Àlsìlàamàtɛ̀rɛ adiini nɔ̀ ká ǎ sawayo nna tabiya dèidèintɛ ká ǹ nà bɔ̀rɔ haliita nnā, lǎakalì ŋmɛnɛ adiini nɔ̀, kpɛ̌nɛ bɔnkaani ŋmɛnɛ adiini nɔ̀

Àlsìlàamàtɛ̀rɛ adiini nɔ̀ ká ǎ sawayo nna tabiya dèidèintɛ ká ǹ nà bɔ̀rɔ haliita nnā, lǎakali ŋmɛnɛ adiini nɔ̀, kpɛ̌nɛ bɔnkaani ŋmɛnɛ adiini nɔ̀

Nna Irikpɛ Māa, Kpéi Ká À Sisibii haliitayo kulu faafuyo, Kpéi Ká À Sisibii fisauyo nna ciminɔ̀ɔkpɛɛyo.

Aayara n taba ka n bɔŋɔ hã:

Mɛi yáa̵ nà samayo nna gannā nna haliita bèerì bèerìyo káayo ǹ gono ǹ bìnni haliita ? Kpɛ̌nɛ Mɛi yáa nà siriya cirici wɔ̀ damu ǹ kuna ?

Mɔ̀ɔfɔ̀ nɔ̀ anduniya bèerì wɔ̀ɔ cìnnì kó gono siriyani kà bɔ̀nŋɔ̀ ǎ jisiyo, ka yei kó cìnnìyo à gɔrdɔ nna à dirau yáasi ká ǹ dàmu à sɛ ká nŋa yǎ nàmu à dirauu sawayo jiiri tuutuumayo ká ň bisa kuna sawayo cirici ?

Aayara Anduniya wɔ̀ nà à bɔ̀ŋɔ haliita nɔ̀ ? Dě binɛ zǎ hɛ̀ika à ná bara bá hɛ̀ifɔ kuna nɔ̀ à hunu ? Dě dū ka à de kà kó gono nɔ̀ jirise bɔ̀nŋɔ̀ ?

Mɛi yáa nà n haliita ?

Mɛi yáa nà siriyani wɔ̀ ká à mutu kó sawayo dàmu n gáa gbéi jinayo nna húnde koniyo gáayo kuna ?

Bɔ̀rɔ̀ fɔ si ká à ba tutu ǹ mà cì à sɛ ká fuu wɔ̀ kà nɔ̀ ka ná bara ká bɔ̀rɔ̀ fɔ yáa nà à cini ! Dě binɛ ǹ mà cì à sɛ ká hɛ̀ifɔ ká à si yáa nà fuu wɔ̀ tɛ ! Dě ya, mɛtɛ bɔ̀rɔ̀fɔyoo tɛ kó warikáayo ň cì ká anduniya bèerì wɔ̀ kà nɔ̀ ka si nna halìitàkpɛ fɔ cimmanī ?! Mɛtɛ lǎkalintɛɛ tɛ ka tutu ǹ mà cì à sɛ ká anduniya jisiyo cirici ká ǎ sawayo wɔ̀ de kà nɔ̀ jirise bɔ̀nŋɔ̀ ?!

Sikā si ká Irikpɛ Bèerì Fɔ Gono ka Bara anduniya wɔ̀ nna hɛ̀ika à gono à kuna Halìitàkpɛ nna ǹ bɛ̀rɛ̀ bɛ̀rɛ̀kpɛ , Nŋa nɔ̀ Irikpɛ ká ǎ Gɛiyo kó Béerīyo.

Irikpɛ Di, Kpei Ká Ǎ Gɛiyo, nà̵ dìyàyo sammà iri ga, ka À Kpeitɛrɛ tilayo zumani ǹ ga , nŋa al-kurani jìrìmàntɛ nɔ̀ tilayo di kɔkɔ̀rɔ̀ kà Irikpɛ nà à zumani Muhammadu ká à bara Irikpɛ dìyàyo kɔkɔ̀rɔ̀ ga. À tilayo nna À dìyàyo di mɛɛcìnɛ̀yo kuna nɔ̀ :

Irikpɛ Di nà iri beiyanī À Bɔ̀ŋɔ̄ɔ nna hɛ̀ika À Bara nna À hakiyo káayo À gonna iri ga, ka yei ka iri hakiyo káayo iri gonna À ga kpàarɛ tɛ .

Nŋa À nà iri cìba ká Nŋa nɔ̀ Irikpɛ Di Ká À nà haliitayo kulu haliita, nŋa Ǎ hunayo nɔ̀ ka su ba bu , nŋa haliitayo kulu gono À Kàmmɛ̀ kuna nɔ̀ kó gonoyo À lìizaayo nna À bɛ̀rɛ bɛ̀rɛyo cìre .

Nŋa À nà iri nɔ laabaari ká beiyo gono hɛ̀ikáayo ň cìbayo hɛ̀ika À Bara kuna, cimi nɔ̀ binɛ ká À Béiyo nà hɛ̀i kulu kɔɔli, Nŋa nɔ̀ kpɛ̌nɛ Kpéi ká Ǎ mã kó diya , hɛ̀ifɔ suu tukuyo À sɛ ganna kuna bère bɔ̀nŋɔ̀ dɔ̄ kuna .

Irikpɛ Di Nŋa nɔ̀ Kpei ká Ǎ Hunayo kó Kɛiyo nna À Bɔ̀ŋɔɔ ka Bara haliitayo Kɛiyànìkpɛ Ká zǎ À Fɔlɔnku dɔ̄ nɔ̀ haliitayo kulu hunayo gono, Kpéi Ká Ǎ Gɛiyo. Nŋa nɔ̀ kpɛ̌nɛ Kpei Ká Ǎ kɛiyo nna À Bɔ̀ŋɔ ka Bara haliita kulu Kɛiyànìkpɛ Ká nna Àla nɔ̀ hɛ̀i kulu hunayoo kɛi deidei, Kpei Ká Ǎ Gɛiyo; Kpei Bèerì cì: { Irikpɛ nɔ̀, kpéi fɔ si ká à hìma ǹ mà bɔɔta nna cimi fàase Nŋa, Kpéi ká Ǎ Hunayo kó Kɛiyo nna À Bɔ̀ŋɔɔ , dùsum su gu À zà bère jibìri . À ŋmɛnɛ nɔ̀ hɛ̀i ká à gono bɔ̀nŋɔ̀ dɔ̄ɔyo kuna nna hɛ̀i ká à gono ganna kuna . Mɛi yáa ba hini ka fàaba À Dɔ̄ dě à ná ci nna À hìnì nɔyo ? Ǎ bei hɛ̀i ká à gono haliitayo mɔ̀ɔjìnɛ̀ nna hɛ̀i ká à gono ǹ banna, nŋayo binɛ suu bá hɛ̀ifɔ bei À Beiyo kuna fàase hɛ̀ika À bā ǹ mà bei . À Tìta Hɛ̄i ka bisa bɔ̀nŋɔ̀ dɔ̄ɔyo nna ganna , nŋa ǹ cɛ̀rimayo binɛ suu gaabu À Sɛ . Nŋa yǎ Bèerīyo kó Bara Jirima Bèerìkpɛ Ká Ǎ Bayo. [Suuratu albakara : 255].

Nŋa À nà iri beiyani kpɛ̌nɛ ká Nŋa nɔ̀ Nɔrukpɛ Ká ǹ ba À zém nna Tɔyo ka Kube ŋmɛnɛ zémyo. Nŋa À nà iri nɔ laakaliyo nna gáa ŋmɛnɛ mãyo nna beiyo hayayo káayo ň duwa kó màamaaciyo káayo ǹ gono À haliitayo ga bei nnā kó À Kpèitɛ̀rɛ yiiko kpɛ̌nɛ béi nnā . Hàyayo nɔ̀ ya káayo ǹ gu À Kpèitɛrɛ Bayo nna À gáabi nna À Zémyo Kùbèntɛyo cìba iri sɛ . Nŋa À kpeitɛ̀rɛ yei ka iri hàlìitàtɛ̀rɛ tabiya dèidèintɛ dɛ̀ɛsɛ iri ga ka nàm à gu À Tɔyo ka Kube cìbayo ka yei kó cìbayo ká à suu tɛ ǹ mà À Zém nna hartàyo .

Nŋa À nà iri beiyanī kpɛ̌nɛ ká Irikpɛ Di Gono samayo bɔ̀nŋɔ̀ dɔ̄ nɔ̀, À si haliitayo kuna kuna , ya nɔ̀ binɛ haliitayo suu huroyo À Kpéitɛrɛ kuna kuna .

Nŋa À yei ka iri nɔ laabaari ká à bara tilasi nɔ̀ iri 'n jìnde nɔ À sɛ, Kpéi ká Ǎ Gɛiyo. Nŋa nɔ̀ iri Hàlìitàkpɛ, anduniya Hàlìitàkpɛ nna à bɛ̀rɛ̀ bɛ̀rɛ̀kpɛ .

Dě ya Kpei Hàlìitàkpɛ gonna Bayo nna Jirima Bèerì Zémyo , nŋa à suu hini ka tɛ ǹ mà À Zém nna ká Ǎ bukaata haliita fɔ ga dě binɛ nna hartayoo . Ká à bara ya nì , Irikpɛ Di suu dìrìŋa nɔ̀ ya , À binɛ suu jìbìrì , À suu ŋmǎ , nŋa à binɛ́ suu hini ka tɛ À 'n gonna wèi , dě binɛ kō . Mɛɛcìnɛ̀yo káayo kuna hɛ̀ifɔ ká ǎ ŋmàanɛɛyo nna Hàlìitàkpɛ Bayo nna À Jirima ná bara ká ǹ gono dìyàtɛ̀rɛ cimi ŋmɛnɛ ká Irikpɛ dìyàyo - yèenāayo mà tɔ ǹ ga - kà nnā kuna nɔ̀ ya .

Irikpɛ Kpei Bèerì cì al-kurani jìrìmàntɛ kuna : { Cì : Irikpɛ Di Nŋa nɔ̀ Irikpɛ Ká À bara À Bɔ̀nŋɔ̄ Fɔ (1) Irikpɛ Ká Nŋa nɔ̀ haliita kuluu nufi nna à bukaata (2) À ná hɛi , ǹ binɛ ná À hɛi (3) Hɛ̀ifɔ binɛ ná bara À cinɛ (4) ﴿ [Suuratu al-Ikhlaassi : 1-4] .

Dě n bara ká ń cimi nɔyo Irikpɛ Ká À Bara Hàlìitàkpɛ sɛ ... aayara hanu fɔ kuna n nà n bɔ̀ŋɔ̄ hã guuri ká gànna ǹ nà n haliita ? Dě binɛ ifɔ̄ Irikpɛɛ bā iri ga ? Dě binɛ ifɔ̄ yǎ bara iri gonoyo ŋmɛnɛ guuri ?

Aayara ǎ hìnì ka tɛ à 'n bara ká Irikpɛ nà iri haliita nɔ̀ ka du ka iri nàmu ya kɔɔnu ? Dě binɛ ǎ bara ká Irikpɛ nà haliitayo wɔ̀ kulu haliita nɔ̀ ká à ná ci guuri dě binɛ nufi fɔ gànna ?

Ka síima nna ká irii beiyo ká à suu tɛ iri 'n dìra hunayo wɔ̀ kuna ká bɔ̀rɔ̀ fɔ kulu su ba duwa à gbei hɛnnɔ dě binɛ ilàalɔ ká à tɛ bana , à suu bara ká hanŋa gùnguyo gono àzaalimiyo sɛ nŋa bàna hɛnnɔ gono ihɛnnɔ tɛ̀ɛkpɛ̀ɛyo sɛ ?

Hɛ̀i ká à bara cimi nɔ̀ ká Nɔrukpɛ Ká À Bara Hàlìitàkpɛ Ká Ǎ Bayo kó Bara Jirima Bèerìkpɛ Di Ká Nŋa nɔ̀ "Allaahu" nà iri nɔ guuri ká gànna À nà iri haliita làabaari , nŋa nɔ̀ bɔɔta mŋáayo Irikpɛ Fɔlɔnku sɛ, nna hɛ̀i ká Ǎ bā iri ga. Nŋa À yei ka iri beiyanī ká Nŋa Fɔlɔnku yáa hìmaayo nna bɔɔta mŋáayo. Nŋa À nà yaasi ká iri bà bɔɔta À sɛ kpàarɛ tɛ iri sɛ À dìyàyoo dɛ̀llɛ̀ bɔ̀nŋɔ̀ - yéenāayo mà tɔ ǹ ga - nna yaasi ká iri bà māanì nna Àla nna À fòoroyo gànayoo nna hɛ̀i kàayo À honŋu nàmuyo, nna hìnì ká iri ba tɔ nnā À yarda ga ka láakali ka mɔɔru nna À hanŋa cènniyo , nŋa kpɛ̌nɛ À nà iri beiyanī iri yeiyo dɔ̄ buyo banna.

Nŋa À yàara ka iri nɔ làabaari ká anduniya hunayo wɔ̀ de bara zarabani nɔ̀ , hunayo cimi ŋmɛnɛ ká ǎ kubeyo cɛrɛ ba gono nɔ̀ laahara kuna , buyo banna .

Nŋa À nà iri nɔ làabaari Kpɛ̌nɛ ká warka à nà Irikpɛ gana zaŋa ká À fóoro, ka yei ka mɔɔru nna hɛ̀ika À honŋu , hunayo hɛnnɔ gono à sɛ anduniya kuna nna niima ká à suu beeni laahara kuna . Ya nɔ̀ binɛ warka à nà Irikpɛ sàabo ka À gutulù bɔ̀nŋɔ fute gono à sɛ anduniya kuna nna àzaaba ká à suu kanti laahara kuna .

Nŋa iri Nɔrukpɛ nà iri nɔ làabaari ká À Kpèitɛ̀rɛ yarda bàa dǔuri nna yèenāayo À ŋmɛnɛ àzaaba ga suu tɛ̀ fàase nna àlsìlàamàtɛ̀rɛ ká nŋa nɔ̀ : jìnde nɔyo À Kpèitɛ̀rɛ sɛ , nna À Kpèitɛ̀rɛ Fɔlɔnku bɔɔtayo wece tɛyo À sɛ mà si , nna bɔ̀ŋɔ nɔyo À Kpèitɛ̀rɛ sɛ À ganayo bɔ̀nŋɔ̀ , nna gbei tɛyo nna À kpèitɛ̀rɛ ŋmɛnɛ àsàriyayo yarda nna tayo bɔ̀nŋɔ̀ . À Kpèitɛ̀rɛ binɛ nà iri nɔ làabaari ká À suu adiini fɔ ta àlsìlàamàtɛ̀rɛ di bàasi ; Irikpɛ Kpei Bèerì cì : ﴾ Warka à gu adiini fɔ kɔtɔ ká à ná bara àlsìlàamàtɛ̀rɛ , Irikpɛ suu ta à sɛ pɛi, laahara kuna binɛ à kpɛɛ gono hàsàaràntɛyo kuna nɔ̀ (85) ﴿ . [Suuratu Aali Ĩmraana: 85].

Warka à ba guna ka diya hɛ̀ikáayoo sɛ bɔ̀rɔ̀ tuutuumaa bɔɔta ŋmáa zaamani wɔ́ kuna , ǎ duwa warka cɛrɛɛ bɔ̀rɔ nɔ̀ ǎ bɔɔta , àfɔ ŋmáani nŋa toolu nɔ̀ ǎ bɔɔta , àfɔ ŋmàani kpɛ̌nɛ nŋa hàndòoriya nɔ̀ ǎ bɔɔta , nna zaŋa ya takayo ; béesinka à suu hìmaayo bɔ̀rɔ̀ làakàlìntɛ mó bɔɔta ŋmáa fàase Irikpɛ Ká À bara haliita kuluu Nɔrukpɛ sɛ , Kpei Ká Ǎ Kubeyo À zémyo kuna . Ka à bara ya , mɛtɛ nɔ̀ nŋa bɔ̀rɔ dii yei kó à hànsinɛ haliita ká à bara zaŋa àla aw binɛ ká ǎ hartayo àla bɔɔta ! Warka sɛ ň bɔɔta ŋmáa suu bara bɔ̀rɔ dě binɛ toolu dě binɛ túuri dě binɛ hundèkoni fɔ !

Nŋa di sɛ , adiiniyo kulu káayo boroo tàmutɛ̀rɛ ŋmáa nnā hɔ̃̀ kuna - àlsìlàamàtɛ̀rɛ bàasi - Irikpɛ suu à ta, domi ǹ bara boroo ŋmɛnɛ tɛyo nɔ̀ , dě binɛ́ ǹ domu bara Irikpɛ ŋmɛnɛyo nɔ̀ nŋa boroo kàmmɛ̀ hɔ̀ɔrɛ nna ǹla . Amma àlsìlàamàtɛ̀rɛ cɛrɛ yáa bara Haliitayo kulu Nɔrukpɛ ŋmɛnɛ , à suu bɛ̀rɛ , à binɛ suu bàaru . Al-kurani jìrìmàntɛ nɔ̀ adiini di tila . Tila fɔ nɔ̀ ká ǎ cɛrimayo nɔ̀ kó bara zaŋa ká Irikpɛ nà à zumanī , à binɛ nà fefēi kó gono àlsilāamayo kàmmɛ̀yo kuna halī hɔ̃̀ nna cìnɛ̀ ká à zùmmu nnā Dìyà kɔ̀kɔ̀rɔ̀ ga.

Nŋa àlsìlàamàtɛ̀rɛ kɔ̀sɛyo kuna nɔ̀ cimi nɔyo Irikpɛ dìyàyo kulu káayo Irikpɛ nà ǹ sàmma sɛ . Ǹ kuluyo di binɛ bara boroo nɔ̀ káayo Irikpɛ nà ǹ tɛ̀ɛmako nna séedayo nna màamaaaci hàyàyo (ǹ dìyàtɛ̀rɛ̀ cimmanīyo ŋmɛnɛ) , ka ǹ samma cɛyo ka kpee nnā À kpèitɛ̀rɛ Fɔlɔnku ká wece si À sɛ bɔɔtayo gànna .

Dìyàyo di kɔ̀kɔ̀rɔ̀ nɔ̀ Muhammadu - Irikpɛ mà à sáabu ka à yéenanī - ká Irikpɛ nà à samma nna À Kpèitɛ̀rɛ àsàriya ká à bara dìyàyo káayo ǹ jina à sɛ ŋmɛnɛ àsàariyayo mɛ̀ɛwì nna ǹ tùusùkpɛ . Nŋa À nà à tɛ̀ɛmako nna séeda bèerì bèerìyo káayo ǹ kuna wɔ̀ɔka à bāyoo bìsayo nɔ̀ al-kurani jìrìmàntɛ ká à bara Hàliitayo Nɔrukpɛ Mɛɛcìnɛ̀ , ka bara Tila ká à jirima bāyoo bìsayo tila kulu ká bɔ̀rɔ̀tɛ̀rɛ bei. Tila nɔ̀ ká à nà hàliitayo mɔnŋɔyanī à tàka kanayo, zǎ hɛ̀ika á gono à kuna dɔ̄ kàmmɛ , nna à mɛɛcìnɛ̀ gurèyo nna à siriyani nna à ŋmɛnɛ àsàriyayo dɔ̄ kàmmɛ . À kuna hìnì cìbayo ka kpee nnā cimi ká ǎ tɔyani bɔnkaani ga anduniya nna laahara kuna yáa gono , à dù ka zummu nɔ̀ nna làarubu cìnɛ̀ .

Dàliiliyo gono tùutuuma laakali ŋmɛnɛyo nna beiyo ŋmɛnɛyo káayo ň cimmanī cimmani zaka ká sika si à kuna ká al-kurani wɔ̀ bara Halìitàkpɛ Ká Ǎ Gɛ̄iyo kó Béeriyo ŋmɛnɛ Sénni nɔ́, nŋa à suu tɛ̀ à 'n bara bɔ̀rɔ̀ tɛyo kuna nɔ̀ à hunu .

Àlsìlàamàtɛ̀rɛ kɔ̀sɛyo kuna kpɛ̌nɛ nɔ̀ cimi nɔyo maláaikayo sɛ, nna cimi nɔyo hanu kɔ̀kɔ̀rɔ̀ sɛ, cìyaama kɛ̄iyo hɛnɛ ká Irikpɛ bà boroo turani zǎ ǹ sáarɛ̄ɛyo kuna domi À mà ǹ gbeiyo kàbu ka ǹ bànayo tɛ ǹ sɛ . Sáa di warka à nà gbei hɛnnɔyo tɛ cimi nɔyo bɔ̀nŋɔ̀ ǎ gonna niima ká à suu béeni aljanna kuna, warka binɛ à gutulù ka gbei làalɔyo tɛ ǎ gonna àzaaba bèerì nìnɛ kuna. Nŋa kpɛ̌nɛ àlsìlàamàtɛ̀rɛ kɔ̀sɛyo kuna nɔ̀ cimi nɔyo hɛ̀ika Irikpɛ jìsi ka à bà tɛ̀ sɛ de ihɛnnɔ de ilàalɔ .

Nŋa Kpɛ̌nɛ àlsìlàamàtɛ̀rɛ̀ bara nɔ̀ hìni fɔ ká ǎ hunayo kulu marguyo, kó sawayo nna làakali nna bɔ̀rɔ tabiya dèidèintɛ ká bɔŋɔ Irikpɛ nà à halìita , nŋa hǔndeyo káayo ň kɛiyo deidei gu à tayo . Hàlìitàkpɛ ká Ǎ Bayo kó bara Jirima Bèerìkpɛ yǎ nà adiini hìni di jìsi À hàlìitayo sɛ , nŋa à bara boroo kulu sɛ nɔ̀ àlhéiri nna bɔnkaani hìni anduniya nna làahara kuna , à binɛ suu dimi fisau dimi kūna , dě binɛ gáa kama ka kǎ gáa kama kūna. Adiini di kuna boroo bara nɔ̀ àfɔ , bɔ̀rɔ̀ fɔ suu bìsayo à hànsìnɛ fàase nna à gbei hɛnnɔ bayo zāka .

Irikpɛ Kpei Bèerì cì : ﴾ Warka à nà gbei hɛnnɔ tɛ , hàrubɔ̀rɔ̀ dě binɛ wèibɔ̀rɔ̀ , kó bara cìmìnɔ̀ɔri hɛnnɔ Iri (Irikpɛ) ba nàmu à 'n huna hunayo hɛnnɔ , Iri 'n yei ka ǹ nɔ ǹ bàna nna bànayo hɛnnɔ ká ǎ bisayo ǹ gbeiyo ká ǹ domu cin kó tɛ (97) ﴿ . [Suuratu annahli : 97] .

Hɛ̀ika Irikpɛ gu à sénni nɔyo gáabi al-kurani jìrìmàntɛ kuna nɔ̀ ká cimi nɔyo Irikpɛ sɛ ká Nŋa nɔ̀ Nɔrukpɛ Ká ň bɔɔta cimi bɔ̀nŋɔ̀ , nna ká àlsìlàamàtɛ̀rɛ̀ nɔ̀ adiini, nna ká (andébi) Muhammadu bara dìyà nɔ̀ , (à kuluyo wɔ̀) bara tilasi nɔ̀ , bɔ̀rɔ sinna fisauyo fɔ à kuna . Ya nɔ̀ binɛ cìyaama kɛiyo hɛnɛ gbeiyo kabuyo nna bàna nɔyo gono. warka à bara ciminɔ̀ɔri cimi ŋmɛnɛ gonna bàa bèerì , warká binɛ à ci cèfèrì hasaara bàtumɛ̀ kpáarɛ ŋmɛnɛ gono à sɛ .

Irikpɛ Kpei Bèerì cì : ﴾ ... Warka à gu Irikpɛ nna À dìyà gānā , Irikpɛ ba à dàmu àljannayo káayo ǹ cìreyo isāyoo zùru , ǹ mó gɔ̀ngɔ̀rɔ̀yo kó gonoyo ǹ kuna , zaŋa ya yáa bara bàa bèerì jìrìmàntɛ duurī (13) ﴿ ﴾ Warka binɛ à nà Irikpɛ nna À dìyà sàabo ka Irikpɛ ŋmɛnɛ tìkì tìkìyo dáari, Irikpɛ ba à dàmu nìnɛ , à mó gɔ̀ngɔ̀rɔ̀yo kó gonoyo à kuna , àzaaba cɛɛnanīyo ŋmɛnɛ mà gono à sɛ (14) ﴿ . [Suuratu annisaai : 13 - 14].