عنوان: نصابِ تعلیم، علمِ فقہ، درجہ (پنجم)۔

عنوان: نصابِ تعلیم، علمِ فقہ، درجہ (پنجم)۔

مختصر تعارف: اس علمی مواد کو مملکت سعودی عرب میں طلبہ کے لیے مقرر کردہ تعلیمی نصاب کی تہذیب اور اختصار سمجھا جا سکتا ہے۔ اسے کئی درجات میں تقسیم کیا گیا ہے۔ اس مواد میں علمِ فقہ کے مطالعہ سے متعلق حصہ بھی شامل ہے، جو بارہ (12) درجات میں منقسم ہے۔ پانچویں درجے میں شامل اہم ترین موضوعات اور مسائل درج ذیل ہیں:

پانی کی قسمیں، ان کے احکام اور ہر قسم کی مثالیں۔

موزوں پر مسح کے احکام اور تیمم کے طریقے کا بیان۔

نماز کے تفصیلی طریقے، اس میں مکروہ افعال اور ان اوقات کا بیان جن میں نماز پڑھنا منع ہے۔

سجدۂ سہو کے احکام کا بیان۔

امامت کے احکام، باجماعت نماز کا حکم، اور معذوروں کی نماز۔

پانچواں درجہ

پہلا سبق [1]

[1] استاد کے لیے: استاد پانی کی اقسام کے بارے میں گفتگو کی تمہید یہ بیان کرتے ہوئے باندھے کہ نماز وغیرہ کے درست ہونے کے لیے طہارت شرط ہے، اور یہ کہ طہارت سے دو چیزیں مقصود ہیں: پہلی: حدث کو دور کرنا، اور حدث: جسم کی ایک ایسی کیفیت کا نام ہے جو نماز وغیرہ سے روکتی ہے۔ دوسری: نجاست کو دور کرنا، خواہ وہ بدن پر ہو، یا کپڑے پر، یا جگہ پر۔ پھر اس کے بعد یہ واضح کرے کہ یہ طہارت پانی سے حاصل ہوتی ہے، اور اس پانی کی دو قسمیں ہیں۔

پانی کی قسمیں

پانی کی دو قسمیں ہیں:

پہلی قسم: پاک پانی، اور یہ وہ پانی ہے جو اپنی اس حالت پر باقی رہے جس پر اللہ تعالیٰ نے اسے پیدا کیا ہے، جیسے: چشموں، سمندروں، نہروں، بارش اور کنوؤں وغیرہ کا پانی۔

اس کا حکم: اس سے طہارت حاصل کرنا صحیح ہے۔

دوسری قسم: ناپاک پانی، یہ وہ پانی ہے جس کا رنگ، ذائقہ یا بو کسی نجاست کی وجہ سے بدل گیا ہو، خواہ وہ تھوڑا ہو یا زیادہ۔

اس کا حکم: اس سے طہارت حاصل کرنا درست نہیں، اور پینے، کھانے یا کسی اور چیز میں اس کا استعمال حرام ہے۔

اس پانی کا حکم جس میں کوئی پاک چیز مل جائے:

اگر پانی میں کوئی پاک چیز مل جائے، جیسے زعفران، چائے، صابن، سیاہی اور مٹی، اور اس کی وجہ سے پانی تبدیل ہو جائے، لیکن وہ کسی دوسری چیز میں تبدیل نہ ہوا ہو، تو وہ اپنی پاکی پر باقی رہتا ہے۔

البتہ اگر پانی کسی دوسری چیز میں تبدیل ہو جائے، جیسے کہ وہ سیاہی، چائے یا کیچڑ بن جائے، تو اس سے طہارت حاصل کرنا صحیح نہیں ہے؛ کیوں کہ اسے پانی نہیں کہا جاتا۔

سوالات:

س1: پانی کی قسمیں بیان کریں، اور ہر قسم کا کیا حکم ہے؟

سوال 2 : صحیح جواب کو چنیں اور اس کے نیچے خط کھینچیں:

1- اگر پانی میں کوئی پاک چیز گر جائے اور اسے سیاہی میں تبدیل کر دے، تو:

(اس سے طہارت حاصل کرنا درست نہیں - وہ اپنی طہارت پر باقی رہتا ہے - وہ ناپاک ہو جاتا ہے)۔

2- سمندر کا پانی کہلاتا ہے:

(پاک پانی - ناپاک پانی)۔

س3: خالی جگہ کو پر کریں:

ناپاک پانی وہ ہے: ............................ ............................

ناپاک پانی سے پاکی حاصل کرنا............................ ۔

ناپاک پانی: ............................ ............................ حرام ہے۔

دوسرا سبق [2]

[2] معلم کے لیے: - جب تک موزہ اپنے اندر موجود سوراخوں کے باوجود "موزہ" کہلانے سے خارج نہ ہو، تب تک وہ ستر (ڈھانپنے) کی صفت سے خارج نہیں ہوتا۔ - یہ واضح کریں کہ مدت ختم ہونے، موزے یا جراب یا ان میں سے کسی ایک کو اتارنے، یا حدثِ اکبر واقع ہونے سے مسح باطل ہو جاتا ہے۔ - دینِ اسلام کی رواداری اور آسانی کی طرف توجہ دلائیں۔ - استاد طلبہ کے سامنے مسح کرنے کا عملی طریقہ دکھائے، پھر اس کے بعد طلبہ سے بھی اس کی عملی مشق کروائے۔

موزوں پر مسح

آپ پہلے جان چکے ہیں کہ وضو کے فرائض میں سے ہے: دونوں پاؤں کو ٹخنوں تک دھونا، لیکن مسلمان کو سردی یا کسی اور وجہ سے - موزوں یا جرابوں سے - اپنے دونوں پاؤں کو ڈھانپ کر رکھنے کی ضرورت پیش آسکتی ہے۔ تو کیا جب بھی وہ وضو کرنا چاہے، اس پر موزے یا جرابیں اتارنا لازم ہے؟

جواب: اس پر یہ لازم نہیں ہے، كيوں کہ یہ اللہ کی اپنے بندوں پر رحمت اور آسانی کا مظہر ہی ہے کہ اس نے ان کے لیے پاؤں دھونے کے بجائے موزوں اور ان جیسی چیزوں پر مسح کرنا جائز قرار دیا ہے۔

اس پر بلال رضی اللہ عنہ کی یہ حدیث دلالت کرتی ہے کہ نبی ﷺ نے دونوں موزوں پر مسح فرمایا [3]۔ [3] صحیح مسلم، کتاب الطہارة، باب: المسح على الناصية والعمامة، حدیث نمبر (275)۔

خف: پاؤں میں پہنے جانے والے چمڑے وغیرہ کے موزے۔

'جورب' سے مراد روئی وغیرہ کے موزے ہیں، جو پیروں میں پہنے جاتے ہیں، اور جنہیں عربی میں 'شُرّاب' کہا جاتا ہے۔

مسح کی شرطیں:

مسح کی کچھ شرطیں ہیں، جن میں سے چند یہ ہیں:

1- موزہ یا جراب کسی پاک چیز سے بنا ہو۔

2- موزہ یا جراب مباح ہو، لہذا حرام موزہ پر مسح کرنا جائز نہیں، جیسے غصب کیا ہوا، چوری کیا ہوا یا مَردوں کے لیے ریشم سے بنا ہوا موزہ۔

3- موزے یا جراب سے پاؤں ٹخنوں تک ڈھک جائیں۔

4- مکمل طہارت کے بعد موزے یا جرابیں پہنی ہوں۔

مسح کی مدت:

مسح کی مدت مقیم کے لیے ایک دن اور ایک رات ہے، اور مسافر کے لیے تین دن اور تین راتیں ہیں۔

مسح کی مدت کی ابتدا اور انتہا:

حدث کے بعد موزوں پر پہلی بار مسح کرنے سے مدت شروع ہوتی ہے، مقیم کے لیے ایک دن اور ایک رات مکمل ہونے پر، اور مسافر کے لیے تین دن اور تین راتیں مکمل ہونے پر ختم ہوتی ہے۔

اس کی مثال یہ ہے: اگر کوئی شخص ہفتے کے دن ظہر کی نماز کے لیے وضو کرے اور موزے یا جرابیں پہنے، پھر اس کے بعد اس کا وضو ٹوٹ جائے، اور جب وہ اسی دن عصر کی نماز کے لیے وضو کرے تو موزوں یا جرابوں پر مسح کرے، تو اس کے لیے جائز ہے کہ وہ دوسرے دن اسی وقت تک مسح کرے، اور وہ اتوار کے دن کی عصر ہے۔ چنانچہ اگر وہ عصر کی نماز کے لیے وضو کرنا چاہے تو وہ موزے یا جرابیں اتارے اور اپنے پاؤں دھوئے۔

مسح کا طریقہ :

وضو کرنے والا اپنے ہاتھوں کو پانی سے بھگوئے، پھر ان سے پیروں کی انگلیوں کی جگہ سے پنڈلی تک اپنے موزوں پر ایک مرتبہ مسح کرے، دائیں ہاتھ سے دائیں پیر کا، اور بائیں ہاتھ سے بائیں پیر کا۔ ایڑی یا موزے یا جراب کے نچلے حصے کا مسح کرنا مشروع نہیں ہے۔

سوالات:

س1: موزوں پر مسح کرنے کا کیا حکم ہے؟ دلیل کے ساتھ ذکر کریں۔

سوال 2: صحیح جملہ میں (صحیح)، یا غلط جملہ میں (غلط) لکھ کر جواب دیں اور غلطی کی تصحیح کریں:

1- موزوں پر مسح کی شرائط میں سے یہ ہے کہ وہ چمڑے کے بنے ہوں۔

2- موزوں پر مسح کی مدت کی شروعات حدث کے بعد کیے جانے والے پہلے مسح سے ہوتی ہے۔

3- مدت ختم ہو جانے کے بعد موزوں پر مسح کرنا درست ہے۔

س3: کالم (الف) کی عبارتوں کو کالم (ب) میں ان کے مناسب الفاظ سے ملائیں:

کالم (الف)

1- مقیم کے لیے مسح کی مدت

2- مسافر کے لیے مسح کی مدت

3- کسی شخص نے جراب چوری کی، پھر اسے پہن کر اس پر مسح کیا۔

4- خالد نے بے وضو ہونے کی حالت میں موزہ پہنا، پھر اس پر مسح کیا۔

کالم (ب)

- تین دن اور تین راتیں

- اس پر مسح کرنا درست نہیں ہے؛ کیونکہ اس نے اسے بغیر طہارت کے پہنا ہے۔

- اس پر مسح کرنا درست نہیں ہے؛ کیونکہ موزہ مباح نہیں ہے۔

- ایک دن اور ایک رات

- اس کی کوئی مدت متعین نہیں ہے۔

س4: موزوں پر مسح کرنے کا طریقہ کیا ہے؟

سوال 5: ایک شخص نے مغرب کی نماز کے بعد جرابیں پہنیں، پھر وضو ٹوٹنے کے بعد عشاء کی نماز کے لیے وضو کیا اور موزوں پر مسح کیا، وہ اوقات بیان کریں جن میں اس کے بعد اس کے لیے موزوں پر مسح کرنا صحیح ہے؟

دوسرا سبق [4]

[4] اس شخص کو بھی پانی نہ ملنے والے پر قیاس کیا جائے گا جس کے پاس پانی تو ہو، لیکن پانی کم ہونے کی وجہ سے اگر وہ اس سے وضو کر لے تو اسے پیاس کا خوف ہو، یا بجلی کٹ جائے اور اس کے پاس پانی کے ٹینک سے پانی نکالنے کا کوئی ذریعہ نہ ہو۔ - استاد طلبہ کے سامنے تیمم کا طریقہ عملی طور پر بیان کرے، پھر ان سے بھی اس کا عملی مشق کروائے۔

تیمم

جب مسلمان نماز پڑھنا چاہے تو اس پر واجب ہے کہ وہ پانی سے وضو کرے؛ کیوں کہ طہارت صحتِ نماز کے لیے شرط ہے، لیکن اگر اسے پانی نہ مل سکے، یا اس کے پاس پانی تو ہو لیکن بیمار ہونے کی وجہ سے اس سے وضو نہ کر سکتا ہو، یا اسے زخم ہوں، یا شدید سردی ہو جس کی وجہ سے وہ پانی استعمال نہ کر سکتا ہو، تو وہ تیمم کرے گا، چناں چہ ارشاد باری تعالیٰ ہے : ...پانی نہ ملے تو تم پاک مٹی سے تیمم کرلو، اسے اپنے چہروں پر اور ہاتھوں پر مل لو... [المائدۃ: 6]

تیمم کی تعریف:

تیمم یہ ہے کہ اللہ تعالیٰ کی عبادت کی نیت سے، ایک مخصوص طریقے کے مطابق، پاک مٹی کے ذریعے چہرے اور دونوں ہاتھوں پر مسح کیا جائے۔

تیمم کا طریقہ:

دل میں نیت کرے، پھر (بسم اللہ) کہے، پھر اپنے دونوں ہاتھوں کو ایک بار مٹی پر مارے، پھر اپنے ہاتھوں سے اپنے چہرے کا مسح کرے، پھر اپنے بائیں ہاتھ کی ہتھیلی سے دائیں ہتھیلی کی پشت کا مسح کرے، اور اپنے دائیں ہاتھ کی ہتھیلی سے بائیں ہتھیلی کی پشت کا مسح کرے۔

تیمم کی شرطیں:

1- نیت کرنا۔

2- پانی کے استعمال پر قدرت نہ ہونا؛ خواہ پانی موجود نہ ہونے کی وجہ سے ہو، یا پانی استعمال کرنے سے نقصان پہنچنے کا اندیشہ ہو۔

3- مٹی پاک ہو۔

4- مٹی مباح ہو۔

تیمم کو توڑنے والی چیزیں:

1- پانی کا مل جانا، اگرچہ نماز کے دوران ہی کیوں نہ ہو، نہ کہ اس کے بعد، یا پانی کے استعمال پر قدرت حاصل ہو جانا۔

2- وضو کو باطل کرنے والی چیزوں سے تیمم بھی باطل ہو جاتا ہے۔ ان میں سے کچھ یہ ہیں:

أ- پیشاب یا پاخانے کے راستے سے نکلنے والی چیز، جیسے پیشاب، پاخانہ یا ہوا۔

ب- نیند اور اس کے مشابہ حالتیں جیسے بے ہوشی۔

ج- اونٹ کا گوشت کھانا۔

سوالات:

س1: تیمم کی تعریف کیا ہے؟

س2: خالی جگہ کو پر کریں:

دو حالتیں ہیں جن میں تیمم جائز ہے، وہ یہ ہیں:

1-............................ ............................ ............................ ............................

2-............................ ............................ ............................ ............................

ب- تیمم کی شراطیں یہ ہیں:

1-............................ ............................ ............................ ............................

2- ............................ ............................ ............................ ............................

3-............................ ............................ ............................ ............................

4-............................ ............................ ............................ ............................

سوال 3 : کیا نیچے دیے گئے حالات میں تیمم کرنا جائز ہے یا پانی سے وضو کرنا ضروری ہے :

الف- ایک شخص اپنے شہر میں ہو اور اسے اپنے گھر میں پانی نہ مل سکے۔

ب- ایک شخص صحرا میں گیا اور نماز کا وقت ہو گیا، اور اس کے پاس صرف اتنا ہی پانی ہے جو اس کے کھانے پینے کے لیے کافی ہو۔

ج- ایک شخص سمندر کے کنارے بیٹھا ہے اور نماز کا وقت ہو گیا، لیکن اس کے پاس پانی نہیں ہے، اور آبادی اس سے بہت دور ہے۔

س4: تیمم کا طریقہ اور اسے باطل کر دینے والی چیزیں بیان کریں۔

تیسرا سبق [5]

[5] استاد کے لیے ہدایات: - استاد طلبہ کو نماز کی رغبت اور شوق دلائے، نماز چھوڑنے سے ڈرائے، اور انہیں نماز ترک کرنے کے خطرے اور اس کے سنگین نتائج سے آگاہ کرے۔ - ان پر کفر کی شناعت واضح کر دے، اور یہ کہ کافر اگر کفر کی حالت میں مر جائے تو اس کا انجام جہنم ہے، اور وہ کبھی جنت میں داخل نہیں ہوگا۔ اللہ تعالی کا فرمان ہے : (بے شک جو لوگ اہل کتاب میں کافر ہوئے اور مشرکین سب دوزخ کی آگ میں (جائیں گے) جہاں وه ہمیشہ رہیں گے۔ یہ لوگ بدترین خلائق ہیں۔) [البينۃ: 6].

نماز

تعریف:

مخصوص اقوال اور افعال کے ذریعے اللہ تعالی کی عبادت کرنا، جو تکبیر سے شروع اور سلام پر ختم ہوتی ہے۔

نماز کا مقام ومرتبہ:

اسلام میں نماز کا ایک بلند اور اعلیٰ مقام ومرتبہ ہے۔ یہ شہادتین کے بعد اسلام کا دوسرا رکن اور دین کا ستون ہے۔ نماز ترک کرنے والے کا اسلام میں کوئی حصہ نہیں۔ اس کی اہمیت اور عظیم مقام کی وجہ سے اللہ تعالیٰ نے اسے آسمان میں اسراء ومعراج کی رات رسول اللہ ﷺ پر فرض کیا۔

ابن عمر رضی اللہ عنہما سے روایت ہے کہ نبی ﷺ نے فرمایا: "اسلام کی بنیاد پانچ چیزوں پر ہے: اس بات کی گواہی دینا کہ اللہ کے سوا کوئی سچا معبود نہیں اور بے شک محمد ﷺ اللہ کے رسول ہیں، نماز قائم کرنا، زکوٰۃ ادا کرنا، خانہ کعبہ کا حج کرنا اور رمضان کے روزے رکھنا۔" [6] [6] صحیح بخاری، حدیث نمبر : 8، صحیح مسلم (1/45)، حدیث نمبر : 16، اور مسند احمد (2/120)، حدیث نمبر : 6011۔ مذکورہ الفاظ احمد کے ہیں۔

نماز کا حکم:

نماز ایک فریضہ ہے جسے اللہ نے اپنے بندوں پر فرض کیا ہے، اور جس نے جان بوجھ کر سستی اور کاہلی کے باعث اسے ترک کیا، تو اس نے کفر کیا، اور اگر وہ توبہ نہ کرے تو اسے قتل کر دیا جائے گا، اس کی دلیل نبی ﷺ کا یہ فرمان ہے: ”ہمارے اور ان (کافروں) کے درمیان فرق نماز کا ہے، تو جس نے نماز چھوڑدی اس نے کفر کیا۔“ [7] "[7] جامع ترمذی، کتاب الإيمان، باب: ما جاء في ترك الصلاة (5/13)، حدیث نمبر: (2621)، اور امام ترمذی نے کہا: "حسن صحیح غریب"۔

نماز کن لوگوں پر واجب ہے :

نماز عاقل و بالغ مسلمان پر فرض ہے، خواہ وہ مرد ہو یا عورت۔ البتہ چھوٹا بچہ جب سات سال کی عمر کو پہنچ جائے، تو اسے بطور مشق نماز پڑھنے کا حکم دیا جائے گا، تاکہ وہ اس سے مانوس ہو جائے اور اس کا عادی بن جائے، اور بالغ ہونے پر اسے نہ چھوڑے۔ اور جب وہ دس سال کا ہو جائے، تو اسے نماز (نہ پڑھنے) پر مارا جائے گا، اس لیے کہ رسول اللہ ﷺ نے فرمایا: ""جب تمہارے بچے سات سال کے ہو جائیں تو انہیں نماز پڑھنے کا حکم دو اور جب وہ دس سال کے ہو جائیں تو نماز میں غفلت پر انہیں مارو اور ان کے بستر بھی الگ الگ کر دو۔" [8]۔" [8] اسے ابو داؤد نے کتاب الصلاۃ، باب: متى يُؤمَر الغُلامُ بِالصَّلاة میں عمرو بن شعيب عن أبيه عن جده کی سند سے حدیث نمبر (495) کے تحت روایت کیا ہے، ترمذی نے ابواب الصلاۃ، باب: ما جاء متى يُؤْمَر الصَّبيُّ بالصَّلاة میں حدیث نمبر (407) کے تحت، دارمی نے اپنی سنن میں کتاب الصلاۃ، باب: متى يُؤمَر الصَّبيُّ بالصَّلاةِ میں حدیث نمبر (407) کے تحت، دارقطنی نے کتاب الصلاۃ، باب: الأمْرُ بِتَعلِيمِ الصَّلوات والضَّربِ عليها، وحَدّ العَوْرَةِ التي يجب سَترها (1/ 230) میں، حاکم نے المستدرک میں کتاب الصلاۃ، باب: في مَواقِيت الصَّلاة (1/ 197) میں، اور بیہقی نے کتاب الصلاۃ، باب: عَوْرَة الرَّجُل (2/ 229) میں روایت کیا ہے۔

سوالات:

س1: اسلام میں نماز کا مقام بیان کریں۔

س2: درج ذیل جملے کو مکمل کریں:

نماز کا حکم: ............................ اور جو شخص جان بوجھ کر سستی اور کاہلی کے باعث اسے ترک کر دے تو وہ ............................ اور اگر وہ توبہ نہ کرے تو اسے ............................

سوال 3 : مندرجہ ذیل امور کی دلیل پیش کریں:

1- نماز اسلام کا دوسرا رکن ہے۔

2- نماز چھوڑنا کفر ہے۔

س4: صحیح جواب کا انتخاب کریں اور اس کے نیچے لکیر کھینچیں:

1- نماز ان پر فرض ہے:

(مسلمان اور کافر - صرف بالغ مسلمان - عاقل وبالغ مسلمان)۔

2- رسول ﷺ پر نماز فرض کی گئی:

(سنہ 1ھ - شبِ معراج - سنہ 9ھ)۔

س5: بچے کو نماز پڑھنے کا حکم کب دیا جائے، اور نماز چھوڑنے پر اسے کب مارا جائے، دلیل کے ساتھ ذکر کریں؟

چوتھا سبق [9]

[9] استاد کے لیے ہدایات: - طلبہ کو نماز کے لیے جلدی آنے کی ترغیب دی جائے، اور اس کی فضیلت بیان کی جائے۔ - طلبہ کو ان بعض رویوں سے متنبہ کیا جائے جو نماز کے لیے چل کر جانے کے آداب کے منافی ہیں، جیسے راستے میں دیر تک کھڑے رہنا، اور ساتھیوں کے ساتھ بے فائدہ گفتگو کرنا۔ - مسجد میں فضول حرکتوں سے منع کیا جائے، اور مساجد میں ہونے والی ایسی بے مقصد حرکتوں کی مثالیں بھی بیان کی جائیں۔ - رکعت پانے کے لیے جلدی کرنے سے روکا جائے۔

نماز کی طرف چل کر جانے اور اس کا انتظار کرنے کے آداب

نماز کی طرف چل کر جانے کے آداب:

ایک مسلمان کو نماز کے لیے نکلتے وقت شرعی آداب کی رعایت کرنی چاہیے، جن میں سے چند یہ ہیں:

1- وہ وضوء کرکے نماز کے لئے نکلے۔

2- جب وہ گھر سے نکلے -اگرچہ نماز کی غرض سے نہ نکلا ہو- تو یہ دعا پڑھے: (اللہ کے نام سے، میں نے اللہ پر بھروسہ کیا۔ اللہ کی مدد کے بغیر نہ کسی چیز سے بچنے کی طاقت ہے، نہ کچھ کرنے کی قوت۔) [10] [10] سنن ابو داود : (5/328)، حدیث نمبر : (5095)، اور سنن ترمذی : (5/490)، حدیث نمبر : (3426)۔

3- نماز کے لیے سکون اور وقار کے ساتھ جائے [11]، کیوں کہ آپ ﷺ کا فرمان ہے: ’’جب تم اقامت کی آواز سنو تو سکون واطمینان کے ساتھ چلو۔ پھر جتنی نماز تمھیں ملے پڑھ لو اور جو رہ جائے اسے پورا کرلو۔‘‘ [12] [11] السکینہ: حرکات میں ٹھہراؤ اور عبث سے اجتناب۔ وقار: ظاہری ہیئت میں ہوتا ہے، جیسے نگاہ نیچی رکھنا، آواز پست رکھنا، اور ادھر ادھر کم دیکھنا۔ [12] اسے بخاری نے کتاب الجمعة، باب: المشي إلى الجمعة، حدیث نمبر: (908) میں اور مسلم نے کتاب المساجد ومواضع الصلاة، باب: استحباب إتيان الصلاة بوقار وسكينة، حدیث نمبر: (602) میں روایت کیا ہے۔

4- مسجد میں داخل ہوتے وقت اپنا دایاں پاؤں آگے رکھے اور اس سے نکلتے وقت اپنا بایاں پاؤں، اور وہ دعا پڑھے جو ابو حمید یا ابو اسید رضی اللہ عنہ کی حدیث میں آئی ہے، انہوں نے فرمایا: رسول اللہ ﷺ نے فرمایا: ’’جب تم میں سے کوئی مسجد میں داخل ہو تو کہے: اے اللہ! میرے لیے اپنی رحمت کے دروازے کھول دے، اور جب نکلے تو کہے: اے اللہ! میں تجھ سے تیرے فضل کا سوال کرتا ہوں‘‘۔ [13] [13] صحیح مسلم، كتاب صَلاة المسافِرين وقصرها، باب: ما يقول إذا دَخَلَ المسجِد (1/494)، حدیث نمبر (713)۔

نماز کے انتظار کے آداب :

مسلمان کے لیے مشروع ہے کہ وہ مسجد میں داخل ہونے کے بعد شرعی آداب کی رعایت کرے، جن میں سے چند یہ ہیں:

1- جب مسجد میں داخل ہو تو بیٹھنے سے پہلے دو رکعت ادا کرے، اور اسے تحیۃ المسجد کہا جاتا ہے۔

2- مسجد میں قبلہ کی طرف رخ کر کے بیٹھے، اور اپنی انگلیوں کو ایک دوسرے میں نہ ڈالے اور نہ انگلیاں چٹخائے۔

3- مسجد میں عبادت میں مشغول رہے، جیسے نماز، تلاوت اور ذکر ۔

4- فضول حرکتیں نہ کرے اور نمازیوں کو تکلیف نہ پہنچائے؛ کیونکہ مسلمان جب مسجد میں ہوتا ہے تو وہ اس وقت تک نماز ہی میں ہوتا ہے جب تک کہ وہ نماز کا انتظار کرتا ہے، چنانچہ ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا: ’’بندہ اس وقت تک نماز ہی میں رہتا ہے جب تک کہ وہ مسجد میں نماز کا انتظار کرتا ہے، اور فرشتے کہتے ہیں کہ اے اللہ! اس کو بخش دے، اے اللہ! اس پر رحم کر، یہاں تک کہ وہ چلا جائے یا اس کا وضوء ٹوٹ جائے‘‘ [14]۔ [14] اس حدیث کو بخاری نے كتاب الصلاة، باب: الصلاة في مسجد السوق، حدیث نمبر: (477) میں اور مسلم نے كتاب المساجد ومواضع الصلاة، باب: فضل صلاة الجماعة وانتظار الصلاة(1/459)، حدیث نمبر: (649) میں روایت کیا ہے اور مذکورہ الفاظ مسلم کے روایت کردہ ہیں۔

سوالات:

س1: نماز کے لیے نکلتے وقت مسلمان کے لیے جن آداب کی رعایت کرنا مشروع ہے، ان میں سے تین آداب ذکر کریں۔

س2: ایسے تین آداب ذکر کریں جن کی رعایت کرنا نماز کا انتظار کرتے وقت مسلمان کے لیے مشروع ہے؟

س3: نماز کی طرف جانے میں جلدی نہ کرنے کی کوئی دلیل حدیث سے ذکر کریں؟

س4: خالی جگہوں کو پر کریں:

أ- مسلمان کے لیے سنت ہے کہ وہ مسجد میں داخل ہوتے وقت ............................ آگے رکھے، اور اس سے نکلتے وقت ............................۔

ب- اسلام نے جن آداب کی تعلیم دی ہے، ان میں سے یہ بھی ہے کہ مسلمان گھر سے نکلتے وقت یہ دعا پڑھے: ............................ ............................ ............................

ج- مسجد میں عبادتوں میں مشغول رہنا چاہیے جیسے ............................ ............................

د- مسلمان کے لیے سنت ہے کہ مسجد میں داخل ہوتے وقت ............................ ............................ اور مسجد سے نکلتے وقت ............................ ............................ پڑھے۔

پانچواں سبق [15]

[15] استاد کے لیے: استاد نماز کا طریقہ بیان کرتے وقت طلبہ کو درج ذیل مسائل کی طرف توجہ دلائے: - مقتدی قراءت بآوازِ بلند نہیں کرے گا، نہ جہری نماز میں اور نہ ہی سری نماز میں، البتہ اس پر قراءت کے الفاظ زبان سے ادا کرنا واجب ہے، اور قراءت کرتے وقت زبان اور ہونٹوں کو حرکت دیے بغیر محض دل ہی دل میں پڑھ لینا کافی نہیں ہے۔ - سینے پر ہاتھ باندھنے کی کیفیت یہ ہے کہ دائیں ہاتھ کو بائیں ہاتھ کی ہتھیلی، کلائی اور بازو پر رکھے۔ - دعائے استفتاح کی تفسیر یہ ہے: (سُبْحانَك اللَّهمَّ) یعنی: اے اللہ! میں تجھے ہر اس بات سے پاک قرار دیتا ہوں جو تیرے شایانِ شان نہیں، (وبحمدِك) یعنی: ایسی پاکی بیان کرتا ہوں جو تیری حمد کے ساتھ مربوط ہو، (وتَبارَك اسمُك) یعنی: تیری برکتیں بہت زیادہ ہیں، (وتَعالى جَدُّك) یعنی: تیری شان بلند اور عظمت والی ہے، (ولا إله غيرُك) یعنی: تیرے سوا کوئی معبودِ برحق نہیں۔ - ہاتھوں کو کندھوں کے برابر یا کانوں کے بالمقابل اٹھانے کی کیفیت: اپنے دونوں ہاتھوں کو اس طرح اٹھائے کہ انگلیاں آپس میں ملی ہوئی اور سیدھی ہوں، اور ہتھیلیوں کا رخ قبلہ کی جانب ہو۔ مَنکِب (کندھے) سے مراد: شانے کے سرے اور بازو کے ملنے کا جوڑ ہے۔ - (آمِين) کا معنی: اے اللہ! قبول فرما۔ - تورُّک کا معنی بیان کرے، اور وہ یہ ہے کہ دائیں پاؤں کو اس طرح کھڑا کر کے بیٹھنا کہ اس کی انگلیاں قبلہ رخ ہوں، اور بائیں پاؤں کو دائیں پنڈلی کے نیچے رکھ کر اسے دائیں جانب سے باہر نکال دینا، اور بائیں سرین پر زور دیتے ہوئے مقعد کے بل (زمین پر) بیٹھنا۔ - استاد نماز کا عملی طریقہ بیان کرنے کے لیے ایک درس مختص کرے۔

نماز کا طریقہ

پہلی رکعت

نمازی قبلہ یعنی کعبہ کی طرف رخ کر کے کھڑا ہو۔

پھر (اللہ اکبر) کہتے ہوئے تکبیر تحریمہ کہے اور اپنے دونوں ہاتھوں کو کندھوں کے برابر یا کانوں کے برابر اٹھائے۔

پھر دائیں ہاتھ کو بائیں ہاتھ پر رکھے، اور دونوں ہاتھوں کو سینے کے اوپر رکھے، اور سجدہ کی جگہ کی طرف دیکھے۔

پھر دعائے استفتاح پڑھے اور وہ یہ ہے: ”اے اللہ! تو پاک ہے، تیری ہی تعریف ہے، تیرا نام بابرکت ہے، تیری شان سب سے اونچی ہے اور تیرے سوا کوئی معبود برحق نہیں ہے۔“

پھر آہستہ سے: ’أعوذُ بِاللهِ مِن الشَّيطانِ الرَّجِيم، بِسمِ اللهِ الرَّحمنِ الرَّحِيمِ‘ کہے، پھر سورۂ فاتحہ پڑھے، اور اس کے بعد: (آمین) کہے، پھر کوئی سورت یا کسی سورت کا کچھ حصہ پڑھے۔

سورہ فاتحہ اور سورت سری نمازوں میں پست آواز سے، اور جہری نمازوں میں بلند آواز سے پڑھے۔ سری نمازیں: (ظہر اور عصر)۔ جہری نمازیں: (مغرب، عشاء اور فجر)۔

پھر اپنے ہاتھوں کو اٹھاتے ہوئے اور (اللہ اکبر) کہتے ہوئے رکوع کرے، اپنے ہاتھوں کو گھٹنوں پر اس طرح رکھے کہ انگلیاں پھیلی ہوئی ہوں جیسے انہیں پکڑے ہوئے ہو، اپنی پیٹھ اور سر کو برابر رکھے اور رکوع میں تین مرتبہ (سُبْحانَ ربي العَظِيم) کہے۔

پھر اگر امام یا منفرد ہو تو (سمع اللهُ لِمَن حَمِدَه) کہتے ہوئے اپنا سر اور دونوں ہاتھ اٹھائے، پھر سب کہیں: (رَبَّنا ولك الحمد، حَمْدًا كَثِيرًا طَيِّبًا مُباركًا فيه، مِلْءَ السَّمواتِ ومِلْءَ الأَرْضِ، ومِلْءَ ما بَيْنَهما، ومِلْءَ ما شِئْتَ مِن شَيْءٍ بَعْد)۔ البتہ مقتدی سر اٹھاتے وقت (رَبَّنا ولك الحمد) کہے، پھر جب سیدھے طور پر کھڑا ہو جائے، تو اپنے دونوں ہاتھ سینے پر رکھتے ہوئے کہے: حَمْدًا كَثِيرًا ...

پھر (اللہ اکبر) کہتے ہوئے سجدہ کرے، اور سجدے میں تین مرتبہ (سُبْحانَ ربي الأَعْلى) پڑھے۔ اس کا سجدہ سات اعضا پر ہو، جوکہ یہ ہیں: (پیشانی ناک سمیت - دونوں ہتھیلیاں - دونوں گھٹنے - پیروں کے کنارے)۔

پھر 'اللہ اکبر' کہتے ہوئے سر اٹھائے، اور بائیں پیر کو بچھا کر اس پر بیٹھے، اور دایاں پیر کھڑا رکھے، انگلیوں کو قبلہ رخ رکھے، دونوں ہاتھ رانوں اور گھٹنوں پر رکھے، اور یہ دعا پڑھے: ( اے اللہ! مجھے اپنی مغفرت‘ رحمت‘ عافیت‘ ہدایت اور رزق سے نواز اور میرے ہی کسر کو دور کردے)۔

پھر (اللہ اکبر) کہتے ہوئے دوسرا سجدہ کرے اور اس میں بھی وہی سب کرے جو پہلے سجدہ میں کیا تھا۔

دوسری رکعت

پھر ''اللہ اکبر'' کہتے ہوئے سر اٹھائے اور دوسری رکعت کے لیے کھڑا ہو جائے، اور اس میں اسی طرح کرے جس طرح پہلی رکعت میں کیا تھا، مگر اس میں دعائے استفتاح نہ پڑھے۔

پہلا تشہد

جب دوسری رکعت سے فارغ ہو تو پہلے تشہد کے لیے بیٹھے، بائیں پیر کو بچھا کر اس پر بیٹھے اور دائیں پیر کو کھڑا رکھے، اور ان دونوں پیروں کی انگلیوں کو قبلہ رخ رکھے، دایاں ہاتھ دائیں ران پر رکھے، اور چھوٹی اور چوتھی دو انگلیوں کو سمیٹ لے، اور انگوٹھے کو درمیانی انگلی سے ملا کر حلقہ بنائے، اور تشہد کے وقت شہادت کی انگلی سے اشارہ کرے، اور بائیں ہاتھ کو بائیں ران اور گھٹنے پر رکھے، اور تشہد پڑھے، جو یہ کہ ہے:

"تمام قولی، فعلی اور مالی عبادات اللہ ہی کے لیے ہیں۔ اے نبی! آپ پر سلامتی، اللہ کی رحمت اور اس کی برکتیں نازل ہوں، ہم پر اور اللہ کے نیک بندوں پر بھی سلامتی ہو۔ میں گواہی دیتا ہوں کہ اللہ کے سوا کوئی معبود برحق نہیں اور میں گواہی دیتا ہوں کہ محمد ﷺ اس کے بندے اور رسول ہیں۔"

تیسری اور چوتھی رکعت

اگر نماز دو رکعت سے زیادہ کی ہو، تو پہلے تشہد کے بعد تکبیر کہتے ہوئے کھڑا ہو جائے، اور اپنے ہاتھوں کو کندھوں یا کانوں کے برابر اٹھائے، پھر آہستہ سورہ فاتحہ پڑھے، اور پچھلی دو رکعتوں کی طرح اسے مکمل کرے۔

آخری تشہد

جب آخری رکعت سے فارغ ہو جائے تو آخری تشہد کے لیے بیٹھے، اور اس کے لیے سنت یہ ہے کہ تورک کی حالت میں بیٹھے، چنانچہ تشہد پڑھے، پھر نبی ﷺ پر درودِ ابراہیمی پڑھے اور کہے: "اے اللہ! محمد پر اور آل محمد پر رحمت نازل فرما، جیسے تو نے ابراہیم پر اور آل ابراہیم پر رحمت نازل کی ہے۔ بے شک تو قابل تعریف اور بزرگی والا ہے۔ محمد پر اور آل محمد پر برکت نازل فرما، جیسے تو نے ابراہیم پر اور آل ابراہیم پر برکت نازل کی ہے۔ بے شک تو قابل تعریف اور بزرگی والا ہے۔"

پھر آخری تشہد کے لیے بیٹھے اور کہے: "”اے اللہ! میں تیری پناہ چاہتا ہوں جہنم کے عذاب سے، قبر کے عذاب سے، زندگی اور موت کے فتنہ سے، اور مسیح دجال کے فتنہ سے۔“"

دو سلام پھیرنا

پھر اپنے دائیں اور بائیں ”السلام علیکم ورحمۃ اللہ، السلام علیکم ورحمۃ اللہ“ کہتے ہوئے سلام پھیرے۔

سوالات:

س1: درج ذیل عبارتوں کو مکمل کریں:

أ- نمازی سات اعضا پر سجدہ کرے، اور وہ اعضاء یہ ہیں: پیشانی ناک کے ساتھ ............................ اور ............................ اور ............................

ب- دعائے استفتاح یہ ہے: .......... ............................ ............................ ............................ ............................ ............................ ............................ ............................ ولا إلَه غيرُك۔

س2: کالم (الف) میں موجود عبارتوں کا نمبر کالم (ب) میں ان کی مناسب عبارتوں کے سامنے لکھیں:

کالم (الف)

1- نمازی قبلہ کی طرف رخ کر کے کھڑا ہو، اور وہ ہے:

2- سِری نمازیں یہ ہیں:

3- نمازی رکوع میں یہ دعا پڑھے:

4- جہری نمازیں یہ ہیں:

5- نمازی سجدہ میں یہ دعا پڑھے:

6- نمازی دونوں سجدوں کے درمیان بیٹھ کر یہ دعا پڑھے:

کالم (ب)

ظہر اور عصر۔

سُبْحانَ ربي الأعلى.

سُبْحانَ ربي العَظِيم.

ربِّ اغْفِرْ لي.

کعبہ

مغرب، عشاء اور فجر۔

اے ہمارے رب! تمام تعریفیں تیرے ہی لئے ہیں

س۳: صحیح جواب میں (صحیح)، یا غلط جواب میں (غلط) لکھ کر جواب دیں اور غلطی کو درست کریں:

1- نمازی سجدے کی جگہ پر نظر رکھے۔

2- نمازی دوسری رکعت میں بھی دعائے استفتاح پڑھے۔

3- تشہدِ اول کے دوران نمازی بائیں پیر کو بچھائے اور دائیں پیر کو کھڑا رکھے۔

س4: بیان کریں کہ نمازی درج ذیل اذکار کب پڑھے:

(آمین)

سُبْحان ربي العَظِيم

سُبْحان ربي الأعلى

ربَّنا ولك الحمْد

ربِّ اغْفِر لي

اللَّهم صَلِّ على محمَّد وعلى آلِ محمَّد ...

چھٹا سبق [16]

[16] استاد کے لیے: - اس کے علاوہ بھی بہت سے قولی، فعلی اور عملی سنتیں ہیں جن کا یہاں اوپر ذکر نہیں کیا گیا۔ استاد کے لیے ضروری ہے کہ وہ ان سے بھی واقف ہو، تاکہ طلبہ کے سامنے نماز کا عملی طریقہ بتاتے وقت ان سنتوں کا بھی اہتمام کرے۔ - استاد طلبہ کو قولی اور فعلی سنتوں پر عمل کرنے کی اہمیت سمجھائے، اور واضح کرے کہ سنتوں کی پابندی اللہ تعالیٰ اور اس کے رسول ﷺ سے محبت کی علامت ہے۔

نماز کی سنتیں

نماز میں کچھ ایسے اقوال و افعال مشروع ہیں جنہیں جان بوجھ کر یا بھول چوک میں چھوڑ دینے سے نماز باطل نہیں ہوتی، لیکن نمازی کو چاہیے کہ ان کا اہتمام کرے تاکہ اس کا ثواب بڑھ جائے، ان کی دو قسمیں ہیں:

پہلی قسم : قولی سنتیں۔ جیسے :

1- دعائے استفتاح، اور وہ یہ ہے: (سُبْحَانَكَ اللَّهُمَّ وَبِحَمْدِكَ، وَتَبَارَكَ اسْمُكَ، وَتَعَالى جَدُّكَ، وَلَا إِلٰهَ غَيْرُكَ)۔

2- پہلی رکعت میں قراءت سے پہلے (أَعوذُ بِاللهِ مِن الشَّيطانِ الرَّجِيم) کہنا۔

3- سورہ فاتحہ کے شروع میں اور ہر سورت کے شروع میں (بِسم اللهِ الرَّحمن الرَّحيم) پڑھنا۔

4- سورہ فاتحہ کے بعد "آمین" کہنا۔

5- ہر نماز کی پہلی اور دوسری رکعت میں سورہ فاتحہ کے بعد کوئی سورت یا سورت کا کچھ حصہ پڑھنا۔

6- آخری تشہد کے دوران نبی ﷺ پر درود بھیجنے کے بعد دعا کرنا۔

دوسری قسم: فعلی سنتیں۔ جیسے:

1- دونوں ہاتھوں کو کندھوں یا کانوں کے برابر اٹھانا، اور یہ چار جگہوں پر ہے: (تکبیرِ تحریمہ کے وقت)، (رکوع کے وقت)، (رکوع سے اٹھتے وقت)، اور (تیسری رکعت کے لیے کھڑے ہونے کے بعد)۔

2- حالتِ قیام میں، دائیں ہاتھ کو بائیں ہاتھ پر رکھ کر دونوں کو سینہ کے اوپر رکھنا۔

3- سجدے کی جگہ پر نظر رکھنا۔

4- دونوں سجدوں کے درمیان اور پہلے تشہدِ میں افتراش کرنا، یعنی بائیں پیر کو بچھا کر اس پر بیٹھے، اور دائیں پیر کو کھڑا رکھے، اور اس کی انگلیوں کو موڑ کر قبلہ رخ رکھے۔

5- رکوع کے دوران انگلیاں کھول کر دونوں ہاتھوں کو دونوں گھٹنوں پر رکھنا۔

6- نمازی اپنے سامنے لاٹھی وغیرہ بطورِ سترہ رکھے، اگر کوئی چیز نہ ملے تو چاند کی شکل میں ایک لکیر کھینچ لے اور اس کی طرف نماز ادا کرے۔

7- اپنے سامنے سے گزرنے والے کو روکے۔

سوالات:

س1: نماز کی تین قولی سنتیں اور تین فعلی سنتیں بیان کریں۔

س2: رفع یدین کرنا نماز میں چار جگہوں پر سنت فعلیہ ہے۔ انہیں ذکر کریں۔

سوال 3 : مندرجہ ذیل میں قولی سنت اور فعلی سنت کے درمیان فرق کریں :

ا- بسم اللہ پڑھنا۔

ب- حالتِ قیام میں دونوں ہاتھوں کو سینے پر رکھنا۔

ج- آمین کہنا۔

د- نمازی کے آگے سے گزرنے والے کو روکنا۔

سوال 4 : مندرجہ ذیل امور کا طریقہ بیان کریں:

أ- رفع یدین کا طریقہ: ............................ ............................ ............................

ب- رکوع کے دوران دونوں ہاتھوں کو رکھنے کا طریقہ: ............................ ............................

ج- افتراش کا طریقہ: ............................ ............................ ............................

ساتواں سبق [17]

[17] معلم کے لیے: - مناسب ہے کہ استاد ان مکروہ افعال کی ممانعت کے بارے میں وارد بعض نصوص کا ذکر کرے۔ - استاد طلبہ کے سامنے ان افعال میں سے ان باتوں کو واضح کرے جن کی عملی وضاحت کی ضرورت ہو۔

نماز میں مکروہ افعال

مسلمان اللہ تعالی کا یہ فرمان پڑھتا ہے: یقیناً ایمان والوں نے فلاح حاصل کرلی۔ جو اپنی نماز میں خشوع کرتے ہیں۔ [المؤمنون: 1-2]۔

اس لیے وہ اپنی نماز کی پابندی کرے، اسے اس کے ارکان، واجبات اور شرائط کے ساتھ مکمل طور پر ادا کرے، اور کوئی ایسا کام نہ کرے جو نماز کے منافی ہو، جیسے بات چیت، حرکت یا ہنسی؛ کیوں کہ وہ اللہ کے ثواب کی امید رکھتا ہے اور اس کے عذاب سے ڈرتا ہے۔ کچھ ایسے افعال ہیں جنہیں نماز کے دوران انجام دینا نمازی کے لیے مکروہ ہے۔ ایسے افعال نماز کے حسن و کمال کے منافی ہیں اور نماز کے اجر و ثواب میں کمی کا باعث بنتے ہیں۔ ان میں سے بعض یہ ہیں:

1- بغیر کسی ضرورت کے اپنے چہرے یا سینے کو ادھر ادھر گھمانا، چنانچہ اگر وہ پورے بدن کے ساتھ پِھر جائے تو اس کی نماز باطل ہو جائے گی۔

2- آسمان کی طرف نگاہ اٹھانا۔

3- بغیر ضرورت کے آنکھیں بند کرنا۔

4- ناک اور منہ کو ڈھانکنا۔

5- سجدہ کے دوران بازوؤں کو بچھانا۔

6- فضول کام کرنا، جیسے بلا ضرورت حرکت کرنا، اور ہاتھ، پاؤں، کپڑے، رومال یا گھڑی سے کھیلنا، اگر یہ فضول کام زیادہ ہوجائے تو اس سے نماز باطل ہوجاتی ہے۔

7- انگلیوں کو ایک دوسرے میں ڈالنا اور انہیں چٹخانا۔

8- ایسی حالت میں نماز شروع کرنا جس میں خشوع متاثر ہو، مثلاً پیشاب، پاخانے یا ہوا کے خارج ہونے کا شدید تقاضا ہو، یا بہت زیادہ بھوک یا شدید پیاس لگی ہو، یا کھانا سامنے موجود ہو اور اسے کھانے کی شدید خواہش ہو۔

سوالات:

س1: نماز کے چار مکروہ اعمال بیان کریں۔

س2 : نماز میں نیچے دیے گئے کام کرنے کا حکم بیان کیجیے :

1- ناک اور منہ کو ڈھانکنا۔

2- اپنے پورے جسم کے ساتھ مڑنا۔

3- سجدے کی جگہ پر نظر رکھنا۔

4- انگلیاں چٹخانا۔

سوال 3 : مندرجہ ذیل امور کی مثالیں دیں:

1- نماز میں فضول کام کرنا: ............................ ............................ ............................

2- نماز میں خشوع سے روکنے والی چیزیں: ............................ ............................ ............................

آٹھواں سبق [18]

[18] استاد کے لیے: - استاد واضح کرے کہ انسان بھول چوک سے پاک نہیں ہے؛ کیوں کہ یہ انسانی فطرت کا تقاضا ہے، اور رسول ﷺ سے بھی نماز میں سہو ہوا ہے، اور آپ ﷺ نے فرمایا: "میں بھی تمہاری طرح ایک انسان ہوں، جس طرح تم بھولتے ہو میں بھی بھول جاتا ہوں، چنانچہ جب تم میں کسی سے بھول چوک ہوجائے، تو وہ بیٹھے بیٹھے سہو کے دو سجدے کر لے۔" - سجدۂ سہو کی مشروعیت کی حکمت واضح کرے، جوکہ یہ ہے: 1- نماز میں واقع ہونے والی کمی کو پورا کرنا۔ 2- شیطان کو ذلیل کرنا۔ 3- رحمن کو راضی کرنا۔

سجدۂ سہو

سجدۂ سہو: یہ دو سجدے ہیں جو نمازی نماز کے آخر میں، نماز میں اس سے سہو ہو جانے پر کرتا ہے۔

سہو سے مراد بھولنا ہے۔

سجدۂ سہو تین اسباب کے لیے مشروع ہے، وہ یہ ہیں:

اول : نماز میں اضافہ :

مثلاً: اگر کوئی شخص ظہر کی نماز پانچ رکعت پڑھے، یا تین سجدے کرے۔

اگر نمازی ایسا جان بوجھ کر کرے تو اس کی نماز باطل ہو جائے گی، اور اگر بھول کر کرے تو سلام پھیرنے سے پہلے سہو کے دو سجدے کرے گا، اس کی دلیل ابن مسعود رضی اللہ عنہ کی حدیث ہے کہ رسول اللہ ﷺ نے فرمایا: ”جب آدمی زیادتی یا کمی کردے، تو وہ دو سجدے کرے۔“ [19] [19] صحیح مسلم، كتاب المساجد ومواضع الصلاة، حدیث نمبر: 572۔

دوم : نماز میں کمی :

جیسے: تشہد اول کے لیے بیٹھنا چھوڑ دے، یا رکوع یا سجدے میں تسبیح چھوڑ دے، اگر نمازی جان بوجھ کر ایسا کرے تو اس کی نماز باطل ہوجاتی ہے، اور اگر بھول جائے تو سلام پھیرنے سے پہلے سجدۂ سہو کرے۔

تیسرا: شک:

مثلاً: اگر کوئی شخص عصر کی نماز پڑھے اور اسے اپنی رکعت میں شک ہو جائے کہ یہ تیسری ہے یا چوتھی، تو وہ اسے تیسری شمار کرے، اور سلام پھیرنے سے پہلے سجدۂ سہو کرے۔

سوالات:

س1: نماز میں سجدہ سہو سے کیا مراد ہے؟

سوال 2 : نماز میں سجدۂ سہو تین اسباب کی بنا پر مشروع ہے، انہیں ذکر کریں۔

س3: دونوں کالم کی عبارتوں کو آپس میں ملائیں:

کالم (الف)

1- کسی شخص نے جان بوجھ کر مغرب کی چار رکعتیں پڑھیں۔

2- کوئی شخص پہلے تشہد کے لیے بیٹھنا بھول گیا۔

کالم (ب)

وہ سجدۂ سہو کرے گا

اس کی نماز باطل ہوجائے گی۔

اس پر کچھ نہيں ہے۔

س4: اگر نمازی کو مغرب کی نماز میں شک ہو جائے کہ دو رکعتیں پڑھی ہیں یا تین، تو کیا حکم ہے؟

نواں سبق:

نمازِ با جماعت

نمازِ با جماعت کا حکم:

مردوں پر نماز با جماعت فرض ہے، خواہ وہ حضر میں ہوں یا سفر میں، اور اس کے دلیلیں درج ذیل ہیں:

1- اللہ تعالی کا فرمان ہے: اور نمازوں کو قائم کرو اور زکوٰة دو اور رکوع کرنے والوں کے ساتھ رکوع کرو۔ [البقرۃ : 43]۔ یہ آیت جماعت کے وجوب کی صریح دلیل ہے، کیوں کہ اس میں تنہا نہیں بلکہ رکوع کرنے والوں کے ساتھ رکوع کرنے کا حکم دیا گیا ہے، اور یہ جماعت کے بغیر ممکن نہیں۔

2۔ ابو ہریرہ رضی اللہ عنہ سے روایت ہے کہ نبی ﷺ کے پاس ایک نابینا شخص آیا اور عرض کیا: "اے الله كے رسول! میرے پاس کوئی آدمی نہيں ہے، جو مجھے مسجد تک لے آیا کرے، اس نے رسول اللہ ﷺ سے سوال کیا کہ اسے اس بات کی رخصت دی جائے کہ وہ اپنے گھر میں نماز پڑھ لیا کرے، تو آپ ﷺ نے اجازت دے دی، جب وہ جانے لگا تو آپ ﷺ نے اسے واپس بلا کر پوچھا: ”کیا تو نماز کی اذان سنتا ہے؟“، اس نے کہا: جی ہاں، آپ ﷺ نے فرمایا: ”پھر اس کا جواب دے (یعنی جماعت کے ساتھ مسجد میں نماز ادا کر)“ [20]۔" [20] صحیح مسلم: باب: يجب إتيان المسجد على من سمع النداء (1/452)، حدیث نمبر: 653۔

3- ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا: ""بلاشبہ منافقوں پر سب سے بھاری نماز عشاء اور فجر کی نماز ہے۔ اگر وہ جان لیں کہ ان دونوں میں کیا (ثواب) ہے تو وہ ضرور ان کے لیے آئیں، خواہ انہیں گھٹنوں کے بل چل کر ہی آنا پڑے۔ میں نے ارادہ کیا ہے کہ نماز کھڑی کرنے کا حکم دے دوں۔ جب وہ کھڑی ہو جائے تو کسی کو لوگوں کو نماز پڑھانے کو کہہ دوں اور پھر اپنے ساتھ ایسے لوگوں کو لے کر جن کے پاس لکڑیوں کے گٹھے ہوں، ان لوگوں کے یہاں جاؤں، جو نماز میں حاضر نہیں ہوتے اور ان کے گھروں کو آگ لگا کر ان کو بھی گھر سمیت جلا دوں۔"" [21] [21] اس حدیث کو امام بخاری نے كتاب التمني، باب: إخراج الخصوم وأهل الريب من البيوت بعد المعرفة، حدیث نمبر: (7224) میں اور امام مسلم نے كتاب المساجد ومواضع الصلاة، باب: فضل صلاة الجماعة، وبيان التشديد في التخلف عنها، حدیث نمبر: (651) میں روایت کیا ہے۔

نمازِ با جماعت کی فضیلت:

نمازِ با جماعت کی بڑی فضیلت ہے جس پر نبی ﷺ کا یہ فرمان دلالت کرتا ہے: "باجماعت نماز اکیلے نماز پڑھنے سے ستائیس (27) درجے زیادہ افضل ہے" [22]۔ [22] صحیح بخاری، حدیث نمبر : 645 اور صحیح مسلم (1/450)، حدیث نمبر : 650۔

جماعت کی کم سے کم تعداد دو ہوتی ہے۔

کتنی رکعت ملنے سے جماعت مل جاتی ہے: اگر امام کے ساتھ ایک رکعت مل جائے تو جماعت مل جاتی ہے۔

کس چیز کے ملنے سے رکعت مل جاتی ہے:

رکوع کے ملنے سے رکعت مل جاتی ہے، چنانچہ جو شخص نماز کے لیے آئے اور امام رکوع کی حالت میں ہو تو وہ کھڑے کھڑے تکبیر تحریمہ پڑھے، پھر رکوع کے لیے تکبیر کہے اور رکوع میں چلا جائے۔

اور اگر وہ رکوع سے اٹھنے کے بعد آئے، تو امام کے ساتھ نماز میں شامل ہو جائے، اور اس کے کھڑے ہونے کا انتظار نہ کرے، لیکن وہ اس رکعت کو اپنی نماز میں شمار نہ کرے۔

اقامتِ نماز کے بعد نفل نماز:

جب جماعت کھڑی ہوجائے، تو اس وقت نفل نماز شروع کرنا جائز نہیں ہے۔ اگر کوئی شخص نفل نماز پڑھ رہا ہو اور جماعت کھڑی ہوجائے، تو اگر وہ دوسرے رکوع سے فارغ ہوچکا ہو، تو جلدی سے پوری کر لے، ورنہ اسے توڑ دے۔

سوالات:

س1: نماز باجماعت کا کیا حکم ہے؟

س2: صحیح جواب پر دائرہ بنائیں:

الف- جماعت کی اقل تعداد (تین - دو - چار)۔

ب- باجماعت پڑھی گئی نماز اکیلے پڑھی گئی نماز سے (21 درجہ - 29 درجہ - 27 درجہ) افضل ہے۔

ج- جماعت (تکبیر تحریمہ ملنے - امام کے ساتھ ایک رکعت ملنے - امام کے ساتھ سلام ملنے) سے مل جاتی ہے۔

س3: جو شخص امام کے رکوع سے اٹھنے کے بعد نماز کے لیے آئے تو وہ کیا کرے؟

س4: درج ذیل مسائل کا حکم بیان کریں:

أ- فرض نماز کی اقامت کے بعد نفلی نماز شروع کرنا۔

ب- اگر فرض نماز کی اقامت ہو جائے، اور آپ نفلی نماز پڑھ رہے ہوں۔

دسواں سبق [23]

[23] لغت میں امی وہ شخص ہے جو لکھنا نہ جانتا ہو۔ اور فقہاء کی اصطلاح میں اس سے مراد وہ شخص ہے جسے سورۃ الفاتحہ کی تلاوت صحیح طریقے سے نہ آتی ہو، یعنی: اسے وہ یاد نہ ہو، یا وہ کسی حرف کو دوسرے حرف سے بدل دیتا ہو، جیسے کوئی شخص راء کو لام سے بدل دے، یا اس میں ایسی غلطی کرے جو معنی کو بدل دے، جیسے کوئی شخص (أَنْعَمْتَ) کو تاء کے ضمہ کے ساتھ پڑھے۔ - استاد اس سبق سے استفادہ کرتے ہوئے طلبہ کو علمِ نافع کے حصول، اعمالِ صالحہ کی بجا آوری، اور نیکی کے کاموں میں ایک دوسرے پر سبقت لے جانے کی ترغیب دے۔

امام کے احکام

امامت کا زیادہ حق دار:

اول: بالترتیب امامت کے سب سے زیادہ حق دار یہ ہیں:

1- اللہ کی کتاب کو سب سے اچھا پڑھنے والا، یعنی: سب سے عمدہ قراءت کرنے والا۔

2- پھر سنت کا زیادہ علم رکھنے والا، یعنی: نبی ﷺ کی احادیث کا زیادہ علم رکھنے والا اور دین کے احکام کو جاننے والا۔

3- پھر جو عمر میں بڑا ہو۔

دوم: گھر کا مالک اپنے گھر میں، اور اسی طرح مسجد کا مقرر امام دوسروں سے زیادہ حق دار ہے، بشرطیکہ وہ امامت کا اہل ہو، چاہے اس سے افضل شخص ہی کیوں نہ موجود ہو۔

سوم: صاحبِ اقتدار اور صاحبِ سلطنت دوسروں سے زیادہ امامت کے اہل ہیں، اس کی دلیل ابو مسعود انصاری رضی اللہ عنہ کی حدیث ہے، انہوں نے فرمایا: رسول اللہ ﷺ نے فرمایا: ’’لوگوں کی امامت وہ کرے جو اللہ کی کتاب (قرآن) کا سب سے زیادہ علم رکھنے والا ہو۔ اگر قرأت میں سب برابر ہوں تو جو سنت کا سب سے بڑا عالم ہو۔ اگر سنت میں سب برابر ہوں تو جس نے سب سے پہلے ہجرت کی ہو۔ اگر ہجرت میں سب برابر ہوں تو جس نے اسلام پہلے قبول کیا ہو۔ کوئی شخص کسی اور شخص کے دائرۂ اقتدار میں اس کی امامت نہ کرے، اور نہ اس کے گھر میں اس کی مخصوص جگہ پر اس کی اجازت کے بغیر بیٹھے۔‘‘ ایک روایت میں «سِلْمًا» کی جگہ «سِنًّا» ہے۔ [24] [24] صحیح مسلم (1/465)، حدیث نمبر : 673، اور سِلْمًا کا معنی ہے: اسلام۔ اور (تَكْرِمَتِه) کا معنی ہے: اس کے بیٹھنے کی وہ جگہ جو اس کی عزت واکرام کے لیے تیار کی گئی ہو۔

امام کے چند احکام یہ ہیں:

- اگر امام بے وضو ہونے کی حالت میں نماز پڑھا دے اور اسے نماز مکمل ہونے کے بعد ہی اس کا علم ہو، تو مقتدیوں کی نماز درست ہوگی، البتہ امام پر اس نماز کو دہرانا واجب ہوگا۔

اُمّی کی امامت صحیح نہیں‘ اس سے مراد وہ شخص ہے جسے سورۃ الفاتحہ صحیح طریقے سے پڑھنی نہ آتی ہو، الا یہ کہ سارے مقتدی اسی کی طرح ہوں۔

- فرض نماز پڑھنے والے کے لیے نفل نماز پڑھنے والے کی اقتداء کرنا درست ہے، جیسے تراویح کی نماز پڑھانے والے امام کے پیچھے عشاء کی نماز پڑھنا، اس کی دلیل حضرت معاذ رضی اللہ عنہ کا واقعہ ہے کہ وہ نبی ﷺ کے ساتھ عشاء کی نماز پڑھتے، پھر اپنی قوم کے پاس آکر انہیں نماز پڑھاتے تھے [25]۔ [25] اس حدیث کو امام بخاری نے کتاب الأذان، باب: إذا صَلَّى ثمَّ أَمَّ قَوْمًا، حدیث نمبر: (711) میں روایت کیا ہے۔

- مسنون طریقہ یہ ہے کہ پہلی رکعت دوسری رکعت سے زیادہ لمبی کی جائے۔

سوالات:

س1: امامت کے سب سے زیادہ حق دار بالترتیب کون ہیں؟

س2: خالی جگہ کو پر کریں:

الف- کتاب اللہ کو سب سے بہتر پڑھنے والا وہ ہے: ............................ ............................ ............................

ب- سنت کا سب سے زیادہ علم رکھنے والا وہ ہے: ............................ ............................ ............................

س۳: صحیح جملہ میں (صحیح) یا غلط جملہ میں (غلط) لکھ کر جواب دیں:

الف- گھر کا مالک اپنے گھر میں دوسروں سے زیادہ امامت کا حق دار ہے۔

ب- امی وہ شخص ہے جسے سورۃ الفاتحہ صحیح طریقے سے پڑھنی نہ آتی ہو۔

ج- پہلی رکعت کو دوسری رکعت سے زیادہ لمبا کرنا مکروہ ہے۔

د- ایسے امام کے پیچھے عشاء کی نماز پڑھنا درست ہے جو تراویح پڑھا رہا ہو۔

س۴: نیچے ذکر کردہ مسائل کا حکم بیان کریں:

1- امی کا اپنے جیسے امی کی امامت کرنا: ............................ ............................ ............................

2- اگر امام نماز پڑھائے اور وہ بے وضو ہو، لیکن اسے نماز مکمل ہونے کے بعد ہی اس کا علم ہو ........................................................ ............................ ............................ ............................

س5: امامت میں اولویت کے مطابق انہیں ترتیب دیں:

ایک شخص جس کی عمر بیس سال ہے، مکمل قرآنِ مجید کا حافظ ہے، دوسرا شخص جس کی عمر چالیس سال ہے، اسے پانچ پارے حفظ ہیں، اور تیسرا شخص جس کی عمر تیس سال ہے، اسے دس پارے حفظ ہیں۔

گیارھواں سبق [26]

[26] استاد کے لیے ہدایات: - اگر مقتدی بغیر کسی عذر کے امام سے آگے کھڑا ہو جائے تو اس کی نماز درست نہیں ہوتی، البتہ اگر اس کے لیے امام سے آگے کھڑے ہوئے بغیر جماعت کے ساتھ نماز پڑھنا ممکن نہ ہو، جیسا کہ شدید ہجوم کی صورت میں ہوتا ہے، تو پھر نماز درست ہے۔ - صفوں کا متصل ہونا: ان کے درمیان اتنا زیادہ فاصلہ نہ ہو جو خلافِ معمول ہو۔ - صفوں کے متصل ہونے کے تربیتی پہلوؤں کو بیان کریں اور طلبہ کو صفیں سیدھی کرنے کی ترغیب دیں۔

امام اور مقتدی کے کھڑے ہونے کی جگہ

- اگر مقتدی ایک ہی ہو، تو سنت یہ ہے کہ وہ امام کے دائیں جانب کھڑا ہو۔

- اگر مقتدی دو یا اس سے زیادہ ہوں، تو سنت یہ ہے کہ وہ امام کے پیچھے کھڑے ہوں، اور امام صف کے بیچ میں کھڑا ہو؛ اس کی دلیل جابر اور جبار بن صخر رضی اللہ عنہما کا واقعہ ہے کہ ان میں سے ایک نبی ﷺ کے دائیں کھڑے ہوگئے اور دوسرا بائیں، جابر فرماتے ہیں: تو رسول اللہ ﷺ نے ہم دونوں کے ہاتھ پکڑ کر ہمیں اپنے پیچھے کر دیا [27]۔ [27] صحیح مسلم، کتاب الزہد والرقاق، باب: حدیث جابر الطویل، وقصۃ ابی الیسر، 4/ 2305، حدیث نمبر : 3010۔

- اگر کوئی شخص اکیلا امام کے پیچھے، یا صف کے پیچھے کھڑا ہو کر نماز پڑھے، تو اس کی نماز درست نہیں ہوگی، اِلّا یہ کہ وہ صف میں شامل ہونے سے عاجز ہو۔

- اگر مقتدی مسجد کے اندر ہو تو اس کا امام کی اقتدا کرنا درست ہے، اگرچہ وہ اس سے دور ہو، یا اسے نہ دیکھ سکے، بشرطیکہ وہ تکبیر سنے۔

- اگر مقتدی مسجد سے باہر ہو، تو اس کے لیے تین شرائط کے ساتھ امام کی اقتدا کرنا درست ہے:

1- امام کو دیکھے، یا مقتدیوں کو دیکھے۔

2- تکبیر سنے۔

3- صفیں متصل ہوں۔

- یہ مکروہ ہے کہ امام مقتدیوں سے بلند جگہ پر کھڑا ہو۔

- مقتدیوں کے لیے امام سے بلند جگہ، جیسے مسجد کی چھت پر نماز پڑھنے میں کوئی حرج نہیں ہے۔

- اگر عورتوں کی جماعت مردوں کے ساتھ نماز پڑھے، تو وہ مردوں کے پیچھے صفیں بنا کر نماز پڑھیں، اور ان کے پیچھے رہیں۔

سوالات:

سوال 1: اگر مقتدی دو یا اس سے زیادہ ہوں، تو سنت یہ ہے کہ وہ امام کے پیچھے کھڑے ہوں۔ اس کی دلیل بیان کریں۔

س2: کالم (الف) کی عبارتوں کا نمبر کالم (ب) میں موجود مناسب عبارتوں کے سامنے لکھیں۔

کالم (الف)

1- جب مقتدی ایک ہو۔

2- جب مقتدی چار مرد ہوں۔

کالم (ب)

وہ امام کے پیچھے کھڑے ہوں۔

وہ امام کے بائیں جانب کھڑا ہو۔

امام کے دائیں جانب کھڑا ہو۔

س3: اگر مقتدی مسجد سے باہر ہو، تو اس کے لیے تین شرائط کے ساتھ امام کی اقتدا کرنا درست ہے، انہیں ذکر کریں۔

س۴: صحیح جملہ میں (صحیح)، یا غلط جملہ میں (غلط) لکھ کر جواب دیں اور غلطی کو درست کریں:

أ- مردوں کے پیچھے عورتوں کی نماز درست نہیں ہے۔

ب- امام سے بلند جگہ پر مقتدیوں کی نماز درست ہے۔

ج- جب مقتدی مسجد کے اندر ہو تو اس کے لیے امام کی اقتدا کرنا درست ہے، بشرطیکہ وہ اسے دیکھے۔

بارہواں سبق

مقتدی کا امام کی اقتدا کرنا

امام کے ساتھ مقتدی کی چار حالتیں ہیں، اور وہ یہ ہیں:

پہلی حالت:

یہ واجب حالت ہے، جس کا مطلب یہ ہے کہ وہ امام کے فعل کے فوراً بعد فعل انجام دے، چنانچہ جب وہ تکبیر کہے تو اس کے فوراً بعد تکبیر کہے، جب وہ رکوع کرے تو اس کے فوراً بعد رکوع کرے، اور اسی طرح (دیگر اعمال انجام دے)۔۔ اس کی دلیل ابو ہریرہ رضی اللہ عنہ کی حدیث ہے، انہوں نے کہا کہ نبی ﷺ نے فرمایا: ’’امام اس لیے بنایا گیا ہے کہ اس کی پیروی کی جائے۔ جب وہ تکبیر کہے تو تکبیر کہو، جب وہ رکوع کرے تو رکوع کرو، جب وہ "سَمِعَ اللَّهُ لِمَنْ حَمِدَهُ" کہے تو تم "رَبَّنَا وَلَكَ الْحَمْدُ" کہو، جب وہ سجدہ کرے تو تم سجدہ کرو اور جب وہ بیٹھ کر نماز پڑھے تو سب بیٹھ کر نماز پڑھو۔‘‘ [28] [28] اس حدیث کو بخاری نے کتاب الأذان، باب: إيجاب التَّكبِير وافْتِتاح الصَّلاة، حدیث نمبر: (734) میں، اور امام مسلم نے (1/308)، حدیث نمبر: (411) میں روایت کیا ہے۔

دوسری حالت: موافقت:

یہ مکروہ ہے، مثلاً: امام کے ساتھ ایک ہی وقت میں رکوع کرنا، اور اگر تکبیر تحریمہ میں موافقت ہو جائے تو اس کی نماز صحیح نہیں ہوگی۔

تیسری حالت: مسابقت:

یہ حرام ہے، جیسے کہ اپنے امام سے پہلے تکبیر کہنا، یا رکوع کرنا، یا سلام پھیرنا؛ کیوں کہ آپ ﷺ کا فرمان ہے: ’’کیا تم میں سے وہ شخص جو امام سے پہلے اپنا سر اٹھاتا ہے، اس بات سے نہیں ڈرتا کہ اللہ اس کے سر کو گدھے کا سر بنا دے یا اس کی صورت گدھے کی صورت جیسی بنا دے؟‘‘ [29] [29] اس حدیث کو بخاری نے كتاب الأذان، باب: إثم مَن رَفَع رأسَه قبل الإمام، حدیث نمبر (691) میں، اور مسلم نے (1/320)، حدیث نمبر (427) میں روایت کیا ہے۔

چوتھی حالت: امام سے پیچھے رہ جانا:

اس کی کئی صورتیں ہیں جن میں سے چند درج ذیل ہیں:

1- اگر امام رکوع کرے اور مقتدی کھڑا رہے اور فوراً رکوع نہ کرے، پھر امام کے رکوع سے سر اٹھانے سے پہلے رکوع کر لے، تو اس کی نماز درست ہے، لیکن فوراً رکوع نہ کر کے اس نے سنت کی مخالفت کی۔

2- اگر امام رکوع کرے اور مقتدی کے رکوع کرنے سے پہلے ہی رکوع سے سر اٹھا لے، تو اگر مقتدی کسی عذر مثلاً اونگھ یا امام کی جلدی کے سبب رکوع کرنے میں پیچھے رہ گیا ہو، تو وہ اس رکن کو ادا کرے جو اس سے چھوٹ گیا ہے اور اپنے امام کے ساتھ جا ملے۔ اور اگر اس کی یہ تاخیر بغیر کسی عذر کے ہو، تو اس کی نماز باطل ہو جائے گی۔

سوالات:

س1: نمازی پر واجب ہے کہ وہ نماز کے افعال میں اپنے امام کی پیروی کرے، اس کی کیا دلیل ہے؟

س2: آنے والے جملوں کو مکمل کریں:

ا- نماز کے افعال میں امام کی موافقت کرنا ........................... اور اگر یہ تکبیر تحریمہ میں ہو ............................

ب- نماز کے افعال میں امام پر سبقت کرنا...... ............................ آپ ﷺ کی اس حدیث کے مطابق: ............................ ........................................

س3: نماز کے افعال میں مقتدی کے امام سے پیچھے رہ جانے کی دو صورتیں بتائیں۔

س4: قوسین میں سے صحیح جواب چنیں اور اس کے نیچے لکیر کھینچیں:

أ- نماز کے افعال میں امام کی اقتدا:

(مکروہ ہے - واجب ہے - حرام ہے)

ب- اگر مقتدی کسی عذر کی وجہ سے رکوع سے پیچھے رہ جائے اور رکوع نہ کرے یہاں تک کہ امام سر اٹھا لے، تو وہ:

(امام کی اقتدا کرے اور جو حصہ چھوٹ گیا ہے اسے ادا نہ کرے - اس کی نماز باطل ہو جاتی ہے - جو حصہ چھوٹ گیا ہے اسے ادا کرے اور امام کے ساتھ مل جائے)۔

تیرھواں سبق [30]

[30] ابو ہریرہ رضی اللہ عنہ سے روایت ہے کہ نبی ﷺ نے فرمایا: "سات لوگوں کو اللہ تعالیٰ اپنے (عرش کے) سائے میں اس دن جگہ دے گا، جس دن اس کے سائے کے علاوہ کوئی سایہ نہ ہوگا، اور آپ نے ان میں (ان کا بھی) ذکر فرمایا: اللہ کی عبادت میں پروان چڑھنے والا جوان، اور ایسا شخص جس کا دل مسجدوں میں اٹکا ہوا ہو۔" اسے بخاری (3/292) حدیث نمبر: (1423)، اور مسلم (2/715)، حدیث نمبر: (1031) نے روایت کیا ہے۔ چنانچہ مسلمان کو چاہیے کہ وہ نماز کے لیے مسجد جلد پہنچنے کا اہتمام کرے، تاکہ وہ اپنے وقت کو قرآن مجید کی تلاوت اور اللہ تعالیٰ کے ذکر میں صرف کر کے اس سے مستفید ہو سکے، یہاں تک کہ وہ خشوع وخضوع اور حضوریِ قلب کے ساتھ اپنی نماز کی طرف متوجہ ہو، تاکہ اس کی نماز کا کوئی حصہ چھوٹ نہ جائے جس کے سبب وہ امام کے ساتھ تکبیر تحریمہ پانے کے اجر سے محروم رہ جائے۔

مسبوق کے احکام

مسبوق سے مراد وہ شخص ہے جس کی امام کے ساتھ نماز کی ایک یا اس سے زیادہ رکعتیں فوت ہو گئی ہوں۔

- جو شخص نماز کے لیے آئے اور امام رکوع کی حالت میں ہو، تو وہ کھڑے کھڑے تکبیرِ تحریمہ کہے، پھر رکوع کے لیے تکبیر کہے اور رکوع میں چلا جائے، اس طرح اس نے رکعت اور جماعت پا لی۔

- لیکن اگر شک ہو کہ امام کے ساتھ رکوع ملا یا نہیں؟ تو اس رکعت کا اعتبار نہیں کرے، اور سجدۂ سہو کرے۔

- جو شخص مسجد میں آئے اور امام سجدے میں ہو یا بیٹھا ہو، تو اس کے لیے مسنون ہے کہ وہ امام کے ساتھ نماز میں داخل ہو جائے، چنانچہ وہ کھڑے کھڑے تکبیرِ تحریمہ پڑھے، پھر بغیر تکبیر کے، اگر امام سجدے میں ہو تو سجدے میں چلا جائے، یا اگر امام بیٹھا ہو تو بیٹھ جائے، اور امام کے کھڑے ہونے کا انتظار نہ کرے۔

- امام جب دوسرا سلام پھیر لے تو مسبوق شخص اپنی چھوٹی ہوئی نماز پوری کرنے کے لیے تکبیر کہتے ہوئے کھڑا ہو۔

- جس شخص کی باجماعت نماز چھوٹ جائے، اس کے لیے مستحب ہے کہ وہ دوسری جماعت کے ساتھ نماز پڑھے۔

- اگر اسے کوئی دوسری جماعت نہ ملے تو مسجد میں موجود بعض لوگوں کے لیے مستحب ہے کہ وہ اس کے ساتھ نماز پڑھیں، کیوں کہ آپ ﷺ کا فرمان ہے: ’’کون ہے جو اس شخص پر صدقہ کرے اور اس کے ساتھ نماز پڑھے۔‘‘ [31] [31] مسند احمد (3/45) : 11426، اور صحیح ابن حبان (6/157) : 2397۔

سوالات:

س1: مسبوق سے کیا مراد ہے؟

س2: آنے والے جملوں کو مکمل کریں:

جس شخص کی جماعت فوت ہو جائے اس کے لیے ............................ ہے کہ وہ دوسری جماعت میں نماز پڑھے، اگر اسے کوئی نہ ملے تو مسجد میں موجود بعض لوگوں کے لیے ............................ ہے کہ وہ اس کے ساتھ نماز پڑھیں، نبی ﷺ کے اس فرمان کے مطابق: (............................ ............................ ............................ ............................ ............................ ............................)۔

سوال 3 : ان میں سے ہر ایک کیا کرے :

الف- جو شخص نماز کے لیے آئے اور امام رکوع میں ہو: ........................................................

ب- جو شخص نماز کے لیے آئے اور امام سجدے میں ہو یا بیٹھا ہو ............................ ............................

ج- امام کے دوسرا سلام پھیرنے کے بعد مسبوق شخص: ............................ ............................

س 4: مسجد جلدی پہنچنے سے آپ کو جو فوائد حاصل ہوتے ہیں‘ انہیں بیان کریں۔

چودھواں سبق [32]

[32] لہسن اور پیاز کھانے کی وجہ سے مسجد میں آنے کی ممانعت اس لیے نہیں ہے کہ ایسا شخص معذور ہے، بلکہ اس کی اذیت کو دور کرنے کے لیے ہے، اسی لیے جس شخص کے پاس جمعہ یا جماعت ترک کرنے کا عذر ہو، اسے جماعت کا اجر حاصل ہوتا ہے، کیوں کہ آپ ﷺ کا فرمان ہے: ’’جو شخص بیمار ہو جائے یا سفر کرے تو اس کے لیے وہی اعمال لکھے جاتے ہیں جو وہ تندرست اور مقیم ہونے کی حالت میں کیا کرتا تھا۔‘‘ البتہ لہسن اور پیاز کھانے والے کو - جب وہ مسجد میں حاضر نہ ہو - جماعت کا اجر حاصل نہیں ہوتا۔

وہ اعذار جن کی وجہ سے جمعہ اور جماعت چھوڑنا جائز ہے

مسجد میں جماعت کے ساتھ نماز ادا کرنا واجب ہے، لیکن جمعہ اور جماعت ترک کرنے کے معاملے میں وہ شخص معذور سمجھا جائے گا جس کے پاس اسے جائز قرار دینے والا کوئی عذر ہو۔ ابن عباس رضی اللہ عنہ سے روایت ہے، انہوں نے کہا: رسول اللہ صلی اللہ علیہ وسلم نے فرمایا: ""جس نے اذان سن لی، پھر بھی بلا عذر اس پر لبیک نہ کہا، تو اس کی نماز نہیں ہوگی۔" [33]" [33] سنن بیہقی (3/185)، حدیث نمبر : 5432، سنن ابن ماجہ (1/260)، حدیث نمبر : 793۔

ان اعذار میں سے چند یہ ہیں:

1- بیماری۔

2- جب جان یا مال یا اہل و عیال وغیرہ کے بارے میں خوف لاحق ہو۔

3- بارش، کیچڑ، یا ٹھنڈی ہوا سے تکلیف پہنچتی ہو۔

4- ایسا کھانا حاضر ہو جس کی اسے اشتہا ہو، لیکن شرط یہ ہے کہ اسے عادت یا جماعت چھوڑنے کا بہانا نہ بنا لے۔

5- پیشاب، پاخانہ یا ہوا (ریاح) کو روکنا؛ کیوں کہ یہ نماز کے دوران خشوع وخضوع میں رکاوٹ ہے۔

6- وہ شخص جسے کسی چیز کی حفاظت سپرد کی گئی ہو، اور اگر وہ اسے چھوڑ کر چلا جائے تو اسے اس چیز کے ضائع ہونے کا خوف ہو۔

7- مریض کی تیمار داری کرنے والا، جب اس کے پاس کوئی اس کی جگہ لینے والا نہ ہو۔

* جس شخص نے لہسن یا پیاز کھایا ہو، اُس کے لیے مسجد میں آنا مکروہ ہے؛ کیوں کہ آپ ﷺ کا فرمان ہے: "’’جس نے لہسن یا پیاز کھایا ہو، وہ ہماری مسجد سے دور رہے اور اپنے گھر میں بیٹھا رہے۔‘‘ [34]،" تاکہ لوگوں اور فرشتوں کو تکلیف نہ دے۔ [34] اس حدیث کو بخاری نے کتاب الأذان، باب: ما جاء في الثّوم النَّيِّئ والبَصَل والكُرّاث میں، حدیث نمبر (855) کے تحت روایت کیا ہے۔

لیکن وہ ایسا جماعت کو ساقط کرنے کے ارادے سے نہ کرے، کیوں کہ یہ حرام ہے، اور جو شخص بدبو زائل کرنے پر قادر ہو، اس پر ایسا کرنا لازم ہے۔

سوالات:

س1: مسجد میں نمازِ با جماعت کا کیا حکم ہے؟ دلیل ذکر کریں۔

سوال 2: ایسے تین اعذار بیان کریں جن کی وجہ سے جمعہ اور جماعت چھوڑنا جائز ہے۔

سوال 3 : آنے والے مسائل کا سبب بیان کریں :

1- پیشاب یا پاخانہ کی حاجت روکنے والے کے لیے جمعہ اور جماعت چھوڑنے کا جواز: ............................

2- جس شخص نے لہسن یا پیاز کھایا ہو اس کے لیے مسجد میں آنا مکروہ ہے: ............................

پندرھواں سبق [35]

[35] استاد کے لیے: - عدمِ استطاعت سے مراد یہ ہے کہ وہ کھڑے ہو کر، بیٹھ کر یا پہلو کے بل نماز ادا کرنے سے عاجز ہو، یا اسے اس سے مشقت لاحق ہو، یا یہ اس کی بیماری میں اضافے یا شفا یابی میں تاخیر کا سبب بنے۔ - استاد کو چاہئے کہ نماز کی اہمیت اور اس کی عظمتِ شان پر روشنی ڈالے اور بتائے کہ شریعت نے مریض اور مسافر کو بھی تمام حالات میں نماز ادا کرنے کا حکم دیا ہے۔ - تمہید کے طور پر اسلام کی آسانی اور اس کی نرمی ورواداری کو بیان کرے، اور اسے موضوع کے ساتھ مربوط کرے۔

شرعی عذر والوں کی نماز

ا: بیماری شخص:

اللہ تعالیٰ نے ایسے مریض کو جو نماز کے بعض افعال ادا کرنے کی طاقت نہ رکھتا ہو، اجازت دی ہے کہ وہ اپنی استطاعت کے مطابق نماز ادا کرے، اور اس کا طریقہ درج ذیل ہے:

1- اگر مریض قیام کرنے پر قادر ہو تو اس پر واجب ہے کہ وہ فرض نماز کھڑے ہو کر ادا کرے۔

2- اگر کھڑا ہوکر نماز پڑھنے سے قاصر ہو تو بیٹھ کر نماز ادا کرے، اور رکوع کے لیے اپنی پیٹھ جھکائے، رہا سجدہ، تو اگر زمین پر سجدہ کرنا ممکن ہو تو ایسا کرے، اور اگر ممکن نہ ہو تو سجدے کے لیے اپنی پیٹھ جھکائے اور رکوع کے بہ نسبت زیادہ جھک کر سجدہ کرے۔

3- اگر بیٹھ کر نماز پڑھنے سے قاصر ہو تو پہلو کے بل لیٹ کر نماز ادا کرے، اور چہرہ قبلہ کی طرف رکھے۔

4- اگر پہلو کے بل بھی نماز ادا کرنا ممکن نہ ہو تو پیٹھ کے بل لیٹ کر نماز ادا کرے اور پیر قبلہ کی طرف رکھے۔ اس کی دلیل عمران بن حصین رضی اللہ عنہ سے مروی یہ حدیث ہے کہ آپ ﷺ نے فرمایا: "کھڑے ہو کر نماز پڑھو، اگر کھڑے ہونے کی طاقت نہ ہو تو بیٹھ کر پڑھ لو اور اگر بیٹھ کر بھی پڑھنے کی طاقت نہ ہو تو پہلو کے بل لیٹ کر پڑھ لو"۔ [36] [36] اس حدیث کو بخاری نے كتاب تَقصِير الصَّلاة، باب: إذا لم يُطِق قاعِدًا صلَّى على جَنْبِ میں، حدیث نمبر (1117) کے تحت روایت کیا ہے۔

* اگر مریض پہلو کے بل یا پیٹھ کے بل نماز ادا کرے تو وہ اپنے سر یا آنکھوں سے اشارہ کرے۔

* مریض کے لیے جائز ہے کہ وہ ظہر اور عصر، اور مغرب اور عشاء کو ان میں سے کسی ایک کے وقت میں جمع کرکے ادا کرے، اگر ہر نماز کو اس کے وقت پر ادا کرنا اس کے لیے مشقت کا باعث ہو، البتہ اس کے لیے قصر کرنا جائز نہیں۔

۲: مسافر:

سفر ایک ایسا عذر ہے جس کی وجہ سے مسافر کے لیے نماز قصر کرنا جائز ہو جاتا ہے، نماز قصر کرنا سنت ہے، اور جس نے سفر میں نماز پوری (چار رکعت) پڑھی اس نے نبی کریم ﷺ کی سنت کی مخالفت کی، کیوں کہ آپ ﷺ سفر میں نماز قصر کیا کرتے تھے، اور آپ علیہ الصلاۃ والسلام ہر مسلمان کے لیے نمونہ ہیں۔ انس بن مالک رضی اللہ عنہ سے روایت ہے، وہ کہتے ہیں: ہم نبی کریم ﷺ کے ساتھ مدینہ سے مکہ کے لیے نکلے، تو آپ ﷺ دو دو رکعت پڑھتے رہے، یہاں تک کہ ہم واپس مدینہ لوٹ آئے [37]۔ [37] اسے بخاری نے کتاب تقصير الصلاة، باب ما جاء في التقصير وكم يقيم حتى يقصر، حدیث نمبر: (1081) میں روایت کیا ہے۔

مسافر کی نماز سے متعلق احکام:

1- چار رکعت والی نمازوں کو قصر کر کے دو رکعت پڑھے۔

چار رکعت والی نمازیں یہ ہیں: (ظہر، عصر اور عشاء)، لیکن مغرب اور فجر میں قصر نہیں کی جاتی۔

مسافر اگر اکیلے نماز پڑھے، یا مسافروں کی جماعت کے ساتھ، تو وہ چار رکعت والی نماز چار رکعت کے بجائے دو رکعت پڑھے۔

لیکن جب مسافر کسی مقیم شخص (یعنی غیر مسافر) کے پیچھے نماز پڑھے تو وہ پوری نماز پڑھے اور قصر نہیں کرے۔

2- جمع: مسافر کے لیے جائز ہے کہ وہ (ظہر اور عصر) کو جمع کرکے دونوں کو ایک ہی وقت میں پڑھے، یعنی: ظہر کے وقت میں، اور اسے جمع تقدیم کہتے ہیں، یا عصر کے وقت میں، اور اسے جمع تاخیر کہتے ہیں، اسی طرح یہ بھی جائز ہے کہ وہ (مغرب اور عشاء) کو ایک ہی وقت میں جمع کر کے پڑھے، چاہے جمع تقدیم ہو یا جمع تاخیر۔

سوالات:

س1: اہلِ اعذار کون ہیں؟

سوال 2: مریض کیسے نماز ادا کرے گا؟ دلیل بیان کریں۔

س3: سفر میں نماز قصر کرنے کا کیا حکم ہے؟ دلیل ذکر کریں۔

س4: بیان کریں کہ بیٹھ کر نماز پڑھنے والا کس طرح رکوع اور سجدہ کرے؟

س5: نیچے دیے گئے مسائل کا حکم بیان کریں:

1- مریض کے لیے عصر اور مغرب کو جمع کرنا۔

2- جب مسافر کسی مقیم شخص کے پیچھے نماز پڑھے۔

سولہواں سبق

نفلی نماز

- نفل نماز سے مراد وہ نماز ہے جسے مسلمان اپنی خوشی سے ادا کرتا ہے، اور یہ اس پر فرض نہیں ہوتی۔

اسلام نے مسلمانوں کو کثرت سے نماز پڑھنے کی ترغیب دی ہے؛ کیوں کہ اس سے بندے کو اللہ کی محبت حاصل ہوتی ہے اور اسے دنیا و آخرت میں توفیق نصیب ہوتی ہے۔ نفلی نماز کی بہت سی قسمیں ہیں، جیسے:

۱: سننِ رواتب :

- سنن رواتب فرض نمازوں کے ساتھ پڑھی جانے والی سنتیں ہیں، اور وہ درج ذیل ہیں:

(2) فجر سے پہلے دو رکعتیں

(4) ظہر سے پہلے چار رکعتیں

(2) ظہر کے بعد دو رکعتیں

(2) مغرب کے بعد دو رکعتیں

(2) عشا کے بعد دو رکعتیں

جہاں تک عصر کا تعلق ہے، تو اس کی کوئی سنتِ راتبہ نہیں ہے۔

اس کی دلیل ام حبيبة رضي الله عنہا کی حدیث ہے، وہ کہتی ہیں کہ میں نے رسول اللہ ﷺ كو یہ فرماتے ہوئے سنا : "”جو مسلمان بھی ہر دن بارہ رکعتیں اللہ کے لئے فرض کے علاوہ نفل پڑھے تو اس کے لئے اللہ تعالی جنت میں ایک گھر تعمیر فرماتا ہے“۔ ام حبیبہ رضی اللہ عنہا فرماتی ہیں: چنانچہ اس کے بعد میں ہمیشہ انہیں پڑھتی رہی۔ [38]" [38] صحیح مسلم، کتاب صلاة المسافرين وقصرها، باب: فضل السنن الراتبة قبل الفرائض وبعدهن، وبيان عددهن، حدیث نمبر: (728)

۲: وتر:

حکم: یہ سنتِ مؤکدہ ہے۔ دلیل: ابو ہریرہ رضی اللہ عنہ سے روایت ہے کہ انہوں نے فرمایا: "میرے خلیل (نبی کریم ﷺ) نے مجھے تین چیزوں کی وصیت کی؛ ہر مہینے میں تین دن روزہ رکھنے، چاشت کی دو ركعت نماز پڑھنے اور سونے سے پہلے وتر پڑھنے کی"۔[39] [39] صحیح بخاری، کتاب الصوم، باب صيام أيام البيض، حدیث نمبر: (1981)، اور صحیح مسلم، کتاب صلاة المسافر وقصرها، باب استحباب صلاة الضحى، حدیث نمبر: (721)۔

اس کا وقت:

نماز عشا کے بعد سے لے کر طلوع فجر تک، البتہ اسے رات کے آخری تہائی حصہ میں ادا کرنا افضل ہے، اور جسے ڈر ہو کہ وہ بیدار نہیں ہوسکے گا تو اسے چاہیے کہ سونے سے پہلے وتر پڑھ لے۔

اس کی رکعات کی تعداد:

اسے کم سے کم ایک رکعت اور زیادہ سے زیادہ گیارہ رکعت پڑھا جا سکتا ہے۔ کمال کا سب سے کمتر درجہ تین رکعت ہے۔

اس کا طریقہ:

دو رکعت پڑھے اور سلام پھیرے، پھر دو رکعت پڑھے اور سلام پھیرے، اور اسی طرح کرتا رہے، پھر ایک رکعت پڑھ کر ختم کرے اور سلام پھیرے۔ سنت یہ ہے کہ آخری رکعت میں رکوع سے اٹھنے کے بعد دنیا اور آخرت کی بھلائیوں میں سے جو چاہے دعا کرے، اور اس بات کا اہتمام کرے کہ نبی ﷺ سے جو دعا ثابت ہے وہی پڑھے، اور انہی میں سے یہ دعا بھی ہے جسے (قنوت) کہا جاتا ہے۔

دعائے قنوت:

حسن بن علی رضی اللہ عنہما سے روایت ہے، وہ کہتے ہیں کہ رسول اللہ ﷺ نے مجھے چند کلمات سکھائے جنہیں میں وتر میں پڑھا کروں: "’’اے اللہ! تو مجھے ہدایت دے کر ان میں (داخل کر) جنھیں تو نے ہدایت دی اور مجھے عافیت دے کر ان میں (شامل کر) جنھیں تو نے عافیت دی اور میری سرپرستی فرما ان لوگوں میں جن کی تو نے سرپرستی فرمائی اور میرے لیے ان چیزوں میں برکت فرما جو تونے عطا کیں اور مجھے ان فیصلوں کے شر سے بچا جو تو نے کیے، اس لیے کہ تو ہی فیصلے کرتا ہے اور تیرے (فیصلے کے) خلاف کوئی فیصلہ نہیں ہو سکتا۔ حقیقت یہ ہے کہ وہ ذلیل نہیں ہو سکتا جس کا تو دوست بن جائے، اے ہمارے رب ! تو بہت بابرکت اور نہایت بلند ہے۔‘‘ [40]" [40] اس حدیث کو ترمذی نے اپنی جامع (2/328) حدیث نمبر: (464) میں روایت کیا ہے اور فرمایا: "یہ حدیث حسن ہے"، اور اسے نسائی نے (3/248) حدیث نمبر: (1745) میں روایت کیا ہے۔

سوالات:

س1: نفلی نماز کا کیا مطلب ہے؟ اور اسے ادا کرنے کا بندے پر کیا اثر ہوتا ہے؟

س2: سننِ رواتب یہ ہیں:

1- ............................ ............................ ظہر سے پہلے۔

2- ............................ ............................ فجر سے پہلے۔

3- ............................ ............................ عشاء کے بعد۔

4- ظہر کے بعد ............................ ............................۔

5- ............................ ............................ مغرب کے بعد۔

س3: درست جواب کے نیچے لکیر کھینچ کر اس کا انتخاب کریں۔

ا- وتر کا وقت: (عشا کی نماز کے بعد - عشا کی نماز سے پہلے - فجر کی نماز کے بعد)۔

ب- وتر کا حکم: (سنت مؤکدہ - واجب - فرض)۔

ج- وتر کم سے کم: (ایک رکعت ہے - گیارہ رکعت ہے - تین رکعت ہے)۔

د- سنن رواتب کتنے ہیں: (آٹھ رکعت ہے - گیارہ رکعت ہے - بارہ رکعت ہے)۔

س4: درج ذیل مسائل کی دلیل ذکر کریں:

1- سننِ رواتب کی مشروعیت۔

2- وتر کی مشروعیت۔

س5: دعاے قنوت ذکر کریں۔

سترہواں سبق [41]

[41] سورج کا بقدرِ نیزہ بلند ہونا محض دیکھنے میں ہے، جبکہ حقیقت میں زمین اور سورج کے درمیان بہت وسیع فاصلے ہیں۔ سورج جب مشرق کی جانب سے طلوع ہوتا ہے تو ہر کھڑی چیز کا ایک لمبا سایہ ہوتا ہے۔ جیسے جیسے سورج بلند ہوتا جاتا ہے سایہ کم ہوتا جاتا ہے، یہاں تک کہ جب سورج بیچ آسمان میں آجاتا ہے تو سائے کا کم ہونا ختم ہو جاتا ہے، اور اس وقت ممانعت کا وقت شروع ہو جاتا ہے۔ پھر جب سورج مغرب کی جانب تھوڑا سا ڈھل جاتا ہے تو سایہ بڑھنا شروع ہو جاتا ہے، اس وقت ممانعت کا وقت ختم ہو جاتا ہے، اور یہ ایک مختصر وقت ہوتا ہے۔

نماز کے ممنوعہ اوقات

مسلمان کے لیے مستحب ہے کہ وہ کثرت سے نوافل پڑھے، کیوں کہ اللہ تعالیٰ نے ان لوگوں کے لیے اجر و ثواب تیار کر رکھا ہے جو عبادات کے ذریعے اس کا قرب حاصل کرتے ہیں۔ لیکن تین اوقات ایسے ہیں جن میں نماز پڑھنا منع ہے‘ اور وہ یہ ہیں:

پہلا: فجر کی نماز کے بعد سے لے کر اس وقت تک جب سورج طلوع ہو جائے اور ایک نیزہ کے برابر بلند ہو جائے۔ یعنی: طلوعِ آفتاب کے تقریباً پندرہ منٹ بعد تک.

دوسرا: جب سورج آسمان کے بیچوں بیچ ہو یہاں تک کہ ڈھل جائے، اور ڈھلنے کا مطلب یہ ہے کہ وہ مغرب کی جانب مائل ہو جائے۔

تیسرا: عصر کی نماز کے بعد سے سورج غروب ہونے تک۔

- ان تین اوقات میں کسی کے لیے بھی نفلی نماز پڑھنا جائز نہیں جیسا کہ پہلے بیان ہو چکا ہے، لیکن اسباب والی کچھ نمازیں ایسی ہیں جو ان اوقات میں پڑھی جا سکتی ہیں، جیسے:

1- فوت شدہ نمازوں کی قضا۔

2- تحیۃ المسجد۔

3- نماز جنازہ۔

سوالات:

س1: نماز کے ممنوعہ اوقات تین ہیں۔ انہیں بیان کریں۔

س2: ان نمازوں کے نیچے خط کشید کریں جنہیں ممنوعہ اوقات میں ادا کرنا جائز ہے:

أ- چھوٹی ہوئی نمازوں کی قضا۔

ب- نفل نماز۔

ج- تحیۃ المسجد۔

د- نمازِ جنازہ۔

س ۳: آسمان کے وسط سے سورج کے ڈھلنے کو کیا کہا جاتا ہے؟

عنوان: نصاب تعلیم، کتاب التوحید، درجہ (پنجم)

مختصر تعارف: یہ علمی مواد سعودی عرب کے اس نصاب تعلیم کی تہذیب واختصار ہے جسے طلبہ کے لیے تیار کیا گیا ہے۔ یہ نصابِ تعلیم مختلف مراحل پر مشتمل ہے۔ اس نصاب میں علمِ توحید سے متعلق خاص مواد بھی شامل ہیں، جو 12 درجات میں منقسم ہیں۔ درجہ پنجم میں جو موضوعات شاملِ نصاب ہیں ان میں چند اہم ترین موضوعات یہ ہیں:

- سورہ عصر میں ایک ساتھ ذکر کیے گئے کامیابی کے اسباب کا بیان، اور وہ یہ ہیں: علم، اس پر عمل، اس کی دعوت، اور اس راہ میں آنے والی اذیتوں پر صبر۔

- رسول ﷺ کی اطاعت کا وجوب، اور شرک سے دوری۔

- ان تین اصولوں کا بیان جن کا جاننا اور ان پر عمل کرنا واجب ہے، اور وہ یہ ہیں: بندے کا اپنے رب کو اس کی نشانیوں اور مخلوقات کے ذریعے جاننا، اور یہ کہ صرف وہی تن تنہا عبادت کا مستحق ہے اور دینِ اسلام کی معرفت اس کے تین مراتب کے ساتھ، یعنی: اسلام، ایمان اور احسان، نیز یہ جاننا کہ ان میں سے ہر مرتبے کے اپنے ارکان ہیں، اور ہر ایک کے شرعی دلائل موجود ہیں۔ اور نبی صلی اللہ علیہ وسلم کو جاننا، اور یہ واضح کرنا کہ آپ ﷺ کی رسالت ہر اعتبار سے کامل اور تمام انسانوں کے لیے عام و شامل ہے۔

پانچواں درجہ

مقدمہ

تمام تعریفیں اس اللہ کے لیے ہیں جس نے قلم کے ذریعہ علم سکھایا۔ جس نے انسان کو وہ سکھایا جسے وہ نہیں جانتا تھا۔ درود وسلام نازل ہو نبی امی پر جن کو اللہ نے اس لیے مبعوث فرمایا کہ لوگوں کو تاریکیوں سے نکال کر روشنی کی طرف لائیں۔ حمد وصلاۃ کے بعد:

اللہ عز وجل کی توحید پر قائم رہنا سب سے بڑا واجب ہے، اس کا علم حاصل کرنا سب سے معزز اور افضل علم ہے اور یہی وہ بنیاد ہے جس پر اعمال کی صحت اور مقبولیت کا دار ومدار ہے۔ بندوں کو تمام ضرورتوں سے زیادہ اسی کی ضرورت ہے، کیوں کہ یہی دلوں کی زندگی ہے۔ پروردگار، معبود اور خالق کو اس کے اسما وصفات اور افعال کے ذریعہ جانے بغیر نہ دلوں کو زندگی ملتی ہے، نہ نعمت وخوش حالی حاصل ہوسکتی ہے اور نہ اطمینان وسکون۔ اسی طرح دین کی سمجھ حاصل کرنا اور طہارت اور نماز جیسی عبادتوں کی ادائیگی کا طریقہ جاننا سعادت مندی کی علامت اور اس بات کی نشانی ہے کہ اللہ تعالیٰ اپنے بندے کے ساتھ بھلائی کا ارادہ رکھتا ہے۔ نبی کریم ﷺ کا ارشاد ہے: "اللہ تعالیٰ جس کے ساتھ بھلائی کا ارادہ فرماتا ہے، اسے دین کی سمجھ عطا فرما دیتا ہے۔"[1]۔ [1] صحیح بخاری، کتاب العلم، باب: من يرد الله به خيرًا يفقهه في الدين، حدیث نمبر 7۔

اسی مقصد کے پیشِ نظر مکتب توعیۃ الجالیات نے عقیدۂ توحید کی تعلیم پر خصوصی توجہ دی ہے، تاکہ طلبہ کے دلوں میں صحیح عقیدہ راسخ کیا جائے، اور وہ اپنے دینی احکام سے متعلق بصیرت وآگہی حاصل کر سکیں۔

نصابِ توحید کے اس پانچویں درجے میں تین بنیادی اصولوں اور ان کے دلائل کو کسی قدر تفصیل کے ساتھ بیان کیا گیا ہے، تاکہ طالبِ علم انہیں مرحلہ وار اور تدریج کے ساتھ سیکھے، اور بلند عزم وہمت کے ساتھ علم کی منازل طے کرتے ہوئے اللہ تعالیٰ کی رضا اور اس کی جنتوں کی کامیابی حاصل کرے۔

ہر سبق کے لیے اس کی نوعیت کے مطابق مخصوص تعلیمی اہداف مقرر کیے گئے ہیں، جن کی ترتیب میں اختصار، عبارت کی وضاحت، موضوعات میں تدریج، اور سابقہ اسباق کے ساتھ ان کا ربط و تسلسل پیشِ نظر رکھا گیا ہے۔ اسی طرح ہر سبق کے آخر میں سوالات بھی شامل کیے گئے ہیں، اور اساتذہ کے لیے ایسی رہنما ہدایات فراہم کی گئی ہیں جو مطلوبہ تعلیمی اہداف کے حصول میں ان کے لیے معاون ثابت ہوں۔

استاد کے لیے ہدایات:

1- اللہ تعالیٰ کے لیے مخلص ہونا عمل کی قبولیت کے لیے شرط ہے۔ لہٰذا اپنے عمل کو اسی پاک ذات کی رضا کے لیے خالص کر لیں، آپ اپنی دنیا اور آخرت میں کامیاب ہو جائیں گے۔

2- امانت کی حفاظت نجات کا ذریعہ ہے اور آپ -اے میرے استاد بھائی- اسلام کی ایک سرحد کے نگہبان اور مسلم بچوں کی عقل وفطرت کے امین ہیں۔ لہٰذا امانت کی حفاظت کریں، تاکہ آپ دونوں جہان میں فلاح پا سکیں۔

3- بلاشبہ مادۂ توحید کی تعلیم ایک عظیم ترین عمل ہے، کیوں کہ توحید کی معرفت اور اس پر عمل کے بغیر بندوں کو نہ تو بھلائی حاصل ہو سکتی ہے اور نہ دنیا کی رسوائی اور آخرت کے عذاب سے نجات مل سکتی ہے۔ لہٰذا طلبہ کے دلوں میں صحیح عقیدہ راسخ کرنے کی بھرپور کوشش کریں اور آپ جن اعلیٰ اصول واقدار کی دعوت دیتے ہیں، ان کے سچے ترجمان اور زندہ مثال بن کر رہیں۔

4- جب آسمان میں گھنگھور گھٹا چھا جائے، بجلی چمکنے لگے، بادل گرجنے لگے، بارش ہونے لگے اور اس طرح کے ایسے واقعات رونما ہوں، جن سے مسلمان کے اندر ایمانی جذبات متحرک ہوجاتے ہیں، تو ان مواقع کو غنیمت جانتے ہوئے اللہ کی وحدانیت اور قدرت کے بارے میں گفتگو کریں۔

5- مثالوں کے ذریعے سبق کو آسان بنانا، اور اس کے مضامین کو عملی زندگی سے جوڑ کر پیش کرنا، طلبہ کے دلوں میں اس مضمون کی رغبت اور دلچسپی پیدا کرنے میں نہایت مؤثر ثابت ہوتا ہے۔ یہی دلچسپی انہیں اس کے سیکھنے اور اس پر عمل کرنے کی طرف آمادہ کرتی ہے۔ اخیر میں ہم آپ کو نبی ﷺ کے اس فرمان کی خوش خبری سناتے ہیں: "مومن کو اس کے اعمال اور نیکیوں میں سے اس کے مرنے کے بعد جن چیزوں کا ثواب پہنچتا رہتا ہے، ان میں سے وہ علم بھی ہے جو اس نے سکھایا اور پھیلایا" [2]۔ [2] سنن ابن ماجہ، حدیث نمبر: 242۔

وصلی اللہ علی نبینا محمد وعلی آلہ وصحبہ وسلم۔

پہلا سبق

کامیابی کے اسباب

اللہ تعالیٰ آپ پر رحم فرمائے، یہ بات اچھی طرح جان لیں کہ ہم پر درج ذیل چار مسائل کا علم حاصل کرنا واجب ہے۔

پہلا مسئلہ: اللہ تعالیٰ، اس کے نبی ﷺ اور اس کے دین یعنی اسلام کو دلائل کے ساتھ جاننا۔

دوسرا مسئلہ: علم پر عمل کرنا۔

تیسرا مسئلہ: اس دین کی طرف دعوت دینا۔

چوتھا مسئلہ: دعوتِ دین میں پیش آنے والے مشکلات پر صبر کرنا۔

اس کی دلیل اللہ تعالیٰ کا یہ فرمان ہے: زمانے کی قسم۔ بے شک (بالیقین) انسان سرتا سر نقصان میں ہے۔ سوائے ان لوگوں کے جو ایمان ﻻئے اور نیک عمل کیے اور (جنہوں نے) آپس میں حق کی وصیت کی اور ایک دوسرے کو صبر کی نصیحت کی۔ [العصر: 1-3]

امام شافعی [3] رحمہ اللہ فرماتے ہیں: ”اگر اللہ تعالیٰ اپنی مخلوق پر بطور حجت صرف اسی ایک سورت کو نازل فرماتا، تو یہ ان کی ہدایت کے لیے کافی ہوتی۔“ [3] آپ محمد بن ادریس القرشی الشافعی ہیں، آپ (150 ھ) میں پیدا ہوئے، فقہ اور حدیث کے عالم تھے، آپ کی متعدد تصانیف ہیں جن میں سے مشہور ترین کتاب "الأم" اور "الرسالہ" ہیں، آپ نے (204 ھ) میں وفات پائی۔

سب سے ماخوذ رہنما ہدایات:

* اللہ نے قسم کھائی ہے کہ سارے لوگ خسارے میں ہیں، سوائے اس کے جو نجات اور کامیابی کے اسباب اختیار کرے۔

* مسلمان پر واجب ہے کہ وہ خسارے سے نجات کے اسباب جانے، اور وہ چار ہیں:

1- اللہ تعالیٰ، اس کے نبی صلی اللہ علیہ وسلم اور اس کے دین کا ایسا نفع بخش علم حاصل کرنا جو عمل کا باعث بنے۔

2- جس دین پر ایمان لایا ہے اس پر عمل کرنا، یعنی نیک کاموں کو بجا لانا، اور حرام کاموں کو ترک کرنا۔

3- دین اسلام کی طرف دعوت دینا اور اسے لوگوں میں پھیلانا۔

4- اطاعت کے کام پر صبر کرنا اور لوگوں کو دعوت دینے کے سبب پیش آنے والی مشکلات پر استقامت اختیار کرنا۔

* یہ چاروں اسباب ایک دوسرے سے مربوط اور باہم وابستہ ہیں۔ کیوں کہ عمل کی بنیاد علم پر ہے، اور لوگوں کو دین کی دعوت دینے سے پہلے داعی کے لیے ضروری ہے کہ وہ خود دین کی تعلیمات پر عمل پیرا ہو۔

* مسلمان پر لازم ہے کہ وہ ان مسائل کو یاد کرے اور دوسروں کو سکھائے؛ کیوں کہ یہ علم پھیلانے اور لوگوں کو خیر کی طرف دعوت دینے میں داخل ہے۔

سوالات:

س1: وہ مسائل بیان کریں جن کا سیکھنا آپ پر واجب ہے۔

س2: اللہ نے کس چیز پر زمانے کی قسم کھائی ہے؟

سوال ۳: سورہ عصر میں مذکور کامیابی کے اسباب کیا ہیں؟

س4: ان امور کو ان کی اولویت کے مطابق ترتیب دیں:

صبر - علم - دعوت الی اللہ - عمل۔

س5: شافعی رحمہ اللہ نے سورۃ العصر کے بارے میں کیا فرمایا؟ اور یہ کس بات پر دلالت کرتا ہے؟

دوسرا سبق

علم عمل پر مقدم ہے۔

امام بخاری [4] - رحمہ اللہ تعالیٰ - نے فرمایا: باب: قول اور عمل سے قبل حصول علم کا بیان۔ [4] ابو عبد اللہ محمد بن اسماعیل بن ابراہیم بخاری، آپ کی ولادت سنہ (194ھ) میں ہوئی، آپ علمِ حدیث کے ماہر تھے، آپ کی متعدد تصانیف ہیں جن میں سب سے مشہور صحیح بخاری ہے جو "الجامع المسند الصحيح المختصر مِن أمور رسول الله ﷺ وسُنَنه وأيّامِه" کے نام سے موسوم ہے، آپ کی وفات سنہ (256ھ) میں ہوئی۔

اس کی دلیل اللہ تعالیٰ کا یہ فرمان ہے: سو (اے نبی!) آپ یقین کر لیں کہ اللہ کے سوا کوئی معبود نہیں... [محمد : 19]۔ چنانچہ اللہ تعالیٰ نے قول وعمل سے پہلے علم کا ذکر کیا ۔

سبق سے ماخوذ رہنما ہدایات:

* علمِ حق وہ ہے جو رسول اللہ ﷺ قرآن اور سنت کل شکل میں لے کر آئے۔

* ایک مسلمان کے لیے ضروری ہے کہ اس کے اعمال اور عبادات شریعت کے صحیح علم پر مبنی ہوں تاکہ اس کی عبادت درست اور قابل قبول ہو۔

* لوگوں کی بہت سی غلطیاں اور بدعتیں جن میں وہ مبتلا ہوتے ہیں، ان کا سبب یہ ہے کہ وہ دینِ حق سے ناواقف ہیں اور علمِ شرعی حاصل نہیں کرتے۔

سوالات:

س1: حقیقی علم کیا ہے؟

س2: بدعات اور غلطیوں میں لوگوں کے مبتلا ہونے کا کیا سبب ہے؟

س3: اللہ تعالی نے آیت کریمہ میں کس بات کا حکم دیا ہے؟

س4: علم عمل سے پہلے کیوں ضروری ہے؟

تیسرا سبق

رسول ﷺ کی اطاعت کرنا اور شرک سے بچنا واجب ہے۔

اللہ تعالیٰ آپ پر رحم فرمائے، یہ بات اچھی طرح جان لیں کہ درج ذیل تین مسائل کا علم حاصل کرنا اور ان پر عمل کرنا ہر مسلمان مرد اور عورت پر واجب ہے:

پہلا: اللہ تعالیٰ نے ہمیں پیدا کیا، رزق عطا فرمایا اور یوں ہی ہمیں بے کار نہیں چھوڑ دیا، بلکہ ہماری طرف اپنا رسول بھیجا، چنانچہ جس نے آپ ﷺ کی اطاعت کی وہ جنت میں داخل ہوگا اور جس نے آپ ﷺ کی نافرمانی کی وہ جہنم میں داخل ہو گا۔

اس کی دلیل اللہ تعالیٰ کا یہ فرمان ہے: بے شک ہم نے تمہاری طرف بھی تم پر گواہی دینے واﻻ رسول بھیج دیا ہے جیسے کہ ہم نے فرعون کے پاس رسول بھیجا تھا۔ تو فرعون نے اس رسول کی نافرمانی کی تو ہم نے اسے سخت (وبال کی) پکڑ میں پکڑ لیا۔ [المزمل: 15-16]۔

دوسرا مسئلہ: اللہ تعالیٰ اس بات کو پسند نہیں کرتا کہ اس کی عبادت میں اس کے ساتھ کسی کو شریک کیا جائے، نہ کسی مقرب فرشتہ کو اور نہ کسی نبی مرسل کو۔

اس کی دلیل اللہ تعالیٰ کا فرمان ہے: اور یہ کہ مسجدیں صرف اللہ ہی کے لئے خاص ہیں۔ پس اللہ تعالیٰ کے ساتھ کسی اور کو نہ پکارو۔ [الجن: 18]۔

سبق سے ماخوذ رہنما ہدایات:

* ہمارے اوپر اللہ کی یہ نعمت ہے کہ اس نے ہمیں اپنی عبادت کے لیے وجود بخشا جبکہ ہم کچھ بھی نہیں تھے‘ اور ہمیں نعمتیں عطا کیں تاکہ ہم ان کے ذریعے اس مقصد میں مدد حاصل کریں جس کے لیے ہمیں پیدا کیا گیا ہے۔

* یہ انسان پر اللہ کا انعام ہے کہ اس نے اسے شتر بے مہار کی طرح نہیں چھوڑ دیا کہ وہ جانوروں کی مانند زندگی گزارے؛ بلکہ اس کی طرف حق کے ساتھ رسولوں کو مبعوث فرمایا۔

* اللہ کے رسول ﷺ نے لوگوں کے لیے جنت کا راستہ واضح کیا اور انہیں اس کی طرف بلایا، انہیں جہنم کے راستے سے آگاہ کیا اور اس سے خبردار کیا، لہٰذا آپ ﷺ کی اطاعت کرنا واجب ہے، جیسا کہ اللہ کے نبی ﷺ نے فرمایا: "میری امت کے سب لوگ جنت میں داخل ہوں گے، ما سوا ان کے جنھوں نے انکار کیا۔ پوچھا گیا کہ اے اللہ کے رسول! انکار کرنے والے کون ہوں گے؟ آپ ﷺ نے فرمایا: جس نے میری اطاعت کی، وہ جنت میں داخل ہو گا اور جس نے میری نافرمانی کی، اس نے انکار کیا۔" [5]۔ [5] اس حدیث کو بخاری نے كتاب الاعتصام والسُّنَّة، باب: الاقتداء بِسُنَن رسولِ الله ﷺ میں، حدیث نمبر (7280) کے تحت روایت کیا ہے۔

* اللہ تعالیٰ کی بادشاہت میں اس کا کوئی شریک نہیں، حتیٰ کہ فرشتے اور انبیاء بھی اللہ کے محتاج بندے ہیں، لہٰذا کسی کے لیے یہ جائز نہیں کہ وہ اللہ تعالیٰ کے ساتھ ان کی عبادت کرے۔

سوالات:

س1: رسولوں کو لوگوں کی جانب مبعوث کرنے کی کیا حکمت ہے؟

س2: انبیاء اور صالحین میں سے کسی غیر اللہ کو پکارنے اور اس سے دعا مانگنے کا کیا حکم ہے؟ دلیل کے ساتھ بیان کریں۔

س3: اس شخص کی کیا جزا ہے جو اللہ اور رسول محمد ﷺ کی اطاعت کرتا ہے؟

س4: اس شخص کی کیا سزا ہے جس نے اللہ تعالیٰ اور اس کے رسول محمد ﷺ کی نافرمانی کی؟

سوال 5: جب فرعون نے موسیٰ علیہ السلام کی نافرمانی کی تو اس کا کیا انجام ہوا؟

چوتھا سبق

ایسے لوگوں سے دوستی رکھنا جائز نہیں جو اللہ اور اس کے رسول ﷺ کے ساتھ دشمنی رکھتے ہوں۔

تیسرا مسئلہ: جس نے رسول اللہ ﷺ کی اطاعت وفرماں برداری کی اور اللہ تعالیٰ کی وحدانیت ویکتائی کو تسلیم کیا، اس کے لیے یہ ہرگز جائز نہیں کہ وہ ایسے لوگوں سے دوستی رکھے، جو اللہ اور اس کے رسول ﷺ کے ساتھ دشمنی رکھتے ہوں؛ خواہ وہ کتنے ہی قریبی رشتے دار کیوں نہ ہوں۔

اس کی دلیل اللہ تعالیٰ کا یہ فرمان ہے: اللہ تعالیٰ پر اور قیامت کے دن پر ایمان رکھنے والوں کو آپ اللہ اور اس کے رسول کی مخالفت کرنے والوں سے محبت رکھتے ہوئے ہرگز نہ پائیں گے گو وه ان کے باپ یا ان کے بیٹے یا ان کے بھائی یا ان کے کنبہ (قبیلے) کے (عزیز) ہی کیوں نہ ہوں۔ یہی لوگ ہیں جن کے دلوں میں اللہ تعالیٰ نے ایمان کو لکھ دیا ہے اور جن کی تائید اپنی روح سے کی ہے اور جنہیں ان جنتوں میں داخل کرے گا جن کے نیچے نہریں بہہ رہی ہیں جہاں یہ ہمیشہ رہیں گے، اللہ ان سے راضی ہے اور یہ اللہ سے خوش ہیں۔ یہی لوگ اللہ کا گروہ ہیں،آگاه رہو! بے شک الله کا گروہ ہی کامیاب ہونے والا ہے۔ [المجادلۃ: 22]۔

سبق سے ماخوذ رہنما ہدایات:

* موالات کا مطلب ہے: اللہ، اس کے رسول اور مومنوں سے قولی وعملی طور پر محبت رکھنا اور ان کی مدد کرنا، اور یہ دین کے عظیم ترین شعائر میں سے ہے۔

* موحد مومن کی دوستی اللہ، اس کے رسول اور مومنوں کے لیے ہوتی ہے۔

* مسلمان پر حرام ہے کہ وہ ایسے لوگوں سے دوستی رکھے، جو اللہ تعالیٰ اور اس کے رسول ﷺ پر ایمان نہ رکھتے ہوں، یا دینِ اسلام کے خلاف برسرپیکار ہوں۔

* مسلمان اگرچہ دور دراز کا رہنے والا ہو، وہ دین میں تمہارا بھائی ہے، اور اللہ کی مخالفت کرنے والا اگرچہ نسب میں تمہارا بھائی ہو، وہ دین میں تمہارا دشمن ہے۔

* بلاشبہ صحابہ رضی اللہ عنہم نے اللہ اور اس کے دین سے سچی وفاداری کی بہترین مثالیں قائم کیں، جب انہوں نے رسول اللہ ﷺ کے خلاف جنگ کرنے والے اپنے رشتہ داروں سے جنگ کی، تو اللہ نے اس پر ان کی تعریف کی۔[6] [6] دیکھیں: کتاب "الوَلاء والبَراء في الإسلام"، از محمَّد بن سعيد القحطاني - حفظہ اللہ -۔

سوالات:

س1: کیا یہود و نصاریٰ سے محبت کرنا جائز ہے، دلیل کے ساتھ ذکر کریں؟

س2: اللہ کے دشمنوں سے بغض رکھنے والے کا بدلہ کیا ہے؟

س3: ولاء (دوستی) کا معنی ذکر کریں۔

س4: وہ تین مسائل ذکر کریں جن کا علم حاصل کرنا ہر مسلمان پر واجب ہے۔

پانچواں سبق

حنیفیت (ملتِ ابراہیمی)

آپ یہ بات جان لیں — اللہ اپنی اطاعت وفرماں برداری کی طرف آپ کی رہنمائی فرمائے — کہ حنیفیت — یعنی ملتِ ابراہیمی — یہ ہے کہ آپ دین کو اللہ کے لیے خالص کرتے ہوئے صرف اسی کی عبادت کریں، اسی کام کا اللہ تعالیٰ نے تمام لوگوں کو حکم دیا اور اسی مقصد سے انھیں پیدا فرمایا؛ جیسا کہ اللہ تعالیٰ کا فرمان ہے: میں نے جنات اورانسانوں کو محض اسی لیے پیدا کیا ہے کہ وه صرف میری عبادت کریں۔ [الذاریات: 56]۔ اس آیت میں ﴿يَعْبُدُوْنِ﴾ کا معنی ہے يُوَحِّدُوْنِ، یعنی خالص ایک اللہ کی عبادت کرنا اور اس کو ایک جاننا، اللہ تعالیٰ نے جن امور کا حکم دیا ہے، ان میں سب سے ارفع واعلٰی ”توحید“ ہے، جو ہر قسم کی عبادات صرف اللہ کے لیے بجا لانے کا دوسرا نام ہے، جن امور سے اللہ تعالیٰ نے منع فرمایا ہے، ان میں سب سے بڑی برائی ”شرک“ ہے، جو اللہ کے ساتھ کسی غیر کو پکارنے کا نام ہے۔

اس کی دلیل اللہ تعالیٰ کا یہ فرمان ہے: اور اللہ تعالیٰ کی عبادت کرو اور اس کے ساتھ کسی کو شریک نہ کرو... [النساء: 36]۔

سبق سے ماخوذ رہنما ہدایات: