Litsela tse molemo tsa bophelo bo thabileng

Litsela tse molemo tsa bophelo bo thabileng

Bongoli

Sheikh Abdur-Rahman bin Nasser As-Sa‘di (Allah A mo hauhela)

Selelekela

Thoriso eohle ke ea Allah, Ea nang le thoriso tsohle. Ke paka hore ha ho na molimo ea lokeloang ke ho khumameloa ele ’nete ntle le Allah A le Mong Feela, Ha A na molekane; ke boele ke behe bopaki hore Muhammad ke Mohlanka le Moromuoa oa Allah, Allah A mo hlohonolofatse ’me A mo fe khotso, hammoho le ba lelapa la hae le barutuoa ba hae.

Ho tsoela pele: Kannete phomolo ea pelo, khotso ea eona le thabo ea eona, hammoho le ho fela ha matšoenyeho le mahlomola, ke ntho e lakatsoang ke motho e mong le e mong. Ka eona ho fumanoa bophelo bo botle le bo monate, ’me thabo le nyakallo lia phethahala. ’Me bakeng sa sena ho na le mabaka a bolumeli, mabaka a tlhaho, le mabaka a mesebetsi. Empa mabaka ana kaofela a ke ke a kopana ka botlalo ntle le ho balumeli feela. Ha e le ba bang, leha ba ka a fumana ka lehlakoreng le itseng kapa ka lebaka leo ba bohlale ba bona ba loanelang lona, ba ntse ba lahlehetsoe ke mabaka a mang a molemo ho feta, a tiileng haholoanyane, le a nang le qetello e ntle le sephetho se molemo.

'Me sengoliloeng sena, ke tla hlalosa se tlang kelellong ka mabaka a maikemisetso ana a maholo ao batho bohle ba a tsomang.

Ba bang ba ile ba fumana boholo ba ʼona 'me ba phela bophelo bo monate le bo molemo, athe ba bang ba hloleha ho ʼona kaofela 'me ba phela bophelo ba mahlomola le masisa-pelo. ’Me ba bang bona ba ne ba le mahareng, ho latela seo ba se filoeng. 'Me Molimo ke Eena ea fanang ka katleho, ’me ke Eena ea koptjoang thuso linthong tsohle tse molemo, le ho thibela bobe bohle.

Khaolo: Tumelo le liketso tseo lokileng

’Me lebaka le leholo ka ho fetisisa la ana, le motheo oa ʼona le tšimoloho ea ʼona, ke tumelo (imān) le mesebetsi e metle. Allah Ea Holimo-limo o itse: ﴾Mang kapa mang ea etsang liketso tse lokileng, ebang ke monna kapa mosali, ha e ntse e le molumeli — Ruri Re tla mo phelisa bophelo bo botle, ’me ruri Re tla ba putsa ho ea ka tse molemo ka ho fetisisa tseo ba neng ba li etsa (97)﴿ [An-Nahl: 97]

Molimo ea Matla Ohle O tsebisitse ’me a tšepisa ba kopanyang tumelo le liketso tse lokileng bophelo bo botle lefats’eng lena, le moputso o motle lefats’eng lena le lefats’eng la qetello.

Lebaka la sena le hlakile: hobane ba lumelang ho Molimo ka tumelo ea ’nete — e hlahisang liketso tse ntle tse lokisang lipelo, boitšoaro, bophelo ba lefatše lena le ba Bofelo — ba na le melao-theo le metheo eo ba nkang ho eona mabaka ’ohle a thabo le nyakallo, le mekhoa ea ho laola matšoenyeho, khathatso le masoabi.

Ba amohela menyaka le thabo ka kamohelo, teboho le ka ho li sebelisa ka tsela e molemo. Haeba ba li sebelisa ka mokhoa ʼona, ba tla utloa thabo e kholo ho tsona, ba be le tšepo ea hore li tla tsoela pele le ho ba le tlhohonolofatso, hape ba be le tšepo ea moputso oa ba bang le teboho — lintho tse fetisisang ka botle le ka tlhohonolofatso, menyaka ena eo e leng litholoana tsa eona.

Ba amohela mathata, likotsi, matšoenyeho le masoabi ka ho hanela seo ba ka se hanang, ho fokotsa seo ba ka se fokotsang, le ho mamella ka mamello seo ba sa khoneng ho se qoba. Ka hona, ba fumana ho tsoa litlamoraong tsa mathata ho hanela ho molemo, boiphihlelo, matla, mamello, le tebello ea moputso le puseletso — lintho tse kholo tse fokotsang mathata le ho a nkela sebaka ka thabo, tšepo e ntle, le takatso ea khauhelo le moputso oa Molimo, joalokaha Moporofeta, khotso le mahlohonolo li be holim’a hae, a hlalositse ho Hadith e nepahetseng ha a re: «Li makatsa hakaakang litaba tsa molumeli! Kannete, lintho tsohle tsa hae li molemo. Haeba ntho e molemo e mo etsahalla, o ea leboha, ’me seo se molemo ho eena. Haeba ntho e mpe e mo etsahalla, o ea mamella, ’me seo le sona ke molemo ho eena. ’Me sena ha se etsahale ho motho ofe kapa ofe ntle le ho molumeli» E tlalehiloe ke Muslim.

Moporofeta (khotso le mahlohonolo li be holim’a hae) o re file tsebo hore moputso oa molumeli, molemo oa hae, le litholoana tsa liketso tsa hae li eketseha ka lintho tsohle tse mo etsahallang, ebang ke thabo kapa bothata. Ke ka lebaka lena ha u fumana batho ba babeli ba thibetsoeng ke bothata bo molemo kapa bo bobe, ’me ba fapana haholo kamoo ba bo amohelang ka teng, ho latela phapang ea bona ka tumelo le liketso tse lokileng. Ea hlalosoang ka litlhaloso tsena tse peli o amohela molemo le bobe ka seo re se boletseng ka tebello ea molato le mamello le seo se latelang ka tsona, kahoo thabo le monate li mo fihlela, 'me ho tšoenyeha, masoabi, matšoenyeho, tlokotsi, le boima ba bophelo lia nyamela, 'me o phela bophelo bo botle lehaeng lena. ’Me e mong o amohela lintho tse mo khahlisang ka boikhohomoso, boikakaso le ho tlola meeli. Boitšoaro ba hae boa senyeha, ’me o li amohela joalokaha liphoofolo li li amohela ka meharo le takatso e feteletseng. Leha ho le joalo, pelo ea hae ha e phomole; e ferekane ka mahlakore a mangata: e tšoenyehile ka ho tšaba hore lintho tseo a li ratang li ka fela, hape e tšoenyehile ka likhohlano tse ngata tse atisang ho hlaha ka lebaka la tsona. Hape meea ea batho ha e eme moeling o itseng; e lula e labalabela lintho tse ling hape—tse ka ’nang tsa fumanoa kapa tsa se ke tsa fumanoa. Le haeba li ka fumanoa ka tekanyo efe kapa efe, o ntse a tšoenyehile ka mabaka ao ho boletsoeng ka ’ona. ’Me ha a kopana le mathata, o a amohela ka ho tšoenyeha, ka ho nyahama, ka tšabo le ka ho teneha. Ka hona, re re sa bue ka mahlomola a bophelo ao a tobanang le ’ona, mafu a kelello le a methapo, le tšabo e ka mo isang maemong a mabe ka ho fetisisa le matšoenyehong a bohloko ka ho fetisisa; hobane ha a na tšepo ea moputso, ebile ha a na mamello e mo tšelisang kapa e mo nolofalletsang moroalo oo.

'Me tsena tsohle li bonahala ka boiphihlelo. ’Me haeba u ka nahanisisa ka motho ea joalo, ’me oa mo bapisa le maemo a batho ba bang, u tla bona phapang e kholo pakeng tsa molumeli ea sebetsang ho latela litlhoko tsa tumelo ea hae le ea seng joalo. Ke hore bolumeli bo khothalletsa ka matla a maholo ho khotsofala ka phepelo ea Allah le ka seo A se fileng bahlanka ba Hae sa mohau oa Hae le mosa oa Hae o fapaneng.

Ha molumeli a hlaheloa ke boloetse, bofutsana, kapa liteko tse ts'oanang tse ka hlahelang motho emong le emong, ka lebaka la tumelo ea hae le khotsofalo le kamohelo ea hae ho seo Molimo A mo abetseng sona, o tla khotsofala, ’me a ke ke a lakatsa ka pelong ea hae seo a sa se rereloang. O tla sheba ba ka tlaase ho eena, ’me a ke ke a sheba ba ka holimo ho eena. Mohlomong thabo, nyakallo le boiketlo tsa hae li ka feta tsa motho ea fihletseng litakatso tsohle tsa lefats'e, haeba a sa fuoa khotsofalo.

Hape u tla fumana hore motho enoa ea se nang mesebetsi e tsamaellanang le tumelo, haeba a ka hlaheloa ke bofutsana bo itseng kapa a lahleheloa ke tse ling tsa litlhoko tsa lefatše, u tla mo fumana a le mathateng a maholo le mahlomola.

Mohlala o mong: Ha lisosa tsa tšabo li hlaha, ’me mathata a hlahela motho, u tla fumana hore motho ea nang le tumelo e nepahetseng o tiile pelong, o khutsitse moeeng, ’me o khona ho sebetsana le taba ena e mo hlahetseng ka tsohle tseo a ka li nahanang, a li buang, le ho li etsa. O se a itokiselitse ntho ena e ferekanyang le e tšoenyang. Tsena ke maemo a tšelisang motho le ho matlafatsa pelo ea hae.

Empa motho ea lahlehetsoeng ke tumelo o ba ka tsela e fapaneng le ena: ha tšabo kapa likotsi li mo hlahela, pelo ea hae ea ferekana, methapo ea hae ea tsitsipana, menahano ea hae ea hasana, ’me o kenoa ke tšabo le letsoalo le matla. O bokellana ka tšabo e tsoang kantle le matšoenyeho a ka hare ao ho leng thata ho hlalosa botebo ba ’ona. Mofuta ona oa batho, haeba ba sa fumane lisosa tse itseng tsa tlhaho tse hlokang koetliso le ho itloaetsa haholo, matla a bona a ka putlama, ’me methapo ea bona ea tsitsipana. Sena se bakoa ke khahello ea tumelo e khothalletsang mamello, haholo-holo maemong a thata le linakong tse bohloko le tse ferekanyang.

Ea lokileng le Ea khopo, molumeli le ea sa lumeleng ba ts'oana tabeng ea ho fumana sebete le boikitlaetso ho nolofatsa le ho phahamisa letsoalo. Le ha ho le joalo, molumeli o ikhetha ho latela matla a tumelo ea hae, mamello ea hae, ts'epo ea hae le ho its'itleha ho Allah, le tebello ea moputso oa hae, lintho tse phahamisang sebete sa hae, ho bebofatsa khatello ea letsoalo, le ho etsa mathata manolo, joalokaha Molimo Ea Matla ʼOhle A itse: {...haeba le khathatsehile, le bona ba khathatsehile joalokaha le khathatsehile, empa lona le na le ts'epo ho Allah eo bona ba se nang eona...} [An-Nisa: 104] Ba tla fumana thuso ea Allah, thuso ea Hae e khethehileng le ts'ehetso ea Hae e tlang ho tlosa matsoalo a bona. 'Me Allah Ea Matla ʼOhle O itse: {Mamellang, ruri, Allah O na le ba mamelang} [Al-Anfal: 46]

Ho etsa molemo ho batho ka mantsoe le ka liketso Har'a lintho tse tlosang mats'oenyeho, tlhonamo le pherekano ke ho hauhela batho ka lipolelo le ka liketso, mefuta eohle ea liketso tse ntle, lintho tsohle tse nepahetseng le ho fana ho ba kopang. Ka tsona Allah Allah O tlosa mats'oenyeho le ho hlonama ho ba lokileng le ba khopo ho ea ka tlholeho ea tsona empa molumeli o na le kabelo e felletseng, karoloana ea tsona 'me o khetholehile ka lebaka la hore mosa oa hae o tsoa botebong ba pelo le ho lebella moputso.

Allah O mo nolofalletsa ho etsa botle ka lebaka la botle boo a nang le ts'epo ea (moputso) bona. Le hore o leleka mathata ho eena ka lebaka la 'nete ea hae le ho tsona moputso ho tsoa ho Allah. Allah Ea Matla ʼOhle O itse: "Ha ho molemo lipuisanong tsa bona tse ngata tsa sephiri, ntle le ea laelang ho fana ka lithuso (sadaqah), kapa ho etsa se lokileng, kapa ho bopa khotso lipakeng tsa batho. Mang kapa mang ea etsang joalo ka sepheo sa ho khahlisa Allah, Re tla mo neha moputso o moholo 114" [An-Nisa: 114].

Allah Ea Matla ʼOhle O re bolelletse ka lintho tsena kaofela hore li molemo ho feta ea faneng ka tsona. Le hore botle bo tlisa botle 'me bo leleka bobe. Le hore molumeli ea tsomang moputso ho tsoa ho Allah o tla fumana moputso o moholo-hali, 'me har'a meputso e meholo-hali ke ho tlosoa hoa mats'oenyeho, ho hlonama, khatello ea maikutlo le tse ts'oanang le tsona.

Khaolo: Ho phathahana ka mosebetsi kapa thuto e nang le molemo

E ’ngoe ea litsela tsa ho fokotsa matšoenyeho a bakoang ke khatello ea maikutlo le ho tšoenyeha haholo ka bothata bo itseng, ke hore motho a iphe mosebetsi oo a o etsang ka mafolofolo kapa a ikakhele ka setotsoana ho ithuteng tsebo e molemo. Ha motho a lula a nahana ka bothata bo mo tšoenyang, pelo ea hae e lula e imetsoe, ’me matšoenyeho a eketseha. Empa ha a qala ho sebetsa kapa ho ithuta ka botebo, kelello le pelo li tšoareha ka ntho e ’ngoe e molemo. Ka tsela ena, menahano e mebe le matšoenyeho lia fokotseha, hobane motho ha a sa tsepamisitse maikutlo bothateng boo bo neng bo mo tšoenya. Mohlomong ka lebaka la ho lebala se mo baketseng mats'oenyeho le tlhonamo, moea oa hae o ea phuthuloha 'me mosebetsi oa hae o ea matlafala. Lena ke lebaka le tloaelehileng lipakeng tsa molumeli le batho ba bang. Empa molumeli o ikhetholla ka tumelo ea hae, ka botsʼepehi (ikhlās) le ka ho lebella moputso ho Allah (iḥtisāb) mosebetsing oa hae—ebang ke tsebo eo a ithutang eona kapa a e rutang, kapa mesebetsi e metle eo a e etsang. Haeba e le khumamelo, e ba khumamelo e felletseng; ’me haeba e le mosebetsi oa lefats’e kapa tloaelo, e fetoha khumamelo ha e tsamaea le niyyah (sepheo) se setle le morero oa ho iphumanela matla a ho mamela Allah. Ka lebaka leo, sena se na le phello e matla ho lelekeng matšoenyeho, mahlomola le masoabi. Ke batho ba bakae ba ileng ba angoa ke khatello ea maikutlo le ho lula ba imetsoe ke matsʼoenyeho, hoo ba ileng ba tšoaroa ke maloetse a fapaneng; empa pheko ea bona e atlehang e ile ea e-ba ho lebala sesosa se ba sithabetsang le se ba tšoenyang, le ho iphapanyetsa sona ka ho ikakhela mosebetsing o mong oa mesebetsi ea bona ea bohlokoa.

Ho loketse hore mosebetsi oo motho a tšoarehileng ka oona ebe ke o thabisang moea oa hae ebile ke oo a o labalabelang; hobane sena se nolofatsa ho fihlella sepheo sena se nang le molemo. Mme Allah ke Eena ea tsebang tsohle.

'Me maikemisetso le chebelo-pele li lokela ho ba holim'a mosebetsi oa kajeno, E 'ngoe ea lintho tse lelekang masisa-pelo le mahlomola ke ho tsepamisa maikutlo holim'a mehopolo ea botho holim'a mosebetsi oa kajeno le ho suthisa mehopolo ho se tla etsahala nakong e tlang le se etsahetseng nakong e fetileng. Ke ka hona Moporofeta, khotso le mahlohonolo li be ho eena, ane a kopa ts'ireletso khahlanong le mesarelo le ho sithabela pelo. Ho hlonama ka lebaka la ntho tse fetileng tse kekeng tsa etsolloa kapa ho lokiseha ha ho molemo, 'me tlhonamo e tlisoang ke letsoalo la se tlang ho etsahala ho Ka ba kotsi. 'Me ka hona, motho o lokela hoba motho oa litaba tsa hajoale, a shebane le ho ntlafatsa bophelo ba hae kajeno honajoale. Ho beha maikutlo holim'a sena ho ka etsa hore mosebetsi o phethoe hantle. 'Me motho o tla iphumana a lokolohile khahlanong le mesarelo le khatello ea maikutlo. Nakong eo Moporofeta, khotso le mahlohonolo li be ho eena, a etsang thapelo ea maikutlo (du'a) kapa a tataisa sechaba sa hae ho etsa thapelo ea maikutlo, o hatella ho kopa thuso ho Allah, ho kopa mohau oa Hae, a tiile ebile a ikemiselitse hantle hore a fumane seo a rapelang hore a se fumane. Le ho tlohela se mo sitisang ho rapela; kaha thapelo e felehetsoa ke mesebetsi, joale mohlanka o sebetsa ka thata ho fihlela se mo tsoelang molemo tabeng tsa tumelo le bophelong ba lefats'e. Ebile a rapela Morena Oa hae ho mo fa katleho holim'a seo a ikemiselitseng le ho tsoma thuso ea Hae holim'a seo joalokaha Moporofeta khotso le tlhohonolofatso li be eena, a itse: (Eba le tjantjello ho seo se u tlisetsang molemo, ‘me u kope thuso ho Molimo; u se ke oa ba le bofokoli kapa oa inehela. Haeba ho ka etsahala ntho e itseng ho uena, u se ke oa re: “Hoja ke ne ke entse tjena le tjena, ho ka be ho etsahetse tjena le tjena,” empa e re: “Ke qeto ea Molimo; seo A se ratang, Oa se etsa.” Hobane polelo ea hore “hoja” e bula monyako oa mosebetsi oa Satane) E tlalehiloe ke Muslim. Ka hona, Moporofeta ﷺ o ile a kopanya pakeng tsa taelo ea hore motho a be le tjantjello le mahlahahlaha tabeng ea lintho tse mo tsoelang molemo maemong ʼohle, le ho kopa thuso ho Allah, le ho se inehele bofokoling boo e leng botsoa bo kotsi; hape a kopanya sena le ho amohela le ho inehela linthong tse seng li fetile tse seng li phethahetse, a ntse a hlokomela le ho lumela kahlolo le qeto ea Allah (Qadhaa le Qadar).

O arotse lintho ka mekhahlelo e 'meli: mokhahlelo oo mohlanka a ka sebetsang ka thata ho e fumana kapa ho fumana seo ho leng bonolo ho se fumana, kapa ho e thibela kapa ho e fokotsa. Ka ho etsa joalo, mohlanka o bonts'a boiteko ba hae ’me o kopa thuso ho Molimo oa hae. 'Me karolong eo sena se seng bonolo, mohlanka o fumane tiisetso, khotsofalo le ho inehela. Ha ho khoao hore ho lisa ntlha ena ea bohlokoa ho tlisa thabo le ho tlosa mats'oenyeho le tlhonamo.

Khaolo: Ho hopola (Dhikr) Allah khafetsa

Le leng la mabaka a maholo a maikutlo a pholileng le boiketlo ke ho lula ho etsoa dhikr ea Allah khafetsa, kaha sena se na le litholoana tse kholo sebakeng sa maikutlo a pholileng le boiketlo, le ho tlosoa hoa mats'oenyeho le tlhonamo. Allah Ea Matla ʼOhle O itse: “...Kannete, ke ka ho hopola Allah moo lipelo li fumanang khutso” [Ar-Raʼd: 28] Ho hopola Allah ho na le sekhahla se seholo sa ho fihlela tholoana tsa takatso ena, ka lebaka la lintlha tse khethehileng le ka lebaka la moputso le katleho eo mohlanka a li lakatsang (ho li fihlela).

Ho bua ka litlhohonolofatso tsa Allah, tse hlahelletseng le tse sa bonahaleng, Hape, ho bua ka limpho tsa Allah tse bonahalang le tse sa bonahaleng; hobane ho li tseba le ho li bua ho etsa hore Allah A tlose mats'oenyeho le mahlomola, hape ho susumetsa mohlanka hore a be le teboho, e leng boemo bo phahameng ka ho fetisisa. E bile ke eona e phahameng ka ho fetisisa, leha mohlanka a ka ba boemong ba bofuma kapa bokuli kapa mathata a mang a mefuta-futa ea liteko. Hobane ha a bapisa limpho tsa Allah tse mo potolohileng — tseo palo ea tsona e sa baloeng, ebile li sa lekanyetsoe — le ntho e mpe e mo hlahetseng, ntho eo e mpe e ke ke ea lekana le limpho tseo, kapa ea ba le tekanyo e ka bapisoang le tsona.

Empa ntho e mpe le lits'itiso tsa bophelo, ha Allah A leka mohlanka ka tsona, 'me mohlanka a phethahatsa mosebetsi oa mamello, khotso le tumelo ea ho inehela, boima ba tsona boa fokotseha, bohloko ba tsona boa fokolisoa. 'Me ha mohlanka a its'itleha ka moputso oa tsona le khotsofalo ea ho etsa thapelo ho Allah ka ho phethahatsa mosebetsi oa mamello le khotso, lintho tse bohloko li fetoha tse monate, hoo tse monate tsa moputso li lebisang tlhokomelong ea bohloko ba mamello ea hae.

Ho sheba ho ba ka tlaase ho rona, E 'ngoe ea lintho tse bohlokoa haholo tabeng ena ke ho sebelisa seo Moporofeta, khotso le tlhohonolofatso li be ho eena, a re tataisitseng ka sona ho hadith e Sahih moo a itseng: (Shebang ho ba tlase ho lona, ’me le se ke la sheba ho ba kaholimo ho lona; hobane hoo ho loketse hore le se ke la nyelisa kapa la nyatsa limpho [litlhohonolofatso] tsa Allah tse holim’a lona) E tlalehiloe ke Muslim. Haeba mohlanka a boloka chebo ena e tlotlehang maikutlong a hae, o tla iphumana a feta batho ba bangata ka bophelo le melemo ea bona le limpho tse phelisang le melemo ea tsona, ho sa tsotellehe hore na maemo a bophelo ba hae a ma kae. Ngongoreho ea hae, mesarelo le tlhonamo li tla nyamela 'me thabo ea hae le ho thabisoa ke tlhohonolofatso tsa Molimo, moo a iphumanang a feta ba bang ba seng lehlohonolo joaloka eena, bophelo ba hae bo tla ntlafala.

Ha mohlanka a ntse a nahana le ho hlahloba ka botebo litlhohonolofatso tsa Molimo tse bonahalang le tse patiloeng, tsa bolumeli le tsa bophelo ba lefats'e, o tla bona haholo hore Morena oa hae O mo file melemo e mengata ebile O mo sirellelitse khahlanong le bobe bo bongata. Ha ho pelaelo hore sena se leleka mats'oenyeho le masoabi, ’me se tlisa thabo le nyakallo pelong.

Khaolo: Ho Ikitlaelletsa ho tlosa lintho tse bakang Mats'oenyeho le ho fumana lintho tse tlisang thabo

Le leng la mabaka a tlisang thabo le ho tlosa mats'oenyeho le masoabi ke hore motho a ikitlaelletse ho tlosa lintho tse bakang mats'oenyeho le ho fumana lintho tse tlisang thabo. Sena se etsoa ka hore a lebale likoluoa kapa mahlomola a fetileng ao a sa khonang ho a thibela, le ho tseba hore ho ts'oareha ha kelello ka tsona ha ho na thuso ebile ha ho khonehe ho fetola letho; hape ke ponts'o ea booatla le ho hloka kelello. Ka hona o ts'oanetse ho ikitlaelletsa ho thibela pelo ea hae hore e se ke ea lula e nahana ka tsona. Ka mokhoa o ts'oanang, o ts'oanetse ho ikitlaelletsa ho sireletsa pelo ea hae hore e se ke ea ts'oenyeha ka lintho tse tlang nakong e tlang, tse kang bofuma, ts'abo, kapa mahlomola a mang ao a a nahanang ka bophelo ba hae bo tlang. Oa tseba hore litaba tsa bokamoso ha li tsejoe, ho kenyeletsa se tla etsahala ho tsona ka botle kapa bobe, litakatso kapa bohloko; hape oa tseba hore tsohle li matsohong a Ea Matla ʼOhle, Ea Bohlale. Bahlanka ha ba na taolo holim’a tsona, haese feela ho ikitlaelletsa ho fumana molemo oa tsona le ho qoba kapa ho leleka kotsi ea tsona. Mohlanka o tseba hore haeba a ka khelosa kelello ea hae mats'oenyehong a amanang le bokamoso ba litaba tsa hae, a be a its'etlehe ka Morena Oa hae hore A li lokise, ’me A kholisehe ka eena tabeng eo, haeba a etsa joalo, pelo ea hae e tla khutsa, litaba tsa hae li tla lokisoa, ’me mats'oenyeho le khatello ea hae li tla nyamela.

Ho sebelisa duʿā’ (thapeli/kopo), E ’ngoe ea lintho tse molemo ka ho fetisisa bakeng sa ho tobana le litaba tsa bokamoso ke ho sebelisa thapeli (kopo) ena eo Moporofeta ﷺ a neng a tloaetse ho e bala: «Oho Allah! Lokisa bakeng sa ka bolumeli baka, e leng ts'ireletso le poloko ea litaba tsohle tsa ka. Lokisa bakeng sa ka bophelo ba ka ba lefats’e leo ho lona ho leng boipheliso ba ka. Lokisa bakeng sa ka bophelo ba ka ba kamor'a lefu, boo ke tla khutlela ho bona. Ebe U etsa hore bophelo e be keketseho bakeng sa ka tabeng e ’ngoe le e ’ngoe e molemo, ’me U etse hore lefu e be phomolo bakeng sa ka khahlanong le bobe bo bong le bo bong» E tlalehiloe ke Muslim. Hape o itse: «Oho Allah! Ke beha ts'epo ea ka mohaung oa Hao; ka hona U se ke oa ntlohela ho itjara le haele ka ho panya ha leihlo. Lokisa litaba tsohle tsa ka, hobane ha ho molimo o mong o nang le tokelo ea ho rapeloa ntle le Uena feela» E tlalehiloe ke Abu Dawud, ka lethathamo le amohelehang la batlalehi. Ha mohlanka a etsa thapeli (kopo) ena, e akarelletsang molemo oa bolumeli le bokamoso ba bophelo ba hae ba lefats’e, ka pelo e teng le ka sepheo se hloekileng, a ntse a ikitlaelletsa ho fihlela seo a se kopang, Allah O tla mo neha seo a se kopileng, seo a se ts'epileng le seo a se sebeletsang; ’me mats'oenyeho a hae a tla fetoha thabo le nyakallo.

Khaolo: ho lekanyetsa se kotsi ka ho fetisisa se ka hlahang

E ’ngoe ea litsela tse molemo ka ho fetisisa tsa ho fokotsa mats'oenyeho le khatello ea maikutlo ha motho a tobane le likotsi ke ho leka ho li fokotsa ka ho nahana litlamorao tse mpe ka ho fetisisa le ho itokisetsa tsona. Ha motho a etsa sena, o lokela ho leka ka matla ho fokotsa seo ho ka khonahalang. Ka boitokiso bona le boiteko bona bo molemo, mats'oenyeho le mesarelo tsa motho li tla nyamela, ’me boiteko bona bo tla shebana le ho tlisa melemo le ho thibela likotsi tse ka bang haufi le taolo ea motho.

Haeba lintho tse bakang ts'abo, tse bakang bokulo le tse bakang bofuma hammoho le tahlehelo ea lintho tseo a li ratang e mo hlahela, ke hore a e amohele ka khutso a be a itlhophele eona, le maemong a thata-hali. Hobane ho itokisetsa ho mamella maima ho ea li nolofatsa le ho tlosa boima ba tsona, haholo ha a ikemiselitse ho li thibela ho latela bokhoni ba hae. Ka hona, boemong ba hae, ho itlhopha hoa hae ho kopantsoe le boiteko ba hae bo molemo bo sitisang mats'oenyeho, ’me o sebetsa ka thata ho nchafatsa matla a hae a ho thibela mathata, ha a ntse a its'itlehile ka Molimo ebile ana le tumelo ho Eena. Ha ho khoao hore lintho tsena li na le molemo o moholo ho tliseng thabo le khotso ea kelello, hammoho le seo mohlanka a nang le ts'epo ea ho thola moputso haufinyane le nakong e tlang. Sena ke se pakiloeng se tsebahalang ’me liketsahalo ho batho bao li ba etsahalletseng li ngata.

Khaolo: Matla a pelo le ho hloka pherekano le ts'its'inyeho ea Maikutlo

E 'ngoe ea mekhoa e metle ka ho fetisisa ea pheko bakeng sa maloetse a pelo 'moho le bakeng sa maloetse a 'mele, ke ho ba le pelo e matla le ho se ferekane ha eona le ho se sisinyehe ke menahano e mebe le lits'oants'o tse maikutlong tse bakiloeng ke mehopolo e mebe. Khalefo le pherekano ke tse ling tsa lisosa tse bohloko ’me tebello ea bomalimabe le tahlehelo ea baratuoa e mo lebisa mats'oenyehong, masoabing, mafung a pelo le bokulong le ho senyeha ha methapo ea kutlo, e nang le litla-morao tse mpe tseo batho ba ba ngata ba fetileng mathateng a tsona.

Ho beha ts'epo ho Allah, Ha pelo e its'etlehile ho Molimo, e Mo ts'epa, e sa lumelle litlhaloso tsa bohata kapa litoro tse mpe ho e laola, ‘me e ts'epa Molimo ebile e lebella mohau oa Hae, mats'oenyeho le bohloko bo tlosoa ho eona 'me mats'oenyeho a mangata a ’mele le a semoea a nyamela. Pelo e fumana matla, khutso le thabo e sa hlaloseheng. Ke litsi tse kae tsa bophelo tse tletseng bakuli ba ts'oeroeng ke khatello ea maikutlo le pherekano e mpe! Ke ha kae litaba tse li ammeng lipelo tsa batho ba matla, ho sa boleloe ka ba futsanehileng! Ke ha kae li ba khannelang ho ts'erehaneng le bohlanyeng! Motho ea phetseng hantle ke eo Molimo A mo folisitseng le ho mo tataisa hore a loants'e litakatso tsa hae hore a fumane litsela tse molemo tse matlafatsang pelo le ho leleka mesarelo. Allah Ea Matla ʼOhle O itse: ﴾...'Me ea behileng ts'epo ea hae ho Allah, O lekane sebakeng sa hae...﴿ [Talaq: 3] E leng ea mo lekaneng tabeng tsohle tsa tumelo ea hae le tsa bophelo ba hae ba lefatše.

Ea itšetlehileng ka Allah ka ’nete o ba le pelo e matla; mehopolo e tšosang kapa lipelaelo ha li mo ame, ’me liketsahalo tsa bophelo ha li mo tšoenye, hobane o tseba hore lintho tseo li hlaha ka lebaka la bofokoli ba moea, le bofokoli le tšabo tse se nang ’nete. Hape o tseba hore Allah O ikarabella ho fana ka khotsofalo e phethahetseng ho ea itšetlehileng ka Eena. Ka hona o tšepa Allah ’me o khutsa ka ts’episo ea Hae. Ka tsela ena matšoenyeho le khatello lia fela, boima bo fetoha bonolo, masoabi a fetoha thabo, ’me tšabo e fetoha polokeho. Ka hona re kopa Allah Ea Phahameng hore a re fe bophelo bo botle, ’me a re hauhele ka ho re fa matla le botsitso ba pelo, le tawakkul e phethahetseng (ho itšetleha ka Allah) eo Allah a tšepisitseng ka eona ho batho ba eona molemo o mong le o mong, le ho ba sireletsa khahlanong le ntho e ’ngoe le e ’ngoe e mpe le e kotsi.

Khaolo: Ho ikoetlisetsa ho mamella liphoso tsa ba bang

'Me ka mantsoe a Moporofeta -khotso le litlhohonolofatso li be holim'a hae: «Molumeli ha a lokela ho hloea mosali oa molumeli; haeba a sa rate se seng ka eena, o tla thabisoa ke se seng ka eena» E tlalehiloe ke Muslim.

Melemo e 'meli e meholo-hali:

Oa pele: ke tataiso mabapi le kamoo motho a lokelang ho sebetsana ka teng le mosali (molekane), le beng ka eena, le motsoalle, le motho eo a sebelisanang le eena, le mang kapa mang eo a nang le kamano kapa khokahano le eena. Ho hlokahala hore motho a tloaetse moea oa hae hore ka nnete motho eo ho tla ba le phoso, bofokoli kapa ntho e itseng eo a sa rateng. Ha u fumana ntho e joalo, bapisa sena le se lokelang ho ba teng ho uena kapa seo u lokelang ho se etsa: ho boloka kamano e matla le ho tsoelapele ho boloka lerato. Sena se etsoa ka ho hopola botle le makhabane ao motho eo a nang le ’ona, le merero e metle—ebang ke ea botho kapa ea kakaretso. Ka tsela ena, ha u sa shebane haholo le liphoso empa u ela hloko makhabane, botsoalle le kamano li tla tsoela pele, ’me khotso le boiketlo li tla phethahala bakeng sa hao.

Molemo oa bobeli: Ke ho tlosoa ha mats'oenyeho le tlhonamo, ho bolokoa ha bohloeki ba pelo, ho tsoela pele ho phetha litokelo tse tlamang le tse khothalletsoang, le ho fihlela khutso le boiketlo pakeng tsa mahlakore a mabeli. Mang kapa mang ea sa lateleng tataiso ena e boletsoeng ke Moporofeta ﷺ empa ho ena le hoo a fetola taba, a shebane feela le lintho tse mpe ’me a sa bone tse ntle, ruri o tla ts'oenyeha, ’me lerato pakeng tsa hae le eo a amanang le eena le tla sitiseha. Ka lebaka leo, litokelo tse ngata tseo e mong le e mong a tlamehileng ho li boloka li tla qetella li khaotsoe kapa li sa phetheha.

Batho ba bangata ba nang le litakatso tse phahameng ba itloaetsa ho ba le mamello le khutso ha likoluoa le mathata li hlaha. Empa ha ho tluoa litabeng tse nyenyane tse bonolo, ba qala ho ts'oenyeha, ’me khotso ea bona e ea ferekana. Lebaka la sena ke hore ba ikoetliselitse ho sebetsana le litaba tse kholo feela, ’me ba tlohetse ho itloaetsa ho sebetsana le tse nyenyane. Ka lebaka leo, taba ena e ba utloisa bohloko ’me e ama boiketlo ba bona pele. Ka hona motho ea bohlale o ikoetlisetsa ho sebetsana le litaba tse nyenyane le tse kholo ka ho ts'oana, ’me o kopa thuso ho Molimo litabeng tseo tsohle, a bile a kopa hore Molimo A se ke A mo tlohela hore a its'etlehe ka Eena leha ekaba ka ho panya ha leihlo. Ka tsela eo lintho tse nyenyane li ba bonolo ho eena, joalokaha le lintho tse kholo le tsona li ba bonolo ho eena. O lula a le khotsong, pelo ea hae e khutsitse ebile e phomotse.

Khaolo: Ho se inehele ho mats'oenyeho

Motho ea bohlale o ea tseba hore bophelo bo nepahetseng ke bophelo ba thabo le khutso, 'me seo se se khuts'oane. Ha a lokela ho bo khutsufatsa ka mats'oenyeho le ho ikamahanya le likhathatso kaha seo se khahlanong le bophelo bo botle. O lokela ho ba lekhonatha ka bophelo ba hae hore boholo ba bona bo se iphumane bo le tlas'a taolo ea mats'oenyeho le likhathatso. Ha ho phapano taba ena lipakeng tsa ea lokileng le ea khopo empa molumeli o na le kabelo e kholo tlhalosong ena le karolo e bohlokoa, bobeli sebakeng sa honajoale kapa sa ka moso.

Ho bapisa pakeng tsa litlhohonolofatso tsa Allah le ntho e mpe e mo hlahetseng (motho), Hape ho loketse hore ha motho a hlaheloa ke ntho e sa mo thabiseng kapa eo a e tšabang, a bapise pakeng tsa litlhohonolofatso tse ling tseo a ntseng a e-na le tsona — ebang ke tsa bolumeli kapa tsa bophelo ba lefatše — le ntho e mpe e mo hlahetseng. Ha a etsa papiso ena, ho tla hlaka hore litlhohonolofatso tseo a nang le tsona li ngata haholo, ’me bobe kapa mahlomola a mo hlahetseng a manyenyane ebile a fela a sa bonahale ha a bapisoa le tsona.

Ka mokhoa o ts'oanang, o bapisa seo a ts'ohang hore se ka mo hlahela le menyetla e mengata ea hore a pholohe ho sona. Hore a se lumelle monyetla o fokolang hore o hlole menyetla e mengata e matla, kahoo le tšabo lia fela. O boetse o lekanya monyetla o moholo ka ho fetisisa oa lintho tse ka mo hlahelang, ebe o itokisetsa tsona haeba li ka etsahala. Hape o ikitlaelletsa ho thibela tse e-s’o etsahale, le ho tlosa kapa ho fokotsa tse seng li etsahetse.

Ho hlokofatsa batho ke ntho e 'ngoe eo u sa lokelang ho e etsa kantle le haeba e u khathatsa, har’a lintho tse molemo ke hore u tsebe hore ho u utloisa bohloko ha batho, haholo-haholo ka mantsoe a mabe, ha ho u utloise bohloko ka nnete; hoba ba utloisa bona bohloko ka bobona. Ho tla u ama feela haeba u ka tšoarella ho nahana ka hona, ’me ua lumella hore ho nke maikutlo a hao. Ka nako eo ho tla u utloisa bohloko joalo ka ha ho ba utloisitse bona. Empa haeba u sa ho ele hloko, ho ke ke ha u utloisa bohloko ho hang.

Tlatsa bophelo ba hau ka maikutlo a molemo, Tseba hore bophelo ba hao bo laoloa ke mehopolo ea hao. Haeba mehopolo ea hao e its'etlehile ka lintho tse bohlokoa bophelong ba hao ba semoea kapa ba litaba tsa lefats'e, ruri bophelo ba hao bo tla nepahala bo u tlisetse thabo. Ho seng joalo ho fapane.

Ho itloaetsa ho khahlisa Molimo eseng 'mopo, E ’ngoe ea lintho tse molemo haholo ho leleka matšoenyeho ke hore u koetlise pelo ea hao hore u se ke ua batla teboho ho mang kapa mang ntle le Allah. Ha u etsa molemo ho motho ea nang le tokelo ho uena kapa ho eo a se nang tokelo ho uena, tseba hore sena ke ts'ebetso pakeng tsa hao le Allah. Kahoo u se ke ua tšoenyeha hore na eo u mo etselitseng molemo oa u leboha kapa che, hobane u entse sena ka lebaka la Allah. Joalokaha Allah A boletse mabapi le bahlanka ba Hae ba khethehileng: “Ruri Re le fepa ka lebaka la ho batla sefahleho sa Allah (re batla khotsofalo ea Allah feela); ha re batle moputso ho lona, ebile ha re batle teboho ho lona 9” [Al-Insan: 9].

Sena se tiisoa haholo ha u sebetsana le lelapa la hao le bana ba hao, le ka matla a kamano ea hao le bona. Ha u koetlisa pelo ea hao hore u lahlele bobe hole le bona (u se ke ua ba tšoarela bobe kapa ua ba utloisa bohloko), ka nnete u tla phomola, ’me le bona ba phomolo. Har’a lintho tse tlisang khutso le phomolo ke ho nka litšoaneleho tse ntle le ho li etsa ho latela tšusumetso ea pelo, ntle le ho ikhatella kapa ho itšoara ka thata, hobane ho ikhatella ho baka khatello le matšoenyeho. Ka linako tse joalo motho a ka qetella a khutlela morao a se na letho, a sa fumane botle boo a neng a bo batla, hobane o ile a tsamaea ka tsela e so thehiloeng. Sena ke karolo ea bohlale: hore u nke lintho tse mahlomola u li fetole tse hloekileng le tse monate, 'me ka ho etsa joalo, thabo ea bophelo ea eketseha 'me mahlomola a fela.

Shebana le sa bohlokoa ho feta se hlokofatsang, Beha lintho tsohle tse molemo pel'a mahlo a hao 'me u sebetse ka thata ho li fihlela. U se ke ua leka ho natsa lintho tse kotsi; e le hore u itebatse lisosa tsohle tse tlisang matšoenyeho le masoabi. Iphe nako ea ho phomola 'me u bokelle matla a moea le kelello tšebetsong ea hao ea bohlokoa.

Ho phetha kapa ho qeta mesebetsi hang-hang ntle le ho e liehisa, Har’a lintho tse molemo hape ke ho qeta mesebetsi hang-hang, e le hore motho a tle a lokolohe nakong e tlang. Hobane haeba mesebetsi e sa phethoe ka nako ea eona, e tla bokellana ho uena: ho tla sala tse fetileng, ’me ho eketsoe tse tlang hamorao, kahoo moroalo oa tsona o tla ba boima. Empa ha u phetha ntho e ’ngoe le e ’ngoe ka nako ea eona, u tla tobana le litaba tsa kamoso ka matla a ho nahana le matla a ho sebetsa.

Ho hlophisa lintho tsa bohlokoa ka tatellano ea tsona ha u ntse u kopa likeletso ho ba bang, Ho tsʼoanetse hore u khethe mesebetsi e molemo ho qala ka e bohlokoa ka ho fetisisa, ebe e lateloa ke e ’ngoe. Hape arola pakeng tsa lintho tseo moea oa hao o li ratang le tseo takatso ea hao e matla ho tsona, hobane ho etsa se fapaneng le seo ho ka tlisa ho teneha, ho khathala le ho sithabela ha pelo. Ithuse tabeng ena ka monahano o nepahetseng le ka ho buisana (ho kopa likeletso), hobane ea buisanang le ba bang ha a so ka a ikoahlaea. Hape ithute taba eo u batlang ho e etsa ka ho e hlahloba ka hloko le ka botebo. Ha u se u bone hore ho na le molemo ho eona ’me u nkile qeto, tšepa Allah, hobane Allah o rata ba mo tšepang.

’Me thoriso eohle ke ea Allah, Mong’a mafatše ’ohle.

’Me Allah a romele lithapelo le khotso ho Mong’a rona Muhammad, le ho ba lelapa la hae le ho Barutuoa ba hae (Sahabah).