الطَّارق

Sumpa man sa langit at sa tagapunta sa gabi.

Ano ang nagpabatid sa iyo kung ano ang tagapunta sa gabi?

[Ito] ang bituing tumatagos.

Walang kaluluwa malibang dito ay may isang [anghel na] tagapag-ingat.

Kaya tumingin ang tao mula sa ano siya nilikha.

Nilikha siya mula sa isang likidong pumupulandit,

na lumalabas mula sa pagitan ng gulugod [ng lalaki] at mga tadyang.

Tunay na Siya, sa pagpapabalik dito,1 ay talagang Nakakakaya.

Sa Araw na sisiyasatin ang mga lihim [para ibunyag],

walang ukol sa kanya na anumang lakas ni tagapag-adya.

Sumpa man sa langit na may pagpapabalik,

sumpa man sa lupa na may bitak [ng pagtubo ng halaman];

tunay na [ang Qur’ān na] ito ay talagang isang sinabing pambukod,

at hindi ito ang biru-biro.

Tunay na sila ay nanlansi ng isang panlalansi [laban sa inihatid ng Propeta],

at nanlansi naman Ako ng isang panlalansi [laban sa kanila].

Kaya mag-anta-antabay ka sa mga tagatangging sumampalataya, mag-antabay ka sa kanila nang hinay-hinay.