I jôl li Allah(Nyambe) nu a yé Ntééda ni Ntohol Islâma Kaat sèm kwèp inyu islâma kikii i bi lo mu' ikété kur-an ipubi loñni magwelek ma mpôdôl nu Allah(Nyambe) Kaat i i gwé bé biniigana bi ngoome [1] Munu i bitilna bini kaat ipe nyonok ni biniigana bi ngoome bi bi mpémél mu' i kur-an ipubi lôñni magwelek ma mpôdôl nu Nyambe inyu hikii mbadga i i nyibil boña i banga soñda. Lôñni kaat i i mbéñge bakena bobasôna mu' i bon ba Islâma ni bôt bape ni mahop map mu' i mambok momasôna ni ngéda yosôna ni maselna ma biniñ ni miñañ. 1. Islâma i yé ñwin i Allah(Nyambe) inyu bôt bobasôna, i yé ngwà ñwuin I…
Kaat sèm kwèp inyu islâma kikii i bi lo mu' ikété kur-an ipubi loñni magwelek ma mpôdôl nu Allah(Nyambe)
Kaat i i gwé bé biniigana bi ngoome[1] Munu i bitilna bini kaat ipe nyonok ni biniigana bi ngoome bi bi mpémél mu' i kur-an ipubi lôñni
magwelek ma mpôdôl nu Nyambe inyu hikii mbadga i i nyibil boña i banga soñda.
Lôñni kaat i i mbéñge bakena bobasôna mu' i bon ba Islâma ni bôt bape ni mahop map mu' i mambok momasôna ni ngéda yosôna ni maselna ma biniñ ni miñañ.
1. Islâma i yé ñwin i Allah(Nyambe) inyu bôt bobasôna, i yé ngwà ñwuin I Nyambe i i ntib mañwin ma Nyambe ma ma bi tagbe.
2. Islâma i ta bé to base i i yéne tôbô inyu ngim loñ to ngim litén, ndi i yé base i Allah(Nyambe) a bi tééne bôt ba binam bobasôna.
3. Islâma i yé ñwin i Allah (Nyambe) I bi lo inyu matib ma biniigana bi bapôdôl ni baôma ba Allah (Nyambe) ba bisu -nsañ ni bisai bi Allah(Nyambe) ba kahab' i ngi yap - inyu matén map.
4. Bapôdôl ba Allah (Nyambe) nsañ ni bisai bi Allah bi kahab i ngi yap, base yap yé pom-base to hala kii ba bééna maselna mu' i kék-mambén.
5. Islâma i nsébél nlélém kii bapôdôl ba bisu: bo Nôa, bo Abraham, bo Môsi, bo Salômô bo David, bo Yésu - nsañ i Allah(Allah) i kahab' i ngi yap - i hémle le Allah nyen a yé Nwet, Nhek, Nti-Makébél, Nti-Niñ,
Nti-Nyemb, Kiñe i bikiñe, ni le nyen a nsob ora, ni le nyen a yé Nti-ñwéhél ni Ntohol.
6. Allah(Nyambe) lipém ni bibégés bi ba ni nye, nyen a yé Nhek, Nyetama ki nyen a kôli ni bibégés, ni le yom-ipe i béhgana bañ to mut nye-kii-nye mbôda ni nye.
7. Allah(Nyambe) nyen a yé Nhek minkoñ ñwominsôna ni gwom bi bi yé mu' ikété, bi di ntehe ni bi di ntehe bé. Hikii yom i i ta bé nye i yé hékél mu' i bihékél gwéé. Allah(Nyambe) a bi hek ki ngi ni hisi' dilo disamal.
8. Allah(Nyambe) lipém ni bibégés bi ba ni nye a gwé bé kolbaha yo-ki-yo mu' i nkok-liane wéé, to mu' lihègèk jéé, to mu' lisobog jéé li ora, to mu' bibégés gwéé.
9. Allah(Nyambe) lipém li ba ni nye a ngwal bé, a bi gwéé bé to, a gwéé bé to kolbaha ndi to pôna ni yom yo-kii-yo.
10. Allah(Nyambe) lipém ni bibégés bi ba ni nye, a ntjenda bé ndi to yila hékél mu' i bihékél gwéé.
11. Allah(Nyambe) lipém ni bibégés bi ba ni nye a yé Litob-li-ñem ni Ntohol inyu baboñol béé, nye ki nyen a ntohol bo, inyu hala nyen a bi om baôma ni suhul bikaat.
12. Allah(Nyambe) nyen a yé Nwet, nyen a Ntohol, nyen a ga kéés bihékél i kel i minkâ mi nsôk, a ma mal tugul bobasôna ni pémés bo mu' i bisosoñ gwap, à ga saa hikii wada wap inyu nson à bi gwel inlam to imbe. Tonje a ngwel ni mam malam a bag nhémle, a ga bana nsaa-nlam i mbus nyemb, ndi tonje a bi tjél hémle ni boñ mam-mabe, a ga kôsna soso kokse i mbus nyemb.
13. Allah(Nyambe) lipém ni bibégés bi ba ni nye a bi hek Adam ni biték, a ñohña ki nye ngadak mbôda i mbus yéé. Bôt ba binam bobasôna ni ba yé' i ndâe yéé, ba nloona bé bo-ni-bo mu' i maloñ map to' i matén map, ndigi mu' i libak jap ikété hémle.
14. Hikii man a ngwééne ikété hémle i pombe Allah(Nyambe) (hala wee: an ngwéé ni nye ayé man base i islâma).
15. Mut binam nye kii nye a bigwééne béé ni ihuha tô béba ndi tô kohol yo mu imatsél ma basañ béé, to begel ihuha imut nunpe.
16. Njom i héka i bôt ba binam i yé libégés Allah(Nyambe) Nyetama.
17. Islâma i bi hogol mut-binam munlôm to mudaa, i yôge nye ni minyonok mi mambén, i yihla ki nye ntihmbe-mambadga inyu' gwom gwobisôna a ntep, ni magwelek méé, ni maboñok méé. A bééga mbegee i magwelek ma ma ntééñga nyemede, yag ni ma ma ntééñga bôt bape.
18. Munlôm ni mudaa ba yé nlélém mu' i bikééhene mu' i magwelek map, yag mu' i nsaa to i ponos' i bisu bi Allah (Nyambe).
19. Islâma i bi hogol mudaa ni téé le bôdaa ba yé lôk-nyañ i bôôlom, i bééga munlôm mbegee i mam ma nkus ikété ndap-libii, kii-ngéda kôs yéé. Munlôm a nlama ni yônôs ngoñ i ngond yéé ni nyañ ibale a nhôlôl a banga bigwelmoo, loñni ngoñ i ñwaa wéé.
20. Nyemb ki i ta bé mamal ma kééda, ndi i yé linoñga-njel' maké, i yé mapam ma ndap bôlô (ndap-nson) ni majôb ma ndap-nsaa i i ntisba nyû-minsôn ni mbû. Nyemb-mbû i yé libaglaga i mbagla ni nyû, ndi i nyiga témb mu i kel-bitugne. I mbus nyemb ki, mbû i njôb bé ikété nyû ipe.
21. Islâma i nsébél bôt i hémle loñni balôm ba matiñ ba hémle ba ba yé: Li hémle Allah, ni biangel gwéé, lôñni hémle bikaat bi Allah, hala wee Tôra ni Injîl ni Zabûr ilole ba nheñel gwo, loñni Kur-an, loñni hémle bapôdôl ni baôma nsañ i Allah i kahab' i ngi yap, ni le di hémle nsôk-lo wap: Muhammad ñôma nu Allah(Nyambe), masôk-mpôdôl ni ñoma nu Nyambe, ni hémle kel nsôk, ni le di yi le niñ i nkoñ’isi ibale yon
ibak lisôk, libak ni niñ baga nene béé ni nseñ wo kii wo, loñni hémle matéak ma nsôk.
22. Bapôdôl ba Allah (Nyambe) ki kokok yada-nsañ i Allah(Nyambe) i kahab i ngi yap mu' i yom ba bi bambal i lôlak yak Allah(Nyambe), ba yé pèlès mu' i yom i nkolbaha soñda ni bilem bilam, tole i i nyidil mut-mbôô i neebe, ba gwé pil i tégbaha ora i Allah(Nyambe) yak babôñol béé, ba nkabna bé ni nye libak li Nwet tole Nyambe, ndi ba yé bôt ba binam kii bape, ba Allah(Nyambe) -jôl jéé li tééba lipubi- a bi ti biniigana bi mbû.
23. Islâma ki i nsébél bôt i bégés ndigi Allah (Nyambe) nyetama ni balôm ba matiñ ma bibégés ba ba yé: masoohe ma ma gwé litelep bitétéé, liôôb ni liôm mbom' isi, ni mbidga i Allah(Nyambe), ni litémbna manjelek i nyeni, ni mayagal. Mut-binam a nsoohe hikii kel ngélé itan. Maselna ma libak li bôt ba binam ma nsôyi mu' masoohe ntôñ, hala nyen ngwañ mut to nhat ni hiyeyeba, ni nkena-nloñ ni séla-mut bobasôna ba ntelep nlôñ wada mu' masoohe, bo zakat i i yé libogok li mahôla ma nkûs tole lihat, i yé ni mimbogok mi matéak ma Allah(Nyambe), nyéksaga i pémés mu' bigwelmoo bi minhat mi bôt inyu diyeyeba ni bape, ngélé yada i ngim ñwii. Bo liyén-njal li li yé libamble bijek ni binyon ni malal' mu' binjâmuha bi sôñ Ramadan, ibôdôl' mapémél ma hiangaa i kepam' manañle. Mut à nlama hôt nyû ni bamble gwom bi bi nlémél nye ni nihbe. Bo Nleñ i Mek, a yé liléñél ndap' Allah(Nyambe) i nsaibak nkoñ i Mek inyu yônôs ngim' i mabéhgene ma Allah(Nyambe), ngélé yada i nom yéé ibale a gwé a gwéé Nhek mu; mu ki' i nleñ bobasôna ba nlama helba yak Nhek lipém li ba ni Nye
24. Mu' i basoso ba mam ba ba ntodol minson mi libégés Allah (Nyambe) ikété base i Islâma lelaa ba nlama sal ñwo, ngéda yap ni maboñ map ma ligwelek kiingéda matéak ma Allah(Nyambe) lipém ni bibégés bi ba ni nye, jôl jé li tééba lipubi, ni lelaa ñoma wéé -nsañ ni bisai bi Allah(Nyambe) bi kahap' i ngi yéé- a bi bambal biniigana inyu yap, mut nye-kii-nye a kônde bé yom mu ndi to héya ipam i len ini. I minson minkeñi mi libégés Allah (Nyambe) ki mi ñwomisôna, bapôdôl ba Allah (Nyambe) bobasôna -nsañ i ba ni bo- ba bi sébél (bés) i gwel ñwo.
25. Ñoma nu islâma inyu minkoñ ñwominsôna ni matén momasôna nyen a yé Muhammad man Abdullah mu' i ndaae i Ismaîl man Ibrahim -nsañ i ba ni bo- a bi gwééne Mek i ñwî 571 (i mbus malo ma Yésu). A bi ôma ni yo (base i Islâma), a bôô i Médin. A bi nogla bé ni litén jéé mu'i mam ma libégés bisat, ndi a bé pôdna moo nye ni bo inyu gwel mam-malam, a bééna bilem-bilam (à bé yét' i mbom) ilole a mbôdôl kôsna biniigana bi mbû, hala nyen litén jéé li bi o nye jôl le <<mut mabiine, bod-ñem>>
A bi bôdôl kôsna biniigana bi mbû a bak bimâñ bi môm mana ma ñwî, Allah(Nyambe) a nitis ni nye bibañga (mayaga), soso yimbne le kur-an ipubi, i i yé ki-keñep-manyaga ma mpôdôl ba Allah (Nyambe), a yé mingwâ mu' i biniigana bi bapôdôl ba Allah (Nyambe) ikepam i len ini.
Ingéda Allah(Nyambe) a bi mal ni yôsnene nye mambén ma base, ñoma nu Allah(Nyambe) ki -nsañ ni bisai bi Allah bi kahap i ngi yéé- à bambal mo longe' i libanglak, a bi wo a banga môm masamal ma nwî ni maa. A bi juba i Medine -nsañ ni bisai bi Allah bi kahap i ngi yéé-
Ñôma nu Allah(Nyambe) Muhammad - nsañ ni bisai bi Allah bi kahap i ngui yéé- à yé matip ma bapôdôl ni baôma ba Allah. Allah a bi om nye ni éga lôñni base i maliga inyuboñle à pémés bot i jiibe li ndim ni libégés-bisat ni litjél-hémle, ni jubus bo' i mapubi ma hémle ni libak lipom li Allah(Nyambe). Ni Allah(Nyambe) a mbog mbogi le à bi om nye inyu sébél-bot i nyeni ni sômbôl yéé (nye Allah).
26. Kék-mambén ma islâma i ñoma nu Allah(Nyambe) Muhammad -nsañ ni bisai bi Allah(Nyambe) bi kahap i Ngi yéé- a bi lona i yé kaat Allah (Nyambe) i i nsôk ni mintôô mi makitik ma Nwet, a yé kék i minyonok mi mambén, mu' ikété libogok li base inyu bôt ba binam, ni biniigana inyu likenek jap hana' nkoñ' isi. A yé litibil tééda kii yom i bisu: Base i bôt ba binam, ni matjél map, ni bigwelmoo gwap, ni lisoñdaga jap li mam, ni mbôda yap, a yé lisôyôi' mambén tole matéak ma ma bi tagbe, kiki ma bé sôyana mana ni mana-mape mu' i mambén ma bi tagbe.
27. Ni Allah(Nyambe) -lipém ni bibégés bi ba ni nye- a nleege ndigi Islâma inyu base, i ñoma wéé Muhammad -nsañ ni bisai bi Allah(Nyambe) bi kahap' i ngi yéé- a bi lona. Tonje a noñ ni njel' ipe ibabé Islâma kii base, i ga leegana bé nye.
28. Kur-an ipubi i yé kaat i Allah(Nyambe) a bi suhlene ñoma wéé Muhammad -nsañ ni bisai bi Allah(Nyambe) bi kahap' i ngi yéé, i yé lipôdôl li Nwet-minkoñ ñwomisôna. Allah(Nyambe) a bi kal bôt ba binam ni bayoñ le ba lona le nlélém yom kii Kur-an, to yaga le pes yada i i yé nlélém kii pes-Kur-an, ndi ba bi la bé boñ hala ipam i len ini. Kur-an ipubi i ntihmbe ngadak mambadga i i nyumus mahoñol ma ngadak' bôt. Kur-an i lipémba i yé isi matat ma Allah (Nyambe) ikepam' i kel-bitugne, i hop' arab i i bi suhlana, to bañga yada i nyiñba bé mu. Mpémlak mu' i biyingin, ñwandak mu' mambok ni mu' matuñga ma nkoñ' isi, à yé bitilna bikeñi kiyaga, mayaga, to yaga mu i éña yéé to éña i ngobol i minlôñ ñwéé, i nlama soñglana.
Nlélém kii magwelek ma ñôma Muhammad -nsañ ni bisai bi Allah(Nyambe) bi kahap i ngi yéé- ni biniigana gwéé, ni mimbogok mi biniigana mu' hiko hi mbok' malo ma baôma ni masôs ma biniigana bi mbû. Kur-an i yé mpamak' i biyingin ni hop' arab i i yé hop' ba gwal i ñoma -nsañ ni bisai bi Allah(Nyambe) bi kahap i ngi yéé- i yé ki nkoblak' i ngadak' mahop. Kur-an ipubi loñni kék' i magwelek ma ñôma -nsañ ni bisai bi Allah(Nyambe) bi kahap i ngi yéé- gwobibaa bi yé yimb' i mambén (litegbene li mambén) ma islâma ni ndoñol yap. Islâma to mambén méé ba nyoñlene bé mu' i mahoñol to ma bôñol ma bôt ba binam ndi i nyôñôl mu' i biniigana bi mbû bi bi nlôl yak Allah (Nyambe): Kur-an ipubi ni kék' i magwelek ma mpodol.
29. Islâma ki, i ñôdna bôt i bôñôl bagwal longe, to iba yaga le ba ta bé bon ba Islâma, loñni yoñ tat ni bonge.
30. Islâma i ñodna bôt i ba sép mu' i bipôdôl ni' i bigwélél, to yaga inyu baoo.
31. Islâma ki i ñodna bôt i boñ longe inyu bihékél gwobisôna, i nsébél ki bôt i tibil libak jap ni makenek malam.
Islâma i ñôdna bôt mu' i mintôô mi magwelek kii bo maliga, liyônôs makak, litééda libak li konji, haba-lam, ñem-ngui, likab, likôhle bôt ba ngoo to diyeyeba, linit' bôt ba gwé ndutu, likébél' i bet ba yé njal, likôhle mambaabaga, litééda matjél ma lihaa, ni likôhle bilém.
33. Islâma i nti kunde inyu gwom bilam ikété bijek ni binyon, i ñôdna ki bôt i pubus miñem, ni manyû, ni mayééne ni ndap, hala ki nyen i nti kunde inyu libii, kikii i bi ti bapôdôl ora mu -nsañ i ba ni bo- hala nyen yag bo ba ntine ora i hikii longe-jam.
34. Islâma ki i nsônga minkañ mi dibe-di mam kii bo likolbaha Allah(Nyambe) ni litjél-hémle, ni libégés bisat, ni lipot-mam inyu Allah(Nyambe) ni ngi-yi (ni likut), ni linol bon, ni likit nhébék i Allah(Nyambe) a bi téé kila, ni lipungul nkoñ' isi, ni makañ, ni bijôñ' i mbamba to' i lisol, ni ndéng, ni malal ma bôôlôm ni bôôlôm to bôdaa ni bôdaa.
I nsônga yag nyuñga-moni, ni lije mintu mi binuga, ni yom i ba nôlôl inyu bisat, ni biôñgba (mintjok mi gwom), i nsôga yag minsôn mi ngôi, ni gwom-bibe ni bi mahindi gwobisôna, i nsônga yag lije gwom bi bon ba nyû, ni liyôbôs hihéga ni kilô, i nsônga yag likit matjél ma lihaa. Bapôdôl ba Allah bobasôna -nsañ i ba ni bo- ba yé ngem yada mu' mambén ma.
35. Islâma ki, i nsônga maboñok-mabe kii bo bitembee, bo wip, bo linuñul-bôt, bo malôga, bo njôñ, ni magwelek mabe, bo wip, bo ño-mbe, ni nkoda-mbagi, i nsônga ki libak-libe' manjel momasôna.
36. Islâma i nsônga ki makét ma ma gwé nyuñga-moni to ngim' mandegle, to nkoda' mbagi, to malôga, to ngim jam i i nla kena bôt ba binam, makoda to matén i ngi-manôgla.
37. Islâma i bi lo inyu yoñ tat ni boña tole soñda, ni sôñga yom yosôna i i nla puñgul boña, kii bo nyôba i maog (liumb), i bi singe ki yi ni lihek-pék ni bédés gwo tel, a ti ki gwo kunde mu i ngada i minkoda mi mam. Islâma i gwé bé ngim mbén to ngim nsolbe-jam i i yéne ndigi inyu ngim-bôt he bes bape. Mambén ni biniigana bi Islâma gwobisôna bi gwé longe njom, bi nkiha ki ni mbagi-sép lôñni pék.
38. Inyu bibase bi yubda ni, ingéda bahémle bap ba nla bé nok minkoda ñwap mi biniigana mi mi ye le pék to soñda ba nla bé neebe, bakena bap ba mintôñ ba niiga bo le ngo nhémle i kéhi' i ngi soñda to lihek-pék, ni le soñda to pék ba gwé bé nseñ inyu nok base to bôñôl yo. Inyu Islâma ni, biniigana bi mbû bi mbéyés mapubi' i ngi pék ni soñda i mut-binam ni éga nye i njel-sép. Bakena-mintôñ mi banimlaga ba ngwés le bôt ba lep soñda yap ni noñ bo ' i mbus, ndi ki Islâma yo i nsébél mut-binam i poñgol boña wéé ni tibil siyè mam ni tibil nok mo kikii ma yé.
39. Islâma i nsiñge bañga-yi ni ôdna bôt' i njômbi bañga-yi i i ta bé nkañak ni biniigana bi likut, i nlôhle bés i tibil siyè (béñge) bés-bomede ni mambok lôñni bihékél bi bi yé ipañ yés, maliga tôbô ma ma mpémél mu' i soñda (i yi ni pék) ma mpénda bé biniigana to base i Islâma.
40. Allah(Nyambe) a nleege bé to nson (bigwélél) ndi to yoñ ngéda ni gwo' i mbus nyemb he nduk inyu' nwet a bi hémle Allah(Nyambe) ni nôgôl Nye, ni Koome biniigana bi baôma béé bobasôna -nsañ ni bisai bi kahap i ngi yap-. Allah(Nyambe) a nleege bé to mabéhgènè ma mut ndigi ma a bi tééne nye.
Lelaa mut-binam a nla ni tjél hémle Allah(Nyambe) ndi a yéñék (a gwéhék) le a
ñwéhél nye (le a ntohol nye) ?
Allah(Nyambe) a nleege bé to hémle i mut nye-kii-nye ikété bôt ba binam he nduk le a hémle bapôdôl ba Nyambe bobasôna -nsañ i ba ni bo-, a hémle ki ñwin-mbû i Muhammad -nsañ ni bisai bi Allah(Nyambe) bi kahap i ngi yéé-.
41. Ngo njômbi i bikaat bi Allah (Nyambe) i yé ndigi le base i maliga i bamblana mut-binam inyuboñle a ba yaga ndigi mbôñôl Allah(Nyambe) nyetama Nwet-minkoñ ñwominsôna, ni le a hohol nye ngata i likut ni biyômôk. U nléba le Islâma i mpubus bé bôt, i mbédés ndigi' nwet a kôli ni hihéga hi hi kôli nye, i nti bé to bo tel i Nwet to banyambe.
42. Mu' i base i Islâma, Allah(Nyambe) a bi néhne bôt njel i bad ñwéhél, hala a yé mut-binam litémbna bisoohene yak Nwet-wéé loñni libagla ni béba. Islâma ki i nsôyôi' bibéba gwobisôna bi bi bôña' i bisu bi ngéda ilole di njôb' i islâma, ñwéhél ki, i nsas' bibéba bi bi tagbe' i bisu bi ngéda. Mut-binam a gwé ni bé le a pahal bibéba gwéé'i bisu bi mut nye-kii-nye.
43. Ikété Islâma ki, mut-binam a gwéé mpèmbè i manôgla ipola nye ni Allah(Nyambe), u gwéé ni bé ngôñ ni mut nye-kii-nye kikii nyâñga ipôla we ni Allah(Nyambe). Islâma i nsôñga bés le di yoñ bôt ba binam kii banyambe to yihla bo bakolbaha Allah(Nyambe) mu' i libak jéé li Nwet, to mu' i bibégés gwéé.
44. Inyu matib ma nkwel, di nyi le bôt ba ba niñil bé nlélém' i haï, ba ba yé mbagla matén ni maloñ, to ibale ba yé liuñ, hikii wada wap a gwéé méé mahoñol, hala ki nyen ba gwé maselna mu' i mayééne map ni mu' i bibôlô gwap, hala ni nyen ba gwé ngôñ ni ñéga inyu unda bo njel nôñol, ba gwé ngôñ ni ngim ñénél i i nkôhle bo ni bog mam map, inyu hala nyen mintôô mi baôma ba Allah (Nyambe) -nsañ ni bisai bi kahap' i ngi yap- ba bi beege' mbegee i nôñnaga' biniigana bi mbû ba bé kôsna bi lôlak yak Allah(Nyambe) -lipém ni bibégés bi ba ni nye- : ba ñéga bôt' i njel-sép ni njel-longe, ba nkod bo mu' mambén ni matéak ma Allah(Nyambe) ni ti mbagi ipôla yap ni njel-sép. Mu ni' i litihmbege jap li nsébla i baôma, ni libayak jap ba mbaï ngéda yap (bo baôma), ni mañwin ma Allah(Nyambe), mam ma bôt ba binam ma ga koglana. Allah(Nyambe) a bi tib mañwin méé ma mbû ni ñoma wéé Muhammad -nsañ ni bisai bi Allah(Nyambe) bi kahap i ngi yéé- a bi tééne' i ñwin-mbû i le i ba ngwà, a yihla ki wo éga inyu bôt, ni tohi, baï-mapubi, ni liunda njel i i nke' Nyeni -lipém li ba ni nye.
45. Inyu hala nyen me nsébél we, u ba yaga tonje le u telep inyu Allah(Nyambe) ni ñem woñ wonsôna, ntiñlâk ngata i linoñ mayôñgô, u yik ntiik le' i mbus nyemb, u ga témb yak Nwet woñ, tibil yoñ ngéda ni hek pék i kolbaha wemede ni' i gwom bi yé we' ipañ. Ti wemede sesema' i matéak ma Allah, hala a nkobla le man base i Islâma, u ga bumbul yaga masoda hana i
nkoñ’isi ni' i mbus nyemb. Ibanile u nsômbôl yila man base i Islâma, u gwé ndigi le u bog mbôgi le: Allah (Nyambe) numpe a ta bé ndigi Allah(Nyambe), Muhammad a yé ñôma nu Allah. U nlama tañba i gwom gwobisôna bi bôt ba mbégés bi ba bé Allah(Nyambe), u nhémle ki le Allah(Nyambe) a ga tugul bawoga, lôñni le bikééhene bi nsôk ni mbagi-nôgôs bi yé maliga. Ibanile u mbog mbôgi, hala wee u nkoome libak joñ li man base' i Islâma, i mbus i
ha, i mbad ni we le u bégés Allah(Nyambe) niñ yoñ yosôna, ni mu' i kék' mambén tole kék' matéak to le kék' biniigana, to yaga le mu' i balôm ba matiñ a bi tééne bés, hala wee: masoohe, zakat, tééda dilo di yén njal, lôñni nleñ i Mek ibale u gwéé njel mu.
Kaat ntilga 11-19-1441
'Mut a ntila yo a yé malét nkeñi docta Muhammad man Abdullah al Suhaïm
Malét biniigana inyu libak li pom li Allah(Nyambe) i pès i biniigana bi Islâma (nlômbi)
