“ពិតប្រាកដណាស់ ជំនឿនឹងរេចរឹលនៅក្នុងទ្រូងរបស់អ្នកម្នាក់ ដូចជាសម្លៀកបំពាក់ដែលរេចរឹលនោះដែរ។ ហេតុនេះ ចូរពួកអ្នកសុំពីអល់ឡោះសូមឲ្យសេចក្តីជំនឿ(អ៊ីម៉ាន)ថ្មីឡើងវិញនៅក្នុងដួងចិត្តរបស់ពួកអ្នក”។

ណាពី ﷺ លោកបានប្រាប់ថា ជាការពិតណាស់ សេចក្តីជំនឿដែលនៅក្នុងដួងចិត្តជនមូស្លីមនឹងក្លាយជារេចរឹល និងទន់ខ្សោយ ប្រៀបដូចជាសម្លៀកបំពាក់ថ្មីដែលរេចរឹលនៅពេលប្រើប្រាស់យូរឆ្នាំដូច្នោះដែរ។ នោះគឺដោយសារតែការធ្វេសប្រហែសក្នុងការគោរពសក្ការៈចំពោះអល់ឡោះ ឬការប្រព្រឹត្តអំពើល្មើស និងការធ្លាក់ទៅក្នុងចំណង់តណ្ហា។ ហេតុនេះ ណាពី ﷺ លោកបានណែនាំពួកយើងឲ្យធ្វើការបួងសួងទៅកាន់អល់ឡោះជាម្ចាស់សុំឲ្យទ្រង់ជួយឲ្យសេចក្តីជំនឿរបស់ពួកយើងថ្មីឡើងវិញជានិច្ចតាមរយៈការអនុវត្តនូវប្រការដែលជាកាតព្វកិច្ច បង្កើននូវការរំលឹកចំពោះអល់ឡោះ និងការសុំការអភ័យទោសអំពីទ្រង់។