ಮುಂತಾದ ದೈವಿಕ ಗ್ರಂಥಗಳಲ್ಲಿ ವಿಶ್ವಾಸವಿಡುವುದು, ಕುರ್ಆನ್ನಲ್ಲಿ ವಿಶ್ವಾಸವಿಡುವುದು, ಎಲ್ಲಾ ಪ್ರವಾದಿಗಳು ಮತ್ತು ಸಂದೇಶವಾಹಕರಲ್ಲಿ ವಿಶ್ವಾಸವಿಡುವುದು, ಅವರಲ್ಲಿ ಕೊನೆಯವರಾದ ಅಂದರೆ ಪ್ರವಾದಿಗಳಲ್ಲಿ ಮತ್ತು ಸಂದೇಶವಾಹಕರಲ್ಲಿ ಅಂತಿಮರಾದ ಪ್ರವಾದಿ ಮುಹಮ್ಮದ್ರಲ್ಲಿ ವಿಶ್ವಾಸವಿಡುವುದು ಮತ್ತು ಅಂತ್ಯದಿನದಲ್ಲಿ ವಿಶ್ವಾಸವಿಡುವುದು. ಇಹಲೋಕದಲ್ಲೇ ಎಲ್ಲವೂ ಕೊನೆಗೊಳ್ಳುವುದಾಗಿದ್ದರೆ ನಮ್ಮ ಜೀವನ ಮತ್ತು ಅಸ್ತಿತ್ವವೆಲ್ಲವೂ ಅಸಂಬದ್ಧವಾಗಿರುತ್ತಿತ್ತು ಎಂದು ನಮಗೆ ತಿಳಿದಿದೆ. ಅದೇ ರೀತಿ ವಿಧಿ ಮತ್ತು ನಿರ್ಣಯದಲ್ಲಿ ವಿಶ್ವಾಸವಿಡುವುದು.
22. ಸಂದೇಶವಾಹಕರು عليهم السلام ಅಲ್ಲಾಹನ ವತಿಯ ಸಂದೇಶಗಳನ್ನು ತಲುಪಿಸುವ ವಿಷಯದಲ್ಲಿ ಪ್ರಮಾದಮುಕ್ತರಾಗಿದ್ದಾರೆ. ಬುದ್ಧಿಗೆ ವಿರುದ್ಧವಾದ ಅಥವಾ ಆರೋಗ್ಯಪೂರ್ಣವಾದ ಗುಣಗಳನ್ನು ತಿರಸ್ಕರಿಸುವ ವಿಷಯಗಳಿಂದ ದೋಷಮುಕ್ತರಾಗಿದ್ದಾರೆ. ಅಲ್ಲಾಹನ ದಾಸರಿಗೆ ಅವನ ಆಜ್ಞೆಗಳನ್ನು ತಲುಪಿಸುವ ಹೊಣೆಯನ್ನು ಸಂದೇಶವಾಹಕರಿಗೆ ವಹಿಸಿಕೊಡಲಾಗಿದೆ. ಅಲ್ಲಾಹನ ರುಬೂಬಿಯ್ಯತ್ (ಪ್ರಭುತ್ವ) ಅಥವಾ ಉಲೂಹಿಯ್ಯತ್ (ಆರಾಧನೆ)ನ ವಿಶೇಷತೆಗಳಲ್ಲಿ ಸಂದೇಶವಾಹಕರಿಗೆ ಯಾವ ಪಾಲಿಲ್ಲ. ಬದಲಾಗಿ ಅವರು ಇತರೆಲ್ಲಾ ಮನುಷ್ಯರಂತೆ ಮನುಷ್ಯರಾಗಿದ್ದಾರೆ. ಅಲ್ಲಾಹನು ತನ್ನ ಸಂದೇಶಗಳನ್ನು ಅವರಿಗೆ ಅವತೀರ್ಣಗೊಳಿಸುತ್ತಾನೆ.
23- ಇಸ್ಲಾಂ ಧರ್ಮವು ಆರಾಧನೆಯ ಮಹಾ ಮೂಲತತ್ವಗಳೊಂದಿಗೆ ಅಲ್ಲಾಹನನ್ನು ಮಾತ್ರ ಆರಾಧಿಸಲು ಕರೆ ನೀಡುತ್ತದೆ. ಅವು: 1. ನಮಾಝ್. ಅದು ಕಿಯಾಮ್ (ನಿಂತುಕೊಳ್ಳುವುದು), ರುಕೂ (ಬಾಗುವುದು), ಸುಜೂದ್(ಸಾಷ್ಟಾಂಗವೆರಗುವುದು), ಅಲ್ಲಾಹನ ಸ್ಮರಣೆ ಮತ್ತು ಪ್ರಶಂಸೆ ಹಾಗೂ ಪ್ರಾರ್ಥನೆಗಳನ್ನು ಒಳಗೊಂಡಿದೆ. ಒಬ್ಬ ವ್ಯಕ್ತಿ ದಿನಕ್ಕೆ ಐದು ಬಾರಿ ಅದನ್ನು ನಿರ್ವಹಿಸುತ್ತಾನೆ. ಅದರಲ್ಲಿ ಎಲ್ಲಾ ತರಹದ ಭೇದ-ಭಾವಗಳು ನಿವಾರಣೆಯಾಗುತ್ತವೆ. ಶ್ರೀಮಂತರು, ಬಡವರು, ಮುಖಂಡರು, ಅನುಯಾಯಿಗಳು ಎಲ್ಲರೂ ನಮಾಜಿನಲ್ಲಿ ಒಂದೇ ಸಾಲಿನಲ್ಲಿ ನಿಲ್ಲುತ್ತಾರೆ. 2. ಝಕಾತ್. ಅದು ಸಂಪತ್ತಿನ ಒಂದು ಸಣ್ಣ ಮೊತ್ತವಾಗಿದ್ದು, ಕೆಲವು ಷರತ್ತುಗಳು ಮತ್ತು ಅಲ್ಲಾಹನ ಆಜ್ಞೆಯ ಕೆಲವು ನಿರ್ಣಯಗಳಿಗೆ ಅನುಗುಣವಾಗಿ, ಶ್ರೀಮಂತರ ಸಂಪತ್ತಿನಲ್ಲಿ ಕಡ್ಡಾಯಗೊಳಿಸಲಾಗಿದೆ. ಅದನ್ನು ಬಡವರು ಮುಂತಾದವರಿಗೆ ಹಂಚಲಾಗುತ್ತದೆ. ಅದನ್ನು ವರ್ಷಕ್ಕೊಮ್ಮೆ ನೀಡಬೇಕಾಗಿದೆ. 3. ಉಪವಾಸ. ಅದು ರಮದಾನ್ ತಿಂಗಳಿನ ಹಗಲಿನಲ್ಲಿ ಉಪವಾಸವನ್ನು ಅಸಿಂಧುಗೊಳಿಸುವ ಕಾರ್ಯಗಳಿಂದ ತನ್ನನ್ನು ತಡೆದುಕೊಳ್ಳುವುದಾಗಿದೆ. ಅದು ಮನಸ್ಸಿನಲ್ಲಿ ಇಚ್ಛಾಶಕ್ತಿ ಮತ್ತು ಸಹನೆಯನ್ನು ಬೆಳೆಸುತ್ತದೆ. 4. ಹಜ್ಜ್ : ಅದು ಸಾಮರ್ಥ್ಯವಿದ್ದವನಿಗೆ ಜೀವಮಾನದಲ್ಲಿ ಒಂದು ಬಾರಿ ಮಕ್ಕಾ ಮುಕರ್ರಮದಲ್ಲಿರುವ ಅಲ್ಲಾಹನ ಭವನದ ಕಡೆ ಯಾತ್ರೆ ಕೈಗೊಳ್ಳುವುದಾಗಿದೆ. ಈ ಹಜ್ಜ್ ಯಾತ್ರೆಯಲ್ಲಿ ಸೃಷ್ಟಿಕರ್ತನ ಕಡೆಗೆ ತಿರುಗುವಲ್ಲಿ ಎಲ್ಲರೂ ಸಮಾನರಾಗಿದ್ದಾರೆ. ಅದರಲ್ಲಿ ಎಲ್ಲಾ ರೀತಿಯ ಬೇಧ-ಭಾವಗಳು ಮತ್ತು ಸಂಬಂಧಗಳು ನಿವಾರಣೆಯಾಗುತ್ತವೆ.
24- ಇಸ್ಲಾಮಿನ ಆರಾಧನಾ ಕ್ರಮಗಳ ಒಂದು ದೊಡ್ಡ ವಿಶೇಷತೆಯೇನೆಂದರೆ ಅವುಗಳ ವಿಧಾನ, ಸಮಯ ಮತ್ತು ಷರತ್ತುಗಳನ್ನು ಸರ್ವಶಕ್ತನಾದ ಅಲ್ಲಾಹನೇ ನಿಯಮಿಸಿದ್ದಾನೆ ಮತ್ತು ಅವುಗಳನ್ನು ಪ್ರವಾದಿ صلي الله عليه وسلم ರವರು ತಲುಪಿಸಿಕೊಟ್ಟಿದ್ದಾರೆ. ಇಂದಿನವರೆಗೂ ಮಾನವರು ಅದರಲ್ಲಿ ಯಾವುದೇ ಸೇರ್ಪಡೆ ಅಥವಾ ಕಡಿತ ಮಾಡುವ ಮೂಲಕ ಹಸ್ತಕ್ಷೇಪ ಮಾಡಿಲ್ಲ. ಎಲ್ಲಾ ಪ್ರವಾದಿಗಳು عليهم السلام ಈ ಮಹಾ ಆರಾಧನೆಗಳ ಕಡೆಗೆ ಆಹ್ವಾನಿಸಿದ್ದಾರೆ.
25- ಅಬ್ದುಲ್ಲಾರ ಮಗ ಮುಹಮ್ಮದ್ ಇಸ್ಲಾಮಿನ ಸಂದೇಶವಾಹಕರು. ಇವರು ಇಸ್ಮಾಈಲ್ ಬಿನ್ ಇಬ್ರಾಹೀಮರ ಸಂತಾನದಲ್ಲಿ ಸೇರಿದವರು. ಇವರು ಕ್ರಿ.ಶ. 571 ರಲ್ಲಿ ಮಕ್ಕಾ ನಗರದಲ್ಲಿ ಜನಿಸಿದರು ಮತ್ತು ಅಲ್ಲೇ ಪ್ರವಾದಿಯಾಗಿ ನಿಯೋಗಿಸಲ್ಪಟ್ಟರು. ನಂತರ ಅವರು ಮದೀನಾಕ್ಕೆ ವಲಸೆ ಹೋದರು. ವಿಗ್ರಹಾರಾಧನೆಯಲ್ಲಿ ಅವರು ತಮ್ಮ ಜನತೆಯೊಡನೆ ಸಹಕರಿಸಲಿಲ್ಲ. ಆದರೆ ಅವರು ದೊಡ್ಡ ದೊಡ್ಡ ಕಾರ್ಯಗಳಲ್ಲಿ ತಮ್ಮ ಜನತೆಯೊಂದಿಗೆ ಸಹಕರಿಸುತ್ತಿದ್ದರು. ಅವರು ಪ್ರವಾದಿಯಾಗುವ ಮುಂಚಿನಿಂದಲೇ ಅತ್ಯುತ್ತಮ ಸ್ವಭಾವದವರಾಗಿದ್ದರು. ಜನರು ಅವರನ್ನು "ಅಲ್-ಅಮೀನ್” (ಪ್ರಾಮಾಣಿಕ) ಎಂದು ಕರೆಯುತ್ತಿದ್ದರು. ಅವರಿಗೆ 40 ವರ್ಷ ಪ್ರಾಯವಾದಾಗ, ಅಲ್ಲಾಹನು ಅವರನ್ನು ಪ್ರವಾದಿಯನ್ನಾಗಿ ನಿಯೋಗಿಸಿದನು ಮತ್ತು ದೊಡ್ಡ ದೊಡ್ಡ ದೃಷ್ಟಾಂತಗಳೊಂದಿಗೆ [ಪವಾಡಗಳು] ಅವರನ್ನು ಬೆಂಬಲಿಸಿದನು. ಅವುಗಳಲ್ಲಿ ಅತಿದೊಡ್ಡದು ಪವಿತ್ರ ಕುರ್ಆನ್. ಅದು ಪ್ರವಾದಿಗಳಿಗೆ ನೀಡಲ್ಪಟ್ಟ ದೃಷ್ಟಾಂತಗಳಲ್ಲೇ ಅತಿದೊಡ್ಡದಾಗಿದ್ದು, ಪ್ರವಾದಿಗಳಿಗೆ ನೀಡಲಾದ ದೃಷ್ಟಾಂತಗಳಲ್ಲಿ ಇಂದಿನ ತನಕ ಬಾಕಿಯುಳಿದ ದೃಷ್ಟಾಂತವಾಗಿದೆ. ಅಲ್ಲಾಹನು ಪ್ರವಾದಿಯವರಿಗೆ ಧರ್ಮವನ್ನು ಪೂರ್ತೀಕರಿಸಿ ಕೊಟ್ಟು, ಪ್ರವಾದಿ صلي الله عليه وسلم ರವರು ಸಂಪೂರ್ಣ ಜವಾಬ್ದಾರಿಯೊಂದಿಗೆ ಆ ಧರ್ಮವನ್ನು (ಜನರಿಗೆ) ತಲುಪಿಸಿದ ನಂತರ ತಮ್ಮ 63ನೇ ವಯಸ್ಸಿನಲ್ಲಿ ನಿಧನರಾದರು. ಅವರನ್ನು ಮದೀನಾ ನಗರದಲ್ಲಿ ದಫನ ಮಾಡಲಾಯಿತು. ಪ್ರವಾದಿ ಮುಹಮ್ಮದ್ صلي الله عليه وسلم ರವರು ಎಲ್ಲಾ ಪ್ರವಾದಿಗಳು ಮತ್ತು ಸಂದೇಶವಾಹಕರಲ್ಲಿ ಕಟ್ಟಕಡೆಯವರಾಗಿದ್ದಾರೆ. ಅಲ್ಲಾಹನು ಅವರನ್ನು ಸನ್ಮಾರ್ಗ ಮತ್ತು ಸತ್ಯಧರ್ಮದೊಂದಿಗೆ ಕಳುಹಿಸಿದನು. ಜನರನ್ನು ಬಹುದೇವರಾಧನೆ, ಸತ್ಯನಿಷೇಧ ಮತ್ತು ಅಜ್ಞಾನಗಳೆಂಬ ಕಾರ್ಗತ್ತಲೆಗಳಿಂದ ಏಕದೇವತ್ವ ಮತ್ತು ಸತ್ಯವಿಶ್ವಾಸವೆಂಬ ಬೆಳಕಿನ ಕಡೆಗೆ ಹೊರತರುವುದಕ್ಕಾಗಿ (ಅವರನ್ನು ಕಳುಹಿಸಲಾಗಿದೆ). ಅಲ್ಲಾಹನು ಅವರನ್ನು ಅವನ ಆಜ್ಞೆಯಿಂದ ಅವನೆಡೆಗೆ ಆಹ್ವಾನಿಸುವವರನ್ನಾಗಿ ಮಾಡಿ ಕಳುಹಿಸಿದ್ದಾನೆಂದು ಸಾಕ್ಷಿ ನೀಡಿದ್ದಾನೆ.
26- ಪ್ರವಾದಿ ಮುಹಮ್ಮದ್ صلي الله عليه وسلم ರವರು ತಂದ ಇಸ್ಲಾಮಿನ ಷರೀಅತ್ ದೈವಿಕ ಸಂದೇಶಗಳ ಪೈಕಿ ಮತ್ತು ದೈವಿಕ ಷರೀಯತ್ ಗಳ ಪೈಕಿ ಕಟ್ಟಕಡೆಯದ್ದಾಗಿದೆ. ಅದು ಪರಿಪೂರ್ಣ ಷರೀಅತ್ ಆಗಿದೆ. ಜನರ ಧಾರ್ಮಿಕ ಮತ್ತು ಐಹಿಕ ಒಳಿತು ಅದರಲ್ಲಿ ಅಡಗಿದೆ. ಅದು ಜನರ ಧರ್ಮ, ಅವರ ರಕ್ತ, ಅವರ ಸಂಪತ್ತು, ಅವರ ಬುದ್ಧಿ ಮತ್ತು ಅವರ ಸಂತತಿಗಳನ್ನು ಮೊದಲನೇ ಸ್ಥಾನದಲ್ಲಿಟ್ಟು ಸಂರಕ್ಷಿಸುತ್ತದೆ. ಹಿಂದಿನ ಷರೀಅತ್ಗಳು ಒಂದು ಇನ್ನೊಂದನ್ನು ರದ್ದುಗೊಳಿಸಿದಂತೆ, ಅದು (ಇಸ್ಲಾಂ) ಹಿಂದಿನ ಎಲ್ಲಾ ಷರೀಅತ್ಗಳನ್ನು ರದ್ದುಗೊಳಿಸುತ್ತದೆ.
27- ಸರ್ವಶಕ್ತನಾದ ಅಲ್ಲಾಹನು ಪ್ರವಾದಿ ಮುಹಮ್ಮದ್ صلي الله عليه وسلم ರವರು ತಂದ ಇಸ್ಲಾಮ್ ಧರ್ಮವನ್ನು ಹೊರತುಪಡಿಸಿ ಬೇರೆ ಯಾವ ಧರ್ಮವನ್ನೂ ಸ್ವೀಕರಿಸುವುದಿಲ್ಲ. ಯಾರಾದರೂ ಇಸ್ಲಾಮ್ ಧರ್ಮವನ್ನು ಹೊರತುಪಡಿಸಿ ಬೇರೆ ಯಾವುದಾದರೂ ಧರ್ಮವನ್ನು ಸ್ವೀಕರಿಸಿದರೆ ಅವನಿಂದ ಅದನ್ನು ಎಂದಿಗೂ ಸ್ವೀಕರಿಸಲಾಗುವುದಿಲ್ಲ.
28- ಪವಿತ್ರ ಕುರ್ಆನ್ ಅಲ್ಲಾಹನು ಪ್ರವಾದಿ ಮುಹಮ್ಮದ್ صلي الله عليه وسلم ರಿಗೆ ಅವತೀರ್ಣಗೊಳಿಸಿದ ಗ್ರಂಥವಾಗಿದೆ. ಅದು ಸರ್ವ ಲೋಕಗಳ ಪರಿಪಾಲಕ ಪ್ರಭುವಿನ ವಚನವಾಗಿದೆ. ಅದರಂತಿರುವ ಒಂದು ಗ್ರಂಥವನ್ನು, ಅಥವಾ ಅದರಂತಿರುವ ಒಂದು ಅಧ್ಯಾಯವನ್ನು ರಚಿಸಿ ತರಲು ಅಲ್ಲಾಹನು ಮನುಷ್ಯರಲ್ಲಿ ಮತ್ತು ಜಿನ್ನ್ಗಳಿಗೆ ಸವಾಲು ಹಾಕಿದ್ದಾನೆ. ಈ ಸವಾಲು ಇಂದು ಕೂಡ ಅಸ್ತಿತ್ವದಲ್ಲಿದೆ. ಮಿಲಿಯನ್ಗಟ್ಟಲೆ ಜನರನ್ನು ದಿಗ್ಭ್ರಮೆಗೊಳಿಸುವ ಪ್ರಮುಖ ಪ್ರಶ್ನೆಗಳಿಗೆ ಪವಿತ್ರ ಕುರ್ಆನ್ ಉತ್ತರಿಸುತ್ತದೆ. ಪವಿತ್ರ ಕುರ್ಆನನ್ನು ಅದು ಅವತೀರ್ಣಗೊಂಡ ಅರಬೀ ಭಾಷೆಯಲ್ಲಿ ಇಂದಿನವರೆಗೂ ಸಂರಕ್ಷಿಸಲಾಗಿದೆ. ಅದರಿಂದ ಒಂದು ಅಕ್ಷರವೂ ಕಳೆದುಹೋಗಿಲ್ಲ. ಅದನ್ನು ಮುದ್ರಿಸಲಾಗುತ್ತದೆ ಹಾಗೂ ಪ್ರಕಟಿಸಲಾಗುತ್ತದೆ. ಅದೊಂದು ಅದ್ಭುತ ಪವಾಡವಾಗಿದ್ದು, ಓದಲಿಕ್ಕೆ ಅಥವಾ ಅದರ ಅರ್ಥಾನುವಾದವನ್ನು ಓದಲಿಕ್ಕೆ ಯೋಗ್ಯವಾದ ಗ್ರಂಥವಾಗಿದೆ. ಇದೇ ರೀತಿ ಪ್ರವಾದಿ ಮುಹಮ್ಮದ್ صلي الله عليه وسلم ರವರ ವಚನ ಮತ್ತು ಅವರ ಬೋಧನೆ ಹಾಗೂ ಚರಿತ್ರೆ ವಿಶ್ವಾಸಾರ್ಹ ವರದಿಗಾರರ ಸರಪಳಿಯ ಪ್ರಕಾರ ಸಂರಕ್ಷಿಸಲಾಗಿದೆ ಮತ್ತು ವರ್ಗಾಯಿಸಲಾಗಿದೆ. ಅದು ಪ್ರವಾದಿ ಮುಹಮ್ಮದ್ صلي الله عليه وسلم ರವರು ಮಾತನಾಡಿದ ಅರಬೀ ಭಾಷೆಯಲ್ಲೇ ಮುದ್ರಿಸಲಾಗಿವೆ. ಅದನ್ನು ಹಲವಾರು ಭಾಷೆಗಳಲ್ಲಿ ಅನುವಾದಿಸಲಾಗಿದೆ. ಪವಿತ್ರ ಕುರ್ಆನ್ ಮತ್ತು ಪ್ರವಾದಿರವರ ವಚನಗಳು ಇಸ್ಲಾಮಿನ ನಿಯಮಗಳ ಮತ್ತು ಅದರ ಧರ್ಮಶಾಸ್ತ್ರದ ಏಕೈಕ ಮೂಲವಾಗಿದೆ. ಇಸ್ಲಾಮ್ ಧರ್ಮವು ಅದರೊಂದಿಗೆ ಸಂಬಂಧವಿರುವ ಜನರ ನಡವಳಿಕೆಯಿಂದ ಸ್ವೀಕರಿಸುವಂತದ್ದಲ್ಲ. ಬದಲಿಗೆ ಅದು ಅಲ್ಲಾಹನ ದಿವ್ಯಸಂದೇಶದಿಂದ — ಪವಿತ್ರ ಕುರ್ಆನ್ ಮತ್ತು ಪ್ರವಾದಿರವರ ಸುನ್ನತ್ತಿನಿಂದ — ಸ್ವೀಕರಿಸುವಂತದ್ದಾಗಿದೆ.
29- ಇಸ್ಲಾಮ್ ಧರ್ಮವು ಮಾತಾಪಿತರೊಂದಿಗೆ ಸದ್ವರ್ತನೆಯಿಂದ ವರ್ತಿಸಬೇಕೆಂದು ಆಜ್ಞೆ ನೀಡುತ್ತದೆ. ಅವರು ಮುಸ್ಲಿಮೇತರರಾದರೂ ಸರಿ. ಅದೇ ರೀತಿ ಮಕ್ಕಳೊಂದಿಗೂ ಉತ್ತಮ ರೀತಿಯಿಂದ ವರ್ತಿಸಬೇಕೆಂದು ಆದೇಶಿಸುತ್ತದೆ.
30- ಇಸ್ಲಾಮ್ ಧರ್ಮವು ಶತ್ರುಗಳೊಂದಿಗೂ ಮಾತು ಮತ್ತು ವ್ಯವಹಾರದಲ್ಲಿ ನ್ಯಾಯ ಪಾಲಿಸಬೇಕೆಂದು ಆದೇಶಿಸುತ್ತದೆ.
31- ಇಸ್ಲಾಮ್ ಧರ್ಮವು ಎಲ್ಲಾ ಸೃಷ್ಟಿಗಳೊಂದಿಗೆ ಸದ್ವರ್ತನೆಯಿಂದ ವರ್ತಿಸಬೇಕೆಂದು ಆದೇಶಿಸುತ್ತದೆ. ಅತ್ಯುತ್ತಮ ಸ್ವಭಾವಗಳನ್ನು ಅಳವಡಿಸಿಕೊಳ್ಳಬೇಕೆಂದು ಮತ್ತು ಒಳ್ಳೆಯ ಕಾರ್ಯಗಳನ್ನು ಮಾಡಬೇಕೆಂದು ಆಹ್ವಾನಿಸುತ್ತದೆ.
32- ಇಸ್ಲಾಮ್ ಧರ್ಮವು ಸತ್ಯ, ಪ್ರಾಮಾಣಿಕತೆ, ಗುಣಶೀಲತೆ, ಸಭ್ಯತೆ, ಧೈರ್ಯ, ಔದಾರ್ಯ, ಉದಾರತನ, ನಿರ್ಗತಿಕರಿಗೆ ಸಹಾಯ ಮಾಡುವುದು, ದುಃಖಿತರಿಗೆ ನೆರವು ನೀಡುವುದು, ಹಸಿದವರಿಗೆ ಆಹಾರ ನೀಡುವುದು, ನೆರೆಹೊರೆಯವರೊಂದಿಗೆ ಸದ್ವರ್ತನೆ ತೋರುವುದು, ಸಂಬಂಧಗಳನ್ನು ಜೋಡಿಸುವುದು, ಪ್ರಾಣಿಗಳ ಮೇಲೆ ದಯೆ ತೋರುವುದು ಮುಂತಾದ ಸ್ತುತ್ಯರ್ಹ ಗುಣಸ್ವಭಾವಗಳನ್ನು ಅಳವಡಿಸಿಕೊಳ್ಳಲು ಆದೇಶಿಸುತ್ತದೆ.
33- ಇಸ್ಲಾಮ್ ಧರ್ಮವು ಆಹಾರ ಮತ್ತು ಪಾನೀಯಗಳಲ್ಲಿ ಉತ್ತಮ ವಸ್ತುಗಳನ್ನು ಧರ್ಮಸಮ್ಮತಗೊಳಿಸಿದೆ. ಹೃದಯ, ದೇಹ ಮತ್ತು ಮನೆಯನ್ನು ಸ್ವಚ್ಛಗೊಳಿಸಬೇಕೆಂದು ಆದೇಶಿಸುತ್ತದೆ. ಈ ಕಾರಣದಿಂದಲೇ ಇಸ್ಲಾಮ್ ಧರ್ಮವು ವಿವಾಹವನ್ನು ಧರ್ಮಸಮ್ಮತಗೊಳಿಸಿದೆ. ಪ್ರವಾದಿಗಳು عليهم السلام ಇದನ್ನು ಆದೇಶಿಸಿದ್ದಾರೆ. ಅವರು ಪ್ರತಿಯೊಂದು ಉತ್ತಮ ಕಾರ್ಯವನ್ನು ಆದೇಶಿಸುತ್ತಿದ್ದರು.
34- ಅಲ್ಲಾಹನೊಂದಿಗೆ ಸಹಭಾಗಿತ್ವ (ಶಿರ್ಕ್), ಸತ್ಯ ನಿಷೇಧ (ಕುಫ್ರ್), ವಿಗ್ರಹಾರಾಧನೆ, ಅರಿವಿಲ್ಲದೆ ಅಲ್ಲಾಹನ ಬಗ್ಗೆ ಹೇಳುವುದು, ಮಕ್ಕಳನ್ನು ಕೊಲ್ಲುವುದು, ಪವಿತ್ರ ಜೀವವನ್ನು ಕೊಲ್ಲುವುದು, ಭೂಮಿಯಲ್ಲಿ ಕ್ಷೋಭೆಯನ್ನುಂಟುಮಾಡುವುದು, ಮಾಟ ಮಂತ್ರ, ಪ್ರತ್ಯಕ್ಷವಾಗಿರುವ ಮತ್ತು ಪರೋಕ್ಷವಾಗಿರುವ ನೀಚಕೃತ್ಯಗಳು, ವ್ಯಭಿಚಾರ, ಸಲಿಂಗರತಿ ಮುಂತಾದ ನಿಷಿದ್ಧಗಳ ಮೂಲಗಳನ್ನೇ ಇಸ್ಲಾಂ ಧರ್ಮವು ನಿಷೇಧಿಸಿದೆ. ಅದೇ ರೀತಿ ಬಡ್ಡಿ ತಿನ್ನುವುದನ್ನು, ಸತ್ತ ಪ್ರಾಣಿಗಳನ್ನು ತಿನ್ನುವುದನ್ನು, ವಿಗ್ರಹಗಳಿಗೆ ಮತ್ತು ಮೂರ್ತಿಗಳಿಗೆ ಬಲಿಯರ್ಪಿಸಲಾಗಿರುವುದನ್ನು ತಿನ್ನುವುದನ್ನು ಇಸ್ಲಾಂ ಧರ್ಮವು ನಿಷೇಧಿಸಿದೆ. ಹಂದಿಮಾಂಸ, ಮತ್ತು ಎಲ್ಲಾ ರೀತಿಯ ಹೊಲಸುಗಳನ್ನು ನಿಷೇಧಿಸಿದೆ. ಅನಾಥರ ಸಂಪತ್ತನ್ನು ಕಬಳಿಸುವುದನ್ನು, ಅಳತೆ ಮತ್ತು ತೂಕದಲ್ಲಿ ಮೋಸ ಮಾಡುವುದನ್ನು, ಮತ್ತು ಸಂಬಂಧಗಳನ್ನು ಕಡಿಯುವುದನ್ನು ಇಸ್ಲಾಮ್ ಧರ್ಮವು ನಿಷೇಧಿಸಿದೆ. ಇವೆಲ್ಲವೂ ನಿಷಿದ್ಧವಾಗಿವೆ ಎಂಬ ವಿಷಯದಲ್ಲಿ ಎಲ್ಲಾ ಪ್ರವಾದಿಗಳು عليهم السلام ಏಕಾಭಿಪ್ರಾಯವನ್ನು ಹೊಂದಿದ್ದಾರೆ.
35-ಇಸ್ಲಾಮ್ ಧರ್ಮವು ಸುಳ್ಳು, ವಂಚನೆ, ದ್ರೋಹ, ಮೋಸ, ಕಾಪಟ್ಯ, ಅಸೂಯೆ, ಕುತಂತ್ರ, ಕಳ್ಳತನ, ಅತಿಕ್ರಮ ಮತ್ತು ಅನ್ಯಾಯದಂತಹ ಕೆಟ್ಟ ಸ್ವಭಾವಗಳನ್ನು ವಿರೋಧಿಸುತ್ತದೆ ಮತ್ತು ಎಲ್ಲಾ ರೀತಿಯ ಕೆಟ್ಟ ಗುಣಗಳನ್ನು ನಿಷೇಧಿಸುತ್ತದೆ.
36- ಬಡ್ಡಿ ಅಥವಾ ಯಾರಿಗಾದರೂ ಹಾನಿ, ವಂಚನೆ, ಅನ್ಯಾಯ ಅಥವಾ ಮೋಸವನ್ನು ಒಳಗೊಂಡಿರುವ, ಅಥವಾ ವಿಪತ್ತುಗಳಿಗೆ ಕಾರಣವಾಗುವ ಮತ್ತು ಸಮಾಜಕ್ಕೆ, ಸಮುದಾಯಕ್ಕೆ ಹಾಗೂ ವ್ಯಕ್ತಿಗಳಿಗೆ ಸಾಮಾನ್ಯವಾಗಿ ಹಾನಿ ಉಂಟುಮಾಡುವ ಎಲ್ಲಾ ಆರ್ಥಿಕ ವ್ಯವಹಾರಗಳನ್ನು ಇಸ್ಲಾಮ್ ವಿರೋಧಿಸುತ್ತದೆ.
37- ಇಸ್ಲಾಮ್ ಧರ್ಮವು ಬುದ್ಧಿಯನ್ನು ಸಂರಕ್ಷಿಸುತ್ತದೆ ಮತ್ತು ಅದನ್ನು ಹಾನಿಗೊಳಿಸುವ ಮದ್ಯ ಮುಂತಾದ ಎಲ್ಲವನ್ನೂ ನಿಷೇಧಿಸುತ್ತದೆ. ಇಸ್ಲಾಮ್ ಧರ್ಮವು ಬುದ್ಧಿಯ ಮಹಿಮೆಯನ್ನು ಉತ್ತುಂಗಕ್ಕೇರಿಸಿ ಅದನ್ನು ಶರಿಯತ್ತಿನ ಎಲ್ಲಾ ಹೊಣೆಗಾರಿಕೆಯ ಆಧಾರವನ್ನಾಗಿ ಮಾಡಿದೆ. ಅದನ್ನು ಮೂಢನಂಬಿಕೆ ಮತ್ತು ವಿಗ್ರಹಾರಾಧನೆಯ ಸಂಕೋಲೆಗಳಿಂದ ಮುಕ್ತಗೊಳಿಸಿದೆ. ಇಸ್ಲಾಮ್ ಧರ್ಮದಲ್ಲಿ ಒಂದು ವರ್ಗಕ್ಕೆ ಮಾತ್ರ ಸೀಮಿತವಾದ ಯಾವುದೇ ನಿಯಮಗಳು ಮತ್ತು ರಹಸ್ಯಗಳಿಲ್ಲ. ಇಸ್ಲಾಂ ಧರ್ಮದ ಎಲ್ಲಾ ಆದೇಶಗಳು ಮತ್ತು ಕಾನೂನುಗಳು ಬುದ್ಧಿಗೆ ನಿಲುಕುವಂತದ್ದಾಗಿವೆ. ಅವು ನ್ಯಾಯ ಹಾಗೂ ಯುಕ್ತಿಯ ಬೇಡಿಕೆಗಳಿಗೆ ಅನುಗುಣವಾಗಿವೆ.
38- ಮಿಥ್ಯ ಧರ್ಮಗಳ ಅನುಯಾಯಿಗಳು ತಮ್ಮ ಧರ್ಮಗಳಲ್ಲಿ ಕಂಡುಬರುವ ವಿರೋಧಾಭಾಸಗಳು ಮತ್ತು ಬುದ್ಧಿಯು ತಿರಸ್ಕರಿಸುವ ವಿಷಯಗಳನ್ನು ಆಳವಾಗಿ ಅಧ್ಯಯನ ಮಾಡುವುದಿಲ್ಲ. ಏಕೆಂದರೆ ಧರ್ಮದ ಮುಖಂಡರು ಧರ್ಮವು ಬುದ್ಧಿ ಮತ್ತು ವಿವೇಚನವನ್ನು ಮೀರಿದೆ ಮತ್ತು ಧರ್ಮವನ್ನು ಅರ್ಥ ಮಾಡಿಕೊಳ್ಳುವುದರಲ್ಲಿ ಬುದ್ಧಿಗೆ ಯಾವುದೇ ಸ್ಥಾನವಿಲ್ಲ ಎನ್ನುತ್ತಾರೆ. ಆದುದರಿಂದ ಇಸ್ಲಾಮ್ ಬುದ್ಧಿಗೆ ಅದರ ಮಾರ್ಗವನ್ನು ಬೆಳಗಿಸುವ ಪ್ರಕಾಶದ ರೂಪದಲ್ಲಿ ಧರ್ಮವನ್ನು ಕಾಣುತ್ತದೆ. ಮಿಥ್ಯ ಧರ್ಮಗಳ ಮುಖಂಡರು ಮನುಷ್ಯನು ತನ್ನ ಬುದ್ಧಿಯನ್ನು ಉಪಯೋಗಿಸುವುದನ್ನು ತೊರೆದು ಕೇವಲ ಅವರನ್ನು ಅನುಸರಿಸಬೇಕೆಂದು ಬಯಸುತ್ತಾರೆ. ಆದರೆ ಇಸ್ಲಾಮ್ ಮನುಷ್ಯನು ತನ್ನ ಬುದ್ಧಿಯನ್ನು ಜಾಗೃತಗೊಳಿಸಿ ವಿಷಯಗಳ ವಾಸ್ತವಾಂಶಗಳನ್ನು ಅದರ ನಿಜವಾದ ರೂಪದಲ್ಲಿ ನೋಡಬೇಕೆಂದು ಬಯಸುತ್ತದೆ.
39- ಇಸ್ಲಾಮ್ ಧರ್ಮವು ಸರಿಯಾದ ಜ್ಞಾನವನ್ನು ಗೌರವಿಸುತ್ತದೆ ಮತ್ತು ದೆಹೇಚ್ಛೆಗಳಿಲ್ಲದ ವೈಜ್ಞಾನಿಕ ಸಂಶೋಧನೆಯನ್ನು ಪ್ರೇರೇಪಿಸುತ್ತದೆ. ನಮ್ಮ ದೇಹದ ಬಗ್ಗೆ ಮತ್ತು ನಮ್ಮ ಸುತ್ತಮುತ್ತಲ ಜಗತ್ತಿನ ಬಗ್ಗೆ ಆಲೋಚಿಸಲು ಆಹ್ವಾನಿಸುತ್ತದೆ. ಸರಿಯಾದ ವೈಜ್ಞಾನಿಕ ಸಂಶೋಧನೆಯ ಫಲಿತಾಂಶಗಳು ಇಸ್ಲಾಮ್ ಧರ್ಮದೊಂದಿಗೆ ಸಂಘರ್ಷಿಸುವುದಿಲ್ಲ.
40- ಅಲ್ಲಾಹನ ಮೇಲೆ ವಿಶ್ವಾಸವಿಟ್ಟು ಅವನಿಗೆ ವಿಧೇಯನಾಗಿ ಜೀವಿಸಿದ ಮತ್ತು ಅವನ ಸಂದೇಶವಾಹಕರನ್ನು ಧೃಡೀಕರಿಸಿದ ವ್ಯಕ್ತಿಯ ಸತ್ಕರ್ಮಗಳನ್ನು ಮಾತ್ರ ಅಲ್ಲಾಹನು ಸ್ವೀಕರಿಸುತ್ತಾನೆ ಮತ್ತು ಪರಲೋಕದಲ್ಲಿ ಅದರ ಪ್ರತಿಫಲವನ್ನು ನೀಡುತ್ತಾನೆ. ಅಲ್ಲಾಹನು ಧರ್ಮದಲ್ಲಿ ಸೇರಿಸಿದ ಆರಾಧನೆಗಳನ್ನು ಮಾತ್ರ ಅವನು ಸ್ವೀಕರಿಸುತ್ತಾನೆ. ಒಬ್ಬ ವ್ಯಕ್ತಿ ಅಲ್ಲಾಹನನ್ನು ನಿಷೇಧಿಸುತ್ತಾ ಅವನಿಂದ ಪ್ರತಿಫಲವನ್ನು ನಿರೀಕ್ಷಿಸಲು ಹೇಗೆ ಸಾಧ್ಯ? ಒಬ್ಬ ವ್ಯಕ್ತಿ ಎಲ್ಲಾ ಪ್ರವಾದಿಗಳು ಮತ್ತು ಪ್ರವಾದಿ ಮುಹಮ್ಮದ್ صلي الله عليه وسلم ರವರ ಪ್ರವಾದಿತ್ವದ ಮೇಲೆ ಸತ್ಯವಿಶ್ವಾಸವಿರಿಸಿದಾಗ ಮಾತ್ರ ಅಲ್ಲಾಹನು ಅವನ ವಿಶ್ವಾಸವನ್ನು ಸ್ವೀಕರಿಸುತ್ತಾನೆ.
41- ಸತ್ಯಧರ್ಮವು ಮನುಷ್ಯನಲ್ಲಿ ನೆಲೆನಿಂತು ಅವನು ಸರ್ವ ಲೋಕಗಳ ಸೃಷ್ಟಿಕರ್ತನಾದ ಅಲ್ಲಾಹನ ನೈಜ ದಾಸನಾಗುವುದು ಮತ್ತು ಅವನನ್ನು ಮನುಷ್ಯರ, ಭೌತಿಕತೆಯ ಹಾಗೂ ಅಂಧವಿಶ್ವಾಸಗಳ ದಾಸ್ಯದಿಂದ ಸ್ವತಂತ್ರಗೊಳಿಸುವುದು ಎಲ್ಲಾ ದೈವಿಕ ಸಂದೇಶಗಳ ಗುರಿಯಾಗಿದೆ. ಇಸ್ಲಾಮ್ ಧರ್ಮದಲ್ಲಿ - ನೀವು ಈಗಾಗಲೇ ನೋಡಿದಂತೆ - ವ್ಯಕ್ತಿಗಳನ್ನು ಪವಿತ್ರಗೊಳಿಸುವುದಾಗಲಿ, ಅವರನ್ನು ಅವರ ಸ್ಥಾನಮಾನಕ್ಕಿಂತ ಮೇಲಕ್ಕೇರಿಸುವುದಾಗಲಿ, ಅಥವಾ ಅವರನ್ನು ಪ್ರಭುಗಳು ಮತ್ತು ದೇವರುಗಳನ್ನಾಗಿ ಮಾಡುವುದಾಗಲಿ ಇಲ್ಲ.
42- ಅಲ್ಲಾಹನು ಇಸ್ಲಾಮಿನಲ್ಲಿ ಪಶ್ಚಾತ್ತಾಪವನ್ನು ನಿರ್ದೇಶಿಸಿದ್ದಾನೆ. ಪಶ್ಚಾತ್ತಾಪವೆಂದರೆ: ಒಬ್ಬ ವ್ಯಕ್ತಿಯು ತನ್ನ ಪ್ರಭುವಿನೆಡೆಗೆ ಮರಳುವುದು ಮತ್ತು ಪಾಪವನ್ನು ತ್ಯಜಿಸುವುದಾಗಿದೆ. ಇಸ್ಲಾಮ್ ಸ್ವೀಕರಿಸುವುದರಿಂದ ಹಿಂದಿನ ಎಲ್ಲಾ ಪಾಪಗಳು ನಾಶವಾಗುತ್ತವೆ. ಪಶ್ಚಾತ್ತಾಪವು ಹಿಂದಿನ ಎಲ್ಲಾ ಪಾಪಗಳನ್ನು ತೊಳೆದುಬಿಡುತ್ತದೆ. ಆದ್ದರಿಂದ ಯಾವುದೇ ಮನುಷ್ಯನಿಗೆ ಇನ್ನೊಬ್ಬನ ಮುಂದೆ ತನ್ನ ಪಾಪಗಳನ್ನು ಒಪ್ಪಿಕೊಳ್ಳುವ ಅವಶ್ಯಕತೆ ಇಲ್ಲ.
43- ಇಸ್ಲಾಮಿನಲ್ಲಿ, ಮನುಷ್ಯ ಮತ್ತು ಅಲ್ಲಾಹನ ನಡುವೆ ನೇರ ಸಂಬಂಧವಿದೆ. ಆದುದರಿಂದ ನಿಮ್ಮ ಮತ್ತು ಅಲ್ಲಾಹನ ಮಧ್ಯೆ ಮಧ್ಯವರ್ತಿಯಾಗಿ ಯಾವುದೇ ವ್ಯಕ್ತಿಯ ಅಗತ್ಯವಿಲ್ಲ. ಮನುಷ್ಯರನ್ನು ದೇವರನ್ನಾಗಿ ಮಾಡಿಕೊಳ್ಳುವುದನ್ನು ಅಥವಾ ಅಲ್ಲಾಹನಿಗೆ ಅವನ ರುಬೂಬಿಯ್ಯತ್ತಿನಲ್ಲಿ (ಪ್ರಭುತ್ವದಲ್ಲಿ) ಅಥವಾ ಉಲೂಹಿಯ್ಯತ್ತಿನಲ್ಲಿ(ಆರಾಧನಾರ್ಹತೆಯಲ್ಲಿ) ಸಹಭಾಗಿಗಳನ್ನಾಗಿ ಮಾಡುವುದನ್ನು ಇಸ್ಲಾಂ ಕಟ್ಟುನಿಟ್ಟಾಗಿ ವಿರೋಧಿಸುತ್ತದೆ.
44- ಈ ಪ್ರಬಂಧದ ಕೊನೆಯಲ್ಲಿ ನಾನು ಹೇಳುವುದೇನೆಂದರೆ: ಜನರು ಕಾಲ, ರಾಷ್ಟ್ರೀಯತೆ ಮತ್ತು ನಾಗರಿಕತೆಗಳಲ್ಲಿ ವಿಂಗಡಣೆಯಾಗಿದ್ದಾರೆ. ಮಾತ್ರವಲ್ಲ, ಇಡೀ ಮಾನವ ಸಮಾಜವು ಆಲೋಚನೆಗಳು ಮತ್ತು ಉದ್ದೇಶಗಳಲ್ಲಿ ವಿಭಿನ್ನವಾಗಿದೆ. ಪರಿಸರ ಮತ್ತು ಕೆಲಸ-ಕಾರ್ಯಗಳಲ್ಲಿ ಬೇರೆ ಬೇರೆಯಾಗಿದೆ. ಅವರೆಲ್ಲರಿಗೂ ಒಬ್ಬ ಮಾರ್ಗದರ್ಶಕನ, ಅವರನ್ನು ಒಟ್ಟುಗೂಡಿಸುವ ಒಂದು ವ್ಯವಸ್ಥೆಯ, ಅವರನ್ನು ಕಾಪಾಡುವ ಒಬ್ಬ ಆಡಳಿತಗಾರನ ಅಗತ್ಯವಿದೆ. ಗೌರವಾನ್ವಿತ ಪ್ರವಾದಿಗಳು ಈ ಕರ್ತವ್ಯವನ್ನು ಅಲ್ಲಾಹನ ವತಿಯಿಂದ ಬಂದ ದಿವ್ಯ ವಾಣಿಯ ಬೆಳಕಿನಲ್ಲಿ ನಿರ್ವಹಿಸುತ್ತಿದ್ದರು. ಅವರು ಜನರಿಗೆ ಸರಿಯಾದ ಹಾಗೂ ನೇರ ಮಾರ್ಗವನ್ನು ತೋರಿಸುತ್ತಿದ್ದರು. ಅವರನ್ನು ಅಲ್ಲಾಹನ ನಿಯಮದ ಆಧಾರದಲ್ಲಿ ಒಟ್ಟುಗೂಡಿಸುತ್ತಿದ್ದರು ಮತ್ತು ಅವರ ಮಧ್ಯೆ ಸತ್ಯದೊಂದಿಗೆ ತೀರ್ಪು ನೀಡುತ್ತಿದ್ದರು. ಜನರು ಈ ಪ್ರವಾದಿಗಳು ಮತ್ತು ಸಂದೇಶವಾಹಕರನ್ನು ಯಾವ ಪ್ರಕಾರ ಅನುಸರಿಸುತ್ತಿದ್ದರೋ ಅದೇ ಪ್ರಕಾರ, ಅವರ ವ್ಯವಹಾರಗಳು ಸರಿಯಾಗಿ ನಡೆಯುತ್ತಿದ್ದವು. ಅದೇ ರೀತಿ ಯಾರಿಗೆ ದೈವಿಕ ಸಂದೇಶಗಳ ಕಾಲವು ಎಷ್ಟು ಹತ್ತಿರವಾಗುತ್ತಿತ್ತೋ ಅವನು ಅಷ್ಟೇ ನೇರ ಮಾರ್ಗವನ್ನು ಅನುಸರಿಸುತ್ತಿದ್ದ. ಆದರೆ ಈಗ ಸರ್ವಶಕ್ತನಾದ ಅಲ್ಲಾಹನು ಮುಹಮ್ಮದ್ صلي الله عليه وسلم ರ ಸಂದೇಶವಾಹಕತ್ವದೊಂದಿಗೆ ಸಂದೇಶವಾಹಕರು ಮತ್ತು ಪ್ರವಾದಿಗಳ ಸರಪಳಿಯನ್ನು ಕೊನೆಗೊಳಿಸಿದ್ದಾನೆ. ಅದನ್ನು ಶಾಶ್ವತಗೊಳಿಸಿದ್ದಾನೆ ಮತ್ತು ಅವರನ್ನು ಜನರಿಗೆ ಮಾರ್ಗದರ್ಶನ, ಕರುಣೆ, ಪ್ರಕಾಶ ಮತ್ತು ಅಲ್ಲಾಹನವರೆಗೆ ತಲುಪಿಸುವ ಮಾರ್ಗದ ಏಕೈಕ ಮಾರ್ಗದರ್ಶಕನನ್ನಾಗಿ ಮಾಡಿದ್ದಾನೆ.
45- ಆದುದರಿಂದ ಓ ಮನುಷ್ಯನೇ! ಸಂಪ್ರದಾಯ ಮತ್ತು ಮೂಡನಂಬಿಕೆಗಳ ಸಂಕೋಲೆಗಳನ್ನು ಕಳಚಿ ನಿಜವಾದ ಹೃದಯ ಮತ್ತು ನಿಜವಾದ ಮನಸ್ಸಿನಿಂದ ಸರ್ವಶಕ್ತನಾದ ಅಲ್ಲಾಹನಿಗಾಗಿ ನಿಲ್ಲುವಂತೆ ನಾನು ನಿನ್ನನ್ನು ಪ್ರಾಮಾಣಿಕವಾಗಿ ಆಹ್ವಾನಿಸುತ್ತೇನೆ. ಮರಣಾನಂತರ ನೀನು ನಿನ್ನ ಪ್ರಭುವಿನ ಕಡೆಗೆ ಹಿಂತಿರುಗುವೆ ಎಂದು ನಿನಗೆ ತಿಳಿದಿದೆ. ನೀನು ನಿನ್ನ ದೇಹದ ಬಗ್ಗೆ ಯೋಚಿಸಿ ನೋಡಬೇಕೆಂದು ಮತ್ತು ನಿನ್ನ ಸುತ್ತಮುತ್ತಲಿನ ಪ್ರಪಂಚದ ಬಗ್ಗೆ ಚಿಂತಿಸಬೇಕೆಂದು ನಾನು ವಿನಂತಿಸುತ್ತೇನೆ. ನೀನು ಇಸ್ಲಾಮ್ ಧರ್ಮವನ್ನು ಸ್ವೀಕರಿಸಿದರೆ ನೀನು ಇಹಲೋಕ ಮತ್ತು ಪರಲೋಕಗಳ ಸೌಭಾಗ್ಯ ಮತ್ತು ಆನಂದವನ್ನು ಪಡೆಯುವೆ. ನೀನು ಇಸ್ಲಾಮ್ ಧರ್ಮ ಸ್ವೀಕರಿಸಲು ಬಯಸಿದರೆ, ನೀನು ಮಾಡಬೇಕಾಗಿರುವುದು ಇಷ್ಟೇ: ಅಲ್ಲಾಹನ ಹೊರತು ಅನ್ಯ ನೈಜ ಆರಾಧ್ಯನಿಲ್ಲ ಮತ್ತು ಮುಹಮ್ಮದ್ صلي الله عليه وسلم ಅಲ್ಲಾಹನ ಸಂದೇಶವಾಹಕರಾಗಿದ್ದಾರೆಂದು ನಾನು ಸಾಕ್ಷ್ಯ ನುಡಿಯುತ್ತೇನೆಂದು ಹೇಳುವುದು. ನಂತರ ನೀನು ಅಲ್ಲಾಹನ ಹೊರತು ಆರಾಧಿಸಲ್ಪಡುವ ಎಲ್ಲವನ್ನೂ ತ್ಯಜಿಸಬೇಕು. ಪುನರುತ್ಥಾನ ದಿನದಂದು ಅಲ್ಲಾಹನು ಎಲ್ಲಾ ಜನರನ್ನು ಅವರ ಸಮಾಧಿಗಳಿಂದ ಜೀವಂತ ಎಬ್ಬಿಸುತ್ತಾನೆಂದು ಮತ್ತು ಪರಲೋಕದ ವಿಚಾರಣೆ ಹಾಗೂ ಪ್ರತಿಫಲವು ಸತ್ಯವಾಗಿದೆ ಎಂದು ವಿಶ್ವಾಸವಿಡಬೇಕು. ಇಷ್ಟು ಮಾಡುವುದರಿಂದ ನೀನು ಮುಸಲ್ಮಾನನಾಗುವೆ. ಅದರ ನಂತರ ಅಲ್ಲಾಹನು ಕಡ್ಡಾಯಗೊಳಿಸಿದ ನಮಾಜ್, ಝಕಾತ್, ಉಪವಾಸ, ಸಾಮರ್ಥ್ಯವಿದ್ದರೆ ಹಜ್ಜ್ ಎಂಬ ಆರಾಧನೆಗಳೊಂದಿಗೆ ಅಲ್ಲಾಹನನ್ನು ಆರಾಧಿಸುವುದು ನಿನ್ನ ಮೇಲೆ ಕಡ್ಡಾಯವಾಗಿದೆ.
19-11-1441ರಂದು ಪುಸ್ತಕದ ಹಸ್ತಪ್ರತಿ ಪೂರ್ಣಗೊಂಡಿದೆ.
ಲೇಖಕರು: ಪ್ರೊಫೆಸರ್ ಡಾ. ಮುಹಮ್ಮದ್ ಬಿನ್ ಅಬ್ದುಲ್ಲಾ ಅಸ್ಸುಹೈಮ್.
ಮಾಜಿ ಅಧ್ಯಾಪಕರು ಇಸ್ಲಾಮಿಕ್ ಸ್ಟಡೀಸ್ ವಿಭಾಗ (ಅಖೀದಾ)
ಕುಲ್ಲಿಯತುತ್ತರ್ಬಿಯಾ, ಕಿಂಗ್ ಸವೂದ್ ವಿಶ್ವವಿದ್ಯಾಲಯ.
ರಿಯಾದ್, ಸೌದಿ ಅರೇಬಿಯಾ
Related books
All books
ಇಸ್ಲಾಮೀ ವಿಶ್ವಾಸದ ಕುರಿತು ಸಂಕ್ಷಿಪ್ತ ವಿವರಣೆ75 ಭಾಷೆಗಳುಇಸ್ಲಾಮೀ ವಿಶ್ವಾಸದ ಕುರಿತು ಸಂಕ್ಷಿಪ್ತ ವಿವರಣೆ
ಈ ಪುಸ್ತಕವು ಅಲ್ಲಾಹನ ಮೇಲಿನ ವಿಶ್ವಾಸ, ಅವನ ದೇವಚರರ ಮೇಲಿನ ವಿಶ್ವಾಸ, ಅವನ ಗ್ರಂಥಗಳ ಮೇಲಿನ ವಿಶ್ವಾಸ, ಅಂತಿಮ ದಿನದ ಮೇಲಿನ ವಿಶ್ವಾಸ ಮತ್ತು ವಿಧಿಯ ಮೇಲಿನ ವಿಶ್ವಾಸಕ್ಕೆ ಸಂಬಂಧಿಸಿದ ವಿಶ್ವಾಸದ ಮೂಲಭೂತ ಅಂಶಗಳನ್ನು ವಿವರಿಸುತ್ತದೆ. ಹಾಗೆಯೇ, ಈ ಪುಸ್ತಕವು ಒಬ್ಬ ಮುಸ್ಲಿಮನು ವಿಶ್ವಾಸವಿರಿಸಬೇಕಾದ ಮತ್ತು ಆ ವಿಶ್ವಾಸದ ಪ್ರಕಾರ ಕಾರ್ಯನಿರ್ವಹಿಸಬೇಕಾದ ಮೂಲಭೂತ ತತ್ವಗಳನ್ನು ವಿವರಿಸುತ್ತದೆ ಹಾಗೂ ಇಸ್ಲಾಮಿ ನಂಬಿಕೆಯ ಆಳವಾದ ತಿಳುವಳಿಕೆಯ ಮೂಲಕ ಅಲ್ಲಾಹನೊಂದಿಗೆ ಸಂಬಂಧವನ್ನು ಬಲಪಡಿಸುವ ಮಹತ್ವವನ್ನು ಒತ್ತಿಹೇಳುತ್ತದೆ.
ಪರಮ ದಯಾಮಯನೂ ಕರುಣಾನಿಧಿಯೂ ಆದ ಅಲ್ಲಾಹನ ನಾಮದಿಂದ74 ಭಾಷೆಗಳುಪರಮ ದಯಾಮಯನೂ ಕರುಣಾನಿಧಿಯೂ ಆದ ಅಲ್ಲಾಹನ ನಾಮದಿಂದ
ಪವಿತ್ರ ಕುರ್ಆನ್ ಸರ್ವಲೋಕಗಳ ಸೃಷ್ಟಿಕರ್ತನಾದ ಅಲ್ಲಾಹನ ವಚನವಾಗಿದೆ. ಅವನು ಅದನ್ನು ಅಂತಿಮ ಪ್ರವಾದಿ ಮುಹಮ್ಮದ್(ಸ) ರಿಗೆ ಅವತೀರ್ಣಗೊಳಿಸಿದನುಅವರು ಮಾನವರಿಗೆ ಅವರನ್ನು ಸೃಷ್ಟಿಸಿದ ಪರಮೋಚ್ಛ ಉದ್ದೇಶವನ್ನು ಸ್ಪಷ್ಟವಾಗಿ ವಿವರಿಸಲು, ಇಹಲೋಕ ಮತ್ತು ಪರಲೋಕದಲ್ಲಿ ಅವರಿಗೆ ನೀಡಲಾಗುವ ಸೌಭಾಗ್ಯಗಳ ಕಡೆಗೆ ಅವರಿಗೆ ಮಾರ್ಗದರ್ಶನ ಮಾಡಲು ಮತ್ತು ಮರಣಾನಂತರದ ಶಾಶ್ವತ ದೌರ್ಭಾಗ್ಯದಿಂದ ಅವರನ್ನು ರಕ್ಷಿಸಲು ಪವಿತ್ರ ಕುರ್ಆನ್ ಅನ್ನು ಅವತೀರ್ಣಗೊಳಿಸಲಾಗಿದೆ. ಇದು ಕಟ್ಟಕಡೆಯದಾಗಿ ಅವತೀರ್ಣವಾದ ದೈವಿಕ ಗ್ರಂಥವಾಗಿದ್ದು ಇದಕ್ಕಿಂತ ಮುಂಚೆ ಅವತೀರ್ಣವಾದ ದೈವಿಕ ಗ್ರಂಥಗಳನ್ನು ಇದು ದೃಢೀಕರಿಸುತ್ತದೆ ಮತ್ತು ಅವುಗಳಲ್ಲಿರುವ ಧರ್ಮ ನಿಯಮಾವಳಿಗಳನ್ನು ರದ್ದುಗೊಳಿಸುತ್ತದೆ. ಪವಿತ್ರ ಕುರ್ಆನ್ ಶಾಶ್ವತವಾಗಿ ನೆಲೆನಿಲ್ಲುವ ಪವಾಡವಾಗಿದೆ ಮತ್ತು ಅದು…
ಇಸ್ಲಾಂ - ಅಲ್ಲಾಹನ ಸಂದೇಶವಾಹಕರುಗಳ ಧರ್ಮ85 ಭಾಷೆಗಳುಇಸ್ಲಾಂ - ಅಲ್ಲಾಹನ ಸಂದೇಶವಾಹಕರುಗಳ ಧರ್ಮ
ಇಸ್ಲಾಂ ಎಂದರೆ ವಿಶ್ವವನ್ನು ಸೃಷ್ಟಿಸಿ, ನಿಯಂತ್ರಿಸುತ್ತಿರುವ ಅಲ್ಲಾಹನಿಗೆ ಸಂಪೂರ್ಣವಾಗಿ ಶರಣಾಗುವುದು ಮತ್ತು ಪ್ರೀತಿ ಹಾಗೂ ಗೌರವದಿಂದ ಅವನಿಗೆ ತಲೆಬಾಗುವುದು. ಅಲ್ಲಾಹನಲ್ಲಿರುವ ನಂಬಿಕೆಯೇ ಇಸ್ಲಾಂನ ಮೂಲ ಅಡಿಪಾಯವಾಗಿದೆ. ಅವನೇ ಸೃಷ್ಟಿಕರ್ತನು ಮತ್ತು ಅವನ ಹೊರತಾದುದೆಲ್ಲವೂ ಅವನ ಸೃಷ್ಟಿಗಳಾಗಿದ್ದಾರೆ. ಏಕೈಕನು ಮತ್ತು ಯಾವುದೇ ಸಹಭಾಗಿಗಳಿಲ್ಲದ ಅವನು ಮಾತ್ರ ಆರಾಧನೆಗೆ ಅರ್ಹನು. ಅವನ ಹೊರತು ಆರಾಧನೆಗೆ ಅರ್ಹರಾದವರು ಯಾರೂ ಇಲ್ಲ. ಅವನಿಗೆ ಅತಿಸುಂದರವಾದ ಹೆಸರುಗಳು ಮತ್ತು ಉನ್ನತ ಗುಣಲಕ್ಷಣಗಳಿವೆ. ಅವನು ಸರ್ವಸಂಪೂರ್ಣನು. ಅವನಲ್ಲಿ ಯಾವುದೇ ಅಪೂರ್ಣತೆಗಳಿಲ್ಲ. ಅವನು ಯಾರಿಗೂ ಜನ್ಮ ನೀಡಿಲ್ಲ ಮತ್ತು ಅವನು ಯಾರಿಂದಲೂ ಜನ್ಮವನ್ನು ಪಡೆದಿಲ್ಲ. ಅವನಿಗೆ ಸರಿಸಾಟಿಯಾಗಿ, ಹೋಲಿಕೆಯಾಗಿ ಯಾರೂ ಇಲ್ಲ. ಅವನು ಅವತಾರ ಹೊಂದುವುದಿಲ್ಲ ಮತ್ತು ಅವನು…
ಮುಸ್ಲಿಂ ಬಾಂಧವರಿಗಾಗಿ ಇಸ್ಲಾಮಿನ ಮೂಲಭೂತ ಪಾಠಗಳು78 ಭಾಷೆಗಳುಮುಸ್ಲಿಂ ಬಾಂಧವರಿಗಾಗಿ ಇಸ್ಲಾಮಿನ ಮೂಲಭೂತ ಪಾಠಗಳು
ಶೈಖ್ ಅಬ್ದುಲ್ ಅಝೀಝ್ ಬಿನ್ ಬಾಝ್ (ಅಲ್ಲಾಹು ಅವರ ಮೇಲೆ ಕರುಣೆ ತೋರಲಿ) ರವರ 'ಮುಸ್ಲಿಮ್ ಬಾಂಧವರಿಗಾಗಿ ಇಸ್ಲಾಮಿನ ಮೂಲಭೂತ ಪಾಠಗಳು' ಎಂಬ ಪುಸ್ತಕವು, ಸಾಮಾನ್ಯ ಮುಸ್ಲಿಮರಿಗೆ ಒಂದು ಜ್ಞಾನದ ಭಂಡಾರವಾಗಲೆಂದು ಇಮಾಮರು ರಚಿಸಿದ, ಮಹತ್ತರ ಪ್ರಯೋಜನವುಳ್ಳ ಒಂದು ಸಂಕ್ಷಿಪ್ತ ಕೃತಿಯಾಗಿದೆ. ಇದರಲ್ಲಿ, ಪ್ರತಿಯೊಬ್ಬ ಮುಸ್ಲಿಮನಿಗೂ ಸರಿಯಾದ ವಿಶ್ವಾಸ (ಅಖೀದಾ) ಮತ್ತು ಆರಾಧನೆಯನ್ನು ಸುಲಭವಾಗಿ ತಲುಪಿಸುವ ಸಲುವಾಗಿ, ಕುರ್ಆನ್ ಮತ್ತು ಸುನ್ನತ್ತನ್ನು ಆಧಾರವಾಗಿಟ್ಟುಕೊಂಡು, ಸರಳ ಮತ್ತು ಸ್ಪಷ್ಟವಾದ ಶೈಲಿಯಲ್ಲಿ, ದೀನಿನ ಮೂಲ ತತ್ವಗಳು ಮತ್ತು ಸ್ತಂಭಗಳಾದ ತೌಹೀದ್, ಈಮಾನ್ ಮತ್ತು ಇಸ್ಲಾಂನಿಂದ ಹಿಡಿದು, ಸ್ವಚ್ಛತೆ (ತಹಾರತ್) ಮತ್ತು ನಮಾಝಿನ ನಿಯಮಗಳು, ಇಸ್ಲಾಮಿನ ಶಿಷ್ಟಾಚಾರಗಳು, ಹಾಗೂ ಶಿರ್ಕ್ ಮತ್ತು ಪಾಪಗಳ ಅಪಾಯಗಳ ಬಗ್ಗೆ ವಿವರಿಸಲಾಗಿದೆ.