عنوان: نصاب تعلیم، کتاب التوحید، مرحلہ (ششم)

عنوان: نصاب تعلیم، کتاب التوحید، مرحلہ (ششم)

مختصر تعارف: اس علمی مواد کو مملکت سعودی عرب میں طلبہ کے لیے پیش کردہ تعلیمی نصاب کی تہذیب اور خلاصہ کہا جا سکتا ہے۔ اسے کئی مرحلوں میں تقسیم کیا گیا ہے۔ اس مواد کے ضمن میں علم توحید کے مطالعے سے متعلق حصہ بھی شامل ہے، جسے بارہ (12) مرحلوں میں تقسیم کیا گیا ہے۔ چھٹے مرحلے میں شامل اہم ترین موضوعات یہ ہیں:

ان چار قواعد کا بیان جن کے ذریعے طالبِ علم یہ جان لیتا ہے کہ صرف توحیدِ ربوبیت کا اقرار کسی کو اسلام میں داخل نہیں کرتا، بلکہ توحیدِ الوہیت ضروری ہے۔ اور توحید الوہیت عبادت میں اللہ تعالیٰ کو یکتا ماننے کا نام ہے۔

شرک کی تعریف، اس کی قسموں کا بیان، اور اس کی ہر قسم کی دلیل۔

کفر کی تعریف، اس کی اقسام کا بیان، اس کی ہر قسم کی دلیل اور ہر قسم کی مثالوں کا ذکر۔

نفاق کی تعریف، اس کی اقسام اور ہر قسم کے دلائل کا بیان مثالوں کے ساتھ۔

نواقضِ اسلام کا بیان: نواقض اسلام سے مراد: وہ امور ہیں کہ جب کوئی انسان ان کا ارتکاب کرتا ہے تو اس کا اسلام باطل ہو جاتا ہے اور وہ ملت سے خارج ہو کر کافر ہو جاتا ہے (والعیاذ باللہ)۔

عقیدہ کا ایک مختصر تعارف، جس میں ان حقوق کا بیان شامل ہے، جو ہر مسلمان پر رسول ﷺ، آپ کی ازواجِ مطہرات، آپ کے صحابہ کرام، آپ کے خلفائے راشدین، ائمۂ مسلمین وغیرہ کے تئیں واجب ہوتے ہیں۔

چھٹا مرحلہ

مقدمہ

تمام تعریفیں اس اللہ کے لیے ہیں، جس نے قلم کے ذریعہ علم سکھایا۔ جس نے انسان کو وہ سکھایا جسے وہ نہیں جانتا تھا۔ درود وسلام نازل ہو نبی امی پر جن کو اللہ نے اس لیے مبعوث فرمایا کہ لوگوں کو تاریکیوں سے نکال کر روشنی کی طرف لائیں۔ حمد وصلاۃ کے بعد:

اللہ عز وجل کی توحید کو اختیار کرنا سب سے بڑا واجب ہے، اس کا علم حاصل کرنا سب سے معزز اور افضل علم ہے اور یہی وہ بنیاد ہے جس پر اعمال کی صحت اور مقبولیت کا دار ومدار ہے۔ بندوں کو تمام ضرورتوں سے بڑھ کر اس کی ضرورت ہے، کیوں کہ پروردگار، معبود اور خالق کو اس کے اسما و صفات اور افعال کے ذریعے جانے بغیر نہ دلوں کو زندگی ملتی ہے، نہ نعمت وخوش حالی حاصل ہوسکتی ہے اور نہ اطمینان وسکون۔ اسی طرح دین میں تفقہ (سمجھ) حاصل کرنا اور عبادات جیسے طہارت اور نماز وغیرہ کی ادائیگی کا طریقہ جاننا سعادت مندی کی علامت اور اس بات کی نشانی ہے کہ اللہ تعالیٰ نے اپنے بندے کے ساتھ بھلائی کا ارادہ فرمایا ہے۔ نبی کریم ﷺ کا ارشاد ہے: "اللہ تعالیٰ جس کے ساتھ بھلائی کا ارادہ فرماتا ہے، اسے دین کی سمجھ عطا فرما دیتا ہے"۔[1] [1] صحیح بخاری، کتاب العلم، باب: من يرد الله به خيرًا يفقهه في الدين، حدیث نمبر (7)۔

اسی اہمیت کے پیش نظر مکتب توعیۃ الجالیات نے طلبہ کے دلوں میں صحیح عقیدہ کو راسخ کرنے کی غرض سے توحید کا مادہ پڑھانے کا خاص اہتمام کیا ہے، تاکہ طلبہ اپنے دینی احکام سے متعلق بصیرت و آگہی حاصل کرسکیں۔

مادہ توحید کا یہ چھٹا مرحلہ ان چار قواعد کے ذکر پر مشتمل ہے جن کے ذریعے شرک کی سنگینی اور توحید کی اہمیت واضح ہوتی ہے۔ اس میں شرک کی تعریف اور اس کی قسموں کی وضاحت، کفر کا معنی اور اس کی انواع، نفاق اور اس کے شعبوں کا بیان اور کتاب اور سنت صحیحہ سے ان سب کے دلائل بھی شامل ہیں۔ اس کے ساتھ ہی ان نواقضِ اسلام کو بھی بیان کیا گیا ہے جو انسان کو ملتِ اسلام سے خارج کر دیتے ہیں۔ اسی طرح عقیدے کے متعلق ایک مختصر خاکہ بھی پیش کیا گیا ہے۔

ہر سبق کے لیے کچھ خاص اہداف مقرر کیے گئے ہیں، جو مادہ کے مزاج سے ہم آہنگ ہیں۔ اختصار، واضح اسلوب، موضوعات میں ترتیب اور پہلے پڑھے گئے سبق سے اس کا ربط بحال رکھنے کا پورا اہتمام کیا گیا ہے۔ ہر سبق کے لیے کچھ سوالات بھی بنائے گئے ہیں اور استاد کے لیے اہم ہدایات بھی پیش کی گئی ہیں، تاکہ ان کی روشنی میں وہ مطلوبہ مقاصد کو حاصل کرنے کی کوشش کریں۔

معلم کی خدمت میں چند نصیحتیں:

1- اللہ تعالی کے لیے مخلص ہونا عمل کی قبولیت کے لیے شرط ہے۔ اس لیے اپنا عمل صرف اللہ پاک کے لیے خالص رکھیے، آپ دنیا و آخرت میں کامیاب رہیں گے۔

2- امانت کی حفاظت نجات کا ذریعہ ہے اور آپ -اے میرے معلم بھائی- اسلام کی ایک سرحد کے نگہبان اور مسلم بچوں کی عقل و فطرت کے امین ہیں؛ لہذا امانت کی حفاظت کریں، تاکہ آپ دنیا و آخرت میں کامیابی سے ہمکنار ہو سکیں۔

3- بلاشبہ مضمونِ توحید کی تعلیم دینا ایک عظیم ترین عمل ہے، کیونکہ بندوں کے لیے فلاح اور دنیا کی رسوائی اور آخرت کے عذاب سے نجات صرف توحید کی معرفت اور اس پر عمل کرنے میں مضمر ہے۔ لہٰذا طلبہ کے دلوں میں صحیح عقیدہ راسخ کرنے کی بھرپور کوشش کریں اور آپ جن اعلیٰ اصولوں اور اقدار کی دعوت دیتے ہیں، خود ان کے سچے ترجمان اور زندہ مثال بنیں۔

4- جب آسمان میں گھنگھور گھٹا چھا جائے، بجلی چمکنے لگے، بادل گرجنے لگے، بارش ہونے لگے اور اس طرح کے دیگر واقعات رونما ہوں، جن سے مسلمان کے اندر ایمان کے جذبات متحرک ہوجاتے ہیں، تو ان مواقع کو غنیمت جانتے ہوئے اللہ کی وحدانیت اور قدرت کے بارے میں گفتگو کریں۔

5- مثالوں کے ذریعہ مادہ کو آسان بناکر پیش کرنے اور سبق کو زمینی حقائق سے جوڑ کر سمجھانے سے مادہ کے تئیں طلبہ کے اندر محبت پیدا ہوتی ہے، جس کے نتیجے میں وہ اس مادہ کو سیکھنے اور اس پر عمل کرنے کے لیے آمادہ ہوتے ہیں۔

اخیر میں ہم آپ کو نبی صلی اللہ علیہ وسلم کی یہ بشارت سناتے ہیں: “مومن کو اس کے اعمال اور نیکیوں میں سے اس کے مرنے کے بعد جن چیزوں کا ثواب پہنچتا رہتا ہے، ان میں وہ علم بھی شامل ہے جو اس نے سکھایا اور پھیلایا ہو۔”[2] [2] سنن ابن ماجہ، حدیث نمبر: (242)۔

وصلی اللہ علی نبینا محمد وعلی آلہ وصحبہ وسلم (اللہ تعالیٰ ہمارے نبی محمد، آپ کی آل اور آپ کے تمام صحابہ پر اپنی رحمتیں نازل فرمائے اور سلامتی عطا فرمائے)۔

پہلا سبق :

اول: توحید کی اہمیت

میں [3] عرش عظیم کے رب، اللہ کریم سے دعا گو ہوں کہ وہ دنیا وآخرت میں آپ کا حامی وناصر ہو۔ آپ جہاں کہیں رہیں اللہ آپ کو بابرکت بنائے اور اپنے ان بندوں میں شامل کردے جو نعمتوں کے ملنے پر شکر گذار ہوتے ہیں، آزمائشوں میں صبر کرتے ہیں اور گناہ سرزد ہونے پر استغفار کرتے ہیں۔ بلا شبہ یہ تینوں خصلتیں سعادت کی علامت ہیں۔ [3] اس کتابچے کا عنوان: "قواعد اربعہ (چار قاعدے)" ہے۔

یہ بات جان لیں — اللہ آپ کی رہنمائی اپنی اطاعت و فرماں برداری کی طرف فرمائے — کہ حنیفیت — یعنی ملتِ ابراہیمی — یہ ہے کہ آپ دین کو اللہ کے لیے خالص کرتے ہوئے صرف اسی کی عبادت کریں۔ اسی کام کا اللہ تعالیٰ نے تمام لوگوں کو حکم دیا ہے اور اسی غرض سے انھیں پیدا فرمایا ہے۔

جیسا کہ اللہ تعالیٰ کے اس ارشاد سے واضح ہے: "میں نے جنات اور انسانوں کو محض اسی لیے پیدا کیا ہے کہ وه صرف میری عبادت کریں۔" [سورہ ذاریات : 56]۔

لہذا جب آپ نے یہ جان لیا کہ اللہ تعالیٰ نے آپ کو صرف اپنی عبادت کے لیے پیدا فرمایا ہے، تو یہ بھی جان لیں کہ کوئی بھی عبادت اسی وقت عبادت کہلائے گی جب وہ توحید کے ساتھ ہو، جیسے نماز اسی وقت نماز کہلائے گی جب وہ طہارت کے ساتھ ادا کی جائے۔ اسی لیے جب شرک عبادت میں داخل ہو جائے، تو عبادت فاسد ہو جاتی ہے۔ بالکل ویسے ہی جیسے حدث سے طہارت فاسد ہو جاتی ہے۔

سبق کی ہدایات :

* سعادت اور خوش بختی راضی بہ رضا رہنے اور امن و امان کے احساس کا نام ہے۔ اکثر لوگ مال و دولت، لباس، سواری اور تفریحی وسائل میں سعادت اور خوش بختی تلاش کرتے ہیں، لیکن محض ان چیزوں کے مل جانے سے سعادت اور خوش بختی حاصل نہیں ہو سکتی۔

* حقیقی سعادت اور خوش بختی صرف تین امور سے نصیب ہوتی ہے، جو اللہ پر ایمان اور اس کا قرب حاصل کرنے میں پنہاں ہیں۔ وہ تین امور یہ ہیں:

اول: اپنے اوپر اللہ تعالیٰ کے فضل و کرم کا اعتراف اور اس کی نعمتوں پر اس کا شکر ادا کرنا۔

دوم : اللہ کی قضا و قدر اور اس کی حکمت پر ایمان لانا اور اس کی طرف سے آنے والی آزمائشوں پر صبر کرنا۔

سوم : توبہ و استغفار کے ذریعے ہمیشہ اللہ کی طرف رجوع کرتے رہنا، خاص طور پر گناہ کے ارتکاب کے وقت۔

* ابراہیم علیہ الصلاۃ والسلام (دین) حنیفیت لے کر آئے تھے، جس سے مراد عبادت کو اللہ تعالی کے لیے خالص کر دینا ہے۔ محمد ﷺ بھی اسی کو لے کر تشریف لائے اور اسی سے انسانیت کو سعادت حاصل ہو سکتی ہے۔

* عبادت توحید کے بغیر درست نہیں ہوسکتی، جیسا کہ اللہ سبحانہ وتعالی نے فرمایا ہے : "آپ کہہ دیجیے! کہ مجھے حکم دیا گیا ہے کہ اللہ تعالیٰ کی اس طرح عبادت کروں کہ اسی کے لیے عبادت کو خالص کر لوں۔" [سورہ زمر : 11]۔

سوالات:

س1: درج ذیل جملے کا صحیح جواب چنیں:

حقیقی سعادت صرف ........................................ سے ہی حاصل ہوتی ہے۔

الف- مال۔ ب- وسائلِ تفریح۔ ج- استغفار کرنا، صبر سے کام لینا اور اللہ تعالی کا شکر ادا کرنا۔

س2: اللہ نے انس و جن کو کیوں پیدا کیا؟

س3: حنیفیت کیا ہے؟

س4: اللہ تعالیٰ کے درج ذیل فرمان کا عنوان تحریر کریں: "میں نے جنات اور انسانوں کو محض اسی لیے پیدا کیا ہے کہ وه صرف میری عبادت کریں۔" [سورہ ذاریات : 56]۔

س5 : اگر آپ سے کوئی گناہ یا معصیت سرزد ہو جائے، تو اللہ تعالیٰ کی رضا حاصل کرنے کے لیے آپ کیا کریں گے؟

دوسرا سبق

توحید کا اقرار

صرف توحید ربوبیت کا اقرار کرنا اسلام میں داخل نہیں کرتا۔

جب آپ نے یہ جان لیا کہ عبادت میں جب شرک کی آمیزش ہوجائے تو شرک عبادت کو فاسد اور عمل کو برباد کر دیتا ہے اور اس کا مرتکب ہمیشہ ہمیش کے لیے جہنم کا مستحق ہوجاتا ہے، تو آپ کو اس بات کا بخوبی اندازہ ہوچکا ہوگا کہ آپ کے لیے سب سے اہم اور ضروری کام یہ جاننا ہے کہ شرک کیا ہے۔ شاید اللہ تعالیٰ آپ کو شرک کے جال سے نجات عطا کرے، جس کے بارے میں اللہ تعالیٰ کا فرمان ہے : "یقیناً اللہ تعالیٰ اپنے ساتھ شریک کیے جانے کو نہیں بخشتا اور اس کے سوا جسے چاہے بخش دیتا ہے اور جس نے اللہ تعالیٰ کے ساتھ شریک بنایا اس نے بہت بڑا گناه کیا اور بہتان باندھا۔" [سورہ نساء: 48]۔

شرک کیا ہے، یہ جاننے کے لیے ان چار قواعد کا جاننا ضروری ہے، جنہیں اللہ تعالی نے اپنی کتاب قرآن کریم میں ذکر فرمایا ہے:

پہلا قاعدہ :

یہ جان لیں کہ جن کفار و مشرکین سے اللہ کے رسول ﷺ نے جنگ کی، وہ اس بات کا اقرار کرتے تھے کہ اللہ تعالیٰ ہی خالق اور مدبر ہے۔

لیکن اس اقرار نے انہیں اسلام میں داخل نہیں کیا۔

اس کی دلیل اللہ تعالی کا یہ فرمان ہے: "آپ کہہ دیجیے کہ وه کون ہے جو تم کو آسمان اور زمین سے رزق پہنچاتا ہے یا وه کون ہے جو کانوں اور آنکھوں پر پورا اختیار رکھتا ہے اور وه کون ہے جو زنده کو مرده سے نکالتا ہے اور مرده کو زنده سے نکالتا ہے اور وه کون ہے جو تمام کاموں کی تدبیر کرتا ہے؟ ضرور وه یہی کہیں گے کہ اللہ، تو ان سے کہہ دیجیے کہ تم پھر کیوں نہیں ڈرتے؟" [سورہ يونس: 31]۔

سبق کی ہدایات :

* توحید نجات کا راستہ ہے۔ جو شخص توحید کی حالت میں اللہ سے ملاقات کرے گا، وہ نجات پائے گا اور کامیاب ہوگا۔ جبکہ شرک ہلاکت کا راستہ ہے۔ جو شخص شرک کی حالت میں اللہ سے ملاقات کرے گا، وہ ناکام اور نامراد ہوگا۔

* شرک ایک نجاست ہے، جو عبادت میں داخل ہو جائے تو اسے فاسد کر دیتا ہے اور اس کے ثواب کو ضائع کر دیتا ہے۔ لہٰذا مسلمان پر واجب ہے کہ وہ خود کو اس سے آلودہ ہونے سے محفوظ رکھے۔

* جو شخص اللہ تعالیٰ کے وجود کا اقرار کرتا ہے، اور اس بات کا ایمان رکھتا ہے کہ وہ کا‍‌ئنات کا خالق ہے، وہی لوگوں کے معاملات کی تدبیر کرتا اور کائنات کے امور کو چلاتا ہے، تو اس کا یہ اقرار درست ہے، لیکن وہ اس بنا پر مسلمان نہیں ہو جاتا، جب تک کہ اس بات پر ایمان نہ لے آئے کہ اس کے سوا کوئی عبادت کے لائق نہیں ہے اور جب تک کہ تنہا اسی کی عبادت نہ کرنے لگے جس کا کوئی شریک نہیں ہے۔

سوالات:

س1 : وہ کیا چیز ہے جو عبادت میں شامل ہو جائے تو اسے فاسد کر دیتی ہے اور عمل کو ضائع کر دیتی ہے؟

س2 : انسان کی ہلاکت کا راستہ کیا ہے؟

س3: اللہ کے عذاب سے نجات کا راستہ کیا ہے؟

سوال 4 : اس بات کی دلیل ذکر کریں کہ اللہ شرک کو نہیں بخشتا۔

س5: توحیدِ ربوبیت کی تعریف کریں۔

س6: کیا توحید ربوبیت کا اقرار انسان کے مسلمان ہونے کے لیے کافی ہے؟

تیسرا سبق

بتوں سے قربت اور شفاعت طلب کرنا شرک ہے

دوسرا قاعدہ :

مشرکینِ عرب کہتے تھے کہ ہمارا غیر اللہ کو پکارنے اور ان کی طرف متوجہ ہونے کا مقصد صرف شفاعت اور تقربِ الٰہی کا حصول ہے۔

تقرب الٰہی کے حصول کی دلیل یہ فرمان الٰہی ہے: "اور جن لوگوں نے اس کے سوا اولیا بنا رکھے ہیں (اور کہتے ہیں) کہ ہم ان کی عبادت صرف اس لیے کرتے ہیں کہ یہ (بزرگ) اللہ کی نزدیکی کے مرتبہ تک ہماری رسائی کرا دیں، یہ لوگ جس بارے میں اختلاف کر رہے ہیں اس کا (سچا) فیصلہ اللہ (خود) کرے گا۔ جھوٹے اور ناشکرے (لوگوں) کو اللہ تعالیٰ راه نہیں دکھاتا۔" [سورہ زمر: 3][4]۔ [4] قُربت: اس کے معنی مقام اور منزلت کے ہیں۔ 'لِيُقَرِّبُونَا إِلَى اللّٰهِ' کے معنی ہيں: تاکہ وہ اللہ کے یہاں ہمیں مقام و مرتبہ دلا دیں۔

جب کہ حصولِ شفاعت کی دلیل اللہ تعالیٰ کا یہ فرمان ہے: "اور یہ لوگ اللہ کے سوا ایسی چیزوں کی عبادت کرتے ہیں جو نہ ان کو ضرر پہنچا سکیں اور نہ ان کو نفع پہنچا سکیں اور کہتے ہیں کہ یہ اللہ کے پاس ہمارے سفارشی ہیں۔" [سورہ يونس : 18]۔

سبق کی ہدایات :

* شفاعت: کسی دوسرے کو فائدہ پہنچانے یا اسے ضرر سے بچانے کے لیے واسطہ بننا ہے۔

* دور جاہلیت کے اکثر لوگ یہ اعتقاد رکھتے تھے کہ ان کے معبود اللہ کے ہاں ان کا واسطہ بنتے ہیں۔ چنانچہ وہ ان کی عبادت اس لیے کرتے تھے کہ وہ ان کے رب کے پاس ان کی سفارش کردیں۔ یہ ایک باطل عقیدہ ہے؛ کیونکہ یہ اللٰہ پر افترا ہے اور کسی نبی نے اس کا حکم نہیں دیا۔

سوالات:

س1 : وہ کون لوگ ہیں جو کہتے ہیں کہ اولیا کو پکارنے اور ان کی طرف متوجہ ہونے کا ہمارا مقصد صرف شفاعت اور تقربِ الٰہی کا حصول ہے؟

س2 : اہل جاہلیت اپنے معبودوں کے بارے میں کیا عقیدہ رکھتے تھے؟

س 3 : کیا دور جاہلیت کے معبود اپنے پرستاروں کو نفع پہنچا سکتے تھے یا اللہ کے یہاں ان کی سفارش کر سکتے تھے؟ اور کیوں؟

س4: جو شخص اپنے اور اللہ کے درمیان کسی کو واسطہ بناتا ہے اسے کیا کہا جاتا ہے؟

س 5 : اس بات کی کیا دلیل ہے کہ دور جاہلیت کے لوگ اپنے معبودوں سے سفارش طلب کرتے تھے؟

چوتھا سبق

شفاعت کی اقسام

شفاعت کی دو قسمیں ہیں:

منفی شفاعت اور مثبت شفاعت:

الف- منفی شفاعت : وہ شفاعت جس کے ذریعے غیر اللہ سے ایسی چیز طلب کی جائے جس پر اللہ کے علاوہ کوئی دوسرا قادر نہ ہو۔

اس کی دلیل اللہ تعالیٰ کا یہ فرمان ہے: "اے ایمان والو! جو ہم نے تمہیں دے رکھا ہے اس میں سے خرچ کرتے رہو اس سے پہلے کہ وه دن آئے جس میں نہ تجارت ہوگی، نہ دوستی اور نہ شفاعت اور کافر ہی ﻇالم ہیں۔" [ سورہ بقرہ: 254]۔

ب- مثبت شفاعت: ایسی شفاعت، جو اللہ سے طلب کی جائے۔

شفاعت کرنے والے کی اسے شفاعت کا حق دے کر عزت افزائی کی جاتی ہے اور شفاعت اسی كى کی جاتی ہے جس کے قول و عمل سے اللہ تعالیٰ راضی ہو اور اس کے لیے شفاعت کی اجازت دے دے۔

جیسا کہ اللہ تعالیٰ کا ارشاد ہے: "کون ہے جو اس کی اجازت کے بغیر اس کے سامنے شفاعت کرسکے...۔" [سورہ بقرہ : 255]۔

سبق کی ہدایات :

* اللہ کے یہاں شفاعت براہِ راست اسی سے مانگنی چاہیے؛ اس طرح کہ شفاعت کا طلب گار -مثال کے طور پر- یوں کہے: یا الٰہی! میرے سلسلہ میں اپنے نبی محمد ﷺ کو شفاعت کی اجازت مرحمت فرما۔

* شفاعت اللہ تعالیٰ کے یہاں صرف دو شرطوں کے ساتھ ہی حاصل ہوگی:

1- اللہ تعالیٰ کا اس شخص سے راضی ہونا جس کے لیے سفارش کی جائے۔ 2- اللہ تعالیٰ کا شافع (سفارش کرنے والے) کو شفاعت کی اجازت دینا۔

* بتوں یا قبر والوں کی طرف متوجہ ہو کر انہیں پکارنا اور ان سے سفارش طلب کرنا باطل اور اللہ کے ساتھ شرک ہے۔

* شفاعت کی قبولیت دراصل اللہ تعالیٰ کی طرف سے شافع (سفارش کرنے والے) کے لیے عزت و اکرام اور اس کی فضیلت کا اظہار ہے اور مشفوع لہ (جس کی سفارش کی جائے اس) کے لیے نفع کا باعث ہے۔

سوالات:

س 1 : شفاعت کی اقسام بیان کریں۔

س2 : منفی شفاعت کی تعریف کریں اور اس کی دلیل ذکر کریں۔

س3 : ثابت شفاعت کی تعریف کریں اور اس کی دلیل ذکر کریں۔

س4 : خالی جگہوں کو پر کریں:

شفاعت درج ذیل دو شرطوں کے بغیر حاصل نہیں ہوگی:

- ......................................................... کے لیے اللہ تعالی کی اجازت۔

- اللہ تعالی کا ................................ سے راضی ہونا۔

س 5 : کیا قبر والوں سے سفارش طلب کرنا جائز ہے؟ اور کیوں؟

پانچواں سبق

غیر اللہ کے لیے انجام دی جانے والی ہر عبادت گمراہی ہے۔

تیسرا قاعدہ :

نبی ﷺ کا ظہور ایسے لوگوں میں ہوا تھا، جو عبادت و بندگی کے معاملے میں الگ الگ راہوں پر چل رہے تھے: ان میں کچھ لوگ فرشتوں کی پوجا کرتے تھے، کچھ لوگ انبیا و صالحین کو پوجتے تھے، کچھ لوگ درختوں اور پتھروں کی پوجا کرتے تھے اور کچھ لوگ سورج اور چاند کی عبادت کرتے تھے۔

ان تمام لوگوں سے رسول اللہ ﷺ نے جنگ کی اور ان کے درمیان کوئی تفریق نہیں کی۔

اس کی دلیل اللہ تعالیٰ کا یہ فرمان ہے: "اور تم ان سے اس حد تک لڑو کہ ان میں فساد عقیده نہ رہے ۔ اور دین اللہ ہی کا ہو جائے..." [5] [ سورہ انفال: 39]۔ [5] یہاں فتنہ سے مراد: شرک اور کفر ہے۔

سورج اور چاند کی پرستش کی دلیل: اللہ تعالیٰ کا یہ فرمان ہے: "اور دن، رات اور سورج چاند بھی (اسی کی) نشانیوں میں سے ہیں۔ تم سورج کو سجده نہ کرو، نہ چاند کو، بلکہ سجده اس اللہ کو کرو، جس نے ان سب کو پیدا کیا ہے، اگر تمہیں اس کی عبادت کرنی ہے تو۔" [سورہ فصلت: 37]۔

اور فرشتوں کی عبادت کی دلیل: اللہ تعالیٰ کا یہ فرمان ہے: "اور یہ نہیں (ہو سکتا) کہ وه تمہیں فرشتوں اور نبیوں کو رب بنا لینے کا حکم کرے۔" [سورہ آل عمران: 80]۔

سبق کی ہدایات :

* کائنات میں صرف ایک اللہ کے سوا کوئی معبود برحق نہیں ہے۔

* کفر ایک ہے اور معبودان مختلف ہیں۔ مثلا بتوں، سورج، چاند، فرشتوں، جنات اور ان جیسی دیگر چیزوں کی عبادت۔ ان معبودوں یا ان میں سے بعض کی عبادت کرنے والے کافر ہیں اور "کفر ایک ہی ملت ہے"۔ اسی لیے رسول ﷺ نے اپنی دعوت اور جہاد میں ان کے درمیان کسی طرح کا کوئی فرق نہیں کیا ہے۔

سوالات:

س1: ظہورِ اسلام سے قبل موجود بعض عبادتوں کا ذکر کریں۔

س۲: خالی جگہوں کو پر کریں:

أ - اللہ تعالیٰ نے فرمایا ہے : (لَا تَسۡجُدُواْ لِلشَّمۡسِ وَلَا لِلۡقَمَرِ وَٱسۡجُدُواْۤ لِلَّهِۤ...........................).

ب - اللہ تعالیٰ نے فرمایا ہے : (وَلَا يَأۡمُرَكُمۡ أَن تَتَّخِذُواْ ٱلۡمَلَٰٓئِكَةَ وَٱلنَّبِيِّـۧنَ أَرۡبَابًاۚ.....................).

س 3 : اس شخص کی کیا سزا ہوگی جو کسی بھی طرح کی کوئی عبادت غیر اللہ کے لیے بجا لائے؟

چھٹا سبق

انبیا، صالحین، درختوں اور پتھروں کی عبادت شرک ہے۔

انبیائے کرام کی عبادت کی دلیل:

اللہ تعالیٰ کا یہ قول ہے : "اور وه وقت بھی قابل ذکر ہے جب کہ اللہ تعالیٰ فرمائے گا کہ اے عیسیٰ ابن مریم! کیا تم نے ان لوگوں سے کہہ دیا تھا کہ تم اللہ کے علاوہ مجھ کو اور میری ماں کو معبود قرار دے لو! عیسیٰ عرض کریں گے کہ میں تو تجھ کو منزہ سمجھتا ہوں۔ مجھ کو کسی طرح زیبا نہ تھا کہ میں ایسی بات کہتا جس کے کہنے کا مجھ کو کوئی حق نہیں۔ اگر میں نے کہا ہوگا تو تجھ کو اس کا علم ہوگا۔ تو، تو میرے دل کے اندر کی بات بھی جانتا ہے اور میں تیرے نفس میں جو کچھ ہے اس کو نہیں جانتا۔ تمام غیبوں کا جاننے واﻻ تو ہی ہے۔" [سورہ مائدہ: 116]۔

نیک اور صالح لوگوں کی عبادت کی دلیل:

اللہ تعالیٰ کا یہ فرمان ہے: "جنہیں یہ لوگ پکارتے ہیں خود وه اپنے رب کے تقرب کی جستجو میں رہتے ہیں کہ ان میں سے کون زیاده نزدیک ہوجائے۔ وه خود اس کی رحمت کی امید رکھتے اور اس کے عذاب سے خوفزده رہتے ہیں۔" [سورہ اسراء: 57]۔

پتھروں اور درختوں کی عبادت کی دلیل:

اللہ تعالیٰ کا یہ فرمان ہے : "کیا تم نے ﻻت اور عزیٰ کو دیکھا؟ اور تیسرے پچھلے منات کو؟" [6] [سورہ نجم: 19 -20]۔ [6] یہ ان معبودوں کے نام ہیں جن کی عبادت مشرکین اسلام سے قبل جزیرۂ عرب میں کیا کرتے تھے۔ لات: ایک شخص تھا جو حاجیوں کے لیے ستو گھولا کرتا تھا۔ جب وہ مر گیا تو لوگوں نے اس کی عبادت شروع کر دی۔ عُزیٰ : کہا جاتا ہے کہ یہ قبیلۂ غطفان کا بُت تھا۔ مناۃ : مذکورہ بالا دونوں بتوں کے بعد تیسرا بُت، جو قبیلۂ ہذیل اور خزاعہ کا معبود تھا۔

ابو واقد لیثی رضی اللہ عنہ سے روایت ہے کہ انہوں نے کہا ہے : "ہم نبی کریم ﷺ کے ساتھ (غزوۂ) حنین کے لیے نکلے۔ ہم نئے نئے مسلمان ہوئے تھے۔ مشرکین کا ایک بیری کا درخت تھا، جہاں وہ جا کر رُکتے تھے اور اس پر اپنا اسلحہ لٹکایا کرتے تھے۔ اسے ”ذات انواط“ کہا جاتا تھا۔ چنانچہ راستے میں ہم لوگ ایک بیری کے درخت سے گزرے، تو ہم نے عرض کیا کہ اے اللہ کے رسول! (ﷺ) ہمارے لیے بھی ایک ذات انواط مقرر فرما دیجیے، جیسا کہ ان کا ایک ذات انواط ہے۔ لہذا رسول اللہ ﷺ نے فرمایا: ”اللہ اکبر! یہی تو سابقہ قوموں کے طریقے ہیں۔ اس ذات کی قسم جس کے ہاتھ میں میری جان ہے! تم نے تو وہی بات کہہ دی جو بنی اسرائیل نے کہی تھی: ﴿اجْعَلْ لَنَا إِلٰھًا كَمَا لَهُمْ آلِهَةٌ﴾ (-کہ اے موسیٰ!- ہمارے لیے بھی ایک معبود ویسا ہی مقرر کر دیجیے، جیسے ان کے یہ معبود ہیں)۔ (موسیٰ علیہ السلام نے) فرمایا: ﴿إِنَّكُمْ قَوْمٌ تَجْهَلُونَ﴾ (واقعی تم لوگوں میں بڑی جہالت ہے۔) دیکھو، تم بھی پہلی امتوں کے طریقوں پر چل پڑوگے۔"[7] [7] اس حدیث کو ترمذی نے اپنی سنن، کتاب الفتن، باب: ما جاء لتركبن سنن من كان قبلكم، حدیث نمبر (2180)، (4/475) میں روایت کیا ہے۔ ترمذی نے اسے "حدیث حسن صحیح" کہا ہے۔ اسے احمد (5/218) اور طبرانی نے المعجم الکبیر (17/21) میں بھی روایت کیاہے۔ مذکورہ الفاظ طبرانی کے ہيں۔

سبق کی ہدایات :

* انبیاء کرام اور صالحین اس بات کو ہرگز گوارا نہیں کرتے کہ لوگ ان کی عبادت کریں، بلکہ وہ اس طرح کے لوگوں سے اپنی براءت و بیزاری کا اظہار کرتے ہیں۔

* جو لوگ عیسیٰ علیہ الصلاۃ والسلام اور ان کی والدہ کی عبادت کرتے ہیں، یہ ان کا اپنا خود ساختہ عمل ہے۔ نہ تو اللہ نے انھیں اس کا حکم دیا ہے اور نہ ہی عیسیٰ علیہ السلام نے۔

* انبیاء و صالحین اللہ کے محتاج ہیں اور عملِ صالح کے ذریعے اس کا تقرب حاصل کرتے ہیں، تو پھر اللہ کو چھوڑ کر ان کی کیسے عبادت کی جا سکتی ہے بھلا؟!

* درختوں، پتھروں اور صالحین کی قبروں سے برکت حاصل کرنا اللہ کے ساتھ شرک کرنا ہے۔

* مشرکین درختوں، پتھروں اور قبروں سے متعلق برکت کا جو عقیدہ رکھتے ہیں، وہ محض وہم ہے جس کی کوئی حقیقت نہیں ہے، کیونکہ وہ تو محض عام درخت اور پتھر ہیں۔ اسی لیے اللہ سبحانہ و تعالیٰ نے فرمایا ہے : "دراصل یہ صرف نام ہیں جو تم نے اور تمہارے باپ دادوں نے ان کے رکھ لیے ہیں۔ اللہ نے ان کی کوئی دلیل نہیں اتاری۔" [سورہ نجم : 23]۔

سوالات:

س 1 : بعض صحابہ رضی اللہ عنہم نے رسول ﷺ سے یہ درخواست کیوں کی کہ آپ ﷺ ان کے لیے ذات انواط مقرر فرما دیں؟

س2 : کیا رسول اللہ صلی اللہ علیہ وسلم نے اپنے صحابہ کے لیے مشرکین کی طرح ذاتِ انواط مقرر کرنے پر رضامندی ظاہر کی؟

س3 : صالحین کی عبادت شرک ہے، اس کی دلیل ذکر کریں۔

س4 : اس بات کی دلیل ذکر کیجیے کہ پتھروں کی عبادت شرک ہے۔

س5 : اس بات کی دلیل بیان کریں کہ انبیا کی عبادت شرک ہے۔

ساتواں سبق:

دور حاضر کے لوگوں کا سنگین شرک

چوتھا قاعدہ :

ہمارے زمانے کے مشرکین، شرک کے معاملے میں، پہلے زمانے کے مشرکین سے زیادہ سخت ہیں؛ کیوں کہ پہلے زمانے کے مشرکین خوش حالی کے وقت شرک کرتے تھے اور مصیبت کے وقت خالص اللہ ہی کو پکارتے تھے، جب کہ ہمارے زمانے کے مشرکین خوش حالی اور مصیبت دونوں حالتوں میں ہمیشہ شرک کا ارتکاب کرتے ہیں۔

اس کی دلیل اللہ تعالیٰ کا یہ فرمان ہے: "پس یہ لوگ جب کشتیوں میں سوار ہوتے ہیں تو اللہ تعالیٰ ہی کو پکارتے ہیں اس کے لئے عبادت کو خالص کر کے، پھر جب وه انہیں خشکی کی طرف بچا ﻻتا ہے، تو اسی وقت شرک کرنے لگتے ہیں۔" [سورہ عنکبوت: 65]۔

یہ رسالہ مکمل ہوا۔ درود و سلام نازل ہو محمدﷺ پر اور آپ کے خاندان اور آپ کے اصحاب پر۔ [8] [8] کتابچہ: "قواعد اربعہ" مکمل ہوا۔

سبق کی ہدایات :

* ان معبودوں کی عبادت کے باطل ہونے کی ایک دلیل یہ بھی ہے کہ جو لوگ ان کی عبادت کرتے ہیں، وہ مصیبت کے وقت انہیں چھوڑ دیتے ہیں اور صرف ایک اللہ کی پناہ لیتے ہیں۔

* جو شخص مصیبت کی حالت میں بھی اپنی گمراہی پر ڈٹا رہے، وہ شرک کے معاملے میں اس شخص سے زیادہ سخت ہے جو خوش حالی کے وقت تو شرک کرے مگر مصیبت کی حالت میں اس سے کنارہ کش ہو جائے۔

* اس زمانے میں جو لوگ قبروں کی عبادت کرتے ہیں، وہ خوش حالی اور پریشانی دونوں حالتوں میں قبر میں مدفون لوگوں کو پکارتے ہیں۔ یہ پہلے کے لوگوں کی نسبت زیادہ سنگین شرک ہے۔

سوالات:

س1: ہمارے زمانے کے مشرکین اور پہلے زمانے کے مشرکین میں کیا فرق ہے؟

س2: بتوں کی عبادت کے باطل ہونے کی کیا دلیل ہے؟

س 3: اس بات کی کیا دلیل ہے کہ مشرکین پریشانی کے وقت بس ایک اللہ کی عبادت کرتے تھے؟

س4: چاروں قواعد اجمالاً ذکر کریں۔

آٹھواں سبق

شرک اور اس کی قسمیں

جان لیجیے کہ توحید کی ضد شرک ہے، اور اس کی تین قسمیں ہیں:

شرک اکبر، شرک اصغر اور شرک خفی۔

شرک اکبر کی دلیل :

اللہ تعالیٰ یہ کا قول ہے : "یقیناً اللہ تعالیٰ اپنے ساتھ شریک کیے جانے کو نہیں بخشتا اور اس کے سوا جسے چاہے بخش دیتا ہے اور جس نے اللہ تعالیٰ کے ساتھ شریک ٹھہرایا اس نے بہت بڑا گناه کیا اور بہتان باندھا۔" [سورہ نساء: 48]۔

مزید ارشاد باری تعالی ہے : "...حاﻻں کہ خود مسیح نے ان سے کہا تھا کہ اے بنی اسرائیل! اللہ ہی کی عبادت کرو جو میرا اور تمہارا سب کا رب ہے۔ یقین مانو کہ جو شخص اللہ کے ساتھ شریک کرتا ہے اللہ تعالیٰ نے اس پر جنت حرام کر دی ہے، اس کا ٹھکانہ جہنم ہی ہے اور گنہگاروں کی مدد کرنے واﻻ کوئی نہیں ہوگا۔" [سورہ مائدہ: 72]۔

شرک اکبر کی چار قسمیں ہیں:

پہلی قسم: دعا میں شرک کرنا۔

اس کی دلیل اللہ تعالیٰ کا یہ فرمان ہے: "پس یہ لوگ جب کشتیوں میں سوار ہوتے ہیں تو اللہ تعالیٰ ہی کو پکارتے ہیں اس کے لئے عبادت کو خالص کر کے۔ پھر جب وه انہیں خشکی کی طرف بچا ﻻتا ہے تو اسی وقت شرک کرنے لگتے ہیں۔ تاکہ ہماری دی ہوئی نعمتوں سے مکرتے رہیں اور ان سے مستفید ہوتے رہیں ۔ انھیں عن قریب پتہ چل جائے گا۔" [سورہ عنکبوت: 65-66]۔

دوسری قسم: نیت یعنی ارادہ اور قصد کا شرک :

اس کی دلیل اللہ تعالیٰ کا یہ فرمان ہے: "جو شخص دنیا کی زندگی اور اس کی زینت پر فریفتہ ہوا چاہتا ہو ہم ایسوں کو ان کے کل اعمال (کا بدلہ) یہیں بھرپور پہنچا دیتے ہیں اور یہاں انہیں کوئی کمی نہیں کی جاتی۔ ہاں یہی وه لوگ ہیں جن کے لیے آخرت میں سوائے آگ کے اور کچھ نہیں اور جو کچھ انہوں نے یہاں کیا ہوگا وہاں سب اکارت ہے اور جو کچھ ان کےاعمال تھے سب برباد ہونے والے ہیں"۔ [9] [سورہ ہود: 15، 16]۔ [9] يُبْخَسُون کا مطلب ہے: ان میں کمی کی جائے گی۔

سبق کی ہدایات :

* شرک اکبر: یعنی عبادت کی کسی بھی قسم کو غیراللہ کے لیے صرف کرنا، جیسے غیر اللہ کو پکارنا اور غیر اللہ کے لیے ذبح کرنا۔ شرک اکبر ملت سے خارج کر دیتا ہے۔ اگر انسان مر جائے اور اس سے توبہ نہ کی ہو تو اس کا مرتکب ہمیشہ جہنم میں رہے گا۔

* شِركُ الدَّعوةِ: اس سے مراد نقصان دور کرنے یا فائدہ حاصل کرنے کے لیے غیر اللہ کو پکارنا ہے، جیسا کہ خوش حالی کی حالت میں مشرکین عرب کیا کرتے تھے۔

* مشرکین کا ایک گروہ ایک کشتی میں سوار ہوا اور وہ اپنے معبودوں کو پکارنے اور ان سے دعائیں مانگنے لگے۔ پھر ہوائیں طوفانی ہو گئیں اور کشتی ہچکولے کھانے لگی تو کشتی والوں نے کہا : صرف اور صرف اپنے رب سے دعا کرو؛ کیونکہ یہاں اس کے سوا کوئی نجات دینے والا نہیں ہے۔ اس کشتی میں ایک ایسا شخص بھی سوار تھا جو رسول اللہ ﷺ کے مکہ میں داخل ہونے کے وقت آپ ﷺ سے بچ کر بھاگ نکلا تھا، تو اس نے کہا : اگر سمندر میں اس کے سوا کوئی اور نجات نہیں دے سکتا، تو خشکی میں بھی اس کے سوا کوئی نجات دینے والا نہیں ہے۔

چنانچہ وہ واپس آ گيا اور اسلام میں داخل ہو گیا۔ وہ شخص عکرمہ بن ابو جہل رضی اللہ عنہ تھے۔ [10] [10] دیکھیں: الاصابۃ فی تمييز الصحابة (2/496)۔

* غیر اللہ کو پکارنا، چاہے وہ آسانی کی حالت میں ہو یا تنگی کی حالت میں، شرکِ اکبر ہے۔

* نیت کا شرک ان لوگوں سے سرزد ہوتا ہے جو آخرت کو بھول گئے ہوں اور اس کے لیے کوئی عمل نہیں کیا ہو، بلکہ انہوں نے اپنی تمام تر فکر، کوشش اور یہاں تک کہ اپنی عبادت کو بھی صرف دنیا تک محدود کر لیا، اس شخص کی طرح جو فقط مالِ غنیمت کے لیے جہاد کرے۔

* ایک مسلمان پر واجب ہے کہ وہ اپنی نیت، ارادے اور دعا کو اللہ رب العالمین کے لیے خالص کرے جس کا کوئی شریک نہیں۔

سوالات:

س1: شرک کی قسمیں بیان کریں۔

س2: شرکِ اکبر کی تعریف کریں۔

سوال 3 : دعا میں شرک کا معنی بیان کریں۔

س4: مندرجہ ذیل میں سے صحیح جواب چنیں:

اللہ تعالیٰ نے فرمایا ہے : "پس یہ لوگ جب کشتیوں میں سوار ہوتے ہیں تو اللہ تعالیٰ ہی کو پکارتے ہیں اس کے لئے عبادت کو خالص کر کے۔ پھر جب وه انہیں خشکی کی طرف بچا ﻻتا ہے، تو اسی وقت شرک کرنے لگتے ہیں۔" [سورہ عنکبوت: 65]۔

اس سے مراد ہیں: الف- مشرکین۔ ب- منافقین۔ ج- مسلمان۔

س5 : شرکِ اکبر کی مثال بیان کریں۔

س6: نیت میں شرک کی دلیل ذکر کریں۔

نواں سبق

اطاعت اور محبت میں شرک۔

تیسری قسم : اطاعت میں شرک :

اس کی دلیل اللہ تعالیٰ کا یہ فرمان ہے: "ان لوگوں نے اللہ کو چھوڑ کر اپنے عالموں اور درویشوں کو رب بنایا ہے اور مریم کے بیٹے مسیح کو، حاﻻں کہ انہیں صرف ایک اکیلے اللہ ہی کی عبادت کا حکم دیا گیا تھا، جس کے سوا کوئی معبود نہیں۔ وه پاک ہے ان کے شریک ٹھہرانے سے۔" [11] [سورہ توبۃ: 31]۔ [11] احبار یہود کے علما کو کہتے ہیں، اور رہبان نصاریٰ کے عبادت گزاروں کو۔

اس کی وہ تفسیر جس میں کوئی اشکال نہیں: اس سے مراد اللہ سبحانہ کی نافرمانی میں علماء و مشائخ کی اطاعت کرنا ہے، نہ کہ ان سے دعا کرنا، جیسا کہ رسول اللہ ﷺ نے عدی بن حاتم رضی اللہ عنہ کے سوال کے جواب میں اس کی وضاحت فرمائی۔ جب انہوں نے عرض کیا: ’’ہم ان کی عبادت تو نہیں کرتے۔‘‘ تو آپ ﷺ نے ان سے بیان فرمایا کہ ان کی عبادت دراصل اللہ کی نافرمانی کے کاموں میں ان کی اطاعت کرنا ہے۔

چوتھی قسم: محبت میں شرک :

اس کی دلیل اللہ تعالیٰ کا یہ فرمان ہے: "بعض لوگ ایسے بھی ہیں جو اللہ کے شریک اوروں کو ٹھہرا کر ان سے ایسی محبت رکھتے ہیں، جیسی محبت اللہ سے ہونی چاہیے، جب کہ ایمان والے اللہ کی محبت میں بہت سخت ہوتے ہیں۔ کاش کہ مشرک لوگ جانتے جب کہ اللہ کے عذاب کو دیکھ کر (جان لیں گے) کہ تمام طاقت اللہ ہی کو ہے اور اللہ تعالیٰ سخت عذاب دینے واﻻ ہے (تو ہرگز شرک نہ کرتے)۔" [12] [سورہ بقرہ: 165]۔ [12] أندادًا کا معنی ہے: امثال، نظیر اور اشباہ۔

سبق کی ہدایات :

* عدی بن حاتم رضی اللہ عنہ سے روایت ہے، انہوں نے فرمایا کہ میں نبی ﷺکے پاس اس حالت میں آیا کہ میری گردن میں سونے کی صلیب لٹک رہی تھی، تو آپ نے فرمایا : ’’اے عدی! اپنی گردن سے یہ بت نکال پھینکو۔" لہذا میں نے اسے نکال پھینکا۔ پھر میں آپ ﷺ کے پاس اس حال میں پہنچا کہ آپ سورہ براءت پڑھ رہے تھے۔ جب آپ ﷺ نے یہ آیت پڑھی: (ٱتَّخَذُوٓاْ أَحۡبَارَهُمۡ وَرُهۡبَٰنَهُمۡ أَرۡبَابٗا مِّن دُونِ ٱللَّهِ) (ترجمہ: انہوں نے اپنےعلما اور درویشوں کو اللہ کے سوا اپنا رب بنا لیا ہے۔) یہاں تک کہ آپ اس سے فارغ ہوگئے، تو میں نے کہا : ہم ان کی عبادت تو نہیں کرتے تھے۔ لہذا آپ ﷺ نے فرمایا : ’’کیا ایسا نہیں ہوتا تھا کہ اللہ نے جو کچھ حلال قرار دیا ہے اسے وہ حرام ٹھہرا دیتے اور تم اسے حرام سمجھنے لگتے تھے؟ اور جو کچھ اللہ نے حرام قرار دیا ہے اسے وہ حلال ٹھہرا دیتے تھے اور تم اسے حلال سمجھنے لگتے تھے؟‘‘ میں نے جواب دیا: ہاں، ایسا تو ہوتا تھا۔ آپ ﷺ نے فرمایا: ’’یہی ان کی عبادت کرنا ہے‘‘۔ [13] [13] ترمذی، کتاب تفسیر القرآن باب: «ومن سورۃ التوبۃ» نمبر (3095)۔ اسے امام طبرانی نے المعجم الکبیر میں بھی روایت کیا ہے اور یہ الفاظ انہی کے ہیں (1/92) (218)۔ شیخ الاسلام ابن تیمیہ رحمہ اللہ نے فرمایا ہے : "یہ حدیث حسن ہے" جیسا کہ مجموع الفتاویٰ، کتاب الایمان (7/67) میں ہے۔

اللہ کے نبی ﷺ نے یہاں یہ واضح کر دیا ہے کہ اہل کتاب جس شرک میں مبتلا ہوئے وہ یہ تھا کہ ان کے احبار و رہبان نے انھیں معصیت کا حکم دیا تو انھوں نے اس پر عمل کیا اور انھیں اطاعت سے روکا تو انھوں نے اسے چھوڑ دیا۔

* جس نے حلال کو حرام یا حرام کو حلال کرنے میں غیر اللہ کی اطاعت کی، اس بات کا اعتقاد رکھتے ہوئے کہ انہیں اس کا حق حاصل ہے، تو وہ مشرک ہے جو شرکِ اکبر میں گرفتار ہے۔

٭ اللہ کے ساتھ کسی اور سے محبت: اس سے مراد مشرکین کی اپنے معبودوں اور شریکوں جیسے درخت، پتھر، فرشتہ وغیرہ سے محبت ہے اور یہی شرک کی اصل اور اس کی بنیاد ہے۔

* محبت عبادت کی اصل ہے، اس لیے مسلمان پر واجب ہے کہ وہ کسی سے اللہ تعالیٰ کی محبت سے زیادہ محبت نہ کرے اور نہ ہی اس کے برابر محبت کرے، ورنہ وہ شرک میں مبتلا ہو جائے گا۔

سوالات:

س1: اطاعت میں شرک سے کیا مراد ہے؟ ساتھ ہی دلیل بھی ذکر کریں۔

س2 : محبت میں شرک سے کیا مراد ہے؟ اس کی دلیل بھی ذکر کریں۔

س3 : وہ کون سا گروہ ہے جو عیسیٰ بن مریم علیہ الصلاۃ والسلام کی عبادت کرتا ہے اور اس کی اس عبادت کا کیا حکم ہے؟

س4 : اس شخص کا کیا حکم ہے جو حلال کو حرام یا حرام کو حلال کرنے میں غیر اللہ کی اطاعت کرے؟

دسواں سبق:

شرکِ اصغر اور شرکِ خفی۔

دوسری قسم: شرکِ اصغر (اس سے مراد ریاکاری ہے)۔

اس کی دلیل اللہ تعالیٰ کا یہ فرمان ہے: "تو جسے بھی اپنے پروردگار سے ملنے کی آرزو ہو اسے چاہیے کہ نیک اعمال کرے اور اپنے پروردگار کی عبادت میں کسی کو بھی شریک نہ کرے۔" [سورہ کھف: 110]۔

تیسری قسم: شرک خفی:

اس کی دلیل آپ ﷺ کا یہ فرمان ہے: "اس امت میں شرک رات کی تاریکی میں سیاہ پتھر پر چیونٹی کی سرسراہٹ سے بھی زیادہ پوشیدہ ہے۔"[14] ابن عباس رضی اللہ عنہما نے اس شرک کی تفسیر اس طرح کی ہے کہ جیسے کوئی شخص اپنے ساتھی سے کہے: ’’ہوگا وہی جو اللہ چاہے اور فلاں چاہے!‘‘[15] [14] اسے امام احمد نے ابو موسیٰ رضی اللہ عنہ سے ان الفاظ میں روایت کیا ہے: "اے لوگو، اس شرک سے بچو؛ کیونکہ یہ چیونٹی کی آہٹ سے بھی زیادہ پوشیدہ ہے۔" (4/403) البتہ یہ حدیث ابن عباس رضی اللہ عنہ پر موقوف ہے۔ [15] اسے ابن ابی حاتم نے روایت کیا ہے۔

اس شرک کا کفارہ رسول اللہ ﷺ کی اس حدیث میں بیان ہوا ہے: ’’اے اللہ! بے شک تیری پناہ میں آتا ہوں اس بات سے کہ میں جان بوجھ کر کسی چیز کو تیرا شریک ٹھہراؤں اور میں تجھ سے اس گناہ کی مغفرت طلب کرتا ہوں جسے میں نہیں جانتا۔‘‘[16] [16] اسے امام احمد نے حضرت ابو موسیٰ رضی اللہ عنہ سے ان الفاظ میں روایت کیا ہے: ’’اے اللہ! بے شک ہم اس بات سے تیری پناہ میں آتے ہیں کہ ہم جانتے ہوئے کسی چیز کو تیرا شریک ٹھہرائیں اور ہم تجھ سے ان غلطیوں کی مغفرت طلب کرتے ہیں جنھیں ہم نہیں جانتے۔‘‘ (4/403)۔

سبق کی ہدایات :

* توحید: اللہ کو عبادت میں ایک ماننے کا نام ہے جب کہ شرک: اللہ کے حق یعنی تعظیم اور عبادت میں کسی دوسرے کو اس کے ساتھ شریک ٹھہرانا ہے۔

* "ما شاء الله وشئت" (جو اللہ اور آپ چاہیں) اور "لولا اللہ وفلان" (اگر اللہ اور فلاں نہ ہوتا) کہنا دراصل شرک ہے؛ کیوں کہ یہ کہنا دراصل اللہ کی مخلوق کو اس کی برابری پر لاکر کھڑا کرنا ہے۔ جب کہ اللہ اس سے پاک و برتر ہے۔

* مسلمان پر واجب ہے کہ اوپر مذکور جملوں کی بجائے اس طرح کے جملے استعمال کرے : "ہوگا وہی جو اللہ چاہے اور پھر آپ چاہیں"، اور "اگر اللہ اور پھر فلاں نہ ہوتا"۔ اگر اس کی زبان پھسل جائے اور اس سے غلطی سرزد ہو جائے تو اسے چاہیے کہ اللہ کے نبی صلی اللہ علیہ و سلم سے منقول دعا کے ذریعے اس کا کفارہ ادا کرے۔

* شرکِ اصغر: وہ تمام اقوال و افعال جو شرک تک لے جانے کا وسیلہ بنتے ہوں، جیسے غیر اللہ کی قسم کھانا اور تھوڑی سی ریاکاری وغیرہ۔

* شرک اصغر بہت بڑا گناہ ہے، البتہ انسان کو اسلام سے نکال باہر نہیں کرتا۔

سوالات:

س1 : شرک خفی کی مثال دیں اور اس کا کفارہ ذکر کریں۔

سوال 2 : انسان کا کون سا قول زیادہ صحیح ہے: "جو اللہ اور آپ چاہیں" یا "جو اللہ چاہے اور پھر آپ چاہیں"؟ وجہ بھی بیان کریں۔

س 3 : شرک اکبر اور شرک اصغر کے درمیان کیا فرق ہے؟

س4: شرک اصغر کی دلیل ذکر کریں۔

گیارہواں سبق

کفر اور اس کی اقسام

کفر کی دو قسمیں ہیں: کفر اکبر اور کفر اصغر۔

کفرِ اکبر : یہ مسلمان کو ملتِ اسلام سے خارج کردیتا ہے۔ اس کی پانچ قسمیں ہیں:

پہلی قسم: کفرِ تکذیب:

اس کی دلیل اللہ تعالیٰ کا یہ فرمان ہے: "اور اس سے بڑا ظالم کون ہوگا، جو اللہ تعالیٰ پر جھوٹ باندھے یا جب حق اس کے پاس آجائے تو وه اسے جھٹلائے؟ کیا ایسے کافروں کا ٹھکانا جہنم میں نہ ہوگا؟" [سورہ عنکبوت: 68]۔

دوسری قسم : تصدیق کے باوجود انکار اور تکبر پر مبنی کفر:

اس کی دلیل اللہ تعالیٰ کا یہ فرمان ہے: "اور جب ہم نے فرشتوں سے کہا کہ آدم کو سجده کرو تو ابلیس کے سوا سب نے سجده کیا۔ اس نے انکار کیا اور تکبر کیا اور وه کافروں میں ہوگیا۔" [سورہ بقرہ: 34]۔

تیسری قسم : کفرِ شک اور یہی کفرِ ظن (گمان) ہے :

اس کی دلیل اللہ تعالیٰ کا یہ فرمان ہے: "اور وہ اپنے باغ میں گیا اور وہ خود اپنے آپ پر ظلم کر رہا تھا۔ کہنے لگا کہ میں خیال نہیں کرسکتا کہ کسی وقت بھی یہ برباد ہوجائے. اور نہ میں قیامت کو قائم ہونے والی خیال کرتا ہوں اور اگر (بالفرض) میں اپنے رب کی طرف لوٹایا بھی گیا تو یقیناً میں (اس لوٹنے کی جگہ) اس سے بھی زیاده بہتر پاؤں گا. اس کے ساتھی نے اس سے باتیں کرتے ہوئے کہا کہ کیا تو اس (معبود) سے کفر کرتا ہے جس نے تجھے مٹی سے پیدا کیا۔ پھر نطفے سے پھر تجھے پورا آدمی بنا دیا؟ لیکن میں تو عقیده رکھتا ہوں کہ وہی اللہ میرا پروردگار ہے، میں اپنے رب کے ساتھ کسی کو شریک نہ کروں گا۔" [سورہ كهف: 35 - 38 ]۔

سبق کی ہدایات :

* کفر، ایمان کی ضد ہے۔ یعنی اللہ اور اس کے رسولوں پر ایمان نہ لانے کو کفر کہا جاتا ہے، چاہے اس میں تکذیب (جھٹلانا) پائی جائے یا نہ پائی جائے، اس سے کوئی فرق نہیں پڑتا، بلکہ شک و شبہ، اعراض و حسد، کبر و نخوت اور اتباعِ رسالت کی راہ میں حائل خواہشاتِ نفس کی پیروی وغیرہ سے بھی اس حکم میں کوئی فرق نہیں پڑتا۔

* کفر اکبر انسان کو دائرۂ اسلام سے نکال دیتا ہے۔

* کفرِ تکذیب کئی چیزوں کے ذریعہ واقع ہوتا ہے، جن میں سے کچھ یہ ہیں:

1- اللہ تعالیٰ کی وحدانیت کا انکار۔

2- محمد ﷺ کی رسالت کو جھٹلانا۔

3- قرآن کو جھٹلانا اور اللہ کی شریعت کو ٹھکرانا۔

* اگر کوئی شخص نبی محمد ﷺ کی صداقت کو جان لے، لیکن وہ آپ کی رسالت پر ایمان لانے سے انکار کر دے؛ تو وہ نبی ﷺ کے چچا ابو طالب کی طرح کافر ہے، جس نے کہا تھا :

بلاشبہ میں جانتا ہوں کہ محمد صلی اللہ علیہ وسلم کا دین * * تمام مخلوقات کے دینوں میں سب سے بہترین دین ہے۔

لیکن وہ اس حالت میں مرا کہ بتوں کی عبادت پر قائم تھا۔ چنانچہ وہ کافر ہو کر مرا۔ اسی طرح اگر کوئی شخص اللہ کی اطاعت سے سرکشی اختیار کرے تو وہ کافر ہے، جیسا کہ ابلیس نے کیا۔

* مسلمان کو چاہیے کہ وہ شبہات اور فاسد افکار سے بچے، جو اس کے ایمان کو خراب کر سکتے ہیں اور اس کے دل میں شکوک اور وساوس پیدا کر سکتے ہیں۔

سوالات:

س1 : کفر کی کتنی اقسام ہیں؟

سوال 2 : کفر تکذیب کس چیز کے ذریعہ واقع ہوتا ہے؟

س 3: کفر اکبر کی تینوں قسمیں دلیل کے ساتھ بیان کریں۔

س4 : آیت کریمہ میں کفر کی قسم پر دلالت کرنے والے لفظ کے نیچے خط کشید کریں:

اللہ تعالیٰ نے فرمایا ہے : "اور اس سے بڑا ﻇالم کون ہوگا، جو اللہ تعالیٰ پر جھوٹ باندھے یا جب حق اس کے پاس آجائے تو اسے جھٹلائے؟" [سورہ عنکبوت: 68]۔

بارہواں سبق

کفرِ اکبر کی بقیہ اقسام

چوتھی قسم : کفرِ اعراض۔

اس کی دلیل اللہ تعالیٰ کا یہ فرمان ہے: "اور کافر لوگ جس چیز سے ڈرائے جاتے ہیں اس سے منہ موڑ لیتے ہیں۔" [سورہ احقاف: 3]۔

پانچویں قسم: کفرِ نفاق۔

اس کی دلیل اللہ تعالیٰ کا یہ فرمان ہے: "یہ اس سبب سے ہے کہ یہ ایمان ﻻکر پھر کافر ہوگئے۔ پس ان کے دلوں پر مہر کر دی گئی۔ اب یہ نہیں سمجھتے۔" [17] [سوره منافقون: 3]۔ [17] طُبِعَ: یعنی ان کے دلوں پر مہر کر دی گئی۔ لہذا وہ اپنے کفر اور دین کے ساتھ کھلواڑ کی وجہ سے حق سے محجوب ہو گئے۔

سبق کی ہدایات :

* کفرِ اعراض کا معنی دینِ اسلام سے اعراض کرنا ہے، بایں طور کہ نہ تو اسے سیکھے اور نہ اس پر عمل کرے۔

* رسول اللہ ﷺ نے اپنے آس پاس کے قریش کے لوگوں کو جمع کیا اور انھیں اللہ کی توحید کی دعوت دی، تو ابولہب نے کہا : تیری ہلاکت ہو، کیا تو نے ہمیں اسی لیے جمع کیا تھا؟ اور اس نے آپ ﷺ کی دعوت کو قبول نہیں کیا[18]۔ ابولہب کا یہ رویہ ’’حق سے اعراض‘‘ کہلاتا ہے، جو کفر کی ایک قسم ہے۔ [18] دیکھیں: صحیح بخاری، کتاب التفسیر، باب: سورة «تبَّت يدا أبي لهب»، حدیث نمبر: (4971)۔

* مسلمان پر واجب ہے کہ جب اسے کوئی حق کی طرف بلائے تو اس کی دعوت قبول کرے اور غرور اسے گناہ پر آمادہ نہ کرے، جس سے وہ اپنے لیے بدبختی مول لے۔ اللہ سبحانہ کا ارشاد ہے: "تو آپ نصیحت کرتے رہیں، اگر نصیحت کچھ فائده دے۔ ڈرنے واﻻ تو نصیحت لے گا۔ (ہاں) بد بخت اس سے گریز کرے گا۔ جو بڑی آگ میں جائے گا۔" [سورہ اعلیٰ: 9- 12]۔

* نفاق نام ہے بظاہر مسلمان ہونے کا دعویٰ کرنے اور اندر کفر چھپائے رکھنے کا، جیسے کہ کوئی شخص اپنی زبان سے اسلام کا اظہار کرے اور لوگوں کے ساتھ نماز پڑھے، لیکن اس کا دل اللہ پر ایمان نہ رکھتا ہو اور اس کی شریعت سے بغض رکھتا ہو۔ ایسے شخص کو نہ اس کی نماز فائدہ دے گی اور نہ اس حق میں اس کے مسلمان ہونے کا اعلان کچھ مفید ہوگا۔ یہی (کفرِ نفاق) ہے۔

سوالات:

س 1: کفرِ اعراض کا معنی بیان کریں اور اس کی دلیل ذکر کریں۔

س2: نفاق کی تعریف کریں اور اس کی مثال پیش کریں۔

س 3 : جب اللہ کے نبی صلی اللہ علیہ و سلم نے قریش کو توحید کی دعوت دی تو ابو لہب کس نوع کے کفر کا مرتکب ہوا؟

س4 : ایک مسلمان کو جب کوئی حق کی طرف بلائے، تو اس پر کیا کرنا واجب ہے؟

سوال 5: منافق کا انجام کیا ہے؟ کیا اللہ تعالیٰ کے یہاں اس کی نماز اور روزہ اسے فائدہ دیں گے؟

س6 : ایسا انسان جو زبان سے تو اسلام کا دعویٰ کرے، لیکن اس کا دل اللہ پر ایمان نہ رکھتا ہو، اسے کیا کہا جاتا ہے؟

س7 : کفر نفاق کی دلیل بیان کریں۔

تیرہواں سبق

کفرِ اصغر

کفرِ اصغر انسان کو دائرۂ اسلام سے خارج نہیں کرتا۔ یہ دراصل کفرانِ نعمت ہے۔

اس کی دلیل اللہ تعالیٰ کا یہ فرمان ہے: "اللہ تعالیٰ اس بستی کی مثال بیان فرماتا ہے جو پورے امن واطمینان سے تھی، اس کی روزی اس کے پاس بافراغت ہر جگہ سے چلی آرہی تھی، پھر اس نے اللہ تعالیٰ کی نعمتوں کا کفر کیا، تو اللہ تعالیٰ نے اسے بھوک اور ڈر کا مزه چکھایا، جو بدلہ تھا ان کے کرتوتوں کا۔" [سورہ نحل: 112]۔

اللہ تعالیٰ کا مزید فرمان ہے : "...یقیناً انسان بڑا ہی بے انصاف اور ناشکرا ہے۔" [سورہ ابراھیم: 34]۔

سبق کی ہدایات :

* کفرِ اصغر: یہ وہ گناہ ہیں، جنہیں قرآن و سنت میں کفر سے موسوم کیا گیا ہے، تاہم وہ کفرِ اکبر کی حد تک نہیں پہنچتے ہیں، جیسے: ناشکری کرنا اور غیر اللہ کی قسم کھانا۔

* کفرانِ نعمت ایک بہت بڑا گناہ ہے، جو اس بات کی دلیل ہے کہ اس کے مرتکب کے اندر ایمان کی کمی ہے، لیکن اس سے انسان دائرۂ اسلام سے خارج نہیں ہوتا۔

سوالات:

س1: کفر اصغر کی تعریف بیان کریں۔

س2: کیا کفر اصغر انسان کو دین اسلام سے خارج کرتا ہے؟

س 3: جس شخص نے محمد ﷺ کی رسالت کو جھٹلایا، کیا اس نے کفر اکبر کیا یا کفر اصغر؟

چودہواں سبق

نفاق اور اس کی اقسام

نفاق کی دو قسمیں ہیں: اعتقادی نفاق اور عملی نفاق:

پہلی قسم : اعتقادی نفاق۔ اس کی بھی چھ اقسام ہیں :

1- رسول اللہ ﷺ کو جھٹلانا۔

2- رسول ﷺ کی لائی ہوئی شریعت کے بعض حصہ کو جھٹلانا۔

3- رسول ﷺ سے بُغض رکھنا۔

4- رسول ﷺ کی لائی ہوئی شریعت سے بُغض رکھنا۔

5- رسول ﷺ کے لائے ہوئے دین کے کمزور ہونے پر خوش ہونا۔

6- رسول ﷺ کے دین کے غلبہ و بالادستی سے تکلیف اور رنج و غم میں مبتلا ہونا۔

ان چھ قسموں کا مرتکب آدمی جہنم کے سب سے نچلے درجے والوں میں سے ہے۔ ہم شقاق (مخالفت) اور نفاق (منافقت) سے اللہ کی پناہ مانگتے ہیں۔

دوسری قسم : عملی نفاق۔ اس کی بھی پانچ قسمیں ہیں:

1- جب بات کرے تو جھوٹ بولے۔

2- جب جھگڑا کرے تو گالی گلوچ کرے۔

3- جب کوئی معاہدہ کرے، تو دھوکہ دے۔

4- جب اس کے پاس امانت رکھی جائے تو خیانت کرے۔

5- جب کوئی وعدہ کرے، تو توڑ ڈالے۔

اس کی دلیل آپ ﷺ کا یہ فرمان ہے: "منافق کی تین نشانیاں ہیں: جب بات کہے تو جھوٹ بولے، جب وعدہ کرے تو وعدہ خلافی کرے اور جب اس کے پاس امانت رکھی جائے تو خیانت کرے"۔ [19] [19] اسے امام بخاری نے کتاب الایمان، باب: علامات المنافق، حدیث نمبر: (33) میں ابو ہریرہ رضی اللہ عنہ سے روایت کیا ہے۔

ایک دوسری حدیث میں ہے: "”جب جھگڑا کرے تو گالی گلوچ کرے اور جب عہد کرے تو بدعہدی کرے۔“ [20]" [20] اسے بخاری نے کتاب الایمان، باب: علامۃ المنافق میں عبداللہ بن عمرو رضی اللہ عنہ سے اور مسلم نے کتاب الایمان، باب: بیان خصال المنافق میں روایت کیا ہے۔ فَجَر: یعنی اس نے بغیر کسی پروا کے اپنی زبان کو فحش اور بری باتوں کے لیے بے لگام چھوڑ دیا۔

اللہ سبحانہ و تعالیٰ ہی زیادہ بہتر جانتا ہے۔ بہ کثرت درود و سلام ہو سیدنا محمد ﷺ پر اور آپ کی آل اور تمام صحابہ پر۔

سبق کی ہدایات :

* نفاق میں کفر اور مومنوں کو دھوکہ دینا، دونوں باتیں جمع ہو جاتی ہیں، یہی وجہ ہے کہ اللہ تعالیٰ نے منافقوں کے لیے سخت سزا مقرر فرمائی ہے۔ اللہ سبحانہ نے فرمایا ہے : "منافق تو یقیناً جہنم کے سب سے نیچے کے طبقہ میں جائیں گے ، ناممکن ہے کہ تو ان کا کوئی مددگار پالے۔" [سورہ نساء: 145]۔

* نفاق کی کچھ صورتیں :

- رسول ﷺ کی لائی ہوئی شریعت کو جھٹلانا۔ جیسے: اس بات کی تصدیق نہ کرنا کہ آدم علیہ السلام مٹی سے پیدا کیے گئے ہیں یا پھر یہ کہ محمد ﷺ خاتم الانبیاء ہیں وغیرہ وغیرہ۔ ایسا شخص کافر اور منافق ہے۔

- رسول ﷺ کی لائی ہوئی شریعت کے کسی حصے سے بُغض رکھنا، جیسے شراب پینے کی حرمت سے کراہیت رکھنا یا نماز سے بُغض رکھنا اور اسے برا بھلا کہنا۔

- شریعت کے نافذ نہ ہونے پر خوش ہونا اور اسلام و اہل اسلام کی فتح و نصرت کو ناپسند کرنا۔

* اگر مسلمان عملی نفاق کے اعمال میں سے کسی عمل جیسے جھوٹ اور عہد شکنی وغیرہ میں ملوث ہو جائے، تو اسلام کے دائرے سے باہر تو نہیں نکلتا، لیکن ایک گناہِ عظیم میں ملوث ہو جاتا ہے، جس سے اندیشہ ہے کہ یہ چیز اسے اعتقادی نفاق کی طرف لے کر چلی جائے۔

* اعتقادی نفاق انسان کو دائرۂ اسلام سے باہر نکال دیتا ہے، جب کہ عملی نفاق دائرۂ اسلام سے باہر نہیں نکالتا۔

سوالات:

س1: اللہ تعالیٰ نے اہل نفاق کے لیے سخت سزا کیوں مقرر کی ہے؟

سوال 2 : اعتقادی نفاق کی اقسام بیان کریں۔

س 3 : قرآن سے ایسی دلیل پیش کریں جو منافقین کا انجام واضح کرے۔

س4 : نفاق کی چند شکلیں ذکر کریں۔

س5 : حدیث شریف سے نفاق کی علامتیں بیان کریں۔

سوال 6 : اعتقادی نفاق اور عملی نفاق کے درمیان فرق بیان کریں۔

پندرھواں سبق

نواقضِ اسلام

جان لیجیے [21] کہ اسلام کے دس نواقض ہیں: [21] یہ رسالہ ”نواقضِ اسلام“ کے عنوان سے ہے۔

پہلا : اللہ کی عبادت میں شرک کرنا۔

ارشادِ باری تعالیٰ ہے: "یقیناً اللہ تعالیٰ اپنے ساتھ شریک کیے جانے کو نہیں بخشتا اور اس کے سوا جسے چاہے بخش دیتا ہے اور جس نے اللہ تعالیٰ کے ساتھ شریک ٹھہرایا، اس نے بہت بڑا گناه کیا اور بہتان باندھا۔" [سورہ نساء: 48]۔

مزید ارشاد ربانی ہے : "...یقین مانو کہ جو شخص اللہ کے ساتھ شریک کرتا ہے اللہ تعالیٰ نے اس پر جنت حرام کر دی ہے، اس کا ٹھکانہ جہنم ہی ہے اور گنہگاروں کی مدد کرنے واﻻ کوئی نہیں ہوگا۔" [سورہ مائدہ : 72]۔

غیر اللہ جیسے جنات یا کسی قبر کے لیے ذبح کرنا بھی اسی کے ضمن میں داخل ہے۔

دوسرا : جو شخص اپنے اور اللہ تعالیٰ کے درمیان غیر اللہ کو واسطہ و وسیلہ بناتا ہے، ان کو پکارتا ہے، ان سے شفاعت کا طلب گار ہوتا ہے اور ان پر توکل کرتا ہے، وہ بالاجماع کافر ہو جاتا ہے۔

تیسرا : جو شخص مشرکوں کو کافر نہیں سمجھتا، یا ان کے کفر میں شک کرتا ہے یا ان کے مذہب کو صحیح سمجھتا ہے تو وہ بھی کافر ہو جاتا ہے۔

سبق کی ہدایات :

* نواقضِ اسلام: یہ وہ امور ہیں جن کا ارتکاب کوئی شخص کرے تو اس کا اسلام باطل ہو جاتا ہے اور وہ کافر ہو کر ملت (دائرۂ اسلام) سے خارج ہو جاتا ہے۔ والعیاذ باللہ۔

* شرک یہ ہے کہ اللہ کی خصوصیات میں غیر اللہ کو اللہ کے مساوی اور برابر قرار دیا جائے۔ یہ اللہ کی نافرمانی میں کیا جانے والا سب سے بڑا گناہ ہے اور ربوبیت کی حق تلفی و الوہیت کی تنقیص ہے۔ اس کی مثال یہ ہے کہ انسان اللہ کے ساتھ کسی غیر کی عبادت کرے، جیسے حضرت عیسیٰ (علیہ السلام) کی یا کسی فرشتے کی، یا پھر وہ عبادت کی کوئی قسم غیر اللہ کے لیے انجام دے، جیسے کسی جن یا قبر (والے) کے لیے جانور ذبح کرے، یا غیراللہ کے لیے نذر مانے۔

* دوسرے ناقض کی مثال: قبر والوں کو پکارنا، ان سے استغاثہ کرنا اور ان سے شفاعت طلب کرنا تاکہ وہ اللہ اور اس کے بندوں کے درمیان واسطہ بنیں۔ یہ ناقض سب سے زیادہ واقع ہونے والے اور سب سے زیادہ خطرناک نواقض میں سے ایک ہے۔ ولا حول ولا قوۃ الا باللہ ( نیکی کرنے کی قوت اور برائی سے بچنے کی ہمت اللہ تعالی کے بغیر ممکن نہیں)۔

* جو شخص مشرکین کو کافر قرار نہیں دیتا، ان کے کفر میں شک کرتا ہے یا پھر ان کے مذہب کو صحیح قرار دیتا ہے، وہ کافر ہے؛ کیونکہ وہ قرآن اور سنت کو جھٹلاتا ہے۔

* کسی شخص کا یہ عقیدہ رکھنا کہ اہل کفر کے اسلام مخالف مذاہب بھی درست ہیں، یہ بھی ایک ناقض ہے۔ کیونکہ اس کا مطلب یہ ہے کہ اسلام ایک باطل مذہب ہے۔ ظاہر سی بات ہے کہ اس سے انسان کافر ہو جاتا ہے۔

سوالات:

س1 : نواقضِ اسلام کتنے ہیں اور ان کے معنی کیا ہیں؟

س 2 : اس شخص کا کیا حکم ہے جو اپنے اور اللہ کے درمیان واسطہ بنائے؟

س3 : کیا اللہ تعالیٰ اس شخص کو معاف کرے گا جو شرک کی حالت میں مر جائے؟ اس کی دلیل ذکر کریں۔

سولھواں سبق

کچھ نواقض اسلام

چوتھا : جس شخص کا یہ اعتقاد ہو کہ نبی ﷺ کے علاوہ کسی اور کا طریقہ زیادہ کامل ہے یا پھر آپﷺ کے فیصلے کی بجائے کسی اور کا فیصلہ زیادہ بہتر ہے، جیسے وہ لوگ جو طاغوتوں کے فیصلے کو آپ ﷺ کے فیصلے پر ترجیح دیتے ہیں، تو اس طرح کے لوگ کافر ہيں۔

پانچواں : جس نے رسول اکرم ﷺ کی لائی ہوئی شریعت کے کسی بھی حکم کو ناپسند کیا، اگرچہ بظاہر وہ اس پر عمل بھی کرے، تو وہ کافر ہو گیا۔

اس کی دلیل اللہ تعالیٰ کا یہ فرمان ہے: "یہ اس لیے کہ وه اللہ کی نازل کرده چیز سے ناخوش ہوئے، پس اللہ تعالیٰ نے (بھی) ان کے اعمال ضائع کر دیے۔ [سورہ محمد : 9]۔

چھٹا : جس نے رسول اللہ ﷺ کے دین کے کسی بھی حکم، اللہ تعالیٰ کے ثواب یا اس کی سزا کا مذاق اڑایا، وہ کافر ہو گیا۔

اس کی دلیل اللہ تعالیٰ کا یہ فرمان ہے: "کہہ دیجیے کہ اللہ، اس کی آیتیں اور اس کا رسول ہی تمہارے ہنسی مذاق کے لیے ره گئے ہیں؟ تم بہانے نہ بناؤ۔ یقیناً تم اپنے ایمان کے بعد بے ایمان ہوگئے...۔" [سورہ توبہ : 65 -66].

ساتواں : جادو۔ یاد رہے کہ ”صَرف“ (دلوں کو پھیرنا) اور ”عَطف“ (دل میں جھکاؤ اور میلان پیدا کرنا)[22] بھی جادو ہی کی قسمیں ہيں۔ جو شخص جادو کرتا ہے یا پھر اسے اچھا خیال کرتا ہے وہ کافر ہو جاتا ہے۔ [22] ’صرف‘: اس سے مراد کسی شخص کو نیکی کے کام سے روکنے یا اسے اس کی بیوی سے پھیر دینے کا سبب بننا ہے۔ جب کہ ’عطف‘ سے مراد جادو کے ذریعے مرد یا عورت کو اپنے شریکِ حیات کا محبوب بنانے کا سبب بننا ہے۔

اس کی دلیل اللہ تعالیٰ کا یہ فرمان ہے: "...وه دونوں بھی کسی شخص کو اس وقت تک نہیں سکھاتے تھے جب تک یہ نہ کہہ دیں کہ ہم تو ایک آزمائش ہیں تو کفر نہ کر،..." [سورہ بقرہ: 102]۔

سبق کی ہدایات :

* جو شخص یہ عقیدہ رکھتا ہے کہ انسانوں کے وضع کردہ قوانین اور نظریات اللہ اور اس کے رسول ﷺ کی طرف سے عطا کردہ شریعت سے زیادہ بہتر اور افضل ہیں، تو ایسا شخص کافر شمار ہوتا ہے؛ کیونکہ اس نے شہادتِ لا الہ الا اللہ کے تقاضے کی پیروی نہیں کی، بلکہ اس کے منافی امر کا مرتکب ہوا۔ ولا حول ولا قوة الا بالله۔

* پانچویں ناقض کی مثال: نماز کی فرضیت کو ناپسند کرنا اگرچہ بظاہر وہ نماز بھی پڑھے، یا شراب کی حرمت کو ناپسند کرنا اگرچہ بظاہر وہ اس کے قریب بھی نہ جائے، یا رسول اللہ ﷺ کی لائی ہوئی شریعت کے کسی بھی حکم کو ناپسند کرنا، چاہے اس کا تعلق اقوال سے ہو یا افعال سے۔

* چھٹے ناقض کی مثال : قرآن، رسول ﷺ، اسلام کے بعض شعائر جیسے نماز، امر بالمعروف اور نہی عن المنکر یا سود ترک کرنے والے کا سود ترک کرنے کی بنا پر کا مذاق اڑانا۔ اس میں سنجیدہ اور ہنسی مذاق کرنے والے کے درمیان کوئی فرق نہیں ہے۔

* جادوگر کافر ہیں؛ کیوں کہ وہ کفر کر کے شیطانوں کا تقرب حاصل کرنے کے بعد ان سے مدد حاصل کرتے ہیں۔ اسی بنا پر ان کے پاس جانا، ان سے معلومات لینا اور ان کے پاس علاج کرانا حرام ہے۔

سوالات:

س1: اس شخص کا کیا حکم ہے جو یہ عقیدہ رکھے کہ اس کی رائے رسول ﷺ کی ہدایت سے زیادہ کامل ہے؟

س2 : اس شخص کا کیا حکم ہے جو طاغوت کے حکم کو اللہ اور اس کے رسول صلی اللہ علیہ وسلم کے حکم پر ترجیح دے؟

س3 : دین کے کسی بھی گوشے کا مذاق اڑانے والے کا کیا حکم ہے، اگرچہ وہ ہنسی مذاق ہی کر رہا ہو؟ دلیل بھی ذکر کریں۔

س 4 : جادو کفر کیوں ہے؟

س 5: اگر آپ کو کوئی بیماری لاحق ہو جائے، تو کیا آپ کے لیے جادوگروں سے علاج کروانا جائز ہے؟ اور کیوں؟

سترھواں سبق:

بقیہ نواقضِ اسلام

آٹھواں : مسلمانوں کے خلاف مشرکین کی پشت پناہی اور مدد کرنا۔

اس کی دلیل اللہ تعالیٰ کا یہ فرمان ہے: "...تم میں سے جو بھی ان میں کسی سے دوستی کرے وه بےشک انہی میں سے ہے۔ ظالموں کو اللہ تعالیٰ ہرگز راه راست نہیں دکھاتا۔" [سورہ مائدہ: 51]۔

نواں : جو یہ اعتقاد رکھے کہ بعض لوگوں کے لیے محمد ﷺ کی شریعت کی پابندی سے نکل جانا جائز ہے، وہ کافر ہے۔

دسواں : اللہ تعالیٰ کے دین سے اعراض کرنا، بایں طور کہ نہ تو اسے سیکھے اور نہ ہی اس پر عمل کرے۔

اس کی دلیل اللہ تعالیٰ کا یہ فرمان ہے: "اس سے بڑھ کر ظالم کون ہے جسے اللہ تعالیٰ کی آیتوں سے وعظ کیا گیا، پھر بھی اس نے ان سے منہ پھیر لیا؟ (یقین مانو) کہ ہم بھی گناه گاروں سے انتقام لینے والے ہیں۔" [سورہ سجدہ: 22]۔

(مذکورہ نواقضِ اسلام کا مرتکب مرتد کہلائے گا،) چاہے اس کا ارتکاب مذاق و استہزا میں ہوا ہو یا سنجیدگی میں یا خوف کی حالت میں۔ البتہ مُکرہ (مجبور) شخص مرتد نہیں ہوگا۔ [23]۔ [23] یہاں مُکرہ (مجبور) سے مراد وہ شخص ہے جو کافروں کے قبضے میں آ جائے اور وہ اسے کفر کا کلمہ زبان سے نکالنے پر مجبور کریں۔ چنانچہ وہ اسے زبان سے نکال لے، لیکن اس کا دل ایمان پر برقرار ہو۔ جبر کی صورت میں قابلِ معافی ہونے کی دلیل فرمانِ الہٰی ہے : (جو شخص اپنے ایمان کے بعد اللہ سے کفر کرے، بجز اس کے جس پر جبر کیا جائے اور اس کا دل ایمان پر برقرار ہو، مگر جو لوگ کھلے دل سے کفر کریں تو ان پر اللہ کا غضب ہے اور انہی کے لیے بہت بڑا عذاب ہے۔) [سورہ نحل: 106]۔

یہ تمام امور انتہائی خطرناک ہونے کے ساتھ ساتھ کثرت سے وقوع پذیر ہوتے ہیں۔ چنانچہ مسلمان کو چاہیے کہ وہ ان سے بچے اور اس بات سے ڈرتا رہے کہ کہیں وہ ان کی زد میں نہ آ جائے۔

ہم اللہ کے غضب کا باعث بننے والی اشیا اور اس کے دردناک عذاب سے اس کی پناہ مانگتے ہیں۔

درود و سلام نازل ہو اللہ کی بہترین مخلوق محمد ﷺ پر اور آپ ﷺ کی آل واصحاب پر۔ [24] [24] رسالہ: "نواقضِ اسلام" مکمل ہوا۔

سبق کی ہدایات :

* آٹھویں ناقض کی مثال : کفار سے محبت کرنا اور مسلمانوں کے خلاف ان کی مدد اور ان کا تعاون کرنا۔ جو شخص ایسا کرے گا، وہ بھی انہی کی طرح اللہ اور اس کے دین کا دشمن ہو گا، الا یہ کہ ایسا کرنے والا جاہل، تاویل کرنے والا یا مجبور ہو۔ اللہ تعالیٰ کا فرمان ہے: "اے ایمان والو! تم یہود ونصاریٰ کو دوست نہ بناؤ یہ تو آپس میں ہی ایک دوسرے کے دوست ہیں۔ تم میں سے جو بھی ان میں کسی سے دوستی کرے وه بےشک انہی میں سے ہے۔ ﻇالموں کو اللہ تعالیٰ ہرگز راه راست نہیں دکھاتا۔" [سوره مائده: 51]۔

* نویں ناقض کی مثال : یہ اعتقاد رکھنا کہ اس کے لیے بعض شرعی واجبات جیسے نماز کو چھوڑنا یا بعض محرمات جیسے شراب پینا جائز ہے۔

* دسویں ناقض سے مراد: اصلِ دین سیکھنے سے کلی اعراض کرنا ہے، جس کے ذریعے انسان مسلمان ہوتا ہے۔

* ہر مسلمان پر لازم ہے کہ وہ ان نواقضِ اسلام سے بچتا رہے اور لوگوں کو ان سے خبردار کرے، تاکہ شیطان انہیں راہ راست سے بھٹکا کر ان میں سے کسی چیز میں مبتلا نہ کر دے؛ کیونکہ بسا اوقات وہ ان میں مبتلا ہو جاتے ہیں اور انہیں احساس تک نہیں ہوتا، جیسا کہ اسلام کا دعویٰ کرنے والے بہت سے لوگوں میں یہ مشاہدہ کیا گیا ہے۔ سچائی یہ ہے کہ اللہ کی توفیق کے بغیر نہ برائیوں سے پھرنے کى طاقت ہے اور نہ ہی نیکیوں کے کرنے کى کوئی قوت۔

سوالات:

س1 : صحیح جواب کے نیچے لکیر کھینچیں:

- مسلمانوں کے خلاف مشرکین کی پشت پناہی اور مدد کرنا:

الف- مکروہ۔ ب- کفر۔ ج- جائز۔

- یہ اعتقاد رکھنا کہ بعض لوگ محمد ﷺ کی شریعت کی پابندی سے نکل سکتے ہیں:

الف- جائز۔ ب- حرام۔ ج- کفر۔

- جس نے اللہ تعالیٰ کے دین سے اعراض کیا، یعنی نہ اسے سیکھا اور نہ ہی اس پر عمل کیا، تو وہ :

ا- کافر ہے۔ ب- مشرک ہے۔ ج- اس پر کچھ نہیں ہے۔

س 2: اگر آپ اپنے ساتھی کو نمازیوں یا اہل تقویٰ اور نیک لوگوں کا مذاق اڑاتے ہوئے سنیں تو اس کے اس فعل کا کیا حکم ہے؟

س3: نواقضِ اسلام کا اجمالاً ذکر کریں۔

عقیدے کا مختصر تعارف

اس میں شامل ہے:

* رسول ﷺ کے سلسلے میں ایک مسلمان پر عائد واجبات۔

* رسول ﷺ کے صحابہ کے سلسلے میں ایک مسلمان پر عائد واجبات۔

* خلفائے راشدین رضی اللہ عنہم کے سلسلے میں ایک مسلمان پر عائد واجبات۔

* ہمارے نبی ﷺ کی ازواج مطہرات کے سلسلے میں ایک مسلمان پر عائد واجبات۔

* مسلم رہنماؤں کے سلسلے میں ایک مسلمان پر عائد واجبات۔

* سنت میں وارد صحیح احادیث پر ایمان لانا واجب ہے۔

* قبر کی نعمت اور اس کا عذاب۔

* قیامت کے دن کے کچھ حالات۔

* کسی اہل قبلہ کے جنتی یا جہنمی ہونے کا حکم نہ لگانا۔

اٹھارہواں سبق

اللہ کے نبی ﷺ کے تئیں ایک مسلمان پر عائد واجبات۔

اہل سنت والجماعت کے اصول میں سے ہے [25]: [25] اہلِ سنت و جماعت: یہ وہ لوگ ہیں جو نبیﷺ اور صحابۂ کرام رضی اللہ عنہم کی راہ پر قائم ہیں۔ انھیں نبی ﷺ کی سنت کو مضبوطی سے پکڑے رہنے اور اس کا اتباع کرنے کی وجہ سے 'اہلِ سنت' کہا گیا، جب کہ 'جماعت' اس لیے کہا گیا کیوں کہ وہ حق پر متفق رہے، دین کے معاملے میں افتراق کا شکار نہیں ہوئے اور ان باتوں کا اتباع کیا جن پر سلف صالحین کا اجماع رہا ہے۔

اللہ کے رسول ﷺ کے حقوق کی ادائیگی واجب ہے۔ آپ کے چند حقوق اس طرح ہيں :

1- اس بات پر ایمان کہ وہ اللہ کے برحق رسول ہیں اور ان کی رسالت تمام لوگوں کے لیے عام ہے۔

اللہ تعالیٰ نے فرمایا ہے : "آپ کہہ دیجیے کہ اے لوگو! میں تم سب کی طرف اس اللہ تعالیٰ کا بھیجا ہوا ہوں..." [سورہ اعراف : 158]۔

2- اس بات پر یقین رکھنا کہ آپ ﷺ رسولوں کے سردار و خاتم النبیین ہیں اور آپ کے بعد کوئی نبی نہیں آئے گا۔

اللہ تعالیٰ نے فرمایا ہے : "(لوگو) تمہارے مردوں میں سے کسی کے باپ محمد ﴿صلی اللہ علیہ وسلم﴾ نہیں ہيں، لیکن آپ اللہ تعالیٰ کے رسول ہیں اور تمام نبیوں کے سلسلے کی آخری کڑی ہيں۔" [سورہ احزاب: 40]۔

3- آپ سے محبت کرنا، آپ کے حکموں کی تعمیل کرنا اور آپ کی منع کی ہوئی چیزوں سے اجتناب کرنا۔

اس کی دلیل اللہ تعالیٰ کا یہ فرمان ہے: "...اور تمہیں جو کچھ رسول دے لے لو، اور جس سے روکے رک جاؤ..." [سورہ حشر: 7]۔

4۔ اس بات پر اعتقاد رکھنا کہ روز قیامت آپ ﷺ کی شفاعت کے بغیر لوگوں کے درمیان فیصلہ صادر نہیں کیا جائے گا، اور یہی وہ شفاعت عظمیٰ ہے جس سے اولو العزم رُسُل [26] معذرت کر لیں گے، یہاں تک کہ وہ شفاعت آپ ﷺ تک پہنچے گی۔ چنانچہ آپ ﷺ عرش کے نیچے سجدہ ریز ہوں گے اور شفاعت کی اجازت طلب کریں گے، تو رب جل وعلا آپ ﷺ سے فرمائے گا: "اپنا سر اٹھائیے، مانگیے، آپ کو دیا جائے گا۔ شفاعت کیجیے، آپ کی شفاعت قبول کی جائے گی"۔ [26] اولو العزم رسل یہ ہیں: حضرت نوح، حضرت ابراہیم، حضرت موسیٰ، حضرت عیسیٰ علیہم السلام اور حضرت محمّد ﷺ۔

سوالات:

س1: رسول اللہ محمد ﷺ کے بارے میں ایک مسلمان پر عائد واجبات کیا ہیں؟

س2 : رسول ﷺ کو کس کی طرف مبعوث کیا گیا تھا؟ دلیل ذکر کریں۔

س3: خاتم النبیین کا کیا مطلب ہے؟

سوال 4 : اللہ کے نبی ﷺ سے آپ کی محبت کی کیا علامت ہے؟

س5 : وہ کون سی سفارش ہے جس سے پیغمبرانِ اولوالعزم دستبردار ہو جائیں گے؟

انیسواں سبق

صحابہ کے تئیں ہمارے اوپر عائد واجبات

اہل سنت و الجماعت کے کچھ اصول یہ ہیں :

1- تمام صحابۂ کرام عادل (قابل اعتماد) ہیں۔

2- رسول اللہ ﷺ کے صحابہ سے محبت رکھنی چاہیے؛ کیونکہ ان سے محبت رکھنا دین و ایمان ہے اور ان سے بغض رکھنا کفر و نفاق ہے۔

3- ان کا نام آنے پر ان سے رضا مندى کا اظہار کرنا یعنی رضی اللہ عنہم کہنا اور ان کے لیے استغفار کرنا۔

4- یہ عقیدہ رکھنا کہ وہ اس امت کے سب سے افضل اور سب سے اچھے لوگ ہیں، جس کی گواہی اللہ کے رسول صلی اللہ علیہ و سلم نے دی ہے، جیسا کہ آپ علیہ الصلاۃ والسلام نے فرمایا ہے: "سب سے اچھے لوگ میرے زمانے کے لوگ ہیں"۔[27] آپ ﷺ نے انہیں سب و شتم کرنے اور ایذا پہنچانے سے منع فرمایا ہے۔ [27] اسے بخاری نے ’كتاب الشهادات‘ باب: لا يشهد على شهادة جور إذا أُشهد، حدیث نمبر (2652)، اور مسلم نے ’كتاب فضائل الصحابة‘ باب: فضل الصحابة ثم الذين يلونهم ثم الذين يلونهم، حدیث نمبر (2533) میں عبد اللہ بن مسعود رضی اللہ عنہ سے روایت کیا ہے۔

اللہ تعالیٰ مومنوں کی اپنے سے پہلے گزر جانے والے بھائیوں سے محبت کو بیان کرتے ہوئے فرماتا ہے: "(اور (ان کے لیے) جو ان کے بعد آئیں، جو کہیں گے کہ اے ہمارے پروردگار! ہمیں بخش دے اور ہمارے ان بھائیوں کو بھی، جو ہم سے پہلے ایمان ﻻچکے ہیں اور ایمان داروں کی طرف سے ہمارے دل میں کینہ (اور دشمنی) نہ ڈال۔ اے ہمارے رب! بے شک تو شفقت ومہربانی کرنے واﻻ ہے۔" [سورہ حشر: 10]۔

رسول اللہ ﷺ نے مزید فرمایا ہے : ’’میرے صحابہ میں سے کسی کو گالی نہ دو، اس لیے کہ اگر تم میں سے کوئی احد (پہاڑ) کے برابر بھی سونا خرچ کر دے، تو بھی ان کے ایک مد یا آدھا مد کو نہیں پہنچ سکتا۔‘‘[28] [28] صحیح بخاری، ’كتاب فضائل أصحاب النبي ﷺ‘ باب قول النبي ﷺ: «لَوْ كُنْتُ مُتَّخِذًا خَلِيلًا»، حدیث نمبر (3673)، اور صحیح مسلم، ’كتاب فضائل الصحابة‘ باب تحريم سب الصحابة رضي الله عنهم، حدیث نمبر (2541)۔ مذکورہ الفاظ انہی کے ہیں۔

5- دین کو سمجھنے اور اس پر عمل کرنے میں ان کے طریقے کی پیروی کرنا۔

سوالات:

س1: رسول اللہ ﷺ کے صحابہ کے بارے میں ایک مسلمان کی کیا ذمہ داری ہے؟

سوال 2 : درج ذیل میں صحیح جواب کا انتخاب کریں :

- اصحابِ رسول ﷺ سے محبت۔

أ- اہل سنت و جماعت کے اصولوں میں سے ایک اصول ہے۔

ب- ایک مستحب کام ہے۔

ج- ایک مکروہ کام ہے۔

- مسلمان یہ عقیدہ رکھتا ہے کہ صحابہ:

أ- فقط سب سے افضل عرب ہیں۔

ب- صرف اہلِ مکہ میں سب سے افضل ہيں۔

ج- اس امت کے افضل ترین لوگ ہيں۔

سوال 3 : اگر آپ سنیں کہ کوئی رسول اللہ ﷺ کے کسی صحابی کو گالی دے رہا ہے، تو اس کے اس فعل کا کیا حکم ہے؟ اور آپ اسے کیا نصیحت کریں گے؟

س4 : صحابۂ کرام رضی اللہ عنہم کو بُرا بھلا کہنے کی ممانعت پر کتاب و سنت سے دلیل پیش کریں۔

بیسواں سبق

خلفائے راشدین رضی اللہ عنہم کے سلسلے میں ہماری ذمے داریاں

اہل سنت وال جماعت کے کچھ اصول اس طرح ہيں:

خلفائے راشدین وہ چار صحابہ ہیں جو رسول اللہ ﷺ کی وفات کے بعد مسند خلافت پر فائز ہوئے۔ یعنی ابوبکر صدیق، ابو حفص فاروق عمر بن خطاب، عثمان بن عفان اور علی بن ابی طالب رضی اللہ عنہم اجمعین۔ امت پر ان کے بہت سے حقوق ہیں۔ مثلا :

1- ان سے محبت اور ان سے راضی ہونا۔

2- افضلیت اور خلافت کے اعتبار سے ان کی ترتیب وہی ہے، جو سلف نے بیان کیا ہے۔ یعنی ابو بکر، پھر عمر، پھر عثمان، پھر علی رضی اللہ عنہم اجمعین کو مقدم رکھنا۔

ابوبکر رضی اللہ عنہ کو مقدم اس لیے رکھا گیا ہے کہ رسول اللہ ﷺ نے نماز کی امامت کے لیے تمام صحابہ میں سے انہی کا انتخاب کیا تھا۔ ساتھ ہی آپ نے فرمایا تھا : "اگر میں کسی کو خلیل بناتا تو ابو بکر کو خلیل بناتا، لیکن وہ میرا بھائی اور ساتھی ہے۔"[29] [29] اسے بخاری نے کتاب فضائل أصحاب النبی ﷺ، باب: قول النبی ﷺ: «لو کنت متخذا خلیلا» حدیث نمبر (3656) کے تحت روایت کیا ہے۔

عمر رضی اللہ عنہ کو مقدم ابوبکر رضی اللہ عنہ کے انہیں مقدم رکھنے کی وجہ سے رکھا گیا ہے۔ عثمان رضی اللہ عنہ کو مقدم اہل شوریٰ کے انہیں مقدم رکھنے کی وجہ سے رکھا گیا ہے۔ جب کہ علی رضی اللہ عنہ کو مقدم ان کی فضیلت اور ان کے زمانے کے لوگوں کے ان پر اجماع کی وجہ سے رکھا گیا ہے۔

3- آپ ﷺ کے طریقے کے ساتھ ان کے طریقے کو بھی اختیار کرنا، جیساکہ رسول اللہ ﷺ نے اپنے اس فرمان میں اس کا حکم دیا ہے : "تم میری سنت کو اور ہدایت یافتہ خلفائے راشدین کے طریقے کو لازم پکڑنا، اسے داڑھوں سے مضبوطی سے پکڑ لینا"۔ [30] [30] سنن ابو داود، کتاب السنۃ، حدیث نمبر: (4607)، جامع الترمذي، کتاب العلم، باب : ما جاء في الأخذ بِالسُّنَّة واجتِناب البدع، حدیث نمبر : (2676)۔ امام ابو عیسیٰ نے فرمایا ہے: "یہ حدیث حسن صحیح ہے"۔ یہاں حدیث کے نقل کیے گئے الفاظ سنن ترمذی کے ہيں۔ سنن ابن ماجہ، المقدمۃ، باب : اتِّباع سنَّة الخلفاء الرّاشدين المهديين، حدیث نمبر : (42)، مسند احمد (4/ 126-127)۔ النَّواجِذ: یہ ناجِذ کی جمع ہے۔ یعنی وہ داڑھیں ہیں جو ناب کے بعد ہوتی ہیں۔ یہ دراصل کسی چیز کو انتہائی مضبوطی سے تھام لینے کی ایک مثال ہے۔

سوالات:

سوال 1: خلفائے راشدین کے نام بتائیں؟ اور افضلیت کے اعتبار سے ان کی ترتیب کیا ہے؟

س2 : عبارت مکمل کریں:

آپ ﷺ نے فرمایا ہے : "تم میری سنت کو اور ہدایت یافتہ ............................... کے طریقے کو لازم پکڑنا .................................."۔

س3- خلفائے راشدین کے تئیں ہمارا فرض کیا ہے؟

سوال 4: ابو بکر صحابہ رضی اللہ عنہم میں سب سے افضل کیوں تھے؟

س 5: خلفائے راشدین رضی اللہ عنہم کے طریقے کو اختیار کرنے کا کیا حکم ہے؟ دلیل کے ساتھ بیان کریں۔

س6: اگر آپ کسی شخص کو خلفائے راشدین رضی اللہ عنہم میں سے کسی ایک کو گالی دیتے ہوئے سنیں، تو اس کے اس فعل کا کیا حکم ہے؟ اور آپ اسے کیا نصیحت کریں گے؟

اکیسواں سبق

نبی ﷺ کی ازواج مطہرات کے سلسلے میں ہماری ذمے داریاں

اہل سنت والجماعت کے کچھ اصول اس طرح ہیں :

ہمارے رسول ﷺ کی بیویاں تمام مومنوں کی مائیں ہیں [31]۔ ارشاد باری تعالی ہے : "...اور پیغمبر کی بیویاں مومنوں کی مائیں ہیں..." [سورہ احزاب: 6]۔ [31] ابن قیم جوزیہ رحمہ اللہ زاد المعاد (1/ 114) میں فرماتے ہیں: "اس بات میں کوئی اختلاف نہیں کہ آپ ﷺ کی وفات کے وقت آپ کی نو بیویاں با حیات تھیں، یا آپ ﷺ ان میں سے آٹھ کے لیے باری مقرر فرماتے تھے: عائشہ بنت صدیق، حفصہ بنت عمر، زینب بنت جحش، ام سلمہ ہند بنت ابو امیہ، صفیہ بنت حیی بن اخطب، ام حبیبہ رملہ بنت ابو سفیان، میمونہ بنت حارث، سودہ بنت زمعہ اور جویریہ بنت حارث مصطلقیہ رضی اللہ عنہن اجمعین۔"

ان کے امت پر کچھ حقوق واجب ہیں۔ مثلا :

1- ان سے محبت کرنا اور ان سے راضی ہونا۔

2- یہ عقیدہ رکھنا کہ وہ ہر طرح کی برائی سے پاک اور مبرا ہیں، جیسا کہ اللہ تعالیٰ کا ارشاد ہے: "اللہ تعالیٰ یہی چاہتا ہے کہ اے نبی کی گھر والیو! تم سے وه (ہر قسم کی) گندگی کو دور کردے اور تمہیں خوب پاک کردے۔" [سورہ احزاب: 33]۔

ان میں سب سے افضل خدیجہ بنت خویلد اور عائشہ بنت صدیق رضی اللہ عنہن اجمعین ہیں۔

خدیجہ بنت خویلد رسول اللہ ﷺ کی پہلی بیوی تھیں اور آپ ﷺ کی رسالت پر سب سے پہلے ایمان وہی لائی تھیں۔ انھوں نے آپ ﷺ کی مدد کی، آپ ﷺ کا ساتھ دیا اور ابراہیم کے علاوہ آپ ﷺ کی تمام اولاد ان ہی کے بطن سے پیدا ہوئی۔ بس ابراہیم ماریہ قبطیہ سے تھے۔

جہاں تک عائشہ صدیقہ بنت ابی بکر صدیق رضی اللہ عنہما کی بات ہے، تو وہ سات آسمانوں کے اوپر سے بری قرار دی گئی ہیں اور رسول اللہ ﷺ پر ان کے علاوہ کسی اور عورت کے لحاف میں وحی نازل نہیں ہوئی ہے۔ وہ سب سے زیادہ دین کا علم اور سمجھ رکھنے والے صحابۂ کرام میں سے تھیں۔ صحابۂ کرام رضی اللہ عنہم ان سے شریعت کے امور اور احکام دریافت کرتے تھے۔

سوالات:

س1 : رسول صلی اللہ علیہ وسلم کی ازواج مطہرات کے بارے میں ہماری کیا ذمے داری ہے؟

سوال 2 : رسول ﷺ کی بیویوں کو گالی دینے یا انھیں کسی بھی قسم کی اذیت پہنچانے والے کا کیا حکم ہے؟

س 3: خدیجہ بنت خویلد رضی اللہ عنہا کی بعض صفات بیان کریں۔

س4 : عائشہ بنت صدیق رضی اللہ عنہا وعن ابیہا کی بعض صفات بیان کریں۔

س 5 : اگر آپ کسی شخص کو نبی ﷺ کی کسی بیوی کو گالی دیتے ہوئے سنیں، تو اس کے اس فعل کا کیا حکم ہے؟ آپ اسے کیا نصیحت کریں گے؟ اس کے متعلق آپ کا کیا موقف ہوگا؟

بائیسواں سبق

مسلم ائمہ کے سلسلے میں ہماری ذمے داری

اہل سنت و الجماعت کے کچھ اصول اس طرح ہيں :

1- مسلم حکمرانوں کی بات سننا اور ماننا ضروری ہے، خواہ وہ نیک ہوں یا گناہ گار، جب تک کہ وہ اللہ کی معصیت کا حکم نہ دیں، کیوں کہ خالق کی معصیت میں کسی مخلوق کی اطاعت نہیں کی جائے گی۔

اللہ تعالیٰ نے فرمایا ہے : "اے ایمان والو! فرماں برداری کرو اللہ تعالیٰ کی اور فرماں برداری کرو رسول (صلی اللہ علیہ وسلم) کی اور تم میں سے اختیار والوں کی۔" [سورہ نساء : 59]۔

جب کہ رسول اللہ ﷺ نے فرمایا ہے : ”مسلم بندہ پر (حکمران کی بات) سننا اور ماننا لازم ہے خواہ وہ بات اسے پسند ہو یا نا پسند۔ چنانچہ اگر اسے معصیت کا حکم دیا جائے تو پھر نہ سنے اور نہ ہی اطاعت کرے۔“[32] [32] اس حدیث کو بخاری نے كتاب الاحكام، باب: السَّمع والطّاعة للامام ما لم تكن معصية ميں، حدیث نمبر: (7144) کے تحت روایت کیا ہے، جب کہ مسلم نے اسے كتاب الامارة، باب: وجوب طاعة الامراء في غير معصية وتحريمها في المعصية میں، حدیث نمبر: (1839) کے تحت روایت کیا ہے۔ مذکورہ الفاظ مسلم کے روایت کردہ ہیں۔ حدیث حضرت ابن عمر رضی اللہ عنہما سے مروی ہے۔

2- ان کے ساتھ حج، جمعہ اور اللہ کے راستے میں جہاد قائم کرنا۔

3- ان کے خلاف بغاوت نہ کرنا، کیونکہ اس سے مسلمانوں کے درمیان تفرقہ اور فتنے پیدا ہوتے ہیں۔

سوالات:

س1: مسلمانوں پر اپنے حاکم کے تئیں کیا فرض ہے؟

س2 : مسلم حکمران کے خلاف بغاوت کرنا کیوں جائز نہیں ہے، اگرچہ وہ فاجر ہی کیوں نہ ہو؟

س3 : اگر ولی الامر کسی گناہ کا حکم دے تو کیا تب بھی اس کی اطاعت کرنا جائز ہے؟ دلیل بھی ذکر کریں۔

تئیسواں سبق

سنت میں وارد صحیح احادیث پر ایمان لانا واجب ہے۔

اہل سنت والجماعت کے کچھ اصول اس طرح ہیں :

سنت میں وارد رسول ﷺ سے منقول تمام صحیح احادیث پر ایمان لانا ضروری ہے؛ جیسے اسراء اور معراج، قیامت کی نشانیاں، قبر کی نعمت اور اس کے عذاب اور قیامت کے احوال کے بارے میں وارد احادیث۔

اسراء و معراج :

اسراء: رسول ﷺ کا رات میں مکہ سے بیت المقدِس کی طرف براق پر جانا۔

معراج : نبی ﷺ کا جبریل علیہ الصلاۃ والسلام کی معیت میں ساتویں آسمان تک جانا، پھر اسی رات آپ ﷺ کا مکہ واپس آنا۔

اس کی تفصیل انس بن مالک رضی اللہ عنہ کی حدیث میں وارد ہوئی ہے، جس میں ہے کہ: "رسول اللہ ﷺ کے پاس براق لایا گیا تو آپﷺ اس پر سوار ہوگئے۔ جب بیت المقدِس پہنچے تو مسجد میں داخل ہوئے اور اس میں دو رکعت نماز ادا کی۔ پھر آپﷺ کو آسمان کی طرف لے جایا گیا۔ پس جبریل نے دروازہ کھلوایا تو دونوں کے لیے دروازہ کھول دیا گیا۔ رسول اللہ ﷺ اور جبریل ساتوں آسمانوں پر چڑھے، رسول اللہ ﷺ سدرۃ المنتہیٰ تک پہنچے اور آپﷺ پر پانچ نمازیں فرض کی گئیں، پھر اسی رات آپﷺ واپس لوٹ آئے۔" [33] [33] صحیح بخاری: كتاب بدء الوحي، باب: ذكر الملائكة صلوات الله عليهم، حدیث نمبر: (3207)، صحیح مسلم: كتاب الايمان، باب: الاسراء برسول الله ﷺ الى السموات، وفرض الصلوات، حدیث نمبر: (162)، ایک طویل حدیث کا یہ ایک ٹکڑا ہے۔ براق: ایک سفید اور لمبا جانور، جو گدھے سے اونچا اور خچر سے چھوٹا ہوتا ہے، وہ اپنا کھر وہاں رکھتا ہے جہاں تک اس کی نگاہ پہنچتی ہے۔ سدرۃ المنتہیٰ: ساتویں آسمان پر لگا ہوا ایک عظیم درخت ہے۔ اگلوں اور پچھلوں کا علم یہیں آ کر ختم ہو جاتا ہے اور اس سے آگے نہیں بڑھتا۔

* اسراء و معراج آپ ﷺ کے معجزات اور آپ کی نبوت کی صداقت کے دلائل میں سے ہیں۔

سوالات:

س1 : درج ذیل بیانوں کا جواب (صحیح) یا (غلط) کے ذریعہ دیں اور غلطی کی اصلاح کریں:

- معراج : یہ رسول اللہ ﷺ کا مکہ سے بیت المقدس تک کا سفر ہے۔

- اہلِ سنت والجماعت کا ایک اصول یہ ہے کہ اللہ کے رسول ﷺ سے مروی تمام صحیح احادیث پر ایمان لانا ضروری ہے۔

- اسراء : نبی کریم ﷺ کا جبریل علیہ الصلاۃ والسلام کی معیت میں ساتویں آسمان تک جانا۔

س2 : اسراء و معراج کے کیا معنی و مطلب ہیں؟

س3 : اسراء و معراج کا واقعہ رسول ﷺ کی نبوت کی دلیل ہے۔ اس کی وضاحت کریں۔

س4 : نماز کب فرض کی گئی اور یہ کس بات پر دلالت کرتا ہے؟

چوبیسواں سبق

قبر کی نعمت اور اس کا عذاب

* فتنۂ قبر پر ایمان : یعنی جب میت کو اس کی قبر میں دفن کر دیا جائے تو اس سے اس کے رب، اس کے دین اور اس کے نبی ﷺ کے متعلق سوال کیا جانا۔

* قبر کی نعمتوں اور اس کے عذاب پر ایمان۔ قبر یا تو جنت کی کیاریوں میں سے ایک کیاری ہے یا جہنم کے گڑھوں میں سے ایک گڑھا۔

* قبر کے احوال کی تفصیل انس رضی اللہ عنہ سے مروی ایک حدیث میں وارد ہوئی ہے، جس میں ہے کہ رسول اللہ ﷺ نے فرمایا ہے : "بلا شبہ آدمی جب اپنی قبر میں رکھا جاتا ہے اور جنازہ میں شریک ہونے والے لوگ اس سے رخصت ہوتے ہیں تو ابھی وہ ان کے جوتوں کی آواز سن رہا ہوتا ہے کہ دو فرشتے (منکر نکیر) اس کے پاس آتے ہیں اور اسے بٹھا کر پوچھتے ہیں کہ اس شخص یعنی محمد ﷺ کے بارے میں تو کیا اعتقاد رکھتا تھا؟ مومن تو یہ کہتا ہے کہ میں گواہی دیتا ہوں کہ آپ ﷺ اللہ کے بندے اور اس کے رسول ہیں۔ اس جواب پر اس سے کہا جاتا ہے کہ تو یہ دیکھ اپنا جہنم کا ٹھکانا لیکن اللہ تعالیٰ نے اس کے بدلہ میں تمہارے لیے جنت میں ٹھکانا دے دیا ہے۔ اس وقت اسے جہنم اور جنت دونوں ٹھکانے دکھائے جائیں گے۔ اورجب منافق وکافر سے کہا جاتا ہے کہ اس شخص کے بارے میں تو کیا کہتا تھا تو وہ جواب دے گا کہ مجھے کچھ معلوم نہیں، میں بھی وہی کہتا تھا جو دوسرے لوگ کہتے تھے۔ پھر اس سے کہا جائے گا نہ تونے جاننے کی کوشش کی اور نہ سمجھنے والوں کی رائے پر چلا۔ پھر اسے لوہے کے گرزوں سے اتنی زور سے مارا جاتا ہے کہ وہ چیخ پڑتا ہے اور اس کی چیخ کو جن اور انسانوں کے سوا اس کے آس پاس کی تمام مخلوق سنتى ہے"۔ [35] [34] دونوں فرشتے منکر اور نکیر ہیں، جیسا کہ ابو ہریرہ رضی اللہ عنہ کی حدیث میں ہے۔ وہ بیان کرتے ہیں کہ رسول اللہ ﷺ نے فرمایا ہے: ”جب میت کو دفنایا جاتا ہے، تو اس کے پاس سیاہ رنگ کے، نیلی آنکھوں والے دو فرشتے آتے ہیں۔ ان میں سے ایک کو منکر اور دوسرے کو نکیر کہا جاتا ہے۔“ اسے ترمذی نے کتاب الجنائز، باب: ما جاء في عذاب القبر میں حدیث نمبر (71) کے تحت روایت کیا ہے۔ ابو عیسیٰ (ترمذی) نے کہا ہے : ”یہ حدیث حسن غریب ہے۔“ [35] صحیح بخاری، کتاب الجنائز، باب: ما جاء في عذاب القبر، حدیث نمبر: (1374)۔ الفاظ صحیح بخاری کے ہیں۔ صحیح مسلم، کتاب الجنة ونعيمها، باب: عرض مقعد الميت من الجنة والنار عليه، حدیث نمبر: (2870)۔

لہذا ہر مسلمان کے لیے قبر کے عذاب اور اس کی نعمتوں پر ایمان لانا اور موت کے بعد کے لیے تیاری کرنا ضروری ہے، جب وہ اپنی قبر میں تنہا رہ جائے گا، اس کے اہلِ خانہ اور دوست احباب اسے چھوڑ چکے ہوں گے، اور اس کے نیک اعمال کے سوا اسے کوئی چیز نفع نہیں دے گی۔

سوالات:

س1 : قبر کی آزمائش سے کیا مراد ہے؟

س2 : جب انسان کو اس کی قبر میں رکھا جاتا ہے تو کس چیز کے ذریعے اس کا امتحان لیا جاتا ہے؟

س3 : مومن سے جب اس کی قبر میں سوال ہو گا تو اس کا جواب کیا ہو گا؟

س 4 : کافر یا منافق سے جب اس کی قبر میں سوال ہو گا تو اس کا جواب کیا ہو گا؟

س5 : عذابِ قبر سے نجات پانے کے لیے مومن کو کیا کرنا چاہیے؟

س6 : اللہ تعالی نے فرمایا ہے : "ایمان والوں کو اللہ تعالیٰ پکی بات کے ساتھ مضبوط رکھتا ہے، دنیا کی زندگی میں بھی اور آخرت میں بھی۔ ہاں، ناانصاف لوگوں کو اللہ بہکا دیتا ہے اور اللہ جو چاہے کر گزرے۔" [سورہ ابراھیم: 27]۔ اس آیت کے چند فوائد اور عبرتیں بتائیں۔

پچیسواں سبق

قیامت کے دن کے کچھ حالات

قیامت قائم ہونے سے پہلے بہت سی نشانیاں ظاہر ہوں گی۔ ان میں سے ایک نشانی کا ذکر حذیفہ بن اسید الغفاری رضی اللہ عنہ سے مروی حدیث میں ہے، وہ فرماتے ہیں کہ ہم ایک دوسرے سے کسی بات پر چرچا کر رہے تھے کہ نبی ﷺ ہمارے پاس آئے اور فرمایا : ”تم سب کس بات کے بارے میں گفتگو کررہے ہو؟“ ان سب نے کہا : ہم سب قیامت کا ذکر کررہے تھے۔ تو آپ نے فرمایا: ”وہ -یعنی قیامت- ہر گز قائم نہیں ہوگی، یہاں تک کہ تم اس سے پہلے دس نشانیاں نہ دیکھ لو“۔ پھر آپ نے ذکر کیا : ”دھوئیں کا، دجال کا، دابہ (چوپایہ) کا، آفتاب کے مغرب سے نکلنے کا، عیسٰی ابن مریم علیہ السلام کے اترنے کا، یاجوج وماجوج (کے نکلنے) کا اور تین (مقامات میں) زمین دھنسنے کا: ایک مشرق میں، دوسرا مغرب میں اور تیسرا جزیرۂ عرب میں اور ان سب کے بعد ایک آگ پیدا ہو گی جو یمن سے نکلے گی اور لوگوں کو محشر کی طرف ہانک لے جائے گی“۔[36] "[36] اسے مسلم نے کتاب الفتن و اشراط الساعۃ، باب: فی الآیات التی تکون قبل الساعۃ میں حدیث نمبر (2901) کے تحت روایت کیا ہے۔ ”دخان“ کے بارے میں کہا گیا ہے کہ: یہ ایسا دھواں ہے جو کافروں کی سانسیں جکڑ لے گا اور مومن کو اس سے زکام جیسی کیفیت لاحق ہوگی اور یہ قیامت قائم ہونے کے قریب ظاہر ہوگا۔ ”دجال“: یہ ایک جھوٹا اور کافر شخص ہے جو آخری زمانے میں نکلے گا اور ربوبیت کا دعویٰ کرے گا۔ اس کے ہاتھوں بہت سے خوارق (عادت امور) ظاہر ہوں گے۔ چنانچہ بہت سے لوگ اس کے فریب میں آکر اس کی پیروی کرلیں گے۔ وہ ساری زمین کا چکر لگائے گا۔ پھر عیسیٰ ابن مریم علیہ الصلوۃ والسلام اسے ہلاک کر دیں گے۔ ”دابّۃ“: یہ ایک جانور ہے جسے اللہ تعالیٰ قیامت قائم ہونے کے قریب نکالے گا۔ اللہ تعالیٰ نے اس کے بارے میں فرمایا ہے: (وَإِذَا وَقَعَ ٱلۡقَوۡلُ عَلَيۡهِمۡ أَخۡرَجۡنَا لَهُمۡ دَآبَّةٗ مِّنَ ٱلۡأَرۡضِ تُكَلِّمُهُمۡ أَنَّ ٱلنَّاسَ كَانُواْ بِـَٔايَٰتِنَا لَا يُوقِنُونَ۔) (اور جب ان پر بات پوری ہو جائے گی تو ہم ان کے لیے زمین سے ایک جانور نکالیں گے جو ان سے کلام کرے گا کہ لوگ ہماری آیتوں پر یقین نہیں کرتے تھے۔) [النمل:82]۔

پس جب قیامت قائم ہوگی تو اللہ تعالیٰ تمام مُردوں، یعنی اگلے اور پچھلے سب لوگوں کو دوبارہ اٹھائے گا۔

پھر اللہ تعالیٰ بندوں کو جمع کرے گا اور ان کے درمیان فیصلہ فرمائے گا، جیسا کہ عبداللہ بن اُنیس رضی اللہ عنہ کی حدیث میں آیا ہے کہ انہوں نے نبی ﷺ کو فرماتے ہوئے سنا : ”قیامت کے دن لوگ برہنہ، غیرمختون اور بہم اٹھائے جائیں گے“۔ ہم نے پوچھا: ”بُهْم“ کا کیا مطلب ہے؟ آپ نے فرمایا: ”ان کے پاس کچھ نہیں ہوگا“۔ پھر ان کو ایسی آواز میں پکارے گا جسے دور والا بالکل اسی طرح سنے گا جیسے قریب والا سنتا ہے: ”میں بادشاہ ہوں، میں بدلہ دینے والا ہوں، کسی جہنمی کے لیے یہ مناسب نہیں ہے کہ وہ جہنم میں جائے اور اس کا کسی جنتی پر حق ہو یہاں تک کہ میں اس سے اس کا بدلہ دلادوں، اور کسی جنتی کے لیے یہ مناسب نہیں ہے کہ وہ جنت میں داخل ہو اور اس کا کسی جہنمی پر حق ہو یہاں تک کہ میں اس سے اس کا بدلہ دلادوں، یہاں تک کہ تھپڑ کا بدلہ بھی۔“ راوی کہتے ہیں: ہم نے پوچھا: یہ کیسے ہوگا جب کہ ہم اللہ عزوجل کے پاس برہنہ، غیرمختون اور بہم آئیں گے؟ آپ نے فرمایا: ”نیکی اور بدی کے ذریعہ“[37]۔ [37] اسے امام احمد (3/495) اور حاکم نے المستدرک : کتاب التفسير، باب: تفسير سورة حم المؤمن (2/438) میں روایت کیا ہے۔ غُرلاً: جن کا ختنہ نہ ہوا ہو۔ الديان: قاضی، حاکم اور لوگوں کو ان کے اعمال کا بدلہ دینے والا۔ أقصه: میں اسے قصاص اور اپنا حق لینے کا اختیار دوں گا۔ اللطمة: چہرے پر ضرب۔

بندوں کے درمیان قصاص اس طرح ہوگا کہ مظلوم کو ظالم کی نیکیاں دے دی جائیں گی، اور اگر اس کے پاس نیکیاں نہ ہوں گی تو مظلوم کی بُرائیاں ظالم کے کھاتے میں ڈال دی جائیں گی۔

سوالات:

س1 : خالی جگہوں کو پر کریں:

رسول اللہ ﷺ نے فرمایا ہے : ’’وہ - یعنی قیامت - ہر گز قائم نہیں ہو گی، یہاں تک کہ اس کے پہلے تم سب دس نشانیاں نہ دیکھ لو، پھر آپ نے ذکر کیا: دھوئیں کا، دجال کا اور ....................................... ..................................... .................................. .......................................... ...................................... ................................ ‘‘۔

س2 : بیان کریں کہ قیامت کے دن لوگوں کو کس طرح جمع کیا جائے گا؟

س3 : اللہ مُردوں کو کب اٹھائے گا؟

سوال 4 : جس شخص پر کسی کا کوئی حق یا قرض ہو، وہ جنت میں کب داخل ہوگا؟

س5 : جس شخص پر کسی کا کوئی حق یا قرض باقی ہو، وہ کب جہنم میں داخل ہوگا؟

س 6 : رسول ﷺ نے دجال سے کیوں خبردار کیا؟

سولھواں سبق

کسی اہل قبلہ کے جنتی یا جہنمی ہونے کا حکم نہ لگانا۔

اہلِ سنت والجماعت کے کچھ اصول یہ ہیں :

* کسی اہل قبلہ کے جنتی یا جہنمی ہونے کا قطعی فیصلہ نہ کرنا، سوائے ان لوگوں کے جن کے بارے میں نبی ﷺ نے اس کی گواہی دی ہو؛ بلکہ وہ نیکوکار کے لیے ثواب کی امید رکھتے ہیں اور گناہ گار کے لیے عذاب سے ڈرتے ہیں۔

* رسول اللہ ﷺ نے جس کے اہلِ جنّت ہونے کی گواہی دی ہے، ہم یقین رکھتے ہیں کہ وہ ضرور جنّت میں داخل ہوگا؛ کیوں کہ رسول اللہ ﷺ اپنی خواہش سے نہیں بولتے، اور جن کے لیے رسول اللہ ﷺ نے اس کی گواہی دی ہے ان میں عشرہ مبشّرہ شامل ہیں، جو درج ذیل حضرات ہیں: ابو بکر، عمر، عثمان، علی، طلحہ بن عبد اللہ، زبیر بن عوّام، سعد بن ابی وقاص، سعید بن زید بن عمرو بن نُفیل، عبد الرحمٰن بن عوف اور ابو عبیدہ عامر بن الجرّاح رضی اللہ عنہم۔

* رسول اللہ ﷺ نے ان کے علاوہ دیگر لوگوں کے لیے بھی جنت کی گواہی دی ہے، جیسے حسن اور حسین رضی اللہ عنہما۔ چنانچہ آپ ﷺ نے فرمایا ہے : "حسن اور حسین جنت کے جوانوں کے سردار ہیں۔"[38]۔ اور عکاشہ بن محصن جن کے بارے میں نبی ﷺ نے بتایا ہے کہ وہ ان ستر ہزار لوگوں میں سے ہوں گے جو بغیر حساب و عذاب کے جنت میں داخل ہوں گے [39]۔ [38] اس حدیث کو ترمذی نے کتاب المناقب، باب: مناقب الحسن والحسین میں، حدیث نمبر (3768) کے تحت روایت کیا ہے اور ابو عیسیٰ ترمذی نے اسے ’حسن صحیح‘ کہا ہے۔ [39] صحیح بخاری، کتاب الرقاق، باب: يدخل الجنة سبعون ألفًا بغير حساب، حدیث نمبر: 6541، اور صحیح مسلم، کتاب الایمان، باب: الدَّليل على دخول طَوائف مِن المسلمين الجنَّة بغير حسابٍ ولا عَذاب، حدیث نمبر: 216۔

* وہ کافر جو اسلام کے بارے میں سننے کے بعد بھی کفر کی حالت میں مر جائے، اس میں کوئی شک نہیں کہ وہ جہنمی ہے۔

سوالات:

س1 : کیا کسی مسلمان کے لیے جائز ہے کہ وہ کسی کے جنتی یا جہنمی ہونے کا حکم لگائے، جب کہ رسول اللہ صلی اللہ علیہ وسلم نے اس کے لیے اس بات کی گواہی نہ دی ہو؟

س 2 : کیا کسی کافر کے اسلام کے بارے میں سننے کے بعد اس کے جہنمی ہونے کا حکم لگانا جائز ہے، جب کہ وہ ابھی مرا نہ ہو؟

س3 : اگر اللہ کے رسول ﷺ کسی کے حق میں گواہی دیں کہ وہ جنتی ہے، تو اس کے بارے میں ہماری کیا ذمہ داری ہے؟

س4: جنت کی بشارت پانے والے دس صحابہ کرام کے نام ذکر کریں۔

عنوان: نصاب تعلیم، علم فقہ، مرحلہ (ششم)

مختصر تعارف: یہ علمی مواد مملکت سعودی عرب میں طلبہ کے لیے مقرر کردہ تعلیمی نصاب کی تہذیب اور خلاصہ شمار کیا جاتا ہے اور یہ کئی درجات میں منقسم ہے۔ اس مواد کے ضمن میں علم فقہ کے مطالعہ سے متعلق حصہ بھی شامل ہے، جو بارہ (12) درجات میں منقسم ہے۔ چھٹے درجے میں شامل اہم ترین موضوعات اور مسائل درج ذیل ہیں:

نماز جمعہ، عیدین، کسوف اور استسقا سے متعلق احکام کا بیان

فرض زکوۃ کے احکام، اس کے وجوب کی شرائط، جن مالوں میں زکوۃ واجب ہے اور جو اصناف (مستحقین) اس کے مستحق ہیں، ان کا بیان۔

روزے کی تعریف، اس کا حکم، اس کی شرطیں، مفسدات، آداب اور دیگر امور کا بیان۔

حج اور عمرہ کے طریقہ، مواقیت کی اقسام، احرام کے محظورات اور ان کے فدیہ نیز اس طرح کے دیگر امور کا بیان۔

چھٹا درجہ

پہلا سبق [1]

[1] استیطان کا معنی ہے: کسی جگہ مستقل طور پر سکونت اختیار کرنا۔ یہ جمعہ کے واجب اور صحیح ہونے کے لیے شرط ہے۔ چنانچہ مسافر اس سے خارج ہو جاتا ہے۔ اسی طرح وہ خانہ بدوش بھی جو خیموں اور بالوں سے بنے گھروں میں رہتے ہیں، اور بارش اور گھاس والے مقامات کی تلاش میں منتقل ہوتے رہتے ہیں۔ فقہ کی کتابوں میں ان کے تفصیلی احکام موجود ہیں۔

نمازِ جمعہ

اس کا حکم:

نماز جمعہ ہر عاقل، بالغ اور مسلمان مرد پر فرض ہے جو مقیم ہو۔

لہذا چھوٹے بچے، پاگل، عورت اور مسافر پر واجب نہیں ہے۔

اس کے واجب ہونے کی دلیل اللہ تعالی کا یہ فرمان ہے : "اے وه لوگو جو ایمان ﻻئے ہو! جمعہ کے دن نماز کی اذان دی جائے تو تم اللہ کے ذکر کی طرف دوڑ پڑو اور خرید وفروخت چھوڑ دو ۔ یہ تمہارے حق میں بہت ہی بہتر ہے اگر تم جانتے ہو۔" [سورہ جمعہ: 9]۔

نماز جمعہ کے صحیح ہونے کی شرائط:

نماز جمعہ کے صحیح ہونے کے لیے مندرجہ ذیل چار شرائط ہیں :

1- وقت کا ہونا، مثلا ظہر کا وقت سورج ڈھلنے (یعنی سورج کے بیچ آسمان سے مغرب کی جانب مائل ہونے) سے شروع ہوتا ہے، اور اس وقت ختم ہوتا ہے جب ہر چیز کا سایہ اس کے برابر ہو جائے۔

2- جماعت کے ساتھ ادا کرنا۔ اکیلے شخص کی جمعہ صحیح نہیں ہوگی۔

3- استیطان: یعنی کسی جگہ مستقل طور پر رہائش اختیار کرنا۔

4- اس سے پہلے دو خطبے ہوں۔

نماز جمعہ کا طریقہ :

نماز جمعہ فجر کی نماز کی طرح دو رکعت ہے، جس میں امام جہری تلاوت کرتا ہے۔ اس کی پہلی رکعت میں - سورہ فاتحہ کے بعد - سورہ اعلی اور دوسری رکعت میں سورہ غاشیہ پڑھنا سنت ہے۔

جمعہ کے مستحب اعمال:

ایک مسلمان کے لیے جمعہ کے دن چند امور مستحب ہیں، مثلا :

1- غسل کرنا، صاف ستھرا ہونا، خوشبو لگانا اور نماز کے لیے نکلتے وقت سب سے اچھے دستیاب کپڑے پہننا۔

2- نماز کے لیے جلدی جانا اور امام کے قریب ہونا۔

3- سورۂ کہف کی تلاوت کرنا۔

4- بکثرت دعا کرنا اور نبی ﷺ پر درود بھیجنا۔

5- جمعہ کی نماز کے بعد دو رکعت یا چار رکعت نماز پڑھنا۔

جمعہ کے دن کی ممنوع چیزیں:

- خطبہ کے دوران بات کرنا حرام ہے؛ کیونکہ خطبہ کو خاموشی کے ساتھ سننا واجب ہے۔ اس کی دلیل نبی ﷺ کا یہ فرمان ہے: ”جب جمعہ کے دن امام خطبہ دے رہا ہو اور تم اپنے پاس بیٹھے ہوئے آدمی سے کہو کہ "خاموش ہو جاؤ" تو (ایسا کہہ کر) تم نے خود ایک لغو حرکت کی“۔ [2] [2] صحیح بخاری: كتاب الجمعة، باب: الانصات يَوْم الجمُعَة والامام يخطُب، حدیث نمبر: (934)۔ ’لَغَوْت‘ کے معنی ہیں: یعنی تم نے لغو بات کہی۔ اور لغو سے مراد گناہ ہے۔

- مسلمان کے لیے لوگوں کی گردنوں کو پھلانگ کر آگے جانا مکروہ ہے، لیکن اگر اسے کوئی خالی جگہ نظر آئے تو کوئی حرج نہیں ہے۔

نماز جمعہ کا خطبہ :

جمعہ کی نماز کے صحیح ہونے کے لیے شرط ہے کہ امام نماز سے پہلے دو خطبے دے اور ہر ایک درج ذیل امور پر مشتمل ہو:

1- اللہ عز وجل کی حمد و ثنا۔

2- قرآن کریم کی چند آیتیں تلاوت کرنا۔

3- وعظ و نصیحت کرنا۔

4- نبی ﷺ پر درود بھیجنا۔

5- اللہ عزوجل کا تقویٰ اختیار کرنے کی وصیت کرنا۔

خطیب کے لیے جن امور کا کرنا مسنون ہے:

1- خطیب کے لیے سنت ہے کہ وہ منبر پر یا کسی اونچی جگہ پر خطبہ دے۔

2- مسجد میں داخل ہوتے اور منبر پر چڑھتے وقت لوگوں کو سلام کرے۔

3- دونوں خطبوں کے درمیان تھوڑی دیر بیٹھے۔

4- مسلمانوں کے لیے دعا کرے۔

5- دونوں خطبوں کو مختصر رکھے۔

سوالات:

س1: نماز جمعہ کا حکم کیا ہے؟ اور یہ کن لوگوں پر واجب ہے؟ اور اس کے وجوب کی دلیل کیا ہے؟

س2 : آنے والے جملوں کو مکمل کریں:

الف- نمازِ جمعہ کا وقت ................................... سے شروع ہوتا ہے اور اس وقت ختم ہوتا ہے جب ...........................................

ب- جمعہ کی نماز کی پہلی رکعت میں سورہ ........................................... اور دوسری رکعت میں سورہ ........................................... پڑھنا سنت ہے۔

س3 : گروپ (الف) میں دی گئی ہر عبارت کے سامنے گروپ (ب) میں دی گئی مناسب عبارت کا نمبر لکھیں:

مجموعہ (الف)

مجموعہ (ب)

1- جمعہ کی صحت کی شرطوں میں سے ہے

خطبہ کے دوران بات کرنا

2- ایک مسلمان کے لیے جمعہ کے دن مستحب ہے

خطبہ کسی اونچی جگہ پر دیا جائے

3- مسلمان کے لیے مکروہ ہے

اللہ عزوجل کی حمد

4- مسلمان پر حرام ہے

لوگوں کی گردنیں پھلانگنا

5- خطبہ کی سنتوں میں سے ہے