حكم السحر والكهانة
جادو اور کہانت کا حکم فضیلۃ الشیخ عبد العزیز بن عبد اللہ بن باز رحمہ اللہ شروع اللہ کے نام سے جو بڑا مہربان نہایت رحم والا ہے جادو، کہانت اور اس سے متعلقہ امور کا حکم[1] [1] اس مقالے کا ایک حصہ "مجموع فتاوی و مقالات متنوعہ" کی تیسری جلد میں (جادو، کہانت اور اس سے متعلقہ امور کا حکم) کے عنوان سے شائع ہو چکا ہے۔ نیز یہ پورا مقالہ ایوان (برائے اسلامی امور و دعوت و ارشاد) کے ماتحت (رسالۃ فی حکم السحر والکہانۃ) کے عنوان سے شائع ہوچکا ہے اور مجلۃ الیمامۃ اور مجلۃ البحوث الإسلامیۃ میں بھی نشر ہو چکا ہے۔ ساری تعریفیں ایک اللہ کے لیے ہیں اور درود و سلام نازل ہو اس نبی پر، جس کے بعد کوئی نبی نہيں آئے…
These files are generated automatically from the book's text; their layout may differ from the printed edition.
جادو اور کہانت کا حکم
فضیلۃ الشیخ عبد العزیز بن عبد اللہ بن باز
رحمہ اللہ
شروع اللہ کے نام سے جو بڑا مہربان نہایت رحم والا ہے
جادو، کہانت اور اس سے متعلقہ امور کا حکم[1]
[1] اس مقالے کا ایک حصہ "مجموع فتاوی و مقالات متنوعہ" کی تیسری جلد میں (جادو، کہانت اور اس سے متعلقہ امور کا حکم) کے عنوان سے شائع ہو چکا ہے۔ نیز یہ پورا مقالہ ایوان (برائے اسلامی امور و دعوت و ارشاد) کے ماتحت (رسالۃ فی حکم السحر والکہانۃ) کے عنوان سے شائع ہوچکا ہے اور مجلۃ الیمامۃ اور مجلۃ البحوث الإسلامیۃ میں بھی نشر ہو چکا ہے۔
ساری تعریفیں ایک اللہ کے لیے ہیں اور درود و سلام نازل ہو اس نبی پر، جس کے بعد کوئی نبی نہيں آئے گا۔ حمد و صلاۃ کے بعد :
حالیہ دنوں میں شعبدہ باز بڑی تعداد میں رونما ہوگئے ہیں، جو دعوی تو معالج ہونے کا کرتے ہیں، لیکن علاج جادو اور کہانت کے ذریعہ کرتے ہیں۔ بعض ممالک میں ان کا جال بچھ چکا ہے۔ وہ ایسے سادہ لوح لوگوں کو اپنا نشانہ بناتے ہیں، جن پر جہالت ولاعلمی کا غلبہ ہوتا ہے۔ اسی کے پیش نظر میں نے اللہ اور اس کے بندوں کے تئیں نصح و خیر خواہی کے جذبہ کے تحت یہ مناسب سمجھا کہ اس کے اندر اسلام اور مسلمانوں کے لئے جو بڑا خطرہ چھپا ہے، اسے واضح کر دوں۔ کیوں کہ اس میں غیر اللہ سے تعلق استوار کرنا اور اللہ و اس کے رسول -صلی اللہ علیہ وسلم- کے حکم کی نافرمانی کرنا جیسی چيزیں شامل ہیں۔
چنانچہ میں اللہ سے مدد طلب کرتے ہوئے یہ عرض کرتا ہوں کہ علاج ومعالجہ کرانا متفقہ طور پر جائز ہے۔ مسلمان کے لئے یہ جائز ہے کہ وہ باطنی امراض، جراحی امراض (surgical diseases)، اعصابی امراض (neurological diseases) یا دیگر بیماریوں کے ڈاکٹر کے پاس جائے، تاکہ وہ اس کی بیماری کی تشخیص کرے اور علمِ طب سے اپنی واقفیت کی روشنی میں مناسب اور شرعی طور پر مباح دواؤں کے ذریعہ اس کا علاج کرے۔ کیوں کہ یہ عمومی اسباب اختیار کرنے کے قبیل سے ہے اور اللہ پر توکل کرنے کے منافی بھی نہیں ہے۔ اللہ پاک و برتر نے بیماری اتاری ہے اور اس کے ساتھ اس کی دوا بھی اتاری ہے۔ کسی کو دوا معلوم ہے اور کسی کو نہیں ہے۔ لیکن یاد رکھنے کی بات ہے کہ اللہ تعالی نے اپنے بندوں کی شفا حرام چیزوں میں نہیں رکھی ہے۔
لہذا مریض کے لیے جائز نہیں کہ وہ اپنی بیماری کی تشخیص کے لیے ایسے کاہنوں کے پاس جائے جو غیبی امور جاننے کا دعوی کرتے ہیں۔ اسی طرح یہ بھی جائز نہیں کہ ان کی بتائی ہوئی باتوں کی تصدیق کرے۔ کیوں کہ وہ اٹکل بازی سے کام لیتے ہیں یا پھر جنوں کو پکارتے ہيں، تاکہ اپنے ارادے کی تکمیل میں ان سے مدد لے سکیں۔ ایسے لوگوں کا حکم یہ ہے کہ اگر وہ علم غیب کا دعوی کریں، تو کافر اور گمراہ ہیں۔ امام مسلم نے اپنی صحیح میں روایت کیا ہے کہ اللہ کے نبی صلی اللہ علیہ وسلم نے فرمایا ہے : ’’جو شخص عرّاف (غیب کی خبر دینے والے) کے پاس جائے اور اُس سے غیب کی بات پوچھے، تو چالیس دنوں تک اُس کی نماز قبول نہیں ہوتی‘‘۔ ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا ہے : "جو کسی کاہن کے پاس گیا اور اس کی کہی ہوئی بات کی تصدیق کی، اس نے اس دین کا انکار کیا جو محمد ﷺ پر نازل کیا گیا ہے۔" اس حدیث کو ابوداود نے روایت کیا ہے۔ سنن اربعہ کے مؤلفین نے بھى اس کی روایت نبی صلی اللہ علیہ وسلم سے کی ہے۔ حاکم نے اسے اللہ کے نبی صلی اللہ علیہ و سلم سے ان الفاظ کے ساتھ صحیح کہا ہے : "جو شخص کسی عرّاف یا کاہن کے پاس گیا اور اس کی بتائی ہوئی باتوں کی تصدیق کی، اُس نے اس دین کا انکار کیا جو محمد ﷺ پر اتارا گیا ہے"۔ عمران بن حصین رضی اللہ عنہ سے روایت ہے، وہ کہتے ہیں کہ رسول اللہ ﷺ نے ارشاد فرمایا ہے : "جو فال نکالے یا جس کے لیے فال نکالا جائے، جو کہانت کا پیشہ اختیار کرے یا جس کے لئے کہانت کی جائے یا جو جادو کرے یا جس کے لئے جادو کیا جائے اور جو کاہن کے پاس جائے اور اس کی بات کی تصدیق کرے، وہ محمد صلی اللہ علیہ وسلم کے لائے ہوئے دین کے ساتھ کفر کرتا ہے"۔ اسے بزّار نے جیّد سند کے ساتھ روایت کیا ہے۔
ان احادیث مبارکہ میں شعبدہ بازوں، کاہنوں اور جادو گروں وغیرہ کے پاس جانے اور ان سے کچھ پوچھنے کی ممانعت اور اس پر وعید آئی ہے۔ اس لیے حکام اور افسران وغیرہ، جن کے پاس طاقت اور باگ ڈور ہو، کی ذمے داری ہے کہ کاہنوں اور شعبدہ بازوں وغیرہ کے پاس جانے سے لوگوں کو روکیں اور بازاروں میں اس طرح کے کرتب دکھانے والوں کو منع کریں اور ان کے پاس جانے والوں کو بھی روکیں۔ یہ بھی جائز نہیں کہ بعض معاملات میں ان کی بات کے صحیح ہو جانے اور کثیر تعداد میں ان کے پاس آنے والے لوگوں کے ہجوم سے دھوکا کھایا جائے، کیوں کہ یہ جاہل و نادان لوگ ہیں۔ ان سے لوگوں کو دھوکا نہیں کھانا چاہئے۔ اس لئے کہ رسول صلی اللہ علیہ وسلم نے ان کے پاس جانے اور ان کی تصدیق کرنے سے منع فرمایا ہے۔ کیوں کہ اس سے بڑی برائی، سنگین خطرے اور نہایت برے انجام مرتب ہوتے ہیں اور اس لئے کہ ایسا کرنے والے جھوٹے اور فاسق ہوا کرتے ہیں۔ یہ احادیث اس بات پر بھی دلالت کرتی ہیں کہ کاہن اور جادوگر کافر ہیں۔ کیوں کہ وہ علم غیب کا دعوی کرتے ہیں جوکہ کفر ہے اور اس لئے بھی کہ وہ اپنے مقصد میں اس وقت تک کامیاب نہیں ہوتے جب تک کہ جنوں سے خدمت نہ لیں اور ان کی عبادت نہ کریں، جو کہ اللہ پاک کے ساتھ کفر اور شرک ہے۔ جو شخص ان کے علمِ غیب کے دعوی کی تصدیق کرتا ہے، وہ بھی انہی کی طرح ہے اور ایسا کرنے والوں سے ان امور کی جانکاری حاصل کرنے والے ہر شخص سے رسول اللہ صلی اللہ علیہ وسلم بری ہیں۔ علاج کے نام پر ان کے ذریعے انجام دیے جانے والے خرافات، جیسے جادوئی لکیریں کھینچنا اور تحریریں لکھنا یا سیسہ انڈیلنا وغیرہ کو تسلیم کرنا بھی جائز نہيں ہے۔ کیوں کہ یہ ساری چيزیں کہانت اور فریب کے دائرے میں آتی ہیں اور انھیں تسلیم کرنا انھیں کرنے والوں کے کفر اور باطل پر ان کی مدد کرنا ہے۔ اسی طرح کسی مسلمان کے لیے یہ جائز نہیں ہے کہ ان کے پاس جاکر یہ دریافت کرے کہ اس کے بیٹے یا قریبی رشتہ دار کی شادی کس سے ہوگی یا پھر میاں بیوی کے ازدواجی تعلقات اور باہمی محبت، وفاداری یا عداوت اور جدائی جیسی چیزوں کے بارے میں پوچھے۔
کیوں کہ یہ غیب کی باتیں ہیں، جو صرف اللہ پاک و برتر ہی کو معلوم ہیں۔
جادو کفر تک پہنچانے والی محرمات میں سے ہے، جیسا کہ اللہ عز وجل نے سورۃ البقرۃ میں دو فرشتوں کے تعلق سے فرمایا ہے : "وه دونوں بھی کسی شخص کو اس وقت تک نہیں سکھاتے تھے، جب تک یہ نہ کہہ دیں کہ ہم تو ایک آزمائش ہیں، لہذا تو کفر نہ کر۔ پھر لوگ ان سے وه سیکھتے جس سے خاوند و بیوی میں جدائی ڈال دیں اور در اصل وه بغیر اللہ تعالیٰ کی مرضی کے کسی کو کوئی نقصان نہیں پہنچا سکتے۔ یہ لوگ وه سیکھتے ہیں، جو انہیں نقصان پہنچائے اور نفع نہ پہنچا سکے۔ اور وه بالیقین جانتے ہیں کہ اس کے لینے والے کا آخرت میں کوئی حصہ نہیں۔ اور وه بدترین چیز ہے، جس کے بدلے وه اپنے آپ کو فروخت کر رہے ہیں۔ کاش کہ یہ جانتے ہوتے"۔[2] [2] سورۃ البقرۃ، آیت : 102۔
یہ تمام آیتیں اس بات پر دلالت کرتی ہیں کہ جادو کفر ہے اور جادو گر میاں بیوی کے درمیان تفریق ڈالتے ہیں۔ یہ آیتیں اس پر دلالت کرتی ہیں کہ جادو بذات خود نفع ونقصان کی تاثیر نہیں رکھتا، بلکہ اللہ کی کونی و قدری اجازت سے اس میں تاثیر پیدا ہوتی ہے۔ کیوں کہ اللہ پاک و برتر ہی وہ ذات ہے، جس نے خیر و شر کو پیدا کیا ہے۔ یہ افترا پرداز جنہوں نے مشرکوں سے کہانت اور شعبدہ بازی کا علم حاصل کیا ہے، ان کی وجہ سے امت کا بہت بڑا نقصان ہوا اور امت بہت بڑی مصیبت سے دوچار ہوئی۔ انہوں نے اپنے ان مزعومہ علوم سے کمزور عقلوں کو شبہ میں ڈالنے کا کام کیا ہے۔ إنا لله و إنا إليه راجعون۔ وحسبنا الله ونعم الوكيل۔ اسی طرح یہ آیت کریمہ اس پر بھی دلالت کرتی ہے کہ جو لوگ جادو سیکھتے ہیں، وہ ایسی چیز سیکھتے ہیں، جو ان کے لئے مفید ہونے کے بجائے نقصان دہ ہے اور ان کے لئے اللہ کے پاس کوئی حصہ نہیں ہے۔ دراصل یہ ایک بہت بڑی وعید ہے، جو اس بات پر دلالت کرتی ہے کہ دنیا و آخرت میں ان کے لئے بڑا نقصان و خسارہ ہے اور انہوں نے نہایت معمولی قیمت میں اپنے آپ کو فروخت کردیا ہے۔ یہی وجہ ہے کہ اللہ پاک و برتر نے اس پر ان کی مذمت بیان کرتے ہوئے فرمایا ہے : "اور وہ بدترین چیز ہے، جس کے بدلے وہ اپنے آپ کو فروخت کر رہے ہیں۔ کاش یہ جانتے ہوتے"۔[3] یہاں شراء کے معنی فروخت کرنے کے ہیں۔ [3] سورۃ البقرۃ، آیت : 102۔
اللہ سے ہم دعا گو ہیں کہ جادوگروں، کاہنوں اور تمام شعبدہ بازوں کے شر سے ہمیں محفوظ رکھے۔ اللہ پاک سے ہم یہ بھی دعا کرتے ہیں کہ مسلمانوں کو ان کے شر سے محفوظ رکھے اور مسلم حکمرانوں کو توفیق دے کہ ان سے لوگوں کو متنبہ کریں اور ان سے متعلق اللہ کے حکم کو نافذ کریں، تاکہ ان کے نقصان دہ اور خبیث کرتوتوں سے بندے مامون رہیں۔ یقینا اللہ بے پناہ سخی اور کرم فرما ہے۔
اللہ پاک نے بندوں کے لئے جادو واقع ہونے سے پہلے اس کے شر سے بچنے کے طریقے مشروع کر دیے ہیں اور اللہ پاک نے بندوں پر رحم کھاتے ہوئے, ان پر فضل واحسان کرتے ہوئے اور ان پر اپنی نعمت تمام کرتے ہوئے ان کے سامنے یہ بھی واضح کردیا ہے کہ اگر جادو واقع ہوجائے, تو اس کا علاج کیسے کریں۔
آنے والے سطور میں ان امور کی وضاحت کی جارہی ہے، جن کے ذریعہ جادو واقع ہونے سے پہلے اس کی خطرناکی سے بچا جا سکتا ہے اور شرعی طور پر ان مباح امور کی بھی وضاحت کی جا رہی ہے، جن کے ذریعہ جادو واقع ہونے کے بعد اس کا علاج کیا جا سکتا ہے۔
وہ امور جن کے ذریعہ جادو واقع ہونے سے قبل اس کی خطرناکی سے بچا جا سکتا ہے، ان میں ایک اہم ترین اور سب سے نفع بخش طریقہ یہ ہے کہ شرعی اذکار، مسنون دعاؤں اور ماثور معوذات کے ذریعہ پناہ طلب کی جائے۔ جیسے ہر فرض نماز کے بعد شرعی اذکار سے فارغ ہوکر آیت الکرسی کی تلاوت کرنا اور اسی طرح سونے کے وقت اس کی تلاوت کرنا۔ آیت الکرسی قرآن کریم کی سب سے عظیم آیت ہے۔ اس سے مراد یہ آیت ہے : ’’ اللہ (وہ ہے کہ) اس کے سوا کوئی معبود نہیں۔ وہ زندہ جاوید (اور) قائم ودائم ہے۔ اسے اونگھ آتی ہے نہ نیند۔ اسی کا ہے جو کچھ آسمانوں میں ہے اور جو کچھ زمین میں ہے۔ کون ہے وہ جو اس کے ہاں اس کی اجازت بغیر سفارش کرسکے؟ وہ جانتا ہے جو کچھ لوگوں کے سامنے ہے اور جو کچھ ان کے پیچھے ہے اور وہ اس کےعلم میں سے کسی چیز کا احاطہ نہیں کرسکتے، مگر جس قدر وہ خود چاہے۔ اس کی کرسی نے آسمانوں اور زمین کو گھیر رکھا ہے اور اسے ان دونوں کی حفاظت نہیں تھکاتی اور وہ بلند تر، نہایت عظمت والا ہے۔‘‘ [4] [4] سورۃ البقرۃ، آیت : 255۔
اسی طرح قل هو الله أحد[5] [5] سورة الإخلاص، آیت: 1۔
، قل أعوذ برب الفلق[6] [6] سورة الفلق، آیت: 1۔
اور قل أعوذ برب الناس[7]۔ ان تینوں سورتوں کو ہر فرض نماز کے بعد ایک ایک بار، صبح کے وقت نماز فجر کے بعد اور شام کے وقت نماز مغرب کے بعد اور سونے کے وقت تین تین بار پڑھنا۔ اسی طرح سورہ بقرہ کی آخری دو آیتیوں کو رات کی ابتدا میں پڑھنا۔ یہ دونوں آیتیں اس طرح ہیں : "رسول ایمان ﻻیا اس چیز پر جو اس کی طرف اللہ تعالیٰ کی جانب سے اتری اور مومن بھی ایمان ﻻئے۔ یہ سب اللہ تعالیٰ اور اس کے فرشتوں پر اور اس کی کتابوں پر اور اس کے رسولوں پر ایمان ﻻئے۔ اس کے رسولوں میں سے کسی میں ہم تفریق نہیں کرتے۔ انہوں نے کہہ دیا کہ ہم نے سنا اور اطاعت کی۔ ہم تیری بخشش طلب کرتے ہیں اے ہمارے رب! اور ہمیں تیری ہی طرف لوٹنا ہے۔"[8] سورہ کے اخیر تک۔ [8] سورۃ البقرۃ، آیت : 285۔ [7] سورة الناس، آیت : 1۔
نیز صحیح حدیث سےثابت ہے کہ رسول اللہ ﷺ کا ارشادِ گرامی ہے : "جو شخص رات کو سورہ بقرہ کی آخری دو آیتیں پڑھ لے، اسے یہ کافی ہو جاتی ہیں"۔ اس کے معنی یہ ہیں واللہ اعلم کہ یہ دونوں آیتيں ہر برائی سے (حفاظت کے لئے) کافی ہوجاتی ہیں۔ اسی طرح رات و دن اور کسی جگہ پر پڑاؤ ڈالتے وقت (اللہ کی پیدا کی ہوئی مخلوقات کے شر سے اللہ تعالی کے مکمل کلمات کی) پناہ طلب کرے۔ خواہ وہ جگہ عمارت ہو یا صحرا، فضا ہو یا سمندر۔ کیوں کہ نبی صلی اللہ علیہ وسلم کی حدیث ہے : "جو شخص کسی جگہ پڑاؤ ڈالے اور یہ دعا پڑھ لے : "أَعُوذُ بِكَلِمَاتِ اللهِ التَّامَّاتِ مِنْ شَرِّ مَا خَلَقَ" (میں اللہ کی پیدا کی ہوئی مخلوقات کے شر سے اللہ تعالیٰ کے مکمل کلمات کی پناہ مانگتا ہوں)، تو اُس کے وہاں سے کوچ کرنے تک اُسے کوئی چیز نقصان نہیں پہنچا سکتی۔" اسی طرح مسلمان کو چاہئے کہ صبح وشام تین دفعہ یہ دعا پڑھا کرے : "اللہ کا نام لے کر کام شروع کرتا ہوں، جس کے نام کے ساتھ کوئی چیز زمین اور آسمان میں نقصان نہیں پہنچا سکتی اور وہ سننے اور جاننے والا ہے۔" کیوں کہ رسول اللہ صلی اللہ علیہ وسلم سے ثابت ہے کہ آپ نے اس کی رغبت دلائی اور اس لئے بھی کہ یہ دعا ہر برائی سے محفوظ رہنے کا سبب ہے۔
یہ اذکار اور معوذات اگر سچے دل، خالص ایمان، اللہ پر بھروسہ اور ان الفاظ کے اندر شامل باتوں پر یقین کے ساتھ پڑھے جائيں، تو جادو کے برے اثرات کے ساتھ ساتھ دیگر شرور و فتن سے حفاظت کا ایک عظیم ترین سبب ہیں۔ ساتھ اگر تضرع الی اللہ کے ساتھ انھیں پڑھا جائے اور جادو کے برے اثرات سے چھٹکارا مانگی جائے، تو جادو کا اثر ہو جانے کے بعد بھی ان کے ذریعے اس سے چھٹکارا حاصل کی جا سکتی ہے۔ جادو وغیرہ سے لاحق ہونے والی بیماریوں کے علاج کے لئے نبی صلی اللہ علیہ وسلم سے جو دعائیں ثابت ہیں اور جن کے ذریعہ آپ صلی اللہ علیہ وسلم اپنے صحابہ کو دم کیا کرتے تھے، ان میں درج ذیل دعا بھی ہے : "اے اللہ! اے لوگوں کے رب! پریشانی دورکردے اور شفا عطا فرما۔ تو ہی شفا دینے والا ہے۔ تیرے سوا کوئی شفا دینے والا نہیں ہے۔ ایسی شفا عطا کر، جو بیماری کو باقی نہ چھوڑے۔" اس دعا کو تین بار پڑھا جائے۔ اسی طرح اس دعا کو پڑھ کر دم کیا جائے، جسے پڑھ کو جبریل نے اللہ کے نبی کو دم کیا تھا۔ وہ دعا اس طرح ہے : "اللہ کے نام سے میں آپ پر دم کرتا ہوں ہر اس چیز سے جو آپ کو اذیت پہنچائے اور ہر جان دار اور حسد کرنے والی نگاہ کے شر سے (حفاظت کے لئے)۔ اللہ آپ کو شفا دے۔ میں اللہ کے نام سے آپ پر دم کرتا ہوں"۔ اس دعا کو تین بار دوہرانا چاہئے۔
جب کسی پر جادو ہو جائے یا کسی کو جادو کے ذریعے بیوی سے ہم بستری سے روک دیا جائے، تو اس کا ایک کارگر علاج یہ ہے کہ بیری کے سات ہرے پتے لیے جائيں، انھیں پتھر وغیرہ سے کوٹ کر ایک برتن میں ڈال دیا جائے، پھر اس میں اتنا پانی ڈال دیا جائے، جو غسل کے لیے کافی ہو اور اس پر آیت الکرسی ، {قل يا أيها الكافرون}[9] ، {قل هو الله أحد} [10] {قل أعوذ برب الفلق} [11] ، {قل أعوذ برب الفلق} [11]، سورہ اعراف کی جادو کے بیان پر مشتمل درج ذیل آیتوں : "اور ہم نے موسی (علیہ السلام) کو حکم دیا کہ اپنا عصا ڈال دیجئے! سو عصا کا ڈالنا تھا کہ اس نے ان کے سارے بنے بنائے کھیل کو نگلنا شروع کیا۔ پس حق ظاہر ہوگیا اور انہوں نے جو کچھ بنایا تھا سب جاتا رہا۔ پس وہ لوگ اس موقع پر ہار گئے اور خوب ذلیل ہوکر پھرے"۔[13] سورہ یونس کی درج ذیل آیتوں : "اور فرعون نے کہا کہ میرے پاس تمام ماہر جادوگروں کو حاضر کرو۔ پھر جب جادو گر آئے، تو موسی (علیہ السلام) نے ان سے کہا کہ ڈالو جو کچھ تم ڈالنے والے ہو۔ سو جب انہوں نے ڈال دیا، تو موسی (علیہ السلام) نے فرمایا کہ جو کچھ تم لائے ہو، وہ جادو ہے۔ یقینی بات ہے کہ اللہ اس کو ابھی درہم برہم کیے دیتا ہے۔ اللہ ایسے فسادیوں کا کام بننے نہیں دیتا اور اللہ تعالی حق کو اپنے فرمان سے ثابت کردیتا ہے، گو مجرم کیسا ہی ناگوار سمجھیں"۔ اور سورہ طہ کی درج ذیل آیتوں کو پڑھے : "کہنے لگا کہ اے موسی! یا تو تو پہلے ڈال یا ہم پہلے ڈالنے والے بن جائیں۔ جواب دیا کہ نہیں تم ہی پہلے ڈالو۔ اب تو موسی (علیہ السلام) کو یہ خیال گزرنے لگا کہ ان کی رسیاں اور لکڑیاں ان کے جادو کے زور سے دوڑ بھاگ رہی ہیں۔ پس موسی (علیہ السلام) نے اپنے دل ہی میں ڈر محسوس کیا۔ ہم نے فرمایا کہ کچھ خوف نہ کر، یقینا تو ہی غالب اور بر تر رہے گا اور تیرے دائیں ہاتھ میں جو ہے، اسے ڈال دے کہ ان کی تمام کاریگری کو وہ نگل جائے۔ انہوں نے جو کچھ بنایا ہے، وہ صرف جادو گروں کے کرتب ہیں اور جادوگر کہیں سے بھی آئے کامیاب نہیں ہوتا"۔ [9] سورة الکافرون، آیت: 1- [10] سورة الإخلاص، آیت: 1- [11] سورة الفلق، آیت: 1- [12] سورة الناس، آیت: 1- [13] سورہ الأعراف، آیت : 117-119۔ [14] سورة يونس، آیت : 79-82۔ [15] سورة طه ، آیت : 65-69۔
مذکورہ آیتوں کو پانی میں پڑھنے کے بعد تین چلو پانی پی لے اور باقی پانی سے غسل کر لے۔ اس طرح بیماری دور ہوجائے گی۔ ان شاء اللہ۔ بیماری دور ہونے تک دو یا اس سے زائد مرتبہ بھی پانی استعمال کرنے کی ضرورت پڑے، تو اس میں کوئی حرج نہیں ہے۔
رہی بات جادگروں کے عمل سے جادو کا علاج کرنے کی، جو کہ جانور ذبح کر کے یا دوسری عبادتوں کے ذریعہ جنوں کا تقرب حاصل کرکے انجام دیا جاتا ہے، تو یہ جائز نہیں ہے۔ کیوں کہ یہ شیطانی عمل، بلکہ شرک اکبر ہے۔ چنانچہ اس سے بچنا واجب ہے۔ اسی طرح کاہنوں، نجومیوں اور شعبدہ بازوں سے اس کا علاج کرانا اور ان کی بتائی ہوئی ترکیب اپنانا جائز نہیں ہے۔ کیوں کہ وہ ایمان کی دولت سے خالی اور جھوٹے و فاجر ہوا کرتے ہیں، جو علم غیب کا دعوی کرتے اور لوگوں کو شبہات میں مبتلا کرتے ہیں۔ رسول صلی اللہ علیہ وسلم نے ان کے پاس جانے، ان سے سوال کرنے اور ان کی باتوں کی تصدیق کرنے سے منع فرمایا ہے، جیسا کہ اس کتاب کے آغاز میں وضاحت کے ساتھ بیان کیا جا چکا ہے۔ نبی صلی اللہ علیہ وسلم سے ثابت ہے کہ جب آپ سے (نُشرہ) کے تعلق سے دریافت کیا گیا، تو آپ نے فرمایا : "یہ شیطانی عمل ہے۔" اسے امام احمد اور ابوداود نے جید سند سے روایت کیا ہے۔ نشرہ کا مطلب ہے جس شخص کو جادو کیا گیا ہو، اس سے جادو کے اثر کو زائل کرنا۔ نبی صلی اللہ علیہ وسلم کی مذکورہ حدیث سے مراد نشرہ کا وہ طریقہ ہے، جسے اہل جاہلیت انجام دیا کرتے تھے۔ وہ یہ ہے کہ جادوکرنے والے سے کہا جائے کہ وہ جادو کو دور کرے یا پھر کسی دوسرے جادوگر کے ذریعہ جادو ہی کے توسط سے اسے دور کیا جائے۔
رہی بات رقیہ، شرعی معوذات اور مباح دواؤں سے اس کا علاج کرنے کی، تو اس میں بھی کوئی حرج نہیں ہے، جیسا کہ پیچھے بیان کیا جا چکا ہے۔ علامہ ابن قیم اور شیخ عبد الرحمن بن حسن رحمہما اللہ نے فتح المجید میں واضح طور پر یہ بات بیان کی ہے اور دیگر علما نے اسے بیان کیا ہے۔
اللہ سے دعا ہے کہ مسلمانوں کو ہر طرح کی برائی سے بچنے کے توفیق عطا کرے، ان کے دین کی حفاظت فرمائے، انہیں دین کی سمجھ بوجھ عطا کرے اور ہر اس عمل سے انہیں بچائے جو اللہ کی شریعت کے مخالف ہو۔ اللہ تعالی اپنے بندہ و رسول محمد اور آپ کے آل و اصحاب پر دورد و سلام نازل فرمائے۔
بیوی کا شوہر پر جادو کرنا [16]
[16] یہ جواب سماحۃ الشیخ کی آفس سے مورخہ ۹/۱۱/۱۳۸۷ھ کو صادر ہوا ہے۔
مجھے آپ کا ۔۔۔۔ کو لکھا ہوا مکتوب ملا۔ اللہ آپ کو اپنی ہدایت سے بہرہ ور فرمائے۔ اس مکتوب میں آپ نے بتایا ہے کہ جب آپ نے اپنی نئى اہلیہ سے ہم بستری کرنا چاہا، تو آپ کو کیا پریشانی لاحق ہوئى۔ نیز یہ کہ آپ (فلاں) شیخ کے پاس گئے اور اس نے آپ کو (فلاں) فتوی دیا۔ ساتھ ہی یہ کہ آپ کی پرانی بیوی نے ایسا جادو کر دیا ہے، جو نئی بیوی سے ہم بستری میں رکاوٹ بن رہا ہے۔ پھر آپ نے اس کا حکم بھی دریافت کیا ہے۔ "جو شخص رات میں آیۃ الکرسی کی تلاوت کر لے، اللہ کی طرف سے اس کے لئے ایک محافظ مقرر رہتا ہے اور صبح تک شیطان اس کے قریب نہیں پھٹکتا۔" ایک دوسری حدیث میں ہے کہ رسول اللہ ﷺ نے ارشاد فرمایا ہے :
اس کا جواب یہ ہے کہ اگر پہلی بیوی اس کا اقرار کر لے یا دلیل سے یہ ثابت ہو جائے، تو اس نے واقعی ایک بڑا منکر، بلکہ کفر اور گمراہی پر مبنی کام کیا ہے۔ کیوں کہ اس کا یہ عمل جادو ہے، جو حرام ہے اور جسے کرنے والا کافر ہے، جیسا کہ اللہ تعالی نے فرمایا ہے : "اور اس چیز کے پیچھے لگ گئے جسے شیاطین (حضرت) سلیمان کی حکومت میں پڑھتے تھے۔ سلیمان نے تو کفر نہ کیا تھا، بلکہ یہ کفر شیطانوں کا تھا، وه لوگوں کو جادو سکھایا کرتے تھے، اور بابل میں ہاروت ماروت دو فرشتوں پرجو اتارا گیا تھا۔ وه دونوں بھی کسی شخص کو اس وقت تک نہیں سکھاتے تھے، جب تک یہ نہ کہہ دیں کہ ہم تو ایک آزمائش ہیں، تو کفر نہ کر۔ پھر لوگ ان سے وه سیکھتے، جس سے خاوند وبیوی میں جدائی ڈال دیں اور دراصل وه بغیر اللہ تعالیٰ کی مرضی کے کسی کو کوئی نقصان نہیں پہنچا سکتے۔ یہ لوگ وه سیکھتے ہیں، جو انہیں نقصان پہنچائے اور نفع نہ پہنچا سکے۔ اور وه بالیقین جانتے ہیں کہ اس کے لینے والے کا آخرت میں کوئی حصہ نہیں۔ اور وه بدترین چیز ہے جس کے بدلے وه اپنے آپ کو فروخت کر رہے ہیں۔ کاش کہ یہ جانتے ہوتے۔"[17] یہ آیت کریمہ اس بات پر دلالت کرتی ہے کہ جادو کفر ہے، جادوگر کافر ہے، جادو کرنے والے ایسا علم سیکھتے ہیں جو انہیں نفع نہیں پہنچاتا، بلکہ نقصان پہنچاتا ہے۔ ان کا ایک مقصد یہ ہوتا ہے کہ میاں بیوی میں جدائی ڈالی جائے۔ ان کے لئے قیامت کے دن اللہ کے پاس کوئی حصہ نہ ہوگا- یعنی ان کے لئے نجات کا کوئی راستہ نہ ہوگا- صحیح حدیث میں رسول اللہ ﷺ سے ثابت ہے کہ آپ نے ارشاد فرمایا : "سات ہلاک کرنے والی چیزوں سے دور رہو"۔ دریافت کیا گیا : اے اللہ کے رسول! وہ کیا چیزیں ہیں؟ آپ نے فرمایا : "اللہ کے ساتھ شرک کرنا، جادو کرنا، اللہ کے حرام کردہ نفس کو ناحق قتل کرنا، سود خوری، یتیم کا مال کھانا، دشمن سے مڈبھیڑ کے دن پیٹھ دکھانا اور گناہ سے ان جان، پاک دامن، مومن عورتوں پر تہمت لگانا"۔ [17] سورۃ البقرۃ، آیت : 102۔
رہی بات اس شیخ کی جس نے آپ کو دوا دی، تو بظاہر یہ لگتا ہے کہ وہ بھی آپ کى پرانى عورت ہی کی طرح جادوگر ہے۔ کیوں کہ جادو کے اعمال سے صرف جادوگر ہی واقف ہوتے ہیں۔ وہ بھی ان نجومیوں اور کاہنوں میں سے ہے، جو بہت سے معاملات میں غیبی علم کا دعوی کرنے میں مشہور ہوتے ہیں۔ ہر مسلمان پر واجب ہے کہ ان سے ہوشیار رہے اور غیبی امور کے دعوی میں ان کی تصدیق نہ کرے۔ کیوں کہ نبی صلی اللہ علیہ وسلم کی حدیث ہے : "جو شخص عراف کے پاس جائے اور اُس سے غیب کی بات پوچھے، چالیس راتوں تک اُس کی نماز قبول نہیں ہوتی"۔
اس حدیث کو مسلم نے اپنی صحیح میں روایت کیا ہے۔ نبی صلی اللہ علیہ وسلم کا ایک اور ارشاد گرامی ہے : "جو شخص کسی نجومی یا کاہن کے پاس گیا اور اس کی بتائی ہوئی باتوں کی تصدیق کی، اُس نے اس دین کا انکار کیا جو محمد ﷺ پر اتارا گیا ہے"۔
جادو کا ایک مفید ترین علاج یہ بھی ہے کہ جادو کی جگہ کو جاننے کی کوشش کی جائے کہ وہ زمین کے اندر ہے یا پہاڑ وغیرہ پر۔ جب جگہ معلوم ہو جائے اور اسے نکال کر تلف کردیا جائے، تو جادو بے کار ہوجاتا ہے۔ لہذا آپ پر واجب ہے کہ اپنے عمل سے توبہ اور اس پر شرمندگی کا اظہار کریں، ہیئۃ کے صدر اور عدلیہ کے صدر کو مذکورہ شیخ اور اپنی پرانی بیوی کے بارے میں بتادیں، تاکہ عدلیہ اور ہیئہ انہیں اس عمل سے باز رکھنے کے سلسلے میں کاروائی کریں۔ آگے آپ کے ساتھ اس طرح کا واقعہ پیش آئے، تو علمائے شریعت سے اس کے بارے میں دریافت کریں، تاکہ وہ اس کا شرعی علاج بتائیں۔ اللہ تعالی ہمیں اور آپ کو دین کی بصیرت، اس پر ثابت قدمی عطا کرے اور اس کی خلاف ورزی سے محفوظ رکھے۔ یقینا وہ سخی و کرم فرما ہے۔
یہ ان امور کا بیان تھا جن کے ذریعہ جادو سے بچا جا سکتا اور اس کا علاج کیا جا سکتا ہے۔ اللہ ہی توفیق دینے والا ہے۔ والسلام علیکم و رحمۃ اللہ و برکاتہ
جادو گروں اور شعبدہ بازوں سے کچھ پوچھنے کا حکم [18]
[18] یہ سوالات و جوابات (نور على الدرب) پروگرام سے ماخوذ ہیں۔
سوال : بھائی ص ع ب ریاض سے دریافت کرتے ہیں : یمن کے بعض علاقوں میں کچھ لوگ رہتے ہیں، جنہیں (سادہ) کے نام سے جانا جاتا ہے۔ یہ لوگ دین منافی اعمال، جیسے شعبدہ بازی وغیرہ انجام دیتے ہیں اور دعوی کرتے ہیں کہ لوگوں کو سخت ترین بیماریوں سے بھی شفا دے سکتے ہیں۔ اس کی دلیل کے طور پر اپنے آپ پر تلواروں سے وار کرتے ہیں یا اپنی زبان کاٹ کر پھر سے اسے درست کر لیتے ہیں اور انہیں کوئی تکلیف بھی نہیں ہوتی۔ ان میں سے کچھ لوگ نماز بھی پڑھتے ہیں اور کچھ لوگ نہیں بھی پڑھتے۔ اسی طرح یہ لوگ دوسرے قبیلہ سے اپنی شادی تو جائز ٹھہراتے ہیں، لیکن کسی اور کے لئے اپنے قبیلہ سے شادی کرنا جائز نہیں ٹھہراتے۔ جب بیماروں کے لئے دعا کرتے ہیں، تو کہتے ہیں: (اے اللہ! اے فلاں!) اس طرح اپنے اجداد میں سے بھی کسی کا نام لے لیتے ہیں۔
پرانے زمانے میں لوگ انہیں بڑا مقام و مرتبہ دیتے، غیر معمولی انسان شمار کرتے اور یہ مانتے تھے کہ وہ اللہ کے مقرب بندے ہیں، بلکہ انہیں اللہ والے کہہ کر پکارتے تھے۔ البتہ موجودہ زمانے میں ان کے تعلق سے لوگوں کے خیالات مختلف قسم کے ہیں۔ کچھ لوگ ان کی مخالفت کرتے ہیں، جو کہ نوجوانوں اور طلبہ کی جماعت ہے۔ جبکہ کچھ لوگ اب بھی ان سے عقیدت رکھتے ہیں، جوکہ عمر رسیدہ اور نا خواندہ لوگ ہیں۔ امید کرتے ہیں کہ آں جناب اس موضوع کی حقیقت بیان کریں گے۔
جواب: یہ اور ان جیسے لوگ ان صوفیوں میں سے ہیں، جو منکر اور باطل اعمال انجام دیتے ہیں۔ یہ لوگ ان عرافین میں شامل ہیں، جن کے تعلق سے نبی صلی اللہ علیہ وسلم نے فرمایا ہے : "جو شخص نجومی کے پاس جائے اور اُس سے غیب کی بات پوچھے، چالیس دنوں تک اُس کی نماز قبول نہیں ہوتی"۔ یہ اس لئے کہ وہ مختلف طرح کا جادو کر کے علم غیب کا دعوی کرتے، جنوں کی خدمت کرتے، ان کی عبادت بجا لاتے اور لوگوں کو شبہات میں مبتلا کرتے ہیں۔ جب کہ جادو کے بارے میں اللہ تعالی نے موسی اور فرعون کے قصہ میں فرمایا ہے : "(موسیٰ علیہ السلام) نے فرمایا کہ تم ہی ڈالو۔ پس جب انہوں نے ڈا دیا، تو لوگوں کی نظر بندی کر دی اور ان پر ہیبت غالب کر دی اور ایک طرح کا بڑا جادو دکھلایا"۔[19] اس لئے اس حدیث کی روشنی میں ان کے پاس جانا اور ان سے کچھ پوچھنا جائز نہیں ہے۔ اسی طرح آپ صلی اللہ علیہ وسلم نے فرمایا ہے : "جو کسی کاہن کے پاس گیا اور اس کی کہی ہوئی بات کی تصدیق کی، اس نے اس دین کا انکار کیا جو محمد ﷺ پر نازل کیا گیا ہے"۔ نیز دوسرے الفاظ میں آپ صلی اللہ علیہ وسلم نے فرمایا ہے : "جو شخص کسی نجومی یا کاہن کے پاس گیا اور اس کی بتائی ہوئی باتوں کی تصدیق کی، اُس نے اس دین کا انکار کیا جو محمد ﷺ پر اتارا گیا ہے"۔ [19] سورہ الأعراف، آیت : 116۔
عبد العزیز بن عبد اللہ بن باز کی جانب سے برادر محترم ... کی خدمت میں۔ السلام علیکم ورحمۃ اللہ وبرکاتہ حمد و صلاۃ کے بعد : رہی بات ان کا غیر اللہ کو پکارنے یا غیر اللہ سے مدد طلب کرنے کی یا ان کے اس دعوی کی کہ ان کے آبا و اجداد کائنات میں تصرف کرتے ہیں، بیماروں کو شفا دیتے ہیں یا اس دنیا سے فوت یا غائب ہونے کے باوجود دعا قبول کرتے ہیں، تو یہ سب کے سب اللہ کے ساتھ کفر اور شرک اکبر ہے۔ لہذا ان کی نکیر کرنا واجب ہے۔ ان کے پاس جانا، ان سے کچھ دریافت کرنا اور ان کی تصدیق کرنا بالکل جائز نہیں۔ کیوں کہ ان کے ان اعمال میں کاہنوں، نجومیوں اور ان مشرکین کے اعمال یک جا ہو گئے ہيں، جو غیراللہ، جیسے جنوں اور مردوں کو پکارتے، ان سے مدد طلب کرتے اور اس بات کا دعوی کرتے ہیں کہ وہ ان کے آبا و اجداد یا ایسے لوگ ہیں جن کے بارے میں وہ ولایت اور کرامت کا عقیدہ رکھتے ہیں۔ یہ سارے اعمال شعبدہ بازی، کہانت اور علم نجوم سے متعلق ہیں، جن کی شریعت مطہرہ میں نکیر آئی ہے۔
جہاں تک ان کے منکر اعمال کی بات ہے کہ وہ اپنے جسم پر خنجر زنی کرتے یا اپنی زبانیں کاٹتے ہیں، تو (جان رکھیں کہ) یہ سب لوگوں کو فریب میں ڈالنے کے کرتب ہیں۔ یہ سب اس حرام جادو کی قسمیں ہیں، جس کی حرمت و ممانعت کتاب و سنت کے نصوص میں آئی ہے۔ اس لئے عقل مند انسان کو اس سے دھوکا نہیں کھانا چاہئے۔ یہ اسی قبیل سے ہے، جس کے بارے میں اللہ پاک و برتر نے فرعون کے جادو گروں کے متعلق فرمایا ہے : "اب تو موسی (علیہ السلام) کو یہ خیال گزرنے لگا کہ ان کی رسیاں اور لکڑیاں ان کے جادو کے زور سے دوڑ بھاگ رہی ہیں"۔[20] معلوم ہوا کہ ان لوگوں نے جادوگری، شعبدہ بازی، کہانت، علم نجوم اور شرک اکبر، غیر اللہ سے مدد طلبی اور علم غیب اور کائنات میں تصرف کا دعوی جیسے اعمال کو یک جا کر لیا ہے۔ یہ شرک اکبر اور واضح کفر کی مختلف قسمیں ہیں اور شعبدہ بازی کے وہ اعمال ہیں، جنہیں اللہ نے حرام ٹھہرایا ہے۔ نیز اس علم غیب کا دعوی ہے جسے اللہ کے سوا کوئی نہیں جانتا، جیسا کہ اللہ پاک کا فرمان ہے : ”کہہ دیجئے کہ آسمانوں والوں میں سے اور زمین والوں میں سے سوائے اللہ کے کوئی غیب نہیں جانتا۔" [21] اس لیے ان کے احوال سے واقف تمام مسلمانوں پر واجب ہے کہ ان کی نکیر کریں، ان کی بد اعمالیوں کو بیان کریں اور اگر وہ اسلامی حکومت کے ماتحت رہتے ہوں، تو ان کے خلاف حکام تک بات پہنجائیں، تاکہ شریعت میں ان کے لیے جو سزا مقرر کی گئی ہے، اسے ان پر نافذ کیا جائے، تاکہ ان کے شر کا خاتمہ ہو سکے اور مسلمانوں کو ان کے باطل افکار اور ان کی دسیسہ کاریوں سے محفوظ رکھا جا سکے۔ [21] سورۃ النمل، آیت : 65۔ [20] سورۃ طہ آيت : 66-
اللہ ہی توفیق دینے والا ہے۔
جنوں کی خدمت لے کر علاج کرنے والے عوامی معالج سے علاج کرانے کا حکم [40]
[40] [«مجموع فتاوى ومقالات متنوعة» لابن باز (5/ 418-420)]
سوال : کچھ لوگ ہیں، جو کہتے ہیں کہ وہ جڑی بوٹی سے علاج کرتے ہیں۔ جب میں ان کے پاس گیا، تو انہوں نے کہا : اپنا اور اپنی والدہ کا نام لکھ دو۔ پھر دوسرے دن ہمارے پاس آؤ۔ جب دوسرے دن ان کے پاس جایا جاتا ہے، تو وہ کہتے ہیں : تم کو فلاں فلاں بیماری ہے اور اس کا علاج یہ اور یہ ہے... ان میں سے ایک نے کہا کہ وہ علاج کے لیے کلام الہی کا استعمال کرتا ہے۔ ایسے لوگوں کے بارے میں آپ کی کیا رائے ہے؟ ان کے پاس جانے کا کیا حکم ہے؟ س ع غ۔ حائل۔
جواب : جو شخص علاج کا یہ طریقہ اختیار کرتا ہے، اس کا یہ طریقہ اس بات کی دلیل ہے کہ وہ جن کا استعمال کرتا اور علم غیب کا دعوی کرتا ہے۔ اس لیے اس سے علاج کرانا جائز نہیں ہے۔ اسی طرح اس کے پاس جانا اور اس سے کچھ دریافت کرنا بھی جائز نہیں ہے۔ کیوں کہ اللہ کے نبی صلی اللہ علیہ وسلم نے اس قسم کے لوگوں کے بارے میں ارشاد فرمایا ہے : "جو شخص عراف کے پاس جائے اور اُس سے غیب کی بات پوچھے، چالیس راتوں تک اُس کی نماز قبول نہیں ہوتی"۔ اسے امام مسلم نے اپنی صحیح میں روایت کیا ہے۔
مختلف احادیث میں نبی صلی اللہ علیہ وسلم سے ثابت ہے کہ آپ نے کاہنوں، نجومیوں اور جادوگروں کے پاس جانے، ان سے کچھ پوچھنے اور ان کی تصدیق کرنے سے منع فرمایا ہے۔ نبی صلی اللہ علیہ وسلم کی حدیث گرامی ہے : "جو کسی کاہن کے پاس گیا اور اس کی کہی ہوئی بات کی تصدیق کی، اس نے اس دین کا انکار کیا جو محمد ﷺ پر نازل کیا گیا ہے"۔ ہر وہ شخص جو علمِ غیب کا دعوی کرے، بایں طور کہ کنکر یا کوڑی پھینکے، زمین پر لکیریں کھینچے یا مریض کا نام اور اس کی والدہ اور رشتہ داروں کا نام پوچھے، تو یہ سب اس بات کی دلیل ہے کہ وہ عراف اور کاہن ہے، جس سے کچھ پوچھنے اور اس کی تصدیق کرنے سے نبی صلی اللہ علیہ وسلم نے منع فرمایا ہے۔
چنانچہ واجب ہے کہ ان سے بچا جائے، ان سے کچھ پوچھا نہ جائے اور ان سے علاج نہ کرایا جائے، اگرچہ وہ قرآن سے علاج کرنے کا ہی دعوی کیوں نہ کریں۔ کیوں کہ باطل پرستوں کا یہ طرہ امتیاز ہے کہ وہ فریب کاری اور دھوکے بازی کرتے ہیں۔ اس لئے ان کی باتوں کی تصدیق کرنا جائز نہیں ہے۔ جو شخص ان میں سے کسی کے بارے میں جانتا ہو، اس پر واجب ہے کہ اس کا معاملہ ذمہ داروں، جیسے قاضیوں، حاکموں اور ہر شہر میں قائم کمیٹی برائے امر بالمعروف والنہی عن المنکر کے دفاتر، تک پہنچائے، تاکہ ان پر اللہ کا حکم نافذ کیا جا سکے اور مسلمان ان کے شر و فساد سے اور ان کے باطل طریقے سے لوگوں کا مال کھانے سے محفوظ رہیں۔
ہم اللہ ہی سے مدد طلب کرتے ہیں۔ گناہوں سے بچنے کی توفیق اور نیکی کرنے کی قوت اللہ ہی سے ملتی ہے۔
جادو کی شرعی دوا [22]
[22] ماخوذ از نور على الدرب پروگرام، کیسٹ نمبر : 53۔
سوال : میں نے ایک عالم سے سنا ہے کہ جس شخص کو لگے کہ اس پر جادو کیا گیا ہے، وہ بیری کے سات پتے لے، انھیں ایک بالٹی پانے میں ڈالے، اس پر سورہ اخلاص، سورہ فلق، سورہ ناس، آیۃ الکرسی، سورہ {قل يا أيها الكافرون}، آیت کریمہ : {وما أنزل على الملكين ببابل هاروت وماروت}[23] اور سورۃ الفاتحہ پڑھے۔ میں جاننا یہ چاہتا ہوں کہ یہ بات کس حد تک سچی ہے؟ جس شخص کو لگے کہ اس پر جادو کیا گیا ہے، تو اسے کیا کرنا چاہیے؟ اس سلسلے میں ہمیں رہنمائی کریں۔ اللہ آپ کو بہتر بدلہ عنایت کرے۔ [23] سورۃ البقرۃ، آیت : 102۔
جواب : اس میں کوئی شک نہیں کہ جادو کا وجود ہے۔ کچھ جادو تخیل اور تصور سے عبارت ہوتا ہے اور جادو اللہ عزیز و برتر کے حکم سے واقع ہوتا اور اثر ڈالتا ہے، جیسا کہ اللہ پاک وبرتر نے جادوگروں کے تعلق سے فرمایا ہے : "اور وہ اس چیز کے پیچھے لگ گئے، جسے شیاطین (حضرت) سلیمان کی حکومت میں پڑھتے تھے۔ سلیمان نے تو کفر نہ کیا تھا، بلکہ یہ کفر شیطانوں کا تھا۔ وه لوگوں کو جادو سکھایا کرتے تھے اور بابل میں ہاروت ماروت دو فرشتوں پرجو اتارا گیا تھا وه دونوں بھی کسی شخص کو اس وقت تک نہیں سکھاتے تھے" وه دونوں یعنی : دونوں فرشتے۔ " جب تک یہ نہ کہہ دیں کہ ہم تو ایک آزمائش ہیں، تو کفر نہ کر۔ پھر لوگ ان سے وه سیکھتے جس سے خاوند و بیوی میں جدائی ڈال دیں اور در اصل وه بغیر اللہ تعالیٰ کی مرضی کے کسی کو کوئی نقصان نہیں پہنچا سکتے"۔[24] معلوم ہوا کہ جادو کی تاثیر ہوتی ہے۔ لیکن اللہ کی کونی اور تقدیری اجازت سے کام کرتی ہے۔ کیوں کہ کائنات کی ہر چیز اللہ پاک و برتر کی تقدیر اور قضا سے ہی واقع ہوتی ہے۔ لیکن (یاد رکھنا چاہئے کہ) جادو کا علاج اور اس کی دوا بھی موجود ہے۔ نبی صلی اللہ علیہ وسلم کو بھی جادو ہوگیا تھا، لیکن اللہ تعالی نے آپ کو اس سے نجات بخشی اور اس کے شر سے آپ کو عافیت دی۔ صحابہ کرام کو جادوگر کا کیا ہوا جادو مل گیا۔ چنانچہ اسے نکال کر تلف کر دیا گیا۔ اس طرح اللہ نے اپنے نبی علیہ الصلاۃ والسلام کو اس سے شفایاب فرمایا۔ لہذا جب جادو کی ہوئی چيزیں، جیسے گرہ لگائے ہوئے دھاگے اور آپس سے جڑی ہوئی کانٹیاں وغیرہ مل جائيں، تو انھیں تلف کر دے۔ کیوں کہ جادو گروں کا طریقہ یہ ہے کہ وہ اپنے خبیث مقاصد کی تکمیل کے لیے پھونک مار کر گرہ لگاتے ہيں۔ ایسے میں کبھی ان کے مقاصد اذن الہی سے پورے ہو جاتے ہیں اور کبھی نہیں بھی ہوتے۔ کیوں کہ ہمارا پاک پروردگار ہر چیز پر قادر ہے۔ کبھی کبھی جادو کا علاج تلاوت قرآن سے بھی ہوتا ہے۔ تلاوت ہوش و حواس میں ہونے کی صورت میں خود جادو سے متاثرہ شخص ہی کرے، یا کوئی اور کر کے اس کے سینے یا جسم کے کسی اور عضو میں پھونک دے۔ ساتھ ہی اس پر سورۃ الفاتحہ، آیۃ الکرسی، قل ھو اللہ احد، معوذتین اور سورۃ الاعراف، سورۃ یونس اور سورۃ طہ کی جادو سے تعلق رکھنے والی آیتیں پڑھے۔ سورۃ الاعراف کی آیتیں حسب ذیل ہیں : "اور ہم نے موسی کو حکم دیا کہ اپنا عصا ڈال دے! سو عصا کا ڈالنا تھا کہ اس نے ان کے سارے بنے بنائے کھیل کو نگلنا شروع کیا۔ پس حق ظاہر ہوگیا اور انہوں نے جو کچھ بنایا تھا, سب جاتا رہا۔ پس وہ لوگ اس موقع پر ہار گئے اور خوب ذلیل ہوکر پھرے"۔[25] سورہ یونس کی آیت سے مراد اللہ پاک کا یہ فرمان ہے : "اور فرعون نے کہا کہ میرے پاس تمام ماہر جادوگروں کو حاضر کرو۔ پھر جب جادو گر آئے تو موسی نے ان سے کہا کہ ڈالو جو کچھ تم ڈالنے والے ہو۔ سو جب انہوں نے ڈال دیا، تو موسی نے کہا کہ جو کچھ تم لائے ہو وہ جادو ہے۔ یقینی بات ہے کہ اللہ اس کو ابھی درہم برہم کیے دیتا ہے۔ اللہ ایسے فسادیوں کا کام بننے نہیں دیتا اور اللہ تعالی حق کو اپنے فرمان سے ثابت کردیتا ہے، گو مجرم کیسا ہی ناگوار سمجھیں"۔[26] اور سورۃ طہ کی آیت سے مراد اللہ پاک کا یہ فرمان ہے : "کہنے لگا کہ اے موسی! یا تو تو پہلے ڈال یا ہم پہلے ڈالنے والے بن جائیں۔ جواب دیا کہ نہیں تم ہی پہلے ڈالو۔ اب تو موسی (علیہ السلام) کو یہ خیال گزرنے لگا کہ ان کی رسیاں اور لکڑیاں ان کے جادو کے زور سے دوڑ بھاگ رہی ہیں۔ پس موسی (علیہ السلام) نے اپنے دل ہی میں ڈر محسوس کیا۔ ہم نے فرمایا کہ کچھ خوف نہ کر، یقینا تو ہی غالب اور بر تر رہے گا اور تیرے دائیں ہاتھ میں جو ہے، اسے ڈال دے کہ ان کی تمام کاریگری کو وہ نگل جائے۔ انہوں نے جو کچھ بنایا ہے، وہ صرف جادو گروں کے کرتب ہیں اور جادوگر کہیں سے بھی آئے کامیاب نہیں ہوتا"۔[27] اسی طرح {قل يا أيها الكافرون} آخر تک، سورہ {قل هو الله أحد} ، {قل أعوذ برب الفلق} اور {قل أعوذ برب الناس} افضل یہ ہے کہ سورہ قل ھو اللہ أحد اور معوذتین کو تین تین دفعہ پڑھے۔ پھر شفا کی دعا کرتے ہوئے کہے : "اے اللہ! اے لوگوں کے رب! پریشانی دورکردے اور شفا عطا فرما۔ تو ہی شفا دینے والا ہے۔ تیرے سوا کوئی شفا دینے والا نہیں ہے۔ ایسی شفا عطا کر، جو بیماری کو باقی نہ چھوڑے۔" اس دعا کو تین بار پڑھے۔ اسی طرح یہ دعا پڑھ کر بھی رقیہ کرے : ’’میں آپ پر اللہ کے نام سے دم کرتا ہوں، آپ کو تکلیف دینے والی ہر چیز سے، ہرجان یا آنکھ یاحاسد کےشر سے، اللہ آپ کو شفا دے۔ میں آپ پراللہ کےنام سے دم کرتا ہوں۔‘‘ تین دفعہ یہ دعا پڑھے اور شفا اور عافیت کی دعا کرے۔ اگر اپنے رقیہ میں یہ دعا بھی تین مرتبہ پڑھ لے، تو بہتر ہے : "أعيذك بكلمات الله التامات من شر ما خلق"۔ (میں تجھے مخلوق کے شر سے اللہ کے مکمل کلمات کی پناہ میں دیتا ہوں۔) [27] سورۃ طہ، آيت : 65، 69۔ [26] سورة يونس، آیت : 79-82۔ [25] سورہ الأعراف، آیت : 117-119۔ [24] سورۃ البقرۃ، آیت : 102۔
یہ ساری دوا مفید اور کارگر ہے۔ اگر اس رقیہ اور دعا کو پانی میں پڑھا جائے، پھر سحر زدہ شخص اس میں سے کچھ پانی پی لے اور باقی سے غسل کرلے، تو ان شاء اللہ اس کے ذریعہ شفا وعافیت ملے گی۔ اگر پانی میں سبز بیری کے سات پتے کوٹ کر ڈال دے، تو یہ بھی شفایابی کی وجہ ثابت ہوگا۔ اس کا تجربہ بہت دفعہ کیا گیا اور اللہ نے اس کے ذریعہ فائدہ پہنچایا ہے۔ ہم نے بہت سے لوگوں کے ساتھ یہ طریقہ اپنایا، تو اللہ نے انہیں اس سے فائدہ پہنچایا۔ معلوم ہوا کہ سحر زدہ شخص کے لئے یہ ایک مفید اور کارگر دوا ہے۔ یہ دوا اس شخص کے لئے بھی نفع بخش ہے جسے اپنی بیوی سے روک دیا گیا ہو۔کیوں کہ کچھ لوگ بعض دفعہ اپنی بیوی سے روک دیئے جاتے ہیں، جس کی وجہ سے وہ ہمبستری نہیں کرپاتے۔ لیکن اگر اس رقیہ اور دعا کو بروئے کار لائيں، تو ان شاء اللہ انہیں فائدہ ہوگا۔ خواہ وہ خود ان دعاؤں کو اپنے اوپر پڑھے یا کوئی اور اس پر پڑھے یا پانی میں پڑھے اور وہ اس سے کچھ پی لے اور باقی سے غسل کرلے- یہ سارے طریقے ان شاء اللہ اس شخص کے لئے کارگر ثابت ہوں گے، جس پر جادو کیا گیا ہو اور اسے بیوی سے روک دیا گیا ہو۔ یہ محض اسباب ہیں۔ شفا دینے والا تو اللہ پاک و برتر ہے، جو ہر چیز پر قادر ہے۔ اسی کے ہاتھ میں دوا اور بیماری ہے اور ہر چیز اسی کے فیصلے اور لکھے کے مطابق وجود میں آتی ہے۔ نبی صلی اللہ علیہ وسلم سے صحیح حدیث میں وارد ہےکہ آپ نے فرمایا ہے : "اللہ تعالیٰ نے جو بھی بیماری اتاری، اس کے ساتھ اس کا علاج بھی اتارا ہے۔ کچھ لوگوں نے اس کی معرفت حاصل کی اور کچھ لوگ اس سے ناواقف رہے"۔
یہ اللہ پاک و برتر کا فضل و احسان ہے اور اللہ ہی سیدھی راہ کی توفیق اور ہدایت دینے والا ہے۔
جنات کا انسان کے اندر داخل ہونے کی حقیقت اور اس کا انکار کرنے والے کی تردید [28]
[28] یہ ایک تردیدی بیان ہے جو شیخ على طنطاوی کو مورخہ 3/11/1408هـ کو بھیجا گیا تھا۔
الحمد لله، والصلاة والسلام على رسول الله، وعلى آله وصحبه ومن اهتدى بهداه۔
حمد وصلاۃ کے بعد عرض ہے کہ بعض ملكی اور غیر ملکی اخبارات میں شعبان سنہ 1407ھ کو اس واقعہ سے متعلق لمبی اور مختصر خبریں نشر ہوئیں کہ کسی جن نے -جو ریاض میں ایک مسلم خاتون پر سوار تھا- میرے پاس اسلام لانے کا اعلان کیا، جب کہ مجھ سے پہلے وہ برادر محترم عبد اللہ بن مشرف العمری کے پاس بھی اس کا اعلان کر چکا تھا، جو ریاض میں ہی مقیم ہیں۔ یہ اس وقت ہوا، جب انہوں نے اس خاتون پر (آیات و اذکار) پڑھے، جن سے بات چیت کی، اسے اللہ کی یاد دلائی، وعظ ونصیحت کی اور بتایا کہ ظلم ایک حرام کام اور کبیرہ گناہ ہے۔ نیز جب جن نے یہ بتایا کہ وہ کافر اور بدھ مذہب کا پیروکار ہے تو انہوں نے اسے اپنا مذہب ترک کرکے دین اسلام قبول کرنے کی دعوت دی۔ چنانچہ اس جن نے دعوت قبول کر لی اور موصوف عبد اللہ کے پاس اسلام لانے کا بر ملا اعلان کر دیا۔ پھر موصوف عبد اللہ اور اس عورت کے سرپرستوں نے یہ رغبت ظاہر کی کہ وہ عورت کو میرے پاس لے کر آئیں، تاکہ میں جن کے اعلانِ اسلام کو سن سکوں۔ چنانچہ وہ میرے پاس آئے اور میں نے جن سے پوچھا کہ وہ اس عورت پر کیوں سوار ہوا، تو اس نے مجھے اس کے اسباب بتائے۔ اس نے عورت کی زبان میں بات کی، لیکن بات مرد کی ہی تھی۔ عورت کی نہیں۔ وہ عورت میرے بغل میں کرسی پر بیٹھی تھی۔ اس کا بھائی عبد اللہ بن مشرف اور بعض دیگر مشائخ یہ سارا ماجرا دیکھ رہے تھے اور جن کی بات بھی سن رہے تھے۔ اس نے کھلے لفظوں میں اسلام لانے کا اعلان کیا اور بتایا کہ وہ ہندوستانی ہے اور بدھ مذہب کا پیروکار ہے۔ میں نے اسے وعظ و نصیحت اور تقوی الہی کی وصیت کی اور یہ گزارش کی کہ وہ اس عورت کے جسم سے نکل جائے اور اس پر ظلم کرنے سے باز آجائے۔ چنانچہ اس نے میری بات مان لی اور کہا کہ میں اسلام قبول کرتا ہوں۔ میں نے اسے وصیت کی کہ جب اللہ نے اسے اسلام کی ہدایت دی ہے، تو وہ اپنی قوم کو بھی اسلام کی طرف بلائے، تو اس نے خیر کا وعدہ کیا اور اس عورت کے جسم سے نکل گیا۔ اس کی آخری بات یہ تھی : السلام علیکم۔ پھر وہ عورت اپنی عام زبان میں بات کرنے لگی اور اسے سلامتی اور راحت محسوس ہونے لگی۔ ایک مہینہ یا اس سے کچھ زیادہ وقت کے بعد وہ اپنے بھائی، بہن اور ماموں کے ساتھ میرے پاس آئی اور بتائی کہ وہ خیر و عافیت سے ہے اور وہ جن اس کے پاس دوبارہ لوٹ کر نہیں آیا۔ الحمد للہ۔ میں نے اس سے پوچھا کہ جب وہ جن اس کے پاس آتا تھا، تو اسے کیسا محسوس ہوتا تھا، تو اس نے بتایا کہ اسے شریعت مخالف گندے خیالات آتے تھے اور بدھ مت اور اس مذہب سے متعلق کتابیں پڑھنے کی طرف میلان محسوس ہوتا تھا۔ لیکن جب اللہ نے جن سے اس کی حفاظت فرمائی، تو یہ افکار و خیالات ختم ہو گئے اور وہ ان منحرف خیالات سے دور اپنی پرانی حالت پر لوٹ گئی۔
مجھے معلوم ہوا ہے کہ فضیلۃ الشیخ علی طنطاوی نے اس قسم کے واقعات کا انکار کیا ہے۔ انہوں نےبتایا ہے کہ یہ فریب اور جھوٹ ہے۔ ممکن ہے کہ یہ بات کسی عورت کے ساتھ رکارڈ کی گئی ہو اور اس عورت نے حقیقت میں ایسا کچھ نہ کہا ہو۔ میں نے وہ کیسٹ منگوائی جس میں شیخ طنطاوی کی بات کی رکارڈنگ ہے اور انہوں نے جو کچھ کہا ہے اسے سنا۔ مجھے بہت تعجب ہوا کہ کس طرح انہوں نے اسے فرضی قرار دیا جب کہ میں نے جنی سے کئی سوالات کیے اور اس نے جواب بھی دیے۔ یہ ان سے صادر ہونے والی ایک بہت بڑی غلطی اور غلط رائے زنی ہے۔ انہوں نے اپنی گفتگو میں یہ بھی دعوی کیا ہے کہ انسان کے ہاتھ پر جن کا اسلام قبول کرنا سلیمان علیہ السلام کے قصہ میں وارد اللہ تعالی کے اس فرمان کے منافی ہے : "مجھے ایسا ملک (بادشاہت) عطا فرما جو میرے سوا کسی (شخص) کے لائق نہ ہو۔" [29] بے شک یہ بھی ان کی غلطی اور باطل و بے بنیاد فہم ہے۔ اللہ ان کو ہدایت عطا فرمائے۔ کیوں کہ انسان کے ہاتھ پر جنات کا اسلام لانا سلیمان کی دعا کے منافی نہیں ہے۔ اس لئے کہ جنوں کی ایک کثیر تعداد نے نبی صلی اللہ علیہ وسلم کے ہاتھ پر اسلام قبول کیا ہے۔ [5] سورۃ ص، آیت : 35۔
اللہ تعالی نے سورۃ الأحقاف اور سورۃ الجن میں اس کی وضاحت فرمائی ہے اور صحیحین میں ابو ہریرہ رضی اللہ عنہ سے مروی ہے کہ نبی صلی اللہ علیہ وسلم نے فرمایا ہے : ’’شیطان نے میرے سامنے آ کر مجھ پر حملہ کر دیا، تاکہ میری نماز خراب کر دے۔ اللہ تعالیٰ نے جب مجھے اس پر قدرت دی، تو میں نے اسے گردن سے دبوچ لیا۔ میں نے ارادہ کر لیا تھا کہ اسے ایک ستون کے ساتھ باندھ دوں، تاکہ صبح تم لوگ بھی اسے دیکھ لو۔ لیکن مجھے حضرت سلیمان علیہ السلام کی یہ دعا یاد آ گئی : ’’اے اللہ! مجھے ایسی بادشاہت عطا فرما، جو میرے بعد کسی کے لیے نہ ہو۔‘‘[30] اس کے بعد اللہ تعالیٰ نے اسے ناکام و بے مراد واپس کر دیا۔‘‘ یہ بخاری کے الفاظ ہیں۔ مسلم کے الفاظ یہ ہیں : "گزشتہ رات ایک سرکش جن مجھ پر حملے کرنے لگا، تاکہ میری نماز توڑ دے۔ لیکن اللہ تعالیٰ نے اسے میرے قابو میں کر دیا۔ لہذا میں نے زور سے اس کی گردن بوچ لی اور یہ ارادہ کیا کہ اسے مسجد کے ستونوں میں سے کسی ستون کے ساتھ باندھ دوں، تاکہ صبح کو تم سب دیکھ سکو۔ پھر مجھے اپنے بھائی سلیمان علیہ السلام کا یہ قول یاد آ گیا: ’’اے میرے رب! مجھے بخش دے اور مجھے ایسی حکومت دے، جو میرے بعد کسی کے لائق نہ ہو۔‘‘[31] اور اللہ نے اس (جن) کو رسوا کر کے لوٹا دیا۔‘‘ امام نسائی نے بخاری کی شرط پر عائشہ رضی اللہ عنہا سے روایت کیا ہے کہ نبی صلی اللہ علیہ وسلم نماز میں تھے کہ شیطان آدھمکا۔ نبی صلی اللہ علیہ وسلم نے اسے پکڑ کر پچھاڑا اور گلا گھونٹ دیا۔ رسول اللہ صلی اللہ علیہ وسلم فرماتے ہیں : "یہاں تک کہ اس کی زبان کی ٹھنڈک میں نے اپنے ہاتھ پر محسوس کی۔ اگر سلیمان کی دعا نہ ہوتی تو وہ صبح تک (ستون) میں بندھا رہتا، تاکہ لوگ اسے دیکھ سکیں"۔ اسے احمد اور ابو داود نے ابو سعید سے روایت کیا ہے۔ اس میں یہ الفاظ بھی آئے ہیں : "میں نے اسے اپنے ہاتھ سے پکڑ لیا اور اس کا گلا گھونٹتا رہا، یہاں تک کہ اس کے لعاب دہن کی ٹھنڈک میں نے اپنے انگوٹھے اور انگشت شہادت کے درمیان محسوس کی"۔ بخاری نے اسے اپنی صحیح جـ4 ص487 میں ابو ہریرہ رضی اللہ عنہ سے صیغہ جزم کے ساتھ تعلیقا روایت کیا ہے۔ وہ فرماتے ہیں : "رسول اللہ صلی اللہ علیہ وسلم نے مجھے رمضان کی زکوٰۃ کی حفاظت پر مقرر فرمایا۔ (رات میں) ایک شخص اچانک میرے پاس آیا اور غلہ میں سے لپ بھربھر کر اٹھانے لگا۔ میں نے اسے پکڑ لیا اور کہا کہ قسم اللہ کی! میں تجھے رسول اللہ صلی اللہ علیہ وسلم کی خدمت میں لے چلوں گا۔ اس پر اس نے کہا کہ اللہ کی قسم! میں بہت محتاج ہوں، میرے بال بچے ہیں اور میں سخت ضرورت مند ہوں۔ ابو ہریرہ رضی اللہ عنہ نے کہا (اس کے اظہار معذرت پر) میں نے اسے چھوڑ دیا۔ صبح ہوئی تو رسول اللہ صلی اللہ علیہ وسلم نے مجھ سے پوچھا کہ اے ابوہریرہ! گذشتہ رات تمہارے قیدی نے کیا کیا تھا؟ میں نے کہا کہ یا رسول اللہ! اس نے سخت ضرورت اور بال بچوں کا رونا رویا، اس لیے مجھے اس پر رحم آ گیا اور میں نے اسے چھوڑ دیا۔ آپ صلی اللہ علیہ وسلم نے فرمایا کہ وہ تم سے جھوٹ بول کر گیا ہے اور وہ پھر آئے گا۔ رسول اللہ صلی اللہ علیہ وسلم کے اس طرح کہنے کی وجہ سے مجھ کو یقین تھا کہ وہ پھر ضرور آئے گا۔ اس لیے میں اس کی تاک میں لگا رہا اور جب وہ دوسری رات آ کے پھر غلہ اٹھانے لگا، تو میں نے اسے پھر پکڑا اور کہا کہ تجھے رسول اللہ صلی اللہ علیہ وسلم کی خدمت میں حاضر کروں گا۔ لیکن اب بھی اس کی وہی التجا تھی کہ مجھے چھوڑ دے، میں محتاج ہوں، بال بچوں کا بوجھ میرے سر پر ہے۔ اب میں کبھی نہ آؤں گا۔ مجھے رحم آ گیا اور میں نے اسے پھر چھوڑ دیا۔ صبح ہوئی تو رسول اللہ صلی اللہ علیہ وسلم نے فرمایا کہ اے ابو ہریرہ! تمہارے قیدی نے کیا کیا؟ میں نے کہا کہ یا رسول اللہ! اس نے پھر اسی سخت ضرورت اور بال بچوں کا رونا رویا، جس پر مجھے رحم آ گیا۔ اس لیے میں نے اسے چھوڑ دیا۔ آپ صلی اللہ علیہ وسلم نے اس مرتبہ بھی یہی فرمایا کہ وہ تم سے جھوٹ بول کر گیا ہے اور پھر آئے گا۔ تیسری مرتبہ میں پھر اس کے انتظار میں تھا کہ اس نے پھر تیسری رات آ کر غلہ اٹھانا شروع کر دیا۔ لہذا میں نے اسے پکڑ لیا اور کہا کہ تجھے رسول اللہ صلی اللہ علیہ وسلم کی خدمت میں پہنچانا اب ضروری ہو گیا ہے۔ یہ تیسرا موقع ہے۔ ہر مرتبہ تم یقین دلاتے رہے کہ پھر نہیں آؤ گے۔ لیکن تم باز نہیں آئے۔ اس نے کہا کہ اس مرتبہ مجھے چھوڑ دو، تو میں تمہیں ایسے چند کلمات سکھا دوں گا، جن سے اللہ تعالیٰ تمہیں فائدہ پہنچائے گا۔ میں نے پوچھا کہ وہ کلمات کیا ہیں؟ اس نے کہا کہ جب تم اپنے بستر پر لیٹنے لگو، تو آیت الکرسی «الله لا إله إلا هو الحي القيوم» پوری پڑھ لیا کرو۔ ایک نگراں فرشتہ اللہ تعالیٰ کی طرف سے برابر تمہاری حفاظت کرتا رہے گا اور صبح تک شیطان تمہارے پاس کبھی نہیں آ سکے گا۔ اس مرتبہ بھی پھر میں نے اسے چھوڑ دیا۔ صبح ہوئی تو رسول اللہ صلی اللہ علیہ وسلم نے دریافت فرمایا کہ گذشتہ رات تمہارے قیدی نے تم سے کیا معاملہ کیا؟ میں نے عرض کیا کہ یا رسول اللہ! اس نے مجھے چند کلمات سکھائے اور یقین دلایا کہ اللہ تعالیٰ مجھے ان سے فائدہ پہنچائے گا۔ اس لیے میں نے اسے چھوڑ دیا۔ آپ نے دریافت کیا کہ وہ کلمات کیا ہیں؟ میں نے عرض کیا کہ اس نے بتایا تھا کہ جب بستر پر لیٹو تو آیت الکرسی شروع سے آخر تک مکمل پڑھ لو۔ اس نے مجھ سے یہ بھی کہا کہ اللہ تعالیٰ کی طرف سے تم پر (اس کے پڑھنے سے) ایک نگراں فرشتہ مقرر رہے گا اور صبح تک شیطان تمہارے قریب بھی نہیں آ سکے گا۔ صحابہ خیر کو سب سے آگے بڑھ کر لینے والے تھے۔ نبی کریم صلی اللہ علیہ وسلم نے (ان کی یہ بات سن کر) فرمایا کہ اگرچہ وہ جھوٹا تھا، لیکن تم سے یہ بات سچ کہہ گیا ہے۔ اے ابو ہریرہ! تم کو یہ بھی معلوم ہے کہ تین راتوں سے سامنا معاملہ کس سے تھا؟ انہوں نے کہا کہ نہیں۔ نبی کریم صلی اللہ علیہ وسلم نے فرمایا کہ وہ شیطان تھا"۔ [5] سورۃ ص، آیت : 35۔ [32] سورۃ البقرۃ، آیت : 255۔ [5] سوۃ ص، آیت : 35-
حضرت صفیہ رضی اللہ عنہا سے شیخین نے روایت کیا ہے کہ اللہ کے نبی صلی اللہ علیہ وسلم نے فرمایا ہے : "شیطان آدم کی اولاد کے جسم میں خون کی طرح دوڑتا ہے"۔
امام احمد نے مسند (ج۴ ص ۲۱۶) میں صحیح سند سے روایت کیا ہے کہ عثمان بن ابو العاص رضی اللہ عنہ نے فرمایا : اے اللہ کے رسول! شیطان میرے اور میری نماز اور میری تلاوت کے درمیان حائل ہو جاتا ہے۔ آپ نےفرمایا : "یہ خنزب نامی شیطان ہے۔ جب تمہیں اس کی آمد کا احساس ہو، تو اس سے اللہ کی پناہ طلب کرو اور تین دفعہ اپنی بائیں جانب تھتکار دو۔ ان کا بیان ہے کہ میں نے ایسا کیا تو اللہ عزیز و برتر نے مجھ سے اس شیطان کو دور کردیا"۔ جیسا کہ صحیح احادیث میں نبی صلی اللہ علیہ وسلم سے وارد ہے کہ ہر انسان کے ساتھ ایک فرشتہ اور شیطان ہوتا ہے، یہاں تک کہ خود نبی صلی اللہ علیہ وسلم کے ساتھ بھی۔ لیکن اللہ نے شیطان کے سلسلے میں آپ کی مدد کی، تو وہ اسلام لے آیا اور آپ کو صرف خیر کا ہی حکم دینے لگا۔ کتاب وسنت اور اجماع امت اس بات پر دال ہے کہ جنات کا انسان میں داخل ہونا اور اس پر سوار ہونا درست ہے۔ ایسے میں بھلا علم سے نسبت رکھنے والے کے لیے یہ کیسے درست ہو سکتا ہے کہ وہ بغیر علم و بصیرت کے محض اہل سنت والجماعت کے مخالفین بعض بدعتیوں کی تقلید میں اس کا انکار کر بیٹھے؟ الله المستعان ولا حول ولا قوة إلا بالله. اس سلسلے میں اہل علم کے جو اقوال منقول ہیں، ان میں سے چند آپ قارئین کی خدمت میں ذکر کر رہا ہوں۔ ان شاء اللہ۔
اللہ تعالی کے اس فرمان سے متعلق مفسرین رحمہم اللہ کے اقوال : "سود خور لوگ نہ کھڑے ہوں گے، مگر اسی طرح، جس طرح وہ کھڑا ہوتا ہے، جسے شیطان چھو کر خبطی بنادے" [33]- [33] سورۃ البقرۃ، آیت: 275۔
ابو جعفر بن جریر رحمہ اللہ باری تعالی کے اس ارشاد باری تعالی : "سود خور لوگ نہ کھڑے ہوں گے، مگر اسی طرح، جس طرح وہ کھڑا ہوتا ہے، جسے شیطان چھو کر خبطی بنادے۔" [34] کی تفسیر میں لکھتے ہيں : یعنی شیطان نے دنیا میں اس کی عقل زائل کر دی ہو اور اس کا گلا گھونٹ کر اسے جنون میں مبتلا کر دیا ہو۔ [34] سورۃ البقرۃ، آیت : 275۔
بغوی رحمہ اللہ اللہ تعالی کے قول : "سود خور لوگ نہ کھڑے ہوں گے مگر اسی طرح جس طرح وہ کھڑا ہوتا ہے جسے شیطان چھو کر خبطی بنادے"۔ [35] آیت میں وارد لفظ 'المس' کا مطلب جنون ہے۔ عربی میں کہا جاتا ہے "مس الرجل فھو ممسوس" یعنی وہ مجنون ہو گیا۔ انتہی [35] سورۃ البقرۃ، آیت : 275۔
ابن کثیر رحمہ اللہ اللہ تعالی کے فرمان : "سود خور لوگ نہ کھڑے ہوں گے، مگر اسی طرح، جس طرح وہ کھڑا ہوتا ہے، جسے شیطان چھو کر خبطی بنادے۔" [36] یعنی: وہ اپنی قبروں سے قیامت کے دن اسی طرح اٹھیں گے، جس طرح انسان غشی کی حالت میں اٹھتا ہے اور وہ شخص اٹھتا ہے، جسے شیطان چھو کر خبطی بنا دے۔ یعنی وہ بڑی بری حالت میں اٹھیں گے۔ ابن عباس رضی اللہ عنہما کہتے ہیں : "سود خور کو قیامت کے دن جنون کے عالم میں گلا گھونٹتا ہوا اٹھایا جائے گا"۔ اسے ابن ابی حاتم نے روایت کیا ہے۔ وہ مزید فرماتے ہیں : [36] سورۃ البقرۃ، آیت : 275۔
اسی قبیل کی روایات عوف بن مالک، سعید بن جبیر، سُدی، ربیع بن انس، قتادۃ اور مقاتل بن حیان سے بھی مروی ہیں۔ ان کے کلام کا مطلوبہ حصہ ختم ہوا۔
قرطبی رحمہ اللہ ارشاد باری تعالی : "سود خور لوگ نہ کھڑے ہوں گے، مگر اسی طرح، جس طرح وہ کھڑا ہوتا ہے، جسے شیطان چھو کر خبطی بنادے۔" [37] اس آیت میں ان لوگوں کے خلاف دلیل ہے، جو جنات کے اثر سے دورہ پڑنے کا انکار کرتے ہیں اور کہتے ہیں کہ یہ عصبی نظام میں پیدا ہونے والی ایک فطری بیماری ہے۔ شیطان کا انسان پر کوئی تسلط نہیں ہوتا اور نہ ہی وہ انسان کے اندر فتور و جنون پیدا کرسکتا ہے۔ ا ھ۔ اس معنی میں مفسرین کے بہت سے اقوال موجود ہیں۔ جو چاہے ان کا مطالعہ کر سکتا ہے۔ [37] سورۃ البقرۃ، آیت : 275۔
شیخ الاسلام ابن تیمیہ رحمہ اللہ اپنی کتاب (إيضاح الدلالة في عموم الرسالة للثقلين) میں، جو مجموع الفتاوی ج19 ص9 - ص65 میں موجود ہے، مذکورہ باتوں کا ذکر کرنے کے بعد فرماتے ہیں : اسی لیے معتزلہ کی ایک جماعت جیسے جبائی اور ابو بکر رازی وغیرہ نے جنات کے انسان کے جسم میں داخل ہونے کا انکار کیا ہے، لیکن انہوں نے جنات کے وجود کا انکار نہیں کیا۔ کیوں کہ ان کی نظر میں رسول صلی اللہ علیہ وسلم سے وارد احادیث میں جنات کا انسان کے جسم میں داخل ہونا اس طرح واضح نہیں ہے، جس طرح جنات کا وجود واضح ہے۔ تاہم وہ اپنی اس رائے میں غلط ہیں۔ اسی لیے اشعری نے مقالات اہل سنت و جماعت میں ذکر کیا ہے کہ وہ کہتے ہیں کہ جن انسان کے جسم میں داخل ہوتا ہے، جیسا کہ اللہ تعالی نے فرمایا ہے : "سود خور لوگ نہ کھڑے ہوں گے، مگر اسی طرح جس طرح وہ کھڑا ہوتا ہے، جسے شیطان چھو کر خبطی بنادے"۔ [38] جب کہ عبد اللہ بن احمد بن حنبل کہتے ہيں کہ میں نے اپنے والد سے پوچھا کہ کچھ لوگوں کا کہنا ہے کہ جن انسان کے جسم میں داخل نہیں ہوتا، تو انھوں نے جواب دیا : میرے بیٹے! وہ غلط بولتے ہیں۔ یہ دیکھو، شیطان اس کی زبان سے بول رہا ہے۔ یہ مسئلہ اپنی جگہ پر پوری تفصیل کے ساتھ مذکور ہے۔ موصوف رحمہ اللہ مزید فرماتے ہیں، جیسا کہ فتاوی جلد نمبر 24، صفحہ 276-277 میں ہے : جنات کا وجود کتاب وسنت اور امت کے اسلاف و ائمہ کے اتفاق سے ثابت ہے۔ اسی طرح جنات کا انسان کے جسم میں داخل ہونا بھی اہل سنت و جماعت کے ائمہ کے اتفاق سے ثابت ہے۔ اللہ تعالی کا فرمان ہے : "سود خور لوگ نہ کھڑے ہوں گے، مگر اسی طرح، جس طرح وہ کھڑا ہوتا ہے، جسے شیطان چھو کر خبطی بنادے۔" [39] ایک صحیح حدیث میں نبی کریم ﷺ نے ارشاد فرمایا ہے : (شیطان آدم کی اولاد کے جسم میں خون کی طرح دوڑ رہا ہے)۔ [39] سورۃ البقرۃ، آیت : 275۔ [38] سورۃ البقرۃ، آیت : 275۔
عبد اللہ بن امام احمد بن حنبل فرماتے ہیں: میں نے اپنے والد سے پوچھا کہ کچھ لوگوں کا گمان ہے کہ جنات انسان کے جسم میں داخل نہیں ہوتے، تو انھوں نے کہا : میرے بیٹے! وہ غلط بولتے ہیں۔ یہ دیکھو، شیطان اس کی زبان سے بول رہا ہے۔ ان کا یہ قول بہت مشہور ہے۔ انسان پر غشی طاری ہوتی ہے تو وہ ایسی بات بولتا ہے، جس سے وہ ناواقف ہوتا ہے۔ اسی طرح اپنے جسم پر ایسی خطرناک ضرب لگاتا ہے کہ اگر اونٹ کو بھی اس طرح پیٹا جائے تو اس پر گہرا اثر ہو جائے۔ اس کے باوجود غشی زدہ شخص کو نہ ضرب کا احساس ہوتا ہے اور نہ اپنی کہی ہوئی بات کا شعور۔
مسلمانوں کے کسی امام نے جنات کے انسانی جسم کے اندر داخل ہونے کا انکار نہیں کیا ہے۔ جس نے اس کا انکار کیا یا یہ دعوی کیا کہ شریعت اس کی تکذیب کرتی ہے، اس نے شریعت پر جھوٹ باندھا۔ شرعی دلائل اس کی نفی بالکل نہیں کرتیں۔ انتہی
ابن القیم رحمہ اللہ اپنی کتاب زاد المعاد فی هدي خیر العباد ج4 ص66-69 میں لکھتے ہیں: دورے کی دو قسمیں ہیں : ایک دورہ تو وہ ہے جو روئے زمین پر رہنے والی خبیث ارواح کی طرف سے ہوتا ہے اور دوسرا دورہ وہ ہے جو برے اخلاط (خون، بلغم، صفرا اور سودا) کی وجہ سے پیدا ہوتا ہے۔ دوسری قسم کے دورے کا علاج ڈاکٹر اور حکیم لوگ کرتے اور وہی اس کے سبب اور علاج کے بارے میں گفتگو کرتے ہیں۔
جہاں تک ارواح کے دورے کی بات ہے، تو صف اول کے خردمند اطبا بھی اس کا اعتراف کرتے ہیں۔ وہ یہ بھی مانتے ہیں کہ اس کا علاج یہ ہے کہ ان ارواح کی ملاقات عالم علوی کی عمدہ خصال شریف ارواح سے کرائی جائے، تاکہ ان خبیث ارواح پر عمدہ خصال ارواح کے اثرات مرتب ہوں اور اس کے نتیجے میں ان کے برے اثرات زائل اور برے افعال نا کارہ ہو جائیں۔ بقراط نے اپنی بعض کتابوں میں اس کی وضاحت کی ہے اور اس کا کچھ علاج بھی ذکر کیا ہے۔ ان کا کہنا ہے:
یہ علاج اس دورے میں مفید ہے، جو اخلاط اور مادہ کی وجہ سے آتا ہے۔ ارواح کی وجہ سے آنے والے دورے میں یہ علاج مفید نہيں ہے۔
لیکن جاہل وکمتر درجے کے اطبا اور زنادقہ نے روح کی وجہ سے آنے والے دورے کا انکار کیا ہے۔ وہ اس بات کو نہیں مانتے کہ ارواح کی وجہ سے بھی دورے آیا کرتے ہيں۔ حالاں کہ ان کی کل جمع پونجی جہالت ہے۔ اس کے سوا ان کے پاس کچھ نہيں ہے۔ ورنہ علم طب ارواح کی وجہ سے دورے آنے کا بالکل ہی انکار نہيں کرتا۔ اس چیز کو محسوس اور اس کا مشاہدہ بھی کیا جاتا ہے۔ ان جاہل اطبا کا یہ کہنا کہ دورہ بعض اخلاط کے غلبے کی وجہ سے آیا کرتا ہے، دورے کی بعض قسموں کے بارے میں تو صحیح ہے، لیکن ساری قسموں کے بارے میں صحیح نہيں ہے۔ انھوں نے آگے کہا ہے : یہ زندیق اطبا صرف اخلاط والے دورے کے قائل ہیں۔ روحوں کے اثر والے دورے کے قائل نہیں ہیں۔ چنانچہ جو لوگ ان ارواح اور ان کی تاثیر کا علم و آگہی رکھتے ہیں، انھیں ان کی نادانی اور کم عقلی پر ہنسی آتی ہے۔
چنانچہ اس دورے کا علاج دو طرح سے ممکن ہے: ایک کا تعلق خود دورے کے شکار شخص سے ہے اور دوسرے کا تعلق معالج سے۔ دورے کے شکار شخص کو چاہیے کہ اپنی قوت ارادی سے کام لے، خلوص کے ساتھـ ان ارواح کے خالق و پروردگار کی طرف رجوع کرے اور دل و زبان کی یک سوئی کے ساتھ درست انداز میں رب کی پناہ طلب کرے۔ یہ ایک طرح کی جنگ ہے اور جنگ جو اس وقت تک اپنے دشمن سے اپنے ہتھیار کے ذریعہ برابری کا مقابلہ نہيں کر سکتا، جب تک اس کے اندر دو باتیں نہ پائی جائيں۔ ایک یہ کہ اس کے پاس موجود ہتھیار صحیح اور عمدہ ہو اور دوسرا یہ کہ ہتھیار اٹھانے والا ہاتھ مضبوط ہو۔ اگر ان دونوں میں سے ایک بات بھی نہ پائی جائے، تو ہتھیار کا کچھ فائدہ نہ ہوگا۔ اب ذرا سوچیں کہ اس وقت کیا ہوگا، جب دونوں ہی باتیں مفقود ہوں؟ دل توحید، توکل، تقوی اور انابت سے خالی ہو اور ساتھ میں ہتھیار بھی نہ ہو۔
معالج کے اندر بھی ان دو چیزوں کا پایا جانا ضروری ہے۔ یہ اور بات ہے کہ کچھ معالج کا صرف "اس سے نکل جا"، "بسم اللہ" یا "لاحول ولا قوۃ الا باللہ" کہہ دینا بھی کافی ہو جایا کرتا ہے۔ رسول اللہ صلی اللہ علیہ وسلم کہا کرتے تھے : "اللہ کا دشمن! تو نكل جا۔ میں اللہ کا رسول ہوں"۔
میں نے اپنے شیخ کو دیکھا ہے کہ وہ دورے والے شخص کے پاس ایک آدمی کو بھیج دیتے، جو اس کے اندر سرايت روح کو مخاطب کرتا اور کہتا : شیخ نے تجھ سے کہا ہے کہ تو اس کے جسم سے نکل جا۔ کیوں کہ تیرا اس کے جسم میں رہنا حلال نہيں ہے۔ بس اتنے بھر سے مریض کو آرام مل جاتا۔ بسا اوقات شيخ خود مخاطب ہوتے اور بسا اوقات روح سرکش ہوتی تو اسے مار کر بھگاتے تھے۔ اس طرح دورے والے شخص کو افاقہ ہو جاتا اور اسے کوئی تکلیف رہ نہيں جاتی۔ ہم نے اور ہمارے علاوہ دوسرے لوگوں نے بارہا اس کامشاہدہ کیا ہے۔ وہ آگے تحریر کرتے ہیں : مختصر یہ کہ اس قسم کے دوروں اور ان کے علاج کا انکار صرف وہی کر سکتا ہے، جو علم و عقل اور معرفت و آگہی سے محروم ہو۔ خبیث ارواح اکثر ان لوگوں پر مسلط ہوتی ہیں جن کے اندر دین داری کی کمی ہوتی ہے اور ان کے دل اور زبانیں اللہ تعالی کے ذکر، نبوی اور ایمانی اذکار ومعوذات سے خالی ہوا کرتی ہیں۔ چنانچہ خبیث روح کا جب ایسے انسان سے مقابلہ ہوتا ہے، تو وہ بے سروسامانی کے عالم میں ہوتا ہے اور مات کھا جاتا ہے۔ بسا اوقات جب انسان برہنہ ہوتا ہے، تو جن اس پر وار کر دیتا ہے۔ مؤلف رحمہ اللہ کے کلام کا مطلوبہ حصہ ختم ہوا۔
مذکورہ بالا شرعی دلائل اور علمائے اہل سنت والجماعت کے اجماع سے واضح ہو چکا ہے کہ جن کا انسان پر مسلط ہونے کا اعتقاد درست ہے اور اس کا انکار کرنے والے غلطی پر ہیں۔ اس طرح شیخ علی طنطاوی صاحب کے انکار کا بھی رد ہو گیا۔
انہوں نے اپنی گفتگو میں وعدہ کیا ہے کہ جب ان کی رہنمائی حق کی جانب کی جائے گی، وہ حق کی طرف لوٹ جائیں گے۔ لہذا امید ہے کہ ہمارے ذکر کردہ دلائل کو پڑھنے کے بعد وہ حق کی طرف لوٹ آئیں گے۔ اللہ سے ہم اپنے لیے اور ان کے لیے ہدایت اور توفیق کی دعا کرتے ہیں۔ ہم نے جو کچھ ذکر کیا ہے اس سے یہ بھی معلوم ہو جاتا ہے کہ الندوہ میگزین شمارہ ۱۴/۱۰/۱۴۰۷ھ کے صفحہ ۸ پر ڈاکٹر محمد عرفان کے حوالے سے لکھا گیا ہے کہ جنون کا لفظ طبی ڈکشنری میں موجود نہیں ہے اور ان کا دعوی ہے کہ جن کا انسان کے اندر داخل ہونا اور اس کی زبان سے بولنا علمي طور پر صد فی صد غلط ہے۔ یہ سب باطل ہے، جس کی وجہ شرعی علوم اور علمائے اہل سنت وجماعت کے ذکر کردہ اصول سے عدم واقفیت ہے۔ اگر یہ بات بہت سے اطبا سے مخفی ہے، تو یہ اس بات کی دلیل نہیں ہے کہ اس کا وجود ہی نہ ہو۔ بلکہ یہ اس بات کی دلیل ہے کہ یہ اطبا ایسے علوم سے پوری طرح نا واقف ہیں، جن سے دوسرے ایسے علما آشنا ہیں، جو دینی امور میں بصیرت و آگہی، امانت و دیانت اور صدق گوئی میں معروف ہیں۔ سچائی یہ ہے اس مسئلے پر اہل سنت و جماعت کا اجماع ہے۔ یہ اجماع شیخ الاسلام ابن تیمیہ نے تمام اہل علم سے نقل کیا ہے۔ انھوں نے ابو الحسن اشعری سے نقل کیا ہے کہ انہوں نے اسے اہل سنت و جماعت سے نقل کیا ہے۔ اسی طرح علامہ ابو الحسن اشعری سے اسے ابو عبد اللہ محمد بن عبد اللہ الشبلی الحنفی متوفی سنہ ۷۹۹ھ نے اپنی کتاب (آکام المرجان فی غرائب الأخبار وأحکام الجان) کے باب ۵۱ میں بھی نقل کیا ہے۔
گزشتہ سطور میں علامہ ابن القیم رحمہ اللہ کے کلام کے ضمن میں یہ بات آ چکی ہے کہ ماہر اطبا اور عقلا اس حقیقت کو تسلیم کرتے ہیں۔ صرف جاہل اطبا اور رذیل قسم کے زنادقہ ہی اس کا انکار کرتے ہیں۔ قاری کو چاہیے کہ ہمارے بیان کیے ہوئے درست موقف کو تسلیم کرے اور جاہل اطبا اور ان کی تقلید میں بے بنیاد باتیں کرنے والے بدعتی معتزلہ وغیرہ کے دھوکے میں نہ آئے۔ سچائی یہ ہے کہ یہ توفیق تو اللہ ہی دیتا ہے۔
نوٹ
کبھی کبھی ایسا شخص جس پر جن سوار ہو، جس دری پر بیٹھا ہوتا ہے، اسے اس طرح کھینچتا ہے، مختلف آلات کو ایک جگہ سے دوسری جگہ اس طرح لے جاتا ہے اور اس طرح کے دوسرے کام کچھ اس طرح کرتا ہے کہ دیکھنے والے کو یقین ہو جاتا ہے کہ اس کے منہ سے بولنے والا اور ان چیزوں کو منتقل کرنے والا انسان نہيں کوئی اور ہے۔
جیسا کہ رسول اللہ صلی اللہ علیہ وسلم کی صحیح احادیث اور اہل علم کے اقوال سے ثابت ہو چکا ہے کہ جن کو خطاب کرنا، اسے وعظ ونصیحت کرنا، اسلام کی دعوت دینا اور اس کا اس دعوت کو قبول کرنا، یہ ساری چیزیں سورہ (ص) میں وارد حضرت سلیمان علیہ السلام کی اس دعا کے منافی نہیں ہیں : "اے میرے رب! مجھے بخش دے اور مجھے ایسا ملک (بادشاہت) عطا فرما، جو میرے سوا کسی (شخص) کے ﻻئق نہ ہو۔ تو بڑا ہی دینے واﻻ ہے"۔ اسی طرح جن کو بھلائی کا حکم دینا، برائی سے روکنا اور جب وہ (انسان کے جسم سے) نکلنے سے انکار کرے تو اسے مارنا، یہ سب مذکورہ آیت کے خلاف نہیں ہے، بلکہ یہ اسی طرح واجب ہے، جس طرح انسانوں کے مابین ظالم کو روکنے، مظلوم کی مدد کرنے، بھلائی کا حکم دینے اور برائی سے روکنے کی خاطر یہ امر واجب ہے۔ صحیح حدیث گزر چکی ہے کہ رسول اللہ صلی اللہ علیہ وسلم نے فرمایا ہے : (میں نے شیطان کا گلا اتنی زور سے گھونٹا کہ اس کا لعاب بہنے لگا۔) آپ نے مزید فرمایا ہے : (اگر میرے بھائی سلیمان کی دعا نہ ہوتی، تو میں اسے باندھ دیتا، حتی کہ لوگ اسے دیکھتے)۔ صحیح مسلم کی ایک روایت ہے۔ ابو دردا رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا ہے : ”اللہ کا دشمن ابلیس آگ کا ایک بھڑکتا ہوا شعلہ لے کر آیا تھا، تاکہ میرے چہرے پر ڈال دے۔ لہذا میں نے تین دفعہ کہا : "أَعُوذُ بِاللَّهِ مِنْكَ” (میں تجھ سے اللہ کی پناہ مانگتا ہوں۔) پھر میں نے کہا : "أَلْعَنُكَ بِلَعْنَةِ اللَّہ" (میں تجھ پر اللہ کی لعنت بھیجتا ہوں۔) لیکن وہ پیچھے نہ ہٹا۔ تین دفعہ ایسا ہوا۔ آخر میں نے اسے پکڑنے کا ارادہ کیا۔ اللہ کی قسم! اگر میرے بھائی سلیمان کی دعا نہ ہوتی، تو اسے ستون سے باندھ دیا جاتا اور صبح مدینہ کے بچے اس سے کھیل رہے ہوتے۔“ اس معنى کی حديثيں بہت بڑی تعداد میں موجود ہيں۔ یہی حال اہل علم کے اقوال کا بھی ہے۔
امید ہے کہ مذکورہ دلائل طالبِ حق کے لئے کافی وشافی ہوں گی۔ میں اللہ تعالی سے، اس کے اسماے حسنی اور صفات علیا کا واسطہ دے کر دعا کرتا ہوں کہ ہمیں دین کی سمجھـ عطا فرمائے، دین پر ثابت قدم رکھے، قول و عمل میں حق کا پیکر بنائے، ہم سب کو بغیر علم کے اللہ کی طرف کوئی بات منسوب کرنے سے بچائے اور جن امور کی جانکاری نہ ہو، ان کا انکار کرنے سے بھی محفوظ رکھے۔ یقینا یہ سارے کام اسی کے ہیں اور اس کی قدرت کے دائرے میں ہيں۔
اللہ تعالی اپنے بندے اور رسول، ہمارے نبی محمد ﷺ پر، اور آپ کی آل و اصحاب پر نیز قیامت تک آپ کی پیروی کرنے والوں پر درود و سلام نازل فرمائے۔
[سورۃ ص : ۳۵]
Related books
All books
فضائلِ اسلام11 زبانیںفضائلِ اسلام
امام محمد بن عبد الوہاب رحمہ اللہ باب: اسلام کا وجوب ... اور ارشادِ باری تعالٰی : {جو شخص اسلام کے سوا اور دین تلاش کرے، اس کا دین قبول نہ کیا جائے گا اور وه آخرت میں نقصان پانے والوں میں ہوگا۔} [1] (سورۂ آل عمران: 85)۔ اور یہ فرمان الہی: {اور یہ کہ یہ دین میرا راستہ ہے، جو مستقیم ہے، سو اس راه پر چلو اور دوسری راہوں پر مت چلو کہ وه راہیں تم کو اللہ کی راه سے جدا کردیں گی۔} [2] (سورۂ انعام: 153)۔ [1] سورۂ آل عمران آیت: 185۔ [2] سورہ انعام آیت: 153۔ مجاہد رحمہ اللہ کہتے ہیں: ’سُبُل‘ سے مراد ’بدعات اور شبہات‘ ہیں۔ عائشہ رضی اللہ عنہا سے مروی ہے کہ اللہ کے رسول ﷺ نے ارشاد فرمایا : "جس نے…
خوشگوار زندگی کے مفید وسائل85 زبانیںخوشگوار زندگی کے مفید وسائل
فضیلۃ الشیخ علامہ عبد الرحمن بن ناصر السعدی رحمہ اللہ کی کتاب "خوشگوار زندگی کے مفید وسائل" حقیقی سعادت کے اسباب کو عمیق ایمانی نقطۂ نظر سے واضح کرتی ہے، چنانچہ ایمان اور عملِ صالح، ذکرِ الہی، قناعت، نعمتوں میں غور وفکر، احسان، توکل، صبر، اور امور کی صحیح قدر و فہم کے ذریعے یہ قاری کی رہنمائی قلبی اطمینان کی جانب کرتی ہے؛ خوبصورت اسلوب میں آپ کے سامنے ایسی زندگی کا خاکہ رکھتی ہے جو تقلباتِ زندگی کے باوجود مطمئن، متوازن اور خوشگوار ہو۔
اسلام کا مختصر تعارف قرآن کریم اور سنت نبوی کی روشنی میں71 زبانیںاسلام کا مختصر تعارف قرآن کریم اور سنت نبوی کی روشنی میں
اسلام یہ اسلام کے مختصر تعارف پر مشتمل ایک انتہائی اہم کتاب ہے جو اسلام کے اصول وتعلیمات اور محاسن کو اس کے اصلی مصادر یعنی قرآن کریم اور سنت نبوی کے سرچشمہ سے کشید کر کے واضح انداز میں پیش کرتی ہے،اس کتاب کے مخاطبین احوال و ظروف اور زبان و بولی کے اعتبار سے ایک دوسرے سے مختلف ہونے کے باوجود ہر مکلف مسلم و غیر مسلم افراد ہیں۔ یہ قرآن کریم اور سنت نبوی سے ماخوذ دلائل سے آراستہ نسحہ ہے۔ 1- اسلام دنیا کے تمام لوگوں کے نام اللہ کا آخری و ابدی پیغام ہے۔ اسلام دنیا کے تمام لوگوں کے نام اللہ تعالی کا پیغام ہے، اللہ تعالی کا فرمان ہے: ہم نے آپ کو تمام لوگوں کے لئے خوشخبریاں سنانے واﻻ اور ڈرانے واﻻ…
نبی ﷺ کی نماز کا طریقہ82 زبانیںنبی ﷺ کی نماز کا طریقہ
کتاب 'كَيفِيَّةُ صَلَاةِ النَّبِيِّ ﷺ' میں سماحۃ الشیخ عبد العزیز بن باز رحمہ اللہ نے آسان اسلوب اور دقیق منہج کے ساتھ، نبی ﷺ کی نماز کا طریقہ، صحیح نصوص کی روشنی میں بیان کیا ہے، تاکہ یہ مسلمان کے لیے اس کی نماز میں رہنما ثابت ہو۔ اس کتاب میں نماز کے ارکان، سنتوں اور صفات کو وضو سے لے کر سلام تک بیان کیا گیا ہے، جو دلیل اور وضاحت کا مجموعہ ہے، اور اس عظیم ترین عبادت میں نبی ﷺ کی مکمل پیروی کرنے کی ترغیب دی گئی ہے۔