Islam ke tumelo ea Baromuoa ba Allah

Islamo ke tumelo ea Baromuoa ba Allah

Komiti ea Tsebo tlas'a ofisi ea Botsamaisi ba Litaba tsa Bolumeli, Masjid al-Haram (Makkah) le Masjid an-Nabawi (Masjid oa Moporofeta Madinah)

Islam ke boinehelo ho Molimo, ’Mopi oa bokahohle le Molaoli oa bona, le ho Mo mamela ka lerato le ka tlhompho e kholo. Motheo oa Islam ke tumelo ho Molimo: hore Ke Eena ’Mopi, ’me tsohle tse ling ke libopuoa tsa Hae; le hore Ke Eena feela ea tšoaneloang ke ho rapeloa, Ea senang molekane. Ha ho na molimo oa ’nete ntle le Eena. O na le Mabitso a Matle ka ho Fetisisa le Litšobotsi (Boleng bo) tse Phahameng ka ho Fetisisa; O na le phetheho e feletseng e se nang bofokoli. Ha A tsoala ebile Ha A tsoaloa, ’me ha ho letho le tšoanang kapa le lekanang le Eena. Ha A kene (ka har’a libopuoa tsa Hae) kapa A iponahatse ka (sebopeho sa) ntho efe kapa efe ea libopuoa tsa Hae.

’Me Islam ke bolumeli ba Molimo Ea Phahameng, boo A sa amoheleng ho batho bolumeli bo bong ntle le bona. Ke bona bolumeli boo baporofeta bohle (khotso e be holim’a bona) ba ileng ba tla ka bona.

Har’a metheo ea Islam ke tumelo ho baromuoa bohle, le hore Molimo O ile A romela barumuoa hore ba fetisetse litaelo tsa Hae ho bahlanka ba Hae, ’me A ba senolela libuka. Oa ho qetela har’a bona e bile Muhammad (khotso e be holim’a hae). Molimo O ile a mo romela ka molao oa bomolimo oa ho qetela, o hlakolang melao ea barumuoa ba pele ho eena. Molimo O ile a mo tšehetsa ka lipontšo tse kholo, ’me tse kholo ka ho fetisisa ke Qur’an e Halalelang, Lentsoe la Morena Oa mafatše ʼohle, buka e kholo ka ho fetisisa eo botho bo kileng ba e tseba. Ke mohlolo ka moelelo oa eona, mantsoe a eona le moralo oa eona; e na le tataiso e isang ’neteng e lebisang thabong lefatšeng lena le lefatšeng le tlang. E bolokiloe ho fihlela kajeno ka puo ea Searabo eo e ileng ea senoloa ka eona, ha e so fetoloe leha e le ho sothoa—esita le tlhaku e le ’ngoe ha e so fetohe.

Har’a metheo ea Islam ke tumelo ho mangeloi, le tumelo ho Letsatsi la Bofelo leo ho lona Molimo A tla tsosa batho mabitleng a bona ka Letsatsi la Kahlolo hore A ba ahlole ka liketso tsa bona. Ea entseng mesebetsi e metle e le molumeli o tla ba le thabo e sa feleng Paradeiseng (Leholimong); ’me ea sa lumelang a entse liketso tse mpe o tla ba le kotlo e kholo Mollong. Hape har’a metheo ea Islam ke tumelo ho al-Qadr eo Molimo a e laetseng—ebang ke e ntle kapa ke e mpe.

Mamoseleme a lumela hore Jesu ke mohlanka oa Molimo le Moromuoa oa Hae, ’me hase Mora oa Molimo; hobane Molimo O Moholo, ho ke ke ha etsahala hore A be le mosali kapa mora. Empa Molimo O re bolelletse ka har’a Qurʼan hore Jesu e ne e le moporofeta eo Molimo A mo fileng mehlolo e mengata, le hore Molimo O ile a mo romela ho bitsa batho ba hae hore ba rapele Molimo A le Mong feela, ntle le molekane. Hape o re boleletse hore Jesu ha a ka a bolella batho hore ba mo rapele, empa eena ka boeena o ne a rapela ’Mopi oa hae.

Islamo ke bolumeli bo lumellanang le tlholeho ea botho le likelello tse phetseng hantle, ’me e amohela ho meea e lokileng. E hlophisitsoe ke ’Mopi e Moholo bakeng sa libopuoa tsa Hae. Ke tumelo ea botle le thabo ho batho bohle; ha e khetholle morabe holim’a morabe o mong, kapa ’mala holim’a o mong. Batho bohle ba lekana ho eona, ’me ha ho motho ea phahametseng e mong Islamong ntle le ka tekanyo ea mesebetsi ea hae e metle.

Ke setlamo hore motho e mong le e mong ea nang le kelello e phetseng hantle a lumele ho Molimo e le Morena, a lumele ho Islamo e le tumelo, a lumele le ho Muhammad —khotso le litlhohonolofatso li holim’a hae— e le Morumuoa. Taba ena ha se khetho ea motho, hobane Molimo O tla mo botsa ka Letsatsi la Kahlolo ka seo a ileng a se araba barumuoa. Haeba e le molumeli, o tla fumana katleho le pholoho e kholo; empa haeba e le ea sa lumelang, o tla ba le tahlehelo e totobetseng.

Lemoseleme ke motho ea reng: “Ke paka hore ha ho na mang kapa mang ea lokeloang ke khumamelo kantle ho Allah 'me ke paka hore Muhammad ke morumuoa oa Allah,” ho tseba moelelo oa polelo ena le ho e lumela, le ho ithuta melao e meng ea Islamo hanyane ka hanyane, e le hore a etse seo Molimo A mo tlamang ho se etsa.