أدعية جامعة

جامع دعائیں [1] [1] یہ کچھ جامع دعائیں ہیں، جو قرآن کریم میں وارد ہوئی ہیں یا نبی ﷺ سے صحیح ثابت ہیں۔ ہر زمان و مکان میں ان دعاؤں کا پڑھنا مشروع ہے، جیسے کہ طواف و سعی کے دوران اورعرفات و مزدلفہ میں۔ لیکن یہ ان کے لئے خاص نہیں ہیں۔

اول : قرآن کی دعائیں۔

ہمارے پروردگار! تو ہم سے قبول فرما، تو ہی سننے واﻻ اور جاننے واﻻ ہے۔ اور ہماری توبہ قبول فرما، تو توبہ قبول فرمانے واﻻ اور رحم وکرم کرنے واﻻ ہے۔

اے ہمارے رب! ہمیں دنیا میں بھلائی عطا فرما اور آخرت میں بھی بھلائی عطا فرما اور ہمیں عذاب جہنم سے بچا۔

اے ہمارے رب! اگر ہم بھول گئے ہوں یا خطا کی ہو، تو ہمیں نہ پکڑنا۔

اے ہمارے رب! ہم پر وه بوجھ نہ ڈال جو ہم سے پہلے لوگوں پر ڈاﻻ تھا۔

اے ہمارے رب! ہم پر وه بوجھ نہ ڈال جسے اٹھانے کی ہمارے اندر طاقت نہ ہو اور ہم سے درگزر فرما اور ہمیں بخش دے اور ہم پر رحم کر! تو ہی ہمارا مالک ہے۔ ہمیں کافروں کی قوم پر غلبہ عطا فرما۔

اے ہمارے رب! ہمیں ہدایت دینے کے بعد ہمارے دل ٹیڑھے نہ کردے اور ہمیں اپنے پاس سے رحمت عطا فرما۔ یقیناً تو بڑا ہی نوازنے واﻻ ہے۔

اے ہمارے رب! ہم ایمان ﻻ چکے، اس لئے ہمارے گناه معاف فرما اور ہمیں آگ کے عذاب سے بچا۔

اے میرے پروردگار! مجھے اپنے پاس سے پاکیزه اوﻻد عطا فرما۔ بے شک تو دعا سننے واﻻ ہے۔

اے ہمارے پالنے والے معبود! ہم تیری اتاری ہوئی وحی پر ایمان ﻻئے اور ہم نے تیرے رسول کی اتباع کی، پس تو ہمیں گواہوں میں لکھ لے۔

اے ہمارے پروردگار! ہمارے گناہوں کو بخش دے اور ہم سے ہمارے کاموں میں جو بے جا زیادتی ہوئی ہے اسے بھی معاف فرما اور ہمیں ﺛابت قدمی عطا فرما اور ہمیں کافروں کی قوم پر علبہ عطا فرما۔

اے ہمارے پروردگار! تو نے یہ بے فائده نہیں بنایا، تو پاک ہے، پس ہمیں آگ کے عذاب سے بچا لے۔

اے ہمارے پالنے والے! تو جسے جہنم میں ڈالے یقیناً تو نے اسے رسوا کیا اور ﻇالموں کا مددگار کوئی نہیں۔

اے ہمارے رب! ہم نے سنا کہ منادی کرنے واﻻ بآواز بلند ایمان کی طرف بلا رہا ہے کہ لوگو! اپنے رب پر ایمان لاؤ۔ پس ہم ایمان لے آئے۔ یا الٰہی! اب تو ہمارے گناه معاف فرما اور ہماری برائیاں ہم سے دور کر دے اور ہمیں موت نیک لوگوں کے ساتھ دے۔

اے ہمارے پالنے والے معبود! ہمیں وه دے جس کا وعده تو نے ہم سے اپنے رسولوں کی زبانی کیا ہے اور ہمیں قیامت کے دن رسوا نہ کر، یقیناً تو وعده خلافی نہیں کرتا۔

اے ہمارے رب! ہم نے اپنے اوپر ظلم کیا ہے اور اگر تو ہماری مغفرت نہ کرے گا اور ہم پر رحم نہ کرے گا تو واقعی ہم نقصان پانے والوں میں سے ہوجائیں گے۔

اے ہمارے رب! ہم کو ﻇالم لوگوں کے ساتھ شامل نہ کر۔

میرے لیے اللہ کافی ہے۔ اس کے سوا کوئی معبود نہیں۔ میں نے اسی پر بھروسہ کیا اور وه بڑے عرش کا مالک ہے۔

اے ہمارے پروردگار! ہم کو ان ﻇالموں کے لئے فتنہ نہ بنا اور اپنی رحمت سے ہم کو ان کافروں سے نجات دے۔

اے میرے پروردگار! اس شہر کو امن واﻻ بنادے اور مجھے اور میری اوﻻد کو بت پرستی سے بچائے رکھ۔

اے میرے پالنے والے! مجھے نماز کا پابند رکھ اور میری اوﻻد میں بھی اس روش کے لوگ بنا۔ اے ہمارے رب! میری دعا قبول فرما۔

اے ہمارے پروردگار! مجھے بخش دے اور میرے ماں باپ کو بھی بخش دے اور دیگر مومنوں کو بھی بخش دے، جس دن حساب ہونے لگے۔

اے ہمارے پروردگار! ہمیں اپنے پاس سے رحمت عطا فرما اور ہمارے کام میں ہمارے لئے راه یابی کو آسان کردے۔

اے میرے پروردگار! میرا سینہ میرے لئے کھول دے اور میرے کام کو میرے لیے آسان کر دے۔

میرے پروردگار! میرے علم میں افزونی عطا فرما۔

الٰہی! تیرے سوا کوئی معبود نہیں ہے، تو پاک ہے۔ کے شک میں ﻇالموں میں ہو گیا۔

اے میرے پروردگار! مجھے تنہا نہ چھوڑ۔ تو سب سے بہتر وارث ہے۔

اے میرے پروردگار! میں شیطانوں کے وسوسوں سے تیری پناه چاہتا ہوں اور میں تیری پناه چاہتا ہوں اے میرے پروردگار! اس بات سے کہ وه میرے پاس آئیں۔

اے ہمارے پروردگار! ہم ایمان ﻻچکے ہیں، تو ہمیں بخش دے اور ہم پر رحم فرما۔ تو سب مہربانوں سے زیاده مہربان ہے۔

اے میرے رب! تو بخش دے اور رحم کر اور تو سب مہربانوں سے بہتر مہربانی کرنے واﻻ ہے۔

اے ہمارے پروردگار! ہم سے دوزخ کا عذاب پرے ہی پرے رکھ، کیونکہ اس کا عذاب چمٹ جانے واﻻ ہے۔ بے شک وہ ٹھہرنے اور رہنے کی بہت بری جگہ ہے۔

اے ہمارے پروردگار! تو ہمیں ہماری بیویوں اور اوﻻد سے آنکھوں کی ٹھنڈک عطا فرما اور ہمیں پرہیزگاروں کا پیشوا بنا۔

اے میرے پروردگار! تو مجھے توفیق دے کہ میں تیری ان نعمتوں کا شکر بجا ﻻؤں، جو تو نے مجھے عطا کی ہیں اور میرے ماں باپ کو عطا کی ہیں اور میں ایسے نیک اعمال کرتا رہوں، جن سے تو خوش رہے۔ مجھے اپنی رحمت سے نیک بندوں میں شامل کر لے۔

اے میرے پروردگار! میں نے خود اپنے اوپر ﻇلم کیا ہے، لہذا تو مجھے معاف فرما دے۔

اے میرے پروردگار! مجھے ﻇالموں کے گروه سے بچا لے۔

مجھے امید ہے کہ میرا رب مجھے سیدھی راه لے چلے گا۔

اے میرے پروردگار! تو جو کچھ بھلائی میری طرف اتارے میں اس کا محتاج ہوں۔

اے میرے رب! مجھے نیک بخت اوﻻد عطا فرما۔

اے میرے پروردگار! مجھے توفیق دے کہ میں تیری اس نعمت کا شکر بجا ﻻؤں جو تو نے مجھے اور میرے ماں باپ کو دی ہے اور یہ کہ میں ایسے نیک اعمال کروں جن سے تو خوش ہو جائے اور تو میری اوﻻد کو بھی صالح بنا، میں تیری طرف رجوع کرتا ہوں اور میں مسلمانوں میں سے ہوں۔

اے ہمارے پروردگار! تجھی پر ہم نے بھروسہ کیا ہے اور تیری ہی طرف ہم رجوع کرتے ہیں اور تیری ہی طرف ہمیں لوٹنا ہے۔

اے ہمارے پروردگار! ہمیں بخش دے اور ہمارے ان بھائیوں کو بھی، جو ہم سے پہلے ایمان ﻻچکے ہیں اور ایمان داروں کے تعلق سے ہمارے دل میں کینہ (اور دشمنی) نہ ڈال۔ اے ہمارے رب! کے شک تو شفقت ومہربانی کرنے واﻻ ہے۔

اے ہمارے رب! تو ہمیں کافروں کی آزمائش میں نہ ڈال اور اے ہمارے پالنے والے! ہماری خطاؤں کو بخش دے۔ بے شک تو ہی غالب، حکمت واﻻ ہے۔

اے ہمارے رب! ہمیں کامل نور عطا فرما اور ہمیں بخش دے۔ یقیناً تو ہر چیز پر قادر ہے۔

دوم : سنت نبوی سے ثابت دعائیں :

اے اللہ! میں تیری پناہ مانگتا ہوں آگ کے فتنے اور آگ کے عذاب سے، قبر کے فتنے اور قبر کے عذاب سے، تونگری کے فتنے کی برائی اور مفلسی کے فتنے کی برائی سے۔

اے اللہ! میں تیری پناہ مانگتا ہوں مسیح دجال کے فتنے سے۔

اے اللہ! میرے دل کو برف اور اولے کے پانی سے دھو دے اور میرے دل کو گناہوں سے اس طرح پاک کر دے، جس طرح تو نے سفید کپڑے کو میل سے پاک کیا ہے، اور میرے اور میرے گناہوں کے درمیان ایسی دوری کر دے، جیسی تو نے مشرق و مغرب کے درمیان رکھی ہے۔

اے اللہ! میں سستی، بڑھاپے، گناہ اور قرض سے تیری پناہ مانگتا ہوں۔

اے اللہ! میں عاجزی، سستی، بزدلی، بڑھاپے اور بخل سے تیری پناہ مانگتا ہوں اور میں قبر کے عذاب اور زندگی اور موت کے شر کی آزمائشوں سے تیری پناہ میں آتا ہوں۔

اے اللہ! میں تیری پناہ مانگتا ہوں آزمائش کی مشقت، بدبختی میں پڑنے، برے فیصلے اور دشمنوں کو ہنسنے کا موقع ملنے سے۔

اے اللہ! میرے لیے میرے دین کو درست کردے، جو میرے حالات کے تحفظ کا ضامن ہے اور میری دنیا کو درست کردے، جس میں میری گزر بسر ہے اور میری آخرت کو درست کردے، جہاں لوٹ کر مجھے جانا ہے اور میری زندگی کو ہر خیر میں اضافے کا سبب بنادے اور موت کو میرے لیے ہر شر سے راحت کا ذریعہ بنادے۔

اے اللہ! میں تجھ سے ہدایت، تقویٰ، پاک دامنی اور لوگوں سے بے نیازی کا سوال کرتا ہوں۔

اے الله! میں عاجزی، سُستی، بزدلی، بخیلی، بڑھاپے اور عذابِ قبر سے تیری پناہ مانگتا ہوں۔

اے اللہ! میرے نفس کو اس (کے حق) کا تقوی عطا کر اور اس کا تزکیہ فرما۔ تو ہی اس کا سب سے بہتر تزکیہ کرنے والا ہے۔ تو ہی اس کا ولی اور مولی ہے۔

اے اللہ! میں تیری پناہ مانگتا ہوں ایسے علم سے جو نفع نہ دے، ایسے دل سے جو خوف نہ کھاتا ہو، ایسے نفس سے جو آسودہ نہ ہو اور ایسی دعا سے جو قبول نہ ہو۔

اے اللہ! مجھے ہدایت دے اور راہ راست پر چلا۔

اے اللہ! میں تیری نعمت کے زائل ہونے سے، تیری دی ہوئی عافیت کے پھر جانے سے، تیرى ناگہانی گرفت سے اور تیری ہر قسم کی ناراضگی سے تيری پناہ مانگتا ہوں۔

اے اللہ! میں تیری پناہ مانگتا ہوں اس کی برائی سے جو میں نے کیا ہے اور اس کی برائی سے بھی جو میں نے نہیں کیا ہے۔

اللہ کے سوا کوئی معبود برحق نہیں، جو عظمت والا اور بُردبار ہے۔ اللہ کے سوا کوئی معبود برحق نہیں، جو عرشِ عظیم کا رب ہے۔ اللہ کے سوا کوئی معبود برحق نہیں، جو آسمانوں، زمین اور عرش کریم کا رب ہے۔

اے اللہ! میں تیری رحمت کی امید رکھتا ہوں۔ سو پلک جھپکنے بھر بھی مجھے میرے نفس کے حوالے نہ کر اور میرے تمام معاملات کو سدھار دے۔ تیرے سوا کوئی عبادت کے لائق نہیں ہے۔

اے اللہ! میں تیرا بندہ ہوں، تیرے بندے اور تیری بندی کا بیٹا ہوں۔ میری پیشانی تیرے ہاتھ میں ہے۔ مجھ پر تیرا ہی حکم چلتا ہے۔ میرے بارے میں تیرا ہر فیصلہ انصاف پر مبنی ہے۔ میں تجھ سے تیرے ہر اس نام کے واسطے سے مانگتا ہوں، جو تیرا ہے، جس سے تونے خود کو موسوم کیا ہے، اپنی کسی مخلوق کو سکھایا ہے، اپنی کتاب میں اتارا ہے یا اپنے لیے اسے علمِ غیب کے طور پر خاص کر رکھا ہے کہ قرآن کو میرے دل کی بہار، سینے کا نور اور رنج و غم سے چھٹکارے کا ذریعہ بنا دے۔

اے دلوں کے پھیرنے والے اللہ! ہمارے دلوں کو اپنی اطاعت کی جانب پھیر دے۔

اے دلوں کو الٹنے پلٹنے والے! میرے دل کو اپنے دین پر ثابت قدم رکھ۔

اے اللہ! میں تجھ سے دنیا اور آخرت میں عافیت مانگتا ہوں۔

اے اللہ! ہمارے تمام معاملوں کو حسن انجام عطا فرما اور ہمیں دنیا کی نامرادی اور آخرت کے عذاب سے بچا۔

اے میرے رب! میری مدد کر، میرے خلاف کسی کی مدد نہ کر، میری تائید کر، میرے خلاف کسی کی تائید نہ کر، میرے حق میں تدبیر فرما، میرے خلاف تدبیر نہ کر۔ میری رہنمائی فرما اور ہدایت کو میرے لیے آسان فرما دے۔ جو میرے خلاف بغاوت کرے اس کے مقابلے میں میری مدد فرما۔

اے میرے رب! مجھے تو اپنا شکر گزار، اپنا ذکر کرنے والا، اپنی ذات سے ڈرنے والا، اپنا اطاعت گزار، اپنے سامنے عاجزی کرنے والا، گڑگڑانے والا اور اپنی طرف رجوع کرنے والا بنا۔

اے میرے رب! میری توبہ قبول کر، میرے گناہ دھو دے، میری دعا قبول فرما، میری دلیل مضبوط کر، میرے دل کو سیدھی راہ دکھا، میری زبان کو درست کر اور میرے دل سے میل کچیل نکال دے۔

اے اللہ! میں تیری پناہ چاہتا ہوں اپنے کان کے شر سے، اپنی آنکھ کے شر سے، اپنی زبان کے شر سے، اپنے دل کے شر سے اور اپنی شرم گاہ کے شر سے۔ [2] [2] مظہری کہتے ہيں : "یعنی اپنی منی کے غلبے کے شر سے، تاکہ زنا میں نہ پڑوں اور اس پر نظر نہ ڈالوں جس پر نظر ڈالنا حرام ہے۔" (قوت المغتذی علی جامع الترمذی 2/860)

اے اللہ! میں تیری پناہ مانگتا ہوں برص، پاگل پن، کوڑھ کی بیماری[3] اور تمام بری بیماریوں سے۔ [3] ایک معروف بیماری جو گوشت کو کھا جاتی ہے اور وہ بکھر جاتا ہے۔ اللہ تعالیٰ ہمیں اس سے محفوظ رکھے۔ (شرح سنن ابوداؤد لابن رسلان : 7/ 411)

اے اللہ! میں تیری پناہ مانگتا ہوں ناپسندیدہ اخلاق، اعمال اور خواہشات سے۔

اے اللہ! تو بڑا معاف کرنے والا اور مہربان ہے، عفو و درگزر کو پسند کرتا ہے، اس لیے مجھے معاف کر دے۔

اے اللہ! میں تجھ سے نیکیاں کرنے، برائیاں چھوڑنے اور مساکین سے محبت کرنے کی توفیق طلب کرتا ہوں اور (میں تجھ سے سوال کرتا ہوں کہ) تو مجھے معاف کر دے اور مجھ پر اپنی رحمت فرما اور جب تو کسی قوم کو فتنہ میں مبتلا کرنا چاہے تو مجھے فتنے ميں مبتلا کیے بغير موت دے دے۔ میں تجھ سے تیری محبت، ہر اس شخص کی محبت جو تجھ سے محبت کرتا ہے اور ہر اس عمل سے محبت کی توفیق طلب کرتا ہوں جو تیری محبت کے قريب کردے۔

اے اللہ! میں تجھ سے دنیا و آخرت کی ساری بھلائیاں مانگتا ہوں، جو مجھ کو معلوم ہیں اور جو نہیں معلوم، اور میں تیری پناہ چاہتا ہوں دنیا اور آخرت کی تمام برائیوں سے، جو مجھ کو معلوم ہیں اور جو نہیں معلوم۔

اے اللہ! میں تجھ سے اس بھلائی کا طلب گار ہوں، جو تیرے بندے اور تیرے نبی ﷺ نے طلب کی ہے، اور میں اس برائی سے تیری پناہ چاہتا ہوں، جس سے تیرے بندے اور تیرے نبی ﷺ نے پناہ مانگی ہے۔

اے اللہ! میں تجھ سے جنت کا طالب ہوں اور اس قول و عمل کا بھی، جو جنت سے قریب کر دے، اور میں تیری پناہ چاہتا ہوں جہنم سے اور اس قول و عمل سے، جو جہنم سے قریب لے جائے۔ میں تجھ سے سوالی ہوں کہ میرے حق میں کیے گئے ہر فیصلے کو بہتر بنادے۔

اے اللہ! میرے کھڑے ہونے کی حالت میں اسلام کے ذریعے میری حفاظت فرما، میرے بیٹھنے کی حالت میں اسلام کے ساتھ میری حفاظت فرما، میرے سونے کی حالت میں اسلام کے ذریعے میری حفاظت فرما اور کسی حسد کرنے والے دشمن کو مجھ پر ہنسنے کا موقع نہ دے۔

اے اللہ! میں تجھ سے ہر وہ بھلائی مانگتا ہوں، جس کے خزانے تیرے ہاتھ میں ہیں اور ہر اس برائی سے تیری پناہ چاہتا ہوں، جس کے خزانے تیرے ہاتھ میں ہیں۔

اے اللہ! تو ہمیں اپنا ایسا ڈر عطا فرما، جو ہمارے اور تیری نافرمانیوں کے بیچ آڑ بن جائے، ایسی فرماں برداری کا جذبہ عطا فرما جس کے ذریعے تو ہمیں اپنی جنت تک پہنچا دے اور ایسا یقین عطا فرما جس کے ذریعے تو ہمارے لیے دنیا کی مصیبتوں کو جھیلنا آسان کر دے۔

اے اللہ! تو ہمیں، جب تک ہم زندہ رہیں، ہمارے کانوں، آنکھوں اور قوتوں سے مستفید ہونے کا موقع عنایت کر اور انھیں ہمارا وارث بنا [4]، ہمیں ظلم کرنے والوں سے بدلہ لینے کی طاقت عنایت کر، دشمنوں کے خلاف ہماری مدد فرما، ہمارے دین کے معاملے میں ہمیں کسی مصیبت میں نہ ڈال، دنیا کو ہمارا سب سے بڑا مقصد اور علم کی انتہا نہ بننے دے اور ہمارے اوپر کسی ایسے شخص کو مسلط نہ کر جو ہم پر رحم نہ کرے۔ [4] یعنی : یعنی ہمارے ديگر اعضا کے کمزور ہوجانے کے بعد بھی موت تک ہماری سماعت اور بصارت کی قوت کو باقی رکھ۔ المفاتيح في شرح المصابيح (3/ 248)۔

اے اللہ! میں بزدلی سے تیری پناہ مانگتا ہوں، بخل سے تیری پناہ مانگتا ہوں، بے بسی کی عمر کی جانب لوٹائے جانے سے تیری پناہ مانگتا ہوں اور دنیا کے فتنے و قبر کے عذاب سے تیری پناہ مانگتا ہوں۔

اے اللہ! میری خطاؤں، میری نادانی، میری ذات سے جڑے ہوئے ہر معاملے میں میری زیادتی کو اور ہر اس بات کو جسے تو مجھ سے زیادہ جانتا ہے، معاف فرما۔ اے اللہ! میرے سنجیدگی سے کیے گئے کاموں، مذاق میں ہونے والے کاموں، غلطی سے ہونے والے گناہوں اور جان بوجھ کر کیے گئے گناہوں کو معاف فرما۔ یہ سب کچھ مجھ سے ہوا بھی ہے۔

اے اللہ! مجھے بخش دے، مجھ پر رحم کر، مجھے ہدایت عطا کر، مجھے عافیت سے رکھ اور مجھے روزی دے۔

اے اللہ! میں نے اپنے نفس پر بہت ظلم کیا ہے اور تیرے سوا کوئی گناہوں کو معاف نہیں کرتا۔ لہٰذا اپنی مہربانی سے مجھے معاف کردے اور مجھ پر رحم فرما۔ بے شک تو ہی معاف کرنے والا، رحم کرنے والا ہے۔

اے اللہ! میں تیرا فرماں بردار ہو گیا، تجھ پر ایمان لایا، تجھ پر بھروسہ کیا، تیری طرف رجوع کیا اور تیری مدد سے (کفر کے ساتھ) مخاصمت کی۔

اے اللہ! میں تیری عزت کی پناہ مانگتا ہوں، تیرے سوا کوئی معبود نہیں، اس بات سے کہ تو مجھے گمراہ کر دے۔ تو ہی ہمیشہ زندہ رہنے والا ہے جسے موت نہیں آئے گی، جب کہ جن و انس سب مر جانے والے ہیں۔

اے اللہ! میں تجھ سے سوال کرتا ہوں تیری رحمت کو واجب کرنے والی چیزوں کا [5] اور ان اسباب کا جو تیری مغفرت کو (میرے لیے) لازمی بنا دیں [6] اور ہر گناہ سے سلامتی کا اور ہر نیکی سے فائدہ اٹھانے کا اور جنت سے بہرہ ور ہونے کا، نیز دوزخ سے نجات پانے کا۔ [5] یعنی وہ افعال، اقوال اور صفات جن کی وجہ سے تیری رحمت مجھے حاصل ہوتی ہے۔ المفاتيح في شرح المصابيح (2/304)۔ [6] (العزائم): عزیمت کی جمع ہے۔ اس سے مراد وہ کام ہے، جس کا انسان عزم کرتا ہے۔ دل میں پختہ ارادہ کرتا ہے۔ یعنی میں تجھ اسے کاموں کا سوال کرتا ہوں جن کی وجہ سے مجھے تیری مغفرت حاصل ہو۔ المفاتيح في شرح المصابيح (2/ 304)

اے اللہ! میرے گناہ بخش دے، میرے لیے میرے گھر میں وسعت پیدا فرما اور میرے رزق میں برکت دے۔

اے اللہ! میں تجھ سے تیرا فضل اور رحمت مانگتا ہوں، کیونکہ اس کا مالک صرف تو ہی ہے۔

اے اللہ! میں لڑھک کر مرنے، مکان یا دیوار وغیرہ گرنے کی وجہ سے مرنے، ڈوب کر مرنے اور جل کر مرنے سے تیری پناہ مانگتا ہوں۔ میں اس بات سے تیری پناہ مانگتا ہوں کہ موت کے وقت شیطان مجھے پاگل بنا دے۔ اس بات سے تیری پناہ مانگتا ہوں کہ جنگ کے میدان سے بھاگ کر مروں اور اس بات سے بھی تیری پناہ مانگتا ہوں کہ کسی زہریلے کیڑے کے ڈسنے کی وجہ سے مروں۔

اے اللہ! میں بھوک سے تیری پناہ چاہتا ہوں، کیوں کہ یہ بہت بری ہم نشیں ہے اور میں خیانت سے تیری پناہ کا طلب گار ہوں، کیوں کہ یہ بہت بری ہم راز ہے۔

اے اللہ! میں عاجزی، سستی، بزدلی، بخل، لاچاری والے بڑھاپے، دل کی سختی، غفلت، محتاجی[7]، ذلت اور بے چارگی سے تیری پناہ مانگتا ہوں۔ میں فقر، کفر، فسق، اختلاف، نفاق، شہرت اور ریا سے تیری پناہ مانگتا ہوں۔ میں بہرے پن، گونگے پن، جنون، کوڑھ، سفید داغ اور بری بیماریوں سے تیری پناہ مانگتا ہوں۔ [7] العيلة : محتاجی۔ المعلم بفوائد مسلم (1/ 279)

اے اللہ! میں فقر، قلت اور ذلت سے تیری پناہ مانگتا ہوں۔ میں اس بات سے بھی تیری پناہ مانگتا ہوں کہ میں کسی پر ظلم کروں یا مجھ پر کوئی ظلم کرے۔

اے اللہ! میں مستقل قیام کی جگہ کے برے پڑوسی سے تیری پناہ مانگتا ہوں، کیوں کہ سفر کا پڑوسی تو بدل جایا کرتا ہے۔

اے اللہ! میں تیری پناہ مانگتا ہوں ایسے دل سے جو خوف نہ کھاتا ہو، ایسے نفس سے جو آسودہ نہ ہوتا ہو، ایسی دعا سے جو سنی نہ جاتی ہو اور ایسے علم سے جو فائدہ نہ دیتا ہو۔ اے اللہ! میں ان چار چیزوں سے تیری پناہ مانگتا ہوں۔

اے اللہ! میں تیری پناہ مانگتا ہوں برے دن سے، بری رات سے، برے وقت سے، برے ساتھی سے اور مستقل قیام کی جگہ کے برے پڑوسی سے۔

اے اللہ! میں تجھ سے جنت مانگتا ہوں اور جہنم سے تیری پناہ مانگتا ہوں۔

اے اللہ! مجھے دین کی سمجھ عطا فرما۔

اے اللہ! میں اس بات سے تیری پناہ مانگتا ہوں کہ جان بوجھ کر کسی کو تیرا شریک ٹھہراؤں اور جو کچھ ان جانے میں ہو جائے اس کے لیے تیری بخشش چاہتاہوں۔

اے اللہ! تو نے مجھے جو علم عطا فرمايا ہے اس سے مجھے نفع پہنچا، مجھے وہ علم عطا فرما جو مجھے نفع دے اور میرے علم میں اضافہ عطا فرما۔

اے اللہ! میں تجھ سے نفع بخش علم، پاکیزہ رزق اور قبول ہونے والا عمل مانگتا ہوں۔

اے اللہ! میں تجھ سے طلب گار ہوں۔ اے اللہ! اس لیے کہ تو واحد ہے، یکتا ہے، بے نیاز ہے، جس نے نہ کسی کو جنا ہے اور نہ کسی نے اسے جنا ہے اور نہ کوئی اس کے برابر کا ہے کہ میرے گناہوں کو معاف کر دے۔ یقینًا تو ہی گناہوں کو معاف کرنے والا اور رحم کرنے والا ہے۔

اے اللہ! میں تجھ سے طلب گار ہوں کہ ساری تعریف تیری ہی ہے، تیرے سوا کوئی معبود برحق نہیں، تو اکیلا ہے، تیرا کوئی شریک نہیں، تو بڑا احسان کرنے والا ہے۔ اے آسمانوں اور زمین کو بے مثل پیدا کرنے والے! اے صاحب جلال اور عزت والے! اے زندۂ جاوید! اے قائم و دائم! میں تجھ سے جنت کا سوال کرتا ہوں اور آگ سے تیری پناہ مانگتا ہوں۔

اے اللہ! میں تجھ سے اس بنا پر مانگتا ہوں کہ میں گواہی دیتا ہوں کہ تو اللہ ہے، تیرے سوا کوئی معبود برحق نہیں، تو اکیلا ہے، بے نیاز ہے، جس کی نہ کوئی اولاد ہے اور نہ وہ کسی کی اولاد ہے اور نہ کوئی اس کا ہم سر ہے۔

اے میرے رب! مجھے بخش دے اور میری توبہ قبول فرما۔ بے شک تو ہی توبہ قبول کرنے والا اور بخشنے والا ہے۔

اے اللہ! اپنے غیب جاننے اور مخلوق پر قدرت رکھنے کے باعث مجھے اس وقت تک زندہ رکھ، جب تک تیرے علم کے مطابق میرے لیے زندگی بہتر ہو اور مجھے اس وقت موت دے دینا، جب تیرے علم کے مطابق میرے لیے موت بہتر ہو۔

اے اللہ! میں تجھ سے حاضر اور غائب میں تیری خشیت کا طلب گار ہوں، خوشنودی اور ناراضگی میں کلمۂ حق کی توفیق کا طلب گار ہوں، مال داری اور تنگ دستی میں میانہ روی کا طلب گار ہوں، میں تجھ سے ایسی نعمت کا طلب گار ہوں جو ختم نہ ہو، آنکھوں کی ایسی ٹھنٹک کا طلب گار ہوں جو ختم نہ ہو، تیرے فیصلوں پر راضی رہنے کا طلب گار ہوں، موت کے بعد زندگی کی ٹھنڈک کا طلب گار ہوں، میں تجھ سے تیرے چہرے کے دیدار کی لذت کا طلب گار ہوں اور تیری ملاقات کے شوق کا طلب گار ہوں، (جو) بغیر کسی تکلیف دہ مصیبت اور گمراہ کن فتنے کے (حاصل) ہو۔

اے اللہ! ہمیں ایمان کی زینت سے آراستہ فرما اور ہمیں ہدایت دینے والا اور ہدایت یافتہ بنا۔

اے اللہ! مجھے اپنی محبت عطا کر اور ایسے لوگوں کی محبت عطا کر جن کی محبت مجھے تیرے پاس فائدہ پہنچائے۔

اے اللہ! مجھے میرے پسند کی جو چیزیں تو نے دے رکھی ہیں، انھیں میرے لیے تیرے پسند کی چیزوں کے حصول کا سبب بنا۔

اے اللہ! اور جو چیز تو نے مجھ سے روک رکھی ہے، اس میں سے جو مجھے پسند ہے، تو اسے میرے حق میں اس کام کے لیے فراغت (کا ذریعہ) بنا دے، جسے تو پسند کرتا ہے۔

اے اللہ! میں بزدلی، بخل، بری عمر، سینے کے فتنے اور قبر کے عذاب سے تیری پناہ مانگتا ہوں۔

اے اللہ! اے جبریل، میکائیل اور اسرافیل کے رب! میں جہنم کی تپش اور قبر کے عذاب سے تیری پناہ مانگتا ہوں۔

اے اللہ! مجھے میری بھلائی الہام فرما اور مجھے میرے نفس کے شر سے بچا۔

اے اللہ! میں تجھ سے نفع بخش علم مانگتا ہوں اور اس علم سے تیری پناہ مانگتا ہوں، جو نفع نہ پہنچائے۔

اے اللہ! ساتوں آسمانوں کے رب، زمین کے رب اور عظیم عرش کے رب! ہمارے رب اور ہر چیز کے رب! دانا اور گٹھلی کو پھاڑ کر پودا نکالنے والے! [8] تورات، انجیل اور فرقان کو اتارنے والے! میں ہر اس چیز کی برائی سے تیری پناہ چاہتا ہوں جس کی پیشانی کو تو پکڑے ہوئے ہے۔ اے اللہ! تو ہی اول ہے، تجھ سے پہلے کوئی چیز نہیں۔ تو ہی آخر ہے، تیرے بعد کوئی چیز نہیں۔ تو ہی ظاہر ہے، تیرے اوپر کوئی چیز نہیں اور تو ہی باطن ہے، تجھ سے پوشیدہ کوئی چیز نہیں۔ ہمارے قرض کو اتار دے اور ہمیں فقر سے نکال کر غنی بنادے۔ [8] یعنی: دانے کو چیرتا ہے، جس سے بالی نکلتی ہے اور گٹھلی کو چیرتا ہے، جس سے کھجور کا درخت نکلتا ہے۔ المفهم لما أشكل من تلخيص كتاب مسلم (7/ 41)

اے اللہ! ہمارے دلوں کے درمیان الفت پیدا کر دے، ہمارے اختلافات کو ختم کر دے، ہمیں سلامتی کے راستے دکھا، ہمیں تاریکیوں سے روشنی کی طرف لے آ، ہمیں ظاہری اور باطنی تمام بے حیائیوں اور فتنوں سے بچا، ہمارے کانوں، آنکھوں، دلوں، بیویوں اور بچوں میں برکت دے اور ہماری توبہ قبول فرما۔ یقینا تو ہی توبہ قبول کرنے والا اور رحمت والا ہے۔ ہمیں اپنی نعمتوں کا شکر ادا کرنے والا، ان پر تیری تعریف کرنے والا اور انھیں قبول کرنے والا بنا اور انھیں ہم پر پوری فرما۔

اے اللہ! میں تجھ سے بہترین سوال، بہترین دعا، بہترین کامیابی، بہترین عمل، بہترین ثواب، بہترین زندگی اور بہترین موت مانگتا ہوں۔ تو مجھے ثابت قدم رکھ، میری نیکیوں کے پلڑے کو بھاری کر دے، میرے ایمان کو حقیقی روپ عطا کر، میرے درجات بلند فرما، میری نماز قبول کر اور میرے گناہ معاف کر دے۔ میں تجھ سے جنت کے اونچے درجات مانگتا ہوں۔

اے اللہ! میں تجھ سے خیر کی ابتدا، خیر کی انتہا، خیر کا کمال، خیر کا آغاز، خیر کا ظاہر، خیر کا باطن اور جنت کے اونچے درجات مانگتا ہوں۔

اے اللہ! میں تجھ سے ان تمام چیزوں اور کاموں کی بھلائی مانگتا ہوں جنھیں میں لاتا ہوں، جنھیں میں کرتا ہوں، جن کو میں عملی جامہ پہناتا ہوں، جو پوشیدہ ہیں اور جو ظاہر ہیں، اور جنت کے اونچے درجات مانگتا ہوں۔

اے اللہ! میں تجھ سے اس بات کا طب گار ہوں کہ تو میرے ذکر کو اونچا کر دے، میرے گناہ کو کالعدم کر دے، میرے حال کو درست کر دے، میرے دل کو پاک کر دے، میری شرم گاہ کی حفاظت فرما، میرے دل کو منور کر دے، میرے گناہ معاف کر دے اور میں تجھ سے جنت کے اونچے درجات مانگتا ہوں۔

اے اللہ! میں تجھ سے اس بات کا طلب گار ہوں کہ تو میرے نفس، میرے کان، میری آنکھ، میری روح، میری بناوٹ، میرے اخلاق، میرے اہل و عیال، میری زندگی، میری موت، میرے عمل میں برکت دے اور میری نیکیوں کو قبول فرما۔ میں تجھ سے جنت کے اونچے درجات مانگتا ہوں۔

اے اللہ! مجھے برے اخلاق، برے اعمال، بری خواہشات اور بری بیماریوں سے بچا۔

اے اللہ! تو نے مجھے جو کچھ دیا ہے اس پر مجھے قناعت کرنے والا بنا اور ہر غائب چیز کو میرے لیے بھلائی کے ساتھ لوٹا۔

اے اللہ! میرے حساب کتاب کا مرحلہ آسان فرما۔

اے اللہ! تيرا ذکر کرنے، تيرا شکر بجالانے اور تيری اچھی طرح عبادت کرنے ميں ميری مدد فرما۔

اے اللہ! میں تجھ سے ایسا ایمان مانگتا ہوں جو پیچھے نہ ہٹتا ہو، ایسی نعمت مانگتا ہوں جو ختم نہ ہوتی ہو اور ہمیشگی کی جنت کے اونچے مقام میں تیرے نبی محمد ﷺ کا ساتھ مانگتا ہوں۔

اے اللہ! مجھے میرے نفس کی برائی سے بچا اور میرے لیے مناسب ہدایت کے پیمانے پر کھری اترنے والی حالت کا فیصلہ فرما۔ اے اللہ! میرے ان تمام گناہوں کو معاف کر دے جو میں نے چھپاکر کیے ہیں، جو میں نے دکھاکر کیے ہیں، جو میں نے غلطی سے کیے ہیں، جو میں نے جان بوجھ کر کیے ہیں، جنھیں میں جانتا ہوں اور جنھیں میں نہیں جانتا۔

اے اللہ! میں قرض کے غلبے، دشمن کے غلبے اور مصیبت میں دشمنوں کے ہنسنے سے تیری پناہ چاہتا ہوں۔

اے اللہ! مجھے بخش دے، مجھے ہدایت عطا فرما، مجھے روزی دے اور مجھے عافیت سے رکھ۔ میں قیامت کے دن کھڑے ہونے کی تنگی سے اللہ کی پناہ مانگتا ہوں۔

اے اللہ! مجھے میرے کان اور آنکھ سے مستفید ہونے کا موقع عنایت کر، ان دونوں کو میرا وارث بنا، مجھ پر ظلم کرنے والے کے خلاف میری مدد فرما اور اس سے میرا بدلہ لے۔

اے اللہ! میں تجھ سے صاف ستھری زندگی، معتدل موت اور غیر رسواکن و غیر ذلت آمیز لوٹنے کا سوالی ہوں۔

اے اللہ! تونے مجھے اچھی ساخت عطا کی ہے، لہذا اچھے اخلاق عنایت کر۔

اے اللہ! ایمان والے مردوں اور عورتوں کو معاف کر دے۔

اے اللہ! مجھے ثابت قدم رکھ اور راہ راست بتانے والا و راہ راست پر چلنے والا بنا۔

اے اللہ! مجھے حکمت عطا کر کہ جسے حکمت دی گئی، اسے بہت ساری بھلائی دی گئی۔

والله أعلم! وصلى الله وسلم على نبينا محمد۔