«M Soab a Wẽnde maneg m dĩinã n kõ-ma, sẽn yaa mam yellã gũudmã

Nabiyaamã (Wẽnd pʋʋsg la A tɩlgr be a yĩngɑ) a kosa kosgo, n tigim a pʋgẽ, zʋg sõmsã yẽgã b sẽn tʋms-a t'a wa pidsã, bãmb me la dĩinã la dũni wã la laahrã manegre, rẽnd a tũusa gom-bi-kãensã sẽn yaa koεεgã, yel-kãensã b tãabã manegre, la a sɩnga ne dĩinã manegre, yẽ sã n manege, zags a yiibã manegr bee ne rẽnda, dũni la laahrã, rẽnd a yeelame: (M Soab a Wẽnde maneg m dĩinã n kõ-ma) Rat n yeele: maan-m sabab sõngo tɩ m yals ne zʋg sõngã ne neng sẽn maneg n yɩɩda. (Sẽn yaa mam yellã gũudmã) La yẽ n gũusd mam yεlã fãa gilli, rẽnd mam dĩinã sã n sãame, m bõn yã, rat n wilgame tɩ dĩinã yell ka maneg wala b sẽn ratã, rẽndame tɩ dũni wã yell n manege, t'a yeele: (La F maneg m dũni wã n kõ-ma) ne Fo sẽn na n kõ maam laafɩ m yĩngẽ wã la bas-m-yam, la rɩtla, la pʋg-sõngo, la koamb sẽn yaa sõma, la mam sẽn tar tʋlsem fãa, tɩ yɩ halaale, n sõngd maam tɩ m tũ Fo, rẽ poorẽ t'a togs padanga a sẽn kot dũnu wã manegrã sababã, n yeele: (Sẽn yaa mam vɩɩmã sẽn be a pʋgẽ wã) Mam vɩɩmã zĩig la a wakatã. (La F maneg m laahrã n kõ-ma, sẽn yaa mam lebεngã sẽn togdẽ wã) La mam lebgrã n tʋg Fo yekrã la rẽnda yaa sẽn tũ ne tʋʋmã manegre, la Wẽnd segl sõngã ne A yembsã zugu la pʋ-peelem maanego, la baas neere. La Nabiyaamã (Wẽnd pʋʋsg la A tɩlgr be a yĩnga) tũnuga taaba n yeel laahrã, dũni wã poorẽ; bala rẽenem soabã, yẽ yaa radg sẽn na n tũ n maneg yiib soabã, rẽnd ned ning sẽn tẽega tɩrga a dũni wã yellẽ, wala Wẽnd sẽn ratã, a laahrã na n tẽega tɩrga, t'a paam zu-noog a pʋgẽ. (La F maan vɩɩmã) la yõorã woglem (tɩ yaa paasg ne-ma sõma fãa pʋgẽ,) tɩ mam wʋsg a pʋgẽ tʋʋm sõmse, (la F maan kũumã) la a yãgbã (tɩ yaa vʋʋsg ne maam n yi wẽng buudã fãa) la fitna (zarb-n-gesga) la masɩɩba, la zarbgo, la Wẽnd kɩɩsgo la yam yaal-yaale, la fãagre n yi dũni wã yεlã, la laafɩ la vʋʋsg paoongo.