Islam ke bolumeli ba tlhaho, kelello le thabo

Islam ke bolumeli ba tlhaho, kelello le thabo.

Ka lebitso la Mmopi ea Mosa Ea Mohau.

Na u kile ua ipotsa:

Ke mang ea bopileng maholimo le lefatše le tsohle tse ho tsona tsa libopuoa tse kholohali? Ke mang ea entseng tsamaiso ee e hlophisitsoeng hantle le e phethahetseng hakaale?

Bokahohle bona bo boholo hakana bo boloka taolo le botsitso ba bona joang ka melao ea bona e hlophisitsoeng hantle e bo laolang ho pholletsa le lilemo?

Na bokahohle boo bo ikentse? Kapa bo bile teng ho tsoa ho lefeela kapa na bo bile teng ka tšohanyetso?

Ke mang ea u bopileng?

Ke mang ea kentseng tsamaiso ena e hlophisitsoeng hantle ka har’a 'mele oa hau le 'meleng ea lintho tse phelang?

Ha ho motho ea ka amohelang ho bolelloa hore moaho ona o bile teng ntle le hore ho be le motho ea o ahang! Kapa hore bosieo ke bona bo entseng moaho ona! bokahohle bona bo boholo hakana bo bile teng ntle le 'Mopi? Motho ea nang le kelello e hlaphohetsoeng a ka amohela joang ho bolelloa hore taolo ena e hlophisitsoeng ka tsela e nepahetseng ea bokahohle e bile teng ka tšohanyetso?

Ruri, ho na le Molimo o moholo, ʼMopi le Mohlophisi le Motsamaisi oa bokahohle bona le sohle se ho bona, ʼme eo ke Allah ea Matla ʼOhle.

ʼMe ʼMopi - ea matla ʼOhle - O re rometse Baromuoa ʼme a ba senolela Libuka tse halalelang (Tšenolo) ʼme ea ho qetela ea tsona e leng Qur’an e Halalelang eo Allah A e senoletseng Muhammad (khotso e be le ena) Moromuoa oa mapomelo oa ba Baromuoa ba Allah, ʼme ka Libuka tsa Hae le Baromuoa ba Hae Allah:

O itsebahalitse ho rona, a hlalosa litšobotsi tsa Hae le litokelo tsa Hae holim'a rona, 'me a hlalosa litokelo tsa rona holim'a hae.

O re tataisitse hore ke Morena ea entseng tlholeho, le hore ke ea Phelang ea sa shoeng, ʼme tlholeho e matsohong a Hae le tlas’a matla le taolo ea Hae.

O boetse O re boleletse hore ho tse ling tsa litšobotsi tsa Hae ke tsebo, hobane o likalikelitse lintho tsohle ka tsebo ea hae, le hore o utloa tsohle, O bona tsohle, 'me ha ho letho le patehileng ho Eena lefatšeng kapa leholimong.

Mme Ar-Rabb (Morena) ke Al-Hayy (Ea Phelang ka ho sa Feleng), Al-Qayyum (Ea sa hlokeng letho ho tsoa ho libopuoa tsa hae empa tsona li mo hloka), eo bophelo ba sebopuoa se seng le se seng bo tsoang ho Eena, Khanya e be ho Eena. Ea Matla 'Ohle o itse: ﴾Allah! Lā ilāha illa Huwa (ha ho mang kapa mang ea lokeloang ke khumamelo kantle ho eena), Al-Hayy Al-Qayyum (Ea Phelang ka ho sa feleng, Ea ikemetseng Ea tšehetsang le ho sireletsa tsohle tse teng), Ea sa otseleng kapa ho tšoaroa ke boroko, Eo tsohle tse maholimong le tse lefatšeng e leng tsa Hae, ke mang ea ka buellang ba bang ho eena kathoko ho tumello ea Hae? O tseba se ka pele ho bona (e leng tsohle tse etsahalang libopuoa tsa hae lefatšeng lena), le se ka morao ho bona (e leng tsohle tse tlang ho ba etsahalla bophelong ba ka mor'a lefu). ʼMe ba ke ke ba fihlela tsebo ea Hae ntle le ka thato ea Hae. Kursi ea Hae e pharaletse ka holim'a maholimo le lefatše, 'me ha a khathale ke ho ba sireletsa le ho ba boloka. ʼMe ke Al-ʼAliyy (Ea Phahameng ka ho Fetisisa) Al-ʼAdheem (Ea Moholo-holo). [Al-Baqarah: 255] Kursi: Ke Setulo seo e leng bonamelo ba maoto, ke sebopuoa se seholo ka holimo ho leholimo la bosupa ʼme Kursi ha se ʼArsh (Terone) kaha ʼArsh (Terone) e le sebopuoa se seholohali ho feta libopuoa tsohle ʼme e ka holimo ho Kursi.

O re tsebisitse hore ke Eena Morena ea khetholloang ka litšobotsi tse phethahetseng, 'me O re file likelello le kutlo tse re thusang ho utloisisa limakatso tsa popo ea Hae le matla a Hae, tse re bontšang boholo ba Hae, matla le phetheho ea litšobotsi tsa Hae, 'me O kentse ka hare ho rona tlhaho e re bontšang phetheho ea Hae le hore A ke ke a e-ba le bofokoli kapa sekoli sefe kapa sefe.

O re rutile hore Morena O kaholimo ho maholimo a Hae, ha a kopane kapa ho tsoakana le libopuoa, ʼme le libopuoa ha li phele ka hare ho Eena.

O re rutile hore re lokela ho ikokobetsa le ho inehela ho Eena Khanya e be ho Eena, kaha ke Eena ʼMopi oa rona le ʼMopi oa bokahohle le Motsamaisi oa bona.

Kahoo ʼMopi O na le litšobotsi tsa boholo 'me A ke ke A hlalosoa e le Ea hlokang kapa Ea haelloang. Hoba Molimo ha O lebale, ha O robale, ha O je lijo, ʼme A ke ke A ba le mosali kapa ngoana. ʼMe mangolo ʼohle a nang le eng kapa eng e hanyetsanang le boholo ba 'Mopi ha a tsoe tšenolong ea 'nete e tlisitsoeng ke Baromuoa ba Molimo, khotso e be le bona.

Allah Ea Phahameng O re ka har’a Qur’an e Halalelang: ﴾E re (Oho Uena Muhammad ﷺ ho bona): “Ke Allah, Ea nnotši Allah As-Samad (Monghali ea ikemetseng, eo libopuoa tsohle li mo hlokang) Haʼa tsoale kapa ho tsoaloa, ʼMe ha ho le ea mong ea ka lekanang le Eena kapa ea ka bapisoang le Eena.﴿ [Al-Ikhlas: 1-4]

Haeba u lumela ho Molimo ʼMopi…na u kile oa ipotsa hore hobane’ng u bopiloe? Molimo o batla eng ho rona, ’me sepheo sa bophelo ba rona ke sefe?

Na ho ka khoneha hore Allah A re bope ebe O re siea re se na morero? Na Allah O bopile libopuoa tsee tsohle ntle le sepheo kapa morero?

ʼMe rea tseba hore ha ho khonehe hore re phele bophelo bona ntle le hore motho e mong le e mong a putsoe bakeng sa mesebetsi ea hae ebang ke e metle kapa e mebe, na ho ka khoneha hore baetsalibe ba se ke ba fuoa kahlolo ’me ba lokileng ba se ke ba fuoa moputso?

’Nete ke hore Molimo ʼMopi ea Moholo, Allah, O re bolelletse ka sepheo le morero oa ho re bopa ha Hae, e leng ho khumamela Allah A nnotši, le seo a se batlang ho rona! O re boleletse hore ke Eena feela Ea tšoaneloang ke khumamelo, ’me A re hlakisetsa ka baprofeta ba Hae hore re ka mo khumamela joang, ra ikatametsa ho Eena joang ka litaelo tsa Hae le ho qoba lintho tseo A li hanetseng, le hore re fumana khotso ea Hae joang, re ela hloko kotlo ea Hae joang, hape O re bolelletse ka tsoho ea rona ka mor'a lefu.

O re bolelletse hore bophelo bona ba lefatše ke teko feela, ’me bophelo ba ’nete bo phethahetseng bo tla ba ka mor’a lefu.

O re boleletse hore mang kapa mang ea khumamelang Allah joalo ka ha a mo laetse, 'me a qoba seo a mo hanetseng sona, o tla ba le bophelo bo botle lefatšeng lena le thabo ea ka ho sa feleng bophelong bo tlang. Empa mang kapa mang ea sa mo mameleng le ea sa lumeleng ho Eena o tla ba le mahlomola lefatšeng lena le tlhokofatso ea ka ho sa feleng bophelong bo tlang.

ʼMe Morena oa rona o re boleletse hore ho hapa thabo le katleho ea Hae le ho phonyoha kotlo ea Hae ho ka finyelloa feela ka Islam, e leng: ho ikokobelletsa Eena le ho mo khumamela a le mong ntle le ho mo kopanya le balekane, ho Mo mamela, le ho latela molao oa Hae ka pelo e thabileng le ka kamohelo. O boetse A re bolella hore A ke ke A amohela bolumeli bofe kapa bofe ho batho ntle le bona (Islam). Allah Ea Holimo-limo O itse: ﴾ʼMe mang kapa mang ea labalabelang bolumeli bo bong bosele ntle le ba Islam - bo ke ke ba amoheloa ho eena le ka mohla o le mong, 'me Letsatsing la Bofelo, o tla ba har'a ba lahlehetsoeng. [Al-Imran: 85]

Ha motho a talima hore na batho ba bangata kajeno ba rapela eng; o tla fumana hore e mong o rapela motho, ʼme e mong o rapela setšoantšo, e mong o rapela naleli, joalo-joalo. Motho ea nang le kelello ha a khumamele mang kapa mang ntle le Morena oa lintho tsohle, Ea phethahetseng litšobotsing tsa Hae. Ke joang motho a ka khumamelang sebopuoa se tšoanang le eena kapa se ka tlase ho eena? Kahoo molimo o rapeloang e ke ke ea e-ba motho, setšoantšo, sefate kapa phoofolo!

Ka hona, mefuta eohle ea malumeli eo batho ba rapelang ka eona kajeno — ntle le Islam — ha e amoheloe ke Allah, hobane ke malumeli a iqapetsoeng ke batho, kapa malumeli ao e neng e le a leholimo eaba hamorao a senngoa ke matsoho a batho. Haele Islam ke bolumeli ba Morena oa lintho tsohle, bo tla lula bo le joalo bo sa fetohe ebile bo sa senyehe. ʼMe Buka ea bolumeli bona ke Qur’an e Halalelang, e sirelelitsoeng feela joalo ka ha e ne e senoloa ke Allah, ’me e ntse e le matsohong a Mamosleme ho fihlela kajeno ka puo eo e senotsoeng ka eona ho Moporofeta oa ho qetela.

E 'ngoe ea metheo ea Islam ke ho lumela ho baromuoa bohle bao Allah A ba romileng, 'me kaofela ha bona e ne e le batho bao Allah A neng A ba tšehelitse ka lipontšo le mehlolo, ʼme O ne A ba rometse ho bitsa batho ho Mo khumamela a le mong, ntle le balekane.

ʼMe moromuoa oa ho qetela oa Baromuoa ke Moromuoa Muhammad (khotso le litlhohonolofatso tsa Allah li be le eena). O rometsoe ke Allah ka molao oa bomolimo oa ho qetela, o hlakolang melao e neng e tlisitsoe ke baporofeta ba pele ho eena. Allah A mo tšehetsa ka lipontšo le mehlolo e meholo, ’me e kholo ka ho fetisisa ea tsona ke Quran e halalelang—Lentsoe la Morena oa lintho tsohle — buka e kholo ka ho fetisisa eo batho ba kileng ba e tseba, e makatsang ka litaba tsa eona, mantsoe, mokhoa oa eona le melao ea eona. Ka hare ho eona ho na le tataiso e lebisang ’neteng, e isang thabong bophelong ba lefatše lena le katlehong e sa feleng ka mor’a lefu. E senotsoe ka puo ea Searabia.

Hape ho na le bopaki bo bongata ba kelello le ba saense bo pakang ntle ho pelaelo hore Qur’an ena ke lentsoe la ’Mopi ea Matla ’Ohle le hore e ne e ke ke ea etsoa ke batho.

ʼMe ho e meng ea metheo ea Islam ke ho lumela ho mangeloi le ho lumela ho Letsatsi la ho Qetela, moo Molimo a tla tsosa batho mabitleng a bona ka Letsatsi la Tsoho ho ba jarisa boikarabello bakeng sa liketso tsa bona. Joale mang kapa mang ea etsang liketso tse ntle 'me e le molumeli o tla ba le thabo e sa feleng Paradeiseng, 'me mang kapa mang ea sa lumeleng le ea etsang liketso tse mpe o tla ba le kotlo e kholo Liheleng. ’Me har’a metheo ea Islam ke ho lumela ho Al-Qadar (hore Allah O tseba tsohle tse etsahetseng le tse tlang ho etsahala le pele li ka etsahala, le hore tsohle tse etsahalang O li ngotse le pele li ka etsahala, le hore tsohle li etsahala feela ka thato ea Hae, le hore Allah ke ʼMopi oa lintho tsohle ho kenyelletsa le liketso tsa libopuoa tsa Hae), ekabang ke se setle kapa se sebe.

’Me bolumeli ba Islam ke mokhoa o phethahetseng oa bophelo, o lumellanang le tlhaho ea motho le kelello, ’me bo amoheloa ke meea e phetseng hantle. Bo hlophisitsoe ke ʼMopi e Moholo bakeng sa popo ea Hae, ’me ke bolumeli ba botle le thabo bakeng sa batho bohle lefatšeng lena le la ka mor'a lefu. Ha bo khetholle morabe ho feta o mong, kapa ’mala ho feta o mong; batho bohle ba lekana ho bolumeli ba Islam. Ha ho motho ea phahameng ho feta e mong ho Islam ntle le ka tekanyo ea mesebetsi ea hae e metle.

Allah Ea Phahameng O re: Mang kapa mang ea etsang ho hotle le ho lokileng, ebang e le e motona kapa e motšehali, ha e ntse e le molumeli, ruri Re tla mo phelisa bophelo bo botle, 'me ruri Re tla ba nea moputso oa bona [Bophelong bo Tlang] ho ea ka botle ba tseo ba neng ba li etsa. [An-Nahl: 97]

’Me e ’ngoe ea lintho tseo Molimo a li tiisang ka ho hlaka ka har’a Qur'an ke hore ho lumela ho Allah e le Morena le Ea nang le tokelo eohle ea ho khumameloa, le ho lumela ho Islam e le bolumeli, le ho lumela ho Muhammad ﷺ e le moromuoa ke ntho e tlamang eo motho a se nang khetho ho holim’a eona. ’Me ka Letsatsi la Tsoho ho tla ba le kahlolo le moputso; kahoo mang kapa mang eo e leng molumeli oa 'nete o tla ba le katleho e kholo le pholoho, empa ea neng a sa lumele o tla ba le tahlehelo e totobetseng.

Allah Ea Phahameng O re: ’Me mang kapa mang ea mamelang Allah le Moromuoa oa Hae, Allah O tla mo kenya lirapeng (tsa Paradeise) tseo ka tlas’a tsona ho phallang linoka, o tla hlola teng ka ho sa feleng; ’me hoo ke katleho e kholo. ’Me mang kapa mang ea sa mameleng Allah le Moromuoa oa Hae, ʼme a tlola meeli ea Hae — O tla mo kenya mollong oo a tla hlola teng ka ho sa feleng, ’me o tla fumana kotlo e hlabisang lihlong. [An-Nisaa: 13-14]