සහජ මානව ස්වභාවයේ ද විචාර බුද්ධියේ ද පරමානන්දයේ ද දහම යි.
අපරිමිත දයාවන්ත අසමසම කරුණාවන්ත අල්ලාහ්ගේ නාමයෙන් ආරම්භ කරමි.
අහස් ද මහපොළොව ද ඒ දෙක අතර ඇති සුවිසල් මැවීම් ද නිර්මාණය කළේ කවරෙක් ද? මෙම විධිමත් හා සූක්ෂ්ම සැකසුම නිර්මාණය කළේ කවරෙක් ද?
මෙම මහා විශ්වය, වසර ගණනාවක් පුරා ක්රමානුකූල ව නියාමනය වෙමින්, එයට අදාළ න්යාය පද්ධතීන්ට අනුගත ව සූක්ෂ්ම පැවැත්මකින් ක්රියාත්මක වනුයේ කෙසේ ද?
මෙම විශ්වය තමා ව ම නිර්මාණය කරගත්තේ ද? නැතහොත් යම් ශූන්ය දෙයකින් නිර්මාණය වූවක් ද? නැතහොත් අහඹු ලෙස බිහි වූවක් ද?
ඔබේ ශරීරයේ සහ ජීවීන්ගේ ශරීර සැකැස්ම තුළ මෙවන් සංකීර්ණ සියුම් ක්රියාකාරීත්වයක් ඇති කළේ කවරෙක් ද?
එක් නිවසක් ගැන උපකල්පනය කරගනිමු. කිසිදු අයෙකුගේ ඉදි කිරීමකින් තොර ව මෙම නිවස ඇති වුණි යැයි කිසිවෙක් විශ්වාස නොකරයි; නැතහොත් මෙම නිවස ඉදි කළේ ශූන්යයක් බව පැවසු ව ද එය ද කිසිවෙක් නොපිළිගනියි. එසේ නම්, මේ මහා සුවිසල් විශ්වය මැවුම්කරුවෙකු නොමැති ව ඇති වූවක් යැයි පවසන සමහරුන් එය සත්ය වාදයක් බව තහවුරු කරමින් සහතික කරන්නේ කෙසේ ද? මෙවන් අතිවිශිෂ්ට සූක්ෂ්ම විශ්වීය ක්රියාදාමයක් අහම්බයෙන් ඇති වූවක් යැයි පැවසීම බුද්ධිගෝචර ද? එවන් ස්ථාවරයක් විචාර බුද්ධිය ඇත්තෙකු පිළිගන්නේ කෙසේ ද?
නිසැක ව ම මෙම විශ්වය හා එහි ඇති දෑ මවා, ඒවා පාලනය කරමින්, ක්රියාත්මක කරවන සර්වබලධාරියෙකු සිටිය යුතු යි. ඔහු සුවිශුද්ධවන්තයාණන් ද අත්යුත්කෘෂ්ටවන්තයාණන් ද වන අල්ලාහ් ම ය.
සුවිශුද්ධ පරමාධිපතියාණෝ අප වෙත දූතවරුන් එවූ සේක. ඔවුන් වෙත වහී හෙවත් දිව්ය පුස්තක පහළ කළ සේක. ඒවා අතුරින් අවසානතම පුස්තකය වනුයේ අල්ලාහ් තම අවසන් දූත මුහම්මද් (සල්ලල්ලාහු අලයිහි වසල්ලම්) තුමාණන් වෙත පහළ කළ ශුද්ධ අල් කුර්ආනය යි. උතුමාණන්ගේ ග්රන්ථ හා උතුමාණන්ගේ දූතවරුන් මඟින්:
උතුමාණන් ගැන ද උතුමාණන්ගේ ගුණාංග ගැන ද අපි අවබෝධ කරගතිමු. උතුමාණන් වෙනුවෙන් කළ යුතු යැයි අප වෙත පැවරෙන වගකීම් ද, උතුමාණන් වෙතින් අප උරුම කරගන්නා අපගේ අයිතීන් ද අපි දැනගතිමු.
සැබැවින් ම සියලු මැවීම් නිර්මාණය කළ පරමාධිපති ඔහු බවත්, ඔහු මිය නොයන අමරණීය සදා ජීවමානී බවත්, සියලු මැවීම් ඔහුගේ ග්රහණයෙහි ද ඔහුගේ බලපරාක්රමය යටතේ ද ඔහුගේ පරිපාලනයට නතු ව ද සිටින බවත් අපි මඟපෙන්වීම් ලද්දෙමු.
සර්වඥභාවය උතුමාණන්ගේ ගුණාංග අතුරින් එකක් බව අපි දැනුම්වත් වීමු. ඒ මහා සර්වඥතා ඥානය සියලු දෑ ආවරණය කරගෙන ඇත. උතුමාණෝ සර්ව ශ්රාවකයාණෝ ය; සර්ව දෘෂ්ටිවන්තයාණෝ ය. මහපොළොවේ හෝ අහසේ හෝ පවත්නා කිසිවක් උතුමාණන්ගෙන් නොසැඟවේ.
පරමාධිපතියාණන් වන උතුමාණෝ සදා ජීවමානී, සදා ස්ථාවරවන්තයාණෝ ය. සියලු මැවීම්වල ජීවය සුවිශුද්ධවන්තයාණන් වන ඔහුගෙන් ම පමණක් හිමි වූවකි. සියලු මැවීම්වල ක්රියාකාරීත්වය පවතින්නේ ද සදා ස්ථාවරවන්තයාණන් වන පාරිශුද්ධවන්තයාණන්ගෙන් ම පමණකි. උත්තරීතර අල්ලාහ් මෙපරිදි පවසන සේක: අල්ලාහ් වනාහි ඔහු හැර වෙනත් දෙවියෙක් නොමැත. සදා ජීවමාන ය, සදා ස්ථාවර පැවැත්ම ඇත්තා ය. මද නින්ද හෝ (තද) නින්ද හෝ ඔහු ව ග්රහණය නොකරයි. අහස්හි ඇති දෑ ද මහපොළොවේ ඇති දෑ ද ඔහු සතු ය. ඔහුගේ අනුමැතියෙන් මිස ඔහු අබියස මැදිහත් වන්නෙකු විය හැක්කේ කවරෙකුට ද? ඔවුනට ඉදිරියෙන් ඇති දෑ ද ඔවුනට පසුපසින් ඇති දෑ ද ඔහු දන්නේය. ඔහු අභිමත කළ පරිදි මිස ඔහුගේ දැනුමෙන් කිසිවක් ඔවුහු ග්රහණය කර නොගනිති. ඔහුගේ පරමාසනය අහස්හි හා මහපොළොවෙහි ව්යාප්ත ව ඇත. ඒ දෙක ආරක්ෂා කිරීම ඔහුට දුෂ්කර නොවේ. තව ද ඔහු අතිඋත්තරීතර ය; සර්ව බලධාරී ය. (අල් බකරා පරිච්ඡේදය: වැකිය 255)
සැබැවින් ම පරමාධිපතියාණන් පරිපූර්ණ උත්තුංග ගුණාංගවලින් වර්ණනා කරනු ලැබූ බව ද අපි දැනුම්වත් වීමු. උතුමාණන්ගේ අතිශ්රේෂ්ඨ මහිමාන්විතභාවය ද අසමසම බලපරාක්රමය ද පරිපූර්ණ ගුණමහිමය ද අප හට හඟවනා උතුමාණන්ගේ විශ්මයජනක නිර්මාණ හා සර්වබලශක්තිය ගෝචර කරගැනීමේ විචාර බුද්ධිය ද හැඟීම් දැනීම් ද අපි දායාදයක් ලෙසින් උරුම කරගතිමු. එපරිදි, උතුමාණන් පරිපූර්ණ බවත් කිසිදු ලෙසකින් දෝෂ රහිත බවත් අප හට හඟවන සහජ මානව ස්වභාවය ද අප තුළ රෝපණය වී ඇත.
සැබැවින් ම පරමාධිපතියාණන් අහස්වලට ඉහළින් සිටින බවත් ඔහු විශ්වය තුළ නොපවතින බවත් විශ්වය ඔහු තුළ නොපවතින බවත් අපි දැනගතිමු.
සුවිශුද්ධයාණන් වන ඔහුට අප පූර්ණ ව අවනත වෙමින් යටත් විය යුතු බව ද අපි දැනුම්වත් වීමු. උතුමාණෝ අපගේ මැවුම්කරුවාණෝ ය; විශ්වයේ ද මැවුම්කරුවාණෝ ය; එහි සමස්ත පාලනය හසුරුවන ඒකීය ක්රියාත්මකකරුවාණෝ ය.
මැවුම්කරුවාණන්ට අත්යුත්කෘෂ්ට ගුණාංග ඇත. අවශ්යතාවක් ඇත්තෙකු ලෙස හෝ අඩුපාඩුවක් සහිත කෙනෙකු ලෙස හෝ කිසිසේත් ම උතුමාණන් ව වර්ණනා කළ නොහැක. එකී පරමාධිපති අමතක නොකරන්නේ ම ය; නොනිදන්නේ ම ය; ආහාර අනුභව නොකරන්නේ ම ය. උතුමාණන්ට බිරියක හෝ පුතෙකු සිටීමට ද නොහැක්කේ ම ය. මැවුම්කරුවාණන්ගේ මහිමාන්විත කීර්තියට පටහැනි වන ආකාරයේ ඕනෑ ම අඩුපාඩුවක් හෝ දෝෂයක් මහිමාන්විත අල්ලාහ්ගේ දූතවරුන් රැගෙන ආ නිර්මල දිව්යමය හෙළිදරව්වල කොහෙත් ම නොැමත. එසේ තිබීමට ද නොහැකි ය.
ඔබ මැවුම්කරුවාණන් වන පරමාධිපතියාණන් ව විශ්වාස කරන්නෙහි නම්, ඔබ ව මැවීමේ අරමුණ ගැන කවදා හෝ විමසා බැලුවෙහි ද? අපෙන් අල්ලාහ් අපේක්ෂා කරනුයේ කුමක් දැ? යි ද අපගේ පැවැත්මේ අවසන් ඉලක්කය කුමක් දැ? යි ද කවදා හෝ සිතා බැලුවෙහි ද?
සැබැවින් ම අල්ලාහ් අප ව මවා පසු ව නිකරුණේ අත්හැර දමන්නට ඉඩකඩ තිබේ ද? අල්ලාහ් මේ සියලු මැවීම් කිසිදු අරමුණක් හෝ ඉලක්කයක් හෝ නොමැති ව මවා තිබෙන්නට පුළුවන ද?
යථාර්ථය නම්, සැබැවින් ම සර්වබලධාරී මැවුම්කරුවාණන් වන 'අල්ලාහ්' අප ව මැවූ අරමුණ අප වෙත දන්වා ඇත. එනම්, එය අල්ලාහ් වන ඔහුට පමණක් අවනත වෙමින් නැමදුම් කිරීම යි. අපෙන් ඔහු අපේක්ෂා කරනුයේ කුමක් ද? සැබැවින් ම නැමදුම් ලැබීමට සුදුස්සා අල්ලාහ් වන ඔහු පමණක් බව උතුමාණන් අපට දන්වා ඇත. තව ද ඔහුට නැමදුම් ඉටු කළ යුත්තේ කෙසේ ද? ඔහුගේ නියෝග පිළිපදිමින් හා ඔහු තහනම් කළ දෑ අත්හැර දමමින් ඔහුට අප සමීප විය යුත්තේ කෙසේ ද? ඔහුගේ තෘප්තිය අප උරුම කරගත හැක්කේ කෙසේ ද? යන වගත් උතුමාණෝ ඔහුගේ දූතවරුන් මඟින් අපට පැහැදිලි කළ සේක. එමෙන් ම මරණින් පසු අප නැවත යොමු වන ස්ථානය ගැන ද අපට දැන්වූ සේක.
නිසැක ව ම මෙලොව ජීවිතය හුදෙක් පරීක්ෂණයක් පමණක් බවත් සැබෑ පරිපූර්ණ ජීවිතය මරණින් මතු ජීවිතය බවත් ඔහු අපට දන්වා සිටියේය.
කවරෙකු අල්ලාහ් නියෝග කළ පරිදි ඔහුට අවනත වී, ඔහු තහනම් කළ දැයින් වැළකී සිටියේ ද, ඔහුට මෙලොවෙහි යහපත් ජීවිතයක් ඇත. මතුලොවෙහි ද සදාතනික සැපත ඇත. එහෙත්, කවරෙකු ඔහුට පිටුපා ඔහු ව ප්රතික්ෂේප කළේ ද ඔහුට මෙලොව අභාග්යය මෙන් ම මතුලොවෙහි ද නිත්ය දඬුවම අනිවාර්යයෙන් ම ඇත.
වර්තමානයේ බහුතරයක් මිනිසුන් නමදින දෑ දෙස බලන විට දැකිය හැකි වනුයේ, ඇතැම්හු තවත් මිනිසෙකුට නමදිති; තවත් උදවිය පිළිමයකට නමදිති; තවත් අයෙක් ග්රහ තාරකා වැනි දෑවලට නමදිති. සිය ගුණමහිමවලින් පරිපූර්ණ වූ විශ්ව පරමාධිපතිට මිස අන් කිසිවෙකුට හෝ කිසිවකට නැමදුම් කිරීම විචාර බුද්ධියක් හිමි මිනිසෙකුට යුතු වන්නේ නැත. තමන් වැනි හෝ තමන්ට වඩා තත්ත්වයෙන් පහළ මැවීමකට හෝ නැමදුම් කරන්නේ කෙසේ ද? නැමදුම් ලැබීමට සුදුස්සා මිනිසෙකු හෝ පිළිමයක් හෝ ගසක් හෝ සතෙකු හෝ විය නොහැක්කේ ම ය.
ඉස්ලාමය හැර වර්තමානයේ මිනිසුන් අදහන සෙසු සියලු ආගම්, අල්ලාහ් විසින් පිළිගනු ලැබෙන්නේ නැත. ඒවා මිනිසුන් නිර්මාණය කරගත් ආගම් ය. එසේ නැතහොත් දිව්ය ආගම් ලෙස තිබී, පසු ව මිනිස් දෑතින් විකෘතියට පත් ආගම් ය. ඉස්ලාමය වනාහි විශ්ව පරමාධිපතියාණන්ගේ දහම යි. එය වෙනස් නොවන අතර විකෘති කිරීමට ද නොහැකි ය. මෙම දහමේ ග්රන්ථය ශුද්ධ වූ අල් කුර්ආනය යි. අල්ලාහ් එය පහළ කළ අයුරින් ම, සුරක්ෂිත ව පවතී. අවසන් දේව දූත මුහම්මද් (සල්ලල්ලාහු අලයිහි වසල්ලම්) තුමාණන්ට පහළ කළ භාෂාවෙන් ම අද දක්වා ම මුස්ලිම්වරුන්ගේ අත්වල එය පවතී.
අල්ලාහ් එවූ සියලු ම ධර්ම දූතවරුන් ගැන විශ්වාස කිරීම ද ඉස්ලාමයේ මූලිකාංගයකි. ඔවුහු සියලු දෙනා ම මිනිසුන් අතුරින් වූහ. සාක්ෂි සාධක සහ ප්රාතිහාර්යයන් මඟින් අල්ලාහ් ඔවුන් ව ශක්තිමත් කළේය. කිසිදු ආදේශ තැබීමකින් තොර ව උතුමාණන්ට පමණක් නැමදීම සඳහා ඇරයුම් කරනු වස් උතුමාණෝ ඔවුන් එවූ සේක.
අවසන් දූතයා වනුයේ දේව දූත මුහම්මද් (සල්ලල්ලාහු අලයිහි වසල්ලම්) තුමා ය. එතුමාණන්ට පෙර සිටි දූතවරුන්ගේ ආගමානුකූල ජීවන පිළිවෙත් වෙනස් කරමින්, අවසන් දිව්යමය ජීවන පිළිවෙත සමඟ අල්ලාහ් එතුමාණන් ව එව්වේය. බලවත් සංඥා සාධක මඟින් එතුමාණන් ව ශක්තිමත් කළේය. ඒ අතුරින් අතිශ්රේෂ්ඨ හා බලවත් ම සාධකය වූයේ ශුද්ධ වූ අල් කුර්ආනය යි. එය විශ්ව පරමාධිපතියාණන්ගේ වදන් ය. මිනිසා හඳුනන, කීර්තිමත් හා ඉතා ප්රබලතම ග්රන්ථය එය යි. එහි අන්තර්ගතයෙහි ද වචනවල ද සැකැස්මෙහි හා නීතිවල ද අසමසම ප්රාතිහාර්යයන් දක්නට ලැබේ. මෙලොව හා මතුලොව පරමානන්දය ගෙන දෙන සත්යය සඳහා වන මඟපෙන්වීම් එහි ඇත. එය පහළ කරනු ලැබුවේ අරාබි භාෂාවෙනි.
නිසැක ව ම අල් කුර්ආනය සර්වබලධාරී උත්තරීතර මැවුම්කරුවාණන්ගේ ප්රකාශයක් බවටත්, එය මිනිස් නිර්මාණයක් විය නොහැකි බවටත් කිසිදු සැකයකින් තොර ව තහවුරු කරන බුද්ධිගෝචර හා විද්යාත්මක සාධක බොහෝමයක් මෙහි ඇත.
ඉස්ලාමයේ මූලිකාංග අතරට මලක්වරුන් හෙවත් සුර දූතයින් පිළිබඳ විශ්වාස කිරීමත්, අවසන් දිනය පිළිබඳ විශ්වාස කිරීමත් ඇතුළත් වේ. එහි දී අල්ලාහ් මිනිසාගේ ක්රියාවන් පිළිබඳ ඔවුන්ගෙන් ප්රශ්න කරනු පිණිස මළවුන් කෙරෙන් නැගිටුවනු ලබන දිනයේ ඔවුන්ගේ මිනීවළවල්වලින් ඔවුන් ව යළි අවදි කරනු ඇත. එහෙයින් කවරෙකු දේවත්වය විශ්වාස කරන්නෙකු ලෙස සිටිමින් දැහැමි ක්රියාවන් සිදු කළේ ද ඔහුට ස්වර්ග උයනේ සදා සැපත ඇත. කවරෙකු ප්රතික්ෂේප කොට නපුරු ක්රියාවන් සිදු කළේ ද ඔහුට අපා ගින්නේ දරුණු දඬුවම ඇත. එමෙන් ම අල්ලාහ් පූර්වයෙන් ම නියම කළ යහපත හා අයහපත අල්ලාහ්ගේ අනුදැනුම හා අභිමතය පරිදි සිදුවන්නක් බව විශ්වාස කිරීමත් ඉස්ලාමයේ මූලිකාංග අතුරින් තවත් එක් කරුණකි.
මන්ද, අප අතුරින් සෑම මිනිසෙකු ම තමන් කළ ධර්මිෂ්ඨ හෝ අධර්මිෂ්ඨ ක්රියාවක් සඳහා ඵලවිපාක නොලබා මෙම ජීවිතයේ දිවිගමන යා නොහැකි බව අප දන්නා බැවිනි. එහෙත්, මෙහි දී අපරාධකරුවන්ට උචිත දඬුවම් නොපවතින අතර දැහැමියන්ට ද ප්රමාණවත් ප්රතිඵල නොලැබෙනු ඇත.
ඉස්ලාම් දහම, පරිපූර්ණ ජීවන රටාවක් වන අතර එය සහජ මානව ස්වභාවයට හා විචාර බුද්ධියට අනුකූල වේ. එය ප්රකෘති සිත් ඇත්තන් විසින් පිළිගනු ලබන්නකි. එය ශ්රේෂ්ඨ මැවුම්කරුවාණන් විසින් සිය මැවීම් උදෙසා ධර්මානුකූල කරන ලද්දකි. එය මෙලාව මෙන් ම මතුලොවෙහි ද සියලු ම මිනිසුන්ට යහපත හා පරමානන්දය අත්කර දෙන දහම යි. එය එක් ජාතියකින් තවත් ජාතියක් හෝ එක් වර්ණයකින් තවත් වර්ණයක් හෝ සුවිශේෂී කරන්නේ නැත. ඒ තුළ මානවයෝ එක සමාන වෙති. සැදැහැවත් දැහැමි ක්රියා අනුව මිස ඉස්ලාමය තුළ කිසිවෙකු වෙනත් කිසිවෙකුට වඩා සුවිශේෂී වන්නේ නැත.
ශුද්ධ අල් කුර්ආනයෙහි අල්ලාහ් සහතික කර පවසා සිටිනුයේ, සැබැවින් ම අල්ලාහ් කෙරෙහි විශ්වාසය තැබීම යනු උතුමාණන් පරමාධිපතියාණන් ලෙසින් ද නැමදුම් ලබනා ඒකීය සුදුස්සා බව ද ඉස්ලාමය සැබෑ ම දහම බව ද මුහම්මද් (සල්ලල්ලාහු අලයිහි වසල්ලම්) තුමාණන් දූතයාණන් බව ද තරයේ විශ්වාස කිරීම යි. එපරිදි, ඉස්ලාමය තුළට පිවිසීම අත්යවශ්ය කරුණකි. එහි මිනිසාට කිසිදු විකල්පයක් නැත. මළවුන් කෙරෙන් නැගිටුවනු ලබන දිනයේ දී විනිශ්චය ද ඵලවිපාක ද ඇත. කවරෙකු සැබෑ විශ්වාසවන්තයෙකු හා සත්යවාදියෙකු ලෙස සිටින්නේ ද ඔහුට අතිමහත් ජයග්රහණය හා සාර්ථකත්වය ඇත. කවරෙකු ප්රතික්ෂේප කරන්නෙකු ලෙස සිටින්නේ ද ඔහුට පැහැදිලි අලාභය ඇත.