الانشِقَاق

Amayka su langit ka magupakan.

Endu makikineg sekanin kanu pedtiyakap lun endu mabenal.

Amayka su lupa ka madatal.

Endu itubpa nin su nganin a nadalem lun endu maginibpedan.

Endu makikineg sekanin kanu pedtiyakap lun endu mabenal.

Hay seka a manusya! Saben-sabenal a seka na makambalingan ka kanu Kadenan nengka (Allah) sa tidtu a kambalingan na makambalatemuway nengka den sekanin.

Makapantag kanu entayn i duwalan kanu kawanan a lima nin.

Na di sumala na makwinta den sekanin sa kagkwinta a malemu,

Endu makambalingan sekanin lu kanu pamilya nin sa magalaw,

Endu makapantag kanu entayn i duwalan sa lukisan kanu taligkudan nu bigkugungin.

Di sumala na matawag sekanin sa kalugyan endu kabinasan.

Endu makaludep den sekanin kanu Sa-eir (naraka).

Saben-sabenal na sekanin na ya nin kaaden siya kanu pamilya nin (sa dunya) na magalaw.

Saben-sabenal na sekanin na inantapin i di den a benal sekanin makambalingan (sa Allah).

Uway! Saben-sabenal na su Kadenan nin (Allah) na ya nin kaaden na lekanin na gailay nin.

Na idsapa ku (Allah) kanu edsukilep.

Endu idsapa ku kanu magabi endu su nganin a kalangkapan nin.

Endu idsapa ku kanu ulan-ulan amayka egkaliwanag.

Da ka-ebplis in na mabalak nu den i pangkat pangkat (gatamanan).

Na ngin i aden sa kanilan ka di silan bamalityala?

Endu amayka batyan kanilan su Qur’an na di silan bamedsugyud?

Ugaid na su manga migkafir na papendalbuten nilan (su bantang).

Endu su Allah na labi a mataw kanu nganin a ibamedsulen nilan.

Na panudtul ka sa kanilan su kasiksan a masakit.

Ya tabya na su manga namalityala endu su namenggalebek sa manga mapya na aden kanilan i balas a di ebpapas.