من خلقني؟ ولماذا؟

Сытми къегъэлъагъуэр КъэзыгъэщIыр зэрыщыIэр!

Хэт сыкъэзыгъэщIар? Сыт сыкъыщIагъэщIар?

Хэт уафэхэмрэ щIылъэмрэ ятет псэущхьэ къызэрымыкIуэ къыпхуэмылъытэн псори къэзыгъэщIар?

Хэт зегъэкIуэныгъэ нэгъэсауэ зыми хуэмыдэу уафэхэми щIылъэми щыIэр къэзыгъэщIар?

Хэт цIыхур къэзыгъэщIар? Хэт абы зэхихыу, илъагъуу зыщIар? Акъыли хэт езытар? Хэт абы зыгуэр къищIэфу икIи къыгурыIуэу зыщIар?

Дауэрэ къыдгурыбгъэIуэфыну уи Iэпкълъэпкъми нэгъуэщI къэгъэщIауэ хъуам я Iэпкълъэпкъми хэт зэтегъэпсыхьыныгъэхэр зэрылажьэр нэгъэсауэ? Хэт ахэр къэзыгъэщIахэр?

Дауэрэ зэтеувэрэ икIи зиIыгърэ мы дунеишхуэм и унафэ зэрызэхэзекIуэу хъуар, ахэр зезыгъакIуэр нэгъэсауэ илъэс бжыгъэ куэдкIэ?

Хэт мы дунейр зэрызэтет унафэхэр зыгъэувар (псэунри, лIэнри, псэущхьэхэри зэрызэтехъукIри, жэщри, махуэри, гъэм и зэманхэри, н.къ.)?

Мы дунеишхуэм езым зыкъигъэщIыжауэ ара? Е зыми къимыкIауэ къэхутауэ ара? Е напIэзыпIэм зэтеувауэ ара?

Сыт цIыхум имылъагъу гуэрхэр зэрыщыIэр и фIэщ щIэхъур? Псалъэм папщIэ, гурыIуэныгъэр, акъылыр, псэр, зыхэщIэныгъэр, лъагъуныгъэр. Абыхэм я лъэужьхэр елъагъури аракъэ? АтIэ дауэрэ цIыхум зэримыдэр мы дунеишхуэр къэзыгъэщIар зэрыщыIэр, Абы къигъэщIауэ хъуар илъагъу пэтрэ, Абы и гущIэгъуныгъэшхуэри нэрылъагъуу и нэгум щIэт пэтрэ?

Зыми идэнукъым жепIэмэ: "Мы унэр езыр-езыру мыбдежым къыщыхутащ, зыми имыухуауэ ар"! Е жраIэмэ абы мы унэр зыми къымыгъэщIу къыщыхутащ! АтIэ дауэрэ цIыху гуэрхэм я фIэщ зэрыхъур мы дунеишхуэр къэзыгъэщIа щымыIэу къэхъуауэ жыраIэмэ? Дауэрэ акъыл зиIэ цIыхум къабыл ищIрэ жраIэну мы дунеишхуэр зэрызекIуэ щытыкIэ нэгъэсар езыр-езыру къэхъуауэ?

Алыхь ЛъапIэм жиIащ: {Е ахэр езыр-езыру къэхъуахэу ара? Е езыхэра къэзыгъэхъур? Е уафэхэмрэ щIылъэмрэ абыхэм къагъэщIауэ ара? Хьэуэ! Абыхэм фIэщхъуныгъэ быдэ яIэкъыми аращ!} (52: 35-36).

Алыхь ЛъапIэу Лъагэр

Тхьэ закъуэу къэзыгъэщIар щыIэщ, Абы цIэрэ, сыфэт куэдрэ лъапIэу иIэхэщ, нэгъэсауэ зэрыщытыр къэзыгъэлъагъуэу. Абы и цIэхэм щыщщ: КъэзыгъэщI, ГущIэгъущI, Ерыскъы зыт, ЛъапIэ. Тхьэшхуэм и цIэхэм щыщу нэхъ цIэрыIуэр Алыхь цIэращ. А цIэм къикIыр: хуэпщылIыныгъэр зыхуэфащэ закъуэу, гъусэ зимыIэ.

Алыхь ЛъапIэм жиIащ КъурIэн ЛъапIэм и деж: {ЖыIэ: "Ар Алыхь Закъуэщ, Алыхь Зыхурикъужщ. Къилъхуакъым икIи къалъхуакъым. ИкIи щыIэкъым зыри Абы хуэдэ"} (112: 1-4).

Алыхь ЛъапIэм жиIащ: {Алыхьыращ Тхьэр, Абы нэгъуэщI тхьэ щыIэкъым, Ар Псэущ, псори зэтезыIыгъэщ, Абы жеибащхъуи жеини ищIэкъым, уафэхэми щIылъэми щыIэр - псори Абы ейщ. Хэт Абы и пащхьэ зыгуэрым къыщхьэщыжыфынур, Езым хуит имыщIауэ? Абыхэм къапэщылъри, къащыщIахэри ещIэр, Езыр зыхуейращ щIэныгъэм щыщу зэрагъащIэр, Абы и тахътэм и лъабжьэм уафэхэри щIылъэри зэщIеубыдэ, ахэр ихъумэнри зыуикI къехьэлъэкIкъым, Ар Лъагэщ, Инщ} (2: 255).

Тхьэшхуэм и сыфэтхэр

Тхьэр щIыр къэзыгъэщIауэ ар жыIэщIэ зыщIаращ, псэущхьэхэм яхуэгъэпсауэ зыубгъуаращ. Аращ уафэхэри, абыхэм псэущхьэ бэлыхьу щыIэхэри къэзыгъэщIар. Абы дыгъэри, мазэри, жэщри, махуэри къигъэщIащ. Псори нэгъэсауэ зэрызэтегъэувам къегъэлъагъуэр Абы и лъэщагъыр.

Тхьэращ жьыуэ тшэр къыдэзытар, ар димыIэмэ дыпсэуфынукъым дэ. Аращ уэшххэри къытхуезгъэшхыр, хыхэри, псыежэххэри къытхуэзыгъэжыIэщIэр. Аращ дызыгъашхэтэр, ди анэхэм я ныбэхэм дыщилъам къару лъэпкъ димыIэу. Аращ ди лъынтхуэхэм лъы ирикIуэу зыщIар, дигухэр зэпымыууэ дыкъыщыхъуа махуэм щегъэжьауэ дылIэжыху къытеуэу зыщIар.

Алыхь ЛъапIэм жиIащ: {Алыхьым фи анэхэм я ныбэм фыкъригъэкIащ, зыри фымыщIэу, икIи тхьэкIумэ иризэхэфхыну, нэ фриплъэну, гу иризыхэфщIэну къывитахэщ, фэ шыкур фщIынкIэ мэхъур} (16: 78).

Тхьэуэ зыхуэпщылIхэм сыфэт нэгъэсахэр иIэн хуейщ

Дыкъэзыгъэхъуам къыдитащ акъыл, Абы и лъэщагъыр къыдгурыIуэу. Абы къытхилъхьащ Ар нэгъэсауэ зэрыщытым и щыхьэт зыхэщIэныгъэ, Абы зы ныкъусаныгъи зэримыIэфыныр къыдгурыIуэу.

ХуэпщылIыныр зыхуэфащэр Алыхь ЛъапIэу Лъагэ закъуэращ. Аращ Нэгъэсар, хуэпщылIыныгъэу хъуари зыхуэгъэзауэ щытын хуейр. Абы нэгъуэщI зыхуэпщылIу хъуар пцIыщ икIи ныкъусаныгъэщ, ахэр псори лIэжынухэщ икIи кIуэдыжынухэщ.

ЗыхуэпщылIыр щытыфынукъым цIыхуу, е мывэ сыну, е жыгыу, е хьэкIэкхъуэкIэу!

Акъыл зиIэр къекIукъым хуэпщылIыну зыми, нэгъэсауэ щыт закъуэм мыхъумэ. Дауэрэ ар хуэпщылIын езым нэхърэ нэхъ къарусыз гуэр!

Тхьэр щытыфынукъым и анэм и ныбэ илъ сабийуэ, итIанэ сабийхэр къызэрыхъум хуэдэу къэхъуу!

Тхьэращ псори къэзыгъэщIар, къэгъэщIауэ хъуар Абы и IэмыщIэм илъщ икIи и унафэм щIэтщ. ЦIыхухэм Абы зыри иращIэфынукъым, зыми Ар кIэраIулIэфынукъым, хьэзаби тралъхьэфынукъым, ягъэпудыфынукъым!

Тхьэр лIэфынукъым!

Тхьэм зыри щыгъупщэкъым, жейкъым, шхыни ишхкъым. Ар Лъэщщ, Абы щхьэгъуси, сабии иIэкъым. КъэзыгъэщIам лъэщыгъэм и сыфэтхэр иIэщ, зэи хуэныкъуэ е ныкъусаныгъэ иIэу щытыфынукъым. Дэтхэнэ тхыгъэу КъэзыгъэщIам и лъэщыгъэм ныкъусаныгъэ хэлъу жызыIэхэр, ахэр и бегъымбархэм хуахьу щытми, псори зэхъуэкIахэ ахэр. Ахэр уэхьи пэжым щыщкъым, Мусэ, Хьисэ, адрей бегъымбархэми къахуехам щыщкъым, Алыхьым и сэлатымрэ и сэламымрэ абыхэм псоми ялъыс.

Алыхь ЛъапIэм жиIащ: {Уэ цIыхухэ, хъыбар къыфхуаIуатэри, федаIуэ абы! Фэ Алыхьым нэгъуэщI фызэлъэIухэм бадзи къагъэхъуфынукъым, псори абы щхьэкIэ зэхыхьами. Бадзэми зыгуэр яIрихамэ, абы кърагъэгъэзэжыфкъым. Къарууншэщ къыIизыхри, къызыIрахри. Абыхэм Алыхьыр зэрыхуэфащэу ялъытакъым, Алыхьыр КъарууфIэщ, Лъэщщ} (22: 73-74).

ДыкъэзыгъэщIам уэхьи къытхуримыгъэхыу дыкъигъэнэфыну акъылым идэн?

Мыхьэнэншэу Алыхьым а къигъэхъуахэр псори къигъэхъуауэ дауэрэ акъылым идэн? Ахэр ауэрэ къигъэхъуауэ хъун Ар АкъылыфIэу, ЗыщIэу?

Акъылым дауэрэ идэн апхуэдэу нэгъэсэуа дыкъэзыгъэщIам, уафэхэми щIылъэми щыIэр зэуэ жыIэщIэ тхуэзыщIам ауэрэ мыхьэнэншэу дыкъигъэщIауэ? Е нэхъ мыхьэнэшхуэ зиIэ упщIэхэм жэуап къыдимыту дыкъигъэнауэ: сыт мыбдежым щытщIэр? Сыт дылIэжа иужь хъунур? Сыт дыкъыщIагъэщIар?

Алыхьым лIыкIуэхэр къытхуигъэкIуащ, ди щыIэныгъэм и мыхьэнэр, сыт дигъэщIэну зыхуейри къэтщIэн папщIэ!

Алыхьым къигъэкIуащ и лIыкIуэхэр, абыхэм къыдагъэщIэн папщIэ Абы и закъуэ хуэпщылIыныгъэр зэрыхуэфащэр къэтщIэн папщIэ, Абы дауэрэ дыхуэпщылIынуми къэтщIэн папщIэ, Абы и унафэхэмрэ къытхуимыдэхэмрэ къэтщIэн папщIэ. ИтIани къэтщIэн папщIэ мыхьэнэшхуэ зиIэ гъуазэхэр, ахэм дытетмэ ди гъащIэри нэхъыфI хъуну, берычэтымрэ фIыгъуэхэмри ди куэд хъуну.

Алыхьым лIыкIуэ куэд къигъэкIуащ: Нухь, Ибрэхьим, Мусэ, Хьисэ. А лIыкIуэхэм Алыхьым нэщэнэхэрэ телъыджагъэхэрэ яритащ, пэжыр къызэрахьам и щыхьэту, КъэзыгъэщIым и деж къызэрикIахэм и щыхьэту.

Иужьрейуэ къигъэкIуар Мухьэмэдщ, Алыхьым и сэлатымрэ и сэламымрэ зылъысын. Абы Алыхьым къыхуригъэхащ КъурIэн ЛъапIэр.

ЛIыкIуэхэм нахуэу къыдгурагъэIуащ мы дуней тетыкIэр дэ дызэрагъэунэхуу зэрыщытыр, псэуныгъэ пэжыр цIыхум и псэр хэкIа иужь зэрыщIидзэр.

Алыхь закъуэм хуэпщылIхэу Абы гъусэ хуэзмыщIауэ Iиман къэзыхьахэм яхуэгъэхьэзыращ абдежым Жэнэтыр, абыхэм лIыкIуэхэри псори я фIэщ хъуащ. Абдежым щыIэщ МафIэри Алыхьым яхуигъэхьэзырауэ джаурхэм, нэгъуэщI тхьэхэм хуэпщылIхэм Алыхьым и гъусэу, лIыкIуэхэм щыщ дэтхэнэр зи фIэщ мыхъуахэм щхьэкIэ.

Алыхь ЛъапIэм жиIащ:

{Уэ Iэдэм и бынхэ, Си лIыкIуэхэр къыщыфхуэкIуэкIэ фэ фщыщхэу Си нэщэнэхэр къыфхуаIуатэу, абдежым тхьэшынагъуэ зыхэлъхэу фIы зыщIам шынагъуи илъагъунукъым, гукъеуи яIэнукъым. Си Ӏэятхэр пцӀыуэ зыбжхэмрэ епагэкIхэмрэ абыхэм, ахэр мафIэм хэхуэнущ, абым игъащIэкIэ къыхэнэнухэщ} (7: 35-36).

Алыхь ЛъапIэм жиIащ: {Фэ фыгугъауэ ара пщIэншэу фыкъэдгъэхъуауэ, икIи фэ къэвмыгъэзэжыну Дэ ди деж?} (23: 115).

КъурIэн ЛъапIэр

КъурIэн ЛъапIэр Алыхь Лъагэм и псалъэщ, ар иужьрей лIыкIуэ Мухьэмэд къыхуехащ, абы и бегъымбарыгъэр къэзыгъэпэж нэхъ телъыджэшхуэщ. Абы и унафэхэр захуэщ, и хъыбархэр пэжщ. Алыхьым ар пцIыуэ зыбжхэм яжриIащ абы и сурэхэм хуэдэ зы закъуэ къахьыну, ауэ ар яхузэфIэкIакъым абы и зэхэтыкIэм и дахагъым, и псалъэхэм я мыхьэнэшхуэ хэлъым щхьэкIэ. Абы хэтщ щыхьэтлыкъ куэд акъылыми хуэгъэзауэ, щIэныгъэм къигъэпэжхэри. Абыхэм псоми къагъэлъагъуэр а Тхылъыр цIыхум зэримытхыфынутэр, атIэ ар цIыхум я Тхьэ ЛъапIэу Лъагэм и псалъэщ.

Сыт лIыкIуэхэр куэд щIэхъур?

Алыхьым къигъэкIуащ лIыкIуэхэр ипэрей зэманым щегъэжьауэ, абыхэм цIыхухэр къыхураджэн папщIэ я Тхьэм, Абы и унафэхэр, хуит яхуимыщIахэр ирагъэщIэну. Абыхэм псоми къызыхураджэр Алыхь закъуэм хуэпщылIыныращ. Iумэтхэм щыщ гуэрым къагъанэу, е зэрахъуэкIыу щыщIадзэкIэ бегъымбарым къахуихьар Алыхь закъуэм узэрыхуэпщылIын хуейр, Алыхьым нэгъуэщI лIыкIуэр яхуигъакIуэт, я гъуэгур захуэ ящIыжын щхьэкIэ, цIыхухэм я фитIрэ захуэм хуагъэзэжын щхьэкIэ, Алыхь закъуэм хуэпщылIхэу икIи хуэжыIэщIэхэу. Иужьрейуэ Алыхь ЛъапIэм къигъэкIуар лIыкIуэхэм щыщу Мухьэмэдщ, Алыхьым и сэламыр зылъысын. Абы къихьащ игъащIэкIэ щыIэн шэрихьэтыр цIыхуу хъуам щхьэкIэ Къемэт махуэр къэсыху. Ар ипэкIэ щыIа шэрихьэтхэр нэгъэсауэ зыщIыжщ, ахэр псори тезыгъэкIуэтыжщ. Тхьэуэ ЛъапIэу Лъагэм а шэрихьэтымрэ лIыкIуэм къихьа динымрэ игъащIэкIэ зэхъуэкI имыIэу щыIэну ищIащ Къемэт махуэр къэсыху.

Аращи дэ, муслъымэнхэм, Алыхьым унафэ къызэрытхуищIауэ ди фIэщ мэхъур лIыкIуэхэу икIи Тхылъхэу ипэкIэ щыIауэ хъуар.

Алыхь ЛъапIэм жиIащ: {ЛIыкIуэми мыIуминхэми я фIэщ хъуащ и Тхьэм къыхуригъэхар, псоми я фIэщ хъуащ Алыхьри, Абы и мелыIычхэри, и Тхылъхэри, и лIыкIуэхэри. И лIыкIуэхэм щыщу зыри зэхэдз тщIыкъым. ЖаIащ: "Зэхэтхащ икIи дожыIэщIэр. Уэ ди Тхьэ, Уи гъэгъуныгъэращ дызыщIэлъэIур, Уи дежи дгъэзэжынущ"} (2: 285).

ЦIыхум Iиман къихьа хъунукъым лIыкIуэхэр псори и фIэщ мыхъумэ.

ЛIыкIуэхэр къэзыгъэкIуахэр Алыхьыращ. Абыхэм щыщу зы лIыкIуэ зи фIэщ мыхъум лIыкIуэу хъуари и фIэщ хъуркъым. ИкIи щыIэкъым а гуэныхьым нэхърэ нэхъ ин - Алыхьым и уэхьир IэщIыб пщIыну. Аращи, Жэнэтым уихьэным папщIэ лIыкIуэхэр псори уи фIэщ хъун хуейщ.

Аращи, мы зэманым щыIэу хъуам я фIэщ хъун хуейщ Алыхьым и лIыкIуэхэр псори. Ар зыми къигъэпэжыфынукъым иужьрей лIыкIуэу, икIэм ит Мухьэмэдыр, Алыхьым и сэлатымрэ и сэламымрэ зылъысын, и фIэщ мыхъуу.

Алыхьым щыжиIащ КъурIэн ЛъапIэм дэтхэнэ зы лIыкIуэр Алыхьым и лIыкIуэхэм щыщу зи фIэщ мыхъур Алыхьри зи фIэщ мыхъущ, Абы и уэхьир пцIыуэ зыбжщ.

Еджэ иужьрей Iэятхэм: {Алыхьымрэ и лIыкIуэхэмрэ зи фIэщ мыхъухэр хуейщ Алыхьымрэ и лIыкIуэхэмрэ зэхагъэкIыну, абыхэм жаIэр: "Зыгуэрхэр ди фIэщ мэхъухэр, нэгъуэщI гуэрхэр ди фIэщ хъуххэкъым". Ахэр хуейхэщ абым и зэхуаку гъуэгу хахыну. Ахэращ ипэжыпIэкIэ джаурхэр, джаурхэм хьэзаб зыгъэпудыр яхуэдгъэхьэзыращ} (4: 150-151).

Сыт Ислъамым къикIыр?

Ислъамыр Алыхьыр бгъэзакъуэу ухуэпщылIыныращ ухуэжыIэщIэу, Абы и унафэхэр бгъэзэщIэныращ, Абы и Шэрихьэтыр къабыл пщIынращ ухуэарэзыуэ.

Алыхьым лIыкIуэхэр псори къигъэкIуащ зы закъуэм къыхураджэу: Алыхь Закъуэм хуэпщылIыныращ гъусэ хуамыщIу.

Ислъамыр бегъымбархэм псоми я динщ, абыхэм къызыхураджэр зыт, ауэ я шэрихьэтхэр зэщхьэщыкIт. Муслъымэн закъуэхэращ нобэ дин пэжым тетхэр, бегъымбархэм псоми къахуеха диным. Ислъамыращ мы ди уахътэм дин пэжыр. Тхьэуэ Ибрэхьим, Мусэ, Хьисэ къэзыгъэкIуаращ абыхэм яужьрейуэ Мухьэмэди къэзгъэкIуар. Ислъамым и Шэрихьэтым ипIэк1э щыIа шэрихьэтхэр псори тригъэкIащ.

Нобэ дину щыIэу хъуар, Ислъамым мыхъумэ, цIыхухэм езыхэм къагупсысауэ аращ е ипэкIэ Алыхьым къригъэха дину, ауэ цIыхухэм я IэхэмкIэ зэIащIэри езыхэм къагупсыса пцIырэ псысэ къанэсыжарэ езы цIыхухэм зэхалъхьарэ халъхьахэщ. АтIэ муслъымэнхэм я фIэщхъуныгъэр нахуэщ, зыщ икIи зихъуэжкъым. Еплъ КъурIэн лъапIэм, ар зы тхылъщ, дэтхэнэ муслъымэн къэралыгъуэми зихъуэжкъым.

Алыхь ЛъапIэм жиIащ КъурIэным:

{ЖыIэ: "Алыхьыр ди фIэщ хъуащ, дэ къытхуехари, Ибрэхьими, Исмэхьили, Исхьэкъи, Екъуби, я щIэблэхэми къахуехари, Муси, Хьиси къратари, бегъымбархэми я Тхьэм къаритари ди фIэщ хъуащ, ахэр зэхэдз тщIыкъым, Абы дыхуэжыIэщIэщ. Ислъам диным нэгъуэщI хущIэкъум къабылу Iрахынукъым, ар ахърэтым хэкIуэдахэм щыщынущ} (3: 84-85).

Сыт муслъымэнхэм ягу хуилъыр Хьисэ, Алыхьым и сэлатыр зылъысын?

ПщIэрэ уэ муслъымэнхэм Алыхьым и бегъымбар Хьисэ я фIэщ зэрыхъун хуейр, фIыуэ ялъагъун зэрыхуейр, пщIэ зэрыхуащIын хуейр, абы и дину Алыхьыр гъэзакъуэным, гъусэ хуэпщI зэрымыхъуным къыхуезыджэр я фIэщ зэрыхъун хуейр! Муслъымэнхэм я фIэщ мэхъур бегъымбар Хьисэрэ бегъымбар Мухьэмэдрэ, Алыхьым и сэлатымрэ и сэламымрэ ахэм тIуми ялъыс, тIури бегъымбархэу зэрыщытахэр, цIыхухэр Алыхьым и гъуэгумрэ жэнэтым и гъуэгумрэ къыхураджэну къызэрагъэкIуахэр.

Дэ ди фIэщ мэхъур Хьисэ Алыхьым и бегъымбар нэхъ лъапIэхэм зэращыщыр, ар телъыджэу къызэрыхъуари ди фIэщ мэхъур. Алыхьым къытхуиIуэтащ КъурIэным деж Хьисэ къызэригъэхъуар адэ имыIэу Адэм къызэригъэхъуам хуэдэу ади, ани имыIэу. АтIэ Алыхьышхуэм сытри хузэфIокIыр.

ИкIи дэ ди фIэщ мэхъур Хьисэ зэрымытхьэр икIи Тхьэм и къуэуи зэрыщымытыр, ар псэууэ пхъэми зэрыкIэрамыIулIар, атIэ Алыхьым ар дрихьеящ, ахърэт зэманым унафэ къэзыхь захуэу къехынущи муслъымэнхэм ягъусэнущ ар, сыту жыпIэмэ муслъымэнхэращ Iиман къэзыхьауэ тхьэгъэзакъуэныгъэм тетхэр езы Хьиси, адрей бегъымбархэми къызыхураджэу щытам.

Алыхь ЛъапIэм къыджиIащ КъурIэным Хьисэ къихьа диныр чыристэнхэм зэрызэрахъуэкIар, зэзыхъуэкIа гъуэщахэм Инджылыр зэрызэрахъуэкIар, Хьисэ жимыIахэр абы зэрыхагъэхьар. Ар нахуэу къегъэпэжыр Инджылым и тетхыкIыныгъэ зэмылIэужьыгъуэу куэд зэрыщыIэм, абыхэм зым зыр къигъэпцIыжу куэд зэритым.

Алыхьым къытхуиIуэтащ Хьисэ и Тхьэм хуэпщылIу зэрыщытар, зыми унафэ зэрыхуимыщIар езым зыхуигъэпщылIыну, атIэ унафэ хуищIт и лъэпкъым ар къэзыгъэщIам хуэпщылIынухэу, ауэ шейтIаным чыристэнхэр Хьисэ хуэпщылIыным хуишахэщ. Алыхьым къыджиIащ КъурIэным Езым нэгъуэщI хуэпщылIахэм зыми зэрыхуимыгъэгъунур, Хьиси Къемэт махуэм хуэпщылIауэ хъуам зыри зэрыхимыщIыкIам щыхьэт зэрыхъунур. Абыхэм яжриIэнущ унафэ яхуищIу зэрыщытар КъэзыгъэщIым хуэпщылIынхэу, езы Хьисэ хуэпщылIыну зэи унафэ зэрахуимыщIар. Абы и щыхьэтщ Алыхь ЛъапIэм и псалъэхэр:

{Уэ Тхылъ къызхуехахэ, фи диным евмыгъэлей, пэж фIэкIаи жывмыIэ Алыхьым щхьэкIэ. ИпэжыпIэкIэ Хьисэ Мэрям и къуэр Алыхьым и лIыкIуэщ, и псалъэщ, Мэрям къыхуригъэхауэ, Абы и деж къикIа псэщ. Аращи Алыхьымрэ и лIыкIуэхэмрэ фи фIэщ фщIы икIи щыуэ жывмыIэ, щывгъэти фэркIэ нэхъыфIщ. ИпэжыпIэкIэ Алыхьыр Тхьэ закъуэщ, фIыщIэр зыхуэфащэщ, дауэрэ Абы бын иIэну уафэхэми щIылъэми щыIэр зэуэ Езым ейуэ? Алыхьыр ирокъур уэчылу} (4: 171).

Алыхь ЛъапIэм жиIащ: {Алыхьым жиIат: "Уэ Мэрям и къуэ Хьисэ, уэра яжезыIар цIыхухэм: "Сэрэ си анэмрэ тхьэуэ дыфщтэ Алыхьыр къэвгъани?" ЖиIащ: "Уэ ЛъапIэ, сэ схуэмыфащэр жысIэну щыткъым, ар жысIауэ щытмэ, Уэ пщIэнут. Сэ сигум илъыр уощIэр, ауэ Уэ уи гум илъыр сщIэркъым. Уэращ ущэхуахэр зыщIэр} (5: 116).

Ахърэтым къыщелыну хуейр Ислъам диным ихьэн хуейщ икIи бегъымбар Мухьэммэд, Алыхьым и сэлатымрэ и сэламымрэ зылъысын, и гъуэгум тетын хуейщ.

Пэжу бегъымбархэмрэ лIыкIуэхэмрэ, Алыхьым и сэламыр зылъысынхэ, псоми зыуэ жаIар ахърэтым къелынухэр зэры муслъымэн къудейхэращ: Алыхь ЛъапIэр зи фIэщ хъуахэу, Абы хуэпщылIыным гъусэ хуамыщIу, бегъымбархэри лIыкIуэхэри псори зи фIэщ хъуахэращ. Мусэ бегъымбарым и зэманым псэуахэу, ар зи фIэщ хъуахэу, абы жиIам тетахэр муслъымэнхэщ, мыIумин пэжхэщ. Ауэ Хьисэ Алыхьым къигъэкIуа иужькIэ Мусэ кIэлъыкIуахэм я фIэщ хъун хуейт Хьисэ икIи абы жиIэм тетын хуейхэт. Хьисэ зи фIэщ хъуахэр муслъымэн пэжхэщ, ар зи фIэщ мыхъуауэ: "Мусэ и диным сыкъытенэнущ", - жызыIахэр мыIуминхэкъым, абыхэм Алыхьым къигъэкIуа бегъымбарыр я фIэщ хъуакъыми. ИужькIэ Алыхьым иужьрей бегъымбар Мухьэмэд къигъэкIуащ, дэтхэнэми ар я фIэщ хъун хуей ищIащ. Тхьэращ Муси, Хьиси къэзыгъэкIуар, Аращ иужьрей лIыкIуэ Мухьэмэди къэзыгъэкIуар. Мухьэмэд, Алыхьым и сэлатымрэ и сэламымрэ зылъысын, къихьар зи фIэщ мыхъуауэ Мусэ е Хьисэ сакIэлъыкIуэу сыкъэнэнущ жызыIэхэр атIэ мыIуминхэкъым.

Ирикъукъым цIыхум муслъымэнхэм пщIэ яхуищIу жиIэ къудеймэ. ИкIи ирикъукъым ахърэтым къыщелын щхьэкIэ факъырэIус итынымрэ хуэныкъуэ зиIэхэм дэIэпыкъу къудеймэ. Абы фIэкI имыIэу Алыхьри, Абы и Тхылъхэри, Абы и лIыкIуэхэри, Къемэт махуэри и фIэщ хъун хуейщ, Алыхьым адрей ищIэхэр къабылу Iихын щхьэкIэ. ЩыIэкъым тхьэ куэдым хуэпщылIынымрэ, Алыхьыр уи фIэщ мыхъунымрэ, Абы и уэхьи къригъэхар IэщIыб щIынымрэ, иужьрей бегъымбар Мухьэмэд, Алыхьым и сэлатымрэ и сэламымрэ зылъысын, къыхуехар мыдэнымрэ нэхъ гуэныхьышхуэ. Журтхэмрэ чыристэнхэмрэ Мухьэмэд лIыкIуэм, Алыхьым и сэлатымрэ и сэламымрэ зылъысын, къыхуехар зэхэзыхахэу ар зи фIэщ мыхъуахэр, Ислъам диным къихьэну зымыдахэр псори жыхьэнэмэм и мафIэм хэхуэнухэщ, игъащIэкIи абым къыщинэнущ Алыхь ЛъапIэм зэрыжиIам хуэдэу:

{Тхылъ зратахэмрэ, тхьэ куэдым хуэпщылIхэмрэ ящыщ джаурхэр жыхьэнэмэ мафIэм игъащIэкIэ къыхэнэнухэщ, ахэр псэущхьэхэм я нэхъ Iейщ} (98: 6).

Иужьрейуэ Алыхьым цIыхубэм къахуригъэхащи диныр, дэтхэнэ зыми Ислъамым и гугъу зэхэзыхым, иужьрей лIыкIуэ Мухьэмэд, Алыхьым и сэлатымрэ и сэламымрэ зылъысын, и гугъу зэхэзыхым ар я фIэщ хъун хуейщ, абы и шэрихьэтым тетын хуейщ, абы унафэу ищIыр игъэзэщIэн хуейщ, къыхуимыдэр къигъэнэн хуейщ. Аращи мы иужьрей диным и гугъу зэхэзыхауэ ар зымыдам Алыхьым зыри къабылу Iихынукъым икIи ахърэтым хьэзаб щытрилъхьэнущ. Абым и щыхьэтщ Алыхь ЛъапIэм и псалъэхэр:

{Ислъам диным нэгъуэщI хущIэкъум къабылу Iрахынукъым, ар ахърэтым хэкIуэдахэм щыщынущ} (3: 85).

Алыхь ЛъапIэм жиIащ: {ЖыIэ: "Уэ Тхылъ зыратахэ, фэри, дэри ди яку дэлъ зы псалъэм фыкъыхуэкIуэ: Алыхьым нэгъуэщI зыми дыхуэмыпщылIыну, Абы зыри гъусэ хуэдмыщIыну, Алыхьым нэгъуэщI фэри, дэри дымыщтэну дызыхуэпщылIыну". Абы иужь я щIыбхэр къагъазэмэ, жыфIэ: "Щыхьэт фыхъу дэ дызэрымуслъымэнхэмкIэ"} (3: 64).

Сыт стелъыр муслъымэн сыхъун папщIэ?

Ислъам диным уихьэн щхьэкIэ мы лъабжьихыр уи фIэщ хъун хуейщ:

Алыхь ЛъапIэр уи фIэщ хъун хуейщ, Ар зэры - КъэзыгъэщIыр, Ерыскъы зытыр, ЗезыгъакIуэр, УнафэщIыр, Абы зыри зэрыхуэмыдэр, щхьэгъуси быни зэримыIэр, Абы и закъуэ хуэпщылIыныр зэрыхуэфащэр.

МелыIычхэр уи фIэщ хъун хуейщ, ахэр Алыхь ЛъапIэм и пщылIхэщ, нурым къыхищIыкIахэщ, ягъэзащIэ IэнатIэхэри яритащ. А я IэнатIэхэм щыщщ абыхэм бегъымбархэм уэхьи къызэрыхурахьэхыр.

Алыхьым и бегъымбархэм къахуригъэха Тхылъу хъуар уи фIэщ хъун хуейщ (Тэуратымрэ Инджылымрэ хуэдэу), иужьрейри ахэм щыщу КъурIэн ЛъапIэращ.

ЛIыкIуэхэр псори уи фIэщ хъун хуейщ, псалъэм папщIэ, Нухь, Ибрэхьим, Мусэ, Хьисэ, абыхэм яужьрейуэ Мухьэмэд. Ахэр цIыхухэм щыщщ, Алыхьым уэхьи къахуригъэхащ, нэщэнэхэмрэ телъыджагъэхэмрэ я пэжыгъэр къигъэлъагъуэу яритащ.

Къемэт махуэр уи фIэщ хъун хуейщ, абдежым Алыхьым япэрейхэри, иужьрейхэри къигъэхъужынущ, къигъэщIауэ хъуам Алыхьым я унафэр ищIэнущ, Iиман къэзыхьахэр Жэнэтым иригъэхьэнущ, джаурхэр Жыхьэнэмэм иригъэхьэнущ.

Алыхьым къыпхуитхар (къэдыр) уи фIэщ хъун хуейщ, Алыхьым псори зэрищIэр - къэхъуауэ щытари, къэхъунури, Алыхьым ар псори зэритхар икIи зэрыхуеяр къэхъуну икIи псори къызэригъэщIар уи фIэщ хъун хуейщ.

Ислъамыр насыпым и гъуэгущ

Ислъамыр бегъымбархэм псоми я динщ, ар хьэрып къудейхэм я динкъым.

Ислъамыр насып пэжым и гъуэгущ мы дунейм, игъащIэ тхъэгъуэщ ахърэтми.

Ислъам дин закъуэращ псэри, пкъыри зыхуейуэ хъуар езыгъэгъуэтыфыр, цIыхум я бэлыхь псоми и хэкIыпIэр зыхэлъыр.

Алыхь ЛъапIэм жиIащ:

{Абы жиIащ: "Псори зэгъусэу фикI мыбы, зыр адрейм и бийуэ фыщытынущ. Си дежым къикIауэ гъуэгу захуэр къыфхуэкIуэмэ, а захуэм тетыр гъуэщэнукъым икIи насыпыншэ хъунукъым. Ауэ Сэ къезгъэхам зи щIыб хуэзыгъазэм, гъащIэ хьэлъэ хуэфащэщ, Къемэт махуэми нэфу къэдгъэхъужынущ} (20: 123-124).

Сыт фейдэуэ сиIэр Ислъамым сихьэмэ?

Ислъамым уихьэным фейдэшхуэхэр хэлъщ, абыхэм щыщщ:

- ЦIыхур мы дунейм щехъулIэнущ икIи пщIэ иIэ хъунущ Алыхьым и пщылI зэрыхъуам тету, ар мыхъумэ хуеиныгъэхэм, шейтIаным, фIэфIыныгъэхэм я пщылIщ.

- Нэхъ ехъулIэныгъэшхуэр ахърэтым и дежщ, абдежым мафIэм и хьэзабым къыщелынущ, жэнэтым ихьэнущ, Алыхьым и арэзыныгъэмкIэ ехъулIэнущ, игъащIэкIэ жэнэтым къинэнущ.

- Алыхьым жэнэтым иригъэхьэхэр игъащIэкIэ тхъэгъуэм къыхэнэнущ мылIэжхэу, узу зыри къамыуалIэу, нэщхъеягъуи, жьыгъи къалъэмыIэсу, зыхуейуэ хъуари ягъуэтынущ.

Жэнэтым щыIэщ тхъэгъуэхэу нэм имылъэгъуахэр, тхьэкIумэм зэхимыхахэр, цIыхум зэи игу къэмыкIахэр.

Абым и щыхьэтхэм щыщщ Алыхь ЛъапIэм жиIар: {ЦIыхухъуми, цIыхубзми фIы зыщIам, ар мыIумину щыту, гъащIэ дахэу дгъэпсэунущ, я псапэри яттыжынущ нэхъыфIу, абыхэм ящIэу щытам нэхърэ} (16: 97).

Сыт сфIэкIуэдынур Ислъамыр къэзмыщтэмэ?

ЦIыхум щIэныгъэм и нэхъ ин дыдэмрэ щыгъуазэнымрэ фIэкIэдынущ, ар Алыхьым епха щIэныгъэмрэ щыгъуазэныгъэмрэщ. Абы фIэкIуэдынущ Алыхьыр и фIэщ хъуныр, аращ атIэ шынагъуэншагъэрэ псэхуныгъэрэ мы дунейм цIыхум къезытыр, ахърэтми тхъэгъуэ мыухыж щIыхуэфащэр.

Алыхьым цIыхухэм къахуригъэха Тхылъхэм я нэхъ лъапIэм щыгъуазэнри фIэкIуэдынущ, а Тхылъ ЛъапIэри и фIэщ хъуныр фIэкIуэдынущ.

Бегъымбар лъапIэхэр и фIэщ хъуныр фIэкIуэдынущ, абыхэми жэнэтым ящIыгъуныр Къемэт махуэм фIэкIуэдынущ. Ар шейтIанхэм, мыхъумыщIакIуэхэм, лей ехакIуэхэм ящIыгъуу жыхьэнэмэ мафIэм хэхуэнущ, сытым хуэдэу Iеищэ апхуэдэ гъусэхэр.

Алыхь ЛъапIэм жиIащ:

{ЖыIэ: "ХэкIуэдэжахэр ипэжыпIэкIэ Къемэт махуэм я псэхэри, я унагъуэхэри хэзыгъэкIуэдэжхэращ. ИпэжыпIэкIэ, аращ хэкIуэдэжыныгъэ нахуэр! Абыхэм ящхьэкIэ мафIэм и Iугъуэращ щыIэнур, я щIагъми а Iугъуэращ". Апхуэдэу Алыхьым и пщылIхэр егъэшынэр. Уэ Си пщылIхэ, Сэ фыкъысщышынэ!} (39: 15-16).

Унафэ къэпхьыну зомыгъэгувэ!

Мы дунейр игъащIэкIэ уздэщыIэн щIыпIэкъым...

Дэтхэнэ дахагъэри текIуэдыкIынущ абы, дэтхэнэ хуеиныгъэри ужьыхыжынущ...

ИтIанэ къэкIуэнущ пщIауэ хъуам щхьэкIэ къызэроупщIыжыну махуэр. Ар Къемэт махуэращ. Алыхь ЛъапIэм жиIащ: {Абдежым Тхылъыр къагъэтIылъынущ, икIи уэ плъагъунущ гуэныхьыщIэхэр абым итым зэрыщышынэхэр. Абыхэм жаIэнущ: "ДыхэкIуэда мыгъуэщ! Сыт Тхылъ мыр! Зыри мащIэм щыщуи, куэдым щыщуи къигъэнакъым абы къимылъытауэ!" Абыхэм я пащхьэм илъу къалъэгъунущ ящIауэ хъуар, икIи уи Тхьэм зыми залымыгъэ ирихынукъым} (18: 49).

Алыхь ЛъапIэу Лъагэм къыджиIащ Ислъам диныр къэзмыщта цIыхур игъащIэкIэ жыхьэнэмэ мафIэм къызэрыхэнэнур.

АтIэ ар зыхэнынур мащIэкъым, атIэ ар ин дыдэщ: {Ислъам диным нэгъуэщI хущIэкъум къабылу Iрахынукъым, ар ахърэтым хэкIуэдахэм щыщынущ} (3: 85).

Ислъам дин закъуэращ Алыхьым къабыл ищIыр, нэгъуэщI дин къабыл ищIкъым.

Алыхьыращ дыкъэзыгъэщIар, Абы и деж дгъэзэжынущ, мы дунейри дыкъихутэным папщIэ ищIащ.

Быдэу уи фIэщ гъэхъу: мы дунейм уи гъащIэр кIэщIщ, пщIыхьэпIэм хуэдэщ... Зыми ищIэркъым щылIэнур!

Сыт атIэ укъэзыгъэщIам жэуапу ептынур Къемэт махуэм къоупщIмэ: "Сыт пэжым ущIытемыувар? Сыт иужьрей бегъымбарым ущIыкIэлъымыкIуар?"

Сыт уи Тхьэм жэуапу ептынур Къемэт махуэм? Абы къыбжиIарэ пэт Ислъамым уи щIыб хуэбгъазэу джаурыгъэм ухуэкIуэмэ къэхъунур, джаурхэр игъащIэкIэ мафIэм зэрыхэкIуэдэнухэр!

Алыхь ЛъапIэм жиIащ: {Ауэ джаурхэмрэ, Ди нэщэнэхэр пцIыуэ зыбжахэмрэ - ахэр МафIэм хэхуэнухэращ, игъащIэкIэ къинэнухэщ абдежым} (2: 39).

Зигъэхеижыфынукъым адэжьхэм я щапхъэ тету жызыIэу пэжыр къэзыгъанэм

Алыхьым къыджиIащ цIыху куэдым зэрамыдэр Ислъам диным къихьэну, здэпсэум къэзыухъуреихь цIыхухэм щышынэхэу.

Куэдым Ислъамыр ядэркъым, я фIэщхъуныгъэу я адэжьхэм къащIэнахэр яхъуэжыну хуейхэкъыми, абыхэм есахэщи. Куэдым лъэпкъым егъэлеяуэ хуэпэжынымрэ пцIым хущIэкъунымрэ къахуэнауэ Ислъамыр ядэркъым.

Абыхэм псоми я щхьэусыгъуэхэр пцIыхэщ, икIи Алыхьым и пащхьэ иувэнухэщ зыри жамыIэфу зрагъэпэжыну.

Тхьэ зи фIэщ мыхъум щхьэусыгъуэу ищIыфынукъым унагъуэ Тхьэ зи фIэщ мыхъум къызэрыхъуар, абы щхьэкIэ Тхьэ и фIэщ мыхъуу къэнэну! АтIэ акъылу Алыхьым къритар къигъэсэбэпу уафэхэмрэ щIылъэмрэ я инагъым егупсысын хуейщ. КъэзыгъэщIам кърита акъылыр къигъэсэбэпу къызгуригъэIуэн хуейщ мы дунеишхуэм къэзыгъэщIар зэриIэр. Апхуэдэ къабзэуи мывэхэм, сынхэм хуэпщылIхэри аращ, абыхэми яIэкъым щхьэусыгъуэ я адэжьхэм я лъэужьыр яхуну. Ахэри пэжым лъыхъуэн хуейщ, и щхьэ еупщIыжын хуейщ: "Дауэрэ сыхуэпщылIрэ псэ зыIумыт, сызэхэзмыхым, сызмылъагъум, зыкIи сэбэп къысхуэмыхъуфым?!"

Апхуэдэщ чыристэнри, абым и фIэщ хъур цIыхум и фитIрэми[1], и акъылми имыдэщ. Абы упщIэ зритыжын хуейщ: "Дауэрэ Тхьэм зэриукIынур и бын гуэныхь лъэпкъ зымыщIар нэгъуэщI цIыхухэм я гуэныхьхэм щхьэкIэ?! Ар залымыгъэщ! Дауэрэ цIыхухэм пхъэм ираIулIыну е яукIыну Тхьэм и къуэ? Тхьэм хузэфIэмыкIыу ара и быным къыщхьэщыжыну?"

Акъыл зиIэм и пщэм дэлъыр пэжым тетыныращ, адэжьхэм я гъуащэныгъэм кIэлъыкIуэныракъым.

Алыхь ЛъапIэм жиIащ: {Абыхэм щыжраIэкIэ: "Алыхьым къригъэхамрэ лIыкIуэмрэ и деж фыкъакIуэ",- жаIэжыр: "Дэ ди адэжьхэр зытету дгъуэтар тхурокъур". АтIэ я адэжьхэм зыри ямыщIэу, гъуэгу захуэми темыту щытамэ щэ?} (5: 104).

Сыт ищIэн хуейр Ислъамым къихьэну зигу илъым, ауэ и Iыхьлыхэм ягъэ кърахыну тешыныхьым?

Ислъамыр къищтэну хуейуэ къэзухъуреихьхэм щышынэм диныр къищтэу ар иущэху хъунущ, Алыхьым хуигъэпсынщIэу, гъуэгу къыхузэIуихыху, ар и щхьэ хуитыжу, зэрымуслъымэныр къигъэлъагъуэфу хъуху.

Унафэу птелъыр занщIэу диныр къэпщтэнращ, атIэ унафэу птелъкъым псоми ябгъэщIэну уэ Ислъамыр къызэрыпщтар, абы и макъри бгъэIуну уи пщэ дэлъкъым, зэран къыпхуэхъуну щытмэ ар.

ЗэгъащIэ Ислъам диныр къызэрыпщтам тету муслъымэн мелуанхэм я къуэш ухъунущ, уи къалэм дэт мэжджытым уахыхьэфынущ, абыхэм чэнджэщ къаIыпхыфынущ е дэIэпыкъуэгъу къыпхуэхъунухэщ я гуапэу.

Алыхь ЛъапIэм жиIащ:

{Алыхьым щышынэм хэкIыпIэ иретыр. Ерыскъыи иретыр здэмыгугъа лъэныкъуэм къикIыу} (65: 2-3).

ЕджакIуэ лъапIэ!

Алыхьышхуэу укъэзыгъэхъуар, фIыгъуэу хъуар къозытар, уи анэм и ныбэм уилъу шхыныр къыпхуэзыгъакIуэтэр, жьы иджыпсту къапшэр къозытыр, Ар арэзы пщIынракъэ нэхъ япэр, цIыхухэр арэзы пщIыным упылъ нэхърэ?

Мы дунейми ахърэтми ущехъулIэныр и уасэкъэ мы дуней псынщIэу кIуэдыжым щыщ псори щIэптыныр? Аращ, Алыхьым и цIэкIэ соIуэр!

Уи блэкIар пэрыуэгъу умыгъэхъу, уи гъуэгу къуаншэр захуэ пщIыжынымкIэ, Iуэху захуэ пщIэным.

ИпэжыпIэкIэ Iиман къэзыхьа хъу нобэ! ШейтIаным хыумыдэ пэжым утетыным пэрыуэгъу хуэхъуну!

Алыхь ЛъапIэм жиIащ:

{Уэ цIыхухэ, фи Тхьэм и деж къикIауэ щыхьэтлыкъ къыфхуехащ, нэхугъэ нахуэри къыфхуедгъэхащ. АтIэ Алыхьыр зи фIэщ хъууэ быдэу Абы еувэлIахэр и гущIэгъумрэ и жумартыгъэмрэ хигъэхьэнущ, гъуэгу захуэми тришэнухэщ} (4: 174-175).

Уи гъащIэм нэхъ унафэ мыхьэнэшхуэ зиIэр къэпхьыну ухьэзыр?

Мы жытIауэ хъуар акъылым техуэу плъагъумэ, уигукIэ пэжыр къэпщтамэ, япэрей лъэбакъуэр гъэув муслъымэн ухъуным ухуэзышэ гъуэгум. СыбдэIэпыкъуну ухуей уи гъащIэм и унафэ нэхъыщхьэ дыдэр къэпхьыну икIи муслъымэн узэрыхъунур къыбгурызгъэIуэну?

Уи гуэныхьхэр пэрыуэгъу умыгъэхъу Ислъам диным уихьэну, Алыхь ЛъапIэм дигъэщIащ КъурIэным и деж Абы гуэныхь псори зэрыхуигъэгъур диныр къэзыщтауэ тобэ къэзыхьам. АтIэ диныр къэпщта иужькIи гуэныхь гуэрхэр бгъэхъэнкIэ мэхъур, сыту жыпIэмэ дэ дыцIыхущ, дымелыIыч гуэныхьыншэкъым. АтIэ дэ Алыхьым къытхуигъэгъуну делъэIун хуейщ, тобэ къыхуэтхьын хуейщ. Алыхь ЛъапIэм щилъагъукIэ пэжым узэрыхуэпIащIэр, Ислъам диным узэрихьар, щыхьэт псалъэхэр зэрыжыпIар къыбдэIэпыкъунущ гуэныхьхэр къэбгъэнэну. Алыхьым хуэзунэтIауэ пэжым тетым Алыхьыр дэIэпыкъуэгъу хуохъур, нэхъыбэж фIыуэ хуэзэным папщIэ. Аращи, шэч къытумыхьэу иджыпсту Ислъам диным къихьэ.

Абы и щыхьэтлыкъхэм щыщщ Алыхь ЛъапIэм и псалъэхэр: {ЯжеIэ джаурхэм абыхэм щагъэтмэ зэрахуигъэгъунур ипэкIэ къэхъуахэр} (8: 38).

Сыт сщIэн хуейр муслъымэн сыхъун щхьэкIэ?

Ислъам диным уихьэныр псынщIэщ икIи хуейкъым зыхуэгъэхьэзырыныгъэрэ зыгуэр къызэхуэсынрэ. ЦIыхум щыхьэтым и псалъэхэр жиIэн хуей къудейуэ аращ къикIыр ищIэу, ар и фIэщ хъууэ. Абы жиIэн хуейщ: "Щыхьэт сохъур Алыхьым нэгъуэщI тхьэ зэрыщымыIэм, икIи Мухьэмэд Абы зэрилIыкIуэр" (Ашхаду ан ля иляха илля Аллах, уа ашхаду анна Мухьаммадан расулю Аллах). Ар хьэрыпыбзэкIэ жыпIэфмэ дэгъуэщ, ауэ къохьэлъэкIмэ уи бзэмкIэ жыпIэми хъунущ. Апхуэдэу муслъымэн ухъунущ. ИтIанэ уи диным щыгъуазэ ухъун хуейщ, аращ уи насыпыр мы дунейм зэпхар, ахърэтми укъезыгъэлынур.

Ислъамым щхьэкIэ нэхъыбэ къэпщIэну ухуеймэ, мы сайтым уихьэну чэнджэщ удот:

Ислъамыр зэрыпIыгъыныр зэбгъэщIэну ухуеймэ, мы сайтым уихьэну чэнджэщ удот: